အခန်း (၁၆၇-၁၆၈)

ထာဝရသိုင်းတာအိုအရှင်

အခန်း (၁၆၇) - စစ်ဆင်ရေး

ဘာသာပြန် - အားသစ်

"အရင်းအမြစ်ကို တိုက်ရိုက် တိုက်ခိုက်မယ်... ဟုတ်လား"

လင်းဖုန်းတွင် ထူးခြားဆန်းပြားသော အကြံဉာဏ်ကောင်းတစ်ခုခု ရှိလိမ့်မည်ဟု မိုလေ့ ထင်မှတ်ထားခဲ့သော်လည်း ဤမျှ ရိုးရှင်းပြတ်သားလွန်းသော နည်းလမ်းဖြစ်နေလိမ့်မည်ဟု သူ မမျှော်လင့်ထားပေ။ သူ စိတ်ပျက်သွားမိသည်ကိုတော့ မဖုံးကွယ်နိုင်တော့ပေ။

လင်းဖုန်းလည်း ဘာမှ ထပ်မပြောတော့ပေ။ ဤအခြေအနေမျိုးတွင် ထိရောက်မည့် အခြားသော ဖြေရှင်းနည်းကောင်းတစ်ခုခုများ ရှိပါသေးသလော။ မရှိနိုင်ပေ။ အကြွင်းမဲ့သာလွန်သော ခွန်အားနှင့် ရင်ဆိုင်ရချိန်တွင် မည်သည့် အစီအမံ၊ ပရိယာယ်မျိုးကမျှ အသုံးမဝင်ပေ။

အကယ်၍ သူတို့သည် ဤမြေပုရွက်ဆိတ်များကို အနိုင်ယူလိုပါက ရှေးဦးစွာ ရာနှင့်ချီသော မြေပုရွက်ဆိတ်နတ်ဆိုးများကို အရင်ဆုံးနှိမ်နင်းရမည်သာ ဖြစ်သည်။ သို့မဟုတ်ပါက မြေပုရွက်ဆိတ်များ အခြေစိုက်စခန်းထဲသို့ ဖောက်ထွင်းဝင်ရောက်နိုင်သည်နှင့် ထိုရာနှင့်ချီသော နတ်ဆိုးများသည် ကပ်ဘေးသင့်လောက်အောင် ဖျက်ဆီးပစ်ကြပေလိမ့်မည်။

"ငါတို့သာ အရင်းအမြစ်ကို တိုက်ရိုက် တိုက်ခိုက်လို့ ရမယ်ဆိုရင် အရင်ကတည်းက လုပ်ခဲ့မှာပေါ့၊ ဒါပေမဲ့ အဲဒါက လုံးဝ မဖြစ်နိုင်တဲ့ ကိစ္စပဲ"

မိုလေ့သည် လင်းဖုန်းကို တစ်ချက်ကြည့်ကာ ခေါင်းခါလိုက်ပြီး ဆက်ပြောသည်။

"ငါတို့ မြောက်ပိုင်းတောင်တန်းအခြေစိုက်စခန်းမှာ သာလွန်လူသား ကျွမ်းကျင်သူ ၅၀ ရှိတယ်။ ငါအပါအဝင် တတိယအဆင့်က ၄ ယောက်ပဲ ရှိတာ။ ညီအစ်ကို လင်းဖုန်း ခေါ်လာတဲ့ စစ်ကူတွေနဲ့ ပေါင်းရင်တောင် သာလွန်လူသားအဆင့် သိုင်းသမားက ၆၀ ဝန်းကျင်ပဲ ရှိတယ်။ အဲဒီ မြေပုရွက်ဆိတ်နတ်ဆိုးတွေက ကိုင်တွယ်ရတာ မလွယ်ဘူး။ ပုံမှန်ဆိုရင် တစ်ဦးချင်း တိုက်ခိုက်ရင်တောင် ငါတို့က အရမ်းသတိထားရတာ။ သူတို့ရဲ့ အက်ဆစ်နဲ့ ထိမိသွားရင် တကယ့်ကို ပြဿနာပဲ။ ကြယ်တာရာစွမ်းအားအကာအကွယ် မရှိတော့ဘဲ အက်ဆစ်နဲ့ အပက်ခံရရင်တော့ သေဖို့ပဲ ရှိတယ်"

"ဒါ့အပြင် ငါတို့က အရေအတွက်မှာလည်း အသာစီးမရဘူး။ ထိပ်တိုက်တွေ့ရင်တော့ အနိုင်ရဖို့ အခွင့်အရေးက လူံးဝမရှိသလောက်ပဲ"

အကယ်၍သာ ထိပ်တိုက် တိုက်ခိုက်နိုင်မည်ဆိုပါက မိုလေ့သည် ယခုအချိန်အထိ စောင့်နေစရာ အကြောင်းမရှိပေ။

"ကျွန်တော်တို့က အသွင်ပြောင်းနယ်ပယ် သိုင်းသမားအားလုံးကို ထိပ်တိုက်သွားတိုက်ခိုင်းဖို့ ပြောနေတာ မဟုတ်ဘူး။ မြေပုရွက်ဆိတ်နတ်ဆိုးတွေအကုန်လုံးကို သတ်ဖို့ ကြိုးစားနေတာလည်း မဟုတ်ဘူး။ ကျွန်တော်တို့က သူတို့ကို ခြောက်လှန့်ဖို့ပဲ လိုတာ။ အဲဒီ မြေပုရွက်ဆိတ်နတ်ဆိုးတွေကို ဖိနှိပ်နိုင်ပြီး သူတို့ဘာသာ သူတို့ ဖရိုဖရဲ ထွက်ပြေးသွားအောင် လုပ်နိုင်မယ်ဆိုရင် အကျပ်အတည်းကလည်း ပြေလည်သွားမှာပဲ မဟုတ်ဘူးလား။ ပြီးတော့ အသွင်ပြောင်းနယ်ပယ် ပထမအဆင့် သိုင်းသမားတွေရဲ့ ခန္ဓာကိုယ်ထဲမှာ ကြယ်တာရာစွမ်းအားက အရမ်းနည်းတယ်။ သူတို့က မြေပုရွက်ဆိတ်နတ်ဆိုးတွေကို ထိပ်တိုက်ရင်ဆိုင်ရင်တော့ ဘယ်လိုမှ အသာစီးရမှာ မဟုတ်ဘူး"

မိုလေ့၏ ရင်ထဲ တုန်လှုပ်သွားသည်။ လင်းဖုန်းသည် အဆင့်မြင့်တိုက်ခိုက်ရေးသမားများကိုသာ အသုံးပြုရန် ရည်ရွယ်နေခြင်းပေလော။

"မြောက်ပိုင်းတောင်အခြေစိုက်စခန်းမှာ အသွင်ပြောင်းနယ်ပယ် ဒုတိယအဆင့်နဲ့ အထက် သိုင်းသမား ဘယ်နှယောက် ရှိလဲဆိုတာ ကျွန်တော် သိချင်ပါတယ်"

မိုလေ့ ခဏတာမျှ စဉ်းစားပြီးနောက် ပြောလိုက်သည်။

"ဒုတိယအဆင့်နဲ့ အထက် သိုင်းသမားအားလုံးပေါင်း ၁၈ ယောက် ရှိတယ်"

"၁၈ ယောက်လား... မဆိုးပါဘူး။ တတိယအဆင့်ကော ဘယ်နှယောက်လဲ"

"ငါ အပါအဝင် တတိယအဆင့် သိုင်းသမားက ၄ ယောက်ပဲ ရှိတာပါ"

တတိယအဆင့် သိုင်းသမား ၄ ယောက်ရှိသည်ဆိုခြင်းမှာ မြောက်ပိုင်းတောင်တန်းအခြေစိုက်စခန်း၏ အင်အားမှာ တောင်ပိုင်းထက် များစွာ သာလွန်နေကြောင်း သက်သေပင်။ တောင်ပိုင်းတောင်တန်းအခြေစိုက်စခန်း အင်အား အကောင်းဆုံးအချိန်၊ ကျိုးယွင် စစ်သေနာပတိချုပ် ဖြစ်နေစဉ်ကပင် တတိယအဆင့် သိုင်းသမားဟူ၍ ကျိုးယွင် တစ်ဦးတည်းသာ ရှိခဲ့သည်ကို သတိရသင့်ပေသည်။

တတိယအဆင့် သိုင်းသမားတစ်ဦး၏ ခန္ဓာကိုယ်ထဲတွင် အနည်းဆုံး ကြယ်တာရာစွမ်းအား အမျှင်ပေါင်း ထောင်ဂဏန်းအနည်းငယ် ရှိတတ်သည်။ အကယ်၍ တတိယအဆင့် အထက်သို့ ရောက်ရှိနေသူဆိုပါက အမျှင်တန်း စုစုပေါင်း ၉၉၉၉ အထိပင် ရှိနိုင်သည်။ ထိုမြေပုရွက်ဆိတ်နတ်ဆိုးများနှင့် တိုက်ခိုက်ရာတွင် အက်ဆစ်နှင့် အပက်ခံရလျှင်ပင် သူတို့၏ ကြွယ်ဝလှသော ကြယ်တာရာစွမ်းအားများဖြင့် ခုခံကာ တိုက်ခိုက်ရေးစွမ်းရည် မကျဆင်းအောင် ထိန်းထားနိုင်သည်။

ထို့ပြင် သူတို့သည် နတ်ဆိုးများကို မယှဉ်နိုင်လျှင်ပင် ထွက်ပြေးလွတ်မြောက်နိုင်ခြေမှာ အလွန်မြင့်မားသည်။

ထို့ကြောင့် လင်းဖုန်းက တိုက်ရိုက်ပင် ပြောလိုက်သည်။

"ညီအစ်ကို မိုလေ့... အသွင်ပြောင်းနယ်ပယ် သိုင်းသမားတွေအားလုံး ထိပ်တိုက်တိုက်မှာ မဟုတ်ပါဘူး၊ ကျွန်တော်တို့ ငါးယောက်ပဲ သွားကြမယ်။ ခင်ဗျားတို့ မြောက်ပိုင်းက တတိယအဆင့် သိုင်းသမား ၄ ယောက်နဲ့ ကျွန်တော်နဲ့ စုစုပေါင်း ၅ ယောက်ပေါ့။ ကျွန်တော်တို့တွေ အဲဒီရာနဲ့ချီတဲ့ မြေပုရွက်ဆိတ်နတ်ဆိုးတွေကို သွားပြီး နှိမ်နင်းမယ်။ ကျန်တဲ့လူတွေကတော့ ကျွန်တော် ခေါ်လာတဲ့ တောင်ပိုင်းက သိုင်းသမားတွေနဲ့ ပေါင်းပြီးတော့ မြောက်ပိုင်းတောင်တန်းအခြေစိုက်စခန်းကို ခဏလောက် စောင့်ကြပ်နေကြမယ်။ ဒါဆိုရင်တော့ ဘာပြဿနာမှ မရှိနိုင်ဘူး မဟုတ်လား"

လင်းဖုန်း၏ စကားကြောင့် မိုလေ့ မျက်လုံးပြူးသွားသည်။ သူသည် လုံးဝမယုံနိုင်လောက်အောင် ဖြစ်နေပုံရသည်။

"ကျုပ်တို့ ၅ ယောက်တည်းနဲ့ ရာနဲ့ချီတဲ့ မြေပုရွက်ဆိတ်နတ်ဆိုးတွေကို သွားတိုက်မယ် ဟုတ်လား"

မိုလေ့ပင်လျှင် ဤသည်မှာ ရူးသွပ်လွန်းသော လုပ်ရပ်ဟု ခံစားလိုက်ရသည်။ လူ ၅ ယောက်က နတ်ဆိုးရာချီကို စိန်ခေါ်မည်လား။ ထိုသို့ တွေးလိုက်ရုံနှင့်ပင် သူ ကြက်သီးထသွားမိသည်။ ထို့ပြင် လင်းဖုန်းကရော တတိယအဆင့် သိုင်းသမား တစ်ယောက်မို့လား။

မိုလေ့ သံသယဖြစ်နေသည်ကို မြင်သောအခါ လင်းဖုန်းက ရှင်းပြလိုက်သည်။

"ညီအစ်ကို မိုလေ့... ရာနဲ့ချီတဲ့ မြေပုရွက်ဆိတ်နတ်ဆိုးတွေက တကယ့်ကို ကြောက်စရာကောင်းတယ် ဆိုပေမဲ့ သူတို့က ပြန့်ကျဲနေကြတာပါ။ အုပ်စုလိုက် စုနေကြတာ မဟုတ်ဘူးလေ။ ဒါကြောင့် ကျွန်တော်တို့က နတ်ဆိုးရာချီရဲ့ တိုက်ခိုက်မှုကို တစ်ပြိုင်နက်တည်း ရင်ဆိုင်ရမှာ မဟုတ်ပါဘူး"

"ဒါ့အပြင် တတိယအဆင့် သိုင်းသမားတစ်ယောက်ရဲ့ ကြယ်တာရာစွမ်းအားက ဘယ်လောက်အထိ သိပ်သည်းလဲ။ ဝိုင်းထားခံရရင်တောင် ခဏလောက်တောင့်ခံထားပြီး ထွက်ပြေးဖို့လည်း သိပ်မခက်ခဲပါဘူး။ တကယ်လို့ ငါတို့ ရှုံးနိမ့်သွားရင်တောင် အသက်အန္တရာယ် မရှိနိုင်ပါဘူး။ အဲဒီလိုဆိုမှတော့ ဘာလို့ စမ်းမကြည့်သင့်ရမှာလဲ"

"တကယ်လို့ ခင်ဗျား ယူဆထားသလိုပဲ မြေပုရွက်ဆိတ်တောင်ပို့ထဲမှာ တစ်ခုခုဖြစ်နေပြီးတော့ သူတို့မှာ ပုရွက်ဆိတ်ဘုရင်မ မရှိဘူးဆိုရင် သူတို့က အခုချိန်မှာ ထိတ်လန့်နေကြတာပဲ။ ကျွန်တော်တို့ အလစ်အငိုက် သွားတိုက်နိုင်မယ်ဆိုရင် သူတို့ကို ခြောက်လှန့်ပြီး မောင်းထုတ်ပစ်ဖို့ဆိုတာ မဖြစ်နိုင်တဲ့ ကိစ္စ မဟုတ်ပါဘူး"

လင်းဖုန်း၏ စကားများကို ကြားရသောအခါ မိုလေ့လည်း သေသေချာချာ စတင်စဉ်းစားလာတော့သည်။

စင်စစ်တွင် ယခင်က သူသည် မြေပုရွက်ဆိတ် နတ်ဆိုး ရာချီရှိနေသည်ကို ကြောက်ရွံ့နေခဲ့ခြင်း ဖြစ်သည်။ သို့သော် လက်တွေ့တွင်မူ သူတစ်ဦးတည်း မဟုတ်ပေ။ မြောက်ပိုင်းတောင်တန်းအခြေစိုက်စခန်းရှိ သိုင်းသမား အားလုံးနီးပါး ထိတ်လန့်နေကြခြင်း ဖြစ်သည်။

အကြောင်းမှာ ယခင် ပုရွက်ဆိတ်ဘုရင်မရှိစဉ်က ဤမြေပုရွက်ဆိတ်များမှာ အလွန် စနစ်တကျ ရှိခဲ့ကြသည်။ သူတို့သည် တိုက်စစ်၊ ခံစစ်များကို တစ်ညီတစ်ညွတ်တည်း လုပ်ဆောင်ကြပြီး အတော်ဆုံး စစ်ဗိုလ်ချုပ်တစ်ဦး၏ အမိန့်ကို အပြည့်အဝ နာခံနေရသကဲ့သို့ပင် ကိုင်တွယ်ရ အလွန်ခက်ခဲခဲ့သည်။

သို့သော် ယခုမူ အခြေအနေက မတူတော့ပေ။ ပုရွက်ဆိတ်ဘုရင်မ မရှိသည်မှာ သေချာသလောက် ရှိနေသည်။ ထိုမြေပုရွက်ဆိတ်နတ်ဆိုးများမှာလည်း ကွက်ကြိုကွက်ကြား ပြန့်ကျဲနေကြသည်။ တစ်နေရာတည်းတွင် အများဆုံး စုနေသည်မှာ နတ်ဆိုးအကောင် ၂၀ ဝန်းကျင်ခန့်သာ ရှိသည်။ အကယ်၍ သူတို့သာ အလစ်အငိုက် စီးနင်းတိုက်ခိုက်နိုင်မည်ဆိုပါက နတ်ဆိုးရာချီကို တစ်ပြိုင်နက်တည်း ရင်ဆိုင်ရမည် မဟုတ်ပေ။

ရှုံးနိမ့်သွားလျှင်ပင် အလွယ်တကူ ပြန်ဆုတ်နိုင်သေးသည်။

"ဘေးလူက ပိုမြင်တယ်" ဆိုသည့်အတိုင်းပင်။ မြောက်ပိုင်းတောင်တန်းအခြေစိုက်စခန်း၏ စစ်သေနာပတိချုပ် ဖြစ်သူ သူကိုယ်တိုင်ထက် လင်းဖုန်းက အခြေအနေကို ပို၍ ရှင်းလင်းစွာ မြင်နေခဲ့ခြင်း ဖြစ်သည်။ အကယ်၍ သူသာ လင်းဖုန်း၏ နည်းလမ်းကို စမ်းကြည့်မည်ဆိုပါက တကယ်ပင် အောင်မြင်သွားနိုင်ပေသည်။

"ကောင်းပြီ... စမ်းကြည့်ကြတာပေါ့။ ဒါပေမဲ့ ညီအစ်ကို လင်းဖုန်း... မင်းကတော့ အခြေစိုက်စခန်းမှာပဲ နေပြီး ကွပ်ကဲနေတာက ပိုကောင်းလိမ့်မယ်ထင်တယ်။ ငါ အခြေစိုက်စခန်းရဲ့ ကွပ်ကဲမှုအာဏာကို မင်းဆီ လွှဲပေးခဲ့မယ်။ ငါတို့ လေးယောက်လုံးက တတိယအဆင့် သိုင်းသမားတွေဆိုတော့ လွတ်လွတ်လပ်လပ် သွားနိုင်လာနိုင်ပြီးတော့ အန္တရာယ် သိပ်မရှိနိုင်ဘူး"

လက်တွေ့တွင် ဤသည်မှာ လင်းဖုန်း၏ ခွန်အားမှာ သူတို့နှင့် မယှဉ်နိုင်ကြောင်း အားနာစွာဖြင့် သတိပေးလိုက်ခြင်းပင် ဖြစ်သည်။ လင်းဖုန်း သဘာဝကျကျ နားလည်လိုက်သည်။ သို့သော် သူ စိတ်မဆိုးပေ။ ထိုအစား သူက တည်ငြိမ်စွာပင် ပြောလိုက်သည်။

"ရပါတယ်... အခြေစိုက်စခန်းမှာ သိုင်းသမားတွေ အများကြီး ရှိနေတာပဲ။ ကျွန်တော် ရှိသည်ဖြစ်စေ၊ မရှိသည်ဖြစ်စေ အရေးမကြီးပါဘူး။ ပြီးတော့ ညီအစ်ကို မိုလေ့... ကျွန်တော့်ရဲ့ ခွန်အားအတွက် စိတ်မပူပါနဲ့။ အရေးကြီးတဲ့ အချိန်ကျရင် ကျွန်တော့်မှာ လွတ်မြောက်နိုင်တဲ့ ကိုယ်ပိုင်နည်းလမ်းတွေ ရှိပါတယ်"

လင်းဖုန်း ဘာလုပ်နိုင်မည်ကို မိုလေ့ မသိပေ။ မျိုးရိုးဗီဇကန့်သတ်ချက်ကို ဖောက်ထွင်းထားသည်မှာ လပိုင်းမျှသာ ရှိသေးသော သိုင်းသမားတစ်ဦးသည် အသွင်ပြောင်းနယ်ပယ် ဒုတိယအဆင့်သို့ပင် ရောက်ရှိနိုင်ပါမည်လော။

ထို့ပြင် ရောက်ရှိသွားသည်ဆိုဦးတော့ မြေပုရွက်ဆိတ်များ၏ ဝိုင်းရံမှုကို ခံရချိန်တွင် ဒုတိယအဆင့် သိုင်းသမားတစ်ဦးမှာ များစွာ အသုံးဝင်လိမ့်မည် မဟုတ်ပေ။

မိုလေ့သည် တောင်ပိုင်းတောင်တန်းအခြေစိုက်စခန်း၏ အင်အားကို အထင်သေးမိသော်လည်း လင်းဖုန်းသည် သူတို့ကို စိတ်ရင်းမှန်ဖြင့် လာရောက် ကူညီပေးခြင်း ဖြစ်သည်။ ထို့ကြောင့် လင်းဖုန်း တစ်ခုခု ဖြစ်သွားမည်ကို သူ လုံးဝ အလိုမရှိပေ။

"ညီအစ်ကို လင်းဖုန်း... ဒီစစ်ဆင်ရေးက တကယ့်ကို အန္တရာယ်များလွန်းတယ်။ ငါတို့တောင် အနိုင်ရဖို့ အပြည့်အဝ ယုံကြည်ချက် မရှိဘူး"

လင်းဖုန်း အလွန်ပင် အားကိုးရာမဲ့သလို ခံစားလိုက်ရသည်။ သူသည် အလွန် ငယ်ရွယ်လွန်းလှသဖြင့် တကယ်ပင် တခြားသူများအတွက်ယုံကြည်မှု တည်ဆောက်ရန် ခက်ခဲနေသည်။ သို့သော် သူသည် ဤစစ်ဆင်ရေးတွင် မဖြစ်မနေ ပါဝင်ရမည်သာ ဖြစ်သည်။ သူ့ခန္ဓာကိုယ်ထဲတွင် ကြယ်တာရာစွမ်းအား အမျှင်တန်းပေါင်း ၅၄၀၀ ကျော်ကို စုစည်းဖိသိပ်ထားပြီး ဖြစ်သည်။ သူသာ ဟင်းလင်းပြင်ပူဖောင်းနည်းစနစ်ကို အသုံးပြုလိုက်မည်ဆိုပါက ခဏအတွင်းမှာပင် နတ်ဆိုး ၁၀ ကောင်ထက်မနည်း သတ်ဖြတ်နိုင်သည်။ ဤသည်မှာ တတိယအဆင့် သိုင်းသမားများပင် မလုပ်ဆောင်နိုင်သော အရာဖြစ်သည်။ လင်းဖုန်း၏ ဟင်းလင်းပြင်ပူဖောင်း မပါဘဲ ထိုမြေပုရွက်ဆိတ်များကို မည်သို့ ခြောက်လှန့်နိုင်ပါမည်နည်း။

သို့သော် ဤကိစ္စကို ရှင်းပြရန် နည်းလမ်း မရှိပေ။ လင်းဖုန်းသည် စစ်ဆင်ရေးတွင် ပါဝင်ရန်သာ အတင်းအကျပ် တောင်းဆိုလိုက်သည်။ မည်သို့ပင်ဖြစ်စေ တိုက်ပွဲထဲ ရောက်သွားသည်နှင့် မိုလေ့နှင့် အခြားသူများ နားလည်သွားကြပေလိမ့်မည်။ တကူးတက ရှင်းပြနေရန် မလိုပေ။

"ညီအစ်ကို မိုလေ့... ဒီအကြံကို ကျွန်တော် ပေးခဲ့တာပါ။ ကျွန်တော့်မှာ ယုံကြည်ချက် ရှိပါတယ်"

"ကောင်းပြီ... ဒါဆိုရင်တော့ ငါတို့ ငါးယောက် အတူတူ သွားကြတာပေါ့"

အဆုံးတွင် မိုလေ့ သဘောတူလိုက်ရုံသာ ရှိတော့သည်။ သို့သော် သူသည် လင်းဖုန်း အန္တရာယ်နှင့် ကြုံတွေ့ရပါက မည်သို့ပင်ဖြစ်စေ သွားရောက် ကယ်တင်မည်ဟုလည်း စိတ်ပိုင်းဖြတ်လိုက်သည်။ လင်းဖုန်းကို တစ်ခုခုဖြစ်သွားခွင့် လုံးဝမပေးနိုင်ပေ။

မိုလေ့သည် မြောက်ပိုင်းတောင်တန်းအခြေစိုက်စခန်းရှိ အခြားသော တတိယအဆင့် သိုင်းသမား ၃ ဦးကို အမြန်သွားရောက် ရှာဖွေလိုက်သည်။ သူတို့အားလုံးမှာလည်း စစ်ဆင်ရေးကို သဘောတူကြသည်။ သို့သော်လည်း လင်းဖုန်းကိုမူ အံ့အားသင့်စွာ ကြည့်နေကြသည်။

သူတို့ ငါးဦးမှာ အခြေစိုက်စခန်းရှိ ကိစ္စအဝဝကို စီစဉ်ပြီးနောက် ခံတပ်မျှော်စင်ပေါ်မှတစ်ဆင့် ကောင်းကင်သို့ ပျံတက်သွားကြပြီး အဝေးရှိ ရာနှင့်ချီသော မြေပုရွက်ဆိတ်နတ်ဆိုးများဆီသို့ ဦးတည်ပျံသန်းသွားကြတော့သည်။

ထာဝရသိုင်းတာအိုအရှင်

အခန်း (၁၆၈) - အားနည်းလွန်းတယ်

ဘာသာပြန် - အားသစ်

မိုလေ့၊ လင်းဖုန်းနှင့် အခြားတတိယအဆင့်သုံးဦးတို့သည် မြောက်ပိုင်းအခြေစိုက်စခန်းမှ အတူတကွ ပျံသန်းထွက်ခွာလာပြီး မြေပုရွက်ဆိတ်အုပ်စုရှိရာသို့ တန်းတန်းမတ်မတ် ဦးတည်သွားကြသည်။

မိုလေ့၏ အခြားအဖော်သုံးဦးမှာ လင်းဖုန်းကို အံ့အားသင့်စွာ ကြည့်နေကြသော်လည်း မိုလေ့ကိုယ်တိုင်က သဘောတူထားပြီးဖြစ်၍ ဘာမှဝင်မပြောကြပေ။ လက်တွေ့တွင်မူ သူတို့သုံးဦးမှာ ဤစွန့်စားမှုအပေါ် မျှော်လင့်ချက် သိပ်မရှိကြချေ။ ရာနှင့်ချီသော မြေပုရွက်ဆိတ်နတ်ဆိုးများကို ဤမျှလောက်နှင့် ခြောက်လှန့်ရန်မှာ မည်သို့ဖြစ်နိုင်ပါမည်နည်း။ သူတို့သည် ဤမြေပုရွက်ဆိတ်နတ်ဆိုးများနှင့် တစ်ခါမှ မတိုက်ခိုက်ဖူးသည်လည်း မဟုတ်ပေ။ ယခင်အကြိမ်များတွင် နတ်ဆိုးအရေအတွက်မှာ ရာဂဏန်းထက် များစွာနည်းပါးသော်လည်း သူတို့ဘက်မှသာ အကြီးအကျယ် ထိခိုက်ဆုံးရှုံးခဲ့ရပြီး မည်သည့်အသာစီးမှ မရခဲ့ချေ။ အဆုံးတွင် အခြေစိုက်စခန်း၏ အကာအကွယ်ကို အားကိုး၍သာ မြေပုရွက်ဆိတ်များ၏ တိုက်ခိုက်မှုကို မနည်းတွန်းလှန်ခဲ့ရခြင်းဖြစ်သည်။

မည်သို့ပင် စဉ်းစားကြည့်စေကာမူ ယခုလက်ရှိ လူငါးဦးတည်းဖြင့် မြေပုရွက်ဆိတ်နတ်ဆိုး ရာချီကို အနိုင်ယူရန်မှာ မဖြစ်နိုင်ဟုသာ တွေးထင်မိကြသည်။

သို့သော် သူတို့ သံသယဖြစ်နေသည့်တိုင် မိုလေ့၏ အမိန့်ကို အပြည့်အဝ နာခံကြသည်။ ဤသည်မှာ မိုလေ့သည် မြောက်ပိုင်းတောင်တန်းအခြေစိုက်စခန်းတွင် အလွန်ဩဇာညောင်းကြောင်း ပြသနေခြင်းပင်။

လင်းဖုန်းနှင့် အခြားသူများ အနီးကပ် ချဉ်းကပ်လာသည်နှင့်အမျှ မြေပုရွက်ဆိတ်နတ်ဆိုးများသည်လည်း သူတို့၏အရိပ်အယောင်ကို သိရှိသွားပုံရပြီး အားလုံးမှာ ရူးသွပ်စွာ လှုပ်လှုပ်ရှားရှား ဖြစ်လာကြသည်။

"အားလုံးပဲ...အခုချက်ချင်း စတိုက်ကြစို့" လင်းဖုန်းက အော်ဟစ်လိုက်သည်။

"တိုက်ကြ"

မိုလေ့နှင့် အခြားသုံးဦးမှာ တွေဝေမနေတော့ပေ။ အသွင်ပြောင်းနယ်ပယ် တတိယအဆင့် သိုင်းသမားများမှာ မည်သို့ သာမန်ဖြစ်နိုင်ပါမည်နည်း။

သူတို့လေးဦး၏ ခန္ဓာကိုယ်ထဲမှ ကြယ်တာရာစွမ်းအားများမှာ ခမ်းနားထည်ဝါလှသည်။ ရှေးဦးစွာ သူတို့၏ ခန္ဓာကိုယ်မျက်နှာပြင်တွင် ကြယ်တာရာစွမ်းအား အကာအကွယ်အလွှာတစ်ခုကို ဖိသိပ်လိုက်ကြသည်။ ထို့နောက် ကြယ်တာရာစွမ်းအားများကို ထုတ်လွှတ်ကာ ကြွေကျလာသော ဥက္ကာခဲလေးလုံးကဲ့သို့ မြေပုရွက်ဆိတ်နတ်ဆိုးများဆီသို့ တိုက်ရိုက် အရှိန်ပြင်းစွာ ဆင်းသက်သွားကြတော့သည်။

လင်းဖုန်း တစ်ဦးတည်းသာ ကောင်းကင်ထက်တွင် လှုပ်ရှားမှုမရှိဘဲ ကျန်ရစ်ခဲ့သည်။

လင်းဖုန်းနှင့် အခြားသူများ၏ လှုပ်ရှားမှုကို မြောက်ပိုင်းတောင်တန်းအခြေစိုက်စခန်းရှိ လူများက စောင့်ကြည့်နေကြသည်။ မြောက်ပိုင်းတောင်တန်းအခြေစိုက်စခန်းမှ ဖြစ်စေ တောင်ပိုင်းတောင်တန်းအခြေစိုက်စခန်းမှ ဖြစ်စေ လူတိုင်းက ဤစစ်ဆင်ရေးကို အလွန်အလေးအနက်ထားကြသည်။

အနည်းဆုံးတော့ ဤသည်မှာ အကောင်းဆုံး ကြိုးပမ်းမှုတစ်ခုပင်။

သို့သော် မြောက်ပိုင်းနှင့် တောင်ပိုင်း အခြေစိုက်စခန်းများမှ လူများတွင် ကွဲပြားသော အမြင်များရှိကြသည်။ မြောက်ပိုင်းသားများက လင်းဖုန်းကို ခေါ်လာရန် မလိုဟု ခံစားမိကြသော်လည်း တောင်ပိုင်းသားများကမူ လင်းဖုန်းအပေါ် လုံးဝဥဿုံ ယုံကြည်မှုရှိနေကြသည်။

အကြောင်းမှာ တောင်ပိုင်းတောင်တန်းအခြေစိုက်စခန်းတွင် လင်းဖုန်းသည် လက်တစ်ချက်ဝေ့ရုံဖြင့် ကြယ်တာရာပူဖောင်း ခြောက်ခုကို ထုတ်လွှတ်ကာ သင်းခွေချပ်နတ်ဆိုး ခြောက်ကောင်ကို ချက်ချင်းသတ်ဖြတ်ပြခဲ့ပြီး တောင်ပိုင်းတောင်တန်းအခြေစိုက်စခန်းတစ်ခုလုံးကို တုန်လှုပ်စေခဲ့ဖူးသည်။ ဤသည်မှာ တတိယအဆင့် သိုင်းသမားများပင် မလုပ်နိုင်လောက်သော အရာမျိုး ဖြစ်ပေလိမ့်မည်။

တောင်ပိုင်းနှင့် မြောက်ပိုင်း အခြေစိုက်စခန်းများ စတင်တည်ထောင်ကတည်းက နှစ်ဖက်စလုံးမှာ တိတ်တဆိတ် ပြိုင်ဆိုင်ခဲ့ကြသည်။ သို့သော် အတိတ်တွင် မြောက်ပိုင်းမှာ တကယ်ပင် ပိုမိုသန်မာခဲ့ပြီး တောင်ပိုင်းကို အကြိမ်ကြိမ် ကူညီခဲ့ဖူးသည်။ ထို့ကြောင့် တောင်ပိုင်းသားများမှာ မြောက်ပိုင်းသားများရှေ့တွင် အားငယ်စိတ် ရှိခဲ့ကြသည်။

ယခုတစ်ကြိမ်တွင်မူ အခြေအနေက မတူတော့ပေ။ တောင်ပိုင်းသားများမှာ လင်းဖုန်းအပေါ် အလုံးစုံမျက်စိမှိတ် ယုံကြည်နေကြသည်။ လင်းဖုန်းသည် မြောက်ပိုင်းသိုင်းသမားများရှေ့တွင် သူ၏စွမ်းဆောင်ရည်ကို ထုတ်ဖော်ပြသနိုင်လိမ့်မည်ဟု သူတို့ မျှော်လင့်နေကြသည်။

အမှန်စင်စစ် ဤသည်မှာ လူများအကြားရှိ သေးဖွဲသိမ်နုတ်လှသော ခံစားချက်များသာ ဖြစ်သည်။ လူတိုင်းတကယ် စိုးရိမ်နေကြသည်မှာ သူတို့ငါးဦး မြေပုရွက်ဆိတ်နတ်ဆိုးများကို အောင်အောင်မြင်မြင် ခြောက်လှန့်နိုင်မည်လော ဆိုသည့်အချက်ပင်။

လင်းဖုန်းသည် ကောင်းကင်ထက်တွင် ရှည်ကြာစွာ မနေခဲ့ပေ။ သူသည် အသက်ပြင်းပြင်းတစ်ချက်ရှူလိုက်ပြီး သူ့ခန္ဓာကိုယ်တစ်ခုလုံးကို အကာအကွယ်ချပ်ဝတ်ဖြင့် ဖုံးအုပ်လိုက်သည်။ သူ၏ ကျောကုန်းတွင် အဖုအကျိတ်တချို့ ပေါ်ပေါက်လာဆဲပင်။

ထိုအဖုအကျိတ်များမှာ တိုက်စားတတ်သော အရည်များကို လွှတ်ထုတ်နိုင်သည်။ ဤသည်မှာ မြေပုရွက်ဆိတ်များနှင့် အနည်းငယ်ဆင်တူသော်လည်း မြေပုရွက်ဆိတ်များလောက် မပြင်းထန်လောက်ပေ။

လင်းဖုန်းသည် ခန္ဓာကိုယ်တစ်ခုလုံးကို အကာအကွယ်ချပ်ဝတ်ဖြင့် ဖုံးအုပ်ပြီးနောက် ကြယ်တာရာစွမ်းအားများကို အချိန်မရွေး ထုတ်ယူရန်လည်း အသင့်ပြင်ထားသည်။ သို့သော် သူသည် ခန္ဓာကိုယ်ကို ကြယ်တာရာစွမ်းအားဖြင့် မဖုံးအုပ်ထားချေ။ အကြောင်းမှာ ဤမြေပုရွက်ဆိတ်များ၏ အက်ဆစ်ရည် မည်မျှပြင်းထန်ကြောင်း စမ်းသပ်လိုသောကြောင့်သာ ဖြစ်သည်။

ရွှစ်...

လင်းဖုန်း၏ ပုံရိပ်မှာ လျှပ်စီးကဲ့သို့ လက်ခနဲ ဖြစ်သွားပြီး မိုလေ့တို့နောက်မှကပ်လျက် အောက်သို့ ဆင်းသက်သွားသည်။

အောက်ဘက်တွင် မြေပုရွက်ဆိတ်နတ်ဆိုး အကောင်၂၀ ကျော် ရှိနေသည်။ အားလုံးမှာ အလွန်တရာ အမျက်ထွက်နေကြသည်။ ဤမြေပုရွက်ဆိတ်နတ်ဆိုးများမှာ ထုထည်မကြီးမားသလို သူတို့၏ ကာကွယ်ရေးမှာလည်း သိပ်မသန်မာလှပေ။ သို့သော် သူတို့၏ သွားများမှာ အလွန်စူးရှထက်မြက်ပြီး မြေအောက်လိုဏ်ခေါင်းများတူးရာတွင် ကျွမ်းကျင်ကြသည်။ ပို၍ပင် သေစေနိုင်သည့် အန္တရာယ်အရှိဆုံးအရာမှာ သူတို့ထွေးထုတ်လိုက်သော အက်ဆစ်ဖြစ်ပြီး ၎င်းမှာ အလွန်ပြင်းထန်သော တိုက်စားနိုင်စွမ်း ရှိသည်။

ဘုန်း...

လင်းဖုန်း မြေပြင်ပေါ်သို့ ဆင်းသက်လိုက်သည်နှင့် မြေပုရွက်ဆိတ်နတ်ဆိုး သုံးကောင်၏ တိုက်ခိုက်ခြင်းကို ခံလိုက်ရသည်။ အစိမ်းရောင်အက်ဆစ်လုံး သုံးလုံးမှာ သူ့ ခန္ဓာကိုယ်ပေါ်သို့ ရုတ်တရက် ပက်ဖြန်းခံလိုက်ရသည်။

၎င်းတို့မှာ အလွန်လျင်မြန်လှပြီး မျက်စိတစ်မှိတ်အတွင်းမှာပင် သူ့ခန္ဓာကိုယ်အပေါ်သို့ ကျရောက်လာခြင်း ဖြစ်သည်။ ရှောင်တိမ်းရန်ပင် အချိန်မရလိုက်ပေ။

ချက်ချင်းဆိုသလို ထိုအက်ဆစ်လုံး သုံးလုံးမှာ လင်းဖုန်း၏ ချပ်ဝတ်ကို စတင်တိုက်စားတော့သည်။ ထိုအချိန်တွင် လင်းဖုန်း၏ အကာအကွယ်ချပ်ဝတ်မှာလည်း အက်ဆစ်၏ တိုက်စားမှုကို အရူးအမူး ခုခံနေသည်။ လင်းဖုန်းသည် သူ၏ အကာအကွယ်ချပ်ဝတ်က မြေပုရွက်ဆိတ်နတ်ဆိုးများ၏ အက်ဆစ်ကို တောင့်ခံနိုင်ခြင်းရှိမရှိ စမ်းသပ်လိုခြင်း ဖြစ်သည်။

အက်ဆစ်သုံးလုံးမှာ အလွန်လျင်မြန်စွာ တိုက်စားသွားပြီး လင်းဖုန်း၏ ချပ်ဝတ်တွင် အပေါက်ကြီး သုံးပေါက် ပေါ်လာသည်။ သို့သော် ဤသည်မှာ လင်းဖုန်း၏ မွေးရာပါ စွမ်းရည်ဖြစ်သဖြင့် စိတ်ကူးလိုက်ရုံဖြင့် သူ၏ သံချပ်ကာမှာ အမြန်ဆုံးနှုန်းဖြင့် အပြည့်အဝ ပြန်လည်ကောင်းမွန်လာနိုင်သည်။

တစ်ဖက်က တိုက်စားလိုက်၊ တစ်ဖက်က ပြန်လည်ကောင်းမွန်လာလိုက်နှင့် နောက်ဆုံးတွင် လင်းဖုန်း သိလိုက်ရသည်မှာ ထိုအက်ဆစ်သုံးလုံးသည် သူ၏ အကာအကွယ်ချပ်ဝတ်ကို လုံးဝ ထိုးဖောက်နိုင်ခြင်းမရှိပေ။

"အသုံးမဝင်ဘူးလား"

လင်းဖုန်း၏ မျက်လုံးအစုံမှာ လင်းလက်သွားသည်။ မြေပုရွက်ဆိတ်များကို မြောက်ပိုင်းတောင်တန်းအခြေစိုက်စခန်းရှိ သိုင်းသမားများက ကြောက်စရာကောင်းသည်ဟု ဖော်ပြကြသော်လည်း သူတို့၏ အပြင်းထန်ဆုံး လက်နက်ဖြစ်သော အက်ဆစ်မှာ သူ့အတွက် အသုံးမဝင်ဖြစ်နေသည်။ ဤသည်မှာ ဝမ်းမြောက်ဖွယ်ရာ အံ့ဩမှုတစ်ခုပင်။ သူသည် မူလက ကြယ်တာရာစွမ်းအားကို သုံး၍ အတင်းအကျပ် ခုခံရန် ပြင်ဆင်ထားသော်လည်း အကာအကွယ်ချပ်ဝတ်မှာ ထိုမျှ စွမ်းဆောင်ရည်ကောင်းလိမ့်မည်ဟု မမျှော်လင့်ထားခဲ့ပေ။

သို့သော် လင်းဖုန်းသည် မိုလေ့နှင့် အခြားအသွင်ပြောင်းနယ်ပယ် သိုင်းသမား လေးဦးကို လှမ်းကြည့်လိုက်သောအခါ သူတို့မှာ ရှေ့သို့တက်ရန် အတော်လေး အခက်တွေ့နေကြသည်ကို မြင်လိုက်ရသည်။ သူတို့အားလုံးမှာ ကြယ်တာရာစွမ်းအားဖြင့် အစွမ်းကုန် ခုခံနေကြရပြီး စက္ကန့်တိုင်းတွင် ကြယ်တာရာစွမ်းအား အမြောက်အမြား ကုန်ဆုံးနေကြသည်။

သူတို့၏ ကြယ်တာရာစွမ်းအားမှာ မည်မျှပင် နက်နဲစေကာမူ ယခုလက်ရှိအချိန် လင်းဖုန်း၏ ကြယ်တာရာစွမ်းအားထက်ပင် ပိုမိုနက်ရှိုင်းနေစေကာမူ ဘာအသုံးကျပါမည်နည်း။ ရေရှည်တွင် တောင့်ခံနိုင်လိမ့်မည် မဟုတ်ပေ။ အကြောင်းမှာ သူတို့သည် ပြန်လည်မဖြည့်တင်းနိုင်ဘဲ ခွန်အားများကိုသာ ဗုန်းဗောလအော အမြောက်အမြား အသုံးပြုနေရသောကြောင့် ဖြစ်သည်။ အခြားတစ်ဖက်တွင်မူ လင်းဖုန်းမှာ ကြယ်တာရာစွမ်းအား တစ်စက်မျှ သုံးရန် မလိုပေ။ သူသည် မွေးရာပါစွမ်းရည်သက်သက်ဖြင့် မြေပုရွက်ဆိတ်နတ်ဆိုးများကို ခုခံနိုင်သည်။ ဤသည်မှာ သဘာဝတရား၏ အပြန်အလှန် ထိန်းကျောင်းမှုပင် ဖြစ်ပြီး သင်းခွေချပ်နတ်ဆိုးများကို ခုခံရသည်ထက်ပင် ပိုမိုလွယ်ကူနေသည်။

သို့သော် လင်းဖုန်း မပေါ့ဆရဲပေ။ သူသည် မြေပုရွက်ဆိတ်နတ်ဆိုးများ၏ အက်ဆစ်ကို အဖန်ဖန် အထပ်ထပ် လေ့လာကြည့်ရာ အက်ဆစ်သည် သူ၏ ချပ်ဝတ်ကို အဆက်မပြတ် တိုက်စားနေကြောင်း သိလိုက်ရသည်။ ချပ်ဝတ်တန်ဆာမှာ တကယ်ပင် တိုက်စားခံရသော်လည်း တိုက်စားမှုအရှိန်မှာ မမြန်လှဘဲ အတော်လေးပင် နှေးကွေးသည်။

ထိုလုပ်ငန်းစဉ်အတွင်း လင်းဖုန်း၏ ချပ်ဝတ်တန်ဆာမှာလည်း ဖြည်းဖြည်းချင်း ပြန်လည်ကောင်းမွန်လာနိုင်သည်။ ထိုအတွက် လင်းဖုန်းသည် မွေးရာပါစွမ်းရည်အနည်းငယ်ကိုသာ အသုံးပြုရန် လိုအပ်သည်။

သို့သော် လင်းဖုန်း၏ မွေးရာပါစွမ်းရည်မှာ မည်မျှအထိ သန်မာပါသနည်း။ အမှန်တကယ်တန်းတွင် ထိုမွေးရာပါစွမ်းရည်မှာ လင်းဖုန်း၏ ရုပ်ပိုင်းဆိုင်ရာ ကြံ့ခိုင်မှုပေါ်တွင် မူတည်သည်။ သူ၏ ရုပ်ပိုင်းဆိုင်ရာကြံ့ခိုင်မှုနှင့်ဆိုလျှင် ဤနေရာတွင် သုံးရက်သုံးညတိုင် ရပ်နေလျှင်ပင် အက်ဆစ်သည် သူ၏ ချပ်ဝတ်ကို တိုက်စားနိုင်လိမ့်မည် မဟုတ်ပေ။

ဤနည်းဖြင့် လင်းဖုန်းမှာ ပြိုင်ဘက်ကင်းအဖြစ်သို့ ရောက်ရှိသွားပြီ ဖြစ်သည်။

"ကောင်းပြီ... အခု ဒီမြေပုရွက်ဆိတ်နတ်ဆိုးတွေရဲ့ ကာကွယ်နိုင်စွမ်းကို ကြည့်ကြတာပေါ့”

“ဝဲကယက်စွမ်းအား ဒုတိယအဆင့်"

လင်းဖုန်းသည် ထိုနတ်ဆိုးများဆီသို့ တန်းတန်းမတ်မတ် ပြေးဝင်သွားသည်။ သူသည် ဝဲကယက်စွမ်းအား တတိယအဆင့် သို့မဟုတ် စတုတ္ထအဆင့်ကိုပင် ထုတ်ဖော်ခြင်း မပြုပေ။ ထိုအစား ဝဲကယက်စွမ်းအား ဒုတိယအဆင့်ကိုသာ ထုတ်ဖော်လိုက်သည်။ သူ၏ မူလရုပ်ပိုင်းဆိုင်ရာ ခွန်အားနှင့် ပေါင်းစပ်လိုက်ပါက လင်းဖုန်းသည် တန် ၁၀၀၀ ကျော်အားကို လွယ်လွယ်ကူကူ ထုတ်ဖော်နိုင်ပြီ ဖြစ်သည်။

ဘုန်း...

လင်းဖုန်း၏ ခွန်အားမှာ မည်မျှအထိ ကြမ်းတမ်းပါသနည်း။ သူသည် မြေပုရွက်ဆိတ်နတ်ဆိုး တစ်ကောင်၏ ခေါင်းပေါ်သို့ လက်သီးဖြင့် အရှိန်ပြင်းစွာ ထိုးချလိုက်သည်။ ချက်ချင်းဆိုသလိုပင် ထိုနတ်ဆိုး၏ ဦးခေါင်းမှာ ကြေမွသွားပြီး နီဖြူရောင် အရည်များမှာ လင်းဖုန်းအပေါ်သို့ ပက်ဖြန်းသွားတော့သည်။

ထိုဖြစ်စဉ်မှာ အလွန်လွယ်ကူလွန်းလှသည်။ တကယ်ကို လွယ်ကူလွန်းလှသည်။ လင်းဖုန်းသည်ပင်လျှင် ဤမြေပုရွက်ဆိတ်နတ်ဆိုးများမှာ အလွန်အားနည်းသည်ဟု ခံစားလိုက်ရသည်။

အကယ်၍ သူသာ သင်းခွေချပ်နတ်ဆိုးတစ်ကောင်နှင့် ရင်ဆိုင်နေရပါက ဤမျှလွယ်လွယ်ကူကူ သတ်နိုင်လိမ့်မည် မဟုတ်ပေ။ ဝဲကယက်စွမ်းအား ဒုတိယအဆင့်မျှဖြင့် သင်းခွေချပ်နတ်ဆိုးတစ်ကောင်ကို အပြင်းအထန် ဒဏ်ရာရအောင်ပင် လုပ်နိုင်လိမ့်မည် မဟုတ်ချေ။ အကြောင်းမှာ ထိုသင်းခွေချပ်နတ်ဆိုးများ၏ ကျောက်ဖြစ်စေခြင်းစွမ်းရည်မှာ တကယ်ပင် သန်မာပြီး သူတို့၏ ကာကွယ်ရေးမှာလည်း အလွန်တရာမြင့်မားသောကြောင့် ဖြစ်သည်။ သင်းခွေချပ်နတ်ဆိုးတစ်ကောင်ကို သတ်ရန် သူသည် ဝဲကယက်စွမ်းအား တတိယအဆင့် သို့မဟုတ် စတုတ္ထအဆင့်အထိ ထုတ်ဖော်ရပေလိမ့်မည်။ မြေပုရွက်ဆိတ်နတ်ဆိုးများမှာမူ အလွန်ပင် အားနည်းလွန်းလှသည်။ လင်းဖုန်းအတွက် ထိုသို့သော တိူက်ခိုက်မှုမှာ အားစိုက်စရာပင် မလိုသလောက် ဖြစ်သည်။ သူ၏ ကြယ်တာရာစွမ်းအားကိုပင် အသုံးပြုရန် မလိုပေ။ လင်းဖုန်းအနေဖြင့် မြေပုရွက်ဆိတ်နတ်ဆိုး အမြောက်အမြား၏ ဝိုင်းရံခြင်းကို ခံရမှသာ အနည်းငယ် ဖိအားခံစားရပေလိမ့်မည်။

သို့သော် ယခုတော့...

လင်းဖုန်းမှာ သိုးအုပ်ထဲရောက်နေသော ကျားတစ်ကောင်အလားပင်။ သူသည် နတ်ဆိုးတစ်ကောင်ပြီးတစ်ကောင်ကို လက်သီးဖြင့် ထိုးနှက်နေသည်။ မျက်စိတစ်မှိတ်အတွင်းမှာပင် မြေပုရွက်ဆိတ်နတ်ဆိုး သုံးကောင်၏ ဦးခေါင်းများမှာ လင်းဖုန်းကြောင့် ပူဖောင်းတစ်လုံးအလား ပေါက်ကွဲထွက်သွားပြီး ခေါင်းမပါသော အလောင်းသုံးလောင်း ဖြစ်သွားကြတော့သည်။