အခန်း (၄၂၁-၄၂၃)

အခန်း (၄၂၁) - ဉာဏ်ကောင်းတယ် (၂)

~ထို့နောက် သူသည် လက်လှမ်းကာ သတိလစ် မေ့မြောနေသော ယွီ မိသားစု ခေါင်းဆောင်၏ ချန်ခွင်းအိတ် ကို ဆွဲယူလိုက်သည်။ အိတ်ပေါ်တွင် ခတ်နှိပ်ထားသော နတ်ဘုရား စိတ်အာရုံကို အတင်းအဓမ္မ ရိုက်ချိုး ဖျက်ဆီးပစ်လိုက်၏။ အထဲတွင် အတန်ကြာ ရှာဖွေပြီးနောက် ဝိညာဉ်ကျောက်စိမ်း ရွှေရည်အနှစ် တစ်စက်ကို ရှာတွေ့သွားသည်။ သူသည် ဝိညာဉ်ကျောက်စိမ်း ရွှေရည်အနှစ်ကို ယူဆောင်လိုက်ပြီးနောက် ချန်ခွင်းအိတ်ကို ပြန်လည် ပစ်ပေါက်ပေးလိုက်တော့သည်။

“တော်ပြီ... မြေဆရာ ကလွဲလို့ ကျန်တဲ့သူတွေ အကုန်လုံး ဝိညာဉ်ကျောက်စိမ်း သတ္တုတွင်းထဲကနေ အခုချက်ချင်း ထွက်သွားကြစမ်း။ ဒီ သတ္တုတွင်းက အခု ငါ့ပိုင်နက် ဖြစ်သွားပြီ”

တာအိုရုပ်သေးက အေးစက်စက် လေသံဖြင့် အမိန့်ပေးလိုက်သည်။

ထိုစကားကို ကြားသည်နှင့် ကောင်းကျုံးရှန်း သည် ချက်ချင်းပင် အရိုအသေပေးလိုက်၏။

“ဟုတ်ကဲ့ပါ ခင်ဗျာ... ကျွန်တော်တို့ ထွက်သွားပါ့မယ်”

သူသည် မည်သည့် တုံ့ဆိုင်းမှုမျှ မရှိဘဲ သူ၏ မျိုးနွယ်စုဝင်များကို ဦးဆောင်ကာ အလျင်အမြန် ထွက်ခွာသွားတော့သည်။

မန် မိသားစုမှ လူများ၏ မျက်နှာသွင်ပြင်များသည် အကြိမ်ကြိမ် ပြောင်းလဲသွားသော်ငြားလည်း၊ နောက်ဆုံးတွင် ကောင်း မိသားစု နောက်သို့ လိုက်ပါရန်သာ ဆုံးဖြတ်လိုက်ကြလေ၏။

ယွီ မိသားစုဝင် များမှာမူ စကားတစ်ခွန်းမျှပင် မဟရဲတော့ချေ။ သတိလစ် မေ့မြောနေသော သူတို့၏ မိသားစု ခေါင်းဆောင်ကို ပွေ့ချီကာ အလျင်အမြန် ထွက်ပြေးသွားကြလေတော့သည်။

“ရွှမ်း...”

တာအိုရုပ်သေးသည် ကောင်းကင်ယံမှ ဆင်းသက်လာပြီး လင်းရှူ နှင့် မလှမ်းမကမ်းတွင် ရပ်တန့်လိုက်သည်။ ရုပ်သေး၏ မမျှော်လင့်ထားသော မြန်ဆန်လှသည့် အရှိန်အဟုန်ကြောင့် သူမ အလန့်တကြား ဖြစ်သွားရ၏။

တာအိုရုပ်သေးသည် သူမကို ခေတ္တမျှ အကဲခတ် ကြည့်ရှုလိုက်သည်။ လင်းရှူ သည် အိုမင်းရင့်ရော်နေသည့် ပုံပေါက်နေသော်ငြားလည်း အသက်အရွယ် အလွန် ကြီးရင့်နေခြင်းတော့ မဟုတ်ဘဲ၊ အသက် တစ်ရာကျော်ခန့်သာ ရှိဦးမည် ဖြစ်သည်။

သူမ၏ မျက်နှာကို သေချာစွာ ကြည့်လိုက်ပါက မူလက အလွန် ချောမောလှပသော အမျိုးသမီး တစ်ဦး ဖြစ်ခဲ့ကြောင်း သိမြင်နိုင်ပေသည်။

အနည်းဆုံးတော့ သူမသည် နတ်သမီးလေး တစ်ပါး ဟူသော ဂုဏ်ပုဒ်နှင့် ထိုက်တန်ခဲ့သူ ဖြစ်၏။

သို့သော် ဝမ်းနည်းစရာ ကောင်းသည်မှာ မြေဆရာ လမ်းစဉ်ကို ကျင့်ကြံသူ တစ်ဦး အနေဖြင့် သူမသည် ကောင်းကင် တာအိုလမ်းစဉ် နှင့် ဆန့်ကျင်ဘက် ဖြစ်သော လမ်းကြောင်းပေါ်တွင် လျှောက်လှမ်းနေရခြင်းပင်။

သူမ၏ သက်တမ်းသည် လုံလောက်မှု မရှိသည်မှာ ကြာလှပြီ ဖြစ်သည်။

ဤကဲ့သို့သော အခြေအနေမျိုးအောက်တွင် နုပျိုခြင်း ထိန်းသိမ်းသည့် ဆေးလုံးများ ပင်လျှင် သူမ၏ ရုပ်ရည်သွင်ပြင်ကို ဆက်လက် မထိန်းသိမ်းပေးနိုင်တော့ချေ။

ဤသည်ကား မြေဆရာ လမ်းစဉ်ကို ကျင့်ကြံခြင်း၏ အားနည်းချက်များထဲမှ တစ်ခုပင် ဖြစ်၏။

အမျိုးသား မြေဆရာများ အနေဖြင့် ဂရုစိုက်မည် မဟုတ်သော်ငြားလည်း၊ အမျိုးသမီး မြေဆရာများ အတွက်မူကား...

“နောက်တစ်ဆင့် အနေနဲ့ တူးဖော်ရေး အလုပ်တွေ မပြီးမချင်း မင်းက ဒီ ဝိညာဉ်ကျောက်စိမ်း သတ္တုတွင်းကို စောင့်ကြပ်ပေးရမယ်။ အဲ့ဒီအချိန် ရောက်လာရင်တော့ မင်းကို ငါ မျှမျှတတ ဆက်ဆံပေးပါ့မယ်”

တာအိုရုပ်သေးက သူမကို စိုက်ကြည့်ရင်း အမိန့်ပေးလိုက်သည်။

လင်းရှူ သည် အလိုမကျစွာဖြင့် အံကြိတ်လိုက်ပြီး စိတ်ထဲမှ ကြိတ်ကာ ညည်းတွားလိုက်တော့၏။

'မျှမျှတတ ဆက်ဆံပေးမယ် ဟုတ်လား'

'နင်သာ ပေါ်မလာခဲ့ဘူး ဆိုရင် ငါ ဝိညာဉ်ကျောက်စိမ်း ရွှေရည်အနှစ် နှစ်စက်တောင် ရနေလောက်ပြီ'

'အခု နင်က ဒီ ဝိညာဉ်ကျောက်စိမ်း သတ္တုတွင်းကို သိမ်းပိုက်လိုက်တဲ့အပြင်၊ ငါ့ကိုပါ အစောင့်အဖြစ် ခိုင်းနေသေးတယ်။ ငါ့ကို ဝိညာဉ်ကျောက်စိမ်း ရွှေရည်အနှစ် တွေ ပေးမှာမို့လို့လား'

ဒါပေါ့လေ။

ဤစကားများကို လင်းရှူ အနေဖြင့် အသံထွက်၍ မပြောရဲခဲ့ပေ။

သူမသည် အနည်းငယ် အခက်တွေ့နေသည့် မျက်နှာထားဖြင့်သာ မေးလိုက်သည်။

“ဘာလို့ အင်အားကြီး မိသားစု သုံးခုက လူတွေကို မောင်းထုတ်ပစ်လိုက်တာလဲ ရှင်။ သူတို့ မရှိရင် ကျွန်မတို့ နှစ်ယောက်တည်းနဲ့ ဒီ ဝိညာဉ်ကျောက်စိမ်း သတ္တုတွင်းကို တူးဖော်ဖို့ အတော်လေး ခက်ခဲလိမ့်မယ်နော်”

ထိုအခါ၊ တာအိုရုပ်သေးက ခပ်ဖျော့ဖျော့သာ ပြုံးပြလိုက်၏။

“ကျိ... ကျိ... ကျိ...”

နောက်တစ်ခဏ၌ ကြွက်မိစ္ဆာများ၏ ဆူညံသော အော်မြည်သံများကို ကြားလိုက်ရသည်။

မူလက ဝိညာဉ်ကျောက်စိမ်း သတ္တုတွင်း အောက်တွင် ရှိနေခဲ့သော ကောင်းကင်မိုးကြိုး ကြွက် မိစ္ဆာအုပ်စုသည် မြေအောက်မှနေ၍ အုံလိုက်ကျင်းလိုက် ထွက်ပေါ်လာကြပြီး တာအိုရုပ်သေး၏ ပတ်လည်တွင် စုရုံးလာကြတော့၏။ ၎င်းတို့ အားလုံးသည် ရိုသေကျိုးနွံစွာဖြင့် ဦးညွှတ် အရိုအသေ ပေးလိုက်ကြသည်။

ဤမြင်ကွင်းကို မျက်မြင်ကိုယ်တွေ့ မြင်လိုက်ရသောအခါ လင်းရှူ သည် တစ်စုံတစ်ခုကို ရုတ်တရက် သဘောပေါက်သွားပြီး ခံစားချက်များ ရောထွေးသွားတော့သည်။

'ဒီလိုကိုး'

'ဝိညာဉ်ကျောက်စိမ်း သတ္တုတွင်း အောက်က ကြွက်မိစ္ဆာ အုပ်စုက သူ့ရဲ့ ထိန်းချုပ်မှု အောက်မှာ ရှိနေတာပဲ'

'အရင်တုန်းက ငါ သူတို့ကို မောင်းထုတ်ပြီး အကုန်လုံးကို ရှင်းလင်းပစ်ဖို့ စီစဉ်ထားခဲ့တာ။ ကံကောင်းလို့ ဘာမှ မဖြစ်ခဲ့တာ'

လင်းရှူ သည် ထိုအကြောင်းကို တွေးမိပြီး အလွန်တရာ ကြောက်မက်ဖွယ် ကောင်းလှသည်ဟု ခံစားလိုက်ရသည်။

အကယ်၍ သူမသာ အမှန်တကယ် လှုပ်ရှားခဲ့မိမည် ဆိုပါက... ဤမျှ စွမ်းအား ကြီးမားလှသော ရန်သူနှင့် ရင်ဆိုင်ရလျက် သူမ အသက်ရှင်လျက် ကျန်ရစ်နိုင်ပါဦးမည်လား။

“နောက်ပိုင်း ဒီ မိစ္ဆာအုပ်စုက တူးဖော်ရေး အလုပ်တွေကို ဆက်လုပ်လိမ့်မယ်။ မင်း လုပ်ရမှာက သတ္တုတွင်းကို စောင့်ကြပ်ဖို့နဲ့ တခြားသူတွေ လာရောက် မနှောင့်ယှက်အောင် တားဆီးပေးဖို့ပဲ”

တာအိုရုပ်သေးက အေးအေးလူလူပင် ပြောလိုက်၏။

လင်းရှူ သည် အသက်ပြင်းပြင်း တစ်ချက် ရှူသွင်းလိုက်သည်။ ရုပ်သေး၏ ဆန္ဒကို သူမ လုံးဝ မဆန့်ကျင်ရဲဘဲ ရိုသေနာခံစွာဖြင့်သာ ပြန်လည် တုံ့ပြန်လိုက်ရတော့၏။

“ဟုတ်ကဲ့ပါ စီနီယာ”

အခြားတစ်ဖက်တွင်မူ၊

အင်အားကြီး ကျင့်ကြံသူ မိသားစုကြီး သုံးခုမှ လူများသည် ထွက်ခွာသွားကြပြီးနောက် အင်မော်တယ် မြို့တော်ဆီသို့ အလျင်အမြန် ပြန်လာခဲ့ကြကာ၊ သက်ဆိုင်ရာ ဘိုးဘေးကြီးများ ထံသို့ အခြေအနေ အရပ်ရပ်ကို သတင်းပို့ကြလေတော့သည်။

ကောင်း မိသားစု အင်မော်တယ် စံအိမ်တော်၊

သတင်းကို ကြားသိရသောအခါ ကောင်း မိသားစု ဘိုးဘေးကြီး ၏ မျက်နှာသွင်ပြင်သည် အနည်းငယ် ပြောင်းလဲသွား၏။ သူသည် ကောင်းကျုံးရှန်း ကို မှုန်ကုပ်နေသော မျက်နှာထားဖြင့် စိုက်ကြည့်ကာ မေးလိုက်သည်။

“ရွှေအမြုတေ အဆင့် နှောင်းပိုင်း အရှင်သခင် တစ်ပါး ဖြစ်တဲ့ လူစိမ်း တစ်ယောက် ပေါ်လာပြီး ဝိညာဉ်ကျောက်စိမ်း သတ္တုတွင်းကို သိမ်းပိုက်သွားတယ် လို့ မင်း ပြောချင်တာလား”

ကောင်းကျုံးရှန်း က သက်ပြင်းချရင်း ပြန်လည် ဖြေကြားလိုက်သည်။

“ဟုတ်ပါတယ် ဘိုးဘေးကြီး။ သူက ရုတ်တရက်ကြီး ပေါ်လာတာမို့လို့ ကျွန်တော်တို့ အကုန်လုံး ဘာလုပ်ရမှန်းတောင် မသိလိုက်ဘူး”

“အဲ့ဒီအချိန်တုန်းက ဝိညာဉ်ကျောက်စိမ်း သတ္တုတွင်း ထဲမှာ တတိယအဆင့် အဆင့်နိမ့် သွေးကြော အခင်းအကျင်း တစ်ခုကို ကျွန်တော်တို့ တည်ဆောက်ထားပြီးသား ဆိုတာ ဘိုးဘေးကြီး သိပါတယ်နော်။ ဒါပေမဲ့ သူက အခင်းအကျင်း ကို အသာလေး ထိုးဖောက်ပြီး တိုက်ရိုက်ကြီးကို ပေါ်လာတာပါ”

“အရမ်းကို ကြောက်စရာ ကောင်းလွန်းပါတယ်။ လင်းရှူ တောင်မှ နည်းနည်းလေးတောင် မကျေနပ်တဲ့ ပုံစံ မပြရဲဘူး”

ကောင်း မိသားစု ဘိုးဘေးကြီး ၏ မျက်နှာအမူအရာသည် အကြိမ်ကြိမ် ပြောင်းလဲသွားတော့၏။ သူ၏ ရင်ထဲတွင် အံ့အားသင့်မှုနှင့် ဒေါသတရားများ ရောယှက်နေသည်။

ရွှေအမြုတေ အဆင့် နှောင်းပိုင်း အရှင်သခင် တစ်ပါး...

ဤကဲ့သို့သော ပုဂ္ဂိုလ်မျိုးကို ကောင်း မိသားစု အနေဖြင့် လုံးဝ မရန်စနိုင်သလို၊ သူကိုယ်တိုင်လည်း မရန်စဝံ့ချေ။

သို့သော် ထို တတိယအဆင့် ဝိညာဉ်ကျောက်စိမ်း သတ္တုတွင်းကြီး သည်ကား... ဝိညာဉ်ကျောက်စိမ်း ရွှေရည်အနှစ် ကို ထုတ်ပေးနိုင်စွမ်း ရှိသည့် သတ္တုတွင်းကြီး ပေတကား။

ထိုအကြောင်းကို တွေးမိတိုင်း သူ၏ ရင်ထဲတွင် နာကျင်မှုများကိုသာ ခံစားရပြီး ဤအခြေအနေကို လုံးဝ လက်မခံနိုင်အောင် ဖြစ်နေရသည်။

ကောင်း မိသားစု ဘိုးဘေးကြီး သည် ဤအခြေအနေကို မည်သို့ ကိုင်တွယ်ဖြေရှင်းရမည်နည်း ဟု စဉ်းစားခန်း ဝင်နေစဉ်မှာပင်၊ ကောင်း မိသားစု ပင်မ အိမ်တော်မှ သခင်မလေး ပေါ်ထွက်လာခဲ့သည်။ အရပ်ရှည်ရှည်နှင့် ကျက်သရေရှိလှသော သူမ၏ ပုံရိပ်သည် ကောင်း မိသားစု ဘိုးဘေးကြီး ၏ ရှေ့မှောက်သို့ ရောက်ရှိလာပြီး၊ ဦးညွှတ် အရိုအသေ ပေးကာ ပြောလိုက်တော့၏။

“ဘိုးဘေးကြီး... ကျွန်မတို့ရဲ့ လက်ရှိ အင်အားနဲ့ဆိုရင်တော့ အဲ့ဒီ သတ္တုတွင်းကို ပြန်လည် ထိန်းချုပ်နိုင်ဖို့ ဆိုတာ လုံးဝ မဖြစ်နိုင်တော့ပါဘူး”

“သို့ပေမယ့်လည်း... ဒီ အကျပ်အတည်းကို အခွင့်အရေး တစ်ခု အဖြစ် ကျွန်မတို့ ပြောင်းလဲပစ်နိုင်ကောင်း ပြောင်းလဲပစ်နိုင်ပါတယ်”

ကောင်း မိသားစု ဘိုးဘေးကြီး သည် မျက်မှောင်ကြုတ်သွားပြီး...

“အခွင့်အရေး တစ်ခု အဖြစ် ပြောင်းလဲမယ် ဟုတ်လား”

သခင်မလေး ကောင်း က အေးအေးလူလူပင် ပြန်လည် ရှင်းပြလိုက်သည်။

“အဲ့ဒီ စီနီယာက တစ်ယောက်တည်း ပေါ်လာတာပါ။ သူ့အနေနဲ့ သတ္တုတွင်းကို တူးဖော်ဖို့ ဆိုတာ သိပ်လွယ်ကူလှမှာ မဟုတ်ပါဘူး။ ကျွန်မတို့ ကောင်း မိသားစု က သူ့ကို အကူအညီ ပေးနိုင်ကောင်း ပေးနိုင်ပါလိမ့်မယ်”

“ပြီးတော့ စီနီယာက ကျွန်မတို့ကို မောင်းထုတ်ခဲ့ပေမယ့် ဘယ်သူ့ကိုမှ သတ်ဖြတ်မသွားခဲ့ဘူးလေ”

“ဒါက သူဟာ သွေးဆာနေတဲ့ လူတစ်ယောက် မဟုတ်ဘူး ဆိုတာကို ပြသနေတာပါပဲ။ သူ့ရဲ့ စရိုက်လက္ခဏာကို အကဲဖြတ်ကြည့်လို့ ရသလို၊ ယုံကြည်ရနိုင်ချေလည်း ရှိပါတယ်”

“တကယ်လို့ ဒီ စီနီယာကသာ ကျွန်မတို့ ကောင်း မိသားစု နဲ့ မိတ်ဆွေဖွဲ့ဖို့ ဆန္ဒရှိလာခဲ့မယ် ဆိုရင်... ရွှေအမြုတေ အဆင့် နှောင်းပိုင်း အရှင်သခင် တစ်ပါးရဲ့ အကူအညီဟာ ကျွန်မတို့ ကောင်း မိသားစု အတွက် အလုပ်တွေ အများကြီး လုပ်ဆောင်နိုင်ဖို့ လုံလောက်ပါတယ်”

“ဥပမာ အားဖြင့်... ဘိုးဘေးကြီး အမြဲတမ်း လုပ်ချင်နေခဲ့တဲ့ ကိစ္စမျိုးပေါ့။ အင်အားကြီး မိသားစု သုံးခု ပူးပေါင်းပြီး ကုန်သွယ်ရေး အသင်းအဖွဲ့ တစ်ခု တည်ထောင်ဖို့ ကိစ္စလေ”

“ဒါမှမဟုတ် ဒီ စီနီယာက တစ်ကိုယ်တော် လှုပ်ရှားတဲ့သူ ဆိုရင်...”

သခင်မလေး ကောင်း သည် သူမ၏ ဘိုးဘေးကြီးကို စိုက်ကြည့်လိုက်၏။ လှပသော မျက်နှာပေါ်တွင် တည်ငြိမ်သော အမူအရာ ဖြင့် သူမက ဆက်ပြောလိုက်သည်။

“သူ့ကို ကောင်း မိသားစု ထဲ ဆွဲသွင်းနိုင်ဖို့ အတွက်... ကျွန်မ အဲ့ဒီ စီနီယာကို အလုပ်အကျွေး ပြုဖို့ ဆန္ဒရှိပါတယ်”

ကောင်း မိသားစု ဘိုးဘေးကြီး ၏ မျက်ဝန်းအိမ်များ ကျဉ်းမြောင်းသွားပြီး ဆွဲဆောင်မှု အပြည့်ရှိသော သူ၏ မျိုးဆက်လေးကို စိုက်ကြည့်နေမိတော့၏။

အခန်း (၄၂၂) - ဉာဏ်ကောင်းတယ် (၃)

~ကောင်း မိသားစု ဘိုးဘေးကြီး သည် မျက်မှောင်အနည်းငယ် ကြုတ်သွားသော်ငြားလည်း သက်ပြင်းသဲ့သဲ့ တစ်ချက် ချလိုက်လေ၏။

သူတို့၏ မျိုးဆက်သည် တဖြည်းဖြည်း ကျဆင်းလာနေပြီ ဖြစ်ပြီး၊ လက်ရှိအချိန်တွင် မျိုးဆက်သစ် တစ်ဦး ဖြစ်သော သူမ တစ်ယောက်တည်းသာ မိသားစုကို မနည်း ဖေးမ တောင့်ခံထားရခြင်း ဖြစ်သည်။

အကယ်၍ အရာအားလုံးက သူမ ပြောသလိုသာ အမှန်တကယ် ဖြစ်လာခဲ့မည် ဆိုလျှင်၊ ရွှေအမြုတေ အဆင့် နှောင်းပိုင်း အရှင်သခင်ကြီး တစ်ပါးကို ကောင်း မိသားစု နှင့် ပူးပေါင်းလာရန် ဆွဲဆောင်နိုင်မည် ဖြစ်၏။

ထိုသို့ ဖြစ်လာစေရန် သူတို့၏ တိုက်ရိုက် မြေးမလေးက အလုပ်အကျွေး ပြုရမည် ဆိုလျှင်တောင်မှ ကောင်း မိသားစု အတွက်တော့ တန်လှပေသည်။

အချိန်အနည်းငယ် ကြာပြီးနောက်၊

ကောင်း မိသားစု ဘိုးဘေးကြီး က ဆုံးဖြတ်ချက် ချလိုက်သည်။

"ကောင်းပြီလေ... မင်း ငါနဲ့အတူ ဝိညာဉ်ကျောက်စိမ်း သတ္တုတွင်း ဆီကို လိုက်ခဲ့။ ဒီ ပုဂ္ဂိုလ်ကြီးနဲ့ သွားတွေ့ကြတာပေါ့"

ကောင်း မိသားစု ဆုံးဖြတ်ချက် ချလိုက်သည့် အချိန်မှာပင် ကုန်းယွဲ့ အင်မော်တယ် မြို့တော် ရှိ အခြား မိသားစု နှစ်ခု ဖြစ်သော ယွီ မိသားစု နှင့် မန် မိသားစု တို့သည်လည်း ဆွေးနွေး တိုင်ပင်နေကြ၏။ မကြာမီမှာပင် ယွီ မိသားစု နှင့် မန် မိသားစု တို့၏ ဘိုးဘေးကြီး များသည် အတူတကွ စုဝေးရောက်ရှိလာကြသည်။

ကောင်း မိသားစု နှင့် နှိုင်းယှဉ်ပါက ယွီ မိသားစု နှင့် မန် မိသားစု တို့ နှစ်ခုစလုံးသည် အံ့အားသင့်မှုနှင့် ဒေါသတရားများ ကြောင့် အံကြိတ်ကာ ဒေါသထွက်နေကြပြီး၊ မည်သို့မျှ စိတ်မငြိမ်မသက် ဖြစ်နေကြတော့၏။

မည်သို့ပင် ဆိုစေကာမူ သူတို့၏ 'ရွှေတွင်းကြီး' အလုခံလိုက်ရသည်ကို သူတို့ မည်သို့များ သည်းခံနိုင်မည်နည်း။

"သူက ရွှေအမြုတေ အဆင့် နှောင်းပိုင်း ဖြစ်နေတော့ရော ဘာအရေးလဲ။ ရွှေအမြုတေ အဆင့် နှောင်းပိုင်း ဖြစ်ရုံနဲ့ ဒီလို ရမ်းကားလို့ ရပြီလား။ သူ့ကို နှိမ်နင်းနိုင်မယ့်သူ မရှာနိုင်ဘူး ဆိုတာ ငါ မယုံဘူး"

ယွီ မိသားစု ဘိုးဘေးကြီး က အံကြိတ်ကာ ပြောလိုက်၏။ သူ၏ မျက်ဝန်းများထဲတွင် ရက်စက်ကြမ်းကြုတ်မှုများ ပြည့်နှက်နေပြီး ဆက်ပြောလိုက်သည်။

"ငါတို့သာ အဲ့ဒီ ဝိညာဉ်ကျောက်စိမ်း ရွှေရည်အနှစ် သတ္တုတွင်း ကို မရနိုင်ဘူး ဆိုရင်၊ သူလည်း ရဖို့ မစဉ်းစားနဲ့"

မန် မိသားစု ဘိုးဘေးကြီး သည် အံ့အားသင့် တုန်လှုပ်သွားပြီး မေးလိုက်သည်။

"အစ်ကိုကြီး ယွီ... ဘာလုပ်ဖို့ ကြံစည်နေတာလဲ"

ယွီ မိသားစု ဘိုးဘေးကြီး က ရက်စက်သော အပြုံးဖြင့် ပြန်ဖြေလိုက်၏။

"ဒီသတင်းကို နဂါးနက် ကုန်သွယ်ရေး အသင်းဆီ ရောင်းစားလိုက်မယ်။ ဝိညာဉ်ကျောက်စိမ်း ရွှေရည်အနှစ် တွေ ရှိနေတဲ့ တတိယအဆင့် ဝိညာဉ်ကျောက်စိမ်း သတ္တုတွင်း ကို သူတို့ လွယ်လွယ်နဲ့ လက်လွှတ်ခံမှာ မဟုတ်ဘူး"

နဂါးနက် ကုန်သွယ်ရေး အသင်း ၏ နာမည်ကို ကြားလိုက်ရသောအခါ မန် မိသားစု ဘိုးဘေးကြီး ၏ မျက်နှာသည် ဖြူဖျော့သွားတော့သည်။

ဤ အသင်းအဖွဲ့၏ အမည်သည် သာမန်မျှသာ ဟု ထင်ရသော်ငြားလည်း၊ အမှန်တကယ်တွင် ဓားပြဂိုဏ်း မှနေ၍ ကြီးထွားလာသော အင်အားစု တစ်ခု ဖြစ်သည်။

၎င်းသည် အနီးအနားရှိ နဂါးနက် မြစ်ကြီး ပေါ်တွင် ကြီးစိုး ဩဇာလွှမ်းမိုးထားသော အင်အားစု တစ်ခု ဖြစ်၏။

အသင်းခေါင်းဆောင် ဖြစ်သူ နဂါးနက်သည် ရွှေအမြုတေ အဆင့် ၏ အထွတ်အထိပ် သို့ ရောက်ရှိနေသော အလွန် အစွမ်းထက်သည့် ပုဂ္ဂိုလ်ကြီး တစ်ဦး ဖြစ်သည်။

သူ၏ လက်အောက်တွင် ထိပ်တန်း တတိယအဆင့် စပါးအုံးမြွေ မိစ္ဆာကြီး တစ်ကောင်လည်း ရှိနေသေး၏။

ထို စပါးအုံးမြွေ မိစ္ဆာကြီးသည် နဂါးသွေး မျိုးဆက် အနည်းငယ် ပါဝင်နေပြီး ခြေသည်း နှစ်ချောင်းပင် ပိုင်ဆိုင်ထားသည်ဟု ကောလဟာလများ ထွက်ပေါ်နေသည်။

သူတို့ နှစ်ဦး ပေါင်းလိုက်မည် ဆိုပါက 'အတုအယောင် မူလဝိညာဉ် အဆင့်' ကျွမ်းကျင်သူ တစ်ဦးကိုပင် ယှဉ်ပြိုင်နိုင်စွမ်း ရှိပေသည်။

အကယ်၍ နဂါးနက် ကုန်သွယ်ရေး အသင်း သာ ဤကိစ္စတွင် ပါဝင်လာပါက ကုန်းယွဲ့ အင်မော်တယ် မြို့တော် အနေဖြင့် အခြေအနေ ကောင်းလာမည် မဟုတ်ချေ။

သို့သော် ဝိညာဉ်ကျောက်စိမ်း ရွှေရည်အနှစ် ကို ထုတ်ပေးနိုင်စွမ်း ရှိသည့် တတိယအဆင့် ဝိညာဉ်ကျောက်စိမ်း သတ္တုတွင်းကြီး ကို သူတို့ လက်လွှတ်လိုက်ရသည်ကို ပြန်လည် တွေးတောမိသောအခါ၊ မန် မိသားစု ဘိုးဘေးကြီး သည် အံကြိတ်ကာ ခေါင်းညိတ်လိုက်ပြီး သဘောတူလိုက်သည်။

"ကောင်းပြီလေ... ဒီသတင်းကို နဂါးနက် ကုန်သွယ်ရေး အသင်း ဆီ သွားရောင်းဖို့ လူလွှတ်လိုက်ရအောင်"

ယွီ မိသားစု နှင့် မန် မိသားစု တို့၏ အကြံအစည်များကို ဘေးဖယ်ထားလိုက်ပါဦး။

အခြားတစ်ဖက်တွင်မူ၊

ကောင်း မိသားစု ဘိုးဘေးကြီး နှင့် ကောင်း မိသားစု သခင်မလေး တို့သည် မြို့ပြင်သို့ ထွက်လာခဲ့ကြ၏။ မကြာမီမှာပင် သူတို့ နှစ်ဦးသည် ဝိညာဉ်ကျောက်စိမ်း သတ္တုတွင်း ၏ အပြင်ဘက်သို့ ရောက်ရှိလာကြသည်။

ကောင်း မိသားစု ဘိုးဘေးကြီး ဖြစ်သူ ကောင်းထန် သည် ရွှေအမြုတေ အဆင့် (၅) ကျင့်ကြံသူ တစ်ဦး ဖြစ်သော်ငြားလည်း၊ ယခုအခိုက်အတန့်၌ ဝိညာဉ်ကျောက်စိမ်း သတ္တုတွင်း ၏ အပြင်ဘက်သို့ ရောက်ရှိလာချိန်တွင် ရိုသေကျိုးနွံစွာဖြင့် မြေသက်ဆင်းလိုက်ပြီး သတ္တုတွင်း ရှိရာသို့ ဦးညွှတ်ကာ အော်ဟစ် ပြောဆိုလိုက်သည်။

"ကောင်း မိသားစု က ကောင်းထန် ပါ ခင်ဗျာ။ ကုန်းယွဲ့ အင်မော်တယ် မြို့တော် မှာ အကြီးအကဲ တစ်ယောက် ပေါ်လာတယ် လို့ ကြားသိရလို့ လာရောက် ဂါရဝပြုတာပါ"

သတ္တုတွင်း အတွင်း၌၊

တာအိုရုပ်သေးသည် သစ်သားအိမ်လေး တစ်လုံး အတွင်း၌ တင်ပျဉ်ခွေ ထိုင်နေပြီး၊ အောက်ဘက်တွင်မူ ကောင်းကင်မိုးကြိုး ကြွက် မိစ္ဆာအုပ်စု သည် ဝိညာဉ်ကျောက်စိမ်း သတ္တုတွင်း ကို အားကြိုးမာန်တက် တူးဖော်နေကြသည်။

ဝိညာဉ်သတ္တုရိုင်း တုံးများကို တစ်တုံးပြီး တစ်တုံး တူးဖော်၍ အပေါ်သို့ သယ်ဆောင်လာကြ၏။

ထိုအခိုက်အတန့်၌ တာအိုရုပ်သေးသည် မျက်လုံးများကို ဖွင့်လိုက်ရာ သူ၏ မျက်ဝန်းများထဲတွင် အံ့အားသင့်သွားသည့် အရိပ်အယောင် တစ်ချက် ဖြတ်ပြေးသွားသည်။

'လူနှစ်ယောက်... တစ်ယောက်က ရွှေအမြုတေ အဆင့် (၅)။ အဲ့ဒါ ကောင်း မိသားစု ဘိုးဘေးကြီး ကောင်းထန် လား'

တာအိုရုပ်သေးသည် သတ္တုတွင်း အပြင်ဘက်မှ အရှိန်အဝါများကို အာရုံခံလိုက်မိ၏။

'နောက်တစ်ယောက်က လူငယ် မိန်းကလေး တစ်ယောက်ပဲ။ အသက် ငါးဆယ်တောင် မပြည့်လောက်သေးဘူး။ အခြေခံတည်ဆောက်ခြင်း အဆင့် (၇) တဲ့လား။ သူမရဲ့ ပါရမီက အတော်လေး မဆိုးဘူးပဲ'

'သူတို့က သတ္တုတွင်း ဆီကို ဘာလာလုပ်ကြတာလဲ။ ဝိညာဉ်ကျောက်စိမ်း သတ္တုတွင်း ကို ပြန်လုယူဖို့လား။ ဒါက မဖြစ်နိုင်ပါဘူး။ သေချင်လို့ လာတာမှ မဟုတ်တာ'

စဉ်းစားတွေးတောနေရင်း သူသည် သူတို့ နှစ်ဦးကို အထဲသို့ ဝင်ခွင့်ပြုရန် လင်းရှူ ထံသို့ သတင်းစကား ပါးလိုက်သည်။

အချိန်တို အတွင်းမှာပင်၊ လင်းရှူ သည် ကောင်းထန် နှင့် ကောင်း မိသားစု သခင်မလေး တို့ကို သစ်သားအိမ်လေး အတွင်းသို့ ခေါ်ဆောင်လာခဲ့၏။

တာအိုရုပ်သေးသည် တင်ပျဉ်ခွေ ထိုင်နေဆဲ ဖြစ်ပြီး သူတို့ ဝင်လာသောအခါမှ မျက်လုံးများကို ဖြည်းညှင်းစွာ ဖွင့်ကာ ကောင်းထန် နှင့် သခင်မလေး ကောင်း တို့ကို ကြည့်လိုက်သည်။

မျက်စိတစ်မှိတ် အတွင်းမှာပင်၊

ကြောက်မက်ဖွယ် ကောင်းလှသော အရှိန်အဝါကြီး တစ်ခုသည် ကောင်းထန် နှင့် ကောင်း မိသားစု သခင်မလေး တို့အပေါ်သို့ ကျရောက်လာပြီး ဖိနှိပ်လိုက်ရာ၊ သူတို့ နှစ်ဦးစလုံး ထိတ်လန့်တုန်လှုပ်သွားကြပြီး တစ်ကိုယ်လုံး ကြက်သီးမွေးညှင်းမျ။ား ထသွားတော့၏။

ဤအခိုက်အတန့်၌ ကောင်းထန် ပင်လျှင် အနည်းငယ် ထိတ်လန့်သွားပြီး ခေါင်းကို ငုံ့ထားကာ တာအိုရုပ်သေးကို မျက်လုံးချင်း မဆုံရဲဘဲ ရိုသေကျိုးနွံစွာဖြင့် ပြောလိုက်သည်။

"ကောင်း မိသားစု ဘိုးဘေးကြီး ကောင်းထန်... အကြီးအကဲ ကို ဂါရဝပြုပါတယ် ခင်ဗျာ"

သူ၏ ဘေးရှိ အမျိုးသမီးငယ်လေးမှာမူ မျက်နှာ ဖြူဖျော့နေပြီး ရင်ထဲတွင် ဗြောင်းဆန်နေလေ၏။ သူမသည် ခေါင်းငုံ့ကာ တုန်ယင်သော အသံဖြင့် နှုတ်ဆက်လိုက်သည်။

"ကောင်း မိသားစု သခင်မလေး ကောင်းးယွမ်ယွမ်... အကြီးအကဲ ကို ဂါရဝပြုပါတယ် ရှင်"

တာအိုရုပ်သေးသည် သူတို့ နှစ်ဦးကို ခေတ္တမျှ စိုက်ကြည့်နေပြီးနောက်၊ သူ၏ အရှိန်အဝါများကို အနည်းငယ် ပြန်လည် ရုပ်သိမ်းလိုက်ကာ အေးအေးလူလူပင် မေးလိုက်သည်။

"မင်းတို့ ဘာကိစ္စ ရှိလို့ လာကြတာလဲ"

ကောင်းထန် ဖြေကြားရန် အချိန်မရလိုက်ခင်မှာပင်၊ သခင်မလေး ကောင်း သည် သူမ၏ နှုတ်ခမ်းအောက်ပိုင်းကို ဖိကိုက်လိုက်၏။ လက်ရှိတွင် သူမသည် ပန်းရောင်ဖျော့ဖျော့ ဝတ်စုံလေးကို ဝတ်ဆင်ထားပြီး အဖြူရောင် ပုဝါလေး တစ်ထည်ကို ပခုံးပေါ်တွင် လွှမ်းခြုံထားသည်။ သူမ၏ နက်မှောင်သော ဆံနွယ်စ အချို့သည် ရင်ဘတ်ရှေ့သို့ ကျဆင်းနေ၏။ လိပ်ပြာပုံစံ ခါးပတ်လေး တစ်ခုက သူမ၏ သွယ်လျသော ခါးလေးကို ရစ်ပတ်ထားပြီး၊ သူမ၏ ပြည့်စုံလှသော ခန္ဓာကိုယ် ကောက်ကြောင်းကို သိမ်မွေ့စွာ ပေါ်လွင်စေကာ ဝတ်စုံအောက်ရှိ အချိုးအစားကျလှသော ရင်သားအစုံကို ထင်ရှားစေသည်။

ရှေ့သို့ ခြေတစ်လှမ်း လှမ်းလိုက်ပြီး ကောင်းယွမ်ယွမ် သည် မမျှော်လင့်ဘဲ တာအိုရုပ်သေး၏ ရှေ့မှောက်တွင် ဒူးထောက်ချလိုက်တော့၏။ သူမသည် ခေါင်းကို ငုံ့ကာ နှိမ့်ချသော လေသံဖြင့် တောင်းဆိုလိုက်သည်။

"ဒီ မိန်းကလေး က အကြီးအကဲ ရဲ့ ဘေးမှာ အလုပ်အကျွေး ပြုလိုပါတယ် ရှင်။ ကျွန်မကို အခွင့်အရေး တစ်ကြိမ်လောက် ပေးဖို့ တောင်းဆိုပါတယ်"

တာအိုရုပ်သေးသည် မျက်မှောင်ကြုတ်သွားပြီး...

မေးလိုက်၏။

"အကြောင်းပြချက်"

ကောင်းယွမ်ယွမ် က ခေါင်းငုံ့လျက် ဖြေကြားလိုက်သည်။

"ကျွန်မ..ကောင်း မိသားစု ရဲ့ ခေါင်းဆောင် ဖြစ်ချင်ပါတယ်။ ကောင်း မိသားစု ကို ဦးဆောင်ပြီး ကုန်းယွဲ့ အင်မော်တယ် မြို့တော် မှာ တစ်ခုတည်းသော ပြိုင်ဘက်ကင်း ကျင့်ကြံသူ မိသားစု အင်အားစု အဖြစ် ရပ်တည်ချင်ပါတယ်။ အရင်တုန်းက ကျွန်မကို အထင်သေးခဲ့တဲ့ သူတွေ အားလုံးကို... ဒီ ကောင်းယွမ်ယွမ် ကို လွယ်လွယ်နဲ့ ရန်စလို့ မရဘူး ဆိုတာ သိစေချင်ပါတယ်"

ကောင်း မိသားစု ဘိုးဘေးကြီး ၏ မျက်နှာသွင်ပြင်သည် အနည်းငယ် ပြောင်းလဲသွားပြီး စိတ်ထဲတွင် အလိုမကျ ဖြစ်သွားတော့၏။ ကောင်းယွမ်ယွမ် ၏ စကားများက သူ့ကို အနည်းငယ် ဇဝေဇဝါ ဖြစ်သွားစေသည်။

သူမက ကောင်း မိသားစု ကို ဘယ်လို သဘောထားနေတာလဲ။

ပြီးတော့ သူက ဒူးထောက်လိုက်တယ်။ ကောင်း မိသားစု ဘိုးဘေးကြီး ဖြစ်တဲ့ ငါ့ကိုကျတော့ သူက ဘယ်လို နေရာမျိုးမှာ ထားချင်တာလဲ။

ဘယ်တုန်းက စပြီး ကောင်း မိသားစု က ဒီလောက်ထိ အောက်ကျခံဖို့ လိုအပ်သွားတာလဲ။ ရွှေအမြုတေ အဆင့် နှောင်းပိုင်း ကျင့်ကြံသူ တစ်ယောက်ကို ရင်ဆိုင်ရတယ် ဆိုရင်တောင်မှ၊ ငါတို့က ဘယ်လိုလုပ်ပြီး ဒီလောက်ထိ နှိမ့်ချရမှာလဲ။

ဤအခိုက်အတန့်၌ ကောင်းထန် သည် ရင်ထဲတွင် အလွန်တရာ အလိုမကျ ဖြစ်နေတော့၏။

သို့သော် သူ၏ ရှေ့မှောက်ရှိ တာအိုရုပ်သေးကို မြင်လိုက်ရသောအခါ၊ ရင်ထဲရှိ ဒေါသတရားများနှင့် နှုတ်ခမ်းဖျားသို့ ရောက်နေသော ဆူပူကြိမ်းမောင်းမည့် စကားများကို မျိုချလိုက်ရသည်။

တာအိုရုပ်သေး : ...

ဒါတွေက ဘယ်လို စကားမျိုးတွေလဲ။

သူသည် မျက်မှောင် အနည်းငယ် ကြုတ်လိုက်ပြီး ဤကိစ္စကို မည်သို့ ကိုင်တွယ်ဖြေရှင်းရမည်နည်း ဟု စိတ်ထဲတွင် ချင့်ချိန် စဉ်းစားနေသည်။

အကယ်၍ သူ၏ ခန္ဓာကိုယ် အစစ်ကသာ ဤကိစ္စကို ဖြေရှင်းရမည် ဆိုပါက သူ လုံးဝ တွန့်ဆုတ်နေမည် မဟုတ်ဘဲ၊ ကောင်းယွမ်ယွမ် နှင့် ကောင်းထန် တို့ကို မည်သည့် ပြဿနာမျှ မဖြစ်စေဘဲ တိုက်ရိုက် မောင်းထုတ်ပစ်လိုက်မည် ဖြစ်၏။

ဤ တတိယအဆင့် ဝိညာဉ်ကျောက်စိမ်း သတ္တုတွင်း ကို တူးဖော်ပြီးစီးသွားသည်နှင့် သူ ချက်ချင်း ထွက်ခွာသွားမည် ဖြစ်သည်။

သို့သော် ဤအရာက တာအိုရုပ်သေး တစ်ခုသာ ဖြစ်ပြီး တာ့ယွဲ့ နယ်မြေ နှင့် အလွန် ဝေးကွာလှပေသည်။ သူ့ထံတွင် ရန်သူများ အခွင့်ကောင်းယူနိုင်မည့် အားနည်းချက် ဟူ၍ တစ်ခုမျှ မရှိချေ။

သူသည် အရာအားလုံးကို စွန့်လွှတ်ပြီး အချိန်မရွေး၊ နေရာမရွေး ထွက်ခွာသွားနိုင်သည်။

ကောင်း မိသားစု...

ဤ ကျင့်ကြံသူ မိသားစု အင်အားစုသည် ပိုးစာပင် နယ်မြေ တွင် တည်ရှိပြီး၊ စွမ်းအားကြီးမားလှသော ပိုးစာပင် အင်မော်တယ် မြို့တော် နှင့် မဝေးလှချေ။ ထို့အပြင် ပိုမို အစွမ်းထက်သော အင်မော်တယ် ဂိတ်တံခါးများ တည်ရှိရာ ဖူလင်း သမုဒ္ဒရာ နယ်မြေ နှင့်လည်း ပိုမို နီးကပ်လှပေသည်။

အကယ်၍ သူသာ ဤကဲ့သို့သော အင်အားစု တစ်ခုကို ထိန်းချုပ်ကာ သူ့အတွက် အလုပ်အကျွေး ပြုစေနိုင်မည် ဆိုလျှင်၊ ၎င်းသည် သူ့အတွက် ခိုင်မာသော ခြေကုပ်စခန်း တစ်ခု ဖြစ်လာပေလိမ့်မည်။

တာအိုရုပ်သေးသည် စိတ်ထဲမှ တိတ်တဆိတ် စဉ်းစားခန်း ဝင်နေ၏။ ဤကိစ္စက ဖြစ်နိုင်ချေ ရှိပုံ ရသည်။

သို့သော် ကြိုတင် လိုအပ်ချက် မှာ သူက ကောင်း မိသားစု ကို ထိန်းချုပ်နိုင်ရမည် ဖြစ်ပြီး၊ ကောင်း မိသားစု ၏ အသုံးချခြင်းကို မခံရစေရန် ဂရုစိုက်ရမည် ပင်။

သူသည် ဖြည်းညှင်းစွာ မတ်တတ်ရပ်ကာ ကောင်း မိသားစု ဘိုးဘေးကြီး ကောင်းထန် ကို စိုက်ကြည့်ရင်း အေးအေးဆေးဆေးပင် ပြောလိုက်သည်။

“တာအိုမိတ်ဆွေ ကောင်း က တကယ့်ကို ကံကောင်းတဲ့ သူပဲ။ ခင်ဗျားရဲ့ နှောင်းလူ မျိုးဆက်တွေက အတော်လေး အရည်အချင်း ရှိကြသေးတာပဲ”

“သူက ကျွန်တော့်ကို အလုပ်အကျွေး ပြုဖို့ ဆန္ဒရှိနေတယ်။ တာအိုမိတ်ဆွေ ကောင်း အနေနဲ့ ဘယ်လို သဘောရလဲ”

အခန်း (၄၂၃) - ရွှေအမြုတေအဆင့် အထွတ်အထိပ် စွမ်းအား၊ ဝိညာဉ်ခွဲထွက် ကျင့်စဉ် (အပိုင်း ၁)

~မူလကတော့ ကောင်းထန်သည် ကောင်းယွမ်ယွမ်ကို ခေါ်ဆောင်ကာ တတိယအဆင့် ဝိညာဉ်ကျောက်စိမ်း သတ္တုတွင်းကို သိမ်းပိုက်သွားသည့် လျှို့ဝှက်ဆန်းကြယ်သော အရှင်သခင်ကြီးနှင့် ပထမဆုံးအကြိမ် အဆက်အသွယ်ပြုလုပ်ပြီး နောက်ခံသမိုင်းကို စုံစမ်းရန် စီစဉ်ထားခဲ့ခြင်း ဖြစ်သည်။

ထို့နောက် သူ၏ တွေ့ရှိချက်များအပေါ် မူတည်၍၊ ဤပုဂ္ဂိုလ်နှင့် မဟာမိတ်ဖွဲ့သင့် မဖွဲ့သင့်နှင့် ကောင်း မိသားစု၏ ရည်မှန်းချက်များ အောင်မြင်စေရန် ကောင်းယွမ်ယွမ်ကို သူ၏ အလုပ်အကျွေးအဖြစ် ဆက်သသင့် မသင့်ကို ဆုံးဖြတ်ရန် ဖြစ်ပေ၏။

သို့ဖြစ်သော်ငြားလည်း ကောင်းယွမ်ယွမ်၏ ဒူးထောက်လိုက်မှုနှင့် သူမ၏ စကားများက ကောင်းထန်နှင့် ကောင်း မိသားစု တစ်ခုလုံးကို မီးဖိုပေါ် တင်ကင်လိုက်သကဲ့သို့ အကျပ်ရိုက်သွားစေခဲ့တော့သည်။

ဤကဲ့သို့ ဒူးထောက်လိုက်ခြင်းသည် ကောင်း မိသားစု၏ ဂုဏ်သိက္ခာကို ခြေမွှပစ်လိုက်ရုံ သက်သက် မဟုတ်ဘဲ၊ ကောင်း မိသားစု၏ ဦးခေါင်းကို အောက်ချလိုက်ကာ ဤလူစိမ်း၏ ရှေ့မှောက်တွင် အညံ့ခံလိုက်ခြင်းပင် ဖြစ်ချေသည်။

ထိုအကြောင်းကြောင့် ကောင်း မိသားစုနှင့် သူသည် လုံးဝ အကျပ်အတည်းထဲသို့ ရောက်ရှိသွားခဲ့ရသည်။

ယခုအခါ တာအိုရုပ်သေး၏ ဖိအားပေးမှုကို ရင်ဆိုင်ရချိန်တွင် ကောင်းထန်သည် ခယလွန်းခြင်း မရှိ၊ မောက်မာလွန်းခြင်း မရှိသော ဟန်ပန်မျိုးဖြင့် တုံ့ပြန်ချင်နေမိ၏။ အနည်းဆုံးတော့ ကောင်း မိသားစုကို ဤမျှလောက်အထိ အောက်ကျနောက်ကျ မခံနိုင်ပေ။

သို့သော် သူ အမှန်တကယ်ပင် ထိုသို့ စွမ်းဆောင်နိုင်ပါဦးမည်လား။

ကောင်းယွမ်ယွမ်၏ ဒူးထောက်လိုက်မှုက ကောင်း မိသားစုကို လုံးဝ အကာအကွယ်မဲ့သွားစေခဲ့ပြီ ဖြစ်သည်။

"ဝုန်း.."

တာအိုရုပ်သေးသည် မတ်တတ်ရပ်လိုက်သည်နှင့် ပိုမို အစွမ်းထက်သော အရှိန်အဝါသည် လျှို့ဝှက်ဆန်းကြယ်သည့် တောင်တန်းကြီး တစ်ခုပမာ ကောင်းထန်၏ ရင်ဘတ်ပေါ်သို့ လေးလံစွာ ဖိချလာရာ အသက်ရှူရပင် ခက်ခဲသွားစေတော့၏။

ကောင်းထန်၏ မျက်နှာသည် အနည်းငယ် ဖြူဖျော့သွားသည်။ ရွှေအမြုတေ အဆင့် (၅) အရှင်သခင် တစ်ပါး ဖြစ်သော်ငြားလည်း ဤအခိုက်အတန့်၌ သူသည် အလွန်တရာ ထိတ်လန့် တုန်လှုပ်နေမိချေသည်။

ကောင်းထန်သည် အလျင်အမြန် ခေါင်းငုံ့လိုက်ပြီး အနည်းငယ် တုန်ယင်နေသော အသံဖြင့် ပြာပြာသလဲ တုံ့ပြန်လိုက်သည်။

“ယွမ်ယွမ်က အကြီးအကဲရဲ့ ဘေးမှာ အလုပ်အကျွေး ပြုချင်တယ် ဆိုမှတော့... ပြီးတော့ အကြီးအကဲကလည်း ယွမ်ယွမ်ကို လက်ခံဖို့ ဆန္ဒရှိတယ် ဆိုရင်... ဒါ... ဒါက တကယ့်ကို ကောင်းကင်ဘုံက ဖန်တီးပေးတဲ့ ကောင်းကျိုး တစ်ရပ်ပါပဲ ခင်ဗျာ။ ကျွန်တော် အပြည့်အဝ ထောက်ခံပါတယ်”

ထိုသို့ဖြစ်သော်ငြားလည်း ဤအခိုက်အတန့်၌ ကောင်းထန်၏ ရင်ထဲတွင် ကောင်းယွမ်ယွမ်ကို ကောင်း မိသားစုမှ စွန့်လွှတ်လိုက်ရန် စဉ်းစားနေမိတော့သည်။

'ဒီကောင်မလေးကို ယုံကြည်လို့ မရဘူး။ သူ့ကို ကောင်း မိသားစုရဲ့ အာဏာကို လုံးဝ ပေးကိုင်လို့ မဖြစ်ဘူး'

'ဒီလိုမှ မဟုတ်ရင်... တစ်နေ့နေ့ကျ သူက ကောင်း မိသားစု တစ်ခုလုံးကိုတောင် ရောင်းစားပစ်မယ့် အန္တရာယ် ရှိနေတယ်'

အချို့သော အခြေအနေများ၊ အချို့သော ကိစ္စရပ်များသည် သူ၏ ထိန်းချုပ်မှုအောက်မှ လွတ်ကင်းသွားသည်နှင့် တစ်ပြိုင်နက် ပြန်လည် ကုစားရန် အလွန်တရာ ခက်ခဲသွားတတ်ပေသည်။

ယခု လက်ရှိ အခြေအနေ ကဲ့သို့ပင် ဖြစ်လေ၏။

တာအိုရုပ်သေး၏ မျက်နှာထက်တွင် ကျေနပ်အားရသော အပြုံးတစ်ခု ထွက်ပေါ်လာပြီး အမိန့်ဆန်ဆန် ပြောလိုက်သည်။

“အဲ့ဒီလိုဆိုမှတော့... အခုချိန်က စပြီး သူက ငါ့ဘေးနားမှာ အလုပ်အကျွေး ပြုရမယ်”

ထိုအခိုက်အတန့်၌ သူက ဆက်လက်၍ အမှတ်ရသွားဟန်ဖြင့် လှောင်ပြောင် ဝင်ရောက်ပြောဆိုလိုက်သည်။

“အော်... ဟုတ်သားပဲ။ အရင်တုန်းက တာအိုမိတ်ဆွေ ကောင်း က ကတိတစ်ခု ပေးထားတယ်လို့ ကြားဖူးတယ်နော်။ ကောင်း မိသားစုရဲ့ မိသားစုခွဲ လေးခုထဲကနေ ဒီ တတိယအဆင့် ဝိညာဉ်ကျောက်စိမ်း သတ္တုတွင်းကို ပြန်ယူပေးနိုင်တဲ့ သူက ကောင်း မိသားစုရဲ့ ခေါင်းဆောင် အသစ် ဖြစ်လာမယ် ဆိုလားပဲ”

တာအိုရုပ်သေးသည် ကောင်းထန်ကို ထပ်မံ စူးစိုက်ကြည့်လိုက်ပြီး အလေးအနက် မေးခွန်းထုတ်လိုက်သည်။

“တာအိုမိတ်ဆွေ ကောင်း... အဲ့ဒါ တကယ်ပဲလား”

ကောင်းထန်၏ မျက်နှာသည် ချက်ချင်း ပြောင်းလဲသွားပြီး၊ သူသည် ခေါင်းမော့ကာ တာအိုရုပ်သေးနှင့် မျက်လုံးချင်း ဆုံကြည့်လိုက်သည်။

သို့သော် တစ်ချက်မျှ အကြည့်ချင်း ဆုံလိုက်ရုံဖြင့် ကောင်းထန်၏ စိတ်အာရုံသည် ပြင်းထန်စွာ တုန်လှုပ်သွားရတော့၏။ မှန်းဆ၍မရနိုင်လောက်အောင် ပြင်းထန်သော ဝိညာဉ် တိုက်ခိုက်မှုကြီး တစ်ခုသည် သူ၏ ဝိညာဉ် ပင်လယ်ထဲသို့ ဝင်ရောက် ဗုံးကြဲသွားသည်။ ဤ ဝိညာဉ် ဖိအားအောက်တွင် ကောင်းထန်သည် ယခင်က တစ်ခါမျှ မကြုံဖူးသော သေလုမတတ် ကြောက်ရွံ့မှုနှင့် မျှော်လင့်ချက်မဲ့ခြင်းတို့ကို ခံစားလိုက်ရချေ၏။

သူ့ရှေ့မှောက်ရှိ ဤပုဂ္ဂိုလ်သည် သူ့ကို သတ်ဖြတ်နိုင်စွမ်း အပြည့်အဝ ရှိနေသည်မှာ သေချာလှပေသည်..။

ကောင်းထန်သည် နှုတ်ခမ်းဖျားသို့ ရောက်နေသော ပြန်လည် ချေပမည့် စကားလုံးများကို ကြိတ်မှိတ်.. မျိုချလိုက်ရပြီး၊ ဤဖိနှိပ်မှုကြောင့် အော်ဟစ် ငိုယိုချင်စိတ်ပင် ပေါက်သွားတော့၏။ ဒါက ကောင်း မိသားစု၏ အတွင်းရေး ကိစ္စ ဖြစ်ပြီး၊ ကောင်း မိသားစုတွင် သူသာလျှင် အဆုံးအဖြတ် ပေးနိုင်သူ ဖြစ်သည် မဟုတ်ပါလော။

အဘယ်ကြောင့် ယခုအခါတွင်... အရာအားလုံးက အရင်ကနှင့် မတူညီတော့သကဲ့သို့ ဖြစ်နေရသနည်း။

ကောင်းထန်၏ မျက်နှာပေါ်တွင် ဝမ်းနည်း ပူဆွေးသော အမူအရာများ ပေါ်လာပြီး၊ အတော်လေး ရုပ်ဆိုး အကျည်းတန်နေသော မျက်နှာထားဖြင့် အလိုမကျစွာ တုံ့ပြန်လိုက်သည်။

“ဟုတ်... ဟုတ်ပါတယ် ခင်ဗျာ။ အဲ့ဒါက အမှန်ပါပဲ။ ဒါပေမဲ့...”

သူသည် အသည်းအသန် ကာကွယ် ပြောဆိုရန် ပြင်လိုက်သည့် အခိုက်အတန့်၌...

တာအိုရုပ်သေးက လက်ဝှေ့ယမ်းကာ သူ့ကို စကားဖြတ်လျက် အမိန့်ပေးလိုက်သည်။

“တော်လောက်ပြီ...”

“အခုချိန်က စပြီး ဒီ တတိယအဆင့် ဝိညာဉ်ကျောက်စိမ်း သတ္တုတွင်းရဲ့ စီမံခန့်ခွဲမှု အပိုင်းကို ယွမ်ယွမ်ဆီ လွှဲပြောင်းပေးလိုက်မယ်။ ဘယ်လိုပဲ ဖြစ်ဖြစ်... ဒီကိစ္စကြောင့် တာအိုမိတ်ဆွေ ကောင်း အနေနဲ့ ကိုယ်ပေးထားတဲ့ ကတိကို တည်ဖို့ လိုတယ်။ ယွမ်ယွမ်ကို ကောင်း မိသားစုရဲ့ မိသားစု ခေါင်းဆောင် ဖြစ်ခွင့် ပေးလိုက်ပါ”

“ဘာ ပြဿနာမှ မရှိလောက်ဘူး မဟုတ်လား။ အကြောင်းကတော့ သူက မင်းတို့.. ကောင်း မိသားစု အတွက် ဒီလောက် ကြီးမားတဲ့ ဝိညာဉ်ကျောက်စိမ်း သတ္တုတွင်းကြီးကို ပြန်ယူလာပေးနိုင်လို့ ကောင်း မိသားစုရဲ့ သူရဲကောင်း ဖြစ်နေပြီလေ”

ထိုစကားများကို ကြားလိုက်ရသောအခါ တာအိုရုပ်သေး၏ ရှေ့မှောက်တွင် ဒူးထောက်နေဆဲ ဖြစ်သော ကောင်းယွမ်ယွမ်သည် ရင်ထဲ၌ အတိုင်းမသိ ဝမ်းသာပီတိ ဖြစ်သွားတော့၏။ သူမသည် တာအိုရုပ်သေးကို မော့ကြည့်လိုက်ရာ၊ သူမ၏ မျက်ဝန်းများထဲတွင် ဖော်ပြ၍မရနိုင်သော ဆွဲဆောင်မှုများ ပြည့်နှက်နေပြီး၊ ဆောင်းဦးရာသီကဲ့သို့ ကြည်လင် တောက်ပနေသော သူမ၏ မျက်လုံးလေးများသည် သနားစဖွယ် အသွင်ကို ဆောင်နေသည်။

လုံးဝ ငြင်းဆို၍ မရနိုင်သည်မှာ၊ ဤအမျိုးသမီးသည် အခြေအနေများကို မည်သို့ အသုံးချရမည်ကို အလွန် ကျွမ်းကျင်နေခြင်းပင် ဖြစ်သည်။

ပထမဦးစွာ သူမသည် တာအိုရုပ်သေး ကဲ့သို့သော သစ်ပင်ကြီး တစ်ပင်ကို မှီခိုရန် ရွေးချယ်ခဲ့ပြီး၊ အနှိမ့်ချဆုံးသော ဟန်ပန်ဖြင့် သူ့ကို ချဉ်းကပ်ခဲ့၏။

ထို့နောက် တာအိုရုပ်သေးက သူမကို မိသားစု ခေါင်းဆောင် နေရာ ပေးရန် တောင်းဆိုပေးသောအခါ၊ သူမသည် အလွန် ချိုသာပြီး နာခံတတ်သော ပုံစံလေးကို ထုတ်ဖော် ပြသလိုက်ပြန်သည်။

တာအိုရုပ်သေး၏ အိုမင်းရင့်ရော်ကာ ဆံပင်များ ဖြူဖွေးနေသော ရုပ်ရည်သွင်ပြင်ကို သူမ နည်းနည်းလေးမျှပင် ဂရုမစိုက်ခဲ့ချေ။

ဤကဲ့သို့သော အမျိုးသမီးမျိုးသည် လှည့်စားမှု နည်းဗျူဟာများစွာကို ပိုင်ဆိုင်ထားသူ ဖြစ်ပေသည်။

ကောင်းထန်၏ မျက်ခွံများ တွန့်ကွေးသွားပြီး သူက အကြံကို တင်ပြလိုက်သည်။

“အကြီးအကဲ ခင်ဗျာ... ယွမ်ယွမ်က ငယ်ပါသေးတယ်။ မိသားစုထဲက လူတိုင်းကို သူမ အနေနဲ့ လွှမ်းမိုးနိုင်ဖို့ ဆိုတာ သိပ်မလွယ်သေးပါဘူး။ သို့ပေမယ့်လဲ.. အကြီးအကဲက ယွမ်ယွမ်ကို ကောင်း မိသားစုရဲ့ ခေါင်းဆောင် ဖြစ်လာအောင် ကျောထောက်နောက်ခံ ပေးမယ် ဆိုရင်တော့... လုံးဝ မဖြစ်နိုင်တဲ့ ကိစ္စတော့ မဟုတ်ပါဘူး။ လောလောဆယ်တော့ ကျွန်တော်.. ယွမ်ယွမ်ကို မိသားစု ခေါင်းဆောင်ရဲ့ ဆက်ခံသူ အဖြစ် အရင် ခန့်အပ်ပေးပါ့မယ်။ အချိန်ကာလ တစ်ခုလောက် အထိ မိသားစုရဲ့ လက်ခံယုံကြည်မှုကို သူ.. ရအောင် ယူပြီးမှ... မိသားစု ခေါင်းဆောင် အဖြစ် ရာထူးတိုးပေးမယ် ဆိုရင်ရော... ဘယ်လို သဘောရပါသလဲ ခင်ဗျာ”

သို့သော် တာအိုရုပ်သေးက သူ့ကို တိမ်းရှောင်သွားရန် အခွင့်အရေး မပေးဘဲ ပြတ်သားစွာ ဝင်ရောက်ပြောဆိုလိုက်သည်။

“ဘယ်လိုပဲ ဖြစ်ဖြစ် တာအိုမိတ်ဆွေ ကောင်း... ခင်ဗျားက ကောင်း မိသားစုရဲ့ ဘိုးဘေးကြီးပဲလေ။ မိသားစုထဲမှာ ခင်ဗျားရဲ့ စကားကို ဘယ်သူကများ ငြင်းဆန်ရဲမှာမို့လို့လဲ”

“ကျုပ် ဆုံးဖြတ်ပြီးပြီ။ ယွမ်ယွမ်က အရည်အချင်း ရှိမှတော့... သူ့ကို ကောင်း မိသားစုရဲ့ မိသားစု ခေါင်းဆောင် အဖြစ် ခန့်အပ်လိုက်ပါ”

“ဒီကိစ္စကို တတ်နိုင်သမျှ အမြန်ဆုံး အကောင်အထည် ဖော်နိုင်ဖို့ မျှော်လင့်တယ်”

“ဒီလိုမှ မဟုတ်လို့... ကျုပ်ကိုယ်တိုင် ဝင်ပါပြီး အတင်းအကျပ် လုပ်ခိုင်းရမယ် ဆိုရင်တော့... အဲ့ဒီရလဒ်က တာအိုမိတ်ဆွေ ကောင်း မြင်ချင်တဲ့ အရာမျိုး ဖြစ်လာမှာ မဟုတ်ဘူးနော်”

ကောင်းထန် ၏ ရင်ထဲတွင်ကား...

အသက်ရှူကျပ်လုမတတ်ပင် ဖြစ်သွားရတော့သည်။

ယခု လက်ရှိအချိန်တွင် သူ လုပ်ချင်ဆုံး အရာမှာ ကိုယ့်ပါးကိုယ် ပြန်ရိုက်ပစ်ရန်ပင်။ သူ ဘာကြောင့်များ ကောင်းယွမ်ယွမ်၏ စကားကို နားထောင်ပြီး သူမကို ဤနေရာသို့ ခေါ်လာခဲ့မိပါသနည်း။

ယခုအခါ ကြီးကျယ်ခမ်းနားသော ကောင်း မိသားစုကြီးသည် ဤပုဂ္ဂိုလ်၏ လက်အောက်ခံ ဘဝသို့ ရောက်ရှိသွားခဲ့တော့၏။

သူသည် ကောင်း မိသားစု ခေါင်းဆောင် နေရာကိုပင် ဝင်ရောက် စွက်ဖက်ပြီး ကောင်းယွမ်ယွမ်ကို ထိုနေရာသို့ ဆွဲတင်ပေးလိုက်သေးသည် မဟုတ်ပါလော။

ကောင်းထန် နှင့် လင်းရှူ တို့ကို ထွက်သွားရန် လက်ဝှေ့ယမ်း ပြလိုက်ပြီးနောက်၊ တာအိုရုပ်သေးသည် သူ၏ ရှေ့မှောက်တွင် ဒူးထောက်နေဆဲ ဖြစ်သော ကောင်းယွမ်ယွမ်ကို စိုက်ကြည့်ကာ အလေးအနက် မှာကြားလိုက်သည်။

“မင်း လိုချင်တာကို ငါ ပေးလိုက်ပြီ။ အခုချိန်ကစပြီး ဘာဆက်လုပ်ရမယ် ဆိုတာ မင်း သိသင့်တယ် မဟုတ်လား”

“ယွမ်ယွမ် နားလည်ပါတယ် ရှင်...”

“ဒီနေ့က စပြီး ယွမ်ယွမ်က အကြီးအကဲရဲ့ ဘေးနားမှာ နေ့ရောညပါ အလုပ်အကျွေး ပြုပါ့မယ်”

သူမ၏ မျက်နှာပေါ်တွင် ရှက်ရွံ့နေသည့် အမူအရာလေး ထွက်ပေါ်နေသော်ငြားလည်း၊ မည်သည့် တုံ့ဆိုင်းမှုမျှ မရှိဘဲ သူမ၏ မန္တန်စွမ်းအားများကို လှုပ်ရှားလိုက်လေ၏။ သူမ၏ ပခုံးပေါ်မှ အဖြူရောင် ပိုးသားပုဝါလေးသည် အောက်သို့ လျှောကျသွားပြီး၊ ၎င်း၏ နောက်တွင်မူ အတွင်းမှ ပန်းရောင်ဖျော့ဖျော့ ဝတ်စုံလေးသည်လည်း ကွာကျသွားတော့သည်။