အခန်း (၁၇၅၀-၁၇၅၂)

အခန်း (၁၇၅၀) ဒြပ်မဲ့လေ့လာသူအထွတ်အထိပ်အဆင့်သို့ ရောက်ရှိခြင်း

ချူးယွင်ဖန်း၏ ခန္ဓာကိုယ်အတွင်းရှိ နတ်စွမ်းအင်များသည် ဆဲလ်များကို ဆေးကြောသန့်စင်ပေးနေသည်။ မဟာအသက်ဓာတ်ကျင့်ကြံခြင်းဆေး၏ ပံ့ပိုးမှုဖြင့် သူ၏နတ်စွမ်းအင်များ ရူးသွပ်စွာ မြင့်တက်လာသည်။ ၎င်းသည် အဆုံးမရှိသကဲ့သို့ ဆက်တိုက်မြင့်တက်နေသောကြောင့် သူ၏ခန္ဓာကိုယ်ကို ပေါက်ကွဲထွက်လုနီးပါး ခံစားရစေသည်။ အကယ်၍ သူသာ သာမန်လူတစ်ဦးဆိုလျှင် ခန္ဓာကိုယ်တစ်ခုလုံး ပေါက်ကွဲသွားလောက်ပြီဖြစ်သော်လည်း ချူးယွင်ဖန်း ကွဲပြားခြားနားသည်။ သူ၏ခန္ဓာကိုယ်သည် အလွန်အမင်း သန်မာသည့်အပြင် ထိပ်တန်းအဆင့် ဝိညာဉ်လက်နက်များကိုပင် လက်ဗလာဖြင့် ဖျက်ဆီးနိုင်သည်။ သူသည် ရုပ်ပိုင်းဆိုင်ရာသန်မာမှုတွင် အထွတ်အထိပ်သို့ ရောက်ရှိနေသည်ဟု ဆိုနိုင်သည်။

သာမန် ဒြပ်မဲ့ကျွမ်းကျင်အဆင့် ကျင့်ကြံသူသည် စကြဝဠာအဆင့် ကျင့်ကြံသူ၏ တိုက်ခိုက်မှု နှစ်ကွက် သုံးကွက်ဖြင့် အသတ်ခံရနိုင်သော်လည်း ချူးယွင်ဖန်းသည် ထူးခြားသူဖြစ်သည်။ သူသည် စကြဝဠာအဆင့်နှင့်ပင် ရင်ဆိုင်တိုက်ခိုက်ဝံ့သည်။ အကယ်၍ အနိုင်မရလျှင်ပင် သေဆုံးလိမ့်မည်မဟုတ်ပေ။ ၎င်းတို့ကြားရှိ ကွာခြားချက်ကို ကျိုးကြောင်းဆင်ခြင်မှုဖြင့် တွက်ချက်၍မရနိုင်ပေ။ နတ်စွမ်းအင်အလွှာများ တစ်လွှာပြီး တစ်လွှာထုတ်လွှတ်လာ၍ ဒြပ်မဲ့လေ့လာသူအထွတ်အထိပ်အဆင့် အတားအဆီးသို့ တိုက်ခိုက်နေသည်။ ချူးယွင်ဖန်း၏ နှာခေါင်းမှ အဆက်မပြတ် ရှူထုတ်နေသော လေထုများသည် အစွယ်များဖြန့်ကာ လက်သည်းများ ဖော်ထုတ်နေသည့် နဂါးနှစ်ကောင်နှင့် ဆင်တူသည်။ ထိုလှုပ်ရှားမှုသည် တုန်လှုပ်ဖွယ်ကောင်းလှသည်။

တစ်ချိန်တည်းမှာ အလယ်အလတ်အဆင့် ဝိညာဉ်ကျောက်တုံးများ ပြာအဖြစ်သို့ ပြောင်းလဲသွားသည်။ ၎င်းတို့အတွင်းရှိ ဝိညာဉ်စွမ်းအင်များကို ကြောက်မက်ဖွယ် အင်အားတစ်ခုက ဆွဲဆောင်နေသကဲ့သို့ သူ၏ခန္ဓာကိုယ်အတွင်းသို့ စီးဝင်လာသည်။ အချိန်သုံးရက်သည် မျက်စိတစ်မှိတ်အတွင်း ကုန်ဆုံးသွားသည်။ ချူးယွင်ဖန်းသည် တောင်မြစ်ပန်းချီကားအတွင်း၌ အချိန်အတော်ကြာ သီးသန့်ကျင့်ကြံနေခဲ့သည်။ ရုတ်တရက် သူ၏မျက်လုံးများကို ဖွင့်ကြည့်လိုက်ရာ မျက်ဝန်းများအတွင်း၌ အလင်းတန်းတစ်ခု လင်းလက်သွားသည်။ ပြီးနောက် အလင်းတန်းများ ဖြည်းညှင်းစွာ ပြန်လည်ပျောက်ကွယ်သွား၍ ပုံမှန်ပြန်ဖြစ်သွားသည်။ ချူးယွင်ဖန်းသည် ဤသုံးရက်အတွင်း သူ၏ အဆင့်ဖြတ်ကျော်မှုကို အောင်မြင်စွာ လုပ်ဆောင်နိုင်ခဲ့၍ ဒြပ်မဲ့လေ့လာသူအဆင့်၏ အထွတ်အထိပ်သို့ ရောက်ရှိသွားကြောင်း သိရှိလိုက်သည်။ သူ၏ကျင့်ကြံမှုများ တိုးတက်လာကာ တိုက်ခိုက်နိုင်စွမ်းသည်လည်း အဆမတန် မြင့်တက်လာသည်။ သူသည် ယခင်ကနှင့် လုံးလုံးလျားလျား ကွာခြားသွားသည်။

ယခုအခါ ချူးယွင်ဖန်းသည် မိမိကိုယ်ကို ကြယ်ကြွေကောင်းကင်ဂိုဏ်း၏ ထူးချွန် တပည့်များထဲတွင် အကောင်းဆုံးဟု ရဲရဲဝံ့ဝံ့ ပြောနိုင်ပြီဖြစ်သည်။ မည်သူမျှ သူထက် ပိုမိုသန်မာနိုင်ဖွယ် အကြောင်းမရှိပေ။ ယခင်က ချူးယွင်ဖန်းသည် ဟော့သားရဲအဖြစ် ပြောင်းလဲနိုင်သော်လည်း ဒြပ်မဲ့အဆင့်၏ ကန့်သတ်ချက်ကို မကျော်လွှားနိုင်ခဲ့ပေ။ သို့သော် ယခုမူ မတူတော့ချေ။ သူ၏စွမ်းအင်သည် အလွန်ကြောက်မက်ဖွယ်ကောင်းစွာ ပြောင်းလဲသွားခဲ့သည်။ သူသည် ယခင်ကထက် အနည်းဆုံးလျှင် အဆပေါင်းများစွာ ပိုမိုသန်မာလာသည်။

ဤအခြေခံအုတ်မြစ်ဖြင့် ချူးယွင်ဖန်းသည် ဟော့သားရဲအသွင် ပြောင်းလဲလိုက်သည်။ ဤသည်မှာ သူ ပထမဆုံးအကြိမ်အဖြစ် စကြဝဠာအဆင့်နှင့် ယှဉ်နိုင်သော စွမ်းအင်မျိုး အမှန်တကယ် ပိုင်ဆိုင်ခြင်းဖြစ်သည်။ သူ၏တစ်ကိုယ်လုံးသည် မျက်စိတစ်မှိတ်အတွင်း ရွှေရောင်အကြေးခွံများဖြင့် ဖုံးလွှမ်းသွား၍ ရွှေရောင်ဟော့တစ်ကောင်အဖြစ် ပြောင်းလဲသွားသည်။ သို့သော် ဤရွှေရောင်ဟော့သည် မူလဟော့ပုံသဏ္ဌာန်နှင့် မတူပေ။ ၎င်း၏ခန္ဓာကိုယ်သည် တောင်ငယ်တစ်ခုကဲ့သို့ မကြီးမားသော်လည်း ၎င်းသယ်ဆောင်လာသော ကြောက်မက်ဖွယ် ဖိအားသည် တောင်ငယ်တစ်ခု အရွယ်အစားရှိစဉ်ကထက် ပိုမိုတုန်လှုပ်ဖွယ်ကောင်းနေသည်။ သူ မတ်တပ်ရပ်လိုက်သောအခါ လူသားပုံသဏ္ဌာန်ရှိသည့် ဟော့တစ်ကောင်နှင့် ဆင်တူသည်။ ဤအခြေအနေမျိုးတွင် ချူးယွင်ဖန်းသည် သူ၏သိုင်းပညာများကို အမှန်တကယ် ထုတ်ဖော်ပြသနိုင်ပြီဖြစ်သည်။

သူ၏တိုက်ခိုက်နိုင်စွမ်းများ အမှန်တကယ် တိုးတက်လာသည်။ ကြမ်းတမ်းသော အရှိန်အဝါများ ရူးသွပ်စွာ ထွက်ပေါ်လာသောကြောင့် တောင်မြစ်ပန်းချီကားပင် တုန်ခါ၍ လိမ်တွန့်သွားသည်။ ချူးယွင်ဖန်းသည် သူ၏ခန္ဓာကိုယ်အတွင်းမှ ကြောက်မက်ဖွယ် စွမ်းအင်များ အဆက်မပြတ် ထွက်ပေါ်နေကြောင်း ခံစားနေရသည်။ သူသည် တစ်ကမ္ဘာလုံးကို ထိုးဖောက်နိုင်သည်ဟု ခံစားလိုက်ရသည်။

"ဒါက ဒြပ်မဲ့အဆင့်ရဲ့ အထက်မှာရှိတဲ့ စကြဝဠာအဆင့်ရဲ့ စွမ်းအင်လား" ချူးယွင်ဖန်းက တီးတိုး ရေရွတ်လိုက်သည်။

သူသည် ဆေးဧကရာဇ်၏ မှတ်ဉာဏ်များတွင် ဤထက် အဆတစ်ရာမက သန်မာသော စွမ်းအင်များကို မြင်တွေ့ဖူးသဖြင့် ဤစွမ်းအင်နှင့် မစိမ်းကားသော်လည်း ကိုယ်တိုင်ပိုင်ဆိုင်ရခြင်းသည် ပထမဆုံးအကြိမ်ဖြစ်သည်။ ၎င်းသည် မှတ်ဉာဏ်ထဲရှိ ခံစားချက်နှင့် လုံးလုံးလျားလျား ကွဲပြားခြားနားလှသည်။ နောက်တစ်ခဏတွင် ချူးယွင်ဖန်းသည် သူ၏ခန္ဓာကိုယ်ရှိ ဟော့ပုံသဏ္ဌာန်ကို ပြန်ရုပ်သိမ်းကာ လူသားအဖြစ်သို့ ပြန်ပြောင်းလိုက်သည်။

'ဒီစွမ်းအင်က တကယ့်ကို အစွမ်းထက်တာပဲ' ချူးယွင်ဖန်းက တွေးလိုက်သည်။

သူ၏ လက်ရှိအစွမ်းဖြင့်ဆိုလျှင် ဝမ်ယီဖန်းကို ကြောက်ရွံ့ရန် မလိုအပ်တော့ပေ။ သို့သော် ဟော့ပုံသဏ္ဌာန်သည် နတ်စွမ်းအင်ကို အလွန်အမင်း ကုန်ခမ်းစေသည်။ ၎င်းကို ဝှက်ဖဲအဖြစ်သာ အသုံးပြုနိုင်သောကြောင့် ပုံမှန်တိုက်ခိုက်ရေးစွမ်းအင်အဖြစ် အသုံး၍မရနိုင်ပေ။ အကယ်၍ သူသာ စကြဝဠာအဆင့်နှင့် နှိုင်းယှဉ်နိုင်သော စွမ်းအင်ကို ပိုင်ဆိုင်လိုပါက ဒြပ်မဲ့ကျွမ်းကျင်အဆင့်သို့ တက်လှမ်းရပေလိမ့်မည်။ သို့သော် ချူးယွင်ဖန်းသည် စိတ်မပျက်မိပေ။ အကြောင်းမှာ သူသည် ထိုအဆင့်နှင့် အလှမ်းမဝေးတော့သောကြောင့်ဖြစ်သည်။ သူ၏လက်ထဲတွင် မဟာအသက်ဓာတ်ကျင့်ကြံခြင်းဆေးတစ်လုံး ကျန်ရှိနေသောကြောင့် ၎င်းဖြင့် ရှေ့ဆက်တိုးရန် လုံလောက်ပေသည်။

"ဘယ်သူက ဘယ်သူ့ကို သတ်မလဲဆိုတာ ကြည့်ကြသေးတာပေါ့၊ ကုန်းစွန်းလျန်" ချူးယွင်ဖန်း လှောင်ပြုံးပြုံးလိုက်သည်။

ဤကာလအတွင်း ကုန်းစွန်းလျန်၏ နတ်အာရုံသည် ချူးယွင်ဖန်း ပြုလုပ်ထားသော အတားအဆီးကို ထိုးဖောက်ရန် အဆက်မပြတ် ကြိုးစားနေကြောင်း သူ ခံစားနိုင်သည်။ သူသည် ချူးယွင်ဖန်းကို တိုက်ခိုက်ရန် ဆုံးဖြတ်ချက်ချထားပုံပေါ်သည်။ သုံးရက်အတွင်း ချူးယွင်ဖန်းသည် အဆင့်ဖြတ်ကျော်သွားခြင်းကို ကုန်းစွန်းလျန် မသိခဲ့ပေ။ သို့သော် ချူးယွင်ဖန်း ဆက်မတွေးတောနိုင်မီ တံခါးခေါက်သံတစ်ခု ကြားလိုက်ရသည်။ သူသည် တောင်မြစ်ပန်းချီကားထဲမှ ထွက်လာ၍ တံခါး ဖွင့်လိုက်သောအခါ ဝမ်ဆန်ချန်းဖြစ်နေကြောင်း မြင်တွေ့လိုက်ရသည်။

"ဗိုလ်မှူးကြီးချူး... လေလံပွဲ ပြီးဆုံးသွားပါပြီ" ဝမ်ဆန်ချန်းက ပြောလာသည်။

"ကောင်းပါပြီ။ ခင်ဗျားတို့ရဲ့ ဧည့်ဝတ်ကျေပွန်မှုအတွက် ကျေးဇူးတင်ပါတယ်။ ကျုပ် သွားတော့မယ်။ နောင် တစ်ခုခု အရောင်းအဝယ်ရှိရင် ခင်ဗျားနဲ့ ခင်ဗျားတို့ အဖွဲ့အစည်းကို ဦးစားပေးပါ့မယ်"

ချူးယွင်ဖန်းသည် စကားပြောပြီးနောက် ဝမ်ဆန်ချန်းကို နှုတ်ဆက်ကာ အလင်းတန်းတစ်ခုအဖြစ် ပြောင်းလဲ၍ ထိုနေရာမှ ပျောက်ကွယ်သွားသည်။ ဝမ်ဆန်ချန်းသည် ချူးယွင်ဖန်း၏ ပုံရိပ်ကို ကြည့်နေစဥ် သူ၏မျက်ဝန်းများအတွင်း စူးရှသော အလင်းတန်းများ ပေါ်ထွက်လာသည်။ လေးရက်အတွင်း ချူးယွင်ဖန်း၏ စွမ်းအင်များ သိသိသာသာ တိုးတက်လာပုံပေါ်သည်။

‘တကယ့်ကို ကြောက်စရာပဲ’

ချူးယွင်ဖန်းက သိုသိပ်စွာ ဖုံးကွယ်ထားသော်လည်း ဝမ်ဆန်ချန်း သတိထားမိလိုက်သည်။ ဝမ်ဆန်ချန်းသည် သူ၏ ဆုံးဖြတ်ချက်ကို ယုံကြည်သည်။ ချူးယွင်ဖန်း ရက်အနည်းငယ်အတွင်း ယခင်ကထက် ပိုမိုသန်မာလာခဲ့သည်။

"စိတ်ဝင်စားစရာပဲ။ ချူးယွင်ဖန်းက ကျုပ်ထင်ထားတာထက် ပိုအစွမ်းထက်နေမယ်လို့ မမျှော်လင့်ထားဘူး။ ဒါပေမယ့် နေဦး၊ သူ ကုန်းစွန်းလျန်ကို ဘယ်လိုရင်ဆိုင်မှာလဲ။ မသေစေနဲ့ပေါ့ မဟုတ်ရင် နှမြောစရာကောင်းလိမ့်မယ်" ဝမ်ဆန်ချန်း မျက်မှောင်ကြုတ်လျက် လှည့်ထွက်သွားသည်။

ဤအချိန်တွင် ချူးယွင်ဖန်းသည် ရတနာတစ်ထောင်ခန်းမ ဌာနခွဲ၏ အပြင်ဘက်သို့ ရောက်ရှိသွားသည်။ ကောင်းကင်ယံတွင် ဥက္ကာခဲများကဲ့သို့ ဖြတ်သန်းသွားသော အလင်းတန်းများကို သူ မြင်တွေ့လိုက်ရသည်။ ၎င်းတို့သည် လေလံပွဲအပြီး ရတနာတစ်ထောင်ခန်းမမှ ထွက်ခွာသွားသူများဖြစ်သည်။

"ဟားဟားဟား မင်း နောက်ဆုံးတော့ ထွက်လာပြီပေါ့"

ထိုအချိန်တွင် ချူးယွင်ဖန်း၏ အနောက်ဘက်မှ ထူးဆန်းသော ရယ်သံတစ်ခု ထွက်ပေါ်လာသည်။ တစ်ချိန်တည်းမှာပင် ကြီးမားသော လှံအလင်းရောင်တစ်ခု လေထုထဲတွင် ပေါ်ထွက်လာ၍ ချူးယွင်ဖန်းထံသို့ ဦးတည်လာခဲ့သည်။ ဤလှံ၏ အရှိန်အဟုန်သည် အလွန်လျင်မြန်လှသည်။ ၎င်းသည် မျက်စိတစ်မှိတ်အတွင်း သူ့ကို ထိုးဖောက်တော့မည့်အလား ချီတက်လာသည်။

တိုက်ခိုက်လာသူသည် ကုန်းစွန်းလျန်မှလွဲ၍ အခြားလူမဟုတ်ပေ။ သူသည် ရက်အတော်ကြာ အောင့်အည်းထားသောကြောင့် ချူးယွင်ဖန်းကို တုံ့ပြန်ရန် အခွင့်အရေးမပေးဘဲ တိုက်ရိုက် တိုက်ခိုက်လိုက်သည်။ သို့သော် ချူးယွင်ဖန်းက ချက်ချင်းတုံ့ပြန်လိုက်ကာ ရပ်နေသည့်နေရာမှ ပျောက်ကွယ်သွားသည်။

ဘုံး

မြေပြင်ပေါ်သို့ လှံအလင်းတန်း ကျရောက်သွားသည့်အတွက် ကြီးမားသော ကျင်းကြီးတစ်ခု ဖြစ်ပေါ်သွားသည်။

"ဘာ..." ကုန်းစွန်းလျန် ဇဝေဇဝါ ဖြစ်သွားသည်။ ချူးယွင်ဖန်းသည် သူ၏တိုက်ခိုက်မှုကို ရှောင်တိမ်းနိုင်ခဲ့သည့်အပြင် သူ၏အရှိန်အဟုန်သည် လွန်ခဲ့သော ရက်အနည်းငယ်ကထက်ပင် ပို၍မြန်ဆန်နေသည်။

အခန်း (၁၇၅၁) တိုက်ပွဲကြောင့် လူတိုင်း တုန်လှုပ်ချောက်ချားခြင်း

ကုန်းစွန်းလျန်သည် ထိုသို့ရယ်ဖွယ်ရာကောင်းသည့် အတွေးကို ခေါင်းထဲမှ ချက်ချင်းပင် မောင်းထုတ်လိုက်သည်။ ရက်အနည်းငယ်သာ ကြာမြင့်ခဲ့သောကြောင့် ကျင့်ကြံသူတစ်ယောက်အဖို့ ရက်အနည်းငယ်မျှ သီးသန့်ကျင့်ကြံရုံဖြင့် မည်သို့မျှ သန်မာနိုင်မည်နည်း။ ချူးယွင်ဖန်းသည် ရက်အနည်းငယ်အတွင်း ဤမျှကြီးမားသည့် ပြောင်းလဲမှုမျိုးဖြင့် မည်သို့ ကြုံတွေ့နိုင်မည်နည်း။ ဤသည်မှာ ဟာသတစ်ခုသာ ဖြစ်ရပေလိမ့်မည်။ သူ၏ အာရုံခံစားမှုများ မှားယွင်းနေခြင်းဖြစ်ပေလိမ့်မည်။

ဤသို့ တွေးတောပြီးနောက် ကုန်းစွန်းလျန်၏ မျက်လုံးများထဲတွင် ကြောက်မက်ဖွယ် အလင်းတန်းများ လင်းလက်သွားသည်။ လွန်ခဲ့သော ရက်အနည်းငယ်က ချူးယွင်ဖန်းကို သတ်ပစ်ချင်ခဲ့သော်လည်း ရတနာတစ်ထောင်ခန်းမ၏ လျှို့ဝှက်ဆန်းကြယ်သော ပညာရှင်တစ်ဦးက တားဆီးခဲ့သည်။ အဘိုးကြီးလီ ခန့်မှန်းထားသကဲ့သို့ပင် ကုန်းစွန်းလျန်သည် လီရှန်ယွမ်အပေါ် မည်မျှသစ္စာရှိပါစေ ရူးသွပ်နေသူ မဟုတ်ပေ။ ရတနာတစ်ထောင်ခန်းမကို မစော်ကားသင့်ကြောင်း ကောင်းမွန်စွာ နားလည်ထားသည်။ သူ၏ကျောထောက်နောက်ခံဖြစ်သော သံမဏိလှံဂိုဏ်းပင် ရတနာတစ်ထောင်ခန်းမကို ရန်ဆွဝံ့မည် မဟုတ်ပေ။ ရတနာတစ်ထောင်ခန်းမနှင့် နှိုင်းယှဉ်လျှင် သံမဏိလှံဂိုဏ်းသည် မပြောပါ့လောက်ပေ။ သူ ခစားနေသည့် လီရှန်ယွမ်ပင် ရတနာတစ်ထောင်ခန်းမကို ယှဉ်ပြိုင်နိုင်စွမ်း မရှိပေ။ ထိုကုန်သည်အဖွဲ့အစည်းသည် အင်မတန် အင်အားကြီးမားပေသည်။

"ဒီနေ့ မင်းကို သတ်မယ်။ ဘယ်သူ လာကယ်မလဲ ကြည့်ကြသေးတာပေါ့"

ကုန်းစွန်းလျန် ထပ်မံတိုက်ခိုက်လိုက်ပြန်သည်။

"ကောင်းကင် ဖြတ်ကျော်ခြင်း လှံ"

သူသည် လှံဖြင့် ထိုးနှက်လိုက်ရာ ကောင်းကင်ယံကို လှံအလင်းတန်းများ ဖြတ်သန်းသွားသည်။ ၎င်းသည် ကောင်းကင်ကို ဖြတ်သန်းနေသည့် တောင်တန်းကြီးတစ်ခုကဲ့သို့ ချူးယွင်ဖန်းထံ ချီတက်လာသည်။ ချူးယွင်ဖန်းသည် ရှောင်တိမ်းရန်ပင် မကြိုးစားဘဲ ထိုလှံကို လက်သီးဖြင့် ပြန်လည် ထိုးနှက်လာသောကြောင့် ကုန်းစွန်းလျန် အံ့အားသင့်သွားသည်။

ဘုံး

ကျယ်လောင်သော ပေါက်ကွဲသံနှင့်အတူ လှံအလင်းတန်းနှင့် လက်သီးချက်တို့ ရိုက်ခတ်သွားရာ ကမ္ဘာတစ်ခုလုံး ပျက်စီးတော့မယောင် ထင်မှတ်ရစေသည်။ ထိုမှ ထွက်ပေါ်လာသော စွမ်းအင်လှိုင်းလုံးကြီးများ တစ်ခဏအတွင်း ပျံ့နှံ့သွားသည်။ ကုန်းစွန်းလျန်၏ တိုက်ခိုက်မှုနှင့် ရင်ဆိုင်ရချိန်တွင် ချူးယွင်ဖန်းသည် အနောက်သို့ ခြေလှမ်းနှစ်လှမ်းခန့်သာ ဆုတ်ခွာသွားပြီးနောက် ဟန်ချက်ကို ပြန်လည်ထိန်းချုပ်နိုင်သွားသည်။

"မဖြစ်နိုင်တာ" ကုန်းစွန်းလျန် အံ့ဩတကြီး အော်ပြောလိုက်သည်။ ချူးယွင်ဖန်းသည် သူ၏ တိုက်ခိုက်မှုကို ဤမျှ လွယ်လွယ်ကူကူ ခုခံနိုင်လိမ့်မည်ဟု မထင်မှတ်ထားပေ။ ပုံမှန်အားဖြင့် သာမန်ဒြပ်မဲ့အဆင့်၊ ဒြပ်မဲ့ကျွမ်းကျင်အဆင့်ပင် ထိုနေရာတွင် သေဆုံးသွားမည်ဖြစ်ရာ ချွင်းချက်ဟူ၍ မရှိနိုင်ပေ။

"မင်းရဲ့ တိုက်ခိုက်ရေးစွမ်းရည်တွေ ဘယ်လိုလုပ် ဒီလောက်တိုးတက်လာရတာလဲ" ကုန်းစွန်းလျန် မျက်မှောင်ကြုတ်ကြည့်လိုက်သည်။

"မင်း ဆင့်ကဲပြောင်းလဲမှုဆေးကို သောက်လိုက်တာလား"

ဤသည်မှာ ကုန်းစွန်းလျန် တွေးတောနိုင်သည့် တစ်ခုတည်းသော အကြောင်းပြချက်ဖြစ်သည်။ မည်သို့ပင်ဆိုစေကာမူ ချူးယွင်ဖန်းသည် သူ၏ ခြိမ်းခြောက်မှုအောက်တွင် ရောက်ရှိနေသောကြောင့် တုံးအသူ မဟုတ်ပါက စွမ်းအင်ကို မြှင့်တင်ရန် နည်းလမ်းတစ်ခုခု စဉ်းစားပေလိမ့်မည်သည်။ သူ သိထားသည့် တစ်ခုတည်းသော နည်းလမ်းသည် ဆင့်ကဲပြောင်းလဲမှုဆေးလုံး သောက်သုံးခြင်းဖြစ်သည်။

ထိုအကြောင်းကြောင့် သူ၏ ရင်ထဲတွင် ဒေါသမီးများ တစ်ဟုန်းဟုန်း တောက်လောင်လာသည်။ ချူးယွင်ဖန်း လက်ထဲရှိ ဆင့်ကဲပြောင်းလဲမှုဆေးလုံးကို သူ၏ ကိုယ်ပိုင်ပစ္စည်းအဖြစ် သတ်မှတ်ထားခဲ့ရာ ယခုအခါ ချူးယွင်ဖန်းသည် သူ ပိုင်ဆိုင်သောပစ္စည်းကို အသုံးပြုဝံ့သည်။ ဤဆေးလုံးသည် သူ၏ အဆင့်ဖြတ်ကျော်ခြင်းနှင့် သက်ဆိုင်နေသဖြင့် သူ၏ ဒေါသများ ပေါက်ကွဲထွက်လာသည်။

"ချီးပဲ... မင်း ဆင့်ကဲပြောင်းလဲမှုဆေးကို စားပစ်လိုက်တယ်ပေါ့လေ။ ဒါ ခွင့်မလွှတ်နိုင်တဲ့ ပြစ်မှုပဲ။ မင်းကို လူသားဆေးပစ္စည်းအဖြစ် သတ်မှတ်ပြီး မင်းရဲ့ ခန္ဓာကိုယ်ထဲက ဆေးအာနိသင်တွေကို ကျုပ် ပြန်ထုတ်ယူပစ်မယ်"

ကုန်းစွန်းလျန်၏ မျက်လုံးများထဲတွင် ပြင်းထန်သော သတ်ဖြတ်လိုစိတ်များ ပေါ်ထွက်လာသည်။

ကုန်းစွန်းလျန်၏ စကားကို ကြားသောအခါ ချူးယွင်ဖန်းက လှောင်ရယ်လိုက်သည်။

"ကျုပ်ကို လူသားဆေးပစ္စည်းအဖြစ် ပြောင်းလဲချင်တာလား။ ခင်ဗျားမှာ ဒီလိုအရည်အချင်းမျိုးရှိမယ်လို့ မထင်ဘူး။ ဒီအချက်ကို အခြေခံပြီး ပြောရရင် ခင်ဗျား ကျုပ်လက်ထဲမှာ သေရမှာ သေချာသွားပြီ"

ချူးယွင်ဖန်းတွင် ဆေးဧကရာဇ်၏ မှတ်ဉာဏ်များရှိနေသဖြင့် လူသားဆေးပစ္စည်းဟူသည် မည်သည်ကို ဆိုလိုကြောင်း သူ ကောင်းကောင်း သိသည်။ ၎င်းသည် ဆေးဖော်စပ်ခြင်း၌ ယုတ်မာကောက်ကျစ်သော လမ်းစဉ်တစ်ခုဖြစ်သည်။ ရှေးခေတ်ကာလများက ဆေးဆရာများစွာ လူသားများကို ဆေးအဖြစ် ကြိတ်ချေ၍ ဆေးလုံးများ ဖော်စပ်ခဲ့ကြသည်။ ဤနည်းလမ်းသည် ရက်စက်လွန်းလှသော်လည်း လူအများအပြားသည် ၎င်းကို အလွန်နှစ်သက်ခဲ့ကြသည်။ လမ်းမှားဖြစ်သော်လည်း လူအများအဖို့ အလွန် ထိရောက်သည့် နည်းလမ်းတစ်ခု ဖြစ်ခဲ့သည်။ ယခုအခါ ကုန်းစွန်းလျန်က သူ့ကို ထိုသို့ ပြုလုပ်ရန် ကြံစည်နေသဖြင့် ချူးယွင်ဖန်းသည် သူ့ကို မည်သို့မျှ လွှတ်ပေးထားမည်နည်း။

"ဟားဟားဟား ဆင့်ကဲပြောင်းလဲမှုဆေးကို သောက်ထားရင်လည်း ဘာထူးမှာလဲ။ မင်းရဲ့ ဒြပ်မဲ့အဆင့်လောက်နဲ့ ကျုပ်ကို ရင်ဆိုင်ရဲတယ်လား"

ကုန်းစွန်းလျန်သည် သူ ရှုံးနိမ့်လိမ့်မည်ဟု လုံးလုံးလျားလျား မထင်မှတ်ထားပေ။ ချူးယွင်ဖန်း နိမ့်ကျသောသူဖြစ်ပါလျက် ဤမျှထောင်လွှား၍ ဥပဒေမဲ့လွန်းလှသည်။ နောက်တစ်ခဏတွင် ကုန်းစွန်းလျန်က ထပ်မံ တိုက်ခိုက်လိုက်သည်။ သူ၏ လက်ထဲတွင် တောက်ပသော ငွေရောင်လှံတစ်စင် ထွက်ပေါ်လာသည်။ ၎င်းသည် ပျံသန်းနေသော နဂါးတစ်ကောင်ကဲ့သို့ ကောင်းကင်ယံကို ထိုးဖောက်သွားသည်။ လှံဖြင့် လေထုကို ထိုးခွဲလိုက်သောအခါ ပြင်းထန်သော ပွတ်တိုက်သံများ ထွက်ပေါ်လာခဲ့ရာ တစ်လောကလုံး မီးဟုန်းဟုန်း တောက်လောင်နေသည့်အလား ခံစားရစေသည်။

သို့သော် ချူးယွင်ဖန်းက လုံးလုံးလျားလျား မကြောက်ရွံ့ပေ။

"အံ့ဖွယ်လက်သီးရှစ်ချက်"

ချူးယွင်ဖန်းသည် ကောင်းကင်နဂါးရှစ်ကောင်၏ စွမ်းအင်ကို ဆင့်ခေါ်လိုက်သည်။ ကောင်းကင်ယံတွင် ရေတွက်၍မရနိုင်သော ပုံရိပ်များ ပေါ်ထွက်လာ၍ ကုန်းစွန်းလျန်၏ ငွေရောင်လှံနှင့် ရိုက်ခတ်သွားသည်။

ဘုံး

နှစ်ဖက်စလုံး၏ တိုက်ခိုက်မှုများ ရိုက်ခတ်မိကြစဉ် ကြီးမားသော ပေါက်ကွဲသံကြီး ထွက်ပေါ်လာသည်။ သို့သော် ပေါက်ကွဲမှုအရှိန် မပြန့်နှံ့သွားမီ ချူးယွင်ဖန်းနှင့် ကုန်းစွန်းလျန်တို့နှစ်ဦးစလုံး တစ်ပြိုင်နက်တည်း အပြန်အလှန် ထပ်မံ ထိုးနှက်လိုက်ကြသည်။

ဘုံး

ဘုံး

ဘုံး

ကောင်းကင်ယံတွင် တုန်လှုပ်ဖွယ်ရာ ရိုက်ခတ်မှုများ တစ်ခုပြီးတစ်ခု ပေါ်ပေါက်လာသည်။ ဤဖြစ်စဥ်သည် ရတနာတစ်ထောင်ခန်းမ၏ ဧည့်သည်တော်များကို နိုးကြားသွားစေသည်။

"အဲဒါ ဘာလဲ။ စကြဝဠာအဆင့် ကျင့်ကြံသူနှစ်ယောက် တိုက်နေကြတာလား"

လူအများအပြား ဤအဆင့်ရှိသော သက်ရောက်မှုကို ရင်းနှီးနေကြသဖြင့် ချက်ချင်းပင် အာရုံခံစားမိသွားသည်။ သို့သော် ဤနေရာတွင် အဘယ်ကြောင့် စကြဝဠာအဆင့် ကျင့်ကြံသူနှစ်ဦး တိုက်ခိုက်နေကြရသနည်းဟု လူအများစု မေးခွန်းထုတ်နေကြသည်။

"ဟိုတစ်ယောက်ကို ကျုပ် သိသလိုပဲ။ သူက သံမဏိလှံဂိုဏ်းက ပါရမီရှင် ကုန်းစွန်းလျန်ပဲ။ သူ စကြဝဠာအဆင့်ကို မကြာသေးခင်က တက်လှမ်းခဲ့တယ်လို့ ကျုပ် ကြားထားတယ်"

"ဟုတ်တယ်၊ သူပဲ။ အဲဒီ ငွေရောင်လှံကို ကျုပ် သိတယ်။ သူ တိုက်ခိုက်တာကို ကျုပ် အရင်က မြင်ဖူးတယ်"

"ဒါဆို နောက်တစ်ယောက်က ဘယ်သူလဲ။ ကြည့်ရတာ တော်တော် ငယ်သေးပုံပဲ၊ ဒါပေမယ့် ကုန်းစွန်းလျန်နဲ့ ဘယ်လိုလုပ် တန်းတူတိုက်ခိုက်နိုင်နေရတာလဲ"

"မဟုတ်ဘူး၊ အတိအကျ ပြောရရင် ဟိုလူငယ်က နည်းနည်း အားနည်းနေပုံပဲ၊ ဒါပေမယ့် ဒါတောင်မှ တော်တော် တုန်လှုပ်စရာ ကောင်းနေပြီ"

လူတိုင်း တအံ့တဩ ဆွေးနွေးနေကြသည်။ ကောင်းကင်ယံတွင် တိုက်ခိုက်နေသူ နှစ်ဦးသည် သာမန် ဒြပ်မဲ့အဆင့်ထက် များစွာ သန်မာကြောင်း ၎င်းတို့ မြင်တွေ့နိုင်သည်။ ကုန်းစွန်းလျန်သည် စကြဝဠာအဆင့်ကျင့်ကြံသူဖြစ်ကြောင်း လူအများ သိကြပြီးသားဖြစ်သည်။ ချူးယွင်ဖန်းနှင့် ပတ်သက်၍မူ မည်သူမျှ မသိကြသော်လည်း သူသည် ကုန်းစွန်းလျန်နှင့် အကြိမ်ပေါင်းများစွာ ရှုံးနိမ့်ခြင်းမရှိဘဲ ယှဉ်ပြိုင်နိုင်ခြင်းအရ အလွန်တုန်လှုပ်ဖွယ်ကောင်းလှသည်။

ကြီးမြတ်သောတရှနှင့် ပြင်ပနယ်မြေတွင် ပါရမီရှင်များစွာ တည်ရှိနေကြသည်။ ထိုအထဲတွင် မရေတွက်နိုင်သော ဒြပ်မဲ့အဆင့် ပါရမီရှင်များစွာ ပါဝင်ကြသည်။ လူတိုင်းသည် စကြဝဠာအဆင့်သို့ တက်လှမ်းနိုင်သူများကိုသာ မှတ်မိကြသည်။ စကြဝဠာအဆင့် ကျင့်ကြံသူဖြစ်လာမှသာလျှင် ကြီးမြတ်သောတရှတွင် အမှန်တကယ် ထင်ရှားကျော်ကြားသူတစ်ဦးအဖြစ် သတ်မှတ်ခံရပေလိမ့်မည်။

အခန်း (၁၇၅၂) ကျုပ် ခင်ဗျားကို ဘယ်လိုသတ်မလဲဆိုတာ ကြည့်နေလိုက်

ကြီးမြတ်သောတရှရှိ ကျင့်ကြံသူများကြားတွင် ရှေးယခင်ကတည်းက တည်ရှိခဲ့သော စကားပုံတစ်ခု ရှိလေသည်။ ဤသည်မှာ စကြဝဠာအဆင့်သို့ မရောက်ရှိသေးသူများသည် ပုရွက်ဆိတ်များသာ ဖြစ်ကြသည်ဟူသော စကားပုံဖြစ်သည်။ သို့သော် အချို့သည် အနည်းငယ် ပိုသန်မာသော ပုရွက်ဆိတ်များဖြစ်ကြ၍ အချို့သည် သာမန် ပုရွက်ဆိတ်များသာဖြစ်သည်။ စကြဝဠာအဆင့်သို့ တက်လှမ်းထားသူတစ်ဦးအနေဖြင့် ကုန်းစွန်းလျန်သည် လူသိများသူတစ်ဦးဖြစ်သည်။ သို့သော် သူနှင့် ရင်ဆိုင်တိုက်ခိုက်နေသူကို မည်သူမျှ မသိကြပေ။ ကုန်းစွန်းလျန်နှင့် ဤအဆင့်အထိ ယှဉ်ပြိုင်နိုင်ခြင်းသည် အလွန်တုန်လှုပ်ဖွယ် ကောင်းပေသည်။

"အဲဒီလူ ဘယ်ကလာမှန်း ကျုပ် မသိပေမယ့် ဒီနေ့တိုက်ပွဲတစ်ခုတည်းနဲ့တင် သူကတော့ ဟိုးလေးတကျော်ကျော် ဖြစ်သွားတော့မှာပဲ"

"ဟို... ဟိုလူက ဒြပ်မဲ့အဆင့်မှာပဲ ရှိသေးတာ" လူတစ်ယောက်က အော်ဟစ်လိုက်သည်။ ကုန်းစွန်းလျန်နှင့် တိုက်ခိုက်နေသူသည် ဒြပ်မဲ့အဆင့် ကျင့်ကြံသူသာဖြစ်ကြောင်း သိလိုက်ရသဖြင့် သူ ထိတ်လန့်တုန်လှုပ်သွားသည်။

ချူးယွင်ဖန်း၏ အရှိန်အဝါသည် အလွန် ပြင်းထန်၍ ကြောက်မက်ဖွယ်ကောင်းလှသည်။ သို့သော် ဒြပ်မဲ့အဆင့်ဟူသည် စကြဝဠာအဆင့်သို့ မဝင်ရောက်သေးသူဖြစ်သည့်အတွက် ၎င်းတို့ကြားတွင် ကြီးမားသော ခြားနားချက်များ တည်ရှိနေဆဲဖြစ်သည်။ လူအုပ်ထဲရှိ ကျင့်ကြံသူများအနက် စကြဝဠာအဆင့်သို့ ရောက်ရှိသူ မပါဝင်သော်လည်း ၎င်းသည် စစ်မှန်သော စကြဝဠာအဆင့်ကို မြင်တွေ့ဖူးကြသည်။ ၎င်းတို့ ကိုယ်တိုင် ထိုအဆင့်သို့ မရောက်ရှိသေးသော်လည်း စကြဝဠာအဆင့်၏ စွမ်းအင်ကို ကောင်းစွာ သိရှိကြသည်။

ဤအချက်ကြောင့် လူအများအပြားကို မူးမေ့လုနီပါး ခံစားရစေသည်။ ၎င်းတို့ အရှေ့ရှိ မြင်ကွင်းသည် ပုံရိပ်ယောင်တစ်ခုသာဖြစ်ပေလိ်မ့်မည်။ အကယ်၍ ချူးယွင်ဖန်းသည်လည်း စကြဝဠာအဆင့် ကျင့်ကြံသူတစ်ဦးဖြစ်ပါက ၎င်းတို့ ဤမျှပြင်းပြင်းထန်ထန် ခံစားနေရမည် မဟုတ်ပေ။ သို့သော် ချူးယွင်ဖန်းသည် ဒြပ်မဲ့အဆင့် ကျင့်ကြံသူသာဖြစ်သည်။ ဒြပ်မဲ့အဆင့် ကျင့်ကြံသူတစ်ဦးသည် စကြဝဠာအဆင့်ကို ယှဉ်ပြိုင်ခြင်းဟူသည် စိတ်ကူးယဉ် အိမ်မက်တစ်ခုသာဖြစ်ပေမည်။

သို့သော် ချူးယွင်ဖန်းက ထိုသို့သော ရယ်ဖွယ်ရာကောင်းသည့် အကြောင်းအရာကို အောင်မြင်အောင် လုပ်ဆောင်နိုင်ခဲ့သည်။ အကယ်၍ ၎င်းတို့ မျက်စိဖြင့် တပ်အပ်မမြင်တွေ့ခဲ့ရပါက ဤမျှ ရယ်စဖွယ်ရာကောင်းသော အကြောင်းအရာကို ယုံကြည်ကြမည် မဟုတ်ပေ။

"ဒါ ဘယ်လိုလုပ် ဖြစ်နိုင်လဲ။ ဒီလူက ဘယ်ကရောက်လာတာလဲ။ ဒြပ်မဲ့အဆင့်က စကြဝဠာအဆင့်နဲ့ တိုက်ခိုက်နေတာလား။ သူက ကောလာဟလတွေထဲက ဘုရင်အဆင့် ပါရမီရှင်များဖြစ်နေမလား" တစ်စုံတစ်ယောက်က တုန်ရီသောအသံဖြင့် ပြောလိုက်သည်။

ဤလောကတွင် ရေတွက်၍မရနိုင်သော ပါရမီရှင်များရှိသော်လည်း ထိုပါရမီရှင်များအကြားတွင်ပင် အဆင့်အတန်းများစွာ ခွဲခြားထားသည်။ ၎င်းအနက် မြို့ဝန်ဘွဲ့ အပ်နှင်းခံရမည့်သူများသည် နောင်တစ်ချိန်တွင် ကြီးမြတ်သောတရှ၏ အရေးပါသော ပုဂ္ဂိုလ်များဖြစ်လာကြမည်ဖြစ်၍ ၎င်းတို့သည် အလွန် ပါရမီထူးသူများဖြစ်သည်။ ၎င်းတို့သည် လီရှန်ယွမ်ကဲ့သို့ လူတစ်သိန်းတွင် တစ်ယောက်သာ ပေါ်ထွန်းနိုင်သည်။ ဂိုဏ်းကြီးဆယ်ဂိုဏ်း၏ ဂိုဏ်းခေါင်းဆောင်များပင် ဤအဆင့်တွင်သာ တည်ရှိကြသည်။

သို့သော် ၎င်းအဆင့်၏ အထက်တွင်မူ ဘုရင်အဆင့် ပါရမီရှင်များရှိကြသည်။ ထိုသို့သော ပုဂ္ဂိုလ်သည် အနာဂတ်တွင် ဘုရင်တစ်ပါးပင် ဖြစ်လာနိုင်သည်။ ကြီးမြတ်သောတရှ၏ နှစ်ပေါင်းများစွာသော သမိုင်းတစ်လျှောက်တွင် ထိုကဲ့သို့သော ပုဂ္ဂိုလ်မျိုး အနည်းငယ်သာ ပေါ်ထွန်းခဲ့သည်။ ၎င်းတို့ တစ်ဦးချင်းစီသည် ခေတ်သစ်တစ်ခု ရောက်ရှိလာခြင်းကို ကိုယ်စားပြုကြသည်။

ပို၍ မြင့်မားသော ဧကရာဇ်အဆင့် ပါရမီရှင်ဟူသည် ရှေးဟောင်းကာလများတွင်သာ တည်ရှိခဲ့ဖူးသည်။ အနည်းဆုံးလျှင် ယခုအချိန်အထိ မည်သူမျှ မကြားဖူးကြချေ။ ထို့ကြောင့် ဘုရင်အဆင့် ပါရမီရှင်ဟူသည် လောကတွင် အထူးချွန်ဆုံး ပါရမီရှင်အဖြစ် သတ်မှတ်ခံရခြင်းဖြစ်သည်။ ထိုအသံကြောင့် လူအများအပြား သတိဝင်လာ၍ ခေတ္တငြိမ်သက်သွားကြသည်။ အကယ်၍ ထိုအကြောင်းအရာသာ မှန်ကန်ပါက ဤလူငယ်သည် အမှန်တကယ် ထူးခြားလှပေသည်။ လူအများအပြား ချက်ချင်းပင် ပုံတူများ ရေးဆွဲ၍ ချူးယွင်ဖန်းနှင့် ကုန်းစွန်းလျန်တို့၏ တိုက်ခိုက်နေသည့် ပုံရိပ်များကို မှတ်တမ်းတင်လိုက်ကြသည်။ ၎င်းတို့သည် ဤသတင်းကို အမြန်ဖြန့်ဝေ၍ မိမိတို့၏ အဖွဲ့အစည်း အသီးသီးဆီ ချူးယွင်ဖန်းနှင့် ပတ်သက်သမျှ အရာအားလုံးကို စုံစမ်းခိုင်းလိုက်ကြသည်။

ထိုအချိန်တွင် ရတနာတစ်ထောင်ခန်းမ ဌာနခွဲ၌ ဝမ်ဆန်ချန်းနှင့် အဘိုးကြီးလီတို့ လက်များ နောက်ပစ်လျက် အဝေးတွင် ပြင်းထန်စွာ တိုက်ခိုက်နေကြသော ချူးယွင်ဖန်းနှင့် ကုန်းစွန်းလျန်တို့ကို ကြည့်နေကြသည်။

"ကုန်းစွန်းလျန်က သံမဏိလှံဂိုဏ်းက ပြုစုပျိုးထောင်ပေးထားတဲ့ အနှိုင်းမဲ့ ပါရမီရှင်ဆိုတာ တကယ်ပဲကို။ သံမဏိလှံဂိုဏ်းရဲ့ အင်အားက ကျုပ်တို့အဖွဲ့အစည်းနဲ့ မယှဉ်နိုင်ပေမယ့် သူတို့လည်း ထိပ်တန်း အင်အားစုတစ်ခုပဲ" အဘိုးကြီးလီက ခေါင်းညိတ်လိုက်သည်။

"တကယ် တုန်လှုပ်စရာကောင်းတာက ချူးယွင်ဖန်းပဲ။ ခင်ဗျား ရွေးချယ်ထားတဲ့လူဆိုတော့ မျှော်လင့်ထားတဲ့အတိုင်းပါပဲ။ ချူးယွင်ဖန်းက သူ့ရဲ့ ဒြပ်မဲ့အဆင့် ကျင့်စဥ်နဲ့ ကုန်းစွန်းလျန်ကို ဒီလောက်တောင် ယှဉ်ပြိုင်တိုက်နိုင်တယ်"

သို့သော် အဘိုးကြီးလီက မျက်မှောင်ကြုတ်ကာ ဆက်ပြောလိုက်သည်။

"ဒါပေမယ့် ဒီနည်းလမ်းတစ်ခုတည်းနဲ့ဆိုရင်တော့ ချူးယွင်ဖန်း ရှုံးနိမ့်သွားဖို့ များတယ်။ ကုန်းစွန်းလျန်ရဲ့ လက်ချက်နဲ့ အသေရိုက်ခံရတာတောင် ဖြစ်နိုင်တယ်။ သူ မနည်း တောင့်ခံထားပုံပဲ။ ဒြပ်မဲ့အဆင့်နဲ့ စကြဝဠာအဆင့်ဆိုတာ ကောင်းကင်နဲ့ မြေကြီးလို ခြားနားနေတာ"

"ဟုတ်တယ်၊ တိုက်ပွဲကြာရှည်လာရင် ချူးယွင်ဖန်းအတွက် မကောင်းဘူး။ ဒါပေမယ့် ဒါက ချူးယွင်ဖန်း ထွက်ပေါက်မရှိဘူးလို့ မဆိုလိုဘူး" ဝမ်ဆန်ချန်းက ပြောလိုက်သည်။

"ချူးယွင်ဖန်းက တော်တော်လေး လျှို့ဝှက်ချက် များတဲ့လူ။ ပြီးခဲ့တဲ့ ရက်အနည်းငယ်အတွင်း သူ့အကြောင်း အသေးစိတ် အချက်အလက်တွေကို ကျုပ် စုဆောင်းထားပြီးပြီ။ ခိုင်လုံတဲ့ သတင်းတွေအရ သူက လီရှန်ယွမ်ကိုတောင် ဒဏ်ရာရအောင် လုပ်နိုင်ခဲ့တယ်။ ပြီးတော့ တိုက်စစ်ရော ခံစစ်ရော သုံးလို့ရတဲ့ ဆေးမီးဖိုတစ်ခုလည်း သူ့မှာ ရှိသေးတယ်။ ဒါပေမယ့် အခုထိ ဒါတွေကို ထုတ်မသုံးသေးဘူး။ ကျုပ်အထင်တော့ ချူးယွင်ဖန်းက သူ့ခွန်အားကို အကုန် မထုတ်သေးတာပဲဖြစ်မယ်။ သူ တစ်ခုခုကို စောင့်နေပုံရတယ်။ ကျုပ်အမြင်တော့ ရလဒ်က မသေချာသေးပါဘူး"

ဝမ်ဆန်ချန်းသည် ကောင်းကင်ယံတွင် တိုက်ခိုက်နေသော ချူးယွင်ဖန်းကို မျှော်လင့်ချက်များ လင်းလက်နေသော မျက်လုံးများဖြင့် စိုက်ကြည့်လိုက်သည်။ ချူးယွင်ဖန်းသည် ဤအခြေအနေကို ပြောင်းလဲပစ်ရန် မည်သို့သော နည်းလမ်းများ အသုံးပြုမည်ကို သူ သိချင်နေမိသည်။ လူတိုင်း ဆွေးနွေးနေကြစဉ် ချူးယွင်ဖန်းနှင့် ကုန်းစွန်းလျန်တို့၏ တိုက်ပွဲသည် အထွတ်အထိပ် အခြေအနေသို့ ရောက်ရှိလာသည်။ ချူးယွင်ဖန်း ကုန်းစွန်းလျန်၏ ဖိအားပေးမှုကြောင့် အကျပ်အတည်း ဆိုက်နေဟန်ဖြင့် ဆက်တိုက် ဆုတ်ခွာနေရသည်။

"မင်း ကန့်သတ်ချကို ရောက်သွားပြီပဲ၊ ဒါပေမယ့် ကျုပ်ဘက်က ဘာမှ မလုပ်ရသေးဘူး။ ချူးယွင်ဖန်း ဒီနေ့က မင်း သေရမယ့်နေ့ပဲ"

ကုန်းစွန်းလျန်သည် တိုက်ခိုက်လေ ပို၍ စိတ်လှုပ်ရှားလာသည်။ ဒြပ်မဲ့အဆင့် ကျင့်ကြံသူဖြစ်နှင့် ချူးယွင်ဖန်းကို ဖိနှိပ်တိုက်ခိုက်ရာမှ ထွက်ပေါ်လာသည့် စိတ်ပျက်အားငယ်မှုများ နောက်ဆုံးတွင် လွင့်စင်သွားသည်။ ချူးယွင်ဖန်းတွင် မည်သည့် လှည့်ကွက်များရှိနေပါစေ စစ်မှန်သော ခွန်အားအရှေ့တွင် အရာအားလုံး အသုံးမဝင်ချေ။ ဤသို့တွေးမိသောအခါ ကုန်းစွန်းလျန်၏ စိတ်အမောများ ပြေပျောက်သွားသည်။

"ဒါက နောက်ဆုံး တိုက်ခိုက်မှုပဲ။ ကျုပ် မင်းရဲ့ အသက်ကို နှုတ်ယူပစ်မယ်" ကုန်းစွန်းလျန် အော်ဟစ်လိုက်သည်။ သူ၏ လက်ထဲရှိ ငွေရောင်လှံသည် သွေးဆာနေသော ငွေနဂါးတစ်ကောင်အဖြစ် ပြောင်းလဲသွားကာ ချူးယွင်ဖန်းဆီ ခုန်အုပ်လာသည်။ ချူးယွင်ဖန်း၏ သွေးများ နေရာအနှံ့ လွင့်စင်သွားမည့် မြင်ကွင်းမျိုး မဖြစ်ပေါ်လာခဲ့ပေ။ ယင်းအစား ချူးယွင်ဖန်း၏ ဦးခေါင်းအထက်တွင် ဆေးမီးဖိုတစ်ခု ပေါ်ပေါက်လာသည်။ ဆေးမီးဖိုသည် လျင်မြန်စွာ လည်ပတ်၍ အသက်အန္တရာယ်ရှိသော လှံချက်ကို ပိတ်ဆို့လိုက်သည်။

"တော်လောက်ပြီ။ ခင်ဗျားက စကြဝဠာအဆင့်မှာ ရှိနေရင်တောင် ဒီလောက်ပါပဲ။ ကျုပ် ခင်ဗျားကို ဘယ်လိုသတ်မလဲဆိုတာ ကြည့်ထားလိုက်"

ချူးယွင်ဖန်း၏ မျက်နှာတွင် ယခင်ကဲ့သို့ ပျာယာခတ်သော အမူအရာများမရှိတော့ဘဲ ယုံကြည်မှုများဖြင့် ပြည့်နှက်နေသည်။ သူသည် အစောပိုင်းတွင် ကုန်းစွန်းလျန်ကို လှည့်စားနေခြင်းသာဖြစ်သည်။ ယခင်က စိတ်ဓာတ်ကျနေသည့် အမူအရာများ အဘယ်သို့ ပျောက်ကွယ်သွားသနည်း။

နောက်တစ်ခဏတွင် ချူးယွင်ဖန်း၏ လက်ထဲ၌ နတ်ဖြတ်ဓား ပေါ်ပေါက်လာသည်။ သူ၏ ခန္ဓာကိုယ်ပေါ်ရှိ ချွေးပေါက်တိုင်းမှ ရွှေရောင် အမွေးအမျှင်များ ထူထပ်စွာ ထွက်ပေါ်လာသည်။ ထိုမှတစ်ဆင့် ချူးယွင်ဖန်းသည် ရွှေရောင် လူသားပုံသဏ္ဌာန်ရှိသည် ဟော့တစ်ကောင်အဖြစ် ပြောင်းလဲသွားသည်။

"သေစမ်း"

ကုန်းစွန်းလျန်သည် ထိုအချိန်တွင် အန္တရာယ်ကို သတိပြုမိသွားသည်။ သို့သော် ဓားအလင်းတန်းသည် သူ့ထံ ခုတ်ပိုင်းချလာသည်။ သူ၏ တောက်ပသော ငွေရောင်လှံကို ပစ်လွှတ်လိုက်သဖြင့် ထိုတိုက်ခိုက်မှုကို ပြန်လည် မခုခံနိုင်တော့ပေ။ လှံသည် ချူးယွင်ဖန်း၏ ဓားချက်ဖြင့် ခုတ်ဖြတ်ခံလိုက်ရသည်။ ပြီးနောက် ကုန်းစွန်းလျန်သည်လည်း သွေးများ အန်ထွက်၍ ချက်ချင်းပင် လွင့်ထွက်သွားသည်။