အခန်း (၈၇-၈၈)

အခန်း (၈၇) လမ်းပြ... မင်းရဲ့ ဂုဏ်သိက္ခာကို လွှတ်ချတတ်ဖို့ သင်ယူရမယ်

ခုံးဝူတောက်က ခေါင်းခါယမ်းလိုက်ပြီး တည်ငြိမ်စွာ ပြောဆိုသည်။

"ဘာမှမဟုတ်ပါဘူး... လမ်းပြပါ..."

"ဟုတ်ကဲ့ပါ... အရှင် နတ်ဘုရားသားတော်... ကျေးဇူးပြုပြီး ဒီဘက်ကို ကြွပါ..."

နာလန်မိသားစု ရှေးဟောင်းဘိုးဘေးကြီးသည် နောက်ဆုံးတွင် သက်ပြင်းချလိုက်နိုင်ပြီး ရိုသေလေးစားကာ မျက်နှာချိုသွေးနေသော အပြုံးတစ်ခုကို ပြသလိုက်သည်။

သူသည် ခုံးဝူတောက်နှင့်အဖွဲ့ကို နာလန်အိမ်တော်အတွင်းသို့ ခေါ်ဆောင်သွားလေ၏။

ခုံးဝူတောက်၏ ရောက်ရှိလာမှုကြောင့် ဖြစ်ပေါ်လာသော ရုတ်ရုတ်သဲသဲဖြစ်မှုသည် ကြီးမားနေပြီဖြစ်ရာ အသင်္ချေသူတော်စင်မြို့ရှိ မရေမတွက်နိုင်သော လူများ၏အာရုံစိုက်မှုကို သဘာဝကျကျ ဆွဲဆောင်နိုင်ခဲ့သည်။

အသင်္ချေသူတော်စင်မြို့ရှိ ကျင့်ကြံသူ အများအပြားသည် အံ့အားသင့်စွာ ကြည့်နေကြပြီး နာလန်အိမ်တော်ဆီသို့ သူတို့၏အကြည့်များတွင် မယုံကြည်နိုင်မှုများဖြင့် ပြည့်နှက်နေသည်။

"ကြည့်ရတာတော့ ထူးခြားတဲ့ လူငယ်သခင်လေးတစ်ယောက်က နာလန်မိသားစုကို ရောက်လာပုံပဲ..."

"နာလန်မိသားစုကို အသင်္ချေသူတော်စင်မြို့ တစ်မြို့လုံးမှာတောင် ထိပ်တန်းမိသားစုတစ်ခုလို့ သတ်မှတ်နိုင်တယ်... ပြီးတော့ နာလန်မိသားစုရဲ့ ရှေးဟောင်းဘိုးဘေးကြီးက ငါတို့အသင်္ချေသူတော်စင်မြို့ရဲ့ ထိပ်သီးအစွမ်းထက် ကျွမ်းကျင်သူတစ်ယောက်ပဲ... သူ့ရဲ့ကျင့်ကြံခြင်းက ခြေလှမ်းတစ်ဝက် သူတော်စင်နယ်ပယ် ကိုတောင် ရောက်နေပြီလို့ ငါ ကြားတယ်..."

"အသင်္ချေသူတော်စင်မြို့ရဲ့ မြို့စားတောင်မှ သူ့ကိုမြင်ရင် ရိုသေရတယ်... ဒါပေမယ့် ဒီနေ့တော့ သူက အဲ့ဒီလူငယ်သခင်လေးကို အရမ်းရိုသေလေးစားနေတယ်..."

"အဲ့ဒါက မှန်တယ် မဟုတ်လား... နာလန်မိသားစုရဲ့ ရှေးဟောင်းဘိုးဘေးကြီးက သူ့ကိုယ်သူ အစေခံအိုကြီးလို့ သုံးနှုန်းသွားတာကို အခုလေးတင် ငါ သေသေချာချာ ကြားလိုက်တယ်..."

"ဟူး... ကြည့်ရတာတော့ ဒီလူငယ်သခင်လေးရဲ့ အထောက်အထားက ငါတို့ရဲ့ စိတ်ကူးယဉ်မှုထက် ကျော်လွန်နေလောက်အောင် ကြီးမားလွန်းတယ်ထင်တယ်..."

ကောင်းကင်ဘုံ တာအိုနယ်မြေမှ ဒေသခံ ကျင့်ကြံသူများ၏ ဆွေးနွေးမှုများနှင့် နှိုင်းယှဉ်လျှင်....

တခြားတာအိုနယ်မြေများမှ ပါရမီရှင်များ၏ မျက်နှာအမူအယာများ ပြောင်းလဲသွားပြီး တစ်စုံတစ်ခုကို ဝေဝါးစွာ ခန့်မှန်းမိလိုက်ကြသည်။

ရထားလုံးတစ်စီးကို တည်ဆောက်ရန် ဝိညာဉ်ပျိုးထောင်ခြင်း နတ်ဘုရားကျောက်စိမ်း အပိုင်းအစကြီးတစ်ခုကို အသုံးပြုနိုင်စွမ်းရှိသော တည်ရှိမှုတစ်ခု...

အချိန်လေဟာနယ် တားမြစ်နယ်မြေ၏ နတ်ဘုရားသားတော်မှလွဲ၍ ဤကဲ့သို့ ဆက်ဆံမှုကို ခံစားရန် မည်သူက အရည်အချင်း ပြည့်မီမည်နည်း...

..........

"အချိန်လေဟာနယ် တားမြစ်နယ်မြေက အဲ့ဒီလူတွေက တကယ်ပဲ နာလန်မိသားစုဆီ သွားကြတာလား..."

ကောင်းကင်ဘုံအနှစ်သာရကျောင်းတော် ရှိ တောင်ထိပ်တစ်ခုပေါ်တွင်...

တုန်လှုပ်ချောက်ချား အင်မော်တယ်သည် လေတိုက်ခတ်မှုကို မျက်နှာမူ၍ မတ်တတ်ရပ်နေပြီး နာလန်မိသားစုထံသို့ ကြည့်နေသော သူ၏ အကြည့်သည် အနည်းငယ် သုန်မှုန်နေလေ၏။

ဤခန္ဓာကိုယ်၏ မူလပိုင်ရှင်သည် နာလန်မိသားစုနှင့် အိမ်ထောင်ရေး မဟာမိတ်တစ်ခု ရှိထားပြီးဖြစ်သည်။

သူသည် နာလန်မိသားစု၏ အိမ်ပါသားမက်လည်း ဖြစ်နေသည်။

ယခုချိန်၌ လူစိမ်းတစ်ယောက်သည် သူနှင့် စေ့စပ်ထားသူ၏ အိမ်သို့ ရောက်သွားလေပြီ။

ဤခန္ဓာကိုယ်၏ စိတ်ခံစားမှုများတွင် သိသာထင်ရှားသော အတက်အကျလှိုင်းတစ်ခုကို သူ ရှင်းရှင်းလင်းလင်း ခံစားနိုင်ပေ၏။

ထိုအရာသည် ဆန္ဒမရှိမှုကဲ့သို့ဖြစ်ပြီး သူ၏ အမျိုးသမီးကို တခြားတစ်ယောက်က ထိတွေ့ခြင်းခံရသည့် အရှက်ရမှုပင်။

"စိတ်မပူပါနဲ့... အခု ဒီဧကရာဇ်က မင်းရဲ့ ခန္ဓာကိုယ်ကို ရပြီဆိုတော့ ငါက လျစ်လျူရှုထားမှာ မဟုတ်ပါဘူး..."

"မင်းက အိမ်ပါသားမက် ဖြစ်တော့မှာ မဟုတ်ဘူး..."

"မင်း ဂုဏ်သိက္ခာရှိရှိ ပြန်လာနိုင်ဖို့ ဒီဧကရာဇ်က ကူညီပေးမယ်... ကောင်းကင်ကိုးထပ်ရဲ့အထက်မှာ ပျံသန်းနေတဲ့ အစစ်အမှန် နဂါးတစ်ကောင် ဖြစ်လာတာက ဘာကိုဆိုလိုလဲဆိုတာ ဒီလူမဆန်တဲ့ကောင်တွေကို သိခွင့်ပေးမယ်..."

ဤခန္ဓာကိုယ်၏ မူလပိုင်ရှင်ဖြစ်သော မုဟောက်အတွက် မဟုတ်လျှင်ပင် အချိန်လေဟာနယ် တားမြစ်နယ်မြေမှ လူများကို ဆန့်ကျင်ရန် သူ ရွေးချယ်မိပေသည်။

မည်သို့ပင်ဆိုစေကာမူ သူ၏ယခင်ဘဝက အချိန်လေဟာနယ် တားမြစ်နယ်မြေမှ ထို ကောင်းကင်ကံကြမ္မာ မဟာဧကရာဇ်ကြောင့်သာ မဟုတ်လျှင် သူ မည်သည်ကြောင့် ကြေကွဲဖွယ်ကောင်းစွာ သေဆုံးရမည်နည်း။

ဘဝတစ်သက်တာ နာကြည်းမှုကို သူ လက်စားချေရပေမည်။

.........

တစ်ချိန်တည်းမှာပင်...

နာလန်အိမ်တော်အတွင်းတွင်...

နာလန်မိသားစု၏ အဖွဲ့ဝင်များအားလုံး စုရုံးရောက်ရှိနေကြ၏။

ဤနေရာ၌ အသင်္ချေသူတော်စင်မြို့တွင် မုန်တိုင်းများ မွှေနှောက်နိုင်ပြီး ခြေတစ်ချက် ပေါက်ရုံဖြင့် အသင်္ချေသူတော်စင်မြို့ကို တုန်လှုပ်သွားစေနိုင်သော အစွမ်းထက် ကျွမ်းကျင်သူ အများအပြား ရှိနေသည်။

ဤအချိန်အခိုက်အတန့်တွင် သူတို့အားလုံးသည် အနိမ့်ဆုံး အစေခံများအလား နံဘေးတွင် ရိုသေလေးစားစွာ မတ်တတ်ရပ်နေသည်။

မည်သို့ပင်ဆိုစေကာမူ သူတို့နာလန်မိသားစု၏ အစွမ်းထက်ဆုံး ရှေးဟောင်းဘိုးဘေးကြီးသည် တစ်ချိန်က အချိန်လေဟာနယ် တားမြစ်နယ်မြေ ၏ သာမန်အစောင့်တစ်ယောက်မျှသာ ဖြစ်ခဲ့သည်။

သူတို့၏ရှေ့ရှိ လူကိုမူ ထည့်ပြောနေစရာပင် မလိုတော့ပေ။ ထိုလူသည် အချိန်လေဟာနယ် တားမြစ်နယ်မြေ၏ အမြင့်မြတ်ဆုံး နတ်ဘုရားသားတော်ပင်။

"ဒီနတ်ဘုရားသားတော် ရောက်လာလို့ မင်းတို့ အားလုံး အနေခက်နေစရာ မလိုပါဘူး... မင်းတို့ ပုံမှန်အတိုင်းပဲ နေကြပါ..."

ထိပ်ဆုံးထိုင်ခုံတွင်ရှိနေသော ခုံးဝူတောက်က သူ၏လက်ဖက်ရည်ခွက်ကို ချလိုက်ပြီး သူ၏ မျက်နှာအမူအရာသည် တည်ငြိမ်ကာ နူးညံ့နေလေ၏။

မြင့်မားသော ရာထူးတစ်ခုတွင် ရှိနေသော်လည်း သူသည် နွေဦးလေညှင်းလေး တစ်ခုကဲ့သို့ သန့်စင်အေးမြသော ခံစားချက်တစ်ခုကို ပေးစွမ်းနေသည်။

အောက်ဘက်ရှိ နာလန်မိသားစုအဖွဲ့ဝင်များ အားလုံးသည် မြှောက်ပင့်ခံရသကဲ့သို့ ရှိနေကြသည်။

သို့သော် ဤသည်မှာ ချုပ်တည်းထားသော မြင့်မြတ်သည့် အမူအရာတစ်ခုသာ ဖြစ်ကြောင်း သူတို့အားလုံး ကောင်းစွာသိထားကြ၏။

ဤလူငယ်၏ နူးညံ့ပြီး သန့်စင်သော အသွင်အပြင်သည် ကောင်းမွန်သော ကြီးပြင်းလာမှု၏ ပြသမှုတစ်ခုမျှသာ ဖြစ်သည်။

ထိုသို့မဟုတ်လျှင် တစ်ချိန်က အချိန်လေဟာနယ် တားမြစ်နယ်မြေ၏ အစောင့် တစ်ယောက် ဖြစ်ခဲ့သော သူတို့၏ရှေးဟောင်းဘိုးဘေးကြီးမျက်နှာကို အနည်းငယ် ထောက်ထားခြင်းလည်း ဖြစ်နိုင်သည်။

"ကျေးဇူးတင်ပါတယ်... အရှင် နတ်ဘုရားသားတော်..."

နာလန်မိသားစု ရှေးဟောင်းဘိုးဘေးကြီးသည် အလျင်အမြန် လက်နှစ်ဖက်ကို ပူးဆုပ်ကာ ဦးညွှတ်ပြီး ရိုသေလေးစားစွာ ပြောဆိုလိုက်သည်။

"အရှင် နတ်ဘုရားသားတော် ကလည်း ဒဏ္ဍာရီလာ ရှေးဟောင်းမဟာတာအို အမှတ်အသား အတွက် ရောက်လာတာ ဖြစ်ရမယ်... အရှင် နတ်ဘုရားသားတော် နတ်ဘုရားအရာဝတ္ထုကို ရရှိအောင် ကူညီဖို့အတွက် ငါတို့ရဲ့ နာလန်မိသားစု က ငါတို့ မိသားစုတစ်ခုလုံးရဲ့ စွမ်းအားကို အသုံးပြုဖို့ ဆန္ဒရှိပါတယ်..."

ကောင်းကင်ဘုံ တာအိုနယ်မြေတွင် ရှေးဟောင်းမဟာတာအို အမှတ်အသား ထွက်ပေါ်လာတော့မည့် သတင်းသည် လျှို့ဝှက်ချက်တစ်ခု မဟုတ်တော့ပေ။

ခုံးဝူတောက်သည် ဤရတနာအတွက် ရောက်လာခြင်းဖြစ်ကြောင်းကို သူတို့ သဘာဝကျကျ သိထားကြ၏။

"မလိုအပ်ပါဘူး... ဒီနတ်ဘုရားသားတော်က ဒီကိစ္စအတွက် ဆုံးဖြတ်ချက်တစ်ခု ချထားပြီးပြီ..."

ခုံးဝူတောက်က နောက်တစ်ကြိမ် ခပ်ဖျော့ဖျော့ပြုံးလိုက်သည်။

"ဒါပေမယ့်... ဒီနတ်ဘုရားသားတော်က ဒီကို အခုမှ ရောက်ဖူးတာဆိုတော့ အသင်္ချေသူတော်စင်မြို့အကြောင်းကို ကောင်းကောင်း နားမလည်ဘူး..."

"အခု... အသင်္ချေသူတော်စင်မြို့ပတ်လည်မှာ အေးအေးဆေးဆေး လမ်းလျှောက်ထွက်ချင်တယ်..."

ဤစကားများကို ပြောလိုက်သည်နှင့် တစ်ပြိုင်နက် နာလန်မိသားစုအဖွဲ့ဝင်များ၏ နှလုံးသားများ ချက်ချင်းတင်းကြပ်သွားသည်။

ခုံးဝူတောက်၏စကားများ နောက်ကွယ်ရှိ အဓိပ္ပာယ်ကို သူတို့ မည်သို့ မသိဘဲ နေမည်နည်း။

နာလန်မိသားစု၏ လူငယ်တပည့် အများအပြားသည် သူတို့၏မျက်လုံးများတွင် မျှော်လင့်ချက် အရိပ်အယောင်များကို ပြသလိုက်ကြသည်။

ယခုတစ်ကြိမ်တွင် ခုံးဝူတောက်၏ လမ်းလျှောက်ထွက်မှုအတွက် လမ်းပြတစ်ယောက် ဖြစ်ချင်ကြသဖြင့် သူတို့သည် ချက်ချင်းဆိုသလိုပင် စိုးရိမ်ပူပန်တကြီး စကားပြောဆိုလိုက်ကြ၏။

"အရှင် နတ်ဘုရားသားတော်... ကျွန်တော်က ကလေးဘဝကတည်းက ဒီအသင်္ချေသူတော်စင်မြို့မှာ ကြီးပြင်းလာတာပါ... အသင်္ချေသူတော်စင်မြို့မှာ လမ်းတွေ လမ်းကြားတွေ ဘယ်လောက်ရှိလဲဆိုတာကို ကျွန်တော် ရှင်းရှင်းလင်းလင်း မှတ်မိပါတယ်... အရှင်နတ်ဘုရားသားတော် ကို ကျွန်တော်က လမ်းပြပေးနိုင်ပါတယ်..."

"အရှင် နတ်ဘုရားသားတော်... ကျွန်တော်က ဒီ အသင်္ချေသူတော်စင်မြို့မှာ ကြီးပြင်းလာရုံတင် မကဘူး... အသင်္ချေသူတော်စင်မြို့ရဲ့ ပတ်ဝန်းကျင် အခြေအနေကိုလည်း အများကြီး သိတယ်... ပြီးတော့ အသင်္ချေသူတော်စင်မြို့ရဲ့ ရှေးဟောင်း သမိုင်းကြောင်းတွေကိုတောင် ကျွန်တော် သိတယ်... ကျေးဇူးပြုပြီး ကျွန်တော့်ကိုရွေးပါ အရှင် နတ်ဘုရားသားတော်..."

"အရှင် နတ်ဘုရားသားတော်... ကျွန်တော့်ကို ငယ်ငယ်ကတည်းက အသင်္ချေသူတော်စင်မြို့ စွယ်စုံကျမ်းလို့ ခေါ်ကြတယ်... အရှင်နတ်ဘုရားသားတော် လိုချင်သရွေ့ ဒီမြို့က အမျိုးသမီးတွေ ဘယ်အရောင် အတွင်းခံဝတ်လဲဆိုတာကိုတောင် ကျွန်တော် တိတိကျကျ ပြောပြနိုင်တယ်..."

"အရှင် နတ်ဘုရားသားတော်... ဒီ နိမ့်ကျတဲ့သူ က ကောင်းကင်ဘုံ တာအိုနယ်မြေတစ်ခုလုံးရဲ့ အထွေထွေ အခြေအနေကို သိတယ်... သီချင်းဆိုတတ် ကတတ်ပြီး လက်ဖက်ရည်နဲ့ ရေ လည်း ကမ်းပေးနိုင်တယ်..."

"........."

နာလန်မိသားစု မှ လူငယ်မိသားစုဝင် အများအပြားသည် သူတို့၏ အားသာချက်များကို တစ်ယောက်ပြီးတစ်ယောက် မိတ်ဆက်လာကြသည်။

သူတို့သည် ခုံးဝူတောက်က သူတို့ကို မျက်နှာသာပေးပြီး ဤခရီးစဉ်အတွက် သူ၏ လမ်းပြ ဖြစ်လာစေရန် ဤအရာကို အသုံးပြုလိုကြခြင်းပင်။

မည်သို့ပင်ဆိုစေကာမူ သူ၏ အထောက်အထားနှင့် အဆင့်အတန်းသည် ရှင်းလင်းနေပေ၏။

ဤသည်က သိပ်အသုံးမဝင်သော လမ်းပြ တစ်ယောက်မျှသာ ဖြစ်လျှင်ပင် သူတို့ ရရှိရန် အိပ်မက်မက်နေသော ဘွဲ့ထူးတစ်ခု သေချာပေါက် ဖြစ်လာပေလိမ့်မည်။

လူအုပ်ထဲတွင် ခြေတစ်လှမ်း နောက်ကျနေသော နာလန်ချိုးရန်သည် သူမ၏နှုတ်ခမ်းနီနီလေးများကို အနေရခက်စွာ စေ့ထားလိုက်သည်။

ပုံမှန်အားဖြင့် တည်ကြည်လေးနက်သော မိသားစုတပည့်များသည် မျက်နှာချိုသွေးရာတွင် နာလန်မိသားစု၏ သခင်မလေးဖြစ်သော သူမထက် ပိုမြန်လိမ့်မည်ဟု သူမ အမှန်တကယ်ကို မမျှော်လင့်ထားခဲ့ပေ။

သူမအတွက် အခွင့်အရေး ရှိတော့မည် မဟုတ်ဟု သူမ တွေးထင်လိုက်၏။

သို့သော် ခုံးဝူတောက်သည် နာလန်မိသားစုမှ လူငယ်ကျင့်ကြံသူ အများအပြားကို အာရုံမစိုက်ခဲ့ပေ။

သူ၏အကြည့်သည် လူတိုင်းကို ကျော်ဖြတ်သွားပြီး နာလန်ချိုးရန်အပေါ်သို့ ကျရောက်သွားသည်။

ဤလမ်းပြသည် နာလန်ချိုးရန် ဖြစ်ရမည်မှာ သဘာဝကျသည်။

မည်သို့ပင်ဆိုစေကာမူ သူသည် နောက်ထပ်ကိစ္စတစ်ခုအနေဖြင့် ကောင်းကင်ဘုံအနှစ်သာရကျောင်းတော်သို့ သွားရပေမည်။

သူမသည် ကောင်းကင်ဘုံအနှစ်သာရကျောင်းတော်၏ အစစ်အမှန် တပည့်တစ်ဦးဖြစ်ရုံသာမက ထိုပုံမှန်မဟုတ်သော ကောင်းကင်ကံကြမ္မာပိုင်ရှင်၏ စေ့စပ်ထားသူလည်း ဖြစ်နေသည်။

လာမည့်ကြီးမားသော ဇာတ်လမ်းအတွက် နာလန်ချိုးရန်သာ မရှိခဲ့လျှင် ထိုကိစ္စသည် သူ့အတွက် ပျော်ရွှင်မှုများစွာကို ဆုံးရှုံးသွားစေပေလိမ့်မည်။

"သခင်မလေးနာလန်က ဒီခရီးစဉ်အတွက် ဒီနတ်ဘုရားသားတော်ရဲ့ လမ်းပြ လုပ်ပေးနိုင်မလား လို့ ငါ သိချင်မိတယ်..."

ခုံးဝူတောက်၏အသံ ပဲ့တင်ထပ်သွားသည်နှင့်..

မူလက ဆူညံနေသော ခန်းမကြီးသည် ချက်ချင်းပင် သုသာန်တစပြင်ကဲ့သို့ တိတ်ဆိတ်သွားသည်။

လူတိုင်း၏အကြည့်များသည် နာလန်ချိုးရန် အပေါ်သို့ မသိစိတ်အရ စုဆုံသွားကြသည်။

အထူးသဖြင့် ယခုလေးတင် သူတို့ကိုယ်သူတို့ အားတက်သရော မိတ်ဆက်နေခဲ့ကြသော နာလန်မိသားစု၏ လူငယ်တပည့်များပင်။

ဤအချိန်အခိုက်အတန့်တွင် သူတို့သည် မနာလိုလွန်းသဖြင့် သူတို့၏မျက်လုံးများမှ အချဉ်ရည်များပင် ကျလာနိုင်သည်။

"ချိုးရန်... သမီး ဘာလို့ အဲဒီမှာ တွေဝေပြီး ရပ်နေသေးတာလဲ..."

နာလန်မိသားစု ရှေးဟောင်းဘိုးဘေးကြီး၏ ကျယ်လောင်သော အော်ဟစ်သံ ထွက်ပေါ်လာမှသာ နာလန်ချိုးရန်သည် အိပ်မက်တစ်ခုမှ နိုးလာသကဲ့သို့ ဖြစ်သွားသည်။

သူမသည် လူအုပ်ထဲမှ အလျင်အမြန် လျှောက်လှမ်းထွက်လာခဲ့သည်။

ထို့နောက် လူတိုင်း၏အကြည့်အောက်တွင် သူမသည် အလွန်အမင်း ရိုသေလေးစားစွာဖြင့် ဒူးထောက်လိုက်ပြီး သူမ၏ခေါင်းကို ငုံ့ထားကာ ရိုသေလေးစားစွာ ပြောဆိုလိုက်သည်။

"ကျေးဇူးတင်ပါတယ်... နတ်ဘုရားသားတော် ခုံးဝူတောက်... အရှင်ရဲ့ အသိအမှတ်ပြုမှု အတွက်ပါ..."

"အရှင် နတ်ဘုရားသားတော်ရဲ့ ဒီခရီးစဉ်အတွက် လမ်းပြ လုပ်ပေးခွင့်ရတာက နာလန်ချိုးရန်ရဲ့ ကံကောင်းမှုပါပဲ..."

နာလန်မိသားစု၏ သခင်မလေးအနေဖြင့် နာလန်ချိုးရန်သည် နာလန်မိသားစုက ဆက်ခံသူ တစ်ဦးအဖြစ် အမြဲတစေ ပြုစုပျိုးထောင်ခြင်းခံခဲ့ရပြီး မရေမတွက်နိုင်သည့် ခမ်းနားထည်ဝါသော အခမ်းအနား အသားကျနေလေပြီ။

သူမ၏စိတ်ကူးယဉ်တွေးတောနိုင်မှုထက် များစွာသာလွန်သော ခုံးဝူတောက်ကဲ့သို့ လူငယ် အရေးပါသည့် ပုဂ္ဂိုလ်တစ်ဦး၏ရှေ့တွင် တစ်စုံတစ်ခုကို သူမ သဘာဝကျကျ သိရှိထားသည်။

လူတစ်ယောက်သည် ဂုဏ်သိက္ခာ ဆိုသည့်အရာကို အလွန်တန်ဖိုးမထားသင့်ပေ။ လူတစ်ယောက်သည် သူ၏ကိုယ်ဟန်အမူအရာကို အနိမ့်ဆုံးအဆင့်ထိ လျှော့ချတတ်ရန် သင်ယူရပေမည်။

...

အခန်း (၈၈) လူငယ် သခင်လေး... ကြောက်မက်ဖွယ်ကောင်းတဲ့ တုံ့ပြန်တိုက်ခိုက်မှု

ထိုအချိန်မှာပင် စနစ်၏အသံ ရုတ်တရက် ပဲ့တင်ထပ်လာသည်။

[ဒင်... ကောင်းကင်ကံကြမ္မာ ဇာတ်လိုက်မင်းသမီး နာလန်ချိုးရန်က သခင်ကို အညံ့ခံကြောင်း ပြသနေတာကို ထောက်လှမ်းတွေ့ရှိရပါတယ်... သခင်က သူ့ကို တိုက်ရိုက် အမဲလိုက်ချင်ပါသလား ဒါမှမဟုတ် ယဉ်ပါးအောင် သွေးဆောင်သည့် လမ်းကြောင်းကို ရွေးချယ်မလား...]

ဤစကားကို ကြားသောအခါ ခုံးဝူတောက်သည် အချိန်တခဏမျှ တွေးတောလိုက်ပြီးနောက် အတွေးတစ်ချက်ဖြင့် ယဉ်ပါးအောင် သွေးဆောင်မည့် လမ်းကြောင်းကို သူ ရွေးချယ်လိုက်သည်။

မည်သို့ပင်ဆိုစေကာမူ နာလန်ချိုးရန်၏ မိသားစုသည် သူ၏အချိန်လေဟာနယ် တားမြစ်နယ်မြေနှင့် အနည်းငယ် ပတ်သက်မှု ရှိလေ၏။

အကယ်၍ သူသည် သူမကို တိုက်ရိုက်ဖိနှိပ်ပြီး သတ်ဖြတ်မည်ဆိုလျှင် ထိုကိစ္စသည် သူတို့ အချိန်လေဟာနယ် တားမြစ်နယ်မြေ၏ ဂုဏ်သတင်းကို အနည်းငယ် ထိခိုက်စေပေလိမ့်မည်။

ထို့ပြင် နာလန်ချိုးရန် အသက်ရှင်နေခြင်းက သူ့အတွက် ပို၍တန်ဖိုးရှိသည်။

[ဒင်... နာလန်ချိုးရန်ကို ယဉ်ပါးအောင် သွေးဆောင်တာမှာ တိုးတက်မှုက ၈ ရာခိုင်နှုန်း တိုးလာပါတယ်... တစ်ဖက်လူရဲ့ ကောင်းကင်အမိန့်တော်အမှတ် ၈၀၀ကို လျှော့ချလိုက်ပြီး ၆၂၀၀ မှတ် ကျန်ရှိနေပါတယ်...]

[နှစ်ဆပြင်းထန်တဲ့ ထိုးနှက်ချက်ကို ဖြစ်ပေါ်စေပြီး ကောင်းကင်အမိန့်တော်အမှတ် ၁၆၀၀ ကို အောင်မြင်စွာ ရရှိခဲ့တဲ့အတွက် သခင်အား ဂုဏ်ယူပါတယ်...]

ခုံးဝူတောက်က ခေါင်းညိတ်ပြပြီး ပြုံးလိုက်သည်။

"ထပါ... ဒီနတ်ဘုရားသားတော်က အခု အသင်္ချေသူတော်စင်မြို့မှာရှိတဲ့ ကောင်းကင်ဘုံအနှစ်သာရကျောင်းတော်ကို သွားလည်ဖို့ ရည်ရွယ်ထားတယ်..."

"လမ်းပြပေးဖို့ သခင်မလေး နာလန်ကို ဒုက္ခပေးရလိမ့်မယ်..."

"ဟုတ်ကဲ့ပါ..."

ခုံးဝူတောက်၏ခွင့်ပြုချက်ကို ရရှိပြီးမှသာ နာလန်ချိုးရန်သည် မတ်တတ်ထရပ်ရဲပြီး ရိုသေလေးစားစွာ သဘောတူလိုက်၏။

ခုံးဝူတောက်သည် အဘယ်ကြောင့် ကောင်းကင်ဘုံအနှစ်သာရကျောင်းတော်သို့ သွားချင်သည်ကို သူမ မသိသော်လည်း...

နာလန်ချိုးရန်သည် လိမ္မာပါးနပ်သူတစ်ဦး ဖြစ်သဖြင့် မမေးသင့်သောအရာကို မေးမည် မဟုတ်ပေ။

ခုံးဝူတောက်၏ခရီးစဉ်အတွက် လမ်းပြကို ဆုံးဖြတ်ပြီးကြောင်း မြင်သောအခါ...

နာလန်မိသားစု၏ လူငယ်တပည့် အများအပြား၏ မျက်နှာအမူအရာများသည် ရုတ်တရက် အနည်းငယ် စိတ်ဓာတ်ကျသွားကြသည်။

နာလန်ချိုးရန်သည် သူတို့မိသားစု၏ သခင်မလေး ဖြစ်သော်လည်း...

ထိုကဲ့သို့ ကြီးမားသည့် အခွင့်အရေးမျိုး သူမအပေါ် ကျရောက်သွားခြင်းက သူတို့၏မျက်လုံးများ နီမြန်းလာသည်အထိ မနာလိုဖြစ်စေခဲ့သည်။

..........

ကြိုတင်ပြင်ဆင်မှုတချို့ ပြုလုပ်ပြီးနောက် နာလန်ချိုးရန်သည် ခုံးဝူတောက်ကို ဦးဆောင်ကာ ကောင်းကင်ဘုံအနှစ်သာရကျောင်းတော်ဆီသို့ ဦးတည်သွားလေ၏။

ခုံးဝူတောက်သည် ခုံးရွှမ်ယန်နှင့် တခြား ဧကရာဇ်သားတော်အစဉ်အဆက်များအတွက် တခြားကိစ္စရပ်များကို စီစဉ်ပေးခဲ့သည်။

ယခုတစ်ကြိမ် ကောင်းကင်ဘုံအနှစ်သာရကျောင်းတော်သို့ သွားသောအခါ ခုံးဝူတောက်သည် ခုံးကျန်ယွဲ့နှင့် နာလန်ချိုးရန်တို့ကိုသာ ခေါ်ဆောင်သွားခဲ့သည်။

ခရီးစဉ်သည် အတားအဆီးမရှိ ချောမွေ့ခဲ့ပေ၏။

နာလန်ချိုးရန်၏ လမ်းညွှန်မှုအောက်တွင် သူတို့ သုံးယောက်သား ကောင်းကင်ဘုံအနှစ်သာရကျောင်းတော်၏ တောင်တံခါးသို့ လျှင်မြန်စွာ ရောက်ရှိလာကြသည်။

ကောင်းကင်ဘုံအနှစ်သာရကျောင်းတော်၏ တောင်တံခါးကို နက်နဲသိမ်မွေ့ အဝါရောင်ကြယ်ပျံဖြင့် ဖန်တီးထားပြီး ပေရာချီမြင့်မားကာ ပျံသန်းရေလှေဆယ်စင်းကျော် တပြိုင်နက်တည်း ဝင်ဆံ့နိုင်စွမ်းရှိသည်။

တောင်တံခါး၏နံဘေးတွင် ယနေ့ အစောင့်တာဝန်ကျနေသော ကောင်းကင်ဘုံအနှစ်သာရကျောင်းတော်မှ တပည့် နှစ်ဦး မတ်တတ်ရပ်နေကြ၏။

နာလန်ချိုးရန်ကို မြင်သောအခါ တပည့် နှစ်ဦးက ရိုသေလေးစားစွာဖြင့် အလျင်အမြန် ဦးညွှတ်အရိုအသေပြုလိုက်ကြသည်။

"စီနီယာအစ်မနာလန်ကို နှုတ်ခွန်းဆက်သပါတယ်..."

နာလန်ချိုးရန် သည် ကောင်းကင်ဘုံအနှစ်သာရကျောင်းတော်၏ အစစ်အမှန်ဆက်ခံသူ ဆယ်ယောက်အနက်မှ တစ်ယောက်ပင်။

နာလန်မိသားစု၏ သခင်မလေးဆိုသည့် သူမ၏ အထောက်အထားနှင့် ပေါင်းစပ်လိုက်လျှင် ကောင်းကင်ဘုံအနှစ်သာရကျောင်းတော် တစ်ခုလုံးရှိ တပည့်များက သူမကို အလွန်လေးစားကြသည်။

"အင်း..."

နာလန်ချိုးရန်က ခေါင်းညိတ်ပြလိုက်ပြီးနောက် နောက်သို့လှည့်ကာ မိတ်ဆက်ပေးလိုက်သည်။

"ဒီအရှင်နှစ်ယောက်က ငါ့ရဲ့နာလန်မိသားစုက ဂုဏ်သရေရှိ ဧည့်သည်တော်တွေပဲ... ငါတို့ရဲ့ ကျောင်းတော်ကို လာလည်ဖို့ ရည်ရွယ်ထားတာတယ်..."

ဤစကားကို ကြားသောအချိန်မှသာ ထိုလူနှစ်ယောက်သည် နာလန်ချိုးရန်၏နောက်ရှိ ခုံးဝူတောက်နှင့်ခုံးကျန်ယွဲ့တို့ကို သတိပြုမိသွားကြသည်။

အထူးသဖြင့် ခုံးဝူတောက်ကို မြင်သောအခါ တပည့်နှစ်ဦးလုံးသည် သူတို့၏နတ်ဘုရားစိတ်ဝိညာဉ်အား ရှင်းပြ၍မရနိုင်သော စွမ်းအားတစ်ခု၏ ရိုက်ခတ်ခြင်းကို ခံလိုက်ရသကဲ့သို့ ခံစားလိုက်ရသည်။

သူတို့၏ နတ်ဘုရားစိတ်ဝိညာဉ် တုန်ယင်နေစဉ်တွင် သူတို့ကိုယ်သူတို့ အရေးမပါဟူသော ခံစားချက်တစ်ခုက သူတို့၏စိတ်နှလုံးသားထဲတွင် ရုတ်တရက် ဖြစ်ပေါ်လာသည်။

ယခုအချိန်၌ သူတို့သည် တောက်ပနေသော ကောင်းကင်ယံ၏ လင်းလက်နေသည့် နေမင်းကြီးကို မျက်မြင်တွေ့ရှိရသော စကြဝဠာထဲရှိ အထင်ရှားဆုံးသော ဖုန်မှုန့်လေးများ ဖြစ်နေသကဲ့သို့ ခံစားလိုက်ရသည်။

သူတို့ကို ပို၍ထိတ်လန့်သွားစေသောအရာမှာ တစ်ဖက်လူ၏ အသက်အရွယ်သည် သူတို့နှင့် တူညီနေပုံရခြင်းပင်။

သို့သော် သူတို့အကြားရှိ မမြင်ရသော ကွာဟချက်သည် ကျော်လွှား၍မရနိုင်သော ချောက်ကမ်းပါးကြီးတစ်ခုကဲ့သို့ဖြစ်ပြီး သူတို့ တစ်သက်လုံး အချိန်ကုန်ခံလျှင်ပင် ဘယ်သောအခါမျှ ဖြတ်ကျော်နိုင်မည် မဟုတ်သော ကွာဟချက်တစ်ခုပင်။

ခန့်မှန်းချက်တစ်ခုက သူတို့၏စိတ်နှလုံးသားများထဲတွင် တပြိုင်နက်တည်း ဖြစ်ပေါ်လာသည်။

နာလန်ချိုးရန် ပြောသော အရှင်နှစ်ယောက်သည် တခြားတာအိုနယ်မြေများရှိ ထိပ်တန်း အင်အားစုများမှ ဆက်ခံသူများ ဖြစ်ပေမည်။

တပည့်နှစ်ယောက်သည် သူတို့၏တွေဝေမိန်းမောနေမှုမှ နောက်ဆုံးတွင် ပြန်လည်သတိဝင်လာပြီး အလျင်အမြန် ဦးညွှတ်လိုက်ကြသည်။

"အရှင် နှစ်ယောက်ကို ဂါရဝပြုပါတယ်..."

"အရှင် နှစ်ယောက်က ငါတို့ရဲ့ ကောင်းကင်ဘုံအနှစ်သာရကျောင်းတော်ကို လာလည်တာက တကယ့်ကို ငါတို့ရဲ့ ကျောင်းတော်အတွက် ဂုဏ်ကျက်သရေကို ယူဆောင်လာပေးတာပါပဲ..."

"အရှင်တို့... ခဏလောက် စောင့်ပေးပါ... ငါတို့ရဲ့ ကျောင်းအုပ်ကြီးဆီ အခုချက်ချင်း သတင်းပို့လိုက်ပါ့မယ်..."

အကယ်၍ တခြားသာမန်လူများသာ ဖြစ်ခဲ့လျှင် ကောင်းကင်ဘုံအနှစ်သာရကျောင်းတော်သို့ တိုက်ရိုက်ဝင်ရောက်ရန် တစ်ဖက်လူသည် ချီတစွန်းတစကိုသာ ချန်ထားခဲ့ရန် လိုအပ်ပေလိမ့်မည်။

သို့သော် ခုံးဝူတောက်တို့နှစ်ယောက်၏ အရှိန်အဝါသည် အလွန်အစွမ်းထက်လွန်းနေပြီး သူတို့သည် နာလန်မိသားစု၏ ဂုဏ်သရေရှိ ဧည့်သည်တော်များလည်း ဖြစ်ကြသည်။

ဤသည်က သူတို့ကို ပေါ့ဆစွာ မနေရဲအောင် ဖြစ်စေခဲ့ပြီး ခုံးဝူတောက်ကို ကိုယ်တိုင်ကိုယ်ကျ ကြိုဆိုရန်အတွက် ကျောင်းအုပ်ကြီးထံသို့ အကြောင်းကြားရန် ပြင်ဆင်နေကြသည်။

"မလိုပါဘူး..."

သို့သော် ခုံးဝူတောက်က ကျောင်းတော်တပည့် နှစ်ဦးကို ကြားဖြတ်ပြောဆိုလိုက်သည်။

"ငါက ဒီတိုင်း လာလည်တာပါ... သခင်မလေး နာလန်က ရှင်းရှင်းလင်းလင်း ပြောပြီးသွားပြီဆိုတော့...ဒါကို ဒီလောက်ထိ ဒုက္ခများအောင် လုပ်ဖို့ မလိုဘူး မဟုတ်လား..."

"ဒါ..."

ကျောင်းတော်တပည့်နှစ်ဦးက တစ်စုံတစ်ခုကို ထပ်ပြောလိုသေးသော်လည်း ခုံးဝူတောက်၏ အနည်းငယ် စိတ်မရှည်သော အကြည့်ကို ခံစားလိုက်ရသည်။

သူတို့၏မျက်နှာအမူအရာများ အလွန်အမင်း ပြောင်းလဲသွားပြီး သူတို့က အလျင်အမြန် ဦးညွှတ်အရိုအသေပြုလိုက်၏။

"ဟုတ်ကဲ့ပါ... အရှင်တို့ ဝင်သွားလို့ ရပါပြီ..."

တစ်ဖက်လူ၏လုပ်ရပ်သည် စည်းမျဉ်းများနှင့် အနည်းငယ် ဆန့်ကျင်နေသော်လည်း...

သူတို့သည် ကျောင်းတော်၏ သာမန်တပည့် များသာဖြစ်ပြီး အလုပ်ချိန်တစ်ခုအတွက် စိတ်ဝိညာဉ်ကျောက်တုံး အနည်းငယ်မျှသာ ရရှိကြသည်။

ဤကိစ္စအတွက် သူတို့၏အသက်ဖြင့် စွန့်စားရန် မလိုအပ်ပေ။

ခုံးဝူတောက် တောင်တံခါးထဲသို့ ဝင်ရောက်သွားပြီး သူ၏အရှိန်အဝါ လုံးဝပျောက်ကွယ်သွားမှသာ....

တပည့် နှစ်ဦးသည် ဝန်ထုပ်ဝန်ပိုးကြီးတစ်ခု ပျောက်ကွယ်သွားသကဲ့သို့ ခံစားလိုက်ရပြီး သက်ပြင်းရှည်ကြီးများ ချလိုက်ကြသည်။

ဂျူနီယာဖြစ်သော ကျောင်းတော်တပည့်တစ်ဦးက အနည်းငယ် စိုးရိမ်ပူပန်သောအသံဖြင့် ပြောဆိုသည်။

"စီနီယာအစ်ကို... ငါတို့ရဲ့ ကောင်းကင်ဘုံအနှစ်သာရကျောင်းတော်ကို အခု ဒီလိုမျိုး ကြောက်စရာကောင်းတဲ့ လူငယ်သခင်လေး တစ်ယောက် ရောက်လာပြီ... တကယ်လို့ ငါတို့က ဒါကို ငါတို့ရဲ့ကျောင်းအုပ်ကြီးဆီ သတင်းမပို့ရင်..."

"ဒါက ပြဿနာတွေ ဖြစ်လာနိုင်မလား..."

မည်သို့ပင်ဆိုစေကာမူ ကောင်းကင်ဘုံအနှစ်သာရကျောင်းတော်သည် ကောင်းကင်ဘုံ တာအိုနယ်မြေရှိ ထိပ်တန်းကျင့်ကြံခြင်းကျောင်းတော်ပင်။

ကျောင်းတော်ထဲတွင် မောက်မာထောင်လွှားပြီး အလွန်အမင်း ပါရမီရှိသော ပုဂ္ဂိုလ်အများအပြား ရှိနေသည်။

အကယ်၍ လူကဲခတ်မတတ်သော လူတချို့က ခုံးဝူတောက်ကို စော်ကားမိမည်ဆိုလျှင် ထိုအရာသည် သူတို့၏ကျောင်းတော်သို့ အဆုံးအစမရှိသော ဘေးဒုက္ခများကို ယူဆောင်လာမည် မဟုတ်လော။

"စိတ်မပူပါနဲ့... အဲ့ဒီလူငယ်သခင်လေးကို လမ်းပြပေးရတဲ့ တာဝန်ရှိသူက စီနီယာအစ်မနာလန်ဆိုတာ မမေ့နဲ့..."

အနည်းငယ် အသက်ပိုကြီးသော တခြား ကျောင်းတော် တပည့်က ပြောဆိုသည်။

"ငါတို့ရဲ့ ကောင်းကင်ဘုံအနှစ်သာရကျောင်းတော်ရဲ့ အစစ်အမှန် တပည့်တစ်ယောက်အနေနဲ့ စီနီယာအစ်မနာလန်က အဲ့ဒီအရှင်ကို ဘယ်သူ့ကိုမှ စော်ကားခွင့်ပြုမှာ မဟုတ်ဘူး..."

"ဒါ့ပြင် အဲ့ဒီအရှင်နှစ်ယောက်က မျက်နှာသစ်တွေဆိုတော့ တခြားအကြီးအကဲတွေက သေချာပေါက် သတိထားမိမှာပါ..."

တစ်ချိန်တည်းမှာပင် ထိုကျောင်းတော်တပည့် သည်လည်း သံသယတချို့ကို ခံစားနေရသည်။

သူတို့၏ စီနီယာအစ်မနာလန်ကို ဤမျှထိ ရိုသေလေးစားစေနိုင်သော လူငယ်တည်ရှိမှု၏ဇစ်မြစ်သည် မည်သည့်အရာ ဖြစ်မည်နည်း။

..........

ကောင်းကင်ဘုံအနှစ်သာရကျောင်းတော်၏ အနက်ရှိုင်းဆုံး နေရာတွင်...

ကျောင်းတော်၏ မဟာအကြီးအကဲနှင့် စစ်တုရင် ကစားနေသော အဘိုးအိုတစ်ဦးသည် ရုတ်တရက် အေးခဲတောင့်တင်းသွားပြီး စစ်တုရင်နယ်ရုပ်တစ်ခုကို ကိုင်ထားသော သူ၏ လက်သည် လေထဲတွင် ဆိုင်းငံ့သွားလေ၏။

သူ၏ ပုံမှန်အားဖြင့် တည်ငြိမ်နေသော မျက်နှာသွင်ပြင်များသည် ယခုအချိန်၌ မယုံနိုင်လောက်အောင် အံ့အားသင့်တုန်လှုပ်နေသည့် အမူအရာကို ပြသနေသည်။

"ကျောင်းအုပ်ကြီး... ဘာဖြစ်လို့လဲ... ခင်ဗျားက ဘာလို့ ဒီလောက်တောင် အံ့အားသင့်နေတဲ့ပုံပေါက်နေတာလဲ..."

မျက်နှာချင်းဆိုင်ရှိ မဟာအကြီးအကဲက စိတ်ရှုပ်ထွေးနေသော အမူအရာဖြင့် မေးမြန်းလိုက်သည်။

သူ၏ရှေ့ရှိ အဘိုးအိုသည် ကောင်းကင်ဘုံအနှစ်သာရကျောင်းတော်၏ ကျောင်းအုပ်ကြီး အစစ်အမှန်ပုဂ္ဂိုလ်ထျန်ယွီပင်။

အစစ်အမှန်ပုဂ္ဂိုလ်ထျန်ယွီသည် မဟာအကြီးအကဲ၏ မေးခွန်းကို ပြန်မဖြေခဲ့ပေ။

သူ၏မျက်နှာသည် ပို၍ဖြူဖျော့လာပြီးနောက် ရုတ်တရက် အသံတစ်သံနှင့်အတူ သူသည် အလျင်အမြန် မတ်တတ်ရပ်လိုက်ပြီး သူ၏ရှေ့ရှိ စစ်တုရင်ခုံကိုပင် မှောက်ကျသွားစေခဲ့သည်။

သို့သော် သူသည် သူ၏ကိုယ်ပိုင်အမူအရာ ပျက်ယွင်းသည့် အပြုအမူကို လုံးဝလျစ်လျူရှုကာ ကျောင်းတော်တောင်တံခါး၏ လမ်းကြောင်းဆီသို့ လှည့်ကြည့်လိုက်၏။

"ငါတို့ရဲ့ ကောင်းကင်ဘုံအနှစ်သာရကျောင်းတော်ထဲကို အမည်မသိ အစွမ်းထက် ကျွမ်းကျင်သူနှစ်ယောက် ဝင်လာတယ်..."

အံ့အားတသင့် ရေရွတ်ပြီးနောက် အစစ်အမှန်ပုဂ္ဂိုလ်ထျန်ယွီသည် အဓိပ္ပာယ်မရှိသော စကားများ ဆက်မပြောတော့ဘဲ မှန်းဆရန်အတွက် မှော်ပညာရပ်တစ်ခုကို ချက်ချင်းစတင် လုပ်ဆောင်လိုက်သည်။

သူ၏အာရုံခံစားမှုအရ သူတို့၏ကောင်းကင်ဘုံအနှစ်သာရကျောင်းတော်သို့ ဝင်ရောက်လာသော အမည်မသိ အစွမ်းထက် ကျွမ်းကျင်သူ နှစ်ဦးသည် အလွန်ငယ်ရွယ်လေ၏။

သူတို့သည် တခြားတာအိုနယ်မြေများရှိ ထိပ်တန်းအင်အားစုများမှ ဆက်ခံသူများ ဖြစ်နိုင်သည်ဟု သူ သံသယဝင်မိသည်။

သို့သော် သူ၏မှန်းဆမှုတစ်ဝက်ခန့် ရောက်ရှိချိန်မှာပင် ကြီးမားသော ကြောက်မက်ဖွယ်ရာ တစ်ခုနှင့် ကြုံတွေ့ရပုံရပြီး သူ၏ခန္ဓာကိုယ်တစ်ခုလုံးရှိ သွေးချီများ နောက်ပြန်စီးဆင်းသွားသည်။

နောက်ဆုံးတွင် 'ဖူး' ဟူသော အသံနှင့်အတူ သူသည် သွေးအမြောက်အများကို အန်ထုတ်လိုက်၏။

"ကျောင်းအုပ်ကြီး..."

မဟာအကြီးအကဲက သူ့ကို ကူညီပေးရန် အလျင်အမြန် ရှေ့သို့တိုးသွားလေသည်။

ဤအချိန်အခိုက်အတန့်တွင် သူ၏မျက်နှာတွင်လည်း အံ့အားသင့်တုန်လှုပ်မှုများဖြင့် ပြည့်နှက်နေသည်။

သူတို့၏ကျောင်းအုပ်ကြီးသည် မယုံနိုင်လောက်အောင် အစွမ်းထက်ပေ၏။ သူသည် မှန်းဆရန် စတင်ရုံဖြင့် မည်သည်ကြောင့် ဤမျှထိ ပြင်းထန်သော တန်ပြန်တိုက်ခိုက်မှုမျိုးကို ခံစားရသနည်း။

"အဟွတ်... အဟွတ်... ငါ အဆင်ပြေပါတယ်..."

အစစ်အမှန်ပုဂ္ဂိုလ်ထျန်ယွီက လက်ဝှေ့ယမ်းလိုက်ပြီးနောက် အလျင်အမြန် ပြောဆိုသည်။

"မြန်မြန်... ငါ့ကို ရှေ့ဆက်သွားဖို့ ကူညီပေးပါ... ငါ အဲ့ဒီလူငယ်သခင်လေးနဲ့ သွားတွေ့ရမယ်..."

သူ၏ကျင့်ကြံခြင်းသည် ခြေလှမ်းတစ်ဝက် သူတော်စင်နယ်ပယ်တွင်သာ ရှိသေးပြီး သူတော်စင်နယ်ပယ်သို့ အမှန်တကယ် မရောက်ရှိသေးသော်လည်း...

သူသည် အရာများစွာကို မှန်းဆရန် ကောင်းကင်ဘုံလျှို့ဝှက်ချက်များ၏ စွမ်းအားအချို့ကို ငှားရမ်းနိုင်လေပြီ။

သို့သော် ယခုလေးတင် သူသည် မှန်းဆရန် အတွေးတစ်ခုသာ ရှိသေးပြီး ထိုသို့သော ကြောက်မက်ဖွယ်ကောင်းသည့် တန်ပြန်တိုက်ခိုက်မှုကို ခံစားခဲ့ရသည်။

ဤလူငယ်သခင်လေးတွင် သူ၏စိတ်ကူးယဉ်တွေးတောနိုင်မှုထက်ပင် များစွာသာလွန်သော ကြောက်မက်ဖွယ်ကောင်းသည့် ဇစ်မြစ်တစ်ခု ရှိနေမည်မှာ သံသယဖြစ်ဖွယ်မရှိချေ။

သူတို့၏ကောင်းကင်ဘုံအနှစ်သာရကျောင်းတော်သည် ဤအရှင်ကို လုံးဝလျစ်လျူရှုထား၍ မရချေ။