သောက်ကျိုးနည်းစနစ်: နတ်ဆိုးဓားအင်မော်တယ်ကတောင် ငါ့ကိုဆရာကြီးခေါ်ရမယ်

သိုင်းပညာရပ်များ ထွန်းကားနေသည့် အဆင့်မြင့်သိုင်းကမ္ဘာကြီးတစ်ခုတွင် ဂူချန်သည် အင်အားကြီးသိုင်းမိသားစုတစ်ခု၏ တစ်ဦးတည်းသောသားအဖြစ် ကူးပြောင်းလာခဲ့ပြီး ကောင်းမှုကုသိုလ်ပြုခြင်းစနစ် တစ်ခုကို ရရှိခဲ့သည်။ စနစ်က သတ်မှတ်ပေးသည့် ကောင်းမှုကုသိုလ်များကို လုပ်ဆောင်ရုံဖြင့် သူ၏အဆင့်ကို မြှင့်တင်နိုင်မည်လော။ ​ သို့ရာတွင် စနစ်၏ ကောင်းမှုကုသိုလ်အပေါ် အဓိပ္ပာယ်ဖွင့်ဆိုချက်များမှာ မည်သည့်အတွက်ကြောင့် ဤမျှအထိ ထူးဆန်းနေရပါသနည်း။ ​သူ အတန်းဖော်တစ်ဦးအား အနိုင်ကျင့်သောအခါ - [ စနစ်: အိမ်ရှင်သည် ဖိနပ်ကို အသုံးပြု၍ အတန်းဖော်၏မျက်နှာကို နှိပ်နယ်ပေးကာ မျက်နှာကြွက်သားများ တောင့်တင်းမှုကို ပြေလျော့စေရန် အောင်မြင်စွာ ကူညီပေးခဲ့သည်။ စေတနာတန်ဖိုး +၅၀၀ ] ​သူက သူတစ်ပါး၏ ရတနာကို ခိုးယူလိုက်သောအခါ - [ စနစ်: အိမ်ရှင်သည် သူတစ်ပါး၏ပိုင်ဆိုင်မှုကို အခမဲ့ စောင့်ရှောက်ပေးခြင်းဖြင့် တစ်ဖက်သားကို ကူညီခဲ့သည်။ စေတနာတန်ဖိုး +၁၀၀၀ ] ​သူ့ ပြိုင်ဘက်၏ သူငယ်ချင်းကို အသုံးပြု၍ ခြိမ်းခြောက်လိုက်သောအခါ - [ စနစ်: အိမ်ရှင်သည် စစ်မှန်သောခင်မင်မှုကို အခမဲ့ စမ်းသပ်စစ်ဆေးပေးခြင်းဖြင့် တစ်ဖက်သားကို ကူညီခဲ့သည်။ စေတနာတန်ဖိုး +၂၀၀၀ ] ​သူ မိသားစုတစ်ခုလုံးကို သတ်ဖြတ်လိုက်သောအခါ - [ စနစ်: အိမ်ရှင်သည် စိတ်နှလုံးနူးညံ့စွာဖြင့် မိသားစုဝင်အားလုံးကို ပြန်လည်ဆုံစည်းနိုင်စေရန် မနားမနေ ကူညီပေးခဲ့သည်။ စေတနာတန်ဖိုး +၅၀၀၀ ] ​ ထိုအခါတွင် ဂူချန်သည် သူ၏ပင်ကိုယ်သဘာဝအတိုင်း ပြတ်သားစွာ ပြုမူရန် ဆုံးဖြတ်လိုက်ပြီး ကုသိုလ်တော်လမ်းစဉ်သို့ ခြေစုံပစ်ဝင်ခဲ့တော့သည်။ ​ သိုင်းလောကအတွင်း သူသည် ကောင်းမှုကုသိုလ်များကို မနားတမ်း ရှာဖွေတော့သည်။ အခြားသူများ ရက်ပေါင်းများစွာ အာရုံစိုက်ကျင့်ကြံရသည့် အသက်ရှူကျင့်စဉ်ကို သူ တစ်ချက်ကြည့်ရုံဖြင့် တတ်မြောက်ခဲ့၏။ အခြားသူများ တစ်နှစ်ပတ်လုံး ခက်ခဲစွာ လေ့ကျင့်ရသည့် သံမဏိလက်မောင်းသိုင်းကို သူ အသက်တစ်ရှိုက်အတွင်း တက်မြောက်သွားသည်။ ပါရမီရှင်များစွာကို အခက်တွေ့စေသည့် အဆင့်မြင့်သိုင်းပညာရပ်များနှင့် နယ်ပယ်အတားအဆီးများအားလုံးကို သူ အလွယ်တကူ ဖြတ်ကျော်နိုင်ခဲ့၏။ ​ အခြားဇာတ်လိုက်များ၏ လမ်းစဥ်မှာ အသက်ဘေးနှင့် ရင်ဆိုင်ရချိန်တွင် ချစ်ခြင်းမေတ္တာ၊ သံယောဇဉ်များဖြင့် အစွမ်းကုန် ရုန်းကန်ရသော်လည်း၊ ဂူချန်၏ လမ်းစဥ်မှာမူ - " လာလာ..တစ်ချက်တည်းရိုက်မယ် .."