အခန်း (၂၁၃-၂၁၄)

အခန်း (၂၁၃) - အဆင့်ငါးဆင့် ဆက်တိုက်တက်လှမ်းခြင်း (၁)

ဝံပုလွေအုပ်စုကြီး၏ အမဲလိုက်ပွဲက ဆက်လက်ဖြစ်ပေါ်နေသည်။ ထျန်းပင်းသည် လုပ်ကြံသတ်ဖြတ်သူများကို ဦးဆောင်ကာ ရွှေရောင်ရေလှိုင်းကြီးတစ်ခုပမာ ခေါင်းမာမာဖြင့် ခုခံနေကြသေးသော မိစ္ဆာသားရဲအစုအဝေး အကြွင်းအကျန်များကို ဖြိုခွဲပစ်နေသည်။

သူ၏ ထက်ရှသော လက်သည်းများ ဝှေ့ယမ်းလိုက်တိုင်း ပြတ်တောက်သွားသော ခြေလက်အင်္ဂါများ လွင့်စင်လာသည်။

ရန့်မြဲ့ကမူ နောက်တန်းခံတပ်ကို ခိုင်မာစွာ ထိန်းချုပ်ထားပြီး မိစ္ဆာသားရဲများ ဖောက်ထွက်မပြေးနိုင်စေရန် အစွန်အဖျားများတွင် တင်းကြပ်သော ဝိုင်းရံပိတ်ဆို့မှုတစ်ခု ဖွဲ့စည်းရန် အစောင့်အရှောက်များကို အမိန့်ပေးထားသည်။

ထိုစဉ် ယင်းဖုန်းနှင့် သူ၏လက်အောက်ခံ အမဲလိုက်သမားများမှာ တိုက်ပွဲမြေပြင်အနှံ့ရှိ အရိပ်များထဲသို့ ပေါင်းစပ်ဝင်ရောက်သွားခဲ့သည်မှာ ကြာပြီဖြစ်ပြီး တိတ်ဆိတ်မြန်ဆန်သော ရိတ်သိမ်းမှုများကို လုပ်ဆောင်နေကြသည်။

မကြာခဏဆိုသလို မည်းနက်သော တစ္ဆေအရိပ်တစ်ခု လျှပ်တစ်ပြက် ဖြတ်ပြေးသွားပြီးနောက် ထွက်ပြေးနေသော မိစ္ဆာသားရဲမှာ လည်ချောင်းမှ သွေးများပန်းထွက်ကာ လဲကျသွားရသည်။

လိုက်လံသတ်ဖြတ်မှုလုပ်ငန်းစဉ် အထွတ်အထိပ်သို့ ရောက်ရှိချိန်တွင် အနောက်မြောက်ဘက်ရှိ သစ်တောအုပ်ထဲသို့ တိုးဝင်ပုန်းအောင်းရန် ကြိုးစားနေသော ဧရာမ‌ ကျောက်အကြေးခွံ ခွေးအကောင်ကြီးတစ်ကောင်ကို ထျန်းပင်း အာရုံစိုက်လိုက်သည်။

ခုန်အုပ်ပြီး ဆွဲဖြဲပစ်ရန် ပြင်လိုက်စဉ်မှာပင် အလွန်တည်ငြိမ်ပြီး လုံးဝလွန်ဆန်၍မရသော လင်းထျန်းလုံ၏ အသိစိတ်ဆန္ဒက မမြင်ရသော ဇက်ကြိုးတစ်ခုပမာ နှင်းဝံပုလွေအားလုံး၏ ခြေလှမ်းများကို ချက်ချင်း ရပ်တန့်သွားစေသည်။

“ရပ်လိုက်တော့”

ထျန်းပင်းသည် အရှိန်ကို ရုတ်တရက် ထိန်းချုပ်လိုက်ရာ သွေးများပေကျံနေသော သူ၏လက်သည်းကြောင့် အေးခဲနေသော မြေပြင်ပေါ်တွင် နက်ရှိုင်းသော ခြစ်ရာကြီးများ ထင်ကျန်သွားလေသည်။

သူ၏ လည်ချောင်းထဲမှ မကျေမနပ် ညည်းတွားသံတစ်ခု ထွက်ပေါ်လာပြီး ဝံပုလွေအသိုက်ဘက်သို့ သူ၏ခေါင်းကြီးကို လှည့်ကြည့်လိုက်ကာ သွေးနီရောင်မျက်လုံးများထဲတွင် နားမလည်နိုင်မှုများဖြင့် ပြည့်နှက်နေသည်။

“တော်သင့်ချိန်တန်ရင် တော်ရမယ်” လင်းထျန်းလုံ၏ အသိစိတ်က ထျန်းပင်း၏စိတ်ထဲသို့ တိုက်ရိုက် စီးဝင်သွားပြီး အေးစက်သော သတိပေးချက်တစ်ခု ပါဝင်နေသည်။

“အဲ့ကောင်‌တွေကြည့်ရတာ ဧရာမချော်ရည်ကြံ့ရဲ့ လက်အောက်ခံတွေမဟုတ်ဘူး၊ သူတို့ရဲ့ မျက်၀န်းတွေက ဧရာမချော်ရည်ကြံ့ရဲ့အမိန့်ကို လုံးလုံး နာခံနေတာမျိုးမရှိဘူး”

ကျောက်အကြေးခွံ ခွေးအ၏ ဟန်ဆောင်မှုများက လင်းထန်းလုံ၏ ငွေပြာဝံပုလွေဘုရင်မျက်၀န်းအောက်မှ မလွတ်မြောက်နိုင်ခဲ့ချေ။

“ဝိညာဉ်နက်တောင်ကြောရဲ့ အနက်ရှိုင်းဆုံးနေရာက တစ်စုံတစ်ရာက ဒီရှုံးနိမ့်သွားတဲ့စစ်သားတွေရဲ့ မျက်လုံးတွေကနေတစ်ဆင့် ငါတို့နေရာကို စောင့်ကြည့်နေတယ်၊ အချိန်မတိုင်ခင် အဲဒီအရာကို ငါတို့တံခါးဝရောက်အောင် ဆွဲခေါ်ချင်နေတာလား”

ထျန်းပင်း၏ ကြီးမားလှသော ခန္ဓာကိုယ်ကြီး တုန်ခါသွားပြီး ခေါင်းပေါ်ကို ရေတစ်ပုံး လောင်းချခံလိုက်ရသကဲ့သို့ ဆူပွက်နေသော တိုက်ပွဲဝင်လိုစိတ်များ ချက်ချင်း ငြိမ်ကျသွားတော့သည်။

ထို့‌နောက် ချက်ချင်းပင် ခေါင်းမော့ကာ တိုတောင်းပြတ်သားသော ဟိန်းဟောက်သံကို ဆက်တိုက် ထုတ်လွှတ်လိုက်သည်။ ၎င်းမှာ ဆုတ်ခွာရန် အမိန့်ပင်။

ဝံပုလွေအုပ်စုကြီးမှာ နားမလည်နိုင်ဖြစ်နေပြီး ငယ်ရွယ်သေးသော ဝံပုလွေစစ်သည် များစွာမှာ သတ်ဖြတ်ချင်စိတ်များ မပြေပျောက်သေးဘဲ ဆက်လိုက်ချင်နေကြသည်။

သို့သော်ငြား သူတို့၏ ဘုရင်ကြီးပေါ်ထားသော သစ္စာစောင့်သိမှု အကြွင်းမဲ့နာခံမှာတို့ကြောုင့် ကိုယ့်စိတ်ကို ပြန်ထိန်းချုပ်ကာ လှည့်ပြန်လာခဲ့ကြသည်။

ဝံပုလွေများအားလုံး သုံ့ပန်းများကို ခေါ်ဆောင်လာရင်း ဝံပုလွေအသိုက်ဆီသို့ ဒီရေကျသကဲ့သို့ ပြန်လည် ဆုတ်ခွာလာကြသည်။

“ရှောင်လန်...... ဝံပုလွေဖေဖေက လိုက်မသတ်ဖို့ အမိန့်ပေးလိုက်ပြီ”

“အင်း... ဆက်လိုက်နေမယ်ဆိုရင် ပြဿနာပိုကြီးမယ့် အရာတစ်ခုခုကို အချိန်မတိုင်ခင် ဆွဲခေါ်သလို ဖြစ်သွားနိုင်တယ်၊ ဒီလောက်က အနေတော်ပဲ... ငါတို့ရဲ့ အင်အားကိုလည်း ပြသနိုင်သလို လှုပ်ရှားဖို့ နေရာလွတ်လည်း ချန်ထားနိုင်တယ်၊ ဦးလေးထျန်းပင်းတော့ တော်တော်လေး အောင့်အည်းနေရတော့မှာပဲ”

လင်းထျန်းလုံသည် ယင်းဖုန်းအား ဆက်သွယ်ကာ ကျောက်အကြေးခွံ ခွေးအများကို လွှတ်ပေးရန်နှင့် ဘယ်ပြေးလဲသိရစေရန် လျှို့၀ှက်၊ ကင်းထောက်ခိုင်းလိုက်လေသည်။

လင်းထျန်းလုံသည် ထင်ရှားလွန်းလှသည့် ဧရာမချော်ရည်ကြံ့ကြီး၏ အလောင်းဆီသို့ လျှောက်သွားလိုက်ချိန်တွင်……

ဝံပုလွေအသိုက်တစ်ခုလုံးရှိ ဒဏ်ရာများကို လျက်နေသော စစ်သည်များဖြစ်စေ၊

အလုပ်များနေသော ဝံပုလွေအမများဖြစ်စေ၊ အားလုံး၏ အကြည့်များသည် သူ၏ခံ့ညားထည်ဝါလှသော ငွေဖြူရောင်ခန္ဓာကိုယ်ကြီးထံသို့ အလိုအလျောက် စူးစိုက်ကျရောက်သွားကြသည်။

ကြံ့ကြီး၏ ကြမ်းတမ်းလွန်းသော ဦးခေါင်းရှေ့တွင် သူ ရပ်လိုက်သည်။ ငွေပြာဘုရင်မျက်ဝန်းမှ အလင်းရောင်ဖျော့ဖျော့ တောက်ပလာပြီး စွမ်းအင်များ စုစည်းနေသည့်နေရာကို တိကျစွာ ရှာဖွေလိုက်လေ၏။

ညာဘက်ရှေ့လက်ဖဝါးကို မြှောက်လိုက်ရာ လက်သည်းထိပ်တွင် အပြာရောင်ရေခဲအလင်းတန်းလေးတစ်ခု စုစည်းလာသည်။

၎င်းမှာ ကျွမ်းကျင်မှုစွမ်းရည် မဟုတ်ဘဲ အလွန်သိပ်သည်း စုစည်းထားသော ရေခဲသဘာဝနိယာမများသာ ဖြစ်သည်။

ညင်သာစွာ ဝှေ့ယမ်းလိုက်ရုံဖြင့် သံမဏိထက်ပင် မာကျောကာ ထျန်းပင်း၏ ပြင်းထန်သော တိုက်ခိုက်မှုများကို အကြိမ်ကြိမ် ခံနိုင်ရည်ရှိခဲ့သည့် ထိုဦးခေါင်းခွံကြီးသည် ပူလောင်နေသော ဓားတစ်ချောင်းဖြင့် ထောပတ်ကို ဖြတ်တောက်လိုက်သကဲ့သို့ အသံတိတ် လှီးဖြတ်ခံလိုက်ရလေ၏။

ဖြတ်ပိုင်းခံလိုက်ရသည့် မျက်နှာပြင်မှာ မှန်တစ်ချပ်အလား ချောမွေ့နေသည်။

လက်သီးဆုပ်အရွယ်အစားရှိသော သလင်းကျောက်အမြုတေတစ်ခု လေထုထဲတွင် ထွက်ပေါ်လာသည်။ ချော်ရည်များကဲ့သို့ အမြုတေ တစ်ခုလုံး နီရဲနေပြီး အတွင်းတွင် ပျစ်ချွဲချွဲ ရွှေရောင်ချော်ရည်များ ဖြည်းညင်းစွာ စီးဆင်းနေသကဲ့သို့ ရှိသည်။

မျက်နှာပြင်ပေါ်တွင်မူ နက်ရှိုင်းသော ရွှေရောင်ရင့်ရင့် ပုံစံများ သဘာဝအတိုင်း ‌တည်ရှိနေသည်။

အမြုတေ ပေါ်လာသည်နှင့် တစ်ပြိုင်နက် ပတ်ဝန်းကျင်အပူချိန်မှာ ရုတ်တရက် ထိုးတက်သွားပြီး လေထုထဲရှိ အစိုဓာတ်များက ချက်ချင်း ခန်းခြောက်သွားသည်။

သန့်စင်ပြီး ကြီးမြတ်လှသော ဘုရင်အဆင့် စွမ်းအင်လှိုင်းများက မမြင်ရသော ရေလှိုင်းများကဲ့သို့ ပြန့်နှံ့သွားရာ အနီးအနားတွင် လုပ်ဖော်ကိုင်ဖက်များ၏ အလောင်းများကို သယ်ပိုးနေကြသော နှင်းဝံပုလွေများပင် အလိုအလျောက် နှာမှုတ်ကာ ရိုသေကြောက်ရွံ့စွာဖြင့် ခြေလှမ်းအနည်းငယ် နောက်ဆုတ်သွားကြသည်။

[စနစ်အသိပေးချက်]။ ။ဧရာမချော်ရည်ကြံ့၏ သလင်းကျောက်အမြုတေ (ဘုရင်အဆင့်) ကို ရရှိပါသည်။

[စနစ်အသိပေးချက်]။ ။သလင်းကျောက်အမြုတေအတွင်း ပါဝင်သော ပင်ကိုစွမ်းရည်ကို ရှာဖွေတွေ့ရှိပါသည် - ရူးသွပ်တိုက်ပွဲဝိညာဉ် (ရွှေရောင် - ဘုရင်အဆင့်)

[စနစ်အသိပေးချက်]။ ။သလင်းကျောက်အမြုတေအတွင်း ပါဝင်သော စွမ်းရည်များကို ရှာဖွေတွေ့ရှိပါသည် -

[မြေကြောဖြတ်သန်းခြင်း (ရွှေရောင် အဆင့်မြင့်)]၊

[မီးစွမ်းအင်ပေါက်ကွဲမှု (ခရမ်းရောင် အဆင့်မြင့်)]၊

[ချော်ရည်အခွံမာ (ခရမ်းရောင် အဆင့်မြင့်)]

လင်းထျန်းလုံသည် စိတ်ထိန်းချုပ်ခြင်းစွမ်းရည်ကို ဂရုတစိုက်အသုံးပြုကာ သလင်းကျောက်အမြုတေကို ထုတ်ယူလိုက်သည်။

အထိအတွေ့က နွေးထွေးစိုစွတ်နေသော်လည်း အတွင်း၌ တောင်ကုန်းတစ်ခုကို ပြားချပ်သွားစေနိုင်လောက်အောင် ပြင်းထန်သော စွမ်းအားများ ကိန်းအောင်းနေသည်ကို ရှင်းလင်းစွာ ခံစားသိရှိနိုင်သည်။

ထို့နောက် တန်ဖိုးကြီးမားသော စစ်ပွဲအနိုင်ပစ္စည်းကို ယူဆောင်ကာ နဂါးတစ်ကောင် ရစ်ခွေနေသကဲ့သို့ဖြစ်နေသော တိုတမ်မိခင်သစ်ပင်၏ အမြစ်များဆီသို့ ခုန်လွှားပြန်လာခဲ့သည်။

ဤနေရာတွင် အသက်စွမ်းအင် အသိပ်သည်းဆုံးဖြစ်ပြီး အမြုတေကို စုပ်ယူရာတွင် သူ့အတွက် အမြင့်ဆုံး အကျိုးသက်ရောက်မှု ပေးနိုင်သည်။

မြစိမ်းရောင် အသက်စွမ်းအင်အလင်းတန်းများ ညင်သာစွာ ဖြာကျလာပြီး သူ့ကို လွှမ်းခြုံထားသည်။ သူက လှဲလျောင်းလိုက်ပြီး ရှေ့လက်ဖဝါးနှစ်ခုကြားတွင် သလင်းကျောက်အမြုတေကို ထားရှိကာ သူ၏အသိစိတ်ကို ခန္ဓာကိုယ်တွင်းသို့ နစ်မြုပ်လိုက်ပြီး စတင်စုပ်ယူတော့သည်။

ဝုန်း….။

တစ်ခဏချင်းအတွင်း သူ၏ ကိုယ်ထဲတွင် သက်ဝင်လှုပ်ရှားနေသော မီးတောင်တစ်ခု ပြင်းထန်စွာ ပေါက်ကွဲသွားသကဲ့သို့ပင်။

ဧရာမချော်ရည်ကြံ့ကြီး၏ ကျန်ရစ်နေသော ရိုင်းစိုင်းသည့် စိတ်ဆန္ဒများနှင့် ရောနှောနေသော ကြီးမြတ်၍ အလွန်သန့်စင်သည့် ဘုရင်အဆင့် စွမ်းအင်များသည် ဆည်ကျိုးပေါက်လာသော ချော်ရည်လှိုင်းများသဖွယ် သူ၏သွေးကြောများထဲသို့ အဟုန်ပြင်းစွာ ဝင်ရောက်လာသည်။

ဤစွမ်းအားသည် ယခင်က သူစုပ်ယူဖူးသမျှ သလင်းကျောက်အမြုတေများထက် များစွာ ပိုမိုပြင်းထန်ပြီး ပူလောင်လှသည်။

၎င်း ဖြတ်သန်းသွားရာ နေရာတိုင်းတွင် သူ၏ ကြံ့ခိုင်သော သွေးကြောများပင် ဆုတ်ဖြဲခံရခြင်းနှင့် လောင်ကျွမ်းခံရခြင်းတို့ကြောင့် ပြင်းထန်သော နာကျင်မှုများကို ခံစားနေရာပါ ခံနိုင်ရည်မရှိတော့သဖြင့် ညည်းတွားသံများပင် ခပ်သဲ့သဲ့ထွက်ပေါ်လာသည်။

“ပြင်းထန်လိုက်တာ” လင်းထျန်းလုံ၏ ရင်ထဲတွင် တင်းကျပ်သွားပြီး အနည်းငယ်မျှပင် ပေါ့ဆရဲခြင်း မရှိတော့ပေ။

မိုးပြာနက်နဲရေခဲ ဝံပုလွေသွေးမျိုးဆက်သည် မကြုံစဖူးသော အမြန်နှုန်းဖြင့် အစွမ်းကုန် လည်ပတ်နေသည်။

သွေးမျိုးဆက်၏ အနက်ရှိုင်းဆုံးနေရာမှ အလွန်အေးစက်သော ရေခဲပြာရောင် စွမ်းအင်များ ထွက်ပေါ်လာပြီး ရေခဲသံကြိုးများစွာအဖြစ် ပြောင်းလဲကာ နီရဲပြင်းထန်သော စွမ်းအင်လှိုင်းများကို ရစ်ပတ်၊ ဖုံးလွှမ်း၊ စိမ့်ဝင်စေလျက် ချိုးနှိမ်သန့်စင်ရန် ကြိုးစားနေသည်။

တစ်ချိန်တည်းမှာပင် ထာဝရတိုက်ပွဲဝိညာဉ်၏ စိတ်ဆန္ဒသည် ထာဝရ အရည်မပျော်နိုင်သော နှစ်တစ်သောင်းသက်တမ်းရှိ နက်နဲရေခဲတုံးကြီးတစ်ခုပမာ သူ၏ အသိစိတ်ပင်လယ်ကို ခိုင်မာစွာ ကာကွယ်ပေးထားပြီး စွမ်းအင်ထဲတွင် ပါဝင်နေသော ဧရာမချော်ရည်ကြံ့ကြီး၏ အောင်နိုင်လိုစိတ်နှင့် ဖျက်ဆီးလိုစိတ် အကြွင်းအကျန်တို့၏ ရိုက်ခတ်မှုများကို ခုခံနေသည်။

ရေခဲနှင့် မီး၊ လုံးဝဆန့်ကျင်ဘက်ဖြစ်သော စွမ်းအားနှစ်ခုသည် သူ၏ ခန္ဓာကိုယ်အတွင်းတွင် အပြင်းထန်ဆုံးသော အားပြိုင်မှုနှင့် ပေါင်းစပ်မှုတို့ကို ပြုလုပ်နေကြသည်။

ခန္ဓာကိုယ်၏ အပြင်ပန်းလက္ခဏာက အတွင်းပိုင်းအန္တရာယ်ကို တိုက်ရိုက် ထင်ဟပ်နေလေသည်။

တစ်ဝက်မှာ အေးစက်စက် အငွေ့အသက်များ ထုတ်လွှင့်နေကာ အပြာရောင်အလင်းဖျော့ဖျော့ ထွက်ပေါ်လာပြီး ထူထဲလွန်းသည့် ရေခဲချပ်ဝတ်တစ်ခု ဖြစ်ပေါ်လာသည်။

ကျန်တစ်ဝက်မှာမူ နီရဲရဲ အရေပြားများဖြင့် အဖြူရောင် အပူငွေ့များ ထွက်ပေါ်နေကာ ပတ်ဝန်းကျင်လေထုပင် မြင့်မားသော အပူချိန်ကြောင့် တွန့်လိမ်သွားသည်။

ပြင်းထန်သော စွမ်းအင်အတက်အကျများသည် လေးလံသော နှလုံးခုန်သံတစ်ခုကဲ့သို့ သူ၏ထံမှ တစ်လှိုင်းပြီးတစ်လှိုင်း ပြန့်ထွက်လာသည်။

၎င်းက မိခင်သစ်ပင်၏ သစ်ကိုင်းများကိုပင် လေမတိုက်ဘဲ ယိမ်းနွဲ့သွားစေပြီး သူ့ကို ကာကွယ်ပေးရန်အတွက် အသက်စွမ်းအင်များ ပိုမိုဖြာကျလာခဲ့သည်။

“အာဝူးးး”

ဤမကြုံစဖူး ပြင်းထန်လှသော စွမ်းအင်ရိုက်ခတ်မှုအောက်တွင် ပထမဆုံး အဆင့်အတားအဆီးတစ်ခုသည် ဟိန်းဟောက်သံနှင့်အတူ ပြိုကွဲသွားတော့သည်။

တဟုန်ထိုး တက်လာသော စွမ်းအင်များသည် ထွက်ပေါက်အသစ်တစ်ခုကို ရှာတွေ့သွားသကဲ့သို့ ပိုမိုပြင်းထန်စွာ စီးဆင်းလာတော့သည်။

အခန်း (၂၁၄) - အဆင့်ငါးဆင့် ဆက်တိုက်တက်လှမ်းခြင်း (၂)

အဆင့် ၃၃။

“အာဝူး...”

ဒုတိယမြောက် အတားအဆီးသည်လည်း ပိုမိုကြီးမားသော စွမ်းအင်လှိုင်း၏ လွှမ်းမိုးနိုင်သော အရှိန်အဟုန်အောက်တွင် ကြေမွသွားရသည်။

အဆင့် ၃၄။

“အာဝူး...”

စွမ်းအင်စီးဆင်းမှုအရှိန် ထပ်မံမြင့်တက်လာပြန်သည်။

သူ၏ ကြွက်သားများ၊ အရိုးများနှင့် သွေးကြောများ အသွင်ပြောင်းလဲခြင်းက ပိုမိုနက်ရှိုင်းလာပြီး စွန့်ထုတ်လိုက်သော အညစ်အကြေးများသည် သူ၏ခန္ဓာကိုယ်မျက်နှာပြင်မှ ထွက်ပေါ်လာသော အစွန်းရောက် အအေးဓာတ် သို့မဟုတ် ပြင်းထန်သော အပူဓာတ်တို့ကြောင့် ချက်ချင်း သန့်စင်သွားသည်။

အဆင့် ၃၅။

“အာဝူး...”

အသက်စွမ်းအင်များ စဉ်ဆက်မပြတ် ဆုတ်ဖြဲခံရခြင်းနှင့် ပြန်လည်ကုစားခြင်းများကြားတွင် သူ၏ သွေးကြောများသည် ပိုမိုကျယ်ဝန်းလာပြီး ခိုင်ထံ့လာကာ ပိုမိုကြီးမားသော စွမ်းအားများ ဝင်ရောက်ခြင်းကို လက်ခံနိုင်လာသည်။

အဆင့် ၃၆။

“အာဝူး...”

နောက်ဆုံးကျန်ရှိနေသော အသန့်စင်ဆုံးနှင့် အခြေခံအကျဆုံး စွမ်းအင်လှိုင်းကို မိုးပြာနက်နဲရေခဲ ဝံပုလွေသွေးမျိုးဆက်မှ လုံးဝ သန့်စင်ပြီး စုပ်ယူလိုက်သောအခါ ဆက်တိုက် ရိုက်ခတ်မှုများအောက်တွင် အခိုင်မာဆုံးသော နောက်ဆုံးအတားအဆီးကြီး ပေါက်ကွဲထွက်သွားတော့သည်။

အဆင့် ၃၇။

အဆင့်ငါးဆင့် ဆက်တိုက် တက်လှမ်းသွားခြင်းကြောင့် ဖြစ်ပေါ်လာသော အသွင်ပြောင်းလဲမှုသည် ကမ္ဘာမြေကိုပင် တုန်လှုပ်စေလောက်ပေသည်။

လင်းထျန်းလုံသည် မျက်လုံးများကို ရုတ်တရက် ဖွင့်လိုက်၏။ ရေခဲပြာရောင် မျက်၀န်းများ၏ အနက်ရှိုင်းဆုံးနေရာတွင် အဆုံးမဲ့ရေခဲနှင့် နှင်းမုန်တိုင်းများ ဖြစ်တည်လာပြီး ပြန်လည်ပျောက်ကွယ်သွားကာ တစ်ခါတစ်ရံတွင် ဟင်းလင်းပြင်ကို ဆုတ်ဖြဲနိုင်သော ငွေရောင်အလင်းတန်းများ လင်းလက်သွားသည်။

သူ၏ အရပ်မှာ သိသိသာသာ ရှည်လာကာ ပိုမိုခံ့ညားထည်ဝါလာပြီး သွယ်လျသော ကြွက်သားများက ပေါက်ကွဲထွက်နိုင်သော စွမ်းအားများဖြင့် ပြည့်နှက်နေသည်။

သူ၏ ငွေဖြူရောင်အမွေးအမျှင်များသည် တောက်ပသော အဖြူရောင်မျှသာ မဟုတ်တော့ဘဲ နှစ်တစ်ထောင်သက်တမ်းရှိ ရေခဲပုံဆောင်ခဲများနှင့် ဆေးရည်စိမ်ထားသကဲ့သို့ ပိုမိုနက်ရှိုင်းပြီး တောက်ပသော အရောင်အဆင်းများ လင်းလက်နေကာ အမွေးတစ်ချောင်းချင်းစီတွင် အစွန်းရောက် အအေးဓာတ်နိယာမများ ကိန်းအောင်းနေသကဲ့သို့ပင်။

ပေါ့ပေါ့ပါးပါး အသက်ရှူထုတ်လိုက်ရာ နှာခေါင်းမှ ထွက်လာသော အေးစက်သည့် လေများသည် ချွန်ထက်ပြတ်သားသော ရေခဲပုံဆောင်ခဲလေးများအဖြစ် စုစည်းသွားပြီး တဖျတ်ဖျတ် ကြွေကျလာသည်။

ပတ်ဝန်းကျင်အပူချိန်က ရုတ်တရက် ကျဆင်းသွားပြီး ယခင်ကထက် အဆပေါင်းများစွာ ပိုမိုကျယ်ဝန်းသော ဧရိယာတစ်ခုကို လွှမ်းခြုံထားသည့် အလွန်မာကျောသော ရေခဲလွှာတစ်ခု မြေပြင်ပေါ်တွင် လျင်မြန်စွာ ပြန့်နှံ့သွားသည်။

ယခင်ကထက် များစွာ ပိုမိုလေးလံ၊ ခံ့ညားပြီး ဝိညာဉ်ကိုပင် တုန်လှုပ်စေသော ဘုရင်အဆင့် အငွေ့အသက်သည် မြေကြီးပေါ်သို့ ပြဒါးရည်များ လောင်းချလိုက်သည့်အလား သဘာဝကျကျ စီးဆင်းလာကာ ဝံပုလွေအသိုက်တစ်ခုလုံးကို လွှမ်းခြုံသွားပြီး ပိုမိုဝေးကွာသော နေရာများသို့ပါ ဆက်လက်ပြန့်နှံ့သွားသည်။

ဒဏ်ရာများကို လျက်နေခြင်း၊ အလောင်းများကို သယ်ယူနေခြင်း၊ ကင်းလှည့်နေခြင်း၊ သို့မဟုတ် ဂူထဲရှိ ဝံပုလွေပေါက်လေးများကို စောင့်ရှောက်နေခြင်း။

စသည်ဖြင့် အလုပ်ရှုပ်နေကြသော နှင်းဝံပုလွေအားလုံးသည် ဤအခိုက်အတန့်တွင် သူတို့၏ ဝိညာဉ်များ တုန်ခါသွားသကဲ့သို့ ခံစားလိုက်ရပြီးသူတို့၏ အလုပ်များကို ရပ်တန့်လိုက်ကြသည်။

သူတို့သည် မိခင်သစ်ပင်ရှိရာသို့ တစ်ခဲနက် လှည့်ကြည့်လိုက်ကြပြီး ခေါင်းများကို နက်ရှိုင်းစွာ ငုံ့ကာ နာခံခြင်း၊ ရိုသေခြင်းနှင့် လှိုက်လှိုက်လှဲလှဲ ဝမ်းမြောက်ခြင်းတို့ ရောနှောနေသော ညည်းတွားသံများကို လည်ချောင်းထဲမှ ထုတ်လွှတ်လိုက်ကြသည်။

ဤသည်မှာ အလွန်တရာ အင်အားကြီးမားလာသော သူတို့၏ဘုရင်ကြီးအပေါ် အနက်ရှိုင်းဆုံးသော ရိုသေလေးစားမှုနှင့် ဂုဏ်ပြုမှုပင်ဖြစ်သည်။

“ဘုရင်ကြီးရဲ့ စွမ်းအင်အဆင့်က... ခုန်တက်သွားတာပဲ”

ရန့်မြဲ့သည် ခံစစ်အချက်အချာနေရာတစ်ခုတွင် ရပ်နေရင်း ဝိညာဉ်ကို အနည်းငယ် တုန်ခါသွားစေသော်လည်း သူ့အား လွန်စွာ စိတ်အေးချမ်းမှု ပေးစွမ်းနိုင်သော ဖိအားကို ခံစားနေရသည်။

သူ၏ အေးစက်စက် ဝံပုလွေမျက်ဝန်းများတွင် မည်သည့်မနာလိုမှုမှ မရှိဘဲ ခြွင်းချက်မရှိ သစ္စာစောင့်သိမှုနှင့် အသိအမှတ်ပြုမှုသာ ရှိလေသည်။

“ဟာ... ငါးဆင့်ဆက်တိုက်လား၊ ငါတို့ရဲ့ ဘုရင်ကြီး ဒီတစ်ခါ တစ်ကယ်ကို ပေါက်ကွဲထွက်လာတာပဲဟ”

ထျန်းပင်းသည် သူ့ကို အသက်ရှူကြပ်လုနီးပါး ဖြစ်စေသော ဖိအားကို ခံစားလိုက်ရသော်လည်း နေရခက်ခြင်းမရှိဘဲ စိတ်လှုပ်ရှားစွာ ဟိန်းဟောက်လိုက်သည်။

သူ၏ ခန္ဓာကိုယ်က ပိုမိုနွေးထွေးလာပြီး ဤလှုံ့ဆော်မှုအောက်တွင် ဒဏ်ရာများမှာလည်း လျင်မြန်စွာ ကျက်လာသကဲ့သို့ ခံစားနေရသည်။

ယင်းဖုန်း၏ ပုံရိပ်သည် အရိပ်တစ်ခုထဲမှ ဖြည်းညင်းစွာ ထွက်ပေါ်လာပြီး လင်းထျန်းလုံဘက်သို့လှည့်ကာ အနည်းငယ် ခေါင်းညိတ်ပြလိုက်သည်။

သူ၏ ငွေဖြူရောင် ဝံပုလွေမျက်ဝန်းများတွင် စိတ်သက်သာရာရသွားသော အရိပ်အယောင်လေးတစ်ခု မသိမသာ လင်းလက်သွားပြီးနောက် အရိပ်ထဲသို့ လုံးဝ ပြန်လည်ပေါင်းစပ်သွားကာ မပြီးဆုံးသေးသော သူ၏ စောင့်ကြည့်ရေးနှင့် ကင်းထောက်တာဝန်များကို ဆက်လက် ထမ်းဆောင်နေတော့သည်။

သစ်ပင်အိမ်လေးထဲတွင်…..

ရှောင်လန်နှင့် ရှောင်ယင်းတို့သည်လည်း ရုတ်တရက် ပိုမိုအားကောင်းပြီး စိတ်အေးချမ်းစေသော ဤအငွေ့အသက်များ၏ ဆွဲဆောင်မှုကို ခံလိုက်ရသည်။

“ဖေဖေ......” ရှောင်လန်က ပြတင်းပေါက်မှ ကျော်ကြည့်ရင်း သူမ၏ မျက်နှာလေးတွင် အံ့သြမှုများ ပြည့်နှက်နေသည်။

“ဖေဖေရဲ့ ပုံစံက... ပိုပြီး လင်းလက်လာတယ်၊ လမင်းကြီးတစ်စင်းလိုပဲ”

ရှောင်ယင်းက ပြင်းထန်စွာ ခေါင်းညိတ်လိုက်ပြီး လင်းထျန်းလုံ ကိုယ်တိုင် ပြုလုပ်ပေးထားသည့် ရေခဲဝံပုလွေအငွေ့အသက်များ ခပ်သဲ့သဲ့ပါဝင်နေသော ရင်ဘတ်ပေါ်ရှိ အရိုးလက်ဖွဲ့လေးကို သူမ၏လက်သေးသေးလေးများဖြင့် ခပ်ဖွဖွ ဆုပ်ကိုင်ထားသည်။

“အင်း... ပိုပြီး လုံခြုံသွားသလို ခံစားရတယ်၊ အပြင်က ဆိုးသွမ်းတဲ့ကောင်တွေ အခုဆိုရင် လာရဲတော့မှာမဟုတ်ဘူး”

“စွမ်းအင်အဆင့်က အရည်အသွေးပိုင်းဆိုင်းရာအရ ခုန်ပျံတက်သွားပြီ... အဆင့်ငါးဆင့် ဆက်တိုက် တက်သွားတာပဲ”

“ဘုရင်အဆင့် သလင်းကျောက်အမြုတေရဲ့ အကျိုးသက်ရောက်မှုက မျှော်မှန်းထားတာထက် အများကြီး သာလွန်နေပုံပဲ၊ ဝံပုလွေဖေဖေရဲ့ စွမ်းအားအပေါ် ထိန်းချုပ်နိုင်စွမ်းကလည်း ပိုပြီးသိမ်မွေ့လာတယ်”

“ဒီလောက်တောင် တိုးတက်လာတယ်ဆိုတော့... အနောက်မြောက်ဘက်က ခြိမ်းခြောက်မှုက ငါတို့ ထင်ထားတာထက် ပိုပြီး ပြဿနာပေးနိုင်ပုံရတယ်၊ ဝံပုလွေဖေဖေက ‌လာမယ့် တိုက်ပွဲအတွက် ပြင်ဆင်နေတာပဲ”

လင်းထျန်းလုံသည် ခန္ဓာကိုယ်မှ ထွက်ပေါ်နေသော အငွေ့အသက်များကို ဖြည်းညင်းစွာ ပြန်လည်ရုပ်သိမ်းလိုက်သည်။

ရေခဲများ ပျံ့နှံ့မှု ရပ်တန့်သွားပြီး အပူချိန်မှာလည်း တဖြည်းဖြည်း ပြန်လည်မြင့်တက်လာသည်။

သူ၏ အတွင်းပိုင်းတွင် နှစ်ဆနီးပါး တိုးတက်လာသော စွမ်းအားများနှင့်အတူ ရေခဲသဘာဝနိယာမများနှင့် ဟင်းလင်းပြင်စွမ်းအားများအပေါ် ပိုမိုသိမ်မွေ့တိကျသော ထိန်းချုပ်နိုင်စွမ်းများကို ဂရုတစိုက် ခံစားနေသည်။

စနစ်အသိပေးချက်က အချိန်ကိုက် ပေါ်လာသည်။

[စနစ်အသိပေးချက်]။ ။အဆင့် ၃၇ ပထမ ဘုရင် အလယ်အလတ် သို့ တက်လှမ်းသွားပါသည်။

[စနစ်အသိပေးချက်]။ ။စွမ်းရည်အားလုံး သိသိသာသာ တိုးတက်သွားပါသည်။

[စနစ်အသိပေးချက်]။ ။မိုးပြာနက်နဲရေခဲ ဝံပုလွေသွေးမျိုးဆက် ကျွမ်းကျင်မှု သိသိသာသာ တိုးတက်လာပါသည်။

လွှမ်းမိုးခြင်း ဝိသေသလက္ခဏာ၏ အကျိုးသက်ရောက်မှု - နှင်းဝံပုလွေမျိုးနွယ်စု စွမ်းရည်အားလုံး +၉၅ ရာခိုင်နှုန်း၊

ဘုရင်သွေးမျိုးဆက် ကိုယ်ပိုင်စွမ်းရည်အားလုံး +၄၈ ရာခိုင်နှုန်း၊

ရေခဲအမျိုးအစား ကျွမ်းကျင်မှု အကျိုးသက်ရောက်မှုများ +၃၅ ရာခိုင်နှုန်း။

[စနစ်အသိပေးချက်]။ ။ထာဝရတိုက်ပွဲဝိညာဉ်၏ စိတ်ခွန်အား များစွာ တိုးတက်လာပါသည်။

ရူးသွပ်ခြင်း ဝိသေသလက္ခဏာ၏ အကျိုးသက်ရောက်မှု - အသက်စွမ်းအင် ၅၀ ရာခိုင်နှုန်း အောက်ရောက်ပါက တိုက်ခိုက်မှုစွမ်းအား ၃၅ ရာခိုင်နှုန်း တိုးလာမည်။ ၂၀ ရာခိုင်နှုန်း အောက်ရောက်ပါက ၆၅ ရာခိုင်နှုန်း တိုးလာမည်။

[စနစ်အသိပေးချက်]။ ။အလယ်အလတ် စိတ်ထိန်းချုပ်ခြင်း စွမ်းရည်၏ ခွန်အား၊ တိကျမှုနှင့် ထိန်းချုပ်နိုင်သော အကွာအဝေး သိသိသာသာ တိုးတက်လာပါသည်။

[စနစ်အသိပေးချက်]။ ။အလယ်အလတ် စိတ်ချင်းဆက်သွယ်ခြင်း စွမ်းရည်၏ အကွာအဝေး၊ ရှင်းလင်းမှုနှင့် ပစ်မှတ်အရေအတွက် သိသိသာသာ တိုးတက်လာပါသည်။

သူက အရောင်အဆင်း လုံးဝပျောက်ကွယ်သွားကာ မီးခိုးဖြူရောင်ဖြစ်ပြီး ဆတ်ဆတ်ကြွေနေသော သလင်းကျောက်အမြုတေ၏ အကြွင်းအကျန်များကို စိတ်စွမ်းအင်ဖြင့် အမှုန့်ကြိတ်ပစ်လိုက်သည်။

သလင်းကျောက်အမြုတေ၏ စွမ်းအင်အနှစ်သာရ အများဆုံးအပိုင်းဖြစ်သော၊ ရွှေရောင်ရင့်ရင့် အလင်းတန်းများ တောက်ပနေသည့် ရူးသွပ်တိုက်ပွဲဝိညာဉ် ဝိသေသလက္ခဏာ၏ အရင်းအမြစ်ကိုမူ သူက ဂရုတစိုက် ခွဲခြားလိုက်ပြီး စနစ်၏ ဝိသေသလက္ခဏာ သိုလှောင်ရုံထဲတွင် သိမ်းဆည်းလိုက်သည်။

ဤသည်မှာ အနာဂတ်တွင် ရှေးဟောင်းကန္တာရတိုက်ပွဲခန္ဓာကို ပေါင်းစပ်ဖန်တီးရန်အတွက် အရေးကြီးသော ပစ္စည်းဖြစ်ပြီး ဆုံးရှုံးခံ၍မရပေ။

မြေကြောဖြတ်သန်းခြင်း၊ မီးစွမ်းအင်ပေါက်ကွဲမှုနှင့် ချော်ရည်အခွံမာဟူသော ကျွမ်းကျင်မှုစွမ်းရည် သုံးခုမှာမူ အစွမ်းထက်သော်လည်း ၎င်းတို့၏ သဘာဝများသည် သူ၏ အဓိကစွမ်းအင်နှင့် ဆန့်ကျင်ဘက်ဖြစ်နေကာ အတင်းအဓမ္မစုပ်ယူပါက အကျိုးထက် အပြစ်က ပိုများနိုင်ပေသည်။

အနာဂတ်တွင် အခြားအသုံးဝင်မည့်နေရာ ရှိကောင်းရှိနိုင်သေးဖြစ်သဖြင့် ၎င်းတို့ကို စနစ်နေရာလွတ်ထဲတွင် ယာယီသိမ်းဆည်းထားလိုက်သည်။

အသစ်ရရှိလာသော စွမ်းအားများနှင့် ရင်းနှီးကျွမ်းဝင်အောင် လုပ်ဆောင်ရင်း နောက်ထပ်အစီအစဉ်အတွက် စဉ်းစားနေစဉ် ဝံပုလွေအုပ်စု၏ နောက်ဘက်မှ ဖရိုဖရဲ ဆူညံသံတစ်ခုက အရွယ်ရောက်ပြီးသော နှင်းဝံပုလွေများထံမှ သတိပေးဟိန်းဟောက်သံအချို့နှင့် ရောယှက်ထွက်ပေါ်လာလေသည်။

စည်ကမ်းထိန်းသိမ်းရေး တာဝန်ယူထားသော အရွယ်ရောက်ပြီးသား နှင်းဝံပုလွေအချို့သည် အနီနှင့်အဖြူ ရောယှက်နေသော ပုံရိပ်တစ်ခုကို တားဆီးရန် ကြိုးစားနေကြသည်။

ထိုပုံရိပ်မှာ အလွန်သွက်လက်ပြီး သူ၏ သေးငယ်သော အရွယ်အစားကို အသုံးပြုကာ ဝံပုလွေများ၏ ခြေထောက်များကြားတွင် လျင်မြန်စွာ တိုးဝှေ့သွားလာနေသည်။

လပ်ဟာနေသည့်နေရာကို တွေ့လိုက်သည်နှင့် ရုတ်တရက် အရှိန်တင်လိုက်ပြီး လင်းထျန်းလုံ၏ ရှေ့တည့်တည့်သို့ ပြေးဝင်လာကာ ရှေ့လက်ဖဝါးများကို ဒုန်း ခနဲ ရိုက်ချလိုက်သည်။

ထို့‌နောက် ရွှံ့များနှင့် နှင်းများ ပေကျံနေသော မျက်နှာလေးကို မော့ကာ အသံသြသြနှင့် အရေးတကြီး ညည်းတွားသံများ ဆက်တိုက် ထုတ်လွှတ်လိုက်လေသည်။

ထိုကောင်လေးမှာ သွေးမိစ္ဆာပင်ဖြစ်သည်။

သူ့ရှေ့ရှိ မျိုးဗီဇပြောင်းလဲသွားသော ဝံပုလွေလေးမှာ မကြာမီအချိန်က မိခင်၏ စောင့်ရှောက်မှု လိုအပ်နေသေးပြီး ထောင့်တစ်နေရာတွင် တုန်ရီနေခဲ့သော အားနည်းသည့် ဝံပုလွေပေါက်လေးနှင့် လုံးဝ ကွာခြားသွားပြီဖြစ်သည်။

တိုတမ်မိခင်သစ်ပင်၏ ကြီးမားလှသော အသက်စွမ်းအင်များ၊ ဝိညာဉ်စုစည်းမှုအလင်းဝန်း၏ အဆငါးရာသော ဝိညာဉ်စွမ်းအင် သိပ်သည်းဆနှင့် ဝံပုလွေအသိုက်ရှိ လုံလောက်သော အစားအစာ ထောက်ပံ့မှုတို့အောက်တွင် ၎င်း၏ ကြီးထွားနှုန်းမှာ အံ့မခန်း မြန်ဆန်လွန်းလှသည်။

ယခုအခါ ၎င်း၏ ပခုံးအမြင့်မှာ တစ်မီတာနီးပါး ရှိနေပြီဖြစ်ပြီး အရွယ်ရောက်ကာစ နှင်းဝံပုလွေတစ်ကောင်၏ စံနှုန်းသို့ ရောက်ရှိနေပြီဖြစ်သည်။

၎င်း၏ ခြေလက်များမှာ ရှည်လျားသန်မာကာ ဖြူဖျော့ဖျော့ အမွေးများပေါ်တွင် သွေးများစွန်းထင်းနေသကဲ့သို့ အနီရင့်ရောင် ပုံစံလှိုင်းကြားများ ထင်ရှားပေါ်လွင်နေပြီး အထူးသဖြင့် စိတ်လှုပ်ရှားလာသည့်အခါ ထိုပုံစံလိုင်းများက မှေးမှိန်စွာ တောက်ပနေတတ်သည်။