အခန်း (၃၀၂)

အခန်း။ ၃၀၂

ထိုအရာက တကယ့်ကို ရက်စက်ကြမ်းကြုတ်သည့် အငြိုးအတေး တစ်ခုပင်။ ညစ်ညမ်းဇုန်အတွင်း၌ ရက်ပေါင်း ၂၀၀ ကျော် ကြာမြင့်အောင် နေထိုင်ခဲ့ရပြီးနောက် သူသည် မော့ကြည့်လိုက်တိုင်း ညစ်ညမ်းမှုများကိုသာ မြင်တွေ့နေရကာ ရှူရှိုက်လိုက်တိုင်း ညစ်ညမ်းမှုများကိုသာ ရှူသွင်းနေရသည်။ အိပ်စက်ချိန်မှာပင် သူ၏ စိတ်ဝိညာဉ်ကို အစွမ်းကုန် တင်းကျပ်ထားခဲ့ရသည်။

ဒီလိုမျိုး အခြေအနေတွေကို ကြုံတွေ့နေရတာတောင်မှ ဘယ်သူက အငြိုးအတေး မရှိဘဲ အေးအေးဆေးဆေး နေနိုင်မှာလဲ။

ရွှီရန်သည် ယခုအခါ အလွန်ပင် ဒေါသထွက်နေခဲ့သည်။ မူလက အစီအစဉ်မှာ ပန်းခြံအတွင်းသို့ ပြန်လာပြီး အနားယူရန် ဖြစ်သော်လည်း ယခုအခါ သဲကန္တာရ ကပ်ဘေးနတ်ဘုရား နှင့် ထိပ်တိုက်တိုးနေပြီဖြစ်ရာ ၎င်း၏ သေခြင်းတရားဖြင့်သာ သူ၏ ဒေါသကို ဖြေဖျောက်ရန် ဆုံးဖြတ်လိုက်တော့သည်။ ကန္တာရကပ်ဘေးနတ်ဘုရား၏ သွေးစွမ်းအင်မှာ ၃၄ သန်းအထိ ရှိနေသော်လည်း ယနေ့တွင်မူ ရွှီရန်အနေဖြင့် အသေအလဲ တိုက်ပွဲဝင်သွားရန် အသင့်ပင်။

ရွှီရန်၏ မျက်လုံးများမှာ စူးရှစွာ တောက်ပလာပြီး စက္ကူစစ်သူကြီးများမှာ ချက်ချင်းပင် အစိတ်အပိုင်းများအဖြစ် ကွဲထွက်သွားကာ သူ၏ ခန္ဓာကိုယ်တစ်ခုလုံးကို ဖုံးလွှမ်းသွားသည့် သိပ်သည်းလှသော ချပ်ဝတ်တန်ဆာအဖြစ် ပြောင်းလဲသွားခဲ့သည်။ ဦးထုပ်ဆောင်း၊ ဖီးနစ်တောင်ပံပုံ မျက်ခုံးအကာ၊ မျက်နှာဖုံး၊ လည်ပင်းအကာ၊ ရင်ဘတ်အကာ၊ ပုခက်ကာ၊ နှလုံးအကာ၊ ဝမ်းဗိုက်အကာ၊ ခါးအကာ၊ ရှေ့ချပ်ဝတ်၊ အနောက်မြီးပိုင်း၊ တံပိုးအကာ၊ ပေါင်အကာ... အစရှိသဖြင့် အစိတ်အပိုင်းအားလုံးမှာ စနစ်တကျ ရှိနေပြီး အပြည့်အစုံ လက်နက်တပ်ဆင်ထားသည့် ပုံစံမျိုးပင်။

စက္ကူပစ္စည်းများ၏ ကာကွယ်ရေးစွမ်းအားဖြင့် သွေးစွမ်းအင် ၁၅ သန်းရှိသော တိုက်ခိုက်မှုများကို ကြံ့ကြံ့ခံနိုင်ပြီး စိန်လက်နက် အဆောင်တံဆိပ်နှစ်ခု၏ အစွမ်းနှင့်ပေါင်းစပ်လိုက်ပါက သွေးစွမ်းအင် သန်း ၃၀ ရှိသော တိုက်ခိုက်မှုများကိုပင် ဟန့်တားနိုင်စွမ်း ရှိသည်။

ပြင်းထန်သော တိုက်ခိုက်မှုများအောက်တွင် အဆောင်တံဆိပ်များမှာ အလျင်အမြန် ကုန်ဆုံးသွားပေလိမ့်မည်။ သို့သော်ငြားလည်း ဤသည်မှာ အလွန်ပင် ခိုင်ခံ့လှသော အနေအထားပင်။

ရွှီရန်သည် သူ၏ကိုယ်ပေါ်တွင်လည်း စိန်လက်နက် အဆောင်တံဆိပ်နှစ်ခုကို ကပ်ထားရာ သူ၏ ကိုယ်ခန္ဓာကြံ့ခိုင်မှုမှာ သွေးစွမ်းအင် ၆ သန်းနှင့် ညီမျှသော တိုက်ခိုက်မှုများကို တောင့်ခံနိုင်စွမ်း ရှိနေခဲ့သည်။ ကိုယ်အင်္ဂါ အသစ်ပြန်လည်ဖြစ်ပေါ်ခြင်း၊ အလွန်အမင်း မြန်ဆန်သော ကုသမှု နှင့် ကုသခြင်း အဆောင်တံဆိပ်တို့၏ အကူအညီဖြင့် ကန္တာရကပ်ဘေးနတ်ဘုရားက သူ့ကို ပြင်းထန်စွာ ဒဏ်ရာရအောင် ပြုလုပ်နိုင်ခဲ့လျှင်တောင် သူသည် လျင်မြန်စွာ ပြန်လည်ကျန်းမာလာနိုင်သည်။

ဤတိုက်ပွဲတွင် ရွှီရန်၏ အစွမ်းမှာ သွေးစွမ်းအင် သန်း ၃၀ ခန့်အထိသာ အမြင့်ဆုံး ရှိသော်လည်း ကန္တာရကပ်ဘေးနတ်ဘုရားမှာ သန်း ၃၀ ထက် ကျော်လွန်နေခဲ့သည်။ သို့သော် ခါးသီးပြင်းထန်သော တိုက်ပွဲမျိုးတွင်မူ သူသည် ယှဉ်ပြိုင်နိုင်စွမ်း ရှိနေဆဲပင်။ သွေးစွမ်းအင် ၄ သန်းခန့် ကွာဟချက်မှာ ရွှီရန်အတွက် ပေါ့ပေါ့ပါးပါးသာဖြစ်ပြီး ၎င်းမှာ ရက်ပေါင်း ၂၀၀ တိုင်တိုင် စုဆောင်းထားခဲ့သော သူ၏ အားအင်များကို သံမဏိစစ်စစ်အဖြစ်သို့ သွေးယူပြောင်းလဲပေးမည့် ပန်းပဲဖိုကြီးသဖွယ် ဖြစ်ပေတော့သည်။

ထို့ကြောင့်ပင် ရွှီရန်အတွက်တော့ သူ၏ စိတ်အတွင်းမှ အငြိုးအတေးများကို ဖွင့်ထုတရန်ဖြစ်စေ သူကိုယ်ကိုယ် သွေးယူရန်ဖြစ်စေ သဲကန္တာရ ကပ်ဘေးနတ်ဘုရား နှင့် အသေအလဲ တိုက်ပွဲဝင်ရန် ဆုံးဖြတ်ချက် ခိုင်မာနေခဲ့ပြီ ဖြစ်သည်။

ရွှီရန်က ခပ်ဖွဖွ ပြုံးလိုက်သည်။ သူ၏ မျက်ဝန်းများမှာ တည်ငြိမ်လွန်းလှ၏။ သူ ဝတ်ဆင်ထားသော နက်မှောင်လှသည့် ချပ်ဝတ်တန်ဆာမှာ နှစ်ပေါင်းထောင်ချီသော အချိန်ကာလများကို ဖြတ်သန်းလာခဲ့ပြီး အဆုံးမရှိသော ညပေါင်းများစွာကို ဝါးမြိုထားသကဲ့သို့ပင် အရှိန်အဝါ ပြင်းနေသည်။ သူ၏ ခန္ဓာကိုယ်မှာ ချပ်ဝတ်တန်ဆာ၏ အောက်တွင် လုံးဝကွယ်ပျောက်နေပြီး ထိုချပ်ဝတ်၏ အမည်းရောင်မှာ အေးစက်ကာ မာကျောလှသော အထိအတွေ့မျိုးကို ပေးစွမ်းနေသည်။ သူသည် ရှေ့သို့ ဖြည်းညှင်းစွာ လှမ်းတက်လိုက်ရာ သူ၏ လှုပ်ရှားမှုနှင့်အတူ ချပ်ဝတ်မှာလည်း တလှုပ်လှုပ်နှင့် ယိမ်းနွဲ့နေခဲ့သည်။

ထိုခြေလှမ်းများမှာ အလွန်ပင် ခန့်ညားထည်ဝါသည်။ တိုက်ပွဲပေါင်း ရာချီ၍ အောင်နိုင်ခဲ့သော စစ်သူကြီးတစ်ဦးကဲ့သို့ပင် ကျားခြေလှမ်းများဖြင့် လျှောက်လှမ်းနေပြီး တဟုန်ထိုး တက်လာသော အနီရောင်အရှိန်အဝါများကြောင့် ကန္တာရကပ်ဘေးနတ်ဘုရား၏ နှလုံးသားမှာပင် တုန်လှုပ်သွားခဲ့ရသည်။ ၎င်းသည် ခန့်မှန်းရခက်လှသော ဘေးအန္တရာယ်တစ်ခု အနီးသို့ ရောက်ရှိလာနေခြင်းကို ပိုမို၍ ခံစားလာရသည်။ ထိုခံစားချက်မှာ ၎င်း၏ ခန္ဓာကိုယ်အတွင်းမှပင် ပေါက်ဖွားလာသကဲ့သို့ပင် လျှို့ဝှက်ဆန်းကြယ်သည်။

အမှန်တကယ်ပင် လျှို့ဝှက်ဆန်းကြယ်လွန်းသည်။ ကန္တာရကပ်ဘေးနတ်ဘုရားမှာ ဤအချက်ကို မယုံကြည်နိုင်ပေ။

သူက တကယ်တော့ ဘယ်လောက်အထိတောင် အစွမ်းထက်နေတာလဲ။

အခုတော့ ငါ့လို မြင့်မြတ်တဲ့ တည်ရှိမှုကြီးက သာမန်လူသားတစ်ယောက်ကြောင့် ကြောက်ရွံ့မှုကို ခံစားနေရတာလား။

၎င်းက အေးစက်စက်ပင် လှောင်ပြုံးပြုံးလိုက်သည်။ ငါးမီတာခန့် မြင့်မားသော ကင်းမြီးကောက် ခန္ဓာကိုယ်မှာ တိုက်ပွဲဝင် အနေအထားသို့ ပြောင်းလဲသွားပြီး အမြီးရှိ အဆိပ်ဆူးမှာ အဆိပ်ပြင်းမြွေ တစ်ကောင်ကဲ့သို့ ကွေးညွတ်လျက် အသင့်ရှိနေခဲ့သည်။

၎င်း၏ ဘယ်ဘက်လက်ဖဝါးပေါ်တွင်မူ ဧရာမ သွေးမျက်လုံး ကြီးတစ်လုံး ပွင့်လာခဲ့တော့သည်။ ၎င်း၏ ညာဘက်လက်သည် ဧရာမ စစ်သုံးဓား ကြီးတစ်လက်ကို သူ၏ရှေ့တွင် အလျားလိုက် ကိုင်စွဲထားသည်။ ရွှီရန်က အရှိန်မြှင့်လိုက်သည်။ ခြေလှမ်းတိုင်းမှာ တစ်လှမ်းထက်တစ်လှမ်း ပိုမိုမြန်ဆန်လာပြီး သူ၏ နက်မှောင်လှသော ချပ်ဝတ်တန်ဆာမှာမူ ရိုက်ခတ်မှုများအောက်တွင်ပင် တည်ငြိမ်တိတ်ဆိတ်နေဆဲပင်။

“ဘယ်လောက်တောင် ရဲတင်းတာလဲ။ လူသားအဆင့်လေးနဲ့ ဒီနတ်ဘုရားကို တိုက်ခိုက်ဖို့ ကြံစည်နေတာလား။ ငါ့ရဲ့ သတ်ဖြတ်မှု သတင်းကျော်ကြားချက်တွေက မင်းအတွက် မလုံလောက်သေးလို့လား”

ရွှီရန်က အနက်ရောင်အရိပ်တစ်ခုအဖြစ် ပြောင်းလဲကာ သူဆီသို့ ဒုန်းစိုင်းပြေးဝင်လာသည်ကို မြင်လိုက်ရသောအခါ သဲကန္တာရ ကပ်ဘေးနတ်ဘုရားက နှာခေါင်းရှုံ့လိုက်သည်။ ရွှီရန်က ၎င်းကို ဘေးအန္တရာယ်တစ်ခုကဲ့သို့ အနည်းငယ် ခံစားရစေသော်လည်း ၎င်းမှာ ကင်းမြီးကောက် တစ်ကောင်နှင့် တွေ့ဆုံရသကဲ့သို့ ထူးဆန်းသော ခံစားချက်မျိုးသာ ဖြစ်သည်။ လူသားတစ်ဦးသည် ကင်းမြီးကောက်နှင့်တွေ့ပါက စက်ဆုပ်ရွံရှာမှုကို ခံစားရနိုင်သော်လည်း ထိုကင်းမြီးကောက်ကောင်ကို မသတ်နိုင်ဘဲ နေပါ့မလား။

ကင်းမြီးကောက်လေးတစ်ကောင်သာ ဖြစ်၍ အလွယ်တကူပင် နင်းခြေပစ်နိုင်၏။

ကန္တာရကပ်ဘေးနတ်ဘုရား၏ ခြေလက်အင်္ဂါများမှာ လျင်မြန်စွာ လှုပ်ရှားလာပြီး ပတ်ဝန်းကျင်၌ လေပွေများ ဝဲလည်လာကာ သဲမုန်တိုင်းကြီးနှင့်အတူ ရွှီရန်ဆီသို့ ဦးတည်ဝင်ရောက်ခဲ့သည်။

ရွှီရန်က သူ၏ဓားကို ဆွဲထုတ်လိုက်သည်။ အဆင့်မြင့် ရှည်လျားသော ဓားနှင့် ကန္တာရကပ်ဘေးနတ်ဘုရား၏ ညာဘက်လက်သည်းမှ ဖန်တီးထားသော ဧရာမဓားကြီးတို့ ထိပ်တိုက်တွေ့ဆုံသွားခဲ့သည်။ ၎င်း၏ ညာဘက်လက်သည်းမှာ မူလက ကင်းမြီးကောက်၏ လက်မဖြစ်သော်လည်း ယခုအခါ တိုက်ပွဲဝင်ရန်အတွက် ဓားတစ်လက်အဖြစ်သို့ ပြောင်းလဲတိုးတက်လာခဲ့ခြင်းပင်။

သုံးမီတာခန့် ရှည်လျားသော ဓား၊ ပါးလွှာသော်လည်း ထက်မြက်ကာ လေးလံလှပြီး၊ ဓားသွားပေါ်တွင် ရွှီရန်၏ မျက်နှာသွင်ပြင်မှာ အရိပ်ထင်ဟပ်နေခဲ့သည်။

“ဝုန်း”

မီးပွားများ လွင့်စင်သွားခဲ့သည်။ ထိုခဏချင်းမှာပင် ရွှီရန်၏ ခန္ဓာကိုယ်အတွင်းရှိ သွေးစွမ်းအင် များမှာ တဟုန်ထိုး လှုပ်ရှားလာခဲ့သည်။ သူ၏ ကိုယ်ခန္ဓာကြံ့ခိုင်မှုမှာ သွေးစွမ်းအင် ၆ သန်းအထိရှိသော တိုက်ခိုက်မှုများကို အားတင်း၍ တောင့်ခံနိုင်စွမ်းရှိသော်လည်း တစ်ဖက်ရန်သူမှာ သွေးစွမ်းအင် ၃၄ သန်း အထိ ရှိနေသည်။ ၎င်းမှာ ၆ သန်းထက် ၅ ဆမက သာလွန်နေခြင်းပင်။

ဆူနာမီလှိုင်းလုံးကြီးတစ်ခုကဲ့သို့ ကြောက်မက်ဖွယ်ကောင်းလှသော အင်အားစုမှာ ရွှီရန်၏ ခန္ဓာကိုယ်ကို ပြင်းထန်စွာ ရိုက်ခတ်သွားခဲ့သည်။ ထိုအခိုက်အတန့်တွင် ရွှီရန်မှာ လှိုင်းလုံးကြီးများ၏ တိုက်စားမှုကို ခံနေရသည့် တာတမံတစ်ခုကဲ့သို့ ဖြစ်နေပြီး မည်သည့်အချိန်တွင်မဆို ဖုန်မှုန့်အဖြစ်သို့ ကြေပျက်သွားနိုင်သည့် အခြေအနေတွင် ရှိနေခဲ့သည်။

သို့သော် ထိုကြောက်မက်ဖွယ် ရိုက်ခတ်မှုအလယ်တွင် ရွှီရန်၏ မျက်လုံးများမှာ စူးရှစွာ တောက်ပလာခဲ့သည်။ သူသည် ချက်ချင်းလက်ငင်း အသတ်ခံရတော့မည့် အခြေအနေသို့ ရောက်ရှိလုနီးပါး ဖြစ်ခဲ့ရသော်လည်း အလွန်အရေးကြီးသော ထိုခဏတွင် ရွှီရန်သည် ဉာဏ်အလင်းပွင့်သွားသကဲ့သို့ တစ်စုံတစ်ခုကို ရုတ်တရက် နားလည်သဘောပေါက်သွားခဲ့သည်။ သူ၏ စိတ်ထဲတွင် လုံးဝအသစ်စက်စက်ဖြစ်သော တိုက်ပွဲဝင် နည်းဗျူဟာတစ်ခု ပေါ်ပေါက်လာခဲ့သည်။

သူ၏ ခန္ဓာကိုယ်မှ တောက်ပလှသော ရွှေရောင်အလင်းတန်းများ ထွက်ပေါ်လာပြီး တစ်ကိုယ်လုံးမှာ ရွှေစစ်စစ်ဖြင့် သွန်းလုပ်ထားသကဲ့သို့ ရွှေရောင်ဝင်းလက်သွားခဲ့သည်။ ယခုအခါ သူသည် ဆူနာမီလှိုင်းလုံးကြီးများအကြားတွင် တုန်လှုပ်ခြင်းမရှိသော ကျောက်ဆောင်ကြီးတစ်ခုကဲ့သို့ တည်ငြိမ်နေပြီး အဆုံးမရှိသော လှိုင်းလုံးကြီးများမှာလည်း သူ၏ခန္ဓာကိုယ်ကို တောင်ကုန်းတစ်ခုအား ခပ်ဖွဖွပွတ်တိုက်သွားသော လေပြေလေညင်းများအလား ဘာမှမထိခိုက်စေနိုင်တော့ပေ။

[ဂုဏ်ယူပါသည်။ သင်သည် ပြင်းထန်လှသော တိုက်ပွဲဖိအားအောက်တွင် ဉာဏ်အလင်းပွင့်ခဲ့ပြီး အံ့မခန်း မှော်စွမ်းရည် အသစ်တစ်ခုကို ရှာဖွေတွေ့ရှိခဲ့သည်။ ရွှေရောင်အလင်းတံဆိပ်စွမ်းရည်မှာ ကိုယ့်၏ သွေးစွမ်းအင် အနည်းငယ်ကို အထောက်အပံ့အဖြစ် အသုံးပြုကာ တစ်ကိုယ်လုံးကို ဖုံးလွှမ်းနိုင်သော ရွှေရောင်ချပ်ဝတ်ကို ဆင့်ခေါ်နိုင်ပြီး သေစေနိုင်လောက်သော တိုက်ခိုက်မှုများကို ကြံ့ကြံ့ခံနိုင်စေသည်။ ဤအတတ်ပညာမှာ အလွန်ပင် ကျွမ်းကျင်နက်ရှိုင်းလှသော ကာကွယ်ရေးဆိုင်ရာ နတ်ဘုရားစွမ်းရည် ဖြစ်ပြီး အားနည်းသူက အားသာသူကို အနိုင်ယူရန်အတွက် အသုံးများသည်]

ရွှီရန်မှာ မှင်သက်သွားရပြီးနောက် ဝမ်းမြောက်ဝမ်းသာ ဖြစ်သွားခဲ့ရ၏။ သဲကန္တာရ ကပ်ဘေးနတ်ဘုရား မှာမူ အလွန်ပင် တုန်လှုပ်သွားခဲ့သည်။

"ဒါကို ဘယ်လိုလုပ်ပြီး ခုခံနိုင်သွားတာလဲ"

ထိုတိုက်ခိုက်မှု၏ ကြောက်မက်ဖွယ် ဖျက်ဆီးနိုင်စွမ်းမှာ ရွှီရန်ကို အပိုင်းပိုင်းအစစ ဆွဲဖြဲပစ်ရန် လုံလောက်နေခဲ့သည်။ ကန္တာရကပ်ဘေးနတ်ဘုရားမှာ ထိတ်လန့်တုန်လှုပ်နေခဲ့ပြီး ၎င်း၏ စက်ဆုပ်ဖွယ်ကောင်းလှသော အစိမ်းရောင် မျက်နှာထက်တွင်မူ တွေဝေဝါးဝါး ဖြစ်နေသည့် အရိပ်အယောင်များ ထင်ဟပ်နေခဲ့သည်။

ရွှီရန်က အားရပါးရ ရယ်မောလိုက်ပြီး “သိပ်ကောင်းတာပဲ” ဟု ပြောလိုက်သည်။ ဤနတ်ဘုရားစွမ်းရည်နှင့်ဆိုလျှင် ထိပ်တိုက်ရင်ဆိုင်မှုများတွင် သူသည် ပို၍ပင် အနိုင်မရနိုင်သော ပုဂ္ဂိုလ်တစ်ဦး ဖြစ်လာပေလိမ့်မည်။ ထို့ကြောင့်ပင် ရွှီရန်သည် လက်စွပ်ပုံစံဦးခေါင်းပါသော ဓား ကို လက်နှစ်ဖက်ဖြင့် ကျစ်ကျစ်ပါအောင် ဆုပ်ကိုင်လျက် ကန္တာရကပ်ဘေးနတ်ဘုရားဆီသို့ ပြင်းထန်စွာ ခုန်အုပ်လိုက်တော့သည်။

ကန္တာရကပ်ဘေးနတ်ဘုရားမှာ အလွန်ပင် လျင်မြန်လှပေရာ ရွှီရန်၏ ဓားလမ်းကြောင်းကို သူ၏ ဓားဖြင့် အပေါ်သို့ ပင့်တင်ကာ လျှပ်တစ်ပြက် ခုခံလိုက်သည်။ သို့သော် ရွှီရန်က နည်းဗျူဟာကို ရုတ်တရက် ပြောင်းလဲလိုက်သည်။ သူ၏လက်ထဲရှိ ဖြောင့်စင်းသော ဓားရှည်မှာ အသက်ဝင်လာသကဲ့သို့ ဖြစ်သွားပြီး ခွေနေသော အဆိပ်ပြင်းမြွေ တစ်ကောင်အဖြစ်သို့ ပြောင်းလဲကာ ကန္တာရကပ်ဘေးနတ်ဘုရား၏ ဧရာမဓားကြီးကို ကျော်ဖြတ်လျက် ၎င်း၏ မျက်နှာဆီသို့ အရှိန်အဟုန်ဖြင့် တိုးဝင်သွားခဲ့တော့သည်။