အခန်း (၅၄၁-၅၄၂)

အပိုင်း (၅၄၁) သွေးကြောလမ်းကြောင်း

"ဒါ ဘယ်နေရာလဲ... ဘယ်ရောက်နေတာလဲ"

"ငါ ဘယ်လိုလုပ်ပြီး ဒီကို ရောက်နေတာလဲ"

"သေစမ်း... ဒါ အရိပ်ကမ္ဘာပဲ"

"အစ်ကိုကျိုး... ခင်ဗျား ဘယ်မှာလဲ"

"အစ်ကိုကြီးဟွမ်"

"အား... ကယ်ကြပါဦး"

အရိပ်ကမ္ဘာထဲတွင် လူတစ်စုထံမှ စူးစူးဝါးဝါး အော်ဟစ်သံများ ထွက်ပေါ်လာပြီး တစ်ယောက်ကိုတစ်ယောက် အလျင်စလို ရှာဖွေနေကြသည်။

အမှောင်ထုထဲတွင် သူတို့အားလုံးသည် မည်းမှောင်နေသော အရိပ်များအဖြစ်သို့ ပြောင်းလဲသွားကြ၏။

အပြင်မှ ကြည့်မည်ဆိုလျှင် ဤဦးနှောက်ရေကန်ကြီး တစ်ခုလုံးကို အနက်ရောင် အမှောင်ထုကြီးက ဖုံးလွှမ်းထားသည်ကို တွေ့ရမည် ဖြစ်သည်။

သာမန်မျက်စိဖြင့် မြင်နိုင်စွမ်းရှိပါက ထိုမည်းမှောင်နေသော နေရာထဲတွင် လူပုံစံ အရိပ်မည်း ဆယ်ဂဏန်းခန့် ရူးသွပ်မတတ် ထွက်ပြေးလွတ်မြောက်ရန် ကြိုးစားနေကြသည်ကို မြင်တွေ့ရပေမည်။

ထိုအချိန်တွင် ဧရာမ နဂါးနက်အရိပ်ကြီး တစ်ကောင်က ထိုလူပုံစံ အရိပ်မည်းများကို အဆက်မပြတ် လိုက်လံ ဖမ်းဆီးနေလေသည်။

နဂါးနက်ကြီးက လူအရိပ်များအပေါ်သို့ အုပ်မိုးလိုက်သည်နှင့် တစ်ပြိုင်နက် ထိုအရိပ်များထံမှ မည်သည့်အသံမျှ ထွက်ပေါ်မလာတော့ဘဲ ချက်ချင်း ဝါးမျိုခံလိုက်ရသကဲ့သို့ ပျောက်ကွယ်သွားတော့သည်။

ဤမှောင်မည်းနေသော နယ်မြေထဲတွင် အလင်းစက်လေး တစ်ခုက အသည်းအသန် တောက်ပနေပြီး ပတ်ဝန်းကျင်ရှိ အမှောင်ထုကို မောင်းနှင်ဖယ်ရှားရန် ကြိုးစားနေ၏။

ဟွမ်ကွမ်းဇူသည် ဓာတ်မဲ့ စွမ်းအင်ကျောက်တုံးများကို အသက်လု၍ စုပ်ယူနေပြီး သူ၏ တစ်ကိုယ်လုံးမှ အလင်းရောင်များကို အစွမ်းကုန် ထုတ်လွှတ်နေသည်။

ယခုအခါ သူ၏ တစ်ကိုယ်လုံးသည် အလင်းတန်းတစ်ခုအဖြစ် ပြောင်းလဲသွားပြီး အမှောင်ထုကို အဆက်မပြတ် ဖယ်ရှားနေလေသည်။

သူသည် မည်းမှောင်နေသော စွမ်းအင်နယ်မြေထဲတွင် ဟိုဟိုဒီဒီ အသည်းအသန် ပြေးလွှားနေသည်။

အဆုံးအစမရှိသော ရေနက်ကြီးထဲတွင် ရေမွန်းနေသူ တစ်ယောက်က အသက်လု၍ ရုန်းကန်နေရသကဲ့သို့ပင်။

နောက်ဆုံးတွင် ထိုအလင်းရောင်သည် တဖြည်းဖြည်း မှေးမှိန်လာပြီး အားနည်းလာလေသည်။

အဆုံး၌ လုံးဝ ငြိမ်းသတ်သွားတော့၏။

ဟွမ်ကွမ်းဇူသည် မျက်တောင်တစ်ခတ်အတွင်းမှာပင် အမှောင်ထု၏ ဝါးမျိုခြင်းကို ခံလိုက်ရပြီး အရိပ်မည်းတစ်စအဖြစ် လုံးဝ ပြောင်းလဲသွားကာ အရိပ်ကမ္ဘာထဲသို့ ပေါင်းစပ်ဝင်ရောက်သွားတော့သည်။

အရိပ်ကမ္ဘာထဲတွင် သူ၏ မျက်နှာတစ်ခုလုံး ကြောက်ရွံ့ထိတ်လန့်မှုများဖြင့် ပြည့်နှက်နေပြီး ထိုဧရာမ နဂါးနက်ကြီးကို တွေ့လိုက်ရလေသည်။

နဂါးနက်ကြီးသည် လိမ်ကောက်နေပြီး အလွန် ကြောက်မက်ဖွယ်ကောင်းလှကာ ပြေးလွှားနေသော လူအရိပ်များကို လျင်မြန်စွာ မျိုချနေ၏။

ဟွမ်ကွမ်းဇူမှာ အလွန်တရာ ကြောက်လန့်သွားသဖြင့် ထောင့်တစ်နေရာတွင် အမြန်ပုန်းအောင်းနေလိုက်ပြီး အနည်းငယ်မျှပင် မလှုပ်ရဲတော့ပေ။

ဤနဂါးနက်ကြီးသည် အလွန်တရာ အစွမ်းထက်သော အမှောင်ဓာတ် သန္ဓေပြောင်း သတ္တဝါတစ်ကောင် ဖြစ်မည်ဟု သူ ခံစားသိရှိနေသည်။

ဤကဲ့သို့သော အရိပ်ကမ္ဘာမျိုးတွင် ထိုသို့သော သန္ဓေပြောင်း သတ္တဝါမျိုးသည် ပြိုင်ဘက်ကင်းနီးပါး ဖြစ်ပေသည်။

အမှောင်ဓာတ် အစွမ်းပိုင်ရှင် ဖြစ်နေမှသာ ဤပတ်ဝန်းကျင်မှ လျင်မြန်စွာ လွတ်မြောက်နိုင်ရန် အခွင့်အရေး ရှိပေမည်။

သို့မဟုတ်ပါက မည်မျှပင် အစွမ်းထက်သော အစွမ်းပိုင်ရှင် ဖြစ်ပါစေ အလွတ်ရုန်းထွက်ရန် အလွန် ခက်ခဲလှပေသည်။

အလင်းဓာတ် အစွမ်းပိုင်ရှင် ဖြစ်သော သူသည်လည်း ချွင်းချက် မဟုတ်ပေ။

အကယ်၍ သူ၏ အဓိက အရည်အသွေးသည်လည်း အမှတ် (၁၀၀) ရှိနေမည်ဆိုပါက အမှောင်ထုကို ချိုးဖျက်ကာ ဖယ်ရှားပြီး အရိပ်ကမ္ဘာထဲမှ ခုန်ထွက်နိုင်စွမ်း ရှိကောင်း ရှိပေမည်။

သို့သော် ယခု လက်ရှိ သူ၏ အခြေအနေဖြင့်မူ မည်သို့မျှ လွတ်မြောက်နိုင်မည် မဟုတ်ပေ။

နဂါးနက်ကြီးသည် ဟိန်းဟောက်ကာ အရိပ်အားလုံးကို မျိုချပစ်လိုက်သော်လည်း ၎င်း ရှာဖွေနေသော သူကိုမူ မတွေ့ရသေးပေ။

ထိုအချက်က ၎င်းကို အလွန်အမင်း ဒေါသထွက်စေသည်မှာ သေချာလှပြီး မည်းမှောင်နေသော ကမ္ဘာကြီးထဲတွင် ဟိန်းဟောက် အော်မြည်နေလေသည်။

ဟွမ်ကွမ်းဇူသည် အကြောက်လွန်ကာ တစ်ကိုယ်လုံး တုန်ယင်နေပြီး သူ့ခန္ဓာကိုယ်ကို အလုံးလေးတစ်ခုလို ဖြစ်အောင် အသည်းအသန် ကွေးညွှတ်ထားလိုက်သည်။

အလင်းရောင် အနည်းငယ်မျှပင် မထုတ်လွှတ်ရဲတော့ပေ။

သို့သော် သူ မည်သို့ပင် ငြိမ်သက်နေပါစေ ဤအရိပ်ကမ္ဘာကြီးထဲတွင် ဘုရင်တစ်ပါးကဲ့သို့ ဖြစ်နေသော နဂါးနက်ကြီးက သူ့ကို ချက်ချင်းပင် အာရုံခံမိသွားလေသည်။

"ဂါး"

နဂါးနက်ကြီးသည် ခေါင်းလှည့်လာပြီး ဟွမ်ကွမ်းဇူရှိရာသို့ ချက်ချင်း တိုးဝင်လာသည်။

ထိုလုပ်ရပ်ကြောင့် ဟွမ်ကွမ်းဇူ၏ မျက်နှာတစ်ခုလုံး ချက်ချင်း သွေးဆုတ်ဖြူရော်သွားတော့၏။

သူ စူးစူးဝါးဝါး အော်ဟစ်ပြီး အသက်ချမ်းသာပေးရန် တောင်းပန်ချင်နေသည်။

သို့သော် အသံတို့သည် လည်ချောင်းဝတွင် တစ်ဆို့နေပြီး ထွက်မလာတော့ပေ။

ဤကဲ့သို့ ကြီးမားသော ကြောက်ရွံ့မှုအောက်တွင် သူ အသံအအ သွားခဲ့လေပြီ။

ကြောက်လန့်လွန်း၍ အသံထွက်မလာတော့ခြင်း ဖြစ်သည်။

နဂါးနက်ကြီးသည် သူ၏အပေါ်သို့ လွှမ်းမိုးကျရောက်လာပြီး အလွန် ကြောက်မက်ဖွယ်ကောင်းသော ပါးစပ်ကြီးဖြင့် တိုက်ရိုက် ကိုက်ချတော့မည့် အခြေအနေသို့ ရောက်နေပြီ ဖြစ်သည်။

ထိုအချိန်မှာပင် နဂါးနက်ကြီးသည် ရုတ်တရက် ခေါင်းကိုမော့ကာ အဝေးသို့ လှမ်းကြည့်လိုက်လေသည်။

၎င်းသည် တစ်စုံတစ်ခုကို အာရုံခံမိသွားပုံရပြီး ရုတ်တရက် ကိုယ်ကိုလှည့်ကာ အဝေးသို့ လျင်မြန်စွာ ထွက်ခွာသွားတော့သည်။ လက်တစ်ကမ်းအကွာတွင် ရှိနေသော ဟွမ်ကွမ်းဇူကိုပင် လှည့်မကြည့်တော့ပေ။

ဟွမ်ကွမ်းဇူလည်း ထိုနေရာတွင် ကြက်သေ သေသွားပြီးနောက် မကြာမီ ဝမ်းသာလွန်း၍ မျက်ရည်များပင် ကျလာလေသည်။

သူက အသံမထွက်ဘဲ ငိုကြွေးလိုက်ပြီးနောက် နဂါးနက်ကြီး ပြန်လှည့်လာမည်ကို စိုးရိမ်သဖြင့် ပါးစပ်ကို အလျင်အမြန် ပြန်ပိတ်ထားလိုက်သည်။

နဂါးနက်ကြီး တစ်စတစ်စ ဝေးကွာသွားသည်ကို ကြည့်ရင်း ပတ်ဝန်းကျင်ရှိ အရိပ်ကမ္ဘာကြီးမှာလည်း တဖြည်းဖြည်း ပျောက်ကွယ်သွားလေသည်။

ဟွမ်ကွမ်းဇူသည် အနည်းငယ်မျှပင် မလှုပ်ရှားရဲဘဲ နေရာတွင်သာ ဝပ်နေရင်း သူ၏ ခန္ဓာကိုယ်တွင်းရှိ သန္ဓေပြောင်းစွမ်းအင်များကို အမြန်ဆုံး ပြန်လည်ပြည့်ဖြိုးစေရန် အားထုတ်နေသည်။

နဂါးနက်ကြီး ဝေးကွာသွားပြီး ၎င်း၏ အရိပ်အယောင်ကို လုံးဝ မမြင်ရတော့သည့်အချိန်တွင် ဤနယ်မြေရှိ အရိပ်ကမ္ဘာကြီးမှာလည်း လုံးဝ ပျောက်ကွယ်သွားတော့၏။

သူ၏ နားထဲတွင် ဦးနှောက်ရေကန်ကြီး၏ ရေလှိုင်းပုတ်သံများကို တစ်ဖန် ပြန်လည် ကြားလိုက်ရသည်။

ထိုအရာက ဟွမ်ကွမ်းဇူအား သေဘေးမှ လွတ်မြောက်လာသကဲ့သို့ ခံစားရစေပြီး သူ ရုတ်တရက် ရုန်းကန်ထလိုက်ကာ ကျောက်တုံးတစ်တုံးပေါ်သို့ အလျင်အမြန် တွယ်တက်သွားလေသည်။

"ငါ မသေသေးဘူး... ငါ မသေသေးဘူးကွ"

"ဟားဟားဟား... ငါ အသက်ရှင်နေသေးတယ်... ငါ တကယ်ကြီး အသက်ရှင်နေသေးတယ်"

"သူတို့တွေ အကုန် သေကုန်ပြီ... ဆရာလင်းရော... ဆရာလင်းတောင် သေသွားပြီ"

ဟွမ်ကွမ်းဇူသည် ရူးသွပ်နေသူ တစ်ယောက်ကဲ့သို့ သူ့ဘာသာ တစ်ယောက်တည်း ရေရွတ်နေလေသည်။

သူသည် ကျောက်တုံးပေါ်တွင် ဝပ်နေပြီး အတော်ကြာသည်အထိ မည်သည့်အသံမျှ မထွက်တော့ပေ။

ထိုအချိန်မှာပင် အပြင်ဘက်ရှိ ဧရာမ ချောက်ကမ်းပါးကြီးထဲသို့ လူတစ်စု ဝင်ရောက်လာပြီး ရေစီးကြောင်းအတိုင်း စုန်ဆင်းလာကြသည်။

ဤကွေ့ကောက်နေသော ချောက်ကမ်းပါးသည် လှေများကို လျင်မြန်စွာ သယ်ဆောင်သွားပြီး မြေအောက်ရှိ ဧရာမ ရေဝဲကြီးတစ်ခုထဲသို့ တရှိန်ထိုး ဝင်ရောက်သွားလေသည်။

သူတို့ ရေဝဲကြီးထဲမှ ပြန်လည် ထွက်ပေါ်လာသောအခါ သူတို့၏ မျက်စိရှေ့တွင် မြေအောက် လမ်းကြောင်းတစ်ခု ပေါ်လာ၏။

ထိုလမ်းကြောင်းထဲတွင် ရေဝပ်နေပြီး ပတ်ဝန်းကျင် တစ်ခုလုံးတွင် အမှောင်ဓာတ် စွမ်းအင်ကျောက်တုံးများ ပြည့်နှက်နေသည်။

ရေနတ်ဘုရားဂိုဏ်းမှ ဟန်ထိုက်၏ မျက်နှာတွင် ချက်ချင်း ဝမ်းသာသွားသော အရိပ်အယောင်များ ပေါ်လာပြီး "သွေးကြောလမ်းကြောင်း" ဟု ပြောလိုက်သည်။

စစ်တပ်မှ တင်းဟွေယိ၏ မျက်လုံးများလည်း ချက်ချင်း အရောင်လက်သွားသည်။ "တကယ် သွေးကြောလမ်းကြောင်းပဲ... ဒါမျိုးက ရေပေါ်ကျွန်းရဲ့ အတွင်းပိုင်းမှာပဲ ပေါ်လာတတ်တာ... ဒီချောက်ကမ်းပါးက သွေးကြောလမ်းကြောင်းဆီကို တိုက်ရိုက် ပေါက်နေလိမ့်မယ်လို့ မထင်ထားဘူး"

အခြားသူများကလည်း အံ့သြဝမ်းသာသော အမူအရာများ အသီးသီး ပေါ်လာကြသည်။

ယခုတစ်ကြိမ် ဝင်ရောက်လာရာတွင် ဤမျှ ချောမွေ့စွာဖြင့် သွေးကြောလမ်းကြောင်းကို ရှာတွေ့လိမ့်မည်ဟု မည်သူကမျှ ထင်မှတ်မထားခဲ့ကြသည်မှာ သိသာလှပေသည်။

သွေးကြောလမ်းကြောင်းကို ရှာတွေ့ခြင်းသည် နှလုံးခန်းကို ရှာတွေ့နိုင်ပြီဟူသော အဓိပ္ပာယ်ပင် ဖြစ်သည်။

သွေးကြောလမ်းကြောင်း မည်မျှပင် ရှုပ်ထွေးပါစေ ပေါ်လာသည်နှင့် တစ်ပြိုင်နက် နှလုံးခန်းဆီသို့ သွားနိုင်မည်ဖြစ်ပြီး နှလုံးအမြူတေကို ရရှိရန် အခွင့်အရေး ရှိလာပြီဟု ဆိုလိုခြင်း ဖြစ်သည်။

ဤလူစုထဲတွင် စိတ်စွမ်းအင် အစွမ်းပိုင်ရှင်များ ပါဝင်နေသည်မှာ ထင်ရှားလှသည်။

သူတို့သည် အမှောင်ထုထဲတွင် ရောက်နေသော်လည်း ပတ်ဝန်းကျင် အခြေအနေကို ရှင်းလင်းစွာ ခွဲခြား သိမြင်နိုင်စွမ်း ရှိကြသည်။

ဒါက စိတ်စွမ်းအင်ဖြင့် ထောက်လှမ်းခြင်းမှ ရရှိလာသော ရလဒ်ဖြစ်ကြောင်း ရှင်းလင်းနေပေသည်။

"မြန်မြန်... အားလုံး လှေပေါ်က ဆင်းကြ... ဒီနေရာက ရေအရမ်းတိမ်တော့ ငါတို့လှေတွေ ဆက်သွားလို့ မရတော့ဘူး"

"ကျောက်ချပြီး လှေရပ်လိုက်... ရှုပ်ယှက်ခတ်မနေကြနဲ့... မလောကြနဲ့... ဒီလိုအချိန်မျိုးမှာ ပိုပြီး တည်တည်ငြိမ်ငြိမ် နေဖို့ လိုတယ်"

"သွေးကြောလမ်းကြောင်းက အရမ်းရှုပ်ထွေးတယ်... အထဲမှာ မရေမတွက်နိုင်တဲ့ သွေးကြောလမ်းကြောင်းတွေ ရှိနေတာ... လမ်းနည်းနည်း မှားသွားတာနဲ့ လမ်းပျောက်ပြီး အထဲမှာ ပိတ်မိသွားဖို့ အရမ်းလွယ်တယ်"

"အားလုံး နားထောင်ကြ... အနည်းဆုံး သုံးယောက်တစ်ဖွဲ့ ဖွဲ့မယ်... အဖွဲ့တိုင်းမှာ လမ်းရှာဖို့ စိတ်စွမ်းအင် အစွမ်းပိုင်ရှင် တစ်ယောက်စီ ပါရမယ်... ဒီနေရာက အမှောင်စွမ်းအင်တွေ ပြည့်နှက်နေတဲ့ ကမ္ဘာပဲ... ဘာအလင်းရောင်မှ ရှိမှာမဟုတ်ဘူး"

"သတိထားကြဦး... ဒီမှာ အမှောင်ဓာတ် သန္ဓေပြောင်း သတ္တဝါတွေ ရှိနေနိုင်တယ်"

လှေအသီးသီးပေါ်ရှိ အဖွဲ့အစည်း အသီးသီးမှ ခေါင်းဆောင်များသည် ကျယ်လောင်စွာ အော်ဟစ်ပြီး သူတို့၏ လက်အောက်ငယ်သားများကို အစီအစဉ်ချပေးနေကြသည်။

လှေများ ကျောက်ချ ရပ်နားလိုက်ပြီးနောက် အဖွဲ့အသီးသီးမှ လူများသည် အဆင်သင့် ပြင်ဆင်ကာ အမှောင်ထဲတွင် စမ်းတဝါးဝါးဖြင့် လှေပေါ်မှ ခုန်ဆင်းလိုက်ကြသည်။

"ဝုန်း"

"ဗွမ်း"

တချို့လူများက ရေအိုင်ထဲသို့ ကျသွားသဖြင့် ရေလှိုင်းများ ကြီးမားစွာ ဖြန်းခနဲ ပက်စင်သွားပြီး၊ တချို့လူများကမူ ကျောက်ဆောင်များပေါ်သို့ နင်းမိသွားကာ တဒုန်းဒုန်း မြည်သံများ ထွက်ပေါ်လာလေသည်။

"တောက်... ဘာမှလည်း မမြင်ရဘူး... အမှောင်ကိုတော့ ငါတော်တော်မုန်းနေပြီ" ဟု တစ်ယောက်က တီးတိုး ဆဲရေးလိုက်သည်။

"ချင်ရှုံး... မင်း အမှောင်ကြောက်နေတာတော့ မဟုတ်ပါဘူးနော်"

"သေလိုက်လေ"

လူစုထဲမှ ဟားတိုက် ရယ်မောသံများ ထွက်ပေါ်လာပြီး ကြောက်ရွံ့နေသည့်ပုံစံ လုံးဝ မရှိကြပေ။

ရှေ့ဆုံးမှ စိတ်စွမ်းအင် အစွမ်းပိုင်ရှင် တစ်ယောက်က ဦးဆောင်ပြီး "အားလုံး ငါ့နောက်က လိုက်ခဲ့ကြ လူမကွဲစေနဲ့... ဒီလမ်းက အရမ်းကျယ်တယ်" ဟု အော်ပြောလိုက်သည်။

အခြားတစ်ယောက်ကလည်း လေးနက်သော အသံဖြင့် "တခြားအဖွဲ့က လူတွေ ချောင်းတိုက်တာကို သတိထားကြဦး" ဟု ပြောလိုက်သည်။

အဖွဲ့အစည်း အသီးသီးမှ လူများသည် အစုလိုက် စုဝေးသွားကြပြီး အခြားသူများကို သတိထား စောင့်ကြည့်နေကြသည်။

စစ်တပ်ဘက်မှ တင်းဟွေယိက စိတ်စွမ်းအင်ကို အသုံးပြု၍ ပတ်ဝန်းကျင်ကို ဖြန့်ကြက် ထောက်လှမ်းလိုက်ရာ ပတ်လည် ပေ ၁၃၀၀ ခန့် အတွင်းရှိ အရာအားလုံးကို အသေးစိတ်ကအစ ရှင်းလင်းစွာ သိမြင်လိုက်ရသည်။

ထိုအချက်က သူ့စိတ်ကို အတော်လေး တည်ငြိမ်သွားစေသည်။

အခြားသူများ မမြင်ရသော်လည်း အနည်းဆုံးတော့ သူသည် ၈၄ မှတ်ရှိသော စိတ်စွမ်းအင် အရည်အသွေးကို အားကိုး၍ ပတ်ဝန်းကျင်ရှိ အရာအားလုံးကို ရှင်းလင်းစွာ အာရုံခံနိုင်စွမ်း ရှိနေပေသည်။

"မြေမိခင်ဂိုဏ်းက ဒီတစ်ခေါက် လာတာ မြေရိုင်းစောင့်ကြည့်သူ ဖန်ဟောင်ပဲ... ဒီလူက မြေဓာတ် အစွမ်းပိုင်ရှင်ဆိုတော့ စိတ်စွမ်းအင်နဲ့ ထောက်လှမ်းနိုင်တဲ့ အစွမ်း မရှိဘူး... သိပ်ပြီး အန္တရာယ် မကြီးလှဘူး"

"ရေနတ်ဘုရားဂိုဏ်းက လာတာကျတော့ ရေလေး ယဇ်ပုရောဟိတ် တိန့်ကျဲနဲ့ ကပ်ရောဂါ ယဇ်ပုရောဟိတ် ဟန်ထိုက် တို့ပဲ... ဒီနှစ်ယောက်မှာလည်း စိတ်စွမ်းအင် ထောက်လှမ်းတဲ့ အစွမ်းမရှိတော့ စိတ်ပူစရာ မလိုဘူး"

"ဝိညာဉ်စွမ်းအင်ဂိုဏ်းက ဒီတစ်ခေါက် လာတာ ဆင့်ကဲပြောင်းလဲခြင်း ကောင်စီရဲ့ အမတ်ကြီး ခုနစ်ယောက်ထဲက တစ်ယောက်ဖြစ်တဲ့ အရိပ်ကောင်စီ ဥက္ကဋ္ဌပဲ... သူ့ရုပ်ကို ဘယ်သူမှ မသိကြပေမဲ့ သူက အမှောင်ဓာတ် အစွမ်းပိုင်ရှင် ဆိုတာတော့ သံသယဖြစ်စရာ မလိုဘူး"

"အခု ဒီနေရာက သူ့အတွက် အားသာတဲ့ နေရာဖြစ်နေတော့ သတိထားရဆုံးက ဒီလူပဲ"

တင်းဟွေယိသည် အခြေအနေကို ရှင်းလင်းစွာ သုံးသပ်ပြီးနောက် ဝိညာဉ်စွမ်းအင်ဂိုဏ်းရှိရာဘက်သို့ သူ၏ စိတ်စွမ်းအင်ကို အာရုံစိုက်၍ ချက်ချင်း စောင့်ကြည့်လိုက်သည်။

ယခုအချိန်တွင် ဝိညာဉ်စွမ်းအင်ဂိုဏ်းမှ လူများသည် ထူးဆန်းသော ခမောက်တစ်မျိုးကို အသီးသီး ဆောင်းလိုက်ကြသည်။

ထိုခမောက်၏ ပုံစံသည် ရေခူနှင့် တူပြီး အဓိက ကိုယ်ထည်ကို ရွှေဖြင့် ပြုလုပ်ထားကာ ရှည်လျားသော လက်တံများစွာက ဝဲပျံနေလေသည်။

ထိုဝဲပျံနေသော လက်တံများကို မည်သည့်အရာဖြင့် ပြုလုပ်ထားမှန်း မသိရပေ။

ယခုအခါ ထိုသူများသည် ဤထူးဆန်းသော ခမောက်ကို ဆောင်းလိုက်သည်နှင့် ပြင်ပအခြေအနေကို ချက်ချင်း ရှင်းလင်းစွာ မြင်နိုင်သွားသကဲ့သို့ အသီးသီး ပြေးလွှားသွားကြတော့သည်။

ထိုမြင်ကွင်းကို မြင်လိုက်ရသော တင်းဟွေယိမှာ ချက်ချင်း အံ့သြထိတ်လန့်သွားပြီး "ဝိညာဉ်စွမ်းအင်ဂိုဏ်းမှာ အပြင်ဘက်ကို အာရုံခံနိုင်တဲ့ ပစ္စည်းတွေ ပါလာတယ်" ဟု အော်ပြောလိုက်သည်။

ထိုစကား ထွက်ပေါ်လာသည်နှင့် တစ်ပြိုင်နက် အခြား အဖွဲ့အစည်းများမှ လူများသည် ပတ်ဝန်းကျင်ကို အလျင်အမြန် လှည့်ကြည့်လိုက်ကြသည်။

ပေါင်ရှန်းမြို့၏ ခေါင်းဆောင် ရွှီဟောင်ယန်က ရုတ်တရက် လက်ကို ဝှေ့ယမ်းလိုက်သည်ကို တွေ့လိုက်ရသည်။

"ဝီ"

မျက်တောင်တစ်ခတ်အတွင်းမှာပင် သူ၏ လက်ဝါးထဲမှ စူးရှတောက်ပသော အလင်းလှိုင်းတစ်ခု ပစ်လွှတ်လိုက်လေသည်။

ပတ်ဝန်းကျင်ရှိ အမှောင်ဓာတ် စွမ်းအင်များသည် ချက်ချင်းပင် လွင့်စင် ပျောက်ကွယ်သွားတော့၏။

မိုးကြိုးတစ်စင်းက အမှောင် ကောင်းကင်ယံကို ဆွဲဖြဲကာ မြေပြင်ကို လင်းထိန်သွားစေသကဲ့သို့ပင်။

ထိုအလင်းရောင်ကို အသုံးချ၍ ရွှီဟောင်ယန်သည် ရုတ်တရက် ကိုယ်ကို ရှောင်တိမ်းကာ ဝိညာဉ်စွမ်းအင်ဂိုဏ်းမှ တပည့်တစ်ယောက်ကို ဆွဲဖမ်းလိုက်သည်။

တစ်ချိန်တည်းမှာပင် ရေဘောလုံးတစ်ခုက အခြား ဝိညာဉ်စွမ်းအင်ဂိုဏ်း တပည့်တစ်ယောက်ဆီသို့ ပြင်းထန်စွာ ဝင်အောင်းသွားလေသည်။

"ဝုန်း... ဝုန်း"

ရေဘောလုံးသည် တူရွင်းအကြီးစား တစ်ခုကဲ့သို့ ထိုဝိညာဉ်စွမ်းအင်ဂိုဏ်း တပည့်၏ ခန္ဓာကိုယ်ပေါ်သို့ ကျရောက်သွားပြီး မျက်တောင်တစ်ခတ်အတွင်းမှာပင် အသားစများအဖြစ် ကြိတ်ချေခံလိုက်ရသည်။

ထို့နောက် ထိုအသားစများအနီးတွင် ရေဓာတ်ဖြင့် ဖွဲ့စည်းထားသော ခန္ဓာကိုယ်တစ်ခု ချက်ချင်း ပေါ်လာပြီး မြေပြင်ပေါ်ရှိ ခမောက်ကို ကောက်ယူလိုက်သည်ကို တွေ့လိုက်ရ၏။

ရွှီဟောင်ယန်သည်လည်း ယခုအချိန်တွင် ခမောက်တစ်ခုကို လုယူနိုင်ခဲ့လေပြီ။

တင်းဟွေယိဘက်တွင်လည်း စိတ်စွမ်းအင်ကို အစွမ်းထက်သော စိတ်အဝေးထိန်းအစွမ်းအဖြစ် ပြောင်းလဲကာ ကျည်ဆန်တစ်တောင့်ကို ထိန်းချုပ်၍ ဝိညာဉ်စွမ်းအင်ဂိုဏ်း တပည့်တစ်ယောက်၏ ခေါင်းကို ချက်ချင်း ဖောက်ထွင်းပစ်လိုက်သည်။

သူသည်လည်း ခမောက်တစ်ခုကို လုယူနိုင်ခဲ့သည်။

နောက်ဆုံးတွင် ကျန်ရစ်နေသော မြေမိခင်ဂိုဏ်းဘက်သို့ ကြည့်လိုက်ရာ မြေရိုင်းစောင့်ကြည့်သူ ဖန်ဟောင်သည် ဝင်ရောက် တိုက်ခိုက်ခြင်း မရှိဘဲ သူ့ဘေးရှိ လူတစ်ဦးက လက်နှစ်ဖက်ဖြင့် မြေပြင်ကို ဖိနှိပ်လိုက်ရာ မြေပြင်တစ်ခုလုံး ပြင်းထန်စွာ တုန်ခါသွားလေသည်။

ရှေ့ရှိ ရေအိုင်သည် ပြင်းထန်စွာ လှုပ်ခတ်သွားပြီး ဝိညာဉ်စွမ်းအင်ဂိုဏ်း တပည့်တစ်ယောက်မှာ မမျှော်လင့်ဘဲ ရေအိုင်၏ ဝါးမျိုခြင်းကို ချက်ချင်း ခံလိုက်ရသည်။

ထိုရေအိုင်သည် အောက်ခြေမရှိသော တွင်းကြီးတစ်ခုအလား ထိုဝိညာဉ်စွမ်းအင်ဂိုဏ်း တပည့်ကို အဆက်မပြတ် မျိုချနေလေသည်။

ထို့နောက် မြေအောက်မှ လူရိပ်တစ်ခု ထွက်ပေါ်လာပြီး သူ၏ ခေါင်းပေါ်ရှိ ခမောက်ကို ချွတ်ယူကာ မြေအောက်သို့ လျင်မြန်စွာ ပြန်ဝင်သွားတော့၏။

တစ်ဖန် ပြန်ပေါ်လာချိန်တွင်မူ သူသည် မြေမိခင်ဂိုဏ်း၏ အဖွဲ့ထဲသို့ ပြန်ရောက်နေပြီ ဖြစ်ကာ မြေအောက်မှတစ်ဆင့် တက်လာခြင်း ဖြစ်သည်။

"ဆရာ... ရပါပြီ"

သူက ဖန်ဟောင်ထံသို့ ခမောက်ကို ရိုသေလေးစားစွာ ကမ်းပေးလိုက်သည်။

ဖန်ဟောင်က ပြုံး၍ ခေါင်းညိတ်ပြလိုက်သည်။ "မဆိုးဘူး"

ဝူမုန့်သည် အနောက်ဘက်တွင် ရပ်နေပြီး ဤမြင်ကွင်းကို ကြည့်ကာ ဘာမှမပြောသော်လည်း ထိုခမောက်ကို ကြည့်ရင်း တစ်စုံတစ်ခုကို စဉ်းစားနေပုံရသည်။

"ရတယ်... မင်းတို့ စောင့်နေလိုက်"

ဝိညာဉ်စွမ်းအင်ဂိုဏ်းထဲမှ ယောက်ျားတစ်ဦးက ဒေါသတကြီး အော်ဟစ်လိုက်သော်လည်း ဆက်မနေရဲဘဲ အမှောင်ထုထဲသို့ လှည့်၍ အပြေးအလွှား ဝင်ရောက်သွားလေသည်။

သို့သော် သူ ထွက်သွားပြီး မကြာမီမှာပင် ဟင်းလင်းပြင်ထဲမှ လူရိပ်တစ်ခု ရုတ်တရက် ပေါ်လာ၏။

"ရွှပ်"

ဓားဖြင့် ကန့်လန့်ဖြတ် ခုတ်ချလိုက်ရာ ထိုသူ၏ ခေါင်း ပြတ်ကျသွားတော့သည်။

ထိုလူရိပ်က ခေါင်းပြတ်ကို ကောက်ယူလိုက်ပြီး ကိုယ်ကို တစ်ချက် ပြန်ခုန်လိုက်ရာ အရိပ်တစ်ခုအဖြစ် ပြောင်းလဲကာ ပျောက်ကွယ်သွားလေသည်။

ဤတိုတောင်းလှသော အလင်းရောင်ထဲတွင် ထိုသူ၏ လှုပ်ရှားမှုသည် လျှပ်စီးအလား လျင်မြန်လှသဖြင့် လူအများအပြား၏ အာရုံစိုက်ခြင်းကို ချက်ချင်း ခံလိုက်ရသည်။

တင်းဟွေယိသည် ခမောက်ကို ကိုင်ထားရင်း ထိုသူကိုလည်း သတိထားမိလိုက်သည်။

သူ မျက်မှောင် အနည်းငယ် ကြုတ်လိုက်သည်။ "ကျိအန်မြို့ ဖူရုံတောင်ကြားက လူပဲ... ဒီလူက အလျင်အမျိုးအစား အစွမ်းပိုင်ရှင်လား"

အလျင်အမျိုးအစားနှင့် ခွန်အားအမျိုးအစား အစွမ်းပိုင်ရှင်များကို ယေဘုယျအားဖြင့် အလေးမထားတတ်ကြသဖြင့် သူ အနည်းငယ် အံ့သြသွားမိသည်။

ကွမ်ဖူဘက်တွင် ဤအမျိုးအစား အစွမ်းပိုင်ရှင်များ အလွန်များပြားပြီး အဓိကအချက်မှာ သူတို့၏ စွမ်းရည်များက တစ်ခုတည်းသာ ရှိနေခြင်းကြောင့် ဖြစ်သည်။

အလျင် နည်းနည်းပိုမြန်ခြင်း၊ ခွန်အား နည်းနည်းပိုကြီးခြင်းထက် မပိုပေ။

အခြား အမျိုးအစား အစွမ်းပိုင်ရှင်များတွင် သူတို့ကို နှိမ်နင်းရန် နည်းလမ်းများစွာ ရှိကြလေသည်။

ဖူရုံတောင်ကြားကို အဘယ်ကြောင့် အလျင်အမျိုးအစား အစွမ်းပိုင်ရှင် တစ်ယောက်က ဦးဆောင်လာရသနည်း ဆိုသည်ကို တင်းဟွေယိ အနည်းငယ် သံသယ ဝင်သွားမိသည်။

သို့သော် ယခုအချိန်တွင် ဤလူစုက တပြိုင်နက်တည်း ဝင်ရောက် တိုက်ခိုက်နေကြရာ ဝိညာဉ်စွမ်းအင်ဂိုဏ်း တပည့်များကို ဝိုင်းဝန်း တိုက်ခိုက်မည့် အခြေအနေသို့ အပြည့်အဝ ရောက်ရှိနေပြီ ဖြစ်သည်။

ထိုမြင်ကွင်းကို တွေ့လိုက်ရသောအခါ ဝိညာဉ်စွမ်းအင်ဂိုဏ်း တပည့်၏ အနောက်တွင် အရိပ်မည်းတစ်ခု ရုတ်တရက် ပေါ်လာလေသည်။

ချက်ချင်းပင် ထိုအရိပ်မည်းက ဟင်းလင်းပြင်ဆီသို့ လက်ဝါးဖြင့် ရိုက်ချလိုက်သည်။

"ဝီ"

မျက်တောင်တစ်ခတ်အတွင်းမှာပင် ရွှီဟောင်ယန်၏ အလင်းလှိုင်းကြောင့် လင်းထိန်နေသော ကောင်းကင်ယံသည် ချက်ချင်း ပြန်လည် မှေးမှိန်သွားပြီး ပတ်ဝန်းကျင် တစ်ခုလုံး အမှောင်အတိ ပြန်ဖြစ်သွားတော့၏။

ထို့နောက် ပတ်ဝန်းကျင်မှ စူးစူးဝါးဝါး အော်ဟစ်သံများကို အဆက်မပြတ် ကြားလိုက်ရလေသည်။

တင်းဟွေယိ ချက်ချင်း ထိတ်လန့်သွားသည်။ "အရိပ်ကောင်စီ ဥက္ကဋ္ဌ ကျန်းမိ"

"ဟက်ဟက်... ငါက အရိပ် ဖြစ်နေပေမဲ့ မင်းတို့က ငါ မရှိဘူးလို့ တကယ် ထင်နေကြတာလား"

အမှောင်ထဲမှ အေးစက်စက် ရယ်မောသံ တစ်ခု ထွက်ပေါ်လာသည်။

ပတ်ဝန်းကျင်တွင် လူများ အဆက်မပြတ် အသတ်ခံနေရသဖြင့် ရွှီဟောင်ယန်က တစ်ဖန် ပြန်လည် တိုက်ခိုက်လိုက်သည်။

စူးရှတောက်ပသော အလင်းရောင် တစ်ခု ထပ်မံ ထွက်ပေါ်လာပြီး ပတ်ဝန်းကျင်ကို ဖြန့်ကြက်သွားကာ အမှောင်ထုကို နောက်တစ်ကြိမ် ဖယ်ရှားလိုက်ပြန်သည်။

သို့သော် ဤခဏလေးအတွင်းမှာပင် အဖွဲ့အစည်း အသီးသီးမှ လူသုံးလေးယောက်ခန့် ခေါင်းနှင့်ကိုယ် အိုးစားကွဲ သွားခဲ့ကြလေပြီ။

ဝိညာဉ်စွမ်းအင်ဂိုဏ်းမှ လူများကမူ သွေးကြောလမ်းကြောင်းထဲသို့ ခြေတစ်လှမ်း ဦးစွာ ဝင်ရောက်သွားကြပြီ ဖြစ်သည်။

ထိုမြင်ကွင်းကို တွေ့လိုက်ရသဖြင့် တင်းဟွေယိက ဘာမှဆက်မပြောတော့ဘဲ "တက်ကြ" ဟု ချက်ချင်း အော်ဟစ်လိုက်သည်။

အခြား အဖွဲ့အစည်း အသီးသီးကလည်း အသံကျယ်ကြီးများဖြင့် အော်ဟစ်လိုက်ကြပြီး သွေးကြောလမ်းကြောင်းထဲသို့ ချက်ချင်း လိုက်ပါ ဝင်ရောက်သွားကြတော့၏။

ဆက်ရန်...

အပိုင်း (၅၄၂) အရိပ်ကမ္ဘာထဲမှ ထွက်ခွာမည့်နည်းလမ်း

တင်းဟွေယိက သွေးကြောလမ်းကြောင်းထဲသို့ ပြေးဝင်သွားရင်း ထိုထူးဆန်းသော ခမောက်ကို ဆောင်းလိုက်သည်။

ခမောက်ကို ဆောင်းလိုက်သည်နှင့် မျက်နှာဖုံးပေါ်တွင် မီးခိုးရောင် မြင်ကွင်းများ ရုတ်တရက် ပေါ်လာသည်။

ထိုမြင်ကွင်းများမှာ သွေးကြောလမ်းကြောင်းပေါ်ရှိ မြင်ကွင်းများပင် ဖြစ်နေချေ၏။

"ဒီကိရိယာက အမှောင်ဓာတ်စွမ်းအင်တွေ ပြည့်နှက်နေတဲ့ နေရာမှာတောင် အပြင်ဘက်ကို သဲသဲကွဲကွဲ မြင်နိုင်တာပဲ"

တင်းဟွေယိ အလွန်အမင်း အံ့ဩသွားပြီး မယုံနိုင်အောင် ဖြစ်သွားရသည်။

သို့သော် မကြာမီမှာပင် တစ်ခုခု မှားယွင်းနေကြောင်း သူ သတိထားမိလိုက်သည်။ ရှေ့မှ မြင်ကွင်းများမှာ ရေလှိုင်းများကဲ့သို့ တုန်ခါနေသည်။

သူ့ရှေ့မှ လူရိပ်များ ဖြတ်ပြေးသွားချိန်တွင် လှုပ်ရှားမှုကြောင့် ပုံရိပ်များက ပို၍ ရှင်းလင်းလာသည်။

ထိုခဏ၌ပင် တင်းဟွေယိက ဤကိရိယာ၏ အလုပ်လုပ်ပုံ သဘောတရားကို ချက်ချင်း နားလည်သွားတော့သည်။

"ဒါ အသံလှိုင်းနဲ့ ထောက်လှမ်းတဲ့ နည်းပညာပဲ"

ကွမ်ဖူစစ်တပ်၏ အရာရှိကြီးတစ်ဦးအနေဖြင့် တင်းဟွေယိက ဤကဲ့သို့သော စစ်လက်နက် ကိရိယာမျိုးကို အလွန် ရင်းနှီးကျွမ်းဝင်နေသည်။

၎င်းမှာ ကြိမ်နှုန်းမြင့် အသံလှိုင်းများကို ထုတ်လွှင့်ပြီးနောက် ပြန်လည်ရိုက်ခတ်လာသော လှိုင်းများကို ဖမ်းယူကာ သုံးဖက်မြင် နေရာလွတ် အချက်အလက်များကို ပြန်လည် တည်ဆောက်သည့် လုပ်ငန်းစဉ် ဖြစ်သည်မှာ ရှင်းလင်းနေသည်။

ဤလုပ်ငန်းစဉ်ကို ကပ်ဘေးရေကြီးမှုကြီး မတိုင်မီကတည်းက လင်းနို့များ၏ သဘာဝကို အတုယူ၍ လေ့လာဖန်တီးထားခဲ့ကြပြီး ဖြစ်သည်။

အများသိနိုင်သော ယေဘုယျ ကိရိယာတစ်ခုကို ပြရလျှင် ဆေးရုံများရှိ အာထရာဆောင်း သည်လည်း ဤအသံလှိုင်းပုံရိပ်ဖော် နည်းပညာကို အသုံးပြုထားခြင်းပင်တည်း။

သူ ယခု ဆောင်းထားသော ကိရိယာမှာလည်း ထိုအလုပ်လုပ်ဆောင်ချက်မျိုး ရှိနေသည်မှာ သိသာထင်ရှားလှသည်။

"ဒီလို ကိရိယာမျိုးကို အမှောင်ဓာတ်စွမ်းအင်နဲ့ ပတ်သက်ပြီး အလွန်ကျွမ်းကျင်တဲ့သူမှပဲ တီထွင်နိုင်မှာ"

"ဒါ ဝိညာဉ်စွမ်းအင်ဂိုဏ်းက အရိပ်ကောင်စီ ဥက္ကဋ္ဌ ကျန်းမိပဲ ဖြစ်ရမယ်"

တစ်ချိန်တည်းမှာပင် အခြားသူများကလည်း ဤကိရိယာ၏ လျှို့ဝှက်ချက်ကို ရှာဖွေတွေ့ရှိသွားကြပြီး အားလုံး၏ မျက်နှာပေါ်တွင် ဝမ်းသာအံ့ဩမှုများ ပေါ်လွင်လာသည်။

"ဒါ အသံလှိုင်းနဲ့ ပုံရိပ်ဖော်တဲ့ ကိရိယာပဲ... အလင်းရောင် မလိုဘဲ ပတ်ဝန်းကျင်ကို ခွဲခြားသိမြင်နိုင်တယ်"

"သောက်ကျိုးနည်း... ဝိညာဉ်စွမ်းအင်ဂိုဏ်းမှာ ဒီလိုကိရိယာမျိုးတောင် ရှိနေတာလား"

"ဒါက သင်္ကေတနည်းပညာဆိုတာ အသိသာကြီးပဲ... သာမန် အသံလှိုင်းပုံရိပ်ဖော်စက်ဆိုရင် ဒီလောက်အထိ အကွာအဝေးကို မထောက်လှမ်းနိုင်သလို ဒီလောက်လည်း တိကျမှာ မဟုတ်ဘူး"

"ပေ ၃၀၀ ပတ်လည်လောက်အထိ ပုံရိပ်ဖော်နိုင်တာဆိုတော့ လုံလောက်နေပါပြီ"

"မြန်မြန်လိုက်ကြ... ဝိညာဉ်စွမ်းအင်ဂိုဏ်းက ကောင်တွေကို ဖမ်းပြီး ပုံရိပ်ဖော်ကိရိယာတွေ ထပ်လုကြမယ်"

လူတစ်ယောက်က သတိဝင်လာပြီး ချက်ချင်းပင် လေသံတိုးတိုးဖြင့် ဟစ်အော်လိုက်သည်။

တင်းဟွေယိလည်း ရုတ်တရက် အသိဝင်လာကာ ချက်ချင်း ကိုယ်ကိုလှည့်၍ ဟစ်အော်လိုက်သည်။ "အားလုံး ငါ့နောက်လိုက်ခဲ့"

နောက်မှ တပ်ဖွဲ့များကလည်း အသီးသီး လိုက်ပါလာကြပြီး သွေးကြောလမ်းကြောင်းထဲသို့ ပြေးဝင်ကာ ဝိညာဉ်စွမ်းအင်ဂိုဏ်းမှ တပည့်များကို လိုက်လံ သတ်ဖြတ်ကြတော့သည်။

ခဏချင်းမှာပင် ရေနတ်ဘုရားဂိုဏ်း၊ မြေမိခင်ဂိုဏ်း၊ ဖူရုံတောင်ကြားနှင့် ပေါင်ရှန်းမြို့ စသည့် အဖွဲ့အစည်း အသီးသီးမှ လူများလည်း နောက်မှ လိုက်သွားကြလေသည်။

မျက်တောင်တစ်ခတ်အတွင်းမှာပင် ဤသွေးကြောလမ်းကြောင်း အဝင်ဝ၌ လူသူကင်းမဲ့သွားပြီး ရေပေါ်တွင် မျောပါနေသော ကျောက်ချထားသည့် သင်္ဘောကြီးအချို့သာ ကျန်ရစ်ခဲ့တော့သည်။

မည်မျှ ကြာသွားသည် မသိ၊ ရုတ်တရက် ရေအောက်မှနေ၍ ဧရာမ နဂါးနက်ကြီး တစ်ကောင် ထွက်ပေါ်လာသည်။

၎င်းက ခန္ဓာကိုယ်ကို လိမ်ယှက်ကာ ရေထဲမှ ကွေ့ကောက်တွားသွားလျက် တက်လာ၏။

ထိုသင်္ဘောကြီးများ ရှေ့သို့ ရောက်သောအခါ ဒေါသတကြီး ဟိန်းဟောက်လိုက်သည်။

ထို့နောက် သွေးကြောလမ်းကြောင်းဆီသို့ လျင်မြန်စွာ လိုက်သွားလေသည်။

တစ်ချိန်တည်းမှာပင် ဦးနှောက်ကန်အတွင်းရှိ အရိပ်တစ်ခုထဲတွင်...

ဟွမ်ကွမ်းဇူက ကျောက်တုံးပေါ်တွင် ထိုင်လျက် ပတ်ပတ်လည်ကို တစ်ပတ်လှည့်ကြည့်လိုက်ပြီးနောက် ထိုနဂါးနက်ကြီး အပြီးတိုင် ထွက်ခွာသွားပြီဖြစ်ကြောင်း အတည်ပြုနိုင်လိုက်သည်။

သူက သက်ပြင်းတစ်ချက်ချလိုက်မိပြီး နောက်ဆုံးတော့ အသိပြန်ဝင်လာတော့သည်။

သူက သန္ဓေပြောင်းစွမ်းအင်များကို စုပ်ယူကာ ခန္ဓာကိုယ်အတွင်း ကုန်ခမ်းသွားသော စွမ်းအင်များကို ပြန်လည်ပြည့်ဖြိုးရန် ကြိုးစားလိုက်သည်။

သို့သော် သူ့ခန္ဓာကိုယ်ကို သူ ပြန်စမ်းကြည့်လိုက်သောအခါ မျက်နှာအမူအရာ ချက်ချင်း ပြောင်းလဲသွားသည်။

"သေစမ်း... ငါက အခု အရိပ်ကမ္ဘာထဲမှာ ရှိနေသေးတာ... သုံးဖက်မြင် ပစ္စည်းတွေကို လုံးဝ ထုတ်ယူလို့ မရဘူး"

သူ၏ မျက်နှာ ပျက်သွားပြီး စိုးရိမ်ပူပန်မှုများ အပြည့် ဖုံးလွှမ်းသွားသည်။

"ဒီလိုဆို ငါက အရိပ်ကမ္ဘာထဲမှာ ပိတ်မိနေတော့မှာပေါ့"

"မဖြစ်ဘူး... ဒီလို လုံးဝ မဖြစ်နိုင်ဘူး"

"ဟိုနဂါးနက်ကြီး ပြန်မလာခင် ဒီအရိပ်ကမ္ဘာထဲကနေ ငါ အမြန် ထွက်သွားမှ ရမယ်"

ထိုသို့ တွေးမိပြီး ဟွမ်ကွမ်းဇူသည် မိမိခန္ဓာကိုယ်အတွင်းရှိ သန္ဓေပြောင်းစွမ်းအင်များကို စတင် အသက်သွင်းရန် ကြိုးစားလိုက်သည်။

သို့သော် လုံးဝ အသုံးမဝင်ပေ။ အရိပ်ကမ္ဘာထဲတွင် အမှောင်ဓာတ် စွမ်းအင်မှလွဲ၍ အခြား မည်သည့်စွမ်းအင်ကိုမျှ အသုံးပြု၍ မရနိုင်ချေ။

သူ၏ အလင်းဓာတ် သန္ဓေပြောင်းအစွမ်းမှာမူ ပို၍ပင် အဖိနှိပ်ခံထားရသေးသည်။

"တောက်... သေစမ်း... မရဘူးဟ... လုံးဝ သုံးလို့မရဘူး"

"ငါက ဒီအရိပ်ကမ္ဘာထဲမှာပဲ ပိတ်မိပြီး သေရတော့မှာလား"

ဟွမ်ကွမ်းဇူ၏ သေဘေးမှ လွတ်မြောက်လာသည့် ဝမ်းသာမှုပင် မပျောက်သေးခင် ယခုအခါ သေမင်း၏ အရိပ်က သူ့ကို တစ်ဖန် ပြန်လည် လွှမ်းမိုးလာပြန်သည်။

သူ လက်မခံနိုင်ဖြစ်ကာ ခဏချင်းမှာပင် စိတ်ဓာတ်များ ပြိုလဲကျသွားတော့သည်။

"ဒီလိုမဖြစ်ရဘူး... ကယ်ကြပါဦး... လူရှိလား"

"ငါ ဒီမှာ မသေချင်ဘူး... ငါ အပြင်ထွက်ချင်တယ်... ငါ ထွက်သွားချင်တယ်"

ဟွမ်ကွမ်းဇူက ငိုယိုအော်ဟစ်နေသည်။ သို့သော် ထိုလှုပ်ရှားမှုက အနည်းငယ် ကြီးမားသွား၏။

ရုတ်တရက် ပတ်ဝန်းကျင်မှ တစ်စုံတစ်ခု ကူးခတ်လာသကဲ့သို့ သူ ခံစားလိုက်ရသည်။

ဟွမ်ကွမ်းဇူ ထိတ်လန့်သွားသည်။ "ဒုက္ခပဲ... ဒီအရိပ်ကမ္ဘာထဲမှာ ဟိုအရိပ်တစ္ဆေတွေ ရှိနေသေးတယ်"

သူ အလျင်အမြန် ပါးစပ်ပိတ်လိုက်ပြီး ကပျာကယာ ပုန်းအောင်းလိုက်သည်။

အရိပ်ကမ္ဘာထဲတွင် ရှိနေသောကြောင့် သူကိုယ်တိုင်လည်း အရိပ်တစ်ခု ဖြစ်နေလေသည်။

ထို့ကြောင့် အရိပ်တစ္ဆေများက သူ့ကို သတိမထားမိကြပေ။

အရိပ်တစ္ဆေအချို့ အနီးအနားတွင် တစ်ပတ်လှည့်လည်သွားသော်လည်း ပုန်းအောင်းနေသော ဟွမ်ကွမ်းဇူကို မတွေ့ရသဖြင့် ပြန်လည် ကူးခတ်ထွက်သွားကြသည်။

ဟွမ်ကွမ်းဇူမှာ ကြောက်လန့်တကြား တုန်ရီနေပြီး ယခုအချိန်တွင် ရမ်းသန်း မအော်ရဲတော့သလို အခြား မည်သည့်နည်းလမ်းမှလည်း မရှိတော့ချေ။

အရိပ်အဖြစ် ပြောင်းလဲသွားသော သူသည် ဤအရိပ်ကမ္ဘာထဲတွင် လုံးလုံးလျားလျား ပိတ်မိသွားခဲ့လေပြီ။

သူက အရိပ်ကမ္ဘာ၏ ကန့်သတ်ချက်များကို မခံရသော ပစ္စည်းသိုလှောင်ခန်း ပိုင်ဆိုင်ထားသည့် လင်းယွမ် မဟုတ်သလို ပုန်းအောင်းနိုင်ရန် သုမာရု ဟင်းလင်းပြင်လည်း မရှိပေ။

ထိုအချိန်၌ သုမာရု ဟင်းလင်းပြင်ထဲတွင်...

လင်းယွမ်သည် တင်ပျဉ်ခွေ ထိုင်နေပြီး သူ့မျက်နှာပေါ်တွင်လည်း သေဘေးမှ လွတ်မြောက်လာသည့် ခံစားချက်မျိုး ပေါ်လွင်နေသည်။

"သေဖို့ နည်းနည်းပဲလိုတယ်"

ကြောက်မက်ဖွယ်ကောင်းသော ထို အမှတ် ၁၀၀ သန္ဓေပြောင်း နဂါးနက်ကြီးကို ပြန်တွေးမိတိုင်း လင်းယွမ်၏ ရင်ထဲတွင် တုန်လှုပ်နေဆဲပင်။

ဤရေပေါ်ကျွန်းပေါ်တွင် ဤမျှ ကြောက်စရာကောင်းသော သန္ဓေပြောင်း သတ္တဝါကြီး ပုန်းအောင်းနေမည်ဟု မည်သူ ထင်ထားမည်နည်း။

ထို့အပြင် ၎င်းက အမှောင်ဓာတ် သန္ဓေပြောင်း သတ္တဝါ တစ်ကောင်လည်း ဖြစ်နေသေးသည်။

လင်းယွမ်က ထိုနဂါးနက်သည် ဤနေရာရှိ ဦးနှောက်အမြူတေကို သန့်စင်ပြီးဖြစ်နိုင်သည်ဟုပင် သံသယ ဝင်မိသည်။

သို့မဟုတ်လျှင် ဤတိရစ္ဆာန်က မည်သို့လုပ်၍ အမှတ် ၁၀၀ ဟူသော ကြောက်မက်ဖွယ် အဆင့်သို့ ဤမျှ လျင်မြန်စွာ ရောက်ရှိနိုင်မည်နည်း။

ဓာတ်သဘာဝတူညီသော သန္ဓေပြောင်း သတ္တဝါများအတွက် ရေပေါ်ကျွန်း၏ ဦးနှောက်အမြူတေ သို့မဟုတ် နှလုံးအမြူတေကို သန့်စင်လိုက်ပါက စွမ်းအားများ အလွန် လျင်မြန်စွာ မြင့်တက်လာတတ်သည်။

မြူခိုးမြို့တော်မှ ချန်ယွင်တောက် ကဲ့သို့ပင်၊ သူ ဦးနှောက်အမြူတေကို သန့်စင်ပြီးနောက် သူတစ်ယောက်တည်း၏ စွမ်းအားက ကျွန်းပေါ်သို့ တက်လာသော မြေမိခင်ဂိုဏ်းမှ အစွမ်းပိုင်ရှင် အားလုံးကို နင်းချေနိုင်လုနီးပါး ဖြစ်ခဲ့သည်။

အကယ်၍ သူက နှလုံးအမြူတေကို ခုမှစတင် သန့်စင်နေသည့် အရေးကြီးသော အချိန်တွင်သာ မရှိနေခဲ့လျှင် ထိုအချိန်က လင်းယွမ်တို့ မြူခိုးမြို့တော်ထဲမှ လွတ်မြောက်နိုင်၊ မလွတ်မြောက်နိုင် ဆိုသည်မှာ မသေချာလှပေ။

ရှင်းမြွေမိစ္ဆာ ဟင်းလင်းပြင်မှ ထိုဓားမြီး ပင်လယ်မြွေကြီး မည်သည့်အတွက်ကြောင့် စွမ်းအားများ ရုတ်တရက် မမြင့်တက်လာဘဲ အလွန်အမင်း မစွမ်းထက်လာသနည်း ဆိုလျှင်...

အဓိက အကြောင်းရင်းမှာ ဓားမြီး ပင်လယ်မြွေ၏ မူလဓာတ်သဘာဝနှင့် ရှင်းမြွေမိစ္ဆာ ဟင်းလင်းပြင်၏ နှလုံးအမြူတေ ဓာတ်သဘာဝတို့ မတူညီသောကြောင့်ပင် ဖြစ်သည်။

သို့သော် ထိုသို့ဖြစ်နေသည့်တိုင် ဓားမြီး ပင်လယ်မြွေ၏ စွမ်းအားတိုးတက်မှုနှုန်းမှာ အနည်းငယ်မျှ နှေးကွေးခြင်း မရှိခဲ့ပေ။

အနည်းဆုံးတော့ လင်းယွမ်တို့ ရှင်းမြွေမိစ္ဆာ ဟင်းလင်းပြင်ထဲသို့ မဝင်ရောက်မီက ဟင်းလင်းပြင် အတွင်းရှိ မျိုးရိုးဗီဇမျိုးစေ့ အစွမ်းပိုင်ရှင်များ မဟာမိတ်အဖွဲ့ပင်လျှင် ၎င်းကို သုတ်သင်နိုင်မည့် နည်းလမ်း မရှိခဲ့ကြချေ။

ဝူယောင်ပန်း ပင်လျှင် ၎င်းကို ဘာမှ မလုပ်နိုင်ခဲ့ပေ။

ယခုအခါ လီချင်းဟွာသည် မြွေမိစ္ဆာ ဟင်းလင်းပြင်၏ နှလုံးအမြူတေကို ခုမှ ရရှိထားခြင်း ဖြစ်သည်။

သူနှင့် မြွေမိစ္ဆာ ဟင်းလင်းပြင်၏ နှလုံးအမြူတေကြား ကိုက်ညီမှုက အလွန်မြင့်မားသဖြင့် နောက်မကြာမီ အချိန်အတွင်း သူ၏ စွမ်းအားများသည် အလွန်လျင်မြန်စွာ ထိုးတက်လာလိမ့်မည်သာ ဖြစ်သည်။

လင်းယွမ်သည် သုမာရု ဟင်းလင်းပြင်ထဲတွင် ထိုင်ရင်း သူ၏ လက်ရှိ အရည်အသွေး ပြောင်းလဲမှုများကို တစ်ချက် စစ်ဆေးကြည့်လိုက်သည်။

အမည် - လင်းယွမ်

ခန္ဓာကိုယ်ကြံ့ခိုင်မှု - ၉၁

ခွန်အား - ၉၈

အလျင် - ၉၄

စိတ်စွမ်းအင် - ၉၆.၅

ဘုံအရည်အသွေးမှတ်များ - ဝ

မျိုးရိုးဗီဇမျိုးစေ့ - အသွင်တစ်ရာ မျောက်ဝံမိစ္ဆာ၊ ရေခဲမြေရိုင်းဝက်ဝံ၊ သုမာရု ဟင်းလင်းပြင် ပုရွက်ဆိတ်

မျိုးရိုးဗီဇမြေပုံ - အသွင်တစ်ရာ မျောက်ဝံမိစ္ဆာ (အခြေခံအဆင့်)၊ ရေခဲမြေရိုင်းဝက်ဝံ (အခြေခံအဆင့်)၊ သုမာရု ဟင်းလင်းပြင် ပုရွက်ဆိတ် (အခြေခံအဆင့်)

ပင်ကိုယ်အစွမ်း - မျိုးရိုးဗီဇ အသွင်တစ်ရာ၊ သုမာရု ဟင်းလင်းပြင်

အစွမ်းများ - ကြွက်သားပေါက်ကွဲအစွမ်း...

အမှတ် - ၃၉၂၁ မှတ်

"အရည်အသွေးမှတ် အကုန်လုံး ၉၀ ကျော်သွားပြီပဲ"

"ဒါပေမဲ့ အသုံးမဝင်သေးဘူး... စိတ်စွမ်းအင်က အမှတ် ၁၀၀ မပြည့်ရင် ဟိုနဂါးနက်ကြီးကို ဘယ်လိုမှ ခုခံနိုင်မှာ မဟုတ်ဘူး"

ထိုနဂါးနက်ကြီး၏ အဓိက အရည်အသွေးသည် စိတ်စွမ်းအင် ဖြစ်ရမည်ဆိုတာကို လင်းယွမ် ယခု နားလည်သွားပြီ ဖြစ်သည်။

သက်ရှိများကို အရိပ်ကမ္ဘာထဲသို့ ဆွဲသွင်းနိုင်သည့် ၎င်း၏ အစွမ်းမှာ စိတ်စွမ်းအင်အပေါ် မှီခိုနေရသည်မှာ သေချာသည်။

မိမိကိုယ်တိုင်သာ စိတ်စွမ်းအင် အမှတ် ၁၀၀ သို့ မရောက်ရှိသေးပါက ၎င်း၏ ဤအစွမ်းကို လုံးဝ ကာကွယ်နိုင်မည် မဟုတ်ပေ။

"ကျွန်းပေါ်တက်လာတဲ့ လူတွေထဲမှာ အသက်ရှင်လျက် ပြန်သွားနိုင်မယ့်သူ တစ်ယောက်မှ ရှိမှာ မဟုတ်တော့ဘူးထင်တယ်"

လင်းယွမ်က အသက်ကို ပြင်းပြင်းတစ်ချက် ရှူသွင်းလိုက်ပြီး လက်ရှိ အကျပ်အတည်းမှ ဖောက်ထွက်နိုင်မည့် နည်းလမ်းကို စဉ်းစားလိုက်သည်။

"အခုလောလောဆယ် ငါ့အမှတ်တွေလည်း ကုန်သွားပြီ... အမှတ်တွေ ရှိနေရင်တောင် စိတ်စွမ်းအင် အရည်အသွေးမှတ်ကို မဲပေါက်မယ်လို့ အာမမခံနိုင်ဘူး"

"နောက်ဆုံး နည်းလမ်းတစ်ခုတော့ ကျန်သေးတယ်"

လင်းယွမ်၏ မျက်ဝန်းများ အရောင်လက်သွားပြီး ပစ္စည်းသိုလှောင်ခန်းထဲမှ အမှောင်ဓာတ်သွေးများ အမြောက်အမြားကို လျင်မြန်စွာ ထုတ်ယူလိုက်သည်။

ထိုသွေးများက လေထဲတွင် ပေါလောပေါ်နေပြီး ပုံပန်းသဏ္ဍာန် မကျသော တွင်းနက်ကြီးတစ်ခုအလား အလင်းရောင် အားလုံးကို စုပ်ယူပစ်လိုက်သည်။

ထိုသွေးများထဲတွင် အမှောင်ဓာတ် စွမ်းအင်များ အမြောက်အမြား ပြည့်နှက်နေလေသည်။

"ငါ့ခန္ဓာကိုယ်ကိုပဲ မီးဖိုတစ်ခုအနေနဲ့ သုံးပြီး... အခုပဲ ဒီအမှောင်ဓာတ်သွေးတွေကို မျိုချပြီး အမှောင်ဓာတ် မျိုးရိုးဗီဇမျိုးစေ့ကို သန့်စင်လိုက်မယ်"

"အမှောင်ဓာတ် မျိုးရိုးဗီဇမျိုးစေ့ကို ငါ ပိုင်ဆိုင်သွားတာနဲ့ တစ်ပြိုင်နက်... ငါ့ရဲ့ မျိုးရိုးဗီဇ အသွင်တစ်ရာ ပင်ကိုယ်အစွမ်းကို သုံးပြီး အမှောင်ဓာတ် စွမ်းအင်တွေကို စိတ်ကြိုက် အသုံးချနိုင်လိမ့်မယ်"

"ဒီလိုဆိုရင် အရိပ်ကမ္ဘာက ငါ့ကို ဘယ်လိုမှ ပိတ်လှောင်ထားနိုင်မှာ မဟုတ်တော့ဘူး"

"ဒါတင်မကသေးဘူး... ငါ စုစည်းရရှိလာမယ့် အမှောင်ဓာတ် မျိုးရိုးဗီဇမျိုးစေ့ အကူအညီနဲ့ ဒီနဂါးနက်ကို ပြန်သတ်ဖို့ နည်းလမ်းရှာလို့တောင် ရနိုင်တယ်... သူ့ခန္ဓာကိုယ်ထဲကနေ ဦးနှောက်အမြူတေကို သန့်စင်ယူနိုင်ရင်တောင် ယူနိုင်ဦးမှာ"

"နောက်ပြီး ဒီနေရာကြီးက နေရောင်လည်း မရ... အလင်းရောင်လည်း မရှိတဲ့ နေရာဆိုပေမဲ့... ငါသာ အမှောင်ဓာတ် မျိုးရိုးဗီဇမျိုးစေ့ကို စုစည်းနိုင်ခဲ့ရင် ဒီနေရာနဲ့ လုံးဝ အသားကျသွားသလို ဖြစ်သွားမှာပဲ... အဲဒီအခါကျရင် ငါက နှလုံးအမြူတေကို အကြောက်အလန့်မရှိ လိုက်ရှာလို့ ရသွားပြီ"

အရေးအကြီးဆုံးမှာ ယခုအချိန်တွင် သူ့အတွက် ဤနည်းလမ်းမှလွဲ၍ အရိပ်ကမ္ဘာထဲမှ ထွက်ခွာနိုင်မည့် အခြားနည်းလမ်း မရှိတော့ခြင်းပင် ဖြစ်သည်။

တကယ်တော့ လင်းယွမ်တွင် မိုက်မဲသော နည်းလမ်းတစ်ခု ရှိပါသေးသည်။ ထိုအရာက အချိန်ဆွဲခြင်းပင် ဖြစ်သည်။

သူက သုမာရု ဟင်းလင်းပြင်ထဲတွင် ပုန်းအောင်းနေပြီး အကြောင်းအကျိုး လွှဲပြောင်းမှုမှ အမှတ်များ စုဆောင်းရရှိလာမည့် အချိန်ကို စောင့်ဆိုင်းခြင်း ဖြစ်သည်။

သိထားရမည်မှာ ယခုအခါ အကြောင်းအကျိုး လွှဲပြောင်းမှုကို အားကိုးခြင်းဖြင့် လင်းယွမ် ဘာမှမလုပ်လျှင်တောင် ထိုက်ယန်တောင်ဘက်ရှိ သားသတ်ရုံမှ သူ့အတွက် နေ့စဉ် အမှတ် တစ်သောင်းခန့် ထောက်ပံ့ပေးနေခြင်း ဖြစ်သည်။

၎င်းမှာ နေ့စဉ် အရည်အသွေးမှတ် တစ်မှတ် ဝင်လာသည်နှင့် အတူတူပင် ဖြစ်သည်။

သူသာ စိတ်ရှည်သည်းခံနိုင်မည်ဆိုလျှင် အနှေးနှင့်အမြန် စိတ်စွမ်းအင် အရည်အသွေးမှတ်များကို မဲပေါက်နိုင်ပြီး စိတ်စွမ်းအင် အမှတ် ၁၀၀ အထိ တိုးမြှင့်နိုင်မည် ဖြစ်သည်။

ထိုအချိန်ကျလျှင် နဂါးနက်ကြီး ဖန်တီးထားသော ဤအရိပ်ကမ္ဘာထဲမှ သူ ရုန်းထွက်နိုင်မည် ဖြစ်သည်။

သို့သော် ဤနည်းလမ်းက အချိန်ယူရမည်မှာ သံသယဖြစ်ဖွယ် မရှိပေ။

ယခုအချိန်တွင် သူ အရှားပါးဆုံးအရာမှာ အချိန်ပင် ဖြစ်သည်။

အပြင်ဘက်တွင် အပြောင်းအလဲများစွာ ရှိနေသဖြင့် လင်းယွမ်က ဤနေရာတွင် အသေအလဲ ထိုင်စောင့်နေရန် မဖြစ်နိုင်ပေ။

"စောင့်နေလို့ မဖြစ်ဘူး... အခုပဲ အမှောင်ဓာတ် မျိုးရိုးဗီဇမျိုးစေ့ကို ချက်ချင်း စုစည်းရမယ်... ဒီအမှောင်ဓာတ်သွေးတွေက ဘယ်သတ္တဝါဆီကလဲ မသိသလို... ဘယ်လို မျိုးရိုးဗီဇမြေပုံမျိုး စုစည်းရရှိလာမလဲ ဆိုတာလည်း မသိဘူး"

လင်းယွမ်၏ မျက်ဝန်းများ အရောင်လက်သွားပြီး ဆက်လက် တုံ့ဆိုင်းမနေတော့ဘဲ ထိုသွေးများကို စုသိမ်းကာ ခေါင်းမော့၍ အကုန်လုံးကို ဂလုခနဲ မြိုချလိုက်တော့သည်။

မိမိခန္ဓာကိုယ်ကို မီးဖိုအဖြစ် အသုံးပြုကာ မျိုးရိုးဗီဇမျိုးစေ့ကို သန့်စင်ခြင်းမှာ သူ၏ ပထမဆုံး အကြိမ်ပင် ဖြစ်သည်။

သာမန်အားဖြင့် ဤနည်းလမ်းမျိုးသည် မျိုးရိုးဗီဇ အမွေအနှစ်တွင် ပါရှိလာသော နည်းလမ်း ဖြစ်သည်။

လင်းယွမ်၌ မူလကတည်းက အမှောင်ဓာတ် မျိုးရိုးဗီဇ အစွမ်း မရှိသဖြင့် သက်ဆိုင်ရာ အမွေအနှစ်မျိုးလည်း ရှိနိုင်မည် မဟုတ်ပေ။

သို့သော် သူသည် ချိုးကုံရုံထံမှ ဤကဲ့သို့သော အမွေအနှစ်မျိုးကို စောစောကတည်းက ရရှိခဲ့ပြီး ဖြစ်သည်။

လွန်ခဲ့သော ရက်အနည်းငယ်ကလည်း သူသည် လီချင်းဟွာ၊ တင်းယန် နှင့် ကျောက်ခိုင် တို့ သုံးဦးထံမှ သက်ဆိုင်ရာ အမွေအနှစ်များကို ထပ်မံ ရရှိထားခဲ့သည်။

သန့်စင်နည်း လေးမျိုးက သန္ဓေပြောင်းစွမ်းအင် ဓာတ်လေးမျိုးနှင့် အသီးသီး သက်ဆိုင်နေသည်။

သို့သော် လင်းယွမ်က ထိုအရာများထဲမှ ကောက်ချက်ချကြည့်ရာ ဤနည်းလမ်းလေးမျိုးမှာ ကြီးကြီးမားမား ကွာခြားမှု မရှိကြောင်း တွေ့ရသည်။

ထိုက်ယန်တောင် သုတေသနနှင့် ဖွံ့ဖြိုးရေးဌာနကပင် ရူပဗေဒ နည်းလမ်းများကို အသုံးပြု၍ မျိုးရိုးဗီဇ မီးဖိုကို တည်ဆောက်နိုင်သည်ဆိုလျှင် ဤသန့်စင်နည်းများ၌ တူညီသော အချက်များ ရှိနေသည်ကို ဖော်ပြနေခြင်းပင် ဖြစ်သည်။

ယခုအချိန်တွင် လင်းယွမ်သည် မျိုးရိုးဗီဇ မီးဖိုနေရာ၌ သူ၏ ခန္ဓာကိုယ်ကို အစားထိုးလိုက်ခြင်းမျှသာ ဖြစ်သည်။

လုပ်ငန်းစဉ်မှာ ရှုပ်ထွေးလှသည် မဟုတ်ပေ။ မျိုးရိုးဗီဇ မီးဖို တည်ဆောက်ရေး လုပ်ငန်းစဉ်ကို ထပ်ခါတလဲလဲ ကြည့်ရှုလေ့လာဖူးသဖြင့် လင်းယွမ်က ဤကိစ္စကို စောစောကတည်းက ရင်းနှီးကျွမ်းဝင်နေပြီ ဖြစ်သည်။

"ပလုံ ပလုံ"

လင်းယွမ်၏ ခန္ဓာကိုယ်အတွင်းမှ အသံများ အများအပြား ထွက်ပေါ်လာသည်။

သူ၏ သွေးလေများက ရူးသွပ်စွာ လည်ပတ်နေပြီး သွေးလေများမှ မီးဖိုအဖြစ် ပြောင်းလဲကာ ထိုအမှောင်ဓာတ်သွေးများကို ရူးသွပ်စွာ စတင်လောင်ကျွမ်းစေတော့သည်။

သွေးများအတွင်းရှိ အသုံးမဝင်သော အညစ်အကြေးများကို သွေးလေမီးဖိုက သန့်စင် ဖယ်ရှားပစ်လိုက်သည်။

အမှောင်ဓာတ် မျိုးရိုးဗီဇများ အမြောက်အမြား စုစည်း ဖိသိပ်ခံလိုက်ရသည်။

အဏုမြူအဆင့်တွင် မျိုးရိုးဗီဇကြိုးမျှင်များ တစ်ခုပြီးတစ်ခု ဖိသိပ်ပေါင်းစပ်သွားကြသည်။

အစေ့အဆန်ပုံစံ မျိုးရိုးဗီဇမျိုးစေ့များ တရစပ် စုစည်းဖြစ်ပေါ်လာလေသည်။

အချိန်များ တစ်စတစ်စ ကုန်ဆုံးသွားသည်။

သုမာရု ဟင်းလင်းပြင်ထဲတွင် နေ့နှင့်ညဟူ၍ မရှိသဖြင့် အချိန်မည်မျှ ကြာသွားသည်ကို မသိနိုင်ပေ။

ရုတ်တရက် အချိန်တစ်ခု၌ မြေပြင်ပေါ်တွင် တင်ပျဉ်ခွေ ထိုင်နေသော လင်းယွမ်၏ ခန္ဓာကိုယ် တစ်ခုလုံးတွင် ပြောင်းလဲမှုများ ဖြစ်ပေါ်လာသည်။

သူ့ပတ်လည်ရှိ အလင်းရောင်များ ရုတ်တရက် ပြိုကျသွားသည်ကို တွေ့လိုက်ရသည်။

သူ့တစ်ကိုယ်လုံးက တွင်းနက်ကြီးတစ်ခုကဲ့သို့ ပတ်ဝန်းကျင်ရှိ အလင်းရောင် အားလုံးကို လျင်မြန်စွာ စတင် စုပ်ယူလိုက်သည်။

မျက်တောင်တစ်ခတ်အတွင်းမှာပင် မူလက သုံးဖက်မြင် ကိုယ်ထည်ရှိသော လင်းယွမ်သည် ရုတ်တရက် ပိုးဟပ်တောင်ပံကဲ့သို့ ပါးလွှာသွားလေသည်။

နောက်ဆုံးတွင် အရိပ်တစ်ခုအဖြစ် တိုက်ရိုက် ပြောင်းလဲသွားပြီး မြေပြင်ပေါ်တွင် လူပုံသဏ္ဍာန် အမည်းရောင် ပြားချပ်ချပ် အရိပ်တစ်ခုသာ ကျန်ရစ်ခဲ့တော့သည်။

"ဟားဟားဟား... အောင်မြင်သွားပြီ"

ထိုအရိပ်မည်းက ဟားတိုက် ရယ်မောသံ ထွက်ပေါ်လာပြီး အသံမှာ လင်းယွမ်ပင် ဖြစ်သည်။

သူက အမှောင်ဓာတ် မျိုးရိုးဗီဇမျိုးစေ့ကို အောင်မြင်စွာ စုစည်းနိုင်ခဲ့ပြီး အရိပ်အဖြစ် ပြောင်းလဲနိုင်သည့် အစွမ်းကို ပိုင်ဆိုင်သွားခဲ့လေပြီ။

ယခုအချိန်မှစ၍ အရိပ်ကမ္ဘာက သူ့ကို မည်သို့မျှ ထပ်မံ ပိတ်လှောင်ထားနိုင်တော့မည် မဟုတ်ပေ။

အရိပ်မည်းက လိမ်ယှက် လှုပ်ရှားသွားပြီး နောက်တစ်ခဏတွင် ဟင်းလင်းပြင်ထဲမှ ထွက်ပေါ်လာကာ အပြင်ဘက်ရှိ မှောင်မည်းနေသော အရိပ်ကမ္ဘာထဲသို့ တစ်ဖန် ပြန်လည် ရောက်ရှိလာသည်။

လင်းယွမ်က စိတ်ဖြင့် အမိန့်ပေးလိုက်ပြီး သုမာရု လက်စွပ်ကို ပစ္စည်းသိုလှောင်ခန်းထဲသို့ တိုက်ရိုက် ပြန်သိမ်းလိုက်သည်။

အရိပ်ကမ္ဘာထဲတွင် ရောက်ရှိနေပြီး အရိပ်အဖြစ် ပြောင်းလဲနေသော လင်းယွမ်က ပတ်ဝန်းကျင်ရှိ မြင်ကွင်း အားလုံးကို အာရုံခံ သိရှိနိုင်နေပြီ ဖြစ်ကြောင်း ယခုအခါ အံ့အားသင့်ဖွယ် တွေ့ရှိလိုက်ရတော့သည်။

ဆက်ရန်...