အခန်း (၁၆၃-၁၆၄)

ထာဝရသိုင်းတာအိုအရှင်

အခန်း (၁၆၃) - စစ်ကူတောင်းခံခြင်း

ဘာသာပြန် - အားသစ်

ကြယ်တာရာပူဖောင်းမှာ အလွန်ပင် ခမ်းနားလှသော်လည်း လင်းဖုန်း၏ စိတ်အစဉ်မှာ တုန်လှုပ်သွားခဲ့ရသည်။ ဤလှပသောပူဖောင်း ပေါက်ကွဲသွားပါက မည်မျှ ကြောက်မက်ဖွယ်ကောင်းသော စွမ်းအားများ ထွက်ပေါ်လာမည်ကို သူ ကောင်းကောင်းခံစားမိသည်။ မည်သို့ပင်ဆိုစေကာမူ သူသည် ထိုပူဖောင်းထဲသို့ ကြယ်တာရာစွမ်းအား အမျှင်ပေါင်း ၃၀၀၀ ထည့်သွင်းထားပြီး ဖြစ်သည်။

အမျှင်ပေါင်း ၃၀၀၀ နှင့်ပင် ကန့်သတ်ချက်သို့ မရောက်သေးပေ။ ထို့ကြောင့် လင်းဖုန်းသည် ကြယ်တာရာစွမ်းအားများ ပိုမိုထည့်သွင်းကာ ဟင်းလင်းပြင်ပူဖောင်း၏ စွမ်းအား ကန့်သတ်ချက်ကို ဆက်လက်စမ်းသပ်ရန် ဆုံးဖြတ်လိုက်သည်။

သုံးထောင့်ငါးရာ၊ လေးထောင်...

ပူဖောင်းထဲရှိ ကြယ်တာရာစွမ်းအား အမျှင်ပေါင်း ၄၀၀၀ သို့ ရောက်ရှိသွားသောအခါ လင်းဖုန်း အနည်းငယ် ရုန်းကန်လာရကြောင်း သိသိသာသာ ခံစားလိုက်ရသည်။ အမျှင်ပေါင်း ၄၀၀၀ ကျော်သွားသည်နှင့် သူ စုစည်းထားသော ကြယ်တာရာပူဖောင်းမှာ အနည်းငယ် မတည်မငြိမ် ဖြစ်လာပြီး အချိန်မရွေး ပြိုကွဲတော့မည့်အလား ဖြစ်နေသည်။

"စိတ်ဆန္ဒ ခိုင်မာမှု မလုံလောက်တာပဲ"

လင်းဖုန်း အကြောင်းရင်းကို ရှာတွေ့သွားသည်။ ဟင်းလင်းပြင်ပူဖောင်းထဲသို့ ကြယ်တာရာစွမ်းအား ထည့်သွင်းရာတွင် အကန့်အသတ် မရှိပုံရသည်။ ဤဟင်းလင်းပြင်ပူဖောင်းနည်းစနစ်မှာ တကယ့်ကို ကြောက်စရာကောင်းသော သိုင်းပညာရပ်တစ်ခုပင်။ သို့သော် လင်းဖုန်း၏ စိတ်ဆန္ဒမှာမူ ကန့်သတ်ချက် ရှိနေသည်။ ပူဖောင်းထဲတွင် ကြယ်တာရာစွမ်းအားများ အလွန်တရာ များပြားလာပါက သူ မထိန်းချုပ်နိုင်တော့ပေ။ ထိုပူဖောင်းမှာ အလိုအလျောက် ပြိုကွဲသွားပေလိမ့်မည်။

"ငါ တည်တည်ငြိမ်ငြိမ် ထိန်းချုပ်နိုင်တဲ့ အဆင့်က အမျှင်ပေါင်း ၄၀၀၀ ဝန်းကျင်ပဲ။ အဲဒီထက် ပိုသွားရင် ငါ မထိန်းချုပ်နိုင်တော့ဘူး"

လင်းဖုန်း အကြည့်များ စူးရှသွားသည်။ ကြယ်တာရာစွမ်းအား အမျှင်ပေါင်း ၄၀၀၀ ဆိုသည်မှာ အသွင်ပြောင်းနယ်ပယ် ဒုတိယအဆင့် သိုင်းသမားတစ်ဦး၏ ကြယ်တာရာစွမ်းအားထက် လေးဆခန့် ပိုများသဖြင့် အလွန်ပင် များပြားလှသော ပမာဏ ဖြစ်သည်။

ဤမျှများပြားလှသော စွမ်းအားများဖြင့် စုစည်းထားသည့် ပူဖောင်းတစ်ခုတည်းက မည်မျှအထိ စွမ်းအားကြီးမားလိုက်မည်နည်း။

လောလောဆယ် လျှို့ဝှက်အခန်းထဲတွင် နှိုင်းယှဉ်စရာ အရာဝတ္ထု မရှိပေ။ သူ ခေတ္တမျှ စဉ်းစားလိုက်သည်။ ဟင်းလင်းပြင်ပူဖောင်းကို သိုင်းသမားများနှင့် ရင်ဆိုင်ရာတွင် တစ်ခါမှ အသုံးမပြုဖူးသေးပေ။ သူ အံကြိတ်ကာ သူ၏ လက်ဖဝါးကို ကြယ်တာရာပူဖောင်းထဲသို့ ထိုးသွင်းလိုက်သည်။

ထို့ပြင် သူ၏ ခန္ဓာကိုယ်ထဲတွင် ကျန်ရှိနေသော အမျှင်ပေါင်း ၁၄၀၀ ကျော်ကို လက်ဖဝါးတွင် စုစည်းကာ အကာအကွယ် အလွှာတစ်ခု ဖန်တီးလိုက်သည်။ သူသည် ကြယ်တာရာစွမ်းအား အကာအကွယ်နှင့် ရင်ဆိုင်ရပါက ဤပူဖောင်းက မည်မျှအထိ စွမ်းအားပြနိုင်မည်ကို ကိုယ်တိုင် စမ်းသပ်လိုခြင်း ဖြစ်သည်။

"ပြိုကွဲစေ"

လင်းဖုန်း၏ စိတ်အမိန့်ကြောင့် ကြယ်တာရာစွမ်းအား အမျှင်ပေါင်း ၄၀၀၀ ဖြင့် စုစည်းထားသော ပူဖောင်းမှာ လျင်မြန်စွာ စတင် ပြိုကွဲသွားတော့သည်။

ဤပူဖောင်းမှာ အလွန်လှပပြီး ကြောက်စရာကောင်းသော အရှိန်အဝါမျိုး မရှိဟု ထင်ရသော်လည်း ၎င်းသည် စကြဝဠာအတွင်းရှိ ကြယ်များ ပြိုကွဲပျက်စီးခြင်း ဖြစ်စဉ်ကို တုပထားခြင်း ဖြစ်သည်။ ဤသည်မှာ ကြောက်မက်ဖွယ်ကောင်းသော တွင်းနက်တစ်ခုကို ဖြစ်ပေါ်စေနိုင်သည့် ဖြစ်စဉ်မျိုး ဖြစ်သည်။

ဤဖြစ်စဉ်အတွင်း မည်မျှအထိ ကြီးမားသော ဖျက်ဆီးအားများ ထွက်ပေါ်လာမည်နည်း။

ယခင်က သင်းခွေချပ်နတ်ဆိုးများကို သတ်ဖြတ်စဉ် လင်းဖုန်းအတွက် အလွန်လွယ်ကူသလို ခံစားခဲ့ရသည်။ သူသည် ဟင်းလင်းပြင်ပူဖောင်းမှာ အလွန်သန်မာသည်ဟုသာ သိထားပြီး မည်မျှအထိ အစွမ်းထက်မည်ကိုမူ တိုက်ရိုက် နားလည်ထားခြင်း မရှိပေ။

ယခု သူ၏ လက်မောင်းဖြင့် ကိုယ်တိုင် စမ်းသပ်ကြည့်သောအခါမှသာ အလွန်အမင်း ကြောက်စရာကောင်းသော အရှိန်အဝါတစ်ခု ပေါက်ကွဲထွက်လာသည်ကို သူ ရုတ်တရက် အာရုံခံမိလိုက်သည်။

ကြောက်စရာကောင်းလှသည်။ အလွန့်အလွန်ပင် ကြောက်စရာကောင်းလှသည်။ ခဏတွင်းချင်းမှာပင် လင်းဖုန်းသည် သေမင်း၏ အငွေ့အသက်ကို ခံစားလိုက်ရသည်။ သူ့နှလုံးသားထဲတွင်လည်း အစွန်းရောက် ကြောက်ရွံ့မှုများ စီးဆင်းသွားသည်။

ရှင်ခြင်းနှင့် သေခြင်းကြား အခြေအနေတွင် ကြီးကြီးမားမား ထိတ်လန့်ကြောက်ရွံ့တတ်ကြသည်။ လင်းဖုန်းသည် ဤခမ်းနားသော ပူဖောင်းကြောင့် သေမင်း၏ အငွေ့အသက်ကို တိတိကျကျ အာရုံခံမိခြင်း ဖြစ်သည်။ ပူဖောင်းများ ပြိုကွဲသွားစဉ်က ထိုသင်းခွေချပ်နတ်ဆိုးများသည်လည်း ဤကဲ့သို့ပင် ခံစားခဲ့ရမည်ဟု သူ ယုံကြည်သည်။

ကြောက်စရာကောင်းသော အရှိန်အဝါများ ပြန့်နှံ့လာသော်လည်း လင်းဖုန်းတွင် လက်မောင်းကို ပြန်ရုပ်သိမ်းရန် အခွင့်အရေး မရှိတော့ပေ။ သူသည် ခန္ဓာကိုယ်ထဲရှိ ကြယ်တာရာစွမ်းအားများကို အရူးအမူး အသက်သွင်းကာ လက်ဖဝါးပေါ်တွင် ထူထပ်သော အကာအကွယ်အလွှာတစ်ခုအဖြစ် စုစည်းလိုက်ရုံသာ တတ်နိုင်တော့သည်။

သိုင်းပညာရှင်များသည် ကြယ်တာရာစွမ်းအား မကုန်ခန်းသရွေ့ မသေနိုင်ပေ။

ဤသည်မှာ မပြောင်းလဲနိုင်သော စည်းမျဉ်းတစ်ခုအလားပင်။ ကြယ်တာရာပူဖောင်း ပြိုကွဲသွားချိန်တွင် လင်းဖုန်းမှာ နာကျင်မှုကိုပင် မခံစားလိုက်ရပေ။ ထိုဖြစ်စဉ်မှာ တစ်စက္ကန့် သို့မဟုတ် တစ်ခဏအတွင်းသာ ဖြစ်နိုင်သည်။ ပူဖောင်းမှာ အပ်ဖျားလေးတစ်ခုအထိ ကျုံ့ဝင်သွားပြီးနောက် လုံးဝ ကွယ်ပျောက်သွားသည်။

လင်းဖုန်း၏ လက်ဖဝါးမှာလည်း ပူဖောင်းနှင့်အတူ လုံးဝပျောက်ကွယ်သွားသည်။ လက်ကောက်ဝတ်နေရာမှစ၍ ထူးဆန်းစွာ ပျောက်ကွယ်သွားခြင်း ဖြစ်သည်။ ၎င်းမှာ ဓားထက်ထက်ဖြင့် ခုတ်ဖြတ်လိုက်သည်ထက်ပင် ပိုမိုချောမွေ့နေပြီး ဘာအကြောင်းရင်းမှ မရှိဘဲ ဟင်းလင်းပြင်ထဲသို့ လုံးဝဥဿုံ ပျောက်ကွယ်သွားသကဲ့သို့ ဖြစ်နေသည်။

ထူးဆန်းအံ့ဩဖွယ်ဖြစ်ကာ ကြောက်စရာကောင်းလှသည်။ လက်ရှိအချိန်တွင် လင်းဖုန်းပင်လျှင် သူ့နှလုံးသား တုန်လှုပ်မှုကို ခံစားလိုက်ရသည်။

သူ၏ ခန္ဓာကိုယ်ကို ကာကွယ်ထားသော ကြယ်တာရာစွမ်းအား အမျှင်ပေါင်း ၁၄၀၀ မှာ လုံးဝ အသုံးမဝင်ခဲ့ပေ။ သူ၏ လက်ဖဝါးမှာ ယခင်ကတည်းက မရှိခဲ့ဖူးသည့်အလား လေထဲသို့ ပျောက်ကွယ်သွားသည်။ ယခုအခါ လင်းဖုန်း၏ ခန္ဓာကိုယ်ထဲတွင် ကြယ်တာရာစွမ်းအား တစ်မျှင်မျှ မကျန်တော့ပေ။

"ဒါက တကယ့်ကို ကြောက်စရာကောင်းလွန်းတယ်။ ဒါက အမျှင်ပေါင်း ၄၀၀၀ နဲ့ လုပ်ထားတဲ့ ဟင်းလင်းပြင်ပူဖောင်းရဲ့ စွမ်းအားလား"

လင်းဖုန်းသည် ပူဖောင်း၏ ကြောက်မက်ဖွယ် စွမ်းအားကို ကိုယ်တိုင် ကြုံတွေ့ခဲ့ရပြီ ဖြစ်သည်။ အသွင်ပြောင်းနယ်ပယ် ဒုတိယအဆင့် မပြောနှင့် တတိယအဆင့် သိုင်းသမားတစ်ဦးပင်လျှင် ထိုစွမ်းအားကို တောင့်ခံနိုင်ပါမည်လော။

လင်းဖုန်း မသိပေ။ တတိယအဆင့် သိုင်းသမားတစ်ဦးတွင် ကြယ်တာရာစွမ်းအား အမျှင်ပေါင်း ၉၉၉၉ခုအထိ ရှိသော်လည်း ထိုစွမ်းအားများက လင်းဖုန်း၏ ဟင်းလင်းပြင်ပူဖောင်းကို ခုခံနိုင်မည်ဟု အတပ်ပြောနိုင်ရန်မှာ တကယ်ပင် ခက်ခဲလှသည်။

ထို့ပြင် ကြယ်တာရာစွမ်းအားမျှင် ၄၀၀၀ ဖြင့် စုစည်းထားသော ပူဖောင်းမှာလည်း ဟင်းလင်းပြင်ပူဖောင်း၏ အစွမ်းကန့်သတ်ချက် မဟုတ်သေးပေ။ လင်းဖုန်းအနေဖြင့် ပူဖောင်းကို ထိန်းချုပ်နိုင်ရန် သူ၏ စိတ်ဆန္ဒကို ထပ်မံမြှင့်တင်နိုင်သရွေ့ ကြယ်တာရာစွမ်းအားများ ပိုမို ထည့်သွင်းနိုင်သေးသည်။

"ဟူး..."

လင်းဖုန်း သက်ပြင်းတစ်ချက် ချလိုက်သည်။ ယခုအခါ သူ၏ ကြယ်တာရာစွမ်းအားမှာ အလွန်များပြားနေပြီး ကန့်သတ်ချက်သို့ ရောက်ရှိနေပြီ ဖြစ်သည်။ ထို့ပြင် ဟင်းလင်းပြင်ပူဖောင်း၏ အစွမ်းကြောင့် သူ၏ ကြယ်တာရာစွမ်းအားမှာ သူ၏ ရုပ်ပိုင်းဆိုင်ရာ ခွန်အားထက်ပင် ကျော်လွန်သွားခဲ့ပြီ ဖြစ်သည်။

လက်ရှိတွင် လင်းဖုန်းသည် သူ၏ ခန္ဓာကိုယ်ကို လေ့ကျင့်ရန် လက်မလွှတ်သေးပေ။ အမှန်တကယ်တွင်မူ ရုပ်ပိုင်းဆိုင်ရာ ကြံ့ခိုင်မှု တိုးတက်လာခြင်းမှာ သူ၏ ကြယ်တာရာစွမ်းအားအတွက် အထောက်အကူ ဖြစ်စေသောကြောင့် ဖြစ်သည်။

အကယ်၍ ဤအတိုင်းသာ ဆက်သွားပါက လင်းဖုန်းသည် သူ၏ ခန္ဓာကိုယ်ကို လေ့ကျင့်ရန် တဖြည်းဖြည်း လက်လွှတ်သွားနိုင်ပေသည်။

မျိုးရိုးဗီဇကန့်သတ်ချက်ကို ချိုးဖြတ်ပြီးနောက် သိုင်းသမားများစွာမှာ သူတို့၏ ခန္ဓာကိုယ်ကို လေ့ကျင့်ရန် အဘယ်တွက်ကြောင့် လက်လွှတ်လိုက်ကြသလဲဆိုသည်မှာ အံ့ဩစရာ မဟုတ်တော့ပေ။ အလွန်တရာမြန်ဆန်ပြီး အစွမ်းထက်သော ကြယ်တာရာစွမ်းအား တိုးတက်မှုနှင့် နှိုင်းယှဉ်လျှင် ရုပ်ပိုင်းဆိုင်ရာ လေ့ကျင့်မှုမှာ အမှန်တကယ်ပင် နှေးကွေးလှသည်။

လင်းဖုန်းကဲ့သို့ သန်မာကြံ့ခိုင်သော ရုပ်ခန္ဓာပိုင်ရှင်ပင်လျှင် ဤပြဿနာကို ကြုံတွေ့နေရပါက အခြားသော သိုင်းသမားများအတွက်မူ ပြောနေရန်ပင် မလိုတော့ပေ။

သို့သော် လင်းဖုန်းသည် သူ၏ ရုပ်ပိုင်းဆိုင်ရာကျင့်ကြံမှုကို လက်လွှတ်ရန် အစီအစဉ် မရှိပေ။ သူသည် ရုပ်ပိုင်းဆိုင်ရာ ကျင့်ကြံမှုနှင့် ကြယ်တာရာစွမ်းအား ကျင့်ကြံမှုမှာ အတူတူပင် အရေးကြီးသည်ဟု အမြဲ ခံစားရသည်။ ထို့ပြင် သူ့၌ မျိုးဗီဇပေါင်းစပ်ကိရိယာ ရှိနေသည်။ သူသာ ကြမ်းကြုတ်သားရဲ မျိုးရိုးဗီဇများကို ထပ်မံ ပေါင်းစပ်နိုင်မည်ဆိုပါက သူ၏ ရုပ်ပိုင်းဆိုင်ရာ ခွန်အားမှာလည်း ကြယ်တာရာစွမ်းအားထက် နိမ့်ကျနေမည် မဟုတ်ပေ။

ယခုလက်ရှိအချိန်တွင် လင်းဖုန်းသည် သူ၏ ခန္ဓာကိုယ်အသွင်ပြောင်းလဲမှုဖြစ်စဥ်မှာ နှစ်လကျော် ကြာမြင့်လာပြီဖြစ်ကြောင်း တွက်ချက်မိသည်။ အမှန်တကယ်တော့ သူသည် ကိုးထပ်ခန္ဓာကိုယ်ကျင့်စဉ်၏ ပဉ္စမအဆင့်ကို စတင်လေ့ကျင့်နိုင်ပြီ ဖြစ်သည်။ အကယ်၍ သူသာ ပဉ္စမအဆင့်ကို ကျွမ်းကျင်ပြီး ဝဲဂယက်စွမ်းအားငါးခုကို ထုတ်ဖော်နိုင်မည်ဆိုပါက မည်သည့် အသွင်ပြောင်းနယ်ပယ် ဒုတိယအဆင့် သိုင်းသမားကိုမဆို ကြောက်နေရန် မလိုအပ်တော့ပေ။

မြောက်ပိုင်းတောင်တန်း အခြေစိုက်စခန်းကိုမူ အလွတ်တန်းသိုင်းသမားများသမဂ္ဂမှ သိုင်းသမားများက ကာကွယ်စောင့်ရှောက်နေကြသည်။

မြောက်ပိုင်းနှင့် တောင်ပိုင်း အခြေစိုက်စခန်းနှစ်ခုစလုံးမှာ ရှေ့တန်း၏ အရှေ့ဘက်ဆုံးတွင် ရှိကြသည်။ တောင်ပိုင်းတောင်တန်းအခြေစိုက်စခန်းမှာ သင်းခွေချပ်သားရဲများကို ခုခံရပြီး မြောက်ပိုင်းတောင်တန်းအခြေစိုက်စခန်းမှာမူ မြေပုရွက်ဆိတ်များကို ခုခံရသည်။

ထိုမြေပုရွက်ဆိတ်များမှာ သင်းခွေချပ်သားရဲများထက် များစွာ သေးငယ်ကြသည်။ ထိုသားရဲများမှာ သေးငယ်သော သတ္တဝါလေးများကဲ့သို့ပင် ဖြစ်ကာ အိမ်မွေးခွေး အရွယ်အစားခန့်သာ ရှိသည်။ သဘာဝကျကျပင် သူတို့သည် သာမန်ပုရွက်ဆိတ်များထက်မူ အဆပေါင်းများစွာ ပိုကြီးကြသည်။

သို့သော် စစ်မှန်သော ကြမ်းကြုတ်သားရဲတစ်ကောင်အနေဖြင့် မြေပုရွက်ဆိတ်များမှာ အလွန်ပင် ကြောက်စရာကောင်းလှသည်။ သူတို့၏ သွားများမှာ ဖျက်ဆီး၍ မရနိုင်လောက်အောင်ပင်။ တစ်ချက်ကိုက်လိုက်ရုံဖြင့် မာကျောသော သံမဏိများကိုပင် အစိတ်စိတ်ပိုင်းပိုင်းဖြစ်အောင် ချိုးဖျက်နိုင်သည်။

ထို့ပြင် မြေပုရွက်ဆိတ်များမှာ မြေအောက်သို့ တိုးဝင်နိုင်သည်။ မြေအောက်တွင် ထောင်နှင့်ချီသော လိုဏ်ခေါင်းများ ရှိနေပြီး ရှုပ်ထွေးလှသော မြေအောက်ဝင်္ကပါကြီးတစ်ခုကဲ့သို့ပင် ဖြစ်သည်။ ဤကဲ့သို့သောကိစ္စရပ်များကြောင့် မြေပုရွက်ဆိတ်များမှာ အလွန်ပင် ခေါင်းခဲစရာ ကောင်းလှသည်။

ယခုအခါ မြောက်ပိုင်းတောင်တန်းအခြေစိုက်စခန်းမှာ အခက်အခဲနှင့် ကြုံတွေ့နေရသည်။ ထိုမြေပုရွက်ဆိတ်များမှာ မည်သည့်အကြောင်းကြောင့်မှန်းမသိ အရူးအမူး ဖြစ်နေကြပြီး အခြေစိုက်စခန်းကို အပြင်းအထန် တိုက်ခိုက်နေကြသည်။ မြောက်ပိုင်းတောင်တန်းအခြေစိုက်စခန်း၏ တည်ဆောက်ရေး ပစ္စည်းများမှာ တောင်ပိုင်းတောင်တန်းအခြေစိုက်စခန်းထက် ပိုမို ခိုင်ခံ့သော်လည်း မြေပုရွက်ဆိတ်များ၏ တိုက်ခိုက်မှုကြောင့် အခြေစိုက်စခန်း ကျဆုံးရန်မှာ အချိန်တစ်ခုသာ လိုတော့သည်။

"စစ်သေနာပတိချုပ်... စစ်ကူတောင်းပါ။ မြို့စားမင်းက တောင်ပိုင်းတောင်တန်းမြို့ကို စောင့်ကြပ်နေရလို့ အလွယ်တကူ လာလို့မရဘူး။ ကျွန်တော်တို့ တောင်ပိုင်းတောင်တန်း အခြေစိုက်စခန်းကနေပဲ စစ်ကူတောင်းလို့ ရမယ်"

"ဟုတ်ပါတယ်။ လွန်ခဲ့တဲ့ ရက်အနည်းငယ်က တောင်ပိုင်းအခြေစိုက်စခန်းက သင်းခွေချပ်သားရဲတွေရဲ့ တိုက်ခိုက်မှုကို တွန်းလှန်နိုင်ခဲ့တယ်လို့ ကြားတယ်။ သူတို့ အခု ကျွန်တော်တို့ကို လာကူညီနိုင်မှာပါ"

မြောက်ပိုင်းတောင်တန်းအခြေစိုက်စခန်း၏ ခွန်အားမှာ အတော်လေး ကောင်းမွန်လှသည်။ အမှန်တကယ်တော့ ၎င်း၏ စုစုပေါင်းခွန်အားမှာ တောင်ပိုင်းအခြေစိုက်စခန်းထက် များစွာ ပို၍ သန်မာသည်။ အခြေစိုက်စခန်းတွင် သာလွန်လူသား ကျွမ်းကျင်သူ စုစုပေါင်း ၅၀ ရှိသည်။ ထိုအရေအတွက်မှာ ရှေ့တန်းအခြေစိုက်စခန်း တစ်ခုအတွက် အတော်လေး ရှားပါးလှသော ပမာဏဖြစ်သည်။

သို့သော် လက်ရှိအချိန်တွင် မြောက်ပိုင်းတောင်တန်းအခြေစိုက်စခန်း၏ အစည်းအဝေးခန်းမအတွင်းရှိ လူတိုင်း၏ မျက်နှာထက်တွင် စိတ်ပျက်အားငယ်မှုများ ရှိနေကြသည်။

"ငါတို့က တောင်ပိုင်းတောင်တန်းအခြေစိုက်စခန်းဆီကနေ စစ်ကူတောင်းရမယ် ဟုတ်လား... တကယ်ကိုပဲ"

မြောက်ပိုင်းအခြေစိုက်စခန်း၏ စစ်သေနာပတိချုပ်မှာလည်း အလွန်ပင် အားကိုးရာမဲ့နေသည်။ အမှန်အတိုင်းပြောရလျှင် မြောက်ပိုင်းနှင့် တောင်ပိုင်း အခြေစိုက်စခန်းနှစ်ခုမှာ အလွန်အလှမ်းဝေးလှသည် မဟုတ်ပေ။ ထို့ပြင် သူတို့မှာ မတူညီသော အဖွဲ့အစည်းများမှ ဖြစ်ကြသဖြင့် ပုံမှန်အားဖြင့် ပြိုင်ဆိုင်မှုများနှင့် ပွတ်တိုက်မှုများ မည်သို့ ရှိမနေဘဲ နေပါမည်နည်း။

သို့သော် တောင်ပိုင်းတောင်တန်းအခြေစိုက်စခန်း အင်အား အကောင်းဆုံးအချိန်မှာပင် မြောက်ပိုင်းတောင်တန်းအခြေစိုက်စခန်းကသာ အသာစီး ရခဲ့သည်။ အမြဲလိုလို တောင်ပိုင်းအခြေစိုက်စခန်းကသာ စစ်ကူတောင်းခဲ့ရခြင်း ဖြစ်သည်။

မြောက်ပိုင်းအခြေစိုက်စခန်းက တောင်ပိုင်းအခြေစိုက်စခန်းဆီကနေ ဘယ်တုန်းက စစ်ကူတောင်းခဲ့ဖူးလို့လဲ။

သို့သော် ယခုအချိန်မှာ ပုဂ္ဂိုလ်ရေးစိတ်ခံစားချက်များကို ရှေ့တန်းတင်နေရမည့်အချိန် မဟုတ်ပေ။ မြောက်ပိုင်းတောင်တန်းအခြေစိုက်စခန်း အပြင်ဘက်ရှိ မြေပုရွက်ဆိတ်များမှာ အခြေစိုက်စခန်းကို အရူးအမူး တိုက်ခိုက်နေကြသည်။ တောင်ပိုင်းအခြေစိုက်စခန်းထံမှ စစ်ကူတောင်းခြင်းမှာ သူတို့၏ တစ်ခုတည်းသော ရွေးချယ်မှု ဖြစ်သည်။

"တောင်ပိုင်းအခြေစိုက်စခန်းဆီကို ချက်ချင်း စစ်ကူတောင်းလိုက်"

မြောက်ပိုင်းအခြေစိုက်စခန်း၏ စစ်သေနာပတိချုပ် မိုလေ့သည် အံကို တင်းတင်းကြိတ်ကာ အမိန့်ပေးလိုက်တော့သည်။

ထာဝရသိုင်းတာအိုအရှင်

အခန်း (၁၆၄) - ယွီရှန်းရောက်ရှိလာခြင်း

ဘာသာပြန် - အားသစ်

ဘီ... ဘီ...

လင်းဖုန်း၏ ဆက်သွယ်ရေးစက် ရုတ်တရက် မြည်လာသည်။

"ဟမ်... ယွီရှန်း၊ မင်း တောင်ပိုင်းအခြေစိုက်စခန်းကို ရောက်နေပြီလား"

လင်းဖုန်း ဖုန်းလက်ခံလိုက်သည်။ သူ့မျက်နှာထက်တွင် အံ့ဩမှုများ ပြည့်နှက်သွားသည်။ ယွီရှန်းက လက်ထပ်ပြီး ပျားရည်ဆမ်းခရီးထွက်ရမှာ မဟုတ်လား။ ဘာလို့နှစ်လအကြာမှာတင် တောင်ပိုင်းအခြေစိုက်စခန်းကို ရောက်လာရတာလဲ။

သို့သော် ဆက်သွယ်ရေးစက်မှတစ်ဆင့် စကားပြောရန် ခက်ခဲသဖြင့် လင်းဖုန်း လျှို့ဝှက်အခန်းထဲမှ ထွက်လာခဲ့သည်။ လင်းဖုန်းသည် ကိုးထပ်ခန္ဓာကိုယ်ကျင့်စဉ် ပဉ္စမအဆင့်ကို မကျွမ်းကျင်သေးသော်လည်း သူ၏ ရုပ်ပိုင်းဆိုင်ရာကြံ့ခိုင်မှုမှာ များစွာ တိုးတက်လာခဲ့ပြီ ဖြစ်သည်။ သူ၏ သဘာဝခန္ဓာကိုယ် ခွန်အားသက်သက်ဖြင့်ပင် တန် ၃၈၀ အားကို ထုတ်ဖော်ရန်မှာ ပြဿနာ မရှိတော့ပေ။

လျှို့ဝှက်အခန်းကို ဖွင့်ပြီးနောက် လင်းဖုန်း ဧည့်ခန်းသို့ ထွက်လာခဲ့သည်။

"စစ်သေနာပတိချုပ်... အပြင်မှာ သာလွန်လူသား ကျွမ်းကျင်သူတစ်ယောက် အခြေစိုက်စခန်းကို လာရောက် သတင်းပို့နေပါတယ်"

လင်းဖုန်း ထွက်လာသည်ကို မြင်သောအခါ အစောင့်က အလျင်အမြန် အစီရင်ခံသည်။

"ကောင်းပြီ... အခြေစိုက်စခန်းက တပ်ရင်းမှူး ၂၀ စလုံးကို အစည်းအဝေးခန်းမမှာ လူစုခိုင်းလိုက်"

"ဟုတ်ကဲ့ပါခင်ဗျာ"

အစောင့်က အမြန် သွားရောက် အကြောင်းကြားလိုက်သည်။ ယခင်တိုက်ပွဲအပြီးတွင် တောင်ပိုင်းအခြေစိုက်စခန်းတွင် လင်းဖုန်း၏ ဂုဏ်သတင်းမှာ ပိုမိုကြီးမားလာပြီး ယခင်စစ်သေနာပတိချုပ် ကျိုးယွင်ကိုပင် ကျော်လွန်သွားခဲ့ပြီ ဖြစ်သည်။

ယခုအချိန်တွင် လင်းဖုန်းသည် တောင်ပိုင်းအခြေစိုက်စခန်း၏ အာဏာကို အပြည့်အဝ ဆုပ်ကိုင်ထားနိုင်ပြီဟု ဆိုနိုင်သည်။ သူသည် အခြေစိုက်စခန်း၏ သေးငယ်သော ကိစ္စရပ်များကို ကိုယ်တိုင်ကိုင်တွယ်ဖြေရှင်းခြင်း မပြုသော်လည်း သူ၏နှုတ်ထွက်စကားအားလုံးမှာ အမိန့်ဖြစ်ပြီး မည်သူမျှ မေးခွန်းထုတ်ရဲခြင်း မရှိပေ။

ဧည့်ခန်းသို့ ရောက်သောအခါ လင်းဖုန်းသည် ယွီရှန်းကို တစ်ချက်ကြည့်ရုံဖြင့် မြင်လိုက်ရသည်။

လက်ရှိ ယွီရှန်းမှာ အလွန်ပင် တက်ကြွလန်းဆန်းနေပုံရသည်။ သူသည် အသစ်တစ်ဖန် ပြန်လည်မွေးဖွားလာသူနှင့်ပင် တူသည်။

"ယွီရှန်း... မင်း ဘယ်လိုဖြစ်လို့ ဒီကို ရောက်နေတာလဲ"

"ဟားဟားဟား... ငါ ဒီကို ဘာလို့ မလာနိုင်ရမှာလဲ။ ရှောင်ရှီးနဲ့ ငါနဲ့က မင်းကို အရင်လာကူညီဖို့ သဘောတူထားကြတာလေ။ ငါတို့အားတဲ့အချိန်မှပဲ အားလပ်ရက်ယူပြီး ပြန်ကြမယ်လို့ ဆုံးဖြတ်ထားတာ။ လွန်ခဲ့တဲ့ နှစ်လအတွင်းမှာ ငါ့ရဲ့ အသွင်ပြောင်းလဲမှုကလည်း ပြီးသလောက် ဖြစ်နေပြီ။ ငါ့ခွန်အားကလည်း တော်တော်လေး တိုးတက်လာပြီလေ။ ငါ မင်းကို တစ်ခုခု ကူညီနိုင်လိမ့်မယ်ထင်လို့ လာခဲ့တာ‌ပေါ့ကွ။ ဘာလဲ... ငါလာတာကို မကြိုဆိုဘူးလား"

"ဘယ်ကလာ...ကြိုဆိုတာပေါ့ကွာ"

လင်းဖုန်းလည်း အလွန် ဝမ်းသာသွားသည်။ ယွီရှန်းစကားအရ ကြားရသည်မှာ လွယ်ကူသယောင်ရှိသော်လည်း အမှန်တကယ်တန်းတွင်မူ သူသည် နှစ်လအတွင်းမှာတင် အပြေးအလွှား ရောက်လာခြင်း ဖြစ်သည်။ သူ ဟန်နီမွန်းပင် ထွက်ဖြစ်ခဲ့ပုံ မရပေ။

ဤသည်မှာ စစ်မှန်သော ညီအစ်ကိုပင်။

"ယွီရှန်း...အခု မင်းရဲ့ ခန္ဓာကိုယ်အသွင်ပြောင်းလဲမှုက ပြီးသွားပြီလား"

"အင်း... ပြီးသွားပြီ။ နှစ်လပဲ ကြာတယ်။ ငါ စစ်ဆေးကြည့်တာတော့ သိပ်ပြီး စိတ်တိုင်းမကျလှပါဘူးကွာ"

ယွီရှန်း ခေါင်းခါလိုက်သည်။ အမှန်တကယ်တော့ ရုပ်ပိုင်းဆိုင်ရာ အသွင်ပြောင်းလဲမှုမှာ များသောအားဖြင့် နှစ်လ သို့မဟုတ် သုံးလ ကြာတတ်သည်။ အချို့ဆိုလျှင် ထိုထက်ပင် ပိုကြာနိုင်သည်။ သို့သော် နှစ်လအတွင်းမှာတင် ပြီးဆုံးသွားသည်ဆိုခြင်းမှာ ယွီရှန်း၏ ရုပ်ပိုင်းဆိုင်ရာ ကြံ့ခိုင်မှုမှာ အလွန်တရာ သန်မာလှခြင်း မရှိကြောင်း ပြသနေသည်။

ထို့ပြင် ယွီရှန်းမှာ ရုပ်ပိုင်းဆိုင်ရာကြံ့ခိုင်မှုကို အထူးပြုထားသူ မဟုတ်ပေ။ လင်းဖုန်းက နှစ်သိမ့်လိုက်သည်။

"ယွီရှန်း... မျိုးရိုးဗီဇကန့်သတ်ချက်ကို ချိုးဖြတ်ပြီးရင် အဓိက အာရုံစိုက်ရမှာက ကြယ်တာရာစွမ်းအား ကျင့်ကြံဖို့ပဲလေ"

ယွီရှန်း ခေါင်းညိတ်လိုက်သည်။ ခွန်အားနှင့် ပတ်သက်လာလျှင် ယွီရှန်းမှာ လင်းဖုန်းနှင့် နှိုင်းယှဉ်၍ မရသည်မှာ သေချာပေသည်။ လက်ရှိယွီရှန်းသည် ဝါရင့်အသွင်ပြောင်းနယ်ပယ် ပထမအဆင့် သိုင်းသမားအချို့ကိုပင် မမီနိုင်ပေ။ မည်သို့ပင်ဆိုစေကာမူ ယွီရှန်း၏ ခန္ဓာကိုယ်ထဲရှိ ကြယ်တာရာစွမ်းအားမှာ အလွန် နည်းပါးနေသေးသည်။ သူ မည်မျှအထိ တိုက်ခိုက်ရေးစွမ်းအား ထုတ်ဖော်နိုင်မည်ဆိုသည်မှာ မေးခွန်းထုတ်စရာ ရှိနေဆဲပင်။

သို့သော် မည်သို့ပင်ဖြစ်စေကာမူ သူသည် အသွင်ပြောင်းနယ်ပယ် သာလွန်လူသားတစ်ဦး ဖြစ်နေဆဲဖြစ်ရာ သာမန်သိုင်းသမားများထက် များစွာ ပိုမိုသန်မာနေဆဲပင်။

ထိုစဉ် အစောင့် ပြန်ရောက်လာသည်။ သူက လင်းဖုန်းကို ရိုသေစွာ ဦးညွတ်၍ အစီရင်ခံလိုက်သည်။

"စစ်သေနာပတိချုပ်... အစည်းအဝေးအတွက် အားလုံး ပြင်ဆင်ပြီးပါပြီ"

"ကောင်းပြီ... ယွီရှန်း။ အစည်းအဝေးခန်းမကို သွားကြစို့။ ငါ မင်းကို တောင်ပိုင်းအခြေစိုက်စခန်းက သာလွန်လူသား ကျွမ်းကျင်သူတွေနဲ့ မိတ်ဆက်ပေးမယ်"

ထို့နောက် လင်းဖုန်းသည် ယွီရှန်းကို အစည်းအဝေးခန်းမသို့ ခေါ်ဆောင်သွားသည်။

လမ်းတစ်လျှောက်တွင် လင်းဖုန်းကို မြင်တွေ့ကြသော သိုင်းသမားတိုင်းက ရိုသေလေးစားစွာ နှုတ်ဆက်ကြသည်။ လင်းဖုန်းကလည်း တစ်ဦးချင်းစီကို ခေါင်းညိတ်ပြသည်။ ဤမြင်ကွင်းက ဘေးနားရှိ ယွီရှန်းကို အံ့အားသင့်စေသည်။

"လင်းဖုန်း... ကြည့်ရတာ မင်း တောင်ပိုင်းတောင်တန်းအခြေစိုက်စခန်းမှာ အခြေအနေ တော်တော်ကောင်းပုံရတယ်။ နှစ်လပဲ ရှိသေးတာကို မင်းရဲ့ ဂုဏ်သတင်းက ဒီလောက်အထိ ကြီးမားနေပြီပဲ။ မင်း အခြေစိုက်စခန်း တစ်ခုလုံးကို အပြည့်အဝ ထိန်းချုပ်ထားနိုင်ပြီ ထင်တယ်"

"ဟားဟား... ငါက ဒီလို သာမန်ကိစ္စတွေကို မကိုင်တွယ်ချင်ဘူးဆိုတာ မင်း သိသားပဲ။ ငါက မင်း ငါ့ကို လာကူညီမှာကို စောင့်နေတာ"

လင်းဖုန်းက ပြုံးလျက် ပြောလိုက်သည်။ သူသည် လုဝေ့အပေါ် ယုံကြည်စိတ်ချသော်လည်း ယွီရှန်းလောက် မည်သို့ စိတ်ချလက်ချဖြစ်နိုင်ပါမည်နည်း။ လင်းဖုန်းသည် ယွီရှန်းကို သူ့ခွန်အားကို ကြွားဝါရန် သို့မဟုတ် အလှပြရန် ခေါ်ယူထားခြင်း မဟုတ်ပေ။ ယွီရှန်းကို တောင်ပိုင်းတောင်တန်းအခြေစိုက်စခန်း၏ ကိစ္စရပ်များကို စီမံခန့်ခွဲရာတွင် ကူညီပေးစေလိုခြင်း ဖြစ်သည်။

ယွီရှန်း ခေါင်းညိတ်လိုက်သည်။ မူလက သူသည် လင်းဖုန်း၏ အခြေခံမှာ မခိုင်မာသေးဟု ယူဆကာ လင်းဖုန်းကို ကူညီရန် အပြေးအလွှား ရောက်လာခြင်း ဖြစ်သည်။ သို့သော် အခြေအနေအရ လင်းဖုန်းသည် တောင်ပိုင်းတောင်တန်းအခြေစိုက်စခန်းတစ်ခုလုံးကို အခြေခံအားဖြင့် ထိန်းချုပ်ထားနိုင်နေပြီ ဖြစ်ပုံပင်။ ဤသည်က ယွီရှန်းကို စိတ်သက်သာရာ ရစေသည်။

အစည်းအဝေးခန်းမအတွင်း၌ တပ်ရင်းမှူး ၂၀ စလုံး ရောက်ရှိနေကြပြီ ဖြစ်သည်။ သူတို့သည် လင်းဖုန်း လူတိုင်းကို ဘာကြောင့် ခေါ်ယူရသလဲဆိုသည်ကို ဆွေးနွေးနေကြသည်။ လင်းဖုန်း အခန်းထဲသို့ ဝင်လာသောအခါ လင်းဖုန်း၏ နောက်ကွယ်တွင် မရင်းနှီးသော မျက်နှာသစ် သိုင်းသမားတစ်ဦး ပါလာသည်ကို လူတိုင်း သတိထားမိလိုက်ကြသည်။

"အားလုံးပဲ... ဒါကတော့ အထက်ကနေ ငါတို့ တောင်ပိုင်းတောင်တန်းအခြေစိုက်စခန်းကို တာဝန်ချပေးလိုက်တဲ့ ယွီရှန်းပါ။ ဒီနေ့ကစပြီး သူက တပ်ရင်းတစ်ခုကို တစ်ကိုယ်တည်း ဦးဆောင်လိမ့်မယ်။ အဲဒီတပ်ရင်းကတော့ ချန်ရွှယ်ရဲ့ တပ်ရင်းပဲ ဖြစ်လိမ့်မယ်"

လင်းဖုန်းက စကားလုံး အနည်းငယ်ဖြင့်ပင် ဆုံးဖြတ်ချက်တစ်ခု ချလိုက်သော်လည်း လုဝေ့နှင့် အခြားသူများမှာ ကန့်ကွက်ခြင်း မရှိကြပေ။ ထိုအစား သူတို့က အပြည့်အဝထောက်ခံကာ ဖော်ရွေစွာ ပြုံးပြကြသည်။

"ညီအစ်ကို ယွီရှန်း... လာပါ၊ ငါ့ဘေးမှာ ထိုင်ပါ။ အနာဂတ်မှာ ငါတို့က အတူတူ တိုက်ပွဲဝင်မယ့် ညီအစ်ကိုတွေ ဖြစ်လာမှာပဲ"

"ဟုတ်တယ်... ညီအစ်ကို ယွီရှန်း။ မင်းက အချိန်အတော်ကြာမှ ငါတို့ တောင်ပိုင်းတောင်တန်းအခြေစိုက်စခန်းကို ပြောင်းလာတဲ့ ပထမဆုံး အသွင်ပြောင်းနယ်ပယ် သိုင်းသမားပဲ။ အထက်က ငါတို့ဆီကို သာလွန်လူသား ကျွမ်းကျင်သူတွေ ထပ်မပို့တော့ဘူးလို့တောင် ငါတို့ ထင်နေခဲ့တာ။ အခုတော့ မင်းရောက်လာပြီပဲပေါ့။ ဒါနိမိတ်ကောင်းတစ်ခုပဲကွ"

"ဒီပုံစံအတိုင်းဆိုရင် အထက်က မကြာခင်မှာ ငါတို့ တပ်ရင်း ၃၆ ခုစလုံးအတွက် နေရာတွေ ဖြည့်ပေးတော့မယ် ထင်တယ်ဟေ့...ဟားဟားဟား"

အခြေစိုက်စခန်းရှိ သိုင်းသမား အားလုံးက ယွီရှန်းကို နွေးထွေးစွာ ကြိုဆိုကြသည်။ ဤကဲ့သို့ နွေးထွေးသောလေထုက ယွီရှန်းကို ကျေနပ်မိစေသည်။ အမှန်တကယ်တော့ သူ တောင်ပိုင်းတောင်တန်းအခြေစိုက်စခန်းကို ရောက်လာကတည်းက မြင်တွေ့ခဲ့ရပြီး ဖြစ်သည်။ အခြေစိုက်စခန်း တစ်ခုလုံးမှာ ကြီးမားလှပြီး သိုင်းသမားများစွာ ရှိသော်လည်း အတွင်းပိုင်း ပဋိပက္ခများ မရှိပေ။ သူတို့အားလုံးမှာ စည်းစည်းလုံးလုံး ညီညီညွတ်ညွတ်ဖြင့် အလုပ်လုပ်နေကြသည်။ စစ်စစ်ကြီးပွားတိုးတက်နေသော မြင်ကွင်းတစ်ခုပင်။ ဤသည်မှာ ယွီရှန်း၏ အထင်မှားမှု မဟုတ်ပေ။ လက်တွေ့တွင် လက်ရှိ တောင်ပိုင်းတောင်တန်းအခြေစိုက်စခန်းမှာ အမှနိတကယ်ပင် စည်းလုံးညီညွတ်နေသည်။ သူတို့အားလုံးမှာ စိတ်တူကိုယ်တူ အတူတကွ အလုပ်လုပ်ကြပြီး အတွင်းပိုင်းပဋိပက္ခများလည်း လုံးဝမရှိကြပေ။ သို့သော် ယခင်က ထိုသို့ မဟုတ်ခဲ့ပေ။ အထူးသဖြင့် ချန်ရွှယ် အသက်ရှင်နေစဉ်က ဖြစ်သည်။ သူမသည် သိုင်းသမားတစ်စုကို အမြဲတစေ သွေးထိုးပေးနေခဲ့ပြီး တောင်ပိုင်းတောင်တန်းအခြေစိုက်စခန်း တစ်ခုလုံးကို အဖွဲ့ကွဲအောင် လုပ်ဆောင်‌နေခဲ့သည်။

ထိုအချိန်က လူအများမှာ စိတ်ဝမ်းကွဲနေခဲ့ကြသည်။ တောင်ပိုင်းတောင်တန်းအခြေစိုက်စခန်းအပေါ် မည်သူမျှ ယုံကြည်မှု မရှိကြသလို မိမိတို့၏ အခြေစိုက်စခန်းဟူသော ခံစားချက်မျိုးလည်း မရှိခဲ့ကြပေ။

ယခင်တိုက်ပွဲတွင် လင်းဖုန်းသည် တောင်ပိုင်းတောင်တန်းအခြေစိုက်စခန်းရှိ သိုင်းသမားအားလုံးကို ဦးဆောင်ကာ သင်းခွေချပ်သားရဲများ၏ တိုက်ခိုက်မှုကို ခုခံတွန်းလှန်နိုင်ခဲ့သည်။ ထိုအချိန်မှစ၍ အခြေစိုက်စခန်းတွင် စိတ်ဝမ်းကွဲမှုများ လုံးဝနီးပါးဆိတ်သုန်းပျောက်ကွယ်သွားသည်။ ထိုအစား အားလုံးမှာ တစ်စိတ်တစ်ဝမ်းတည်း ဖြစ်သွားကြပြီး အလွန်တရာ စည်းလုံးသွားခဲ့ကြသည်။

"ယွီရှန်းက အခုမှ ရောက်လာတာပါ။ အားလုံးက သူ့ကို ဝိုင်းပြီး ကူညီပေးလိုက်ကြပါဦး"

လင်းဖုန်းသည် ယွီရှန်းအပေါ် သူ၏ ဂရုစိုက်မှုကို ထုတ်ဖော်ပြောဆိုရန် ဝန်မလေးပေ။ မည်သို့ပင်ဆိုစေကာမူ သူတို့၏ ဆက်ဆံရေးမှာ ဖုံးကွယ်ထား၍ မရနိုင်ပေ။ ထို့ပြင် လက်ရှိအခြေစိုက်စခန်း၏ လေထုအခြေအနေတွင် တကူးတက ဖုံးကွယ်ထားရန်လည်း မလိုအပ်ပေ။

"ဒါနဲ့... မကြာသေးခင်က သင်းခွေချပ်သားရဲတွေဆီမှာ ထူးထူးခြားခြားပြောင်းလဲမှုမျိုး ရှိသေးလား"

လင်းဖုန်း လုဝေ့ကို ကြည့်ကာ မေးလိုက်သည်။

"ထူးခြားတာတော့ မရှိပါဘူး။ မကြာသေးခင်ကာလအတွင်းမှာ သင်းခွေချပ်သားရဲတွေ ငြိမ်သက်နေပါတယ်။ ဒါပေမဲ့ မြောက်ပိုင်းတောင်တန်းအခြေစိုက်စခန်းမှာ ပြဿနာတက်နေတယ်လို့တော့ ကျွန်တော် ကြားတယ်"

"မြောက်ပိုင်းအခြေစိုက်စခန်းမှာက ဘာပြဿနာတက်နေတာလဲ"

လင်းဖုန်း ဆက်လက်မေးမြန်းရန် ပြင်လိုက်စဉ်မှာပင် အပြင်ဘက်မှ သိုင်းသမားတစ်ဦး ရုတ်တရက် အပြေးအလွှား ဝင်ရောက်လာသည်။ သူက စိုးရိမ်တကြီးဖြင့် ပြောလိုက်သည်။

"စစ်သေနာပတိချုပ်... မြောက်ပိုင်းတောင်တန်းအခြေစိုက်စခန်းက အရေးပေါ် စစ်ကူတောင်းခံလာပါတယ်"

"စစ်ကူတောင်းတာလား... ငါ့ကို ပြစမ်း"

ထို့ကြောင့် ထိုသိုင်းသမားက အကူအညီတောင်းခံစာကို လင်းဖုန်းထံသို့ ရိုသေစွာ ပေးအပ်လိုက်သည်။

လင်းဖုန်း အကူအညီတောင်းခံစာကို အသေးစိတ် ဖတ်ကြည့်လိုက်သည်။ မြောက်ပိုင်းတောင်တန်းအခြေစိုက်စခန်း၏ ပြဿနာအကြောင်း သူတို့ ဆွေးနွေးနေစဉ်မှာပင် ထိုအခြေစိုက်စခန်းမှ အကူအညီတောင်းခံစာတစ်စောင် မမျှော်လင့်ဘဲ ရောက်ရှိလာလေပြီ။