အခန်း (၁၅၂၁-၁၅၂၂)

အခန်း (၁၅၂၁) - ဒါဆိုရင်တော့ မင်းကို ရိုက်ရမှာပဲ

ဖန့်ရှောင်ထျန်းသည် မျက်မှောင်အနည်းငယ် ကြုတ်လိုက်မိသည်။

ရောက်လာသူနှင့် တန့်လင်ခုန့်မှာ ဆွေမျိုးတော်စပ်သူများ ဖြစ်ကြောင်း သူရိပ်မိလိုက်သည်။

သို့သော် ထိုသူမှာ လူအများရှေ့တွင် တန့်လင်ခုန့်ကို ဤမျှအထိ ပြင်းပြင်းထန်ထန် ငေါက်ငမ်းနေခြင်းမှာ တစ်ဖက်လူ၏ မျက်နှာကို လုံးဝ ထောက်ထားညှာတာခြင်း မရှိသည်မှာ သိသာလှသည်။

ရောက်လာသူသည် တခြားသူများ၏ မျက်နှာထားကို ဂရုမစိုက်ဘဲ ရှန့်ဝူကို ကြည့်ကာ ပြုံးလျက် ဆိုသည်။

"ရှန့်ဝူမိန်းကလေး... ငါ့ညီက တန့်မျိုးနွယ်ရဲ့ ပါရမီရှင်တစ်ယောက်ပဲ၊ ကမ္ဘာကျော်ဓားချက် လို့တောင် အမည်တွင်တယ်။ တကယ်လို့ သူနဲ့သာ လက်တွဲဖော်အဖြစ် ပေါင်းဖက်မယ်ဆိုရင် ဒါဟာ နဂါးနဲ့ မြင်းပျံ ဆုံသလို ကျက်သရေ မင်္ဂလာအပေါင်းနဲ့ ပြည့်စုံသွားမှာပဲ။ မိန်းကလေးရဲ့ သဘောထားက ဘယ်လိုရှိပါသလဲ "

"အစ်ကိုကြီး... ရှန့်ဝူမိန်းကလေးမှာ စိတ်ထဲရှိတဲ့သူ ရှိပြီးသားပါ။ ဒီကိစ္စကို နောက်ထပ် မပြောပါနဲ့တော့"

တန့်လင်ခုန့်က ရုတ်တရက် ကြားဖြတ်ပြောလိုက်သည်။

"ပါးစပ်ပိတ်ထားစမ်း "

တန့်လင်ရှောင်း က အော်ဟစ်လိုက်ပြီး တန့်လင်ခုန့်ကို တင်းမာသော အကြည့်ဖြင့် စိုက်ကြည့်လိုက်သည်။

ထို့နောက် သူက ဖန့်မောင်နှမကို ကြည့်ကာ ခပ်အေးအေး ဆိုသည်။

"မင်းတို့ မောင်နှမအကြောင်း ငါကြားဖူးပါတယ်။ ပါရမီကတော့ မဆိုးပါဘူး၊ နှစ်ပေါင်း ၂၀၀ အတွင်းမှာ ပေါင်းစပ်ခြင်းအဆင့်ကို တက်လှမ်းနိုင်တာဟာ တာ့ရှန့်အင်ပါယာမှာ နောင်တစ်ချိန် အလားအလာကောင်းမယ့် ပါရမီမျိုးပဲ"

သူက စကားကို ခဏရပ်လိုက်ပြီး ပြောလိုက်သည်။

"ဒါပေမဲ့ မင်းတို့ရဲ့ နောက်ခံက သာမန်ပဲ၊ အိမ်မှာ မိဘလည်း မရှိကြဘူး။ ဒါဟာ မိဘမဲ့ အထီးကျန် ဖြစ်နေတာပဲ၊ ကျက်သရေ မရှိဘူး ။ရှန့်ဝူမိန်းကလေးသာ မင်းတို့အိမ်ကို ချွေးမအဖြစ် ရောက်သွားမယ်ဆိုရင် ဒါဟာ ရယ်စရာကြီး ဖြစ်မသွားဘူးလား "

ဘေးပတ်ဝန်းကျင်ရှိ လူများမှာ အနည်းငယ် အံ့အားသင့်သွားကြသော်လည်း၊ တန့်လင်ရှောင်း၏ အဆင့်အတန်းကို စဉ်းစားမိသောအခါ ဤသို့သော စကားမျိုး ပြောဆိုရန် သူ၌ အရည်အချင်း ရှိသည်ဟု ထင်မြင်မိကြသည်။

"မိဘမဲ့ အထီးကျန်မို့လို့ ကျက်သရေ မရှိဘူး ဟုတ်လား "

ဖန့်ရှောင်ထျန်း၏ မျက်လုံးများ မှေးစပြုလာပြီးနောက်၊ သူ၏ မျက်ဝန်းထဲမှ ဓားတစ်စင်းကဲ့သို့ ထက်ရှသော အလင်းတန်းများ ထွက်ပေါ်လာကာ တန့်လင်ရှောင်းကို စိုက်ကြည့်လိုက်သည်။

"မင်းက ဘာဖြစ်လို့ ငါ့မိသားစုကို စော်ကားရတာလဲ ငါ့အိမ်ရဲ့ အခြေအနေအမှန်ကိုလည်း မသိဘဲနဲ့ ဒီလို စကားမျိုး ပြောတာဟာ မင်းကိုယ်တိုင် ယဉ်ကျေးမှု မရှိတာ ကို ပြနေတာပဲ"

"ဟုတ်တယ် ယဉ်ကျေးမှု မရှိတာ "

ဖန့်ရှောင်ပန်းက ဒေါသတကြီး ပြောလိုက်သည်။

"ငါတို့မှာ မိဘအရှိဘူးလို့ ဘယ်သူပြောလဲ သူတို့က ကိစ္စရှိလို့ အပြင်သွားနေကြတာ ငါတို့မှာ အစ်ကိုကြီး တစ်ယောက်လည်း ရှိသေးတယ် တကယ်လို့ သူသာ နင် ငါတို့ဖန့်မိသားစုကို ဒီလို နှိမ့်ချစော်ကားတာ ကြားရင် နင့်ကို ကောင်းကောင်းထားမှာ မဟုတ်ဘူး "

ရှန့်ဝူမှာလည်း ယခုအခါ အတော်လေး ဒေါသထွက်နေမိသည်။

တန့်မျိုးနွယ်မှ တန့်လင်ရှောင်းသည် လူမိုက်ဆန်လွန်းပြီး ယနေ့ကဲ့သို့သော အခမ်းအနားမျိုးတွင် ရိုင်းရိုင်းစိုင်းစိုင်း ပြောဆိုနေသည်ဟု သူမ ခံစားလိုက်ရသည်။

"အစ်ကိုကြီး... စကားပြောရင် ဆင်ခြင်ပါ။ ဖန့်မိတ်ဆွေက အစ်ကို့ကို ဘာမှ ပြစ်မှားထားတာ မရှိဘူး"

တန့်လင်ခုန့်က လေးလေးပင်ပင် ဆိုလိုက်သည်။

တန့်လင်ရှောင်းသည် ဒေါသထွက်လွန်းသဖြင့် ရယ်ပင် ရယ်မိသွားသည်။

"မင်းက ငါ့ကို ပြန်ဆုံးမနေတာလား ငါက စကားပြောတာ ဆင်ခြင်မှု မရှိဘူး ဟုတ်လား မင်းလို အနိုင်ကျင့်ခံရလွယ်တဲ့ ပျော့ညံ့တဲ့ကောင်မျိုးသာ ဆိုရင်၊ နောင်တစ်ချိန် တန့်မျိုးနွယ်ရဲ့ အလံတော်ကို ဘယ်သူက လွှင့်ထူမှာလဲ။ ဘိုးဘေးတွေက မင်းကို အာဏာလွှဲပေးဖို့ တိုင်ပင်နေကြတာကိုက ရယ်စရာကြီးပဲ "

"အစ်ကိုကြီး... အဲ့ဒါ ဘိုးဘေးတို့ရဲ့ ကိစ္စပဲ၊ ကျွန်တော်နဲ့ မဆိုင်ဘူး။ ဒီကိစ္စကြောင့် ကျွန်တော့်အပေါ် ဒေါသမပုံပါနဲ့၊ ပြီးတော့လည်း တခြားသူတွေအပေါ် အာဃာတ မထားပါနဲ့"

တန့်လင်ခုန့်က အသက်ကို ပြင်းပြင်းရှူလိုက်သည်

"ဒီနေ့ကိစ္စ ဒီမှာတင် တော်လိုက်ပါတော့၊ အစ်ကို ပြန်လို့ရပြီ"

ဖန့်ရှောင်ထျန်း၏ စိတ်ထဲ၌ ရိပ်မိသွားသည်။

ဤတန့်လင်ရှောင်းသည် သူတို့မောင်နှမကို နှိမ့်ချနေသယောင် ရှိသော်လည်း၊ အမှန်တကယ်တွင်မူ ထိုကိစ္စကို အကြောင်းပြကာ တန့်လင်ခုန့်အပေါ် ဒေါသပုံချနေခြင်း ဖြစ်သည်။

သို့သော် တစ်ဖက်လူမှာ သူတို့ကို "မိဘမဲ့ အထီးကျန်၊ ကျက်သရေ မရှိသူများ" ဟု စော်ကားခဲ့သည်မှာ အမှန်ပင်။ ဤကိစ္စအတွက် ရှင်းလင်းချက်တစ်ခု လိုအပ်သည်။

အနီးအနားရှိ ကျင့်ကြံသူ အများအပြားမှာလည်း အခြေအနေကို သတိပြုမိသွားကြပြီး ရပ်ကြည့်နေကြတော့သည်။

ဤနေရာနှင့် အတော်လေး ဝေးကွာသော ဇရပ်တစ်ခုအတွင်း၌မူ အဆင့်အတန်း မြင့်မားသော ပုဂ္ဂိုလ်အချို့သည် လက်ဖက်ရည် သောက်ရင်း တရားဓမ္မများ ဆွေးနွေးနေကြကာ၊ ရံဖန်ရံခါ ဤဘက်သို့ လှမ်းကြည့်နေကြသည်။

ထိုအထဲမှ အဖိုးအိုတစ်ဦးက လူလတ်ပိုင်းအရွယ် အမျိုးသားတစ်ဦးကို ကြည့်ကာ ပြုံးလျက် ဆိုသည်။

"မင်းရဲ့ သားကြီးကတော့ အတော်လေးကို မာန်တက်နေတာပဲနော်"

လူလတ်ပိုင်း အမျိုးသားက လက်ဖက်ရည်တစ်ငုံ သောက်လိုက်ပြီး ဂရုမစိုက်ဟန်ဖြင့် ပြောလိုက်သည်။

"သူက လင်ခုန့်ရဲ့ မပြတ်သားတဲ့ စိတ်ဓာတ်ကို စိတ်တိုနေတာပါ။ သူ့ရဲ့ နောက်ခံ အခြေအနေက ဟိုကလေးထက် သာနေပါလျက်နဲ့ ဘာဖြစ်လို့ ရှန့်ဝူကို လိုက်ဖို့ လက်လျှော့လိုက်ရတာလဲ ထားလိုက်ပါတော့... ကလေးချင်း ကိစ္စပဲ၊ သူတို့ဘာသာ သူတို့ ဖြစ်ကြပါစေ။ ငါတို့နဲ့ ဘာဆိုင်လို့လဲ "

အမျိုးသားက ပြုံးလျက် ခေါင်းခါလိုက်သည်

"ငါတို့တွေ ဆုံရခဲတယ်၊ တခြားအကြောင်းတွေပဲ ပြောကြရအောင်"

ဤနေရာ၌ ရှိနေကြသူများမှာ တာ့ရှန့်အင်ပါယာတွင် မျက်နှာပန်းပွင့်သော ပုဂ္ဂိုလ်များ ဖြစ်ကြရာ၊ ယနေ့တွင် လက်ဖက်ရည်သောက်ရင်း ဆုံစည်းရခြင်းမှာ အမှန်ပင် ခဲယဉ်းလှသည်။

"ကောင်းပါပြီ၊ ဆဋ္ဌမမင်းသား ကလည်း အခုထိ မရောက်သေးဘူးဆိုတော့ တခြားအကြောင်း ပြောကြတာပေါ့"

တစ်ဦးက ပြုံးလျက် ခေါင်းညိတ်လိုက်သည်။

ထိုအခါ လူလတ်ပိုင်း အမျိုးသားက

"လွန်ခဲ့တဲ့ နှစ်ပေါင်း ၂၀၀ ကျော်တုန်းက မသေမျိုးတက်ဆွေးနွေးပွဲမှာ မသေမျိုးလှေ တစ်စင်း ပေါ်လာခဲ့တာကို အားလုံး သိကြမှာပါ။ အဲ့ဒီလှေပိုင်ရှင်ရဲ့ နောက်ခံကို သိကြလား "

"ကျွယ်မင်နန်းတော် ရဲ့ အမာခံတပည့်တစ်ယောက်ပဲ"

မျက်နှာထား တည်တင်းသော အဖိုးအိုတစ်ဦးက ခပ်အေးအေး ပြောလိုက်သည်။

လူလတ်ပိုင်း အမျိုးသားက တိုးတိုးလေး ဆိုသည်

"ဒီသတင်းကို ကျွန်တော်လည်း ကြားဖူးပါတယ်။ ဒါပေမဲ့... ကျွယ်မင်နန်းတော် ဆိုတာ ဘယ်လို အင်အားစုမျိုးလဲ "

"တချို့အရာတွေကို မင်းအခု မသိဘူးဆိုရင် နောင်လည်း သိရမှာ မဟုတ်ဘူး။ မင်းတို့ တန့်မျိုးနွယ်အနေနဲ့ ဒါတွေကို သိဖို့ မလိုအပ်ပါဘူး"

အဖိုးအိုက ခပ်အေးအေးပင် ပြန်ပြောလိုက်သည်။

လူလတ်ပိုင်း အမျိုးသားမှာ ခေတ္တမျှ ဆွံ့အသွားသော်လည်း ဒေါသမထွက်ပေ။

ပြုံးလျက်သာ အရှက်ပြေအောင် လုပ်လိုက်သည်။

အဘယ်ကြောင့်ဆိုသော် ထိုအဖိုးအို၏ ကျင့်ကြံမှုမှာ သူ့ထက် မြင့်မားသလို၊ နောက်ခံမှာလည်း တတိယဘိုးဘေး မျိုးနွယ်စုမှ အဆင့်မြင့် ကျင့်ကြံသူ အချို့နှင့် အလွန် ရင်းနှီးသောကြောင့် ဖြစ်သည်။

"မင်းရဲ့ ကိစ္စကိုတော့ အိမ်ပြန်ရောက်မှ သေချာ ပြောကြသေးတာပေါ့။ အခုတော့ လူပုံအလယ်မို့ ငါ မင်းကို မျက်နှာသာ ပေးလိုက်မယ်"

တန့်လင်ရှောင်းက တန့်လင်ခုန့်ကို လက်ညှိုးငေါ့ကာ ပြောလိုက်ပြီးနောက်၊ ဖန့်ရှောင်ပန်းကို ကြည့်ကာ ပြုံးလျက် ဆိုသည်။

"မင်းတို့ရဲ့ နောက်ခံအကြောင်းကို ငါ တစ်ဆင့်စကား ကြားဖူးပါတယ်။ လွန်ခဲ့တဲ့ နှစ်ပေါင်း ၂၀၀ ကျော်တုန်းက မင်းတို့မိဘတွေဟာ အပြင်မှာ တိုက်ပွဲဝင်ရင်း ကျဆုံးသွားကြပြီလေ။ သူတို့ရဲ့ ကျင့်ကြံမှုကလည်း သိပ်မမြင့်မားပါဘူး၊ သာမန် ကျင့်ကြံသူလေးတွေပါပဲ။ မင်းပြောတဲ့ အစ်ကိုကြီးဆိုတာကိုတော့ ငါ တစ်ခါမှ မကြားဖူးဘူး။ သူက ငါ့ကို ဆုံးမမယ်ဆိုရင်လည်း၊ သူ့ကို ဒီကို ခေါ်လိုက်လေ... ငါ သူနဲ့ စကားပြောကြည့်ချင်တယ်"

"အစ်ကိုကြီးက အခု တာ့ရှန့်အင်ပါယာမှာ မရှိဘူး၊ ဒါပေမဲ့ သူ ငါတို့ကို လာခေါ်မယ်လို့ ပြောထားတယ်"

ဖန့်ရှောင်ပန်းက နှာခေါင်းရှုံ့လိုက်သည်

"အစ်ကိုကြီး ရောက်လာရင် ဒီနေ့ကိစ္စကို သေချာ ပြန်ပြောပြမှာ"

"အစ်ကိုကြီး ရောက်မလာရင်တောင်၊ ဒီနေ့ကိစ္စအတွက် မင်း ငါတို့ ဖန့်မိသားစုကို တောင်းပန်ရမယ်"

ဖန့်ရှောင်ထျန်းက အနည်းငယ် ပြုံးလိုက်ပြီး တန့်လင်ရှောင်းကို စိုက်ကြည့်ကာ တစ်လုံးချင်း ဆိုသည်။

"ငါ့ကို စော်ကားတာ ရတယ်၊ ရှောင်ပန်းကို စော်ကားတာ မရဘူး။ ငါ့အဖေနဲ့ အမေကို စော်ကားတာကတော့ ပိုပြီးတော့တောင် မရဘူး "

"မရဘူး ဟုတ်လား ငါက စော်ကားလိုက်ပြီကွာ... ဘာဖြစ်လဲ "

တန့်လင်ရှောင်းက လှောင်ပြုံးဖြင့် ဆိုသည်။

"ဒါဆိုရင်တော့ မင်းကို ရိုက်ရမှာပဲ"

ဖန့်ရှောင်ထျန်းက နောက်သို့ ခြေလှမ်းတစ်လှမ်း ဆုတ်လိုက်သည်။

လူတိုင်း အံ့အားသင့်သွားကြသည်။

ရိုက်မယ်ပြောပြီး ဘာလို့ နောက်ကို ဆုတ်သွားတာလဲ

တန့်လင်ရှောင်းက ဟားတိုက်ရယ်မောရန် ပြင်လိုက်သော်လည်း၊ ရုတ်တရက် တစ်ကိုယ်လုံး ကြက်သီးမွှေးညင်းများ ထောင်ထသွားသကဲ့သို့ ခံစားလိုက်ရသည်။

ကြောက်မက်ဖွယ်ကောင်းသော ဓားဆန္ဒ တစ်ခုသည် ကောင်းကင်ယံမှ ဆင်းသက်လာရာ၊ လူအများအပြားမှာ ထိတ်လန့်တကြား ခေါင်းမော့ကြည့်လိုက်ကြတော့သည်။

"တောက်"

ဝေးကွာသော ဇရပ်အတွင်းရှိ လူလတ်ပိုင်း အမျိုးသားမှာ ရုတ်တရက် ကြိမ်းမောင်းလိုက်ပြီး၊ ဘာကိုမှ ဂရုမစိုက်နိုင်တော့ဘဲ ဝိညာဉ်ကိရိယာ တစ်ခုကို ချက်ချင်း ထုတ်လွှတ်ကာ ထိုဓားဆန္ဒကို ခုခံရန် ပစ်လွှတ်လိုက်သည်။

"ဒီနေရာမှာ လူသတ်မှု ကျူးလွန်ရဲသလား"

အရှိန်အဝါ အမြောက်အမြားမှာလည်း တစ်ပြိုင်နက်တည်း ထွက်ပေါ်လာပြီး လူလတ်ပိုင်း အမျိုးသား၏ ဝိညာဉ်ကိရိယာနှင့်အတူ ထိုဓားဆန္ဒကို ဝိုင်းဝန်း တားဆီးကြသည်။

ဝုန်း

သူတို့၏ နည်းလမ်းများမှာ ခဏချင်းအတွင်း ပျက်စီးသွားပြီး၊ ကြောက်မက်ဖွယ် ဓားဆန္ဒသည် တန့်လင်ရှောင်း၏ ဒူးဆစ်အရိုးများကို ပြတ်တောက်သွားစေခဲ့သည်။

ဖျတ်

တန့်လင်ရှောင်း၏ ခြေသလုံးပေါ်တွင် သေးငယ်သော အက်ကြောင်းတစ်ခု ပေါ်လာပြီး သွေးများ စိမ့်ထွက်လာသည်။

ထို့နောက်တွင်မူ ခြေသလုံးနှင့် ပေါင်မှာ ပြတ်ထွက်သွားပြီး၊ သူသည် ဟန်ချက်မထိန်းနိုင်ဘဲ မြေပြင်ပေါ်သို့ ဒူးထောက်လဲကျသွားတော့သည်။

တန့်လင်ခုန့်နှင့် ဘေးရှိလူများမှာ ကြောင်ကြည့်နေကြမိသည်။

စက္ကန့်အနည်းငယ် ကြာမှ သတိဝင်လာကြပြီး၊ ဖန့်ရှောင်ထျန်းကို မယုံကြည်နိုင်ဟန်ဖြင့် လှမ်းကြည့်လိုက်ကြသည်။

"ဒါက ဖန့်မောင်နှမလား"

"ခုနက ဓားဆန္ဒက... ဖန့်ရှောင်ထျန်းနဲ့ ပတ်သက်နေတာလား"

"ဒါ ဘယ်လိုလုပ် ဖြစ်နိုင်မှာလဲ... ဘယ်သူက သူ့အတွက် ထွက်တိုက်ပေးပြီး တန့်လင်ရှောင်းရဲ့ ခြေထောက်နှစ်ဖက်ကို ဖြတ်ပစ်လိုက်တာလဲ "

"ခုနက အစွမ်းထက်တဲ့ ပုဂ္ဂိုလ်တွေ အများကြီး ထွက်တားတာတောင် အဲ့ဒီဓားဆန္ဒကို မတားနိုင်ဘူး။ ဓားပညာ အထူးကျွမ်းကျင်တဲ့သူပဲ... မသေမျိုးအဆင့် ပဲ ဖြစ်ရမယ် "

"ဖန့်မောင်နှမရဲ့ နောက်ခံက... ငါတို့ ထင်ထားတာထက် အများကြီး ပိုနက်နဲတာပဲ..."

ထိုအချိန်တွင် လူလတ်ပိုင်း အမျိုးသားသည် တန့်လင်ရှောင်း၏ ဘေးသို့ ရောက်ရှိလာပြီး၊ သူ၏ သားဖြစ်သူ သနားစဖွယ် ဖြစ်နေသည်ကို မြင်သောအခါ ဖန့်ရှောင်ထျန်းကို အေးစက်စက် တစ်ချက် ကြည့်လိုက်ပြီးနောက်၊ ဖန့်ရှောင်ထျန်း၏ နောက်ဘက်ဆီသို့ လှမ်းကြည့်လိုက်သည်။

ထိုနေရာတွင် ပုံရိပ်တစ်ခု မတ်တပ်ရပ်နေပြီး၊ သူ့ကို ပြုံးလျက် ကြည့်နေသည်။

"ဦးလေးတော် ဟွမ် ရဲ့ အကူအညီအတွက် ကျေးဇူးတင်ပါတယ်"

ဖန့်ရှောင်ထျန်းက လှည့်၍ လက်အုပ်ချီ နှုတ်ဆက်လိုက်သည်။

ထိုအပြုအမူကပင် ရောက်လာသူမှာ သူနှင့် ပတ်သက်ကြောင်း အတည်ပြုလိုက်ခြင်း ဖြစ်တော့သည်။

အခန်း (၁၅၂၂) - ခြေထောက်တစ်စုံ ပြတ်ရုံတင်ပဲ၊ ဘာမှမဟုတ်ပါဘူး

"ဟွမ်"

လူအတော်များများက ထိုနာမည်နှင့် ပတ်သက်သည့် အချက်အလက်ကို ဦးနှောက်ထဲတွင် လိုက်လံရှာဖွေနေကြသည်။

သို့သော် တာ့ရှန့်မြို့တော်အတွင်း၌ ဟွမ် မျိုးရိုးအမည်ရှိသည့် ပညာရှင် သို့မဟုတ် အင်အားကြီးမျိုးနွယ်စု ရှိနေသည်ဟု မကြားမိပေ။

ပြင်ပက လာသူလား

လူလတ်ပိုင်းအမျိုးသား သည် ထိုအခေါ်အဝေါ်ကို ကြားလိုက်ရသောအခါ မျက်နှာထား အနည်းငယ် လျော့ကျသွားပြီးနောက်၊ မိမိ၏ မသေမျိုးစွမ်းအင် ကို အသုံးပြု၍ တန့်လင်ရှောင်း၏ ပြတ်တောက်နေသော ခြေထောက်နှစ်ဖက်ကို ပြန်ဆက်ပေးရန် ပြင်လိုက်သည်။

"အဖေ... ဒီလူက ဒီလိုပွဲလမ်းသဘင်မျိုးမှာ လက်ရဲဇက်ရဲ လုပ်တာပဲ၊ သူ့ကို သင်ခန်းစာ ကောင်းကောင်းပေးရမယ်။ မဟုတ်ရင် တခြားသူတွေက ကျွန်တော်တို့ တန့်မျိုးနွယ်ကို အနိုင်ကျင့်လို့ ရတယ်လို့ ထင်ကုန်ကြလိမ့်မယ်"

တန့်လင်ရှောင်းက အံကြိတ်ကာ တိုးတိုးလေး ပြောလိုက်သည်။

"အဲ့ဒါကတော့ အသေအချာပဲပေါ့၊ ငါတို့ တန့်မျိုးနွယ်ကို ထားဦး... ဒီနေ့ ဒီနေရာက ဘယ်နေရာလဲ နန်းတော်လေ။ ငါ မလုပ်ရင်တောင် တာ့ရှန့်အင်ပါယာက လက်ပိုက်ကြည့်နေမှာ မဟုတ်ဘူး"

လူလတ်ပိုင်းအမျိုးသားက တန့်လင်ရှောင်း၏ ခြေလက်ပြတ်ကို ဆက်ပေးရင်း အေးဆေးစွာ ပြုံးလျက် ဆိုသည်။

ဘေးလူများကလည်း စိတ်ထဲမှ ခေါင်းညိတ်ထောက်ခံကြသည်။

အမှန်ပင်။

ဤကဲ့သို့သော အခြေအနေမျိုးတွင် တန့်မျိုးနွယ်က လက်တုံ့မပြန်လျှင်ပင် တော်ဝင်မျိုးနွယ်စုဘက်မှ ဖြေရှင်းပေလိမ့်မည်။

ယနေ့ကဲ့သို့ အခမ်းအနားမျိုးတွင် လူသတ်ဖြတ်ဒဏ်ရာရအောင် လုပ်ဆောင်ခြင်းမှာ တန့်မျိုးနွယ်၏ မျက်နှာကို ရိုက်လိုက်ခြင်း မဟုတ်ဘဲ တော်ဝင်မျိုးနွယ်၏ မျက်နှာကို စော်ကားလိုက်ခြင်းပင် ဖြစ်သည်။

တန့်လင်ခုန့်သည် တန့်လင်ရှောင်း၏ သနားစဖွယ် အခြေအနေကို ကြည့်ပြီး စိတ်ထဲတွင် ဒေါသအနည်းငယ်မျှ မရှိသည့်အပြင်၊ကျိတ်၍ ဝမ်းသာနေမိသည်။

ထို့နောက် သူက ဖန့်ရှောင်ထျန်းကို ကြည့်လိုက်ရာ မျက်ဝန်းထဲ၌ အံ့ဩတုန်လှုပ်မှုများ ပြည့်နှက်နေသည်။

နောက်ခံမရှိဟု ထင်ရသော ဤဖန့်မိတ်ဆွေ၏ နောက်ကွယ်တွင် မသေမျိုးအဆင့်ရှိသည့် ပုဂ္ဂိုလ်ကြီးတစ်ဦး ရှိနေလိမ့်မည်ဟု သူ လုံးဝ မထင်ထားခဲ့မိပေ။

"ရှောင်ထျန်းအစ်ကို... ဒီစီနီယာ က ဘယ်သူလဲဟင်"

ရှန့်ဝူက အံ့ဩစွာ မေးလိုက်သည်။

ဟွမ်ဝူကျိသည် လူအချို့၏ ရှေ့သို့ လျှောက်လာပြီး ဖန့်ရှောင်ထျန်းနှင့် ဖန့်ရှောင်ပန်းကို ခေါင်းညိတ်ပြလိုက်ကာ၊ ထို့နောက် ရှန့်ဝူကို အထက်အောက် အကဲခတ်ကြည့်ရှုနေသည်။

"ညီမလေး ရှောင်ဝူ... ဒါက စီနီယာဟွမ်ပါ။ သူက... ကျွန်တော့်အစ်ကိုကြီးက ကျွန်တော်တို့ မောင်နှမဘေးမှာ ထားခဲ့ပြီး ကျင့်ကြံမှုတွေကို သင်ကြားပေးဖို့ တာဝန်ပေးထားတဲ့ စီနီယာပါ"

ဖန့်ရှောင်ထျန်းက ပြောလိုက်သည်။

"ရှောင်ထျန်းအစ်ကို့မှာ တကယ်ပဲ အစ်ကိုကြီး တစ်ယောက် ရှိတာလား "

ရှန့်ဝူမှာ အလွန်အံ့အားသင့်သွားသည်။

လူအများလည်း ကြောင်အမ်းသွားကြသည်။ အကယ်၍ ဤလူသည် ဖန့်ရှောင်ထျန်း၏ အစ်ကိုကြီး ချန်ရစ်ထားခဲ့သူ ဆိုလျှင်၊ မောင်နှမတွေကို ကာကွယ်ဖို့ မသေမျိုးအဆင့်ရှိသူ တစ်ဦးကို ထားခဲ့နိုင်သည့် ထိုသူကိုယ်တိုင်၏ ကျင့်ကြံမှုက မည်မျှအထိ မြင့်မားနေမည်နည်း။

"မဖြစ်နိုင်တာ... ဖန့်ရှောင်ထျန်းက အသက်ဘယ်လောက်ရှိသေးလို့လဲ သူ့မှာ အစ်ကိုကြီး ရှိရင်တောင် အသက်က သိပ်မကွာနိုင်ဘူး၊ မသေမျိုးအဆင့်တော့ လုံးဝ မဖြစ်နိုင်ပါဘူး..."

"မသေမျိုးအဆင့် ဟုတ်ဟုတ်၊ မဟုတ်ဟုတ် ဖန့်ရှောင်ထျန်း ဒီနေ့ လုပ်တာကတော့ တကယ့်ကို စိတ်လိုက်မာန်ပါ ဖြစ်သွားပြီ။ နန်းတော်အပြင်မှာဆိုရင် ဘာမှ မဖြစ်နိုင်ပေမဲ့၊ ဒီမှာက နန်းတော်ထဲလေ၊ တန့်မျိုးနွယ်ကို ရိုက်တာက ရှန့်မျိုးနွယ် (တော်ဝင်မျိုးနွယ်) ကို ရိုက်တာနဲ့ အတူတူပဲ"

လူအများက တိုးတိုးတိတ်တိတ် ဝေဖန်နေကြသည်။

ထိုအချိန်တွင် လူလတ်ပိုင်းအမျိုးသားမှာ ရုတ်တရက် ဒေါသတကြီး ခေါင်းမော့လာပြီး ဟွမ်ဝူကျိကို စိုက်ကြည့်ကာ အော်ဟစ်လိုက်သည်။

"မင်း... လွန်သွားပြီ"

ဘာဖြစ်လို့လဲ

အားလုံး ကြောင်သွားကြသည်။

ထို့နောက်မှ သတိထားမိကြသည်မှာ တန့်လင်ရှောင်း၏ ပြတ်တောက်နေသော ခြေထောက်မှာ လုံးဝ ဆက်၍မရဘဲ ဖြစ်နေသည်။

ဒဏ်ရာဝန်းကျင်တွင် ကြောက်မက်ဖွယ်ကောင်းသော ဓားဆန္ဒ တစ်ခု ကျန်ရှိနေပုံရသည်။

ထိုဓားဆန္ဒကြောင့်ပင် ဒဏ်ရာမှာ အသားပြန်မတက်ဘဲ ပြန်ဆက်၍ မရခြင်း ဖြစ်သည်။

"ဒါက အသေးအဖွဲ သင်ခန်းစာပေးရုံတင်ပါ။ သူက သူတစ်ပါးရဲ့ မိသားစုဂုဏ်သိက္ခာကို စော်ကားတယ်၊ ခြေထောက်တစ်စုံ ပြတ်ရုံတင်ပဲ၊ ဒါဟာ ဘာမှမဟုတ်ပါဘူး "

ဟွမ်ဝူကျိက လူလတ်ပိုင်းအမျိုးသားကို ပြုံးစစဖြင့် ကြည့်ကာ ဆိုသည်။

"ဒါက သူက မျိုးဆက်သစ် လူငယ်တစ်ယောက်မို့လို့ ညှာတာပေးထားတာ။ တကယ်လို့ မင်းကိုယ်တိုင်သာ ထွက်ပြီး နှိမ့်ချစော်ကားတာဆိုရင် ခြေထောက်ပြတ်ရုံတင် မကတော့ဘူး"

လူလတ်ပိုင်းအမျိုးသားသည် ဒေါသထွက်လွန်းသဖြင့် ရယ်ပင် ရယ်မိသွားသည်။

သူသည် တန့်မျိုးနွယ်၏ အရှင်သခင်၊ အဆင့် ၃ မသေမျိုး ဖြစ်ပြီး၊ မသေမျိုးအရှင် အဆင့်သို့ တက်လှမ်းရန် ခြေတစ်လှမ်းသာ လိုတော့သည့် ပုဂ္ဂိုလ်ဖြစ်ရာ တစ်ဖက်လူက သူ့ကို ထ်ုကဲ့သို့ ပေါ်ပေါ်တင်တင် ခြိမ်းခြောက်ရဲသည်လား သူ၏ ကျင့်ကြံမှုကို ထားဦး၊ တန့်မျိုးနွယ်တွင် အဆင့် ၅ မသေမျိုး ပုဂ္ဂိုလ်ကြီးလည်း ရှိနေသေးသည်။

တာ့ရှန့်မြို့တော်တွင် တော်ဝင်မျိုးနွယ်ကလွဲလျှင် သူတို့ မကြောက်ရသည့်သူ မရှိပေ။

"ဒီနေရာက ငါတို့ တန့်မျိုးနွယ်ပိုင်နက် မဟုတ်ဘူး။ ကျန်တဲ့ကိစ္စတွေကိုတော့ ငါ မင်းနဲ့ စကားပြောမနေတော့ဘူး၊ သူတို့နဲ့ပဲ ရှင်းလိုက်တော့"

လူလတ်ပိုင်းအမျိုးသားက ရုတ်တရက် ပြုံးလိုက်သည်။

နောက်တစ်စက္ကန့်တွင် ပုံရိပ် ဆယ်ဂဏန်းခန့် ကောင်းကင်မှ ဆင်းသက်လာကြသည်။

သူတို့အားလုံးမှာ အဖြူရောင်ဝတ်စုံများကို ဝတ်ဆင်ထားကြသည်။

လူတိုင်း၏ အကြည့်များမှာ ချက်ချင်း လေးနက်သွားကြသည်။

ဝတ်ဖြူတော်အဖွဲ့ ဆိုသည်မှာ တာ့ရှန့်တော်ဝင်မျိုးနွယ်စု၏ အထူးခြားဆုံး အဖွဲ့အစည်းတစ်ခု ဖြစ်သည်။

သူတို့သည် မြို့တော်အတွင်း၌ တရားဥပဒေ စိုးမိုးရေးအတွက် လုပ်ပိုင်ခွင့် အပြည့်အဝ ရှိကြသည်။

မည်သည့် မျိုးနွယ်စုအရှင်သခင်ပင် အမှားကျူးလွန်ပါစေ၊ ဝတ်ဖြူတော်အဖွဲ့က တံခါးလာခေါက်လျှင် မည်သူမှ မတွန်းလှန်ရဲဘဲ လိုက်သွားကြရုံသာ ရှိသည်။

အကယ်၍ အပြစ်ရှိလျှင် အပြစ်ပေးခံရမည်၊ အပြစ်မရှိလျှင်... ပြန်လွှတ်ပေးမည် ဖြစ်သော်လည်း သူတို့ထံမှ တောင်းပန်စကား တစ်ခွန်းမျှ ရလိမ့်မည် မဟုတ်ပေ။

ခုနက ဟွမ်ဝူကျိ၏ ဓားဆန္ဒကို တားဆီးရန် လူလတ်ပိုင်းအမျိုးသားနှင့်အတူ လက်တွဲခဲ့သူများထဲတွင် ဤဝတ်ဖြူတော်အဖွဲ့ဝင်များလည်း ပါဝင်သည်။

သို့သော် သူတို့၏ နည်းလမ်းများမှာလည်း ဟွမ်ဝူကျိ၏ ဓားတစ်ချက်အောက်တွင် ပျက်စီးခဲ့ရသည်။

"စီနီယာ... ကျွန်တော်တို့နဲ့အတူ တစ်ခေါက် လိုက်ခဲ့ပေးပါ"

ဝတ်ဖြူတော်တစ်ဦးက လေးနက်သော အသံဖြင့် ဆိုသည်။

သူ၏ မျက်ဝန်းထဲတွင်မူ ဟွမ်ဝူကျိအပေါ် အထိတ်တလန့်ဖြစ်မှုနှင့် သတိထားမှုများ ပြည့်နှက်နေသည်။

တစ်ဖက်လူ၏ ခုနက ဓားချက်မှာ တကယ့်ကို ထူးခြားဆန်းပြားလှသဖြင့် ကျင့်ကြံမှုကို ခန့်မှန်းရန် ခက်ခဲလှသည်။

အဆင့် ၄ မသေမျိုးလား၊ သို့မဟုတ် အဆင့် ၅ မသေမျိုးလား။

သို့သော် ဟွမ်ဝူကျိက ဝတ်ဖြူတော်များ၏ စကားကို ဂရုမစိုက်ဘဲ ရှန့်ဝူကိုသာ ဆက်လက် အကဲခတ်နေဆဲ ဖြစ်သည်။

ရှန့်ဝူမှာ မျက်နှာတစ်ခုလုံး နီရဲလာပြီး မသိစိတ်ဖြင့် ဖန့်ရှောင်ထျန်း၏ လက်ကို ဆွဲကာ သူ၏ ကျောနောက်သို့ ပုန်းလိုက်မိသည်။

"မင်းက ရှောင်ထျန်းကို တကယ်ပဲ ချစ်တာလား "

ဟွမ်ဝူကျိက ရုတ်တရက် မေးလိုက်သည်။

လူတိုင်း ကြောင်အမ်းသွားကြသည်။

ဝတ်ဖြူတော်အဖွဲ့ဝင်များလည်း တစ်ဦးကိုတစ်ဦး ကြည့်လိုက်ကြသည်။

"စီနီယာဟွမ်... ခင်ဗျား..."

ဖန့်ရှောင်ထျန်းက မသိစိတ်ဖြင့် စကားစလိုက်သည်။

"မင်းကို မမေးဘူး"

ဟွမ်ဝူကျိက လက်ကာပြလိုက်ပြီး၊ ရှန့်ဝူကို ကြည့်ကာ ပြုံးလျက် ဆိုသည်။

"ရှောင်ထျန်းရဲ့ အဆင့်အတန်းက ထူးခြားတယ်။ တကယ်လို့ မင်းက သူ့ကို တကယ်ချစ်တာဆိုရင် တဲ့တိုးသာ ပြောလိုက်စမ်းပါ၊ မင်း သူ့အပေါ် ဘယ်လောက်အထိ ချစ်သလဲဆိုတာ ငါ သိချင်လို့။ တကယ်လို့ ခဏတာ စိတ်ကူးယဉ်ရုံဆိုရင်တော့ ဒီနေ့မှာတင် ရပ်လိုက်တော့"

"ကျွန်မ ခဏတာ စိတ်ကူးယဉ်တာ မဟုတ်ပါဘူး "

ရှန့်ဝူက မသိစိတ်ဖြင့် ပြန်ငြင်းလိုက်ပြီးနောက် သတ္တိကို မွေးကာ ပြောလိုက်သည်။

"ကျွန်မ ရှောင်ထျန်းအစ်ကို့ကို တကယ်ချစ်တာပါ။ သူနဲ့ လက်တွဲဖော်အဖြစ် ပေါင်းဖက်ချင်တယ်၊ သူ့အတွက် သားသမီးတွေလည်း ယူပေးချင်တယ်"

လူလတ်ပိုင်းအမျိုးသား သည် ထိုစကားကို ကြားသောအခါ နှာခေါင်းရှုံ့လိုက်မိသည်။

ဤမိန်းကလေးမှာ မူလက သူ သဘောကျထားပြီး တန့်လင်ခုန့်၏ လက်တွဲဖော်အဖြစ် တန့်မျိုးနွယ်ထဲသို့ သွင်းရန် ပြင်ဆင်ထားသူ ဖြစ်သည်။

သို့သော် တစ်ဖက်လူက ဤကဲ့သို့သော ပွဲလမ်းသဘင်မျိုးတွင် အခြားအမျိုးသားတစ်ဦးကို လူပုံအလယ်၌ ဖွင့်ပြောလိမ့်မည်ဟု မထင်ထားခဲ့ပေ။

"အင်း... ကြည့်ရတာတော့ တကယ်ချစ်ပုံရသားပဲ"

ဟွမ်ဝူကျိက ခေါင်းညိတ်လိုက်ပြီးနောက် ဖန့်ရှောင်ထျန်းကို ကြည့်ကာ ပြုံးလိုက်သည်။

"မင်းလည်း အခုချက်ချင်း ဆုံးဖြတ်ချက် မချပါနဲ့ဦး၊ မင်းအစ်ကိုကြီး ရောက်လာမှပဲ ပြောကြတာပေါ့"

"အစ်ကိုကြီး သူ ပြန်လာပြီလား "

ဖန့်ရှောင်ထျန်း၏ မျက်လုံးများ တောက်ပသွားသည်။

ရှောင်ပန်းကလည်း ချက်ချင်း ရှေ့တိုးလာကာ မျှော်လင့်တကြီးဖြင့် မေးလိုက်သည်။

"စီနီယာဟွမ်... အစ်ကိုကြီး တကယ်ပဲ ပြန်လာပြီလား "

"အင်း... ပြန်လာပြီ"

ဟွမ်ဝူကျိက ခေါင်းညိတ်သည်။

ယင်လောက၏ နတ်ဘုရားဝိညာဥ်တစ်ပါး ဖြစ်သည့်အတွက် သူနှင့် ဖန့်ချန်ကြားတွင် ထူးခြားသော ဆက်သွယ်မှုတစ်ခု ရှိနေပေသည်။

"သိပ်ကောင်းတာပဲ"

ဖန့်ရှောင်ပန်းက စိတ်လှုပ်ရှားနေသလို၊ အနည်းငယ်လည်း စိုးရိမ်တုန်လှုပ်နေပုံ ရသည်။

လူတိုင်းမှာမူ သူတို့ပြောနေသည့် အစ်ကိုကြီး ဆိုသူမှာ မည်သူနည်းဟု ပို၍ပင် သိချင်စိတ် ပြင်းပြလာကြသည်။

လူလတ်ပိုင်းအမျိုးသားမှာမူ မျက်မှောင်ကြုတ်လိုက်မိပြီး တစ်ခုခု မှားယွင်းနေသလို ခံစားနေရသော်လည်း၊ တန့်မျိုးနွယ်၏ ဂုဏ်သိက္ခာအတွက် ယနေ့ကိစ္စကို အရင် ဖြေရှင်းရမည်ဟု ဆုံးဖြတ်လိုက်သည်။

သူက ဝတ်ဖြူတော်အဖွဲ့ကို ကြည့်ကာ

"လူကြီးမင်းတို့... ဒီလူက အကြောင်းမဲ့သက်သက် ကျွန်တော့်သားရဲ့ ခြေထောက်နှစ်ဖက်ကို ဖြတ်ပစ်လိုက်တယ်။ တာ့ရှန့်မြို့တော်ရဲ့ စည်းမျဉ်းအရ ဘယ်လို အပြစ်ပေးသင့်သလဲ "

"စိတ်ချပါ၊ ကျုပ်တို့ စည်းမျဉ်းအတိုင်း ဖြေရှင်းမှာပါ"

ဝတ်ဖြူတော်တစ်ဦးက ခေါင်းညိတ်ပြလိုက်သည်။

သူက ဟွမ်ဝူကျိကို ကြည့်ကာ မျက်ဝန်းထဲ၌ အေးစက်သော အလင်းတန်းများ ဖြတ်ပြေးသွားပြီး စကားပြောရန် ပြင်လိုက်စဉ်မှာပင် အသံတစ်သံ ကြားလိုက်ရသည်။

"ဆဋ္ဌမမင်းသား ကြွလာပါပြီ"

ဆဋ္ဌမမင်းသား ရောက်လာပြီလား

လူတိုင်း အနည်းငယ် အံ့အားသင့်သွားကြသည်။

လူလတ်ပိုင်းအမျိုးသားက လှည့်ကြည့်လိုက်ရာ၊ ဇရပ်အတွင်း၌ အတူရှိခဲ့ကြသော မျိုးနွယ်စုကြီးများမှ အရေးပါသော ပုဂ္ဂိုလ်ကြီးများသည် ပုံရိပ်နှစ်ခု၏ ဘေးတွင် ဝန်းရံလျက် ဤဘက်သို့ လျှောက်လာသည်ကို တွေ့လိုက်ရသည်။

ထိုပုံရိပ်နှစ်ခုထဲမှ တစ်ဦးမှာ အဖြူရောင်ဝတ်စုံကို ဝတ်ဆင်ထားပြီး ကိုယ်ပေါ်မှ အဆင့် ၅ မသေမျိုး အရှိန်အဝါများ ထွက်ပေါ်နေသည်။

သူသည် ဝတ်ဖြူတော်အဖွဲ့၏ အကြီးအကဲပင် ဖြစ်သည်။

အခြားတစ်ဦးမှာမူ မင်းသားဝတ်ရုံ ကို ဆင်မြန်းထားပြီး၊ သူ၏ အရှိန်အဝါမှာ အဆင့် ၅ မသေမျိုးလောက် မပြင်းထန်သော်လည်း ဤနေရာရှိ ပုဂ္ဂိုလ်ကြီးများထက် မနိမ့်ကျပေ။ သူကား တာ့ရှန့်အင်ပါယာ၏ ဆဋ္ဌမမင်းသားပင် ဖြစ်တော့သည်။

"ဆဋ္ဌမမင်းသား"

လူတိုင်းက အလုအယက် လက်အုပ်ချီ နှုတ်ဆက်ကြသည်။

ဆဋ္ဌမမင်းသားမှာ မျက်နှာတစ်ခုလုံး ပြုံးရွှင်နေသည်။

လူလတ်ပိုင်းအမျိုးသား သည် ရှေ့သို့ ခြေတစ်လှမ်းတိုးကာ ဤကိစ္စကို တိုင်ကြားရန် ပြင်လိုက်သော်လည်း၊ ဆဋ္ဌမမင်းသားက သူ၏ ပခုံးကို ညင်သာစွာ ပုတ်လိုက်ပြီး လေးလေးနက်နက် ဆိုလာသည်ကို ကြားလိုက်ရသည်။

"အို... မိတ်ဆွေဟောင်း တန့်ရာ... ငါ ခဏလေး နောက်ကျသွားတာနဲ့ မင်းကတော့ ငါ့အတွက် ဒုက္ခတွေ ရှာပေးလိုက်ပြီပဲ။ တန့်မျိုးနွယ်ကို မင်းသာ ဒီအတိုင်း ဆက်ပြီး အုပ်ချုပ်နေမယ်ဆိုရင် နောင်တစ်ချိန် မျိုးနွယ်စုတစ်ခုလုံး မျိုးတုံးမယ့် ဘေးဒုက္ခနဲ့ ကြုံရတော့မှာ မဟုတ်ဘူးလား "

ရှူး...

အားလုံးက အံ့အားသင့်စွာဖြင့် အသက်ကို ပြင်းပြင်းရှူလိုက်ကြပြီး ဘာတွေဖြစ်နေမှန်း ဝေခွဲမရ ဖြစ်သွားကြသည်။

လူလတ်ပိုင်းအမျိုးသားမှာလည်း တုန်လှုပ်သွားပြီး ဆဋ္ဌမမင်းသားကို သတိကြီးစွာဖြင့် ကြည့်ကာ

"ဆဋ္ဌမမင်းသား... ဒါက ဘာကို ဆိုလိုတာလဲခင်ဗျာ..."