အခန်း (၂၀၉-၂၁၀)

အခန်း (၂၀၉) - အင်မော်တယ် ကျင့်ကြံခြင်း သတင်းစာ

"ဒါပေမဲ့ သူဌေး... ယွမ်ကျန်း သေသွားပြီ ဆိုရင်တောင် ဝူမိသားစု ကုန်သည်အသင်း နဲ့ ငါတို့ ပေါင်းစည်းဖို့ တကယ် လိုအပ်လို့လား..."

အခြား အဆင့်မြင့် အဖွဲ့ဝင် တစ်ဦးက သိချင်စိတ်ဖြင့် မေးလိုက်၏။

ထိုစကားကို ကြားပြီး ချိုက်ကျန်းခွန်း က ခေါင်းခါရမ်းလိုက်သည်။

"မင်းတို့ ဒီအကြောင်းကို နားလည်မှာ မဟုတ်ဘူး... မကြာသေးခင်က ဝူမိသားစု ကုန်သည်အသင်း အကြောင်း မင်းတို့ စုံစမ်းပြီးပြီ မလား... ဝူမိသားစု ကုန်သည်အသင်း မျှော်မှန်းထားတဲ့ အနာဂတ် က ကြောက်မက်ဖွယ်ကောင်းလောက်အောင် ထွန်းတောက်နေတယ်...နောင်ကြရင် အထက်ကမ္ဘာ က ဝူမိသားစု ကုန်သည်အသင်း ရဲ့ လက်အောက်မှာ သေချာပေါက် ရောက်သွားလိမ့်မယ်... ဒါကြောင့် ငါတို့ရဲ့ မြေကမ္ဘာနဂါး ကုန်သည်အသင်း ကို အခု ဝူမိသားစု ကုန်သည်အသင်း နဲ့ ပေါင်းစည်းလိုက်တာက အမှန်ကန်ဆုံး ရွေးချယ်မှုပဲ..."

"ဒါပေမဲ့ သူဌေး အကြံပြုတဲ့ အတိုင်း ငါတို့ တကယ် လုပ်လိုက်ရင် ငါတို့က အထက်ကမ္ဘာ တစ်ခုလုံးမှာ ရှိတဲ့ အင်အားအကြီးဆုံး လူတွေနဲ့ ရင်ဆိုင်ရလိမ့်မယ်... အင်မော်တယ် မဟာဧကရာဇ် အဆင့် စွမ်းအားရှင်တွေတောင် ဝင်မပါဘဲ နေနိုင်မှာ မဟုတ်ဘူး... ငါတို့ တကယ်ပဲ တောင့်ခံထားနိုင်ပါ့မလား..."

"မင်းတို့ ဒါကို နားမလည်ဘူး မလား... ဝူမိသားစု ကုန်သည်အသင်း ကို ငါတို့ လည်ပတ်နေတာ မဟုတ်ဘူး... ငါတို့က အလုပ်သမားတွေ သက်သက်ပဲ... အကယ်၍ အထက်ကမ္ဘာ က စွမ်းအားကြီးတဲ့ ပုဂ္ဂိုလ်တွေကို ငါတို့ တကယ် ပြစ်မှားမိရင်တောင် အဲဒါက သူဌေး ဝူ ရဲ့ ပြဿနာပဲ... ငါတို့က အမိန့်အတိုင်း လုပ်ဆောင်ဖို့ပဲ လိုတယ်... ပြီးတော့ ဝူမိသားစု ကုန်သည်အသင်း ဖျက်ဆီးခံရရင်တောင် ငါတို့က အန္တရာယ်ကင်းကင်း နေနိုင်သေးတယ်... ဘာလို့လဲဆိုတော့ ငါတို့ရဲ့ ကျင့်ကြံခြင်း က နိမ့်ကျနေတော့ ငါတို့လို ပုရွက်ဆိတ် တွေကို ဘယ်သူကမှ ဂရုစိုက်နေမှာ မဟုတ်ဘူးလေ..."

ချိုက်ကျန်းခွန်း ၏ စကားကို ကြားပြီးနောက် ထိုနေရာရှိ အဆင့်မြင့် အဖွဲ့ဝင် အားလုံးက သဘောပေါက်သွားသည့် အမူအရာများဖြင့် သူဌေး ဖြစ်သူသည် အလွန် ထက်မြက်ကြောင်း ချီးကျူးလိုက်ကြ၏။

ထိုကဲ့သို့သော ချီးကျူးမှုများကို နားထောင်ရင်း ချိုက်ကျန်းခွန်း က ကျေနပ်စွာ ခေါင်းညိတ်လိုက်သည်။

"အတိုချုပ် ပြောရရင် ဒီအရာက ကြီးမားတဲ့ လောင်းကြေး တစ်ခုပဲ... အကယ်၍ ဝူမိသားစု ကုန်သည်အသင်း က အထက်ကမ္ဘာ မှာ အကြီးဆုံး ကုန်သည်အသင်း တကယ် ဖြစ်လာနိုင်မယ် ဆိုရင် ငါတို့ကို ဝါရင့် အဖွဲ့ဝင်တွေ အဖြစ် သတ်မှတ်လို့ ရပြီ... အဲဒီအခါကျရင် ငါတို့ရဲ့ ခံစားခွင့်တွေက ဘယ်လောက်တောင် ဆိုးရွားနိုင်မှာလဲ..."

"ဒါကြောင့် သွားပြီး အင်မော်တယ် ကျင့်ကြံခြင်း သတင်းစာ ကို ဆက်သွယ်လိုက်... ဝူမိသားစု ကုန်သည်အသင်း က မိတ်ဖက်တွေ ရှာနေတယ် ဆိုတဲ့ သတင်းကို ဖြန့်လိုက်..."

အင်မော်တယ် ကျင့်ကြံခြင်း သတင်းစာ သည် အထက်ကမ္ဘာ တစ်ခုလုံးတွင် အကြီးဆုံး သတင်းစာ ဖြစ်၏။နယ်မြေ တိုင်းတွင် ဖြစ်ပျက်သမျှ အရာအားလုံးကို ၎င်းက သိရှိသည်ဟု ဆိုနိုင်သည်။ သေချာသည်မှာ အင်မော်တယ် မဟာဧကရာဇ် နှင့် ပတ်သက်သည့် အလွန် အရေးကြီးသော ကိစ္စရပ်မျိုး မဟုတ်ပါက ၊ အင်မော်တယ် ကျင့်ကြံခြင်း သတင်းစာသည် သူ၏ ကိုယ်ပိုင် နယ်မြေ နှင့် ပတ်သက်သည့် ကိစ္စရပ်များကိုသာ ဖော်ပြလေ့ ရှိသည်။

သို့သော်လည်း အကယ်၍ သင်သည် ငွေကြေး သုံးစွဲမည် ဆိုပါက ၊ သင် ဖြန့်ဝေလိုသော သတင်းစကားကို အင်မော်တယ် ကျင့်ကြံခြင်း သတင်းစာ တွင် ဖော်ပြနိုင်သေး၏။

ထိုစဉ် မြေကမ္ဘာနဂါး ကုန်သည်အသင်း မှ အဆင့်မြင့် အဖွဲ့ဝင်များက မေးခွန်းသစ် တစ်ခုကို ထုတ်မေးလာကြသည်။

"ဒါပေမဲ့ သူဌေး... အကယ်၍ အခြား နယ်မြေတွေက ကုန်သည်အသင်းတွေက ဝူမိသားစု ကုန်သည်အသင်း နဲ့ မပူးပေါင်းချင်ဘူး ဆိုရင် ဘယ်လိုလုပ်မလဲ..."

"မေးခွန်းကောင်းပဲ... အဲဒီလိုဆိုရင်တော့ နယ်မြေ တိုင်းမှာ ဝူမိသားစု ကုန်သည်အသင်း တစ်ခု တည်ထောင်ပြီး သူတို့ကို ရှင်သန်ခွင့် မပေးဖို့ပဲ ရှိတော့တယ်..."

ချိုက်ကျန်းခွန်း က အေးစက်သော မျက်နှာထားဖြင့် ပြောလိုက်၏။သူသည် သာမန် ဘဝမှနေ၍ လက်ရှိ အနေအထားအထိ ရောက်ရှိလာခြင်းမှာ ဤကဲ့သို့သော ရက်စက်မှုကြောင့်သာ ဖြစ်သည်။

"ဟုတ်ကဲ့ပါ..."

မကြာမီမှာပင် လိုအပ်သော ပြင်ဆင်မှုများ အားလုံးကို ပြုလုပ်ပြီးနောက် ချိုက်ကျန်းခွန်း သည် အင်မော်တယ် ကျင့်ကြံခြင်း သတင်းစာ ၏ တောင်ပိုင်း ဒေသ ဌာနခွဲ သို့ ထွက်ခွာသွား၏။သူ၏ အထောက်အထားကို ထုတ်ဖော် ပြောဆိုပြီးနောက် ၊ ဌာနခွဲ ၏ တာဝန်ခံဖြင့် လျင်မြန်စွာ ဆက်သွယ်နိုင်ခဲ့သည်။

"သူဌေး ချိုက်... ခင်ဗျား ဆိုလိုတာက အထက်ကမ္ဘာ ရဲ့ နယ်မြေ တိုင်းမှာ ဝူမိသားစု ကုန်သည်အသင်း က မိတ်ဖက်တွေ ရှာနေတယ် ဆိုတဲ့ သတင်းကို ဖော်ပြချင်တာလား..."

ချိုက်ကျန်းခွန်း ၏ စကားကို ကြားလိုက်ရချိန်တွင် ဟွမ်ယွမ် ဒေသရှိ အင်မော်တယ် ကျင့်ကြံခြင်း သတင်းစာ ၏ တာဝန်ခံ ရှီဟောက် ၏ မျက်နှာပေါ်တွင် မယုံကြည်နိုင်သည့် အမူအရာများ ဖြစ်ပေါ်လာခဲ့သည်။

ချိုက်ကျန်းခွန်း က အနည်းငယ် ခေါင်းညိတ်ပြလိုက်သည်။

"ဟုတ်တယ်.."

"နေပါဦး... ဒီကိစ္စကို ကျွန်တော် အရင် စဉ်းစားကြည့်ပါရစေ..."

ဤအရာက ရှီဟောက် ကို ဇဝေဇဝါ ဖြစ်သွားစေပြီးနောက် နောက်ဆုံးတွင် သူ နားလည်သွားကာ ချိုက်ကျန်းခွန်း ကို ကြည့်၍ ပြောလိုက်၏။

"ဒါဆို အခု ခင်ဗျား ပြောနေတာက မြေကမ္ဘာနဂါး ကုန်သည်အသင်း က ဝူမိသားစု ကုန်သည်အသင်း နဲ့ ပေါင်းစည်းသွားပြီ ဆိုတဲ့ သဘောလား..."

"အင်း..."

ချိုက်ကျန်းခွန်း ၏ ပေါ့ပေါ့ပါးပါး အမူအရာကို မြင်သောအခါ ရှီဟောက် မှာ အနည်းငယ် ဇဝေဇဝါ ဖြစ်သွား၏။မည်သို့ပင်ဆိုစေကာမူ မြေကမ္ဘာနဂါး ကုန်သည်အသင်း သည် ယခင်က ဟွမ်ယွမ် ဒေသ တွင် အကြီးဆုံး ကုန်သည်အသင်း ဖြစ်ခဲ့ပြီး ၎င်း၏ သူဌေး ဖြစ်သော ချိုက်ကျန်းခွန်း မှာလည်း ရှီဟောက် နှင့် အလွန် ကောင်းမွန်သော ဆက်ဆံရေး ရှိသည်။

ထို့ကြောင့် မြေကမ္ဘာနဂါး ကုန်သည်အသင်း ၏ နောက်ကွယ်ရှိ ပိုင်ရှင်မှာ ယွမ်ကျန်း ဖြစ်ကြောင်း ရှီဟောက် သဘာဝကျကျ သိရှိထား၏။

ရှီဟောက် ၏ အတွေးများကို ခန့်မှန်းမိသကဲ့သို့ ချိုက်ကျန်းခွန်း က တီးတိုး ပြောလိုက်သည်။

"အဲဒီအတွက် ခင်ဗျား စိတ်ပူစရာ မလိုပါဘူး... ယွမ်ကျန်း က သေသွားပြီ... ဝူမိသားစု ကုန်သည်အသင်း ရဲ့ လက်ချက်ပဲ..."

ထိုစကားကို ကြားသောအခါ ရှီဟောက် မှာ အံ့အားသင့်သွားသော်လည်း ၊ သူသည် ချိုက်ကျန်းခွန်း ၏ ပခုံးကို ပုတ်၍ နှစ်သိမ့်ပေးလိုက်၏။

"အစ်ကို ချိုက်... ကလဲ့စားချေနိုင်ခဲ့တဲ့ အတွက် ဂုဏ်ယူပါတယ်..."

ရင်းနှီးသော သူငယ်ချင်း တစ်ယောက် အနေဖြင့် ချိုက်ကျန်းခွန်း နှင့် ပတ်သက်သည့် အချို့အရာများကို ရှီဟောက်အနေဖြင့် သိရှိထားသည်။

ထိုစကားကို ကြားသောအခါ ချိုက်ကျန်းခွန်း သည် မည်သည့် အမူအရာမျှ မပြခဲ့ချေ။ ကလဲ့စားမချေမီက သူသည် အလွန် ကလဲ့စားချေလိုခဲ့သော်လည်း ကလဲ့စားချေပြီးနောက် ၎င်းက သိပ်ထူးခြားမှု မရှိကြောင်း တွေ့ရှိခဲ့ရသည်။

ရှီဟောက် က အလွန် လေးနက်သော မျက်နှာထားဖြင့် အလျင်အမြန် ပြောလိုက်၏။

"အစ်ကို ချိုက်... အကယ်၍ ဒီသတင်းသာ ပြန့်သွားရင် အထက်ကမ္ဘာ တစ်ခုလုံးမှာ ကြီးမားတဲ့ အုံကြွမှုတွေ ဖြစ်လာမယ် ဆိုတာကို ခင်ဗျား ခန့်မှန်းမိလောက်မယ်လို့ ကျွန်တော် ထင်တယ်... အဲဒီအချိန်ကျရင် အင်မော်တယ် အရှင်မြတ် တွေ ဒါမှမဟုတ် အင်မော်တယ် မဟာဧကရာဇ် တွေတောင် ဝူမိသားစု ကုန်သည်အသင်း ကို တိုက်ခိုက်လာနိုင်တယ်... ဝူမိသားစု ကုန်သည်အသင်း က တကယ်ပဲ တောင့်ခံထားနိုင်မယ်လို့ ခင်ဗျား သေချာလို့လား..."

ချိုက်ကျန်းခွန်း က ခေါင်းကို ဖြည်းညင်းစွာ ခါရမ်းလိုက်သည်။

"ဒါက ကြီးမားတဲ့ လောင်းကြေး တစ်ခုပဲ မိတ်ဆွေ... အကယ်၍ ဝူမိသားစု ကုန်သည်အသင်း က အောင်မြင်သွားပြီး အထက်ကမ္ဘာ က လူတိုင်းကို တောင့်ခံထားနိုင်မယ် ဆိုရင် ဝူမိသားစု ကုန်သည်အသင်း ရဲ့ ဝါရင့် အဖွဲ့ဝင် တစ်ယောက် အနေနဲ့ ငါလည်း အကျိုးအမြတ် အများကြီး ရရှိမှာပဲ..."

"အကယ်၍ ငါတို့ ကျရှုံးသွားရင်လည်း အရှုံး မရှိပါဘူး... ဘာပဲဖြစ်ဖြစ် ငါက ဝူမိသားစု ကုန်သည်အသင်း ရဲ့ ပိုင်ရှင် မှ မဟုတ်တာ... အကယ်၍ သူတို့က လူရှာချင်ရင်တောင် ဝူမိသားစု ကုန်သည်အသင်း ရဲ့ ပိုင်ရှင် ဆီကိုပဲ သွားလို့ ရမှာ..."

ထိုစကားကို ကြားသောအခါ ရှီဟောက် မှာ တစ်ခဏမျှ မှင်သက်သွားပြီးနောက် ရယ်မောလိုက်၏။

"ဟားဟား... အစ်ကို ချိုက် လို့ပဲ ပြောရမယ်... ခင်ဗျားက အရာအားလုံးကို အသေးစိတ် စဉ်းစားထားပြီးပြီ ဆိုတော့ ခင်ဗျားကို တားတာက ကျွန်တော့်အတွက် ကျေးဇူးကန်းရာ ကျလိမ့်မယ်... ဒါပေမဲ့ ဒီကိစ္စကို ရှင်းရှင်းလင်းလင်း ပြောဦးမယ်... ငါတို့ကြားက ဆက်ဆံရေးက ကောင်းပေမယ့် အထက်ကမ္ဘာ တစ်ခုလုံး မြင်တွေ့နိုင်တဲ့ သတင်းမျိုးကို အင်မော်တယ် ကျင့်ကြံခြင်း သတင်းစာ မှာ ဖော်ပြဖို့ ဆိုတာ အရင်းအမြစ် အများကြီး လိုအပ်တယ် ဆိုတာကို ခင်ဗျား သိပါတယ်..."

ရှီဟောက် ၏ လေသံသည် ပိုပို၍ တည်ကြည် လေးနက်လာ၏။အကယ်၍ သူတို့သည် အထက်ကမ္ဘာ တစ်ခုလုံးသို့ ရောက်ရှိနိုင်မည့် သတင်းကို ဖော်ပြလိုပါက လိုအပ်သော ကောင်းကင် ဝိညာဉ်ကျောက်တုံး ပမာဏမှာ မြေကမ္ဘာနဂါး ကုန်သည်အသင်း တတ်နိုင်သည်ထက် ပိုများပြားလိမ့်မည် ဖြစ်သည်။

သို့သော် ချိုက်ကျန်းခွန်း က လက်ကို ပေါ့ပေါ့ပါးပါး ဝှေ့ယမ်းပြလိုက်ပြီးနောက် သိုလှောင်ရေး လက်စွပ် တစ်ကွင်းကို ထုတ်ယူကာ ပြောလိုက်၏။

"စည်းကမ်း တွေကို ကျွန်တော် သေချာပေါက် သိပါတယ်... သူဌေး ဝူ က ကျွန်တော့်ကို အင်မော်တယ် ဝိညာဉ်ကျောက်တုံး တွေ ပေးထားပြီးသားပါ... ဒီမှာ အဆင့်မြင့် အင်မော်တယ် ဝိညာဉ်ကျောက်တုံး တစ်သန်း ရှိတယ်... ဆယ်ရက်လောက် ခေါင်းစီးသတင်း ဖြစ်ဖို့ လုံလောက်တယ်..."

အင်မော်တယ် ကျင့်ကြံခြင်း သတင်းစာ တွင် အထက်ကမ္ဘာ တစ်ခုလုံး မြင်တွေ့နိုင်မည့် သတင်းစကားများကို ဖော်ပြနိုင်သော ကဏ္ဍ ဆယ်ခု ရှိသည်။ ဈေးနှုန်းများက သတင်းစကား မည်မျှ ထင်ရှားသည် အပေါ် မူတည်၍ ကွာခြားပြီး ၊ အဈေးအကြီးဆုံး ခေါင်းစီးသတင်း ကဏ္ဍ မှာ တစ်ရက်လျှင် အဆင့်မြင့် အင်မော်တယ် ဝိညာဉ်ကျောက်တုံး တစ်သိန်း အထိ ကုန်ကျကာ အင်မော်တယ် အရှင်မြတ် များအတွက်ပင် အနည်းငယ် မတတ်နိုင်သော ပမာဏ ဖြစ်၏။

အကယ်၍ ဝူဟောက် သာ ဤမျှ မချမ်းသာခဲ့လျှင် ဝူရူလုံအနေဖြင့် ဤကဲ့သို့ ငွေကြေး သုံးစွဲနိုင်မည် မဟုတ်ပေ။

ချိုက်ကျန်းခွန်း ၏ စကားကို ကြားသောအခါ ရှီဟောက် မှာ သက်ပြင်းချမိသည်။

"အဆင့်မြင့် အင်မော်တယ် ဝိညာဉ်ကျောက်တုံး တစ်သန်း ကို အလွယ်တကူ ထုတ်ပေးနိုင်တာကို ကြည့်ရင် ဝူမိသားစု ကုန်သည်အသင်း က သာမန် အင်အားစု တစ်ခုတော့ မဟုတ်ဘူး ထင်တယ်... အစ်ကို ချိုက်... ခင်ဗျားက တကယ်ကို စွမ်းအားကြီးတဲ့ ကျောထောက်နောက်ခံ တစ်ခုကို ရှာတွေ့ခဲ့တာပဲ... အကယ်၍ ခင်ဗျား အောင်မြင်သွားရင် ကျွန်တော့်ကို မမေ့နဲ့နော်..."

"စိတ်မပူနဲ့ ညီနောင် ရှီ... ငါ့ရဲ့အလားအလာကို အသိအမှတ်ပြုပေးခဲ့တဲ့ မင်းရဲ့ ကြင်နာမှုကို ငါဘယ်တော့မှ မေ့မှာ မဟုတ်ပါဘူး... တတ်နိုင်ရင် မင်းကို သေချာပေါက် ကူညီပေးပါ့မယ်..."

ချိုက်ကျန်းခွန်း က ပြုံးကာ တည်ကြည် လေးနက်စွာဖြင့် ပြောလိုက်၏။

"ကောင်းပြီ... ကျွန်တော် မှတ်ထားလိုက်ပါ့မယ်... အစောဆုံး သုံးရက် အတွင်းမှာ ဖော်ပြနိုင်မယ်လို့ ခန့်မှန်းရတယ်... ခင်ဗျား အခု ပြန်လို့ ရပါပြီ..."

"အင်း..."

ချိုက်ကျန်းခွန်း လှည့်ထွက်သွားသည်ကို မြင်သောအခါ ရှီဟောက် သည် ချိုက်ကျန်းခွန်း ၏ ထွက်ခွာသွားသော ကျောပြင်ကို လေးနက်သော မျက်နှာထားဖြင့် စိုက်ကြည့်နေမိသည်။

သို့သော် အတန်ကြာပြီးနောက် သူသည် ခေါင်းခါလိုက်ပြီး ဤကိစ္စကို သတင်းပို့ရန် လှည့်ထွက်သွား၏။မည်သို့ပင်ဆိုစေကာမူ ငွေမရှာခြင်းက လူမိုက် တစ်ယောက်သာ လုပ်မည့် အလုပ်သာ ဖြစ်သည်။

သို့သော်လည်း ဤသတင်းသာ ဖော်ပြခံရပါက အထက်ကမ္ဘာ တစ်ခုလုံး ကြီးမားသော အုံကြွမှုကြီး တစ်ခုကို သေချာပေါက် ကြုံတွေ့ရလိမ့်မည် ဖြစ်ကြောင်း ရှီဟောက် ခန့်မှန်းမိပေသည်။

အခန်း (၂၁၀) - အထက်ကမ္ဘာ ၏ တုန်လှုပ်မှု

"ဘာ... ဝူမိသားစု ကုန်သည်အသင်း က ဘယ်လို အင်အားစု မျိုးလဲ... ငါတို့ကို သူတို့ရဲ့ ကိုယ်စားလှယ်တွေ ဖြစ်လာအောင် လုပ်ရဲတယ်ပေါ့လေ..."

"ဝူမိသားစု ကုန်သည်အသင်း က တကယ်ကို ရဲတင်းလွန်းတယ်... ငါတို့ အားလုံး ပူးပေါင်းပြီး သူတို့ကို တိုက်ခိုက်မှာကို မကြောက်ဘူးလား..."

"ဟွန့်... ဝူမိသားစု ကုန်သည်အသင်း က တကယ်တမ်း ဘယ်လောက် စွမ်းအားကြီးလဲ ဆိုတာ ငါ ကြည့်ချင်သေးတယ်... သူတို့က လူရွှင်တော် တွေ သက်သက်ပဲ... ငါတို့က ဝူမိသားစု ကုန်သည်အသင်း ရဲ့ ကိုယ်စားလှယ်တွေ မလုပ်ရင် သူတို့ ဘာလုပ်နိုင်မှာလဲ..."

ထိုသတင်း ပျံ့နှံ့သွားသည်နှင့် တစ်ပြိုင်နက် ချိုက်ကျန်းခွန်း ခန့်မှန်းထားသည့်အတိုင်း မည်သူကမျှ ဝူမိသားစု ကုန်သည်အသင်း ၏ ကိုယ်စားလှယ် ဖြစ်လာရန် ဆန္ဒမရှိကြချေ။

မည်သို့ပင်ဆိုစေကာမူ သူတို့သည် မူလကတည်းက သူတို့၏ သက်ဆိုင်ရာ နယ်မြေ များတွင် အကြီးဆုံး ကုန်သည်အသင်းများ ဖြစ်ကြပြီး သူတို့အထက်တွင် မည်သူမျှ မရှိချေ။ ဝူမိသားစု ကုန်သည်အသင်း ၏ စကားတစ်ခွန်းတည်းဖြင့် သူတို့သည် ဝူမိသားစု ကုန်သည်အသင်း ၏ လက်အောက်ခံများ မည်သို့ ဖြစ်လာနိုင်မည်နည်း။

"သူဌေး... ငါတို့ကို ဘယ်သူမှ မဆက်သွယ်ရင် ဘယ်လိုလုပ်မလဲ..."

မျက်စိတစ်မှိတ်အတွင်း သုံးရက် ကုန်ဆုံးသွားပြီး ဤကာလအတွင်း မည်သူကမျှ ချိုက်ကျန်းခွန်း ကို မဆက်သွယ်ခဲ့ချေ။ ၎င်းက ချိုက်ကျန်းခွန်း မျှော်လင့်ထားသည့်အတိုင်းပင် ဖြစ်၏။

ချိုက်ကျန်းခွန်း က မတ်တတ်ထရပ်ကာ ဖြည်းညင်းစွာ ပြောလိုက်သည်။

"ကိစ္စမရှိဘူး... သူဌေး ကို ငါ ဆက်သွယ်လိုက်မယ်... နောက်တစ်ဆင့်ကို ကူးရမယ့် အချိန် ရောက်ပြီ..."

တစ်ချိန်တည်းမှာပင် ရွှမ်ကျုံး နယ်မြေ ရှိ ဝူရူလုံ နှင့် ကျန်းယဲ့ တို့သည်လည်း ထိုသတင်း ရရှိခဲ့သော်လည်း သူတို့ နှစ်ဦးစလုံးက မည်သည့် ထူးခြားသော တုံ့ပြန်မှုမျှ မပြခဲ့ကြချေ။

အချိန်များက နောက်တစ်နေ့သို့ လျင်မြန်စွာ ကုန်ဆုံးသွား၏။တစ်ရက်တာ ခရီးသွားပြီးနောက် ချိုက်ကျန်းခွန်း သည် ဝူမိသားစု ကုန်သည်အသင်း နှင့် ဝူရူလုံ ၏ ရှေ့သို့ ရောက်ရှိလာခဲ့သည်။

"သူဌေး..."

"အင်း... ထပါ..."

ဝူရူလုံ က တီးတိုး ပြောလိုက်၏။

ထိုစကားကို ကြားသောအခါ ချိုက်ကျန်းခွန်း က မတ်တတ်ထရပ်ကာ တည်ကြည် လေးနက်စွာဖြင့် ပြောလိုက်သည်။

"သူဌေး... အခြား နယ်မြေတွေက ကုန်သည်အသင်းတွေကို ငါတို့ ဝူမိသားစု ကုန်သည်အသင်း ရဲ့ ကိုယ်စားလှယ်တွေ ဖြစ်လာဖို့ အင်မော်တယ် ကျင့်ကြံခြင်း သတင်းစာထဲက ကြော်ငြာကြောင့် ကျွန်တော် ဒီနေရာကို လာခဲ့တာပါ... တစ်နှစ်ကြာတဲ့အထိ အခြား ဘယ်ကုန်သည်အသင်းကမှ မဆက်သွယ်ဘူး ဆိုရင် နောက်တစ်ဆင့်ကို ကူးဖို့ အချိန်ရောက်ပြီ..."

"နောက်တစ်ဆင့် လား..."

ဝူရူလုံ မှာ အနည်းငယ် သိချင်သွား၏။ချိုက်ကျန်းခွန်း သည် သူ့ကို အထက်ကမ္ဘာ ရှိ ကုန်သည်အသင်း အားလုံးကို ဖိနှိပ်စေချင်သည်ဟု သူ ထင်မှတ်ထားခဲ့သည်။

"ဟုတ်တယ်... တကယ်တမ်းကျတော့ သတင်းစကား တစ်ခုတည်း အပေါ် အားကိုးပြီး အထက်ကမ္ဘာ က ကုန်သည်အသင်း အားလုံးကို ငါတို့ ဝူမိသားစု ကုန်သည်အသင်း ရဲ့ ကိုယ်စားလှယ်တွေ ဖြစ်လာအောင် လုပ်ဖို့ ကျွန်တော် မရည်ရွယ်ထားဘူး... ဘာပဲဖြစ်ဖြစ် သူတို့က မူလကတည်းက သူတို့ရဲ့ သက်ဆိုင်ရာ ဒေသတွေမှာ ဧကရာဇ် တွေ ဖြစ်ခဲ့ကြတာပဲ... အကယ်၍ ငါတို့ ဝူမိသားစု ကုန်သည်အသင်း က သူတို့ကို ဖိအားပေးမယ် ဆိုရင် ဘယ်သူကမှ သဘောတူမှာ မဟုတ်ဘူး..."

"ဒီအချိန်မှာ ငါတို့ လုပ်ရမှာက တစ်နှစ် စောင့်ပြီးရင် အင်မော်တယ် ကျင့်ကြံခြင်း သတင်းစာ မှာ သတင်းတစ်ခု ဖော်ပြဖို့ပဲ... ဝူမိသားစု ကုန်သည်အသင်း ကို တည်ထောင်ဖို့ နယ်မြေ အသီးသီးက ကျင့်ကြံသူ တွေကို ဖိတ်ခေါ်ပြီး ဝူမိသားစု ကုန်သည်အသင်း က အကာအကွယ် ပေးမယ် ဆိုတဲ့ သတင်းကို ဖြန့်ဖို့ပဲ... အကယ်၍ တစ်ယောက်ယောက်က လှုပ်ရှားရဲတယ် ဆိုရင် ကြီးမားတဲ့ ကုန်သည်အသင်း အနည်းငယ်ကို ငါတို့ သုတ်သင်ပစ်လိုက်ရုံပဲ..."

"အဲဒီအချိန်ကျရင် ဝူမိသားစု ကုန်သည်အသင်း က ဒေသ အားလုံးမှာ နာမည်ရလာလိမ့်မယ်... ပြီးတော့ သူ့ရဲ့ ခိုင်မာတဲ့ စွမ်းအားကြောင့် အခြား ကုန်သည်အသင်းတွေက ဝူမိသားစု ကုန်သည်အသင်း ကို ပေါ်ပေါ်ထင်ထင် မတိုက်ခိုက်ရဲကြတော့ဘူး... ဒါ့အပြင် ဝူမိသားစု ကုန်သည်အသင်း ပိုင်ဆိုင်ထားတဲ့ အရာတွေနဲ့ ဆိုရင် နှစ်တစ်ရာ အတွင်းမှာ အထက်ကမ္ဘာ ရဲ့ အကြီးဆုံး ကုန်သည်အသင်း ဖြစ်လာလိမ့်မယ်..."

ထိုသို့ပြောနေရင်း၊ ချိုက်ကျန်းခွန်း ၏လေသံမှာ ပိုပို၍ စိတ်လှုပ်ရှားလာ၏။

ထိုစကားကို ကြားပြီးနောက် ၊ ဝူရူလုံ က နက်နက်ရှိုင်းရှိုင်း စဉ်းစားလိုက်ကာ အတန်ကြာပြီးနောက် နောက်ဆုံးတွင် သဘောတူလိုက်သည်။

"ငါ နားလည်ပြီ... ဒီအရာက ကောင်းကင် ဝိညာဉ်ကျောက်တုံး ပဲ... ဒီကိစ္စအတွက် ခင်ဗျားက အပြည့်အဝ တာဝန်ယူပါ..."

ဝူရူလုံ ၏ အမိန့်ကို ရရှိပြီးနောက် ချိုက်ကျန်းခွန်း သည် အင်မော်တယ် ဝိညာဉ်ကျောက်တုံး များကို ယူကာ နောက်တစ်ဆင့်အတွက် ပြင်ဆင်ရန် အောက်သို့ ဆင်းသွား၏။တစ်နှစ်အကြာတွင် ဝူမိသားစု ကုန်သည်အသင်း သည် အထက်ကမ္ဘာ တွင် အကြီးဆုံး ကုန်သည်အသင်း ဖြစ်လာမည် သို့မဟုတ် သမိုင်းကြောင်း တစ်လျှောက် ဖုန်မှုန့်တစ်ခု အဖြစ်သို့ ပြောင်းလဲသွားမည် ဖြစ်သည်။

ချိုက်ကျန်းခွန်း ထွက်သွားပြီးနောက် ဘေးတွင် ရပ်နေသော ကျန်းယဲ့ က မေးလိုက်၏။

"သူဌေး ဝူ... အထက်ကမ္ဘာ က အင်အားအကြီးဆုံး လူတွေကို ခင်ဗျား တကယ်ပဲ တားဆီးနိုင်မယ်ဆိုတာ သေချာရဲ့လား..."

ထိုစကားကို ကြားသောအခါ ဝူရူလုံ က ဘာမှ မပြောဘဲ လက်တွေ့ လုပ်ဆောင်ပြလိုက်၏။ဖရိုဖရဲ ခေါင်းလောင်း ကို တိုက်ရိုက် ထုတ်ယူ၍ မေးလိုက်သည်။

"စီနီယာ ကျန်း ဘယ်လို ထင်လဲ..."

" ဟုတ်တယ်... သေချာပေါက် တားဆီးနိုင်တယ်..."

ဝူရူလုံ သည် ဖရိုဖရဲ ခေါင်းလောင်း ကို ထုတ်ယူလိုက်သည်နှင့် တစ်ပြိုင်နက် ၎င်းထံမှ ထွက်ပေါ်လာသော ကြောက်မက်ဖွယ်ကောင်းသည့် အရှိန်အဝါကို ကျန်းယဲ့ အာရုံခံမိလိုက်သည်။သူ့လို လူမျိုး တစ်ထောင် သို့မဟုတ် အယောက် တစ်သောင်း ပေါင်းရင်တောင် ဖရိုဖရဲ ခေါင်းလောင်း ၏ လက်ချက်ဖြင့် သေဆုံးသွားနိုင်သည်ဟု သူ ခံစားမိသည်။

"ဒါကြောင့် စိတ်ပူစရာ မလိုဘူး... ငါတို့ရဲ့ ဝူမိသားစု ကုန်သည်အသင်း က အံ့အားသင့်စရာတွေ မရှိဘဲနဲ့ အထက်ကမ္ဘာ မှာ အကြီးဆုံး ကုန်သည်အသင်း ဖြစ်လာလိမ့်မယ်... အကယ်၍ တစ်ယောက်ယောက်က ဝင်ပါမယ် ဆိုရင် သူတို့ကို သုတ်သင်ပစ်လိုက်ရုံပဲ..."

"ဟုတ်ကဲ့... ကျွန်တော် နားလည်ပါပြီ သူဌေး..."

ယခုအခါ ကျန်းယဲ့ တွင် အကြွင်းမဲ့ ယုံကြည်မှု ရှိသွားပြီး ခေါင်းညိတ်လိုက်၏။ဝူမိသားစု ကုန်သည်အသင်း ၏ နောက်သို့ လိုက်ပါခြင်းသည် သူ၏ အနာဂတ်မှာ အကန့်အသတ် ရှိမည်မဟုတ်ကြောင်း ဆိုရပေမည်။

တစ်နှစ်ဆိုသည့် အချိန်က လျင်မြန်စွာ ကုန်ဆုံးသွားပြီး ချိုက်ကျန်းခွန်း ခန့်မှန်းထားသည့်အတိုင်း မည်သူကမျှ ဝူမိသားစု ကုန်သည်အသင်း ထံ ပူးပေါင်းရန် မချဉ်းကပ်ခဲ့ကြချေ။ သူတို့သည် ဝူမိသားစု ကုန်သည်အသင်း ကို ရယ်စရာ တစ်ခု အဖြစ်သာ သဘောထားခဲ့ကြသည်။

ချိုက်ကျန်းခွန်း ထပ်ရောက်လာသည်ကို မြင်သောအခါ ရှီဟောက် က မနေနိုင်ဘဲ သက်ပြင်းချကာ ပြောလိုက်၏။

"အစ်ကို ချိုက်... ဒီအရာက ခင်ဗျားအတွက် အရှုံးပေါ်မယ့် ကိစ္စ တစ်ခုပဲ..."

" ညီနောင် ရှီ... ခင်ဗျား ဘာမှ ထပ်ပြောစရာ မလိုတော့ဘူး... ငါက တခြား ကိစ္စ တစ်ခုအတွက် ဒီနေရာကို လာခဲ့တာပါ..."

ချိုက်ကျန်းခွန်း က ဂရုမစိုက်ဘဲ သူ လာရသည့် ရည်ရွယ်ချက်ကို တိုက်ရိုက် ပြောလိုက်၏။

ထိုစကားကို ကြားပြီးနောက် ၊ ရှီဟောက် ၏ အမူအရာမှာ သိပ်မကောင်းလှဘဲ မျက်မှောင်ကြုတ်ကာ ပြောလိုက်သည်။

"အစ်ကို ချိုက်... ခင်ဗျား သေချာလို့လား... အခုတော့ နောက်ကြောင်းပြန်လှည့်ဖို့ တကယ်ကို မဖြစ်နိုင်တော့ဘူး ထင်တယ်..."

"ညီနောင် ရှီ... မင်း ငါ့ကို သိပါတယ်... ငါ ဒီလမ်းစဉ်ကို ရွေးချယ်ပြီးကတည်းက နောက်ကြောင်းပြန်လှည့်ဖို့ ရည်ရွယ်ချက် မရှိဘူး..."

ချိုက်ကျန်းခွန်း က ခေါင်းခါလိုက်ပြီး သူ၏ မျက်နှာအမူအရာသည် အလွန် တည်ငြိမ်သည်။

ထိုမြင်ကွင်းကြောင့် ရှီဟောက်မှာ သဘောတူရန်မှတစ်ပါး အခြား ရွေးချယ်စရာ မရှိတော့ချေ။ ချိုက်ကျန်းခွန်း သည် အင်မော်တယ် ဝိညာဉ်ကျောက်တုံး များကို လွှဲပြောင်းပေးပြီး သုံးရက်အကြာတွင် သတင်းများက အထက်ကမ္ဘာ တစ်ခုလုံးသို့ သဘာဝကျကျ ပျံ့နှံ့သွားတော့သည်။

ချိုက်ကျန်းခွန်း ခန့်မှန်းထားသည့်အတိုင်း လူအတော်များများက ရွှမ်ကျုံး နယ်မြေ သို့ ရောက်ရှိိလာကြ၏။

"ခင်ဗျားက အိမ်နီးချင်း အလယ်ပိုင်းလွင်ပြင် နယ်မြေ က လို့ ပြောတာလား..."

ဝူရူလုံ နှင့် ကျန်းယဲ့ တို့သည် သူတို့၏ ရှေ့ရှိ လျိုထျန်းရွှေအင်မော်တယ် ကျင့်ကြံသူ ကို ကြည့်၍ လေးနက်သော မျက်နှာထားဖြင့် မေးလိုက်သည် ။

"ဟုတ်ပါတယ် သူဌေး ဝူ... ခင်ဗျား ကျွန်တော့်ကို လုဇစ်ချီ လို့ပဲ ခေါ်နိုင်ပါတယ်... ဝူမိသားစု ကုန်သည်အသင်း ဌာနခွဲ တစ်ခုကို အဲဒီမှာ ဖွင့်မယ် ဆိုရင် ကျွန်တော့်ရဲ့ ဘေးကင်းရေးကို ဝူမိသားစု ကုန်သည်အသင်း က အာမခံနိုင်မလား ဆိုတာ စုံစမ်းဖို့ ကျွန်တော် လာခဲ့တာပါ..."

လုဇစ်ချီ က ဝူရူလုံ ကို ကြည့်၍ လေးနက်သော မျက်နှာထားဖြင့် မေးလိုက်၏။

ထိုစကားကို ကြားသောအခါ ဝူရူလုံ က တုံ့ဆိုင်းမနေဘဲ ခေါင်းညိတ်လိုက်ပြီး အလွန် တည်ကြည် လေးနက်စွာဖြင့် ပြောလိုက်သည်။

"ငါတို့ ဝူမိသားစု ကုန်သည်အသင်း က တခြားသူတွေကို အနိုင်ကျင့်မှာ မဟုတ်ဘူး... ဒါပေမဲ့ ငါတို့လည်း အနိုင်ကျင့်ခံမှာ မဟုတ်ဘူး... အကယ်၍ တစ်ယောက်ယောက်က ဝူမိသားစု ကုန်သည်အသင်း က ဘယ်သူ့ကိုမဆို အနိုင်ကျင့်မယ် ဆိုရင် သူတို့ သုတ်သင်ခံရဖို့ ပြင်ဆင်ထားသင့်တယ်..."

"ကောင်းပြီ... ဒီလိုဆိုရင် ကျွန်တော် လုဇစ်ချီ က အလယ်ပိုင်းလွင်ပြင် နယ်မြေ မှာ ဝူမိသားစု ကုန်သည်အသင်း ဌာနခွဲ တစ်ခု ဖွင့်ဖို့ ဆန္ဒရှိပါတယ်..."

လုဇစ်ချီ က ခေါင်းညိတ် သဘောတူလိုက်ပြီး သူ၏ လေသံမှာ အလွန် လေးနက်နေ၏။

ဤအရာက ဝူရူလုံ ကို လုဇစ်ချီ နှင့် ပတ်သက်၍ အနည်းငယ် သိချင်သွားစေသော်လည်း အခြားသူများ၏ ကိုယ်ရေးကိုယ်တာကို စပ်စုလိုစိတ် မရှိသဖြင့် နောက်ဆုံးတွင် မေးခွန်း သိပ်အများကြီး မမေးခဲ့ချေ။

"ကောင်းပြီ... ဒီအရာတွေက ငါတို့ ဝူမိသားစု ကုန်သည်အသင်း ရဲ့ ထုတ်ကုန်တွေပဲ... ဒါတွေကို ဘယ်လို သုံးရမလဲ၊ ဘယ်လို ရောင်းရမလဲ ဆိုတာနဲ့ ဆက်သွယ်ရေးစခန်း တွေ၊ ဟင်းလင်းပြင် နေရာရွှေ့ပြောင်း ဝင်္ကပါ တွေကို ဘယ်လို တည်ဆောက်ရမလဲ ဆိုတာကို သင်ပေးဖို့ လူတစ်ယောက်ကို ငါတာဝန်ပေးလိုက်မယ်..."

ဝူရူလုံ က လက်ဝှေ့ယမ်းလိုက်ပြီး လုဇစ်ချီ ကို ခေါ်သွားရန် လူတစ်ယောက်ကို စေခိုင်းလိုက်၏။

ချိုက်ကျန်းခွန်း ၏ အစီအစဉ်ကြောင့် ဝူရူလုံ သည် ဝူမိသားစု ကုန်သည်အသင်း ၏ ဒေသဆိုင်ရာ ကိုယ်စားလှယ်များ ဖြစ်လာရန် လျှောက်ထားသူများကို ဝူမိသားစု ကုန်သည်အသင်း ၏ လည်ပတ်ပုံများအကြောင်း ရှင်းပြရန် ရည်ရွယ်ချက်ဖြင့် ဝူမိသားစု ကုန်သည်အသင်း တွင် လူအများအပြားကို သီးသန့် စုဆောင်းထားခဲ့သည်။

သေချာသည်မှာ မိုဘိုင်းဖုန်း များနှင့် အခြားအရာများ အားလုံးကို ရွှမ်ကျုံး နယ်မြေ မှ ထုတ်လုပ်ခြင်း ဖြစ်သည်။ လိုအပ်သည်မှာ အခြား နယ်မြေများတွင် ဆက်သွယ်ရေးစခန်း များနှင့် နေရာရွှေ့ပြောင်း ဝင်္ကပါ များကို တည်ဆောက်ရန်သာ ဖြစ်သည်။ ဟင်းလင်းပြင် နေရာရွှေ့ပြောင်း ဝင်္ကပါ ၏ ရည်ရွယ်ချက်မှာ အချက်ပြလှိုင်း ထုတ်လွှင့်မှုကို ပိုမို မြန်ဆန်စေရန်သာ ဖြစ်သည်။