အခန်း (၁၄၄၇-၁၄၄၈)
Vol. 145 Ch. 1447-1448
အခန်း (၁၄၄၇) - အမာခံတပည့် စစ်ဆေးမှု
ရောက်ရှိလာသော အဆင့် ၆ မသေမျိုး ပေါ်လာသည်နှင့် တစ်ပြိုင်နက် လူအုပ်ကြီးမှာ အသက်ရှူပင် မှားသွားကြတော့သည်။
"တိုက်ပွဲတစ်ရာမသေမျိုး ပါလား"
"သူ ဖြစ်နေတာပဲ..."
"ငါ မမွေးခင်ကတည်းက သူက နာမည်ကြီးနေတာ ကြာပြီ"
"စီနီယာအစ်ကို လီစီရဲ့ မျက်နှာက တကယ်ကို ကြီးမားလှပေတယ် "
ရောက်လာသူမှာ အခြားသူမဟုတ်၊ ရှဲ့အာမန်၏ နတ်တံဆိပ်တော် စူးစမ်းရေးအဖွဲ့မှ ထိပ်တန်းတိုက်ခိုက်ရေးသမား တိုက်ပွဲတစ်ရာမသေမျိုး ပင်ဖြစ်သည်။
သူ၏ ကျင့်ကြံမှုအဆင့်မှာ အလွန်ပင် ခိုင်မာကျစ်လျစ်လှပြီး ကျွယ်မင်နန်းတော်ရှိ အဆင့် ၆ မသေမျိုးများထဲတွင် တစ်မူထူးခြားသူ ဖြစ်သည်။
အမာခံတပည့် စစ်ဆေးမှုကို အကြိမ်အနည်းငယ် လျှောက်ထားခဲ့သော်လည်း ရှုံးနိမ့်ခဲ့သဖြင့် အစီရင်ဗဟိုချက် နှင့် ပဋိညာဉ် မပြုနိုင်ခဲ့ပေ။
သို့သော် သူသည် ရှေးဟောင်းမသေမျိုး အဆင့်သို့ မတက်လှမ်းနိုင်ဟု မည်သူမျှ မထင်ကြပေ။
ရှေးဟောင်းမသေမျိုး စာရင်းဝင်ခွင့်သာ ရရှိပါက တိုက်ပွဲတစ်ရာမသေမျိုး သည် ရှေးဟောင်းမသေမျိုးအဆင့်သို့ အေးအေးဆေးဆေး တက်လှမ်းနိုင်သူ ဖြစ်သည်။
ထိုအဆင့်သို့ ရောက်ရှိနေပြီဖြစ်ရာ သူသည် လက်ဗလာဖြင့်ပင် အစီရင်မသေမျိုးအတတ် ကို အခုမှ စတင်နားလည်ကာစ လီရှမ်းဇီ ကဲ့သို့သော အမာခံတပည့်မျိုးနှင့် တန်းတူ တိုက်ခိုက်နိုင်စွမ်း ရှိသည်။
အမာခံတပည့် မဟုတ်သော်လည်း အမာခံတပည့်ထက် သာလွန်သူ ဖြစ်ပေသည်။
၎င်းအပြင် တိုက်ပွဲတစ်ရာ မသေမျိုး ၏ နောက်ကွယ်တွင် စီနီယာအစ်မကြီး ရှဲ့အာမန် ရှိနေသေးသည်။
ထိုနေရာတွင် ရှိနေသော ကျင့်ကြံသူများထဲတွင် ကျင့်ကြံမှု အမြင့်ဆုံးမှာ ကျန်းချန် နှင့် လီစီ တို့နှင့် အဆင့်တူ အဆင့် ၄ မသေမျိုးများသာ ရှိကြသည်။
သူတို့အားလုံးမှာ အလျင်အမြန်ပင် ရှေ့သို့တက်၍ ဂါရဝပြုကြတော့သည်။
"ကျုပ်တို့...တိုက်ပွဲတစ်ရာမသေမျိုး ကို ဂါရဝပြုပါတယ်ဗျာ"
"အခမ်းအနားတွေ လုပ်မနေကြနဲ့တော့"
တိုက်ပွဲတစ်ရာမသေမျိုး က အေးဆေးစွာ ခေါင်းညိတ်ပြသည်။
လီစီမှာ စိတ်လှုပ်ရှား ဝမ်းသာသွားပြီး ရှေ့သို့ တစ်လှမ်းတိုးကာ အသံတိုးတိုးဖြင့် ဆိုသည်။
"တိုက်ပွဲတစ်ရာမသေမျိုး က ကျုပ်ရဲ့ လက်ဖက်ရည်ပွဲကို တက်ရောက်ပေးလိမ့်မယ်လို့ မထင်ထားမိပါဘူး။ ကျုပ်သာ ကြိုသိရင် ကိုယ်တိုင်လာကြိုမှာပါ။ အရှင်အနေနဲ့ စိတ်အနှောင့်အယှက် မဖြစ်ပါနဲ့ဗျာ"
"လီစီရဲ့ မျက်နှာက ဒီတစ်ခါတော့ တကယ်ကို ကြီးတာပဲ။ ဒီသတင်းသာ ပျံ့သွားရင် နောင်မှာ အဆင့် ၄ မသေမျိုးတွေထဲမှာ ဘယ်သူက သူ့ကို ယှဉ်ရဲတော့မှာလဲ"
"စီနီယာအစ်မကြီးနဲ့ စတုတ္ထစီနီယာအစ်ကိုတို့က အခုတလော ရင်းနှီးနေကြလို့ စီနီယာအစ်မကြီးက တိုက်ပွဲတစ်ရာမသေမျိုးကို လွှတ်ပြီး လီစီကို မျက်နှာပွင့်အောင် လုပ်ပေးတာလား မသိဘူး"
"မဖြစ်နိုင်ပါဘူး... စီနီယာအစ်မကြီးတို့က ဒီလိုကိစ္စမျိုးကို ဘယ်ဂရုစိုက်မှာလဲ။ တိုက်ပွဲတစ်ရာမသေမျိုးနဲ့ လီစီနဲ့က တစ်ဦးချင်း ခင်မင်မှု ရှိနေလို့ သီးသန့်လာတာ ဖြစ်မှာပါ"
"စီနီယာအစ်ကို လီစီကလည်း အမြော်အမြင်ရှိပါတယ်။ နှစ်ပေါင်းများစွာ လက်ဖက်ရည်ပွဲတွေ ကျင်းပလာခဲ့တာကြောင့် ကျွယ်မင်ကြယ်ပေါ်မှာ သူ့နာမည်က ဟိုးဟိုးကျော်နေပြီလေ"
လူအများက တိုးတိုးတိတ်တိတ် ဆွေးနွေးနေကြသည်။
လီစီမှာ မျက်နှာပေါ်မှ အပြုံးကို မထိန်းနိုင်တော့ဘဲ စကားပြောရန် ပြင်လိုက်စဉ်မှာပင် တိုက်ပွဲတစ်ရာမသေမျိုး က မျက်မှောင်ကြုတ်လိုက်သည်ကို မြင်လိုက်ရသည်။
"လက်ဖက်ရည်ပွဲ ငါက ဒီပွဲကို လာတာမဟုတ်ဘူး"
"ဗျာ..."
လီစီမှာ မှင်သက်သွားပြီး မသိစိတ်ဖြင့် မေးလိုက်မိသည်။
"ဒါဆိုရင် ဘာကိစ္စနဲ့..."
တိုက်ပွဲတစ်ရာမသေမျိုးက လူအုပ်ကြီးကို တစ်ချက်ဝေ့ကြည့်လိုက်ပြီး အကြည့်က ဖန့်ချန်ပေါ်တွင် ရပ်တန့်သွားကာ မျက်ဝန်းထဲတွင် အပြုံးရိပ် အနည်းငယ် ပေါ်လာသည်။
"စီနီယာအစ်မကြီးက မင်းကို လာခေါ်ခိုင်းလိုက်လို့"
ဝေါခနဲ
မရေမတွက်နိုင်သော အကြည့်များမှာ ဖန့်ချန်ပေါ်သို့ ကျရောက်သွားကြသည်။
ထိုအကြည့်များထဲတွင် မယုံကြည်နိုင်မှု၊ တုန်လှုပ်မှုနှင့် ထိတ်လန့်မှုများ ပြည့်နှက်နေသည်။
လီစီ၏ အကြည့်များမှာ ဝေဝါးသွားတော့သည်။
ကျန်းချန်၏ မျက်နှာမှာလည်း အကြိမ်ကြိမ် ပြောင်းလဲနေသည်။
ယုထျန်းကော်နှင့် နန်မင်ရှောက်ကျဲ တို့မှာလည်း သူတို့နည်းတူပင် စိတ်ထဲတွင် အလွန်အမင်း တုန်လှုပ်သွားကြသည်။
စီနီယာအစ်မကြီးက တိုက်ပွဲတစ်ရာမသေမျိုးကို အထူးတလည် လွှတ်ပြီး ဖန့်ချန်ကို လာခေါ်ခိုင်းသည်လား။
ရှေ့မှ ပုဂ္ဂိုလ်မှာ တိုက်ပွဲတစ်ရာမသေမျိုး အစစ်အမှန်သာ မဟုတ်လျှင် အခြားတစ်နေရာတွင် တစ်စုံတစ်ယောက်က ထိုသို့ပြောလာပါက သူတို့ သေလျှင်ပင် ယုံကြလိမ့်မည် မဟုတ်ပေ။
စီနီယာအစ်မကြီးမှာ မည်မျှ မြင့်မြတ်သော ပုဂ္ဂိုလ်ဖြစ်သနည်း၊ အသစ်တက်လာကာစ အဆင့် ၁ မသေမျိုးလေး တစ်ဦးကို ဘာကြောင့် အလေးထားနေရသနည်း သူကသာ အမာခံတပည့် ဖြစ်နေလျှင် တစ်မျိုး၊ အခုတော့ သာမန် အမာခံတပည့်များပင် စီနီယာအစ်မကြီးနှင့် ရင်းနှီးခွင့်ရရန် အခွင့်အရေး မရှိသလောက်ပင်...
"နေဦး... သူက စီနီယာအစ်မကြီးကို သွားစော်ကားမိတာများလား"
တစ်စုံတစ်ယောက်က အတွေးပေါက်သွားသည်။
သို့သော် တိုက်ပွဲတစ်ရာ မသေမျိုး ကို အသေအချာ ကြည့်လိုက်သောအခါ မျက်နှာပေါ်တွင် ဒေါသအရိပ်အယောင် မရှိသဖြင့် ထိုသို့လည်း မဖြစ်နိုင်ပေ။
"စီနီယာ... ဒုက္ခပေးမိပါပြီ"
ဖန့်ချန်က လက်အုပ်ချီ၍ ဆိုသည်။
"အင်း..."
ပိုင်ကျန့်ရှန်းကျွင်းက အသာအယာ ခေါင်းညိတ်ပြပြီး ဖန့်ချန်ကို ခေါ်ဆောင်၍ ထွက်ခွာရန် ပြင်လိုက်သည်။
ထိုစဉ် ကျန်းချန်က မနေနိုင်တော့ဘဲ မေးလိုက်သည်
"အရှင်... စီနီယာအစ်မကြီးက ဖန့်ချန်ကို ဘာကိစ္စနဲ့ ရှာတာပါလဲဗျာ"
"ဘာကိစ္စလဲ ဟုတ်လား မင်းနဲ့..."
တိုက်ပွဲတစ်ရာ မသေမျိုး က စကားပြောရန် ပြင်လိုက်သော်လည်း သူ၏မျက်ဝန်းများမှာ ခဏမျှ ဝေ့ဝဲသွားကာ ရှေ့မှ အခြေအနေမှာ တစ်ခုခု မဟုတ်မှန်း ရိပ်မိသွားပုံရသည်။
ကျန်းချန်သည် ယခင်က ဖန့်ချန်အပေါ် ပြုမူခဲ့သည်များကို သတိရသွားပြီးနောက် သူက အခြေအနေကို နားလည်သွားကာ လှောင်ပြုံးလေးဖြင့် ဆိုသည်။
"ဘာမှတော့ မဟုတ်ပါဘူး၊ ဖန့်ချန် လျှောက်ထားခဲ့တဲ့ အမာခံတပည့် စစ်ဆေးမှုကိစ္စ အဆင်သင့် ဖြစ်နေပြီလေ။ အကြီးအကဲများကောင်စီကလည်း အမိန့်ထုတ်ပြန်လိုက်ပြီ၊ အစီရင်ဗဟိုချက် တစ်ခုကို အသုံးပြုခွင့် ပေးလိုက်ပြီပေါ့။ ဒါကြောင့် စစ်ဆေးမှုပြုလုပ်မယ့် နေရာကို သူ့ကို ခေါ်သွားဖို့ လာတာပဲ။ စီနီယာအစ်မကြီးကလည်း အဲဒီမှာ စောင့်နေတယ်"
"..."
"..."
ပတ်ဝန်းကျင် တစ်ခုလုံးမှာ သေလောက်အောင် တိတ်ဆိတ်သွားတော့သည်။
နန်မင်ရှောက်ကျဲပင်လျှင် သူ၏နှလုံးခုန်သံ ခေတ္တရပ်တန့်သွားသလို ခံစားလိုက်ရသည်။
သူတို့ နားကြားမမှားဘူး မဟုတ်လား
အမာခံတပည့် စစ်ဆေးမှု
ကျွယ်မင်ကျင့်ကြံသူ ဖြစ်လာတာ နှစ်ပေါင်း တစ်ရာတောင် မပြည့်သေးတဲ့ အဆင့် ၁ မသေမျိုး တစ်ယောက်က အမာခံတပည့် စစ်ဆေးမှုကို ခံယူမယ် ဟုတ်လား။
ကျန်းချန်ကဲ့သို့သော နောက်ခံမျိုးရှိသည့်သူပင်လျှင် အဆင့် ၃ မသေမျိုးအထိ အချိန်ကုန်ခံခဲ့သော်လည်း လုံလောက်သော ဂုဏ်ထူးရမှတ် မစုဆောင်းနိုင်သေးပေ။
ဒီလူက ဘာမို့လို့လဲ
သူတို့သည် မသိစိတ်ဖြင့် ထိုကိစ္စကို မယုံကြည်နိုင်ကြသော်လည်း စကားပြောသူမှာ တိုက်ပွဲတစ်ရာမသေမျိုး ဖြစ်နေသဖြင့် သူသည် ထိုသို့သော ကိစ္စမျိုးကို လိမ်ညာပြောဆိုလိမ့်မည် မဟုတ်ပေ။
"မဖြစ်နိုင်တာ..."
ကျန်းချန်က အတင်းအကြပ် ပြုံးလိုက်ရင်း
"တစ်ခုခု မှားနေတာလား မသိဘူး၊ သူ့ရဲ့ ဂုဏ်ထူးရမှတ်က အမာခံတပည့် စစ်ဆေးမှုကို လျှောက်ထားဖို့ လုံလောက်လို့လား တကယ်လို့ မှားနေတယ်ဆိုရင်တော့ သေသေချာချာ စစ်ဆေးသင့်ပါတယ်၊ မဟုတ်ရင် ဒီကိစ္စသာ တကယ်ဖြစ်လာရင် တခြား ကျွယ်မင်ကျင့်ကြံသူတွေ ဘယ်လိုတွေးမလဲ။ အရာအားလုံးက မျှတမှုအပေါ်မှာပဲ အခြေခံသင့်တာ မဟုတ်လား"
"ကျန်းစီနီယာ ပြောတာ မှန်ပါတယ်"
"ကျုပ် ကျွယ်မင်နန်းတော်မှာ နေလာတာ နှစ်ပေါင်း နှစ်ထောင့်လေးရာကျော်ပြီ၊ အခုထိ စစ်ဆေးမှု လျှောက်ထားဖို့ ဂုဏ်ထူးရမှတ် မစုမိသေးဘူး။ သူကသာ တခြားအဆက်အသွယ်တွေနဲ့ ဒီအခွင့်အရေးကို ရခဲ့တာဆိုရင် ကျုပ်တို့လိုလူတွေအတွက် မတရားလွန်းရာ ကျပါတယ်"
ကန့်ကွက်သံများစွာ ထွက်ပေါ်လာသော်လည်း တိုက်ပွဲတစ်ရာ မသေမျိုးက များများစားစား ရှင်းမပြဘဲ အေးဆေးစွာသာ ဆိုသည်။
"ဒီအတွက်တော့ စိတ်အေးအေးထားကြပါ၊ သူက ဂုဏ်ထူးရမှတ် လုံလောက်လို့သာ စစ်ဆေးမှု လျှောက်ထားခွင့် ရတာပါ။ ကျွယ်မင်နန်းတော်ရဲ့ စည်းမျဉ်းတွေက နှစ်ပေါင်းများစွာကတည်းက တည်ရှိလာတာ၊ အခုထိတော့ ဘယ်သူမှ လျှောက်ပြီး မဖျက်ဆီးရဲသေးဘူး။ ကျန်းချန်ရဲ့ နောက်ကွယ်မှာ စီနီယာ အကြီးအကဲ ကျန်း ရှိနေတာပဲ၊ သူ စစ်ဆေးမှု လျှောက်ထားဖူးတာ မင်းတို့ တွေ့ဖူးလို့လား "
"..."
ကျန်းချန်၏ မျက်နှာပေါ်တွင် အတင်းအကြပ်ပြုံးထားသည့် အမူအရာသာ ရှိနေတော့သည်။
"ဂုဏ်ထူးရမှတ် ၅,၀၀၀ ဆိုတာ အဲဒီလောက် လွယ်လွယ်နဲ့ စုလို့ရတာမှ မဟုတ်တာ"
"တကယ်တော့ မလွယ်ပါဘူး။ ဒီတစ်ခေါက် ဖန့်ချန်က စီနီယာအစ်မကြီးနောက်ကို လိုက်ရင်း အန္တရာယ်နှစ်ကြိမ် ဆက်တိုက် ရင်ဆိုင်ခဲ့ရသလို၊ အောင်မြင်မှုကြီး တစ်ခုကိုလည်း ရယူပေးနိုင်ခဲ့တယ်။ ဒါကြောင့် စီနီယာအစ်မကြီးက သူ့ကို သီးသန့် ဂုဏ်ထူးရမှတ် ၃,၀၀၀ ပေးခဲ့ပြီး အကြီးအကဲများကောင်စီကလည်း ၂,၀၀၀ ပေးခဲ့တယ် "
တိုက်ပွဲတစ်ရာမသေမျိုး က လှောင်ပြုံးဖြင့် ဆိုသည်
"မင်းတို့ ပေါင်းကြည့်လိုက်လေ၊ အားလုံး ၅,၀၀၀ တိတိ မဟုတ်ဘူးလား "
၃,၀၀၀ နှင့် ၂,၀၀၀ ပေါင်းခြင်းမှာ အလွန်ရိုးရှင်းသော အတွက်အချက် ဖြစ်သည်။
ဦးနှောက်သုံးစရာပင် မလိုပေ။
လူတိုင်းမှာ ဖန့်ချန်တွင် ဂုဏ်ထူးရမှတ် လုံလောက်နေပြီဖြစ်ကြောင်း အတည်ပြုလိုက်နိုင်ကြပြီး သူတို့၏ မျက်ဝန်းထဲတွင် အားကျစိတ်များဖြင့် ပြည့်နှက်သွားတော့သည်။
ကျန်းချန်မှာ စကားစ ဆွံ့အသွားပြီး အကြာကြီး နှုတ်ဆိတ်နေမိသည်။
တိုက်ပွဲတစ်ရာ မသေမျိုးက ထိုအခြေအနေကို မြင်သောအခါ အသာအယာ ရယ်မောလိုက်ပြီး ဖန့်ချန်ကို ခေါ်ဆောင်ကာ ကောင်းကင်ယံသို့ ပျံသန်းထွက်ခွာသွားတော့သည်။
"ကျန်းမိတ်ဆွေ... ဒီတစ်ခါတော့ ခင်ဗျားကြောင့် ကျုပ်တော့ ဒုက္ခရောက်တော့မှာပဲ"
လီစီက သက်ပြင်းအသာချလိုက်သည်။
အမာခံတပည့်အသစ် တစ်ယောက်ကို စော်ကားမိတာက ကိစ္စမရှိသော်လည်း၊ အကယ်၍ ထိုအမာခံတပည့်ကို စီနီယာအစ်မကြီးကပါ အလေးထားနေလျှင်တော့ ပြဿနာက အလွန်ကြီးမားသွားပြီ ဖြစ်သည်။
သူ့နောက်ကွယ်မှ စတုတ္ထစီနီယာအစ်ကိုသည်လည်း မသေမျိုးအစီရင်အတတ်ကို အသုံးပြုနိုင်သော်လည်း ထိုစီနီယာအစ်မကြီးနှင့် ယှဉ်လိုက်လျှင်တော့ မဖြည့်ဆည်းနိုင်သော ကွာခြားချက်ကြီး ရှိနေဆဲ ဖြစ်သည်။
"စစ်ဆေးမှု လျှောက်ထားနိုင်ရုံနဲ့ ဘာဖြစ်မှာလဲစစ်ဆေးမှုမှာ ကျရှုံးတဲ့သူတွေလည်း အများကြီးပဲ မဟုတ်လား။ တိုက်ပွဲတစ်ရာမသေမျိုး တောင် နှစ်ကြိမ်တောင် ကျရှုံးခဲ့တာပဲ"
ကျန်းချန်က ရုတ်တရက် အေးစက်စွာ နှာခေါင်းရှုံ့လိုက်ရင်း
"သူ ဒီနေ့ စစ်ဆေးမှု လုပ်မယ်ဆိုမှတော့ ငါတို့တွေလည်း သွားကြည့်ကြတာပေါ့။ တကယ်လို့ သူသာ စစ်ဆေးမှု အောင်မြင်သွားရင်တော့ ငါတို့တွေက သူ့ကို ပထမဆုံး ဂုဏ်ပြုပေးမယ့်သူတွေ ဖြစ်တာပေါ့"
အားလုံးက ချက်ချင်းပင် သဘောတူလိုက်ကြသည်။
ယနေ့ တစ်စုံတစ်ယောက်က အမာခံတပည့် စစ်ဆေးမှု ပြုလုပ်မည်ဖြစ်ရာ ထိုလက်ဖက်ရည်ပွဲမှာလည်း အရေးမပါတော့ပေ။
စစ်ဆေးမှုပြုလုပ်မည့် နေရာသို့ သွားရောက်ကြည့်ရှုရန်သာ ပို၍ အရေးကြီးနေတော့သည်။
အခန်း (၁၄၄၈) - ဘာမှ ထူးမခြားနားပါလား
တိုက်ပွဲတစ်ရာမသေမျိုးသည် ဖန့်ချန်ကို ခေါ်ဆောင်၍ မီးအိမ်နန်းတော် ရှေ့ရှိ ကွင်းပြင်ကျယ်သို့ ရောက်ရှိလာခဲ့သည်။
စီနီယာအစ်မကြီးနှင့် အကြီးအကဲ အချို့မှာ ထိုနေရာတွင် စောင့်ဆိုင်းနေကြသည်မှာ ကြာပြီဖြစ်သည်။
စစ်ဆေးမှုဟု ဆိုသော်လည်း အမှန်စင်စစ် အစီရင်ဗဟိုချက်နှင့် ပဋိညာဉ် ပြုနိုင်၊ မပြုနိုင် စမ်းသပ်ခြင်းသာ ဖြစ်သည်။
လုပ်ငန်းစဉ်မှာ အလွန်ရိုးရှင်းပြီး ရှုပ်ထွေးလှသည်တော့ မဟုတ်ပေ။
စီနီယာအစ်မကြီးအပြင် သတင်းရရှိထားကြသည့် အမာခံတပည့်အချို့လည်း ရောက်ရှိလာကြသည်။
ဥပမာအားဖြင့် လီရှမ်းဇီ၊ ကျိရှန့် နှင့် နန်မင်ရုယွဲ့ တို့ ဖြစ်ကြသည်။
သူတို့အားလုံးသည် ဖန့်ချန်နှင့် ထိတွေ့ဆက်ဆံဖူးသူများ ဖြစ်ကြရာ ဖန့်ချန်က အမာခံတပည့် စစ်ဆေးမှု လျှောက်ထားသည်ဟု ကြားသိရသောအခါ အလိုအလျောက်ပင် ရောက်ရှိလာကြခြင်း ဖြစ်သည်။
လင်းယွမ်တို့ သုံးဦးမှာမူ ကြာနီနတ်မိမယ် ရဲ့နောက်တွင် ရပ်နေကြပြီး ဖန့်ချန်ကို မြင်လိုက်ရသောအခါ သူတို့၏ မျက်ဝန်းထဲတွင် စိတ်လှုပ်ရှားမှုအရိပ်အယောင်များ ပေါ်လွင်နေတော့သည်။
"ငါပြောသားပဲ... ငါတို့ခေါင်းဆောင်က လူထဲကလူပဲလို့။ ကြည့်စမ်း... ဘယ်လောက်မှ မကြာသေးဘူး၊ အမာခံတပည့် စစ်ဆေးမှုမှာ ပါဝင်ခွင့် ရနေပြီ"
လင်းယွမ်က အားတက်သရော ဆိုသည်
"ဟို ကျန်းချန်ကိုပဲ ကြည့်လိုက်ဦး၊ နောက်ခံကလည်း ခေါင်းဆောင်ထက် ကြီးတယ်၊ ကျင့်ကြံမှုကလည်း ပိုမြင့်တယ်၊ ဒါပေမဲ့ အခုထိ တစ်ခါမှ စစ်ဆေးမှု မလျှောက်ထားနိုင်သေးဘူး"
"တော်တော့... နောက်မှ တစ်ယောက်ယောက် ကြားသွားရင် ရန်သူတိုးနေဦးမယ်"
ယွီဝူရှီး က သတိပေးလိုက်သည်။
ကျန်းချန်၏ နောက်ကွယ်တွင် အကြီးအကဲတစ်ဦး ရှိနေပြီး ပတ်သက်မှုကွန်ရက်ကလည်း ရှုပ်ထွေးလှသည်။
ဤနေရာရှိ အမာခံတပည့်များထဲတွင် ကျန်းချန်ဘက်တော်သား မည်သူရှိနေမည်ကို မည်သူသိနိုင်မည်နည်း။
သူတို့ကဲ့သို့ အပြင်စည်းကျင့်ကြံသူလေးများအနေဖြင့် ထိုကဲ့သို့သော ရန်ငြိုးများကြား တိုက်ရိုက်ဝင်မပါသင့်ပေ၊ မဟုတ်လျှင် အရိုးပင် ရှာမရအောင် ကြေမွသွားနိုင်သည့် အန္တရာယ်ရှိသည်။
"ငါမကြောက်ပါဘူး၊ သူရဲရင် ငါလည်း ပြောရဲတယ်"
လင်းယွမ်က အေးစက်စွာ နှာခေါင်းရှုံ့လိုက်သော်လည်း ကျန်းချန်တို့အဖွဲ့ ရောက်လာသည်ကို မြင်လိုက်ရသောအခါ ချက်ချင်းပင် ပါးစပ်ပိတ်သွားတော့သည်။
သာမန်အချိန်များတွင် ထိုနေရာသို့ အမာခံတပည့်မှလွဲ၍ ကျန်သူများ ခွင့်ပြုချက်မရှိဘဲ ချဉ်းကပ်ခွင့်မရှိပေ။
သို့သော် ယနေ့မှာ အခြေအနေထူးခြားနေသဖြင့် အပြင်စည်းကျင့်ကြံသူများကို အမာခံတပည့် စစ်ဆေးမှုအား ကြည့်ရှုခွင့်ပေးခြင်းမှာ သူတို့အတွက် အကျိုးရှိစေနိုင်သည်ဟု ယူဆကာ ကန့်သတ်ချက်ကို ဖြေလျှော့ပေးထားခြင်း ဖြစ်သည်။
"ဒီစစ်ဆေးမှုအတွက် ဂုဏ်ထူးရမှတ် ၅,၀၀၀ ကုန်ကျမှာ ဖြစ်တယ်။ တကယ်လို့ မင်းက ဒီမှတ်တွေနဲ့သာ ကျင့်ကြံမယ်ဆိုရင် အဆင့် ၅ မသေမျိုးအထိ တက်လှမ်းဖို့တောင် လုံလောက်တယ်"
စီနီယာအစ်မကြီး၏ အကြည့်မှာ ဖန့်ချန်ပေါ်သို့ ကျရောက်လာပြီး အသာအယာ ပြုံးလျက် ဆိုသည်။
"ဒါကြောင့် နောက်ဆုံးတစ်ခေါက်အနေနဲ့ ထပ်စဉ်းစားပါဦး... အခုအချိန်မှာပဲ အမာခံတပည့် စစ်ဆေးမှုကို လျှောက်ထားမှာ သေချာရဲ့လား"
"ကျနော် လျှောက်ထားဖို့ ဆုံးဖြတ်ပြီးသားပါ"
ဖန့်ချန်က တုံ့ဆိုင်းခြင်းမရှိဘဲ ပြန်ဖြေလိုက်သည်။
၎င်းမှာ ရွေးချယ်စရာ တစ်ခုမဟုတ်သဖြင့် ဝေခွဲမရဖြစ်နေစရာ အကြောင်းမရှိပေ။
စစ်ဆေးခွင့် ရနေပြီဖြစ်ရာ သူသည်လည်း အစီရင်ဗဟိုချက်တစ်ခုနှင့် ပဋိညာဉ် ပြုနိုင်၊ မပြုနိုင်ကို စမ်းသပ်ကြည့်ချင်နေမိသည်။
အမာခံတပည့် အဆင့်အတန်းက ပေးအပ်မည့် အခွင့်အရေးများကို ခဏထားဦး၊ ဤလျှို့ဝှက်ဆန်းကြယ်လှသော အစီရင်ဗဟိုချက်ကို သူကိုယ်တိုင် အနီးကပ် လေ့လာကြည့်ချင်နေခြင်း ဖြစ်သည်။
ဝမ်ချုံစန်းက ၎င်းကို အသုံးပြုပြီး လင်ကွေ့ကြယ်တာရာပေါ်ရှိ တားမြစ်ချက်ကို မည်သို့ ချိုးဖျက်ကာ ယင်လောက ကို ဖွင့်လှစ်နိုင်ခဲ့သနည်းဆိုသည်ကို သူ သိချင်နေမိသည်။
"ကောင်းပြီ"
စီနီယာအစ်မကြီးက သဘောကျဟန်ဖြင့် အသာအယာ ခေါင်းညိတ်လိုက်ပြီး အကြီးအကဲ ချန် ကို လှမ်းကြည့်လိုက်သည်။
"အကြီးအကဲ ချန်... သူက စစ်ဆေးမှုခံယူဖို့ အတည်ပြုလိုက်ပြီ၊ သူ့တံဆိပ်ပြားပေါ်က ဂုဏ်ထူးရမှတ်တွေကို နှုတ်ယူလိုက်လို့ ရပါပြီ"
အကြီးအကဲ ချန် က လက်ကို ဝေ့ယမ်းလိုက်ရာ ဖန့်ချန်၏ ခါးတွင် ချိတ်ဆွဲထားသော တံဆိပ်ပြားမှာ သူ၏ လက်ထဲသို့ ရောက်ရှိသွားသည်။
ဂုဏ်ထူးရမှတ် ၅,၀၀၀ ကို နှုတ်ယူပြီးနောက် ဖန့်ချန်ထံသို့ ပြန်ပေးလိုက်ရာ တံဆိပ်ပြားထဲရှိ ရမှတ်မှာ မူလတန်ဖိုးဖြစ်သော ၈၅၀ သို့ ပြန်လည် ရောက်ရှိသွားတော့သည်။
"ငါတို့ရဲ့ အတွေ့အကြုံတွေအရ ကျင့်ကြံမှုအဆင့် နိမ့်လေလေ အစီရင်ဗဟိုချက်နဲ့ ပဋိညာဉ်ပြုဖို့ ပိုခက်ခဲလေလေပဲ။ များသောအားဖြင့်တော့ အဆင့် ၂ မသေမျိုး ရောက်မှ ပဋိညာဉ်ပြုဖို့ ငါတို့ အကြံပေးလေ့ရှိတယ်။ ဒါပေမဲ့ မင်းက ဆုံးဖြတ်ချက် ချပြီးသားဆိုတော့လည်း ငါတို့ ထပ်ပြီး မတားတော့ပါဘူး"
"မင်း သိထားရမှာက ကျရှုံးခဲ့ရင် ဘာဖြစ်မလဲဆိုတာပဲ။ ငါတို့ ကျွယ်မင်နန်းတော်အနေနဲ့ အစီရင်ဗဟိုချက် တစ်ခု ဆုံးရှုံးသွားမှာဖြစ်သလို မင်းအတွက်ကတော့ ဂုဏ်ထူးရမှတ် ၅,၀၀၀ ဆုံးရှုံးသွားမှာ ဖြစ်တယ်"
အကြီးအကဲ ချန်က ဖန့်ချန်ကို ပြုံး၍ ကြည့်ကာ ပြောလိုက်သည်။
"ကျနော် နားလည်ပါတယ်"
ဖန့်ချန်က အသာအယာ ခေါင်းညိတ်ပြလိုက်သည်။
"ဂုဏ်ထူးရမှတ် ၅,၀၀၀ တောင်လား..."
"တကယ်ကြီး ဖြစ်နေတာပဲ..."
ရောက်ရှိနေသော အပြင်စည်းကျင့်ကြံသူများ၏ မျက်ဝန်းများမှာ လှုပ်ခတ်သွားကြသည်။
သူတို့၏ စိတ်ထဲတွင် အားကျစိတ်၊ မနာလိုစိတ်များဖြင့် ပြည့်နှက်နေသလို အချို့မှာမူ လောဘရိပ်ပင် ထွက်ပေါ်နေကြသည်။
ဂုဏ်ထူးရမှတ် ၅,၀၀၀ ဆိုသည်မှာ အမှန်တကယ်ပင် သေးငယ်သော ပမာဏမဟုတ်ပေ။
သူတို့မှာ သာမန်အချိန်တွင် ရမှတ် ဆယ်ဂဏန်း၊ ရာဂဏန်း စုဆောင်းနိုင်ရန်ပင် ကောင်းကင်သို့ တက်ရသကဲ့သို့ ခက်ခဲလှသည်။
၅,၀၀၀ ဆိုသည်မှာ အိမ်မက်ထဲတွင်ပင် မမက်ရဲကြပေ။
ကျင့်ကြံမှုက အဆင့် ၄ မရောက်မချင်း ထိုကဲ့သို့ ရမှတ်မျိုး ရရှိရန် အခွင့်အရေး လုံးဝမရှိနိုင်ပေ။
"ငါ နောက်ကျမသွားဘူး မဟုတ်လား"
အမျိုးသမီးတစ်ဦးသည် စူးစမ်းရေးအဖွဲ့ဝင် အများအပြားကို ခေါ်ဆောင်၍ လေထုကို ခွဲကာ ရောက်ရှိလာသည်။
"စီနီယာအစ်မ သုံး လည်း ရောက်လာတာလား"
လူတိုင်း၏ အမူအရာမှာ လှုပ်ခတ်သွားကြသည်။
"မနောက်ကျပါဘူး၊ အတော်ပဲ"
စီနီယာအစ်မကြီးက သိသိသာသာ ပြုံးလျက် ဆိုလိုက်သည်။
စီနီယာအစ်မ သုံး က သူမကို တစ်ချက်ကြည့်ကာ မချိုမချဉ် အမူအရာဖြင့် ပြန်ပြောသည်။
"ပြောရဦးမယ်... စီနီယာအစ်မကြီးက စီနီယာအစ်ကို နှစ် ရဲ့ လုပ်ကြံမှုကို ဖော်ထုတ်နိုင်ခဲ့တာကို ဂုဏ်မပြုရသေးဘူးပဲ"
"နံပါတ် သုံး... အဲဒီကိစ္စက ခိုင်လုံတဲ့ သက်သေမရှိဘူး။ နံပါတ် နှစ် ကလည်း ကျွယ်မင်ယင်လောကမှာ တာဝန်ထမ်းဆောင်နေရပြီဆိုတော့ အကျဉ်းချခံထားရတာနဲ့ မခြားပါဘူး။ ဒီကိစ္စကို ထပ်မပြောနဲ့တော့"
အကြီးအကဲ ချန်၏ မျက်နှာမှာ ပျက်သွားပြီး တားမြစ်လိုက်သည်။
"မပြောရင်လည်း မပြောတော့ပါဘူး၊ ကျမက စီနီယာအစ်မကြီးကို ကြည်ညိုလို့ပါ။ အပြင်ကို သာမန်ကာလျှံကာ တစ်ခေါက်ထွက်လိုက်တာနဲ့ နံပါတ် နှစ် ကို ဒုက္ခရောက်အောင် လုပ်နိုင်ခဲ့တာပဲ"
စီနီယာအစ်မ သုံး က ရယ်မောလျက် ဆိုသည်။
အနီးအနားရှိ အပြင်စည်းကျင့်ကြံသူများမှာ ထူးဆန်းသော အမူအရာများ ဖြစ်သွားကြသည်။
ဤကဲ့သို့သော အဆင့်မြင့် စကားဝိုင်းများကို သူတို့မှာ နားထောင်ခွင့်သာရှိပြီး ဝင်ရောက်စွက်ဖက်ခွင့် မရှိပေ။
သို့သော် ဂုဏ်သရေရှိ စီနီယာအစ်ကို နှစ် ပင်လျှင် စီနီယာအစ်မကြီး၏ ထိုကိစ္စကြောင့် ပတ်သက်ဆက်နွှယ်ပြီး နာမည်ပျက်သွားသည်ကို တွေးမိသောအခါ သူတို့၏ စိတ်ထဲတွင် ကြောက်ရွံ့တုန်လှုပ်သွားကြသည်။
"သူသာ ကမ်းပါးနားမှာ မရပ်နေခဲ့ရင် ငါ့အတွက် ဘယ်မှာ အခွင့်အရေး ရှိပါ့မလဲ"
စီနီယာအစ်မကြီးက စီနီယာအစ်မ သုံး ကို စူးစိုက်ကြည့်ကာ မေးလိုက်သည်။
"ညီမလေး သုံး... ဒီကိစ္စက တကယ်ပဲ ညီမနဲ့ မသက်ဆိုင်ဘူး မဟုတ်လား"
စီနီယာအစ်မ သုံး ၏ မျက်နှာမှာ အနည်းငယ် ပျက်သွားပြီးနောက် နှာခေါင်းရှုံ့လိုက်သည် ။
"သဘာဝကျကျပဲ... မသက်ဆိုင်ပါဘူး"
သူမသည် ထပ်၍ စကားမပြောတော့ပေ။
မကြာမီမှာပင် နံပါတ် လေး၊ နံပါတ် ခြောက်၊ နံပါတ် ခုနစ် စသည့် အမာခံတပည့်များလည်း တစ်ယောက်ပြီးတစ်ယောက် ရောက်ရှိလာကြသည်။
နံပါတ် ခုနစ် ရောက်လာသောအခါ စီနီယာအစ်မကြီး၏ နောက်တွင် ချက်ချင်း ရပ်လိုက်သည်။
သူမသည် အလွန်အေးဆေးတည်ငြိမ်သော ပုံစံရှိပြီး ထုတ်မပြောလျှင် သူမကို ကျွယ်မင်နန်းတော်တွင် အဆင့် ၇ ရှိသော အမာခံတပည့်ဟု မည်သူမျှ ထင်မှတ်လိမ့်မည်မဟုတ်ပေ။
မသိမသာပင် ကျွယ်မင်နန်းတော်ရှိ အပြင်စည်းကျင့်ကြံသူ ရှစ်ဆယ်၊ ကိုးဆယ် ရာခိုင်နှုန်းခန့်မှာ ဤနေရာတွင် စုဝေးမိသွားကြပြီ ဖြစ်သည်။
သူတို့သည် တိုးတိုးတိတ်တိတ် ဆွေးနွေးရင်း ဖန့်ချန်ကို မနာလိုစိတ်၊ အားကျစိတ်များဖြင့် ဝိုင်းကြည့်နေကြတော့သည်။
"စတင်လို့ ရပြီ"
အကြီးအကဲ ချန် က ရုတ်တရက် ပြုံးလျက် ဆိုလိုက်ကာ ကျောက်စိမ်းသေတ္တာတစ်ခုကို ထုတ်ယူပြီး ဖြည်းဖြည်းချင်း ဖွင့်လိုက်သည်။
စိမ်းဖန့်ဖန့် အရောင်ရှိသော အစီရင်ဗဟိုချက်သည် မှိန်ပျပျ အလင်းတန်းများ ဖြာထွက်နေပြီး လူတိုင်း၏ မျက်စိထဲသို့ တိုးဝင်လာသည်။
ကျန်းချန်မှာ တံတွေးတစ်ချက် မျိုချလိုက်မိသည်။
သူ၏ မျက်ဝန်းများမှာ အစီရင်ဗဟိုချက်ပေါ်တွင် စူးစိုက်နေပြီး ၎င်းမှာ သူ အမြဲတမ်း အိမ်မက်မက်ခဲ့ရသည့် အရာ ဖြစ်သည်။
ကိုယ်တိုင်ပင် စစ်ဆေးမှု မလျှောက်ထားနိုင်သေးမီတွင် ယုတ်ညံ့လှသော မျိုးဆက်သစ် တစ်ဦးက ဦးသူ ဖြစ်နေသည်ကို သူ မခံမရပ်နိုင် ဖြစ်နေမိသည်။
"ဒီအစီရင်ဗဟိုချက်က ဝူရှန့်ငရဲ ပေါ်ကနေ တူးဖော်ရရှိလာတာ ဖြစ်တယ်"
အကြီးအကဲ ချန်က လက်ကို အသာဝေ့ယမ်းလိုက်ရာ ကျောက်စိမ်းသေတ္တာမှာ မမြင်ရသော လေလှိုင်းတစ်ခု၏ ပင့်တင်မှုဖြင့် ဖန့်ချန်၏ ရှေ့သို့ ရောက်ရှိလာသည်။
"မင်းရဲ့ အနှစ်သာရသွေး ကို သုံးပြီး သူနဲ့ ပဋိညာဉ်ပြုကြည့်ပါ။ အဲဒီထဲမှာ နက်နက်ရှိုင်းရှိုင်း စီးမျောပြီး ဆန်းကြယ်မှုတွေကို ခံစားကြည့်ပါ"
ဖန့်ချန်သည် ရှေ့မှ အစီရင်ဗဟိုချက်ကို သေသေချာချာ အကဲခတ်နေပြီး ပဋိညာဉ်ပြုရန် အလျင်မလိုသေးပေ။
"ကြည့်ရတာ...ကြာနီနတ်မိမယ် ပဋိညာဉ်ပြုထားတဲ့ အရာနဲ့ ဘာမှ ထူးမခြားနားပါလား..."
ဖန့်ချန်သည် ၎င်းတို့ကြားရှိ အရှိန်အဝါ ကွာခြားချက်ကို ခွဲခြား၍ မရပေ။
အကယ်၍ တကယ်ပင် မထူးခြားဘူးဆိုလျှင် သူ၏ ယခင်ဘဝက မိစ္ဆာ ဖြစ်ခဲ့လျှင်ပင် ထိုအစီရင်ဗဟိုချက်နှင့် လိုက်ဖက်နိုင်ကြောင်း သက်သေပြနေခြင်း ဖြစ်သည်။
အကယ်၍ ကွာခြားမှု ရှိနေလျှင်မူ ကြာနီနတ်မိမယ် ပဋိညာဉ်ပြုခဲ့သည့် အစီရင်ဗဟိုချက်မှာ တစ်စုံတစ်ယောက်၏ ပြုပြင်မွမ်းမံခြင်း ခံထားရကြောင်း သူ ကောက်ချက်ချနိုင်မည် ဖြစ်သည်။
ထိုစဉ်က ကြာနီနတ်မိမယ် သည် ထိုအစီရင်ဗဟိုချက်ရှိရာသို့ တန်းတန်းမတ်မတ် သွားခဲ့ခြင်း ဖြစ်ရာ ၎င်းမြုပ်နှံထားသည့် နေရာကို ကြိုတင် သိရှိနေခဲ့ခြင်း ဖြစ်သည်။
ထိုအချက်က အမာခံတပည့်များ သို့မဟုတ် အကြီးအကဲများကောင်စီထဲတွင် သူမကဲ့သို့ပင် ယခင်ဘဝ အမှတ်ရနေသူများ ရှိနေနိုင်ကြောင်း ညွှန်းဆိုနေသည်။
"သူ ကြောက်နေတာလား "
"မဟုတ်ပါဘူး... စိတ်လှုပ်ရှားနေတာ ဖြစ်မှာပါ။ ငါသာဆိုရင်လည်း စိတ်လှုပ်ရှားမှာပဲ၊ ဒီနေ့ စစ်ဆေးမှုက သူ့ရဲ့ အနာဂတ် တစ်ခုလုံးကို ဆုံးဖြတ်ပေးမှာလေ"
"ဟုတ်တယ်... ကျရှုံးရင် ဂုဏ်ထူးရမှတ် ၅,၀၀၀ ဆုံးရှုံးမယ်၊ အောင်မြင်ရင်တော့ လူအများအထက်က ပုဂ္ဂိုလ် ဖြစ်လာမှာပဲ"
ဖန့်ချန်သည် အကြာကြီး မလှုပ်မယှက် ရှိနေသည်ကို မြင်သောအခါ လူအများက သူသည် ကျရှုံးမည်ကို ကြောက်ရွံ့သဖြင့် မစတင်ရဲခြင်း ဖြစ်သည်ဟု ယူဆနေကြသည်။
"မိတ်ဆွေ လီစီ... ဒီလို သတ္တိမျိုးနဲ့ သူ အောင်မြင်နိုင်မယ်လို့ ခင်ဗျား ထင်လား"
ကျန်းချန်၏ မျက်ဝန်းထဲတွင် လှောင်ပြုံးအရိပ်အယောင်လေး ပေါ်လာသည်။
"သူ တကယ်ပဲ ကြောက်နေတာပဲ"
လီစီက အသာအယာ ခေါင်းညိတ်ပြသည်
"နှလုံးသား အခြေအနေ ကိုတောင် မကျော်ဖြတ်နိုင်ရင် ပဋိညာဉ် အောင်မြင်ဖို့ဆိုတာ သုညနဲ့ မခြားပါဘူး"
ကျန်းချန်၏ မျက်နှာပေါ်မှ အပြုံးမှာ ပို၍ တောက်ပလာတော့သည်။
ထိုစဉ်မှာပင် ဖန့်ချန်သည် သူ၏ လက်ချောင်းကို လှီးလိုက်ပြီး အနှစ်သာရသွေးများမှာ အစီရင်ဗဟိုချက်ပေါ်သို့ တစ်စက်ချင်းစီ ကျဆင်းသွားလေတော့သည်။