အခန်း (၅၇-၅၈)

အခန်း (၅၇) အစွန်းကျဆုံး ကျင့်ကြံခြင်း နည်းလမ်း၊ ကျင့်ကြံခြင်းနှင့် အကြီးအကဲစွန်း ရင်ကွဲနာကျ ကာ ငိုကြွေးခဲ့ရသည်။

နင်းဖန် နောက်ဆုံး စာလုံးကို ရေးဆွဲပြီးသွားသောအခါ...

သူသည် ခေါင်းကို အနည်းငယ် ညိတ်လိုက်ပြီး ဆေးညွှန်းကို ကျောက်စိမ်းသေတ္တာထဲသို့ ထည့်ကာ စင်ပေါ် ရှိ အထင်ရှားဆုံး နေရာတွင် တင်လိုက်လေသည်။

"နောက်သုံးနှစ်နေရင် ကျရောက်လာမယ့် ကြီးမားတဲ့ ဘေးအန္တရာယ်ကြီးက ဘယ်လိုပုံစံ ရှိမလဲ မသိ ဘူး...။"

"အကယ်၍ အဲဒါက သက်ရှိတွေကိုပဲ ပစ်မှတ်ထားမယ်ဆိုရင် ဒီကမ္ဘာကြီးက အသက်ရှင်ကျန်ရစ်နိုင်ပြီး နောက်ထပ် နှစ်ထောင်ပေါင်းများစွာ ကြာတဲ့အထိ နောင်လာနောက်သားတွေအတွက် တောက်ပနေဦး မှာပါ...။"

နင်းဖန်သည် သူ၏ နှလုံးသားထဲတွင် တိုးညင်းစွာ သက်ပြင်းချလိုက်လေသည်။

ကြီးမားသော ဘေးအန္တရာယ်က နီးကပ်လာနေခဲ့ပြီဖြစ်ရာ ဤကမ္ဘာကြီးကို မည်သည့် ကံကြမ္မာက စောင့်ကြိုနေမည်ကို မည်သူက သိနိုင်ပါမည်နည်း။

သူသည် သူ့ကိုယ်သူပင် အနိုင်နိုင် ကာကွယ်ရမည် ဖြစ်ပြီး ဆေးညွှန်းကို ချန်ရစ်ခဲ့ခြင်းမှာ ရုတ်တရက် ပေါ်လာသော စိတ်ကူးသက်သက်သာ ဖြစ်လေသည်။

အနည်းဆုံးတော့ ၎င်းက ထိုက်ရီအစစ်အမှန်ဂိုဏ်း ၏ တပည့်တစ်ယောက်အနေဖြင့် ဤ စိတ်ကူးယဉ် ကမ္ဘာ သို့ သူ၏ ကူးပြောင်းလာခြင်း ကို အဓိပ္ပာယ်ရှိစေခဲ့သည်။

ယခု အရာအားလုံး ပြီးစီးသွားပြီဖြစ်ရာ သူ အချိန်မဆွဲတော့ချေ။ ဆေးဥယျာဉ်ထဲမှ အရည်အသွေး ကောင်းမွန်သော ဝိညာဉ်အပင် အနည်းငယ်ကို ခူးယူပြီးနောက် သားရဲတစ်သောင်း တောင်ထိပ် ထမင်း စားဆောင်ဆီသို့ တိုက်ရိုက် ဦးတည်သွားခဲ့လေသည်။

ယနေ့အတွက် ကျင့်ကြံခြင်း အစားအစာကို ပြင်ဆင်ရန် အချိန်ကျရောက်ပြီ ဖြစ်သည်...

တစ်ချိန်တည်းမှာပင်။

ကောင်းကင်ယံရှိ ဧရာမ လျှို့ဝှက်နယ်မြေ အတွင်း၌။

နင်းဖန် ဆေးညွှန်းကို ရေးသားပြီး ဆေးဖက်ဝင်အပင်တစ်ရာတောင်ထိပ် တွင် ချန်ရစ်ခဲ့သည်ကို ဂိုဏ်း တစ်ခုလုံး မြင်တွေ့လိုက်ရသောအခါ လူတိုင်းသည် ရိုသေလေးစားစွာ မတ်တတ်ရပ်လိုက်ကြလေသည်။

အထူးသဖြင့် စွန်းချီယွမ် သည် တုန်ယင်နေပြီး သူ၏ မျက်လုံးများမှ ပူနွေးသော မျက်ရည်များ ထိန်းမရ သိမ်းမရ စီးကျလာခဲ့လေသည်။

အခြားအကြီးအကဲများ အားလုံးသည်လည်း ထိုနည်းတူ ခံစားခဲ့ကြရလေသည်။

သူတို့သည် နင်းဖန်၏ လုပ်ရပ်ကြောင့် လုံးဝ ယုံကြည်လေးစားသွားကြလေသည်။

သူ့တွင် ဤကဲ့သို့သော ရည်ရွယ်ချက်များ ရှိနေသေးသည်ကို မည်သူကမျှ မထင်မှတ်ထားခဲ့ချေ။

ဆေးညွှန်းကို ကိုယ်ပိုင်အဖြစ် မသိမ်းထားဘဲ နောင်လာနောက်သားများကို ကူညီရန် ၎င်းကို ထုတ်ပြန်ခဲ့ လေသည်။

မည်မျှ ကြီးမားသော ကိုယ်ကျိုးစွန့်မှုမျိုးနည်း။

နင်းဖန် ဆေးညွှန်းကို စတင် ရေးဆွဲစဉ်က သူတို့ တစ်ချက် မြင်တွေ့ခဲ့ရသော်လည်း၊ ၎င်းမှာ ကြမ်းတမ်းသော မိတ္တူမျှသာ ဖြစ်လေသည်။

ပါဝင်ပစ္စည်းများကို ထည့်ရမည့် အစီအစဉ် သို့မဟုတ် တိကျသော သန့်စင်သည့် အချိန်များ ကဲ့သို့သော အရေးကြီးသည့် အသေးစိတ် အချက်အလက်များစွာ ပျောက်ဆုံးနေခဲ့သည်။

လက်ရှိ ဗားရှင်းက ကွက်လပ်တိုင်းကို ဖြည့်ဆည်းပေးခဲ့သည်ပင်။

၎င်းသည် သူတို့ တစ်ခါမှ မသိခဲ့ဖူးသော လျှို့ဝှက်ချက်များကိုပင် ဖော်ပြနေခဲ့သည်မဟုတ်ပါလား။

ဥပမာအားဖြင့် ဆေးညွှန်းသည် ပုံသဏ္ဌာန်မဲ့ အမြစ် ကို ဓာတ်ကူပစ္စည်းအဖြစ် မလိုအပ်ချေ။ သက်တမ်း ၊ အလေးချိန်နှင့် အစီအစဉ်တို့ကို တင်းကျပ်စွာ လိုက်နာသရွေ့ ဆေးရည်သည် ကိုးဆယ်ရာခိုင်နှုန်း အင်အားမြှင့်တင်ရေး အကျိုးသက်ရောက်မှုကို ပေးစွမ်းနိုင်သေးသည်ပင်။

ပုံသဏ္ဌာန်မဲ့ အမြစ် ကို ပေါင်းထည့်ခြင်းသည် မူလအစ ကမ္ဘာဦး ဆေးရည် ၏ ဖုံးကွယ်ထားသော မူကွဲ တစ်ခုသာ ဖြစ်ပေသည်။

အကယ်၍ နင်းဖန်သာ ၎င်းကို မရေးသားခဲ့ပါက ထိုကဲ့သို့ နက်နဲသော အသိပညာကို သူတို့ ဘယ်သောအခါမျှ ရှာဖွေတွေ့ရှိနိုင်မည် မဟုတ်ချေ။

ထိုအခိုက်အတန့်တွင် အကြီးအကဲ အများအပြား၏ နှလုံးသားများ အနိုင်ယူခံလိုက်ရသည်။

"နင်းဖန်ရဲ့ ကိုယ်ကျင့်တရားက ငါတို့ဂိုဏ်းရဲ့ တပည့်ခေါင်းဆောင် နေရာနဲ့ တကယ်ကို ထိုက်တန်ပါ တယ်...။"

"ငါတို့ အရင်က သူ့ကို အထင်လွဲခဲ့တာ...။"

"တကယ်ပါပဲ...၊ သူ့ရဲ့ လက်မှတ်ထဲကို ပံ့ပိုးမှုအမှတ်တွေ တိတ်တဆိတ် ဖြည့်နေတာကို ငါတို့ မြင်တုန်း က သူက လောဘကြီးပြီး အရှက်မရှိဘူးလို့ ငါတို့ ထင်ခဲ့တာ...။ အခုတော့ သူက အရင်းအမြစ်တွေကို အကောင်းဆုံး အသုံးချနေတာ ဆိုတာ ရှင်းလင်းသွားပါပြီ...။"

"မူလအစ ကမ္ဘာဦး ဆေးရည်၊ ဘယ်လောက်တောင် မာနကြီးတဲ့ နာမည်လဲ ဒါပေမယ့် သူ့ရဲ့ အကျိုး သက်ရောက်မှုတွေက အဲဒီနာမည်နဲ့ ထိုက်တန်ပါတယ်လေ...။"

"ဒီအချိန်ကစပြီး ကမ္ဘာပေါ်မှာ အကောင်းဆုံး သွေးကြောများ နွေးထွေးစေခြင်း နည်းစနစ်က ငါတို့ရဲ့ ထိုက်ရီအစစ်အမှန်ဂိုဏ်း ကပဲ ဖြစ်လာတော့မယ်...။"

တောင်ထိပ်အရှင်သခင်အဆင့် အကြီးအကဲ အချို့သည် သူတို့အချင်းချင်း ဆွေးနွေးနေကြသည်။

နင်းဖန်ကို သူတို့ ကြည့်လိုက်သောအခါ သူတို့၏ မျက်လုံးများတွင် စစ်မှန်သော အသိအမှတ်ပြုမှုနှင့် ဂုဏ်ယူမှုများ ပါဝင်နေခဲ့လေတော့သည်။

စွန်းချီယွမ် သည် အထူးသဖြင့် အားသစ်လောင်းလာသကဲ့သို့ ခံစားလိုက်ရသည်။

အဘယ်ကြောင့်ဆိုသော် နင်းဖန်သည် ဆေးညွှန်းကို ချန်ရစ်ခဲ့စဉ်က ၎င်းသည် ဆေးဖက်ဝင်အပင် တစ်ရာတောင်ထိပ် ၏ ဆေးဥယျာဉ်မှ မြစ်ဖျားခံကြောင်း ရှင်းလင်းစွာ ဖော်ပြခဲ့သောကြောင့်ပင်။

ထိုအချက်က ဘာကို ဆိုလိုသနည်း…။

၎င်းက နင်းဖန်၏ နှလုံးသားထဲတွင် ဆေးဥယျာဉ် ဘက်မှ ရပ်တည်နေကြောင်း ပြသနေသည်ပင်။

သူသည် ဥယျာဉ်အပေါ် သံယောဇဉ် ရှိနေသည်ပင်။

နတ်ဘုရား ဆေးညွှန်းဖြစ်သော မူလအစ ကမ္ဘာဦး ဆေးရည်သည် သူတို့၏ ဥယျာဉ်မှ လာကြောင်း သတင်းပြန့်သွားသည်နှင့်တပြိုင်နက် ကမ္ဘာကြီးသည် တုန်လှုပ်သွားပေလိမ့်မည်။

၎င်း၏ သခင်အနေဖြင့် စွန်းချီယွမ် သည်လည်း သဘာဝကျစွာပင် ထိုဂုဏ်ကျက်သရေကို ဝေမျှခံစား ရမည်သာဖြစ်လေသည်။

"အံ့သြစရာပဲ...၊ နင်းဖန်က ကမ္ဘာ့အကောင်းဆုံး ဆေးညွှန်း ဆိုတဲ့ ဂုဏ်ပုဒ်ကို ငါတို့ရဲ့ ဥယျာဉ်ကို ပေးအပ် လိုက်တာပဲ...။"

စွန်းချီယွမ် တွေးလေလေ ပိုပျော်လာလေလေ ဖြစ်သည်။ သူ၏ စိတ်လှုပ်ရှားမှုကြောင့် ရှောင်ချာ ၏ လက်ကို ဆုပ်ကိုင်လိုက်လေ၏။

နောက်ဆုံးလူမှာလည်း အပြုံးများဖြင့် ပြည့်နှက်နေခဲ့လေသည်။

မည်သို့ပင်ဆိုစေ ကမ္ပည်းစာတွင် ဆေးဖက်ဝင်အပင်တစ်ရာတောင်ထိပ် ဟူသော စာလုံးများက ဆေးဥယျာဉ်၏ ရှေ့တွင် ရှိနေသည်ပင်။

စွန်းချီယွမ် သည် ဒု-တောင်ထိပ်အရှင်သခင် သာဖြစ်ပြီး ရှောင်ချာ မှာ စစ်မှန်သော တောင်ထိပ် အရှင်သခင် ဖြစ်လေသည်။

ထိုဂုဏ်ပြုမှုသည် သူတို့ နှစ်ဦးစလုံးနှင့် တန်းတူ သက်ဆိုင်ပေသည်။

"ဒါပေမယ့် နင်းဖန်က နောက်ထပ် ဘယ်လို ကျင့်ကြံမလဲ...။ သူ သားရဲတစ်သောင်း တောင်ထိပ် ကို ပြန်သွားတာ ငါ အခုလေးတင် မြင်လိုက်တယ်...။"

အကြီးအကဲများ ဝမ်းသာနေစဉ် တစ်ယောက်က ရုတ်တရက် ဇဝေဇဝါဖြစ်စွာဖြင့် ပြောလိုက်သည်။

ထိုစကားများကြောင့် အခြားသူများ အားလုံးလည်း ဇဝေဇဝါ ဖြစ်သွားကြလေသည်။

ကျုံးတင်း တစ်ယောက်တည်းသာ အတွေးတစ်ခု ရိုက်ခတ်သွားသကဲ့သို့ ရုတ်တရက် ဖြူရော် သွားခဲ့လေသည်။

"မဟုတ်ဘူး...။"

"ငါ့ရဲ့ အသားတွေ...။"

သူ၏ မျက်နှာ ဖြူရော်သွားပြီး အောက်သို့ ငုံ့ကြည့်လိုက်လေသည်။

ထင်သည့်အတိုင်းပင် နင်းဖန်သည် ပျံသန်းသည့်လှေကို ထမင်းစားဆောင်တွင် ဆင်းသက်ကာ သိုလှောင်ရုံဆီသို့ တည့်တည့် သွားနေသည်ကို သူ မြင်တွေ့လိုက်ရလေသည်။

သိုလှောင်ရုံတွင် ယွင်မုန့် ငါးကြင်း ကဲ့သို့သော ထိပ်တန်း ရတနာများ မရှိတော့သော်လည်း ပဉ္စမအဆင့် နှင့် ဆဋ္ဌမအဆင့် နတ်ဆိုးသားရဲ အသားများ အမြောက်အမြား ကျန်ရှိနေသေးသည်။

ထို့ကြောင့် ကျုံးတင်း သည် သူ၏ ရည်ရွယ်ချက်ကို ချက်ချင်း နားလည်သွားပြီး နာကျင်စွာ ညည်းတွား လိုက်သည်ပင်။

"နင်းဖန်က မီးဖိုချောင်ထဲကို အနှစ်တစ်သိန်း သက်တမ်းရှိတဲ့ ကောင်းကင်နဲ့မြေကြီး ရတနာ သုံးပင်ကို ယူသွားတယ်...။ သူက ငါ့ရဲ့ အဆင့်မြင့် နတ်ဆိုးသားရဲ အသားနဲ့ တွဲပြီး အကောင်းဆုံး ဟင်းလျာ တစ်အိုး ချက်ပြုတ်ပြီး သူ့ရဲ့ ရုပ်ခန္ဓာကိုယ်သန့်စင်ခြင်း အကျိုးသက်ရောက်မှုတွေကို မြှင့်တင်ဖို့ ရည်ရွယ်ထား တာပဲ...။"

သူ၏ အသံမှာ တုန်ယင်နေပြီး ထိုစကားများကို ပြောလိုက်ရခြင်းကပင် သူ၏ အင်အား အားလုံးကို ကုန်ခန်းသွားစေသကဲ့သို့ ဖြစ်နေခဲ့သည်။

အခြားသူများသည် ကြားသော်လည်း သိပ်မတွေးကြချေ။

ဝမ်းသာနေဆဲဖြစ်သော စွန်းချီယွမ် သည် ကျုံးတင်း ၏ ဗိုက်ကြီးကို ပုတ်ကာ ရယ်မောလိုက်သည်။

"ဂျူနီယာညီလေးကျုံး...၊ ပိုပြီး ရက်ရောပါကွာ...၊ နင်းဖန်က ငါတို့ရဲ့ တပည့်ခေါင်းဆောင် ပဲ ပြီးတော့ ဂိုဏ်းအတွက် ဒီလောက် ကြီးမားတဲ့ ပံ့ပိုးကူညီမှုကို ချန်ရစ်ခဲ့တာပဲလေ...၊ သူ့ကို နည်းနည်းပါးပါး စားသောက်ခွင့်ပြုတာက ဘာများ ဆုံးရှုံးသွားမှာမို့လို့လဲ...။"

"မင်း ပြောတာက လွယ်လိုက်တာ...၊ ဒီကောင်လေး ဘယ်လောက်တောင် စားနိုင်လဲဆိုတာ မင်း မမြင်ဖူးလို့ပါ...။"

ကျုံးတင်း က နှာခေါင်းရှုံ့လိုက်ပြီး သူ၏ ဗိုက်ကို လှမ်းမမီစေရန် နောက်သို့ တစ်လှမ်းဆုတ်ကာ မျက်လုံးများကို မှေးလိုက်သည်။

"ပြီးတော့ မင်းက ဘေးကင်းတယ်လို့ ထင်နေတာလား...။"

"ဘာအဓိပ္ပာယ်လဲ..." စွန်းချီယွမ် အေးခဲသွားသည်။

ကျုံးတင်း က ရယ်မောကာ ရှင်းပြလိုက်သည်။

"နင်းဖန်က သက်တမ်းရင့် ကောင်းကင်နဲ့မြေကြီး ရတနာ တွေကို အဆင့်မြင့် နတ်ဆိုးသားရဲ အသားနဲ့ ပေါင်းစပ်ပြီး အစာချေဖျက်ခြင်း ရုပ်ခန္ဓာကိုယ် သန့်စင်ခြင်း နည်းလမ်း ကို သုံးပြီး သူ့ရဲ့ ရုပ်ခန္ဓာကိုယ် ကို ဖန်တီးဖို့ ရည်ရွယ်ထားတာ ထင်ရှားတယ်လေ...။"

"ဒါပေမယ့် မမေ့နဲ့နော်...၊ သူက အကန့်အသတ်မဲ့ တာအိုကျမ်းစာ ဆိုတဲ့ အံ့ဖွယ် နည်းစနစ်ကို ကျင့်ကြံ နေတာ...။ သူက တစ်နေ့ကို အနည်းဆုံး သုံးနပ်စားဖို့ လိုအပ်တယ်...။"

"မင်းရဲ့ ဆေးဥယျာဉ်ထဲက ကောင်းကင်နဲ့မြေကြီး ရတနာ ဘယ်လောက်များက သူ့ရဲ့ ခံတွင်းမြိန်မှုကို ကျေနပ်စေနိုင်မလဲ မသိဘူးနော် အကြီးအကဲစွန်း...။"

ရှင်းပြချက်ကို ကြားပြီးနောက်။

စွန်းချီယွမ် ၏ စိတ်ထဲတွင် ပေါက်ကွဲသွားပြီး သူ မှင်တက်သွားခဲ့လေသည်။

အကယ်၍ နင်းဖန်သာ သူ၏ ခန္ဓာကိုယ်ကို ဤနည်းဖြင့် သန့်စင်မည်ဆိုပါက ဖြုန်းတီးမှုမှာ အကန့် အသတ်ကို ကျော်လွန်သွားပေလိမ့်မည်။

ကောင်းကင်နဲ့မြေကြီး ရတနာ များ၊ အဆင့်မြင့် နတ်ဆိုးသားရဲ အသားများနှင့် ချက်ပြုတ်ကာ တစ်နေ့ သုံးနပ် စားသုံးခြင်းကို ထိုက်ရီအစစ်အမှန်ဂိုဏ်း ပင်လျှင် ကုန်ကျစရိတ်ကို ခံနိုင်ရည်ရှိရန် ရုန်းကန်ရ ပေလိမ့်မည်။

အဆင့်မြင့် နတ်ဆိုးသားရဲ အသားက တစ်ကဏ္ဍဖြစ်သော်လည်း သက်တမ်းရင့် ကောင်းကင်နဲ့မြေကြီး ရတနာ များမှာ အမှန်တကယ် ရှားပါးလှပေသည်။

ဂိုဏ်းသည် ထိုဆေးဖက်ဝင် အပင်များကို မျိုးဆက်ပေါင်းများစွာသော ဆေးဥယျာဉ် အကြီးအကဲများ၏ ခက်ခဲသော ကြိုးပမ်းအားထုတ်မှုများမှတစ်ဆင့် စုဆောင်းခဲ့ခြင်း ဖြစ်လေသည်။

အချို့အပင်များကို လွန်ခဲ့သော နှစ်တစ်သန်းက စိုက်ပျိုးခဲ့ပြီး ယနေ့တိုင်အောင် ပြုစုပျိုးထောင် ခဲ့ကြလေသည်။

သို့တိုင် နင်းဖန်က ၎င်းတို့ကို နတ်ဆိုးသားရဲ အသားနှင့် ပြုတ်ရန် သာမန် အရံဟင်းလျာများအဖြစ် ပေါ့ပေါ့ပါးပါး ခူးယူသွားခဲ့သည်...။ ထိုသို့လုပ်သည်ကို ကြည့်ပြီး မည်သူက သည်းခံနိုင်မည်နည်း။

ထိုအခိုက်အတန့်တွင် စွန်းချီယွမ် သည် တစ်စုံတစ်ဦးက သူ၏ နှလုံးသားကို ဆုပ်ကိုင်ထားသကဲ့သို့ ခံစားလိုက်ရပြီး နာကျင်မှုမှာ သည်းမခံနိုင်လောက်အောင် ဖြစ်နေခဲ့သည်ပင်။

"ငါ... ငါတို့ ဘာလုပ်ကြမလဲ...၊ အား...။"

သူသည် သူ၏ ရင်ဘတ်ကို လက်တစ်ဖက်ဖြင့် ဆုပ်ကိုင်ထားပြီး ငိုကြွေးလုမတတ် ဖြစ်နေခဲ့သည်။

သူ၏ တုံ့ပြန်မှုမှာ ကျုံးတင်း ထက်ပင် ပိုမို ပြဇာတ်ဆန်နေခဲ့သည်။

အခြားအကြီးအကဲများသည် နောက်ဆုံးတွင် ဘာတွေဖြစ်နေလဲဆိုတာကို သဘောပေါက်သွားကြပြီး ကိုယ်ချင်းစာစွာဖြင့် စုပ်သပ်လိုက်ကြလေသည်။

အချို့ကမူ သူတို့၏ ကိုယ်ပိုင် တောင်ထိပ်များသည် ရုပ်ခန္ဓာကိုယ်သန့်စင်ခြင်း နှင့် သိပ်မပတ်သက်ဘဲ ထိခိုက်မှု မရှိနိုင်ကြောင်းကို တိတ်တဆိတ် ဝမ်းသာနေခဲ့ကြလေသည်။

ဥပမာအားဖြင့် ထျန်းကုန်းတောင်ထိပ် မှ လီချန်မင် သည် သက်ပြင်းရှည်ကြီးတစ်ခု ချလိုက်လေသည်။

မှော်လက်နက်ဖန်တီးခြင်း သည် မည်သူမဆို လုပ်နိုင်သောအရာ မဟုတ်ချေ။

၎င်းသည် ကျွမ်းကျင်မှု လိုအပ်သည်...၊ တူထုသည့် အင်အားနှင့် အချိန်ကိုက်မှုတို့ကို ညတွင်းချင်း သင်ယူ၍ မရနိုင်ချေ။

နင်းဖန်သည် သူ၏ ပစ္စည်းများကို ဖျက်ဆီးရန် ထျန်းကုန်းတောင်ထိပ် သို့ သွားမည့် လမ်းမရှိချေ။

သို့တိုင် ဂျူနီယာညီလေးများဖြစ်သော ကျုံးတင်း နှင့် စွန်းချီယွမ် တို့မှာ အမှန်တကယ်ပင် သနားစရာ ကောင်းလှသည်။

သူတို့ နှစ်ပေါင်းများစွာ စုဆောင်းလာခဲ့သော အရင်းအမြစ်များကို နင်းဖန်က တစ်ချက်တည်းဖြင့် ရှင်းလင်းသွားသည်ကို သူတို့ မြင်တွေ့ရဖွယ် ရှိနေသည်။

အခန်း (၅၈) မသေမျိုး ဟင်းလျာများကို စားသုံးခြင်း၊ မသေမျိုး အရက်များကို သောက်သုံးခြင်းနှင့် သူတော်စင်မိန်းမပျို၏ နန်းတော်တွင် ညအိပ်ခြင်း။

"ဒီအသားက ကောင်းတယ်...၊ ဒီည ဒါကို စားမယ်...။"

သားရဲတစ်သောင်း တောင်ထိပ်တွင် နင်းဖန်သည် ထမင်းစားဆောင်၏ သိုလှောင်ရုံမှ ပျော်ရွှင်စွာ ထွက်လာခဲ့ပြီး မှေးမှိန်သော အပြာရောင် အလင်းတန်းများ တောက်ပနေသည့် နတ်ဆိုးသားရဲ အသား သုံးတုံးကို သယ်ဆောင်လာခဲ့လေေသည်။

ဤသည်မှာ ဆဋ္ဌမအဆင့် နတ်ဆိုးသားရဲ၊ ရွှမ်မင် ကြံ့ ၏ ခါးသား ဖြလေသည်။ ၎င်းသည် ခန္ဓာကိုယ် တစ်ခုလုံး၏ အနှစ်သာရကို စုစည်းထားပြီး အသား၏ အမျှင်များကြားတွင် လျှပ်စီးကြောင်းများ ခပ်ရေးရေး တောက်ပနေကာ ရုပ်ခန္ဓာကိုယ်သန့်စင်ခြင်း အတွက် အလွန် သင့်တော်ပေသည်။

သို့သော် ဤအသား တစ်ခုတည်းကို အသုံးပြုခြင်းက နင်းဖန်၏ ကျင့်ကြံခြင်းကို ထိန်းသိမ်းရန် လုံလောက်မည် မဟုတ်ချေ။

ထို့ကြောင့် သူသည် ၎င်းနှင့်အတူ ရောစပ် ပြင်ဆင်ရန် ဆေးဖက်ဝင်အပင်တစ်ရာတောင်ထိပ် မှ သူ သေချာ စွာ ရွေးချယ်ထားသော ကောင်းကင်နဲ့မြေကြီး ရတနာ များလည်း လိုအပ်ပေသည်။

သူ ယူဆောင်လာသော ကျောက်စိမ်းသေတ္တာထဲမှ ယခုလေးတင် ခူးထားသော အနှစ်တစ်သိန်း သက်တမ်းရှိ နှလုံးကိုးခု နှင်းကြာပန်း တစ်ပွင့်ကို သူ ထုတ်ယူလိုက်လေသည်။

ဤကြာပန်းကို ဆေးဥယျာဉ် အကြီးအကဲက ရေခဲဓာတ် ဝင်္ကပါတစ်ခုတွင် စိုက်ပျိုးထားခဲ့ပြီး နေ့စဉ် ဂရုတစိုက် ပြုစုစောင့်ရှောက်ထားခဲ့ခြင်း ဖြစ်လေသည်။

သို့သော် နင်းဖန်သည် ယခုအချိန်တွင် ကျင့်ကြံရန် အလျင်စလို ဖြစ်နေသဖြင့် ထိုအရာများ အားလုံးကို ဂရုမစိုက်ဘဲ တိုက်ရိုက် ခူးယူခဲ့လေသည်။

မည်သို့ပင်ဆိုစေ ဤအရာများသည် ဂိုဏ်းက စွန့်ပစ်ထားခဲ့သော အရာများဖြစ်ပြီး ကမ္ဘာကြီးသည် ကြီးမားသော ဘေးအန္တရာယ်တစ်ခုနှင့် ရင်ဆိုင်ရတော့မည် ဖြစ်ပေသည်။

ရတနာက မည်မျှပင် ကောင်းနေပါစေ အချိန်တန်လျှင် အရာအားလုံးက ဘာမှမဟုတ်သောအရာအဖြစ် ပြောင်းလဲသွားနိုင်ပေသည်။

၎င်းက သူ့ကို အကျိုးပြုပြီး သူ၏ ကျင့်ကြံခြင်းမှာ အထောက်အကူတစ်ခု ဖြစ်လာခွင့်ပေးတာက ပိုကောင်းပေသည်။

မည်သည့် စိတ်ပိုင်းဆိုင်ရာ ဖိအားမျှ မရှိဘဲ နင်းဖန်သည် နှင်းကြာပန်းကို နောက်မှ အသုံးပြုရန် စားပွဲ ပေါ်တွင် တင်လိုက်လေသည်။

မီးဖိုပေါ်တွင် အနှစ်တစ်ထောင် အေးစက်သော သံ ဖြင့် သွန်းလုပ်ထားသော အိုးကြီးတစ်လုံးသည် မြေကြီး အူတိုင် မီးတောက် ဖြင့် လောင်ကျွမ်းနေပြီ ဖြစ်သည်။

သူ၏ လက်ဝါးစောင်းတစ်ချက် ရိုက်ခတ်မှုနှင့်အတူ ကြံ့ ခါးသားသည် အိုးထဲသို့ တိကျစွာ ကျဆင်းသွား လေ၏။ မြင့်မားသော အပူချိန်က အသားထဲရှိ မိုးကြိုး စွမ်းအားကို ချက်ချင်းပင် အစပျိုးလိုက်ပြီး ရွှေရောင်၊ အပြာရောင် လျှပ်စစ် မီးပွားများ တဖျစ်ဖျစ် မြည်ကာ ပေါက်ကွဲထွက်လာခဲ့လေသည်။

တစ်ချိန်တည်းမှာပင် နှလုံးကိုးခု နှင်းကြာပန်း ကိုလည်း အတွင်းသို့ ပစ်ထည့်လိုက်လေသည်။

ကြာပန်းဖတ်များသည် အသားနှင့် ထိတွေ့သည်နှင့် အရည်ပျော်သွားပြီး အတုံးများကို ရစ်ပတ်ထား သော ဖောက်ထွင်းမြင်ရသည့် ရေခဲပုံဆောင်ခဲများအဖြစ် ချက်ချင်း ပြောင်းလဲသွားသည်။ မိုးကြိုးမီး နှင့် ရေခဲမြူများ ရောယှက်ကာ အိုးကြီးအတွင်း လှိုင်းထနေခဲ့လေသည်။

ကြည့်ရုံဖြင့်ပင် ဤအိုးထဲရှိ ဟင်းလျာသည် အလွန် ထူးခြားကြောင်း ခံစားနိုင်ပြီ ဖြစ်သည်။

သို့သော် ၎င်းမှာ အားလုံး မဟုတ်သေးချေ။

နင်းဖန်သည် အချိန်ကိုက် တွက်ချက်ကာ သွေးကဲ့သို့ နီရဲနေသော မြေကမ္ဘာ မီးတောက် နဂါးဂျင်ဆင်း နှစ်ခုကို ပစ်ထည့်လိုက်လေသည်။

ဤဂျင်ဆင်းများသည်လည်း အနှစ်တစ်သိန်း သက်တမ်းရှိပြီး ကျောက်ကပ်ကို အာဟာရဖြစ်စေကာ ခန္ဓာကိုယ်ကို သန်မာစေသော အကျိုးသက်ရောက်မှုများ ရှိသည့် မီးဓာတ် ကောင်းကင်နဲ့မြေကြီး ရတနာ များ ဖြစ်ကြလေသည်။

အိုးထဲသို့ ဝင်ရောက်သွားသည်နှင့် ဂျင်ဆင်း အမြစ်များသည် သက်ရှိများကဲ့သို့ ရေခဲနှင့်မီး ရောယှက်နေ သော အသားများကို ချက်ချင်း ရစ်ပတ်သွား၏။ မျက်စိတစ်မှိတ်အတွင်းမှာပင် အိုးကြီးအတွင်း အနီ၊ အဖြူ နှင့် အပြာရောင် အလင်းတန်းများ လှိုင်းထသွားခဲ့လေသည်။

နတ်ဆိုးသားရဲ ၏ ဝိညာဉ် အနှစ်သာရနှင့် ဝိညာဉ်အပင်များ ၏ ဆေးဖက်ဝင် ချီ တို့သည် ရေခိုးရေငွေ့ များထဲတွင် နဂါးတစ်ကောင်နှင့် ကြံ့တစ်ကောင် တိုက်ခိုက်နေသည့် ပုံသဏ္ဌာန်များအဖြစ် အသွင်ပြောင်း သွားခဲ့လေသည်။

ကြွယ်ဝပြီး ထူးခြားသော ရနံ့သည် ရုပ်ဝတ္ထု အလင်းတန်းများအဖြစ် ပြောင်းလဲသွားပြီး ထမင်းစား ဆောင်၏ အမိုးတန်းများကို ရွှေရောင် အလင်းတန်း တစ်လွှာဖြင့်ပင် ဖုံးအုပ်သွားစေခဲ့သည်။

ဤပုံမှန်မဟုတ်သော ဖြစ်ရပ်သည် တစ်နာရီတိတိ ကြာမြင့်ခဲ့လေသည်။

နင်းဖန်သည် အပူရှိန်ကို စောင့်ကြည့်နေစဉ် သူ၏ တောက်ပသော ဆေး နှလုံးသား ပါရမီကို အသုံးပြု၍ အိုးအတွင်းရှိ အခြေအနေကို စောင့်ကြည့်နေခဲ့လေသည်။

အချိန်ကိုက် ဖြစ်သောအခါ သူသည် မြေကြီး အူတိုင် မီးတောက် ကို ငြိမ်းသတ်လိုက်ပြီး နောက်ဆုံး ကောင်းကင်နဲ့မြေကြီး ရတနာ ဖြစ်သော ကျောက်စိမ်း ရိုးတွင်းခြင်ဆီ ဝိညာဉ် လင်းကျီးမှို ကို အမှုန့် ကြိတ်ကာ ဖြူးလိုက်လေတော့သည်။

ဟင်းချိုအိုး တစ်ခုလုံး ရုတ်တရက် တိတ်ဆိတ်သွားပြီး အမြင်အာရုံများ အားလုံး ပျောက်ကွယ်သွားကာ ထူထဲသော အသားရနံ့သာ ကျန်ရှိလေတော့သည်။

"စားရမယ့် အချိန်ရောက်ပြီ...။"

ရနံ့ကို ရှူရှိုက်လိုက်ရသဖြင့် နင်းဖန်၏ ခံတွင်းမြိန်မှုသည် လုံးဝကို လှုံ့ဆော်ခံလိုက်ရလေ၏။

သူ ဆက်လက် တုံ့ဆိုင်းမနေတော့ဘဲ ပန်းကန်လုံးကြီး တစ်လုံးကို ချက်ချင်း ခူးယူကာ အားရပါးရ စတင် စားသောက်လေတော့သည်။

တစ်နာရီနီးပါး ချက်ပြုတ်ထားသော ကြံ့ ခါးသားသည် အမှန်တကယ်ပင် ပါးစပ်ထဲတွင် အရည်ပျော် သွားခဲ့ပြီး အသား၏အရသာမှာ ထိပ်တန်းအဆင့် ဖြစ်၏။

ကောင်းကင်နဲ့မြေကြီး ရတနာ သုံးခုကို ဟင်းခတ်အမွှေးအကြိုင်အဖြစ် ပေါင်းစပ်ထားသဖြင့် အရသာ မှာ အလွန် ကောင်းမွန်လှပေသည်။

တစ်ချိန်တည်းမှာပင် ကြွယ်ဝသော ဆေးစွမ်းအင်နှင့် နတ်ဆိုးသားရဲ အသားရှိ အာဟာရတို့သည် အချင်း ချင်း ဖြည့်ဆည်းပေးပြီး နင်းဖန်၏ ခန္ဓာကိုယ်အတွင်း ဂနာမငြိမ်ဖြစ်မှု တစ်ခုကို လှုံ့ဆော်ပေးခဲ့သည်။

သူ၏ အသားကို အပြည့်အဝ အသုံးချခြင်း ပါရမီ အသက်ဝင်လာမှုနှင့် ပေါင်းစပ်လိုက်သောအခါ သူ၏ သွေးလှည့်ပတ်မှု အရှိန်မြန်လာပြီး ကြွက်သားများ တဖြည်းဖြည်း တက်ကြွလာကာ အရိုးများ အတူ တကွ မြည်ဟည်းသွားပြီး သူ၏ ရုပ်ခန္ဓာကိုယ် သည် စတင် သန်မာလာခဲ့လေသည်။

ထို့ပြင် နင်းဖန်သည် အစာချေဖျက်ခြင်း ရုပ်ခန္ဓာကိုယ် သန့်စင်ခြင်း နည်းလမ်း ကို အသုံးပြု၍ သူ၏ ကျင့်ကြံခြင်းကို ပြန်လည်စတင်ချိန်မှာပင်...၊

ထိုက်ရီအကြွင်းအကျန်နယ်မြေ အတွင်း၌။

အားလုံး၏ သွားများသည် မနာလိုမှုကြောင့် ယားယံနေခဲ့ကြလေသည်။

"သူ ဘယ်လိုလုပ် ထပ်စားနေတာလဲ...။"

"ဒီတစ်ကြိမ်တော့ သူက အဆင့်မြင့် နတ်ဆိုးသားရဲ အသားကို စားရုံတင် မကဘူး အနှစ်တစ်သိန်း သက်တမ်းရှိတဲ့ ကောင်းကင်နဲ့မြေကြီး ရတနာ တွေကိုတောင် ဟင်းခတ်အမွှေးအကြိုင်အဖြစ် သုံးနေ တာပဲ...။ ငါ တကယ် စကားတောင်မပြောနိုင်တော့ဘူး...။"

"အဲဒီ အသားအိုးက အရောင်သုံးမျိုးရှိတဲ့ အံ့ဖွယ် အလင်းတန်းတွေ ထုတ်လွှတ်နေတယ်...၊ အဲဒါ ဘယ်လောက်တောင် အရသာရှိလိုက်မလဲ...။"

"စီနီယာအစ်ကိုနင်း...၊ ငါ တောင်းပန်ပါတယ် စားတာကို ရပ်လိုက်ပါတော့ ငါတို့ တကယ် ဆက်ပြီး သည်းမခံနိုင်တော့ဘူး...။"

"..."

တပည့် လူအုပ်ကြီးသည် ဝမ်းနည်းစွာဖြင့် အော်ဟစ်နေကြ၏။

သူတို့သည် ဤ လျှို့ဝှက်နယ်မြေ တွင် ပိတ်မိနေပြီး ဂိုဏ်းက ဝေငှသော ရိက္ခာများ ရှိသော်လည်း ၎င်းတို့အားလုံးမှာ သာမန် အစားအစာများသာ ဖြစ်သည်။ ၎င်းက နင်းဖန် စားနေသောအရာလောက် ဘယ်လိုလုပ်များ ခမ်းနားနိုင်မှာတဲ့လဲ။

ဒီကောင်က ဂိုဏ်းတစ်ခုလုံးရဲ့ အရင်းအမြစ်တွေကို သူ တစ်ယောက်တည်းအတွက် အသုံးပြုနေပြီး တောင်နဲ့ ပင်လယ်က အရသာရှိတဲ့ အစားအစာတွေကို စားပြီး ကျောက်စိမ်း ဝတ်ရည်တွေကို သောက်နေခြင်းပင်။ ဤသည်ကို မည်သူက ခံနိုင်ရည်ရှိမှာတဲ့လဲ။

သူတို့ တစ်ဦးစီတိုင်းသည် ဆာလောင်မှုကြောင့် မိန်းမောနေကြသည်။

အကြီးအကဲများဘက်တွင်လည်း သူတို့၏ မျက်လုံးများ တစ်ယောက်ပြီးတစ်ယောက် ပြူးထွက်နေ ကြလေသည်။

"အဆင့်မြင့် နတ်ဆိုးသားရဲ အသားကို ဒီလိုမျိုး ပြင်ဆင်လို့ ရတာလား…။"

လူအုပ်စု တစ်ခုလုံး မှင်တက်သွားခဲ့ကြလေ၏။

ဘယ်သူကမှ ယခုလိုမျိုး စားနေသည်ကို တစ်ခါမှ မမြင်ဖူးကျပေ။

ကောင်းကင်နဲ့မြေကြီး ရတနာ တွေကို အရံဟင်းလျာများအဖြစ် အသုံးပြုခြင်း၊ မတူညီတဲ့ ဓာတ်များ နဲ့တောင်မှ အမျိုးမျိုးသော စွမ်းအင်တွေကို နောက်ဆုံးမှာ ကျွမ်းကျင်စွာနဲ့ ပြီးပြည့်စုံစွာ ပေါင်းစပ်နိုင် ခဲ့သည်ပင်။

ဤသည်က ရိုးရှင်းစွာ ရယ်စရာပါပင်...။

ကျုံးတင်း သည် စွန်းချီယွမ် နှင့် စာရင်းများကို အပြန်အလှန် စစ်ဆေးနေစဉ် သူ၏ တံတွေးများကို အရူးအမူး မြိုချနေခဲ့၏။

နင်းဖန်၏ စားသောက်ပုံမှ ပြဿနာ တစ်ခုခု ပေါ်လာနိုင်မလား ဆိုတာကို သူတို့ ဆွေးနွေးနေကြသည်။

နတ်ဆိုးသားရဲ အသားနှင့် ပတ်သက်သည့် ကျုံးတင်း ၏ ဗဟုသုတနှင့် အမျိုးမျိုးသော ကောင်းကင်နဲ့ မြေကြီး ရတနာ ဓာတ်များအပေါ် စွန်းချီယွမ် ၏ ခွဲခြမ်းစိတ်ဖြာမှုတို့အပေါ် အခြေခံ၍ နင်းဖန်၏ နည်းလမ်းအရ အမျိုးမျိုးသော စွမ်းအင်များကို တစ်ခုတည်းအဖြစ် အမှန်တကယ် ပေါင်းစပ်နိုင်ပြီး ရုပ်ခန္ဓာကိုယ် ကို သန့်စင်ခြင်း အကျိုးသက်ရောက်မှုကို ဘက်စုံ မြှင့်တင်ပေးနိုင်ကြောင်း သူတို့ နှစ်ဦး နောက်ဆုံးတွင် အံ့သြစွာ တွေ့ရှိခဲ့ကြလေ၏။

"ယုံကြည်နိုင်စရာ မရှိဘူး...၊ ဒီနည်းလမ်းက ဖြုန်းတီးရာကျပေမယ့် အဲဒါက တကယ်ကို ထိရောက် တယ်...။"

စွန်းချီယွမ် က ရေရွတ်လိုက်လေသည်။

အခြားအကြီးအကဲများက ဤသည်ကို ကြားပြီး နင်းဖန်၏ ပုံရိပ်ကို အောက်သို့ ငုံ့ကြည့်လိုက်သောအခါ သူတို့လည်း အံ့အားသင့်မှု လှိုင်းတံပိုးများကို ခံစားလိုက်ရလေသည်။

ဤယခင် အပြင်စည်း အစမ်းခန့်တပည့်သည် ရက်အနည်းငယ်အတွင်း ရုပ်ခန္ဓာကိုယ် သန့်စင်ခြင်း နည်းလမ်းများစွာကို အမှန်တကယ် သုတေသနပြုခဲ့သည်တကား။

သူ တကယ်ပဲ ပါရမီရှင် တစ်ယောက် ဖြစ်နိုင်မလား။

ဤနေရာရှိ ပါရမီရှင် သည် ကျင့်ကြံခြင်း ပါရမီကို မဆိုလိုဘဲ အရာဝတ္ထုများကို နားလည်မှုနှင့် အသုံးချ မှုတို့ကို ဆိုလိုခြင်း ဖြစ်၏။

အခြားသူများ စိတ်ကူးပင် မယဉ်နိုင်သော အရာများသည် နင်းဖန်၏ လက်ထဲတွင် အလွန် သဘာဝ ကျကျ အသီးအပွင့်များ ဖြစ်ထွန်းလာခဲ့သည်ပင်။

သို့သော် ဘေးထွက်ဆိုးကျိုးများနှင့် ပတ်သက်၍မူ ၎င်းသည် ဂိုဏ်းအပေါ် အနည်းငယ် ခက်ခဲပေသည်။ အကယ်၍ ထိုက်ရီအစစ်အမှန်ဂိုဏ်း သာ ထိပ်တန်း အင်အားစုတစ်ခု မဟုတ်ပါက ဤကဲ့သို့သော ဖြုန်းတီးမှုမျိုးကို သူတို့ ခံနိုင်ရည်ရှိမည် မဟုတ်ချေ။

"ထားလိုက်ပါတော့ နင်းဖန်က ဘာပဲဖြစ်ဖြစ် ငါတို့ဂိုဏ်းရဲ့ တပည့်ခေါင်းဆောင် ပဲလေ...။ သူ အရင်း အမြစ် တချို့ကို အသုံးပြုတာ မှန်ပါတယ်...။"

ဂိုဏ်းချုပ် ဖေ့ချင်းယွီက ဤအချိန်တွင် စကားပြောလိုက်၏။

အမှန်တကယ်တော့ သူလည်း အနည်းငယ် နာကျင်သလို ခံစားခဲ့ရသည်။ မည်သို့ပင်ဆိုစေ အဆင့်မြင့် နတ်ဆိုးသားရဲ အသားဖြစ်စေ ကောင်းကင်နဲ့မြေကြီး ရတနာ များဖြစ်စေ ၎င်းတို့အားလုံးမှာ ဂိုဏ်း၏ အခြေခံအုတ်မြစ် ၏ အစိတ်အပိုင်းများ ဖြစ်ကြလေသည်။

၎င်းတို့ကို မူလက ဂိုဏ်း တစ်ခုလုံးကို ထောက်ပံ့ရန် ရည်ရွယ်ထားသော်လည်း ယခုမူ ၎င်းတို့သည် နင်းဖန်၏ ကိုယ်ပိုင် ကျင့်ကြံခြင်း အရင်းအမြစ်များ ဖြစ်လာခဲ့ပြီ ဖြစ်၏။

သို့ပေမယ့် ကိစ္စတွေက ဤအဆင့်ထိ ရောက်နေပြီဆိုမှတော့ သူတို့ ဘာများပြောနိုင်မည်နည်း။

"သူတို့က လျှို့ဝှက်နယ်မြေ ထဲမှာ ပိတ်မိနေပြီး အပြင်မထွက်နိုင်ဘူးလေ...။ နင်းဖန်ကို သူတို့ တားနိုင်လို့ လား…။"

ထို့ကြောင့် ရက်ရောဟန်ဆောင်ခြင်းက ပိုကောင်းပေသည်။

မည်သို့ပင်ဆိုစေ ဤအရင်းအမြစ်များသည် ပြင်ပလူများကို အကျိုးပြုနေခြင်း မဟုတ်သလို အလဟဿ ဖြုန်းတီးနေခြင်းလည်း မဟုတ်ချေ။

ထိုသို့ဖြင့် ဂိုဏ်းတစ်ခုလုံးသည် နင်းဖန်က သူ၏ ရုပ်ခန္ဓာကိုယ်သန့်စင်ခြင်း စတုတ္ထအလွှာ ကျင့်ကြံခြင်း ကို ဤကဲ့သို့ အလွန်အမင်း ဖြုန်းတီးသော နည်းလမ်းဖြင့် စတင်သည်ကို ကြည့်နေခဲ့ကြ၏။

သူ၏ တစ်နေ့ သုံးနပ်စလုံးကို ဤစံနှုန်းအတိုင်း စားသုံးခဲ့သည်။

တစ်ခါတစ်ရံတွင် သူသည် အပို သရေစာများကိုပင် စားတတ်၏။

သို့မဟုတ် အနှစ်ငါးသိန်းကျော် သက်တမ်းရှိ ထိပ်တန်း ဝိညာဉ်အပင် အချို့ကို ယူကာ အသုပ် လုပ် စားတတ်လေသည်။

ဂိုဏ်းရှိ လူတိုင်းသည် အစပိုင်းတွင် လက်မခံနိုင်ရာမှ တဖြည်းဖြည်း ကျင့်သားရလာပြီး နောက်ဆုံးတွင် ထုံကျင်သွားကြတော့၏။

ထို့အပြင် နင်းဖန်၏ ရုပ်ပိုင်းဆိုင်ရာ အင်အားသည်လည်း ကြောက်မက်ဖွယ်ကောင်းသော အမြန်နှုန်းဖြင့် တိုးတက်လာခဲ့လေသည်။

တတိယမြောက်နေ့တွင် နင်းဖန်သည် ဂျင် နှစ်သိန်းခုနစ်သောင်းရှိသော ဧရာမ အရာဝတ္ထုတစ်ခုကို လက်တစ်ဖက်တည်းဖြင့် ပင့်မြှောက်နိုင်နေပြီ ဖြစ်၏။

သို့သော် တစ်ခုခု အနည်းငယ် လိုအပ်နေသေးကြောင်း သူ ခံစားနေရဆဲပင် ဖြစ်လေသည်။

ထို့ကြောင့် စတုတ္ထနေ့ ညတွင် ညစာစားပြီးသည်နှင့် သူသည် ပျံသန်းသည့်လှေကို မောင်းနှင်ကာ တောင်ထိပ် အမျိုးမျိုးကြား ပျံသန်းနေခဲ့ပြီး တစ်ခုခုကို ရှာဖွေနေပုံရ၏။

တစ်နာရီခန့် အကြာတွင် ပျံသန်းသည့်လှေသည် နောက်ဆုံးတွင် အထီးကျန် တောင်ထိပ်တစ်ခု၌ ရပ်တန့် သွားခဲ့လေသည်။

ဤနေရာရှိ ရှုခင်းမှာ လှပပြီး ဝိညာဉ်ချီများ ပေါများကာ ၎င်းအပေါ်တွင် ခမ်းနားသော နန်းတော်တစ်ခု တည်ဆောက်ထား၏။

အထက်ရှိ ဆိုင်းဘုတ်တွင် စကားလုံးကြီး သုံးလုံး ထွင်းထုထားလေသည်...။

သူတော်စင်မိန်းမပျို နန်းတော်…။

"ရုပ်ပိုင်းဆိုင်ရာ ကျင့်ကြံခြင်းဆိုတာ စားတာ၊ လေ့ကျင့်တာနဲ့ အိပ်တာထက် ဘာမှ ပိုမပါပါဘူး...။"

"အခု ငါ ကောင်းကောင်းစားပြီး ကောင်းကောင်း လေ့ကျင့်နေတယ် ဒါပေမယ့် အိပ်တဲ့အပိုင်းမှာပဲ အရည်အသွေးက မလုံလောက်သေးဘူး...။"

"ဒါကြောင့် နေဖို့ နေရာကောင်း တစ်ခုကို ရှာရမယ့် အချိန်ရောက်ပြီ...။"

သူတော်စင်မိန်းမပျို နန်းတော် ၏ တံခါးရှေ့တွင် ရပ်နေစဉ် နင်းဖန်သည် သူ့ဘာသာသူ တွေးလိုက်၏...။ တစ်ချိန်တည်းမှာပင်။

ထိုက်ရီအကြွင်းအကျန်နယ်မြေ အတွင်း၌။

ရေတွက်မရနိုင်သော တပည့်များသည် ဤမြင်ကွင်းကို မြင်ပြီး မျက်လုံးများ ပြူးကျယ်ကာ တညီ တညွတ်တည်း မတ်မတ် ရပ်လိုက်ကြ၏။

အဓိပ္ပာယ်မရှိသော အတွေးတစ်ခု သူတို့၏ နှလုံးသားများတွင် တစ်ပြိုင်နက်တည်း ပေါ်လာခဲ့သည်။

"ဒီကောင်...၊ သူ သူတော်စင်မိန်းမပျို ရဲ့ အိပ်ခန်းထဲမှာ ညအိပ်ဖို့ စီစဉ်နေတာတော့ မဟုတ်ပါဘူးနော်...။"