ပါရမီရှင်တစ်ယောက်ရဲ့ ထင်တိုင်းကျဲဒိုင်ယာရီ

စိတ်ကူးယဉ်သိုင်းလောကသို့ ကူးပြောင်းရောက်ရှိလာပြီးနောက် နင်းဖန်သည် ထိပ်တန်းအင်အားစုကြီးတစ်ခုဖြစ်သော "ထိုက်ယီကျန်းမင်" ဂိုဏ်း၏ အပြင်စည်းတပည့်လောင်းတစ်ဦး ဖြစ်လာခဲ့သည်။ ပါရမီအသင့်အတင့်သာ ရှိသော နင်းဖန်သည် တစ်နေ့တွင် ပုံမှန်အတိုင်း နိုးထလာခဲ့ရာ ၊ တစ်ဂိုဏ်းလုံး၌ မည်သူမျှမရှိတော့ဘဲ ခြောက်ကပ်နေသည်ကို အံ့သြဖွယ်ရာ တွေ့ရှိလိုက်ရသည်။ ထိုအချိန်တွင် စနစ်တစ်ခု ကျဆင်းလာခဲ့ပြီး နောက်သုံးနှစ်အကြာတွင် ဤကမ္ဘာလောကကြီး၌ ကြီးမားသော ဘေးအန္တရာယ်ဆိုးကြီးတစ်ခု ကျရောက်လာမည်ဖြစ်ကြောင်း နင်းဖန်အား အသိပေးလာခဲ့သည်။ ထိုဘေးအန္တရာယ်ဆိုးကြီးကြောင့် သက်ရှိသတ္တဝါ ကိုးဆယ့်ကိုး ရာခိုင်နှုန်းခန့် သေကြေပျက်စီးရမည် ဖြစ်၏။ ထို့ကြောင့် မိမိကိုယ်ကို ကာကွယ်နိုင်ရန်အတွက် နင်းဖန်သည် ကြီးကြပ်သူကင်းမဲ့နေသော ဂိုဏ်းကြီးအတွင်း၌ စနစ်၏အကူအညီဖြင့် အပြင်းအထန် ကျင့်ကြံအားထုတ်ရန်မှလွဲ၍ အခြားရွေးချယ်စရာ မရှိခဲ့ပေ။ ကျမ်းစာတိုက်အတွင်းရှိ ထိပ်တန်းကျင့်စဉ်များ၊ ဆေးဖော်စပ်ရာအခန်းအတွင်းရှိ အဆင့်မြင့်ဆေးတောင့်များ၊ ဂိုဏ်း၏ တားမြစ်နယ်မြေအတွင်းရှိ နှစ်ထောင်ချီ သက်တမ်းရှိသော ဝိညာဉ် ကျောက်စက်ရည်များ၊ အထက်စီးဆန်လှသော သူတော်စင်မလေး၏ ကျောက်စိမ်းကုတင် အစရှိသော အရာအားလုံးသည် ထိုအချိန်မှစကာ သူ၏ အခမဲ့အထောက်အပံ့များ ဖြစ်လာခဲ့လေတော့သည်။ နင်းဖန်၏ ကျင့်ကြံမှုအဆင့်သည်လည်း နေ့ချင်းညချင်းပင် တဟုန်ထိုး တိုးတက်လာခဲ့လေ၏။ ... သို့သော် သူ မသိခဲ့သောအရာမှာ တစ်ဂိုဏ်းလုံး ရုတ်တရက် ပျောက်ကွယ်သွားခြင်းမဟုတ်ဘဲ မတော်တဆမှုတစ်ခုကြောင့် ဂိုဏ်း၏အထက်ရှိ လျှို့ဝှက်နယ်မြေတစ်ခုအတွင်း ပိတ်မိနေခဲ့ကြခြင်းပင် ဖြစ်သည်။ ဤလျှို့ဝှက်နယ်မြေကို ဂိုဏ်းတည်ထောင်သူ ကိုယ်တိုင် ဖန်တီးခဲ့ခြင်းဖြစ်ပြီး ၊ ကိုယ်ပျောက်နိုင်စွမ်းရှိကာ အတွင်းမှနေ၍ အပြင်ဘက်သို့ မြင်တွေ့နိုင်သော်လည်း အပြင်ဘက်မှနေ၍ အထဲကိုတော့ မမြင်တွေ့နိုင်ချေ။ ထို့ကြောင့် နင်းဖန်၏ လှုပ်ရှားမှုတိုင်းသည် တစ်ဂိုဏ်းလုံး၏ မျက်စိအောက်တွင် ရှိနေခဲ့သည်။ ဂိုဏ်းချုပ်: "ဒီကလေးက စည်းကမ်းမရှိဘူး၊ ငါတို့ဂိုဏ်းရဲ့ လျှို့ဝှက်ကျင့်စဉ်တွေကိုတောင် ရဲရဲတင်းတင်း ခိုးယူရဲတယ်" ဆေးဖော်စပ်ရေး အကြီးအကဲ: "ဘာ၊ မင်းက ငါ့ရဲ့ အဆင့် ၈ ကောင်းကင်ဆေးတောင့်ကို သကြားလုံးလို စားနေတာလား" လက်နက်သွန်းလုပ်ရေး အကြီးအကဲ: "အဲဒါ နှစ်သောင်းချီ သက်တမ်းရှိတဲ့ ရေခဲသံမဏိကွ ၊ မီးဖိုထဲမပစ်ထည့်ခင် ဘယ်လိုသွန်းလုပ်ရမလဲဆိုတာကိုရော မင်း နားလည်ရဲ့လား" ဂိုဏ်းသားများ: "နင်းဖန် သေသင့်တယ် ၊ သူက သူတော်စင်မလေးရဲ့ ကုတင်ပေါ်မှာ ညအိပ်ရဲရုံတင်မကဘူး၊ အမိုက်စား ပုံစံမျိုးနဲ့ပါ အိပ်နေသေးတယ်" အစပိုင်းတွင် တစ်ဂိုဏ်းလုံးသည် ဒေါသများဖြင့် ပေါက်ကွဲနေခဲ့ကြသည်။ သို့သော် နင်းဖန်သည် အဆင့် ၈ ဆေးတောင့်၏ ဆေးစွမ်းအာနိသင်ကို ပြီးပြည့်စုံစွာ စုပ်ယူပြလိုက်သည့်အခါ၊ နှစ်သောင်းချီ ရေခဲသံမဏိမှတစ်ဆင့် ပြိုင်ဘက်ကင်း မြင့်မြတ်သောလက်နက်ကို သွန်းလုပ်ပြလိုက်သည့်အခါ ၊ ဂိုဏ်း၏ အခက်ခဲဆုံးသော နတ်ဘုရားစွမ်းရည်ကိုပါ အောင်မြင်စွာ ကျင့်ကြံနိုင်ခဲ့သည်ကို မြင်တွေ့လိုက်ရချိန်တွင် ထိုအသံများအားလုံး တဖြည်းဖြည်း တိတ်ဆိတ်သွားခဲ့လေတော့သည်။ "ညီလေး... မင်းက တကယ်ကို ဆရာကျတာပဲ!"