အခန်း (၁၄၄၅-၁၄၄၆)
Vol. 145 Ch. 1445-1446
အခန်း (၁၄၄၅) - လူပုံအလယ်တွင် အကျပ်ရိုက်စေခြင်း
"ဒီလက်ဖက်ရည်ပွဲတော်ကို ဦးစီးကျင်းပတဲ့ ကျင့်ကြံသူရဲ့အမည်က လီစီ တဲ့၊ စတုတ္ထစီနီယာအစ်ကိုရဲ့ စူးစမ်းရေးအဖွဲ့ဝင်တစ်ယောက်လို့ သိရတယ်၊ သူကိုယ်တိုင်လည်း အဆင့် ၄ မသေမျိုးပဲ"
ယုထျန်းကော်က ဖန့်ချန်၏ဘေးနားတွင် အသံတိုးတိုးဖြင့် မိတ်ဆက်ပေးလေသည်။
သူတို့ကဲ့သို့သော အပြင်စည်းကျင့်ကြံသူများသည် ကွယ်ရာတွင် ရှဲ့အာမန်တို့အဖွဲ့ကို စီနီယာအစ်ကို၊ စီနီယာအစ်မဟု ရံဖန်ရံခါ ခေါ်ဝေါ်လေ့ရှိကြသော်လည်း လူရှေ့သူရှေ့တွင်မူ ထိုသို့ခေါ်ရန် မဝံ့ရဲကြပေ။
အကြောင်းမှာ ရာထူးအဆင့်အတန်း ကျော်လွန်ရာရောက်မည်ကို စိုးရိမ်သောကြောင့်ပင်။
"ဒါကြောင့်လည်း ဒီနေ့ လူတွေအများကြီး လာကြတာကိုး"
ဖန့်ချန်က ခေါင်းညိတ်လိုက်သည်။
ထိုကဲ့သို့သော နောက်ခံမျိုးမရှိလျှင် ကျန်းချန်နှင့် ကျိထျန်းကျွင်းတို့ကဲ့သို့သော ပုဂ္ဂိုလ်များ လာရောက်လိမ့်မည်မဟုတ်ပေ။
သို့သော် ဖန့်ချန်သည် တစ်ခုကို စပ်စုချင်နေမိသည်။
ယခုရောက်နေသော ကျိထျန်းကျွင်း၏ ခန္ဓာကိုယ်မှာ သူ၏မူလကိုယ်စစ်စစ်လား သို့မဟုတ် ကိုယ်ပွား လားဟူ၍ ဖြစ်သည်။
"ကျန်းမိတ်ဆွေ... ခင်ဗျားက ဟုန်အမာခံတပည့်အသစ်ရဲ့ စူးစမ်းရေးအဖွဲ့ထဲ ဝင်လိုက်တယ်လို့ ကြားတယ်၊ သူမက စူးစမ်းရေးထွက်ဖို့ မပြင်ဆင်သေးဘူးလား "
လီစီက သိလိုစိတ်ဖြင့် မေးလိုက်သည်။
ရောက်ရှိနေသူအားလုံး၏ မျက်ဝန်းများမှာ တောက်ပသွားကြသည်။
ထို ဟုန် အမာခံတပည့်အပေါ် အားလုံးက စိတ်ဝင်တစားရှိနေကြပြီး သူမသည် ပထမဆုံးအကြိမ် စူးစမ်းရေးထွက်ရုံမျှဖြင့် အမာခံတပည့် အမှန်တကယ် ဖြစ်သွားသည်လားဆိုသည်ကို သိလိုနေကြသည်။
ကျန်းချန်၏ တောက်ပသော အပြုံးမှာ အနည်းငယ် မှိန်ဖျော့သွားပြီးနောက် ပေါ့ပေါ့ပါးပါးပင် ပြန်လည်ရယ်မောကာ ဆိုသည်။
"အကြောင်းအမျိုးမျိုးကြောင့် ကျုပ် အဲဒီအဖွဲ့ထဲမှာ မရှိတော့ပါဘူး၊ အခုတော့ ကျုပ်က လွတ်လပ်တဲ့သူတစ်ယောက်ပါပဲ"
"လွတ်လပ်တဲ့သူ ဟုတ်လား ဒါဆိုရင်တော့ အတော်ပဲဗျာ၊ လွန်ခဲ့တဲ့ ရက်ပိုင်းကတင် စတုတ္ထစီနီယာအစ်ကိုက ခင်ဗျားအကြောင်း ပြောနေသေးတယ်၊ ခင်ဗျားသာ သူ့အဖွဲ့ထဲ ဝင်လာမယ်ဆိုရင် အလွန်ကောင်းမှာပဲတဲ့"
လီစီ၏ မျက်လုံးများ တောက်ပသွားသည်။
လူအုပ်ကြီး၏ ဝန်းရံမှုအောက်တွင် နှစ်ဦးသားမှာ အားတက်သရော စကားပြောရင်း အတွင်းဘက်သို့ လျှောက်သွားကြသည်။
စကားအနည်းငယ် ပြောပြီးနောက် ကျန်းချန်၏ အကြည့်မှာ လူပုံရိပ်တစ်ခုပေါ်သို့ ရုတ်တရက် ကျရောက်သွားသဖြင့် ခြေလှမ်းများ တုံ့ခနဲ ရပ်သွားတော့သည်။
"ကျန်းမိတ်ဆွေ... ဘာဖြစ်လို့လဲ"
လီစီက ပြုံးလျက် မေးသည်
"ငါတို့တွေ အတွင်းမှာ သွားထိုင်ရအောင်၊ ဒီတစ်ခေါက်တော့ သေသေချာချာ စကားပြောရမယ်၊ နောင်မှာ ငါတို့က လုပ်ဖော်ကိုင်ဖက်တွေ ဖြစ်လာနိုင်တာပဲလေ"
ကျန်းချန်က အသာအယာ ခေါင်းညိတ်ပြသည်
"ကျုပ် လာခဲ့တာလည်း အဲဒီရည်ရွယ်ချက်ကြောင့်ပါပဲ၊ ဒါပေမဲ့ စတုတ္ထစီနီယာအစ်ကိုက ဘယ်လိုတွေးမလဲဆိုတာ မသေချာလို့။ အခု ခင်ဗျား ဒီလိုပြောတော့မှပဲ စိတ်အေးသွားရတယ်။ ဒါပေမဲ့..."
သူသည် ဖန့်ချန်ကို လှောင်ပြုံးဖြင့် စိုက်ကြည့်လိုက်ကာ
"ခင်ဗျားရဲ့ လက်ဖက်ရည်ပွဲက ဘယ်လိုဖြစ်လို့ အဆင့်မရှိတဲ့ လူတန်းစားတွေကိုပါ ဖိတ်ထားရတာလဲ "
အဆင့်မရှိတဲ့ လူတန်းစား
အားလုံးမှာ မှင်သက်သွားကြသည်။
ယနေ့ ထိုလက်ဖက်ရည်ပွဲသို့ တက်ရောက်ခွင့်ရသူတိုင်းမှာ အနည်းနှင့်အများ နောက်ခံရှိကြသူများချည်း ဖြစ်သည်။
ထို့အပြင် အားလုံးမှာ ကျွယ်မင်ကျင့်ကြံသူများ ဖြစ်ကြပြီး ကျွယ်မင်ကြယ်သို့ ရောက်ရှိလာနိုင်ခြင်းကပင် ပါရမီနှင့် အဆက်အသွယ် ကောင်းမွန်ကြောင်း သက်သေပြနေခြင်း ဖြစ်သည်။
အဆင့်မရှိသော လူတန်းစားဟူ၍ မည်သည့်နေရာတွင် ရှိနေသနည်း။
လူအချို့သည် ကျန်းချန်၏ အကြည့်နောက်သို့ လိုက်၍ ကြည့်လိုက်ကြသည်။
"ယုမိတ်ဆွေနဲ့ ဖန့်မိတ်ဆွေတို့လား "
ဟွမ်ဆန်းကျင်းသည် လူအုပ်ကြားမှ ထိုမြင်ကွင်းကို မြင်လိုက်ရသောအခါ မျက်နှာပျက်သွားပြီး အနည်းငယ် ထိတ်လန့်တုန်လှုပ်သွားသည်။
"ကျန်းမိတ်ဆွေ... ဒီစကားရဲ့ အဓိပ္ပာယ်က ဘာလဲ"
လီစီ၏ အကြည့်မှာ ယုထျန်းကော်တို့အဖွဲ့ပေါ်တွင် တစ်ပတ်လည်သွားပြီးနောက် တစ်စုံတစ်ခုကို စဉ်းစားမိဟန်ဖြင့် ပြုံး၍ မေးလိုက်သည်။
"ဒီနေ့ လက်ဖက်ရည်ပွဲကို လာတဲ့ ကျင့်ကြံသူတွေဟာ အနည်းဆုံးတော့ ကျွယ်မင်နန်းတော်မှာ နှစ်ပေါင်း ရာနဲ့ချီပြီး နေခဲ့ကြသူတွေ မဟုတ်လား "
ကျန်းချန်က အေးဆေးစွာ ဆိုသည်
"နှစ်ပေါင်း ရာနဲ့ချီတဲ့ အချိန်ဟာ ကျွယ်မင်နန်းတော်အပေါ် အပြည့်အဝ နားလည်ဖို့ လုံလောက်တယ်၊ ကျင့်ကြံခြင်းဆိုင်ရာ အမြင်တွေလည်း ပိုမိုနက်ရှိုင်းလာပြီး နောင်တစ်ချိန်မှာ အမာခံတပည့် ဖြစ်လာနိုင်တဲ့ အခွင့်အရေးတွေ ရှိကြသူတွေချည်းပဲ..."
အားလုံးက မသိစိတ်ဖြင့် ခေါင်းညိတ်လိုက်ကြသည်။
ယနေ့ ရောက်ရှိနေသူတိုင်း၏ စိတ်ထဲတွင် အမာခံတပည့် ဖြစ်လာရန် ရည်မှန်းချက် ရှိကြသည်။
အမာခံတပည့် ဖြစ်လာမှသာ လူအများအပေါ် လွှမ်းမိုးနိုင်သူ ဖြစ်လာမည်ဖြစ်ပြီး လူသားလောက ကိုးနယ်မြေ၏ အဆင့်မြင့်ဆုံး ပုဂ္ဂိုလ်များ ဖြစ်လာမည် မဟုတ်ပါလား။
များစွာသော အခမ်းအနားကြီးများကိုလည်း အမာခံတပည့်များသာ တက်ရောက်ခွင့်ရှိပြီး အပြင်စည်းကျင့်ကြံသူများမှာ နားထောင်ခွင့်ပင် မရှိကြပေ။
အမာခံတပည့် မဖြစ်သရွေ့ ဇာတ်ပို့သာ ဖြစ်နေမည်ဖြစ်ပြီး အမာခံတပည့် ဖြစ်လာမှသာ ထိုနေရာ၏ ဇာတ်လိုက် ဖြစ်လာပေလိမ့်မည်။
"ဒါပေမဲ့ ကျုပ် သိရသလောက်တော့... ဒီကျင့်ကြံသူရဲ့ စစ်ဆေးမှုရလဒ်က ကြေးညို အဆင့်ပဲ ရှိရုံတင်မကဘူး၊ ကျွယ်မင်နန်းတော်ထဲကို ရောက်လာတာ နှစ်ပေါင်း တစ်ရာတောင် မပြည့်သေးဘူး။ သူလည်း ဒီနေရာမှာ ရှိနေတာက... နည်းနည်းတော့ မဟန်ဘူး မထင်ဘူးလား "
ကျန်းချန်က ဖန့်ချန်ကို လက်ညှိုးထိုးပြလိုက်သည်။
ယုထျန်းကော်တို့အဖွဲ့မှာ အစက ထိတ်လန့်နေခဲ့ကြသော်လည်း ကျန်းချန် လက်ညှိုးထိုးပြလိုက်သူမှာ ဖန့်ချန်ဖြစ်ကြောင်း မြင်လိုက်ရသောအခါမှ အံ့သြမှင်သက်သွားကြတော့သည်။
"ဖန့်မိတ်ဆွေ... ခင်ဗျား ဘယ်တုန်းက ဒီကျန်းစီနီယာကို သွားစော်ကားမိလိုက်တာလဲ "
ယုထျန်းကော်က တိုးတိုးလေး လှမ်းမေးသည်။
လူအုပ်ကြားထဲတွင်မူ ဟွမ်ဆန်းကျင်းမှာ ခေါင်းကို ငုံ့ထားလိုက်မိသည်။
ခုနက ဖန့်ချန်တို့နှင့် အတူမရပ်နေခဲ့မိသည်မှာ ကံကောင်းသည်ဟု သူ တွေးနေမိသည်။
မဟုတ်လျှင် သူပါ ကျန်းချန်၏ ငြိုးတေးခြင်းကို ခံရပေလိမ့်မည်။
အကဲခတ်တတ်သူတိုင်းက ကျန်းချန်နှင့် ဖန့်ချန်ကြားတွင် ရန်ငြိုးရှိနေကြောင်း သိမြင်လိုက်ကြသည်။
ထိုရန်ငြိုးမှာလည်း သေးသေးမွှားမွှား မဟုတ်ဘဲ လူပုံအလယ်တွင် ကျန်းချန်က ဒေါသတကြီး လှောင်ပြောင်စော်ကားရသည်အထိ ကြီးမားပုံရသည်။
"လီစီနီယာ... ဒီဖန့်မိတ်ဆွေက အမာခံတပည့်အသစ် ဟုန် ခေါ်လာတဲ့သူလို့ ထင်ပါတယ်"
တစ်ဦးက လီစီကို တိုးတိုးလေး ပြောပြသည်။
လီစီသည် ဖန့်ချန်၏ နောက်ခံကို နားလည်သွားသောအခါ ပေါ့ပါးသော အပြုံးဖြင့်
"ကျုပ်ရဲ့ ပေါ့ဆမှုကြောင့်ပါ၊ ဒီလူကို ဘယ်သူက ဖိတ်ခေါ်လာသလဲဆိုတာ ကျုပ်လည်း မသိဘူး။ ခင်ဗျားတို့ထဲက ဘယ်သူက သူ့ကို ဖိတ်လာတာလဲ ရှိရင် ထွက်ဝန်ခံကြစမ်း"
ပတ်ဝန်းကျင်တစ်ခုလုံး တိတ်ဆိတ်သွားသည်။
မည်သူမျှ ထွက်မဝန်ခံရဲကြပေ။
ဟွမ်ဆန်းကျင်းလည်း နှုတ်ဆိတ်နေမိသည်။
အမှန်စင်စစ် သူဖိတ်ခဲ့သည်မှာ ယုထျန်းကော်သာ ဖြစ်ပြီး ဖန့်ချန်နှင့် မသက်ဆိုင်ပေ။
ယုထျန်းကော်မှာ မျက်နှာပျက်သွားပြီးနောက် သက်ပြင်းချကာ လက်အုပ်ချီ၍ ဆိုသည်။
"ကျုပ်... ကျုပ် ဖိတ်ခေါ်လာတာပါ..."
"မင်းလား မင်းက ဘယ်သူလဲ ဪ... ငွေဖြူရောင်တံဆိပ်ပြားပိုင်ရှင်ကိုး၊ ပါရမီတော့ နည်းနည်း ရှိသားပဲ"
လီစီက လှောင်ပြုံး ပြုံးလိုက်သည်။
သူ၏ခါးတွင်မူ ရွှေရောင်တံဆိပ်ပြားတစ်ခု ချိတ်ဆွဲထားရာ သူ၏ စစ်ဆေးမှုရလဒ်မှာ မည်မျှ ထူးချွန်ခဲ့ကြောင်း သိသာလှသည်။
ယခုကဲ့သို့ အဆင့် ၄ မသေမျိုး ဖြစ်လာခြင်းမှာလည်း မဆန်းပေ။
"ဒီနေ့ လက်ဖက်ရည်ပွဲက ရည်မှန်းချက်တူသူတွေကိုပဲ ဖိတ်ထားတာ။ မင်းတို့က ကျုပ်တို့နဲ့ လမ်းစဉ်မတူဘူးဆိုရင်တော့... ထွက်သွားပေးကြပါ"
လီစီက လက်ကာပြလိုက်သည်။
ယုထျန်းကော်တို့အဖွဲ့မှာ မျက်နှာပူထူသွားကြပြီး လူအများ၏ အကြည့်အောက်တွင် ဖိအားကြီးစွာ ခံစားနေကြရသည်။
ယနေ့ သူတို့သည် လူကြီးလူကောင်းများနှင့် သိကျွမ်းခွင့် မရသည့်အပြင်... လူကြီးလူကောင်း အများအပြားကိုပါ စော်ကားမိသလို ဖြစ်သွားလေပြီ။
အနည်းဆုံးတော့ ထို လီစီ နှင့် နောင်တွင် မည်သည့်ပတ်သက်မှုမျှ ရှိတော့မည် မဟုတ်ပေ။
လီစီ တို့၏ အာဏာကြောင့် ကျန်ရှိသော အပြင်စည်းကျင့်ကြံသူများကလည်း သူတို့ကို ဝိုင်းပယ်ကြပေလိမ့်မည်။
ဤသို့ တွေးမိသောအခါ အချို့မှာ လာမိသည်ကို နောင်တရနေကြသလို၊ ဖန့်ချန်ကိုလည်း မကျေမနပ် ကြည့်လိုက်ကြသည်။
မည်သူ့ကိုမှ မစော်ကားဘဲ အဆင့် ၄ မသေမျိုး၊ ၎င်းအပြင် နောက်ခံအင်အားရှိသော အဆင့် ၄ မသေမျိုးကိုမှ သွား၍ စော်ကားမိရသည်လားဟု တွေးနေကြသည်။
"ယုမိတ်ဆွေ... ဒီနေရာမှာ ငါတို့ကို သိပ်ပြီး မကြိုဆိုကြဘူး ထင်တယ်"
ဖန့်ချန်က ပြုံးလျက် ဆိုသည်
"ငါတို့တစ်စုပဲ သီးသန့်ဆုံကြတာ ပိုကောင်းပါလိမ့်မယ်။ လူအုပ်ကြီးနဲ့ စုဝေးနေတာဟာ လူစုလူဝေးလုပ်ဖို့ကလွဲရင် အနှစ်သာရရှိတဲ့ တာအိုတရားတွေလည်း ဆွေးနွေးနိုင်မှာ မဟုတ်ပါဘူး"
"ကောင်းပြီလေ"
ယုထျန်းကော်က စဉ်းစားပြီးနောက် ခေါင်းညိတ်ပြသည်။
နှစ်ဦးသားမှာ လှည့်ထွက်သွားကြသည်။
ယုထျန်းကော်၏ ဘေးမှလူများမှာလည်း အံကြိတ်ကာ နောက်မှ လိုက်သွားရတော့သည်။
သူတို့အားလုံးမှာ သတ်ဖြတ်သူကျား စူးစမ်းရေးအဖွဲ့ဝင်များ ဖြစ်ကြသဖြင့် တစ်လှေတည်းစီး တစ်ခရီးတည်းသွားများ မဟုတ်ပါလား။
"နေဦး"
လီစီက လက်ကို အသာအယာ ဝေ့ယမ်းလိုက်ရာ သူတို့နှစ်ဦး၏ရှေ့တွင် မသေမျိုးစွမ်းအားအတားအဆီး တစ်ခု ပေါ်လာပြီး လမ်းကို ပိတ်လိုက်တော့သည်။
"မင်းက... ငါ့ရဲ့ လက်ဖက်ရည်ပွဲကို လူစုလူဝေးလုပ်ဖို့ သက်သက်ပဲလို့ ပြောလိုက်တာလား "
လီစီ က ဖန့်ချန်ကို စိုက်ကြည့်ကာ သူ၏အပြုံးမှာ ပို၍ပင် တောက်ပလာသည်။
စတင်ရန်စခဲ့သော ကျန်းချန်မှာမူ ယခုအခါ ပွဲကြည့်ပရိသတ်အဖြစ် ဘေးတွင်ရပ်၍ ဘာစကားမျှမပြောဘဲ လှောင်ပြုံးဖြင့် ကြည့်နေတော့သည်။
"ဖန့်မိတ်ဆွေ... သူ့နဲ့ ရန်ငြိုးထပ်မတိုးပါနဲ့တော့၊ စကားကောင်းလေး နှစ်ခွန်းလောက် ပြောပြီးမှ ထွက်သွားကြရအောင်"
ယုထျန်းကော်က စိုးရိမ်တကြီးဖြင့် လှမ်းပြောသည်။
သူသည် ယခင်က မည်မျှပင် မာန်တက်ခဲ့ဖူးသော်လည်း ကျွယ်မင်နန်းတော်သို့ ရောက်ပြီးနောက်တွင်မူ ထိုမာန်မာနများမှာ တဖြည်းဖြည်းချင်း ချိုးနှိမ်ခံလိုက်ရပြီ ဖြစ်သည်။
ထိုနေရာသည် အလွန်ကောင်းမွန်သော နေရာဖြစ်ပြီး သူ၏ အားနည်းချက်များကို သိမြင်လာစေကာ ယခင်က မာနများကို စွန့်လွှတ်၍ ကျင့်ကြံခြင်းကိုသာ အာရုံစိုက်ရန် ဆုံးဖြတ်ထားသူ ဖြစ်သည်။
"မဟုတ်လို့လား ကျုပ် မှားသွားတာလည်း ဖြစ်နိုင်ပါတယ်။ ဘာမှ မရှိရင်တော့... ကျုပ် သွားခွင့်ပြုပါဦး"
ဖန့်ချန်က ပြုံးလျက် လက်အုပ်ချီ နှုတ်ဆက်လိုက်သည်။
သူ၏ ထိုအမူအရာမှာ လီစီ ကို ပို၍ပင် အရှက်ရစေကာ လီစီ၏ မျက်နှာပေါ်မှ အပြုံးမှာ ပို၍ပင် တောက်ပလာတော့သည်။
သူ စကားပြောရန် ပြင်လိုက်စဉ်မှာပင် လူပုံရိပ်အချို့မှာ အလျင်အမြန် ရောက်ရှိလာကြသည်။
ဦးဆောင်လာသူမှာ တောင်းပန်စကား ဆိုရင်း လက်အုပ်ချီလိုက်သည်။
"လီစီနီယာ... ကျုပ် နောက်ကျသွားပါတယ်"
ထိုသူမှာ နန်မင်ရှောက်ကျဲ ပင် ဖြစ်သည်။
အခန်း (၁၄၄၆) - အညစ်အကြေးများ စုဝေးရာ
"နန်မင်ရှောက်ကျဲ ပါလား..."
"စီနီယာအစ်ကို လီစီက သူ့ကိုတောင် ဖိတ်ထားတာလား"
နန်မင်ရှောက်ကျဲ နှင့် နန်မင်ရုယွဲ့ တို့မှာ ဆွေမျိုးတော်စပ်ကြပြီး အတော်လေး ရင်းနှီးကြကြောင်း လူတိုင်း သိထားကြသည်။
"မိတ်ဆွေ ရှောက်ကျဲ ပါလား"
လီစီ၏ မျက်နှာပေါ်တွင် အပြုံးတစ်ခု ပေါ်လာပြီး မသေမျိုးစွမ်းအားအတားအဆီးကို လက်ဝေ့ယမ်းကာ ဖယ်ရှားလိုက်သည်။
သူသည် ကြိုဆိုရန် ပြင်လိုက်စဉ်မှာပင် နန်မင်ရှောက်ကျဲက ခြေလှမ်းများကို ရပ်တန့်လိုက်ပြီး ဖန့်ချန်၏ ဘေးနားသို့ လျှောက်သွားသည်ကို မြင်လိုက်ရသည်။
"ဖန့်မိတ်ဆွေ... ကြားရသလောက်တော့ ခင်ဗျား ပြန်ရောက်လာပြီးတာနဲ့ အနားမနေရဘဲ စီနီယာအစ်မကြီးနောက်ကို လိုက်ပြီး လင်ကွေ့ကြယ်တာရာ မှာ ကိစ္စသွားဆောင်ရွက်တယ်ဆို၊ အဲဒီနောက်မှာ အောက်ပိုင်းနယ်မြေခြောက်ခုကိုပါ သွားခဲ့သေးတယ်လို့ ကြားတယ်"
"ကျုပ်ကတော့ ခင်ဗျားဆီ အလည်လာတာ အချည်းနှီး ဖြစ်သွားတာပေါ့။ ဒါပေမဲ့ ကိစ္စမရှိပါဘူး၊ ဒီနေ့ ပြန်ဆုံရတာပဲ ကောင်းပါတယ်။ အရင်က ကျွယ်မင်ယင်လောက ကိစ္စမှာ ခင်ဗျားဆီက ကျေးဇူးအကြွေး အများကြီး တင်ခဲ့တာ၊ နောင်ကျမှပဲ ဖြည်းဖြည်းချင်း ပြန်ဆပ်ပါ့မယ်ဗျာ"
နန်မင်ရှောက်ကျဲက ပြုံးလျက် လက်အုပ်ချီ နှုတ်ဆက်လိုက်သည်။
တုရုဖုန်း တို့အဖွဲ့ကလည်း ဖန့်ချန်ကို ပြုံးရွှင်စွာဖြင့် နှုတ်ဆက်ကြသည်။
စီနီယာအစ်မကြီး
ရောက်ရှိနေသူအားလုံးမှာ နန်မင်ရှောက်ကျဲ ပြောသွားသည့် ကျေးဇူးအကြွေးဆိုသည်ကို စိတ်မဝင်စားကြသော်လည်း စီနီယာအစ်မကြီး ဟူသည့် စကားလုံးအပေါ်တွင်မူ အလွန်အမင်း အာရုံစိုက်သွားကြသည်။
လွန်ခဲ့သော ရက်ပိုင်းကတင် ကျွယ်မင်ကြယ်ပေါ်၌ နာရေးခေါင်းလောင်းသံများ မြည်ဟီးခဲ့ဖူးသည်။
ထိုစဉ်က စီနီယာအစ်မကြီး တကယ်ပဲ ကျဆုံးသွားပြီဟု အားလုံးက ထင်မှတ်ခဲ့ကြသည်။
သို့သော် မကြာမီမှာပင် သတင်းများ ပြန်လည်ရောက်ရှိလာသည်။
အမှန်စင်စစ် ၎င်းမှာ စီနီယာအစ်မကြီး ခင်းကျင်းထားသည့် အကွက်တစ်ခုသာ ဖြစ်ပြီး သူမသည် သေဆုံးခြင်းမရှိသည့်အပြင် အဆင့် ၈ မသေမျိုး တစ်ဦးကိုပင် ကိုယ်တိုင် သတ်ဖြတ်နိုင်ခဲ့သည်။
ယခုအခါ စိတ်ဝိညာဥ်နယ်မြေ ရှိ အဆိပ်ငါးပါးဂိုဏ်း မှာ ကျွယ်မင်နန်းတော်၏ အမာခံတပည့်များ၏ ချေမှုန်းခြင်းကို ခံလိုက်ရပြီဖြစ်သည်။
ထိုဂိုဏ်းမှ ကျင့်ကြံသူများမှာ ထွက်ပြေးသူပြေး၊ သေသူသေဖြင့် ပျက်စီးသွားကြပြီ။
အဆင့် ၈ မသေမျိုး တစ်ဦး အုပ်စိုးပြီး စိတ်ဝိညာဥ်နယ်မြေတွင် ထိပ်တန်းအင်အားစုတစ်ခု ဖြစ်ခဲ့သော်လည်း တစ်ညအတွင်းမှာပင် ပြာပုံအတိ ဖြစ်သွားခဲ့ရသည်။
ရုလိုင်ဘုရားကျောင်းဘက်ကလည်း ကောင်းကျိုးမခံစားရပေ။
နှစ်ဖက်အဖွဲ့အစည်းများမှာ ညှိနှိုင်းနေကြပြီး တစ်ဖက်က အကျိုးအမြတ်တစ်ခုခုကို အနစ်နာခံ၍ မပေးအပ်လျှင် ထိုကိစ္စမှာ ငြိမ်းချမ်းစွာ ပြီးဆုံးမည်မဟုတ်ပေ။
သို့သော် သူတို့ မထင်မှတ်ထားသည်မှာ... ဤသို့ သာမန်ကာလျှံကာနိုင်လှသော ဖန့်မိတ်ဆွေသည်လည်း ထိုကိစ္စနှင့် ပတ်သက်နေသည်လား။
သူက ဘာကောင်မို့လို့... စီနီယာအစ်မကြီးနှင့်အတူ လင်ကွေ့ကြယ်တာရာ သို့ လိုက်ပါခွင့်ရရသနည်း အောက်ပိုင်းနယ်မြေခြောက်ခု ကိုပါ သွားခဲ့သေးသည်လား။
ယုထျန်းကော်တို့အဖွဲ့မှာ မှင်သက်နေကြသည်။
လူအုပ်ကြားထဲမှ ဟွမ်ဆန်းကျင်းနှင့် ဘေးမှလူများမှာလည်း တစ်ဦးကိုတစ်ဦး ကြည့်ကာ ထိတ်လန့်တုန်လှုပ်နေကြသည်။
လီစီသည် မူလက နန်မင်ရှောက်ကျဲနှင့် အလိုက်သင့် စကားပြောပြီးမှ ဖန့်ချန်ကို ဆက်၍ အကျပ်ကိုင်ရန် ကြံစည်ထားသော်လည်း နန်မင်ရှောက်ကျဲ၏ စကားကို ကြားလိုက်ရသောအခါ သူသည် အတွေးနက်သွားတော့သည်။
ကျန်းချန်၏ မျက်နှာမှာလည်း အကြိမ်ကြိမ် ပြောင်းလဲနေသည်။
ဖန့်ချန်သည် ထိုကိစ္စများထဲတွင် ပါဝင်နေလိမ့်မည်ဟု သူ လုံးဝမသိခဲ့သလို၊ စိတ်ကူးထဲမှာပင် ထည့်မထားခဲ့မိပေ။
အဆင့် ၁ မသေမျိုး တက်လှမ်းခါစ ကျင့်ကြံသူတစ်ဦးက ထိုကဲ့သို့ အဖြစ်အပျက်ကြီးထဲတွင် မည်သို့ ပါဝင်နိုင်မည်နည်း။
"မိတ်ဆွေ ရှောက်ကျဲက နောက်ပိုင်းမှာ လင်းယွမ် တို့အတွက် ကျွယ်မင်ယင်လောကမှာ အလုပ်ကောင်းကောင်းတွေ စီစဉ်ပေးခဲ့တာပဲ၊ ကျေးဇူးအကြွေးက ဆပ်ပြီးသားလို့ ပြောလို့ရပါတယ်။ အဲဒါကို အရမ်းကြီး စိတ်ထဲမထားပါနဲ့တော့"
ဖန့်ချန်က ပြုံး၍ ဆိုသည်။
ယုထျန်းကော်၏ အမူအရာမှာ ပို၍ ထူးဆန်းလာသည်။
နန်မင်ရှောက်ကျဲ၏ စကားများကိုပင် သူ မချေဖျက်နိုင်သေးမီမှာပင် ဖန့်ချန်နှင့် နန်မင်ရှောက်ကျဲတို့၏ ဆက်ဆံရေးမှာ အလွန်ရင်းနှီးနေကြောင်း တွေ့လိုက်ရပြန်သည်။
နန်မင်ရှောက်ကျဲက ထိုကဲ့သို့သော အမူအရာမျိုးဖြင့် ဆက်ဆံသည်ကို သူ တစ်ခါမျှ မမြင်ဖူးပေ။
ထိုသူမှာ သူကိုယ်တိုင်ထက်ပင် ဆယ်ဆမက မာန်တက်တတ်သူ မဟုတ်ပါလား။
"ဖန့်မိတ်ဆွေ... ဒီလက်ဖက်ရည်ပွဲက အခုမှ စတာမဟုတ်လား၊ ခုနက ခင်ဗျားတို့ ဘာလို့ ပြန်ဖို့ ပြင်နေကြတာလဲ တစ်ခုခု အရေးကြီးကိစ္စ ရှိလို့လား "
နန်မင်ရှောက်ကျဲက အရင်စကားကို ဆက်မပြောတော့ဘဲ စပ်စုသလို မေးလိုက်သည်။
"အရေးကြီးကိစ္စရှိရင်လည်း နောက်မှ အေးအေးဆေးဆေး ပြန်ဆုံကြတာပေါ့"
"မိတ်ဆွေ ရှောက်ကျဲ... ဒီဖန့်မိတ်ဆွေရဲ့ စရိုက်က နည်းနည်းတော့ မာန်တက်လွန်းသလားလို့။ အထင်လွဲမှုလေး တစ်ခုကြောင့်နဲ့ ပြန်မယ်လုပ်နေတာ။ အဲဒါတင်မကသေးဘူး၊ ကျုပ် ဦးစီးကျင်းပတဲ့ ဒီလက်ဖက်ရည်ပွဲကို တရားဓမ္မ ဆွေးနွေးတဲ့နေရာ မဟုတ်ဘဲ လူစုလူဝေးလုပ်ပြီး ဂိုဏ်းဂဏခွဲတဲ့နေရာလို့တောင် လှောင်ပြောင်သွားသေးတယ်"
လီစီက ရုတ်တရက် အေးစက်စွာ ရယ်မောလိုက်သည်။
"ခင်ဗျား ရောက်လာတာ အတော်ပဲ၊ ကျုပ်က အခုတင် ဒီဖန့်မိတ်ဆွေကို ဒီစကားပြောရတဲ့ အကြောင်းရင်းကို မေးမလို့ပဲ။ ခင်ဗျား ရောက်လာပြီဆိုတော့လည်း အတူတူ နားထောင်ကြတာပေါ့"
အားလုံး၏ အမူအရာမှာ ပို၍ ထူးဆန်းလာကြသည်။
သိသာလှသည်မှာ နန်မင်ရှောက်ကျဲ၏ ထိုအမူအရာမှာ ခုနက ပဋိပက္ခကို မြင်တွေ့ခဲ့၍ စီနီယာအစ်မကြီး၏ အရှိန်အဝါကို သုံးကာ ဖန့်ချန်ဘက်မှ ရပ်တည်ပေးခြင်း ဖြစ်သည်။
သို့သော် ဤလုပ်ရပ်မှာ လီစီအပေါ်တွင် ကောင်းကျိုးမသက်ရောက်သည့်အပြင် အခြေအနေကို ပို၍ ဆိုးရွားသွားစေပုံရသည်။
လီစီသည် ထိုစကားအနည်းငယ်ကြောင့် နောက်ဆုတ်မည့်ပုံမပေါ်ဘဲ ဆက်လက်၍ အကျပ်ကိုင်ရန်သာ ပြင်နေသည်။
ထိုပွဲကြီးမှာ မည်သို့ အဆုံးသတ်မည်ကို လူတိုင်းက စောင့်ကြည့်နေကြသည်။
အမှန်အတိုင်း ပြောရလျှင် ကျန်းချန်၏ နောက်ကွယ်တွင် အကြီးအကဲများကောင်စီမှ အကြီးအကဲတစ်ဦး ရှိပြီး၊ လီစီ၏ နောက်ကွယ်တွင် စတုတ္ထစီနီယာအစ်ကို ရှိသည်။
သူတို့နှစ်ဦးစလုံးမှာလည်း အဆင့် ၄ မသေမျိုးများ ဖြစ်ကြသည်။
နန်မင်ရှောက်ကျဲ၏ နောက်ကွယ်တွင်မူ နန်မင်ရုယွဲ့ တစ်ဦးသာ ရှိပြီး သူ့မှာ ကျွယ်မင်နန်းတော်တွင် အဆင့် ၅ ရှိသူ ဖြစ်ကာ စတုတ္ထစီနီယာအစ်ကိုထက် ဝါနုသည်။
ထို့အပြင် ဖန့်ချန်မှာ အသစ်တက်လာသော ကျွယ်မင်ကျင့်ကြံသူတစ်ဦးသာ ဖြစ်သည်။
သူ့နောက်ကွယ်တွင် အမာခံတပည့်အသစ် တစ်ဦးရှိနိုင်သော်လည်း ကျန်းချန်တို့နှစ်ဦး၏ နောက်ခံနှင့် နှိုင်းယှဉ်လိုက်လျှင် အရေးမပါသလို ဖြစ်သွားပေသည်။
"စီနီယာအစ်မကြီးက ဒီလူနဲ့ တကယ်ပဲ ပတ်သက်နေမှသာ ရမှာ၊ မဟုတ်ရင်တော့ ဒီနေ့ နန်မင်ရှောက်ကျဲရော ဒီလူပါ အရှက်တကွဲနဲ့ပဲ ပြန်သွားရလိမ့်မယ်"
"စီနီယာအစ်မကြီးက ဘယ်လိုပုဂ္ဂိုလ်မျိုးလဲ၊ အသစ်တက်လာတဲ့ အဆင့် ၁ မသေမျိုးတစ်ယောက်ကို ဘာလို့ ဂရုစိုက်မှာလဲ။ အရင်က စီနီယာအစ်မကြီးနဲ့အတူ လင်ကွေ့ကြယ်တာရာကို လိုက်သွားတဲ့သူတွေ အများကြီးပဲ။ အဲဒီ ဟုန် အမာခံတပည့် ခေါ်လာတဲ့သူတွေ အကုန်လုံး လိုက်သွားကြတာပဲလေ၊ ဖန့်ချန်ကလည်း အဲဒီထဲက တစ်ယောက်ပဲ ဖြစ်မှာပါ"
လူအများက တိုးတိုးတိတ်တိတ် ဝေဖန်နေကြသည်။
နန်မင်ရှောက်ကျဲ၏ မျက်နှာမှာ အနည်းငယ် ပျက်သွားသည်။
သူသည် မည်သို့ တုံ့ပြန်ရမည်ကို စဉ်းစားနေစဉ်မှာပင် ဖန့်ချန်က စကားစလိုက်သည်။
"အကြောင်းရင်းလား အလွန်ရိုးရှင်းပါတယ်"
ဖန့်ချန်က ကျန်းချန်ကို လှောင်ပြုံးဖြင့် ကြည့်လိုက်သည်။
"ဒီစီနီယာ ကျန်းဟာ အဆင့် ၃ မသေမျိုး ဖြစ်ပါလျက်နဲ့ ကျုပ် အဆင့် ၁ မသေမျိုး တက်လှမ်းနေတဲ့ အချိန်မှာ လုပ်ကြံ နှောင့်ယှက်ခဲ့လို့ ဟုန် အမာခံတပည့်ရဲ့ မောင်းထုတ်ခြင်းကို ခံခဲ့ရတဲ့သူပဲ ဒီလို ယုတ်ညံ့တဲ့ နည်းလမ်းမျိုးကို အဆင့် ၃ မသေမျိုး တစ်ယောက်ဆီမှာ တွေ့ရတာ တကယ်ကို မဖြစ်သင့်ဘူး၊ ဒါ့အပြင် သူက ကျွယ်မင်ကျင့်ကြံသူ တစ်ယောက်လည်း ဖြစ်နေသေးတယ်။ ဒီလက်ဖက်ရည်ပွဲက ဒီလိုလူမျိုးကို အလေးနက်ထားနေတယ်ဆိုရင် အဲဒါဟာ အညစ်အကြေးတွေ စုဝေးရာ၊ ဂိုဏ်းဂဏခွဲတဲ့နေရာ မဟုတ်လို့ ဘာလဲ "
အားလုံးမှာ ထိတ်လန့်သွားကြပြီး ကျန်းချန်ကို မယုံကြည်နိုင်စွာ ကြည့်လိုက်ကြသည်။
ဂုဏ်သရေရှိ အဆင့် ၃ မသေမျိုး တစ်ဦးက မျိုးဆက်သစ် တစ်ဦး၏ အဆင့်တက်ချိန်တွင် နှောင့်ယှက်လိမ့်မည်ဟု မည်သူမျှ မယုံကြည်နိုင်ကြပေ။
သို့သော် ကျန်းချန်သည် ဟုန် အမာခံတပည့်၏ စူးစမ်းရေးအဖွဲ့မှ ရုတ်တရက် ထွက်ခွာသွားသည့် ကိစ္စမှာ တစ်ခုခုတော့ ရှိနေပုံရပြီး၊ သူသည် ရောက်ရောက်ချင်း ဖန့်ချန်ကို ရန်စသည်မှာလည်း ရန်ငြိုးရှိနေ၍ ဖြစ်ကြောင်း သိသာလှသည်။
လူအများ၏ အကြည့်များမှာ ရှုပ်ထွေးသွားကြသည်။
အချို့မှာ အေးစက်သော အကြည့်များဖြင့် ကြည့်လာကြပြီး ခြေလှမ်းအနည်းငယ် ဆုတ်သွားကြသည်။
ကျန်းချန်၏ ထိုလုပ်ရပ်ကို သူတို့က ရွံရှာမိပုံရသည်။
အဆင့်တက်ခြင်းဆိုသည်မှာ မည်သည့်ကျင့်ကြံသူအတွက်မဆို အလွန်အရေးကြီးသော အချိန်ဖြစ်ပြီး နောင်အနာဂတ်အတွက် ပထမဆုံးသော အဓိကကိစ္စဖြစ်သည်။
ထိုကဲ့သို့ အချိန်မျိုးတွင် နှောင့်ယှက်ဖျက်ဆီးခြင်းမှာ မည်မျှ ယုတ်မာသော စိတ်ထားဖြစ်ကြောင်း စဉ်းစားကြည့်ရုံဖြင့် သိနိုင်ပေသည်။
ယုထျန်းကော်မှာ အဖြစ်မှန်ကို သိသွားတော့သည်။
နန်မင်ရှောက်ကျဲ၏ မျက်နှာမှာလည်း ပျက်သွားပြီး သူလည်း ထိုကိစ္စကို ယခုမှ ကြားဖူးပုံရသည်။
ကျန်းချန်၏ အရှိန်အဝါမှာ ခေတ္တမျှ တန့်သွားသည်။
သူ၏ အမူအရာမှာ မပြောင်းလဲသော်လည်း မျက်ဝန်းများမှာ ခဏမျှ ပြင်းထန်သော ဒေါသရိပ်များဖြင့် တောက်ပသွားသည်။
လီစီပင် သူ၏ စိတ်ခံစားမှု ပြောင်းလဲသွားသည်ကို ခံစားလိုက်ရသည်။
"အဲဒါက အထင်လွဲမှုလေး တစ်ခုပါ၊ အခုအချိန်မှာ မင်းက ဒါကို ထုတ်ပြောနေတာ ဘာရည်ရွယ်ချက်လဲ "
ကျန်းချန်က ရုတ်တရက် ပေါ့ပေါ့ပါးပါး ရယ်မောလိုက်သည်။
"ဒီအထင်လွဲမှုအတွက် ငါက မင်းကို ဂုဏ်ထူးရမှတ် ၇၀၀ တောင် ပေးခဲ့ဖူးတယ် မဟုတ်လား။ အခု မင်းက အဆင့် ၁ မသေမျိုးလည်း ဖြစ်နေပြီ၊ ဂုဏ်ထူးရမှတ် ၇၀၀ လည်း ရထားပြီးပြီ၊ ဒါကို ဆက်ပြီး အငြိုးထားနေဦးမှာလား ငါ့ရဲ့ ကျင့်ကြံမှုနဲ့သာ မင်းရဲ့ အဆင့်တက်ခြင်းကို တကယ်ဖျက်ဆီးချင်ရင် စိတ်ကူးတစ်ချက်နဲ့တင် လုံလောက်တယ်၊ မင်းဆိုရင် ဘယ်သူလုပ်မှန်းတောင် သိမှာမဟုတ်ဘူး"
"ဘာ ဂုဏ်ထူးရမှတ် ၇၀၀ တောင် လျော်ပေးခဲ့တာလား "
"စီနီယာ ကျန်း ပြောတာလည်း ဟုတ်တာပဲ၊ သူက အဆင့် ၃ မသေမျိုးလေ၊ တကယ်ဖျက်ဆီးချင်ရင် ဒီလူ ဘယ်လိုလုပ် သတိထားမိမှာလဲ "
"အထင်လွဲတာပဲ ဖြစ်မှာပါ..."
လူအများ၏ အမူအရာ ပြောင်းလဲသွားသည်ကို မြင်လိုက်ရသောအခါ ကျန်းချန်သည် ယနေ့အတွက် သူ အခြေအနေ ကောင်းသွားပြီဟု သိလိုက်သည်။
ထိုစဉ်က အဖြစ်အပျက်ကို ဖန့်ချန်ဘက်မှ သက်သေထွက်ဆိုပေးနိုင်မည့်သူ တစ်ဦးမျှ မရှိပေ။
ထို့ကြောင့် သူ ပြောသမျှမှာ အမှန်ဖြစ်ပြီး တစ်ဖက်လူမှာ မည်သို့မျှ ငြင်းချက်ထုတ်နိုင်မည်မဟုတ်ပေ။
ထိုစဉ်မှာပင် အလွန်အမင်း ပြင်းထန်လှသော အရှိန်အဝါတစ်ခုမှာ အဝေးမှ လွင့်ပျံလာသည်။
"အဆင့် ၅ မသေမျိုးလား "
"မဟုတ်ဘူး... အဆင့် ၆ မသေမျိုး ရောက်လာတာ ထင်တယ်..."
"စီနီယာအစ်ကို လီစီ ရဲ့ မျက်နှာက... တကယ်ကို ကြီးလှပါပေတယ်..."
အားလုံးမှာ ကောင်းကင်ယံသို့ မော့ကြည့်လိုက်ကြတော့သည်။