အခန်း (၁၄၅၅-၁၄၅၆)

အခန်း (၁၄၅၅) - သေခြင်းရှင်ခြင်းမှတ်တမ်း၏ စာမျက်နှာအစုတ်

"ဒါက..."

ဖန့်ချန်၏ စိတ်အာရုံတို့ လှုပ်ခတ်သွားရသည်။

သူ့မျက်မှောက်တွင် မြင်တွေ့နေရသည့်အရာမှာ စာအုပ်တစ်အုပ်ထံမှ အတင်းအဓမ္မ ဆွဲဖြတ်ယူထားသည့် ပျက်စီးနေသော စာမျက်နှာတစ်ခုနှင့် တူလှပေသည်။

၎င်းပေါ်တွင် သိပ်သည်းလှစွာသော အမည်နာမပေါင်း မြောက်မြားစွာကို ရေးထိုးထားပြီး၊ ထိုအထဲတွင် ရှဲ့အာမန် ဆိုသည့် အမည်သုံးလုံးကိုလည်း သူ မြင်လိုက်ရသလိုပင်။

"ယင်မသေမျိုးလမ်းစဉ်ကို ကျင့်ကြံချင်သည်ဖြစ်စေ၊ မကျင့်ကြံချင်သည်ဖြစ်စေ... အမာခံတပည့်ဆိုရင် ဒီအပေါ်မှာ အမည်နာမ ရေးထိုးရမယ်၊ ပြီးတော့ နာမည်အရင်းပဲ ဖြစ်ရမယ်"

အကြီးအကဲ ချန်က ပြုံး၍ ရှင်းပြသည်

"တကယ်လို့ နာမည်အလိမ်ကို သုံးခဲ့ရင်တော့ အပေါ့စားအနေနဲ့ ချက်ချင်း ဒဏ်ရာပြင်းထန်ရပြီး ဝိညာဉ်ထိခိုက်မယ်၊ အပြင်းအထန်ဆိုရင်တော့ နေရာတင် သေဆုံးပြီး ဝိညာဉ်ပါ ပျောက်ကွယ်သွားလိမ့်မယ်"

"ဖန့်မောင်လေး... မင်း အရင်က နာမည်အလိမ် သုံးခဲ့ဖူးရင်တောင် အခုတော့ နာမည်အရင်းကိုပဲ ရေးထိုးရမယ်နော်၊ အကြီးအကဲ ချန်က ခြောက်လှန့်နေတာ မဟုတ်ဘူး"

စီနီယာအစ်မကြီးက ပြုံး၍ ဆိုသည်။

ထိုစဉ် မြွေဝိညာဉ်မင်းက ဖန့်ချန်ကို စိုက်ကြည့်ကာ အေးစက်စွာ ဆိုလိုက်သည်။

"မင်းရဲ့ သွေးနဲ့ အမည်ကို ရေးထိုးတော့ သေခြင်းရှင်ခြင်းမှတ်တမ်းပေါ်မှာ တစ်ချက်ရေးခြစ်လိုက်တာနဲ့ ယင်မသေမျိုးလမ်းစဉ်က မင်းအတွက် ပွင့်လင်းသွားလိမ့်မယ်"

သေခြင်းရှင်ခြင်းမှတ်တမ်း

ဖန့်ချန်၏ မျက်နှာမှာ တည်ငြိမ်နေသော်လည်း စိတ်ထဲတွင်မူ လှိုင်းထန်သွားရသည်။

ဤအရာက ဒဏ္ဍာရီလာ သေခြင်းရှင်ခြင်းမှတ်တမ်းလော။

ရှေးဟောင်းယင်လောကတွင် ငရဲမင်း ပိုင်ဆိုင်သည့် အစွမ်းထက်လှသော နတ်ဘုရားလက်နက် လော။

အကယ်၍ ထိုသည်မှာ အမှန်တကယ်ဖြစ်ပါက ၎င်းသည် သေခြင်းရှင်ခြင်းမှတ်တမ်း၏ အစိတ်အပိုင်းတစ်ခု၊ စာမျက်နှာတစ်ခုမျှသာ ဖြစ်ပေလိမ့်မည်။

ကျန်ရှိသည့် အစိတ်အပိုင်းများမှာ အဘယ်မှာနည်း။ အထက်သုံးနယ်မြေ ရှိ ထိပ်တန်းအင်အားစုများ၏ လက်ထဲတွင် ရှိနေသလော။

ရှန်ယန်မီးဖို ကို ပြန်လည်တွေးတောကြည့်လျှင်၊ အထက်သုံးနယ်မြေမှ အင်အားစုအသီးသီးတို့သည် ရှေးဟောင်းယင်လောက ပျက်စီးပြီးနောက် ကျန်ရစ်ခဲ့သည့် အမွေအနှစ်များကို ဖူထူလောက ထဲတွင် လက်ခံရရှိထားကြသည်မှာ သံသယဖြစ်ဖွယ် မရှိပေ။

"ဖန့်အမာခံတပည့်... သွားလေ"

အကြီးအကဲ ချန်က ညင်သာစွာ တိုက်တွန်းလိုက်သည်။

ဖန့်ချန်သည် ထူးဆန်းသော ခံစားချက်ဖြင့် ထိုကြီးမားပြီး ပျက်စီးနေသော စာမျက်နှာကြီးရှေ့သို့ လျှောက်သွားကာ လက်ညှိုးကို ကိုက်၍ သွေးဖြင့် အမည်ရေးထိုးရန် နေရာလွတ်တစ်ခုကို ရှာလိုက်သည်။

သူသည် ယခုခေတ်၏ ငရဲမင်း ဖြစ်ပြီး ဤအရာမှာ ရှေးဟောင်းငရဲမင်း၏ လက်နက်ဖြစ်သည်။

၎င်းပေါ်တွင် သူ၏ အမည်ကို ရေးထိုးလိုက်ပါက မည်သို့ ဖြစ်ပျက်လာမည်နည်း။

နှမြောစရာကောင်းသည်မှာ ထိုမှတ်တမ်း၏ အသေးစိတ် လုပ်ဆောင်ချက်များကို သူ မသိရှိခြင်းပင်။

အကယ်၍ ၎င်းက လူတစ်ဦးကို အဘယ်ကြောင့် ယင်မသေမျိုး ဖြစ်စေနိုင်သည်ကို သိရှိပါက နောက်ဆက်တွဲ ဖြစ်လာမည့် အခြေအနေများကို သူ ခန့်မှန်းနိုင်ပေလိမ့်မည်။

ဖန့်ချန်.....

အမည်ရေးထိုးပြီးနောက် ဖန့်ချန်သည် အခြားသုံးဦးရှိရာသို့ ပြန်ဆုတ်လာခဲ့သည်။

သူ ဒဏ်ရာမရသလို နေရာတင် သေဆုံးသွားခြင်းလည်း မရှိသည်ကို မြင်ရသည့်အခါ အကြီးအကဲ ချန်နှင့် မြွေဝိညာဉ်မင်းတို့က ကျေနပ်စွာ ခေါင်းညိတ်လိုက်ကြသည်။

၎င်းမှာ ဖန့်ချန်သည် ကျွယ်မင်နန်းတော်သို့ ဝင်ရောက်စဉ်ကတည်းက အမည်အလိမ်ကို အသုံးမပြုခဲ့ဘဲ အစကတည်းက ပွင့်လင်းရိုးသားခဲ့ကြောင်း သက်သေပြနေခြင်းပင်။

ဤကဲ့သို့သောသူမှာ ကျွယ်မင်နန်းတော်အနေဖြင့် အားသွန်ခွန်စိုက် ပြုစုပျိုးထောင်ရန် ထိုက်တန်ပေသည်။

"အကြီးအကဲ ချန်... တကယ်လို့ ကျနော် အရင်က နာမည်အလိမ် သုံးခဲ့ရင် ဘာဖြစ်မလဲ "

ဖန့်ချန်က စပ်စုသည့်အဟန်ဖြင့် မေးလိုက်သည်။

အကြီးအကဲ ချန်က ရယ်မောကာ

"ဘာမှတော့ မဖြစ်ပါဘူး၊ အခု နာမည်အရင်း ရေးထိုးလိုက်ရင် ရပါပြီ၊ ကျုပ်တို့ကလည်း အရင်က နာမည်အလိမ် သုံးခဲ့တာကို အပြစ်မယူပါဘူး။ ဒါပေမဲ့ နန်းတော်သခင် ဆီမှာတော့ ပုံရိပ်ဆိုး ကျန်သွားနိုင်မလားဆိုတာ မပြောနိုင်ဘူးပေါ့"

ကျွယ်မင်နန်းတော်သခင်

ဖန့်ချန်သည် ထိုပုဂ္ဂိုလ်ကို အတော်လေး စိတ်ဝင်စားမိသည်။

ကျွယ်မင်နန်းတော်၏ တစ်ဦးတည်းသော အဆင့် ၉ မသေမျိုးမှာ မည်သည့်နေရာတွင် တံခါးပိတ်ကျင့်ကြံနေသနည်း၊ ကျွယ်မင်ကြယ်ပေါ်မှာပင် ရှိနေသလော။

"ဟဲဟဲ... မင်းရဲ့ အမည်ကို ရေးထိုးပြီးပြီဆိုရင် ယင်မသေမျိုးလမ်းစဥ်ကို စတင်ကျင့်ကြံလို့ ရပြီ။ မင်း ပတ်ဝန်းကျင်က ယင်ဓာတ် တွေကို ခံစားမိပြီလား အဲဒါတွေကို မင်း လေ့ကျင့်စုပ်ယူနိုင်ပြီ။ နောင်မှာ ဒီယင်ဓာတ်တွေကိုပဲ စုပ်ယူပြီး ယင်သက်တမ်းအဖြစ် ပြောင်းလဲလိုက်ရင် မင်းအတွက် နှစ်ပေါင်းများစွာ ရှင်သန်ဖို့ လုံလောက်သွားပြီ"

မြွေဝိညာဉ်မင်းက ထူးဆန်းသော ရယ်သံဖြင့် ဆိုလိုက်သည်။

အားလုံး ထိုနေရာမှ ထွက်ခွာရန် ပြင်လိုက်စဉ်မှာပင် ပျက်စီးနေသော စာမျက်နှာကြီးထံမှ ကြောက်မက်ဖွယ်ကောင်းသော ယင်ဓာတ်လှိုင်းများ ရုတ်တရက် ထွက်ပေါ်လာသည်။

လေးဦးသားလုံး ခြေလှမ်းများ ရပ်တန့်သွားကြပြီး လှည့်ကြည့်လိုက်ကြသည်။

ထိုအခါ ဖန့်ချန် ခုနက ရေးထိုးခဲ့သည့် အမည်မှာ တဖြည်းဖြည်း မှေးမှိန်လာပြီး နောက်ဆုံးတွင် အရိပ်အယောင်ပင် မကျန်တော့ဘဲ ပျောက်ကွယ်သွားသည်ကို မြင်လိုက်ရတော့သည်။

"ဒါ... ဒါ ဘယ်လိုဖြစ်တာလဲ"

အကြီးအကဲ ချန်မှာ မှင်သက်သွားရသည်။

သူသည် အကြီးအကဲတစ်ဦး၊ ရှေးဟောင်းမသေမျိုး တစ်ဦးဖြစ်ပြီး နှစ်ပေါင်းများစွာ ရှင်သန်လာခဲ့သူ ဖြစ်သည်။

ကျွယ်မင်ယင်လောကတွင် ယင်မသေမျိုးလမ်းစဥ်ကို လျှောက်လှမ်းရန် အနားယူတော့မည့်အရွယ်သို့ ရောက်နေပြီဖြစ်သော်လည်း သူ၏ သက်တမ်းတစ်လျှောက် ထိုကဲ့သို့သော မြင်ကွင်းမျိုးကို တစ်ခါမျှ မတွေ့ဖူးခဲ့ချေ။

မြွေဝိညာဉ်မင်း၏ မျက်နှာမှာ လေးနက်သွားပြီး ဖန့်ချန်ကို အေးစက်သော အကြည့်ဖြင့် ဝေ့ကြည့်လိုက်ကာ

"မင်းရဲ့ နာမည်ကို နောက်တစ်ခေါက် ထပ်ရေးစမ်း"

"ဟုတ်ကဲ့"

ဖန့်ချန်သည် ရှေ့သို့ တစ်ဖန်တက်၍ သူ၏ အမည်ကို ရေးထိုးလိုက်ပြန်သည်။

ခေတ္တအကြာတွင် ပျက်စီးနေသော စာမျက်နှာထံမှ ကြောက်မက်ဖွယ်ကောင်းသော ယင်ဓာတ်လှိုင်းများ ထပ်မံ ထွက်ပေါ်လာပြီး ခဲဖျက်တစ်ခုက ဖျက်လိုက်သကဲ့သို့ ဖန့်ချန်၏ အမည်ကို တိုက်စားသွားပြန်သည်။

"ထူးဆန်းလိုက်လေခြင်း..."

မြွေဝိညာဉ်မင်းမှာ ဖန့်ချန်ကို မကြည့်ဘဲ မနေနိုင်တော့

"ငါ ဒီနေရာမှာ စောင့်ကြပ်လာတာ နှစ်ပေါင်းများစွာ ရှိပြီ၊ ဒီလိုမျိုး တစ်ခါမှ မကြုံဖူးဘူး။ နာမည်အလိမ်ဆိုရင်လည်း အတုံ့အပြန် ဒဏ်ခတ်တာ ခံရမယ်၊ နာမည်အရင်းဆိုရင်လည်း ယင်မသေမျိုး တံခါးပေါက် ပွင့်သွားရမယ်။ ဘာဖြစ်လို့ မင်းရဲ့ အမည်က သေခြင်းရှင်ခြင်းမှတ်တမ်းပေါ်မှာ အစအနတောင် မကျန်ရတာလဲ "

ဖန့်ချန်က ဝေခွဲမရသည့် အမူအရာဖြင့်

"ကျနော်လည်း မသိပါဘူးလေ"

စိတ်ထဲတွင်မူ ငါက ငရဲမင်း ဖြစ်နေလို့နေမှာပေါ့ကွာ ဟု တွေးနေမိသည်။

"ဒီကိစ္စကို နန်းတော်သခင်ဆီ အစီရင်ခံဖို့ လိုလိမ့်မယ်"

မြွေဝိညာဉ်မင်းက အကြီးအကဲ ချန်ကို လေးနက်စွာ ကြည့်၍ ဆိုသည်။

အကြီးအကဲ ချန်က မျက်မှောင်ကြုတ်လျက် ခဏအကြာမှ ခေါင်းညိတ်လိုက်သည်။

"မှန်တယ်၊ နန်းတော်သခင်ဆီ တင်ပြရမယ်"

"စီနီယာကြီးတို့... ဒါက ကျနော့်အပေါ် ဘာသက်ရောက်မှု ရှိနိုင်မလဲ "

ဖန့်ချန်က မေးလိုက်သည်။

"သက်ရောက်မှုကတော့ သိပ်မရှိပါဘူး၊ ယင်မသေမျိုးလမ်းစဥ်ကို လျှောက်လှမ်းလို့ မရတော့တာပဲ ရှိတယ်"

မြွေဝိညာဉ်မင်း၏ မျက်လုံးများတွင် သနားကရုဏာရိပ် အနည်းငယ် ပေါ်လာသည်။

"ဒါက ကိစ္စမရှိပါဘူး"

စီနီယာအစ်မကြီးက ရုတ်တရက် ရယ်မောကာ ဆိုလိုက်သည်။

အကြီးအကဲ ချန်က သက်ပြင်းချလိုက်ပြီး

"တကယ်တော့ သက်ရောက်မှု သိပ်မကြီးပါဘူး၊ တခြားသူရဲ့ လက်ချက်နဲ့ မသေဆုံးဖို့ပဲ လိုတာပါ။ တကယ်လို့ သေသွားရင်တော့ သာမန် လွင့်မျောနေတဲ့ ဝိညာဉ်တစ်ခုပဲ ဖြစ်သွားလိမ့်မယ်။ ဒါ့အပြင် မင်းရဲ့ လူသားလောက ကျင့်ကြံမှုအဆင့်က ဆက်တိုက် တိုးတက်နေသရွေ့ သက်တမ်းကတော့ ရှည်လျားနေဦးမှာပါ။ နှမြောစရာကောင်းတာကတော့ နောင်တစ်ချိန်မှာ မင်းရဲ့ သက်တမ်းကုန်ဆုံးခါနီးရင် ကျွယ်မင်ယင်လောကကို ပြန်လာပြီး နန်းတော်အတွက် ဒီနယ်မြေကို စောင့်ကြပ်ပေးနိုင်မှာ မဟုတ်တော့တာပဲ"

"ကဲ... သွားကြစို့၊ မင်းအတွက် ရာထူးတစ်ခု စီစဉ်ပေးရမယ်"

စီနီယာအစ်မကြီးက ပြုံးရွှင်စွာဖြင့် ဖန့်ချန်ကို ဆွဲခေါ်ကာ ထွက်ခွာလာခဲ့သည်။

မြွေဝိညာဉ်မင်းက အကြီးအကဲ ချန်ကို တစ်ချက်ကြည့်ကာ အသံတိုးတက်ဖြင့် ဆိုလိုက်သည်။

"ဒီလူငယ်ကို သေချာ စောင့်ကြည့်ထားဦး၊ ပုံမှန်မဟုတ်တဲ့ အရာတွေရဲ့ နောက်ကွယ်မှာ မိစ္ဆာ တစ်ကောင်ကောင် ရှိနေတတ်တယ်"

"ငါ နားလည်ပါတယ်"

အကြီးအကဲ ချန်က အသာအယာ ခေါင်းညိတ်လိုက်သည်။

သုံးဦးသား နတ်ဘုရားဝိညာဥ်နန်းတော် မှ ထွက်လာပြီးနောက် စီနီယာအစ်မကြီးက လမ်းတစ်လျှောက်တွင် ကျွယ်မင်ယင်လောကရှိ ဌာနအသီးသီး အကြောင်းကို ဖန့်ချန်အား မိတ်ဆက်ပေးလေသည်။

"ဒီမှာက ဌာနတွေ သိပ်မများဘူး၊ မင်း အောက်နယ်မြေ ခြောက်ခု မှာ ယင်လောကကို ဆင်းဖူးတယ်ဆိုတော့ အဲဒီက ယင်လောကငယ် တွေမှာ ဌာနအမျိုးမျိုး ရှိတာ သိမှာပေါ့ "

"ဟုတ်ကဲ့... ဆင်းဖူးပါတယ်၊ ယင်လောကငယ်မှာ ပြီးခဲ့တဲ့နှစ်တွေက ဌာနတွေ တော်တော်များလာတာ သတိထားမိတယ်"

"အင်း... အဲဒီဘက်မှာ အရင်က ဦးဆောင်သူ မရှိခဲ့ပေမဲ့ အခုတော့ တစ်စုံတစ်ယောက်က ရှေ့ထွက်ပြီး အုပ်ချုပ်နေပြီ၊ ကြည့်ရတာ ကောင်းကောင်း အခြေချဖို့ ပြင်နေပုံပဲ။ ဒါပေမဲ့ မင်း စိတ်ထဲ ထည့်မထားပါနဲ့၊ အဲဒါတွေက အဆင့်မရှိတဲ့ နေရာတွေပါ။ ငါတို့ ကျွယ်မင်ယင်လောကမှာတော့ စုစုပေါင်း ဌာနကြီး ခြောက်ခု ရှိတယ်။ ၎င်းတို့ကတော့... ယင်စစ်သည်ဌာန ၊ တရားသူကြီးဌာန ၊ မိစ္ဆာလေ့ကျင့်ရေးဌာန ၊ ဝိညာဉ်ဖမ်းဆီးရေးဌာန ၊ သံသရာဌာန နဲ့... အာဏာအရှိဆုံးဖြစ်တဲ့ ဗဟိုဌာန တို့ပဲ။ မင်း ကြိုက်တဲ့ ဌာနမှာ တာဝန်ထမ်းဆောင်လို့ ရတယ်၊ ဒါပေမဲ့ မင်းက အခုမှ စဝင်တာဆိုတော့ ရာထူးအဆင့်အတန်းကတော့ သိပ်မမြင့်နိုင်သေးဘူးပေါ့"

"ကြိုက်တဲ့ ဌာနမှာ လုပ်လို့ရတယ် ဟုတ်လား "

ဖန့်ချန်က အံ့အားသင့်စွာ မေးလိုက်သည်

"လုပ်ထုံးလုပ်နည်းတွေ ဘာတွေ မလိုဘူးလား "

"ရှဲ့အာမန်က ဗဟိုဌာနရဲ့ ဌာနချုပ်မှူး လေ၊ လုပ်ထုံးလုပ်နည်း အားလုံးက သူ့လက်ထဲက ဖြတ်ရတာ။ ပုံမှန်အားဖြင့် သူ မရှိရင် နောက်ထပ် ယင်အရှင် တစ်ယောက်က စီမံတယ်၊ အဲဒီ ယင်အရှင် ကိုလည်း မင်း တွေ့ပြီးပြီပဲ၊ ငါတို့ကတော့ နံပါတ်ခုနစ်လို့ ခေါ်ကြတယ်"

အကြီးအကဲ ချန်က ရယ်မော၍ ဆိုသည်။

"ဒါကြောင့် မင်း အခု ကြိုက်တဲ့ ဌာနကို စိတ်ကြိုက် ရွေးလို့ရတယ်"

ဖန့်ချန်သည် ထိုစီနီယာအစ်မကြီးမှာ ယင်လောကတွင် ဤမျှ ရာထူးကြီးမားကာ အာဏာအရှိဆုံးဖြစ်သည့် ဗဟိုဌာန၏ ဌာနချုပ်မှူး ဖြစ်နေလိမ့်မည်ဟု မထင်ထားခဲ့ပေ။

ဝမ်ချုံစန်း ၏ နည်းလမ်းမှာ သူမထံမှတစ်ဆင့် စတင်ရန် ဖြစ်နေသလော။

'မဖြစ်နိုင်လောက်ပါဘူး... စီနီယာအစ်မကြီးက ဝမ်ချုံစန်းနဲ့ ဆက်ဆံရေး ကောင်းပေမဲ့ ဒီကိစ္စမှာ ပါဝင်ပုံမရဘူး၊ ဝမ်ချုံစန်းရဲ့ ကိုယ်ပွားကို ဒီနေရာမှာ ပုန်းအောင်းဖို့ ခွင့်ပြုမှာလည်း မဟုတ်ဘူး'

အတွေးများကို ဖယ်ထုတ်လိုက်ရင်း ဖန့်ချန်က သဘာဝကျကျပင် ပြောလိုက်သည်။

"ကျနော် သံသရာဌာန မှာ တာဝန်ထမ်းဆောင်ချင်ပါတယ်"

"သံသရာဌာနလား အဲဒါကတော့ လွယ်ပါတယ်"

စီနီယာအစ်မကြီးက အသာအယာ ခေါင်းညိတ်လိုက်လေတော့သည်။

အခန်း (၁၄၅၆) -စိတ်ဝိညာဥ်တောင်

အကြီးအကဲ ချန် ထွက်ခွာသွားပြီးနောက် စီနီယာအစ်မကြီးသည် ဖန့်ချန်ကို တစ်ဦးတည်း ခေါ်ဆောင်၍ သံသရာဌာန သို့ ရောက်ရှိလာခဲ့သည်။

သံသရာဌာနတွင် တာဝန်ထမ်းဆောင်နေကြသော ကျင့်ကြံသူများသည် နည်းမျိုးစုံဖြင့် နောက်ခံအင်အား ရှိကြသူများဖြစ်သလို အစွမ်းအစလည်း မဆိုးလှပေ။

စီနီယာအစ်မကြီးကို မြင်လိုက်ရသည်နှင့် အားလုံးက ရှေ့သို့ တိုးလာပြီး အရိုအသေပေး ဂါရဝပြုကြလေသည်။

မကြာမီမှာပင် သံသရာဌာနမှ အရာရှိတစ်ဦးသည် ခပ်သုတ်သုတ် ပြေးထွက်လာပြီး စီနီယာအစ်မကြီးကို ပြုံး၍ နှုတ်ဆက်လိုက်သည်။

"စီနီယာအစ်မကြီး... အခုလို ကြွလာတာ ဘာလို့ ကြိုပြီး အကြောင်းမကြားရတာလဲဗျာ"

"ရှောင်ထု မင်းကို မိတ်ဆက်ပေးရဦးမယ်၊ ဒါက ဖန့်မောင်လေးပဲ၊ ကျွယ်မင်နန်းတော်ရဲ့ အမာခံတပည့်သစ်လေ"

စီနီယာအစ်မကြီးက ပြုံး၍ ဆိုလိုက်သည်။

လာရောက်သူမှာ အနည်းငယ် မှင်သက်သွားပြီး ဖန့်ချန်ကို အံ့အားသင့်သလို ကြည့်လိုက်ကာ ချက်ချင်းပင် လက်အုပ်ချီ၍ ပြုံးလျက် ဆိုသည်။

"ဖေထု ပါ၊ ဖန့်ညီလေးကို တွေ့ရတာ ဝမ်းသာပါတယ်"

"ဖန့်ချန်ပါ၊ ဖေစီနီယာကို ဂါရဝပြုပါတယ်"

ဖန့်ချန်ကလည်း လက်အုပ်ချီ၍ ပြန်လည် နှုတ်ဆက်လိုက်သည်။

ထို့နောက် ဖေထုက စီနီယာအစ်မကြီးနှင့် ဖန့်ချန်ကို အတွင်းသို့ ဖိတ်ခေါ်ကာ စကားပြောကြလေသည်။

သူတို့နှစ်ဦး၏ အပြန်အလှန် စကားပြောဆိုပုံအရ ဤဖေထုမှာ သံသရာဌာနအတွင်း ရာထူးအဆင့်အတန်း မနိမ့်လှကြောင်း သိလိုက်ရသည်။

"ကျုပ်တို့ ကျွယ်မင်နန်းတော်မှာ အမာခံတပည့် ထောင်နဲ့ချီ ရှိတယ်၊ အားလုံးက ကျွယ်မင်ယင်လောကမှာ ကိုယ်စီ တာဝန်တွေ ရှိကြတာချည်းပဲ။ ဒါပေမဲ့ ယင်လောကမှာ ဌာနကြီး ခြောက်ခုပဲ ရှိတာဆိုတော့ ဘယ်လိုပဲ ခွဲဝေခွဲဝေ အမာခံတပည့် အများစုရဲ့ ရာထူးက သိပ်မကြီးနိုင်ဘူး၊ မင်းက အခုမှ ရောက်တာဆိုတော့ အောက်ခြေကနေပဲ စရမှာပေါ့"

စီနီယာအစ်မကြီးသည် ဖေထု၏ ဖိတ်ကြားမှုကြောင့် အဓိကနေရာတွင် ထိုင်လိုက်ပြီးနောက် ဖန့်ချန်ကို ပြုံးရွှင်စွာ ကြည့်၍ ဆိုသည်။

"ရှောင်ထုကို သံသရာဌာနရဲ့ ဖွဲ့စည်းပုံအကြောင်း ရှင်းပြခိုင်းလိုက်မယ်၊ ပြီးရင် မင်းရဲ့ အကြံဥာဏ်ကို ငါ့ကို ပြန်ပြောပြပေါ့၊ မင်းကိုယ်တိုင် ဘယ်လို ရာထူးမျိုးနဲ့ သင့်တော်မလဲဆိုတာ ကြည့်လိုက်ဦး"

ပြောပြီးသည်နှင့် သူမက ဖေထုကို လှည့်ကြည့်လိုက်သည်။

ဖေထုက ချက်ချင်း ခေါင်းညိတ်လိုက်ပြီး လည်ချောင်းတစ်ချက် ဟန့်ကာ ဆိုသည်။

"ဖန့်ညီလေး... သံသရာဌာနမှာ အဓိက ဌာနခွဲ သုံးခု ရှိတယ်၊ ဒါတွေကတော့ အမည်စာရင်းသွင်းခြင်း၊ စစ်ဆေးအတည်ပြုခြင်း နဲ့ သေတ္တာပိတ်ခြင်း ဒါမှမဟုတ် နောက်ဆုံး ဆုံးဖြတ်ခြင်း တို့ပဲ"

"အမည်စာရင်းသွင်းခြင်း ဆိုတာက သံသရာလည်မယ့်သူတွေရဲ့ အမည်ကို မှတ်တမ်းတင်ရတာ၊ တစ်ဆက်တည်းမှာပဲ သူတို့ ပြန်လည် မွေးဖွားမယ့်နေရာကို အကြမ်းဖျင်း စီစဉ်ပေးရတာပေါ့"

"စစ်ဆေးအတည်ပြုခြင်း ဆိုတာကတော့ အမည်စာရင်းသွင်းတဲ့အခါမှာ သင့်တင့်လျောက်ပတ်မှု ရှိမရှိ၊ တစ်စုံတစ်ယောက်က လာဘ်ထိုးလို့ နေရာလွဲ စီစဉ်ပေးလိုက်တာမျိုး ရှိမရှိကို စစ်ဆေးရတာ။ မင်းသိတဲ့အတိုင်း ကျွယ်မင်ကြယ်က အလွန်ကျယ်ပြောတယ်၊ တစ်ခါတလေ ပြန်လည် မွေးဖွားမယ့်နေရာက နောင်တစ်ချိန် ကျင့်ကြံသူ ဖြစ်လာနိုင်မလား ဆိုတာကို အဆုံးအဖြတ် ပေးနိုင်လို့ပဲ"

"သေတ္တာပိတ်ခြင်း ဆိုတာကတော့ နိဂုံးချုပ် ဆုံးဖြတ်ခြင်း ဆိုတဲ့ အဓိပ္ပာယ်ပဲ၊ သူတို့က လွင့်မျောနေတဲ့ ဝိညာဉ်တွေကို သံသရာထဲကို အပြီးသတ် ပို့ဆောင်ပေးရတဲ့သူတွေပေါ့"

"လက်ရှိမှာ ငါတို့ သံသရာဌာနမှာ ဌာနချုပ်မှူး တစ်ဦး ရှိတယ်၊ ယင်အရှင် နှစ်ဦးက ကူညီပေးတယ်။အမည်စာရင်းသွင်းခြင်းဆိုင်ရာ အရာရှိချုပ် တစ်ဦးရှိပြီး လက်အောက်မှာ အမည်စာရင်းသွင်း စေတမန် ၃၃ ဦး ရှိတယ်"

"စစ်ဆေးအတည်ပြုခြင်းဆိုင်ရာ အရာရှိချုပ် တစ်ဦးရှိပြီး လက်အောက်မှာ စစ်ဆေးရေး စေတမန် ၂၉ ဦး ရှိတယ်။ သေတ္တာပိတ်ခြင်းဆိုင်ရာ အရာရှိချုပ် တစ်ဦးရှိပြီး လက်အောက်မှာ သေတ္တာပိတ် စေတမန် ၄၉ ဦး ရှိတယ်"

ဤသို့ ပြောပြီးနောက် ဖေထုက ပြုံး၍ ဆက်ပြောသည်။

"ဒီအရေအတွက်က သိပ်မများဘူးလို့ ထင်လားကျုပ်တို့ ကျွယ်မင်နန်းတော်က အမာခံတပည့် ထောင်နဲ့ချီထဲမှာ အများစုက သံသရာဌာနကို ဝင်ချင်ကြတာ။ ဘာလို့လဲဆိုတော့ ဒီမှာ ခံစားခွင့်တွေ ကောင်းတယ်၊ အခွင့်အရေးလည်း ကောင်းတယ်၊ ပြီးတော့ အပြင်ထွက်ပြီး စွန့်စားစရာလည်း မလိုဘူး။ ဌာနကြီး ခြောက်ခုထဲမှာ အမာခံတပည့် အရေအတွက် အနည်းဆုံး ဌာနလည်း ဖြစ်တယ်"

"ဒါပေမဲ့ အမာခံတပည့် တစ်ယောက်ချင်းစီရဲ့ လက်အောက်မှာ အရန်ကျင့်ကြံသူ ရာနဲ့ချီ ရှိတယ်လေ။ ဒါကြောင့် အလုပ်အများစုကို သူတို့ကို ခိုင်းလိုက်ရုံပဲ။ သံသရာဌာနရဲ့ အလုပ်တွေက ရှုပ်ထွေးတယ်လို့ ထင်ရပေမဲ့ ကျွမ်းကျင်သွားရင်တော့ အဆင်ပြေသွားမှာပါ"

"ဖန့်မောင်လေး... မင်း ဘယ်ရာထူးနဲ့ သင့်တော်မယ်လို့ ထင်လဲ"

စီနီယာအစ်မကြီးက မေးလိုက်သည်။

"အမည်စာရင်းသွင်း စေတမန် အဖြစ်ကနေပဲ စလုပ်ကြည့်ပါ့မယ်"

"ဒါဆိုရင်တော့ တကယ့်ကို အဆင်ပြေတာပဲ၊ ငါက အမည်စာရင်းသွင်းခြင်းဆိုင်ရာ အရာရှိချုပ်လေ"

ဖေထုက တစ်ဟားဟား ရယ်မောလိုက်သည်။

"စီနီယာအစ်မကြီးက ကိုယ်တိုင် လိုက်ပို့ပေးတယ်ဆိုကတည်းက မင်းက ထူးချွန်တဲ့သူ ဖြစ်မှာ သေချာတယ်၊ ငါ့ဆီမှာလည်း လူတော်တွေ လိုအပ်နေတာနဲ့ အတော်ပဲ"

"မင်း ထပ်မစဉ်းစားတော့ဘူးလား အမည်စာရင်းသွင်း စေတမန်က တော်တော်တော့ လက်ဝင်တယ်နော်၊ တစ်နေ့လုံး သံသရာလည်မယ့်သူတွေရဲ့ စာရင်းကို မှတ်တမ်းတင်နေရမှာ။ စစ်ဆေးရေး စေတမန်နဲ့ သေတ္တာပိတ် စေတမန်တွေက အလုပ်လည်း ပိုသက်သာသလို လစာလည်း ပိုကောင်းတယ်"

စီနီယာအစ်မကြီးက ဆိုသည်။

"စီနီယာအစ်မကြီးရယ်... သူ့ကို ကျနော့်လက်အောက်မှာပဲ အလုပ်လုပ်ခွင့် ပေးလိုက်ပါဗျာ။ တခြား ဂျူနီယာလေးတွေက ဘယ်လောက် စကားနားမထောင်ဘူးဆိုတာ အစ်မကြီးလည်း သိသားပဲ၊ ဒီအတိုင်းဆို ကျနော့်ခေါင်းက သုံးဆလောက် ပိုကြီးလာတော့မှာ"

ဖေထုက ခါးသက်သက် ပြုံး၍ ဆိုလိုက်သည်။

"ကောင်းပြီလေ... သူကိုယ်တိုင် ရွေးချယ်တာဆိုတော့ ငါလည်း ကြားဝင်မစွက်တော့ဘူး"

စီနီယာအစ်မကြီးက တစ်ချက်ပြုံး၍ ခေါင်းညိတ်လိုက်သည်။

"မင်းကတော့ ဝါရင့်သူတစ်ယောက် ဖြစ်နေပြီဆိုတော့ တခြား ဂျူနီယာလေးတွေရဲ့ ဆိုးတေတဲ့ စရိုက်ကို ထိန်းကျောင်းဖို့ မင်းလို ဝါရင့်သူမျိုး လိုတာပေါ့"

သူမက စကားလမ်းကြောင်းကို ပြောင်းလိုက်ပြီး ဖန့်ချန်ကို ပြုံး၍ ဆိုသည်။

"လီရှမ်းဇီ က သံသရာဌာနရဲ့ သေတ္တာပိတ်ခြင်းဆိုင်ရာ အရာရှိချုပ်ပဲ၊ ပြီးခဲ့တဲ့ ဝူရှန့်ငရဲခရီးစဉ် ပြီးတော့မှ ရာထူးတိုးသွားတာ"

ဖန့်ချန်က အံ့အားသင့်သွားသည်။

"လီစီနီယာက အစီရင်မသေမျိုးအတတ်တွေကိုတောင် တတ်မြောက်ထားပြီဖြစ်လျက်နဲ့ အရာရှိချုပ် တစ်ဦးပဲ ဖြစ်နိုင်တာလား "

"အဲဒါကလည်း မနည်းဘူးလေ၊ အရာရှိချုပ်ဆိုတာ ဖေထုရဲ့ ရာထူးထက် အများကြီး ပိုအရေးပါတယ်၊ ပြီးတော့ သေတ္တာပိတ်ခြင်းဆိုတာ အရေးကြီးတဲ့ အပိုင်းပဲ။ အဲဒီအထက်မှာတော့ ယင်အရှင်နဲ့ ဌာနချုပ်မှူးတွေ ရှိတယ်၊ အဲဒီနေရာတွေက အကြီးအကဲအဖွဲ့က အကြီးအကဲတွေပဲ ထိုင်ကြတာ။ အစီရင်မသေမျိုးအတတ် တတ်မြောက်ထားတာနဲ့တင် အားလုံး ပြီးသွားပြီလို့ ထင်နေတာလား မင်းရဲ့ ကိုယ်ပိုင် ကျင့်ကြံမှုအဆင့်ကလည်း လုံလောက်ဖို့ လိုသေးတယ်လေ"

"ဥပမာပြောရရင် နံပါတ်နှစ် စီနီယာဆိုရင် ကျွယ်မင်ယင်လောကမှာ ဗဟိုဌာနရဲ့ အရာရှိငယ်လေး တစ်ဦးပဲ ရှိသေးတယ်၊ အရာရှိချုပ်တောင် မဟုတ်ဘူး။ နံပါတ်သုံးကတော့ ယင်စစ်သည်ဌာနမှာ အရာရှိချုပ်၊ နံပါတ်လေးက ဝိညာဉ်ဖမ်းဆီးရေးဌာန၊ နံပါတ်ငါးက တရားသူကြီးဌာန၊ နံပါတ်ခြောက်က မိစ္ဆာလေ့ကျင့်ရေးဌာန၊ နံပါတ်ခုနစ်ကတော့ နံပါတ်နှစ်လိုပဲ ဗဟိုဌာနမှာ ရှိကြတယ်"

စီနီယာအစ်မကြီးက ရှင်းပြလိုက်သည်။

ဖေထုမှာ စိတ်ထဲမှ တုန်လှုပ်သွားမိသည်။

ပုံမှန်ဆိုလျှင် စီနီယာအစ်မကြီးက ဤမျှအထိ စကားအများကြီး ပြောလေ့မရှိပေ။

အဘယ်ကြောင့် ထိုအမာခံတပည့်သစ်အပေါ် ဤမျှအထိ ထူးထူးခြားခြား ဆက်ဆံနေရသနည်း။

"ဒါနဲ့... အရင် သံသရာဌာနရဲ့ ဌာနချုပ်မှူးက ကျန်းမာရေး တစ်ခုခု ချို့ယွင်းသွားလို့ ရာထူးကနေ နုတ်ထွက်သွားတယ်၊ အခု အသစ်တက်လာတဲ့ တစ်ယောက်ကတော့... ပြောရရင် မင်းနဲ့လည်း ရေစက်ရှိတယ်လို့ ဆိုရမယ်"

စီနီယာအစ်မကြီးက ဆိုလိုက်သည်။

ကျနော်နဲ့ ရေစက်ရှိတယ်

ဖန့်ချန်၏ စိတ်ထဲတွင် တစ်ခုခုကို ရိပ်မိလိုက်ပြီး ဝေခွဲမရသည့် အမူအရာဖြင့်

"ဘယ်သူများပါလိမ့်..."

"သူက အောက်နယ်မြေ ခြောက်ခုက လာတာ၊ အရင်က ထိုက်ရွှမ်မသေမျိုး လို့ ခေါ်တယ်၊ အခုတော့ ရှေးဟောင်းမသေမျိုး ဖြစ်သွားပြီဆိုတော့ နောက်ဆုံး စကားလုံး နှစ်လုံးကို ဖြုတ်လိုက်ပြီပေါ့။ သူက ငါတို့ ကျွယ်မင်ကျင့်ကြံသူ ဖြစ်လာတာ နှစ်ပေါင်းများစွာ ရှိပြီ၊ အောင်မြင်မှုတွေလည်း အများကြီး ရထားတာ"

"အကြီးအကဲတွေက သူ့ကို အတော်လေး အရေးပေးကြတယ်၊ ငါလည်း သူ အလုပ်လုပ်ပုံကို သဘောကျတယ်၊ ဒါကြောင့် ဒီတစ်ခေါက် သံသရာဌာနရဲ့ ဌာနချုပ်မှူး ရာထူးကို သူပဲ ရသွားတာ"

စီနီယာအစ်မကြီးက ပြုံး၍ ဆက်ပြောသည်

"သူက လီရှမ်းဇီ နဲ့လည်း ပတ်သက်မှု ရှိတယ်၊ လီရှမ်းဇီ ရဲ့ ညီမလေးရဲ့ ဆရာလည်း ဖြစ်တယ်။ သူ့ရဲ့ မူလ မျိုးနွယ်ကလည်း မသေးဘူး၊ စိတ်ဝိညာဥ်တောင် မှာ ပညာသင်ကြားခဲ့တာလေ။ ငါမှတ်မိသလောက်ဆိုရင် မင်းရဲ့ အရင် စစ်ဆေးမှုတုန်းက သူက စစ်ဆေးရေး အရာရှိချုပ်ပဲ၊ မင်းတို့ တွေ့ဖူးမှာပါ"

"ဪ... ဒီစီနီယာကြီးကို ပြောတာကိုး"

ဖန့်ချန်က နားလည်သွားသလို အမူအရာ လုပ်လိုက်သည်။

အမှားအယွင်း မရှိနိုင်ပါက ထိုထိုက်ရွှမ်းမသေမျိုးမှာ ဝမ်ချုံစန်း၏ ပင်ကိုယ်ခန္ဓာ ဖြစ်နိုင်ချေ များလှသည်။

ဤတစ်ကြိမ်တွင် စီနီယာအစ်မကြီး ပြောပြလိုက်သည့် သတင်းက အတော်လေး အရေးပါလှသည်။

သူက စိတ်ဝိညာဥ်တောင် က လာတာတဲ့လား

ဒါဆိုရင် ရှေးဟောင်းမိစ္ဆာဂိုဏ်း နဲ့ အမြဲတမ်း ရင်ဆိုင်နေရတဲ့ အင်အားစုက ဒီအင်အားစုပဲလား

စိတ်ဝိညာဥ်နယ်မြေ...စိတ်ဝိညာဥ်တောင်။

ဖန့်ချန်သည် ထိုအင်အားစုမှာ အလွန်ပင် မရိုးရှင်းကြောင်း ခံစားလိုက်ရသည်။

"စီနီယာအစ်မကြီး...စိတ်ဝိညာဥ်တောင် ဆိုတာ ဘယ်လို အင်အားစုမျိုးလဲ၊ စိတ်ဝိညာဥ်နယ်မြေရဲ့ ထိပ်တန်း အင်အားစုလား "

ဖန့်ချန်က မေးလိုက်သည်။

သူ၏ လက်ရှိ အဆင့်အတန်းနှင့်ဆိုလျှင် ထိုမေးခွန်းများကို မေးမြန်းခြင်းက မည်သည့် သံသယကိုမျှ ဖြစ်စေမည် မဟုတ်ပေ။

"လွန်ခဲ့တဲ့ အချိန်အတော်ကြာတုန်းကတော့ ဟုတ်တာပေါ့၊ ဒီနယ်မြေကိုတောင် စိတ်ဝိညာဥ်နယ်မြေ လို့ ခေါ်ကြတာပဲလေ။ ဒါပေမဲ့...စိတ်ဝိညာဥ် တောင်က ကပ်ဘေးကြီးတစ်ခုကို ကြုံတွေ့ခဲ့ရလို့ အခုတော့ သိပ်ပြီး အခြေအနေ မကောင်းတော့ဘူး၊ ဒီနယ်မြေရဲ့ ဒုတိယတန်းစား အင်အားစုလောက်ပဲ ဖြစ်တော့တယ်"

စီနီယာအစ်မကြီးက ရယ်မော၍ ဆိုသည်။

ကပ်ဘေးကြီးကို ကြုံခဲ့ရတယ်

မိစ္ဆာကပ်ဘေး လား...

ဖန့်ချန်က စဉ်းစားနေဆဲမှာပင် လူရိပ်တစ်ခု ခပ်သွက်သွက် လျှောက်လာသည်ကို မြင်လိုက်ရသည်။

လူမရောက်မီ အသံက အရင် ထွက်ပေါ်လာသည်

"စီနီယာအစ်မကြီး... ဖန့်ညီလေးကို အလုပ်သွင်းဖို့ ခေါ်လာတယ်လို့ ကြားတယ်၊ ဖန့်ညီလေးကို ကျနော့်ရဲ့ သေတ္တာပိတ် စေတမန်အဖြစ် ခန့်ပေးလို့ ရမလားဗျာ "

လာရောက်သူမှာ အခြားသူ မဟုတ်ဘဲ လီရှမ်းဇီး ပင် ဖြစ်လေတော့သည်။