အခန်း (၂၀၃-၂၀၄)

အခန်း (၂၀၃) - ချိုက်ကျန်းခွန်း က ငါတို့ လူလား

“အဲဒီစကားရဲ့ အဓိပ္ပာယ်က ဘာလဲ...”

ဝူရူလုံ သည် မျက်မှောင်ကုတ်သွားပြီး သူ၏ နောက်ရှိ ကျန်းယဲ့ ကို အချက်ပြလိုက်၏။ ကျန်းယဲ့ ကလည်း လှုပ်ရှားရန် အသင့်ဖြစ်နေပြီ ဖြစ်သည်။

ထိုစကားကို ကြားသောအခါ ချိုက်ကျန်းခွန်း ၏ အမူအရာသည် အလွန် လေးနက်သွား၏။ တစ်ခဏမျှ စဉ်းစားပြီးနောက် သူက ဆက်၍ မေးလိုက်သည်။

"သူဌေး ဝူ... ခင်ဗျားကို ကျွန်တော် ယုံကြည်လို့ ရမလား..."

ချိုက်ကျန်းခွန်း ၏ စကားကို ကြားသောအခါ ဝူရူလုံ နှင့် ကျန်းယဲ့ တို့သည် တစ်ယောက်ကိုတစ်ယောက် ကြည့်လိုက်ကြ၏။ ချိုက်ကျန်းခွန်း တွင် လူမသိသော လျှို့ဝှက်ချက် အချို့ ရှိနေပုံ ရသည်။

ထိုသို့ တွေးလိုက်မိပြီးနောက် ဝူရူလုံ က ချောင်းတစ်ချက် ဟန့်လိုက်ပြီးနောက် စံထားရသော စီးပွားရေးသမား တစ်ဦး၏ အပြုံးမျိုးကို ပြုံး၍ ဖြည်းညင်းစွာ ပြောလိုက်၏။

"ခင်ဗျား ကျွန်တော့်ကို ယုံကြည်မယ်လို့ ကျွန်တော် အာမ မခံနိုင်ပေမယ့် ဒီနေ့ ခင်ဗျား ဒီနေရာမှာ နေမယ် ဆိုရင်တော့ ဒီအကြောင်းကို တခြား ဘယ်သူမှ သိမှာ မဟုတ်ဘူးလို့ ကျွန်တော် အာမခံနိုင်တယ်..."

"ဒီလိုဆိုရင် ကျွန်တော် ခင်ဗျားကို မေးချင်တယ်... ခင်ဗျား ကျွန်တော်နဲ့ အပေးအယူ တစ်ခု လုပ်ဖို့ ဆန္ဒရှိလား..."

ချိုက်ကျန်းခွန်း က ဝူရူလုံ ကို ကြည့်၍ ပြတ်သားသော မျက်နှာထားဖြင့် ပြောလိုက်၏။

ဝူရူလုံ က မျက်ခုံးပင့်လိုက်သည်။

"ဪ... အဲဒီအကြောင်း ပြောပြပါဦး..."

"အဲဒါကတော့ ယွမ်ကျန်း ကို ဖယ်ရှားဖို့ ခင်ဗျား ကျွန်တော့်ကို ကူညီပေးပါ... အဲဒီအစား မြေကမ္ဘာနဂါး ကုန်သည်အသင်း ကို ခင်ဗျားဆီ ကျွန်တော် လွှဲပေးမယ်... အခုကစပြီး ကျွန်တော် ချိုက်ကျန်းခွန်း က ခင်ဗျားကို အစေခံဖို့ ဆန္ဒရှိတယ်..."

ဝူရူလုံ နှင့် ကျန်းယဲ့ တို့ မှာ အံ့အားသင့်သွားသည်။

မည်သို့ပင်ဆိုစေကာမူ သူတို့၏ ယခင် စုံစမ်းစစ်ဆေးမှုများအရ မြေကမ္ဘာနဂါး ကုန်သည်အသင်း နှင့် ယွမ်ကျန်း တို့ကြား ဆက်ဆံရေးမှာ ဧကရာဇ် တစ်ပါးနှင့် သူ၏ လက်အောက်ခံ တစ်ဦးကဲ့သို့ ဖြစ်ပြီး ယွမ်ကျန်း က ဧကရာဇ် ဖြစ်ကာ မြေကမ္ဘာနဂါး ကုန်သည်အသင်း က လက်အောက်ခံ ဖြစ်သည်။

ထို့အပြင် သူတို့၏ စုံစမ်းစစ်ဆေးမှုများအရ မြေကမ္ဘာနဂါး ကုန်သည်အသင်း နှင့် ယွမ်ကျန်း တို့ကြားတွင် မည်သည့် ရန်ငြိုးမျှ မရှိချေ။

ဝူရူလုံ နှင့် ကျန်းယဲ့ တို့၏ အတွေးများကို ခန့်မှန်းမိသကဲ့သို့ ချိုက်ကျန်းခွန်း က ခါးသီးစွာ ပြုံး၍ ပြောလိုက်သည်။

"ဒီလို အပေးအယူမျိုးကို ကျွန်တော် ဘာလို့ အဆိုပြုရတာလဲ ဆိုတာ ခင်ဗျားတို့ စဉ်းစားနေမှာပဲ... မြေကမ္ဘာနဂါး ကုန်သည်အသင်း က ယွမ်ကျန်း နဲ့ ဘာရန်ငြိုးမှ မရှိပါဘူး... ဒါဆို ကျွန်တော်က ဘာလို့ သူ့ကို ဆန့်ကျင် လှုပ်ရှားရမှာလဲ..."

"တကယ်တော့ မြေကမ္ဘာနဂါး ကုန်သည်အသင်း က ယွမ်ကျန်း နဲ့ ဘာရန်ငြိုးမှ မရှိဘူး... ယွမ်ကျန်း နဲ့ ရန်ငြိုး ရှိတာက ကျွန်တော်ရယ်... ပြီးတော့ မြေကမ္ဘာနဂါး ကုန်သည်အသင်း ရဲ့ ဒုတိယ သူဌေး ရယ်ပဲ..."

ချိုက်ကျန်းခွန်း ၏ စကားများမှတစ်ဆင့် ဘာတွေ ဖြစ်ပျက်ခဲ့သည်ကို ဝူရူလုံ နှင့် ကျန်းယဲ့ တို့ သိရှိသွားကြ၏။ ထိုဖြစ်ရပ်၏ အစမှာ လွန်ခဲ့သော အချိန်အတော်ကြာက ဖြစ်သည်။ ထိုအချိန်က ယွမ်ကျန်း သည် ဟွမ်ယွမ် ဒေသ တွင် အင်အားအကြီးမားဆုံး မဟုတ်သေးဘဲ မြေကမ္ဘာနဂါး ကုန်သည်အသင်း လည်း မရှိသေးပေ။ ထို့အပြင် ချိုက်ကျန်းခွန်း မှာလည်း မိသားစုငယ်လေး တစ်ခုမှ သာမန်လူ တစ်ဦးသာ ဖြစ်၏။

ထို့နောက် ချိုက် မိသားစု မှာ ယွမ်ကျန်း ၏ သုတ်သင်ခြင်းကို ခံလိုက်ရပြီး ချိုက်ကျန်းခွန်း တစ်ယောက်သာ အသက်ရှင် ကျန်ရစ်ခဲ့သည်။ သူသည် ယွမ်ကျန်း ၏ လူယုံ ဖြစ်လာပြီး မြေကမ္ဘာနဂါး ကုန်သည်အသင်း ကို တည်ထောင်ကာ သူ၏ မိသားစုအတွက် ကလဲ့စားမချေမီ လျှို့ဝှက်စွာ ပိုမို အားကောင်းလာစေရန် အစီအစဉ်ဆွဲခဲ့ခြင်း ဖြစ်သည်။

နျဲ့လုံ မှာလည်း ထိုနည်းတူပင် ဖြစ်သည်။ ထိုအချက်ကို ချိုက်ကျန်းခွန်းသည် မြေကမ္ဘာနဂါး ကုန်သည်အသင်း ကို တည်ထောင်ပြီးနောက်မှ တိုက်ဆိုင်စွာ ဖြင့် သိရှိခဲ့ခြင်း ဖြစ်၏။

ကလဲ့စားချေလိုစိတ်ဖြင့် သူတို့ နှစ်ဦး ပူးပေါင်းခဲ့ကြသည်။

"ဒါကြောင့် ကျွန်တော် မေးချင်တယ်... သူဌေး ဝူ... ကျွန်တော်နဲ့ အပေးအယူ လုပ်ဖို့ ခင်ဗျား သဘောတူနိုင်မလား... ဘာပဲဖြစ်ဖြစ် ခင်ဗျားလည်း အားစိုက်ထုတ်မှု သိပ်အများကြီး မလုပ်ချင်ဘူး မလား..."

ချိုက်ကျန်းခွန်း က ဝူရူလုံ ကို ကြည့်၍ အလွန် လေးနက်သော မျက်နှာထားဖြင့် မေးလိုက်၏။

ဝူရူလုံ စကားမပြောနိုင်မီမှာပင် ဘေးတွင် ရပ်နေသော ကျန်းယဲ့ က အေးစက်စက် အပြုံးတစ်ခု ပြုံး၍ ပြောလိုက်သည်။

"သူဌေး ချိုက်... ကျွန်တော် အရမ်း သိချင်လို့ပါ... ဒုတိယ သူဌေး နျဲ့လုံ ကို ယုံကြည်လို့ ရတယ် ဆိုတာ ဘာအဓိပ္ပာယ်လဲ..."

"ဒါပေါ့... ဘာပဲဖြစ်ဖြစ် အဲဒီတုန်းက နျဲ့ မိသားစု ရဲ့ အစုလိုက်အပြုံလိုက် သတ်ဖြတ်ခံရမှု အကြောင်းကိုလည်း ကျွန်တော် သိထားတာပဲ..."

ချိုက်ကျန်းခွန်း က မဆိုင်းမတွပင် ဖြေလိုက်သော်လည်း သူသည် တစ်စုံတစ်ခုကို အလျင်အမြန် သဘောပေါက်သွားပြီး အနည်းငယ် မနှစ်မြို့ဖွယ် မျက်နှာထားဖြင့် ပြောလိုက်၏။

"စီနီယာ ကျန်း... နျဲ့လုံ က ကျွန်တော့်ကို သစ္စာဖောက်မယ်လို့ ပြောချင်တာလား... နျဲ့လုံ က ကျွန်တော့်အတွက် ညီအစ်ကို တစ်ယောက်လိုပဲ... သူက ကျွန်တော့်ကို သစ္စာဖောက်မှာ မဟုတ်ဘူး..."

ထိုစကားကို ကြားသောအခါ ကျန်းယဲ့ က ခေါင်းကိုသာ ခါရမ်းလိုက်ပြီး တည်ငြိမ်စွာဖြင့် ပြောလိုက်၏။

"လူတစ်ယောက်ရဲ့ မျက်နှာကို သိနိုင်ပေမယ့် စိတ်နှလုံးကိုတော့ မသိနိုင်ဘူး... နျဲ့လုံ က မင်းကို သစ္စာမဖောက်ဘူးလို့ မင်း ထင်နေရုံနဲ့ သူက သစ္စာမဖောက်ဘူးလို့ မယူဆလိုက်နဲ့... မကြာခင် မင်း သိလာရလိမ့်မယ်..."

ကျန်းယဲ့ စကားပြောပြီးသည်နှင့် နောက်တစ်စက္ကန့်တွင် အလွန် ကြောက်မက်ဖွယ်ကောင်းသော ဖိအားတစ်ရပ်က ဝူမိသားစု ကုန်သည်အသင်း ပေါ်သို့ ကျဆင်းလာ၏။

ထိုဖိအား အရှိန်အဝါကို ခံစားရပြီးနောက် ချိုက်ကျန်းခွန်း ၏ အမူအရာသည် ကြည့်ဆိုးရွားသွားသည်။ ယွမ်ကျန်း ၏ နောက်သို့ ဤမျှ နှစ်ပေါင်းများစွာ လိုက်ခဲ့ပြီးနောက် ဤဖိအား အရှိန်အဝါကို သူ မည်သို့ မရင်းနှီးဘဲ နေမည်နည်း။ ၎င်းက ယွမ်ကျန်း ၏ အရှိန်အဝါ ဖြစ်သည်မှာ ထင်ရှား၏။

သူ သည် ဝူမိသားစု၏ကုန်သည်အသင်း သို့ သွားမည်ကို ယွမ်ကျန်း အား မပြောရန် လူတိုင်းကို မှာကြားထားခဲ့သည် မဟုတ်လော။

ဤအချက်ကို တွေးမိသောအခါ ချိုက်ကျန်းခွန်း ၏ စိတ်နှလုံးသားသည် အောက်ခြေအထိ ထိုးကျသွား၏။ ကြည့်ရသည်မှာ ယွမ်ကျန်း သည် မြေကမ္ဘာနဂါး ကုန်သည်အသင်း တွင် သူ၏ လူတစ်ယောက်ကို မွေးမြူထားပုံရသည်။

ထိုအခိုက်၌ ဝူရူလုံ က စကားပြောလာ၏။

"သူဌေး ချိုက်... ကျွန်တော် သိချင်တယ်... ငါတို့ရဲ့ အပေးအယူက အတည် ဖြစ်သေးလား..."

ထိုစကားကို ကြားသောအခါ ချိုက်ကျန်းခွန်း မှာ အနည်းငယ် အံ့အားသင့်သွားသော်လည်း အလျင်အမြန် ပုံမှန် ပြန်ဖြစ်သွားပြီး စကားပြောလိုက်သည်။

"သေချာပေါက် အတည် ဖြစ်တာပေါ့... ဒါပေမဲ့ ယွမ်ကျန်း က အင်မော်တယ် အရှင်မြတ် အထွတ်အထိပ်အဆင့် ရှိတယ်... သူ့ကို ခင်ဗျား ကိုင်တွယ်နိုင်မလား..."

လက်ရှိ အခြေအနေအရ သူ့ရှေ့က ဝူရူလုံ နှင့် ကျန်းယဲ့ တို့တွင် ကျန်းယဲ့ က ဦးဆောင်နေခြင်း မဟုတ်ဘဲ ဝူရူလုံ က ဦးဆောင်နေခြင်း ဖြစ်ကြောင်း သဘာဝကျကျ သူ မြင်တွေ့နိုင်ပေသည်။

၎င်းက သူ့ကို ရဲတင်းသော ခန့်မှန်းမှု တစ်ခု ပြုလုပ်ရန် ဦးတည်သွားစေ၏။ ဝူရူလုံ ၏ နောက်ကွယ်တွင် စွမ်းအားကြီးမားသော အင်အားစု တစ်ခု ရှိနေပြီး ၎င်းက ကျန်းယဲ့ ပင်လျှင် အလွန် ကြောက်ရွံ့ရလောက်အောင် စွမ်းအားကြီးမားသည်။ သေချာသည်မှာ အခြား ဖြစ်နိုင်ချေ တစ်ခုလည်း ရှိသေး၏။ ဝူရူလုံ ကိုယ်တိုင်က အလွန် စွမ်းအားကြီးမားသော ပုဂ္ဂိုလ် တစ်ဦး ဖြစ်ပြီး သူ၏ စစ်မှန်သော ကျင့်ကြံခြင်း အဆင့်ကို မည်သူမျှ မခွဲခြားနိုင်လောက်အောင်ပင်။

"ဒီလိုဆိုမှတော့ ပြီးတော့ ယွမ်ကျန်း လည်း ထွက်ပေါ်လာပြီ ဆိုတော့ ဒီနေ့ သူ့ကို တစ်ခါတည်း ရှင်းပစ်လိုက်ကြတာပေါ့..."

ဝူရူလုံ စကားပြောပြီးနောက် သူသည် ဖြည်းညင်းစွာ မတ်တတ်ထရပ်ကာ သူ၏ မျက်နှာချင်းဆိုင်ရှိ ချိုက်ကျန်းခွန်း ကို ကြည့်၍ ပြောလိုက်၏။

"သွားကြစို့ သူဌေး ချိုက်... ဟွမ်ယွမ် ဒေသ မှာ အင်အားအကြီးဆုံး လူနဲ့ သွားတွေ့ကြရအောင်..."

တစ်ချိန်တည်းမှာပင် ဝူမိသားစု ကုန်သည်အသင်း ၏ အပြင်ဘက်၌ ယွမ်ကျန်း သည် လေထဲတွင် ရပ်၍ ဝူမိသားစု ကုန်သည်အသင်း ကို အထက်စီးမှ ငုံ့ကြည့်နေ၏။ သူ၏ ဘေးတွင် ရပ်နေသူမှာ အခြားမဟုတ်ဘဲ သူ့ကို ဘယ်တော့မှ သစ္စာဖောက်မည် မဟုတ်ဟု ချိုက်ကျန်းခွန်း အစောပိုင်းက ပြောထားခဲ့သော နျဲ့လုံ ပင် ဖြစ်သည်။

ဤအခိုက်အတန့်တွင် နျဲ့လုံသည် မျက်နှာချိုသွေးသော အမူအရာဖြင့် ပြောလိုက်၏။

"စီနီယာ... ချိုက်ကျန်းခွန်း က ဝူမိသားစု ကုန်သည်အသင်း ဆီ ရောက်နေပြီး ဝူမိသားစု ကုန်သည်အသင်း နဲ့ ပူးပေါင်းပြီး ခင်ဗျားကို ဖြုတ်ချဖို့ စီစဉ်နေတယ်..."

"ဒီကိစ္စနဲ့ ပတ်သက်ပြီး ငါ နောက်မှ ဆုံးဖြတ်ချက် ချမယ်... ဒါပေမဲ့ မင်းကရော... မင်းက ချိုက်ကျန်းခွန်း ရဲ့ လူယုံ မဟုတ်ဘူးလား... ဘာလို့ သူ့ကို သစ္စာဖောက်ရတာလဲ..."

ယွမ်ကျန်း သည် နျဲ့လုံ ကို တစ်ချက် ကြည့်လိုက်သည်။ သူ၏ မျက်လုံးများထဲတွင် ဂရုမစိုက်မှုများ ဖြင့် ပြည့်နှက်နေ၏။

နျဲ့လုံ မှာ အနည်းငယ် အံ့အားသင့်သွားပြီး အလျင်အမြန် ပြောလိုက်သည်။

"ကျွန်တော် မသေချင်လို့ပါ... စီနီယာ ယွမ် ကို ဆန့်ကျင်တာက သေချာပေါက် သေရမယ့် လမ်းပဲ... မြေကမ္ဘာနဂါး ကုန်သည်အသင်း အတွက်ပဲ ကျွန်တော် က စဉ်းစားတာပါ..."

"မင်း အရမ်းတော်တယ်... အကယ်၍ ချိုက်ကျန်းခွန်း က ငါ့ကို တကယ် သစ္စာဖောက်ခဲ့တယ် ဆိုရင် မင်းက မြေကမ္ဘာနဂါး ကုန်သည်အသင်း ရဲ့ သူဌေး အသစ် ဖြစ်လာလိမ့်မယ်..."

ထိုစကားကို ကြားသောအခါ နျဲ့လုံ ၏ မျက်နှာပေါ်တွင် ဝမ်းသာပီတိမှုများဖြင့် ပြည့်နှက်သွား၏။ သူ လုပ်ခဲ့သမျှ အရာအားလုံးသည် မြေကမ္ဘာနဂါး ကုန်သည်အသင်း ၏ သူဌေး ဖြစ်လာရန် သက်သက်ပင် မဟုတ်လော။

သူသည် ရွှေအင်မော်တယ် အထွတ်အထိပ်အဆင့် တွင် နှစ်ပေါင်းများစွာ ရှိနေခဲ့သည်။လျိုထျန်းရွှေအင်မော်တယ် သို့ အဆင့်တက်လှမ်းနိုင်ခြင်း မရှိရသည့် အကြောင်းရင်းမှာ လုံလောက်သော အရင်းအမြစ်များ မရှိသောကြောင့် ဖြစ်၏။ အကယ်၍ သူသည် မြေကမ္ဘာနဂါး ကုန်သည်အသင်း ၏ သူဌေး ဖြစ်လာပါက သူ သည် လုံလောက်သော အရင်းအမြစ်များကို ရရှိနိုင်မည် ဖြစ်သည်။

ထိုအခါ သူ တောင့်တနေခဲ့သော လျိုထျန်းရွှေအင်မော်တယ် သို့ အောင်မြင်စွာ တက်လှမ်းနိုင်မည် ဖြစ်ပြီး၊ သက်တမ်းကုန်ဆုံးမည့် အန္တရာယ်မှ လွတ်မြောက်နိုင်မည် ဖြစ်၏။

"သူဌေး ချိုက်... တောင်းပန်ပါတယ်... ကျွန်တော်က အဲဒီလောက် မမိုက်မဲပါဘူး... ကျွန်တော် အသက်ရှင်ချင်သေးတယ်..."

နျဲ့လုံသည် သူ့ဟာသူ တွေးလိုက်မိသည်။

ထိုစဉ် ဝူရူလုံ ၏ ဦးဆောင်မှုဖြင့် ချိုက်ကျန်းခွန်း နှင့် ကျန်းယဲ့ တို့သည် သူတို့၏ ရှေ့တွင် ထွက်ပေါ်လာ၏။

ချိုက်ကျန်းခွန်း က ယွမ်ကျန်း ၏ ဘေးတွင် ရပ်နေသော နျဲ့လုံ ကို မြင်သောအခါ သူ၏ အမူအရာသည် နေရာတွင်ပင် အေးခဲသွားသည်။ မြေကမ္ဘာနဂါး ကုန်သည်အသင်း ၏ သူဌေး တစ်ယောက် အနေဖြင့် နျဲ့လုံသည် သူ့ကို သစ္စာဖောက်ခဲ့ကြောင်း သူ မည်သို့ မခန့်မှန်းနိုင်ဘဲ နေမည်နည်း။

အခန်း (၂၀၄) - ယွမ်ကျန်း တစ်ကွက်တည်းဖြင့် ရှုံးနိမ့်သွားခြင်း နှင့် နျဲ့လုံတစ်ယောက် အမှားကို သိရှိသွားခြင်း

"နျဲ့လုံ... မင်း ဘာလို့ ငါ့ကို သစ္စာဖောက်ရတာလဲ..."

ချိုက်ကျန်းခွန်း က အသက်ပြင်းပြင်း ရှူသွင်းလိုက်ပြီး နျဲ့လုံ ကို သတ်ဖြတ်လိုသော အငွေ့အသက်များ ပြည့်နှက်နေသည့် အကြည့်ဖြင့် ကြည့်ကာ ပြောလိုက်၏။

ချိုက်ကျန်းခွန်း သည် သူ၏ ဘဝတွင် သစ္စာဖောက်ခြင်းကို မည်သည့်အရာထက်မဆို ပို၍ မုန်းတီးသည်။ သူ၏ လူယုံ တစ်ယောက် အနေဖြင့် နျဲ့လုံ သည် သစ္စာဖောက်ခြင်း၏ အကျိုးဆက်များကို သိရှိသင့်ပေသည်။

ချိုက်ကျန်းခွန်း ၏ စကားကို ကြားသောအခါ အခြားတစ်ဘက်ရှိ နျဲ့လုံ ၏ မျက်နှာပေါ်တွင် အကြောက်တရား အရိပ်အယောင်တစ်ခု ထွက်ပေါ်လာသော်လည်း ရုတ်တရက် တစ်စုံတစ်ခုကို သတိရသွားပြီး အေးစက်စွာ နှာမှုတ်၍ ပြောလိုက်၏။

"သူဌေး... မဟုတ်ဘူး... အခု ခင်ဗျားကို ချိုက်ကျန်းခွန်း လို့ပဲ ခေါ်သင့်တာ... ငါတို့အားလုံးက စီနီယာ ယွမ် ရဲ့ လက်အောက်ငယ်သားတွေပဲ... ခင်ဗျားက စီနီယာ ယွမ် ကို သစ္စာဖောက်တာ ဆိုတော့ ဒီအကြောင်းကို စီနီယာ ယွမ် ကို ပြောပြဖို့ ငါ့မှာ အကြောင်းပြချက် ရှိတာပေါ့..."

"သစ္စာဖောက်တာတွေ ဘာတွေ လာမပြောနဲ့... ငါလုပ်ရမယ့် အလုပ်ကို လုပ်ရုံ သက်သက်ပဲ..."

"ဟွန့်... အလွန်ကောင်းတယ်... စောင့်နေလိုက်... နာကျင်မှု အစစ်အမှန် ဆိုတာ ဘာလဲ ဆိုတာကို ငါ ပြပေးမယ်..."

ချိုက်ကျန်းခွန်း သည် ဒေါသတကြီးဖြင့် ပြောလိုက်၏။ အဘယ်ကြောင့်ဆိုသော် ဤအခိုက်အတန့်တွင် နျဲ့လုံ သည် သူ၏ ရင်ထဲ၌ သေလူ တစ်ယောက် ဖြစ်နေပြီ ဖြစ်သောကြောင့်တည်း။

ထိုစကားကို ကြားသောအခါ နျဲ့လုံ မှာ အနည်းငယ် ကြောက်လန့်သွားသော်လည်း သူ၏ ဘေးရှိ လူမှာ အင်မော်တယ် အရှင်မြတ် အထွတ်အထိပ်အဆင့် ရှိ စွမ်းအားကြီးမားလှသော ယွမ်ကျန်း ဖြစ်ကြောင်းကို အလျင်အမြန် သတိရသွားသည်။ တစ်ဖက်ရှိ ဝူမိသားစု ကုန်သည်အသင်း တွင် ကျန်းယဲ့ ရှိနေလျှင်တောင် သရေသာ ကျနိုင်မည် ဖြစ်၏။

အကယ်၍ ချိုက်ကျန်းခွန်း က သူ့ကို တိုက်ခိုက်လာမည် ဆိုပါက ယွမ်ကျန်းအနေဖြင့် ဒီတိုင်း လက်ပိုက်ကြည့်နေမည်လော။

ထိုအခိုက်၌ ယွမ်ကျန်း သည် စကားစပြောလာ၏။ သူသည် ချိုက်ကျန်းခွန်း ကို ဂရုမစိုက်သော အကြည့်ဖြင့် ကြည့်၍ ပြောလိုက်သည်။

"ကျန်းခွန်း... မင်းက ငါ့ကို သစ္စာဖောက်ဖို့ ကြိုးစားနေတာလား..."

စကားလုံးများက အလွန် တည်ငြိမ်နေသော်လည်း ချိုက်ကျန်းခွန်း သည် ၎င်းတို့ထဲမှ သတ်ဖြတ်လိုသော အငွေ့အသက်များကို ခံစားမိပေသည်။

မှန်ပေသည်။ ယွမ်ကျန်း ၏ စကားထဲတွင် သတ်ဖြတ်လိုသော အငွေ့အသက်များ ပါဝင်နေသည်။ ဤအရာက နှစ်ပေါင်းများစွာ နောက်လိုက်လုပ်ခဲ့ပြီးမှ ယွမ်ကျန်းနှင့် ပတ်သတ်၍ သိရှိလာသော ချိုက်ကျန်းခွန်း ၏ နားလည်မှုပင် ဖြစ်၏။

ယခင်က ဆိုလျှင် ချိုက်ကျန်းခွန်း သည် ယွမ်ကျန်း ၏ စွမ်းအားကြောင့် သူ့ကို ရင်ဆိုင်ရန် အလွန် ကြောက်ရွံ့နေမည် ဖြစ်ပြီး ဒူးထောက်၍ နာခံစွာ တောင်းပန်နေပေလိမ့်မည်။ သို့သော် ယခုမူ သူ မကြောက်တော့ချေ။

ဝူမိသားစု ကုန်သည်အသင်း ၏ အင်အားကို သိရှိပြီးနောက် ယွမ်ကျန်း အပေါ် ချိုက်ကျန်းခွန်း ၏ သည်းခံနိုင်စွမ်းသည် အကန့်အသတ်သို့ ရောက်ရှိသွားပြီး သူ့မိသားစုအတွက် ကလဲ့စားချေရန် မစောင့်နိုင်တော့ပေ။

ထိုသို့ တွေးလိုက်မိပြီးနောက် ချိုက်ကျန်းခွန်း က လှောင်ရယ် ရယ်လိုက်ပြီး ပြောလိုက်၏။

"သစ္စာဖောက်တယ်... ဘာသစ္စာဖောက်တာလဲ... ငါ့ရဲ့ ပန်းတိုင်က မင်းကို သတ်ဖို့ပဲ... လွန်ခဲ့တဲ့ နှစ်သန်း ၃၀ က ချိုက် မိသားစု ကို မင်း မှတ်မိသေးလား ဆိုတာ ငါ သိချင်တယ်... မင်းလက်ချက်နဲ့ သနားစရာ ကောင်းလောက်အောင် သေဆုံးသွားခဲ့ရတဲ့ ချိုက် မိသားစု ရဲ့ အပြစ်ကင်းတဲ့ ဝိညာဉ် ၃,၅၆၃ ယောက် ကို မင်း မှတ်မိသေးလား..."

ချိုက်ကျန်းခွန်း ၏ စကားကို ကြားသောအခါ ယွမ်ကျန်း သည် မျက်မှောင်ကြုတ်သွားပြီး သူ၏ မျက်နှာထားသည် ကြည့်ရဆိုးသွားသည်။

"မင်းက အဲဒီတုန်းက ချိုက် မိသားစုဝင် တစ်ယောက်ပေါ့..."

"ဟုတ်တယ်... ငါက ချိုက် မိသားစု ခေါင်းဆောင် ချိုက်ရွှီခွန်း ရဲ့ သား ချိုက်ကျန်းခွန်း ပဲ... အဲဒီတုန်းက ငါသာ ခရီးထွက်မနေဘူး ဆိုရင် မင်းလက်ချက်နဲ့ ငါ သေသွားလောက်ပြီ... ဒါပေမဲ့ ကောင်းကင်ဘုံ က ချိုက် မိသားစု ကို မျက်ကွယ်မပြုခဲ့ဘဲ ငါ့ကို အသက်ရှင်ခွင့် ပေးခဲ့တယ်..."

"ဒါကြောင့် အခု ငါက ချိုက် မိသားစုဝင် ၃,၅၆၃ ယောက် ကိုယ်စား မင်းကို ကလဲ့စားချေဖို့ ရောက်လာတာပဲ..."

ချိုက်ကျန်းခွန်းသည် ယွမ်ကျန်း ကို သတ်ဖြတ်လိုသော အငွေ့အသက်များနှင့် သွေးဆာနေသော အကြည့်များဖြင့် ကြည့်လိုက်၏။

ထိုစကားကို ကြားသောအခါ ယွမ်ကျန်း က အေးစက်စွာ နှာမှုတ်လိုက်သည်။

"ဘာလဲ... မင်းက ရွှေအင်မော်တယ် ကနဦးအဆင့်ပဲ ရှိသေးတာပဲ... ငါ့ရဲ့ ပြိုင်ဘက် ဖြစ်နိုင်မယ်လို့ ထင်နေလား... ပြီးတော့ ကျန်းယဲ့... မင်းက ငါနဲ့ စစ်တိုက်ဖို့ စီစဉ်နေတာလား..."

ထိုသို့ပြောနေရင်း ယွမ်ကျန်း သည် ဝူရူလုံ ၏ နောက်တွင် ရပ်နေသော ကျန်းယဲ့ ကို တိုက်ခိုက်လိုစိတ် အပြည့်ပါသော အကြည့်ဖြင့် ကြည့်လိုက်၏။အကယ်၍ ကျန်းယဲ့ သာ သဘောတူမည် ဆိုပါက ၊ ကျန်းယဲ့ ကိုလည်း ရှင်းပစ်ရန် သူ ဝန်လေးနေမည် မဟုတ်ချေ။

သူသည် အိမ်နီးချင်း ရွှမ်ကျုံး နယ်မြေ ၏ နယ်ပယ်ကို လိုချင်တပ်မက်နေသည်မှာ ကြာပြီ ဖြစ်ပြီး ကျန်းယဲ့ ကို ကြောက်ရွံ့ခြင်းသာ မရှိခဲ့လျှင် သူသည် အစောကြီးကတည်းက လှုပ်ရှားခဲ့ပြီး ဖြစ်ပေလိမ့်မည်။

ယခု ကျန်းယဲ့ သည် သူ၏ တံခါးဝသို့ ရောက်လာပြီ ဖြစ်ရာ ဤအခွင့်အရေးကို သဘာဝကျကျ လက်လွတ်ခံမည် မဟုတ်ပေ။

ထိုစကားကို ကြားသည်နှင့် ၊ ကျန်းယဲ့ က ပြုံးကာ ခေါင်းခါ၍ ပြောလိုက်၏။

"မဟုတ်ဘူး... မဟုတ်ဘူး... စစ်တိုက်ဖို့ မလိုဘူး... ငါက အမိန့်ကို နာခံရုံ သက်သက်ပဲ.."

ကျန်းယဲ့ ၏ စကားကို ကြားသောအခါ ယွမ်ကျန်း နှင့် နျဲ့လုံ တို့မှာ မျက်မှောင်ကြုတ်သွားကြပြီး မည်သူကများ ကျန်းယဲ့ ကို အမိန့်ပေးနိုင်သနည်း ဆိုသည်ကို နှစ်ယောက်စလုံး သိချင်သွားကြသည်။

သို့သော် သူတို့ စဉ်းစား၍မရနိုင်မီမှာပင် ဝူရူလုံ က ပြောလိုက်သည်။

"စီနီယာ ကျန်း... သူတို့နဲ့ စကားပြောပြီး ဘာလို့ အချိန်ဖြုန်းနေတာလဲ... သွားရှင်းလိုက်..."

"ဟုတ်ကဲ့ပါ သူဌေး..."

ဝူရူလုံ စကားပြောပြီးသည်နှင့် ကျန်းယဲ့ က ချက်ချင်းပင် လှုပ်ရှားလိုက်၏။

ဤအခိုက်အတန့်တွင် ယွမ်ကျန်းအနေဖြင့် ကျန်းယဲ့ ကဲ့သို့သော ပုဂ္ဂိုလ်တစ်ယောက်က လူသားအင်မော်တယ် တစ်ဦး၏ အမိန့်ကို အဘယ်ကြောင့် နာခံရသနည်း ဆိုသည်ကို အလွန် သိချင်နေဆဲ ဖြစ်သော်လည်း သူ ဆက်၍ မစဉ်းစားနိုင်တော့ချေ။

အင်မော်တယ် အရှင်မြတ် အထွတ်အထိပ်အဆင့် အတူတူ ဖြစ်သည့် အတွက် ကျန်းယဲ့ ကို သူ အနိုင်ယူနိုင်မည်ဟု ယုံကြည်မှု ရှိသော်လည်း ၊ ၎င်းက အတော်လေး ကြီးမားသော တန်ဖိုးတစ်ခုကို ပေးဆပ်ရမည် ဖြစ်သည်။ ထို့ကြောင့် ယွမ်ကျန်း သည် ထိုအရာကို ပေါ့ပေါ့တန်တန် သဘောမထားဘဲ အစကတည်းက အစွမ်းကုန် ထုတ်သုံးကာ တိုက်ခိုက်လိုက်၏။

အခြားတစ်ဘက်ရှိ ကျန်းယဲ့ မှာလည်း ထိုနည်းတူပင် ဖြစ်သည်။

"နေမင်းပေါက်ကွဲမှု လက်ဝါး..."

ကျန်းယဲ့ ၏ စွမ်းအားများသည် ဧရာမ လက်ဝါးရာကြီး တစ်ခု အဖြစ် စုစည်းသွားသည်နှင့် ယွမ်ကျန်း ၏ အမူအရာသည် ရုတ်တရက် ပြောင်းလဲသွားပြီး အလွန် ထိတ်လန့် အံ့အားသင့်စွာဖြင့် အော်ဟစ်လိုက်၏။

"မဖြစ်နိုင်ဘူး... ကျန်းယဲ့... မင်းက အင်မော်တယ် အရှင်မြတ် အထွတ်အထိပ်အဆင့် မဟုတ်ဘူးလား... မင်းက အင်မော်တယ်ဘုရင် အဆင့်ကို ရောက်နေပြီလား... ဘယ်တုန်းက အင်မော်တယ်ဘုရင် အဆင့်ကို တက်လှမ်းသွားတာလဲ..."

"အဲဒါကို မင်းကို ရှင်းပြစရာ မလိုဘူး ထင်တယ်... မင်း သွားရမယ့် လမ်းကိုပဲ ဆက်သွားလိုက်တော့..."

ကျန်းယဲ့ က လှောင်ရယ် ရယ်လိုက်ပြီး အတွေးတစ်ချက်နှင့်အတူ သူ၏ လက်ဝါးရိုက်ချက်သည်လည်း တစ်ပြိုင်နက်တည်း ထွက်ပေါ်လာ၏။ အင်မော်တယ်ဘုရင် ကနဦးအဆင့် ၏ အစွမ်းကုန် တိုက်ခိုက်မှုသည် ကမ္ဘာမြေကိုပင် တုန်လှုပ်သွားစေသည်ဟု ဆိုနိုင်သည်။

ဤကြောက်မက်ဖွယ်ကောင်းသော အရှိန်အဝါသည် ဟွမ်ယွမ် ဒေသ ရှိ စွမ်းအားကြီးမားသော ပုဂ္ဂိုလ်တိုင်းကို တုန်လှုပ်သွားစေပြီး မည်သူက ဤမျှ စွမ်းအားကြီးမားသော စီနီယာ ကို ပြစ်မှားမိသနည်း ဆိုသည်ကို အားလုံးက သိချင်သွားကြ၏။

ယွမ်ကျန်း ၏ နောက်တွင် ရပ်နေသော နျဲ့လုံ မှာ နေရာတွင်ပင် အေးခဲသွားသည်။ ကျန်းယဲ့ သည် မည်သည့် ကျင့်ကြံခြင်းအဆင့်တွင် ရှိသည်ကို သူ အာရုံမခံနိုင်သော်လည်း လက်ရှိ အခြေအနေအရ ကြည့်လျှင် ကျန်းယဲ့ သည် ယွမ်ကျန်း ထက် များစွာ ပိုမို စွမ်းအားကြီးမားနေပုံ ရ၏။

"မဖြစ်နိုင်ဘူး... မဖြစ်နိုင်ဘူး... အဲဒါ အမှန် မဖြစ်နိုင်ဘူး... သူတို့ အားလုံးက အင်မော်တယ် အရှင်မြတ် အထွတ်အထိပ်အဆင့် တွေ မဟုတ်ဘူးလား... ယွမ်ကျန်း က ဘယ်လိုလုပ် ကျန်းယဲ့ ရဲ့ ပြိုင်ဘက် မဖြစ်နိုင်ရမှာလဲ..."

နျဲ့လုံသည် မယုံကြည်နိုင်စွာဖြင့် တွေးလိုက်မိသော်လည်း နောက်တစ်စက္ကန့်တွင် သူ့ရှေ့က ရက်စက်လှသော မြင်ကွင်းသည် သူ၏ စိတ်ကူးယဉ်မှု အားလုံးကို ရိုက်ချိုးပစ်လိုက်၏။

ကျန်းယဲ့ ၏ ကရုဏာမဲ့သော လက်ဝါးရိုက်ချက် အောက်တွင် ယွမ်ကျန်း သည် သူ၏ အနှစ်သာရကို အသုံးပြုကာ သူ၏ ကျင့်ကြံခြင်းကို လောင်ကျွမ်းစေခြင်း အပါအဝင် သူ၏ စွမ်းအား အားလုံးကို ထုတ်သုံးခဲ့သော်လည်း အားလုံးက အချည်းနှီးသာ ဖြစ်ခဲ့ရသည်။ သူသည် ကျန်းယဲ့ ၏ လက်ဝါးရိုက်ချက်ဖြင့် ဖုန်မှုန့် အဖြစ်သို့ တိုက်ရိုက် ပေါက်ကွဲထွက်သွားတော့၏။

ယခုအချိန်၌ပင် သူသည် ဘက်မှား၍ ရွေးချယ်မိပြီ ဖြစ်ကြောင်း နျဲ့လုံ တစ်ယောက် သဘောပေါက်သွားသည်။

ထိုစဉ် ချိုက်ကျန်းခွန်း က နျဲ့လုံ ၏ ရှေ့တွင် ထွက်ပေါ်လာ၏။

သူ၏ ရှေ့တွင် သတ်ဖြတ်လိုသော အငွေ့အသက်များ ဖြင့် ပြည့်နှက်နေသော ချိုက်ကျန်းခွန်း ကို ကြည့်ရင်း နျဲ့လုံသည် ဆက်၍ မတောင့်ခံနိုင်တော့ဘဲ ဒူးထောက်ချကာ ခါးသီးစွာ ငိုကြွေးလိုက်သည်။

"သူဌေး... အားလုံးက ကျွန်တော့် အပြစ်ပါ... အားလုံးက ကျွန်တော့် အပြစ်ပါ... ကျွန်တော်က ယွမ်ကျန်း ရဲ့ အတင်းအကျပ် ခိုင်းစေမှု ခံခဲ့ရတာပါ... ကျွန်တော် မှားသွားပြီ ဆိုတာ ကျွန်တော် တကယ် သိပါပြီ... ကျေးဇူးပြုပြီး ကျွန်တော့် အသက်ကို ချမ်းသာပေးပါ... ခင်ဗျားကို ထာဝရ သစ္စာစောင့်သိပါ့မယ်လို့ ကျွန်တော် ကျိန်ဆိုရဲပါတယ်..."

ထိုစကားကို ကြားသောအခါ ချိုက်ကျန်းခွန်း က တည်ငြိမ်နေဆဲ ဖြစ်ပြီး ခေါင်းကို ဖြည်းညင်းစွာ ခါရမ်းလိုက်၏။

"နျဲ့လုံ... မင်းက ငါ့ရဲ့ လက်အောက်ငယ်သား ဖြစ်ပြီး ငါ့ဘေးမှာ နှစ်ပေါင်းများစွာ ရှိနေခဲ့တာ ဆိုတော့ မင်း ဘာတွေ တွေးနေလဲ ဆိုတာ ငါ နားလည်ပါတယ်... မင်း လုပ်ခဲ့တဲ့ အရာတွေအတွက် မင်း နောင်တမရဘူး... မင်းက သေရတော့မယ် ဆိုတာကို သိနေလို့ ကြောက်နေရုံ သက်သက်ပဲ.."

"စိတ်မပူပါနဲ့... ငါ့ဘေးမှာ ဒီလောက် နှစ်ပေါင်းများစွာ နေခဲ့ပြီးပြီ ဆိုတော့ မင်းကို သက်သောင့်သက်သာ သေခွင့် ပေးမှာ မဟုတ်ဘူး..."

"မဟုတ်ဘူး... မဟုတ်ဘူး... သူဌေး... ကျေးဇူးပြုပြီး... မလုပ်ပါနဲ့..."

နျဲ့လုံ မှာ ထိတ်လန့်သွားသည်။ ကျင့်ကြံမှုအရ ချိုက်ကျန်းခွန်းသည် သူ့ထက် တစ်ဆင့် ပိုမြင့်သည်။ အင်မော်တယ် အရှင်မြတ် အထွတ်အထိပ်အဆင့် ဖြစ်သော ယွမ်ကျန်း သည် အင်မော်တယ်ဘုရင် ကနဦးအဆင့် ဖြစ်သော ကျန်းယဲ့ ကို မခုခံနိုင်သကဲ့သို့ သူ၏ အစွမ်းကုန် စွမ်းအားဖြင့်ပင် လျိုထျန်းရွှေအင်မော်တယ် တစ်ယောက်၏ တိုက်ခိုက်မှုကို နျဲ့လုံ အနေဖြင့် မခုခံနိုင်ခဲ့ချေ။

နျဲ့လုံ ကို သတိလစ်အောင် ရိုက်ချလိုက်ပြီး သူ၏ ကျင့်ကြံစွမ်းအား ဖျက်ဆီးပစ်လိုက်ပြီးနောက် ချိုက်ကျန်းခွန်း သည် ဝူရူလုံ နှင့် ကျန်းယဲ့ တို့ထံသို့ ချဉ်းကပ်သွားပြီး ကျေးဇူးတင်သော အမူအရာဖြင့် ပြောလိုက်၏။

"ယွမ်ကျန်း ကို ဖယ်ရှားဖို့ ကူညီပေးတဲ့ သူဌေး ဝူ နဲ့ စီနီယာ ကျန်း ကို ကျေးဇူးတင်ပါတယ်... ကျွန်တော် ကတိပေးထားသမျှ အရာအားလုံးကို မှတ်မိပါတယ်... ကျွန်တော် ပြန်ရောက်တာနဲ့ မြေကမ္ဘာနဂါး ကုန်သည်အသင်း ကို ဝူမိသားစု ကုန်သည်အသင်း လို့ နာမည် ပြောင်းလိုက်မယ် ဆိုတာကို ကြေညာပါ့မယ်..."

"ကောင်းပြီ...ဒီနေ့ကစပြီး ခင်ဗျားက ငါ့ရဲ့ ဝူမိသားစု ကုန်သည်အသင်း ဟွမ်ယွမ်ဒေသရဲ့ လက်အောက်ခံသူဌေး ပဲ..."

ဝူရူလုံ က ချိုက်ကျန်းခွန်း ကို တစ်ချက် ကြည့်လိုက်ပြီးနောက် လေးနက်စွာဖြင့် ပြောလိုက်သည်။

"ဟုတ်ကဲ့ပါ သူဌေး..."