အခန်း (၁၂၃-၁၂၄)

အခန်း (၁၂၃) ဆေးဂိုဏ်း မဟာအကြီးအကဲ၏ ထက်မြက်သော အကြံအစည်၊ သစ်တောပင်လယ် ကြီး၏ အပြင်ဘက်တွင် ကျွမ်းကျင်သူများ ရှိနေသေးသလား

ဆေးဂိုဏ်း၏ မဟာအကြီးအကဲက ကောင်းကင်ယံတွင် သူ၏ မေးစေ့ကို ပွတ်သပ်ကာ စဉ်းစားခန်း ဝင်နေသော မျက်နှာထားဖြင့် ရေရွတ်လိုက်လေသည်။

"မျက်ကန်းစုံတွဲ ကြည့်ဖို့ လာရင်းနဲ့ ဒီလို မယုံနိုင်စရာကောင်းတဲ့ လျှို့ဝှက်ချက်ကြီးကို ကြားရလိမ့်မယ် လို့ ငါ မမျှော်လင့်ထားခဲ့မိဘူး…။ "

လွန်ခဲ့သော လေးရက်က သူသည် ဂိုဏ်း၏ သူတော်စင်မိန်းမပျိုကို ဤအပြင်ဘက်တောင်ထိပ် သစ်တောပင်လယ်ကြီးဆီသို့ ခေါ်ဆောင်လာခဲ့ပြီး၊ လက်ထပ်ဖို့ကမ်းလှမ်းရန်အတွက် ထိုက်ရီအစစ်အမှ န်ဂိုဏ်းသို့ သွားရောက်လည်ပတ်ရန် ရည်ရွယ်ခဲ့ခြင်း ဖြစ်လေသည်။

မည်သို့ပင်ဆိုစေ နတ်ဘုရားအဆင့် ဆေးဆရာတစ်ဦးမှာ အလွန်အမင်း ဆွဲဆောင်မှု ရှိလွန်းနေပေသည်။ ထိုကဲ့သို့သော ပုဂ္ဂိုလ်မျိုးက ဆေးဖော်စပ်ခြင်း မဟုတ်သော ဂိုဏ်းတစ်ခုတွင် မွေးဖွားလာခြင်းမှာ ရိုးရိုး ရှင်းရှင်း အပြစ်တစ်ခုပင် ဖြစ်၏။

ထို့ကြောင့် အကြိမ်ကြိမ် စဉ်းစားချင့်ချိန်ပြီးနောက် ဆေးဂိုဏ်း၏ မဟာအကြီးအကဲက ၎င်းအတွက် တိုက်ပွဲဝင်ရန် ဆုံးဖြတ်လိုက်လေသည်။

ဆယ်ရက်တိုင်တိုင် အလေးအနက် နားချပြီးနောက်၊ နောက်ဆုံးတွင် ကောင်မလေးက ထိုက်ရီအစစ် အမှန်ဂိုဏ်းသို့ လာရောက်လေ့လာရန် သဘောတူလိုက်လေ၏။

နှစ်ဦးစလုံးမှာ အလယ်ပိုင်းကုန်းမြေရှိ ထိပ်တန်း အင်အားစုများမှ လူငယ် ပါရမီရှင်များ ဖြစ်ကြရာ အဆင့်အတန်းအရ ကိုက်ညီမှု ရှိပေသည်။ သူတို့က အချင်းချင်း သိကျွမ်းရန် ကြိုးစားကြမည်ဖြစ်ပြီး၊ အကယ်၍ ရင်ခုန်သံ မရှိပါက ၎င်းကို လက်လွှတ်လိုက်မည် ဖြစ်လေသည်။

သို့ရာတွင် သူတို့သာ အဆင်ပြေသွားပါက၊ ဤနတ်ဘုရားအဆင့် ဆေးဆရာမှာ ဆေးဂိုဏ်း၏ သမက် ဖြစ်လာပေလိမ့်မည်။

အချိန်အလုံအလောက်နှင့် သူတို့၏ သူတော်စင်မိန်းမပျိုထံမှ ခေါင်းအုံးပေါ်က စကားလေး အချို့ဖြင့် ဆိုလျှင်၊ ဤနတ်ဘုရားအဆင့် ဆေးဆရာက မည်သည့်ဂိုဏ်းတွင် အမြဲတမ်း နေထိုင်ရန် ရွေးချယ်မည် ကို ပြောရန် ခက်ခဲသွားမည် ဖြစ်၏။

ဤအကြံအစည် သူ၏ စိတ်ထဲတွင် ပေါ်လာသည်နှင့် တစ်ပြိုင်နက်၊ ဆေးဂိုဏ်း၏ မဟာအကြီးအကဲမှာ စိတ်လှုပ်ရှားမှုများဖြင့် ပြည့်နှက်သွားလေသည်။ သူ၏ အမြင်တွင် သူ၏ ဂိုဏ်းမှ သူတော်စင်မိန်းမပျိုမှာ အလွန်တရာ လှပပြီး ပြီးပြည့်စုံသော ခန္ဓာကိုယ်ကို ပိုင်ဆိုင်ထားရာ၊ မည်သည့် လူငယ်ကမျှ သူမကို မနှစ်သက်ဘဲ နေနိုင်မည်မဟုတ်ချေ။

ဤမျက်ကန်းစုံတွဲ တွေ့ဆုံမှုမှာ သေချာပေါက် အောင်မြင်မည့် ကိစ္စတစ်ခု ဖြစ်ပေသည်။ သူမက ထို ကလေးကို အချစ်ရူး ရူးသွားအောင် သေချာပေါက် လုပ်နိုင်မည် ဖြစ်လေသည်။

ထို့ကြောင့် သူက သူတော်စင်မိန်းမပျိုကို ကျယ်ပြန့်သော သစ်တောပင်လယ်ကြီးဆီသို့ စိတ်လှုပ်ရှားစွာ ခေါ်ဆောင်လာခဲ့ပြီး၊ ဤလက်ထပ်ပွဲကို စီစဉ်နိုင်ခြင်း ရှိမရှိ သိရန်အတွက် ထိုက်ရီအစစ်အမှန်ဂိုဏ်း၏ အထက်လူကြီးများနှင့် သေချာစွာ ဆွေးနွေးရန် ရည်ရွယ်ခဲ့ပေ၏။

သို့ရာတွင် သူတို့ ရောက်ရောက်ချင်းမှာပင် အေးစက်သော ဆက်ဆံမှုကို ခံလိုက်ရလေသည်။

ပထမဦးစွာ အဆင့်မြင့် ကောင်းကင်အဆင့်ဟု ဆိုထားသော ထိုဂိုဏ်းကာကွယ်ရေး ဝင်္ကပါကြီး ရှိနေ ပေသည်။ ယင်းက အမှန်တကယ်ပင် ပွင့်နေဆဲ ဖြစ်၏။

ဒသမအဆင့် နတ်ဆေးလုံး မွေးဖွားလာချိန်က ဆေးဂိုဏ်း၏ မဟာအကြီးအကဲမှာ စိတ်လှုပ်ရှားဖွယ်ရာ ကို ကြည့်ရှုရန် အလျင်စလို ရောက်လာခဲ့ပြီး၊ ထိုအချိန်က ဝင်္ကပါမှာ လည်ပတ်နေခဲ့ပြီဖြစ်ကာ ကောင်းကင်လျှို့ဝှက်ချက်များကို ဖုံးကွယ်ထားခဲ့ကြောင်း သိထားရမည်ဖြစ်လေသည်။ ဆေးဂိုဏ်း၏ မဟာအကြီးအကဲမှာ နတ်ဘုရားအဆင့် ဆေးဆရာ၏ အစစ်အမှန် အသွင်အပြင်ကို တစ်ချက်မျှ မြင်တွေ့ရရန်အတွက် သူ၏ သွေးအဆီအနှစ်နှင့် သက်တမ်းကိုပင် လောင်ကျွမ်းရန် ဖိအားပေးခံခဲ့ရ၏။

ယခု ရက်ပေါင်း ဒါဇင်နှင့်ချီ ကြာပြီးနောက်၊ သစ်တောပင်လယ်ကြီးဆီသို့ ပြန်လာသောအခါ ဝင်္ကပါက ရှိနေဆဲ ဖြစ်လေသည်။

ထိုက်ရီအစစ်အမှန်ဂိုဏ်းတွင် ဝိညာဉ်ကျောက်တုံးများ အလွန်များပြားနေပြီး မသုံးနိုင်တော့သည့်အလား ကြီးကျယ်ခမ်းနားလှသော ကောင်းကင်အဆင့်မြင့် မဟာဝင်္ကပါကြီးတစ်ခုကို အချိန်ပြည့် ဖွင့်ထားခြင်း ဖြစ်ကြောင်း တွေးတောစရာပင်။

ဆေးဂိုဏ်း၏ မဟာအကြီးအကဲမှာ ကူကယ်ရာမဲ့ဖြစ်သွားပြီး ဂိတ်တံခါးဝတွင် ခေါ်ဆိုရန်အတွက် သူ၏ ဝိညာဉ်စွမ်းအင်ကို လည်ပတ်ကာ နတ်ဘုရားစွမ်းရည်တစ်ခုကို အသုံးပြုရုံသာ တတ်နိုင်တော့၏။

သို့ရာတွင် သူ၏ အသံက ကျယ်ပြန့်သော သစ်တောပင်လယ်ကြီး တစ်ခုလုံးသို့ ပျံ့နှံ့သွားသော်ငြား၊ သူ မည်သည့် တုံ့ပြန်မှုမျှ မရရှိခဲ့ချေ။ ဤသည်က သူ့ကို ခဏတာ ကြောင်အမ်းအမ်း ဖြစ်သွားစေလေသည်။

ထိုက်ရီအစစ်အမှန်ဂိုဏ်းက ဘာလုပ်နေသည်ကို သူ လုံးဝ မသိခဲ့ချေ။ ဆက်ခေါ်သင့် မခေါ်သင့် တွေဝေနေချိန်တွင်၊ သူ၏ အနောက်ဘက်ရှိ ဟင်းလင်းပြင်နယ်မြေကို ဖောက်ထွင်းလာသော အရှိန်အဝါ အချို့ကို သူ ရုတ်တရက် ခံစားလိုက်ရ၏။

ဤအရှိန်အဝါများတွင် ကြွယ်ဝသော မိုးကြိုးစွမ်းအင်များ ပါဝင်နေသော်ငြား၊ သူတို့က ၎င်းကို ဗြောင် ကျကျ မပြသရဲကြချေ။ ယင်းအစား သူတို့က ခိုးကြောင်ခိုးဝှက်ဖြစ်နေပြီး၊ အလွန်အမင်း ဖိနှိပ်ကာ ထိန်းချုပ်ထားကြလေသည်။

ဤသည်က ဆေးဂိုဏ်း၏ မဟာအကြီးအကဲကို ပြဿနာတစ်ခုခု ရှိနေကြောင်း ခံစားမိစေသဖြင့်၊ သူက အင်္ကျီလက်ကို ဝှေ့ယမ်းကာ သူ့ကိုယ်သူနှင့် သူတော်စင်မိန်းမပျိုကို ကြိုတင်၍ ဖုံးကွယ်ထားလိုက်၏။

ရလဒ်အနေဖြင့် မယုံနိုင်စရာ မြင်ကွင်းတစ်ခုက သူ၏ရှေ့တွင် ပေါ်လာတော့သည်။ သူတို့၏ ကိုယ်ပိုင် လက္ခဏာများကို ဖုံးကွယ်ထားပြီး အခြားဂိုဏ်းတစ်ခု၏ ဂိတ်တံခါးဝတွင် ခိုးကြောင်ခိုးဝှက် လုပ်နေ သော လူအုပ်စုမှာ အလယ်ပိုင်းကုန်းမြေရှိ ပထမတန်းစား အင်အားစုတစ်ခုဖြစ်သော ကောင်းကင် ကိုးထပ် မိုးကြိုးဂိုဏ်းမှ ဖြစ်နေလေသည်။

ထို့အပြင် ဂိုဏ်း၏ အဆင့်မြင့်အဖွဲ့ဝင်များ အားလုံးပင် ထိုနေရာတွင် ရှိနေကြ၏။

သူတို့ ရောက်ရောက်ချင်းမှာပင် ထူးဆန်းသော သူငယ်အိမ်များရှိသည့် အကြီးအကဲများထဲမှ တစ်ဦးက ထိုက်ရီအစစ်အမှန်ဂိုဏ်းအတွင်းသို့ ကြည့်ရှုရန် သူငယ်အိမ် နည်းစနစ်တစ်ခုကို ကျွမ်းကျင်စွာ အသုံးပြု လိုက်လေသည်။ တစ်ချိန်တည်းမှာပင် သူက ရေပြင်မှလမင်း ကြေးမုံမှပန်း နတ်ဘုရားစွမ်းရည်ကို အသုံးပြု၍ သူမြင်ရသော ပုံရိပ်များကို ထင်ဟပ်ပြသလိုက်၏။

ထိုအချိန်တွင် ဆေးဂိုဏ်း၏ မဟာအကြီးအကဲမှာ လုံးဝ ဆွံ့အသွားလေသည်။ ကောင်းကင်ကိုးထပ် မိုးကြိုးဂိုဏ်းမှ အကြီးအကဲများက ဤမျှ အကူအညီပေးပြီး သူတို့ရောက်လာသည်နှင့် တစ်ပြိုင်နက် သူ့အတွက် တိုက်ရိုက်ထုတ်လွှင့်မှုတစ်ခုကို ပြုလုပ်ပေးလိမ့်မည်ဟု သူ မမျှော်လင့်ထားခဲ့ချေ။

ထိုက်ရီအစစ်အမှန်ဂိုဏ်းအတွင်း မည်သို့သော အပြောင်းအလဲများ ဖြစ်ပေါ်ခဲ့ကြောင်းကို မသိရသဖြင့် သူ စိုးရိမ်နေခဲ့၏။ ယခုအခါ အရာအားလုံး ပြီးပြည့်စုံသွားလေပြီ။ မည်သည့် အားထုတ်မှုမျှ မပါဘဲ သူ လိုချင်သောအရာကို သူ ရရှိသွားခဲ့ပြီ ဖြစ်ပေသည်။

ထို့ကြောင့် သူက သူတော်စင်မိန်းမပျိုကို ခေါ်ဆောင်ကာ ဟင်းလင်းပြင်နယ်မြေထဲတွင် ပုန်းအောင်း နေပြီး ကောင်းကင်ကိုးထပ် မိုးကြိုးဂိုဏ်းမှ လူများနှင့်အတူ ကြည့်ရှုနေလိုက်လေသည်။

သူ မြင်တွေ့ခဲ့ရသောအရာက တစ်ဖန် ထူးခြားလှပေသည်။ ပြီးခဲ့သည့်အကြိမ်က သူ မြင်တွေ့ခဲ့ရသော နတ်ဘုရားအဆင့် ဆေးဆရာ တပည့်မှာ အမှန်တကယ်ပင် ကောင်းကင်အဆင့် မိုးကြိုးရေကန်ထဲတွင် ရုပ်ခန္ဓာကိုယ်သန့်စင်ခြင်းကို လုပ်ဆောင်နေလေသည်။

အစမှ အဆုံးတိုင်အောင် ဆေးဂိုဏ်း၏ မဟာအကြီးအကဲမှာ ပါးစပ်အဟောင်းသားဖြင့် ကြည့်နေခဲ့၏။ သူတော်စင်မိန်းမပျိုအတွက် သူ ရွေးချယ်ထားသော ဤခင်ပွန်းလောင်းမှာ ဆေးဖော်စပ်ခြင်းတွင် ပြိုင်ဘက်ကင်းရုံသာမက၊ သမိုင်းတစ်လျှောက် အားလုံးထက် သာလွန်သော ကျင့်ကြံခြင်း ပါရမီကိုပါ ပိုင်ဆိုင်ထားလိမ့်မည်ဟု သူ တစ်ခါမျှ စိတ်ကူးမယဉ်ခဲ့ဖူးချေ။

ကောင်းကင်မိုးကြိုးဖြင့် ခန္ဓာကိုယ်ကို သန့်စင်ခြင်း၊ နတ်ဘုရားအရိုးနှင့် နတ်ဘုရားကလီစာများကို သွန်းလုပ်ခြင်း၊ နှင့် လက်တစ်ဖက်တည်းတွင် ခွန်အား ဂျင်ဆယ့်ခြောက်သန်း ပိုင်ဆိုင်ထားခြင်းတို့ ပင်တည်း။

ယင်းက မည်သို့သော သဘောတရားမျိုးလဲဆိုသည်ကို ဆေးဂိုဏ်း၏ မဟာအကြီးအကဲက တွေးတောင် မတွေးရဲချေ။

ထို့အပြင် သူ့ကို ပို၍ပင် ရှုပ်ထွေးသွားစေသောအရာမှာ ဤကဲ့သို့ ပြိုင်ဘက်ကင်းသော ပါရမီရှင်တစ်ဦး နှင့် ရင်ဆိုင်ရချိန်တွင်...

...ကောင်းကင်ကိုးထပ် မိုးကြိုးဂိုဏ်းမှ လူများက သူ့ကို သတ်ရန် ရုတ်တရက် ဆုံးဖြတ်လိုက်ကြခြင်းပင် ဖြစ်ပေသည်။

လူ့ဦးနှောက်က ဤသို့ အလုပ်လုပ်သလားဟု သူ တွေးမိလေသည်။ ထိုသူမှာ ထိပ်တန်း အင်အားစုတစ်ခု ၏ အဓိက တပည့်တစ်ယောက်ဖြစ်ပြီး ဂိုဏ်းတစ်ခုလုံးက သူ့ကို အဖိုးတန် ရတနာတစ်ခုလို ဆက်ဆံကြ မည်မှာ သေချာလှပေသည်။

သို့ရာတွင် အဆင်အခြင်မဲ့သော လူမိုက်တစ်သိုက်က သူ့ကို ပုခက်ထဲမှာတင် သတ်ပစ်ရန် ကိုယ့်အသက် ကို စွန့်လောင်းတော့မည်ဖြစ်ရာ၊ ထိုက်ရီအစစ်အမှန်ဂိုဏ်းက သူတို့၏ ကောင်းကင်ကိုးထပ် မိုးကြိုး ဂိုဏ်းတစ်ခုလုံးကို အမှုန့်ဖြစ်အောင် ကြိတ်ချေပစ်မည်ကို တကယ်ပင် မကြောက်ကြသလားဟု တွေးတောစရာ ဖြစ်နေပေသည်။

သူ၏ ငယ်ရွယ်စဉ်ကာလက ဆေးဂိုဏ်း၏ မဟာအကြီးအကဲမှာလည်း အလယ်ပိုင်းကုန်းမြေရှိ ထူးချွန် သူတစ်ဦး ဖြစ်ခဲ့ပြီး၊ လက်ရှိ အဓိက အင်အားစု အသီးသီးမှ အကြီးအကဲများနှင့် ခေတ်ပြိုင် ပါရမီရှင် တစ်ဦး ဖြစ်ခဲ့ကာ သူတို့နှင့် နီးကပ်စွာ ဆက်သွယ်မှု ရှိခဲ့ဖူးလေသည်။

သူ၏ အသိပညာအရ ဂိုဏ်းချုပ် ဖေ့ချင်းယွီမှာ ခန့်ညားထည်ဝါပုံရသော်ငြား၊ သူသည် တကယ်တော့ အတော်လေး အကြောင်းအကျိုး ဆီလျော်သူ ဖြစ်ပေသည်။

သို့ရာတွင် ပထမတစ်ချက်ကြည့်လိုက်လျှင် သာမန်ဟု ထင်ရသော သူ၏ စီနီယာ၊ ဂျူနီယာ အစ်ကို အစ်မများ အဖွဲ့မှာ တကယ်တော့ အားလုံးတွင် ထူးခြားသော စွမ်းရည်များ ရှိကြလေသည်။

ဥပမာအားဖြင့် လျှို့ဝှက်ဓားတောင်ထိပ်မှ စီနီယာအစ်မ ယွီရူရွှမ်းမှာ နူးညံ့သိမ်မွေ့ပြီး သီလရှိပုံရကာ၊ လူတိုင်းကို အမြဲတမ်း ပြုံးပြတတ်လေသည်။ သို့ရာတွင် သူမ၏ လက်ထဲရှိ နတ်ဘုရားဓားကို ဆွဲထုတ် လိုက်သည်နှင့် တစ်ပြိုင်နက်၊ ကောင်းကင်အရှင်သခင် တစ်ဦးကိုပင် ခုတ်ပိုင်းရဲလေသည်။ သူမ ခုတ်ပိုင်းရန်အတွက် ကောင်းကင်ကိုးထပ် မိုးကြိုးဂိုဏ်းတွင် ခေါင်းမည်မျှ ရှိသနည်းဟု သူ တွေးမိ၏။

ထို့နောက် အငယ်ဆုံး ဂျူနီယာအစ်ကို ကျုံးတင်း ရှိသေးလေသည်။ သူက စားသောက်ခြင်းကိုသာ အပြည့်အဝ အာရုံစိုက်နေပြီး၊ အသွင်အပြင်မှာ ဝဝကစ်ကစ်လေးဖြစ်ကာ သူ့ကိုယ်သူ အစာအိမ်အိတ် ကောင်းကင်အရှင်သခင် ဟူသော ဘွဲ့ကို ပေးထား၏။

သူက လုံးဝ အန္တရာယ်မပေးနိုင်သူကဲ့သို့ ထင်ရလေသည်။ သို့ရာတွင် လက်တွေ့၌ သူ လှုပ်ရှားလိုက် သောအခါ သူ၏ ဧရာမ အစာအိမ်အိတ်ကြီးက ကောင်းကင်နှင့် မြေကြီးကို မျိုချနိုင်ပြီး၊ ရှေးဟောင်း အကြွင်းအကျန် မျိုးစိတ်များ၏ အသိုက်များကိုပင် ဝင်ရောက်စီးနင်းရဲပေသည်။

ကောင်းကင်ကိုးထပ် မိုးကြိုးဂိုဏ်း၏ မိုးကြိုးသိုင်းပညာများက မည်မျှပင် ကြမ်းတမ်းပါစေ အရွယ် ရောက်ပြီးသား ရှေးဟောင်းအကြွင်းအကျန် မျိုးစိတ်တစ်ကောင်နှင့် ယှဉ်နိုင်မည်မဟုတ်ချေ။

ထိုက်ရီအစစ်အမှန်ဂိုဏ်းတွင် ထိုကဲ့သို့သော အကြီးအကဲအဖွဲ့မျိုး ရှိနေသဖြင့်၊ အကယ်၍ နင်းဖန်သာ အနည်းငယ်မျှ ဒဏ်ရာရသွားပါက...

...ကောင်းကင်ကိုးထပ် မိုးကြိုးဂိုဏ်း တစ်ခုလုံးက ထိုနေ့မှာပင် ဖျက်ဆီးခံရလောက်ပြီး၊ ရွှံ့ထဲရှိ ပုရွက်ဆိတ်များကိုပင် နှစ်ပိုင်းခွဲခံရမည် ဖြစ်ပေသည်။

ထို့ကြောင့် ဆေးဂိုဏ်း၏ မဟာအကြီးအကဲမှာ သူတို့က ထိုက်ရီအစစ်အမှန်ဂိုဏ်းကို အဘယ်ကြောင့် အတင်းအကြပ် ဆန့်ကျင်နေကြသနည်း ဆိုသည်ကို လုံးဝ နားမလည်နိုင်ဖြစ်နေတော့၏။

မဟာအကြီးအကဲက သူ၏ မုတ်ဆိတ်ကို သပ်ကာ ပြုံးရင်း ပြောလိုက်လေသည်။

"ယွင်နီ... ကောင်းကင်ကိုးထပ် မိုးကြိုးဂိုဏ်းရဲ့ ပူးပေါင်းကြံစည်မှုကို ငါတို့ မတော်တဆ ရှာတွေ့သွား တာက ကံကြမ္မာအထောက်အပံ့တစ်ခုလို့ သတ်မှတ်လို့ရတယ်။ ငါတို့သာ ထိုက်ရီအစစ်အမှန်ဂိုဏ်းကို ကြိုတင် အသိပေးနိုင်ရင်၊ အဲဒါက ဖေ့ချင်းယွီကို သေချာပေါက် စိတ်လှုပ်ရှားစေပြီး လက်ထပ်ခွင့် တောင်းတာ အောင်မြင်နိုင်ခြေကို တိုးလာစေလိမ့်မယ်…။"

သူ၏ဘေးတွင် ဆေးဂိုဏ်း၏ သူတော်စင်မိန်းမပျိုက မျက်မှောင်အနည်းငယ် ကြုတ်ကာ ပြောလိုက် လေသည်။

"ဒါပေမယ့် ထိုက်ရီအစစ်အမှန်ဂိုဏ်းရဲ့ လက်ရှိ အခြေအနေက မရေရာသေးဘူး၊ ပြီးတော့ ဂိုဏ်းကာ ကွယ်ရေး ဝင်္ကပါက အမြဲတမ်း ဖွင့်ထားတယ်။ ငါတို့ဆီမှာ ဒီလောက် အရေးကြီးတဲ့ သတင်းအချက် အလက် ရှိနေရင်တောင် သူတို့ကို အသိပေးလို့မရဘူးလေ၊ မဟုတ်ဘူးလား…။"

ယင်းကိုကြားသောအခါ မဟာအကြီးအကဲ၏ အပြုံးက မှေးမှိန်သွားပြီး ပြောလိုက်လေသည်။

"အဲဒါက တကယ်ကို ပြဿနာတစ်ခုပဲ...။"

ထိုက်ရီအစစ်အမှန်ဂိုဏ်းက တကယ်တမ်း ဘာတွေလုပ်နေသနည်းဟု သူ မတွေးဘဲ မနေနိုင်တော့ချေ။

မဟာအကြီးအကဲ စဉ်းစားခန်းဝင်နေသည်ကို မြင်သောအခါ၊ သူတော်စင်မိန်းမပျို ယွင်နီက သူမ၏ နှုတ်ခမ်းနီနီလေးများကို ကိုက်ကာ တီးတိုးပြောလိုက်လေသည်။

"ငါတို့ ဒီကိစ္စကို မေ့လိုက်တာပဲ ကောင်းမယ်ထင်တယ်။ မိုးကြိုးရေကန်ထဲမှာ ရုပ်ခန္ဓာကိုယ်သန့်စင် နေတုန်းက နင်းဖန်က သူ့ဘေးက မိန်းကလေးတပည့်နဲ့ အရမ်း နီးကပ်နေတာကို ငါ မြင်ခဲ့တယ်။ သူ့မှာ တာအိုလက်တွဲဖော် ရှိနေပြီထင်တယ်...။"

သူမ စကားပြောနေစဉ်မှာပင် နောက်ဆုတ်ရန် ရည်ရွယ်ချက် ရှိနေပြီ ဖြစ်လေသည်။

ဆေးဂိုဏ်း၏ မဟာအကြီးအကဲက လက်တစ်ဖက်ကို မြှောက်ကာ ပြောလိုက်၏။

"ကိစ္စမရှိပါဘူး။ သူ့မှာ တာအိုလက်တွဲဖော် ရှိနေတော့ရော ဘာဖြစ်လဲ။ အဆိုးဆုံးဆို ငါတို့က မယားငယ်ပဲ လုပ်ကြတာပေါ့…။"

ယင်းကိုကြားသောအခါ ယွင်နီ၏ သန့်စင်သော မျက်လုံးများက မယုံကြည်နိုင်လောက်အောင် ပြူးကျယ်သွားကာ ရေရွတ်လိုက်လေသည်။

"မ... မယားငယ် လုပ်မယ်၊ ဟုတ်လား….။ "

ဂုဏ်သိက္ခာကြီးမားသော ဆေးဂိုဏ်း၏ သူတော်စင်မိန်းမပျို၊ ထိပ်တန်း အင်အားစုတစ်ခု၏ တိုက်ရိုက် မျိုးဆက်၊ ကောင်းကင်ကိုးထပ်မှ နတ်ဘုရားမတစ်ပါးကဲ့သို့သော ဖြစ်တည်မှုဖြစ်သည့် သူမက တစ်စုံ တစ်ယောက်၏ မယားငယ် ဖြစ်ရမည်ဟူသောအချက်ကို သူမ မယုံကြည်နိုင်အောင် ဖြစ်နေလေသည်။ မဟာအကြီးအကဲ စိတ်များ လွတ်သွားပြီလားဟုပင် တွေးမိလိုက်၏။

သို့ရာတွင် ဆေးဂိုဏ်း၏ မဟာအကြီးအကဲက လုံးဝ ဂရုမစိုက်ဘဲ တည်ငြိမ်စွာ ပြောလိုက်လေသည်။

"နင်းဖန်က နတ်ဘုရားအဆင့် ဆေးဆရာသက်သက် သို့မဟုတ် အထွတ်အထိပ်အခြေခံအုတ်မြစ်ရှိတဲ့ သာမန် တပည့်တစ်ယောက်သာ ဆိုရင်တော့၊ မင်းကို ကိုယ့်ကိုယ်ကိုယ် နှိမ့်ချခိုင်းမှာ မဟုတ်ပါဘူး…။"

"ဒါပေမယ့် သူက သာမန်လူတစ်ယောက်လား…။"

"မင်း ကိုယ်တိုင် မျက်စိနဲ့ မြင်ခဲ့တာပဲ။ အဲဒါက ဂျင် (၁.၆) သန်း မဟုတ်ဘူး၊ အပြည့်အဝ ဂျင် (၁၆) သန်းကြီးတောင်….။"

"ဒီလောက် ခိုင်မာတဲ့ အခြေခံအုတ်မြစ်နဲ့ ကမ္ဘာပေါ်မှာ တစ်ဦးတည်းသော နတ်ဘုရားအဆင့် ဆေးဆရာ ဆိုတဲ့ အဆင့်အတန်းနဲ့ဆိုတော့၊ ငါတို့က သူ့ရဲ့ ဒုတိယဇနီး ဖြစ်သွားတော့ရော ဘာဖြစ်လဲ။ အဲဒါက မကျေနပ်စရာတစ်ခု ဖြစ်နေဦးမလား…။"

မဟာအကြီးအကဲ၏ စကားများကို နားထောင်ရင်း... သူတော်စင်မိန်းမပျိုမှာ စကားပြောမထွက်တော့ ချေ။ သူမ၏ သန့်စင်ပြီး ချစ်စရာကောင်းသော ကလေးမျက်နှာလေးမှာ တွေဝေမှုများနှင့် အတွင်းပိုင်း ပဋိပက္ခများ ပြည့်နှက်နေလေသည်။

ရိုးရိုးသားသား ပြောရလျှင်၊ အစကတည်းက သူမက ထိုက်ရီအစစ်အမှန်ဂိုဏ်း၏ ဤနတ်ဘုရားအဆင့် ဆေးဆရာအပေါ် မည်သည့် စိတ်ဝင်စားမှုမျှ မရှိခဲ့ချေ။ ဤတစ်ကြိမ်တွင် မဟာအကြီးအကဲ၏ အဆက် မပြတ် ဆူပူနေမှုကို စိတ်အနှောင့်အယှက်ဖြစ်ရသဖြင့် လာရောက်ကြည့်ရှုရန်သာ ဆုံးဖြတ်ခဲ့ခြင်း ဖြစ်လေသည်။

သို့ရာတွင် နင်းဖန်က အလွန် ချောမောပြီး တောင့်တင်းသော ခန္ဓာကိုယ်နှင့် ထူးခြားသော အရှိန်အဝါ ရှိကြောင်း သူမ တွေ့ရှိခဲ့ရ၏။ သူ၏ အသွင်အပြင်ကို ကြည့်ရုံဖြင့်ပင်၊ သူက သူမ၏ အကြိုက်နှင့် အမှန်တကယ် ကိုက်ညီနေပေသည်။

သူ၏ နတ်ဘုရားအဆင့် ဆေးဆရာဆိုသည့် အဆင့်အတန်းနှင့် ပေါင်းစပ်လိုက်လျှင်၊ အကယ်၍ သူတို့ အတူတူရှိနေပြီး ဆေးဖော်စပ်ခြင်း တာအိုအကြောင်း ဆွေးနွေးနိုင်ပါက၊ သူတို့တွင် ပြောစရာ အကြောင်းအရာများ အဆုံးအစမရှိ ရှိနေမည်မှာ သေချာလှပေသည်။

ထို့ကြောင့် ယွင်နီက စိတ်ပြောင်းသွားပြီး ဤလက်ထပ်ပွဲကို အခြေခံအားဖြင့် သဘောတူခဲ့ပြီ ဖြစ်၏။ ယခုအခါ ထိုက်ရီအစစ်အမှန်ဂိုဏ်းက မည်သို့ ပြောဆိုမည်ဆိုသည့် အပေါ်တွင်သာ မူတည်နေတော့ သည်။

မည်သို့ပင်ဆိုစေ သူမ၏ သဘောတူညီမှု တစ်ခုတည်းက အသုံးမဝင်ချေ။ အဓိကအချက်မှာ နင်းဖန်၏ သဘောထား ဖြစ်ပေသည်။ သို့ရာတွင် ထိုက်ရီအစစ်အမှန်ဂိုဏ်း၏ ကာကွယ်ရေး ဝင်္ကပါကမူ ပျောက်ကွယ်သွားမည် မဟုတ်ကြောင်းကို မည်သူက တွေးမိမည်နည်း။

သူတို့က လုံးဝ ဝင်ရောက်၍မရဘဲ နင်းဖန် ကိုယ်တိုင်ကိုပင် မမြင်တွေ့နိုင်ခဲ့ချေ။

ထို့အပြင် သူနှင့် ခွဲမရအောင် ရှိနေသော အမျိုးသမီးတပည့်တစ်ဦး ရှိနေသေးလေသည်။ အမျိုးသမီး တစ်ဦး၏ ဆဋ္ဌမအာရုံကို အားကိုး၍ ယွင်နီက ထိုအမျိုးသမီးနှင့် နင်းဖန်တို့မှာ တာအိုလက်တွဲဖော် ဆက်ဆံရေး ရှိနေနိုင်ခြေ အလွန်များကြောင်း ခံစားမိလေသည်။

ထို့ကြောင့် သူမ အနည်းငယ် စိတ်ဓာတ်ကျသွားပြီး နောက်ဆုတ်ရန် ရည်ရွယ်ချက် ပေါ်လာခဲ့ခြင်း ဖြစ် ၏။ သို့ရာတွင် သူမ လက်လျှော့တော့မည့် အချိန်မှာပင် မဟာအကြီးအကဲက သူမကို မယားငယ် လုပ်နိုင်ကြောင်း ပြောလာလေသည်။

ဤစကားများ ပြောလိုက်သည်နှင့် တစ်ပြိုင်နက်၊ ဆေးဂိုဏ်း၏ သူတော်စင်မိန်းမပျိုမှာ တစ်ဖန် ပြန်လည် ပဋိပက္ခ ဖြစ်လာတော့၏။

သူတော်စင်မိန်းမပျို အချိန်အတော်ကြာ တိတ်ဆိတ်နေသည်ကို မြင်သောအခါ၊ ဆေးဂိုဏ်း၏ မဟာအကြီးအကဲက နှစ်သိမ့်စကား အချို့ ပြောလိုက်လေသည်။

"အရမ်းကြီး မတွေးပါနဲ့၊ အိမ်ထောင်ရေး ကိစ္စတွေမှာ ကံကြမ္မာကို သူ့ဖာသာသူ ဖြစ်ခွင့်ပေးလိုက်ရုံပါ ပဲ…။"

ထို့နောက် ခေါင်းစဉ်ပြောင်းကာ သူက ဆက်ပြောလိုက်လေ၏။

"ဒါပေမယ့် ငါတို့ ရသင့်ရထိုက်တာအတွက်တော့ တိုက်ပွဲဝင်ရဦးမယ်။ ကောင်းကင်ကိုးထပ် မိုးကြိုး ဂိုဏ်း ပြောသလိုပဲ၊ တာလော့ မဟာသားကောင်ရှာဖွေပွဲ စတင်တဲ့အခါ ထိုက်ရီအစစ်အမှန်ဂိုဏ်းက မပါဝင်ဘဲ နေပါ့မလား…။"

"အဲဒီအချိန်ရောက်ရင်၊ နင်းဖန်က ဂိုဏ်းကို ကိုယ်စားပြုပြီး တိုက်ပွဲဝင်ဖို့ အလားအလာ အလွန်များ တယ်…။"

"ပြီးတော့ ကောင်းကင်ကိုးထပ် မိုးကြိုးဂိုဏ်းရဲ့ မကောင်းတဲ့ ရည်ရွယ်ချက်တွေနဲ့ ပတ်သက်တဲ့ သတင်း အချက်အလက်တွေ ငါတို့လက်ထဲမှာ ရှိနေတော့၊ ငါတို့မှာ အားသာချက် ရှိတယ်။ အဲဒီအချိန်ရောက်ရင် မင်းက သူ့ဆီကို သတင်းအချက်အလက်တွေနဲ့ တိုက်ရိုက်သွားလို့ရတယ်။ သူက ကျေးဇူးတင်လွန်းလို့ မျက်ရည်ကျမသွားဘူးလား…။"

"အဲဒီနောက် မင်းတို့နှစ်ယောက်က သဘာဝကျကျ တွဲသွားနိုင်ပြီး၊ အပြန်အလှန် ဆက်ဆံမှု အချို့ရှိ လာရင်၊ အချစ်မီးပွားတွေ လွင့်စင်လာမှာ မဟုတ်ဘူးလား…။"

အဆုံးတွင် ဆေးဂိုဏ်း၏ မဟာအကြီးအကဲက မျက်စိမှိတ်ပြကာ အမူအရာများ ပြုလုပ်နေလေသည်။

သူတော်စင်မိန်းမပျို၏ ပါးပြင်များ လုံးဝ နီရဲသွား၏။ မဟာအကြီးအကဲက ဤမျှ ပွင့်ပွင့်လင်းလင်း ပြောလိမ့်မည်ဟု သူမ မမျှော်လင့်ထားခဲ့ချေ။

သူမက မျက်နှာနီရဲရဲနှင့် တိုးညင်းသော အသံဖြင့်သာ ပြန်ပြောနိုင်လေသည်။ "ယွင်နီ အကြီးအကဲရဲ့ အစီအစဉ်တွေ အားလုံးကို လိုက်နာပါ့မယ်…။"

"ကောင်းတယ်" ဟု မဟာအကြီးအကဲက ပြောလိုက်လေသည်။

ဆေးဂိုဏ်း၏ မဟာအကြီးအကဲ၏ မျက်နှာပေါ်တွင် စိတ်သက်သာရာရသွားသော အပြုံးတစ်ခု ပေါ်လာ ခဲ့၏။ သူ၏ အင်္ကျီလက်ကို ဝှေ့ယမ်းလိုက်ရာ၊ သူတို့နှစ်ဦးမှာ ဤသစ်တောပင်လယ်ကြီးမှ ထွက်ခွာသွား ပြီး ချက်ချင်း ပျောက်ကွယ်သွားလေတော့သည်။

သူတို့ ထွက်သွားပြီး မကြာမီမှာပင်...

...တိတ်ဆိတ်သော သစ်တောပင်လယ်ကြီး အထက်တွင် သူတို့ ရပ်နေခဲ့သော နေရာနှင့် မလှမ်းမကမ်းရှိ ဟင်းလင်းပြင်နယ်မြေ၌...

...လေထုက အနည်းငယ် တုန်ခါသွားပြီး လှိုင်းများထကာ အရိပ်နှစ်ခု ပေါ်လာလေသည်။

နှစ်ဦးစလုံးမှာ အမျိုးသားများ ဖြစ်ကြပြီး၊ ဘယ်ဘက်ရှိသူမှာ လူလတ်ပိုင်းအရွယ်ရှိပုံရကာ ခန့်ညား ထည်ဝါသော အရှိန်အဝါ ရှိလေသည်။ ညာဘက်ရှိသူမှာ ပိုမို ငယ်ရွယ်ပြီး ပါရမီရှင်တစ်ဦး၏ တက်ကြွ သော အရှိန်အဝါ ရှိလေ၏။

သူတို့ ဝတ်ဆင်ထားသော ဝတ်စုံများ၏ ရင်ဘတ်ပေါ်တွင် ရှေးဟောင်းသစ်ပင်ကြီးတစ်ခု၏ တံဆိပ်ကို ထိုးနှက်ထားလေသည်။ ဤသည်ကို ကျန်းမုနက်နဲသိမ်မွေ့နန်းတော်၏ သင်္ကေတအဖြစ် သေချာပေါက် မှတ်မိမည် ဖြစ်ပေသည်။

ပြီးတော့ ဤအချိန်တွင်...

ကျန်းမုနက်နဲသိမ်မွေ့နန်းတော်၏ တာအိုအရှင်သခင်နှင့် သူ၏ဘေးရှိ လူငယ်လေးတို့က...

...ကောင်းကင်ကိုးထပ် မိုးကြိုးဂိုဏ်းမှ လူများနှင့် ဆေးဂိုဏ်း အကြီးအကဲတို့ မကြာမီက ရပ်နေခဲ့သော နေရာဆီသို့ အတူတကွ ကြည့်လိုက်ကြလေသည်။

ထို့နောက် သူတို့ အချင်းချင်း ကြည့်လိုက်ကြချိန်တွင်၊ သူတို့၏ မျက်လုံးများထဲ၌ နက်ရှိုင်းသော အံ့အားသင့်မှုများ ပြည့်နှက်နေတော့သည်။

အခန်း (၁၂၄) ငါက ပထမထပ်မှာ ရှိနေတယ်လို့ မင်းထင်နေတာလား၊ တကယ်တော့ ငါက တတိယ ထပ်မှာ ရှိနေတာ

နက်နဲသိမ်မွေ့နန်းတော်၏ တာအိုအရှင်သခင်က သူ၏ မေးစေ့ကို ပွတ်သပ်လိုက်ရာ သူ၏ မျက်လုံးများ တွင် ရယ်မောချင်စိတ်များ ပြည့်နှက်နေကာ ပြောလိုက်လေသည်။

"ဂိုဏ်းကို လာလည်ရုံနဲ့ ဒီလို ထူးဆန်းတဲ့ ဖြစ်ရပ်နှစ်ခုကို ကြုံရလိမ့်မယ်လို့ ငါ တကယ် မမျှော်လင့်ထား ခဲ့ဘူး…။"

လွန်ခဲ့သော လေးရက်ခွဲခန့်က သူသည် နက်နဲသိမ်မွေ့နန်းတော်၏ တာအိုကျင့်ကြံသူကို ခေါ်ဆောင်ကာ ဂိုဏ်းသို့ အလည်အပတ် လာရောက်ခဲ့ခြင်း ဖြစ်လေသည်။

အလည်အပတ်ဟု ခေါ်ဆိုသော်ငြား၊ အဓိက ရည်ရွယ်ချက်မှာ ထိုနတ်ဘုရားအဆင့် ဆေးဆရာနှင့် တွေ့ဆုံရန်ဖြစ်ပြီး၊ ကြုံကြိုက်သဖြင့် နက်နဲသိမ်မွေ့နန်းတော်၏ တာအိုကျင့်ကြံသူအတွက် ဆေးလုံး အချို့ကို တောင်းခံရန် ဖြစ်ပေသည်။

ထိုကဲ့သို့သော ကိစ္စရပ်မှာ အခြားသူများ၏ အမြင်တွင် စိတ်ကူး၍မရနိုင်လောက်အောင် ဖြစ်နိုင် သော်ငြား၊ ကျန်းမုနက်နဲသိမ်မွေ့နန်းတော်အတွက်မူ ခက်ခဲသော အရာမဟုတ်ချေ။

မည်သို့ပင်ဆိုစေ ကျန်းမုနက်နဲသိမ်မွေ့နန်းတော်နှင့် ထိုက်ရီအစစ်အမှန်ဂိုဏ်းတို့မှာ မိသားစု မိတ်ဆွေ များ ဖြစ်ကြကြောင်းကို အလယ်ပိုင်းကုန်းမြေရှိ လူတိုင်း သိကြလေသည်။ သူတို့၏ ဘိုးဘေးကြီး မျိုးဆက်ကတည်းက၊ ဂိုဏ်းနှစ်ခုမှာ တစ်ခုကိုတစ်ခု ထောက်ပံ့ခဲ့ကြပြီး မကြာခဏ အပြန်အလှန် ဆက်သွယ်မှုများ ရှိခဲ့ကြ၏။

အသွေးထွက်သံယို အများဆုံးနှင့် ကမောက်ကမ အဖြစ်ဆုံး အချိန်များတွင်ပင်၊ သူတို့က သေသည် အထိ မတိုက်ခိုက်ခဲ့ကြဘဲ အချင်းချင်းအတွက် လမ်းဖွင့်ပေးထားရန်သာ ရွေးချယ်ခဲ့ကြလေသည်။

ထို့ကြောင့် ဤခင်မင်ရင်းနှီးမှုကို အားကိုး၍၊ ဖေ့ချင်းယွီကို ထိုနတ်ဘုရားအဆင့် ဆေးဆရာနှင့် မိတ်ဆက်ပေးရန် သူ တောင်းဆိုနိုင်မလားဆိုသည်ကို နက်နဲသိမ်မွေ့နန်းတော်၏ တာအိုအရှင်သခင်က စဉ်းစားခဲ့ခြင်း ဖြစ်ပေသည်။ သူတို့အတွက် ဆေးလုံး အချို့ပါ ရနိုင်လျှင် အကောင်းဆုံး ဖြစ်မည်။

ဒသမအဆင့် နတ်ဆေးလုံးကို သူ မတောင်းဆိုသော်ငြား၊ နောက်ထပ် နဝမအဆင့် သူတော်စင်ဆေးလုံး အနည်းငယ်ဆိုလျှင်လည်း လုံလောက်ပေသည်။ ဈေးနှုန်းကို ညှိနှိုင်း၍ ရနိုင်လေသည်။

ကျန်းမုနက်နဲသိမ်မွေ့နန်းတော်မှာ ချမ်းသာပြီး ဩဇာအာဏာ ကြီးမား၏။ သူတို့၏ တပည့်ကို ပျိုးထောင်ရန်အတွက် မည်သည့်အရာကိုမဆို ထုတ်ပေးရန် ဆန္ဒရှိကြလေသည်။ ထို့အပြင် ဖေ့ချင်းယွီ က ငြင်းဆိုမည်ကိုလည်း သူ မကြောက်ချေ။

မည်သို့ပင်ဆိုစေ သူက ဖေ့ချင်းယွီ၏ အားနည်းချက်ကို သူ၏ လက်ထဲတွင် ကိုင်ထားဆဲ ဖြစ်လေသည်။

လွန်ခဲ့သော နှစ်နှစ်ထောင်က ဤကောင်လေးမှာ သူတော်စင်တစ်ဦး ဖြစ်နေဆဲအချိန်တွင်၊ တာအိုအ ကြောင်း ဆွေးနွေးရန်အတွက် သူ၏ဂိုဏ်းနှင့်အတူ ကျန်းမုနက်နဲသိမ်မွေ့နန်းတော်သို့ လိုက်ပါလာခဲ့၏။ ထိုအချိန်က ဂိုဏ်းနှစ်ခုမှာ နက်ရှိုင်းသော ဖလှယ်မှုများ ပြုလုပ်ခဲ့ကြပြီး၊ သူတို့၏ တပည့်များကလည်း မကြာခဏ ယှဉ်ပြိုင်တိုက်ခိုက်ခဲ့ကြကာ၊ အခြေခံအားဖြင့် အတွဲလိုက် တိုက်ခိုက်ခဲ့ကြခြင်း ဖြစ်လေ သည်။

သူတော်စင်တစ်ဦးအနေဖြင့် ဖေ့ချင်းယွီကို သဘာဝကျကျပင် ကျန်းမုနက်နဲသိမ်မွေ့နန်းတော်၏ သာမန် တပည့်တစ်ဦးနှင့် တွဲပေး၍ မရနိုင်ချေ။ ထို့ကြောင့် သူ၏ ပြိုင်ဘက်မှာ ထိုအချိန်က နက်နဲသိမ်မွေ့ နန်းတော်၏ တာအိုမိန်းမပျို ဖြစ်လေသည်။

အစပိုင်းတွင် ဖေ့ချင်းယွီက ထိုတာအိုမိန်းမပျိုကို လျစ်လျူရှုထားပြီး ဂုဏ်ယူဝင့်ကြွားသော ပါရမီရှင် တစ်ဦး၏ အမူအရာကို ပြသနေခဲ့၏။ သို့ရာတွင် နှစ်လမပြည့်မီမှာပင် အခြေအနေက ပြောင်းလဲသွားခဲ့ လေသည်။

ဖေ့ချင်းယွီက နက်နဲသိမ်မွေ့နန်းတော်၏ တာအိုမိန်းမပျို ပတ်ဝန်းကျင်တွင် အချိန်ဖြုန်းနေခဲ့ပြီး၊ သူမ၏ နေထိုင်ကောင်းမွန်မှုအတွက် စိုးရိမ်ပူပန်မှုများကို ပြသနေခဲ့တော့၏။

အလှလေးက အရှေ့ပိုင်း တောရိုင်းနယ်မြေ၏ နက်ရှိုင်းသောနေရာတွင် ထွက်ရှိသည့် ကောင်းကင်နက်နဲ သိမ်မွေ့ စိတ်ဝိညာဉ်သစ်သီးကို စားချင်သည်ဟု ပြောလိုက်သောကြောင့်သာ၊ သူက အလယ်ပိုင်းကုန်း မြေမှ ကိုယ်တိုင် ထွက်ခွာသွားရန် မတွေဝေခဲ့ဘဲ ၎င်းကို ခူးယူရန် တစ်နှစ်ကျော် အချိန်ယူခဲ့လေသည်။ သူ့ကို လုံးဝ အချစ်ရူး ရူးသွားသည်ဟု ပြောမည်ဆိုလျှင် ချဲ့ကားပြောဆိုရာ ရောက်မည် မဟုတ်ချေ။

ထို့အပြင် နက်နဲသိမ်မွေ့နန်းတော်၏ တာအိုအရှင်သခင် လက်ထဲရှိ အားနည်းချက်မှာ ထိုစဉ်က ဖေ့ချင်းယွီက နက်နဲသိမ်မွေ့နန်းတော်၏ တာအိုမိန်းမပျိုထံ ရေးသားခဲ့သော ရည်းစားစာတစ်စောင် ဖြစ်လေသည်။

အကြောင်းအရာမှာ အလွန် ချွဲပြစ်လွန်းသဖြင့် ကြည့်ရန်ပင် ခက်ခဲလှပေသည်။ ကံကောင်းထောက် မစွာဖြင့် ဤရည်းစားစာမှာ နက်နဲသိမ်မွေ့နန်းတော်၏ တာအိုအရှင်သခင် လက်ထဲသို့ ကျရောက် သွားခဲ့လေ၏။

ထိုအချိန်က သူသည် ၎င်းကို ဖတ်ပြီးနောက် သုံးရက်နှင့် သုံးညတိုင်တိုင် ရယ်မောခဲ့ရာ၊ ဖေ့ချင်းယွီမှာ အလွန်အမင်း ဒေါသထွက်သွားပြီး သူ့ကို အကြိမ်ကြိမ် ဓားထုတ်ကာ ရန်ပြုခဲ့လေသည်။ သို့ရာတွင် ထိုသို့ဖြစ်စေကာမူ၊ နက်နဲသိမ်မွေ့နန်းတော်၏ တာအိုအရှင်သခင်က ရည်းစားစာကို သူ့ထံ ပြန်မပေးခဲ့ ဘဲ၊ ယနေ့တိုင်အောင် သူ၏ သိုလှောင်ရေးလက်စွပ်၏ အနက်ရှိုင်းဆုံး အစိတ်အပိုင်းတွင် သိမ်းဆည်း ထားဆဲ ဖြစ်လေသည်။

"ဒီလျှို့ဝှက်ချက်ကို မင်းတစ်သက်လုံး ဆန့်ကျင်ဖို့ ငါ သိမ်းထားမယ်…။" ဟု နက်နဲသိမ်မွေ့နန်းတော်၏ တာအိုအရှင်သခင်က ကြီးကျယ်သော သစ္စာတစ်ခု ဆိုခဲ့ပြီး၊ သူ၏ တစ်သက်တာလုံး ဖေ့ချင်းယွီကို ခြိမ်းခြောက်ရန် ဤရည်းစားစာကို အသုံးပြုမည်ဟု ဆုံးဖြတ်ခဲ့လေသည်။

ထို့ကြောင့်ပင် သူက ဆေးလုံးများ လဲလှယ်ရန်အတွက် ဤမျှ ကြီးကျယ်ခမ်းနားစွာ ရောက်လာခဲ့ခြင်း ဖြစ်၏။ ဖေ့ချင်းယွီက မရောင်းဘဲ မနေရဲချေ။

သို့ရာတွင် အံ့ဩစရာကောင်းသည်မှာ၊ သူ သစ်တောပင်လယ်ကြီးသို့ ရောက်ရှိလာသောအခါ၊ ထိုက်ရီ အစစ်အမှန်ဂိုဏ်း တစ်ခုလုံးကို ပိတ်ထားခဲ့လေသည်။

ဂိုဏ်းကာကွယ်ရေး မဟာဝင်္ကပါကြီးမှာ ဖွင့်ထားဆဲဖြစ်ပြီး၊ အတွင်းရှိ မြင်ကွင်းကို လုံးဝ မြင်တွေ့ရန် မဖြစ်နိုင်ချေ။ နက်နဲသိမ်မွေ့နန်းတော်၏ တာအိုအရှင်သခင်က ဖေ့ချင်းယွီထံ စာတိုပေးပို့ရန် ဝိညာဉ်ရေး ရာ ကျောက်စိမ်းပြားတစ်ခုကို အသုံးပြုခဲ့သော်ငြား၊ သမုဒ္ဒရာထဲသို့ ကျောက်ခဲတစ်လုံး ပစ်ချလိုက် သကဲ့သို့ ဖြစ်နေခဲ့၏။

ဤသည်က ထိုလူအိုကြီး ဖေ့ချင်းယွီက သူ့ကို တမင်တကာ ရှောင်နေသလားဆိုသည်ကို ခဏတာ သံသယဝင်သွားစေခဲ့ပြီး၊ ထို့ကြောင့်ပင် သူက မဟာဝင်္ကပါကြီးကို ဖွင့်ထားခြင်း ဖြစ်နိုင်သည်ဟု တွေးမိလေသည်။

ထို့နောက်... ဆေးဂိုဏ်း၏ မဟာအကြီးအကဲ၏ အရှိန်အဝါကို သူ ခံစားမိလိုက်၏။

နက်နဲသိမ်မွေ့နန်းတော်၏ တာအိုအရှင်သခင်က အကယ်၍ ဖေ့ချင်းယွီသာ သူ့ကို တမင်တကာ ရှောင် နေခြင်းဖြစ်ပါက၊ ယင်းက သူ့ကိုသာ ပစ်မှတ်ထားခြင်း ဖြစ်ရမည်ဟု ချက်ချင်း တွေးမိလိုက်လေသည်။ ဆေးဂိုဏ်းမှ လူများ ဤနေရာတွင် ရှိနေသဖြင့်၊ သူက မဟာဝင်္ကပါကြီးကို ဆက်လက် ဖွင့်ထားပြီး သူတို့ကို အထဲမဝင်ခိုင်းဘဲ နေရန် မဖြစ်နိုင်ချေ။

ထို့ကြောင့် နက်နဲသိမ်မွေ့နန်းတော်၏ တာအိုအရှင်သခင်က ထွက်သွားဟန်ဆောင်ခဲ့သော်ငြား၊ နက်နဲ သိမ်မွေ့နန်းတော်၏ တာအိုကျင့်ကြံသူကို ခေါ်ဆောင်သွားပြီးနောက်၊ သူက ဟင်းလင်းပြင်နယ်မြေ ထဲတွင် ပုန်းအောင်းကာ ပြန်လာခဲ့လေသည်။

ရလဒ်အနေဖြင့် ထို့နောက် ဖြစ်ပျက်ခဲ့သမျှမှာ သူ၏ မျှော်လင့်ချက်များကို လုံးဝ ကျော်လွန်သွားခဲ့၏။

ပထမဦးစွာ ဆေးဂိုဏ်း၏ မဟာအကြီးအကဲလည်း အခက်အခဲနှင့် ကြုံတွေ့ခဲ့ရပြီး သူ၏ တံခါးခေါက် သံကို မည်သည့် တုံ့ပြန်မှုမျှ မရရှိခဲ့ချေ။

ဒုတိယအနေဖြင့် ကောင်းကင်ကိုးထပ် မိုးကြိုးဂိုဏ်းမှ လူများ ရောက်ရှိလာပြီး၊ ထိုက်ရီအစစ်အမှန် ဂိုဏ်းတွင် အဖြစ်အပျက်တစ်ခု ဖြစ်ပွားခဲ့ကြောင်းကို သူတို့ ကြိုတင် သိရှိထားပုံရလေသည်။ သူတို့ ရောက်ရောက်ချင်းမှာပင် သူငယ်အိမ် နည်းစနစ်များကို အသုံးပြုကာ နတ်ဘုရားစွမ်းရည် ပုံရိပ်ယောင် တစ်ခုကို ဖွင့်လှစ်လိုက်ကြ၏။

ရလဒ်အနေဖြင့်…၊ အခြေအနေမှာ ထူးဆန်းသွားလေသည်။

ကောင်းကင်ကိုးထပ် မိုးကြိုးဂိုဏ်းက အပြင်ဘက်ဆုံးမှ ကြည့်ရှုနေပြီး၊ ထိုက်ရီအစစ်အမှန်ဂိုဏ်း ကဲ့သို့ သော ထိပ်တန်း အင်အားစုတစ်ခု၏ ပတ်ဝန်းကျင်တွင် အခြားမည်သူမျှ ရှိနေမည် မဟုတ်ဟု ယုံကြည် နေကြလေသည်။

သို့ရာတွင် လက်တွေ့၌၊ သူတို့၏ ခေါင်းပေါ် မလှမ်းမကမ်းတွင်၊ ဆေးဂိုဏ်း၏ မဟာအကြီးအကဲနှင့် သူတော်စင်မိန်းမပျိုတို့က သူတို့ကို တိတ်တဆိတ် စောင့်ကြည့်နေခဲ့ကြလေ၏။

ထို့အပြင် ဆေးဂိုဏ်းမှ ဤနှစ်ဦးကလည်း ဤနေရာတွင် သူတို့၏ အဖွဲ့နှစ်ဖွဲ့သာ ရှိသည်ဟု ထင်နေကြ လေသည်။

သူတို့ရှိနေသော နေရာထက် ပိုမြင့်သော နေရာတစ်ခုတွင်၊ နက်နဲသိမ်မွေ့နန်းတော်၏ တာအိုအရှင်သခင် နှင့် နက်နဲသိမ်မွေ့နန်းတော်၏ တာအိုကျင့်ကြံသူတို့လည်း စောင့်ကြည့်နေကြောင်းကို သူတို့ အနည်းငယ် မျှ မသိခဲ့ကြချေ။

တကယ်ပါပဲ၊ ပထမထပ်က လုံခြုံတယ်လို့ မင်း ထင်နေပေမယ့်၊ တကယ်တော့ ဒုတိယထပ်မှာ လူတွေ ရှိနေတယ်။ ဒုတိယထပ်က စိုးရိမ်စရာ မရှိဘူးလို့ မင်း ထင်နေပေမယ့်၊ တတိယထပ်မှာတော့ လူတွေ ပြည့်နေပြီလေ။

ဒီလှိုင်းကတော့ တစ်ခုနဲ့တစ်ခု ဆက်စပ်နေတာပဲ။

နက်နဲသိမ်မွေ့နန်းတော်၏ တာအိုအရှင်သခင်က ရုတ်တရက် သတိဖြင့် မော့ကြည့်လိုက်ကာ သူ၏ နတ်ဘုရားအာရုံနှင့် အာရုံငါးပါးကို လွှတ်ပေး၍ သေချာစွာ စစ်ဆေးလိုက်ရင်း တွေးမိလေသည်။

"ရှုး... ငါ့အထက်မှာ တခြားလူများ ရှိနေဦးမလား…။ "

ယုံကြည်စိတ်ချမှု မရှိသေးသဖြင့်၊ သူ၏ ကိုယ်ပိုင် အတည်ပြုခြင်း တာအိုကိုပင် လွှတ်ပေးလိုက်ပြီး အဆုံးအစမဲ့သော တာအိုစည်းချက်များဖြင့် အာရုံခံလိုက်၏။ ထိုအခါမှသာ သူ့နောက်တွင် ဤနေရာ၌ အခြားမည်သူမျှ မရှိကြောင်းကို သူ အတည်ပြုနိုင်တော့သည်။

ဤအချိန်တွင် သူ၏ဘေးရှိ နက်နဲသိမ်မွေ့နန်းတော်၏ တာအိုကျင့်ကြံသူက အနည်းငယ် ဝမ်းနည်းစွာ ဖြင့် မေးလိုက်လေသည်။

"ဆရာ... ကျွန်တော်တို့ ဆေးလုံးတွေ လဲလို့ရဦးမလား…။"

နက်နဲသိမ်မွေ့နန်းတော်၏ တာအိုအရှင်သခင်က မျက်လုံးလှန်ကာ ပြောလိုက်လေသည်။

"အခု ငါတို့က ဘာနဲ့များ လဲလို့ရတော့မှာလဲ။ ထိုက်ရီအစစ်အမှန်ဂိုဏ်း တစ်ခုလုံး ပျောက်ကွယ်နေပြီး သူတို့ ဘယ်လို လှည့်ကွက်မျိုး ကစားနေလဲဆိုတာ ငါ မသိဘူး။ လောလောဆယ်တော့ ဘာရလဒ်မှ ရှိမှာမဟုတ်ဘူးလို့ ငါ ခန့်မှန်းမိနေတယ်…။"

ထို့နောက် ကောင်းကင်ကိုးထပ် မိုးကြိုးဂိုဏ်း ရပ်နေခဲ့သော နေရာကို ကြည့်ကာ လှောင်ပြောင်လိုက် လေသည်။

"ဒါပေမယ့် ဒီဂိုဏ်းချုပ်က ငါတို့ ထိပ်တန်း အင်အားစုတွေကို ရန်စရဲလောက်အောင် တကယ်ကို သတ္တိရှိတာပဲ…။"

"သူက အဲဒီ နင်းဖန်ကို အရေးယူချင်နေတာ၊ သူ့ကို ဘယ်လိုလုပ် အလွယ်တကူ ခွင့်ပြုပေးနိုင်မှာလဲ…။"

"မလုပ်ရင် ကမ္ဘာကြီးက ငါတို့ ထိပ်တန်း အင်အားစုတွေကို အနိုင်ကျင့်ရလွယ်တယ်၊ တပည့်တစ် ယောက်ကိုတောင် မကာကွယ်နိုင်ဘူးလို့ ထင်သွားလိမ့်မယ်…။"

စကားပြောနေစဉ် မကောင်းဆိုးဝါး ချီစွမ်းအင်များက သူ၏ ခန္ဓာကိုယ်မှ ပေါက်ကွဲထွက်လာလေသည်။

ယင်းကို ကြားသောအခါ နက်နဲသိမ်မွေ့နန်းတော်၏ တာအိုကျင့်ကြံသူက အလျင်အမြန် ညွှန်ကြားချက် တောင်းခံလိုက်၏။ "ဆရာ... ကျွန်တော်တို့က ထိုက်ရီအစစ်အမှန်ဂိုဏ်းအတွက် သူတို့ကို သုတ်သင် ရှင်းလင်းဖို့ မိုးကြိုးဂိုဏ်းဆီ သွားပြီး တိုက်ခိုက်တော့မလို့လား….။"

"အဲဒါက သဘာဝကျကျ မလိုအပ်ပါဘူး…။"

ဟု နက်နဲသိမ်မွေ့နန်းတော်၏ တာအိုအရှင်သခင်က ခေါင်းခါကာ ပြောလိုက်လေသည်။

ထိပ်တန်း အင်အားစုတစ်ခုအနေဖြင့်၊ အကြောင်းပြချက်မရှိဘဲ အခြားဂိုဏ်းများကို သူတို့ မည်သို့ တိုက်ခိုက်နိုင်မည်နည်း။ အကယ်၍ ထိုသို့သာ ဖြစ်နိုင်ပါက၊ ကမ္ဘာပေါ်ရှိ အကြီးအသေး အင်အားစုများ အားလုံးမှာ အန္တရာယ်ရှိနေမည်ဖြစ်ပြီး ကမ္ဘာကြီးမှာ ကာလကြာရှည်စွာ ကမောက်ကမ ဖြစ်နေခဲ့မည် ဖြစ်ပေသည်။ သူက ခဏတာ စဉ်းစားပြီးနောက် ပြောလိုက်လေသည်။

"တပည့်...၊ တာလော့ မဟာသားကောင်ရှာဖွေပွဲ စတင်ပြီးရင် မင်းသွားပြီး အဲဒီ နင်းဖန်ကို ကူညီ ပေးလိုက်…။"

"စကားမစပ် ဆေးဂိုဏ်းရဲ့ ကောင်းတဲ့ အပြုအမူတွေကို ဖျက်ဆီးပစ်လိုက်…။"

"ဒီသရဲအိုကြီးက အလှမယ် ထောင်ချောက်ကို အသုံးပြုပြီး လူတွေကို ခိုးယူဖို့ ထိုက်ရီအစစ်အမှန် ဂိုဏ်းဆီကို တကယ် ပြေးလာချင်နေတာလား…။"

"ငါသာ ဒီနင်းဖန်ကို မကာကွယ်နိုင်ဘဲ သူ့ကို ဆေးဂိုဏ်းထဲ သွေးဆောင်ခံလိုက်ရရင်၊ ဖေ့ချင်းယွီ ပြန်လာ တဲ့အခါ ငါ့ကို သူ့တံတွေးတွေနဲ့ နစ်သေအောင် လုပ်မှာ မဟုတ်ဘူးလား…။"

"သူ့ရဲ့ အဓိပ္ပါယ်မရှိတဲ့ စကားတွေကို နားထောင်ဖို့ ငါ အရမ်း ပျင်းနေတယ်….။"