အခန်း (၃၁၂)

အပိုင်း (၃၁၂)

ပင်လယ်သားရဲ ဘုရင် နှစ်ပါးသည် ထိုအချိန်၌ မိမိတို့ မျိုးနွယ်စုဝင် တစ်ဦးချင်းစီ၏ စွမ်းအားများဖြင့် ပေါင်းစည်းထားသော အခြေအနေ၌ ရှိနေသည်။ မျိုးနွယ်စု တစ်ခုလုံး၏ စွမ်းအင်များ ကို တစ်သားတည်းပေါင်းစပ်ထားခြင်း ဖြစ်သဖြင့် အလွန်ကြီးမားလှသော အင်အားကို ပိုင်ဆိုင်ထားကြ၏။ သို့သော်လည်း ယခုအခါတွင်မူ ထိုမျိုးနွယ်စု နှစ်ခုလုံး၏ အသက်သည် ကျုံးရှန်၏ လက်ခုပ်အတွင်းသို့ ကျရောက်သွားရသည်။

ကျုံးရှန်၏ ကိုယ်တွင်းဟင်းလင်းပြင်အတွင်း၌ သူသည် ထိုသတ္တဝါများကို မိမိအလိုရှိသလို ခြယ်လှယ်နိုင်ကာ သူတို့အနေဖြင့် ပြန်လည် ခုခံနိုင်စွမ်း အနည်းငယ်မျှပင် ရှိမနေချေ။ ကျုံးရှန်ထံမှ ပေးပို့လိုက်သော စိတ်ဆန္ဒကို လက်ခံရရှိပြီးနောက်တွင် ထိုဘုရင် နှစ်ဦးသည် မိမိတို့ အချင်းချင်း တိုက်ခိုက်နေကြခြင်းသည် ကလေးကစားစရာမျှသာ ဖြစ်ကြောင်း နားလည်သွားကြရလေသည်။

ထို့ကြောင့် သူတို့သည် ချက်ချင်းပင် တိုက်ခိုက်နေသော အခြေအနေကို ရပ်တန့်လိုက်၏။ နဂါးမြွေငါးရှဉ့်ဘုရင်သည် သူ၏ ကြီးမားလှသော ခန္ဓာကိုယ်ကို ပြန်လည် ခွဲထုတ်လိုက်သောအခါ မီးခိုးရောင် သွေးသားစိုင်များအတွင်းမှ သာမန် နဂါးမြွေငါးရှဉ့် မြောက်မြားစွာ ထွက်ပေါ်လာပြီး မူလအတိုင်း ပြန်လည် ဖြစ်တည်သွားကြသည်။ အစွယ်ပါကြယ်ငါးဘုရင်သည်လည်း သူ၏ အစီရင်ကို ချက်ချင်း ဖျက်သိမ်းလိုက်သဖြင့် ချိတ်ဆက်ထားသော လက်တံများ ပြုတ်ထွက်သွားကာ ကြယ်ငါးများသည်လည်း သီးခြားစီ ဖြစ်သွားကြလေသည်။

ပင်လယ်သားရဲ ဘုရင် နှစ်ဦးစလုံးသည် ကျုံးရှန်၏ အစွမ်းကို ကြောက်ရွံ့လျက် အညံ့ခံရန် ရွေးချယ်လိုက်ကြသည်ကို မြင်သောအခါ ကျုံးရှန်သည် အတွေးတစ်ချက် ဖြင့် သာမန် ပင်လယ်သားရဲ အားလုံးကို သူ၏ ကိုယ်တွင်းဟင်းလင်းပြင်အတွင်းမှ အပြင်သို့ ကန်ထုတ်လိုက်သည်။ သူသည် ဘုရင် နှစ်ဦးကိုသာ ချန်လှပ်ထားခဲ့ကာ သူတို့၏ အသိစိတ်များအတွင်းသို့ တိုးဝင်လိုက်ပြီး သူတို့ သိမ်းဆည်းထားသော ဝိညာဉ်ဝါးမြိုခြင်းအရင်းအမြစ်များနှင့်ပတ်သက်သည့်မှတ်ဉာဏ်များကို ရှာဖွေလေသည်။

ပင်လယ်သားရဲ ဘုရင် နှစ်ဦးစလုံးသည် ဝိညာဉ်ဝါးမြိုခြင်းအရင်းအမြစ်များကို မိမိတို့၏ ခန္ဓာကိုယ်နှင့် မကွာ ထားရှိကြခြင်းဖြစ်သည်။ လင်လုံသားရဲဘုရင်ကဲ့သို့ပင် အနှီ ပင်လယ်သားရဲမျိုးနွယ်စု တစ်ခုစီ၌ ဝိညာဉ်ဝါးမြိုခြင်းအရင်းအမြစ် သုံးခုစီ ရှိနေကြပြီး စုစုပေါင်း ခြောက်ခု ရှိလေသည်။ ထိုအရင်းအမြစ်များကို မာကျောလှသော ကမာခွံများအတွင်း၌ သိမ်းဆည်းထားကြကာ အသက်လု တိုက်ပွဲ၌ နောက်ဆုံး ဝှက်ဖဲအဖြစ် အသုံးပြုရန် ရည်ရွယ်ထားကြသည်။

ဝိညာဉ်ဝါးမြိုခြင်းအရင်းအမြစ်၏ စုပ်ယူဝါးမြိုနိုင်စွမ်းသည် အလွန်ကြမ်းတမ်းလှပြီး ရန်သူနှင့် မိတ်ဆွေ ခွဲခြားခြင်း မရှိချေ။ ထို့ကြောင့် ပင်လယ်သားရဲများသည် ကျုံးရှန်ကဲ့သို့ ထိုအရင်းအမြစ်များကို တိုက်ရိုက် ဝါးမြိုရန် မစွမ်းသာကြဘဲ ဂရုတစိုက် သိမ်းဆည်းထားကာ ယင်းတို့မှ ထွက်ပေါ်လာသော ဝါးမြိုခြင်း စွမ်းအားများကိုသာ တိုက်ခိုက်ရေးတွင် အသုံးချနိုင်ကြလေသည်။

ယခုအခါတွင် နဂါးမြွေငါးရှဉ့်ဘုရင်နှင့် အစွယ်ပါကြယ်ငါးဘုရင်တို့သည် ကမာခွံ သုံးခုစီကို ကျုံးရှန်ထံသို့ ဆက်သလိုက်သည်။ ကျုံးရှန်သည်လည်း အချိန်ဆွဲခြင်းမရှိတော့ဘဲ ထိုကမာခွံ ခြောက်ခုလုံးကို ရိုက်ခွဲပစ်လိုက်ကာ ထွက်ပေါ်လာသော ဝိညာဉ်ဝါးမြိုခြင်းအရင်းအမြစ် ခြောက်ခုလုံးကို မြိုချလိုက်တော့သည်။

သူသည် ဝိညာဉ်ဝါးမြိုခြင်းအရင်းအမြစ် လေးခုကို ပေါင်းစပ်ထားပြီး ဖြစ်သဖြင့် သူ၏ ခန္ဓာကိုယ်အတွင်းရှိ ဝိညာဉ်စွမ်းအား ငါးပုံတစ်ပုံခန့်သည် ဝါးမြိုခြင်းစွမ်းအားများဖြင့် ပေါင်းစပ်နေပြီဖြစ်သည်။ ထို့ကြောင့် ယခုတစ်ကြိမ် ချေဖျက်သည့်အခါ ယခင်ကထက် ပိုမို လျင်မြန်လာပြီး ခွန်အား ကုန်ဆုံးမှုသည်လည်း ပထမဆုံးအကြိမ်ကထက် အဆများစွာ လျော့နည်းသွားရလေသည်။

သူသည် ထိုဝိညာဉ်ဝါးမြိုခြင်းအရင်းအမြစ် ခြောက်ခုလုံးကို ချေဖျက်ပြီးသောအခါ ခန္ဓာကိုယ်အတွင်းရှိ ဝိညာဉ်စွမ်းအား နှစ်ပုံတစ်ပုံခန့် သည် ရက်စက်ကြမ်းကြုတ်သော ဝါးမြိုခြင်း စွမ်းရည်ကို ပိုင်ဆိုင်သွား၏။

ဝိညာဉ်ဝါးမြိုခြင်းအရင်းအမြစ် နောက်ထပ် ဆယ်ခုကိုသာ ထပ်မံ ရရှိမည်ဆိုပါက ကျုံးရှန်၏ခန္ဓာကိုယ်အတွင်းရှိ ဝါးမြိုခြင်းစွမ်းရည်သည် ပြည့်စုံသွားမည် ဖြစ်သည်။ အနာဂတ်တွင် တိုက်ခိုက်မှုများ ပြုလုပ်သည့်အခါ၌ သူ ထုတ်ဖော်လိုက်သော မည်သည့် နတ်ဘုရားစွမ်းရည် သို့မဟုတ် နတ်ဘုရားလက်နက်များမဆို ရန်သူ၏ တိုက်ကွက်များကြောင့် အားနည်းသွားခြင်း မရှိတော့ဘဲ ရန်သူ၏ စွမ်းအားများကို ပြန်လည် ဝါးမြိုကာ ပိုမို အားကောင်းလာပေလိမ့်မည်။

ဝိညာဉ်ဝါးမြိုခြင်းအရင်းအမြစ်များကို ချေဖျက်ပြီးနောက်တွင် ကျုံးရှန်သည် ပင်လယ်သားရဲ ဘုရင် နှစ်ဦးကို အပြင်သို့ ပြန်ထုတ်လိုက်သည်။ ယခုအခါ၌ နဂါးမြွေငါးရှဉ့်များနှင့် အစွယ်ပါကြယ်ငါးများသည် တစ်ဦးနှင့်တစ်ဦး တိုက်ခိုက်ခြင်း မရှိကြတော့ချေ။ ကျုံးရှန်၏ ကြားဝင်စွက်ဖက်မှုကြောင့် သူတို့သည် တည်ငြိမ်သွားကြကာ အစွယ်ပါကြယ်ငါးဘုရင်နှင့် နဂါးမြွေငါးရှဉ့်ဘုရင်တို့သည် ကျုံးရှန်ရှေ့မှောက်၌ ဝပ်စင်းနေကြလေသည်။

သူတို့သည် ကျုံးရှန်၏ အစွမ်းကြောင့် အလွန်အမင်း ထိတ်လန့်သွားကြရသဖြင့် မည်သည့် မလေးစားမှုမျှ ပြုလုပ်ရန် မဝံ့ရဲကြတော့ပေ။

သို့သော်လည်း ကျုံးရှန်သည် အလွန် အရေးကြီးလှသော အချက်တစ်ခုကို ရုတ်တရက် သတိရလိုက်သည်။ ထိုသည်မှာ ပင်လယ်သားရဲ ဘုရင်များထံသို့ ဝိညာဉ်ဝါးမျိုခြင်းအရင်းအမြစ်များ မည်သည့်နေရာမှ ရောက်ရှိလာသနည်းဟူသော အချက်ပင် ဖြစ်သည်။ ပင်လယ်သားရဲဘုရင်များ၏ မှတ်ဉာဏ်များအတွင်း၌ ထိုကဲ့သို့သတင်းအချက်အလက်မျိုး ရှာမတွေ့ခဲ့ချေ။

သူတို့သည် မှတ်ဉာဏ်အချို့ ပျောက်ဆုံးနေသကဲ့သို့ ဖြစ်နေ၏။

ဝိညာဉ်ဝါးမျိုခြင်းအရင်းအမြစ် ဆိုသည်မှာ စတုတ္ထအထပ်တစ်ထောင်ဟင်းလင်းပြင်ကမ္ဘာ၏ အဓိကကျသော ရတနာတစ်ပါး ဖြစ်ကာ လမ်းဘေးမှ ဟင်းသီးဟင်းရွက်များကဲ့သို့ အလွယ်တကူ ရရှိနိုင်သော အရာမျိုး မဟုတ်ပေ။ ထိုအရင်းအမြစ်များ ထွက်ပေါ်လာသည့် မြစ်ဖျားခံရာ နေရာတစ်ခု မလွဲဧကန် ရှိနေလိမ့်မည်ဖြစ်သည်။ ထိုနေရာ၌ ဝိညာဉ်ဝါးမျိုခြင်းအရင်းအမြစ် မြောက်မြားစွာ ရှိနေနိုင်ရုံမျှမက ပိုမို သန့်စင်အဆင့်မြင့်သော ဝါးမြိုခြင်း စွမ်းအားများလည်း ရှိနေနိုင်ပေသည်။

ကျုံးရှန်သည် ရရှိထားသော ဝါးမြိုခြင်းအရင်းအမြစ်အမြုတေများဖြင့် ကျေနပ် ရောင့်ရဲခြင်းမရှိဘဲ မူလမြစ်ဖျားခံရာ နေရာတစ်ခုလုံးကိုပါ သိမ်းပိုက်ရန် တွေးတောလာသည်။ သို့သော်လည်း ထိုပင်လယ်သားရဲ ဘုရင်များ၏ မှတ်ဉာဏ်များအတွင်းမှ သတင်းအချက်အလက်များ ဖျက်ဆီးခံထားရခြင်းကို ကြည့်ခြင်းဖြင့် နောက်ကွယ်၌ တစ်စုံတစ်ဦး ထိန်းချုပ်နေကြောင်း သိသာလှပေသည်။

ကောင်းကင်တက်လှမ်းခြင်းမျှော်စင် တစ်ခုလုံးသည် သူ မျှော်စင်အတွင်းသို့ မဝင်ရောက်မီက ထင်မှတ်ထားခဲ့သကဲ့သို့ ပရမ်းပတာဖြစ်နေသော နေရာတစ်ခု မဟုတ်ချေ။ ပထမဆုံးသော အထပ်တစ်ထောင်ဟင်းလင်းပြင်ကမ္ဘာ ဖြစ်သည့် မြက်ခင်းပြင်ကမ္ဘာအတွင်းရှိ ကူးပြောင်းခြင်းတံခါးနှင့် တစ်သားတည်း ဖြစ်နေသော အသိစိတ်ကို ကြည့်ခြင်းဖြင့် မျှော်စင်၌ ကိုယ်ပိုင် အသိစိတ် ဝိညာဉ်တစ်ခု ရှိနေနိုင်ပေသည်။

ကောင်းကင်တက်လှမ်းခြင်းမျှော်စင်၏ ကြောက်မက်ဖွယ်ကောင်းသော အဆင့်အတန်းနှင့် စွမ်းအားများကို ကြည့်မည်ဆိုပါက ထိုအသိစိတ်သည် မည်မျှအထိ အစွမ်းထက်မည်ကိုပင် ခန့်မှန်းရန် ခက်ခဲလှသည်။ သို့သော်လည်း လက်ရှိ ခန့်မှန်းချက်များအရ မျှော်စင်ဝိညာဉ်သည် မျှော်စင်အတွင်းရှိ အခွင့်အာဏာ အချို့ကိုသာ စီမံခန့်ခွဲနိုင်ဟန် ရှိကာ မျှော်စင် တစ်ခုလုံးအပေါ်တွင်မူ အကြွင်းမဲ့ ထိန်းချုပ်နိုင်စွမ်း မရှိသေးပေ။

ကောင်းကင်တက်လှမ်းခြင်းမျှော်စင်သည် နှစ်သန်းပေါင်းများစွာ တည်ရှိခဲ့ပြီးသူ၏ ကိုယ်ပိုင် စည်းမျဉ်းနိယာမများအတိုင်းသာ ငရဲကမ္ဘာအတွင်း ပေါ်ထွက်လာခြင်း ဖြစ်သည်။ ထို့ပြင် ယခုတစ်ကြိမ်၌ ဂူကျဲထူ၏ နှောင့်ယှက်မှုများကြောင့် အပြောင်းအလဲများနှင့် ဟာကွက်အချို့ ဖြစ်ပေါ်လာခဲ့ပြီး မျှော်စင်သည် သတ်မှတ်ထားသော အချိန်ထက် စောစီးစွာ ပွင့်လာရကာ စောစီးစွာလည်း ပြန်လည် ပိတ်သိမ်းသွားခဲ့ရလေသည်။

ကောင်းကင်တက်လှမ်းခြင်းမျှော်စင်၏ အဆင့်အတန်းနှင့် စွမ်းအားများအရဆိုလျှင် ဂူကျဲထူနှင့် ဖြူမဲ သေမင်းတမန်ညီနောင်၏ တိုက်ခိုက်မှုမှ ထွက်ပေါ်လာသော စွမ်းအင်လှိုင်းများဖြင့် မျှော်စင်သည် အနည်းငယ်မျှပင် လှုပ်ခါနိုင်စွမ်း မရှိသင့်ပါချေ။ ယခုကဲ့သို့ ဖြစ်ပျက်သွားရခြင်းသည် မျှော်စင်အတွင်း၌ တစ်စုံတစ်ရာသော ဟာကွက်များ ရှိနေသောကြောင့်သာ ဖြစ်ရမည်။

ဂူကျဲထူသည် ထိုဟာကွက်များအကြောင်းကို ကြိုတင် သိရှိထားဟန် ရှိကာအခွင့်ကောင်းယူ၍ ဤတစ်ကြိမ်တွင် အကြံအစည်များဖြင့် ရောက်ရှိလာခဲ့ခြင်း ဖြစ်သည်။ သို့သော်လည်း ကျုံးရှန်သည် အခွင့်ကောင်းကို ကြားဖြတ် ရယူသွားခဲ့သဖြင့် နောက်ဆုံးတွင် မျှော်စင်အတွင်းသို့ ဝင်ရောက်နိုင်ခြင်း မရှိခဲ့ချေ။ ကျုံးရှန်သည် မူလနေရာ၌ပင် ရပ်နေသော်လည်း အတွေးများအကြား နစ်မြှုပ်နေသည်။

မျှော်စင်တက်လှမ်းမှု ပြီးဆုံးသွားသောအခါ ဂူကျဲထူကို မဖြစ်မနေ ဖမ်းဆီးရမည် ဖြစ်ကာ သူ၏ ဝိညာဉ်ကို စစ်ဆေးလျက် သူ သိရှိထားသော မျှော်စင်၏ ဟာကွက်များကို အကုန်အစင် သိရှိအောင် ပြုလုပ်ရပေလိမ့်မည်။

ကျုံးရှန်သည် ပင်လယ်သားရဲ ဘုရင် နှစ်ဦး၏ မှတ်ဉာဏ်များမှတစ်ဆင့် အနီးနားရှိ အခြားသော ပင်လယ်သားရဲ မျိုးနွယ်စုများ၏ တည်နေရာကို ရရှိထားပြီး ဖြစ်သည်။ သူ့အနေဖြင့် ထိုမျိုးနွယ်စုများကို တစ်ခုပြီးတစ်ခု တိုက်ခိုက် ချေမှုန်းရန်သာ လိုအပ်တော့သည်။ ထိုခရီးစဉ်အတွင်း၌ ဝိညာဉ်ဝါးမျိုခြင်းအရင်းအမြစ်များ မြစ်ဖျားခံရာ နေရာနှင့် ပတ်သက်သော လမ်းစများကိုလည်း ရှာဖွေရန်လိုအပ်သေးလေသည်။

သူ၏ ပင်ကိုအသိစိတ်အရ ထိုနေရာကို ရှာဖွေတွေ့ရှိမည်ဆိုပါက ကြီးမားလှသော အကျိုးကျေးဇူးများကို ရရှိမည်ဟု ခံစားမိ သည်။ ကျုံးရှန်သည် သူ ဖြတ်သန်းခဲ့သော အထပ်တစ်ထောင်ဟင်းလင်းပြင်ကမ္ဘာ တစ်ခုစီတိုင်းမှ ဆုလာဘ် မြောက်မြားစွာကို ရရှိခဲ့ပြီး ဖြစ်သည်။

မြက်ခင်းပြင်ကမ္ဘာအတွင်း၌ ထူးခြားသော ဒေသထွက်ပစ္စည်းများအပြင် မိစ္ဆာအရှင်သခင် အဆင့်ရှိကျင့်ကြံသူ တစ်ထောင်ကျော်နှင့် ငရဲကမ္ဘာမှ ပါရမီရှင်များကို သတ်ဖြတ်နိုင်ခဲ့သည်။

ဒုတိယမြောက် အထပ်တစ်ထောင်ဟင်းလင်းပြင်ကမ္ဘာ အတွင်း၌ လျှို့တင်းရှန့် အမည်ရှိ သတ္တဝါများ၏ အခွံများနှင့် ဥများကို ရရှိခဲ့သည့်အပြင် မျက်လုံးသုံးလုံးဖျံ တစ်ကောင်ကိုလည်း ရရှိခဲ့သည်။ ထို့ပြင် အညှောင့်ထွက်ပေါ်စပြုနေသော ဖန်ဆင်းခြင်း မျိုးစေ့ နှင့် ခုနစ်ရောင်ခြယ်ဘူးသီးခြောက် ရတနာ တစ်ခုကိုလည်း ရရှိခဲ့လေသည်။

တတိယမြောက် အထပ်တစ်ထောင်ဟင်းလင်းပြင်ကမ္ဘာအတွင်း၌မူ သူသည် ဖာလွီသူတော်စင် နှင့် အရာခမ်သိမ်း ကျမ်းစာလိပ် တို့၏ မှတ်ဉာဏ်အချို့ကို စုပ်ယူ ရရှိခဲ့ကာ ဝမ်ရှန့်နတ်ဘုရားကုန်းမြေတိုက်ကြီး၏ နက်ရှိုင်းလှသော လျှို့ဝှက်ချက်များကို သိရှိခဲ့ရသည်။ ယခု စတုတ္ထမြောက် အထပ်တစ်ထောင်ဟင်းလင်းပြင်ကမ္ဘာ ဖြစ်သော ဝိညာဉ်ဝါးမြိုခြင်း ပင်လယ်အတွင်း၌ လင်လုံ ပင်လယ်သားရဲများ၏ လင်လုံ (ဝိညာဉ်မီးအိမ်) များ၊ ဝိညာဉ်ဝါးမြိုခြင်းအရင်းအမြစ်များနှင့် အစွယ်ပါကြယ်ငါးများ၏ ချိတ်ဆက်မှု အစီရင်စသည်တို့ကို ရရှိထားခဲ့လေသည်။

ထိုအရာများ အားလုံးသည် အလွန်အဖိုးတန်လှသော ရတနာများဖြစ်ကြသည်။ ကျုံးရှန်သည် မျှော်စင်၏ ထိပ်ဆုံးသို့ ရောက်ရှိကာ ကောင်းကင်ဘုံကို ရှာတွေ့ပါက ကောင်းကင်တက်လှမ်းခြင်းမျှော်စင်ကို ဗဟိုချက်အဖြစ် အသုံးပြုကာ ငရဲကမ္ဘာနှင့် ဝမ်ရှန့်နတ်ဘုရားကုန်းမြေတိုက်ကြီးတို့ကို ချိတ်ဆက်မည် ဖြစ်သည်။ ထို့နောက် ဝမ်ရှန့်နတ်ဘုရားကုန်းမြေတိုက်ကြီးသို့ ပြန်လည် သွားရောက်မည်ဖြစ်ကာ ထျန်းဂိုဏ်းမြင့်မြတ်နယ်မြေကို အခြေတည်၍ နတ်ဘုရား နန်းတော်တစ်ခု တည်ထောင်ပြီး ရှေးခေတ် ဧကရာဇ်များကဲ့သို့ မဟာကမ္ဘာ တစ်ခုလုံးကို သိမ်းပိုက် စိုးစံမည်။

ထို့ပြင် သူသည် ထိုဧကရာဇ်များထက် သာလွန်အောင် ဝမ်ရှန့်နတ်ဘုရားကုန်းမြေတိုက်ကြီး၏ ကောင်းကင်တာအို အသိစိတ်ကို ကျော်လွှားအနိုင်ယူရန်ကြိုစားပေမည်။

ကောင်းကင်တာအိုကို အနိုင်ယူကျော်လွှားခြင်း။

ထိုအခါမှသာ သူ၏ ကိုယ်ပိုင် တာအိုလမ်းစဉ်ကို လက်တွေ့ကျင့်သုံးအကောင်အထည်ဖော်နိုင်မည်ဖြစ်သည်။