အခန်း (၁၅၄-၁၅၅)

ထာဝရသိုင်းတာအိုအရှင်

အခန်း (၁၅၄) - မွေးရာပါစွမ်းရည်များ၏ အပြောင်းအလဲ (၁)

ဘာသာပြန် - အားသစ်

ယခုအခါ ချန်ရွှယ် ရောက်ရှိလာပြီဖြစ်ရာ အခြေအနေမှာ အနည်းငယ် တင်းမာနေပုံရသည်။ လင်းဖုန်းသည် အခြေစိုက်စခန်း အပြင်ဘက်ရှိ သိပ်သည်းလှသော သင်းခွေချပ်သားရဲ အုပ်စုကြီးကို လက်ညှိုးထိုးပြကာ အေးစက်စွာ ပြောလိုက်သည်။

"ခေါင်းဆောင်ချန်ရွှယ်... အဲဒီမှာ နတ်ဆိုး ၄၆ ကောင်တောင် ရှိနေပြီ။ ဒါကိုပဲ မင်းက သူတို့ကို ပြင်းပြင်းထန်ထန် ထိုးနှက်နိုင်ခဲ့တယ်လို့ ပြောတာလား။ ငါတို့ သူတို့ကို အပြတ်အသတ် အနိုင်ယူနိုင်လိမ့်မယ်လို့ မင်း ပြောခဲ့တာ မဟုတ်လား"

ချန်ရွှယ်၏ မျက်လုံးများထဲတွင် ရှုပ်ထွေးသော အရိပ်အယောင်များ ရှိနေသည်။ အခြေစိုက်စခန်း အပြင်ဘက်ရှိ သိပ်သည်းလှသော သင်းခွေချပ်သားရဲ အုပ်စုကြီးမှာ အလွန် ခန့်ညားထည်ဝါပုံရသော်လည်း ၎င်းသည် တောင်ပိုင်းတောင်တန်း အခြေစိုက်စခန်းအတွက် ပို၍ အန္တရာယ်များလှသည်။

ထို့ပြင် သင်းခွေချပမသားရဲနတ်ဆိုး ၄၆ ကောင်ပင် ရှိနေပြီ ဖြစ်သည်။ သင်းခွေချပ်သားရဲများ၏ အသိုက်ထဲတွင် နောက်ထပ် နတ်ဆိုး မည်မျှရှိနေဦးမည်ကို မည်သူ သိနိုင်ပါမည်နည်း။ သူမသည် လက်စားချေလိုစိတ် ပြင်းပြနေသဖြင့် တောင်ပိုင်းတောင်တန်း အခြေစိုက်စခန်း တစ်ခုလုံးကို ပျက်စီးစေလုနီးပါး ဖြစ်အောင် လုပ်ဆောင်မိခဲ့ပြီ ဖြစ်သည်။

"ကျွန်မကိုလည်း ထည့်လိုက်ပါ။"

ချန်ရွှယ်က ရုတ်တရက် ပြောလိုက်သည်။

လင်းဖုန်း၏ တည်ငြိမ်သော မျက်နှာကို ကြည့်ရင်း ချန်ရွှယ်က ထပ်ပြောသည်။

"အနည်းဆုံးတော့ ကျွန်မ သိုင်းပညာရှင်တရားရုံးကို မသွားရသေးခင်မှာ ကျွန်မကိုလည်း ပါဝင်ခွင့်ပေးပါ"

ချန်ရွှယ်လည်း သူမ၏ ယခင်လုပ်ရပ်များက မည်မျှ ယုတ်မာကြောင်း သိရှိသွားပုံရသည်။ သူမအား သိုင်းပညာရှင်တရားရုံးတွင် စစ်ဆေးမည်မှာ သေချာသလောက် ရှိနေပြီး ၎င်းကို မည်သူမျှ ပြောင်းလဲနိုင်မည် မဟုတ်ပေ။

လူတိုင်း လင်းဖုန်းကို ကြည့်လိုက်ကြသည်။ သူသည် စစ်သေနာပတိချုပ် ဖြစ်သည်။ ဤကဲ့သို့ အရေးကြီးသော အခြေအနေမျိုးတွင် လင်းဖုန်း တစ်ယောက်တည်းသာ ဆုံးဖြတ်ချက် ချနိုင်သည်။

"ကောင်းပြီ... မင်းကိုလည်း ထည့်မယ်။ ခုနက ငါပြောသလိုပဲ မင်းတို့ ၂၁ ယောက်က နတ်ဆိုး ၄၂ ကောင်ကို တားဆီးထားကြ။ ကျန်တဲ့ နတ်ဆိုး ၄ ကောင်ကိုတော့ ငါ့ကို လွှဲပေးလိုက်"

လင်းဖုန်း၏ စကားလုံးတိုင်းမှာ သိုင်းသမား အားလုံး၏ နှလုံးသားကို ရိုက်ခတ်သွားသကဲ့သို့ပင်။ သိုင်းသမား အားလုံး တိတ်ဆိတ်သွားကြသည်။ သူတို့သည် သေရမည်ကို မကြောက်ကြသော်လည်း မေ့ပျောက်၍မရနိုင်သော ဝမ်းနည်းဖွယ်ရာ အတိတ်များ ရှိကြသည်ချည်းသာ။

စစ်သေနာပတိချုပ် ကျိုးယွင်သည်လည်း နောက်ဆုံးအကြိမ်က ဤကဲ့သို့ပင် ပြောခဲ့ဖူးသည်။ သို့သော် နောက်ဆုံးတွင် ကျိုးယွင်သည် တိုက်ပွဲတွင် ကျဆုံးခဲ့ရသလို တောင်ပိုင်းတောင်တန်း အခြေစိုက်စခန်းမှာလည်း ဆုံးရှုံးမှုများစွာ ရင်ဆိုင်ကြုံတွေ့ခဲ့ရပြီး ပျက်စီးလုနီးပါး ဖြစ်ခဲ့ရသည်။

"မဟုတ်ဘူး... ကျွန်တော် ကန့်ကွက်ပါတယ်။ စစ်သေနာပတိချုပ်... ကျွန်တော်တို့ အရင်က အမှားမျိုး ထပ်မလုပ်နိုင်ပါဘူး။ နောက်ဆုံးတစ်ကြိမ်က စစ်သေနာပတိချုပ် ကျိုးယွင်က အစပျိုးပြီး တိုက်ခိုက်ခဲ့တယ်။ နောက်ဆုံး ဘာဖြစ်ခဲ့လဲ။ ကျွန်တော်တို့ အခြေစိုက်စခန်း ပျက်စီးလုနီးပါး ဖြစ်ခဲ့ရတယ်။ အခြေစိုက်စခန်း ပျက်စီးသွားတာနဲ့ အနောက်ဘက်က တောင်ပိုင်းတောင်တန်း မြို့တော်ပါ အန္တရာယ် ရှိလာလိမ့်မယ်"

လုဝေ့သည် ပထမဆုံး ရှေ့ထွက်ကာ ကန့်ကွက်လိုက်သည်။ သူ ကန့်ကွက်ရမည် ဖြစ်သည်။ နောက်ဆုံးတစ်ကြိမ်က မကန့်ကွက်ခဲ့မိသည်ကို သူ တစ်သက်လုံး နောင်တရနေခဲ့သည်။ ယခုတစ်ကြိမ်တွင်မူ ဘာပဲဖြစ်ဖြစ် သူ ရှေ့ထွက် ကန့်ကွက်ရမည် ဖြစ်သည်။

သိုင်းသမားမြောက်များစွာသည်လည်း တစ်ယောက်ပြီးတစ်ယောက် ခေါင်းညိတ် ထောက်ခံကြသည်။ သူတို့၏ နောက်ဆုံးကျရှုံးမှုမှာ အလွန်ပင် ခါးသီးလှသည်။ နောက်ဆုံးတစ်ကြိမ်ကို ပြန်တွေးမိလျှင်ပင် ကြက်သီးထဖွယ်ရာ... သေဘေးမှ သီသီလေး လွတ်မြောက်ခဲ့ရခြင်းပင် ဖြစ်သည်။ သူတို့ ထိုအမှားမျိုး ထပ်မလုပ်ချင်ကြတော့ပေ။

ထို့ပြင် နောက်ဆုံးတစ်ကြိမ်က ဆုံးရှုံးမှု အများအပြား ကြုံတွေ့ခဲ့ရသည်ကို လင်းဖုန်း သင်ခန်းစာ မယူမိဘူးလား။

လင်းဖုန်းသည် အောက်ဘက်ရှိ သင်းခွေချပ်သားရဲ အုပ်စုကြီးကို ကြည့်ကာ တည်ငြိမ်စွာ ပြောလိုက်သည်။

"ငါတို့မှာ ရွေးချယ်စရာ ရှိသေးလို့လား။ ဒီတစ်ခါက အရင်တစ်ခါနဲ့ မတူဘူး။ အရင်တစ်ခါက စစ်သေနာပတိချုပ် ကျိုးယွင်က အစပျိုးပြီး သင်းခွေချပ်သားရဲတွေရဲ့ အသိုက်ထဲအထိ ဝင်တိုက်ခဲ့တာ။ ဒီတစ်ခါတော့ ငါတို့က ဒီသားရဲတွေကို မောင်းထုတ်ရုံပဲ။ သူတို့ကို အရင် မမောင်းထုတ်နိုင်ရင် သူတို့ ဆုတ်ခွာသွားအောင် မင်း ဘာလုပ်နိုင်မှာလဲ"

"ကျွန်တော်တို့ စစ်သံတမန် ရှန်ကွမ်းကျန်းနန်ဆီကနေ အကူအညီ တောင်းလို့ရတာပဲ"

"စစ်သံတမန်က တောင်ပိုင်းတောင်တန်း မြို့တော်ကို စောင့်ရှောက်ဖို့ လိုအပ်တယ်။ တကယ်လို့ သင်းခွေချပ်သားရဲတွေက ငါတို့ကို လှည့်စားပြီး မြို့တော်ကို တိုက်ခိုက်ခဲ့ရင်ရော။ အဲဒါက မဖြစ်နိုင်တာ မဟုတ်ဘူး။ စစ်သံတမန်အနေနဲ့ မြို့တော်ကို အလွယ်တကူ လက်လွှတ်ပြီး ထွက်လာလို့ မရဘူး"

လင်းဖုန်း၏ စကားကြောင့် လုဝေ့ နှုတ်ဆိတ်သွားသည်။ ထိုအချက်မှာ အမှန်ပင် ဖြစ်သည်။ စစ်သံတမန်သည် မြို့တော်ကို အလွယ်တကူ စွန့်ခွာလာမည် မဟုတ်ပေ။ တောင်ပိုင်းတောင်တန်း အခြေစိုက်စခန်း တစ်ခုတည်းဖြင့် သင်းခွေချပ်သားရဲများကို အခြေစိုက်စခန်း အပြင်ဘက်မှာ အပြတ်အသတ် တားဆီးရန်မှာ အလွန် ခက်ခဲလှသည်။ အကယ်၍ သင်းခွေချပ်သားရဲများက အခြေစိုက်စခန်းကို ကျော်ဖြတ်ပြီး မြေအောက်ဥမင်များ တူးကာ မြို့တော်ကို တိုက်ခိုက်ခဲ့ပါက စစ်သံတမန် မရှိဘဲ မြို့တော်မှာ မည်မျှ အန္တရာယ် ရှိလိမ့်မည်နည်း။

ဖြစ်နိုင်ချေ ဆယ်ပုံတစ်ပုံတောင် မရှိလျှင်ပင် စစ်သံတမန်အနေဖြင့် ဤမျှကြီးမားသော စွန့်စားမှုကို လုပ်ဆောင်လိမ့်မည် မဟုတ်ပေ။

တောင်ပိုင်းတောင်တန်း အခြေစိုက်စခန်းမှာ ရှေ့တန်းခံတပ်တစ်ခုမျှသာ ဖြစ်သည်။ မူလက သူတို့သည် သင်းခွေချပ်သားရဲများကို အာရုံလွှဲထားပြီး သူတို့၏ အင်အားကို တဖြည်းဖြည်း လျော့ပါးအောင် လုပ်ဆောင်ရန် ရည်ရွယ်ခဲ့ခြင်း ဖြစ်သည်။ သို့သော် နောက်ဆုံးတစ်ကြိမ် ပြင်းထန်သော ရှုံးနိမ့်မှုပြီးနောက် အခြေစိုက်စခန်းတွင် ထိုသို့လုပ်ဆောင်နိုင်စွမ်း မရှိတော့ပေ။ သူတို့သည် အခြေစိုက်စခန်းထဲတွင် ပုန်းအောင်းနေရုံသာ တတ်နိုင်တော့ပြီး ထိုသားရဲများကို တားဆီးရန်အတွက် အပြင်သို့ ထွက်ရန် မတတ်နိုင်တော့ပေ။

မည်သူမျှ စကားမပြောသည်ကို မြင်သောအခါ လင်းဖုန်းက ဆက်ပြောသည်။

"ငါပြောသလိုပဲ လုပ်ကြစို့။ ဒီတစ်ခါ ငါတို့မှာ ရွေးချယ်စရာ မရှိဘူး။ ရှိသမျှ ခွန်အားတွေ အကုန်သုံးပြီး တိုက်ခိုက်ရမှာပဲ။ ကံကောင်းတာက ငါတို့မှာ အခြေစိုက်စခန်း ရှိနေတဲ့အတွက် အသာစီး ရထားတယ်။ မှတ်ထားပါ၊ ငါတို့က ဒီသားရဲတွေကို မောင်းထုတ်ဖို့ပဲ လိုတာ။ သူတို့နောက်ကို လိုက်ပြီး မတိုက်ခိုက်နဲ့"

"စစ်သေနာပတိချုပ်... ဒါက အရမ်း စွန့်စားလွန်းရာ ကျပါတယ်။ ခင်ဗျား တစ်ယောက်တည်း နတ်ဆိုး ၄ ကောင်ကို ကိုင်တွယ်ဖို့ဆိုတာ အရမ်း အန္တရာယ် များပါတယ်။ ဒါ့ပြင် အဲဒီ နတ်ဆိုးတွေကို တားဆီးထားဖို့ကလည်း မလွယ်ပါဘူး။ တကယ်လို့ လူတိုင်းက နတ်ဆိုးနှစ်ကောင်စီကို မတားဆီးနိုင်ခဲ့ရင် ပြဿနာတက်လိမ့်မယ်"

လင်းဖုန်း၏ လေယူလေသိမ်းမှာ တဖြည်းဖြည်း အေးစက်လာသည်။

"တကယ်လို့ ငါတို့ နတ်ဆိုးတွေကို မတားဆီးနိုင်ရင် အသေခံ တိုက်ခိုက်ရမှာပဲ။ ငါတို့က ရှေ့တန်း စစ်မြေပြင်မှာ ရှိနေတဲ့အတွက် ဘယ်အချိန်မဆို အသက်စွန့်ဖို့ ပြင်ဆင်ထားရမယ်။ ငါ နဂါးကျောက်တုံးမြို့မှာ သေရေးရှင်ရေး တိုက်ပွဲကို ဖြတ်ကျော်လာခဲ့ပြီးပြီ။ ကြောက်စရာ ဘာမှ မရှိဘူး။ ငါတို့ တိုက်မလား သေမလားပဲ။ ဒါပေမဲ့ ငါတို့ အသက်နဲ့လဲရမယ်ဆိုရင်တောင် ဒီသားရဲတွေကို အခြေစိုက်စခန်းထဲ ပေးမဝင်နိုင်ဘူး"

"ဒါ့ပြင် ငါ့ရဲ့ ဘေးကင်းလုံခြုံမှုအတွက် မင်းတို့ စိတ်ပူနေစရာ မလိုပါဘူး။ ငါ့ရဲ့ မွေးရာပါ စွမ်းရည်အကြောင်း မင်းတို့ နည်းနည်းတော့ သိထားကြလိမ့်မယ်လို့ ထင်ပါတယ်။ ငါ့ရဲ့ ကုသခြင်းစွမ်းရည်နဲ့ဆိုရင် ငါက မင်းတို့အားလုံးထက် ပိုပြီးတော့တောင် အသက်ရှင်နိုင်စွမ်းမြင့်တယ်။ ငါ့ကို သတ်ဖို့ဆိုတာ မလွယ်ပါဘူး။ သေသေချာချာ ကြည့်ထားကြ၊ ငါ အရင်ဆင်းပြီး မင်းတို့အတွက် အချိန်ဆွဲပေးမယ်၊ ဟားဟားဟား...လာခဲ့ကြစမ်း"

ထိုသို့ပြောပြီးနောက် လင်းဖုန်းသည် ခံတပ်မျှော်စင်ပေါ်မှ ခုန်ချလိုက်ကာ အခြေစိုက်စခန်း အပြင်ဘက်ရှိ သင်းခွေချပ်သားရဲ အုပ်စုကြီး၏ အလယ်ဗဟိုသို့ ဦးတည် ပျံသန်းသွားတော့သည်။

"စစ်သေနာပတိချုပ်"

လုဝေ့နှင့် အခြားသူများမှာ ထိတ်လန့်တုန်လှုပ်ကာ မျက်နှာများ ဖြူလျော့သွားကြသည်။ ချန်ရွှယ်၏ မျက်လုံးထဲတွင်ပင် အံ့ဩတုန်လှုပ်မှု အရိပ်အယောင်များ ပေါ်ပေါက်လာသည်။

လင်းဖုန်းသည် အရေးကြီးသော အချိန်တွင် လုံးဝ ကြောက်ရွံ့ခြင်း မရှိပေ။

လင်းဖုန်း ခံတပ်မျှော်စင်ပေါ်မှ ခုန်ချလိုက်သည်။ သင်းခွေချပ်သားရဲများသည်လည်း လင်းဖုန်းကို မြင်သွားသည်။ သားရဲတို့၏ အကြည့်များမှာ ကြမ်းကြုတ်ရက်စက်လာသည်။ ထိုနေရာတွင် သင်းခွေချပ်သားရဲပေါင်း သောင်းနှင့်ချီ ရှိနေသည်။

လင်းဖုန်း မြေပြင်ပေါ်သို့ ဆင်းသက်လိုက်သည်နှင့် မရေမတွက်နိုင်သော သင်းခွေချပ်သားရဲများ စုပြုံတိုးဝှေ့ လာကြသည်။

၎င်းတို့အားလုံးမှာ သာမန် သင်းခွေချပ်သားရဲများ ဖြစ်ကြသော်လည်း အရေအတွက်မှာ အလွန် များပြားလှသည်။ သာလွန်လူသား ကျွမ်းကျင်သူတစ်ဦးပင်လျှင် မိမိကိုယ်ကို ကာကွယ်ရန်အတွက် ကြယ်တာရာစွမ်းအားကို အသုံးပြုရပေလိမ့်မည်။ သူတို့၏ ကြယ်တာရာစွမ်းအား ကုန်ဆုံးသွားပြီဆိုလျှင် သေခြင်းတရားသာ စောင့်ကြိုနေပေလိမ့်မည်။

သာမန် သင်းခွေချပ်သားရဲများ၏ ဝိုင်းရံ သတ်ဖြတ်ခြင်းကို ခံခဲ့ရသော သာလွန်လူသား ကျွမ်းကျင်သူ အများအပြားလည်း ရှိခဲ့ဖူးသည်။ ကျိုးယွင်နှင့်အတူ သင်းခွေချပ်သားရဲများ၏ အသိုက်ထဲသို့ လိုက်သွားခဲ့သော သာလွန်လူသား ကျွမ်းကျင်သူ အများအပြားမှာလည်း ဤနည်းအတိုင်း ဝိုင်းရံ သတ်ဖြတ်ခြင်း ခံခဲ့ရသည်။

လင်းဖုန်း အသက်ကို ပြင်းပြင်းရှူလိုက်သည်။ နဂါးကျောက်တုံးမြို့မှ တိုက်ပွဲပြီးကတည်းက သူသည် သားရဲရိုင်းများနှင့် အားရပါးရ မတိုက်ခိုက်ခဲ့ရပေ။ ကျောက်တုံးမြို့တွင်ပင်လျှင် သေရေးရှင်ရေး တိုက်ပွဲများ မရှိခဲ့ပေ။ လူတိုင်းမှာ ထိန်းထိန်းသိမ်းသိမ်းသာ ရှိခဲ့ကြပြီး အသေသတ်ရန် မကြိုးစားခဲ့ကြပေ။

သို့သော် ယခုမူ...

သောင်းနှင့်ချီသော သားရဲရိုင်းများ၊ သူ့ကို အပိုင်းပိုင်း ဆွဲဖြဲပစ်ချင်နေသော သင်းခွေချပ်သားရဲများနှင့် ရင်ဆိုင်နေရသည်။ တကယ့်အစစ်အမှန် တိုက်ပွဲပင်။

"ချပ်ဝတ်"

လင်းဖုန်းသည် မိမိကိုယ်ကို ကာကွယ်ရန်အတွက် ကြယ်တာရာစွမ်းအားကို အသုံးပြုရန် မရည်ရွယ်ပေ။ သူ ကြယ်တာရာစွမ်းအားကို အသုံးပြုရန် လုံးဝ မလိုအပ်ပေ။ သူ့မှာ ခုခံရေးအတွက် ချပ်ဝတ်တန်ဆာနှင့် မသေနိုင်သော အစွမ်းသတ္တိ ရှိနေသည် မဟုတ်ပါလား။ သူ ဘာကြောင့် ကြယ်တာရာစွမ်းအားကို အသုံးပြုပြီး ကာကွယ်နေရမည်နည်း။

ချက်ချင်းပင် လင်းဖုန်း၏ ခန္ဓာကိုယ်ပေါ်တွင် အရေပြားလွှာ တစ်ခု ဖုံးလွှမ်းသွားသည်။ ၎င်းမှာ တဖြည်းဖြည်းနှင့် လင်းဖုန်း၏ ခန္ဓာကိုယ်ပေါ်တွင် ထူးကဲသော ချပ်ဝတ်တန်ဆာ တစ်ခုအဖြစ် ပြောင်းလဲသွားသည်။

တစ်ချိန်တည်းမှာပင် လင်းဖုန်း၏ ပုခုံးများ၊ လက်ကောက်ဝတ်များ၊ ခြေကျင်းဝတ်များနှင့် အဆစ်များတွင် မာကျောသော အရိုးစူးချွန်များ ပေါ်ထွက်လာသည်။ ၎င်းတို့၏ အသွင်အပြင်မှာ အလွန်ပင် ရက်စက်ပြီး ကြောက်စရာကောင်းပုံ ပေါက်နေသည်။

ထို့ပြင် အပြောင်းအလဲမှာ မပြီးသေးပေ။ လင်းဖုန်း၏ ကျောပြင်တွင် ထူးဆန်းသော အဖုအကျိတ်များ ပေါ်ထွက်လာသည်။ ၎င်းတို့မှာ ပျော့ပြောင်းနေပြီး အတွင်းထဲတွင် တစ်စုံတစ်ခု လှုပ်ရှားနေသကဲ့သို့ပင်။

လင်းဖုန်း အလွန် အံ့ဩသွားသည်။ နောက်ဆုံးတစ်ကြိမ် သူ အကာအကွယ် ချပ်ဝတ်တန်ဆာကို အသုံးပြုစဉ်က ဤကဲ့သို့သော အပြောင်းအလဲမျိုး မရှိခဲ့ကြောင်း သူ မှတ်မိနေသည်။ အခု ဘာကြောင့် သူ၏ ချပ်ဝတ်တန်ဆာ မွေးရာပါ စွမ်းရည်မှာ ကြီးမားသော အပြောင်းအလဲများ ဖြစ်ပေါ်နေရသနည်း။

"ငါ့ခန္ဓာကိုယ်က မကြာသေးခင်ကမှ အသွင်ပြောင်းလဲခြင်းကို ဖြတ်ကျော်ခဲ့လို့ ငါ့ရဲ့ ရုပ်ပိုင်းဆိုင်ရာ ကြံ့ခိုင်မှု တိုးတက်လာတာကြောင့် ငါ့ရဲ့ မွေးရာပါ စွမ်းရည်ကလည်း လိုက်ပြီး ပြောင်းလဲသွားတာလား"

ဤသည်က အကြောင်းရင်းမှန်ဟုတ်မဟုတ်ဆိုသည်ကို လင်းဖုန်း မသိသော်လည်း သူ၏ ကျောပြင်ပေါ်မှ အဖုအကျိတ်များမှာ ဖောင်းကြွလာသည်။ ထို့ပြင် ထိုနေရာမှာ ထုံကျဉ်နေပြီး အနည်းငယ် ယားယံသလို ခံစားနေရသည်။

လင်းဖုန်းသည် သူသာ အလိုရှိပါက ကျောပြင်ပေါ်မှ ထိုအဖုအကျိတ်များမှာ ချက်ချင်း ပေါက်ထွက်လာတော့မည်ဟုပင် ခံစားနေရသည်။

ထာဝရသိုင်းတာအိုအရှင်

အခန်း (၁၅၅) - မွေးရာပါစွမ်းရည်များ၏ အပြောင်းအလဲ (၂)

ဘာသာပြန် - အားသစ်

"ဝေါင်း..."

လင်းဖုန်းအနေဖြင့် သူ၏ ချပ်ဝတ်တန်ဆာ စွမ်းရည်ထဲမှ အပြောင်းအလဲများကို သေသေချာချာ မခံစားရသေးမီမှာပင် သင်းခွေချပ်သားရဲများသည် သူ့ထံသို့ သွေးဆာကြမ်းတမ်းစွာဖြင့် ခုန်အုပ်လာကြတော့သည်။

ဤသင်းခွေချပ်သားရဲများသည် အခြားသော သားရဲရိုင်းများနှင့် နှိုင်းယှဉ်လျှင် စရိုက်အားဖြင့် အနည်းငယ် ယဉ်ပါးသည်ဟု ဆိုနိုင်သော်လည်း တိုက်ပွဲထဲတွင်မူ အခြားသားရဲများထက် အောက်ကျနောက်ကျ မရှိလှဘဲ ပို၍ပင် ရက်စက်ကြမ်းကြုတ်ကြသေးသည်။

လင်းဖုန်း မြေပြင်ပေါ် ဆင်းသက်လိုက်သည်နှင့် သူ၏ ခန္ဓာကိုယ်ပေါ်မှ ချပ်ဝတ်တန်ဆာမှာ တစ်ကိုယ်လုံးကို လျင်မြန်စွာ ဖုံးလွှမ်းသွားသည်။ တစ်ချိန်တည်းမှာပင် သင်းခွေချပ်သားရဲ ဒါဇင်ပေါင်းများစွာသည် အရပ်မျက်နှာအနှံ့မှ သူ့ထံသို့ ဝိုင်းအုံ တိုက်ခိုက်လာကြသည်။ ထိုသားရဲများ၏ အရေပြားနှင့် အသားမှာ အလွန်မာကျောလှသည်။ သူတို့၏ အရေပြားမှာ ကျောက်တုံးကဲ့သို့ မာကျောပြီး ခွန်အားမှာလည်း အလွန်ကြီးမားလှသည်။ သူတို့ အရှိန်အပြည့်ဖြင့် ပြေးဝင်လာသောအခါ ထွက်ပေါ်လာသော အရှိန်အဝါအ‌ငွေ့အသက်မှာလည်း အတော်လေးကို အထင်ကြီးစရာ ကောင်းလှသည်။

လင်းဖုန်း မျက်မှောင်ကြုတ်လိုက်မိသည်။ သူ၏ ကျောပြင်ပေါ်မှ အဖုအကျိတ်များမှာ အလွန်ပင် နေရခက်အောင် လုပ်ဆောင်နေသည်။ ထို့ကြောင့် သူ စိတ်ကူးလိုက်သည်နှင့် ကျောပြင်ပေါ်မှ ထိုအဖုအကျိတ်များမှာ အလိုအလျောက် ပေါက်ထွက်သွားတော့သည်။

ဘုန်း...

လင်းဖုန်း၏ ကျောပြင်ပေါ်မှ အဖုအကျိတ်များမှာ ဖိအားမြင့် ရေပိုက်များကဲ့သို့ ရုတ်တရက် ပေါက်ထွက်သွားသည်။ ထိုအဖုအကျိတ်များထဲမှ သိပ်သည်းလှသော အစိမ်းရောင် အရည်များ ပန်းထွက်လာသည်။

ထိုအရည်များကို ကြည့်ရသည်မှာ အလွန်ပင် ရွံရှာဖွယ်ကောင်းလှသည်။ ထိုအရည်များသည် သင်းခွေချပ်သားရဲ ဒါဇင်ပေါင်းများစွာ၏ ခန္ဓာကိုယ်ပေါ်သို့ တစ်ပြိုင်နက်တည်း ကျရောက်သွားသည်။ ချက်ချင်းဆိုသလိုပင် ထိုသင်းခွေချပ်သားရဲများသည် နာကျင်စွာဖြင့် အော်ဟစ်ကာ မြေပြင်ပေါ်သို့ ဘုန်းဘုန်းလဲ ကျကုန်တော့သည်။ သူတို့၏ မာကျောလှသော အရေပြား အစိတ်အပိုင်း အတော်များများမှာ ချက်ချင်းပင် အရည်ပျော်သွားခဲ့ပြီး နာကျင်စွာဖြင့် မြေပြင်ပေါ်တွင် လူးလိမ့်နေကြကာ နောက်ဆုံးတွင် အင်အားကုန်ခမ်းပြီး သေဆုံးသွားကြတော့သည်။

"တိုက်စားခြင်းလား"

လင်းဖုန်း အနည်းငယ် အံ့ဩသွားသည်။ သူ၏ ကျောပြင်ပေါ်မှ အဖုအကျိတ်များသည် အက်စစ်နှင့် ဆင်တူသော တိုက်စားနိုင်စွမ်းရှိသည့် အရည်များကို ထုတ်လွှတ်နိုင်လိမ့်မည်ဟု သူ မထင်ထားခဲ့ပေ။ ၎င်းမှာ အလွန်ပင် အစွမ်းထက်လှသည်။

လင်းဖုန်း သေသေချာချာ ပြန်စဉ်းစားကြည့်လိုက်သည်။ သူ၏ အကာအကွယ်ချပ်ဝတ် မွေးရာပါစွမ်းရည်မှာ အမှန်တကယ်တော့ နှာမောင်းရှည်သားရဲ၏ မျိုးရိုးဗီဇမှ ရရှိခဲ့ခြင်း ဖြစ်သည်။ မာကျောသော အရေပြား၊ အံ့ဩစရာကောင်းသော ခုခံမှုနှင့် ကြီးမားသော ခွန်အားတို့မှအပ နှာမောင်းရှည်သားရဲတွင် တိုက်စားနိုင်သော အရည်များ ရှိပုံမရပေ။

ဤ အဖုအကျိတ်များသည် အမှန်တကယ်တန်းတွင် တိုက်စားနိုင်သော အရည်များကို ထုတ်လုပ်ပေးသည့် အရာများဖြစ်နေမလား။ သို့သော် ထိုအရည်‌တွေက ဘယ်ကနေ ရောက်လာတာလဲ။ သို့တည်းမဟုတ် ထိုကဲ့သို့သော စွမ်းရည်မျိုးသည် နှာမောင်းရှည်သားရဲ၏ မျိုးဗီဇထဲတွင် ကိန်းအောင်းနေသော်လည်း အပြင်ပန်းအားဖြင့် ပေါ်မလာခဲ့ဘဲ လင်းဖုန်းက ၎င်းတို့၏ မျိုးရိုးဗီဇကို ဆက်ခံလိုက်သည့် အချိန်တွင်မှသာ ထိုစွမ်းရည်ကို ဖော်ထုတ်နိုင်ခဲ့ခြင်းပေလော။

"ဝေါင်း..."

ဘာပဲဖြစ်ဖြစ် တိုက်ပွဲကတော့ စတင်နေပြီ ဖြစ်သည်။ ထိုသင်းခွေချပ်သားရဲများသည် အလွန်အမင်း ဒေါသထွက်နေကြပြီး လင်းဖုန်းထံသို့ နောက်တစ်ကြိမ် ပြေးဝင်လာကြပြန်သည်။

လင်းဖုန်းအနေဖြင့် သူ၏ ကျောပြင်ပေါ်မှ အဖုအကျိတ်များ အကြောင်းကို လေ့လာနေရန် အချိန်မရှိပေ။ လင်းဖုန်းတွင် ဓားမော့မပါသော်လည်း သူ့လက်ဖဝါးများကို ဓားကဲ့သို့ အသုံးပြုနိုင်သည်။

"လျှပ်စီးဓားမော့သိုင်း"

လင်းဖုန်း၏ တစ်ကိုယ်လုံးမှာ အလင်းတန်းတစ်ခုအဖြစ် ပြောင်းလဲသွားသကဲ့သို့ပင်။ ချက်ချင်းဆိုသလိုပင် လင်းဖုန်း တိုက်ခိုက်လိုက်သော သင်းခွေချပ်သားရဲများ အားလုံးသည် မြေပြင်ပေါ်သို့ တစ်ကောင်ပြီးတစ်ကောင် အတုံးအရုံး လဲကျကုန်တော့သည်။ အချို့မှာ မသေသေးသော်လည်း သူတို့၏ ခန္ဓာကိုယ်ပေါ်တွင် ကြီးမားရှည်လျားသော ဒဏ်ရာကြီးတစ်ခု ပေါ်ထွက်နေသည်။

"ဒီလောက်တောင် အစွမ်းထက်တာလား"

လင်းဖုန်း သူ့လက်ဖဝါးကို ဆန့်ထုတ်လိုက်သည်။ လင်းဖုန်းတွင် ဓားမော့မပါသော်လည်း ထက်မြက်သော ဦးချို မွေးရာပါစွမ်းရည်ကို အသုံးပြုကာတိုက်ခိုက်လိုက်သည်။ ဤအချိန်တွင် ထက်မြက်သော ဦးချိုသည်လည်း ပြောင်းလဲသွားပုံရသည်။ ၎င်း၏ စူးချွန်များမှာ ပိုမိုမာကျော ထက်မြက်လာရုံသာမက ၎င်းတို့အပေါ်တွင် မှိန်ဖျော့ဖျော့ အလင်းတန်းတစ်ခုလည်း ရှိနေသည်။ ၎င်းမှာ ပုံမှန်မဟုတ်သော စွမ်းအားတစ်ခု ဖြစ်ပုံရသည်။

ထက်မြက်သောဦးချို ထိမှန်သည့် နေရာတိုင်းတွင် ထိုပုံမှန်မဟုတ်သော အလင်းစွမ်းအားသည် သင်းခွေချပ်သားရဲ၏ ခန္ဓာကိုယ်ထဲသို့ ဝင်ရောက်ကာ ပေါက်ကွဲထွက်သွားသည်။ အကယ်၍ သူတို့ မသေလျှင်ပင် ပြင်းထန်စွာ ဒဏ်ရာရသွားကြသည်။

ဤပုံမှန်မဟုတ်သော စွမ်းအားမှာ ယခင်က ထက်မြက်သောဦးချို မွေးရာပါစွမ်းရည်တွင် မရှိခဲ့ပေ။

လင်းဖုန်း၏ ထက်မြက်သောဦးချို‌ မွေးရာပ့စွမ်းရည်မှာ ယူနီကွန်း၏ မျိုးရိုးဗီဇမှ ရရှိခဲ့ခြင်း ဖြစ်သော်လည်း ယူနီကွန်းတွင်ပင် ဤကဲ့သို့ ပုံမှန်မဟုတ်သော စွမ်းအားရှိပုံမရပေ။ ယူနီကွန်း၏ မျိုးရိုးဗီဇမှ ရရှိခဲ့သော ထက်မြက်သောဦးချိုတွင် အဘယ်ကြောင့် ဤမျှ ထူးခြားသော စွမ်းအား ရှိနေရသနည်း။

အမှန်စင်စစ်တွင် ယူနီကွန်းသားရဲများတွင်လည်း ဤကဲ့သို့သော စွမ်းအားရှိကောင်းရှိလိမ့်မည်။ သို့သော်လည်း ယူနီကွန်းသားရဲများကိုယ်တိုင်ပင်လျှင် ထိုစွမ်းရည်ကို ဖော်ထုတ်နိုင်စွမ်း မရှိခဲ့ပေ။

လင်းဖုန်းတွင် မရေမရာ ယူဆချက်တစ်ခု ရှိနေသည်။ အဖုအကျိတ်များနှင့် ထိုပုံမှန်မဟုတ်သော စွမ်းအားမှာ ယခင်က တစ်ခါမျှ ပေါ်မလာခဲ့ဖူးသော်လည်း ယခုမူ ထူးဆန်းစွာ ပေါ်ပေါက်လာခဲ့သည်။

သို့သော် လင်းဖုန်းအနေဖြင့် ယခုအချိန်တွင် ဤမျှ နက်နဲပြီး ရှုပ်ထွေးလှသော ပြဿနာကို လေ့လာနေရန် အချိန်မရှိပေ။ ယူနီကွန်း မျိုးရိုးဗီဇထဲတွင် အထူးစွမ်းရည် မည်မျှ ပါဝင်နေသနည်းဆိုသည့် အချက်ကို ကျွမ်းကျင်သူများနှင့် ပညာရှင်များသာ အေးအေးဆေးဆေး လေ့လာရန် ထားလိုက်ရပေလိမ့်မည်။

ယခုလက်ရှိ ထက်မြက်သောဦးချိုမှာ အလွန် အစွမ်းထက်နေသည်။ ထိုမွေးရာပါစွမ်းရည်သည် လင်းဖုန်းအတွက် အကြွင်းမဲ့အားသာချက်တစ်ရပ် ပေးစွမ်းထားသောကြောင့် သူ လျှပ်စီးဓားမော့သိုင်းကိုသာ ဆက်လက် အသုံးပြုခဲ့သည်။ လင်းဖုန်း၏ လက်ဝါးခုတ်ချက်နှင့် ထိတွေ့မိသမျှ သင်းခွေချပ်သားရဲတစ်ကောင်မျှ ကောင်းကောင်းမွန်မွန် မကျန်ရစ်ခဲ့ပေ။ ထိုသားရဲများသည် သေလျှင်သေ မသေလျှင် ပြင်းပြင်းထန်ထန် ဒဏ်ရာရခြင်းနှင့်သာ အဆုံးသတ်ကြရသည်။

မျက်စိတစ်မှိတ်အတွင်းမှာပင် လင်းဖုန်း၏ ပတ်ဝန်းကျင်တွင် သင်းခွေချပ်သားရဲ အလောင်းပုံကြီးတစ်ခု ဖြစ်သွားသည်။

ခံတပ်မျှော်စင်ပေါ်မှ သိုင်းသမား အများအပြားမှာ မှင်သက်သွားကြရသည်။

လင်းဖုန်း တစ်ယောက်တည်းကပင် ဤမျှများပြားလှသော သင်းခွေချပ်သားရဲများ၏ တိုက်ခိုက်မှုကို ကြံ့ကြံ့ခံနေနိုင်ခဲ့သည်။ သာလွန်လူသား ကျွမ်းကျင်သူတစ်ဦးပင်လျှင် ကြယ်တာရာစွမ်းအားကို အသုံးပြုနေရသည့် အချိန်တွင် အသာစီးရရန် ခက်ခဲလိမ့်မည်ဆိုသည်ကို လူတိုင်း သိထားကြသည်။

ထို့ပြင် သူတို့မှာ ခုခံရုံသာ တတ်နိုင်ပြီး တိုက်ခိုက်ရန် မလွယ်ကူပေ။ သူတို့သည် ထိုသင်းခွေချပ်သားရဲများကို အသားကြိတ်စက်တစ်ခုကဲ့သို့ သတ်ဖြတ်နေသော လင်းဖုန်းကဲ့သို့ ကျွမ်းကျင်မှုမျိုး လုံးဝ မရှိကြပေ။

"စစ်သေနာပတိချုပ်က ငါတို့အတွက် အချိန်ဆွဲပေးပြီးပြီ။ ခံတပ်တံခါးကို ဖွင့်လိုက်ကြ။ အားလုံးပဲ... ထွက်တိုက်ကြစို့"

ခံတပ်တံခါးဝတွင် သင်းခွေချပ်သားရဲများ မရှိတော့ပေ။ ယခုအချိန်တွင် ထွက်တိုက်လျှင် သင်းခွေချပ်သားရဲများ အခြေစိုက်စခန်းထဲသို့ ဝင်လာမည်ကို စိုးရိမ်နေရန် မလိုတော့ပေ။ ထို့ကြောင့် ဤသည်မှာ လင်းဖုန်းက လူတိုင်းအတွက် ဦးဆောင်တိုက်ယူပေးခဲ့သော တစ်သက်မှာတစ်ခါသာ ရနိုင်သည့် အခွင့်အရေးပင် ဖြစ်သည်။

တောင်ပိုင်းတောင်တန်း အခြေစိုက်စခန်း၏ ကျန်ရှိနေသော သာလွန်လူသား ကျွမ်းကျင်သူ ၂၁ ဦးမှာ ခံတပ်မျှော်စင်ပေါ်မှ ချက်ချင်း ခုန်ချလိုက်ကြပြီး ခံတပ်တံခါး အပြင်ဘက်တွင် ရှည်လျားသော ဘေးကင်းလုံခြုံရေး လမ်းကြောင်းတစ်ခုကို ချက်ချင်း ရှင်းလင်းလိုက်ကြသည်။

တစ်ချိန်တည်းမှာပင် ခံတပ်တံခါး ပွင့်သွားခဲ့ပြီး ရေတွက်လို့မရသော သိုင်းသမားများ ဝုန်းခနဲ ထွက်လာကြသည်။

စစ်မြေပြင်တွင် တိုက်ခိုက်သံ ဟိန်းဟောက်သံများ လွှမ်းမိုးသွားသည်။ လင်းဖုန်းလည်း တိုက်ခိုက်နေခြင်းကို ရပ်လိုက်သည်။ သူသည် ကျန်ရှိသော သာလွန်လူသား ကျွမ်းကျင်သူ ၂၁ ဦးကို တစ်ချက်ကြည့်ကာ အော်ပြောလိုက်သည်။

"သာမန် သင်းခွေချပ်သားရဲတွေနဲ့ လုံးထွေးမနေကြနဲ့။ အစီအစဉ်အတိုင်း လုပ်ကြ"

စစ်မြေပြင်တွင် သာလွန်လူသား ကျွမ်းကျင်သူ အားလုံးသည် သူတို့ ကိုင်တွယ်ရမည့် အရာမှာ သင်းခွေချပ်နတ်ဆိုးများ ဖြစ်ကြောင်း ကောင်းစွာ သိထားကြသည်။ ထိုနတ်ဆိုးများသည် ဤတိုက်ပွဲတွင် အဓိကအရေးအကြီးဆုံး ဖြစ်သည်။ ထိုနတ်ဆိုးများကိုသာ မောင်းထုတ်နိုင်လျှင် သာမန် သင်းခွေချပ်သားရဲများသည်လည်း သဘာဝအလျောက် ဆုတ်ခွာသွားကြပေလိမ့်မည်။

အကယ်၍ သူတို့ သာမန်သင်းခွေချပ်သားရဲများနှင့် လုံးထွေးသတ်ပုတ်နေမည်ဆိုပါက ရရှိမည့် အကျိုးကျေးဇူးထက် ဆုံးရှုံးမှုက ပိုများပေလိမ့်မည်။ သူတို့သည် သင်းခွေချပ်သားရဲများ၏ ဝိုင်းရံတိုက်ခိုက်မှုထဲတွင် ပိတ်မိသွားပြီး အားအင်ကုန်ခမ်းကာ သေဆုံးသွားနိုင်ပေသည်။

"သတ်"

ပထမဆုံး ရှေ့ထွက် တိုက်ခိုက်သူမှာ ချန်ရွှယ် ဖြစ်လိမ့်မည်ဟု မည်သူမျှ မထင်ထားခဲ့ပေ။ ဤမိန်းမသည် ယခုတိုက်ပွဲကြီးကို ဖြစ်ပေါ်အောင် ဆွဲဆောင်ခဲ့သည့် အဓိကတရားခံဟု ပြောလျှင်လည်း မမှားပေ။ လက်ရှိစစ်ပွဲပြီးနောက် ရလဒ်က ဘာပဲဖြစ်ဖြစ် ချန်ရွှယ်မှာ သိုင်းပညာရှင်တရားရုံးသို့ ပို့ဆောင်ခြင်း ခံရပေလိမ့်မည်။

သို့သော် ချန်ရွှယ်သည် သာလွန်လူသား ကျွမ်းကျင်သူတစ်ဦး ဖြစ်နေဆဲပင်။ သူမသည် တောင်ပိုင်းတောင်တန်း အခြေစိုက်စခန်း၏ တပ်ရင်းမှူး တစ်ဦးလည်း ဖြစ်သည်။ သူမ၏ ရဲရဲတောက် လုပ်ဆောင်ချက်များက အခြားသော သိုင်းသမားများကိုလည်း စိတ်ဓာတ်တက်ကြွစေပေလိမ့်မည်။

"သတ်"

ချန်ရွှယ် ဘာတွေးနေသည်ကို လင်းဖုန်း ဂရုမစိုက်ပေ။ သူသည် သူ၏ ပစ်မှတ်ဖြစ်သော သင်းခွေချပ်နတ်ဆိုးလေးကောင်ကို ရွေးချယ်ပြီးသား ဖြစ်သည်။ ၎င်းတို့ထဲမှ နှစ်ကောင်မှာ ထူးထူးခြားခြား သန်မာလှသည်။ သူတို့သည် ဤသင်းခွေချပ်သားရဲ အုပ်စုထဲတွင် အသန်မာဆုံးများ ဖြစ်ရပေမည်။

လင်းဖုန်းသည် ရုတ်တရက် လေထဲသို့ ပျံတက်လိုက်ပြီး နောက်ဘက်ရှိ သင်းခွေချပ်နတ်ဆိုးများထံသို့ ခုန်အုပ်လိုက်သည်။ တစ်ချိန်တည်းမှာပင် အခြားသော သာလွန်လူသား ကျွမ်းကျင်သူများသည်လည်း တစ်ယောက်ပြီးတစ်ယောက် လေထဲသို့ ပျံတက်လိုက်ကြပြီး စစ်မြေပြင်မှ ခဏအတွင်း ရုန်းထွက်ကာ သူတို့ကို ဝိုင်းရံထားသော သာမန် သင်းခွေချပ်သားရဲများထံမှ လွတ်မြောက်အောင် လုပ်ဆောင်လိုက်ကြသည်။

သာလွန်လူသား ကျွမ်းကျင်သူများက သင်းခွေချပ်သားရဲများထက် အားသာသော တစ်ခုတည်းသော အချက်မှာ သူတို့ ပျံသန်းနိုင်ခြင်းပင် ဖြစ်နိုင်သည်။ အကယ်၍ ၎င်းတို့သည် ဝက်အူပိုးကောင်များသာ ဖြစ်ခဲ့လျှင် ဤကဲ့သို့ မဆင်မခြင် ပျံသန်းခြင်းက သူတို့အား ဝက်အူပိုးကောင်များ၏ နှာမောင်းများဖြင့် တိုက်ရိုက် ဆွဲချခြင်းကို ခံရစေပေလိမ့်မည်။

သို့သော် သင်းခွေချပ်သားရဲများတွင်မူ ထိုကဲ့သို့သော စွမ်းရည်မျိုး မရှိပေ။ သူတို့၏ အရေပြားမှာ မာကျောပြီး လက်သည်းများမှာ ထက်မြက်လှသည်။ သူတို့သည် မြေအောက်ဥမင်များကို လျင်မြန်စွာ တူးနိုင်သော်လည်း မပျံသန်းနိုင်ကြပေ။

လင်းဖုန်း အရှိန်ကို ထပ်ပြီး မြှင့်လိုက်ကာ သင်းခွေချပ်နတ်ဆိုးလေးကောင်၏ အလယ်ဗဟိုသို့ ရုတ်တရက် ဆင်းသက်လိုက်သည်။ သင်းခွေချပ်နတ်ဆိုးတချို့မှာ အခြားသော သာလွန်လူသား ကျွမ်းကျင်သူများကို ရင်ဆိုင်ကိုင်တွယ်ရန် ကြိုးစားသော်လည်း လင်းဖုန်းက လျင်မြန်စွာ တားဆီးလိုက်သည်။

အရှိန်နှင့် ပတ်သက်လျှင် အရှိန်အမျိုးအစား မွေးရာပါစွမ်းရည်ကို ဖော်ထုတ်နိုင်သူများမှလွဲ၍ ကျန်သာလွန်လူသား ကျွမ်းကျင်သူများသည် လင်းဖုန်း၏ အရှိန်ကို မမီကြပေ။ ဤသင်းခွေချပ်သားရဲများအကြောင်းမှာမူ ပြောနေရန်ပင် မလိုတော့ပေ။

ထိုသင်းခွေချပ်နတ်ဆိုးလေးကောင်မှာလည်း အလွန် ဉာဏ်ကောင်းကြသည်။ သူတို့ လင်းဖုန်း၏အပြုအမူမှ ဆိုလိုရင်းကို နားလည်ကြသည်။ ထိုလူသားသည် သူတို့လေးကောင်စလုံးကို တစ်ပြိုင်နက်တည်း စိန်ခေါ်နေခြင်းပင်။

ထိုသင်းခွေချပ်နတ်ဆိုးလေးကောင်မှာ ဒေါသထွက်သွားကြသည်။ လင်းဖုန်းကို ကျော်ဖြတ်၍ မရနိုင်သောကြောင့် သူ့ကို ဝိုင်းရံလိုက်ကြပြီး အနီးသို့ တစ်လှမ်းချင်း တိုးကပ်လာကြသည်။