အခန်း (၁၄၃)

အခန်း (၁၄၃) ဂျူနီယာညီမလေး၊ မင်းပြောတာတွေ အကုန်မှန်တယ်

ဝိညာဉ်လက်ဖက်ရည်တစ်အိုး ကုန်သွားခဲ့လေသည်။

နင်းဖန်သည် သူ့ရှေ့ရှိ တက်ကြွနေသော မိန်းကလေးကို ကြည့်လိုက် ပြီး အနည်းငယ် သိချင်စိတ်ဖြင့် မေးလိုက်သည်။

"ဒါဆို မင်း မှတ်ဉာဏ်တွေ မဆုံးရှုံးခင်က ဂိုဏ်းမှာ မင်းရဲ့ အဆင့်အတန်းက အတိအကျ ဘာလဲ"

တခြား ကျန်းထန်၏ လှုပ်ရှားမှုတိုင်းတွင် ကြီးကျယ်ခမ်းနားသော အရှိန်အဝါတစ်ခုကို အမှန်တကယ် ပိုင်ဆိုင်ထား၏။

နင်းဖန်သည် အရေးမပါလှသော အပြင်စည်းတပည့်တစ်ဦး ဖြစ်သော်လည်း၊ ယခင်က "အစစ်အမှန်တပည့်" များကို အဝေးကနေ မြင်ခဲ့ဖူးသည်။

သို့သော် မနေ့ညက တွေ့ခဲ့ရသည့် ကျန်းထန် ၏ အရှိန်အဝါနှင့် ယှဉ်လိုက်လျှင် ထိုတပည့်များပင် သာမန်လူကဲ့သို့ ဖြစ်သွားရသည်။ ထိုကျန်းထန်တွင် အတွင်းစိတ်မှလာသော ယုံကြည်မှုနှင့် လွှမ်းမိုးနိုင်သောအရှိန်ဝါ ရှိနေသည်။ ဤကဲ့သို့ စိတ်ဓာတ်မျိုး ရှိသူမှာ သာမန်ပါရမီရှင်တစ်ယောက် မဖြစ်နိုင်ကြောင်း သူ ခံစားမိသည်။

‘သူမက အစစ်အမှန်တပည့်တွေထဲကမှ ထိပ်တန်းအဆင့် ဖြစ်နေမလား'

အကြောင်းမှာ ထိုက်ရီအစစ်အမှန်ဂိုဏ်း ၏ အစစ်အမှန်တပည့် ၇၂ ယောက်တွင် အဆင့်အတန်း ကွဲပြားမှုများ ရှိကြရာ၊ သူမသာ ထိပ်သီးတစ်ယောက်ဖြစ်ပါက ထိုမျှ အရှိန်အဝါကြီးမားနေခြင်းမှာ အံ့သြစရာမဟုတ်ပေ။

နင်းဖန် မေးလိုက်စဉ်... သူ့ရှေ့ရှိ အူကြောင်ကြောင်နိုင်လှသော ထိုမိန်းကလေးသည် ချက်ချင်းပင် အမူအရာပြောင်းကာ ပြတ်သားရှင်းလင်းစွာ ပြန်လည်ဖြေကြားပေးခဲ့သည်။

"သတင်းပို့ပါတယ် စီနီယာအစ်ကို၊ ကျွန်မလည်း မသိဘူး"

"..."

ဤအဖြေကြောင့် နင်းဖန် တကယ်ကို စကားမပြောနိုင် ဖြစ်သွားခဲ့၏။

သူ၏ နှုတ်ခမ်းမှာ အနည်းငယ် တွန့်သွားပြီး သူသည် စိတ်ရှည်လက်ရှည် ထပ်မေးလိုက်သည်။

"ဒါဆို အရင်က ဘယ်တောင်ထိပ်မှာ နေခဲ့တာလဲဆိုတာ မင်း မှတ်မိလား"

"ကျွန်မ မမှတ်မိဘူး"

ကျန်းထန်သည် ပြတ်ပြတ်သားသား ပြန်ဖြေလိုက်ပြီး သူမ၏ ခေါင်းကို ခါယမ်းလိုက်၏။

နင်းဖန် သက်ပြင်းချကာ နဖူးကို ပွတ်သပ်လိုက်သည်။

"မင်းက ဒါကိုလည်း မသိဘူး၊ အဲဒါကိုလည်း မမှတ်မိဘူး... မင်း မှတ်ဉာဏ် တချို့ ပြန်ရခဲ့တာ မဟုတ်ဘူးလား... ဘယ်အထိ ပြန်ရခဲ့တာလဲ"

ဤသည်ကို ကြားသောအခါ ကျန်းထန်သည် သူမ၏ ဖြူဖွေးသော လက်ချောင်းများကို စတင်ရေတွက်ကာ စဉ်းစားနေသည်။

"ကျင့်ကြံခြင်းနဲ့ ပတ်သက်တဲ့ အရာတွေ အများကြီးကို ကျွန်မ မှတ်မိတယ်၊ ဒါပေမယ့် ကျွန်မ ဘယ်သူလဲ ဆိုတာနဲ့ ပတ်သက်ပြီး ဘာမှ ပြန်မမှတ်မိဘူး... 'တခြား ကျွန်မ' က ကျွန်မကို မမှတ်မိစေချင်တဲ့ ပုံပဲ..."

"ကောင်းပြီလေ..."

နင်းဖန်မှာ စိတ်လျော့ရုံမှတစ်ပါး ရွေးချယ်စရာ မရှိတော့ချေ။

သူ၏ ဂျူနီယာညီမလေး၏ မည်သူမည်ဝါဖြစ်ကြောင်းမှာ လျှို့ဝှက်ချက်တစ်ခုအဖြစ် ရှိနေဆဲ ဖြစ်၏။ သို့သော် ကိစ္စမရှိချေ။ ၎င်းမှာ အရေးကြီးသော ပြဿနာ မဟုတ်ပေ။ ကောင်းကင်နှင့်မြေကြီး၏ မဟာဘေးဒုက္ခကို ရင်ဆိုင်ရာတွင် ကျင့်ကြံခြင်းကသာ အရေးအကြီးဆုံး ဖြစ်သည်။

ထို့နောက် သူ ထပ်မေးလိုက်သည်။

"မိုးကြိုးရေကန်ထဲမှာ မင်း အမြင့်ဆုံး အခြေခံအုတ်မြစ်တစ်ခုကို တည်ဆောက်ခဲ့သင့်တယ်... အခု မင်း ဘယ်နယ်ပယ်ကို ရောက်နေပြီလဲ၊ ပြီးတော့ အင်အား ဘယ်လောက် ပိုင်ဆိုင်ထားလဲ"

ထိုနေ့က မိုးကြိုးရေကန်တွင် ရုပ်ခန္ဓာကိုယ်သန့်စင်နေစဉ်အတွင်း ကျန်းထန်သည် သူ၏ ရှေ့၌ ကောင်းကင်တာအို၏ တုံ့ပြန်မှုကို ရရှိခဲ့၏။ ၎င်းသည် ထူးဆန်းသော အဖြစ်အပျက်များကို မဖြစ်ပေါ်စေသော်လည်း သူမ၏ ခန္ဓာကိုယ်တွင် သိသာထင်ရှားသော အပြောင်းအလဲများကို ကြုံတွေ့ခဲ့ရသည်။

ကျန်းထန်က ဂုဏ်ယူစွာ ပြန်ဖြေလိုက်သည်။

"စီနီယာအစ်ကို... ကျွန်မ အခု စိတ်ဝိညာဉ်သန့်စင်ခြင်းနယ်ပယ်ရဲ့ အထွတ်အထိပ်ကို ရောက်နေပါပြီ ကျွန်မရဲ့ အင်အားက နှစ်ဆကျော် တိုးလာပုံရတယ်၊ စမ်းသပ်ပြီးမှ အတိအကျ ပမာဏကို ကျွန်မ သိရလိမ့်မယ်"

"အဲဒီလောက်တောင် မြန်တာလား"

နင်းဖန် မှင်တက်သွားခဲ့၏။

နင်းဖန်ကိုယ်တိုင်မှာမူ ထိပ်တန်းအဆင့်ပါရမီ၊ ထူးခြားသော ကျင့်ကြံခြင်းနည်းစနစ်နှင့် ကောင်းကင်တာအို၏ အလင်းတန်းကောင်းချီးကြောင့်သာ စိတ်ဝိညာဉ်သန့်စင်ခြင်းနယ်ပယ် အလယ်အဆင့်သို့ တက်လှမ်းနိုင်ခဲ့ခြင်း ဖြစ်သည်။ သို့သော် သူ၏အူကြောင်ကြောင် ညီမလေးမှာမူ အိပ်နေရုံဖြင့် စိတ်ဝိညာဉ်သန့်စင်ခြင်းနယ်ပယ် အထွတ်အထိပ်သို့ တစ်ဟုန်ထိုး ရောက်ရှိသွားခဲ့သည်။

သေချာတွက်ကြည့်လျှင် သူမသည် အဓိကနယ်ပယ်ကြီးတစ်ခုလုံးကို ကျော်ဖြတ်သွားခဲ့ခြင်းဖြစ်ရာ ဤသည်မှာ အလွန်ပင် ချဲ့ကားလွန်းလှသည်။ တာအိုခန္ဓာကိုယ် ပဲ့တင်ထပ်ခြင်းက ကျင့်ကြံခြင်းအရှိန်ကို ဤမျှအထိ မြန်ဆန်စေသလားဆိုသည်ကို နင်းဖန် တွေးမတတ်အောင် ဖြစ်ရသည်။ ထို့ကြောင့် သူမ ဉာဏ်အလင်းရစဉ်အတွင်း ရရှိခဲ့သည့် ကံကောင်းခြင်းတစ်ခုဟုသာ ရိုးရှင်းစွာ မှတ်ယူလိုက်သည်။

အမှန်တကယ်တွင် ကျန်းထန် ဤမျှလျင်မြန်စွာ ကျင့်ကြံနိုင်ခြင်း၏ အကြောင်းရင်းမှာ သူမသည် မူလကတည်းက စိတ်ဝိညာဉ်သွန်းလုပ်ခြင်းနယ်ပယ် အထွတ်အထိပ်သို့ ရောက်ရှိပြီးသား ဖြစ်သောကြောင့် ဖြစ်သည်။

သူမသည် နဂါးမျိုးနွယ်စု၏ လျှို့ဝှက်နည်းစနစ်ကို အသုံးပြုကာ ရုပ်ခန္ဓာကို အသက် (၁၈) နှစ်အရွယ်သို့ ပြန်ပြောင်း၍ ကျင့်ကြံခြင်းကို အစက ပြန်စခဲ့သည်။ ထိုသို့ ပြောင်းလဲရာတွင် သူမ၏ ရုပ်ပိုင်းဆိုင်ရာ အသက်အရွယ်သာ ငယ်သွားခြင်း ဖြစ်ပြီး၊ ဝိညာဉ်စွမ်းအားနှင့် နတ်ဘုရားစိတ်အာရုံတို့မှာမူ ယခင်အတိုင်း အားကောင်းနက်ရှိုင်းစွာ ကျန်ရှိနေဆဲ ဖြစ်သည်။

ထို့ကြောင့် ကျန်းထန်အတွက် စိတ်ဝိညာဉ်သန့်စင်ခြင်းနှင့် စိတ်ဝိညာဉ်သွန်းလုပ်ခြင်း နယ်ပယ်များတွင် မည်သည့်ကျင့်ကြံခြင်း အဟန့်အတားမှ မရှိခဲ့သလို၊ အားစိုက်ကျင့်ကြံရန်လည်း မလိုအပ်ခဲ့သည်။ သူမအတွက်မူ ယခင်က အောင်မြင်ပြီးသား အဆင့်များကို ပြန်လည်ချိုးဖျက်နေခြင်းသာ ဖြစ်သည်။ ဤအကြောင်းရင်းကြောင့်ပင် သူမသည် နယ်ပယ်အဆင့်ကို ချိုးဖျက်အောင်မြင်ပြီးပြီးချင်း နင်းဖန်၏ ကျင့်ကြံခြင်းအဆင့်ကို မီလုနီးပါး ဖြစ်သွားစေခဲ့သည်။

"သွားကြစို့... မင်းရဲ့ အင်အားကို စမ်းသပ်ဖို့ ခေါ်သွားမယ်"

ထို့နောက် နင်းဖန်သည် ကျန်းထန်ကို လေ့ကျင့်ရေးကွင်းသို့ ခေါ်ဆောင်သွားခဲ့၏။

ကျန်းထန်သည် သူမ၏ ရုပ်ပိုင်းဆိုင်ရာအင်အားကို ဦးစွာ စမ်းသပ်ခဲ့သည်။ အားကုန်ထုတ်ပြီး စမ်းသပ်အပြီးတွင် သူမ၏ အင်အားမှာ ဂျင်း ၂.၈ သန်း အထိ ရှိနေခဲ့သည်။ ဤရလဒ်သည် မိုးကြိုးရေကန်တွင် ရုပ်ခန္ဓာမသန့်စင်မီကထက် နှစ်ဆကျော် ပိုများလာခြင်း ဖြစ်သည်။

သူမသည် ထျန်းကုန်းတောင်ထိပ်တွင် ရှိစဉ်ကတည်းက အမြင့်ဆုံး အခြေခံအုတ်မြစ်စံနှုန်းများကို ပြည့်မီခဲ့သူ ဖြစ်သဖြင့် ဤမျှ စွမ်းအားကြီးမားလာခြင်းမှာ ပုံမှန်ပင် ဖြစ်သည်။ သူမ ရုပ်ခန္ဓာကိုယ်သန့်စင်ခြင်း နဝမအလွှာကို ချိုးဖျက်ပြီးနောက် အဆင့်ဆင့် မြှင့်တင်မှုများကြောင့် ရုပ်ခန္ဓာစွမ်းအားသည် သိသိသာသာ ခုန်ပျံကျော်လွှား တိုးတက်လာခဲ့သည်။

သူမ၏ အင်အားသည် ဂျင်း သုံးသန်းပြည့်ရန် အနည်းငယ်သာ လိုတော့သည်။ ထိုအခြေခံအုတ်မြစ်သည် အလွန်ခိုင်မာလှပြီး သာမန် အခြေခံအုတ်မြစ်ထက် များစွာ ပိုမိုသာလွန်သည်။

ထို့နောက် နင်းဖန်လည်း စမ်းသပ်ကြည့်ခဲ့သည်။ သူသည် ဒသမအဆင့် နတ်ဘုရားဆေးလုံး၏ အာနိသင်ကြောင့် ရုပ်ခန္ဓာကိုယ်သန့်စင်ခြင်းကို မကျင့်ကြံသော်လည်း၊ နယ်ပယ်ချိုးဖျက်မှုများနှင့်အတူ ရုပ်ခန္ဓာအဆင့်မှာ အကန့်အသတ်မရှိ တိုးတက်နေခဲ့သည်။ သာမန်ထက် သာလွန်သော သွေးချီစွမ်းအားကို ပိုင်ဆိုင်ထားပြီး ရုပ်ခန္ဓာ ကျင့်ကြံသူတစ်ဝက်ဟုပင် သတ်မှတ်နိုင်သည်။

စမ်းသပ်မှုအပြီးတွင် ထွက်ပေါ်လာသော ရလဒ်မှာ ပို၍ပင် အံ့အားသင့်စရာ ကောင်းလှသည်။

နင်းဖန်၏ အင်အားမှာ ဂျင်း ၂၁ သန်း အထိ ရှိနေခဲ့သည်။

သူ၏ ရုပ်ခန္ဓာသည် ပြိုင်ဘက်ကင်းလောက်အောင် သန်မာလှပြီး နတ်ဘုရားအရိုးများနှင့် ကိုယ်တွင်းအင်္ဂါများ ပဲ့တင်ထပ်နေသည်။ သွေးချီစွမ်းအားများမှာလည်း သွေးကြောများအတွင်း ပွက်ပွက်ဆူလျက် စီးဆင်းနေသဖြင့် သူ၏ပုံစံမှာ လူသားအသွင်ဆောင်ထားသော ရှေးဟောင်းသားရဲကြီးတစ်ကောင်ကဲ့သို့ ထိတ်လန့်ဖွယ် ဖြစ်နေသည်။

"ဝါး... စီနီယာအစ်ကို က အရမ်း အံ့သြဖို့ကောင်းတာပဲ"

ထိုစကားများကို ကြားသောအခါ နင်းဖန်သည် ဂုဏ်ယူသည့်ဟန်ကို မဖုံးကွယ်နိုင်တော့ဘဲ ပြုံးမိလိုက်သည်။ ရိုးရိုးသားသားဆိုရလျှင် ဤအူကြောင်ကြောင် ညီမလေးသည် အတော်လေး အသုံးဝင်လှသည်။

မည်သို့ပင်ဆိုစေ ဂိုဏ်းထဲတွင် သူတစ်ယောက်တည်းသာ ကျင့်ကြံနေရမည်ဆိုပါက အလွန်ပင် အထီးကျန်ဆန်လှပေမည်။ ပြိုင်ဘက်ကင်း နတ်ဘုရားကျင့်စဉ်များကို တတ်မြောက်ထားလျှင်တောင်မှ ချီးကျူးမည့်သူ၊ ကြည့်ရှုမည့်သူ မရှိပါက ဘာအကျိုးရှိမည်နည်း။

သို့သော် ကျန်းထန် ရှိနေခြင်းကတော့ လုံးဝကွာခြားလှသည်။ ထိုမိန်းကလေးသည် အမြဲတက်ကြွလန်းဆန်းနေတတ်ပြီး အရေးကြီးသော အခိုက်အတန့်များတွင် စိတ် ခွန်အားပေးရာ၌ အလွန်တော်သည်။သူမ၏ ဟန်ဆောင်မှုကင်းသော လေးစားမှုက နင်းဖန်ကို ကြီးမားသော အောင်မြင်မှုခံစားချက် ရရှိစေသည်။

"ဂျူနီယာညီမလေး... မင်းက ကျင့်ကြံခြင်းနဲ့ ပတ်သက်တဲ့ မင်းရဲ့ မှတ်ဉာဏ်တွေကို ပြန်ရပြီလို့ ပြောတယ်နော်... ဒါဆို ငါက မင်းကို စမ်းသပ်ကြည့်မယ်..."

"စိတ်ဝိညာဉ်သွန်းလုပ်ခြင်းနယ်ပယ်မှာ နတ်ဘုရားစိတ်အာရုံကို သန့်စင်ဖို့ နည်းလမ်းတွေက ဘာတွေလဲ..."

စမ်းသပ်မှု ပြီးဆုံးသွားပြီးနောက် နင်းဖန်သည် အနည်းငယ် စိုးရိမ်ပူပန်နေသည့် အမူအရာဖြင့် မေးမြန်းလိုက်သည်။ ထိုသို့ မေးမြန်းသည်ကို ကြားလိုက်ရသောအခါ ကျန်းထန်၏ နှလုံးသားထဲတွင် ကြည်နူးမှုတစ်ခု ဖြစ်လာခဲ့သည်။

စီနီယာအစ်ကိုသည် အလွန်ကြင်နာတတ်ပြီး သူမ၏ ကျင့်ကြံခြင်းကိုလည်း အမြဲတမ်း ဂရုတစိုက်ရှိသည်ဟု သူမ တွေးမိလိုက်သည်။ ထို့ပြင် စီနီယာအစ်ကိုက ယခုကဲ့သို့ အခြေခံဗဟုသုတဆိုင်ရာ မေးခွန်းများကို မေးမြန်းနေခြင်းမှာ သူမ၏ မှတ်ဉာဏ်များ တကယ် ပြန်လည်ရရှိလာခြင်း ရှိ၊ မရှိကို စိတ်ပူ၍ စစ်ဆေးပေးနေခြင်းသာ ဖြစ်မည်ဟု သူမက ထင်မှတ်လိုက်တော့သည်။

သူမက တိုးညင်းစွာ ပြောလိုက်သည်။

"စီနီယာအစ်ကို... ကျွန်မ မှတ်မိတာ မှန်ရင် နတ်ဘုရားစိတ်အာရုံ ဆိုတာ နတ်ဘုရား အာရုံနဲ့ စိတ်ဝိဉာဏ် စွမ်းအားကို ရည်ညွှန်းတာပါ၊ အဲဒီ နှစ်ခု ပေါင်းစပ်ပြီး နတ်ဘုရားစိတ်အာရုံကို ဖြစ်ပေါ်စေတာပါ..."

"ဒါပေမယ့် ဒီနေ့ခေတ် ကျင့်ကြံသူ အများစုရဲ့ နတ်ဘုရားစိတ်အာရုံက အာရုံခံ စစ်ဆေးခြင်းကိုပဲ လုပ်ဆောင်နိုင်တဲ့ စွမ်းရည် ရှိပြီး စိတိဉာဏ် စွမ်းအား အားနည်းတယ်..."

"ဘာလို့လဲဆိုတော့ စိတ်ဝိဉာဏ် စွမ်းအားကို ကျင့်ကြံဖို့က အရမ်း ခက်ခဲလို့ပါ၊ အဲဒါက ကြီးမားတဲ့ အခွင့်အရေး တစ်ခုခု လိုအပ်တယ်..."

"ကျွန်မတို့လို ဂိုဏ်းကြီးတွေက တပည့်တွေအတွက်တော့ ဆေးလုံးတွေ စားတာ၊ တရားထိုင်တာ၊ ဒါမှမဟုတ် ဓား ထိန်းချုပ်ခြင်းနဲ့ ရုပ်သေးရုပ် ထိန်းချုပ်ခြင်း လိုမျိုး နည်းလမ်းတွေကို သုံးပြီး နတ်ဘုရားစိတ်အာရုံကို မြှင့်တင်နိုင်ပါတယ်..."

"ကျွန်မပြောတာ မှန်လားလို့ သိချင်မိတယ်..."

-

ကျန်းထန်က နင်းဖန်ကို နောက်ပြောင်ကာ မျက်စိမှိတ်ပြလိုက်သည်။ နင်းဖန်ကမူ အပြင်ပန်းတွင် တည်ငြိမ်နေဟန်ပြသော်လည်း၊ တကယ်တမ်းတွင် စကားအားလုံးကို တစ်ခွန်းမကျန် ဂရုတစိုက် နားထောင်မှတ်သားနေခဲ့သည်။

အရာအားလုံး မှန်ကန်ကြောင်း အတည်ပြုပြီးနောက်မှသာ သူ ခေါင်းညိတ်လိုက်၏။ သူက လေးစားသော အမူအရာဖြင့် ပြောလိုက်သည်။

"အရမ်းကောင်းတယ် ဂျူနီယာညီမလေး၊ မင်းပြောတာတွေ အကုန်မှန်တယ်"

"မင်းရဲ့ မှတ်ဉာဏ်တွေ တကယ် ပြန်ရလာပြီ ပုံပဲ"

ကျန်းထန် ပြုံးရွှင်သွားပြီး ကျေးဇူးတင်စွာဖြင့် ပြောလိုက်သည်။

"စီနီယာအစ်ကို... ရှင်က တကယ်ကို ကောင်းတာပဲ... ကျွန်မကို ကျင့်ကြံဖို့ သင်ပေးတယ်၊ ပြီးတော့ အမှားတွေကို စစ်ဆေးဖို့ ကူညီပေးတယ်... ရှင်သာ မရှိရင် ကျွန်မ ဘယ်လောက်တောင် လမ်းလွဲသွားမလဲဆိုတာ မသိဘူး"

"ဘာမှ မဟုတ်ပါဘူး... ဒါက စီနီယာအစ်ကို လုပ်သင့်လုပ်ထိုက်တဲ့ အရာပဲလေ..."

နင်းဖန် ၏ နှလုံးသားထဲတွင်သာ တိတ်တဆိတ် သက်ပြင်းချလိုက်၏။

မှန်ပေသည်။ သူမသာ မရှိပါက... သူ မည်မျှပင် လမ်းလွဲသွားရမည်ကို မသိနိုင်တော့ချေ။

---