အခန်း (၉၃-၉၄)

အခန်း (၉၃) - သင်တန်းစတင်ခြင်းနှင့် မီးဓာတ်သားရဲများ ဘယ်မှာလဲ

"ဖြူလိုက်တာ"

"ကြီးလိုက်တာ"

"ဝိုင်းစက်ပြီး ကြီးမားလိုက်တာ"

ဗဟိုရုပ်သံဌာန၏ အမှတ် ၁၈ စတူဒီယိုအတွင်း၌ ဖြစ်သည်။ စူးချီသည် စင်မြင့်အလယ်တွင် ရပ်လျက် ပတ်ဝန်းကျင်ကို ကြည့်ကာ မချီးမွမ်းဘဲ မနေနိုင် ဖြစ်နေသည်။ ဤနေရာသည် စတုရန်းမီတာ တစ်ထောင်ခန့် ကျယ်ဝန်းသော အလွန်ကြီးမားသည့် စက်ဝိုင်းပုံစံ တိုက်ရိုက်ထုတ်လွှင့်မှု ခန်းမကြီး ဖြစ်သည်။ နို့နှစ်ရောင် ကော်ဇောများနှင့် ဖြူဖွေးသော ကျောက်သားနံရံများကြောင့် ခန်းမတစ်ခုလုံးမှာ ခန့်ညားထည်ဝါပြီး လင်းထိန်နေသည်။

သူ၏ နောက်ကွယ်တွင် နာမည်ကြီး မီဒီယာသမားများနှင့် အင်တာနက် လူသိများသူများအတွက် ဧည့်သည်တော်နေရာများ ရှိပြီး သူ၏ ရှေ့တွင်မူ အလွန်ကြီးမားသော မျက်နှာပြင်ကြီးတစ်ခု ရှိနေသည်။ ဤနေရာသည် တစ်ချိန်က ရှေးဟောင်းပညာရှိများနှင့် စကားပြောဆိုခြင်း၊ နိုင်ငံတော်၏ အဖိုးတန် ရတနာများကို ပြသခြင်းနှင့် ပညာရှင်ပေါင်းစုံ ဆွေးနွေးခြင်းတို့ ပြုလုပ်ခဲ့သည့် နေရာမြတ်တစ်ခု ဖြစ်သည်။

ယခုတစ်ကြိမ် လောင်းကြေးပြိုင်ပွဲကို ပိုမိုကြီးကျယ်စေရန်အတွက် မိသားစုကြီးများက ဤနေရာတွင် တိုက်ရိုက်ထုတ်လွှင့်ရန် သဘောတူခဲ့ကြခြင်း ဖြစ်သည်။ သူတို့သည် စူးချီအား နောက်ဆုတ်၍မရသော အနေအထားသို့ ရောက်အောင် တွန်းပို့လိုကြသည်။

တိုက်ရိုက်ထုတ်လွှင့်မှု မစတင်မီ အချိန်အနည်းငယ် အလိုတွင် မီဒီယာသမားများက ရှန်ကျစ်ရှားကို ဝိုင်းအုံထားကြသဖြင့် သူမ လှုပ်ရှား၍ပင် မရတော့ပေ။

"ကျောင်းအုပ်ကြီးရှန် ... ဒီကျင့်စဉ်အပေါ် ဘယ်လောက်အထိ ယုံကြည်မှု ရှိပါသလဲရှင့်"

"ကျောင်းအုပ်ကြီးရှန် ... ဒီကျင့်စဉ်ရဲ့ အားသာချက်၊ အားနည်းချက်တွေကို ပြောပြပေးပါဦးရှင့်"

ကင်မရာများစွာ၏ ရှေ့တွင် ရှန်ကျစ်ရှားမှာ အစပိုင်း၌ ငြင်းပယ်ရန် ပြင်သော်လည်း တစ်စုံတစ်ခုကို တွေးမိကာ စိတ်ကို ပြောင်းလိုက်သည်။ အကယ်၍ သူမသာ စူးချီကို အမွှမ်းတင်ပြီး လူတွေ ပိုမျှော်လင့်လာအောင် လုပ်နိုင်ခဲ့လျှင် ကျောင်းသားတွေ သင်ယူပြီးမှ စိတ်ပျက်ပြီး ကျောင်းထွက်သွားကြမည့် အရှိန်က ပိုပြင်းထန်လာမည် မဟုတ်ပါလော။

ထိုသို့တွေးကာ ကျောင်းအုပ်ကြီးရှန်မှာ ကိုယ်ကို မတ်မတ်ထားလိုက်သည်။

"ဆရာစူးချီ ပြောပြချက်အရတော့ ဒါဟာ နတ်ဘုရားအဆင့်အထိ ရောက်နိုင်တဲ့ ကျင့်စဉ်ပါ၊ ဒါကို သင်ယူခြင်းအားဖြင့် ဧကရာဇ်အဆင့်ကို တက်လှမ်းနိုင်မယ့် အခွင့်အရေး ရှိပါတယ်" ဟု သူမက ဆိုသည်။

သူမက ထိုသို့ပြောရင်း ရင်ထဲမှနေ၍ ဒါတွေက ငါပြောတာ မဟုတ်ဘူးနော်၊ စူးချီ ကြွားထားတာတွေချည်းပဲ၊ ဧကရာဇ်အဆင့် မရောက်ရင် သူ့ကိုပဲ အပြစ်တင်ကြပေါ့ ဟု တိတ်တဆိတ် တွေးနေမိသည်။

"ဒါ့အပြင် ဒီကျင့်စဉ်မှာ ကြီးမားတဲ့ အားသာချက် သုံးခု ရှိပါတယ်၊ ပထမတစ်ခုကတော့ ဒါဟာ တကယ့်ကို ထူးခြားတဲ့ ကျင့်စဉ် ဖြစ်ပါတယ်"

‘တစ်မျိုးတည်းသာ ကျင့်ရပြီး တခြားကျင့်စဉ်တွေ ပြောင်းလို့မရတာထက် ဘာက ပိုပြီး ထူးခြားဦးမှာလဲ’ ဟု သူမ တွေးလိုက်သည်။

"ဒုတိယ အချက်ကတော့ အခြေခံသင်ယူဖို့ အရမ်းကို လွယ်ကူတာပဲ ဖြစ်ပါတယ်"

‘ဒါပေမဲ့ စွမ်းအားကတော့ အလွန်နည်းတာပေါ့’ ဟု သူမက စိတ်ထဲမှ ဖြည့်စွက်လိုက်သည်။

"နောက်ဆုံး အချက်ကတော့ မီးလျှံတွေကို အလွန်လျင်မြန်စွာ စုပ်ယူနိုင်တာပဲ ဖြစ်ပါတယ်"

‘ကံဆိုးတာကတော့ မီးလျှံစုပ်ယူလည်း သွေးနဲ့စွမ်းအင်က မတိုးတာပါပဲ၊ အင်အားတွေ ဖြုန်းတီးရုံသက်သက်ပါပဲ’ ဟု သူမက အကြံပိုင်စွာ တွေးနေတော့သည်။

ရှန်ကျစ်ရှားသည် မီးလျှံကျမ်းအပေါ် သူမ၏ နားလည်မှုများဖြင့် အရေးကြီးသည့် အချက်များကို ဖုံးကွယ်ကာ လှပစွာ ပြောဆိုသွားခဲ့သည်။ မီဒီယာများကလည်း ထိုစကားများကို ချက်ချင်းပင် သတင်းအဖြစ် ရေးသားဖြန့်ဝေကြတော့သည်။ "နယူးဗွိုင်းယေ့ဂျ်၏ ကျင့်စဉ်အသစ် လျှို့ဝှက်ချက်များ" ၊ "ကျောင်းအုပ်ကြီးရှန် ထုတ်ဖော်ပြောကြားလိုက်သည့် မီးလျှံကျမ်း၏ အားသာချက် လေးရပ်" စသည့် သတင်းများမှာ လူမှုကွန်ရက်စာမျက်နှာများပေါ်တွင် လျှံထွက်သွားတော့သည်။

ဤသို့ဖြင့် နယူးဗွိုင်းယေ့ဂျ် အွန်လိုင်းစနစ်တွင် အသင်းဝင်ဦးရေမှာ တစ်သန်းလေးသိန်း ကျော်သွားခဲ့ပြီး တိုက်ရိုက်ကြည့်ရှုသူဦးရေမှာလည်း ခုနစ်သိန်းကျော်အထိ ရှိလာခဲ့သည်။ လူအပေါင်း၏ စောင့်ကြည့်မှုအောက်တွင် သင်ခန်းစာမှာ တရားဝင် စတင်လိုက်ပြီ ဖြစ်သည်။

စင်မြင့်အလယ်တွင် စူးချီ စတင် စကားပြောလိုက်သည်။

"ကျောင်းသားတို့ရေ ... ငါက မင်းတို့ရဲ့ ဆရာစူးပါ"

ဗဟိုရုပ်သံဌာန၏ ထုတ်လွှင့်မှုတွင် မှတ်ချက်များ မပါဝင်သော်လည်း နယူးဗွိုင်းယေ့ဂျ် အွန်လိုင်းစနစ်တွင်မူ မှတ်ချက်များမှာ တရစပ် တက်လာနေသည်။

"ဆရာကြီး နောက်ကျတယ်နော်၊ အမှတ်မကောင်းပေးဘူး"

"ဆရာကြီးရေ ... ဒီနေ့ စတူဒီယိုက တကယ်ကို ကြီးပြီး ဖြူတာပဲ"

"ဒီနေရာက ရင်းနှီးနေသလိုပဲ၊ အရင်က ပညာရှိတွေနဲ့ စကားပြောတာ ဒီမှာ မြင်ဖူးသလိုပဲ"

"ဆရာကြီးလည်း အဆင့်တက်သွားပြီပဲ၊ ပစ္စည်းကိရိယာတွေကအစ အဆင့်မြင့်သွားပြီ"

စူးချီသည် ထိုမှတ်ချက်များကို လျစ်လျူရှုကာ ကျင့်စဉ်အကြောင်းကို စတင်ရှင်းပြသည်။

"စာမသင်ခင်မှာ ကျောင်းသားအားလုံးကို မေးခွန်းလေးခု အရင်မေးချင်ပါတယ်"

"နတ်ဘုရားအဆင့်အထိ ရောက်နိုင်တဲ့ ဧကရာဇ်ကျင့်စဉ်ကို သင်ယူချင်ကြသလား"

"ကျင့်ကြံမှုအရှိန်က အခြေခံကျင့်စဉ်ထက်တောင် နှေးကွာတာကို မင်းတို့ သည်းခံနိုင်ကြမလား"

"တစ်သက်လုံး ဒီကျင့်စဉ်တစ်ခုတည်းကိုပဲ ကျင့်ရမှာကိုကော လက်ခံနိုင်ကြမလား"

"သားရဲတွေကို တိုက်ခိုက်နှိမ်နင်းဖို့ သန္နိဋ္ဌာန် ရှိကြသလား"

"အကယ်၍ အားလုံးကို ဟုတ်ကဲ့ လို့ ဖြေနိုင်မယ်ဆိုရင်တော့ ငါ့ရဲ့ ရှင်းပြချက်အတိုင်း ဒီကျင့်စဉ်ကို လိုက်ပြီး သင်ယူကြပါ"

စူးချီ စကားအဆုံးတွင် တစ်ခန်းလုံး တိတ်ဆိတ်သွားရသည်။ ဧကရာဇ်အဆင့်သို့ ရောက်ရှိခြင်း ဆိုသည်မှာ မည်သို့သော အဓိပ္ပာယ်နည်း။ ၎င်းမှာ ကိုယ်ခံပညာရှင် အားလုံးအတွက် အိပ်မက်တစ်ခုမျှသာ ဖြစ်သည်။ ဧကရာဇ်အဆင့်သို့ ရောက်ရန် သွေးနှင့်စွမ်းအင် ရမှတ် ၁.၆ ဘီလီယံ လိုအပ်သည်။ လက်ရှိတွင် အမြန်ဆုံးဟု ဆိုရမည့် ထိုက်ကျိကျင့်စဉ်ဖြင့်ပင် နှစ်ပေါင်း လေးသောင်းကျော် ကျင့်ကြံရမည့် အခြေအနေ ဖြစ်သည်။

ယခု ဆရာစူးချီ ပြောနေသည်မှာ သူသည် သမိုင်းတစ်လျှောက် မည်သူမျှ မလုပ်နိုင်ခဲ့သော ဧကရာဇ်အဆင့် ကျင့်စဉ်ကို ဖန်တီးလိုက်ပြီ ဟူ၍ ဖြစ်သည်။ ၎င်းမှာ ဖြစ်နိုင်ပါမည်လော။ သူကိုယ်တိုင်ပင် ထိုအဆင့်သို့ မရောက်သေးဘဲ မည်သို့ သိနိုင်ပါမည်နည်း။ သစ္စာအရှိဆုံး ကျောင်းသားများပင်လျှင် သံသယများ ဝင်လာကြတော့သည်။

"ဒါက အစစ်လား၊ အတုလား"

"မဖြစ်နိုင်တာတွေ ပြောနေတာပဲ"

"ဧကရာဇ်အဆင့်အထိ ရောက်နိုင်ရင် ဆရာစူးချီက ဘာလို့ ဒီကျင့်စဉ်ကို ထုတ်ပေးမှာလဲ"

သို့သော်လည်း စူးချီ၏ ယခင်က စွမ်းဆောင်ရည်များကြောင့် သူ့ကို ယုံကြည်သူများလည်း ရှိနေဆဲပင် ဖြစ်သည်။ စူးချီသည် ထိုသံသယများနှင့် ထောက်ခံမှုများကို ဂရုမစိုက်ဘဲ ဆက်ပြောလိုက်သည်။

"ဒီနေ့ ငါသင်ပေးမယ့် ကျင့်စဉ်ကို မီးလျှံကျမ်း လို့ ခေါ်ပါတယ်၊ ဒါကို အမြင့်ဆုံးအဆင့်အထိ ကျင့်နိုင်မယ်ဆိုရင် မင်းတို့ဟာ ဧကရာဇ်အဆင့်ကို သေချာပေါက် ရောက်ရှိမှာ ဖြစ်ပြီး တစ်ကမ္ဘာလုံးမှာ မင်းတို့ကို ယှဉ်နိုင်သူ ရှိမှာ မဟုတ်ပါဘူး"

"ဒါပေမဲ့ ..."

စူးချီသည် မသင်ကြားမီ မီးလျှံကျမ်း၏ အားသာချက်နှင့် အားနည်းချက်များကို သေချာစွာ ရှင်းပြရမည် ဖြစ်သည်။

"ငါမေးခဲ့တဲ့ မေးခွန်းတွေထဲက တစ်ခုခုကို မင်းတို့ လက်မခံနိုင်ဘူးဆိုရင်တော့ ဒီကျင့်စဉ်ကို မသင်ဖို့ ငါ အကြံပြုချင်ပါတယ်၊ အကြောင်းကတော့ သူ့ရဲ့ ကနဦးစွမ်းအားက အလွန်နည်းပါးလို့ပါပဲ၊ ပြီးတော့ ဒါကို သင်ပြီးရင် တခြားကျင့်စဉ်တွေကို ပြောင်းသင်လို့ မရတော့ပါဘူး၊ ဧကရာဇ်အဆင့် ရောက်ချင်ရင်တော့ ဒီကျင့်စဉ်ကိုသုံးပြီး သားရဲတွေကို တိုက်ခိုက်ရမှာ ဖြစ်ပါတယ်"

စူးချီ ခေတ္တမျှ ရပ်လိုက်သောအခါ မှတ်ချက်များမှာ ငြိမ်သက်သွားပြန်သည်။ စူးချီသည် အတင်းအကျပ် သင်ခိုင်းခြင်း မပြုဘဲ အကျိုးအပြစ်ကို အရင်ရှင်းပြနေခြင်း ဖြစ်သည်။ ဤအချက်ကပင် ကျောင်းသားများအား ဤကျင့်စဉ်မှာ တကယ့်ကို ဧကရာဇ်အဆင့် ကျင့်စဉ် ဖြစ်နိုင်သည်ဟု ပိုမို ယုံကြည်လာစေသည်။ ထို့ကြောင့် မည်သည့်ကျောင်းသားမျှ သင်ယူရန် လက်မတွန့်ခဲ့ကြပေ။

"မင်းတို့ နောက်မဆုတ်ဘူးဆိုရင်တော့ ငါတို့ သင်ခန်းစာကို အခုပဲ စတင်ပါမယ်"

စူးချီသည် မီးလျှံကျမ်း၏ သွေးနှင့်စွမ်းအင် လည်ပတ်မှုပုံစံကို မျက်နှာပြင်ကြီးပေါ်တွင် ပြသလိုက်သည်။ ထို့နောက် မန္တန်များနှင့် လည်ပတ်ပုံ အဆင့်ဆင့်ကို ရှင်းပြတော့သည်။ ဤကျင့်စဉ်မှာ သင်ယူရန် မခက်ခဲလှပေ။ တစ်နာရီခန့်အတွင်း ကျောင်းသားအားလုံးနီးပါး၏ သွေးနှင့်စွမ်းအင်မှာ အဝါနုရောင်သို့ ပြောင်းလဲသွားခဲ့သည်။

သို့သော် ထိုအဆင့်သို့ ရောက်သောအခါ အားလုံးမှာ ဇဝေဇဝါ ဖြစ်ကုန်ကြသည်။

"စွမ်းအားက အရမ်းနည်းတာပဲ မဟုတ်လား"

"သွေးနဲ့စွမ်းအင် တိုးတဲ့နှုန်းကလည်း အခြေခံကျင့်စဉ်လောက်တောင် မရှိဘူး"

"ဒီကျင့်စဉ်ကို သင်ပြီးမှ စိုးရိမ်စိတ်တွေ ဝင်လာပြီ"

"တောက် ... ဆရာစူးချီသာ ငါ့ကို လိမ်တာဆိုရင်တော့ သူ့အိမ်ရှေ့မှာ သွားပြီး ဆန္ဒပြမယ်"

အားနည်းသော စွမ်းအား၊ နှေးကွေးသော ကျင့်ကြံမှုအရှိန်နှင့် တခြားကျင့်စဉ် ပြောင်းလဲ၍မရခြင်း စသည့် အချက်များကြောင့် အားလုံးမှာ ထိတ်လန့်နေကြစဉ် စူးချီက ဆက်ပြောလိုက်သည်။

"မင်းတို့အားလုံး အခြေခံတတ်သွားပြီလို့ ငါယုံကြည်ပါတယ်"

"အခုဆိုရင် ဒီကျင့်စဉ်က ဧကရာဇ်အဆင့် ကျင့်စဉ်အဖြစ် ဘယ်လို ပြောင်းလဲသွားမလဲဆိုတာ သိချင်ကြမှာပေါ့"

"၎င်းရဲ့ ပြောင်းလဲမှုအတွက် လိုအပ်ချက်ကတော့ သားရဲတွေရဲ့ မီးလျှံကို စုပ်ယူရမှာ ဖြစ်ပါတယ်"

"ပထမဆုံးအကြိမ်မှာ အဆင့်နှစ် သားရဲတစ်ကောင်ရဲ့ မီးလျှံကို စုပ်ယူရင် ကျင့်စဉ်က တစ်ဆင့် တက်လှမ်းသွားမှာ ဖြစ်ပါတယ်"

စူးချီသည် ထိုနေရာတွင် စကားကို ရပ်လိုက်သည်။ သူသည် ထန်ကျန့်ချိုးနှင့် ထားရှိခဲ့သော လောင်းကြေးကို မမေ့ပေ။ ထို့ကြောင့် တိုက်ရိုက်ထုတ်လွှင့်မှုမှတစ်ဆင့် စစ်တပ်မှ အကဲဖြတ်အဖွဲ့ဝင် တစ်သောင်းကို သတိပေးလိုက်သည်။

"သင်တန်းတက်နေတဲ့ စစ်တပ်က ညီအစ်ကိုတို့ ... အခု မင်းတို့ ပြင်ဆင်ထားတဲ့ မီးဓာတ်သားရဲတွေကို ထုတ်ပြီး စုပ်ယူကြည့်လို့ ရပါပြီ၊ အဲဒီအခါကျရင် ကျင့်စဉ်ရဲ့ တိုးတက်ပြောင်းလဲမှုကို မင်းတို့ကိုယ်တိုင် ခံစားရပါလိမ့်မယ်"

ထိုအချိန်တွင် ဗဟိုကာကွယ်ရေးဇုန်မှ တပ်မှူးချုပ်မှာ စူးချီ၏ စကားကြောင့် အံ့အားသင့်သွားရသည်။

"မီးဓာတ်သားရဲ ဟုတ်လား"

"မီးဓာတ်သားရဲတွေ တကယ်ပဲ လိုအပ်တာလား"

သင်တန်းမစမီက စူးချီသည် မီးဓာတ်သားရဲများ ပြင်ဆင်ထားရန် တောင်းဆိုခဲ့သော်လည်း အစိုးရအနေဖြင့် ချောက်နက်ကြီးကို အကာအကွယ် ကောင်းကောင်း ပေးထားသဖြင့် မီးဓာတ်သားရဲ အရှင်များကို ရှာဖွေရန် ခက်ခဲနေခဲ့သည်။ ထို့ကြောင့် သင်တန်းတက်နေသည့် စစ်သည်သစ်များတွင် မီးဓာတ်သားရဲများ အဆင်သင့် မရှိဘဲ ဖြစ်နေတော့သည်။