အခန်း (၁၂၇-၁၂၈)
Vol. 13 Ch. 127-128
Chapter 127+128
~
အခန်း ၁၂၇+၁၂၈ : တစ်ဦးတည်းဖြင့် လူအများကို ဖိနှိပ်ခြင်း
~
ရဲ့ညီအစ်ကို သုံးဖော်သည် ဂူချန်နှင့် ပထမဆုံး ထိပ်တိုက်တွေ့ဆုံသူများ ဖြစ်ကြသည်။
၎င်းတို့ သုံးဦးသည် လှပသော လှုပ်ရှားမှုများဖြင့် အရပ်မျက်နှာ သုံးခုမှနေ၍ လက်ကွက်များ ဖော်ဆောင်လိုက်ကြလေသည်။ မီတာ ဒါဇင်ပေါင်းများစွာ ကြီးမားသော ဓားပုံရိပ်ယောင် သုံးလက်မှာ ရုတ်တရက် ထွက်ပေါ်လာ၏။ ၎င်းတို့အပေါ်တွင် ဖြူဖွေးသော အလင်းတန်းများ လက်နေပြီး စူးရှလှသော ဓားအရှိန်အဝါများက လောကတစ်ခုလုံးကို ပြည့်နှက်သွားစေသည်။ သာမန်သိုင်းပညာရှင်များမှာ အဝေးက လှမ်းကြည့်ရုံမျှနှင့်ပင် ခန္ဓာကိုယ်ထဲ၌ စူးရှနာကျင်မှုကို ခံစားနေကြရသည်။
၎င်းတို့ သုံးဦးမှာ တည်ငြိမ်သောအကြည့်များဖြင့် ဓားပုံရိပ်ယောင်များကို တစ်ပြိုင်နက်တည်း ထိန်းချုပ်ကာ လေထဲသို့ ပိုင်းချလိုက်ပြီး အေးစက်စွာ ပြောလိုက်ကြသည် ။
"ငါတို့ သုံးယောက်လုံးမှာ SS-အဆင့် သိုင်းပါရမီဖြစ်တဲ့ နတ်ဘုရားဓားတာအို ရှိကြတယ်။ ဒီတိုက်ကွက်နဲ့ ပေါင်းစပ်လိုက်ရင် နိဗ္ဗာန အဆင့် ပညာရှင်တစ်ယောက်တောင် တောင့်ခံနိုင်မှာ မဟုတ်ဘူး.."
"မင်း အခုချက်ချင်း အရှုံးပေးပြီး ငါတို့ဆီက ခိုးထားတဲ့ တယ်လီပို့လက်ပတ်တွေကို ပြန်ပေးမယ်ဆိုရင် အရင်က ရန်ငြိုးတွေကို အားလုံး ကျေအေးပေးမယ်.."
ဝုန်း...
သို့သော် နောက်တစ်စက္ကန့်တွင် အနက်ရောင်ဝတ်စုံဝတ် ပုံရိပ်မှာ သူ၏ လက်မောင်းများကို ရုတ်တရက် ဆန့်ထုတ်လိုက်သည်။ နီရဲသော သွေးမြူများ ပေါက်ကွဲထွက်လာပြီး သူသည် ပြေးဝင်လာသော ဓားပုံရိပ်ယောင်များကို အင်အားသုံး၍ လှမ်းဖမ်းလိုက်သည်။ ဖန်ခွက်များ ကွဲကြေသွားသည့်အလား အသံနှင့်အတူ ဖျက်ဆီး၍မရနိုင်ဟု ထင်ရသော စူးရှသည့် ဓားပုံရိပ်ယောင်များမှာ တိုက်ရိုက် ချေဖျက်ခြင်း ခံလိုက်ရသည်။ ဖြူဖွေးသော ဓားအလင်းစများမှာ သူ၏ ပတ်ဝန်းကျင်တွင် လွင့်စင်သွားသော်လည်း သူ၏ အနားသို့ ရောက်လာသည်နှင့် တစ်ပြိုင်နက် ပူပြင်းလှသော အပူလှိုင်းကြောင့် အရည်ပျော်သွားကြတော့သည်။
"မင်းအမေကိုပဲ တောင်းပန်ခိုင်းလိုက်..ဟားဟားဟား.."
ဂူချန်သည် ဟင်းလင်းပြင်ကို နင်းလျှောက်ရင်း ခက်ထန်စွာ ရယ်မောလိုက်သည်။ ပြင်းထန်၍ ပူပြင်းလှသော အငွေ့အသက်များမှာ သူ၏ ခန္ဓာကိုယ်အတွင်းမှ ပေါက်ကွဲထွက်လာပြီး သူ၏ ပုံရိပ်မှာ မျက်စိတစ်မှိတ်အတွင်းမှာပင် မီတာရာချီ အကွာအဝေးသို့ ရောက်ရှိသွားသည်။ တယ်လီပို့လိုက်သည့်အလား သူသည် ရပ်နေသည့်နေရာမှ ရုတ်တရက် ပျောက်ကွယ်သွားပြီး ရဲ့ညီအစ်ကို သုံးဖော်ထဲမှ အကြီးဆုံးဖြစ်သူ ရဲ့ဖန်၏ ရှေ့တည့်တည့်တွင် ရုတ်တရက် ပေါ်လာတော့သည်။
သူ့ကို အပေါ်စီးမှ ငုံ့ကြည့်နေသော ဂူချန်၏ ချောမောလှသည့် မျက်နှာတွင် သွေးအေးပြီး ယုတ်မာသော အပြုံးတစ်ခု ရှိနေကာ ခရမ်းရောင်မျက်ဝန်းနှစ်ထပ် မှ ဝိညာဉ်ကို တုန်လှုပ်စေမည့် ထိတ်လန့်ဖွယ် အလင်းတန်းများ ထွက်ပေါ်နေသည်။
"ဂလု... ဂလု..."
ရဲ့ဖန်သည် တံတွေး မျိုချလိုက်ပြီး မိစ္ဆာတစ်ကောင်ကို ကြည့်နေရသည့်အလား မျက်လုံးများ ပြူးကျယ်နေ၏။ သူ၏ရှေ့ရှိ ပုံရိပ်ကို စိုက်ကြည့်နေမိပြီး သူ၏ ကြွက်သားများမှာလည်း တောင့်တင်းသွားပုံရသည်။ တစ်ဖက်လူ၏ မျက်လုံးထဲမှ ထိတ်လန့်ဖွယ် အလင်းတန်းမှာ သူ၏ နှလုံးသား အနက်ရှိုင်းဆုံးနေရာအထိ ထိုးဖောက်ဝင်ရောက်သွားသဖြင့် သူ၏ လျှို့ဝှက်ချက်အားလုံးမှာ ပေါ်လွင်နေသကဲ့သို့ ခံစားနေရသည်။ သူ မည်သို့ပင် တုံ့ပြန်ပါစေ၊ ပြုပြင်၍မရနိုင်သော အားနည်းချက်တစ်ခု ပေါ်ထွက်လာပြီး တစ်ဖက်လူက သူ့ကို တစ်ခဏချင်း သတ်ပစ်တော့မည်ဟု ထင်မှတ်နေမိသည်။
"အစ်ကိုကြီး၊ မြန်မြန်ပြေး.."
ထိုစဉ်မှာပင် သူ၏ နားထဲ၌ ဟိန်းဟောက်သံတစ်ခု ထွက်ပေါ်လာပြီး ရဲ့ဖန်မှာ ချက်ချင်း သတိဝင်လာသည်။ သူ၏ ခန္ဓာကိုယ်ကို လှုပ်ရှားလိုက်ရုံရှိသေးသော်လည်း ကြီးမားသော အပူလှိုင်းမှာ သူ့ဆီသို့ တိုးဝင်လာပြီး ပတ်ဝန်းကျင် အပူချိန်မှာလည်း ရုတ်တရက် ဒီဂရီ ဒါဇင်ပေါင်းများစွာ မြင့်တက်လာသည်။ ကြီးမားသော လက်ဝါးကြီးတစ်ခုမှာ သူ၏ ဦးခေါင်းပေါ်တွင် ရုတ်တရက် ပေါ်လာပြီး သူ၏ နဖူးကို ဖမ်းဆုပ်ကာ... မြေပြင်ပေါ်သို့ ပြင်းထန်စွာ ရိုက်ချလိုက်တော့သည်။
ပြေးဝင်လာကြသော လူလေးဦးနှင့် အနားရှိ လူများအားလုံး၏ အမြင်တွင် လေထုမှာ ရုတ်တရက် တုန်ခါသွားသည်ကိုသာ မြင်လိုက်ရသည်။ လေထဲတွင် ဝဲပျံနေသော ရဲ့ဖန်မှာ အနက်ရောင် ပုံရိပ်တစ်ခု၏ ဖိနှိပ်ခြင်းကို ခံလိုက်ရကာ သာမန်မျက်စိနှင့် မမြင်နိုင်သော အရှိန်ဖြင့် မြေပြင်ပေါ်သို့ တစ်ခဏချင်း ရောက်သွားတော့သည်။
ဝုန်း...
ရဲ့ဖန်၏ ဦးခေါင်းအပါအဝင် တစ်ကိုယ်လုံးကို ဂူချန်က မြေပြင်ပေါ်သို့ ရိုက်ချလိုက်ခြင်း ဖြစ်သည်။
ဗုန်း...
အလွန်ပြင်းထန်လှပြီး ကြောက်မက်ဖွယ်ကောင်းသော အားတစ်ခု ပေါက်ကွဲထွက်လာသည်။ ရိုက်ခတ်လိုက်သည့် ဗဟိုချက်မှနေ၍ မီတာရာချီရှိသော မြေပြင်မှာ ပေါက်ကွဲသွားပြီး နိမ့်ဆင်းကာ အစိတ်စိတ်အမွှာမွှာ အက်ကွဲသွားသည်။ မမြင်နိုင်သော တုန်ခါမှုလှိုင်းမှာ အရပ်မျက်နှာ အနှံ့သို့ ပျံ့နှံ့သွားပြီး ဖုန်မှုန့်များနှင့် သဲကျောက်များမှာ လေထဲတွင် လွင့်စင်ကုန်သည်။
ကြာပန်းစိမ်းကျွန်း တစ်ခုလုံးမှာ ဤစွမ်းအားအောက်တွင် ပြင်းထန်စွာ တုန်ခါသွားသဖြင့် သစ်ပင်များပေါ်မှ ရပ်ကြည့်နေသော ဖြေဆိုသူများပင်လျှင် မြေပြင်ပေါ်သို့ လိမ့်ကျကုန်ကြသည်။ အားလုံးက ဤမြင်ကွင်းကို ထိတ်လန့်တုန်လှုပ်စွာ ကြည့်နေကြပြီး ၎င်းတို့၏ မျက်လုံးထဲတွင် အံ့ဩတုန်လှုပ်မှုများ ပြည့်နှက်နေ၏။
' ဒီလို စွမ်းအားမျိုး..'
' ဒါက မဟာမိတ်အဖွဲ့ရဲ့ ထိပ်တန်းပါရမီရှင်တွေရဲ့ တိုက်ပွဲလား။ သာမန် တိုက်ကွက် တစ်ချက်တည်းနဲ့တင် လောကကြီးကို ပြောင်းလဲစေနိုင်တာပဲ။ ငါတို့လို မြို့နယ်တွေ၊ ပြည်နယ်တွေမှာ ပါရမီရှင်လို့ သတ်မှတ်ခံထားရတဲ့သူတွေကတော့ ဒီတိုက်ပွဲရဲ့ ရိုက်ခတ်မှုလှိုင်းကိုတောင် တောင့်ခံနိုင်မှာ မဟုတ်ဘူး '
ရဲ့ချန်နှင့် ရဲ့ထျန်းတို့ နှစ်ဦးသာလျှင် ကြီးမားသော ကျင်းကြီးဆီသို့ ပြေးဝင်သွားကြပြီး နာကျင်သောအသံဖြင့် အော်ဟစ်လိုက်ကြသည် ။
"အစ်ကိုကြီး.."
သူတို့ နှစ်ဦးမှာ ကြောက်မက်ဖွယ်ကောင်းသော ဓားအရှိန်အဝါများ ဝန်းရံထားသည့် တောက်ပသော ဓားရှည်များကို ကိုင်ဆောင်ထားကြသည်။ ဓားစွမ်းအင် တစ်ခုချင်းစီမှာ လေထုကို ဆုတ်ဖြဲနိုင်စွမ်း ရှိကြပြီး အရာအားလုံးကို ချေမှုန်းမည့် အရှိန်အဟုန်ဖြင့် ဂူချန်ထံသို့ ပြေးဝင်သွားကြသည်။ သူတို့၏ မျက်လုံးများမှာ နီရဲနေပြီး ဒေါသမှာ အထွတ်အထိပ်သို့ ရောက်ရှိနေလေပြီ ။ အတူတူ ကြီးပြင်းလာခဲ့ကြသော ညီအစ်ကိုအရင်းများ ဖြစ်ကြသဖြင့် သူတို့၏ သံယောဇဉ်မှာ အလွန်ပင် နက်ရှိုင်းလှသည်။ အကယ်၍ သူတို့၏ အစ်ကိုကြီးမှာ ပြင်းထန်စွာ ဒဏ်ရာရသွားခြင်း သို့မဟုတ် သေဆုံးသွားခြင်း ဖြစ်ခဲ့ပါက ဤလူယုတ်မာကို အပိုင်းပိုင်းအစစ ဖြစ်အောင် သူတို့ သေချာပေါက် တိုက်ခိုက်ကြပေလိမ့်မည်။
ဂူချန်က မော့ကြည့်လိုက်သော်လည်း သူ၏ အမူအရာမှာ ပြောင်းလဲခြင်း မရှိ။ သူ၏ လက်များမှာ နဂါးများအလား ထွက်ပေါ်လာပြီး တိုက်ခိုက်လာသူ နှစ်ဦးနှင့် ပြင်းထန်စွာ ထိပ်တိုက်တွေ့ဆုံလိုက်သည်။ သူ၏ လက်မောင်းပေါ်မှ သွေးကြောများမှာ ဖောင်းကြွနေပြီး ထူးဆန်းသော ပုံစံများမှာ စူးရှသော ဟိန်းဟောက်သံများကို သယ်ဆောင်လာသကဲ့သို့ ထင်ရသည်။ ထို့နောက် ပြေးဝင်လာသော ပြင်းထန်လှသည့် ဓားစွမ်းအင် နှစ်ခုကို မြားတိုများကို ဖမ်းဆုပ်လိုက်သကဲ့သို့ ဖမ်းယူလိုက်သည်။ ထိုဓားစွမ်းအင်များမှာ ပြင်းထန်ပြီး ခိုင်မာထည်ဝါလှသော်လည်း ထိုကြီးမားသော လက်ဝါးများကိုမူ တစ်လက်မမျှပင် တိုးမပေါက်နိုင်ချေ။
"မြောက်ပိုင်း အအေးဓာတ် ဝိညာဥ်.."
ထိုစဉ်မှာပင် ဂူချန်၏ နောက်ကွယ်မှနေ၍ ရေခဲပြင်ကဲ့သို့ အေးစက်စူးရှသော အသံတစ်ခု ထွက်ပေါ်လာသည်။ ထို့နောက် ပိုင်နင်ပင်းမှာ နတ်သမီးတစ်ပါး ဆင်းသက်လာသည့်အလား သူ၏ နောက်ကွယ်တွင် ရုတ်တရက် ပေါ်လာသည်။ သူမသည် အေးစက်သော အငွေ့အသက်များ ထွက်ပေါ်နေသည့် ရေခဲစူးတစ်ခုကို ကိုင်ဆောင်ထားပြီး ဂူချန်၏ ရင်ဘတ် ဘယ်ဘက်ခြမ်းဆီသို့ ပြင်းထန်စွာ ထိုးစိုက်လိုက်သည်။
တစ်ချိန်တည်းမှာပင် ကောင်းကင်ယံမှနေ၍ ပြင်းထန်သော ပေါက်ကွဲသံကြီး တစ်ခု ထွက်ပေါ်လာသည်။ လုံအောက်သည် မည်သို့ရောက်သွားသည်မသိဘဲ အမြင့်ပိုင်းသို့ ရောက်ရှိနေပြီး ထူးဆန်းသော ပုံစံဖြင့် ဆင်းသက်လာခြင်း ဖြစ်သည်။ သူ၏ ရှေ့တွင် ကြီးမားသော ဖြူဖွေးသည့် လက်ဝါးကြီးတစ်ခုမှာ ပေါ်ထွက်လာပြီး ကောင်းကင်တစ်ခုလုံးကို ဖုံးလွှမ်းသွားတော့သည်။ လုံအောက်က မျက်လုံးများ ပြူးကျယ်ကာ အံကြိတ်ရင်း အော်ဟစ်လိုက်သည် ။
"လူယုတ်မာ၊ သေပေတော့.."
အရပ်မျက်နှာ သုံးခုမှ တိုက်ခိုက်ခြင်းကို ခံလိုက်ရသဖြင့် အခြေအနေမှာ အလွန်ပင် စိုးရိမ်ရသော အနေအထားသို့ ရောက်ရှိသွားသည်။ ပတ်ဝန်းကျင်ရှိ ဖြေဆိုသူများမှာ ရင်တထိတ်ထိတ် ဖြစ်နေကြ၏။ သူတို့သည် မျက်လုံးများကို ပြူးကြည့်ကာ မျက်စိတစ်မှိတ်အတွင်း ဖြစ်ပျက်သွားမည့် အရာများကို မလွတ်တမ်း ကြည့်နိုင်ရန် သူတို့၏ မျက်လုံးစွမ်းအားများကို အစွမ်းကုန် အသုံးပြုနေကြသည်။
သို့သော်...
"ဟင်းဟင်း..."
အရပ်မျက်နှာ အနှံ့မှ ဝိုင်းရံတိုက်ခိုက်ခြင်း ခံနေရသော်လည်း ဂူချန်၏ မျက်နှာတွင် နောက်ပြောင်လိုသော အပြုံးတစ်ခု ရုတ်တရက် ပေါ်လာသည်။ သူ၏ နီရဲသော လက်မောင်းများမှာ ရုတ်တရက် ဖောင်းကားလာပြီး ကြွက်သားများနှင့် သွေးကြောများမှာ ပေါ်လွင်လာ၏။
ထို့နောက် ရဲ့ညီအစ်ကို နှစ်ဦး၏ ဓားစွမ်းအင်များကို အလွယ်တကူပင် ဆုတ်ဖြဲပစ်လိုက်ပြီး ရှေ့သို့ တိုးဝင်လိုက်သည်။ ဓားစွမ်းအင် အကာအကွယ်မှာ ပျက်စီးသွားပြီး သူတို့၏ ခန္ဓာကိုယ်များကို ထိမှန်သွားသဖြင့် ၎င်းတို့၏ ရင်ဘတ်တွင် အပေါက်ကြီးတစ်ခု ဖြစ်သွားကာ ဂူချန်က သူတို့၏ ရင်ဘတ်ကို အလွယ်တကူပင် ရိုက်ချလိုက်တော့သည်။ ပြင်းထန်သော အသံနှင့်အတူ ၎င်းတို့၏ ရင်ဘတ်မှာ တစ်ခဏချင်း ချိုင့်ဝင်သွားသည်။ သူတို့၏ ပတ်ဝန်းကျင်ရှိ ပြင်းထန်သော ဓားစွမ်းအင်များမှာ ပျောက်ကွယ်သွားပြီး သူတို့မှာ အမြောက်ဆန်များအလား နောက်သို့ လွင့်ထွက်သွားကြသည်။
ဂူချန်၏ ရင်ဘတ် ဘယ်ဘက်ခြမ်းကို နောက်ကွယ်မှ တိုက်ခိုက်လာသော ရေခဲစူးမှာမူ သူ၏ ခန္ဓာကိုယ်နှင့် မီတာဝက်ပင် မပြည့်သော နေရာတွင် ရွှေရောင်အလင်းတန်းတစ်ခု၏ တားဆီးခြင်းကို ခံလိုက်ရသည်။ သူ၏ ရွှေရောင်ခန္ဓာကိုယ်မှာ တောက်ပနေ၏။ သာမန်အားဖြင့် အရာအားလုံးကို အလွယ်တကူ ဖြတ်တောက်နိုင်သော မြောက်ပိုင်း အအေးဓာတ် ဝိညာဉ်မှာ ယခုအခါတွင်မူ ရွှေရောင်ခန္ဓာကိုယ်ထဲ၌ တစ်ဆို့နေတော့သည်။
'ဒါ ဘယ်လိုလုပ် ဖြစ်နိုင်မှာလဲ။ ဒါက ငါ့ရဲ့ S-အဆင့် ပါရမီကနေ ဖြစ်ပေါ်လာတဲ့ ရေခဲဝိညာဉ်ပဲ။ ဘယ်လိုလုပ်ပြီး အဆင့် ၄ သိုင်းသမား တစ်ယောက်ရဲ့ ရွှေခန္ဓာကိုတောင် ဖောက်ထွက်နိုင်စွမ်း မရှိရတာလဲ..'
ပိုင်နင်ပင်း၏ မျက်လုံးများမှာ ပြင်းထန်စွာ တုန်ခါနေသည်။ သူမသည် ရေခဲစူးကို လက်မှ မလွှတ်နိုင်ခင်မှာပင် လေပြင်းမုန်တိုင်းကဲ့သို့ ပြင်းထန်သော အားတစ်ခုက သူမ၏ မျက်နှာကို ရိုက်ခတ်လာသည်ကို ခံစားလိုက်ရသည်။
ဖြောင်း..
လေထုကို ခွဲထွက်လာသော အသံနှင့်အတူ ကြီးမားသော လက်ဝါးကြီးမှာ သူမ၏ လှပသော မျက်နှာကို ရိုက်ချလိုက်သည်။ သူမ၏ ဖြူစင်နုနယ်သော အရေပြားမှာ ချက်ချင်းပင် ပေါက်ပြဲသွားပြီး သွေးများ ထွက်လာကာ သူမသည် မီတာရာချီ လည်ထွက်သွားတော့သည်။ ဝုန်း ဆိုသည့် အသံနှင့်အတူ သူမသည် တောင်ကုန်းငယ်တစ်ခုပေါ်သို့ ပြင်းထန်စွာ ကျရောက်သွား၏။
ထိုအချိန်မှာပင် ကောင်းကင်ယံမှ ကြီးမားသော လက်ဝါးကြီးမှာ အပြည့်အဝ ပေါ်ထွက်လာသည်။ မီတာ တစ်ရာခန့် ကျယ်ဝန်းသောကြောင့် ဂူချန်၏ အမြင်အာရုံမှာ တစ်ခဏချင်း မှောင်အတိ ကျသွား၏။ အတိုင်းအဆမရှိသော ဖိအားများမှာ မုန်တိုင်းလှိုင်းများအလား တိုးဝင်လာပြီး မီတာ တစ်ရာအတွင်းရှိ လေထုကို ပြင်းထန်စွာ ဖိနှိပ်လိုက်သည်။ ဂူချန်၏ ခြေဖဝါးအောက်ရှိ ကျောက်တုံးများနှင့် မြေကြီးများမှာ ထပ်မံ ပျက်စီးသွားပြီး မှုန်ညှပ်သော အမှုန့်များအဖြစ် ပြောင်းလဲကာ မိုးပေါက်များအလား အရပ်မျက်နှာ အနှံ့သို့ လွင့်စင်ကုန်သည်။
ကြီးမားသော လက်ဝါးကြီး၏ ဖိနှိပ်ခြင်းကို ခံနေရသော်လည်း သူသည် တည်ငြိမ်စွာ မတ်တပ်ရပ်နေပြီး လက်တစ်ဖက်ကိုသာ အပေါ်သို့ မြှောက်လိုက်သည်။
ဗုန်း..
အရာအားလုံးကို ချေမှုန်းနိုင်စွမ်းရှိပုံရသော လက်ဝါးကြီးမှာ စက္ကူတစ်ချပ်အလား ဖြစ်သွားပြီး ဂူချန်က ၎င်းကို အပေါက်ဖောက်လိုက်သည်။ သူ၏ နီရဲသော လက်မှာ မည်သည့် ထိခိုက်မှုမျှ မရှိဘဲ လုံအောက်၏ လည်ပင်းကို ဖမ်းဆုပ်လိုက်သည်။ ထို့နောက် သူ့ကို အောက်သို့ ဆွဲချလိုက်ကာ သူ၏ မျက်နှာရှေ့တွင် ထားလိုက်ပြီး သူ၏ ထူးဆန်းသော ခရမ်းရောင် မျက်လုံးများဖြင့် လုံအောက်ကို စိုက်ကြည့်လိုက်သည်။
လုံအောက်သည် အသက်ရှူရန်ပင် ခက်ခဲလာ၏။ သူ၏ ခန္ဓာကိုယ်မှ ဖြူဖွေးသော မြူများ ဆက်တိုက် ထွက်ပေါ်နေသော်လည်း ထိုကြီးမားသော လက်ဝါးများ၏ ဖမ်းဆုပ်မှုမှ မရုန်းထွက်နိုင်ချေ။ သူ၏ လည်ပင်းမှာ ပြင်းထန်သော ဖိအားကြောင့် ပုံပျက်နေသဖြင့် အသံပင် မထွက်နိုင်တော့ချေ။
သူသည် သူ၏ ကံကြမ္မာကို ဖမ်းဆုပ်ထားသည့် အနက်ရောင်ဝတ်စုံဝတ် လူငယ်ကိုသာ စိုက်ကြည့်နေနိုင်တော့သည်။ ထိုလူငယ်၏ မျက်နှာတွင် လှောင်ပြုံးတစ်ခု ရှိနေပြီး ..
"ဒါက မင်းရဲ့ အစွမ်းကုန်ပဲလား.."
" ရယ်စရာကောင်းလိုက်တာ.."
လုံအောက်၏ ရင်ထဲတွင် တင်းကျပ်သွားပြီး သွေးစွန်းနေသော သူ၏ မျက်နှာမှာ နာကျင်ခံစားရမှုများဖြင့် ပြည့်နှက်နေသည်။ ဤအချိန်တွင် သူ၏ နဂါးချိုမှာ တစ်ဝက်ခန့် ကျိုးသွားခဲ့ပြီ ဖြစ်သည်။ သူ၏ ခန္ဓာကိုယ်မှာ ပြင်းထန်စွာ ရုန်းကန်နေသော်လည်း သူ၏ ခွန်အားနှင့် သတိများမှာ တဖြည်းဖြည်း ပျောက်ကွယ်နေသည်ကိုသာ သူ ခံစားနေရသည်။
လုံအောက်၏ ရုန်းကန်မှုများ အားနည်းသွားသည်နှင့်အမျှ ယခင်က ဆူညံနေသော ကြာပန်းစိမ်းကျွန်းမှာ ကျောက်ချရပ်နားထားသကဲ့သို့ တိတ်ဆိတ်သွားတော့သည်။ ဘေးမှ စောင့်ကြည့်နေသော ဖြေဆိုသူများပင်လျှင် သူတို့၏ အသက်ရှူသံကို တမင်တကာ နှေးကွေးစေခဲ့ကြသည်။ သူတို့၏ မျက်လုံးများထဲတွင် အံ့ဩတုန်လှုပ်မှုများ ပြည့်နှက်နေပြီး တိုက်ပွဲ၏ အလယ်ဗဟိုတွင် နတ်ဘုရားတစ်ပါး သို့မဟုတ် မိစ္ဆာတစ်ကောင်အလား ရပ်နေသော ပုံရိပ်ကိုသာ စိုက်ကြည့်နေကြတော့သည်။
တစ်ဦးတည်းနှင့် လူအများကို ဖိနှိပ်ခြင်း။