အခန်း (၁၀၅-၁၀၆)

အခန်း (၁၀၅) အိမ်တိုင်ရာရောက် ပို့ပေးတတ်တယ်၊ ဒီကောင်လေး တော်သားပဲ

"ဘယ်သူပဲဖြစ်ဖြစ် ဂရုမစိုက်ဘူး... လာရဲရင်တော့ အရိုက်ခံရမှာပဲ..."

မြေအောက်ကမ္ဘာဘိုးဘေးသည် သူ၏ ဖူးရောင်နေသော မျက်လုံးများကို ပွတ်သပ်ရင်း မကျေမနပ်ဖြင့် လှောင်ပြောင်လိုက်လေသည်။

"အကယ်၍ ဒီလိုဆိုရင်တော့ တောင်သခင်လင်းရီကို ဆက်မထားတော့ပါဘူး..."

"ဒီကိစ္စ လုံးဝဖြေရှင်းပြီးသွားတဲ့အခါ ကျွန်မရဲ့ရေသူမျိုးနွယ်စုက ကြီးမားတဲ့ ဆုလာဘ်တစ်ခု ပေးအပ်ပါ့မယ်..."

ရေသူဧကရီက လေးနက်စွာ ပြောလိုက်၏။

"သွားကြစို့..."

"မြေအောက်ကမ္ဘာ ဘိုးဘေးကို သွားတွေ့ကြတာပေါ့..."

လင်းရီက တိမ်တိုက်လှေကား ဝင်္ကပါပြားကို ထုတ်ယူလိုက်ပြီး သူ၏ လက်ကို ဝှေ့ယမ်းကာ မဟာမိုးကောင်းကင် လှည့်စားခြင်း စည်းတံဆိပ်ကို သိမ်းဆည်းလိုက်လေသည်။

ထန်ကျင်းကျုံးက အလျင်အမြန် ရှေ့သို့ တိုးလာပြီး သေခြင်းရှင်ခြင်းတံခါး၏ တတိယမြောက်မျိုးဆက် ဘိုးဘေး၏ အစစ်အမှန်ဝိညာဉ်ကို အလုံးလေးတစ်ခုအဖြစ် စုစည်းလိုက်ကာ ဟွေကွမ်သံချပ်ကာနှင့်အတူ တိမ်တိုက်လှေကား ဝင်္ကပါပြားအတွင်းသို့ တစ်ယောက်ပြီးတစ်ယောက် ဝင်ရောက်သွားကြ၏။

ဝှစ်။

အရှေ့ပင်လယ် ကမ်းစပ်သည် မူလကတည်းက မြေအောက်ကမ္ဘာ တားမြစ်နယ်မြေနှင့် သိပ်မဝေးလှချေ။ ထို့အပြင် အဆင့်တစ်ဆယ်တိမ်တိုက်လှေကား ဝင်္ကပါပြားဖြစ်သဖြင့် အတက်အဆင်း အနည်းငယ် ပြုလုပ်ပြီးသည်နှင့် မြေအောက်ကမ္ဘာ တားမြစ်နယ်မြေ၏ အပြင်ဘက်သို့ ရောက်ရှိသွားလေသည်။

"ဒီမြေအောက်ကမ္ဘာ တားမြစ်နယ်မြေက ဘယ်လိုဖြစ်ပြီး ဒီလိုဖြစ်သွားတာလဲ..."

လင်းရီသည် တိမ်တိုက်လှေကား ဝင်္ကပါပြားပေါ်တွင် ရပ်နေရင်း အပေါက်ကြီးတစ်ခု ဖြစ်နေသော မြေအောက်ကမ္ဘာ တားမြစ်နယ်မြေကို ကြည့်ကာ အံ့အားသင့်စွာ မေးလိုက်၏။

"တောင်သခင် မသိလိုက်လို့..."

"အရင်က ကောင်းကင်ဘုံရဲ့အပြစ်ပေးမှုကျဆင်းလာတော့ လီတိရှန်းက အနောက်ဘက်ကနေ ဓားတစ်ချက်နဲ့ ရောက်လာပြီး ကောင်းကင်ဘုံရဲ့အပြစ်ပေးမှုကို ချိုးဖျက်ခဲ့တယ်လေ..."

"ဒီမြေအောက်ကမ္ဘာ တားမြစ်နယ်မြေက လမ်းမှာပိတ်နေလို့ ဘေးထွက်ဆိုးကျိုး ခံလိုက်ရတာပါ..."

ထန်ကျင်းကျုံးက အပြုံးဖြင့် ပြောလိုက်သည်။

"ဒီလိုကိုး..."

လင်းရီက မနေနိုင်ဘဲ ပြုံးလိုက်မိပြီးနောက် မြေအောက်ကမ္ဘာ တားမြစ်နယ်မြေ ရှိရာဘက်သို့ ဦးညွှတ်လိုက်သည်။

"မျိုးဆက်သစ်လင်းရီက မြေအောက်ကမ္ဘာ အရှင်သခင်ကို တွေ့ခွင့်တောင်းပါတယ်..."

"မရဘူး..."

မြေအောက်ကမ္ဘာ ဘိုးဘေးသည် လင်းရီ၏ အသံကိုကြားသည်နှင့် ချက်ချင်း ဒေါသထွက်သွားခဲ့၏။

*အရင်က တာလော့ဂိုဏ်းချုပ် ကြည့်နေလို့ မင်းကို လမ်းငှားပေးခဲ့တာ၊ အခု မင်းက ငါ့တံခါးဝကို ထပ်လာရဲသေးတယ်ပေါ့လေ...ဘယ်လိုမှ မရဘူး*

"စီနီယာ သေချာ ပြန်စဉ်းစားကြည့်ဦးမလား..."

လင်းရီ၏ အမူအရာမှာ ပြောင်းလဲခြင်း မရှိချေ။

"မလိုဘူး..."

မြေအောက်ကမ္ဘာ ဘိုးဘေးက သေချာပေါက် ပြောလိုက်သည်။

"နှမြောစရာပဲ၊ ကြည့်ရတာ စီနီယာ မြေအောက်ကမ္ဘာဆီမှာတော့ အလုပ်ဖြစ်မှာ မဟုတ်ဘူးထင်တယ်..."

"ဒါပေမဲ့ ကိစ္စမရှိပါဘူး၊ ငါ့ရဲ့တာလော့မှာ အမွေအနှစ်တစ်ရာရှိတယ်... စီနီယာ့ရဲ့ အစစ်အမှန်ဝိညာဉ်ကလည်း အကောင်းပကတိ ရှိသေးတယ်၊ စိတ်အာရုံကလည်း ပုံမှန်ပဲဆိုတော့ ဖြေရှင်းဖို့ နည်းလမ်းတစ်ခုခုတော့ သေချာပေါက်ရှိမှာပါ..."

"ဒီမျိုးဆက်သစ် ဂိုဏ်းကို ပြန်ရောက်ရင် ဂိုဏ်းချုပ်ဘိုးဘေးကြီးကို သတင်းပို့လိုက်မယ်... သူတို့က စီနီယာ ပြန်လည်နာလန်ထူလာဖို့ သဘာဝကျကျပဲ ကူညီပေးနိုင်မှာပါ..."

လင်းရီက သေခြင်းရှင်ခြင်းတံခါး၏ တတိယမြောက်မျိုးဆက် ဘိုးဘေးကို ရိုးသားသော အမူအရာဖြင့် ကြည့်ကာ ပြောလိုက်လေသည်။

"ကောင်းပြီလေ..."

"အတိုချုပ်ပြောရရင်... မင်းက ငါ ပြန်လည်နာလန်ထူလာအောင် ကူညီပေးမယ်ဆိုရင် ငါက ရေသူမျိုးနွယ်စုရဲ့ ကျွန်တာအိုစည်းတံဆိပ်ကို ဖြေရှင်းပေးမယ်..."

"မျှတတယ်..."

သေခြင်းရှင်ခြင်းတံခါး၏ တတိယမြောက်မျိုးဆက် ဘိုးဘေးက သေချာပေါက် ပြောလိုက်၏။

“ဘာ…”

ဤစကားကို ကြားသောအခါ မြေအောက်ကမ္ဘာ ဘိုးဘေး၏ စိတ်အခြေအနေမှာ ချက်ချင်းပင် ဆိုးရွားသွားခဲ့သည်။

*တာလော့ဂိုဏ်းချုပ်ကို သွားရှာမယ် ဟုတ်လား...အဲဒီသောက်ကောင်ကို ဘာလို့ သွားရှာရမှာလဲ...သူက သရဲတာအို အကြောင်းမှ မသိတာ*

လောကတွင် ပဉ္စမမြောက် အစွမ်းအထက်ဆုံးသူ ဖြစ်သောကြောင့် မြေအောက်ကမ္ဘာ ဘိုးဘေးတွင် အလွန်ကောင်းမွန်သော ထိုးထွင်းသိမြင်မှုရှိပြီး သေခြင်းရှင်ခြင်းတံခါး၏ တတိယမြောက်မျိုးဆက် ဘိုးဘေး၏ အခြေအနေမှာ ထိုစဉ်က သူ၏ အခြေအနေနှင့် အလွန်တူညီနေကြောင်းကို သဘာဝကျကျပင် မြင်တွေ့နိုင်လေသည်။

သူက သရဲအင်မော်တယ်တစ်ပါးအဖြစ် ကျင့်ကြံရန်အတွက် အလွန်ကောင်းမွန်သော ကိုယ်စားလှယ်လောင်းတစ်ဦးဖြစ်၏။

ဘယ်လိုပဲ ကြည့်ကြည့် သူ့ဆီ ပြန်ရောက်လာတာပဲ မဟုတ်ဘူးလား။

"စီနီယာ၊ စိတ်ချပါ..."

"ဒီမျိုးဆက်သစ်က ဒီကိစ္စကို သေချာပေါက် ဂရုတစိုက် ကိုင်တွယ်ပေးပါ့မယ်..."

လင်းရီက ခေါင်းညိတ်လိုက်ပြီး လူတိုင်းကို ခေါ်ကာ ထွက်ခွာရန် ပြင်လိုက်သည်။

"ဒီဘိုးဘေး အခုလေးတင် သေချာ ပြန်စဉ်းစားလိုက်တယ်..."

"မင်းတို့အားလုံး ဝင်လာလို့ရပြီ..."

ဤအချိန်တွင် မြေအောက်ကမ္ဘာ ဘိုးဘေး၏ အံကြိတ်သံက ထပ်မံ ထွက်ပေါ်လာခဲ့၏။

"အဲ့ဒီလိုဆိုရင်တော့ ကျေးဇူးတင်ပါတယ် စီနီယာ..."

လင်းရီ၏ စိတ်ထဲတွင် လှုပ်ရှားသွားပြီး သူ့ရှေ့ရှိ မြေအောက်ကမ္ဘာ တားမြစ်နယ်မြေကို ကြည့်ကာ ထပ်မံ အခက်တွေ့သွားပြန်လေသည်။

မြေအောက်ကမ္ဘာ တားမြစ်နယ်မြေတွင် အပေါက်ကြီးတစ်ခု ရှိနေသော်လည်း ထိုအပေါက်မှာ ကောင်းကင်ယံတွင် မြင့်မားစွာရှိနေပြီး လီတိရှန်း၏ ဓားဖြင့် ဖောက်ထွင်းခံထားရခြင်း ဖြစ်၏။

အကယ်၍ သူတို့သာ ထိုနေရာကနေဝင်မယ်ဆိုရင် မြေအောက်ကမ္ဘာဘိုးဘေး၏ မျက်နှာကို နင်းပြီး ဝင်သည်နှင့် ဘာကွာတော့မည်နည်း။

ဝှစ်။

လင်းရီ စကားမပြောရသေးမီမှာပင် မြေအောက်ကမ္ဘာ တားမြစ်နယ်မြေအတွင်းရှိ မြေအောက်ကမ္ဘာချီများ ကွဲသွားပြီး လမ်းကြောင်းတစ်ခု ထပ်မံ ဖြစ်ပေါ်လာသည်ကို မြင်တွေ့လိုက်ရသည်။

"အနာဂတ်မှာ တစ်ယောက်ယောက်က စီနီယာ မြေအောက်ကမ္ဘာရဲ့ စိတ်သဘောထား မကောင်းဘူးလို့ ပြောရဲရင် ဒီမျိုးဆက်သစ်က ပထမဆုံး သဘောမတူတဲ့သူ ဖြစ်လိမ့်မယ်..."

လင်းရီက လမ်းကြောင်းကို ကြည့်ကာ အပြုံးဖြင့် ပြောလိုက်ပြီး လူတိုင်းကို လမ်းကြောင်းပေါ်သို့ ခေါ်ဆောင်သွားခဲ့၏။

ခဏအကြာတွင် လင်းရီသည် အလွန် သန့်ရှင်းစင်ကြယ်သော မှေးမှိန်သည့် အင်မော်တယ်အလင်းတန်းတစ်ခုကို မြင်တွေ့လိုက်ရသည်။

အင်မော်တယ်အလင်းတန်းအတွင်း၌။

အင်မော်တယ်နန်းတော်တစ်ခုသည် သေဆုံးခြင်းကင်းမဲ့သော အရှိန်အဝါများဖြင့် တဖျတ်ဖျတ် လင်းလက်နေခဲ့၏။

အင်မော်တယ်နန်းတော်အတွင်း၌ ဆေးဖက်ဝင်အပင်များ စိုက်ပျိုးထားသော လယ်ကွင်းများ ရှိနေလေသည်။

ထိုဆေးဖက်ဝင်အပင် လယ်ကွင်းများတွင် လက်ဖက်ပင် အမျိုးမျိုးဖြင့် ပြည့်နှက်နေ၏။

ရှေးဟောင်းလက်ဖက်ပင်တစ်ပင်၏ အောက်တွင် လက်ဖက်ရည်စားပွဲတစ်ခု ရှိလေသည်။

လက်ဖက်ရည်စားပွဲရှေ့တွင် အဘိုးအိုတစ်ဦး ထိုင်နေပြီး ဝိညာဉ်စမ်းရေဖြင့် လက်ဖက်ရည် ဖျော်နေခဲ့၏။

"စီနီယာ့ရဲ့နေရာက တကယ့်ကို ထူးခြားတဲ့ နေရာလေးပဲ..."

လင်းရီသည် လူတိုင်းကို မြေအောက်ကမ္ဘာ ဘိုးဘေးရှိရာသို့ ခေါ်ဆောင်သွားခဲ့ပြီး အသက်ရှူလိုက်တိုင်း မွှေးကြိုင်သော ရနံ့များက လေထဲတွင် ပျံ့နှံ့နေကာ နှလုံးသားနှင့် စိတ်ဝိညာဉ်ကို လန်းဆန်းသွားစေခဲ့သည်။

"ဒါက သဘာဝပဲလေ..."

မြေအောက်ကမ္ဘာ ဘိုးဘေးက အတင်းအကျပ်ပြုံးကာ ပြောလိုက်ပြီး သူ၏ အကြည့်များက ထန်ကျင်းကျုံးအပေါ်သို့ သိမ်မွေ့စွာ ရောက်ရှိသွားခဲ့၏။

*ဒီကောင်စုတ်လေးက အရင်တုန်းက ဒီ ဘိုးဘေးကို ယင်နဲ့ယန် သဘောတရားတွေနဲ့ အများကြီး စော်ကားခဲ့တာပဲ... သူ့ကို ရိုက်ပြီး ဒေါသဖြေဖို့ အခွင့်အရေးတစ်ခု ရှာရမယ်*

ဤအချိန်တွင် ထန်ကျင်းကျုံးမှာ သူ ပစ်မှတ်ထားခံနေရမှန်းမသိဘဲ သူ၏ ဘိုးဘေး၏ အစစ်အမှန်ဝိညာဉ်ကို လေးစားစွာဖြင့် ကိုင်ဆောင်ထားသည်။

"ထိုင်..."

မြေအောက်ကမ္ဘာဘိုးဘေးက သူ၏ မျက်နှာချင်းဆိုင်ရှိ ကုလားထိုင်ကို ညွှန်ပြလိုက်၏။

"ကျေးဇူးတင်ပါတယ် စီနီယာ..."

လင်းရီကလည်း ယဉ်ကျေးမနေဘဲ မြေအောက်ကမ္ဘာ ဘိုးဘေး၏ ရှေ့တွင် ထိုင်လိုက်သည်။

မြေအောက်ကမ္ဘာဘိုးဘေးက လင်းရီအား လက်ဖက်ရည်တစ်ခွက် ငှဲ့ပေးလိုက်ရာ မွှေးကြိုင်သော ရနံ့တစ်ခု လေနှင့်အတူ ထွက်ပေါ်လာပြီး သူ၏ အဆုတ်ထဲသို့ တိုက်ရိုက် ဝင်ရောက်သွားခဲ့သည်။

လင်းရီက လက်ဖက်ရည်ခွက်ကို ကိုင်ကာ တစ်ကျိုက် သောက်လိုက်၏။

မှေးမှိန်သော ရနံ့တစ်ခုက သူ၏စိတ်ဝိညာဉ်ပင်လယ်ဆီသို့ လိမ့်ဝင်သွားသည်ကို ခံစားလိုက်ရပြီး ၎င်းက သူ၏ နတ်ဘုရားစိတ်ဝိညာဉ်ကို အဆပေါင်းများစွာ ပိုမို အစွမ်းထက်လာစေခဲ့သည်။

"ဒီလက်ဖက်ရည်က အံ့မခန်းပဲ၊ နတ်ဘုရား စိတ်ဝိညာဉ်ကို အားဖြည့်ပေးနိုင်တယ်..."

လင်းရီက ချီးကျူးလိုက်၏။

"ဒါ သဘာဝပဲလေ..."

"ဒီလက်ဖက်ရည်ကို ဝိညာဉ်သုံးပါး လက်ဖက်ရည်လို့ ခေါ်တယ်..."

"သူက ဝိညာဉ်ကို အားဖြည့်ပေးပြီး စိတ်ကို တည်ငြိမ်စေနိုင်တယ်... ငါ့နေရာကလွဲရင် တခြားဘယ်သူမှ မသောက်နိုင်ဘူး..."

လက်ဖက်ရည်နှင့် ပတ်သက်လာလျှင် မြေအောက်ကမ္ဘာ ဘိုးဘေးတွင် ယုံကြည်မှုအပြည့် ရှိနေလေသည်။

စွမ်းအားအရ သူသည် လောကတွင် ပဉ္စမမြောက်ဖြစ်၏။

သို့သော် လက်ဖက်ရည်ဖျော်စပ်ခြင်း အနုပညာနှင့် ပတ်သက်လာလျှင် သူက ဒုတိယဟုဆိုပါက မည်သူကမျှ ပထမဟု မပြောရဲကြချေ။

"လက်ဖက်ရည်ထက်စာရင် ဒီမျိုးဆက်သစ်က ဝိုင်ကို ပိုကြိုက်တယ်..."

"ဒီမျိုးဆက်သစ်က စီနီယာ့ရဲ့ လက်ဖက်ရည်ကို သောက်ပြီးပြီဆိုတော့ စီနီယာရော ဒီမျိုးဆက်သစ်ရဲ့ ဝိုင်ကို မြည်းစမ်းကြည့်ချင်လား..."

လင်းရီက အပြုံးဖြင့် ပြောလိုက်ပြီး သံသယကင်းစင်အိုးနှင့် သံသယကင်းစင်ခွက်တို့ကို ထုတ်ယူကာ မြေအောက်ကမ္ဘာဘိုးဘေးအတွက် ကိုယ်တိုင်ကိုယ်ကျ ဝိုင်တစ်ခွက် ငှဲ့ပေးလိုက်လေသည်။

မှန်ထဲကပန်း၊ ရေထဲကလဝိုင်ခွက်ထဲသို့ ရောက်သွားသည်နှင့် တာအိုစည်းချက်လှိုင်းလုံးတစ်ခု ချက်ချင်း ထွက်ပေါ်လာရာ မြေအောက်ကမ္ဘာ ဘိုးဘေး၏ မျက်နှာပေါ်တွင် အံ့အားသင့်သည့် အမူအရာ ထွက်ပေါ်လာစေခဲ့၏။

"ဒါက မှန်ထဲကပန်း၊ ရေထဲကလဝိုင် လား..."

"အဲဒါက လူတွေကို ဉာဏ်အလင်းပွင့်အောင် ကူညီပေးနိုင်တယ်ဆို..."

မြေအောက်ကမ္ဘာဘိုးဘေးသသည် သူ့ရှေ့ရှိ မှန်ထဲကပန်း၊ ရေထဲကလဝိုင်ကို ကြည့်လိုက်ရာ သူ၏အမူအရာက အနည်းငယ် နူးညံ့သွားခဲ့လေသည်။

*အိမ်တိုင်ရာရောက် ပို့ပေးတတ်တယ်ဆိုတော့ ဒီကောင်လေးကို ဆက်ဆံလို့ရသားပဲ…*

"အဲဒါက လူတွေကို ဉာဏ်အလင်းပွင့်အောင် ကူညီပေးနိုင်တယ် ဟုတ်လား..."

သေခြင်းရှင်ခြင်းတံခါး၏ တတိယမြောက်မျိုးဆက် ဘိုးဘေးသည်လည်း အံ့အားသင့်စွာ အော်ဟစ်လိုက်မိ၏။

*ခေတ်ကြီးက ဒီလောက်မြန်မြန် တိုးတက်လာပြီလား…ဒီလို ကောင်းကင်အလိုကို ဆန့်ကျင်တဲ့ ပစ္စည်းမျိုးတောင် ထွက်ပေါ်လာပြီလား…*

"ဘိုးဘေး... ခင်ဗျား မသိလို့ပါ..."

"တာလော့အင်မော်တယ်ဂိုဏ်းက အခု အထွတ်အထိပ်ကို ရောက်နေပြီလေ.."

"တောင်တစ်ရာနဲ့ တာအိုတစ်ရာက ဝိညာဉ်ကုန်းမြေမှာ ပြိုင်ဘက်ကင်းပဲ..."

"တောင်သခင်လင်းရီက သူ့ရဲ့ကိုယ်ပိုင်တောင်ကို တည်ထောင်ပြီး သူ့ရဲ့ကိုယ်ပိုင် ဝိုင်တာအိုကို ဖွင့်လှစ်ခဲ့တာ..."

"ဒီမှန်ထဲကပန်း၊ ရေထဲကလဝိုင်က အခုဆို ဝိုင်တောင်ရဲ့ အမှတ်တံဆိပ် ဖြစ်နေပြီး ဝိုင်တောင်ပွဲတော်ကြီးမှာ တာလော့ဂိုဏ်းချုပ်နဲ့ လောကသခင်အားခုံးဆိုတဲ့ အမြင့်ဆုံးကျွမ်းကျင်သူ နှစ်ယောက်ကိုတောင် ဉာဏ်အလင်းပွင့်စေပြီး သူတို့ရဲ့ ကိုယ်ပိုင် မဟာပြီးပြည့်စုံခြင်းကို သိမြင်သွားစေခဲ့တယ်လေ..."

"ဒီတပည့်လည်း အရင်က တစ်ခွက်သောက်ခွင့်ရခဲ့ပြီး ဉာဏ်အလင်းပွင့်ခြင်း အခြေအနေမှာ လက်နက်ကပ်ဘေးကို ဖြတ်ကျော်နိုင်ခဲ့တယ်... အကျိုးသက်ရောက်မှုက တကယ်ကို အံ့မခန်းပဲ..."

ထန်ကျင်းကျုံးက အလျင်အမြန် ပြောလိုက်သည်။

"အာ..."

"အဲဒီလောက်တောင် ကောင်းတာလား..."

"ဒါဆို ဒီဘိုးဘေးကိုလည်း တစ်ခွက်လောက် ပေးစမ်းပါ..."

သေခြင်းရှင်ခြင်းတံခါး၏ တတိယမြောက်မျိုးဆက် ဘိုးဘေးက စိတ်မရှည်စွာဖြင့် ပြောလိုက်၏။

"စီနီယာ... စီနီယာက အစစ်အမှန်ဝိညာဉ်အခြေအနေနဲ့တောင် သောက်လို့ရသေးတာလား..."

လင်းရီက အံ့အားသင့်စွာ မေးလိုက်သည်။

"ဘာလို့ မရရမှာလဲ..."

သေခြင်းရှင်ခြင်းတံခါး၏ တတိယမြောက်မျိုးဆက် ဘိုးဘေး၏ အစစ်အမှန်ဝိညာဉ် ပျံသန်းထွက်ပေါ်လာပြီး ပုံပျက်နေသော ဝေဝါးသည့် လူ့ပုံသဏ္ဍာန်တစ်ခုအဖြစ် ပြောင်းလဲသွားကာ လင်းရီ၏ ဘေးတွင် ထိုင်လိုက်သည်။

"ကောင်းပြီလေ..."

လင်းရီက နောက်ထပ် သံသယကင်းစင်ခွက် တစ်ခွက်ကို ထုတ်ယူပြီး သေခြင်းရှင်ခြင်းတံခါး၏ တတိယမြောက်မျိုးဆက် ဘိုးဘေးအတွက်လည်း တစ်ခွက် ငှဲ့ပေးလိုက်၏။

သေခြင်းရှင်ခြင်းတံခါး၏ တတိယမြောက်မျိုးဆက် ဘိုးဘေးသည် မှန်ထဲကပန်း၊ ရေထဲကလဝိုင်ကို တစ်ကျိုက်တည်း သောက်ချလိုက်ရာ သူ၏ အစစ်အမှန်ဝိညာဉ်က မြည်ဟည်းသွားပြီး တာအိုစည်းချက် အလွှာပေါင်းများစွာ ပျံ့နှံ့ထွက်ပေါ်လာကာ ဉာဏ်အလင်းပွင့်ခြင်းနှင့် တူသော်လည်း ဉာဏ်အလင်းပွင့်ခြင်း အတိအကျ မဟုတ်သော အခြေအနေတစ်ခုသို့ ရောက်ရှိသွားသည်။

"မင်းတို့ ဘာလို့ ဒီကိုရောက်နေလဲဆိုတာကို ဒီဘိုးဘေးသိတယ်..."

မြေအောက်ကမ္ဘာ ဘိုးဘေးက သေခြင်းရှင်ခြင်းတံခါး၏ တတိယမြောက်မျိုးဆက် ဘိုးဘေး၏ အစစ်အမှန်ဝိညာဉ်ကို နားလည်သဘောပေါက်ဟန်ဖြင့် ကြည့်လိုက်၏။

"စီနီယာ... အဲဒါကို ဖြစ်မြောက်အောင် လုပ်ပေးနိုင်မလား..."

လင်းရီက ပြောလိုက်သည်။

"သရဲကျင့်ကြံခြင်းရဲ့ တာအိုက ယင်မှာကျော်လွန်ပြီး မထင်ရှားတဲ့ နတ်ဘုရားပုံရိပ်ရှိတယ်... သံသရာရဲ့နာကျင်မှုတွေကို မခံစားရပေမယ့် ၎င်းက ပုံသဏ္ဍာန် မရှိပေမယ့် ပုံသဏ္ဍာန် မရှိတာလည်း မဟုတ်ဘူး... ပုံရိပ်မရှိပေမယ့် ပုံရိပ် မရှိတာလည်း မဟုတ်ဘူး... ထင်ယောင်ထင်မှားဖြစ်ပေမယ့် နက်နဲတာတော့ မဟုတ်ဘူး... ယင်ဖြစ်ပေမယ့် ယန်တော့မဟုတ်ဘူး... အင်မော်တယ်ဆိုတဲ့ နာမည်တော့ ရှိပေမယ့် အင်မော်တယ် အစစ်အမှန်တော့ မဟုတ်ဘူး..."

"သူ့ကို ငါ့ရဲ့သရဲတာအိုထဲ တကယ် ဝင်စေချင်တာလား..."

မြေအောက်ကမ္ဘာ ဘိုးဘေးက လင်းရီကိုကြည့်ကာ တစ်စုံတစ်ခုကို အရိပ်အမြွက် ပြောလိုက်သည်။

အခန်း (၁၀၆) သရဲအင်မော်တယ်တွေက အောက်ကျတယ် ဟုတ်လား... ငါတို့ လက်မခံဘူး!

"အင်မော်တယ်ဆိုတဲ့ နာမည်တော့ ရှိပေမယ့် အင်မော်တယ် အစစ်အမှန်တော့ မဟုတ်ဘူး ဟုတ်လား..."

လင်းရီ၏ နှလုံးသားထဲတွင် လှုပ်ရှားသွားခဲ့၏။

"မှန်တယ်..."

"သရဲတာအိုထဲ ဝင်သွားပြီဆိုတာနဲ့ အင်မော်တယ်ဖြစ်လာပြီး ဖျက်ဆီးလို့ မရနိုင်တော့ဘူး၊ သက်တမ်းရဲ့ ကန့်သတ်ချက်လည်း မရှိတော့ဘူး..."

"ပေးဆပ်ရမယ့် တန်ဖိုးကတော့ ငါတို့ သရဲ အင်မော်တယ်တွေက ကောင်းကင်တံခါးထဲကို ပြန်ဝင်ခွင့်မရတော့ဘူး..."

မြေအောက်ကမ္ဘာ ဘိုးဘေးက လင်းရီကို အဓိပ္ပာယ်ပါပါ ကြည့်လိုက်လေသည်။

"ဒီလိုကိုး..."

လင်းရီက ချက်ချင်း နားလည်သွားခဲ့၏။

မြေအောက်ကမ္ဘာ ဘိုးဘေးသည် ပဉ္စမမြောက်နေရာတွင် ပြိုင်ဘက်ကင်းဖြစ်ပြီး၊ အံ့မခန်းပါရမီများရှိကာ ရှည်လျားသော နှစ်ပေါင်းများစွာ အသက်ရှင်နေထိုင်ခဲ့သော်လည်း တစ်ခါမျှ ကပ်ဘေးချိုးဖျက်ခြင်းနယ်ပယ်သို့ မဝင်ရောက်ခဲ့ခြင်းမှာ အံ့ဩစရာ မဟုတ်ချေ။

တကယ်တော့ မြေအောက်ကမ္ဘာ ဘိုးဘေးက ကပ်ဘေးချိုးဖျက်ခြင်းနယ်ပယ်သို့ မဝင်ရောက်ချင်၍ မဟုတ်ဘဲ မဝင်ရောက်နိုင်ခဲ့ခြင်းပင် ဖြစ်သည်။

"သရဲအင်မော်တယ်တွေရဲ့ တာအိုက အင်မော်တယ်တာအိုတွေထဲမှာ အဆင့်နိမ့်တာအိုတစ်ခုပဲလေ..."

မြေအောက်ကမ္ဘာ ဘိုးဘေးက ပခုံးတွန့်ကာ ပြောလိုက်၏။

"ဒီအဘိုးကြီးကတော့ ကပ်ဘေးချိုးဖျက်ခြင်းနယ်ပယ်ကို မဝင်ရောက်နိုင်တဲ့ တာအို ရှိတယ်ဆိုတာကို တစ်ခါမှ မယုံခဲ့ဘူး..."

ဤအချိန်တွင် သေခြင်းရှင်ခြင်းတံခါး၏ တတိယမြောက်မျိုးဆက် ဘိုးဘေးက ဝင်ပြောလိုက်လေသည်။

"မင်းက ဘာသိလို့လဲ..."

"ကောင်းကင်တံခါးဆိုတာ တာအိုရဲ့ လူဝင်စားခြင်းတစ်ခုပဲ... သရဲကျင့်ကြံသူတွေရဲ့ တာအိုကတော့ တာအိုနဲ့ သီးခြားတည်ရှိနေတာ..."

"အဲဒါက ကောင်းကင်တံခါးရဲ့ချီကို အကြောက်ဆုံးပဲ..."

မြေအောက်ကမ္ဘာဘိုးဘေးက လှောင်ပြောင်လိုက်၏။

"ကောင်းကင်တံခါးပဲ မဟုတ်ဘူးလား..."

"ဘာကြောက်စရာရှိလို့လဲ..."

ကောင်းကင်တံခါးအကြောင်း ပြောလာသောအခါ သေခြင်းရှင်ခြင်းတံခါး၏ တတိယမြောက်မျိုးဆက် ဘိုးဘေးက အလွန် ဂုဏ်ယူနေခဲ့သည်။

"ကောင်းကင်တံခါးကို မကြောက်ဘူး ဟုတ်လား..."

"ဘယ်သူက ကောင်းကင်တံခါးကို မကြောက်ဘဲ နေနိုင်မှာလဲ..."

မြေအောက်ကမ္ဘာဘိုးဘေးက မျက်မှောင်ကြုတ်သွားခဲ့၏။

"စီနီယာမြေအောက်ကမ္ဘာ..."

"ဒါက သေခြင်းရှင်ခြင်းတံခါးရဲ့ တတိယမြောက်မျိုးဆက် ဘိုးဘေးပါ..."

လင်းရီက အပြုံးဖြင့် ပြောလိုက်သည်။

"အော်... မင်းက ကောင်းကင်တံခါးကို စိန်ခေါ်ခဲ့တဲ့ အဲဒီလူမိုက်ကြီးကိုး..."

မြေအောက်ကမ္ဘာဘိုးဘေးက အံ့အားသင့်သွားခဲ့၏။

သေခြင်းရှင်ခြင်းတံခါး၏ တတိယမြောက်မျိုးဆက် ဘိုးဘေး၏ နာမည်ဂုဏ်သတင်းမှာ အလွန် ကြီးမားလှပေသည်။

သူသည် အင်္သချေဂိုဏ်းကို အချိန်တိုင်းအတွက် လင်းထိန်သွားစေခဲ့သည်ဟုဆိုလျှင် ပိုပြောရာ မရောက်ချေ။

သေမင်းကို ဖိတ်ခေါ်ရာတွင် ဤမျှ ကျွမ်းကျင်သောသူကို သူ တစ်ခါမျှ မမြင်ဖူးခဲ့ချေ။ သူသည် ဝိညာဉ်ကုန်းမြေရှိ ကျင့်ကြံသူအားလုံးအတွက် ဆန့်ကျင်ဘက် ဥပမာတစ်ခု ဖြစ်လေသည်။

သူ၏ နာမည်ကျော်ကြားမှုမှာ သူ၏ ဆရာသခင် သေခြင်းရှင်ခြင်းတာအိုကျင့်ကြံသူထက်ပင် ပိုမိုကြီးမားသေး၏။

"ဘာလူမိုက်ကြီးလဲ... ဒီအဘိုးကြီးရဲ့ စိတ်အခြေအနေက ပြိုင်ဘက်ကင်းပဲကွ..."

"ဝိညာဉ်ကုန်းမြေမှာ ရှိသမျှကပ်ဘေးတိုင်းကို ငါ စမ်းကြည့်ပြီးပြီ..."

"လာလိုက်သွားလိုက်နဲ့ အင်မော်တယ်ဖြစ်ပြီး ဖျက်ဆီးလို့ မရဘူး..."

"အကယ်၍ ငါသာ ကောင်းကင်တံခါးကို မစိန်ခေါ်ခဲ့ဘူးဆိုရင် ဘဝမှာ ကြီးမားတဲ့ နောင်တတစ်ခု ဖြစ်သွားမှာပေါ့..."

"ငါက လူ့လောကမှာ ပြိုင်ဘက်ကင်းပဲ... အကယ်၍ ကောင်းကင်ကြီးနဲ့ မတိုက်ခိုက်ရင် ငါ ဘယ်သူနဲ့ သွားတိုက်ခိုက်ရမှာလဲ..."

သေခြင်းရှင်ခြင်းတံခါး၏ တတိယမြောက်မျိုးဆက် ဘိုးဘေးက ယုံကြည်ချက် အပြည့်ဖြင့် ပြောလိုက်လေသည်။

အကယ်၍ နောက်ထပ် အခွင့်အရေး တစ်ကြိမ်သာရမည်ဆိုလျှင် သူ ထပ်မံ စိန်ခေါ်ဦးမည်သာ ဖြစ်၏။

သေသည်အထိ တိုက်ခိုက်မည်။

သေခြင်းရှင်ခြင်းတံခါးမှ ကျင့်ကြံသူများသည် တစ်သက်လုံး ချောမောခန့်ညားနေကြလေသည်။

သေခြင်းဆိုသည်မှာ အဘယ်နည်း။

"မိုက်တယ်ကွာ..."

မြေအောက်ကမ္ဘာ ဘိုးဘေးသည် သေခြင်းရှင်ခြင်းတံခါး၏ တတိယမြောက်မျိုးဆက် ဘိုးဘေးကို ရိုးသားစွာဖြင့် လက်မထောင်ပြလိုက်၏။

"ဒီအဘိုးကြီးက သေခြင်းရှင်ခြင်းလမ်းစဉ်ကို မဟာပြီးပြည့်စုံခြင်းအထိ ကျင့်ကြံပြီးပြီဆိုတော့ အစကနေ ပြန်ကျင့်ဖို့က အဓိပ္ပာယ်မရှိတော့ဘူး..."

"သရဲအင်မော်တယ်တွေရဲ့ တာအိုက အဆင့်နိမ့်တာအိုဖြစ်ပြီး ကောင်းကင်တံခါးထဲကို ဝင်ခွင့်မရှိဘူးလို့ မင်း ပြောခဲ့တယ် မဟုတ်လား..."

"ဒီအဘိုးကြီးကတော့ အဲဒီ အဆိုးအညစ်တွေကို လုံးဝမယုံဘူးကွ..."

"ငါက သရဲအင်မော်တယ်တစ်ပါးအနေနဲ့ တာအိုကို အောင်မြင်အောင် လုပ်ပြမယ်လို့ ဆုံးဖြတ်ထားတယ်..."

သေခြင်းရှင်ခြင်းတံခါး၏ တတိယမြောက်မျိုးဆက် ဘိုးဘေးက စိတ်အားထက်သန်နေခဲ့၏။

*ဒီလောကမှာ သူ မလုပ်ရဲတဲ့အရာဆိုတာ မရှိဘူး*

"ကောင်းတယ်၊ ကောင်းတယ်၊ ကောင်းတယ်..."

"မင်း အဲဒီလိုပြောမှတော့ ဒီဘိုးဘေးကလည်း အဖော်ရလို့ ဝမ်းသာပါတယ်..."

"ငါ့ရဲ့ သရဲအင်မော်တယ်တွေက တာအိုကို မအောင်မြင်နိုင်ဘူးလို့ ဘယ်သူပြောလဲ..."

မြေအောက်ကမ္ဘာ ဘိုးဘေးကလည်း စိတ်အားထက်သန်လာခဲ့လေသည်။

ဤဘိုးဘေးသည် သေခြင်းတရားမှ မွေးဖွားလာခြင်း ဖြစ်၏။

ငရဲမှနေ၍ ကိုယ်ပိုင်အစွမ်းအစဖြင့် ပြန်လည်ရောက်ရှိလာနိုင်ခြင်းက မူလကတည်းက သူ့ကို သေခြင်းရှင်ခြင်းတံခါးအတွက် မျိုးစေ့ကောင်းတစ်ခု ဖြစ်လာစေခဲ့လေသည်။

ယခု သူတို့နှစ်ဦး တွေ့ဆုံသောအခါ နှစ်ပေါင်းများစွာကတည်းက သိကျွမ်းခဲ့သူများကဲ့သို့ ဖြစ်သွားကြလေသည်။

"သူတို့နှစ်ယောက်လုံးကို ဒီမှာ ထားခဲ့လိုက်၊ မင်း သွားလို့ရပြီ..."

မြေအောက်ကမ္ဘာ ဘိုးဘေးက သေခြင်းရှင်ခြင်းတံခါး၏ တတိယမြောက်မျိုးဆက် ဘိုးဘေး၏ အစစ်အမှန်ဝိညာဉ်နှင့် ထန်ကျင်းကျုံးတို့ကို လက်ညှိုးထိုးကာ ပြောလိုက်၏။

"ဟင်... ကျုပ်က ဘာလို့နေခဲ့ရမှာလဲ..."

"ကျုပ်က သရဲတာအိုထဲ ဝင်မှာမှ မဟုတ်တာ..."

ထန်ကျင်းကျုံးက အံ့အားသင့်သွားခဲ့သည်။

"ငါက မင်းကို နေခဲ့လို့ပြောရင် နေခဲ့ပေါ့၊ အဓိပ္ပာယ်မရှိတာတွေ ဘာလို့ လျှောက်ပြောနေတာလဲ..."

မြေအောက်ကမ္ဘာ ဘိုးဘေးက စကားမပြောရသေးမီမှာပင် သေခြင်းရှင်ခြင်းတံခါး၏ တတိယမြောက်မျိုးဆက် ဘိုးဘေးက စိတ်မရှည်စွာဖြင့် အရင် ဝင်ပြောလိုက်လေသည်။

*မင်း ခုနက ငါ့ကို ရိုက်ခဲ့တယ် မဟုတ်လား*

*အဲဒီ အချက်သုံးထောင်ကို ပြန်မရိုက်ရသေးခင် ထွက်သွားဖို့တော့ မစဉ်းစားနဲ့*

"မှန်တယ်..."

မြေအောက်ကမ္ဘာ ဘိုးဘေးကလည်း တိုးတိုးလေး ဝင်ပြောလိုက်၏။

*မင်းက မြေအောက်ကမ္ဘာ တားမြစ်နယ်မြေထဲကို ဝင်လာပြီးရင် လွတ်လွတ်လပ်လပ် ပြန်ထွက်သွားလို့ ရမယ် ထင်နေတာလား*

*အိပ်မက်မက်နေလိုက်*

"ဒါဆို ကျုပ် နေခဲ့ရမှာလား..."

ထန်ကျင်းကျုံး၏ ပါးစပ်က တွန့်သွားပြီး လင်းရီကို အကူအညီ တောင်းသည့် အကြည့်ဖြင့် ကြည့်လိုက်လေသည်။

"နေခဲ့လိုက်ပါ..."

"စီနီယာနှစ်ယောက်က လူစားတာမှ မဟုတ်တာ..."

လင်းရီက တောက်ပစွာ ပြုံးလိုက်၏။

ဤစကားကို ကြားသောအခါ ထန်ကျင်းကျုံးခမျာ ငိုရမလို ရယ်ရမလို အပြုံးတစ်ခုကို မဖော်ပြဘဲ မနေနိုင်တော့ချေ။

"စီနီယာ..."

"စီနီယာ့ရဲ့ကိစ္စလည်း ပြေလည်သွားပြီဆိုတော့ ကျွန်တာအိုစည်းတံဆိပ်ကို ချိုးဖျက်မယ့် နည်းလမ်းကို ဒီမျိုးဆက်သစ်ကို လက်ဆင့်ကမ်းပေးဖို့ အချိန်တန်ပြီ မဟုတ်လား..."

လင်းရီက အပြုံးဖြင့် ပြောလိုက်သည်။

"အင်း..."

"ခေါင်းလောင်းကို ချည်တဲ့သူကပဲ ပြန်ဖြုတ်ရမယ်ဆိုတဲ့ စကားပုံ ရှိတယ်လေ..."

"အဲ့ဒီကျွန်တာအိုစည်းတံဆိပ်ကို ချိုးဖျက်မယ့် နည်းလမ်းကလည်း မင်္ဂလာဝတ်စုံ အင်မော်တယ်ဝင်္ကပါအပေါ်မှာပဲ မှီခိုနေရတယ်..."

သေခြင်းရှင်ခြင်းတံခါး၏ တတိယမြောက်မျိုးဆက် ဘိုးဘေးက အပြုံးဖြင့် ပြောလိုက်၏။

"မင်္ဂလာဝတ်စုံအင်မော်တယ်ဝင်္ကပါအပေါ်မှာ မှီခိုရတယ် ဟုတ်လား..."

လင်းရီက အံ့အားသင့်သွားခဲ့သည်။

"မှန်တယ်..."

"မင်းက ဘာလို့ ဒီလောက်တောင် ခေါင်းမာနေရတာလဲ..."

"အရာအားလုံးက ပြောင်းလွယ်ပြင်လွယ် ရှိဖို့ လိုတယ်လေ..."

"မင်္ဂလာဝတ်စုံ အင်မော်တယ်ဝင်္ကပါက အရာအားလုံးကို ပြောင်းရွှေ့ပေးနိုင်တယ်၊ အဲဒီအထဲမှာ သဘာဝကျကျပဲ ကျွန်တာအိုစည်းတံဆိပ်လည်း ပါဝင်တာပေါ့..."

"အဲဒီတုန်းက ဒီအဘိုးကြီးက ကျွန်တာအိုစည်းတံဆိပ်ကို အရင် စမ်းကြည့်ပြီးတော့ မင်္ဂလာဝတ်စုံ အင်မော်တယ်ဝင်္ကပါကို ထပ်စမ်းကြည့်ခဲ့တာ... မင်္ဂလာဝတ်စုံ မဖြစ်သွားတဲ့အပြင် ကျွန်တာအိုစည်းတံဆိပ်ကို အဲဒီတုန်းက အင်္သချေဂိုဏ်းရဲ့ ဂိုဏ်းချုပ်ဆီကိုပါ ပြောင်းရွှေ့ပေးနိုင်ခဲ့လိမ့်မယ်လို့ ငါ လုံးဝ မထင်ထားခဲ့ဘူး..."

"ငါက အင်္သချေဂိုဏ်းရဲ့ လိုက်လံ ဖမ်းဆီးတာကို နှစ်ပေါင်းများစွာ ခံခဲ့ရပေမယ့် အဲဒါက တကယ့်ကို တန်ပါတယ်..."

"ငါက ကျွန်တစ်ယောက်ကို အလကားရလိုက်တဲ့အပြင် အခုဒီနည်းလမ်းနဲ့ အခြေအနေကိုတောင် ပြောင်းပြန်လှန်ပစ်နိုင်ပြီ..."

သေခြင်းရှင်ခြင်းတံခါး၏ တတိယမြောက် မျိုးဆက် ဘိုးဘေးက အလွန် ဂုဏ်ယူစွာဖြင့် ပြောလိုက်လေသည်။

လင်းရီနှင့် အခြားသူများအားလုံးက ဤစကားကို ကြားသောအခါ ကြောင်သွားကြ၏။

မင်းလို အနှောင့်အယှက် ပေးနိုင်စွမ်းရှိတဲ့သူ တစ်ယောက်တည်းကသာ ကျွန်တာအိုစည်းတံဆိပ်နဲ့ မင်္ဂလာဝတ်စုံ အင်မော်တယ်ဝင်္ကပါ နှစ်ခုလုံးကို တစ်ပြိုင်နက်တည်း ပိုင်ဆိုင်ထားမှာလို့ သူတို့ စိတ်ထဲကနေ တွေးလိုက်ကြ၏။

ပုံမှန်လူတွေကတော့ ထိုအရာတွေကို စမ်းကြည့်ဖို့ နေနေသာသာ စဉ်းစားရုံနဲ့တင် ရူးသွားလိမ့်မည်။

ပြောင်းလွယ်ပြင်လွယ်ရှိတာကို အသာထား။

"ဒီနည်းလမ်းက မင်္ဂလာဝတ်စုံ အင်မော်တယ်ဝင်္ကပါကို အခြေခံထားပြီး 'လီတိုင်ထောင်ကျန်း' (ဘေးအန္တရာယ်ကနေ ရှောင်လွှဲဖို့ ကိုယ်စားလှယ် အသုံးပြုခြင်း) လို့ ခေါ်တယ်..."

"ရေသူနိုင်ငံတော်မှာ အဆင်သင့်ဖြစ်နေတဲ့ မင်္ဂလာဝတ်စုံ အင်မော်တယ်ဝင်္ကပါ ရှိပြီးသားပဲ..."

"မင်းက အနည်းငယ် ပြုပြင်ပြောင်းလဲလိုက်ရုံနဲ့ အဲ့ဒါကို 'လီတိုင်ထောင်ကျန်း' ဝင်္ကပါ းအဖြစ် ပြောင်းလဲပစ်လို့ရတယ်..."

"အဲဒီအချိန်ကျရင် အင်မော်တယ် သန္ဓေသားဝင်္ကပါပေါ်မှာ တစ်ခုခုကိုရှာပြီး တင်ထားလိုက်ရုံနဲ့ ကျွန်တာအိုစည်းတံဆိပ်ကို ပြောင်းရွှေ့ပစ်လို့ရပြီ..."

သေခြင်းရှင်ခြင်းတံခါး၏ တတိယမြောက်မျိုးဆက် ဘိုးဘေး၏ အစစ်အမှန်ဝိညာဉ် တုန်ခါသွားသည်နှင့်အမျှ ကျမ်းစာလိပ် တစ်ခုသည် လင်းရီ၏ နားထဲသို့ ရောက်ရှိသွားခဲ့ပြီ ဖြစ်၏။

လင်းရီက ၎င်းကို တိတ်တဆိတ် မှတ်သားလိုက်ပြီး သေချာစွာ နားလည်သဘောပေါက်အောင် ကြိုးစားလိုက်သည်။ ခဏအကြာတွင် သူ ထရပ်ကာ ဦးညွှတ်လိုက်ပြီး "ဒီ မျိုးဆက်သစ်က ရေသူမျိုးနွယ်စုကိုယ်စား စီနီယာ့ကို ကျေးဇူးတင်ပါတယ်..." ဟု ပြောလိုက်လေသည်။

"ငါတို့လိုအပ်တာတွေကို ငါတို့ ရလိုက်ရုံပါပဲ..."

သေခြင်းရှင်ခြင်းတံခါး၏ တတိယမြောက်မျိုးဆက် ဘိုးဘေးက ဂရုမစိုက်ဟန်ဖြင့် ပြောလိုက်၏။

"ဒီမျိုးဆက်သစ် ခွင့်ပြုပါဦး..."

လင်းရီက ခေါင်းညိတ်လိုက်ပြီး ဟွေကွမ်ကို ခေါ်ကာ တိမ်တိုက်လှေကား ဝင်္ကပါပြား ပေါ်သို့ နောက်တစ်ကြိမ် တက်သွားခဲ့သည်။ လျှပ်တစ်ပြက်အတွင်းမှာပင် သူ ပျောက်ကွယ်သွားခဲ့၏။

"အား..."

လင်းရီထွက်သွားသည်နှင့် တစ်ပြိုင်နက် မြေအောက်ကမ္ဘာ တားမြစ်နယ်မြေ အတွင်းမှ ထန်ကျင်းကျုံး၏ အလွန် စူးရှသော အော်ဟစ်သံတစ်ခု ထွက်ပေါ်လာခဲ့လေသည်။

လင်းရီသည် အဝေးမှ အော်ဟစ်သံများကို နားထောင်ရင်း သူ၏ မျက်နှာပေါ်တွင် အပြုံးတစ်ခု ထွက်ပေါ်လာခဲ့၏။

"အကြီးအကဲထန်ရဲ့ ပါရမီက ကန့်သတ်ချက်ရှိတယ်... ကောင်းကင်အလိုကို ဆန့်ကျင်တဲ့ ကံကောင်းမှုမျိုး မရှိဘဲနဲ့တော့ ကပ်ဘေးချိုးဖျက်ခြင်းနယ်ပယ် ပြီးပြည့်စုံခြင်းဆိုတာ သူ့အတွက် အမြင့်ဆုံး ကန့်သတ်ချက်ပဲ..."

"အခု ဒီမြေအောက်ကမ္ဘာ ဘိုးဘေးနဲ့ သေခြင်းရှင်ခြင်းတံခါးရဲ့ တတိယမြောက် မျိုးဆက် ဘိုးဘေးတို့က အကြီးအကဲထန် ရဲ့ ကံကောင်းမှုတွေပဲ..."

လင်းရီက မှေးမှိန်စွာ ပြုံးလိုက်ပြီး ဆက်လက် နှောင့်နှေးမနေတော့ဘဲ ချက်ချင်း ထွက်ခွာသွားခဲ့လေသည်။

ဝှစ်။

လင်းရီ အရှေ့ပင်လယ်ကမ်းစပ်သို့ ပြန်ရောက်သည်နှင့် တစ်ပြိုင်နက် အရှေ့ဘက် မိုးကုပ်စက်ဝိုင်းမှ ခရမ်းရောင်ချီ များ ဆက်တိုက်ရောက်ရှိလာသည်ကို မြင်တွေ့လိုက်ရ၏။

ခရမ်းရောင်ချီများအတွင်း၌ ကျိုးယွင်သည် သူ၏ ဓားကို စီးနင်းကာ ရောက်ရှိလာပြီး ကျိုးယွင်၏ အနောက်တွင် တာအိုကျင့်ကြံသူနှစ်ဦး လိုက်ပါလာခဲ့သည်။

တာအိုကျင့်ကြံသူနှစ်ဦးအနက် တစ်ဦးမှာ သာမန်ရုပ်ရည်ရှိသော်လည်း ထူးခြားသော အမူအကျင့် ရှိလေသည်။ လင်းရီက သူ၏ ချီကို အာရုံခံလိုက်ပြီး သူသည် တာလော့ဂိုဏ်းချုပ်ဖြစ်ကြောင်း အတည်ပြုလိုက်၏။

၎င်းမှာ ဂိုဏ်းချုပ်၏ ဝိညာဉ် လူဝင်စားခြင်းဖြစ်ရမည်ဟု ခန့်မှန်းရပေသည်။

အခြားတာအိုကျင့်ကြံသူမှာမူ အင်မော်တယ်ကဲ့သို့သော အရှိန်အဝါရှိပြီး ငှက်ကျားဖြူတစ်ကောင်ကို စီးနင်းလာကာ လောကီနှင့် ကင်းကွာသော အင်မော်တယ် အမူအကျင့် ရှိလေသည်။

မြေကမ္ဘာအင်မော်တယ်။

တစ်ချက်ကြည့်လိုက်ရုံဖြင့် ဤ တာအိုကျင့်ကြံသူမှာ မြေကမ္ဘာအင်မော်တယ် တစ်ပါးဖြစ်ကြောင်း လင်းရီ အတည်ပြုနိုင်ခဲ့၏။

သူတို့ သုံးဦးသည် အရှေ့ပင်လယ်၏ အဆုံးမှ မျက်တောင်တစ်ခတ်အတွင်း ရောက်ရှိလာပြီး ရေသူနန်းတော်၏ အထက်တွင် ထွက်ပေါ်လာခဲ့လေသည်။

လင်းရီကလည်း သူ၏တိမ်တိုက်လှေကား ဝင်္ကပါပြားဖြင့် အလျင်အမြန် လိုက်သွားခဲ့၏။

"တပည့်လင်းရီက ဂိုဏ်းချုပ် ဘိုးဘေးကြီး၊ ဆရာနဲ့ စီနီယာတို့ကို နှုတ်ဆက်ပါတယ်..."

လင်းရီက ဦးညွှတ်လိုက်သည်။

"ကောင်းတဲ့ ကောင်လေး..."

တာလော့ဂိုဏ်းချုပ်၏ ဝိညာဉ် လူဝင်စားခြင်းက အနည်းငယ် ခေါင်းညိတ်ပြလိုက်၏။

"လင်းရီ... မင်း ပင်ပန်းသွားပြီ..."

ကျိုးယွင်ကလည်း လင်းရီ၏ ပခုံးကို ပုတ်ကာ ပြောလိုက်၏။ သူသည် လင်းရီ လုပ်ခဲ့သမျှကို ရှင်းလင်းစွာ သိရှိထားပုံ ရလေသည်။

"ဒါတွေ အားလုံးက တပည့်တစ်ယောက်အနေနဲ့ လုပ်သင့်လုပ်ထိုက်တာတွေပါ..."

လင်းရီက တောက်ပစွာ ပြုံးလိုက်သည်။

တစ်နေ့နေ့တွင် သူသာ ကျိုးယွင်၏ အကူအညီ လိုအပ်လာပါက ကျိုးယွင်သည်လည်း အစွမ်းကုန် ကြိုးစားကူညီပေးလိမ့်မည်ဟု လင်းရီယုံကြည်ထား၏။

"လင်းရီ..."

"ဒါက ဖုန်းလိုင်အင်မော်တယ်ကျွန်းရဲ့ ကျွန်းသခင်ပဲ..."

ကျိုးယွင်က မိတ်ဆက်ပေးလိုက်သည်။

"မျိုးဆက်သစ်လင်းရီက ဖုန်းလိုင် ကျွန်းသခင်ကို နှုတ်ဆက်ပါတယ်..."

လင်းရီက ဦးညွှတ်လိုက်၏။

"တောင်သခင်လင်းရီက ယဉ်ကျေးလွန်းနေပါပြီ..."

"တာလော့အင်မော်တယ်ဂိုဏ်းကနေ ပြိုင်ဘက်ကင်းတဲ့၊ အားလုံးက ထူးခြားတဲ့ တာအိုအခြေခံအုတ်မြစ်တစ်ရာပါတဲ့ ပါရမီရှင်တစ်ယောက် ထွက်ပေါ်လာတယ်လို့ ဒီအဘိုးကြီး ကြားခဲ့ရတာ... အခု သူ့ကို တွေ့လိုက်ရတော့ သူ့ရဲ့တာအိုအရိုးတွေက တကယ့်ကို သဘာဝအလျောက် ဖြစ်တည်နေတာပဲ..."

ဖုန်းလိုင်ကျွန်းသခင်က လင်းရီကို ကြည့်ကာ ပြောလိုက်သည်။

"စီနီယာက မြှောက်ပြောနေပါပြီ..."

လင်းရီက ပြန်ဖြေလိုက်၏။

"စကားမစပ်... ဒီအဘိုးကြီး ဒီတစ်ကြိမ် ကိုယ်တိုင်ကိုယ်ကျ လာခဲ့ရတာက တောင်သခင်လင်းရီနဲ့ မျက်နှာချင်းဆိုင် ဆွေးနွေးချင်တဲ့ ကိစ္စတစ်ခု ရှိနေလို့ပါ..."

ဖုန်းလိုင်ကျွန်းသခင်က ဤအချိန်တွင် လေးနက်စွာ ပြောလိုက်လေသည်။