အခန်း (၁၄၄၁-၁၄၄၂)
Vol. 145 Ch. 1441-1442
အခန်း (၁၄၄၁) - ဖူထူလောကရဲ့ နက်ရှိုင်းတဲ့ ရေအိုင်
“သူက ကျမရဲ့ အဖွဲ့ဝင်ပဲ”
ကြာနီနတ်မိမယ်က ထိုအမာခံတပည့်ကို ကြည့်လိုက်ရာ သူမ၏ အကြည့်များမှာ အေးစက်လှသည်
“စီနီယာအစ်မကြီး သေခါနီးမှာ ဒီစကားကို တကယ်ပြောသွားခဲ့တာ၊ သူက ပြန်ပြောပြတာပဲရှိတာ၊ ဘာပြဿနာရှိလို့လဲ ”
“စီနီယာအစ်မကြီး သေဆုံးရတဲ့ ကိစ္စမှာ ဘက်ပေါင်းစုံက ပြဿနာတွေ ရှိနေတာ အမှန်ပဲ။ ဒီကိစ္စ ပတ်သက်ဆက်နွှယ်မှုက ငါတို့ ထင်ထားတာထက် ပိုပြီး ကျယ်ပြန့်နိုင်တယ်။ အကြီးအကဲများကောင်စီ ဘက်ကလည်း... ကိုယ့်ကိုယ်ကိုယ် ပြန်ပြီး စစ်ဆေးဖို့ လိုလိမ့်မယ်”
ဒုတိယစီနီယာအစ်ကိုက လေးလေးနက်နက် ခေါင်းညိတ်ပြသည်။
နန်မင်ရုယွဲ့နှင့် လီရှမ်းဇီတို့ကလည်း ထောက်ခံစကား ဆိုကြရာ ခုနက ဖန့်ချန်ကို ဒေါသတကြီး အော်ဟစ်ခဲ့သည့် အမာခံတပည့်မှာ မျက်နှာပျက်သွားပြီး ဆက်လက်၍ စကားမပြောတော့ပေ။
“အကြီးအကဲများကောင်စီကတော့ တကယ်ပဲ ကိုယ့်ကိုယ်ကိုယ် ပြန်စစ်ဆေးဖို့ လိုအပ်တယ်”
အကြီးအကဲချန်က အသာအယာ ခေါင်းညိတ်လိုက်ပြီး
“လောလောဆယ်တော့ သိထားတဲ့ သဲလွန်စတွေကို အောက်ခြေအဆင့်အထိ အကြောင်းကြားလိုက်မယ်။ လူလွှတ်ပြီး ရုလိုင်ဘုရားကျောင်းနဲ့ အဆိပ်ငါးပါးဂိုဏ်းဆီကို သွားခိုင်းလိုက်ပါ”
“ယင်လောကငယ် ဘက်ကိုလည်း လူလွှတ်သင့်တယ်၊ စီနီယာအစ်မကြီးရဲ့ ဝိညာဉ်ကို ရှာတွေ့နိုင်မလားဆိုတာ ကြည့်ရမယ်”
ဟု တစ်ဦးက အကြံပြုသည်။
အကြီးအကဲချန်က ထိုသူကို တစ်ချက်ကြည့်လိုက်ကာ
“လူလွှတ်ရမှာပေါ့၊ သွားမယ့်သူဟာ ကျွယ်မင်ကျင့်ကြံသူ ဖြစ်ရမယ်၊ ကျင့်ကြံမှုကလည်း အဆင့် ၁ မသေမျိုးထက် မကျော်ရဘူး။ ဒီကိစ္စကို ငါကိုယ်တိုင် စီစဉ်မယ်”
“ဒါဆို အခု... ကျွယ်မင်ကြယ်တာရာကို ပြန်ကြမလား စီနီယာအစ်မကြီးရဲ့ ရုပ်အလောင်းကို ကောင်းကောင်းမွန်မွန် သင်္ဂြိုဟ်ပေးသင့်နေပြီ”
တတိယစီနီယာအစ်မက ပြုံး၍ ဆိုသည်
“သေသွားတာတောင် လူတွေကို တစ်နေကုန် လာကြည့်ခိုင်းနေတာက မကောင်းဘူးလေ၊ ဒါက မသင့်တော်ဘူး”
“တတိယစီနီယာအစ်မ... ရှင့်ရဲ့ သဘောထားက ဘယ်လိုဖြစ်နေတာလဲ ”
“စီနီယာအစ်မကြီး သေသွားတာကို ရှင်က ဝမ်းသာနေသလိုပဲနော် ”
“ဂိုဏ်းတူညီအစ်ကို မောင်နှမ သံယောဇဉ် နည်းနည်းလေးမှ မရှိဘူး”
နံပါတ် ၇ စီနီယာအစ်မက စတင်ပြောဆိုလိုက်ရာ စီနီယာအစ်မကြီး၏ နောက်လိုက် အမာခံတပည့်များကလည်း တတိယစီနီယာအစ်မကို ဝိုင်းဝန်း ပြစ်တင်ကြတော့သည်။
သို့သော် တတိယစီနီယာအစ်မကမူ လုံးဝ ဂရုမစိုက်ပေ။
သူမ ကိုယ်တိုင် ပြန်ပြောစရာပင် မလိုဘဲ သူမ၏ နောက်လိုက်များက ပြန်လည် တုံ့ပြန်အော်ဟစ်ပေးနေကြပြီ ဖြစ်သည်။
အခြေအနေမှာ အနည်းငယ် ရှုပ်ထွေးလာသည်ကို မြင်သောအခါ အကြီးအကဲချန်က အေးစက်စွာ နှာခေါင်းရှုံ့လိုက်သည်။
“မင်းတို့မှာ ဒီလောက် အားယားနေရင်လည်း ဒီကိစ္စရဲ့ နောက်ဆက်တွဲတွေကို သေချာ ကိုင်တွယ်ကြစမ်း၊ ဒီမှာတင် ကိုယ့်လူအချင်းချင်း ရန်ဖြစ်မနေကြနဲ့၊ ပြန်ကြမယ် ”
စကားဆုံးသည်နှင့် အကြီးအကဲချန်သည် သူ၏ နဂါးနက်လှေကို ထုတ်ဖော်ကာ ဦးစွာ ထွက်ခွာသွားတော့သည်။
ကျန်ရှိသော အကြီးအကဲများသည်လည်း လင်းကွေ့ကြယ်တာရာမှ ရှေးဟောင်းမသေမျိုးများကို နှုတ်ဆက်ကာ အသီးသီး ထွက်ခွာသွားကြသည်။
“အားလုံးပဲ... ကျနော်တို့လည်း ခွင့်ပြုပါဦး”
လင်းကွေ့ကြယ်တာရာမှ ရှေးဟောင်းမသေမျိုး သုံးဦးမှာလည်း တစ်ဦးကိုတစ်ဦး ကြည့်လိုက်ကြပြီး လျင်မြန်စွာပင် နှုတ်ဆက်ကာ ထွက်ခွာသွားကြသည်။
သူတို့သည် ထိုရှုပ်ထွေးသော ကိစ္စထဲတွင် ပါဝင်ပတ်သက်လိုစိတ် မရှိကြပေ။
နဂါးနက်လှေပေါ်တွင် အမာခံတပည့်များသာ ကျန်ရစ်ခဲ့ပြီး သူတို့၏ အကြည့်များမှာ ထိုရေခဲခေါင်းတလားပေါ်တွင် ရှိနေကြသည်။
“စီနီယာအစ်မကြီးရဲ့ ရေခဲခေါင်းတလားကို ညီမလေးဟုန် ဆီမှာပဲ ထားဖို့ဆိုတာ ငါတို့လည်း စိတ်မချဘူး၊ ငါ့ရဲ့ နဂါးနက်လှေနဲ့ပဲ အတူတူ သယ်သွားလိုက်မယ်”
ဟု တတိယစီနီယာအစ်မက ခပ်ပြုံးပြုံး ဆိုသည်။
“မင်းဆီမှာ ထားရင် ပိုတောင် စိတ်မချသေးတယ်၊ ငါပဲ စောင့်ရှောက်ပြီး သယ်သွားပေးမယ်။ အမာခံတပည့်ခေါင်းဆောင် အောက်နယ်မြေမှာ သေဆုံးရတာတင် လှောင်စရာ ကောင်းနေပြီ၊ လမ်းမှာ ပြဿနာ တစ်ခုခု ထပ်ဖြစ်ရင် ငါတို့ ကျွယ်မင်နန်းတော်ရဲ့ မျက်နှာ ဘယ်မှာ သွားထားရမလဲ ”
ဟု နံပါတ် ၄ က ကန့်ကွက်သည်။
“စီနီယာအစ်မကြီးမှာ ကြိုပြောခဲ့တဲ့ စကားရှိပါတယ်၊ သူမရဲ့ ရုပ်အလောင်းကို ကျမပဲ သယ်ဆောင်သွားရမယ်လို့။ ဒါကြောင့် စီနီယာ အစ်ကို၊ အစ်မတို့ ပင်ပန်းမခံပါနဲ့တော့။ ကျမ ကျွယ်မင်ကြယ်တာရာကို ပြန်ဖို့ ပြင်ပါတော့မယ်၊ စီနီယာတို့လည်း ပြန်ကြပါတော့ရှင်”
ဟု ကြာနီနတ်မိမယ်က တည်ငြိမ်စွာ ဆိုသည်။
နန်မင်ရုယွဲ့က ထိုအခြေအနေကို မြင်သောအခါ ပြုံးလိုက်ပြီး အားလုံးကို ဆိုသည်။
“ဒါဟာ စီနီယာအစ်မကြီး ချန်ရစ်ခဲ့တဲ့ နောက်ဆုံးစကား ဖြစ်နေတော့လည်း ငါတို့ အဲဒီအတိုင်းပဲ လိုက်နာရမှာပေါ့။ စီနီယာအစ်မကြီးရဲ့ ဝိညာဉ်သာ သိခဲ့ရင် ငါတို့ကို စိတ်ဆိုးနေမှာ မဟုတ်ပါဘူး”
“ဝိညာဉ်က သိရမယ် စီနီယာအစ်မကြီးက အရင်ကတည်းက ယင်မသေမျိုးလမ်းစဉ်ကို အထင်အမြင်သေးခဲ့တာ၊ ဒီလမ်းစဉ်မှာ ဘာမှ ကြိုးစားအားထုတ်ခဲ့တာ မဟုတ်ဘူး။ အခု ယင်လောကကို ရောက်သွားခဲ့ရင်တောင် ကျင့်ကြံမှု ဘာမှ ကျန်မှာမဟုတ်ဘူး။ ငါတို့က ဘာလို့ သူမရဲ့ မျက်နှာကို ဆက်ကြည့်နေရဦးမှာလဲ သူမ စီနီယာအစ်မကြီး လုပ်ခဲ့တာလည်း နှစ်တွေ အတော်ကြာခဲ့ပြီ၊ တော်လောက်ပါပြီ”
တတိယစီနီယာအစ်မက အေးစက်စွာ နှာခေါင်းရှုံ့လျက် အားလုံးကို ဝေ့ကြည့်လိုက်ကာ နောက်ဆုံးတွင် ကြာနီနတ်မိမယ်ကို ပြုံးစစဖြင့် ကြည့်သည်။
“ဒါဆိုရင်လည်း မင်းအပြန်လမ်းမှာ သေချာ သတိထားဦးပေါ့၊ တကယ်လို့ စီနီယာအစ်မကြီးကို ပျောက်သွားအောင် လုပ်မိရင်တော့ မင်းလည်း အမာခံတပည့်တစ်ယောက်အနေနဲ့ အပြစ်ပေးခံရလိမ့်မယ်”
စကားဆုံးသည်နှင့် သူမသည် သူမ၏ နဂါးနက်လှေပေါ်သို့ ပြန်တက်ကာ နယ်မြေရှာဖွေရေး အဖွဲ့နှင့်အတူ ဟင်းလင်ပြင်ပြာကြီးထဲသို့ ပျောက်ကွယ်သွားတော့သည်။
ကျန်ရှိသော အမာခံတပည့်များလည်း တစ်ဦးပြီးတစ်ဦး ထွက်ခွာသွားကြသည်။
နန်မင်ရုယွဲ့သည်လည်း မထွက်ခွာမီ ကြာနီနတ်မိမယ်ကို လမ်းမှာ သတိထားရန် မှာကြားပြီး ဘာမှ ထပ်မပြောဘဲ ထွက်သွားခဲ့သည်။
အားလုံး ထွက်သွားပြီးနောက်မှ ကြာနီနတ်မိမယ်က ဖန့်ချန်ကို ကြည့်ကာ
“ဖန့်မိတ်ဆွေ... လမ်းမှာ တစ်ခုခု ထူးခြားတာ ဖြစ်လာနိုင်မလား ”
“ပြောရခက်တယ်၊ ဒီအချိန်မှာတောင် ထပ်ပြီး လှုပ်ရှားရဲတယ် ဆိုရင်တော့ စီနီယာအစ်မကြီး သေဆုံးမှုနဲ့ မကင်းဘူးလို့ ပြောလို့ရတယ်။ ဒါပေမဲ့ စီနီယာအစ်မကြီး တကယ် သေ၊ မသေ ဆိုတာကို အတည်ပြုဖို့က ဒီကြားထဲမှာပဲ အခွင့်အရေး ရှိတာ။ ကျွယ်မင်ကြယ်တာရာကို ရောက်သွားပြီဆိုရင်တော့ အဲဒီအခွင့်အရေးက မရေမရာ ဖြစ်သွားပြီ”
ဟု ဖန့်ချန်က ဆိုသည်။
ကြာနီနတ်မိမယ်က အသာအယာ ခေါင်းညိတ်လိုက်ပြီးနောက် သူမ၏ ကိုယ်တွင်းမှ မသေမျိုးစွမ်းအား များကို နဂါးနက်လှေအတွင်းသို့ ထည့်သွင်းလိုက်သည်။
နဂါးနက်လှေသည် စွမ်းအားများ ရရှိသည်နှင့် ချက်ချင်းပင် အလင်းတန်းတစ်ခုအဖြစ် ပြောင်းလဲကာ ဟင်းလင်ပြင်ပြာကြီးထဲသို့ အရှိန်အဟုန်ဖြင့် တိုးဝင်သွားတော့သည်။
ပထမ လအနည်းငယ် ခရီးစဉ်မှာ အဆင်ပြေချောမွေ့ခဲ့ပြီး လမ်းတွင် မည်သည့် အတားအဆီးမှ မရှိခဲ့ပေ။
တစ်ခါတစ်ရံ တခြားအဖွဲ့အစည်းများ၏ နဂါးနက်လှေများနှင့် တွေ့ဆုံရသော်လည်း သူတို့သည် ကျွယ်မင်နဂါးနက်လှေကို မြင်သည်နှင့် လမ်းဖယ်ပေးကြပြီး အနားမကပ်ရဲကြပေ။
ကျွယ်မင်နန်းတော် အမာခံတပည့် ဆိုသည့် ဂုဏ်ပုဒ်မှာ စိတ်ဝိညာဥ်နယ်မြေ အတွင်း၌ အဆင့်အတန်း အမြင့်မားဆုံးထဲတွင် ပါဝင်ပေသည်။
“ဟုန်မိတ်ဆွေ... ကျွယ်မင်ယင်လောကမှာတုန်းက ကြားဖူးတာကတော့ အမာခံတပည့်တွေဟာ ယင်မသေမျိုးလမ်းစဉ်ကို ကြိုတင် ကျင့်ကြံခွင့် ရှိတယ်ဆိုပဲ၊ အဲဒီလမ်းစဉ်အကြောင်း ဘယ်လောက် သိထားလဲ ”
ဟု ဖန့်ချန်က အမှတ်မထင် မေးလိုက်သည်။
“ယင်မသေမျိုး လမ်းစဉ်ဆိုတာ ဝိညာဉ်ကို ကျင့်ကြံတာပဲ”
ကြာနီနတ်မိမယ်က တွေးတောရင်း ဆိုသည်
“ကျမ အမာခံတပည့် ဖြစ်လာပြီးတဲ့နောက် ရှင် ပျောက်ကွယ်နေတဲ့ နှစ်တွေအတွင်းမှာ ကျွယ်မင်နန်းတော်က ကျမကို ယင်မသေမျိုး လမ်းစဉ် ကျင့်ကြံနည်းတွေ တကယ်ပဲ သင်ပေးခဲ့ပါတယ်။ ဒါပေမဲ့ အဲဒါက ကျင့်ကြံချိန် အများကြီး ယူရသလို၊ လူသားလောကက ကျင့်ကြံမှုကိုလည်း နှောင့်နှေးစေနိုင်တယ်။ ကျမက အဆင့် ၁ မသေမျိုးအဖြစ် အမြန်ဆုံး တက်လှမ်းချင်တာကြောင့် ယင်မသေမျိုး လမ်းစဉ်ကို တကယ်တမ်း မကျင့်ကြံရသေးဘူး”
သူမက ဖန့်ချန်ကို တစ်ချက်ကြည့်ကာ
“ဒီကျင့်စဉ်ကို အမာခံတပည့် မဟုတ်သူတွေကို ခိုးသင်ပေးလို့ မရဘူး၊ ဖန့်မိတ်ဆွေ နားလည်ပေးပါဦး”
“ရပါတယ်၊ ကျုပ်က သိချင်ရုံ သက်သက်ပါ”
ဟု ဖန့်ချန်က အေးဆေးစွာ ပြုံး၍ ဆိုသည်။
“စီနီယာအစ်မကြီးကလည်း ယင်မသေမျိုး လမ်းစဉ်ကို သိပ်ပြီး ဂရုမစိုက်ခဲ့ပုံရတယ်”
ကြာနီနတ်မိမယ်က ရေခဲခေါင်းတလားကို ကြည့်ကာ သက်ပြင်းချလိုက်သည်။
ဒီစီနီယာအစ်မကြီးရဲ့ နည်းလမ်းတွေက တကယ်ကို ထူးခြားဆန်းပြားလွန်းလှသည်။
ထိုအကြီးအကဲတွေတောင် သူမ ဟန်ဆောင်သေနေတာကို မရိပ်မိကြပေ။
“ကျုပ်သိသလောက် ယင်မသေမျိုး လမ်းစဉ်က အားနည်းချက်အချို့ကို ဖြည့်ဆည်းပေးနိုင်တယ်။ တကယ်လို့ မတော်တဆ သေဆုံးခဲ့ရင်တောင် ကျင့်ကြံမှုတွေ အကုန်မဆုံးရှုံးဘဲ တခြားပုံစံတစ်ခုနဲ့ ဆက်လက် အသက်ရှင်နိုင်တာမျိုးပေါ့။ ပြီးတော့... ယင်လောက ယင်သက်တမ်း တွေကို ယင်မသေမျိုးတွေက တိုက်ရိုက် စုပ်ယူနိုင်တယ်၊ ဒါကြောင့် သူတို့ရဲ့ သက်တမ်းက အလွန် ရှည်လျားတာပဲ”
ကြာနီနတ်မိမယ်က ခပ်ဖွဖွ ပြုံးလိုက်ပြီး
“ကျမ ခန့်မှန်းတာသာ မှန်မယ်ဆိုရင် ကျွယ်မင်နန်းတော်ရဲ့ အရင်က အားကောင်းခဲ့တဲ့ ပညာရှင်ကြီးတွေဟာ အခု လူသားလောကမှာ သေဆုံးသွားပြီ ဆိုပေမဲ့ သူတို့ဟာ ယင်လောကမှာတော့ ဆက်လက် အသက်ရှင်နေဦးမှာပဲ၊ လူကိုယ်တိုင် ထွက်မလာကြတာပဲ ဖြစ်လိမ့်မယ်”
ဖန့်ချန် ဘာမှ ပြန်မပြောမိပေ။
ကျွယ်မင်နန်းတော်တွင် ယင်မသေမျိုး လမ်းစဉ် ရှိသည်ကို သိကတည်းက သူ ထိုအချက်ကို ခန့်မှန်းမိပြီးသား ဖြစ်သည်။
ကျွယ်မင်နန်းတော်၏ အစစ်အမှန် အင်အားမှာ ကျွယ်မင်ယင်လောက အတွင်း၌ ရှိနေနိုင်ချေ အလွန်ကြီးမားသည်။
နှစ်ပေါင်းများစွာ စုဆောင်းလာခဲ့သည့် ယင်မသေမျိုး အရေအတွက်မှာ မည်မျှအထိ များပြား ထိတ်လန့်စရာ ကောင်းနေမည်နည်း သူတို့တွင် ယင်မိစ္ဆာမျှော်စင် ကဲ့သို့သော အရာမျိုးပင် ရှိနေသေးသည်။
ယင်မိစ္ဆာတွေကို သန့်စင်ပြီး စင်ကြယ်သော ယင်သက်တမ်းများ ရယူခြင်းသည် ယင်မသေမျိုး အမြောက်အမြားကို မွေးမြူထားနိုင်ရန် လုံလောက်ပေသည်။
ကျွယ်မင်နန်းတော် တင်မကဘဲ အထက်နယ်မြေ သုံးခုက ထိပ်တန်း အင်အားစုအားလုံးသည် ထိုအတိုင်းပင် လုပ်ဆောင်နေကြလိမ့်မည်ဟု ခန့်မှန်းရသည်။
ဖူထူလောက ရဲ့ ရေအိုင်က သူထင်ထားတာထက် အများကြီး ပိုပြီး နက်ရှိုင်းလှသည်။
ထိုသို့ ဖြစ်နေခြင်းကြောင့်ပင် ငရဲမင်းအမိန့်တော် ကို ပိုင်ဆိုင်ထားသည့် သူသည် ဖူထူလောကအတွင်း၌ အတိုင်းအတာတစ်ခုအထိ အသာစီး ရထားသကဲ့သို့ ဖြစ်နေပေသည်။
“မဟန်တော့ဘူး၊ ဒီနေရာက ကြယ်မြေပုံ ထဲမှာ မှတ်သားထားတာနဲ့ မတူတော့ဘူး ”
ကြာနီနတ်မိမယ်က ရုတ်တရက် မျက်မှောင်ကြုတ်ကာ အလန့်တကြား ပြောလိုက်သည်။
အခန်း (၁၄၄၂) - ငါက မင်းကို လက်လှမ်းခိုင်းလို့လား
နဂါးနက်လှေသည် မိမိဘာသာပင် မသိလိုက်ဘဲ လမ်းကြောင်းမှ သွေဖည်သွားခဲ့ပြီ ဖြစ်သည်။
ပုံမှန်အခြေအနေတွင် ထို့သို့သောအရာမျိုးမှာ လုံးဝ မဖြစ်နိုင်ပေ။
အကြောင်းမှာ နဂါးနက်လှေ၏ ကြယ်မြေပုံသည် မသေမျိုးတံဆိပ်ခတ်နှိပ်မှု တစ်မျိုး ဖြစ်သောကြောင့်ပင်။
ထိပ်တန်းအင်အားစုကြီးများ၏ ကြယ်မြေပုံများမှာ သီးသန့်ဖြစ်သော မသေမျိုးတံဆိပ်များ ဖြစ်ကြရာ နဂါးနက်လှေ၏ အရှင်သခင် လုံးဝ မရိပ်မိစေဘဲ ထိုတံဆိပ်ကို သက်ရောက်မှုဖြစ်အောင် လုပ်ရန်မှာ အလွန် ခက်ခဲလှပေသည်။
နဂါးနက်လှေ၏ အရှိန်မှာ တဖြည်းဖြည်း နှေးကွေးသွားသည်။
ဖန့်ချန်သည် ကြယ်မြေပုံရှေ့သို့ လျှောက်သွားကာ ကြည့်လိုက်ရာ ဤနေရာမှာ ကြယ်မြေပုံပေါ်တွင် မှတ်သားထားသည့် လမ်းကြောင်းနှင့် တကယ်ပင် ကွဲပြားနေသည်။
ထို့အပြင် ကြယ်မြေပုံသည် ပေးသင့်သည့် ကြိုတင်သတိပေးချက်မျိုးကိုလည်း ထုတ်မပေးပေ။
ကြာနီနတ်မိမယ်က သူမ၏ ဝတ်ရုံလက်ကို အသာအယာ ဝေ့ယမ်းလိုက်ရာ အစီရင်များ တစ်ခုပြီးတစ်ခု စတင်လည်ပတ်လာတော့သည်။
ခဏချင်းအတွင်းမှာပင် နဂါးနက်လှေပေါ်တွင် အလွှာပေါင်း ဆယ်ဂဏန်းမကသော ကာကွယ်ရေး အလင်းအကာများ ဖုံးလွှမ်းသွားသည်။
တိုက်ခိုက်ရေး အစီရင်အမျိုးမျိုးမှာလည်း မသေမျိုးစွမ်းအားများ စီးဝင်လာမှုနှင့်အတူ ချက်ချင်းပင် တုံ့ပြန်လာကြသည်။
တစ်ချိန်တည်းမှာပင် မသေမျိုးလှေအစီရင်ဗဟိုချက် သည်လည်း အနီးနားရှိ မြေနဂါးစီးရီး နဂါးနက်လှေများနှင့် စတင်ချိတ်ဆက်ရန် ကြိုးပမ်းနေသည်။
အကယ်၍ ထိုလှေများ ရောက်ရှိလာနိုင်ပါက ကြာနီနတ်မိမယ်အနေဖြင့် မသေမျိုးလှေအစီရင် ကို ဖွင့်လှစ်နိုင်မည် ဖြစ်သည်။
သို့သော် ထိုလှေများ ရောက်လာရန်မှာ အလွန် ခဲယဉ်းလှသည်ဟု ခန့်မှန်းရပေသည်။
အကြောင်းမှာ လမ်းကြောင်း လွဲချော်သွားသောကြောင့် ဖြစ်သည်။
မူလသတ်မှတ်ထားသော လမ်းကြောင်း၏ အပိုင်းတိုင်းတွင် ကျွယ်မင်ကျင့်ကြံသူများ၏ လှေများက စူးစမ်းစစ်ဆေးမှုများ ပြုလုပ်နေကြမည် ဖြစ်သည်။
ဖန့်ချန်နှင့် ကြာနီနတ်မိမယ်တို့၏ မျက်နှာပေါ်တွင် စိုးရိမ်ရိပ်များ ပေါ်လာသည်။
သူတို့နှစ်ဦး အလုပ်ရှုပ်နေကြသည်မှာ အတန်ကြာသွားပြီးနောက် နဂါးနက်လှေ၏ ကာကွယ်ရေး အလင်းအကာများမှာ ရုတ်တရက် တစ်လွှာပြီးတစ်လွှာ ပျောက်ကွယ်သွားတော့သည်။
သူတို့နှစ်ဦးသည် အနောက်သို့ ထိတ်လန့်တကြား လှည့်ကြည့်လိုက်ကြရာ လူပုံရိပ်တစ်ခုမှာ မည်သည့်အချိန်က ရောက်နေမှန်းမသိဘဲ ရေခဲခေါင်းတလားရှေ့တွင် ပေါ်နေသည်ကို တွေ့လိုက်ရသည်။
ထိုသူသည် ခေါင်းငုံ့ကာ ခေါင်းတလားအတွင်းရှိ ရုပ်အလောင်းကို တည်ငြိမ်စွာ ကြည့်နေခဲ့ခြင်း ဖြစ်သည်။
“မင်းတို့ သိပ်ပြီး စိုးရိမ်မနေကြပါနဲ့၊ ငါက ဒီကို လာကြည့်ရုံ သက်သက်ပါ၊ မင်းတို့ကို ဘာမှ လုပ်မှာ မဟုတ်ဘူး။ ဒါပေမဲ့ ဒီရုပ်အလောင်းကိုတော့ ငါ သယ်သွားရလိမ့်မယ်”
ထိုလူပုံရိပ်က ခပ်ဖွဖွ ရယ်မောလိုက်သည်။
သူသည် အမှောင်ထုတစ်လွှာ၏ ဖုံးလွှမ်းခြင်းကို ခံထားရသဖြင့် သူ၏ ရုပ်သွင်ကို အတိအကျ မမြင်ရသလို၊ အသံမှာလည်း အမျိုးသား သို့မဟုတ် အမျိုးသမီး ဖြစ်သည်ကို ခွဲခြား၍ မရပေ။
“ဒါဆို စီနီယာအစ်မကြီးကို ငါးစာနဲ့ မျှားခေါ်ပြီး ထောင်ချောက်ဆင်ခဲ့တာ ရှင့်လက်ချက်ပေါ့ ”
ကြာနီနတ်မိမယ်က အေးစက်စွာ မေးလိုက်သည်
“ရှင်က ကျွယ်မင်နန်းတော်က ကျင့်ကြံသူလား ”
“မင်းတို့ အေးအေးဆေးဆေး ခန့်မှန်းကြည့်ကြပေါ့၊ ဒါပေမဲ့ ဘယ်လိုပဲ ခန့်မှန်းခန့်မှန်း ငါ့ရဲ့ အစစ်အမှန်ကတော့ ပေါ်လာမှာ မဟုတ်ဘူး”
တစ်ဖက်လူက ခပ်တိုးတိုး ရယ်မောရင်း လက်ကို ဝေ့ယမ်းကာ ရေခဲခေါင်းတလားကို ဖွင့်လိုက်သည်။
ရေခဲခေါင်းတလားပေါ်ရှိ အဆင့်ဆင့်သော တားမြစ်ချက် အစီရင်များမှာ သူ၏ရှေ့တွင် ပါးလွှာသော စက္ကူချပ်များကဲ့သို့ပင် ပျက်စီးလွယ်နေပုံရသည်။
“တောက်... ရှဲ့အာမန်... ကျွယ်မင်နန်းတော်ရဲ့ နောက်မျိုးဆက် နန်းတော်သခင် ဖြစ်လာဖို့ အခွင့်အရေး အရှိဆုံး ပါရမီရှင်က ဒီလိုပဲ သေသွားရတာ တကယ်ကို နှမြောစရာ ကောင်းတာပဲ”
“မင်းက ဟန်ဆောင်သေနေတာလား အကယ်၍ ဟန်ဆောင်နေတာဆိုရင် အခု မျက်လုံးဖွင့်လိုက်တာ ပိုကောင်းမယ်။ ဘာလို့လဲဆိုတော့ ဒီအနားမှာ ငါကလွဲရင် တခြားသူ မရှိဘူး။ မင်းရဲ့ မသေမျိုးလှေအစီရင်ကိုလည်း သုံးလို့မရဘူး၊ ငါ့လို အဆင့် ၈ မသေမျိုးရှေ့မှာ မင်းမှာ ဘာမှ ပြန်ခုခံနိုင်စွမ်း မရှိဘူး။ အဲဒီတော့ ကောင်းကောင်းမွန်မွန် စကားပြောကြတာပေါ့”
“အဲဒီ အကြီးအကဲတွေကတော့ ဒီမျိုးဆက်သစ် နှစ်ယောက်နဲ့ မင်းကို လွှတ်လိုက်ရင် ငါ့ကို မျှားထုတ်နိုင်မယ်လို့ ထင်နေကြတာလား ဟားဟားဟား... ရယ်စရာကောင်းလိုက်တာ”
“ငါတော့ ထွက်လာခဲ့ပါပြီ၊ ဒါပေမဲ့ ကံဆိုးတာက ငါ ဘယ်မှာလဲဆိုတာ သူတို့ လုံးဝ မသိကြတာပဲ။ အခုဆို သူတို့တွေ ဒီနဂါးနက်လှေကို အရူးအမူး လိုက်ရှာနေကြလောက်ပြီ။ သူတို့တွေ ဘာမှမတတ်နိုင်ဘဲ မျက်လုံးပြူးကြည့်နေမယ့် ပုံကို မြင်ယောင်ပြီး ငါတော့ ရယ်ချင်နေပြီကွာ”
“ဒါဆိုရင်လည်း ပိုပြီး ကျယ်ကျယ်လောင်လောင် ရယ်လိုက်လေ”
စီနီယာအစ်မကြီးက မျက်လုံးများကို ဖွင့်လိုက်ပြီး ထိုသူကို အေးစက်စက် ကြည့်ကာ ရေခဲခေါင်းတလားထဲမှ ထထိုင်လိုက်သည်။
“ပြောစမ်း... မင်းက ဘယ်ကလဲ လူသားလောက ကိုးနယ်မြေက ရှေးဟောင်းမသေမျိုး အများစုက မှတ်တမ်းထဲမှာ ရှိပြီးသားပဲ။ မင်းရဲ့ အငွေ့အသက်က ငါ့အတွက် အတော်လေး စိမ်းနေတယ်၊ မသေမျိုးလောကငယ် ကလား ဒါမှမဟုတ်... နတ်ဘုရားနယ်မြေ ကလား ”
“မသေမျိုးလောကငယ် နတ်ဘုရားနယ်မြေ "
ဖန့်ချန်သည် ကြာနီနတ်မိမယ်ကို မျက်ရိပ်ပြလိုက်ရာ သူတို့နှစ်ဦးသည် အသာအယာ နောက်သို့ ဆုတ်လိုက်ကြသည်။
ခုနက ထိုသူက မိမိကိုယ်ကိုယ် အဆင့် ၈ မသေမျိုးဟု ပြောလိုက်သဖြင့် ဖန့်ချန် အတော်လေး အံ့အားသင့်သွားသည်။
ဒီတစ်ကြိမ်တွင် ငါးစာဟပ်မည့် ငါးမှာ အများဆုံး အဆင့် ၇ ဖြစ်လိမ့်မည်ဟုသာ သူ ထင်ထားခဲ့ခြင်း ဖြစ်သည်။
ထိုသူ ငါးစာဟပ်၊ မဟပ်မှာပင် မသေချာသည့် အခြေအနေတွင် အစစ်အမှန် အင်အားကြီး ပုဂ္ဂိုလ် က တန်းထွက်လာလိမ့်မည်ဟု မမျှော်လင့်ထားပေ။
အဆင့် ၈ ရှေးဟောင်းမသေမျိုး ဆိုသည်မှာ ဤလောက၏ အမြင့်ဆုံး ထိပ်တန်း အဆင့်အတန်းပင် ဖြစ်သည်။
ထိပ်တန်း အင်အားစုကြီးများမှ အဆင့် ၉ မသေမျိုးများ လူလုံးမပြသရွေ့၊ မသေမျိုးလှေ အစီရင်စွမ်းအားကို အသုံးပြုနိုင်သည့် စီနီယာအစ်မကြီးကဲ့သို့သော ပုဂ္ဂိုလ်များသာလျှင် ထိုသူနှင့် အနည်းငယ် ယှဉ်ပြိုင်နိုင်သည်။
သို့သော်... ထိုနေရာမှာ ကျွယ်မင်နန်းတော်၏ အုပ်ချုပ်မှုနယ်မြေနှင့် အလွန်ဝေးကွာလှသဖြင့် မသေမျိုးလှေအစီရင်ကို အသုံးပြုရန် လုံလောက်သော လှေများကို လုံးဝ ရှာတွေ့နိုင်မည် မဟုတ်ပေ။
“ငါ ဘယ်ကလာသလဲ ဆိုတာက မင်းနဲ့ ဘာမှ မဆိုင်တော့ဘူး။ သေမယ့်လူက အများကြီး သိနေစရာ မလိုပါဘူး။ ငါ သိချင်တာ တစ်ခုပဲ ရှိတယ်၊ အောက်နယ်မြေ ခြောက်ခုမှာတုန်းက မင်းတို့တွေ ဘယ်လိုနည်းနဲ့ လွတ်မြောက်လာခဲ့ကြတာလဲ ”
ထိုသူက ဖန့်ချန်ကို တစ်ချက် လှမ်းကြည့်လိုက်သကဲ့သို့ပင်။
“မင်းတောင် ငါ့မေးခွန်းကို မဖြေချင်ဘူးဆိုမှတော့ ငါက ဘာလို့ မင်းမေးခွန်းကို ဖြေရမှာလဲ”
စီနီယာအစ်မကြီးက ပြုံး၍ ပြန်မေးလိုက်သည်။
တစ်ဖက်လူက အသာအယာ သက်ပြင်းချလိုက်ပြီးနောက် သူ၏ လက်ဝါးကို ဆန့်ထုတ်လိုက်သည်။
“ဒါဆိုရင်လည်း သေလမ်းကို ပို့ပေးလိုက်ရမှာပေါ့၊ မင်းတို့ ကျွယ်မင်နန်းတော်က အဲဒီ အဘိုးကြီးတွေ လိုက်မလာခင်မှာပေါ့...”
သူ၏ လက်ဝါးမှာ စီနီယာအစ်မကြီးထံသို့ တဖြည်းဖြည်း နီးကပ်လာသည်။
အရှိန်မှာ အလွန်နှေးကွေးလှသဖြင့် အလွယ်တကူ ရှောင်တိမ်းနိုင်ပုံရသော်လည်း အကယ်၍ သူသာ အဆင့် ၈ မသေမျိုးဆိုလျှင် ထိုအခြေအနေမှာ လုံးဝ ကွဲပြားခြားနားသွားပေလိမ့်မည်။
ဖန့်ချန်၏ ရင်ထဲတွင် ဘာမှ မတတ်နိုင်သလို ခံစားလိုက်ရပြီး သူသည် ကြာနီနတ်မိမယ်ကို ခေါ်ကာ ထွက်ပြေးရတော့မည် ဖြစ်သည်။
ထိုတစ်ကြိမ်တွင်မူ စီနီယာအစ်မကြီးမှာ ဤနေရာတွင် ကျန်ရစ်ခဲ့ရတော့မည်ဖြစ်ကာ လွတ်မြောက်ရန် အခွင့်အရေး ရှိတော့မည် မဟုတ်ပေ။
“ငါက မင်းကို လက်လှမ်းခိုင်းလို့လား ”
စီနီယာအစ်မကြီးက ရုတ်တရက် လက်ကို ဝေ့ယမ်းကာ ထိုသူ၏ ပါးကို ရိုက်ချလိုက်သည်။
ဖန့်ချန်နှင့် ကြာနီနတ်မိမယ်တို့ပင် ဘာဖြစ်သွားမှန်း မသိလိုက်မီ ထိုသူသည် နဂါးနက်လှေပေါ်မှ အဝေးသို့ လွင့်စင်ထွက်သွားတော့သည်။
ထို့နောက်တွင်မူ စီနီယာအစ်မကြီးသည် လှေပေါ်မှ ခုန်ဆင်းကာ ထိုသူ့ထံသို့ ပိုမိုမြန်ဆန်သော အရှိန်ဖြင့် ပြေးဝင်သွားတော့သည်။
ဟင်းလင်ပြင်ထဲတွင် အလွန်ပင် တောက်ပလှပသော အလင်းတန်းများ ပေါက်ကွဲထွက်ပေါ်လာသည်။
ကြာနီနတ်မိမယ်သည် ဖန့်ချန်ကို အံ့အားသင့်စွာ ကြည့်လိုက်သည်။
“ကြည့်ရတာ... စီနီယာအစ်မကြီးက သူမရဲ့ အစစ်အမှန် အင်အားကို အမြဲတမ်း ဖုံးကွယ်ထားခဲ့တာပဲ။ သူမဟာ အဆင့် ၈ ရှေးဟောင်းမသေမျိုး တစ်ယောက်ပဲ။ အဲဒီတုန်းက အောက်နယ်မြေမှာလည်း... သူမဟာ အဲဒီ အဆင့် ၈ ပုဂ္ဂိုလ် ပေါ်လာမှာကို တမင် စောင့်နေခဲ့တာပဲ ဖြစ်ရမယ်”
ဖန့်ချန်က တိုးတိုးလေး ရေရွတ်လိုက်သည်။
သူသည် တိုက်ခိုက်နေကြသော ထိုပုံရိပ်နှစ်ခုကို ကြည့်ရင်း မချိပြုံး ပြုံးလိုက်မိသည်။
စီနီယာအစ်မကြီးသည် အမန် ဟူသော အခေါ်အဝေါ်ကို ကြားလိုက်ရသဖြင့် စိတ်ပြောင်းကာ ရုတ်တရက် လှုပ်ရှားလိုက်ခြင်း ဖြစ်နိုင်သည်ဟု သူ ခန့်မှန်းမိသည်။
“စီနီယာအစ်မကြီးက အဆင့် ၈ ရှေးဟောင်းမသေမျိုး ဖြစ်နေပြီး ဒါကို အမြဲ ဖုံးကွယ်ထားခဲ့တယ် ဆိုရင်တော့... တစ်စုံတစ်ယောက်က သူမကို လုပ်ကြံတော့မယ် ဆိုတာကို သူမ ကြိုတင် ခန့်မှန်းမိထားတာ ဖြစ်နိုင်သလား ဒီတစ်ခေါက် အောက်နယ်မြေကို သွားတာက အလိမ်ခံရတာ မဟုတ်ဘဲ သူမက တမင် လုပ်ဆောင်ခဲ့တာလား ”
ကြာနီနတ်မိမယ်က ဖန့်ချန်ကို မေးသည်။
“ဖြစ်နိုင်ချေ ရှိပါတယ်။ အခုဆိုရင် စီနီယာအစ်မကြီးရဲ့ အစီအစဉ်က တစ်ဝက်လောက် အောင်မြင်နေပြီလို့ ပြောလို့ရတယ်။ တကယ်လို့ သူမက ဒီအဆင့် ၈ မသေမျိုးကို ဖမ်းဆီးနိုင်ခဲ့မယ်ဆိုရင် သူ့နောက်ကွယ်မှာ ဘယ်သူရှိလဲဆိုတာ သိရလိမ့်မယ်”
ဖန့်ချန်က တစ်စုံတစ်ခုကို စဉ်းစားမိသွားကာ
“ဟုန်မိတ်ဆွေ... ကျွယ်မင်နန်းတော်ထဲမှာ နတ်ဘုရားနယ်မြေ အကြောင်း မှတ်တမ်းတင်ထားတာမျိုး ရှိသလား ”
ယခင်က ကျိထျန်းတုနှင့် ဆူယာ တို့ကို ဖမ်းဆီးခဲ့ဖူးသော်လည်း သူတို့သည် နတ်ဘုရားနယ်မြေ အကြောင်းကို သာမန်ကျင့်ကြံသူများ မသေမျိုးလောကငယ်အကြောင်း သိသလောက်သာ သိထားကြသဖြင့် အသုံးဝင်သော သတင်းအချက်အလက် သိပ်မရရှိခဲ့ပေ။
နတ်ဘုရားနယ်မြေတွင် ယခင်က ကပ်ဘေးတစ်ခု ဖြစ်ပွားခဲ့ဖူးသည်ဟုသာ သိထားကြသည်။
ထိုကပ်ဘေးမှာ ကြာနီနတ်မိမယ်၏ လူမျိုးစုများ လုပ်ဆောင်ခဲ့သော ယင်လောကကြီး နှင့် တစ်ချိန်တည်း ဖြစ်ပွားခဲ့ခြင်းမှာ သံသယဖြစ်ဖွယ် မရှိပေ။
“ရှင်က... ဒီလူက နတ်ဘုရားနယ်မြေက လာတာလို့ သံသယရှိနေတာလား ”
ကြာနီနတ်မိမယ်က တွေးတောရင်း ဆိုသည်
“ကျွယ်မင်နန်းတော်မှာ နတ်ဘုရားနယ်မြေအကြောင်း မှတ်တမ်းအချို့ တကယ်ရှိပါတယ်။ ကျမက ရှေးဟောင်းစာပေတွေကို ဝါသနာပါလို့ တစ်ခါနှစ်ခါ ဖတ်ဖူးခဲ့တယ်။ အခုအချိန်မှာတော့ နတ်ဘုရားနယ်မြေ ဟာ အလွန်အမင်း ရှုပ်ထွေးနေတဲ့ အခြေအနေမှာ ရှိနေပြီး မှော်မိစ္ဆာသားရဲ တွေ သောင်းကျန်းနေသလို၊ စစ်မှန်တဲ့ မသေမျိုး တွေကို တွေ့ဖို့တောင် အတော်လေး ခဲယဉ်းသွားပြီလို့ သိရတယ်”
“မှော်မိစ္ဆာသားရဲ ”
“အင်း... ဟင်းလင်ပြင်မိစ္ဆာ တွေနဲ့ ဆင်တူတယ်၊ ဒီခေတ်က ထွက်ပေါ်လာတဲ့ သတ္တဝါတွေ မဟုတ်ဘူးလို့ ထင်ရတာပဲ”
ဖန့်ချန်က ခေါင်းညိတ်လိုက်သည်။
သူမ ပြောတာလည်း မှန်ပေသည်၊ ထိုမှော်မိစ္ဆာသားရဲများမှာ ကြာနီနတ်မိမယ်၏ ဇာတိမြေမှ ဖန်တီးလိုက်သော အရာများ ဖြစ်နိုင်ပေသည်။
“ဒီမှော်မိစ္ဆာတွေက အဲဒီလောက်တောင် အားကောင်းလို့လား ကျုပ်မှတ်မိသလောက် နတ်ဘုရားနယ်မြေမှာ ထူးခြားဆန်းပြားတဲ့ မသေမျိုးဂိုဏ်းတွေ အများကြီး ရှိခဲ့တာပဲ။ သူတို့တောင် ဒီမှော်မိစ္ဆာတွေကို မနှိမ်နင်းနိုင်ကြဘူးလား ”
“လွန်ခဲ့တဲ့ အချိန်အတော်ကြာကတည်းက အဲဒီ မသေမျိုးဂိုဏ်းတွေဟာ မျိုးတုံး ပျောက်ကွယ်သွားခဲ့ကြပါပြီ...”
ကြာနီနတ်မိမယ်၏ စကားပင် မဆုံးသေးမီမှာပင် စီနီယာအစ်မကြီး ပြန်လည် ပေါ်ထွက်လာသည်။
သူမ၏ လက်ထဲတွင်မူ အသက်ဝိညာဉ် မရှိတော့သော ရုပ်အလောင်းတစ်ခုကို ဆွဲကိုင်ထားသည်။
ထိုသို့သော တိုက်ပွဲအပြီးမှာပင် စီနီယာအစ်မကြီးမှာ ဆံပင်အနည်းငယ် ဖရိုဖရဲ ဖြစ်သွားရုံသာ ရှိပြီး သူမ၏ ကိုယ်ပေါ်တွင် မည်သည့် ဒဏ်ရာအနာတရမှ ရှိမနေပေ။