အခန်း (၉၃-၉၄)

အခန်း (၉၃) စေ့စပ်ထားသူတွေ သဘောထားကွဲလွဲနေတာလား... ကြက်သွန်မြိတ်ကြီးတွေပဲ...

ဤစကားများကို ပြောလိုက်သည်နှင့် တပြိုင်နက် အစစ်အမှန်ပုဂ္ဂိုလ်ထျန်ယွီနှင့် ကျောင်းတော်၏ အကြီးအကဲများသည် ချက်ချင်းဆိုသလိုပင် သူတို့၏နှလုံးသားများထဲ၌ ထိတ်လန့်တုန်လှုပ်သွားကြသည်။

ကောင်းကင်ဘုံအနှစ်သာရကျောင်းတော်၏ အနောက်ဘက်တောင်တန်းတွင် ပုန်းကွယ်နေသော ကောင်းကင်ဘုံယဇ်ပလ္လင် အကြောင်းကို သူတို့ သဘာဝကျကျ သိထားကြသည်။

ယခုချိန်၌ ဤတပည့် ပြောဆိုသည်ကို ကြားလိုက်ရသောအခါ ကိစ္စရပ်များသည် တိုက်ဆိုင်လွန်းနေပုံရလေ၏။

မုဟောက် သည် လွန်ခဲ့သော အချိန်သိပ်မကြာခင်ကမှ အနောက်ဘက်တောင်တန်းသို့ ဝင်ရောက်သွားခဲ့ပြီး ထိုနေရာအတွင်းတွင် ပုန်းကွယ်နေသော ကောင်းကင်ဘုံယဇ်ပလ္လင်က အသက်ဝင်လာခဲ့သည်။

အကယ်၍ ထိုအရာကို မုဟောက်က မဖြစ်ပေါ်စေခဲ့လျှင် တစ်စုံတစ်ခုက အမှန်တကယ်ကို မှားယွင်းနေလေပြီ။

"မုဟောက်... သူက အနောက်ဘက်တောင်တန်းထဲကို ဝင်သွားတာလား..."

အနီးအနားတွင် ရပ်နေသော နာလန်ချိုးရန်၏ မျက်နှာပေါ်တွင်လည်း မယုံကြည်နိုင်သော အမူအယာတစ်ခု ရှိနေသည်။

သူမ၏စေ့စပ်ထားသူထံတွင် မည်သည့် ပါရမီမျိုးရှိကြောင်းကို သူမ အတိအကျ သိရှိထားသည်။

ထိုသို့သော ကောင်းကင်ဘုံ ထူးဆန်းသည့် သဘာဝလွန်ဖြစ်စဉ်ကို ဖြစ်ပေါ်စေရန် သူ မည်သည့်နေရာမှ နည်းလမ်းများ ရရှိခဲ့သည်ကို သူမ စဉ်းစား၍မရနိုင်ပေ။

.........

ကောင်းကင်ဘုံအနှစ်သာရကျောင်းတော်၏ အနောက်ဘက်တောင်တန်း၌....

တုန်လှုပ်ချောက်ချား အင်မော်တယ်သည် ကောင်းကင်ဘုံ ယဇ်ပလ္လင်ကို အသက်သွင်းလိုက်သည်နှင့်အမျှ...

ထိုအရာမှ ပေါက်ကွဲထွက်လာသော ဥပဒေသ မှော်စာလုံးများသည် နတ်ဘုရားမြူခိုးများအဖြစ် ပြောင်းလဲသွားပြီး တုန်လှုပ်ချောက်ချား အင်မော်တယ်ကို လုံးလုံးလျားလျား လွှမ်းခြုံသွားလေသည်။

"နောက်တစ်ခုက... ကောင်းကင်လမ်းကြောင်း အစ်မ နဲ့ ဆက်သွယ်ဖို့ အောင်မြင်သွားသရွေ့... ပြဿနာ အားလုံး ပြေလည်သွားလိမ့်မယ်..."

"ငါ ဆန္ဒရှိသရွေ့ ဒီကောင်းကင်ဘုံအနှစ်သာရကျောင်းတော်... မဟုတ်ဘူး... ကောင်းကင်ဘုံ တာအိုနယ်မြေ တစ်ခုလုံးက သူတော်စင်နန်းတော်တွေ အားလုံးက ငါ့ကို အညံ့ခံလိမ့်မယ်..."

ကောင်းကင်ဘုံ တာအိုနယ်မြေရှိ သူတော်စင်နန်းတော် အများအပြားကို မူလက ကောင်းကင်တာအိုက ဖန်တီးထားခဲ့ခြင်းဖြစ်သည်။

သူသည် ကိုးရောင်ခြယ်အင်မော်တယ်သွေး၏ အထူးသွေးမျိုးဆက်ကို ပိုင်ဆိုင်ထားသောကြောင့်....

ကောင်းကင်ဘုံ တာအိုနယ်မြေ၏ ကောင်းကင်တာအိုနှင့် သူ၏ ဆက်ဆံရေးသည် ထူးကဲပြီး ရင်းနှီးသည်ဟုပင် ဆိုနိုင်ပေ၏။

ကောင်းကင်တာအိုနှင့် အဆက်အသွယ် အောင်မြင်စွာ တည်ဆောက်နိုင်ပြီး အကူအညီကို ရရှိသရွေ့...

သူ မြင့်တက်လာမည့် လမ်းကြောင်းသည် ချောမွေ့သော လမ်းကြောင်းတစ်ခု ဖြစ်လာပေလိမ့်မည်။

သို့သော် သူ၏ လှပသော စိတ်ကူးယဉ်မှုထဲတွင် နစ်မျောနေစဉ်မှာပင်....

ခရက်...

ကြည်လင်ပြတ်သားသော အက်ကွဲသံတစ်ခုနှင့်အတူ ကောင်းကင်ဘုံယဇ်ပလ္လင်သည် ဝုန်းခနဲအသံတစ်သံနှင့်အတူ ကြေမွှပျက်စီးသွားသည်။

အောင်မြင်စွာ တည်ဆောက်တော့မည့် ပဲ့တင်ထပ်သော တံတားသည်လည်း ရလဒ်အနေဖြင့် ပြိုလဲသွားလေ၏။

"ဒါက..."

ကောင်းကင်ဘုံ ယဇ်ပလ္လင်သည် အပျက်အစီးပုံ တစ်ခုအဖြစ် ပြောင်းလဲသွားသည်ကို မြင်သောအခါ တုန်လှုပ်ချောက်ချား အင်မော်တယ် လုံးလုံးလျားလျား ဆွံ့အသွားသည်။

အချိန်တခဏကြာ တွေဝေမိန်းမောသွားပြီးနောက် တုန်လှုပ်ချောက်ချားအင်မော်တယ်ကဒေါသတကြီးဖြင့် အံ့တင်းတင်းကြိတ်လိုက်သည်။

"ကျစ်... ဒီကောင်းကင်ဘုံအနှစ်သာရကျောင်းတော်က ကောင်တွေက ကောင်းကင်ဘုံ ယဇ်ပလ္လင်ကို အချိန်အတော်ကြာအောင် ပြုပြင်ထိန်းသိမ်းမှု မလုပ်ထားလို့ အဲ့ဒါက ကိုးရောင်ခြယ်အင်မော်တယ်သွေးရဲ့ စွမ်းအားကို တောင့်မခံနိုင်တာ သေချာတယ်..."

တုန်လှုပ်ချောက်ချား အင်မော်တယ်သည် နေရာအနှံ့အပြား၌ ပြန့်ကျဲနေသော အပျက်အစီးများကို ဒေါသတကြီး ကန်ထုတ်လိုက်သည်။

သူသည် ထိုအရာနှင့် အလွန်နီးစပ်နေခဲ့ကာ ကောင်းကင်တာအိုနှင့် အဆက်အသွယ်ကို အောင်မြင်စွာ တည်ဆောက်နိုင်တော့ပေမည်။

သို့သော် ထိုကဲ့သို့ မမျှော်လင့်ထားသည့် အဖြစ်အပျက် အပြောင်းအလဲတစ်ခု ဖြစ်ပေါ်လာခဲ့သည်။

သို့သော် သူ၏ဒေါသကို ဆက်၍မထုတ်လွှတ်နိုင်မီ သူ၏နောက်မှ ကျယ်လောင်သော အော်ဟစ်သံတစ်သံ ရုတ်တရက် ထွက်ပေါ်လာသည်။

"မုဟောက်... မင်း ဘာလုပ်နေတာလဲ..."

နောက်ထပ်အချိန်တခဏတွင် ကောင်းကင်ဘုံအနှစ်သာရကျောင်းတော်မှ အကြီးအကဲတစ်စုကို ဦးဆောင်လာသော အစစ်အမှန်ပုဂ္ဂိုလ်ထျန်ယွီ ရောက်ရှိလာသည်။

အပျက်အစီးပုံတစ်ခုအဖြစ် ပြောင်းလဲသွားသော ကောင်းကင်ဘုံ ယဇ်ပလ္လင်ကို သူတို့ မြင်တွေ့ချိန်၌....

အစစ်အမှန်ပုဂ္ဂိုလ်ထျန်ယွီနှင့် ကျောင်းတော်၏ အကြီးအကဲများသည် အလွန်အမင်း ဒေါသထွက်နေကြပြီး သူတို့၏မျက်လုံးများမှ မီးတောက်များ ပျံ့လွင့်လာတော့မည့်ပုံပေါက်နေသည်။

ဤမုဟောက်သည် အမှန်တကယ်ကို လူယုတ်မာ တစ်ယောက်ပင်။

ကောင်းကင်ဘုံ ယဇ်ပလ္လင်သည် သူတို့ ကောင်းကင်ဘုံအနှစ်သာရကျောင်းတော်၏ မြင့်မြတ်သော ရတနာတစ်ခု ဖြစ်သည်။

ထိုအရာသည် သူတို့၏ ကောင်းကင်ဘုံအနှစ်သာရကျောင်းတော်အတွက် ကောင်းကင်တာအိုနှင့် ပဲ့တင်ထပ်ရန် တစ်ခုတည်းသော နည်းလမ်းလည်း ဖြစ်ပေ၏။

ထိုယဇ်ပလ္လင်ကို ခေတ်ကာလများစွာကြာအောင် အသုံးမပြုခဲ့သော်လည်း ထိုအရာသည် သူတို့ ကောင်းကင်ဘုံအနှစ်သာရကျောင်းတော်၏ မြင့်မြတ်သော ရတနာတစ်ခု ဖြစ်နေဆဲပင်။

ယခုချိန်၌ ထိုအရာကို ဤလူယုတ်မာမုဟောက် က အပျက်အစီးပုံတစ်ခုအဖြစ် ပြောင်းလဲလိုက်လေပြီ။

သို့သော် ထူးဆန်းသည်မှာ လူအများ ရောက်လာသည်ကို မုဟောက် ရှင်းရှင်းလင်းလင်း မြင်တွေ့ပြီးနောက် သူသည် နောင်တရသည့် အရိပ်အယောင် မပြသရုံသာမက....

ထိုအစား သူသည် အထင်သေးနေပုံရပြီး သူ၏ နှာခေါင်းများ ကောင်းကင်သို့ထိလုမတတ် ခေါင်းမော့ထားသည်။

သူ၏မျက်နှာပေါ်တွင် "ငါ ဖျက်ဆီးလိုက်တာလေ... အဲဒီတော့ ဘာဖြစ်လဲ" ဟူသော စကားစုတစ်ခုကို ပွင့်ပွင့်လင်းလင်း ရေးထားသည့်အလားပင်။

"ဒီကောင်က မုဟောက် လား..."

သူတို့နှင့်အတူ ရောက်ရှိလာသော ခုံးဝူတောက်သည်လည်း တစ်ဖက်လူကို သတိပြုမိသွားသည်။

သူ၏အကြည့်အောက်တွင် စနစ် အချက်အလက်ဇယားတစ်ခုသည် မုဟောက်၏ ခေါင်းအထက်တွင် ထွက်ပေါ်လာသည်။

[အမည်: တုန်လှုပ်ချောက်ချား အင်မော်တယ် (အမည်ရင်း)]

[ကိုယ်ပိုင်အမှတ်အသား: ပုံမှန်မဟုတ်သော ကောင်းကင်ကံကြမ္မာပိုင်ရှင်...ပြန်လည်မွေးဖွားလာသော ကောင်းကင်ကံကြမ္မာ မဟာဧကရာဇ်.. ကောင်းကင်တာအို၏သားတော်]

[နယ်ပယ်: ဟင်းလင်းပြင်သန့်စင်ခြင်းနယ်ပယ် အဆင့်တစ်]

[ရုပ်ခန္ဓာကိုယ်: ကိုးရောင်ခြယ် အင်မော်တယ် သွေး (ချိတ်ပိတ်ခံထားရသည်)၊ မိုးပြာသူတော်စင်ရုပ်ခန္ဓာကိုယ် (မနိုးထသေး)]

[ကျင့်စဉ်: အလင်းကိုးဖြာ ဧကရာဇ် ကျမ်းစာ နက်နဲသိမ်မွေ့ကိုးထပ် နတ်ဘုရားနည်းစနစ် နက်နဲသိမ်မွေ့ အဝါရောင်တာအိုနည်းစနစ်...]

[ရတနာများ: မရှိပါ]

[လက်ရှိ ကောင်းကင်အမိန့်တော်အမှတ်: ၂၅၀၀၀]

တုန်လှုပ်ချောက်ချား အင်မော်တယ်လား...

ဤအမည်ကို မြင်သောအခါ ခုံးဝူတောက်၏ မျက်ခုံးများ အနည်းငယ် မြင့်တက်သွားသည်။

အကယ်၍ တစ်ယောက်ယောက်က ကောင်းကင်ဘုံ တာအိုနယ်မြေအကြောင်း ပြောမည်ဆိုလျှင် သူတို့သည် တုန်လှုပ်ချောက်ချား အင်မော်တယ်ကို သေချာပေါက် တွေးတောမိကြပေလိမ့်မည်။

မည်သို့ပင်ဆိုစေကာမူ ဤလူသည် မရေမတွက်နိုင်သော နှစ်ကာလများတလျှောက် ကောင်းကင်ဘုံ တာအိုနယ်မြေမှ ထွက်ပေါ်လာသည့် တစ်ဦးတည်းသော ကောင်းကင်ကံကြမ္မာ မဟာဧကရာဇ်ပင်။

ဤကောင်းကင်ကံကြမ္မာ မဟာဧကရာဇ်သည် ဧကရာဇ်ကျဆုံးခြင်းခေတ်တွင် သေဆုံးသွားပြီဖြစ်ကြောင်း ကောလာဟလများ ရှိလေ၏။

တစ်ဖက်လူက ဤခေတ်ကာလတွင် ပူးကပ်ပြီး ပြန်လည်မွေးဖွားခြင်းကို ခံစားရလိမ့်မည်ဟု သူ မမျှော်လင့်ထားခဲ့ပေ။

ထို့ပြင် တစ်ဖက်လူထံတွင် ကောင်းကင်အမိန့်တော်အမှတ်နှစ်သောင်းကျော် အမှန်တကယ် ရှိနေသည်။

ဤသည်မှာ ယခုအချိန်အထိ 'ကြက်သွန်မြိတ်' တစ်ကောင်ပေါ်တွင် သူ မြင်တွေ့ခဲ့ရသမျှ အများဆုံး ကောင်းကင်အမိန့်တော်အမှတ်များပင်။

တစ်ဖက်လူထံတွင် ကြီးမားသော အခွင့်အရေး တစ်ခု ပုန်းကွယ်နေမည်မှာ ထည့်ပြောနေရန်ပင် မလိုတော့ချေ။

ခုံးဝူတောက်၏အကြည့်ကို အာရုံခံမိသည့်အလား...

တုန်လှုပ်ချောက်ချား အင်မော်တယ်သည် သူ၏ အကြည့်ကို မည်သည့် အကြောက်တရားမှ မရှိဘဲ ရင်ဆိုင်လိုက်သည်။

သို့သော် ခုံးဝူတောက်၏နံဘေးတွင် မတ်တတ်ရပ်နေသော နာလန်ချိုးရန်ကို သူ မြင်တွေ့ချိန်၌ သူသည် တွေဝေမိန်းမောမသွားဘဲ မနေနိုင်ခဲ့ချေ။

သူသည် မုဟောက်၏ မှတ်ဉာဏ်များအားလုံးကို ရရှိပြီးပြီဖြစ်ရာ နာလန်ချိုးရန်သည် သူ၏ စေ့စပ်ထားသူဖြစ်ကြောင်း သဘာဝကျကျ သိရှိထားသည်။

သို့သော် ယခုချိန်၌ သူ၏စေ့စပ်ထားသူ သည် တခြားအမျိုးသားတစ်ဦး၏နံဘေးတွင် အစေခံ တစ်ယောက်ကဲ့သို့ ရိုသေလေးစားစွာ မတ်တတ်ရပ်နေသည်။

ထို့ပြင် ထိုလူသည် သူ၏ယခင်ဘဝက ရန်သူပင်။

အစောပိုင်းက သူ၏ ခေါင်းပေါ်တွင် တစ်ခုခု ပိုနေသကဲ့သို့ အဘယ်ကြောင့် ခံစားရသည်ကို ယခုမှ သူ နားလည်သွားခဲ့သည်။

ထိုအရာက ချိုတပ်ခံရသော ဦးထုပ်တစ်လုံး ဖြစ်နေခြင်းပင်။

သူ၏ယခင်ဘဝတွင် မည်သို့ပင်ဆိုစေကာမူ သူသည် တစ်ပါးတည်းသောနှင့် အမြင့်မြတ်ဆုံး ကောင်းကင်ကံကြမ္မာ မဟာဧကရာဇ် ဖြစ်ခဲ့ရာ ထိုကဲ့သို့အရှက်ခွဲမှုကို သူ မည်သည့်အချိန်ကမျှ မခံစားခဲ့ရဖူးချေ။

"နာလန်ချိုးရန်... ငါ့ရဲ့စေ့စပ်ထားသူအနေနဲ့ မင်းက အခု အစေခံတစ်ယောက်လို တောသားတစ်ကောင်ရဲ့ နောက်ကို လိုက်နေတာလား..."

တုန်လှုပ်ချောက်ချား အင်မော်တယ်က ဒေါသတကြီး အော်ဟစ်လိုက်သည်။

"မင်းမှာ အရှက်ဆိုတာ ရှိသေးရဲ့လား..."

ဤရုတ်တရက် စကားများက ထိုနေရာရှိ လူတိုင်းကို အငိုက်ဖမ်းခံလိုက်ရပြီး သူတို့သည် ထိုနေရာတွင် ချက်ချင်းအေးခဲတောင့်တင်းသွားကြသည်။

အထူးသဖြင့် အကြောင်းအရင်းမရှိဘဲ ဆဲဆိုခြင်း ခံလိုက်ရသော နာလန်ချိုးရန်သည် ပို၍ပင် စိတ်ရှုပ်ထွေးသွားပေ၏။

သူမကို မျက်လုံးချင်းဆုံရန်ပင် မဝံ့ရဲသော မုဟောက်သည် ယနေ့၌ သူမကို လူသိရှင်ကြား စော်ကားလိမ့်မည်ဟု သူမ လုံးဝမျှော်လင့်မထားခဲ့ပေ။

"မုဟောက်... ငါ့ကို အသရေဖျက်တာ ရပ်လိုက်စမ်း..."

နာလန်ချိုးရန်ကလည်း ဒေါသတကြီး တုံ့ပြန်လိုက်သည်။

"နတ်ဘုရားသားတော်နဲ့ ငါက ဖြူစင်တယ်... ဘာမှ မဖြစ်ခဲ့ဘူး..."

"နတ်ဘုရားသားတော် အတွက် လမ်းပြ လုပ်ပေးဖို့ ငါကိုယ်တိုင် ငါ့ရဲ့ဆန္ဒနဲ့လုပ်ခဲ့တာ... ငါနဲ့ နတ်ဘုရားသားတော် အကြောင်းကို ခန့်မှန်းဖို့ နင်ရဲ့ ညစ်ပတ်တဲ့ အတွေးတွေကို မသုံးနဲ့..."

[ဒင်... ကောင်းကင်ကံကြမ္မာ ဇာတ်လိုက်မင်းသမီး နာလန်ချိုးရန် နဲ့ ပုံမှန်မဟုတ်သော ကောင်းကင်ကံကြမ္မာပိုင်ရှင် တုန်လှုပ်ချောက်ချား အင်မော်တယ်တို့ကြားက သဘောထားကွဲလွဲမှုတစ်ခုကို ထောက်လှမ်းတွေ့ရှိရပါတယ်... တုန်လှုပ်ချောက်ချား အင်မော်တယ်ရဲ့ ကောင်းကင်အမိန့်တော်အမှတ်တွေကို ၅၀၀ လျှော့ချလိုက်ပြီး ၂၄၅၀၀ မှတ် ကျန်ရှိနေပါတယ်...]

[နှစ်ဆ ပြင်းထန်တဲ့ ထိုးနှက်ချက်ကို ဖြစ်ပေါ်စေပြီး ကောင်းကင်အမိန့်တော်အမှတ် ၁၀၀၀ ကို ရရှိခဲ့တဲ့အတွက် သခင်ကို ဂုဏ်ယူပါတယ်...]

ခုံးဝူတောက်က မျက်ခုံးပင့်လိုက်လေသည်။

ထိုအရာကို ကြည့်ခြင်းအားဖြင့် ဤကောင်းကင်ကံကြမ္မာ မဟာဧကရာဇ်သည် မည်သည့် စော်ကားမှုကိုမျှ သည်းမခံနိုင်ကြောင်း သိသာထင်ရှားသည်။

ခုံးဝူတောက်သည် သူ၏စေ့စပ်ထားသူ နှင့် ယခုမှ တွေ့ဆုံရုံသာ ရှိသေးသော်လည်း သူတို့သည် သဘောထားကွဲလွဲနေကြလေပြီ။

"ရိုင်းစိုင်းလိုက်တာ..."

ဤအချိန်အခိုက်အတန့်တွင် အဆုံးအစမရှိသော အေးစက်မှုများ ဒေါသများဖြင့် ပြည့်နှက်နေသည့် ကျယ်လောင်သော အော်ဟစ်သံတစ်သံက နံဘေးမှ ထွက်ပေါ်လာသည်။

အစစ်အမှန်ပုဂ္ဂိုလ်ထျန်ယွီထံမှ ကြောက်မက်ဖွယ်ကောင်းသောဖိအားများ ပေါက်ကွဲထွက်လာပြီး ဒေါသတကြီး ​အော်ငေါက်လိုက်သည်။

"မုဟောက်...လူယုတ်မာ... မင်းက ကျောင်းတော်ရဲ့ တားမြစ်နယ်မြေထဲကို ကျူးကျော်ဝင်ရောက်ပြီး ငါတို့ ကျောင်းတော်ရဲ့ မြင့်မြတ်တဲ့ ရတနာကို ဖျက်ဆီးခဲ့တင်မကဘူး...အခု မင်းက ငါတို့ ကျောင်းတော်ရဲ့ ဂုဏ်သရေရှိ ဧည့်သည်တော်ကိုပါ စော်ကားရဲသေးတယ်ပေါ့..."

"မင်းရဲ့ရာဇဝတ်မှုက သေဒဏ်နဲ့ ထိုက်တန်တယ်..."

"အစောင့်တွေ... ဒီကျောင်းအုပ်ကြီးအတွက် သူ့ကို ဖိနှိပ်လိုက်စမ်း..."

ခုံးဝူတောက်၏အထောက်အထားသည် ထူးခြားလေ၏။

တုန်လှုပ်ချောက်ချား အင်မော်တယ်သည် ယခင်က ကောင်းကင်တာအို ထူးဆန်းသည့် သဘာဝလွန်ဖြစ်စဉ်ကို ဖြစ်ပေါ်စေခဲ့ပြီး သူ့ကို အံ့အားသင့်စေခဲ့သော်လည်း....

မုဟောက်သည် ခုံးဝူတောက်နှင့် ယှဉ်နိုင်ရန် များစွာအလှမ်းကွာဟနေဆဲပင်။

သူ၏စကားများ အဆုံးသတ်သွားသည့် အချိန်အခိုက်အတန့်မှာပင်....

ကျောင်းတော်အကြီးအကဲနှစ်ဦးသည် ပြေးထွက်လာပြီး တုန်လှုပ်ချောက်ချား အင်မော်တယ်ကို ဖိနှိပ်ရန် ချက်ချင်းပြင်ဆင်လိုက်ကြသည်။

သို့သော် တုန်လှုပ်ချောက်ချား အင်မော်တယ်သည် မည်သည့် အကြောက်တရားကိုမျှ မပြသဘဲ အော်ဟစ်လိုက်၏။

"ငါက ကောင်းကင်တာအို နဲ့ အဆက်အသွယ် အောင်မြင်အောင် တည်ဆောက်နိုင်ခဲ့ပြီ..."

"မင်းတို့က ငါ့ကို ထိရဲလား..."

ဤစကားကို ကြားသောအခါ တုန်လှုပ်ချောက်ချား အင်မော်တယ်နှင့် နီးကပ်နေသော ကျောင်းတော် အကြီးအကဲနှစ်ဦး ချက်ချင်းအေးခဲတောင့်တင်းသွားကြသည်။

သူတို့၏မျက်လုံးသူငယ်အိမ်များသည် အပ်များကဲ့သို့ ကျုံ့သွားပြီး သူတို့၏မျက်နှာများပေါ်တွင် မယုံကြည်နိုင်မှုများဖြင့် ပြည့်နှက်နေသည်။

ဘာ...

ဤကောင်လေးသည် အစောပိုင်းက ကောင်းကင်တာအိုနှင့် အောင်မြင်စွာ အဆက်အသွယ် တည်ဆောက်နိုင်ခဲ့ခြင်းမှာ မည်သို့မျှ မဖြစ်နိုင်ပေ။

ကောင်းကင်ဘုံ ယဇ်ပလ္လင်မှတစ်ဆင့် ကောင်းကင်တာအို နှင့် အဆက်အသွယ် အောင်မြင်စွာ တည်ဆောက်ရန်မှာ အခြေအနေ များစွာကို ဖြည့်ဆည်းရန် လိုအပ်ပေ၏။

ထိုသို့ဖြစ်လာရန် ကောင်းကင်နှင့်မြေကြီး၏ မရေမတွက်နိုင်သော နတ်ဘုရားရတနာများကို ယဇ်ပူဇော်ရန် လိုအပ်ရုံသာမက ကောင်းကင်တာအိုနှင့် အဆက်အသွယ်ရှိရန်လည်း လိုအပ်သည်။

လူသိများသော အမှိုက်ကောင်တစ်ယောက်ဖြစ်သည့် မုဟောက် သည် ကောင်းကင်တာအိုနှင့် မည်သို့ အဆက်အသွယ် တည်ဆောက်နိုင်မည်နည်း။

သို့သော် ယခင်က ပေါက်ကွဲထွက်လာခဲ့သော ကြောက်မက်ဖွယ်ကောင်းသည့် ထူးဆန်းသော သဘာဝလွန်ဖြစ်စဉ်ကို သူတို့ ပြန်လည်အမှတ်ရချိန်တွင်...

တစ်ဖက်လူသည် ထိုသို့လုပ်ဆောင်ရန် အမှန်တကယ်ကို အောင်မြင်နိုင်ကြောင်း သူတို့ကို အဆက်မပြတ် သတိပေးနေသည်။

သူတို့၏ ကောင်းကင်ဘုံအနှစ်သာရကျောင်းတော်ကို မူလက ကောင်းကင်တာအိုမှ ဖန်တီးခဲ့ခြင်းဖြစ်ပြီး အရာအားလုံးကို ကောင်းကင်တာအိုက အမိန့်ပေးထားခြင်း ဖြစ်ပေ၏။

အကယ်၍ တစ်ဖက်လူသည် ကောင်းကင်တာအို နှင့် အမှန်တကယ်ကို အဆက်အသွယ် တည်ဆောက်နိုင်မည်ဆိုလျှင် သူတို့သည် သူ့ကို ဖိနှိပ်ရန် ခက်ခဲပေလိမ့်မည်။

...

အခန်း (၉၄) ကြည့်ရတာတော့ မင်းကိုယ်မင်း တော်တော်လေး ယုံကြည်မှု ရှိနေပုံပဲ...

နံဘေးတွင်ရှိနေသော ခုံးဝူတောက်က ဤစကားများကို ကြားသောအခါ မျက်ခုံးပင့်လိုက်သည်။

တစ်ဖက်လူ၏ လက်ရှိနယ်ပယ်သည် ဟင်းလင်းပြင်သန့်စင်ခြင်းနယ်ပယ်မျှသာ ဖြစ်သော်လည်း ထိုအရာမှတဆင့် ကောင်းကင်တာအိုနှင့် အဆက်အသွယ် တည်ဆောက်နိုင်သလော...

ဤသည်က သူ၏စိတ်ဝင်စားမှုကို နောက်တစ်ကြိမ် လှုံ့ဆော်ပေးလေ၏။

"အဓိပ္ပာယ်မရှိတာ... ကောင်းကင်ဘုံ ယဇ်ပလ္လင် က ကြေမွှပျက်စီးသွားပြီလေ... အဲ့ဒါတောင် မင်းက ဒီလိုမျိုး ပေါက်ကရစကားတွေကို ပြောရဲသေးတယ်ပေါ့..."

အစစ်အမှန်ပုဂ္ဂိုလ်ထျန်ယွီက နောက်တစ်ကြိမ် ဒေါသတကြီး ​အော်ဟစ်လိုက်သည်။

"ကောင်းကင်တာအိုက နှစ်ပေါင်း ဘယ်လောက်ထိကြာအောင် အိပ်မောကျနေခဲ့လဲဆိုတာ ဘယ်သူမှ မသိနိုင်ဘူး... မင်းလို သာမန်အမှိုက်ကောင်က ကောင်းကင်တာအိုနဲ့ အဆက်အသွယ် တည်ဆောက်နိုင်ခဲ့ပြီလို့ ဘယ်လိုများ ပြောရဲရတာလဲ..."

ဤစကားကို ကြားသောအခါ တခြားကျောင်းတော် အကြီးအကဲများသည်လည်း သူတို့၏ တွေဝေမိန်းမောနေမှုမှ လွတ်မြောက်သွားကြသည်။

ဤှသည်မှာ အမှန်ပင်။

တစ်ဖက်လူသည် သူတို့၏ ကောင်းကင်ဘုံအနှစ်သာရကျောင်းတော်တွင် နာမည်ဆိုးဖြင့် ကျော်ကြားသော အသုံးမကျသူ တစ်ယောက်ပင်။

သာမန် အသုံးမကျသူတစ်ယောက်က ကောင်းကင်တာအိုကဲ့သို့အမြင့်မြတ်ဆုံး တည်ရှိမှုတစ်ခုနှင့် အဆက်အသွယ် တည်ဆောက်နိုင်စွမ်း ရှိမည်မဟုတ်ပေ။

သူတို့၏အမြင်အရ တုန်လှုပ်ချောက်ချား အင်မော်တယ်သည် ယခင်က ကောင်းကင်ဘုံ ယဇ်ပလ္လင်ကို လှုံ့ဆော်နိုင်လောက်အောင် မတော်တဆ ကံကောင်းသွားခြင်းသာ ဖြစ်နိုင်ခြေ အများဆုံးပင်။

"ကျောင်းအုပ်ကြီး... မုဟောက် က မကောင်းဆိုးဝါး ကျင့်စဉ်တစ်ခုခုကို ကျင့်ကြံထားတာ သေချာတယ်...တိုက်ဆိုင်မှုကြောင့် ကောင်းကင်ဘုံ ယဇ်ပလ္လင်နဲ့ ပဲ့တင်ထပ်သွားတာ ဖြစ်ရမယ်..."

"ကျွန်တော်ရဲ့အမြင်အရတော့... သူ့ကို ကောင်းကင်ဘုံ အကျဉ်းထောင်ထဲမှာ လှောင်ပိတ်ထားပြီးတော့ သေသေချာချာ စစ်ဆေးမေးမြန်းသင့်တယ်..."

နောက်ထပ် အကြီးအကဲတစ်ဦးက ရှေ့သို့ထွက်လာပြီး သူသည် ခုံးဝူတောက်ကို မျက်နှာချိုသွေးရန် ဤအခွင့်အရေးကို လက်လွတ်မခံချင်ပေ။

"ဒီကောင်က ငါတို့ကျောင်းတော်ရဲ့ ဂုဏ်သရေရှိ ဧည့်သည်တော်ကို တောသားလို့တောင် ခေါ်ရဲသေးတယ်... သူက အပြစ်ပေးခံရဖို့ ထိုက်တန်တယ်..."

"နတ်ဘုရားသားတော် ခုံးဝူတောက်ကို တောင်းပန်ဖို့အတွက် သူ့ရဲ့ ကျင့်ကြံခြင်း ကို ဖျက်ဆီးပြီးတော့ ညှဉ်းပန်းနှိပ်စက်မှုတွေ လုပ်သင့်တယ်..."

ကျောင်းတော်အကြီးအကဲ အများအပြားထံမှ ပြစ်တင်ကြိမ်းမောင်းမှုများကို ကြားသောအခါ တုန်လှုပ်ချောက်ချားအင်မော်တယ်၏ မျက်နှာအမူအရာသည် ရုတ်တရက် ပျက်ယွင်းသွားပေ၏။

ယခင်က ကောင်းကင်ဘုံယဇ်ပလ္လင်ကို အသက်သွင်းစဉ်က သူ ဖြစ်ပေါ်စေခဲ့သော ထူးဆန်းသည့် သဘာဝလွန်ဖြစ်စဉ်မှာ အမှန်တကယ်ကို ကြီးမားလှသည်။

ဤလူများသည် ထိုအရာကို ရှင်းရှင်းလင်းလင်း မြင်ခဲ့ရမည်မှာ သေချာပေါက်ပင်။

သူသည် ကောင်းကင်တာအိုနှင့် ဆက်သွယ်နိုင်ကြောင်း မကြာသေးမီက ထုတ်ပြန်ကြေညာချက်နှင့် ပေါင်းစပ်လိုက်လျှင်...

သူ ကြိုတင်ခန့်မှန်းထားသော ဖြစ်ရပ်များ၏ လမ်းကြောင်းအရ တစ်ဖက်လူများသည် သူ၏အထောက်အထားကို အလွန်အမင်း သတိထားလာမည်မှာ သံသယဖြစ်ဖွယ် မရှိပေ။

သူတို့သည် သူ့ကို ဂုဏ်သရေရှိ ဧည့်သည်တော် တစ်ဦးအဖြစ်ပင် ဆက်ဆံနိုင်ပြီး ကောင်းကင်ဘုံအနှစ်သာရကျောင်းတော်တစ်ခုလုံးက သူ့ကို အညံ့ခံလာပေလိမ့်မည်။

သို့သော် မည်သည်ကြောင့် ဤသို့ ဖြစ်လာရသည်ကို သူ နားမလည်နိုင်ပေ။

ဖြစ်ရပ်များ၏ လမ်းကြောင်းသည် သူ မျှော်လင့်ထားသည်နှင့် လုံးဝကွဲပြားခြားနားနေခဲ့သည်။

ကောင်းကင်ဘုံအနှစ်သာရကျောင်းတော်မှ ဤ မျက်ကန်းအရူးများအားလုံးသည် ဤဝတ်ရုံဖြူ ဝတ်အမျိုးသားကို မျက်နှာချိုသွေးနေကြ၏။

ထိုအချိန်မှာပင် သူတစ်ယောက်တည်းသာ အာရုံခံနိုင်သော အထူးချီလှိုင်းတစ်ခုသည် ဟင်းလင်းပြင်မှ ရုတ်တရက် ဆင်းသက်လာပြီး သူ၏ခန္ဓာကိုယ်ထဲသို့ တိတ်တဆိတ် ပေါင်းစပ်သွားသည်။

တုန်လှုပ်ချောက်ချား အင်မော်တယ်၏ အနည်းငယ် လှုပ်ရှားနေသော စိတ်အခြေအနေ လျှင်မြန်စွာ တည်ငြိမ်သွားသည်။

အစောပိုင်းက ကောင်းကင်ဘုံ တာအိုနယ်မြေ၏ ကောင်းကင်တာအိုထံမှ တုံ့ပြန်မှုတစ်ခုကို သူ အာရုံခံမိလိုက်သည်။

ကောင်းကင်တာအိုသည် သူ့ကို လျှို့ဝှက်စွာဖြင့် အထူးကာကွယ်မှုတစ်ခု ပေးသနားလိုက်ပုံရပေ၏။

ဤအရာကိုတွေးတောရင်း တုန်လှုပ်ချောက်ချား အင်မော်တယ်၏ နှုတ်ခမ်းများ အနည်းငယ် ကွေးတက်သွားပြီး သူ၏ယုံကြည်မှုကို ပြန်လည်ရရှိသွားသည့်အလားပင်။

"ဟား ဟား ဟား... မင်းတို့က အပြင်လူ တစ်ယောက်အတွက် ငါ့ကို စော်ကားပြီး ကောင်းကင်တာအိုကို ရန်စတော့မှာလား..."

ဤစကားများကြောင့် ကောင်းကင်ဘုံအနှစ်သာရကျောင်းတော် မှ လူများအားလုံး နောက်တစ်ကြိမ် အနည်းငယ် တွေဝေမိန်းမောသွားကြသည်။

သူတို့သည် အချင်းချင်း တွေဝေစွာ ကြည့်လိုက်ကြပြီး သူတို့၏မျက်နှာအမူအယာများသည် ပို၍ပင် ရှုပ်ထွေးသွားလေ၏။

တစ်ဖက်လူ၏ စိတ်အခြေအနေက မမှန်ကန်ခြင်း ဖြစ်နိုင်ပြီး ထိုကဲ့သို့ စကားမျိုးကို သူ ပြောရဲခြင်းမှာ အံ့အားသင့်ဖွယ်ရာ ကိစ္စတစ်ရပ်ပင်။

သူ့ကို ဆန့်ကျင်ခြင်းက ကောင်းကင်တာအိုကို ရန်စခြင်းဖြစ်သည်ဟူသော သဘောမျိုး ဖြစ်နေသည်။

"ဒီအချိန်ရောက်တာတောင် ဒီလိုမျိုး ပေါက်လွတ်ပဲစား စကားတွေကို ပြောရဲသေးတယ်ပေါ့..."

"မင်းက ဘာလို့ လိမ္မာပါးနပ်စွာနဲ့ အညံ့မခံဘဲ နတ်ဘုရားသားတော် ခုံးဝူတောက်ကို မတောင်းပန်ရတာလဲ..."

ဤအချိန်အခိုက်အတန့်တွင် မဟာအကြီးအကဲသည် ပထမဆုံး လှုပ်ရှားလိုက်၏။

သူ၏လက်ဝါးထဲတွင် မှော်စာလုံးများ လင်းလက်သွားပြီး ကြောက်မက်ဖွယ်ကောင်းသော ဥပဒေသစွမ်းအားသည် သူ၏လက်မှ ထွက်ပေါ်လာကာ တုန်လှုပ်ချောက်ချား အင်မော်တယ် ဆီသို့ တိုက်ရိုက်ပျံ့လွင့်သွားသည်။

ဝုန်း...

မိုးခြိမ်းသံကဲ့သို့ ကျယ်လောင်သောအသံတစ်သံက ဟင်းလင်းပြင်အတွင်းတွင် ပဲ့တင်ထပ်သွားသည်။

မရေမတွက်နိုင်သော မှော်စာလုံးများ အပြန်အလှန် ယှက်နွယ်သွားသည်နှင့်အမျှ ထိုအရာများသည် လျှပ်စီးမိုးကြိုးသံကြိုးများအဖြစ် ပြောင်းလဲသွားပြီး တစ်ဖက်လူကို လုံးဝဖိနှိပ်ရန် ရည်ရွယ်ထားသည်။

ကျောင်းတော်မှ မဟာအကြီးအကဲတစ်ဦးအနေဖြင့် သူ၏ စွမ်းအားသည် အစစ်အမှန်ပုဂ္ဂိုလ်ထျန်ယွီ ပြီးလျှင် ဒုတိယနေရာမှလိုက်သည်ဟု ဆိုနိုင်ပေ၏။

တုန်လှုပ်ချောက်ချား အင်မော်တယ်၏ လက်ရှိ ကျင့်ကြံခြင်း သည် ဟင်းလင်းပြင်သန့်စင်ခြင်းနယ်ပယ် တွင်သာ ရှိသေးသည်။ သူတို့နှစ်ဦးကြားရှိ နယ်ပယ်ကွာဟချက်မှာ ကြီးမားလှသည်။

တစ်ဖက်လူကို ဖိနှိပ်ခြင်းသည် အလွန်လွယ်ကူလွန်းပေ၏။

တခြားအကြီးအကဲများသည် ဤမြင်ကွင်းကိုကြည့်ပြီး နောင်တရသည့် အရိပ်အယောင်တစ်ရပ်ကို ခံစားလိုက်ရသည်။

အကယ်၍ သူတို့သာ ကြိုသိခဲ့လျှင် အဓိပ္ပာယ်မရှိသော စကားများကို များစွာမပြောခဲ့သင့်ပေ။ ခုံးဝူတောက်ကို မျက်နှာချိုသွေးရန် သူတို့သည် မုဟောက်ကို တိုက်ရိုက်ဖိနှိပ်သင့်ခဲ့သည်။

ယခုချိန်၌ သူတို့၏ယာယီခြေလှမ်းမှားမှုက ထာဝရနောင်တကို ဖြစ်စေခဲ့သည်။ ထိုကဲ့သို့ အခွင့်အရေးကောင်းတစ်ခုကို သူတို့၏ မဟာအကြီးအကဲက လုယူသွားခဲ့လေပြီ။

"အချိန်ကိုက်ပဲ..."

တုန်လှုပ်ချောက်ချား အင်မော်တယ်၏ နှုတ်ခမ်းများသည် အပြုံးတစ်ခုအဖြစ် ကွေးတက်သွားပြီး သူ၏မျက်လုံးများတွင် အထင်သေးမှု အရိပ်အယောင်တစ်ရပ် ရှိနေသည်။

သူသည် ထိုတိုက်ခိုက်မှုကို အနည်းငယ်မျှပင် ဂရုမစိုက်ခဲ့ချေ။ ထိုအစား သူသည် သူ၏ ခန္ဓာကိုယ်တွင်းရှိ ချီများကို လှည့်ပတ်ပြီး ရှောင်တိမ်းခြင်း မရှိဘဲ လက်ဝါးရိုက်ချက်တစ်ချက်ဖြင့် တိုက်ခိုက်မှုကို ထိပ်တိုက်ရင်ဆိုင်လိုက်သည်။

"မုဟောက်... အဲ့ဒီ အသုံးမကျတဲ့ကောင်က သူ့ကိုယ်သူ တကယ်ကြီး အထင်ကြီးနေတာပဲ... သူက သူ့ရဲ့ ကိုယ်ပိုင်အကန့်အသတ်တွေကိုတောင် မသိဘူး... မဟာအကြီးအကဲရဲ့ တိုက်ခိုက်မှုကို သူက ထိပ်တိုက်ရင်ဆိုင်ဖို့ ကြိုးစားရဲတယ်ပေါ့..."

"သူက သေဖို့ တောင်းဆိုနေတာ ရှင်းနေတာပဲ..."

တခြားကျောင်းတော်အကြီးအကဲများက အထင်သေးမှု လှောင်ပြောင်မှုများဖြင့် ပြောဆိုလိုက်ကြသည်။

"မဟာအကြီးအကဲက နတ်ဘုရားဘုရင်နယ်ပယ် အဆင့်ကိုး ကျင့်ကြံသူတစ်ယောက်လေ... မုဟောက်က ဟင်းလင်းပြင်သန့်စင်ခြင်းနယ်ပယ် မှာပဲ ရှိသေးတာ... သူက ဘယ်လိုလုပ်ပြီးတော့ မဟာအကြီးအကဲ နဲ့ ယှဉ်နိုင်မှာလဲ..."

"မဟာအကြီးအကဲက သနားညှာတာမှု ပြသဖို့ပဲ ငါ မျှော်လင့်ပါတယ်... တကယ်လို့ သူက မတော်တဆ ဒီကောင်ကို သတ်ပစ်လိုက်ရင်..."

"အဲ့ဒါဆိုရင် အရင်က နတ်ဘုရားသားတော် ခုံးဝူတောက်ကို စော်ကားခဲ့တဲ့အတွက် သူ တောင်းပန်ဖို့ ခက်သွားလိမ့်မယ်..."

ဝုန်း...

နောက်ထပ်အချိန်တခဏတွင် မှော်စာလုံးများ လင်းလက်သွားပြီး လျှပ်စီးမိုးကြိုးသံများ မြည်ဟီးသွားသည်။

ကြောက်မက်ဖွယ်ကောင်းသော စွမ်းအားနှစ်ရပ်သည် ဟင်းလင်းပြင်တွင် ရုတ်တရက် တိုက်မိသွားပြီး မယုံနိုင်လောက်အောင် တောက်ပသော အလင်းတန်းများကို ထုတ်လွှတ်လိုက်၏။

တလိမ့်လိမ့်ထနေသော စွမ်းအင်မုန်တိုင်းသည် ပျံ့နှံ့သွားပြီး စောင့်ကြည့်နေသော ကျောင်းတော်အကြီးအကဲများကိုပင် သူတို့၏ခြေလှမ်းများအား အနည်းငယ် ယိမ်းယိုင်သွားစေခဲ့သည်။

နတ်ဘုရားအလင်းတန်းများ လျော့နည်းသွားပြီး ဖုန်မှုန့်များ တဖြည်းဖြည်း ပြယ်လွင့်သွားပြီးနောက်....

လူတိုင်းက မြင်ကွင်းတစ်ခုကို အံ့အားသင့်စွာ တွေ့ရှိလိုက်ကြလေသည်။

သူတို့ မျှော်လင့်ထားသည့် မုဟောက် ဖိနှိပ်ခံရသော မြင်ကွင်းသည် ဖြစ်မလာခဲ့ချေ။

ထိုအစား တစ်ဖက်လူသည် လူငယ် နတ်ဘုရား တစ်ပါးကဲ့သို့ ယုံကြည်မှုရှိပြီး အစွမ်းထက်သော မျက်နှာအမူအယာဖြင့် တည်ငြိမ်စွာ မတ်တတ်ရပ်နေသည်။

"ဘာ..."

"မုဟောက်က မဟာအကြီးအကဲရဲ့ တိုက်ခိုက်မှုကို တကယ်ကြီး ပိတ်ဆို့ဟန့်တားလိုက်တာလား..."

သူတို့၏ရှေ့ရှိ မြင်ကွင်းသည် သူတို့၏မျှော်လင့်ချက်များထက် ကျော်လွန်နေလေ၏။

အထူးသဖြင့် အလွန်အမင်း အံ့အားသင့်သွားသဖြင့် အနည်းငယ် ကြက်သေသေနေသော နာလန်ချိုးရန်ပင်။

သူမနှင့် စေ့စပ်ထားသူ၏စွမ်းအားကို သူမ အလွန်ကောင်းစွာ သိရှိထားသည်။

ပုံမှန်အားဖြင့် အကြီးအကဲတစ်ဦးကို တိုက်ခိုက်ရန် မဆိုထားနှင့် သာမန် အပြင်စည်းတပည့် တစ်ဦးကို အနိုင်ယူရန်ပင် သူ ရုန်းကန်ရပေမည်။

ထိုသို့ဆိုသည့်တိုင် ယခုချိန်၌ တစ်ဖက်လူသည် သူမတို့ကျောင်းတော်၏ မဟာအကြီးအကဲထံမှ တိုက်ခိုက်မှုတစ်ခုကို ဤမျှထိ လွယ်လင့်တကူ ဟန့်တားနိုင်ခဲ့လေပြီ။

ဤသည်မှာ တစ်ချိန်က ကျောင်းတော်ရှိ လူတိုင်းက အသုံးမကျသော အိမ်ပါသားမက်ဟု ခေါ်ဆိုခဲ့သော မုဟောက် အစစ်အမှန် ဟုတ်ပါသလော....

"ဒါက ဘယ်လိုလုပ်ပြီး ဖြစ်နိုင်မှာလဲ..."

"မင်း... မင်းမှာ ဟင်းလင်းပြင်သန့်စင်ခြင်းနယ်ပယ် ကျင့်ကြံခြင်းပဲ ရှိတာလေ... ငါ့ရဲ့ တိုက်ခိုက်မှုကို မင်းက ဘယ်လိုလုပ်ပြီး ပိတ်ဆို့ဟန့်တားနိုင်ခဲ့တာလဲ..."

တိုက်ခိုက်ခဲ့သော မဟာအကြီးအကဲသည် ယခုအချိန်၌ အလွန်အမင်း အံ့အားသင့်သွားသဖြင့် သူ၏ဘဝကိုပင် သံသယဝင်သွားသည်။

ကျောင်းတော်တွင် ဒုတိယ အစွမ်းထက်ဆုံးသူ အနေဖြင့် သူ၏ကိုယ်ပိုင်စွမ်းအားအပေါ် အကြွင်းမဲ့ ယုံကြည်မှုရှိသည်။

သို့သော် ရလဒ်သည် သူ့ထက် နယ်ပယ်အနည်းငယ် နိမ့်ကျသော ကျင့်ကြံခြင်းသာရှိသည့် မုဟောက်ကို ရင်ဆိုင်ရစဉ် လှုပ်ရှားမှုတစ်ခုတည်းဖြင့်ပင် သူ အနိုင်ယူနိုင်ခဲ့ခြင်း မရှိချေ။

တစ်ဖက်လူက သူ၏ စစ်မှန်သော စွမ်းအားကို အမြဲတစေ ဖုံးကွယ်ထားခဲ့ခြင်း ဖြစ်နိုင်သည်။

မုဟောက်သည် ဤအချိန်တလျှောက်လုံး အလွန်အစွမ်းထက်ခဲ့ပြီး ယခင်က အရှက်ခွဲခံရမှုများကို သည်းခံနေခဲ့ခြင်းသာ ဖြစ်ပေမည်။

သေချာသည်မှာ ဤအရာကြောင့် အံ့အားမသင့်ခဲ့သော သူတစ်ယောက် ထိုနေရာတွင် ရှိနေမည်ဆိုလျှင်....

ထိုလူသည် နံဘေးမှနေ၍ ဇာတ်ကွက်ကို စောင့်ကြည့်နေသော ခုံးဝူတောက်ပင်။

တစ်ဖက်လူက ဤတိုက်ခိုက်မှုကို ပိတ်ဆို့နိုင်ခြင်းသည် သူ၏မျှော်လင့်ချက်များအတွင်း၌ လုံးဝရှိနေသည်။

မည်သို့ပင်ဆိုစေကာမူ ပုံမှန်မဟုတ်သော တစ်ဖက်လူသည် ကောင်းကင်ကံကြမ္မာပိုင်ရှင် ဖြစ်ရုံသာမက ပြန်လည်မွေးဖွားလာသော ကောင်းကင်ကံကြမ္မာ မဟာဧကရာဇ်လည်း ဖြစ်နေသည်။

ထိုကြောင့် ကျင့်ကြံဆင့်နယ်ပယ် အနည်းငယ်ကို ဖြတ်ကျော်၍ တိုက်ခိုက်ခြင်းသည် သူ့အတွက် ဖြစ်ရိုးဖြစ်စဉ် ကိစ္စတစ်ခုသာ ဖြစ်ပေမည်။

သေချာသည်မှာ ပြိုင်ဘက်က ကောင်းကင်ကို ပို၍အန်တုလေလေ သူ ပို၍ပျော်ရွှင်လေလေပင်။

ခုံးဝူတောက်က ရယ်မောပြီး ခေါင်းယမ်းလိုက်သည်။ ထို့နောက် သူ၏လက်များကို နောက်ပစ်ကာ ဖြည်းညှင်းစွာ ရှေ့သို့လျှောက်လှမ်းသွားလိုက်လေသည်။

သူက အလျင်စလိုမရှိဘဲ တည်ငြိမ်စွာ ပြောဆိုလိုက်၏။

"ကြည့်ရတာတော့ မင်းကိုယ်မင်း တော်တော်လေး ယုံကြည်မှု ရှိနေပုံပဲ..."