အခန်း (၇၈၄-၇၈၆)

အခန်း (၇၈၄) - သူတော်စင် ဘိုးဘေးကြီး ၏ လေနတ်ဘုရား ပန်းချီကား

~လန်ယာ နယ်မြေ စစ်တပ်ကြီးသည် နင်ချီ က ချီပိုင်ရှို့ ကို သတ်ဖြတ်လိုက်သည်ကိုသာ မြင်တွေ့ခဲ့ရဖူးသော်လည်း၊ ချီပိုင်ရှို့ မှာ ပေါင်းစည်းခြင်း နယ်ပယ် အဆင့်မျှသာ ရှိသေးသူ ဖြစ်သည်။ နင်ချီ က သူ့ကို တစ်ချက် လှမ်းကြည့်လိုက်ရုံဖြင့် သတ်ဖြတ်နိုင်ခဲ့သဖြင့် သူ၏ ကြီးမြတ်သော စွမ်းအားကို လုံးဝ နားလည် သဘောပေါက်နိုင်စွမ်း မရှိခဲ့ကြချေ။

ယခု နယ်မြေအရှင်သခင် နှစ်ပါး၏ တိုက်ပွဲတွင် နင်ချီ က သူ၏ စွမ်းရည်များကို အပြည့်အဝ ထုတ်ဖော် ပြသလိုက်သောအခါမှသာ... နင်ချီ ၏ ခွန်အားကို သူတို့ ရှင်းလင်းစွာ နားလည် သဘောပေါက်သွားကြတော့သည်။

ဒီကောင်လေးက ကြောက်စရာ ကောင်းလောက်အောင် အစွမ်းထက်တာပဲ။ ကျူးယန့်ချွမ်း နှင့် အခြား နှစ်ဦးမှာ သူတို့ ဂိုဏ်း၏ တာအိုနှင့် ပေါင်းစည်းခြင်း နယ်ပယ် ဘိုးဘေးကြီး များသာ စစ်မြေပြင်နယ်မြေ အတွင်းသို့ ဝင်ရောက်လာနိုင်မည် ဆိုလျှင်တောင်မှ နင်ချီ ကို ယှဉ်နိုင်ပါ့မလား ဟုပင် သံသယ ဝင်လာမိကြ၏။

အနက်ရှိုင်းဆုံး ခံစားလိုက်ရသူများမှာ ချီခယ်ချင်း နှင့် အခြားသူများပင် ဖြစ်၏။

သူတို့ အားလုံးမှာ ခွမ်းရှန်းချင်း တစ်ယောက်တည်း၏ ဖိနှိပ် ချုပ်ချယ်မှုကို ခံခဲ့ရသူများ ဖြစ်ကြသည်။ သူက မည်သည့် စွမ်းအားကိုမျှ အသုံးပြုခဲ့ပုံ မပေါ်ဘဲနှင့်ပင်... သူတို့ အနေဖြင့် အစွမ်းကုန် ကြိုးစားခဲ့သော်ငြားလည်း အနည်းငယ်မျှသော စွမ်းအားကိုပင် ထုတ်လွှတ်နိုင်ခြင်း မရှိခဲ့ဘဲ လုံးဝ ခုခံနိုင်စွမ်း မရှိခဲ့ကြချေ။

နယ်မြေအရှင်သခင် တစ်ပါး၏ စွမ်းအားကို ကိုယ်တိုင် ကိုယ်ကျ ခံစားဖူးပြီးမှသာ ထိုသူမှာ မည်မျှ ကြောက်မက်ဖွယ် ကောင်းကြောင်းကို သူတို့ သဘောပေါက်သွားခဲ့ကြပြီး၊ ယခုအခါ နင်ချီ ကို နတ်ဘုရား တစ်ပါးအလား လေးစားနေကြတော့သည်။

သူတို့ ရှေ့တွင် ရပ်နေသော ဤလူသည်... ခွမ်းရှန်းချင်း က သူတို့ကို အလွယ်တကူ ဖိနှိပ်နိုင်ခဲ့သကဲ့သို့ ခွမ်းရှန်းချင်း ကို အလွယ်တကူ ဖိနှိပ် အနိုင်ယူနိုင်ခဲ့သည် မဟုတ်ပါလော။

သူက နတ်ဘုရား တစ်ပါး မဟုတ်ရင် ဘာဖြစ်နိုင်ဦးမှာလဲ။

နက်ရှိုင်းသော သစ္စာတရား နယ်မြေ မှ အဖွဲ့ဝင်များသည် မဟာမိတ် ခေါင်းဆောင်ကြီး ဖန်တီးခဲ့သော အံ့မခန်း လုပ်ဆောင်ချက်များကို ယခင်ကတည်းက မျက်မြင်ကိုယ်တွေ့ မြင်တွေ့ခဲ့ဖူးကြပြီ ဖြစ်သည်။ သူတို့က နင်ချီ ၏ ကျောပြင်ကို ငေးကြည့်နေကြရာ သူတို့၏ မျက်လုံးများထဲတွင် လေးစားမှုများ အပြည့်အဝ ပြည့်နှက်နေ၏။

သူတို့၏ နှလုံးသားထဲတွင် နင်ချီ မှာ နတ်ဘုရား တစ်ပါးနှင့် လုံးဝ ခြားနားမှု မရှိတော့ချေ။

နင်ချီ က ခွမ်းရှန်းချင်း ကို ပေါ့ပေါ့ပါးပါးပင် ဆိုလိုက်၏။

“မင်းမှာ တခြား နည်းလမ်းတွေ မရှိတော့ဘူးလား။ ငါ ချန်းရင် ကို သတ်လိုက်တုန်းက သူဆီကနေ မင်းရဲ့ နောက်ခံ အကြောင်းကို ကြုံသလို သိလိုက်ရတယ်။ မင်းက ကျယ်ပြန့်သော ကမ္ဘာ ရဲ့ အင်အားအကြီးဆုံး ဂိုဏ်းကြီးက လူတစ်ယောက်နဲ့ တွေ့ခဲ့ဖူးတယ် ဆိုတာပဲ။ ကျယ်ပြန့်သော အင်မော်တယ်ဂိုဏ်း က ဘိုးဘေးကြီး က မင်းကို သူ့ရဲ့ အမည်ခံတပည့် အဖြစ်တောင် လက်ခံခဲ့တယ် ဆို”

ဤ သတင်းအချက်အလက်များကြောင့်သာ နင်ချီ သည် ခွမ်းရှန်းချင်း ကို ချက်ချင်း သတ်ပစ်ခြင်း မပြုခဲ့ခြင်းပင် ဖြစ်၏။

တစ်ဖက်လူသည် ကျယ်ပြန့်သော ကမ္ဘာ ၏ အစွမ်းအထက်ဆုံး ပုဂ္ဂိုလ်၏ အမည်ခံတပည့် အဖြစ် လက်ခံခြင်း ခံခဲ့ရသည် ဆိုကတည်းက... ခွမ်းရှန်းချင်း တွင် အသက်ကယ် ရတနာ တစ်ခုခုတော့ သေချာပေါက် ရှိနေလိမ့်မည် မဟုတ်ပါလော။

နင်ချီ သည် ယခုအခါ တာအိုနှင့် ပေါင်းစည်းခြင်း နယ်ပယ် ဘိုးဘေးကြီး များကို သူ၏ ပြိုင်ဘက်များအဖြစ် သတ်မှတ်ထားသော်လည်း၊ သူသည် စပ်စုချင်စိတ် အပြည့်အဝ ရှိနေဆဲပင်။

တောင်နှင့် ပင်လယ် ကမ္ဘာ၊ ကျယ်ပြန့်သော ကမ္ဘာ နှင့် ဝိညာဉ်ကမ္ဘာ နှစ်ခု အကြားတွင်... ဝိညာဉ်ကမ္ဘာ နှစ်ခုလုံး၏ ဆန္ဒတော်တွေ အပြင် နင်ချီ အနေဖြင့် အထူး ဂရုပြုသင့်သော အခြား ပုဂ္ဂိုလ် အနည်းငယ် ရှိနေသေးသည်။

တောင်နှင့် ပင်လယ် ကမ္ဘာ တွင် ဒဏ္ဍာရီလာ တောင်ဘိုးဘေးကြီး နှင့် ပင်လယ်ဘိုးဘေးကြီး တို့ ရှိနေကြပြီး၊ ကျယ်ပြန့်သော ကမ္ဘာ တွင်မူ ချန်းရင် ထံမှ သိရှိရသော သတင်းများအရ... တောင်ဘိုးဘေးကြီး နှင့် ဆက်စပ်နေသော သက်ရှိ တစ်ခု ရှိနေကြောင်း သူ သိရှိခဲ့ရ၏။ ပင်လယ်ဘိုးဘေးကြီး နှင့် ဆင်တူသော သက်ရှိ တစ်ခု ဖြစ်ပြီး၊ ကျယ်ပြန့်သော ကမ္ဘာ မှ ကျင့်ကြံသူ များက သူတော်စင် ဘိုးဘေးကြီး ဟု ရိုသေ လေးစားစွာ ခေါ်ဝေါ်ကြ၏။

နင်ချီ ၏ ကိုယ်ပိုင် ခွန်အားကို ထည့်တွက်မည် ဆိုလျှင်ပင်... တာအိုနှင့် ပေါင်းစည်းခြင်း နယ်ပယ် သို့ ရောက်ရှိနေသူများကို မဆိုထားနှင့်... အထွတ်အထိပ် အဆင့် သို့ ရောက်ရှိနေသော အစွမ်းအထက်ဆုံး ပုဂ္ဂိုလ်များကိုပင် သူ ကြောက်ရွံ့နေမည် မဟုတ်ချေ။

သို့သော် နင်ချီ သည် ဝိညာဉ်ကမ္ဘာ နှစ်ခု အတွင်းရှိ အစွမ်းအထက်ဆုံး ပုဂ္ဂိုလ်များအပေါ် စပ်စုချင်စိတ် ရှိနေဆဲ ဖြစ်ပြီး တစ်ချိန်တည်းမှာပင် သတိဝီရိယ ကြီးမားသော သဘောထားကိုလည်း ထိန်းသိမ်းထား၏။

တာအို အရ သူ၏ ခွန်အားက ဝိညာဉ်ကမ္ဘာ နှစ်ခု အတွင်းရှိ အစွမ်းအထက်ဆုံး ပုဂ္ဂိုလ်များ၏ အဆင့်အတန်းသို့ ရောက်ရှိနေပြီလား ဆိုတာကိုတော့ သူ မသိသေးချေ။

အခြားတစ်ဖက်ရှိ ခွမ်းရှန်းချင်း မှာ ထိုစကားကို ကြားလိုက်ရသောအခါ အနည်းငယ် အံ့အားသင့်သွားပြီး၊ နင်ချီ က ဤ သတင်းအချက်အလက်များကို ချန်းရင် ထံမှပင် ရရှိခဲ့လိမ့်မည်ဟု လုံးဝ မထင်မှတ်ထားခဲ့ချေ။

ဒါဆို... ချန်းရင် က နင်ချီ ရဲ့ ဝိညာဉ်စစ်ဆေးတာကို ခံလိုက်ရဖို့ များတယ်ပေါ့။ ငါကတော့ ချန်းရင် လိုမျိုး အဖြစ်ဆိုးနဲ့ လုံးဝ အဆုံးသတ် မခံနိုင်ဘူး။

ထိုအချက်ကို တွေးမိလိုက်သောအခါ ခွမ်းရှန်းချင်း ၏ လက်ထဲတွင် ရုတ်တရက် အရာတစ်ခု ပေါ်ထွက်လာပြီး သူက ၎င်းကို တင်းကျပ်စွာ ဆုပ်ကိုင်ထားလိုက်သည်

နင်ချီ ၏ အကြည့်များက အထက်သို့ ရွှေ့သွားပြီး၊ ထိုအရာမှာ အစိမ်းရောင် အဖုံးဖြင့် အလွန်တရာ သေသပ် လှပစွာ ဖန်တီးထားသော ပန်းချီကားလိပ် တစ်ခု ဖြစ်ကြောင်း တွေ့လိုက်ရ၏။

၎င်းမှာ ခွမ်းရှန်းချင်း၏ လက်ထက် နှစ်လက်မခန့်သာ ပိုမို ကျယ်ဝန်းပြီး၊ လယ်သမား တစ်ဦး အသုံးပြုလေ့ရှိသော ဒလိမ့်တုံး တစ်ခုခန့်သာ အထူရှိသည်။

ခွမ်းရှန်းချင်း ၏ မျက်နှာထားမှာ တည်ကြည် လေးနက်နေ၏။ ပန်းချီကားလိပ် ကို ထုတ်ယူလိုက်ပြီးနောက် သူ၏ မျက်လုံးများထဲတွင် အဆုံးအစမဲ့သော လေးစားမှုများ ပြည့်နှက်နေပုံ ရ၏။

သူက ဆိုလိုက်၏။

“နင်ချီ... မင်းရဲ့ ခွန်အားက ငါ့ထက် သာလွန်တယ် ဆိုတာကို ငါ ဝန်ခံပါတယ်။ ဒါပေမဲ့ ဒီ ပန်းချီကားလိပ် က မင်းကို ဘာမှ မလုပ်နိုင်ဘူး ဆိုတာကိုတော့ ငါ လုံးဝ မယုံဘူး”

ခွမ်းရှန်းချင်း သည် ဤ ပန်းချီကားလိပ် အပေါ်တွင် အတိုင်းအဆမဲ့သော ယုံကြည်မှုများ ရှိနေ၏။

နင်ချီ ၏ မျက်လုံးများ တလက်လက် တောက်ပသွား၏။ ထို ပန်းချီကားလိပ် မှာ သာမန်မျှသာ ဖြစ်ပုံရသော်လည်း၊ တစ်ဖက်လူ၏ နောက်ခံကို ထည့်သွင်း စဉ်းစားကြည့်ပါက... သူ ဤမျှအထိ ယုံကြည်မှု ရှိနေသော အရာသည် ကျယ်ပြန့်သော ကမ္ဘာ ၏ သူတော်စင် ဘိုးဘေးကြီး က သူ့ကို ပေးအပ်ထားသော အရာ သေချာပေါက် ဖြစ်ရမည်။

နင်ချီ ၏ တည်ငြိမ် အေးချမ်းနေသော နှလုံးသားမှာ ရုတ်တရက် လှိုင်းဂယက်များ ထသွားတော့သည်။

ဒါက ကြီးမားတဲ့ အကျိုးအမြတ် တစ်ခုပဲ။ သူကိုယ်တိုင်တောင် တစ်ဖက်လူရဲ့ သူတော်စင် ဘိုးဘေးကြီး ရဲ့ စွမ်းအားတွေကို မြင်တွေ့ခွင့် ရလိမ့်မယ်လို့ လုံးဝ ထင်မထားခဲ့ဘူးလေ။

သူတော်စင် ဘိုးဘေးကြီး က ဘယ်လောက်တောင် အစွမ်းထက်သလဲ ဆိုတာကို နင်ချီ အလွန်တရာ သိချင်နေခဲ့ပြီ ဖြစ်၏။

“လာစမ်းပါ” ဟု နင်ချီ က ခွမ်းရှန်းချင်း ကို စိန်ခေါ်လိုက်၏။

ခွမ်းရှန်းချင်း ၏ ပန်းချီကားလိပ် ကို ကိုင်ထားသော လက်မှာ ရုတ်တရက် တုန်ယင်သွားတော့သည်။

ဒါက သူတော်စင် ဘိုးဘေးကြီး က သူ့ကို ချီးမြှင့်ထားသော နတ်ဘုရား ဆေးလုံး ပန်းချီကား ပင် ဖြစ်သည်။

သူ၏ လက်ရှိ ကျင့်ကြံခြင်း အဆင့်အတန်းနှင့် နယ်မြေအရှင်သခင် ဟူသော အဆင့်အတန်း အားလုံးမှာ သူတော်စင် ဘိုးဘေးကြီး က သူ့ကို ချီးမြှင့်ထားသော ဤ ပန်းချီကား ကြောင့်သာ ရရှိခဲ့ခြင်း ဖြစ်၏။

သို့သော် ခွမ်းရှန်းချင်း သည် ၎င်းကို ရရှိချိန်မှစ၍ နေ့ရော ညပါ လေ့လာနေခဲ့သော်ငြားလည်း၊ ပန်းချီကား ၏ တစ်ရာခိုင်နှုန်းခန့်ကိုသာ နားလည် သဘောပေါက်နိုင်ခဲ့သေးသည်။

အကယ်၍ သူသာ ၎င်းကို ရာခိုင်နှုန်းပြည့် နားလည် သဘောပေါက်နိုင်မည် ဆိုပါက... သူတော်စင် ဘိုးဘေးကြီး ၏ အဆင့်အတန်းသို့ ရောက်ရှိသွားမည်ဟု ဆိုလိုခြင်း မဟုတ်ချေ။ ဤပန်းချီကားမှာ သူတော်စင် ဘိုးဘေးကြီး က အမှတ်တမဲ့ ရေးဆွဲထားသော ပန်းချီကားငယ် တစ်ချပ်မျှသာ ဖြစ်၏။

ခွမ်းရှန်းချင်း သည် အလွန်တရာ အသည်းအသန် ဖြစ်မလာသရွေ့ ဤအရာကို လုံးဝ အသုံးမပြုချင်ခဲ့ချေ။ သို့သော် ယခုအခါ ကြောက်မက်ဖွယ်ကောင်းလောက်အောင် အစွမ်းထက်လှသော နင်ချီ နှင့် ရင်ဆိုင်နေရပြီ ဖြစ်ရာ သူ့အနေဖြင့် ၎င်းကို ထုတ်ယူ အသုံးပြုရန်မှလွဲ၍ အခြား ရွေးချယ်စရာ မရှိတော့ချေ။

သူ၏ လက်ကို တစ်ချက် ဝှေ့ယမ်းလိုက်ရာ ခွမ်းရှန်းချင်း သည် လေ သဘာဝ စည်းမျဉ်း များနှင့် စွမ်းအင်များကို ပန်းချီကား ထဲသို့ ပို့လွှတ်လိုက်၏။

မှေးမှိန်စွာဖြင့် ပန်းချီကား ပေါ်တွင် တာအို တံဆိပ် တစ်ခု ပေါ်လာပုံ ရပြီး ၎င်းမှာ ဖွင့်ဟလာတော့သည်။

နင်ချီ သည် ရုတ်တရက် ခွမ်းရှန်းချင်း ၏ နောက်ကွယ်သို့ တည်နေရာ ရွှေ့ပြောင်းသွား၏။

လက်ထဲရှိ ပန်းချီကား ၏ အားဖြည့်ပေးမှုဖြင့် ခွမ်းရှန်းချင်း ၏ တုံ့ပြန်မှုမှာ အလွန်တရာ မြန်ဆန်လှပြီး၊ နင်ချီ ၏ တည်နေရာကို မျက်စိတစ်မှိတ် အတွင်း အာရုံခံမိသွားတော့သည်။ သူက နောက်သို့ လှည့်ကြည့်ကာ အေးစက်စက် ရယ်လိုက်ပြီး...

“အလကားပဲ... မင်း ဘယ်ကိုပဲ ပြေးပြေး..မလွတ်ဘူး”

နင်ချီ က ဘာမှ မပြောဘဲ တိတ်ဆိတ်နေလိုက်၏။ သူ ထွက်ပြေးရန် ကြိုးစားနေခြင်း မဟုတ်ချေ။ ထိုအစား သူ၏ နောက်ကွယ်ရှိ နက်ရှိုင်းသော သစ္စာတရား နယ်မြေ အပါအဝင် စစ်တပ်ကြီး သုံးခုလုံးအတွက် သူ တွေးတောနေခြင်းသာ ဖြစ်၏။

အကယ်၍ သူသာ ထို နေရာတွင် ဆက်လက် ရှိနေမည် ဆိုလျှင်၊ ဤ ကျက်သရေမရှိသော ပန်းချီကား ထံမှ တိုက်ခိုက်မှုများက အလွန်တရာ ပြင်းထန်လွန်းနေမည် ဆိုပါက... သူ ရှောင်တိမ်းနိုင်ကောင်း ရှောင်တိမ်းနိုင်မည် ဖြစ်သော်လည်း၊ သူ၏ နောက်ကွယ်ရှိ စစ်တပ်ကြီးမှာမူ ရှောင်တိမ်း၍ မရနိုင်ဘဲ အကြီးအကျယ် ဒုက္ခရောက်ကုန်ကြပေလိမ့်မည်။

သူတို့သည် မိုင်နှစ်ဆယ် အကွာအဝေးတွင် ရှိနေကြသော်ငြားလည်း၊ ခွမ်းရှန်းချင်း ၏ တိုက်ခိုက်မှုမှာ မည်မျှအထိ အစွမ်းထက်မည် ဆိုတာကို နင်ချီ အနေဖြင့် အာမ မခံနိုင်ချေ။

မည်သို့ပင်ဆိုစေ ခွမ်းရှန်းချင်း ၏ မျက်နှာပေါ်ရှိ အမူအရာမှာ ယုံကြည်မှု လွန်ကဲနေလွန်းလှသည် မဟုတ်ပါလော။

နင်ချီ က သူ၏ မှော်နည်းစနစ် အားလုံးကို အသက်သွင်းလိုက်ပြီး၊ တောင်နှင့် ပင်လယ် ကမ္ဘာ က သူ့ကို ချီးမြှင့်ထားသော နယ်မြေအရှင်သခင် စွမ်းအားများကို အပြည့်အဝ ထုတ်လွှတ်လိုက်၏။ တစ်ချိန်တည်းမှာပင် သူသည် သူ၏ အစစ်အမှန် ခန္ဓာကိုယ် နှင့်ပင် တိတ်တဆိတ် ပြန်လည် ချိတ်ဆက်ထားလိုက်တော့သည်။

ခွမ်းရှန်းချင်း ၏ လက်ထဲရှိ နတ်ဘုရား ဆေးလုံး မှာ နောက်ဆုံးတွင် ဖွင့်ဟလာပြီး၊ ပန်းချီကားလိပ် လည်ပတ်သွားသည်နှင့်အမျှ ငါးပေခန့် ကျယ်ဝန်းပြီး ဆယ်ပေခန့် ရှည်လျားသော ပန်းချီကား တစ်ချပ်မှာ အပြည့်အဝ ရုပ်လုံးပေါ်လာတော့သည်။

နင်ချီ က ပန်းချီကားလိပ် ကို စူးစိုက်ကြည့်လိုက်၏။

ထို ပန်းချီကား ပေါ်တွင် အတော်လေး လောလောဆယ် ရေးဆွဲထားပုံ ရသော ရိုးရှင်းသည့် ပုံကြမ်း တစ်ခု ရှိနေသည်။

မှင်ရည် အနည်းငယ်ဖြင့် ရေးဆွဲထားသော ထို ပန်းချီကား က လူတစ်ယောက်၏ အကြမ်းဖျင်း ပုံသဏ္ဌာန်ကို ဖော်ကျူးထား၏။

လူတစ်ယောက်သည် လေပြင်းများကို စီးနင်းကာ ကောင်းကင်ဘုံ ကိုးလွှာ သို့ လှည့်လည် သွားလာနေ၏... ဒါက လေနတ်ဘုရား ပင် ဖြစ်သည်။

ပန်းချီကား ထဲရှိ အပြည့်အစုံ ပုံရိပ်ကို မြင်လိုက်ရသည်နှင့် တစ်ပြိုင်နက် နင်ချီ မှာ ထို မြင်ကွင်းကြောင့် ချက်ချင်းပင် စွဲမက်သွားတော့သည်။

ပန်းချီကား ထဲရှိ ရိုးရှင်းလှသော ပုံရိပ်များမှာ ရုတ်တရက် အဆုံးအစမဲ့ ကြွယ်ဝလာတော့သည်။

နင်ချီ သည် သူ၏ ဝိညာဉ်အာရုံများ ပန်းချီကား ထဲသို့ ဆွဲသွင်းခံလိုက်ရသကဲ့သို့ ခံစားလိုက်ရ၏။ လူဝင်စား တစ်ယောက် အနေဖြင့်... လေနတ်ဘုရား ၏ ခြေဖဝါးအောက်ရှိ လေပြင်းများက သူ့ကို ကောင်းကင်ဘုံ ကိုးလွှာ သို့ တန်းတန်းမတ်မတ် ခေါ်ဆောင်သွားသည်။

လက်ဝါး တစ်ချက်တည်းဖြင့် လေနတ်ဘုရား သည် ကောင်းကင်ဘုံ ကို ရိုက်ချိုး ဖျက်ဆီးလိုက်ပြီး၊ အင်မော်တယ် တံခါးများ ကို မှုန့်မှုန့်ညက်ညက် ကြေမွသွားစေကာ၊ မရေမတွက်နိုင်သော အင်မော်တယ် ပုံရိပ်များကို သတ်ဖြတ်ပစ်လိုက်ပြီး... နောက်ဆုံးတွင် အစစ်အမှန် အင်မော်တယ် အဆင့်သို့ တက်လှမ်းနိုင်ခဲ့၏။

သို့သော် သူသည် သူ၏ ခြေဖဝါးအောက်ရှိ အရိုးဖြူ တောင်ပုံရာပုံ ကြားရှိ အလောင်းကောင် လေပြင်း တစ်ခု အဖြစ်သို့ ပြောင်းလဲသွားခဲ့လေပြီ...။

wunzinnosp

အခန်း (၇၈၅)- သူတော်စင် ဘိုးဘေးကြီး ၏ တိုက်ခိုက်မှု

~လေနတ်ဘုရား ပန်းချီကား ထံမှ မှေးမှိန်သော အပြာရောင် အလင်းတန်း တစ်ခု ဖြာထွက်လာ၏။

၎င်းကို ပထမဆုံး စတင် ဖွင့်လှစ်လိုက်ချိန်တွင် သာမန် ပန်းချီကား တစ်ချပ်မျှသာ ဖြစ်ပုံရသော်လည်း၊ ယခုအခါတွင်မူ ၎င်း၏ လျှို့ဝှက်ဆန်းကြယ်မှုများ အားလုံးကို ထုတ်ဖော် ပြသလာပြီး နင်ချီ ၏ စိတ်အစဉ်ကို အပြည့်အဝ ဖမ်းစားသွားပြီ ဖြစ်၏။

နင်ချီ သည် ပန်းချီကား ထဲတွင် ရေးဆွဲထားသော လေနတ်ဘုရား ၏ ခြေဖဝါးအောက်တွင် နင်းခြေခံလိုက်ရပြီး၊ လေနတ်ဘုရား အင်မော်တယ် ဖြစ်လာစေရန် ကူညီပေးမည့် နင်းခုံ တစ်ခု အဖြစ်သို့ ပြောင်းလဲသွားသကဲ့သို့ ခံစားလိုက်ရ၏။

လေနတ်ဘုရား ၏ အရှိန်အဝါ ဆိုသည်မှာ နောက်ဆုံးတွင်တော့ ပုံရိပ်ယောင် တစ်ခုမျှသာ ဖြစ်၏။ ၎င်းသည် ပန်းချီဆွဲသူ၏ ကိုယ်ပိုင် ခံစားချက်များကိုသာ ကိုယ်စားပြုနေခြင်း ဖြစ်၏။

“ဒါက ကျယ်ပြန့်သော ကမ္ဘာ ရဲ့ အစွမ်းအထက်ဆုံး သူတော်စင် ဘိုးဘေးကြီး ရဲ့ နည်းလမ်းလား” ဟု နင်ချီ က တိုးတိုးလေး ရေရွတ်လိုက်၏။

ရုတ်တရက် နင်ချီ ၏ ဝိညာဉ်အာရုံများမှာ စူးရှစွာ တောက်ပလာတော့သည်။

တောင်များနှင့် မြစ်များ ပြောင်းပြန် လှန်သွားပြီး၊ ကောင်းကင်နှင့် မြေကြီး ပြောင်းပြန် ဖြစ်သွားကာ၊ သူ၏ ဝိညာဉ်အာရုံကို ခြေဖဝါးဖြင့် နင်းခြေထားသော လေနတ်ဘုရား မှာ ချက်ချင်းပင် အောက်သို့ ဆွဲချခံလိုက်ရပြီး နင်ချီ ၏ ခြေဖဝါးအောက်တွင် အစားထိုး နင်းခြေခံလိုက်ရတော့သည်။

နင်ချီ က ခပ်အေးအေးပင် ဆိုလိုက်၏။

“ထူးထူးခြားခြားတော့ မဟုတ်ပါဘူးလေ”

ပန်းချီကား တစ်ချပ်ကို ကြည့်ခြင်းအားဖြင့် ထိုလူအကြောင်းကို သိရှိနိုင်၏။ ပန်းချီကား ထဲတွင် ဖော်ကျူးထားသော စိတ်ဝိညာဉ်မှာ သူတော်စင် ဘိုးဘေးကြီး ၏ အတွေးအမြင်များကို ကိုယ်စားပြုနေခြင်းပင်။

အကယ်၍ အခြား တစ်စုံတစ်ယောက်သာ ဤပန်းချီကား နှင့် ကြုံတွေ့ရမည် ဆိုပါက... သူတော်စင် ဘိုးဘေးကြီး ၏ အရှိန်အဝါနှင့် ပြိုင်ဘက်ကင်းသော ဆွဲဆောင်မှုအောက်တွင် သေချာပေါက် စွဲမက်သွားမည်သာ ဖြစ်သည်။

အကြောင်းမူကား တောင်နှင့် ပင်လယ် ကမ္ဘာ တွင် ဖြစ်စေ၊ ကျယ်ပြန့်သော ကမ္ဘာ တွင် ဖြစ်စေ... ဝိညာဉ်ကမ္ဘာ နှစ်ခုလုံးတွင် ကျင့်ကြံသူ များသာ ရှိပြီး အင်မော်တယ် များ မရှိသောကြောင့်ပင်။

တစ်စုံတစ်ယောက်သည် ကောင်းကင်ဘုံ ကိုးလွှာ ကို အောင်နိုင်ရန်နှင့် မရေမတွက်နိုင်သော အရိုးစုများ၏ နောက်ကွယ်တွင် အစစ်အမှန် အင်မော်တယ် အဖြစ်သို့ ရောက်ရှိရန် ရည်မှန်းချက် ထားရှိ၏။ ဤကဲ့သို့သော ကြီးမားလှသည့် ရည်မှန်းချက်မျိုးက ကျင့်ကြံသူ များကို သဘာဝကျကျပင် စွဲမက်သွားစေနိုင်သည်။

သို့သော် နင်ချီ ကမူ ကွဲပြားခြားနား၏။ သူသည် မိမိကိုယ်ကို မည်သည့်အခါမျှ အကန့်အသတ်များ မသတ်မှတ်ထားခဲ့သလို၊ ကျော်ဖြတ်၍ မရနိုင်သော အတားအဆီးများ ရှိနေလိမ့်မည်ဟုလည်း တစ်ခါမှ မတွေးထင်ထားခဲ့ချေ။

သာမန် ကျင့်ကြံသူ များ အနေဖြင့်... အင်မော်တယ် အဖြစ်သို့ တက်လှမ်းရန် မဆိုထားနှင့်... တောင်ဘိုးဘေးကြီး ကို ကျော်လွန်သော အရာတစ်ခုကို ဖန်တီးရန်ပင်... ပင်လယ်ဘိုးဘေးကြီး နှင့် သူတော်စင် ဘိုးဘေးကြီး တို့၏ နယ်နိမိတ်များကိုပင် ကျော်လွန်ရန် မဝံ့ရဲကြချေ။

နင်ချီ ကမူ ဤစာရင်းထဲတွင် လုံးဝ အကျုံးမဝင်သည်မှာ ထင်ရှားလှသည်။

သူသည် အောက်ခြေ ကမ္ဘာငယ်လေး တစ်ခုတွင် မွေးဖွားလာခဲ့သော်ငြားလည်း၊ သူ၏ နှလုံးသားမှာ လွတ်လပ်ပြီး အဆုံးအစမဲ့ ကျယ်ပြောလှ၏။

လောကကြီး ဆိုသည်မှာ သင်၏ နှလုံးသား ကျယ်ပြန့်သလောက် ကြီးမားသည်ပဲလေ။

သူတော်စင် ဘိုးဘေးကြီး ၏ အိပ်မက်မှာ အစစ်အမှန် အင်မော်တယ် အဖြစ်သို့ ရောက်ရှိရန် ဖြစ်သော်လည်း၊ နင်ချီ ၏ အိပ်မက်မှာမူ ထိုထက် များစွာ ပိုမို ကြီးမား ကျယ်ပြန့်လှ၏။

နင်ချီ သည် လောလောဆယ်တွင် အစစ်အမှန်သိုင်းကမ္ဘာ ၏ ရှင်သန်ရေး ပြဿနာများကို ဖြေရှင်းရန် နစ်မွန်းနေရသော်ငြားလည်း၊ သူ၏ သေးငယ်သော ရည်မှန်းချက်လေးမှာ အစစ်အမှန်သိုင်းကမ္ဘာ တစ်ခုလုံးကို ဦးဆောင်ကာ တောင်နှင့် ပင်လယ် ကမ္ဘာ သာမက ကျယ်ပြန့်သော ကမ္ဘာ ကိုပါ ဝါးမြို သိမ်းပိုက်ပစ်ရန် ဖြစ်၏။

ဤပြဿနာများ အားလုံး ပြေလည်သွားသည်နှင့် တစ်ပြိုင်နက် နင်ချီ တွင် အဓိက ရည်မှန်းချက် တစ်ခု ရှိလာမည် ဖြစ်သည်။ ၎င်းမှာ အစစ်အမှန်သိုင်းကမ္ဘာ ကို ရှေ့သို့ ဆက်လက် ဦးဆောင်သွားရန်ပင်။

အစစ်အမှန်သိုင်းကမ္ဘာ ဆိုတာ သူပဲ... သူဆိုတာလည်း အစစ်အမှန်သိုင်းကမ္ဘာ ပါပင်။

ထို့ကြောင့် နင်ချီ ၏ အိပ်မက်မှာ အသေခံ၍ မရသော အစစ်အမှန် အင်မော်တယ် အဖြစ်သို့ ရောက်ရှိရန် သက်သက်သာ မဟုတ်ဘဲ၊ အနည်းဆုံးတော့ အစစ်အမှန်သိုင်းကမ္ဘာ ကို အင်မော်တယ် ကမ္ဘာ တစ်ခုအဖြစ် ပြောင်းလဲပစ်ရန် ဖြစ်၏။

ထိုနှစ်ခုကို နှိုင်းယှဉ်ကြည့်မည် ဆိုပါက အလွန်တရာ ကြီးမားသော ကွာဟချက်ကို တွေ့မြင်နိုင်၏။

ဒီတော့ ဒီပန်းချီကားလေး တစ်ချပ်နှင့် နင်ချီ ကို ဖိနှိပ်ပြီး အညံ့ခံခိုင်းလို့ ဘယ်လိုလုပ် ရနိုင်ပါမည်လဲ။

...

ခွမ်းရှန်းချင်း ၏ လက်သင်္ကေတများ ပြောင်းလဲသွားပြီး၊ အချိန်တစ်ခုတွင်တော့ သူသည် ထို ပန်းချီကားကို လက်နှစ်ဖက်ဖြင့် ကိုင်ဆောင်ထားပြီ ဖြစ်သည်။

၎င်းမှာ သူတော်စင် ဘိုးဘေးကြီး က သူ့ကို ချီးမြှင့်ထားသော လေနတ်ဘုရား ပန်းချီကား ဖြစ်ပြီး သူတော်စင် ဘိုးဘေးကြီး ၏ စွမ်းအားများ ပါဝင်နေသော်ငြားလည်း၊ ခွမ်းရှန်းချင်း အနေဖြင့် ပန်းချီကား ၏ သတ်ဖြတ်ခြင်း အကွက်ကို အသက်သွင်းနိုင်ရန်အတွက် သူ၏ ကိုယ်ပိုင် စွမ်းအားများကို ပို့လွှတ်ပေးရန် လိုအပ်နေသေး၏။

သူက ပန်းချီကား ကို နင်ချီ ဆီသို့ ချိန်ရွယ်လိုက်ရာ၊ နင်ချီ ၏ စိတ်အစဉ်မှာ ပန်းချီကား ၏ ဆွဲဆောင်မှုကို အပြည့်အဝ ခံလိုက်ရပြီး သူ၏ ဝိညာဉ် ပျောက်ဆုံးသွားသကဲ့သို့ ဖြစ်နေသည်ကို မြင်တွေ့လိုက်ရသည်။

ခွမ်းရှန်းချင်း ၏ မျက်လုံးများ တလက်လက် တောက်ပသွားပြီး သူ၏ ကိုယ်တွင်းရှိ စည်းမျဉ်း စွမ်းအားများက ပန်းချီကား ထဲသို့ အဆက်မပြတ် စီးဝင်သွား၏။

ဤ လေနတ်ဘုရား ပန်းချီကား တွင် တိုက်ခိုက်မှု နှစ်မျိုး ရှိသည်။ ပထမ တစ်မျိုးမှာ... ပန်းချီကား ကို မြင်တွေ့ရသူ၏ စိတ်အစဉ်မှာ ချက်ချင်းပင် စုပ်ယူခံလိုက်ရမည် ဖြစ်သည်။ အကယ်၍ သတိမထားမိပါက... တစ်ဖက်လူ၏ မူလဝိညာဉ် ပင်လျှင် ထိုအထဲသို့ ဆွဲသွင်းခံရပြီး သူတို့၏ စိတ်ဝိညာဉ်ကို ပိတ်လှောင်ထားနိုင်စွမ်း ရှိ၏။

ဒုတိယ တစ်မျိုးမှာ... တစ်ဖက်လူ၏ စိတ်အစဉ် စုပ်ယူခံလိုက်ရချိန်တွင် လေနတ်ဘုရား ပန်းချီကား က ပြင်းထန်သော တိုက်ခိုက်မှု တစ်ခုကို ထုတ်လွှတ်ကာ ရန်သူကို သတ်ဖြတ်ပြီး သူတို့၏ ခန္ဓာကိုယ်ကို ဖျက်ဆီးပစ်မည် ဖြစ်သည်။

နင်ချီ ၏ လုပ်ဆောင်ချက်များကို အနည်းငယ် သိရှိပြီးနောက်တွင် မာနထောင်လွှားလှသော ခွမ်းရှန်းချင်း ပင်လျှင်... နင်ချီ သည် သူ၏ ဘဝတစ်လျှောက်လုံးတွင် ကြုံတွေ့ခဲ့ဖူးသမျှ အထဲတွင် ကြောက်စရာ အကောင်းဆုံးသော ပါရမီရှင် တစ်ဦး ဖြစ်ကြောင်း ဝန်ခံရတော့သည်။

ထို့အပြင် နင်ချီ သည် ဆုံမှတ် များကို ရှာဖွေနိုင်သော သံလိုက် အိမ်မြှောင် ကိုလည်း ဖန်တီးနိုင်စွမ်း ရှိသေးရာ၊ နင်ချီ သည် ကျယ်ပြန့်သော ကမ္ဘာ အတွက် အလွန်တရာ အသုံးဝင်လိမ့်မည်ဟု ခွမ်းရှန်းချင်း က ကောက်ချက်ချထား၏။

ခွမ်းရှန်းချင်း ကိုယ်တိုင် နင်ချီ ကို အနိုင်မယူနိုင်သော်ငြားလည်း၊ ကံကောင်းထောက်မစွာဖြင့် သူတော်စင် ဘိုးဘေးကြီး က သူ့ကို ဤပန်းချီကား ချီးမြှင့်ထားခဲ့သည်။

ဤပန်းချီကားသည် ခွမ်းရှန်းချင်း ၏ လိုအပ်ချက်များကို ပြီးပြည့်စုံစွာ ဖြည့်ဆည်းပေးနိုင်ပြီး၊ နင်ချီ ကို လုံးဝ သေဆုံးသွားခြင်း မရှိစေဘဲ အနိုင်ယူနိုင်စွမ်း ရှိ၏။

လေနတ်ဘုရား ပန်းချီကား ၏ အထွတ်အထိပ် အကွက်ကို ထုတ်လွှတ်နိုင်ရန်အတွက် ခွမ်းရှန်းချင်း သည် သူ၏ စွမ်းအား သုံးပုံနှစ်ပုံခန့်ကို ပန်းချီကား ထဲသို့ ပို့လွှတ်လိုက်သည်။

နောက်ဆုံးတွင်တော့ လေနတ်ဘုရား ပန်းချီကား မှာ အနည်းငယ် တုန်ခါသွားသကဲ့သို့ ခံစားလိုက်ရ၏။ ၎င်းမှာ တိုက်ခိုက်မှုကို စတင်ရန်အတွက် စွမ်းအင် အလုံအလောက် ရရှိသွားပြီ ဖြစ်ကြောင်း အဓိပ္ပာယ် သက်ရောက်၏။

ခွမ်းရှန်းချင်း သည် နင်ချီ ကို စူးစိုက်ကြည့်နေရင်း လေနတ်ဘုရား ပန်းချီကား ကို လက်နှစ်ဖက်ဖြင့် တင်းကျပ်စွာ ဆုပ်ကိုင်ထားလိုက်သည်။ ပေါင်းစည်းခြင်း နယ်ပယ် အဆင့်ရှိသော သူ၏ ပြည့်ဖြိုးသော မျက်နှာပေါ်မှနေ၍ ချွေးစေးများ စိမ့်ထွက်လာတော့သည်။

လေနတ်ဘုရား ပန်းချီကား ကို အသက်သွင်းရန်အတွက် သူ မည်မျှအထိ အားစိုက်ထုတ်ခဲ့ရသနည်း ဆိုသည်ကို ရှင်းလင်းစွာ မြင်တွေ့နိုင်၏။

“လေနတ်ဘုရား ခုတ်ပိုင်းခြင်း”

ခွမ်းရှန်းချင်း က တိုးတိုးလေး ဟိန်းဟောက်လိုက်သည်။

ရုတ်တရက် လေနတ်ဘုရား ၏ ပုံရိပ်ယောင်မှာ လေနတ်ဘုရား ပန်းချီကား မျက်နှာပြင် တစ်ခုလုံးပေါ်တွင် လှုပ်ရှားသွားသကဲ့သို့ ခံစားလိုက်ရ၏။

လေနတ်ဘုရား ထံမှ အပြာရောင် ချီစွမ်းအင်များ ထွက်ပေါ်လာပြီး သူ၏ ခန္ဓာကိုယ် ပတ်လည်တွင် နဂါး တစ်ကောင်အလား ဝေ့ဝဲ တက်လာတော့သည်။

ရုတ်တရက် နဂါး ပုံသဏ္ဌာန် အပြာရောင် ချီစွမ်းအင်များက ပန်းချီကား ပေါ်ရှိ စုတ်ချက်များအတိုင်း အထက်သို့ တက်လာပြီး၊ လည်ပင်းနှင့် မျက်နှာကို ဖြတ်သန်းကာ နောက်ဆုံးတွင် လေနတ်ဘုရား ၏ မျက်လုံးထဲသို့ ဝင်ရောက်သွား၏။

ထို မျက်လုံးများမှာ မျက်စိတစ်မှိတ် အတွင်း ပြောင်းလဲသွားပြီး၊ ပန်းချီကား ပေါ်တွင် အင်မော်တယ် အရှင်သခင် တစ်ပါး၏ မျက်လုံး တစ်စုံ ပေါ်လာသည့်အလား ဖြစ်သွားတော့သည်။

ယခင်က ကောင်းကင်ကို မော့ကြည့်နေခဲ့သော်လည်း၊ ယခုအခါ ထိုမျက်လုံးများက အောက်သို့ စိုက်ကြည့်လာပြီး နင်ချီ အပေါ်သို့ ကျရောက်သွား၏။

နင်ချီ ၏ ပုံရိပ်မှာ သူ၏ မျက်လုံးများထဲတွင် ထင်ဟပ်နေပြီး အလွန်တရာ ကျောချမ်းဖွယ် ကောင်းလှလေသည်။

“ရွှီး…”

ပန်းချီကား စုတ်ပြဲသွားသည့်အလား တိုးညင်းသော အသံတစ်ခု ထွက်ပေါ်လာပြီးနောက်၊ ပန်းချီကား ၏ မျက်လုံးများထဲမှနေ၍ စိမ်းပြာရောင် နဂါး နှစ်ကောင် တဟုန်ထိုး ပျံထွက်လာတော့သည်။

wunzinnosp

အခန်း (၇၈၆) - သူတော်စင် ဘိုးဘေးကြီး ၏ တိုက်ခိုက်မှု

~၎င်းတို့သည် အခြားသော ဟင်းလင်းပြင် တစ်ခုမှ လာသူများအလား၊ ခန္ဓာကိုယ် တစ်ဝက်မှာ ပန်းချီကားလိပ် ထဲမှ ထွက်ပေါ်နေပြီး နောက်တစ်ဝက်မှာ အတွင်းဘက်တွင် ရှိနေဆဲ။ ဟင်းလင်းပြင် ကို ဖြတ်သန်းပြီး ဤလောကသို့ ဆင်းသက်လာတော့မည့်အလား ထင်မှတ်ရ၏။

ထွက်ပေါ်လာသော စိမ်းပြာရောင် နဂါး ခန္ဓာကိုယ်မှာ အလွန်တရာ သေသပ် လှပစွာ ဖန်တီးထားပြီး၊ သေးငယ်သော နဂါး အကြေးခွံများဖြင့် ဖုံးလွှမ်းထားသည်။ ၎င်းတို့သည် တိမ်လွှာများကို စီးနင်းကာ ပျံသန်းလာပြီး ၎င်းတို့၏ လက်သည်း လေးဖက်မှာလည်း ရံဖန်ရံခါ ပေါ်ထွက်လာ၏။

“ဝုန်း...”

နဂါး ဟိန်းဟောက်သံကြီး နှစ်ခုက ကောင်းကင်နှင့် မြေကြီး တစ်ခွင်လုံး ပဲ့တင်ထပ်သွားပြီး၊ စိမ်းပြာရောင် နဂါး နှစ်ကောင်မှာ ပန်းချီကား ထဲမှ အပြည့်အဝ ထွက်ပေါ်လာတော့သည်။ နဂါး အမြီးများကို ပြင်းထန်စွာ ခတ်လိုက်ရာ၊ စိမ်းပြာရောင် လျှပ်စီးတန်းများအလား ဟင်းလင်းပြင် ကို ဖြတ်သန်းသွားပြီး မျက်စိတစ်မှိတ် အတွင်း နင်ချီ ဆီသို့ တဟုန်ထိုး ခုတ်ပိုင်းလာတော့သည်။

ပန်းချီကား နှင့် ဝေးကွာသွားသည်နှင့်အမျှ နဂါးတို့၏ ခန္ဓာကိုယ်များမှာ တဖြည်းဖြည်း ကြီးမားလာ၏။ အစပိုင်းတွင် လှံ တစ်ချောင်းစာမျှသာ ရှည်လျားသော်လည်း၊ နင်ချီ ၏ အနီးသို့ ရောက်ရှိလာချိန်တွင်မူ ပေအနည်းငယ်ခန့်အထိ ကြီးမားလာကြတော့သည်။

မျက်တောင် တစ်ခတ်စာ အချိန်အတွင်းမှာပင် မဂ်လာ တိမ်တိုက်များက ဟင်းလင်းပြင် တစ်ခုလုံး ပြည့်နှက်သွား၏။ လေပြင်းများ တိုက်ခတ်လာကာ၊ မိုးခြိမ်းသံ၊ လျှပ်စီးလက်သံ များနှင့်အတူ အားလုံး စုပေါင်းလာကြတော့၏။

ဤ စိမ်းပြာရောင် နဂါး နှစ်ကောင် ထွက်ပေါ်လာမှုကြောင့် ဖြစ်ပေါ်လာခြင်းပင် ဖြစ်သည်။

ဤအရာများမှာ ပုံရိပ်ယောင်များ မဟုတ်သလို သာမန် ကောင်းကင် ဖြစ်စဉ်များလည်း မဟုတ်ချေ။ ၎င်းတို့မှာ စိမ်းပြာရောင် နဂါး နှစ်ကောင်က ပတ်ဝန်းကျင်ရှိ စည်းမျဉ်း စွမ်းအားများကို ဆွဲယူကာ ဖွဲ့စည်းထားသော ပူးပေါင်း တိုက်ခိုက်မှု တစ်ခု ဖြစ်၏။

လေ၊ မိုးကြိုး၊ မိုး နှင့် လျှပ်စီးတန်း များက သူတို့၏ ဘေးတွင် ပေါ်ထွက်လာပြီး သူတို့ထံသို့ စုပြုံ ဝင်ရောက်လာကာ သူတို့၏ တိုက်ခိုက်မှုများထဲသို့ တစ်ပြိုင်နက်တည်း ပေါင်းစပ်သွားကြသည်။

သူတော်စင် ဘိုးဘေးကြီး ချန်ရစ်ခဲ့သော လေနတ်ဘုရား ပန်းချီကား မှာ အမှန်တကယ်ပင် ကြောက်မက်ဖွယ် ကောင်းလောက်အောင် အစွမ်းထက်လှ၏။ ၎င်း၏ တိုက်ခိုက်မှုများမှာ ခွမ်းရှန်းချင်း ၏ ယခင် တိုက်ခိုက်မှုများ ကဲ့သို့ မရိုးရှင်းဘဲ၊ ပူးပေါင်း တိုက်ခိုက်မှု တစ်ခုကို ဖန်တီးရန်အတွက် ပတ်ဝန်းကျင်ရှိ ဖြစ်စဉ်များကိုပါ ဆွဲဆောင် အသက်သွင်းနိုင်စွမ်း ရှိသည်။

ထိုအချိန်တွင် နင်ချီ မှာ ရုတ်တရက် သတိဝင်လာပြီး၊ မျက်တောင်တစ်ခတ် အတွင်း ပတ်ဝန်းကျင်ရှိ ဖြစ်ပျက်နေသမျှ အရာအားလုံးကို သတိပြုမိသွားတော့၏။

မျက်စိတစ်မှိတ် အတွင်း စည်းမျဉ်း လေးခု ပါဝင်နေသော စိမ်းပြာရောင် နဂါး နှစ်ကောင်၏ ခုတ်ပိုင်း တိုက်ခိုက်လာမှုကို ရင်ဆိုင်ရချိန်တွင်၊ နင်ချီ သည် သူ၏ ထွက်ပြေး လွတ်မြောက်ရေး နည်းစနစ် များကို အသုံးပြုရန် မရွေးချယ်ခဲ့ချေ။ ထိုအစား သူ၏ ရင်တွင်း၌ ရဲစွမ်းသတ္တိများ တဟုန်ထိုး မြင့်တက်လာပြီး ကောင်းကင်နှင့် မြေကြီးကိုပင် ယှဉ်ပြိုင်ချင်စိတ်များ ပေါက်ဖွားလာတော့သည်။

နင်ချီက နေမင်း ခန္ဓာ သွန်းလုပ်ခြင်း အတတ်အား အသက်သွင်းလိုက်ရာ၊ ယင် နှင့် ယန် စွမ်းအင်များက သူ၏ တစ်ကိုယ်လုံးတွင် လှည့်ပတ်သွားပြီး သူ့ကို အတွင်းမှ ကာကွယ်ပေးမည့် တိုက်ကျိ အခင်းအကျင်း တစ်ခု အဖြစ် ဖွဲ့စည်းသွားတော့၏။

စိမ်းပြာရောင် နဂါး နှစ်ကောင်၏ ရှေ့လက်သည်းများက နင်ချီ ကို ဝင်ရောက် ရိုက်ခတ်သွားပြီ ဖြစ်သည်။

“ဝုန်း...”

နဂါး ဟိန်းဟောက်သံကြီးများ ထပ်မံ ထွက်ပေါ်လာပြီး နင်ချီ မှာ စိမ်းပြာရောင် နဂါး နှစ်ကောင်၏ ရိုက်ခတ်မှုကြောင့် နောက်သို့ အဆက်မပြတ် ဆုတ်ခွာသွားရ၏။

ခပ်လှမ်းလှမ်းမှ ကြည့်မည် ဆိုပါက... နဂါး နှစ်ကောင်က ပုလဲလုံးလေး တစ်လုံးကို လုယက် ဆော့ကစားနေသည့်အလား ဖြစ်နေလေသည်။ နင်ချီ မှာ ကစားစရာ အရုပ်လေး တစ်ရုပ်အလား စိမ်းပြာရောင် နဂါး နှစ်ကောင်၏ လက်သည်းများ ကြားတွင် လှောင်ပြောင် ဆော့ကစားခံနေရ၏။

ဤမြင်ကွင်းကို မြင်လိုက်ရသောအခါ ခွမ်းရှန်းချင်း မှာ ဆွံ့အ မှင်သက်သွားတော့သည်။

သူက နင်ချီ ကို နဂါး နှစ်ကောင်က ခုတ်ပိုင်းပြီး နောက်သို့ ဆုတ်ခွာသွားအောင် ဖိအားပေးနေသည်ကို မြင်တွေ့လိုက်ရသော်ငြားလည်း၊ ခွမ်းရှန်းချင်း မှာ ဟင်းလင်းပြင် ထဲတွင် မတ်မတ်ကြီး ရပ်နေဆဲပင် ဖြစ်၏။

“သူက သူတော်စင် ဘိုးဘေးကြီး ရဲ့ စိတ်ပိုင်းဆိုင်ရာ ဖိနှိပ် ချုပ်ချယ်မှု တွေကနေ ဘယ်လိုလုပ်ပြီး ရုန်းထွက်နိုင်ခဲ့တာလဲ”

ခွမ်းရှန်းချင်း က မယုံနိုင်သလို ခပ်တိုးတိုး ရေရွတ်လိုက်သည်။

သူ၏ မျက်နှာပေါ်ရှိ အမူအရာမှာ... နင်ချီ ကို နဂါး နှစ်ကောင်က ခုတ်ပိုင်းလိုက်သည်ကို မြင်တွေ့ရချိန်ကထက်ပင် ပို၍ အံ့အားသင့်နေလေ၏။

ခွမ်းရှန်းချင်း၏ အမြင်တွင် လေနတ်ဘုရား ပန်းချီကား ကို သူတော်စင် ဘိုးဘေးကြီး ကိုယ်တိုင် ရေးဆွဲထားခြင်း ဖြစ်လေရာ.. သူတော်စင် ဘိုးဘေးကြီး ၏ တိုက်ခိုက်မှု စွမ်းအားများ ပါဝင်နေသဖြင့် နင်ချီ အနေဖြင့် လေနတ်ဘုရား ပန်းချီကား ထံမှ လုံးဝ ရုန်းထွက်နိုင်မည် မဟုတ်ဟု ယူဆထားခဲ့ခြင်း ဖြစ်သည်။

သူတော်စင် ဘိုးဘေးကြီး သည် ကျယ်ပြန့်သော ကမ္ဘာ တစ်ခုလုံးတွင် အစွမ်းအထက်ဆုံး ပုဂ္ဂိုလ် ဖြစ်ကြောင်း သိထားသင့်သည်။ ကျင့်ကြံသူ တွေတောင်မှ သူ့ကို မော့ကြည့်နေရ၏။... သူ့အတွက်ဆိုလျှင် သေရမှာကိုတောင် ဝန်လေးကြမှာ မဟုတ်ချေ။

ခွမ်းရှန်းချင်း ၏ နှလုံးသားထဲတွင် သူတော်စင် ဘိုးဘေးကြီး မှာ နတ်ဘုရား တစ်ပါးအလား တောက်ပ ကြီးကျယ်လှပြီး မည်သူကမျှ သူနှင့် ယှဉ်ပြိုင်နိုင်စွမ်း မရှိသလို၊ သူ၏ လက်ဝါး တစ်ချက်ကိုပင် ခုခံနိုင်စွမ်း မရှိကြချေ။

သို့ရာတွင်၊ ယခုတော့...

နင်ချီ သည် စိမ်းပြာရောင် နဂါး နှစ်ကောင်၏ တိုက်ခိုက်မှုကို ခံလိုက်ရသော်ငြားလည်း၊ လေ၊ မိုးကြိုး၊ မိုး နှင့် လျှပ်စီးတန်း များကလည်း သူ့အပေါ်သို့ ကျရောက်လာကြသည်။

သို့သော် သူ ယခုလေးတင် အသက်သွင်းလိုက်သော တိုက်ကျိ အခင်းအကျင်း မှာ မှော်နည်းစနစ် အားလုံးကို တွန်းလှန်နိုင်စွမ်း ရှိပုံ ရသည်။ လေနဂါး များ ဖြစ်စေ၊ လေ၊ တိမ်၊ မိုးကြိုး နှင့် လျှပ်စီးတန်း စည်းမျဉ်း လေးခု ဖြစ်စေ... မည်သည့်အရာကမျှ သူ၏ ကာကွယ်ရေးကို မထိုးဖောက်နိုင်ခဲ့ကြချေ။

နင်ချီ ရရှိသွားသော တစ်ခုတည်းသော ဒဏ်ရာမှာ... သူ သတိပြန်ဝင်လာသည်နှင့် တစ်ပြိုင်နက် စိမ်းပြာရောင် နဂါး ၏ တိုက်ခိုက်မှုကြောင့် အငိုက်မိသွားခြင်းသာ။

ပထမဆုံး ရိုက်ခတ်မှု လှိုင်းကို သူ မခုခံနိုင်ခဲ့သဖြင့် သူ၏ ပုံရိပ်မှာ တစ်ဆယ် လီ ခန့် အကွာအဝေးသို့ မျက်စိတစ်မှိတ် အတွင်း လွင့်စဉ်သွားခဲ့ရ၏။

တစ်ဆယ် လီ အကွာအဝေးရှိ ဟင်းလင်းပြင် သို့ ရောက်ရှိသွားချိန်တွင် နင်ချီ နောက်ဆုံး၌ ရပ်တန့်သွားနိုင်ခဲ့၏။

စိမ်းပြာရောင် နဂါး နှစ်ကောင်မှာ ဉာဏ်ရည်ဉာဏ်သွေး ရှိပုံ ရသည်။ နင်ချီ က ပြန်လည် တုံ့ပြန်လာသည်ကို မြင်သောအခါ သူတို့ နှစ်ကောင်စလုံး အနည်းငယ် အံ့အားသင့်သွားကြ၏။

“ဟား... ဒါက သူတော်စင် ဘိုးဘေးကြီး ရဲ့ တိုက်ခိုက်မှု စွမ်းအားပေါ့လေ”

နင်ချီ က ခေါင်းကို မော့ကာ စိမ်းပြာရောင် နဂါး နှစ်ကောင်နှင့် သူတို့နှင့်အတူ ပါလာသော လေ၊ တိမ်၊ မိုးကြိုး နှင့် လျှပ်စီးတန်း များကို လှမ်းကြည့်လိုက်သည်။

ယခုအခါ စိမ်းပြာရောင် နဂါး နှစ်ကောင်သည် တစ်ဆယ် လီ ခန့် အကွာအဝေးသို့ ရောက်ရှိနေပြီ ဖြစ်ပြီး၊ နင်ချီ ၏ တစ်ဖက်တစ်ချက်စီတွင် ကောင်းကင် တိုင်လုံးကြီး နှစ်ခုအလား မားမားမတ်မတ် ရပ်တည်နေကြ၏။

လေ၊ တိမ်၊ မိုးကြိုး နှင့် လျှပ်စီးတန်း များက စိမ်းပြာရောင် နဂါး ၏ ပတ်လည် ဆယ်တောင်ခန့် ဧရိယာကို လွှမ်းခြုံထားရာ၊ ထိုဒေသ တစ်ခုလုံးမှာ စိမ်းပြာရောင် နဂါး ၏ ထိန်းချုပ်မှုအောက်တွင် ရှိသော နယ်မြေ တစ်ခုအလား ဖြစ်နေတော့သည်။

ထို ပတ်ဝန်းကျင် အနေအထားတွင် နင်ချီ မှာ အလွန်တရာ သေးငယ်လွန်းလှသည်ဟု ခံစားရ၏။

သို့သော် သူ၏ သေးငယ်လှသော ခန္ဓာကိုယ်လေးက စွမ်းအား အားလုံးကို တားဆီးထားနိုင်ခဲ့ပြီး စိမ်းပြာရောင် နဂါး နှစ်ကောင်က သူ့ကို ဆက်လက်၍ မခုတ်ပိုင်းနိုင်အောင် တားဆီးထားနိုင်ခဲ့သည်။

ခွမ်းရှန်းချင်း မှာ လေနတ်ဘုရား ပန်းချီကား ကို လက်နှစ်ဖက်ဖြင့် ကိုင်ဆောင်ထားဆဲ ဖြစ်၏။ ဤအခိုက်အတန့်တွင် သူသည် နင်ချီ ထက်ပင် ဝိညာဉ် လွင့်ထွက်သွားသူ တစ်ဦးနှင့် ပိုတူနေသည်။

“မဖြစ်နိုင်ဘူး... သူတော်စင် ဘိုးဘေးကြီး ရဲ့ လက်တစ်ချက်ကို ဘယ်သူမှ မခုခံနိုင်ဘူး... သူတော်စင် ဘိုးဘေးကြီး က အစွမ်းအထက်ဆုံးပဲ”

သူက ထိုသို့ တတွတ်တွတ် ရေရွတ်နေတော့၏။

နောက်ဘက် ခပ်လှမ်းလှမ်းတွင်တော့ နက်ရှိုင်းသော သစ္စာတရား နယ်မြေ၊ ဖူယောင် နယ်မြေ နှင့် လန်ယာ နယ်မြေ သုံးခုစလုံးမှ စစ်တပ်ကြီးများမှာ သက်ပြင်းချကာ စိတ်အေးသွားကြတော့သည်။

ယခုလေးတင် သူတို့ အလွန်တရာ ကြောက်ရွံ့ ထိတ်လန့်ခဲ့ရသည်မှာ အမှန်ပင် ဖြစ်၏။

စစ်မြေပြင်နယ်မြေ ထဲတွင် နယ်မြေအရှင်သခင် တစ်ပါး ပေါ်လာခြင်းကပင် အလွန် ဆိုးရွားနေပြီ ဖြစ်ရာ၊ ခွမ်းရှန်းချင်း ၏ ပန်းချီကား ထဲသို့ ဆွဲသွင်းခံလိုက်ရခြင်းက ပို၍ပင် ဆိုးရွားလှလေသည်။

ထို စိမ်းပြာရောင် နဂါး နှစ်ကောင်တည်းကပင် ခွမ်းရှန်းချင်း ထက် ပိုမို အစွမ်းထက်နေသည် မဟုတ်ပါလော။

ထိုအရာ၏ ဇာစ်မြစ်ကို သူတို့ မသိကြသော်ငြားလည်း၊ တာအို အရ ၎င်းသည် ကျယ်ပြန့်သော ကမ္ဘာ မှ နတ်ဘုရား ရတနာ တစ်ခု သေချာပေါက် ဖြစ်ရမည် ဆိုသည်ကိုတော့ သိထားကြ၏။

ကံကောင်းထောက်မစွာဖြင့် ဤ နတ်ဘုရား ရတနာ က မည်မျှပင် ကြောက်စရာ ကောင်းနေပါစေ... အရှင်သခင် နင် က ၎င်းကို ကာကွယ် တားဆီးနိုင်ခဲ့ပြီ ဖြစ်၏။ နင်ချီ ၏ ခွန်အားများမှာ အမြဲတမ်း သူတို့၏ စိတ်ကူးယဉ် တွေးတောနိုင်စွမ်းကို ကျော်လွန်နေတတ်သည်။

နင်ချီ သည် စိမ်းပြာရောင် နဂါး နှစ်ကောင်ကို အသေအချာ လေ့လာ အကဲခတ်နေခဲ့၏။ သူတော်စင် ဘိုးဘေးကြီး က ပန်းချီကား ထဲတွင် ဖုံးကွယ်ထားသော တိုက်ခိုက်မှုကို ရင်ဆိုင်နိုင်ရန်အတွက်၊ သူသည် ယခုလေးတင် အလွန်တရာ ပြင်းထန်သော စွမ်းအားများကို အသုံးပြုခဲ့ရသည်။

နင်ချီ သည် သူ၏ လက်ရှိ အစွမ်းထက်ဆုံး ကျင့်စဉ် ဖြစ်သော တိုက်ယင် နေမင်း နတ်ဘုရား ကျင့်စဉ် ကို အသုံးပြုခဲ့ရုံသာမက၊ တစ်ချိန်တည်းမှာပင် အစစ်အမှန် ခန္ဓာကိုယ် နှင့် ချိတ်ဆက်ကာ သူ အပြည့်အဝ ထိန်းချုပ်ထားနိုင်သော မူလအစ နယ်မြေစွမ်းအား များကိုပါ လွှဲပြောင်း အသုံးပြုခဲ့ရခြင်း ဖြစ်၏။

ထို့ကြောင့်သာ စိမ်းပြာရောင် နဂါး နှစ်ကောင်က သူ့ကို တစ်ဆယ် လီ ခန့်သာ လွင့်စဉ်သွားအောင် လုပ်နိုင်ခဲ့ပြီး သူ့ကို အထိအခိုက် မရှိအောင် ကာကွယ်နိုင်ခဲ့ခြင်း ဖြစ်သည်။

အကယ်၍ နင်ချီ သာ လူဝင်စား ခန္ဓာကိုယ် ၏ စွမ်းအားကိုသာ အသုံးပြုခဲ့မည် ဆိုပါက... အထိအခိုက် မရှိအောင် ကာကွယ်နိုင်လိမ့်မည်ဟု သူ အာမ မခံနိုင်ချေ။ ဤတိုက်ခိုက်မှုကြောင့် သူ နှစ်ပိုင်း ပြတ်သွားနိုင်ခြေပင် ရှိ၏။

နင်ချီ ၏ အာရုံခံနိုင်စွမ်းမှာ အလွန်တရာ ထက်မြက်လှ၏။ သူတော်စင် ဘိုးဘေးကြီး ၏ ဖုံးကွယ်ထားသော ပန်းချီကား ထဲတွင် ပါဝင်နေသည့် စွမ်းအားများမှာ ခွမ်းရှန်းချင်း ၏ နယ်မြေအရှင်သခင် စွမ်းအားများထက် အဆပေါင်းများစွာ သာလွန်နေကြောင်း သူ ကောင်းကောင်း သိထားသည်။

ဤတိုက်ခိုက်မှုမှာ ကျယ်ပြန့်သော ကမ္ဘာ တစ်ခုလုံးကို အုပ်ချုပ်လိုသော သူတော်စင် ဘိုးဘေးကြီး ၏ ဆန္ဒ တစ်ဝက် နှင့် ကျယ်ပြန့်သော ကမ္ဘာ့ဆန္ဒတော် ၏ စွမ်းအား တစ်ဝက် တို့ ပေါင်းစပ်ကာ ဖြစ်ပေါ်လာခြင်း ဖြစ်သည်ဟု နင်ချီ ထူးဆန်းစွာ ခံစားနေရ၏။

ကျယ်ပြန့်သော ကမ္ဘာ နှင့် သူတော်စင် ဘိုးဘေးကြီး တို့ အကြားတွင် အမှန်တကယ် မည်သို့သော ဆက်ဆံရေးမျိုး ရှိနေသနည်း ဟု နင်ချီ စတင် သံသယ ဝင်လာတော့သည်။