အခန်း (၅၂၁-၅၂၂)

အပိုင်း (၅၂၁) ရှင်းမြွေမိစ္ဆာ ဟင်းလင်းပြင်

"ဘာ... ရေပေါ်ကျွန်းဆိုတာ သန္ဓေပြောင်း သတ္တဝါတစ်ကောင်ရဲ့ အလောင်း ဟုတ်လား"

လီချင်းဟွာ၏ စကားတစ်ခွန်းကြောင့် လင်းယွမ်ပင်လျှင် ချက်ချင်း ခေါင်းလှည့်ကြည့်မိသွားတော့သည်။

လီရှန်ယန်နှင့် ကျန်းရုံရုံတို့မှာမူ အလွန်အမင်း အံ့အားသင့်သွားကြပြီး မယုံနိုင်စွာဖြင့် ပါးစပ်အဟောင်းသား ဖြစ်သွားကြလေသည်။

လင်းယွမ်သည် မြူခိုးမြို့တော်ကို ဖြတ်သန်းဖူးပြီး ရေပေါ်ကျွန်း၏ အတွင်းပိုင်းအထိ ကိုယ်တိုင် ရောက်ရှိခဲ့ဖူးသဖြင့် စိတ်ထဲတွင် ကြိုတင် တွေးဆထားမှုအချို့ ရှိနေခဲ့ပြီး ဖြစ်သည်။

သို့သော် ယခု လီချင်းဟွာ၏ စကားက သူ၏ တွေးဆချက်ကို တိုက်ရိုက် အတည်ပြုပေးလိုက်သကဲ့သို့ ဖြစ်သွားပေသည်။

ထို့ကြောင့် လင်းယွမ်၏ ရင်ထဲတွင် ထိတ်လန့်အံ့သြမှုများ လှိုင်းထန်လာရဆဲပင်။

"ဒီဟင်းလင်းပြင်ကြီးက အနည်းဆုံး စတုရန်းမိုင် ဆယ်ဂဏန်းလောက် ကျယ်တာလေ... ဘယ်လို သန္ဓေပြောင်း သတ္တဝါမျိုးက ဒီလောက် ကြောက်စရာကောင်းတဲ့ အရွယ်အစား ရှိနေရတာလဲ" လီရှန်ယန်က မနေနိုင်ဘဲ ရေရွတ်လိုက်သည်။

ကျန်းရုံရုံမှာမူ အသိဉာဏ် လျင်မြန်သူပီပီ ချက်ချင်း တွေးတောလိုက်ပြီး "ဒါက ဟင်းလင်းပြင် အမျိုးအစား သန္ဓေပြောင်း သတ္တဝါရဲ့ အလောင်းမို့လို့ သူ့ခန္ဓာကိုယ် အတွင်းပိုင်းက ကျယ်ဝန်းနေတာများလား... တကယ်တမ်း သူ့ရဲ့ မူလအရွယ်အစားက ဒီလောက် မကြီးတာ ဖြစ်နိုင်တယ်နော်" ဟု ဝင်ပြောလိုက်၏။

လီချင်းဟွာက ခေါင်းယမ်းလိုက်သည်။ "မဟုတ်ဘူး... ဒီရေပေါ်ကျွန်းတွေက ခင်ဗျားတို့ အပြင်မှာ မြင်နေရတဲ့အတိုင်း တကယ်ကို ကြီးမားကျယ်ဝန်းတာ"

ထို့နောက် သူက လင်းယွမ်ဘက်သို့ လှည့်ကြည့်ကာ "ဆရာလင်းယွမ်... ဆရာလည်း ခန့်မှန်းမိလောက်ပြီ မဟုတ်လား" ဟု မေးလိုက်သည်။

လင်းယွမ်က ခေါင်းအနည်းငယ် ညိတ်ပြလိုက်ပြီး "မြူခိုးမြို့တော်မှာတုန်းက အဲ့ဒီမြေအောက်က သွေးကြောလမ်းကြောင်းတွေရယ်... နှလုံးခန်းရယ်၊ ဦးနှောက်ရေကန်ရယ်ကို ငါ မြင်ခဲ့ရကတည်းက စိတ်ထဲမှာ ထင်တော့ ထင်နေတာ" ဟု ပြောလေသည်။

"ဒါပေမဲ့ အဲ့ဒီတုန်းက အတိအကျ မပြောနိုင်သေးဘူး... အခု မင်းက နှလုံးအမြူတေကို ရလိုက်ပြီး အမွေအနှစ် တချို့ကိုပါ လက်ခံရရှိသွားပြီဆိုတော့ ဒီကိစ္စက တကယ် အမှန်ဖြစ်နေပြီပေါ့"

လီရှန်ယန်မှာ ထိတ်လန့်တကြားဖြင့် ဖြတ်ပြောလိုက်သည်။ "နေ... နေပါဦး... ငါတို့ ကမ္ဘာမြေကြီးက ဘယ်လောက်ကျယ်လို့ ဒီလောက်ကြီးမားတဲ့ သန္ဓေပြောင်း သတ္တဝါတွေ ရှိနေရတာလဲ... ရေလွှမ်းမိုးဘေး ဖြစ်တာကနေ အခုချိန်ထိ ဘယ်လောက်မှ မကြာသေးဘူးလေ... ဘယ်လိုလုပ် ဒီလောက်ကြီးတဲ့ အကောင်ကြီးတွေ ဆင့်ကဲပြောင်းလဲလာနိုင်မှာလဲ"

"ဒါ ယုတ္တိရှိလို့လား... သိပ္ပံနည်းလမ်းကျလို့လား"

လီရှန်ယန်ကိုလည်း အပြစ်တင်၍ မရပေ။ ရေပေါ်ကျွန်း တစ်ကျွန်း၏ အရွယ်အစားမှာ မြို့ငယ်လေးတစ်မြို့၏ မြို့လယ်ခေါင်နီးပါးခန့် ကျယ်ဝန်းလှသည် မဟုတ်ပါလော။

ထိုကဲ့သို့သော သန္ဓေပြောင်း မိစ္ဆာကောင်ကြီးများ ပေါ်ထွက်လာရန်အတွက် အချိန် မည်မျှကြာအောင် ဆင့်ကဲပြောင်းလဲခဲ့ရမည်နည်း။

ရေလွှမ်းမိုးဘေး စတင်ခဲ့သည်မှာ အလွန်ဆုံးမှ အချိန် မည်မျှကြာမြင့်ခဲ့ပြီနည်း။

လီချင်းဟွာက ခေါင်းခါလိုက်ပြီး "ကျွန်တော် ပြောနိုင်တာကတော့... ဒီရေပေါ်ကျွန်းအဆင့်ရှိတဲ့ သန္ဓေပြောင်း မိစ္ဆာကောင်ကြီးတွေက ကျွန်တော်တို့ ကမ္ဘာမြေပေါ်က သတ္တဝါတွေ ဆင့်ကဲပြောင်းလဲလာတာ မဟုတ်နိုင်ဘူး ဆိုတာပဲ"

"ပြီးတော့ ဘယ်လောက်ပဲ ယုတ္တိမတန်ဘူး ပြောပြော... ရေကြီးပြီးနောက်ပိုင်း ပေါ်လာတဲ့ သန္ဓေပြောင်း အစွမ်းတွေကရော သိပ္ပံနည်းကျလို့လား"

ကျန်းရုံရုံက ဘေးမှနေ၍ အံ့အားသင့်စွာဖြင့် "ရှင် ပြောချင်တာက... ဒီအကောင်တွေက ဂြိုဟ်သား သတ္တဝါတွေ ဖြစ်နိုင်တယ်ပေါ့... ဒါ... ဒါကတော့"

သူမမှာ မည်သို့ ဆက်ပြောရမည်ကိုပင် မသိတော့ချေ။

လင်းယွမ်က သူတို့၏ စကားဝိုင်းကို ဖြတ်တောက်လိုက်ပြီး ဓားမြီး ပင်လယ်မြွေ၏ အလောင်းကို သိမ်းဆည်းလိုက်ကာ လေးနက်သော လေသံဖြင့် ပြောလိုက်သည်။ "အနာဂတ်မှာ ဘာတွေဖြစ်လာမလဲ ဆိုတာကို ဘယ်သူမှ မသိနိုင်ဘူး... ငါတို့အတွက် အခုလောလောဆယ် အရေးအကြီးဆုံးက အသက်ရှင်သန်ရေးပဲ"

"ကိုယ့်ကိုယ်ကိုယ် အစွမ်းထက်လာအောင် လုပ်ရမယ်... ထိုက်ယန်တောင်ကို အင်အားကြီးလာအောင် လုပ်ရမယ်... ပြီးတော့ ငါတို့ တန်ဖိုးထားရတဲ့ လူတွေနဲ့ အရာတွေကို ကာကွယ်ရမယ်"

"ကျန်တဲ့ကိစ္စတွေကိုတော့ ငါတို့ အဲ့ဒီအဆင့်ရောက်သွားတဲ့ တစ်နေ့ကျရင် အလိုလို သိလာရမှာပါပဲ"

လင်းယွမ်၏ စကားကြောင့် အားလုံး တိတ်ဆိတ်သွားကြလေသည်။

မှန်ပေသည်။ ယခုအချိန်တွင် အားလုံးမှာ အသက်ရှင်သန်ရေးအတွက်ပင် အနိုင်နိုင် ရုန်းကန်နေကြရရာ၊ ဤကမ္ဘာလောကကြီး မည်သို့ ပြောင်းလဲသွားသည်ကို ပူပန်နေ၍ရော ဘာအကျိုးထူးမည်နည်း။

ထိုသို့ ပူပန်နေမည့်အစား အသက်ရှင်သန်နိုင်ရန် ဦးစွာ ကြိုးစားပြီး အင်အားကြီးမားလာချိန်ရောက်မှသာ အရာအားလုံးကို ရှင်းလင်းစွာ သိမြင်နိုင်မည် မဟုတ်ပါလော။

"သွားကြစို့"

လီချင်းဟွာက ခေါင်းညိတ်လိုက်ပြီး ဟင်းလင်းပြင် တံခါးပေါက်ကို ဖွင့်ရန် ပြင်လိုက်သည်။

"နေ... နေကြပါဦး"

အမျိုးသမီး အသံတစ်သံ ထွက်ပေါ်လာပြီး လင်းမြောင်မြောင်သည် သူမ၏ အစ်ကိုဖြစ်သူ လင်းကျင်းထောင်၏ လက်မောင်းကို ရုန်းထွက်ကာ ပြေးထွက်လာလေသည်။

လင်းယွမ်က ၎င်းတို့ မောင်နှမနှစ်ဦးအား အံ့သြစွာ ကြည့်လိုက်သည်။

လီချင်းဟွာက ချက်ချင်း မျက်မှောင်ကြုတ်သွားပြီး လီရှန်ယန်နှင့် ကျန်းရုံရုံတို့၏ မျက်နှာထက်တွင်လည်း သတိထားစောင့်ကြည့်သည့် အရိပ်အယောင်များ ပေါ်လာကြ၏။

လင်းယွမ်က "ငါ မင်းတို့ကို ဒုက္ခမပေးခဲ့ဘူးလေ... ဘာလဲ... မင်းတို့က ငါတို့ကို ရန်လုပ်ချင်လို့လား" ဟု မေးလိုက်သည်။

လင်းမြောင်မြောင်က အလျင်စလို ပြန်ပြောလေသည်။ "မ... မဟုတ်ရပါဘူး ကိုလင်းယွမ်... ကျွန်မတို့ အဲ့ဒီလို သဘောမျိုး မဟုတ်ပါဘူး... ကျွန်မ... ကျွန်မ အစ်ကိုက ခန္ဓာကိုယ်ကြံ့ခိုင်မှု အမျိုးအစား အစွမ်းပိုင်ရှင်မို့လို့... သူက ခန္ဓာကိုယ်ကြံ့ခိုင်မှု အမျိုးအစား မျိုးရိုးဗီဇမျိုးစေ့ သန္ဓေပြောင်း သတ္တဝါရဲ့ သွေးအဆီအနှစ်ကို လိုအပ်နေလို့ပါ"

"အစ်ကိုတို့ ခုနက သတ်လိုက်တဲ့ မြွေကြီးက... ခန္ဓာကိုယ်ကြံ့ခိုင်မှု အမျိုးအစား သန္ဓေပြောင်း သတ္တဝါ မဟုတ်လားဟင်"

လင်းယွမ်က တည်ငြိမ်သော မျက်နှာထားဖြင့် "မင်းတို့က ဓားမြီး ပင်လယ်မြွေရဲ့ သွေးအဆီအနှစ်ကို လိုချင်တာပေါ့" ဟု ပြန်မေးလိုက်သည်။

"အဲ့... ကျွန်တော်တို့ အလဲအလှယ် လုပ်လို့ရပါတယ်... ဝယ်ဆိုလည်း ဝယ်ပါ့မယ်" လင်းကျင်းထောင်ကလည်း အနီးသို့ ရောက်လာပြီး အလျင်အမြန် ဝင်ပြောလေသည်။

လင်းယွမ်က ခေါင်းခါလိုက်သည်။ "မရောင်းနိုင်ဘူး... ငါတို့ ကိုယ်တိုင် သုံးဖို့ လိုသေးတယ်"

ထိုက်ယန်တောင်တွင် ခန္ဓာကိုယ်ကြံ့ခိုင်မှု အမျိုးအစား အစွမ်းပိုင်ရှင် များပြားလှသဖြင့် ဤဓားမြီး ပင်လယ်မြွေ တစ်ကောင်တည်းနှင့်ပင် ထိုက်ယန်တောင်အတွင်း ခွဲဝေရန် မလုံလောက်သေးချေ။

လင်းယွမ်၏ စကားကြောင့် လင်းကျင်းထောင်မှာ အနည်းငယ် စိတ်ပျက်သွားရသည်။

လင်းမြောင်မြောင်ကမူ လက်မလျော့လိုသေးဘဲ "အစ်ကိုတို့ လိုချင်တာဘာရှိလဲ... ကျွန်မတို့ ပေးနိုင်တာဆိုရင် သေချာပေါက် ရအောင် ရှာပေးပါ့မယ်"

လင်းယွမ်က အချိန်မဖြုန်းလိုတော့သဖြင့် ခေါင်းခါပြလိုက်သည်။

ထိုစဉ် လီချင်းဟွာက ရုတ်တရက် အကြံရသွားဟန်ဖြင့် လင်းယွမ်အား ဆွဲထားလိုက်ပြီး "ဆရာလင်းယွမ်... ဒီလူနှစ်ယောက်က ဘယ်ကလာတာလဲ" ဟု တိုးတိုးမေးလိုက်သည်။

"ငါ မေးကြည့်တော့ ကျိအန်မြို့၊ ဖူရုံတောင်ကြားက အသက်ရှင်ကျန်ရစ်သူတွေ စုနေတဲ့ နေရာကလာတာလို့ ပြောတယ်"

လီချင်းဟွာ အံ့သြသွားပြီး "ဒီနေရာက ကျိအန်မြို့ အပိုင်ထဲ ရောက်နေပြီလား"

လင်းယွမ်က ခေါင်းအနည်းငယ် ညိတ်ပြလိုက်သည်။

လီချင်းဟွာက စဉ်းစားခန်း ဝင်သွားပြီး "ဆရာလင်းယွမ်... ကျွန်တော် ထင်တာတော့ ဒီလူနှစ်ယောက်နဲ့ မိတ်ဖွဲ့ထားသင့်တယ် ထင်တယ်"

"ကျွန်တော်တို့ ထိုက်ယန်တောင်က လင်ကျန်းမြို့မှာ အင်အားနည်းသေးတယ်... အပြင်က သတင်းတွေကိုလည်း သိရတာ နည်းတယ်"

"ကျိအန်မြို့က လင်ကျန်းမြို့ရဲ့ ရေညာဘက်မှာ ရှိတယ်... ရှေ့လျှောက် ရေကြီးတာ မရပ်ဘဲ ရေမျက်နှာပြင် ဆက်တက်လာဦးမယ်ဆိုရင် ကျွန်တော်တို့ မြောက်ဘက်ကို ပြောင်းရွှေ့ရနိုင်တယ်"

"အခု ကျိအန်မြို့ဘက်ကို ကြိုတင် လမ်းခင်းထားတာက အလကား ဖြစ်ရင်ဖြစ်သွားနိုင်ပေမဲ့ နောင်တစ်ချိန်ကျရင် အသုံးဝင်လာနိုင်တယ်"

လင်းယွမ်က ထိုစကားကို ကြားသောအခါ အနည်းငယ် စဉ်းစားလိုက်ပြီး "ကောင်းပြီလေ... ရှင်းမြွေမိစ္ဆာ ဟင်းလင်းပြင်ကလည်း ဒီနေရာနဲ့ နီးနေတော့ နောက်ပိုင်း ကျိအန်မြို့က လူတွေနဲ့ ဆက်ဆံရတာတွေ ရှိလာနိုင်တယ်... ဒီကိစ္စ မင်းပဲ ကိုင်တွယ်လိုက်တော့" ဟု ပြောလိုက်သည်။

လီချင်းဟွာက ပြုံး၍ ခေါင်းညိတ်လိုက်ပြီးနောက် လင်းကျင်းထောင် မောင်နှမဘက်သို့ လှည့်ကာ "ငါတို့ အခု အရေးတကြီး သွားစရာ ရှိသေးလို့ အချိန်မရဘူး... မင်းတို့ အရောင်းအဝယ် လုပ်ချင်ရင် နောက်တစ်ပတ်နေမှ ဒီနေရာကို ပြန်လာခဲ့" ဟု ပြောလေသည်။

"ဟုတ်ကဲ့... ဟုတ်ကဲ့ပါ... နောက်တစ်ပတ်နေရင် သေချာပေါက် ပြန်လာခဲ့ပါ့မယ်"

လင်းကျင်းထောင်မှာ ဝမ်းသာလွန်းသဖြင့် အလျင်အမြန် ခေါင်းတညိတ်ညိတ်နှင့် ကတိပေးလိုက်သည်။

သူ့ရှေ့မှ လူများက ဤမျှ လွယ်လွယ်ကူကူ သဘောတူလိမ့်မည်ဟု သူ လုံးဝ ထင်မထားခဲ့ပေ။

ဒါက မျိုးရိုးဗီဇမျိုးစေ့ သန္ဓေပြောင်း သတ္တဝါရဲ့ သွေးအဆီအနှစ်လေ။

ပိုက်ဆံရှိရင်တောင် ဝယ်လို့မရနိုင်တဲ့ အဖိုးတန် ရတနာမျိုး မဟုတ်ပါလော။

"ဝီ"

လီချင်းဟွာက လေဟာပြင်သို့ လက်ညှိုးဖြင့် ထိုးလိုက်သည်။

သူ၏ လက်ချောင်းထိပ်မှ စွမ်းအင်တစ်ရပ် ထွက်ပေါ်လာပြီး ဟင်းလင်းပြင် တစ်ခုလုံး တုန်ခါသွားလေသည်။

ချက်ချင်းပင် ဟင်းလင်းပြင်အတွင်း တံခါးပေါက်တစ်ခု ပွင့်ဟလာပြီး ရေများ အလုံးအရင်းဖြင့် ထိုတံခါးပေါက်အတွင်းသို့ စီးဝင်သွားတော့သည်။

လီချင်းဟွာက "ဆရာလင်းယွမ်... ရှန်ယန်... မရုံရုံ... သွားကြစို့" ဟု ပြောလိုက်သည်။

ထို့နောက် သူတို့လေးဦးသည် ဟင်းလင်းပြင် တံခါးပေါက်အတွင်းသို့ ဝင်ရောက်သွားကြလေသည်။

လင်းကျင်းထောင်နှင့် လင်းမြောင်မြောင်တို့၏ အံ့သြမှင်သက်နေသော အကြည့်များအောက်တွင် သူတို့လေးဦးလုံး မျက်စိရှေ့မှ ပျောက်ကွယ်သွားပြီး ရေထဲရှိ ဟင်းလင်းပြင် တံခါးပေါက်ကြီးလည်း အစအနမကျန် ပျောက်ကွယ်သွားလေတော့သည်။

"ဒါ... ဒါ... ဒါ ဟင်းလင်းပြင် အမျိုးအစား အစွမ်းပိုင်ရှင်ပဲ"

"ဟုတ်တယ်... အသေအချာပဲ"

မောင်နှမနှစ်ဦးမှာ တစ်ယောက်မျက်နှာ တစ်ယောက် ကြည့်ကာ အလွန်အမင်း ထိတ်လန့် အံ့သြနေကြ၏။

ဟို ဆရာလင်းယွမ် ဆိုသူကပင် ကြောက်ခမန်းလိလိ အစွမ်းထက်နေပြီ ဖြစ်သည်။

သူ၏ အပေါင်းအပါကလည်း ဤမျှ အစွမ်းထက်သော ဟင်းလင်းပြင် အစွမ်းပိုင်ရှင် ဖြစ်နေလိမ့်မည်ဟု ထင်မထားခဲ့ကြပေ။

"ဒီလိုလူမျိုးတွေက ညီမတို့ကို လိမ်မှာ မဟုတ်ပါဘူးနော်" ဟု လင်းမြောင်မြောင်က မနေနိုင်ဘဲ မေးလိုက်သည်။

လင်းကျင်းထောင်က ခေါင်းယမ်းလိုက်သည်။ "ငါတို့ဆီမှာ သူတို့ လိမ်စရာ ဘာရှိလို့လဲ... သူတို့ ငါတို့ဆီက ဘာလိုချင်တာလဲ ဆိုတာကို အတိအကျ မပြောသွားတာပဲ ခက်တယ်... ဟူး"

လင်းမြောင်မြောင်၏ မျက်နှာပေါ်တွင် အတွေးများ ဖြတ်ပြေးသွားပြီး "ညီမတို့ ဖူရုံတောင်ကြားကို အရင်ပြန်ကြမယ်... ဖူရုံတောင်ကြားမှာပဲ ရနိုင်တဲ့ ပစ္စည်းတွေကို စုဆောင်းထားပြီး သူတို့ သဘောကျမယ့်ဟာ ပါမပါ စောင့်ကြည့်ကြတာပေါ့" ဟု တိုးတိုးလေး ပြောလိုက်သည်။

"အင်း... နင်ပြောတာလည်း ဟုတ်တယ်... လာ... ငါတို့ အရင်ပြန်ကြမယ်"

...

ခေါက်ချိုးဖြစ်နေသော ဟင်းလင်းပြင်အတွင်းတွင် လှိုင်းဂယက်များ ထသွားသည်။

လင်းယွမ်တို့အဖွဲ့ ဟင်းလင်းပြင်မှ ထွက်လာချိန်တွင် ရှင်းမြွေမိစ္ဆာ ဟင်းလင်းပြင်အတွင်းသို့ ပြန်လည် ရောက်ရှိနေပြီ ဖြစ်သည်။

ပတ်ဝန်းကျင်ကို ကြည့်လိုက်ရာ ရေပြင်ကျယ်ကြီးကိုသာ မြင်တွေ့ရသဖြင့် လင်းယွမ်က "ချင်းဟွာ... မင်း ဒီနေရာက နှလုံးအမြူတေကို ရထားတာဆိုတော့ အရပ်မျက်နှာတွေကို ခွဲခြားနိုင်လား" ဟု မေးလိုက်သည်။

လီချင်းဟွာက ခေါင်းညိတ်ပြပြီး "အရပ်မျက်နှာတွေကိုတော့ ခွဲခြားလို့ ရတယ်... ဒါပေမဲ့ ဒီအထဲက သက်ရှိတွေကို အာရုံခံဖို့ကတော့ မရသေးဘူး... အဲ့ဒီအတွက် ဦးနှောက်အမြူတေ လိုအပ်တယ်... ဦးလေးကောကို ရှာဖို့က လူအင်အား လိုလိမ့်မယ်" ဟု ဖြေလေသည်။

လင်းယွမ်က သဘောတူလိုက်ပြီး "ရှောင်မောင်းတောင်ကို အရင်ပြန်ကြတာပေါ့... ဝူယောင်ပန်း ပြန်ရောက်လာမှာကို ငါ စိုးရိမ်တယ်" ဟု ပြောလိုက်သည်။

လီချင်းဟွာက ချက်ချင်း ခေါင်းညိတ်လိုက်ပြီး "ကျွန်တော် ဟင်းလင်းပြင် တံခါးပေါက် တန်း ဖွင့်လိုက်မယ်" ဟု ဆိုလေသည်။

သူက နောက်ထပ် ဟင်းလင်းပြင် တံခါးပေါက်တစ်ခုကို ထပ်မံ ဖွင့်လှစ်လိုက်ပြီး လင်းယွမ်တို့ သုံးဦးကို ခေါ်ဆောင်ကာ ဝင်ရောက်သွားသည်။

လင်းယွမ် ထပ်မံ ထွက်ပေါ်လာချိန်တွင် ရှောင်မောင်းတောင်သို့ ရောက်ရှိနေပြီ ဖြစ်သည်။

ဟင်းလင်းပြင် အစွမ်းမှာ အမှန်တကယ်ပင် အံ့မခန်း ဖြစ်ကြောင်း လင်းယွမ် ရင်ထဲမှ ချီးကျူးလိုက်မိသည်။

မည်သည့် အမြန်နှုန်း အမျိုးအစား အစွမ်းထက်မဆို ပို၍ မြန်ဆန်လှပေသည်။

"မင်းရဲ့ ဒီဟင်းလင်းပြင် တံခါးပေါက်က သိပ်အဆင်ပြေတာပဲ... နောက်ဆိုရင် ဘယ်သွားသွား လွယ်လွယ်လေး ဖွင့်သွားလို့ ရပြီပေါ့" လီရှန်ယန်က မနေနိုင်ဘဲ အားကျစွာ ပြောလိုက်သည်။

လီချင်းဟွာက ခေါင်းခါလိုက်ပြီး "ဘယ်လိုလုပ် ရမလဲ... ရှင်းမြွေမိစ္ဆာ ဟင်းလင်းပြင်ရဲ့ နှလုံးအမြူတေကို ကျွန်တော် ရထားလို့ ဒီအထဲမှာ လွတ်လွတ်လပ်လပ် တံခါးဖွင့်လို့ ရတာ"

"ရှင်းမြွေမိစ္ဆာ ဟင်းလင်းပြင်က ကျွန်တော်နဲ့ တစ်သားတည်း ဖြစ်နေလို့ သူ့ရဲ့ ဟင်းလင်းပြင် အကာအရံကို အလွယ်တကူ ဖွင့်လို့ရတာလေ"

"အပြင်ကမ္ဘာရဲ့ ဟင်းလင်းပြင် အကာအရံက ရှင်းမြွေမိစ္ဆာ ဟင်းလင်းပြင်ထက် အဆပေါင်းများစွာ ပိုခိုင်မာတယ်... ဟင်းလင်းပြင် ဆုံမှတ်ကို ရှာမတွေ့သရွေ့... လက်ရှိ ကျွန်တော့်ရဲ့ စိတ်စွမ်းအင် အဆင့်နဲ့ဆို အပြင်မှာ တံခါးပေါက် ဖွင့်ဖို့ဆိုတာ မဖြစ်နိုင်ဘူး"

လင်းယွမ်က ဝင်မေးလိုက်သည်။ "ဒါဆို မင်းရဲ့ ဟင်းလင်းပြင် ခေါက်ချိုးတဲ့ အစွမ်းကရော ဘယ်လို အလုပ်လုပ်တာလဲ"

လီချင်းဟွာက ပြန်ဖြေသည်။ "ဟင်းလင်းပြင် ခေါက်ချိုးတာက လိုအပ်ချက် သိပ်မများပါဘူး... ဟင်းလင်းပြင်ကို အက်ကွဲကြောင်းလေး ဖြစ်အောင် ဖွင့်နိုင်ရုံနဲ့ လုံလောက်တယ်"

"ဒါပေမဲ့ အဲ့ဒီလို လုပ်နိုင်ဖို့ဆိုတာကလည်း ကျွန်တော့်ရဲ့ စိတ်စွမ်းအင် ရောက်နိုင်တဲ့ အကွာအဝေး အတွင်းမှာပဲ ရတာ... ပြီးတော့ ဆရာလင်းလည်း မြင်တဲ့အတိုင်းပဲ ကျွန်တော် ဖွင့်နိုင်တဲ့ ဟင်းလင်းပြင် အက်ကွဲကြောင်းက အရမ်းသေးပြီး ချက်ချင်း ပြန်ပိတ်သွားတာလေ"

လီရှန်ယန်က "ဒါဆို ရှင်းမြွေမိစ္ဆာ ဟင်းလင်းပြင်ထဲမှာဆို မင်းက ပြိုင်ဘက်ကင်း ဖြစ်နေပြီပေါ့" ဟု ဖြတ်မေးလိုက်သည်။

လီချင်းဟွာက ပြုံးလိုက်ပြီး "အဲ့ဒီလိုလည်း မဟုတ်သေးပါဘူး... ခုနက ပြောသလိုပဲ ရှင်းမြွေမိစ္ဆာ ဟင်းလင်းပြင်ရဲ့ အကာအရံက သိပ်မခိုင်မာဘူး... အင်အားကြီးတဲ့ အစွမ်းပိုင်ရှင်နဲ့ တွေ့ရင် အပြင်ကနေ အတင်းအဓမ္မ ဖောက်ခွဲပြီး ဝင်လာလို့ ရတယ်" ဟု ပြောလိုက်သည်။

ထိုသို့ပြောရင်း သူက လင်းယွမ်ကို လှမ်းကြည့်လိုက်လေသည်။

လီချင်းဟွာ ပြောသော "အင်အားကြီးမားသည့် အစွမ်းပိုင်ရှင်" ဆိုသည်မှာ လင်းယွမ်ကဲ့သို့ လူမျိုးကို ဆိုလိုကြောင်း သိသာလှပေသည်။

သို့သော် လင်းယွမ်ကမူ ခေါင်းယမ်းလိုက်ပြီး "ဒီ ဟင်းလင်းပြင် အကာအရံက မဆိုးပါဘူး... ငါဆိုရင်တောင် ဟင်းလင်းပြင် ဆုံမှတ်ကို ရှာတွေ့မှ အကာအရံကို ဖောက်ပြီး ထွက်နိုင်မှာ" ဟု ပြောလေသည်။

လီချင်းဟွာက ထိုအခါမှသာ သက်ပြင်းချနိုင်သွားပြီး "ဆရာလင်းယွမ်က ဟင်းလင်းပြင် ဆုံမှတ်ကို ရှာတွေ့လို့ အကာအရံကို ဖောက်ပြီး ကျွန်တော်တို့ဆီ ရောက်လာတာကိုး"

"ဆရာ့ရဲ့ အစွမ်းက ရှင်းမြွေမိစ္ဆာ ဟင်းလင်းပြင်ကို ဖျက်ဆီးပစ်နိုင်တဲ့ အဆင့်အထိ ရောက်နေပြီလို့တောင် ထင်နေတာ"

လီချင်းဟွာမှာ ဝန်ထုပ်ဝန်ပိုးကြီး ကျသွားသကဲ့သို့ ပေါ့ပါးသွားပုံရသည်။

အကယ်၍ ဤဟင်းလင်းပြင်ကြီးသည် ထိုမျှ လွယ်လွယ်ကူကူ ဖောက်ထွင်းခံရနိုင်ပါက ကာကွယ်ရေးစွမ်းရည် အလွန် ညံ့ဖျင်းလွန်းနေမည် မဟုတ်ပါလော။

လင်းယွမ်က ပြုံးလိုက်ပြီး "ဒါပေမဲ့ မင်း သတိထားရမယ့် အချက်တစ်ခု ရှိတယ်... ဒီရှင်းမြွေမိစ္ဆာ ဟင်းလင်းပြင်က အပြည့်အစုံ မဟုတ်ဘူး... အားနည်းချက်တွေ ရှိနေတယ်"

"ငါ အခု ဝင်လာတာတောင် အပြင်က ဟင်းလင်းပြင် အကာအရံကို အကြီးအကျယ် မီးလောင်တိုက်သွင်းပြီး အားနည်းတဲ့ နေရာကနေ ဖောက်ဝင်လာခဲ့တာ"

လီချင်းဟွာက ခေါင်းညိတ်လိုက်ပြီး လေးနက်စွာဖြင့် "ဒီရှင်းမြွေမိစ္ဆာ ဟင်းလင်းပြင်က နဂိုကတည်းက ပျက်စီးနေတာ... မူလပိုင်ရှင် မြွေကြီး မသေခင်ကတည်းက ဒဏ်ရာရထားလို့ ဖြစ်မယ်" ဟု ပြောလေသည်။

"ဒါပေမဲ့ ကိစ္စမရှိပါဘူး... အခု ကျွန်တော်က နှလုံးအမြူတေကို ရထားပြီဆိုတော့ကာ... ကျွန်တော်ကိုယ်တိုင်ကလည်း ဟင်းလင်းပြင် အစွမ်းပိုင်ရှင် ဖြစ်နေတော့ ဒါတွေကို ပြန်ပြုပြင်လို့ ရပါတယ်"

သူတို့ စကားပြောနေရင်းဖြင့် ရှောင်မောင်းတောင်သို့ ရောက်ရှိလာကြသည်။

တင်းယန်၊ ကျိုးချင်းမင်တို့နှင့် တွေ့ဆုံကြရာ နှစ်ဖက်စလုံး အလွန် ဝမ်းသာပီတိ ဖြစ်သွားကြသည်။

ဝူယောင်ပန်းမှာ ဤမျှ ဒုက္ခပေးတတ်ကြောင်းကို လီရှန်ယန်နှင့် လီချင်းဟွာတို့ ယခုမှ သိရှိသွားကြတော့သည်။

တစ်ချိန်တည်းမှာပင် ရှမင် သေဆုံးသွားကြောင်း သိလိုက်ရသဖြင့် တင်းယန်နှင့် ကျိုးချင်းမင်တို့မှာလည်း မျက်နှာညှိုးသွားကာ ယူကြုံးမရဖြစ်သွားကြသည်။

သို့သော် လီချင်းဟွာက ဓားမြီး ပင်လယ်မြွေကို သတ်ဖြတ်နိုင်ခဲ့ပြီး ဤဟင်းလင်းပြင်ကြီး၏ နှလုံးအမြူတေကိုပါ ရယူနိုင်ခဲ့ကြောင်း ကြားသိရသောအခါ အားလုံး အလွန်အမင်း အံ့အားသင့်သွားကြလေသည်။

နှစ်ဖက်စလုံး အခြေအနေများကို အပြန်အလှန် ဖလှယ်ကြပြီးနောက်၊ လင်းယွမ်က ထိုက်ယန်တောင်ကို ဂိုဏ်းကြီးသုံးဂိုဏ်းက ဝင်ရောက်တိုက်ခိုက်ခဲ့ကြောင်း ပြောပြလိုက်သည်။

လီချင်းဟွာ၊ တင်းယန်တို့ အားလုံး မျက်နှာပျက်သွားကြသည်။

လီချင်းဟွာမှာ သတ်ဖြတ်လိုသော အငွေ့အသက်များ ထွက်ပေါ်လာပြီး "ဂိုဏ်းကြီးသုံးဂိုဏ်းပေါ့လေ... ဒီရောဂါပိုး ကူးစက်တာက သူတို့ရဲ့ လက်ချက်ကိုး" ဟု ဒေါသတကြီး ပြောလိုက်သည်။

တင်းယန်ကလည်း လက်သီးကို ကျစ်ကျစ်ပါအောင် ဆုပ်လိုက်ပြီး "အားလုံး အဆင်ပြေကြရဲ့လား" ဟု စိုးရိမ်တကြီး မေးလိုက်သည်။

သူမ ရန်မေတို့ကို စိုးရိမ်နေမှန်း လင်းယွမ် သိပါသည်။

သူက ခေါင်းခါပြလိုက်ပြီး "လူတွေတော့ အဆင်ပြေပါတယ်... အဆောက်အအုံတွေ တော်တော်များများ ပျက်စီးသွားလို့ နည်းနည်း ဒုကများနေတယ်" ဟု ဖြေလေသည်။

"လူတွေ ဘာမှမဖြစ်ရင် တော်ပါသေးတယ်" လီရှန်ယန်က သက်ပြင်းချလိုက်သည်။

တင်းယန်က ဒေါသတကြီးဖြင့် "စောစောကတည်းက သိရင် ငါတို့ ထွက်မလာခဲ့ပါဘူး" ဟု ရေရွတ်လိုက်သည်။

လီချင်းဟွာက အရင်ဆုံး တည်ငြိမ်သွားပြီး "ဆရာလင်းယွမ်... ရှေ့ဆက် ဘယ်လို လုပ်ကြမလဲ" ဟု မေးလိုက်သည်။

လင်းယွမ်က လေးနက်သော လေသံဖြင့် "ရှေ့ဆက်ပြီး... မင်းတို့အားလုံး အမြန်ဆုံး အစွမ်းထက်လာအောင် ကြိုးစားရမယ်... မျိုးရိုးဗီဇမျိုးစေ့ အဆင့်ကို ရောက်မှ ထိုက်ယန်တောင်ကို ကာကွယ်နိုင်မှာ"

"ဂိုဏ်းကြီးသုံးဂိုဏ်းနဲ့ ငါတို့ ထိုက်ယန်တောင်ကြားမှာ သေချာပေါက် စာရင်းရှင်းရမယ်" ဟု ပြောလေသည်။

လီချင်းဟွာ၏ မျက်ဝန်းများ တည်ငြိမ်သွားပြီး အတန်ကြာ စဉ်းစားပြီးနောက် "ရှင်းမြွေမိစ္ဆာ ဟင်းလင်းပြင်ထဲမှာ မျိုးရိုးဗီဇမျိုးစေ့ အဆင့်ရှိတဲ့ သန္ဓေပြောင်း သတ္တဝါတွေ အများကြီး ရှိတယ်... အဲ့ဒါတွေကို သတ်နိုင်ရင် သွေးအဆီအနှစ်တွေ အများကြီး ရနိုင်တယ်" ဟု ပြောလိုက်သည်။

လင်းယွမ်က ချက်ချင်း ခေါင်းယမ်းလိုက်သည်။ "မလုပ်နဲ့... ရှင်းမြွေမိစ္ဆာ ဟင်းလင်းပြင်က မင်းရဲ့ ပိုင်ဆိုင်မှု ဖြစ်သွားပြီဆိုတော့... ငါတို့က အကုန်လုံးကို သတ်ပစ်လို့ မဖြစ်တော့ဘူး... ရေရှည် အသုံးဝင်နိုင်မယ့် နည်းလမ်းကို စဉ်းစားရမယ်"

"ဟင်"

အားလုံး ကြောင်အသွားကြသည်။

လင်းယွမ်က ဆက်ပြောသည်။ "ဒီ မျိုးရိုးဗီဇမျိုးစေ့ အဆင့်ရှိတဲ့ သန္ဓေပြောင်း သတ္တဝါတွေကို ယဉ်ပါးအောင် လုပ်ပြီး မွေးမြူဖို့ နည်းလမ်းရှာရမယ်... အဲ့ဒီလိုဆိုရင် ငါတို့အတွက် မျိုးရိုးဗီဇမျိုးစေ့ သွေးအဆီအနှစ်တွေ အမြဲတမ်း ရနေတော့မှာပေါ့"

ထိုစကားကို ကြားလိုက်သည်နှင့် အားလုံး၏ မျက်လုံးများ အရောင်တောက်သွားကြပြီး စိတ်လှုပ်ရှား ဝမ်းသာသွားကြလေသည်။

ယခင်က မည်သူမျှ ထိုကဲ့သို့ မတွေးမိခဲ့ကြပေ။

အဓိကအကြောင်းရင်းမှာ မျိုးရိုးဗီဇမျိုးစေ့ သန္ဓေပြောင်း သတ္တဝါများမှာ အလွန် အစွမ်းထက်လွန်းသောကြောင့် ဖြစ်သည်။ လီချင်းဟွာပင်လျှင် ဓားမြီး ပင်လယ်မြွေနှင့် တိုက်ခိုက်ပြီးနောက် မျိုးရိုးဗီဇမျိုးစေ့ သန္ဓေပြောင်း သတ္တဝါများ၏ ကြောက်မက်ဖွယ်ကောင်းပုံကို သေချာပေါက် သိရှိနားလည်သွားခဲ့ပြီ ဖြစ်သည်။

ထို့ကြောင့် သူပင်လျှင် ပထမဆုံး တွေးမိသည်မှာ ဤကြောက်စရာကောင်းသော မိစ္ဆာများကို မွေးမြူရန် မဟုတ်ဘဲ သတ်ဖြတ်ရန်သာ ဖြစ်နေခဲ့သည်။

သို့သော် ဤစကားကို ဆရာလင်းယွမ်က ပြောလိုက်သောအခါတွင်မူ အလွန်ပင် သဘာဝကျပြီး ဖြစ်နိုင်ချေရှိသည်ဟု ခံစားလိုက်ကြရလေတော့သည်။

ဆက်ရန်...

အပိုင်း (၅၂၂) ဟင်းလင်းပြင် သွေးအဆီအနှစ်

"ဆရာလင်း... ဒီနေရာက ရှင်းမြွေမိစ္ဆာ ဟင်းလင်းပြင်ရဲ့ အတွင်းပိုင်းပဲ"

စိမ်းပြာရောင် အလင်းတန်းများ လွှမ်းခြုံနေသော ဟင်းလင်းပြင်တစ်ခုအတွင်း လီချင်းဟွာက လင်းယွမ်ကို ခေါ်ဆောင်လာကာ သိပ်မကြီးမားလှသော ဧရာမ နှလုံးခန်းမကြီးထဲသို့ ရောက်ရှိလာခဲ့သည်။

ဤနေရာက မြူခိုးမြို့တော်ရှိ ရေပေါ်ကျွန်း နှလုံးခန်းမနှင့် ယှဉ်လျှင် အများကြီး ပိုသေးငယ်လေသည်။

ဘောလုံးကွင်း တစ်ကွင်းစာခန့်သာ အရွယ်အစား ရှိသည်။

နှလုံးခန်းမ အတွင်းပိုင်း တစ်ခုလုံးရှိ ကြမ်းပြင်နှင့် အသားနံရံများမှ စိမ်းပြာရောင် အလင်းတန်းများက နေရာအနှံ့ ဖြာထွက်နေတော့သည်။

လင်းယွမ်က ထိုနေရာတွင် ပြင်းထန်လှသော စွမ်းအင်လှိုင်းများ ရိုက်ခတ်နေသည်ကို ခံစားရလေသည်။

လီချင်းဟွာက ရှင်းပြလေသည် "ဒီနေရာက ရှင်းမြွေမိစ္ဆာရဲ့ နှလုံးသားပဲ... အဲ့ဒီအထဲမှာ ဟင်းလင်းပြင်အစွမ်း သန္ဓေပြောင်းစွမ်းအင်တွေ အမြောက်အမြား ရှိနေတာ"

"အချိန်ကြာလာတာနဲ့အမျှ ဒီစွမ်းအင်တွေက သူ့ရဲ့ နှလုံးအသားနံရံတွေနဲ့ သွေးတွေထဲကို စိမ့်ဝင်သွားပြီး... ဒီမှာ ဘယ်လောက်ကြာအောင် စုပုံနေမှန်း မသိပေမယ့် သလင်းကျောက်တွေ အများကြီး ဖြစ်လာတာ"

"ဒါက စွမ်းအင်ကျောက်တုံးထက်တောင် ပိုပြီး သန့်စင်တဲ့ စွမ်းအင် သွေးအဆီအနှစ်တွေလို့ ပြောလို့ရတယ်"

လင်းယွမ်က ခေါင်းဆတ်ပြခဲ့သည်။ ဤအကြောင်းကို သူ သေချာပေါက် သိထားပြီး သူ၏ ပစ္စည်းသိုလှောင်ခန်းထဲတွင် မြူခိုးမြို့တော်မှ ရရှိခဲ့သော ရေခဲဓာတ် သွေးအဆီအနှစ်များ အများအပြား ရှိနေဆဲ ဖြစ်သည်။

"ဒီလောက်များတဲ့ စွမ်းအင် သွေးအဆီအနှစ်တွေက မင်းရဲ့ အစွမ်းကို အမြန်ဆုံး မြှင့်တင်ပေးနိုင်မှာ အသေအချာပဲ" လင်းယွမ်က ပြုံးရွှင်စွာ ပြောလေသည်။

လီချင်းဟွာကလည်း ဝမ်းသာအားရဖြင့် "ဟိုဓားမြီး ပင်လယ်မြွေက ဟင်းလင်းပြင် အမျိုးအစား သန္ဓေပြောင်း သတ္တဝါ မဟုတ်တာ ကံကောင်းတယ်... နို့မို့ဆို နှလုံးအမြူတေကို သန့်စင်ပြီးတာနဲ့ ဒီသွေးအဆီအနှစ်တွေကို စုပ်ယူစားသောက်နေလောက်ပြီ" ဟု ပြောလေသည်။

"အခုတော့ ဒီပစ္စည်းတွေက ကျွန်တော့်အတွက် အချောင်ရလိုက်တာပေါ့"

လင်းယွမ်က မေးလေသည် "ဒါနဲ့ ဦးနှောက်ရေကန်ကိုရော မင်း ရှာတွေ့ပြီလား... အဲ့ဒီထဲမှာရော ဒီလို သွေးအဆီအနှစ်တွေ ရှိနေသေးလား"

"ဦးနှောက်ရေကန်က ဘယ်နားမှာရှိလဲဆိုတာ ကျွန်တော် သိတယ်... ဒါပေမဲ့ မသွားရသေးဘူး... အဲ့ဒီထဲမှာတော့ စိတ်စွမ်းအင် အမျိုးအစား သလင်းကျောက်တွေ အဓိက ဖြစ်ဖို့ များတယ်" ဟု လီချင်းဟွာက ခန့်မှန်းပြောဆိုလိုက်သည်။

လင်းယွမ်ကလည်း ခေါင်းဆတ်ပြလေသည်။ ဦးနှောက်ရေကန်နှင့် နှလုံးခန်းမက မတူညီဘဲ ထိုနေရာသည် စိတ်စွမ်းအင်များ တည်ရှိရာ နေရာပင် ဖြစ်သည်။

ရှင်းမြွေမိစ္ဆာ သေဆုံးသွားပြီးနောက် ကြီးမားလှသော စိတ်စွမ်းအင်များ ပျံ့လွင့်သွားကာ နောက်ဆုံးတွင် ဦးနှောက်ရေကန်ထဲသို့ ပေါင်းစပ်ဝင်ရောက်သွားမည်ဟု ခန့်မှန်းရသည်။

ထို့ကြောင့် လီချင်းဟွာ၏ ခန့်မှန်းချက်က မမှားပေ။ ထိုနေရာသည် တကယ်တမ်းတွင် စိတ်စွမ်းအင် သလင်းကျောက်များ အသိပ်သည်းဆုံး နေရာ ဖြစ်ဖို့ များလှသည်။

နှမြောစရာ ကောင်းသည်က သူ မြူခိုးမြို့တော်တွင် ရှိစဉ်က ဦးနှောက်ရေကန်ထဲ ရောက်နေခဲ့သော်လည်း သေချာ ဂရုတစိုက် မရှာဖွေခဲ့မိခြင်းပင်။

ယခု ပြန်တွေးကြည့်လျှင် ထိုဦးနှောက်ရေကန်ထဲ၌ စိတ်စွမ်းအင် အမျိုးအစား သလင်းကျောက်များ မနည်းမနော ရှိနေလောက်ပြီး အကယ်၍ တူးဖော်နိုင်ခဲ့လျှင် စိတ်စွမ်းအင် အမျိုးအစား မျိုးရိုးဗီဇမျိုးစေ့များ အများအပြားကို ထုတ်ယူနိုင်လောက်သည်။

ထိုစဉ် လီချင်းဟွာက ထပ်ပြောလေသည် "ဆရာလင်း... ထိုက်ယန်တောင် တစ်တောင်လုံးမှာ ဆရာလင်းနဲ့ ကျွန်တော်ပဲ ဟင်းလင်းပြင် အစွမ်းကို ပိုင်ဆိုင်ထားတာ"

"ဆရာလင်း ဘယ်လိုလုပ်လိုက်လဲတော့ ကျွန်တော် သေချာ မသိပေမယ့် ဆရာလင်းလည်း ဒီဟင်းလင်းပြင် အမျိုးအစား သွေးအဆီအနှစ်တွေကို လိုမှာပဲ"

"ဒီက သွေးအဆီအနှစ်တွေကို ဆရာလင်း လိုသလောက် အချိန်မရွေး လာယူလို့ရပါတယ်"

လင်းယွမ် ထိုစကားကို ကြားသောအခါ ပြုံးလိုက်မိတော့သည်။

လီချင်းဟွာက အတော်လေး သဘောထားကြီးလှသဖြင့် အစောပိုင်းက သူ့အသက်ကို ချမ်းသာပေးခဲ့ရကျိုး နပ်သွားခဲ့သည်။

လင်းယွမ်က ခေတ္တမျှ စဉ်းစားပြီးနောက် မေးလေသည် "မင်း နိုးထလာတဲ့ မျိုးရိုးဗီဇမြေပုံက ဘာလဲ"

"ဟင်းလင်းပြင် ရှင်းမြွေမိစ္ဆာတဲ့... မျိုးရိုးဗီဇ အမွေအနှစ်တွေထဲကနေ ဟင်းလင်းပြင် အသုံးပြုပုံနဲ့ ပတ်သက်တဲ့ နည်းစနစ်တချို့ကို ကျွန်တော် ရလိုက်တယ်"

"အဲ့ဒီအထဲမှာ ဟင်းလင်းပြင်အက်ကွဲဓားကွက်က အလွယ်ကူဆုံး တစ်ခုပဲ... ဒါ့အပြင် ဟင်းလင်းပြင် ခေါက်ချိုးတာနဲ့ ဟင်းလင်းပြင် ခုန်ပျံတာတို့လို ပိုအဆင့်မြင့်တဲ့ အစွမ်းတွေလည်း ရှိသေးတယ်... လက်ရှိ ကျွန်တော့်ရဲ့ စိတ်စွမ်းအင်က မလုံလောက်သေးလို့ အသုံးမပြုနိုင်သေးဘူး"

လင်းယွမ်က အံ့အားသင့်သွားမိသည်။ မျိုးရိုးဗီဇမျိုးစေ့ကို အခုလေးတင် ပေါင်းစပ်ပြီးစီးကာစ ရှိသေးသော်လည်း လီချင်းဟွာက ဤမျှများပြားသော အမွေအနှစ် အစွမ်းများကို ရရှိခဲ့သည် မဟုတ်ပါလား။

ဤဟင်းလင်းပြင် ရှင်းမြွေမိစ္ဆာ၏ မျိုးရိုးဗီဇမြေပုံ အဆင့်က သေချာပေါက် နိမ့်ကျမည် မဟုတ်ချေ။

"အခု မင်းဆီမှာ ဟင်းလင်းပြင် အမျိုးအစား သွေးအဆီအနှစ်တွေ အများကြီး ရှိနေပြီပဲ... အစွမ်းတွေ တိုးတက်လာဖို့ ဆိုတာက အချိန်ပဲလိုတာ... မလောနဲ့... ဖြည်းဖြည်းချင်း လုပ်"

"ဒီဟင်းလင်းပြင် အမျိုးအစား သွေးအဆီအနှစ်တွေက တန်ဖိုး အရမ်းကြီးတယ်... ဟင်းလင်းပြင် အစွမ်းပိုင်ရှင်တွေကလည်း အရမ်းရှားတာ... အခုအချိန်အထိ မင်းတစ်ယောက်တည်းကိုပဲ ငါ တွေ့ဖူးသေးတယ်... မင်းရဲ့ ဒီသွေးအဆီအနှစ်တွေကို သေချာသာ သိမ်းဆည်းထား"

"လိုအပ်တဲ့ အချိန်ကျရင် အသုံးပြုလို့ရအောင် မျိုးရိုးဗီဇမျိုးစေ့ ထုတ်ဖို့အတွက် ငါ နည်းနည်း ယူသွားမယ်"

"ကျန်တာတွေကိုတော့ မင်းဘာသာမင်းပဲ သိမ်းထားလိုက်ပါ"

လင်းယွမ်က ထိုဟင်းလင်းပြင် အမျိုးအစား သွေးအဆီအနှစ်များကို မည်သို့ ခွဲဝေယူမည် ဆိုသည်နှင့် ပတ်သက်၍ လောဘတကြီး မတောင်းဆိုခဲ့ပေ။

လင်းယွမ်အတွက်ကတော့ ဟင်းလင်းပြင် အမျိုးအစား သွေးအဆီအနှစ် အနည်းငယ် ရရှိရုံဖြင့် ဟင်းလင်းပြင် အမျိုးအစား မျိုးရိုးဗီဇမျိုးစေ့များကို ထုတ်ယူနိုင်ပြီ ဖြစ်သည်။

သူ၏ မျိုးရိုးဗီဇ အသွင်တစ်ရာ ပင်ကိုယ်အစွမ်းဖြင့် သူပိုင်ဆိုင်သော ဟင်းလင်းပြင် အစွမ်း မျိုးရိုးဗီဇမျိုးစေ့ကို အလွယ်တကူ ပေါင်းစပ်ဖန်တီးနိုင်လေသည်။

အစွမ်းကို မြှင့်တင်ရန် ကိစ္စနှင့် ပတ်သက်၍ သူ၏ အဓိက ခွန်အား အရင်းအမြစ်သည် အသွင်တစ်ရာ မျောက်ဝံမိစ္ဆာသာ ဖြစ်သည်။

အသွင်တစ်ရာ မျောက်ဝံမိစ္ဆာ၏ မျိုးရိုးဗီဇမျိုးစေ့ အဆင့် မြင့်တက်လာမှသာ အခြားသော မျိုးရိုးဗီဇမျိုးစေ့များ၏ အစွမ်းများလည်း အလိုအလျောက် လိုက်ပါ မြင့်တက်လာမည် ဖြစ်သည်။

ထို့ကြောင့် အစွမ်းကို မြှင့်တင်ရန်အတွက် သူက ဟင်းလင်းပြင် အမျိုးအစား သွေးအဆီအနှစ် အများအပြားကို မလိုအပ်ပေ။

ထို့နောက် လီချင်းဟွာက ဟင်းလင်းပြင် အမျိုးအစား သွေးအဆီအနှစ် အမြောက်အမြားကို တူးဖော်ကာ လင်းယွမ်အား ပေးအပ်ခဲ့သည်။

လင်းယွမ်က ပစ္စည်းသိုလှောင်ခန်းထဲသို့ ထည့်သွင်းသိမ်းဆည်းပြီးနောက် လီချင်းဟွာနှင့်အတူ ရှင်းမြွေမိစ္ဆာ၏ နှလုံးခန်းမထဲမှ ထွက်ခွာလာခဲ့သည်။

ဤနှလုံးခန်းမ၏ တည်နေရာက အလွန် ထူးခြားဆန်းကြယ်လှပြီး ရှင်းမြွေမိစ္ဆာ ဟင်းလင်းပြင်၏ အပြင်ဘက်တွင် တည်ရှိနေသည်။

လီချင်းဟွာ၏ အပြောအရ ရှင်းမြွေမိစ္ဆာ ဟင်းလင်းပြင်သည် တကယ်တမ်းတွင် ရှင်းမြွေမိစ္ဆာ၏ ကိုယ်တွင်းရှိ ဟင်းလင်းပြင်တစ်ခုသာ ဖြစ်သည်။

ရှင်းမြွေမိစ္ဆာ သေဆုံးသွားပြီးနောက် ၎င်း၏ ခန္ဓာကိုယ်က ပျောက်ကွယ်သွားခဲ့ကာ ကိုယ်တွင်း ဟင်းလင်းပြင်များ ပျက်စီးသွားသောကြောင့် အပြင်ဘက်သို့ ထွက်ပေါ်လာခဲ့ပြီး ဂေဟစနစ်မြို့တော်၏ အချို့သော နယ်မြေများကို ဝါးမျိုသွားကာ ယခုလို အခြေအနေမျိုး ဖြစ်ပေါ်လာခြင်း ဖြစ်သည်။

ရှောင်မောင်းတောင်သို့ ပြန်ရောက်သောအခါ လင်းယွမ်က လီချင်းဟွာ၊ တင်းယန်တို့နှင့်အတူ ထိုနေရာရှိ မျိုးရိုးဗီဇမျိုးစေ့ အဆင့်ရှိ သန္ဓေပြောင်း သတ္တဝါများကို စတင် အမဲလိုက်ကြတော့သည်။

ကျိုးချင်းမင်၊ လီရှန်ယန်နှင့် ကျန်းရုံရုံ သုံးယောက်ကတော့ ရှောင်မောင်းတောင်တွင် ကျန်ရစ်နေသော အသက်ရှင်ကျန်ရစ်သူများကို ဦးဆောင်ကာ ဦးလေးကောကို အတူတကွ ရှာဖွေရေး တာဝန်ယူခဲ့ကြသည်။

"ဆရာလင်း... ဒီနေရာက အကျယ်ကြီးပဲ... မျိုးရိုးဗီဇမျိုးစေ့အဆင့် သန္ဓေပြောင်း သတ္တဝါတွေကို ရှာရတာ အချိန်အတော်လေး ပေးရမယ့်ပုံပဲ" လီချင်းဟွာက သက်ပြင်းချကာ ပြောလေသည်။

အကယ်၍ သူသာ နှလုံးအမြူတေကို သန့်စင်ပြီးပါက ဤမျှ ဒုက္ခခံနေရန် မလိုအပ်တော့ပေ။

ဟင်းလင်းပြင်ထဲရှိ သက်ရှိသတ္တဝါများ၏ အငွေ့အသက်များသည် ဦးနှောက်အမြူတေ၏ အာရုံခံနိုင်စွမ်းကို ရှောင်လွှဲနိုင်မည် မဟုတ်ချေ။

လင်းယွမ်က ပြုံးလိုက်ပြီး ခေါင်းယမ်းကာ ပြောလေသည် "ရိုးရှင်းတဲ့ နည်းလမ်းတစ်ခုတော့ရှိတယ် ရှိသေးတယ်"

"ဘာနည်းလမ်းလဲ" လီချင်းဟွာက အံ့အားသင့်သွားပြီး လင်းယွမ်ကို သံသယဖြင့် ကြည့်လိုက်သည်။

တင်းယန်ကလည်း လင်းယွမ်ကို ကြည့်ကာ မေးခွန်းထုတ်ချင်သော အမူအရာကို ပြသနေခဲ့သည်။

"ဒီဟင်းလင်းပြင်ထဲမှာ အလင်းရောင် မရှိဘူး... အဲ့ဒီတော့ ဒီက သက်ရှိတွေက အလင်းရောင်အပေါ် ရန်လိုတဲ့ သဘောရှိပုံရတယ်"

"အရင်တုန်းက ဝူယောင်ပန်းကို သတ်လိုက်တုန်းက မီးတောက်တစ်ခုကနေ မျိုးရိုးဗီဇမျိုးစေ့အဆင့် သန္ဓေပြောင်း သတ္တဝါ အကောင်ရေ အတော်များများကို ချက်ချင်း ဆွဲဆောင်နိုင်ခဲ့တယ်"

"တစ်နည်းအားဖြင့် ပြောရရင် အလင်းရောင် ရှိနေသရွေ့ သူတို့က အလိုလို ပြေးလာကြမှာပဲ... ငါတို့က လိုက်ရှာနေစရာ မလိုဘူး"

လီချင်းဟွာသည် မျိုးရိုးဗီဇမျိုးစေ့ အဆင့်သို့ ယခုမှ ဝင်ရောက်လာသူ ဖြစ်ပြီး ဤဟင်းလင်းပြင်ကိုလည်း ယခုမှ စတင် ထိန်းချုပ်နိုင်ခြင်း ဖြစ်သောကြောင့် ဤနေရာရှိ သက်ရှိများတွင် ထိုသို့သော ဝိသေသလက္ခဏာများ ရှိနေသည်ကို မသိသေးချေ။

တင်းယန်ကတော့ ယခင်က လင်းယွမ်၏ မီးနဂါးအက အစွမ်းဖြင့် ရှောင်မောင်းတောင်ကို မီးရှို့လိုက်ချိန်တွင် သန္ဓေပြောင်း သတ္တဝါ အကောင်ရေများစွာကို ဆွဲဆောင်နိုင်ခဲ့ပြီး ရှောင်မောင်းတောင် ဧဒင်ကို ဝင်ရောက် တိုက်ခိုက်ခဲ့သည်ကို မျက်မြင်ကိုယ်တွေ့ ကြုံခဲ့ရသူ ဖြစ်သည်။

ယခု လင်းယွမ်၏ အကြံအစည်ကို ကြားလိုက်ရသောအခါ သူမ၏ မျက်ဝန်းများက အရောင်လက်သွားပြီး "ဒီနည်းလမ်းက ကောင်းတယ်... ဒါပေမဲ့ လာတဲ့ မျိုးရိုးဗီဇမျိုးစေ့အဆင့် မိစ္ဆာကောင်တွေက အရမ်းများလာရင် ဘယ်လိုလုပ်မလဲ" ဟု မေးလေသည်။

လင်းယွမ်က ချက်ချင်းပင် ရယ်မောလိုက်ပြီး "များတာက ပြဿနာ မဟုတ်ဘူး... စိတ်ချ... အချိန်ကျရင် ငါ့တာဝန်သာထားလိုက်" ဟု ပြောလိုက်သည်။

သူသည် ကိုယ်ခွဲဖောက်ခွဲခြင်းကို အားကိုးမှသာ အဓိက အရည်အသွေး ရာခိုင်နှုန်းပြည့် တိုက်ခိုက်မှုစွမ်းအားကို ဖော်ထုတ်နိုင်သော ဝူယောင်ပန်း မဟုတ်ချေ။

သူ၏ အစွမ်းအထက်ဆုံး ခွန်အား အရည်အသွေးက ၉၂ မှတ်အထိ မြင့်မားနေသည်ကို မဆိုထားနှင့်... သူ၏ ထံတွင် ကြွက်သားပေါက်ကွဲအစွမ်း ဟူသော ပေါက်ကွဲအားပြင်းထန်သည့် ခွန်အား အစွမ်းလည်း ရှိနေသေးသည်။

တိုက်ရိုက် နှစ်ဆ မြင့်တက်သွားခြင်းကြောင့် ခွန်အား အမှတ်သည် မျက်စိတစ်မှိတ်အတွင်း ၁၈၄ မှတ်အထိ ရောက်ရှိသွားမည် ဖြစ်သည်။

ဤရှင်းမြွေမိစ္ဆာ ဟင်းလင်းပြင်ထဲရှိ မည်သည့် မျိုးရိုးဗီဇမျိုးစေ့အဆင့် မိစ္ဆာကောင်မဆို သူ၏ လက်သီးတစ်ချက်ကို တောင့်ခံနိုင်မည် မဟုတ်ကြောင်း သူ ယုံကြည်လေသည်။

သေချာပေါက် ဤအရာသည် လင်းယွမ်၏ အပြင်းထန်ဆုံး တိုက်ခိုက်မှုသာ ဖြစ်ပြီး ကာကွယ်ရေးအပိုင်းတွင်တော့ ခန္ဓာကိုယ်ကြံ့ခိုင်မှု အရည်အသွေးကိုသာ ကြည့်ရမည် ဖြစ်သည်။

လင်းယွမ်၏ လက်ရှိ ခန္ဓာကိုယ်ကြံ့ခိုင်မှုမှာ ၈၂ မှတ် ဖြစ်ရာ ရန်သူ၏ တိုက်ခိုက်မှုစွမ်းအားက ထိုပမာဏထက် ကျော်လွန်သွားပါက လင်းယွမ်အတွက် အတိုင်းအတာတစ်ခုအထိ အန္တရာယ် ရှိလာနိုင်သည်။

ဥပမာအားဖြင့် ဝူယောင်ပန်းသည် သူ၏ အဓိက အရည်အသွေးက ခန္ဓာကိုယ်ကြံ့ခိုင်မှု ဖြစ်ပြီး ဒုတိယ အရည်အသွေးက စိတ်စွမ်းအင် ဖြစ်ကာ တတိယ အရည်အသွေးကျမှသာ ခွန်အား ဖြစ်လေသည်။

ဝူယောင်ပန်းက ခွန်အားနှင့် အလျင်ကို အားကိုး၍ တိုက်ခိုက်ပါက တိုက်ခိုက်မှုစွမ်းအား ၇၀ မှတ် ဝန်းကျင်သာ ဖော်ထုတ်နိုင်မည် ဖြစ်ရာ သဘာဝကျကျပင် လင်းယွမ်ကို မည်သို့မျှ အနိုင်ယူနိုင်မည် မဟုတ်ပေ။

သို့သော် ဝူယောင်ပန်းက သူ၏ ကိုယ်ခွဲများကို ဖောက်ခွဲလိုက်မည် ဆိုပါက သူ၏ အဓိက အရည်အသွေး ၈၇ မှတ်၏ စွမ်းအားအားလုံးကို အပြည့်အဝ ဖော်ထုတ်လိုက်ခြင်းနှင့် ညီမျှသွားရာ လင်းယွမ်အတွက်တော့ အနည်းငယ် အန္တရာယ် ရှိနေသေးသည်။

ထို့ကြောင့်ပင် လင်းယွမ်က အစောပိုင်းတွင် တစ်ဖက်လူ၏ ကိုယ်ခွဲဖောက်ခွဲရေး ဗျူဟာဖြင့် ဝိုင်းဝန်းတိုက်ခိုက်ခံရခြင်းကို တတ်နိုင်သမျှ ရှောင်ရှားခဲ့ခြင်း ဖြစ်သည်။

ယခုအချိန်တွင်တော့ ဤနေရာရှိ မျိုးရိုးဗီဇမျိုးစေ့အဆင့် သန္ဓေပြောင်း သတ္တဝါများသည် မိမိကိုယ်ကိုယ် ဖောက်ခွဲ၍ သူ့အား အသေအလဲ တိုက်ခိုက်လာလိမ့်မည်ဟု လင်းယွမ် မထင်ထားပေ။

"စလိုက်ရအောင်"

လင်းယွမ်၏ အမိန့်ပေးသံ ထွက်ပေါ်လာသည်နှင့် တင်းယန်နှင့် လီချင်းဟွာတို့က အဆောက်အအုံတစ်ခု၏ အပေါ်တွင် ချက်ချင်း ရပ်တန့်လိုက်ကြသည်။

သူတို့နှစ်ယောက်က လင်းယွမ် ပြင်ဆင်ပေးထားသော ဓာတ်ဆီတစ်ပုံးစီကို ဆွဲကိုင်ထားကာ အောက်ဘက်ရှိ ရေပြင်ပေါ်သို့ လောင်းချလိုက်ကြသည်။

ထို့နောက် လင်းယွမ်က လက်ကို ညင်သာစွာ ဝှေ့ယမ်းလိုက်ရာ မီးနဂါးတစ်ကောင်က ရေပြင်ပေါ်ရှိ ဓာတ်ဆီများဆီသို့ ဝင်တိုက်သွားတော့သည်။

"ဝုန်း"

ပြင်းထန်သော မီးတောက်များက မျက်စိတစ်မှိတ်အတွင်း ကောင်းကင်ယံသို့ ထိုးတက်ကာ လောင်ကျွမ်းသွားလေသည်။

အားပြင်းလှသော မီးလှိုင်းများက ချက်ချင်း ကောင်းကင်ယံသို့ ထိုးတက်သွားပြီး ကြီးမားကျယ်ပြန့်သော ရေပြင်ကြီးကို တိုက်ရိုက် မီးလောင်ကျွမ်းစေခဲ့သည်။

ခဏအကြာတွင် ကောင်းကင်ယံ တစ်ခုလုံး နီရဲတောက်လောင်သွားတော့သည်။

ရေအောက်ရှိ မရေမတွက်နိုင်သော သန္ဓေပြောင်း ငါးများက အသက်အန္တရာယ်ကို မကြောက်မရွံ့ဘဲ မီးရောင်ရှိရာသို့ တဖွဲဖွဲ အလုအယက် တိုးဝင်လာကြသည်။

သက်ရှိများ၏ အလင်းရောင်ကို တိမ်းညွတ်တတ်သော သဘာဝက ဤအချိန်တွင် အထင်းသား ပေါ်လွင်နေတော့သည်။

"ဝုန်း... ဝုန်း"

ရုတ်တရက် ရေပြင်အောက်မှ ကြောက်မက်ဖွယ် ကောင်းသော လှိုင်းလုံးကြီးများ ရုတ်ချည်း ထကြွသောင်းကျန်းလာခဲ့သည်။

ပေရာနှင့်ချီ ကြီးမားလှသော အရိပ်မည်းကြီးတစ်ခုက ရေပြင်ကို ခွဲကာ အလွန် လျင်မြန်သော အလျင်ဖြင့် ထွက်ပေါ်လာလေသည်။

"လာပြီဟေ့" လီချင်းဟွာက မနေနိုင်ဘဲ အော်ဟစ်လိုက်သည်။

တင်းယန်၏ မျက်နှာပေါ်တွင်လည်း လေးနက်တည်ကြည်သော အမူအရာများ ပေါ်ထွက်လာသည်။

လင်းယွမ်က အောက်ဘက်ရှိ ရေပြင်ကို ငုံ့ကြည့်လိုက်လေသည်။

မီးရောင်များ လွှမ်းခြုံထားသည့်ကြားမှ မိကျောင်းပုံစံ ဧရာမ သန္ဓေပြောင်း သတ္တဝါကြီး တစ်ကောင်က ရေပြင်ပေါ်သို့ ပေါ်ထွက်လာခဲ့သည်။

၎င်းတွင် ကြောက်မက်ဖွယ် ကောင်းသော ပါးစပ်အရှည်ကြီး ရှိပြီး ကျောကုန်းပေါ်ရှိ စိမ်းပြာရောင် သားရေချပ်ဝတ်တန်ဆာမှ ကြောက်မက်ဖွယ် ဖိအားများ အဆက်မပြတ် ထွက်ပေါ်နေလေသည်။

ပါးစပ်အပြည့် ထွက်နေသော ချွန်ထက်သည့် အစွယ်များ၊ အေးစက်နေသော မျက်ဝန်းအိမ်နှင့် ကြောက်မက်ဖွယ် ကောင်းသော သွားစွယ်များ... အားလုံးက ၎င်း၏ ကြောက်မက်ဖွယ် စွမ်းအားကြီးမားလှသော အသွင်အပြင်ကို ပြသနေကြသည်။

"မိကျောင်း အမျိုးအစား မျိုးရိုးဗီဇမျိုးစေ့အဆင့် သန္ဓေပြောင်း သတ္တဝါကြီးပဲ" တင်းယန်က မနေနိုင်ဘဲ အာမေဍိတ်သံ ပြုလိုက်မိသည်။

ဘေးဘက်ရှိ လီချင်းဟွာက အလျင်အမြန် သုံးသပ်ပြလေသည်။ "အနီးကပ် တိုက်ခိုက်တတ်တဲ့ မျိုးရိုးဗီဇမျိုးစေ့အဆင့် သန္ဓေပြောင်း သတ္တဝါနဲ့ တူတယ်... ခန္ဓာကိုယ်ကြံ့ခိုင်မှု ဒါမှမဟုတ် ခွန်အား အမျိုးအစား ဖြစ်ဖို့ များပါတယ်"

လင်းယွမ်က စွမ်းအင်တိုင်းမျက်မှန်ကို တပ်ဆင်ကာ ဤသန္ဓေပြောင်း မိကျောင်း၏ စွမ်းအင် ပြင်းအားကို စစ်ဆေးလိုက်သည်။

အချက်အလက်များက အလျင်အမြန် ခုန်တက်သွားပြီး မကြာမီမှာပင် စွမ်းအင်တိုင်းမျက်မှန်တွင် အမှတ် "၆၂" ဟူသော ကိန်းဂဏန်းများ ပေါ်ထွက်လာခဲ့သည်။

လင်းယွမ်က ပြုံးလိုက်ပြီး "အဓိက အရည်အသွေးက ၆၂ မှတ်တည်း... သိပ်တော့ အန္တရာယ် မရှိပါဘူး" ဟု ပြောလေသည်။

လီချင်းဟွာက လက်တည့်စမ်းချင်သော အမူအရာကို မထိန်းချုပ်နိုင်ဘဲ "ဆရာလင်း... ကျွန်တော့်ကို စမ်းသပ်ခွင့် ပြုပါလား" ဟု မေးလိုက်သည်။

လင်းယွမ်က သူ့ကို တစ်ချက် ကြည့်လိုက်ပြီး ရှင်းမြွေမိစ္ဆာ ဟင်းလင်းပြင်ထဲတွင် အချိန်မရွေး နေရာရွှေ့ပြောင်းနိုင်သည့် တံခါးပေါက်များကို ဖွင့်လှစ်နိုင်စွမ်း ရှိသဖြင့် သူ့ကိုယ်သူ ကာကွယ်ရန် သေချာပေါက် ပြဿနာ မရှိနိုင်ကြောင်း တွေးမိလိုက်သည်။

ထို့ကြောင့် ခေါင်းဆတ်ပြလိုက်ကာ "အတော်ပဲ... မင်းရဲ့ လက်ရှိ တိုက်ခိုက်နိုင်စွမ်းကို ငါလည်း ကြည့်ချင်နေတာ" ဟု ပြောလိုက်သည်။

လီချင်းဟွာက ပြုံးလိုက်ပြီး တိုက်ခေါင်မိုးပေါ်မှ ခြေတစ်လှမ်း ဆုတ်ခွာကာ ခုန်ချလိုက်သည်။

သူ၏ ခန္ဓာကိုယ်က အောက်ဘက်သို့ ရုတ်တရက် ပြုတ်ကျသွားလေသည်။

သို့သော် နောက်တစ်စက္ကန့်တွင် သူ၏ တစ်ကိုယ်လုံးက ဟင်းလင်းပြင်ထဲသို့ တိုက်ရိုက် ပျောက်ကွယ်သွားတော့သည်။

တစ်ဖန် ပြန်လည် ထွက်ပေါ်လာချိန်တွင် ထိုသန္ဓေပြောင်း မိကျောင်းကြီး၏ အထက်၌ တိုက်ရိုက် ပေါ်လာခဲ့သည်။

သန္ဓေပြောင်း မိကျောင်းကြီးက စွမ်းအားကြီးမားသော ရန်သူကို အာရုံခံမိသွားသဖြင့် ရုတ်တရက် ခေါင်းမော့ကြည့်လိုက်ကာ ဒေါသတကြီး ဟိန်းဟောက်လိုက်လေသည်။

၎င်း၏ အမြီးက ရေပြင်ကို အားပြင်းပြင်း ရိုက်ချလိုက်ရာ မျက်စိတစ်မှိတ်အတွင်း ကြီးမားလှသော ခွန်အားများ ပေါက်ကွဲထွက်လာခဲ့သည်။

ရေပြင်က ဝုန်းကနဲ ပေါက်ကွဲထွက်သွားပြီး ၎င်း၏ ခန္ဓာကိုယ်က ရေပြင်ပေါ်မှနေ၍ မတ်မတ်ကြီး အရှိန်အဟုန်ဖြင့် ခုန်တက်လာကာ ကောင်းကင်ပေါ်ရှိ လီချင်းဟွာထံသို့ ကိုက်ခဲရန် ပြေးဝင်လာတော့သည်။

လီချင်းဟွာက ထိုမြင်ကွင်းကို မြင်လိုက်ရသောအခါ သူ၏ မျက်ဝန်းများထဲတွင် စူးရှသော အလင်းတန်းတစ်ခု ပေါ်ထွက်လာခဲ့သည်။

သူက လက်နှစ်ဖက်ဖြင့် အောက်ဘက်သို့ ပြင်းပြင်းထန်ထန် ဖိချလိုက်သည်။

လေဟာပြင်က ချက်ချင်း တုန်ခါသွားပြီး ဟင်းလင်းပြင် တစ်ခုလုံးက ဤအချိန်တွင် ရပ်တန့်သွားသကဲ့သို့ ဖြစ်သွားသည်။

မျက်စိဖြင့် မမြင်နိုင်သော ဟင်းလင်းပြင် အကာအရံတစ်ခုက သန္ဓေပြောင်း မိကျောင်းကြီး၏ ခေါင်းပေါ်တွင် ပေါ်ထွက်လာခဲ့သည်။

ဖောင်း... ခနဲ အသံနှင့်အတူ သန္ဓေပြောင်း မိကျောင်းကြီးက ၎င်းအား ခေါင်းဖြင့် ပြင်းပြင်းထန်ထန် ဝင်တိုက်မိသွားကာ ကျယ်လောင်သော အသံကြီး ထွက်ပေါ်လာလေသည်။

၎င်းက ကောင်းကင်ယံရှိ ကြီးမားသော တံတိုင်းကြီးတစ်ခုကို ဝင်တိုက်မိသွားသကဲ့သို့ ဖြစ်သွားပြီးနောက် ရေပြင်ပေါ်သို့ အရှိန်ပြင်းပြင်းဖြင့် ပြန်လည် ပြုတ်ကျသွားတော့သည်။

သို့သော် ၎င်း ရေထဲသို့ အပြီးတိုင် ပြုတ်မကျခင်မှာပင် လီချင်းဟွာက လက်ကို ဆန့်ထုတ်ကာ တစ်ချက် လွှဲယမ်းလိုက်သည်ကို တွေ့လိုက်ရသည်။

ချက်ချင်းပင် ၎င်း ပြုတ်ကျနေသော လမ်းကြောင်းတွင် ဧရာမ ဟင်းလင်းပြင် တံခါးပေါက်ကြီးတစ်ခု ပေါ်ထွက်လာခဲ့သည်။

"ဝှီး"

ဧရာမ သန္ဓေပြောင်း မိကျောင်းကြီးက ထိုတံခါးပေါက်ကြီးထဲသို့ ချက်ချင်း ပြုတ်ကျသွားပြီးနောက် လီချင်းဟွာက ကောင်းကင်ယံသို့ နောက်တစ်ကြိမ် လွှဲယမ်းလိုက်သည်ကို မြင်တွေ့လိုက်ရသည်။

နောက်ထပ် ဟင်းလင်းပြင် လမ်းကြောင်းတစ်ခု ထပ်မံ ပေါ်ထွက်လာခဲ့ပြန်သည်။

ထိုဧရာမ သန္ဓေပြောင်း မိကျောင်းကြီးက ကောင်းကင်ပေါ်မှ အံ့သြဖွယ်ကောင်းလောက်အောင် ပြုတ်ကျလာခဲ့သည်။

ဤသို့ဖြင့် ၎င်းသည် မြေဆွဲအား၏ သက်ရောက်မှုအောက်တွင် သံသရာလည်နေသကဲ့သို့ အောက်ဘက်ရှိ ဟင်းလင်းပြင် လမ်းကြောင်းထဲသို့ ပြုတ်ကျသွားလိုက်၊ အပေါ်ဘက်ရှိ ဟင်းလင်းပြင် လမ်းကြောင်းမှနေ၍ ပြန်ပြုတ်ကျလာလိုက် ဖြစ်နေတော့သည်။

ကောင်းကင်ယံတွင် အားပြုစရာ နေရာမရှိသဖြင့် ၎င်းက ထိုသို့သော သံသရာလည်နေမှုထဲမှ လွတ်မြောက်နိုင်စွမ်း လုံးဝ မရှိတော့ချေ။

လီချင်းဟွာက ဟင်းလင်းပြင် လမ်းကြောင်း နှစ်ခုကို ထိန်းသိမ်းထားရင်း မျက်နှာပေါ်တွင် အပြုံးများ ပြည့်နှက်နေခဲ့သည်။

သူက ခေါင်းလှည့်ကာ လင်းယွမ်ဘက်သို့ လှမ်းအော်လိုက်သည် "ဆရာလင်း... ဒီသန္ဓေပြောင်း မိကျောင်းက ခွန်အား အမျိုးအစား သန္ဓေပြောင်း သတ္တဝါ ဖြစ်ဖို့ များတယ်"

လင်းယွမ်လည်း ထိုအချက်ကို ရိပ်မိလိုက်သည်။ အကယ်၍ ၎င်းသာ အခြား အမျိုးအစား သန္ဓေပြောင်း သတ္တဝါ ဖြစ်ခဲ့လျှင် လေထဲတွင် ခေတ္တ ရပ်တန့်နိုင်စွမ်း လုံးဝမရှိဘဲ နေမည် မဟုတ်ချေ။

သူ၏ ကိုယ်ဟန်က တစ်ချက် လင်းလက်သွားပြီး လီချင်းဟွာ၏ အနီးသို့ လျင်မြန်စွာ ရောက်ရှိလာကာ "ခွန်အား အမျိုးအစား ဖြစ်လည်း ကောင်းတာပဲ... ထိုက်ယန်တောင်မှာ ခွန်အား အမျိုးအစား အစွမ်းပိုင်ရှင်တွေ အများကြီး ရှိနေတော့ အနာဂတ်မှာ ခွန်အား အမျိုးအစား မျိုးရိုးဗီဇမျိုးစေ့တွေ အများကြီး လိုအပ်လာမှာ သေချာတယ်" ဟု ပြောလိုက်သည်။

"ဒီတစ်ကောင်ကို ငါ့ဆီ လွှဲထားလိုက်တော့... ဟိုဘက်မှာ နောက်တစ်ကောင် လာနေပြီ"

လီချင်းဟွာက ဘေးဘက်ရှိ ရေလွှမ်းမိုးနေသော နေရာသို့ အလျင်အမြန် ကြည့်လိုက်သည်။

အဝေးရှိ ရေပြင်ထက်တွင် ဒေါသတကြီး လှိမ့်တက်နေသော လှိုင်းလုံးများကြား၌ အပြာရောင် အလင်းတန်းများ တလက်လက် တောက်ပနေသည့် အကြည်ရောင် ဧရာမ ရေခူကြီး တစ်ကောင်က အလွန် လျင်မြန်သော အရှိန်ဖြင့် ချဉ်းကပ်လာနေသည်ကို တွေ့လိုက်ရလေတော့သည်။

(ရေခူ - ဂျယ်လီဖစ်ရှ်)

ဆက်ရန်...