အခန်း (၁၂၁-၁၂၂)

မဟာတာအို ကံကြမ္မာသားတော်တွေကို အမဲလိုက်မယ့် ဗီလိန်နတ်ဘုရားသားတော်

ဘာသာပြန်သူ-ATY author team

Book 13 Chapter 121 to 130

အခန်း (၁၂၁) နတ်ဘုရားသားတော်ကို ဖိအားပေးတာလား... ဖရိုဖရဲဟင်းလင်းပြင် ပိုင်နက်နယ်မြေ

ခုံးဝူတောက်၏အသံ ထွက်ပေါ်လာသည်နှင့် ထိတ်လန့်တုန်လှုပ်မှုကြောင့် ခန္ဓာကိုယ်ပြင်ပသို့ လွင့်စင်သွားခဲ့သော လူအများ၏ စိတ်ဝိညာဉ်များသည် သူတို့၏ ရုပ်ခန္ဓာကိုယ်များအတွင်းသို့ တဖြည်းဖြည်း ပြန်လည်ရောက်ရှိလာကြ၏။

သို့ရာတွင် ထိုသို့ဖြစ်သည့်တိုင် သူတို့၏ လည်ချောင်းများသည် အချိန်ကြာမြင့်စွာ လှုပ်ရှားနေခဲ့ပြီး စကားတစ်ခွန်းမျှ မဟနိုင်ခဲ့ကြချေ။

သူတို့သည် တစ်ယောက်ကိုတစ်ယောက် ကြက်သေသေစွာ ကြည့်နေနိုင်ရုံသာရှိပြီး သူတို့၏မျက်လုံးများတွင် ရှင်းပြ၍မရနိုင်သော ထိတ်လန့်တုန်လှုပ်မှုများဖြင့် ပြည့်နှက်နေသည်။

ဤသည်က မည်သည့်အဓိပ္ပာယ်ကို ဆိုလိုသနည်း။

ခုံးဝူတောက်သည် နတ်ဘုရားသားတော် ယန်ရန်အား သူ ပါးဖြတ်ရိုက်ပြီး လွင့်ထွက်သွားစေခဲ့သည်ကို လုံးလုံးလျားလျား မသိလိုက်သလော....

တစ်ဖက်လူသည် ခြင် သို့မဟုတ် ယင်ကောင် မဟုတ်ပေ။

ဤမျှ ကြီးမားသော သက်ရှိလူသား တစ်ယောက်ကို သူ၏လက်ဗလာဖြင့် ပါးရိုက်ပြီး လွင့်ထွက်သွားစေခဲ့သည်ကို ခုံးဝူတောက်သည် မည်သို့ လုံးလုံးလျားလျား မသိဘဲ နေနိုင်မည်နည်း....

ထိုသို့မဟုတ်ပါက ခုံးဝူတောက်၏ရှေ့တွင် နတ်ဘုရားသားတော် ယန်ရန်သည် အလွန်အားနည်းနေသလော....

"နတ်ဘုရားသားတော်အရှင် ခုံးဝူတောက်..."

အချိန်အတော်ကြာပြီးနောက် မုချင်းလီသည် ပထမဆုံး သတိပြန်ဝင်လာပြီး သူမ၏လက်ကို ထိတ်လန့်တုန်လှုပ်စွာဖြင့် မြှောက်လိုက်၏။

သူမက တိုးညှင်းစွာ ပြောဆိုသည်။

"အဲ့ဒီငှက်ကတုံးကောင်က နတ်ဘုရားသားတော်အရှင်ရဲ့ ပါးရိုက်ခံလိုက်ရလို့ လွင့်သွားတာလေ..."

"အဲ့ဒီလိုလား..."

ဤစကားကို ကြားသောအခါ ခုံးဝူတောက်သည် ရုတ်တရက် သတိပြုမိသွား၏။

ဤသည်မှာ အခက်တွေ့စရာ ကိစ္စတစ်ရပ်ပင်။

သူ ပျက်စီးခြင်းခေတ်တွင် ရှိနေစဉ်ကတည်းက သူသည် လူများကို ပါးဖြတ်ရိုက်ရသည်အား အနှစ်သက်ဆုံးပင်။

အကြိမ်များစွာ ပါးဖြတ်ရိုက်ခြင်းသည် ကြွက်သား မှတ်ဉာဏ်တစ်ခုကို ဖြစ်ပေါ်စေခဲ့ပေ၏။

အစောပိုင်းက သူ၏ခွန်အားကို မထိန်းချုပ်နိုင်ခဲ့ရုံသာမက သူ အကြိုက်ဆုံးဖြစ်သည့် ကြီးမားသော ပါးဖြတ်ရိုက်ချက်တစ်ချက်ကို နတ်ဘုရားသားတော်ယန်ရန်ထံသို့ မတော်တဆ ပေးလိုက်မိခြင်းပင်။

ဤအချိန်အခိုက်အတန့်တွင် ဒေါသတကြီး ဟိန်းဟောက်သံတစ်သံသည် အဝေးရှိ ပြိုကျနေသော တောင်ကြီးထံမှ ရုတ်တရက် ထွက်ပေါ်လာခဲ့သည်။

"ခုံးဝူတောက်... မင်း သေသင့်တယ်..."

ဝုန်း...

မီးတောက်တိုင်လုံးကြီးများသည် ကောင်းကင်ယံသို့ ပျံ့လွင့်သွားပြီး နေရာအနှံ့အပြားသို့ ဖုန်မှုန့်များကို လွင့်စင်သွားစေခဲ့သည်။

နတ်ဘုရားသားတော် ယန်ရန်၏ ပုံရိပ်သည် မိုးကောင်းကင်ယံသို့ ပျံသန်းလာပေ၏။

ယန်ရန်၏စွမ်းအားများသည် သူ၏နံဘေးပတ်လည်တွင် ပို၍ပင်လောင်ကျွမ်းကာ လှည့်ပတ်နေပြီး သူ၏ပုံရိပ်ကို ပို၍ပင် ကြောက်မက်ဖွယ်ကောင်းလာစေသည်။

တစ်ခုရှိသည်မှာ ခုံးဝူတောက်၏ပါးရိုက်ချက်ကြောင့် ဝက်ခေါင်းကဲ့သို့ ရောင်ရမ်းနေသော သူ၏မျက်နှာကို မကြည့်မိလျှင် ဖြစ်ပေမည်။

ဤသည်က အစောပိုင်းရှိ သူ၏ကြီးကျယ်ခမ်းနားသော ဟန်ပန်နှင့် လုံးလုံးလျားလျား ကွာခြားနေသည်။

ဤအခိုက်အတန့်တွင် နတ်ဘုရားသားတော် ယန်ရန်၏ခေါင်းသည် ဝက်ခေါင်းကဲ့သို့ ရောင်ရမ်းနေပေ၏။

သူ၏ဆံပင်များ ဖရိုဖရဲဖြစ်နေပြီး သူ၏ မျက်နှာတွင် သွေးကွက်များဖြင့် ဖုံးလွှမ်းနေကာ အလွန်အမင်း ဖရိုဖရဲဖြစ်နေပုံရသည်။

ဤအရာသည် ကျင့်ကြံသူ အများအပြားကို မထိန်းချုပ်နိုင်ဘဲ ရယ်မောမိသွားစေပြီး လူတချို့ကမူ သူတို့၏ ရယ်ချင်စိတ်များကို အောင့်အည်းထားခဲ့ကြသည်။

ပတ်ဝန်းကျင်ရှိ ပုံမှန်မဟုတ်သော အသံများကို ကြားလိုက်ရချိန်၌ နတ်ဘုရားသားတော် ယန်ရန်သည် ပို၍ပင် ဒေါသထွက်လာပေ၏။

အစောပိုင်းက ခုံးဝူတောက်၏ပါးရိုက်ချက်သည် သူ့အ​တွက် ထိခိုက်နစ်နာမှု မရှိခဲ့သော်လည်း အလွန်အမင်း စော်ကားရာ ရောက်ခဲ့သည်။

နတ်ဘုရားသားတော် ယန်ရန်၏ ကျန်ရှိနေသော စဥ်းစားချင့်ချိန်နိုင်မှုသည် ဤအချိန်အခိုက်အတန့်တွင် ဒေါသကြောင့် လုံးလုံးလျားလျား လွှမ်းမိုးခြင်းခံလိုက်ရလေပြီ။

မည်သည့် တန်ကြေးကို ပေးဆပ်ရပါစေ ဤကျိန်ဆဲခံရမည့်ကောင်အား အပိုင်းပိုင်းဆွဲဖြဲပစ်မည်ဟု သူ ဆုံးဖြတ်လိုက်သည်။

ဝုန်း...

ကောင်းကင်နှင့်မြေပြင်သည် ဤအချိန်အခိုက်အတန့်တွင် အလွန်အမင်းတုန်ယင်သွားကာ ကျယ်လောင်သောအသံကြီး မြည်ဟီးသွားသည်။

ထို့နောက် နတ်ဘုရားသားတော်ယန်ရန်အား ဗဟိုပြု၍ ငရဲပြည်ကဲ့သို့ ပူပြင်းလောင်ကျွမ်းစေသော မီးတောက်လှိုင်းလုံးကြီးတစ်ခုသည် ပတ်ဝန်းကျင်ကို နောက်တစ်ကြိမ် လွှမ်းခြုံသွားပေ၏။

မိုးကောင်းကင်ယံသည် လောင်ကျွမ်းနေသော မီးပင်လယ်ကြီးကြောင့် ကြက်သွေးရောင်အဖြစ် လုံးလုံးလျားလျား ဆေးခြယ်ခြင်းခံလိုက်ရသည်။

ခရက်...

နတ်ဘုရားသားတော်ယန်ရန်၏ နံဘေးပတ်လည်ရှိ ဟင်းလင်းပြင်သည် ပြိုကျပျက်စီးသွားတော့သည်။

အရောင်မတူညီသော မီးတောက်နတ်ဘုရားမြစ် လေးသွယ်သည် ဟင်းလင်းပြင်အက်ကွဲကြောင်းများမှ ပေါက်ကွဲထွက်လာပြီး နတ်ဘုရားသားတော် ယန်ရန်၏ ခန္ဓာကိုယ်အတွင်းသို့ အလျင်အမြန် ပေါင်းစည်းသွားကြ၏။

"ဒါက... ကောင်းကင်နဲ့မြေပြင် ဆန်းကြယ်မီးတောက်တွေရဲ့ အရှိန်အဝါပဲ..."

အဝေးမှ စောင့်ကြည့်နေသော ကျင့်ကြံသူ တစ်ဦးသည် ရုတ်တရက် အံ့အားသင့်စွာဖြင့် ရေရွတ်လိုက်သည်။

"နတ်ဘုရားသားတော်ယန်ရန် ဆင့်ခေါ်လိုက်တဲ့ မီးတောက်နတ်ဘုရားမြစ် လေးသွယ်လုံးက ကောင်းကင်နဲ့မြေပြင် ဆန်းကြယ်မီးတောက် တွေချည်းပဲ..."

"ကောင်းကင်နဲ့မြေပြင် ဆန်းကြယ်မီးတောက် လေးမျိုးတောင်လား... နတ်ဘုရားသားတော် ယန်ရန်က အဲ့ဒါတွေကို ဘယ်လို ရခဲ့တာလဲ..."

"ကြောက်ဖို့ကောင်းတဲ့ အဆင့်အရဆိုရင် ကောင်းကင်နဲ့မြေပြင် ဆန်းကြယ်မီးတောက် တွေ ပိုင်ဆိုင်ထားတဲ့ စွမ်းအားက ရွှေကျီးကန်း မီးတောက်နဲ့ သိပ်ပြီး ကွာခြားမှု မရှိဘူး..."

"ကောင်းကင်နဲ့မြေပြင် ဆန်းကြယ်မီးတောက် လေးမျိုးကို ပေါင်းစပ်ထားပြီးတော့ နတ်ဘုရားသားတော်ယန်ရန် ထိန်းချုပ်ထားတဲ့ ရွှေကျီးကန်း မီးတောက်နဲ့ ပေါင်းစပ်လိုက်မယ်ဆိုရင်... သူ့ရဲ့စွမ်းအားက သေချာပေါက် အဆင့်တွေအများကြီး မြင့်တက်သွားလိမ့်မယ်..."

".........."

ဤကောင်းကင်နှင့်မြေပြင် ဆန်းကြယ်မီးတောက်လေးမျိုးလုံးကို နတ်ဘုရားသားတော် ယန်ရန်သည် အကန့်အသတ်မဲ့ မီးနယ်မြေ၏ အနက်ရှိုင်းဆုံး နေရာတွင် ရှာတွေ့ခဲ့ပြီး အောင်မြင်စွာ သန့်စင်နိုင်ခဲ့ခြင်း ဖြစ်ပေ၏။

ကောင်းကင်နှင့်မြေပြင် ဆန်းကြယ်မီးတောက် များသည် သဘာဝအတိုင်း ကောင်းကင်နှင့်မြေကြီး၏ စိတ်ဝိညာဉ်ချီကို စုပ်ယူပြီး နေနှင့်လ၏အနှစ်သာရကို ဆွဲယူကြသည်။

ဆန်းကြယ်မီးတောက်တစ်ခုကို ပိုင်ဆိုင်ထားသော သာမန်လူတစ်ဦးသည် ဒေသတစ်ခုကို လွှမ်းမိုးနိုင်သော စွမ်းအားကြီးမားသည့် မီးထိန်းချုပ်သူတစ်ဦး ဖြစ်လာနိုင်သည်။

နတ်ဘုရားသားတော် ယန်ရန်သည် မီးတောက်လေးခုကို တိုက်ရိုက်တွေ့ကြုံခဲ့ရသဖြင့် မယုံနိုင်လောက်အောင် ကံကောင်းခဲ့သူပင်။

ဤကောင်းကင်နှင့်မြေပြင် ဆန်းကြယ်မီးတောက်လေးခုကို စုပ်ယူပြီးနောက် သူသည် သူ၏ ရွှေကျီးကန်း သွေးမျိုးဆက်ကိုလည်း အောင်မြင်စွာ အသွင်ပြောင်းနိုင်ခဲ့သည်။

နတ်ဘုရားသားတော် ယန်ရန်၏ မူလအစီအစဉ်အရ ဤသည်မှာ သူ၏နောက်ဆုံးလျှို့ဝှက်လက်နက်ပင်။

သေရေးရှင်ရေး အခိုက်အတန့် မဟုတ်လျှင် ထိုအရာကို သူသည် လွယ်လင့်တကူ အသုံးပြုမည် မဟုတ်ချေ။

သို့သော် ခုံးဝူတောက်၏ ပါးဖြတ်ရိုက်ခြင်းခံရကာ ဤမျှထိ ကြီးမားသော အရှက်ခွဲခံရမှုကို တွေ့ကြုံရပြီးနောက် သူ မည်သည့်အရာကိုမျှ ဂရုမစိုက်နိုင်တော့ပေ။

"ဒီငှက်ကတုံးကောင်က ဒီလောက်ထိ ကံကောင်းတာလား... ကောင်းကင်နဲ့မြေပြင် ဆန်းကြယ်မီးတောက် လေးမျိုးကို တကယ်ကြီး ရှာတွေ့နိုင်တာလား..."

ခုံးဝူတောက်သည် မျက်ခုံးအနည်းငယ် ပင့်လိုက်၏။

နတ်ဘုရားသားတော် ယန်ရန်၏ စွမ်းအားသည် သူ့အတွက် အနည်းငယ် အားနည်းပုံပေါ်သော်လည်း ကိစ္စတစ်ခုကို သူ ဝန်ခံရပေမည်။

သူ၏ကံကောင်းမှုသည် စကားလုံးများဖြင့် ဖော်ပြ၍မရအောင် ဖြစ်နေသည်ဟု ဆိုရပေမည်။

တခြားပါရမီရှင်များဆိုလျှင် သူတို့၏ ဘဝတသက်တာတွင် ကောင်းကင်နှင့်မြေပြင် ဆန်းကြယ်မီးတောက်တစ်ခုကို တွေ့ကြုံရပါက သူတို့၏ ဘိုးဘေးသင်္ချိုင်းများမှ အစိမ်းရောင် မီးခိုးများ ထွက်လာသည်ဟု သတ်မှတ်ခံရပေမည်။

တစ်ဖက်တွင်မူ နတ်ဘုရားသားတော်ယန်ရန်သည် ဤနိမ့်ကျသော ကောင်းကင်ဘုံ တာအိုနယ်မြေ တွင် ကောင်းကင်နှင့်မြေပြင် ဆန်းကြယ်မီးတောက်လေးမျိုးကို တွေ့ရှိနိုင်ခဲ့သည်။

အကယ်၍ တစ်ဖက်လူ၏ ကောင်းကင်ကံကြမ္မာအမှတ်များကို သူ မခံစားမိခဲ့ပါက....

နတ်ဘုရားသားတော် ယန်ရန်သည်လည်း မဟာတာအိုမှ ရွေးချယ်ထားသော ကောင်းကင်ကံကြမ္မာပိုင်ရှင်တစ်ဦး ဖြစ်နိုင်သည်ဟု သူ အမှန်တကယ်ကို သံသယဝင်မိပေမည်။

သို့ရာတွင် ကောင်းကင်ကံကြမ္မာပိုင်ရှင်များဖြစ်စေ တခြားအင်မော်တယ် တာအိုအမွေအနှစ် များ၏ ထိပ်တန်းဆက်ခံသူများဖြစ်စေ...

သူတို့၏ တစ်ခုတည်းသောတန်ဖိုးမှာ သူ ရိတ်သိမ်းမည့် ကြက်သွန်မြိတ်ကြီးများ ဖြစ်လာရန်ပင်။

တစ်ချိန်တည်းမှာပင်....

ကောင်းကင်နှင့်မြေပြင် ဆန်းကြယ်မီးတောက် လေးမျိုး၏ စွမ်းအားများသည် နတ်ဘုရားသားတော် ယန်ရန်၏ ခန္ဓာကိုယ်အတွင်းသို့ လုံးလုံးလျားလျား ပေါင်းစည်းသွားသည်နှင့်...

သူ၏နံဘေးပတ်လည်တွင် လှည့်ပတ်နေသော ရွှေကျီးကန်းမီးတောက် သည် နောက်ထပ် အသွင်ပြောင်းမှုတစ်ခုကို ခံစားလိုက်ရသည်။

ထိုအရာများသည် ယခင်က ကြက်သွေးရွှေရောင်မှ မျက်စိဖြင့်မြင်နိုင်သောအရှိန်ဖြင့် သန့်စင်သောရွှေရောင်သို့ စတင်၍ ကူးပြောင်းသွားတော့သည်။

"ဒါက......"

နတ်ဘုရားသားတော် ယန်ရန် ထိုကဲ့သို့ အခြေအနေသို့ ရောက်ရှိသွားသည်အား မြင်တွေ့ချိန်၌ ရွှေကျီးကန်းနတ်ဘုရားတောင်မှ ပါရမီရှင် အများအပြားသည် အစပိုင်းတွင် အနည်းငယ် မှင်သက်သွားကြပြီးနောက် သူတို့၏ မျက်နှာများသည် ဝမ်းသာမှုများဖြင့် တောက်ပသွားကြ၏။

"နတ်ဘုရားသားတော်ယန်ရန်က ကောင်းကင်လောင်ကျွမ်းခြင်း ရွှေကျီးကန်းကျင့်စဉ်ကို အဆင့်ခြောက်အထိ တကယ်ကြီး ကျင့်ကြံနိုင်ခဲ့တာပဲ..."

"ကောင်းကင်လောင်ကျွမ်းခြင်း ရွှေကျီးကန်း ကျင့်စဉ်က ငါတို့ရဲ့ ရွှေကျီးကန်းနတ်ဘုရားတောင်က အဓိကအကျဆုံး မူလအမွေအနှစ်ပဲ... သမိုင်းတလျှောက်မှာ ဒီလောက်ထိ ငယ်ငယ်ရွယ်ရွယ်နဲ့ အဆင့်ခြောက်အထိ ကျင့်ကြံနိုင်ခဲ့တာ နတ်ဘုရားသားတော် ယန်ရန် တစ်ယောက်ပဲ ရှိတယ်..."

ကောင်းကင်လောင်ကျွမ်းခြင်း ရွှေကျီးကန်း ကျင့်စဉ်တွင် စုစုပေါင်း အဆင့်ကိုးဆင့်ရှိသည်။

အဆင့်ကိုးဖြစ်သော ပြီးပြည့်စုံခြင်းအဆင့်သို့ ကျင့်ကြံနိုင်ခြင်းသည် အစစ်အမှန် ရွှေကျီးကန်း စွမ်းအားနှင့် ရွှေကျီးကန်း နတ်ဘုရားစွမ်းရည် များအားလုံးကို အမှန်တကယ် ရရှိစေနိုင်သည်ဟု ဆိုကြ၏။

အဆင့်ခြောက်သို့ ကျင့်ကြံနိုင်ခြင်းသည် အစစ်အမှန် ရွှေကျီးကန်း မီးတောက်ကို အသုံးပြုနိုင်စေသည်။

သူတို့၏ နတ်ဘုရားသားတော်မှ ဖွဲ့စည်းထားသော ရွှေကျီးကန်း မီးတောက်သည် သန့်စင်သော ရွှေရောင်သို့ ပြောင်းလဲသွားခြင်းသည် အကောင်းဆုံး လက္ခဏာပင်။

သူတို့နတ်ဘုရားသားတော်၏ ရွှေကျီးကန်း မီးတောက်သည် အရည်အသွေးပိုင်းဆိုင်ရာ ပြောင်းလဲမှုတစ်ခုကို ခံစားခဲ့ရပြီး သူ၏ကျင့်ကြံဆင့်နယ်ပယ်နှင့် သူ၏ စွမ်းအားကန့်သတ်ချက်များကို များစွာကျော်လွန်သွားခဲ့လေပြီ။

"ကောင်းကင်လောင်ကျွမ်းခြင်း ရွှေကျီးကန်း ပိုင်နက်နယ်မြေ...အသက်ဝင်စမ်း..."

ယန်ရန်က အော်ဟစ်လိုက်သည်။

ဝုန်း...

လောကကြီးပျက်သုဥ်းမည့်နေ့ကဲ့သို့ တုန်ခါသံကြီးတစ်သံသည် အရာအားလုံးကို လွှမ်းမိုးသွားပေ၏။

လူတိုင်း၏ အမြင်အာရုံသည် ဤအခိုက်အတန့်တွင် လုံးလုံးလျားလျား ပြောင်းပြန်လှန်ခြင်းကို ခံလိုက်ရပြီး အသန့်စင်ဆုံး မီးတောက်များဖြင့် ပြည့်နှက်သွားတော့သည်။

ကောင်းကင်ကိုးထပ်မှ နေမင်းကြီးသည် သေမျိုးလောက သို့ လုံးလုံးလျားလျား ကျဆင်းလာပြီး ဤနေရာကို သန့်စင်သော မီးတောက် ကမ္ဘာတစ်ခုအဖြစ် အသွင်ပြောင်းသွားစေသကဲ့သို့ပင်။

စောင့်ကြည့်နေကြသော ကျင့်ကြံသူအမြောက်အများသည် သက်ရောက်မှု ခံလိုက်ရပြီး ငရဲမှလာသကဲ့သို့ မီးတောက်များ၏ သနားညှာတာမှု ကင်းမဲ့စွာ လောင်ကျွမ်းခြင်းကို ခံလိုက်ရပြီး သူတို့၏အရေပြားများ အနည်းငယ် တွန့်လိမ်ပြီး လောင်ကျွမ်းသွားပေ၏။

မီးတောက်ကမ္ဘာကြီး လွှမ်းခြုံထားသော နေရာတိုင်းတွင် ဟင်းလင်းပြင်သည် တွန့်လိမ်ပုံပျက်သွားပြီး နတ်ဘုရားသားတော်ယန်ရန်၏ စွမ်းအားက အရာအားလုံးကို ဖျက်ဆီးလိုက်သည်။

ဤမြင်ကွင်းကို မြင်သောအခါ ခုံးဝူတောက်သည် တည်ငြိမ်အေးချမ်းနေဆဲပင်။

"မင်းလို ငှက်ကတုံးကောင် တစ်ကောင်က ပိုင်နက်နယ်မြေ စွမ်းအားကို တကယ်ကြီး ကျွမ်းကျင်နိုင်မယ်လို့ ငါ မထင်ထားခဲ့ဘူး..."

"နှမြောစရာပဲ... အမှိုက်က အမြဲတမ်း အမှိုက်ပဲ ဖြစ်နေမှာပဲ..."

သူ၏အသံတွင် လှောင်ပြောင်လိုသည့် အရိပ်အယောင်တစ်ခု ပါဝင်နေသည်။

သူ့ထံသို့ ပြေးဝင်လာသော ကောင်းကင်လောင်ကျွမ်းခြင်း ရွှေကျီးကန်းပိုင်နက်နယ်မြေ ကို ရင်ဆိုင်ရာတွင် ဤသည်ကို သူ၏ ကိုယ်ပိုင် စွမ်းအားဖြင့် တိုက်ရိုက်ဖျက်ဆီးပစ်ရန် သူ မရွေးချယ်ခဲ့ချေ။

သူသည်လည်း ထိုတိုက်ခိုက်မှုကို သူ၏ပိုင်နက်နယ်မြေ စွမ်းအားဖြင့် ဖိနှိပ်ရန် ဟန်ပြင်လိုက်၏။

"ဖရိုဖရဲ ဟင်းလင်းပြင် ပိုင်နက်နယ်မြေ...အသက်ဝင်စမ်း..."

ခုံးဝူတောက်၏ တိုးညှင်းသော တီးတိုးရေရွတ်သံ ကျဆင်းသွားသည်...

မူလက ရွှေကျီးကန်း မီးတောက် ဖြင့် အရောင်ဆိုးထားသော ရွှေရောင်လောကကြီးသည် ချက်ချင်းပင် အရောင်မှိန်သွားပြီး အနက်ရောင်နှင့် အဖြူရောင်အဖြစ်သို့ ပြောင်းလဲသွားပေ၏။

ဟင်းလင်းပြင်တစ်ခုလုံး ပြင်းထန်စွာ တုန်ခါသွားသည်။

ကြည်လင်ပြတ်သားမှုမရှိသော အခြေအနေတွင် အနက်နှင့်အဖြူ ရောယှက်သော အလင်းတွင်းနက်ကြီးတစ်ခု ခုံးဝူတောက်၏နောက်တွင် ထွက်ပေါ်လာပေ၏။ ထိုအရာအတွင်း၌ သန်းရာနှင့်ချီသော နူးညံ့သိမ်မွေ့သည့် အလင်းတန်းများ စီးဆင်းနေကာ ကြီးမားသော စွမ်းအားများ ပါဝင်နေသည်။

ဤအနက်နှင့်အဖြူ အလင်းတွင်းနက်ကြီး ထွက်ပေါ်လာသည့် အချိန်အခိုက်အတန့်မှာပင်....

နတ်ဘုရားသားတော် ယန်ရန် ထုတ်လွှတ်လိုက်သည့် အလျင်အမြန် ပျံ့နှံ့နေသော ကောင်းကင်လောင်ကျွမ်းခြင်း ရွှေကျီးကန်း ပိုင်နက်နယ်မြေသည် ချက်ချင်းပင် အကြွင်းမဲ့ ချုပ်နှောင်ခြင်းကို ခံလိုက်ရပြီး နေရာတွင် တိုက်ရိုက် အေးခဲတောင့်တင်းသွားပေ၏။

"ဒါက......"

တောင့်တင်းအေးခဲသွားသော နတ်ဘုရားသားတော် ယန်ရန်၏ မျက်နှာအမူအယာ သိသိသာသာ ပြောင်းလဲသွားသည်။

"သူက ပိုင်နက်နယ်မြေ စွမ်းအားကိုတောင် တကယ်ကြီး ကျွမ်းကျင်ထားတာပဲ..."

"ပြီးတော့... အဲ့ဒါက ငါ့ရဲ့ ကောင်းကင်လောင်ကျွမ်းခြင်း ရွှေကျီးကန်း ပိုင်နက်နယ်မြေ ထက်တောင် ပိုပြီးကြောက်စရာကောင်းတယ်..."

ကောင်းကင်လောင်ကျွမ်းခြင်း ရွှေကျီးကန်း ပိုင်နက်နယ်မြေသည် လောကရှိ အရာအားလုံးကို ပြာကျသွားစေရန် လုံလောက်သည်။

ယခုအချိန်၌ ခုံးဝူတောက်၏ ပိုင်နက်နယ်မြေ စွမ်းအားကြောင့် ဤမျှထိ လွယ်လင့်တကူ ဖိနှိပ်ခံလိုက်ရခြင်းမှာ သူ့အတွက် အမှန်တကယ်ကို လက်ခံရန် ခက်ခဲလှသည်။

"ဒီနေ့... မင်းလို အမှိုက်ကောင်ကို အစစ်အမှန် ပိုင်နက်နယ်မြေတစ်ခုက ဘာလဲဆိုတာ ငါ ပြမယ်..."

အခန်း (၁၂၂) နတ်ဘုရားသားတော် ယန်ရန်ကိုချေမှုန်းပစ်ခြင်း... ကိုင်တွယ်ရ ခက်ခဲတာလား... ဒါဆိုရင် မင်းတို့ အားလုံး ဒီနေရာမှာပဲ သေလိုက်ကြတော့

ထိုစကားသံ ကျရောက်လာသည်နှင့် ဖရိုဖရဲစွမ်းအား ဆင်းသက်လာပြီး ဥပဒေသများ အရှုံးပေးသွားကြတော့သည်။

ဤအချိန်၌ ကောင်းကင်နှင့်မြေကြီးသည် နှလုံးကွဲကြေဖွယ် ညည်းတွားသံကို ထုတ်လွှတ်လိုက်၏။

ချုပ်နှောင်ခံထားရသော ကောင်းကင်လောင်ကျွမ်းခြင်း ရွှေကျီးကန်း ပိုင်နက်နယ်မြေ သည် တည်ငြိမ်မှုမရှိဘဲ တဖျတ်ဖျတ်တောက်ပနေပြီး ဤအချိန်အခိုက်အတန့်တွင် ပို၍အားကောင်းသော စွမ်းအားတစ်ခု၏ လုံးလုံးလျားလျား ဖိနှိပ်ခြင်းကို ခံလိုက်ရသည်။

နတ်ဘုရားသားတော် ယန်ရန်၏ မျက်နှာအမူအရာ သိသိသာသာ ပြောင်းလဲသွားပေ၏။

ခုံးဝူတောက်သည် မည်သည့် ပိုင်နက်နယ်မြေကို အသုံးပြုနေမှန်း သူ မသိသော်လည်း ဤအရာအတွင်း၌ ပါဝင်သော ကြောက်မက်ဖွယ်ကောင်းသည့် စွမ်းအားကို သူရှင်းလင်းစွာ ခံစားနိုင်သည်။

ကောင်းကင်နှင့်မြေပြင်အကြားတွင် မတ်တတ်ရပ်နေသော ခုံးဝူတောက်သည် တောက်ပစွာ လင်းထိန်နေပုံရပေ၏။

အဆုံးမဲ့တာအိုစည်းချက်များနှင့် ဥပဒေသ များသည် သူ၏နံဘေးပတ်လည်တွင် စီးဆင်းကာ ရောယှက်နေပြီး သူ၏ပုံရိပ်ကို ပို၍ပင် တောက်ပလာစေကာ လူအများမှ စေ့စေ့ကြည့်ရှုရန်ပင် မဖြစ်နိုင်တော့ချေ။

နတ်ဘုရားတစ်ပါး ဆင်းသက်လာသည်နှင့် တူညီနေသော ဟင်းလင်းပြင်ရှိ အဖြူရောင် ဝတ်ရုံဝတ်ပုံရိပ်ကိုကြည့်ကာ မရေမတွက်နိုင်သော ကျင့်ကြံသူများအားလုံး ထိတ်လန့်သွားကြသည်။

"နတ်ဘုရားသားတော် ခုံးဝူတောက်ရဲ့ စွမ်းအားက ဘယ်လောက်ထိ သန်မာအားကောင်းနေတာလဲ..."

"ဒါက ဘယ်လို ပိုင်နက်နယ်မြေမျိုးလဲ... ငါတို့က မိုင်ရာနဲ့ချီ ဝေးတဲ့နေရာကို ဆုတ်ခွာသွားတာတောင်မှ ဒီလိုမျိုး ရင်တလှပ်လှပ်ဖြစ်စေတဲ့ ဖိအားကို ခံစားနေရတုန်းပဲ..."

"အဲ့ဒါက ဖရိုဖရဲစွမ်းအားနဲ့ သက်ဆိုင်ပုံရတယ်... ဒါပေမယ့် အဲ့ဒါက ဖရိုဖရဲ စွမ်းအား ထက် အများကြီးပိုပြီး ကြောက်စရာကောင်းပုံရတယ်..."

ဤအခိုက်အတန့်တွင် ခုံးဝူတောက်သည် လှုပ်ရှားလိုက်လေပြီ။

သူသည် လက်ညှိုးတစ်ချောင်းကို ဆန့်တန်းကာ နတ်ဘုရားသားတော်ယန်ရန် ရှိနေသော အရပ်ဆီသို့ ညင်သာစွာ ညွှန်ပြလိုက်သည်။

ဝုန်း...

သူ လက်ညှိုးတစ်ချောင်း ညွှန်ပြလိုက်သည်နှင့်တောင်ပြိုကျပြီး ပင်လယ်ရေ လွှမ်းမိုးသကဲ့သို့ တဝုန်းဝုန်းထနေသော စွမ်းအင်လှိုင်းလုံးကြီးတစ်ခု ဆင်းသက်လာသည်။

နတ်ဘုရားသားတော် ယန်ရန်၏ ကောင်းကင်လောင်ကျွမ်းခြင်း ရွှေကျီးကန်း ပိုင်နက်နယ်မြေ သည် လုံးလုံးလျားလျား ဖျက်ဆီးခံလိုက်ရသည်။

မဟာတာအို ချီစွမ်းအင်၏ ကြောက်မက်ဖွယ်ကောင်းသော နောက်ဆက်တွဲ သက်ရောက်မှုသည် လျော့ကျမသွားဘဲ နတ်ဘုရားသားတော် ယန်ရန်အား တိုက်ရိုက်ရိုက်ခတ်သွားပေ၏။

နတ်ဘုရားသားတော်ယန်ရန်၏ မျက်နှာအမူအရာ သိသိသာသာ ပြောင်းလဲသွားသည်။ ထိုကဲ့သို့ ကြောက်မက်ဖွယ်ကောင်းသော စွမ်းအားအောက်တွင် သူသည် ရှောင်တိမ်းရန် အခွင့်အရေး လုံးလုံးလျားလျား မရှိခဲ့ချေ။

သူသည် အံ့တင်းတင်းကြိတ်ကာ ကျယ်လောင်စွာ ဟိန်းဟောက်လိုက်ပြီး ဤတိုက်ခိုက်မှုကို အတင်းအကြပ် ခံယူရန် ဟန်ပြင်လိုက်ရုံသာ တတ်နိုင်တော့သည်။

သူ၏ခန္ဓာကိုယ်တစ်ခုလုံးတွင် နတ်ဘုရားမီးတောက်များ ရစ်သိုင်းလွှမ်းခြုံနေပြီး သူ၏ရွှေကျီးကန်း သွေးအဆီအနှစ်များကိုပင် လောင်ကျွမ်းလိုက်သည်။

သို့ရာတွင် ထိုကိစ္စသည် အသုံးမဝင်ခဲ့ချေ။

ခရက်...

အရိုးများ ကျိုးကြေသွားသည့် နှလုံးကွဲကြေဖွယ်အသံကြီး ပဲ့တင်ထပ်သွားကာ နတ်ဘုရားသားတော်ယန်ရန်၏ နံရိုးများသည် လုံးလုံးလျားလျား ကျိုးကြေသွားပေ၏။

ထို့နောက် တလက်လက် တောက်ပနေသော အရိုးဖြူအစအနများနှင့် ရောနှောနေသည့် သွေးမြှုပ်များသည် နေရာအနှံ့အပြားသို့ လွင့်စင်သွားပြီး မိုးကောင်းကင်ယံမှ ကျဆင်းလာခဲ့သည်။

သူ၏ ရွှေကျီးကန်း သွေးမျိုးဆက်သည် အသွင်ပြောင်းမှုတစ်ခုကို ခံစားခဲ့ရပြီးပြီဖြစ်ကာ သူ၏ ရုပ်ခန္ဓာကိုယ်ကို ဖျက်ဆီး၍မရဟု ပြောနိုင်သည်။

သို့သော် ဤအခိုက်အတန့်တွင် ဤသည်က ကျောက်တုံးကို ကြက်ဥနှင့်ပေါက်သကဲ့သို့ ဖြစ်နေပေ၏။ ခုံးဝူတောက်ထံမှ တိုက်ခိုက်မှုတစ်ခုကိုပင် သူ မတားဆီးနိုင်ခဲ့ချေ။

ဝုန်း...

နတ်ဘုရားသားတော်ယန်ရန်၏ ရင်ဘတ်မှ သွေးမြူတိမ်တိုက်တစ်ခု ပေါက်ကွဲထွက်လာပြီး သူသည် ဖြူရော်နေသော မျက်နှာဖြင့် မြေပြင်ပေါ်သို့ လဲကျသွားတော့သည်။

ကောင်းကင်ယံရှိ ခုံးဝူတောက်ကို ကြည့်လိုက်ချိန်၌ ယန်ရန်ထံတွင် မည်သည့် မထီမဲ့မြင်ပြုမှုမျှ မရှိတော့ဘဲ ကြောက်ရွံ့မှုများ အပြည့်အဝရှိသော မျက်နှာတစ်ခုသာ ကျန်ရှိနေတော့သည်။

တစ်ဖက်လူသည် အမှန်တကယ်ကို သူ့ကဲ့သို့ ဟင်းလင်းပြင်နတ်ဘုရားနယ်ပယ်တွင်သာ ရှိနေသလော...

မည်သည်ကြောင့် တစ်ဖက်လူထံမှ တိုက်ခိုက်မှု တစ်ခုကိုပင် သူ မတားဆီးနိုင်ခဲ့သနည်း.....

"နတ်ဘုရားသားတော် ယန်ရန်..."

ရွှေကျီးကန်းနတ်ဘုရားတောင်မှ ပါရမီရှင် အများအပြားသည် သူတို့၏ကျင့်ကြံခြင်းစွမ်းအားကို အသက်သွင်းလိုက်ကြပြီး နတ်ဘုရားသားတော်ယန်ရန်၏နံဘေးသို့ ချက်ချင်း အပြေးသွားကြ၏။

အထူးသဖြင့် ရွှေကျီးကန်းနတ်ဘုရားတောင်မှ ဧကရာဇ်သားတော်များနှင့် သမီးတော်များ ဖြစ်ကြပြီး ပြင်းထန်စွာ ဒဏ်ရာရနေသော နတ်ဘုရားသားတော် ယန်ရန်အား ကာကွယ်လိုသဖြင့် သူတို့၏ အသက်ဝိညာဉ်ရတနာများကိုပင် ဆင့်ခေါ်ထားပြီး ဖြစ်သည်။

"ဟမ့်... ငှက်ကတုံးကောင်တွေ... နင်တို့က နတ်ဘုရားသားတော် ခုံးဝူတောက်ကို စော်ကားထားပြီးတော့ ဒီနေရာကနေ အထိအခိုက်မရှိ ထွက်သွားချင်သေးတာလား..."

ခုံးကျန်ယွဲ့က အေးစက်စက် နှာခေါင်းရှုံ့လိုက်သည်။

ရုတ်ချည်းဆိုသလိုပင် သူမသည် အချိန်လေဟာနယ် တားမြစ်နယ်မြေမှ လူများကို ဦးဆောင်ကာ ရွှေကျီးကန်းနတ်ဘုရားတောင်မှ လူများကို ဝိုင်းရံထားလိုက်သည်။

"ဒီငှက်ကတုံးကောင်တွေက ထွက်ပြေးဖို့ ကြိုးစားနေတာ ဖြစ်ရမယ်..."

နာလန်မိသားစုဘိုးဘေးသည် အော်ဟစ်လိုက်၏။

"နာလန်မိသားစုက ဟင်းလင်းပြင်နတ်ဘုရားနယ်ပယ်အထက် ကျွမ်းကျင်သူတွေ အားလုံး... ငါ့နောက်ကနေလိုက်ပြီး တိုက်ပွဲဝင်ကြစမ်း..."

ယနေ့ကိစ္စနှင့် ပတ်သက်၍ စဉ်းစားနေရန် မလိုတော့ချေ။ အချိန်လေဟာနယ် တားမြစ်နယ်မြေ သည် ရွှေကျီးကန်းနတ်ဘုရားတောင်နှင့် သေရေးရှင်ရေး ရန်ငြိုးတစ်ခုကို ဖွဲ့စည်းခဲ့ပြီးလေပြီ။

သူသည် မူလက အချိန်လေဟာနယ် တားမြစ်နယ်မြေ၏ အစောင့်တစ်ဦးပင်။

အချိန်လေဟာနယ် တားမြစ်နယ်မြေမှ လူငယ် သခင်များ တိုက်ခိုက်နေသည်ကို သူသည် မည်သည့် တုံ့ပြန်မှုမျှ မရှိဘဲ သူ မည်သို့ စောင့်ကြည့်နေနိုင်မည်နည်း။

သို့သော် ထိုအချိန်မှာပင် ဒေါသတကြီး အော်ဟစ်သံတစ်သံ ဟင်းလင်းပြင်တွင် ရုတ်တရက် ပဲ့တင်ထပ်လာခဲ့သည်။

"နတ်ဘုရားသားတော် ခုံးဝူတောက်... သနားညှာတာသင့်တဲ့အချိန်မှာ သနားညှာတာပါ..."

ခရက်...

ရုတ်တရက် အက်ကွဲနေသော ဟင်းလင်းပြင်ထဲမှ ပုံရိပ်ခုနစ်ခု ထွက်ပေါ်လာခဲ့သည်။

သူတို့အနက် အနိမ့်ဆုံး ကျင့်ကြံခြင်းမှာ နတ်ဘုရားဘုရင်နယ်ပယ် အဆင့်ကိုး ဖြစ်ပြီး သူတို့ထဲမှ အများစုမှာ ခြေလှမ်းတစ်ဝက် သူတော်စင်နယ်ပယ်သို့ ရောက်ရှိနေလေပြီ။

ထို့အပြင် ဤစွမ်းအားကြီးမားသော ဝါရင့်ကျွမ်းကျင်သူ ခုနစ်ဦးသည် ယခုခရီးစဉ်တွင် နတ်ဘုရားသားတော်တို့ အုပ်စုအတွက် တာအိုအစောင့်အရှောက်များပင်။

"အခြေအနေ မကောင်းတာကို သူတို့ မြင်သွားပုံရတယ်... ရွှေကျီးကန်းနတ်ဘုရားတောင်က မျိုးဆက်ဟောင်း ကျွမ်းကျင်သူတွေ ဝင်ရောက်စွက်ဖက်ဖို့ ပြင်ဆင်နေကြပြီ..."

"နတ်ဘုရားဘုရင်နယ်ပယ် အဆင့်ကိုး သုံးယောက် ခြေလှမ်းတစ်ဝက် သူတော်စင်နယ်ပယ် လေးယောက်... အရင်က သေသွားတဲ့ ခြေလှမ်းတစ်ဝက် သူတော်စင်နယ်ပယ် သုံးယောက်နဲ့ ပေါင်းလိုက်ရင် ဒီခရီးစဉ်မှာ နတ်ဘုရားသားတော် ယန်ရန်အတွက် တာအိုအစောင့်အရှောက် စုစုပေါင်း ဆယ်ယောက်တောင် ရှိတယ်... ရွှေကျီးကန်းနတ်ဘုရားတောင်က တကယ်ကို ရက်ရောတာပဲ..."

"ဒီစွမ်းအားကြီးမားတဲ့ ဝါရင့်ကျွမ်းကျင်သူခုနစ်ဦးက ရွှေကျီးကန်းနတ်ဘုရားတောင်က ပါရမီရှင်တွေကို ခေါ်သွားဖို့ တောင်းဆိုလာမယ်ဆိုရင် နတ်ဘုရားသားတော် ခုံးဝူတောက်ရဲ့ အနောက်က တာအိုအစောင့်အရှောက်တွေ လှုပ်ရှားရင်တောင်မှ သူတို့ကို ထိန်းသိမ်းထားဖို့ ခက်ခဲနိုင်တယ် မဟုတ်လား..."

စောင့်ကြည့်နေကြသော ကျင့်ကြံသူအများအပြားသည် တက်ကြွစွာ ဆွေးနွေးနေကြ၏။

ရွှေကျီးကန်းနတ်ဘုရားတောင်မှ ဤကျွမ်းကျင်သော ဝါရင့်ကျွမ်းကျင်သူခုနစ်ဦး ထုတ်လွှတ်လိုက်သော အရှိန်အဝါသည် တူညီသော နယ်ပယ်တွင်ရှိနေသူများထက် များစွာသာလွန်နေပေ၏။

အချိန်လေဟာနယ် တားမြစ်နယ်မြေ၏ တာအိုအစောင့်အရှောက်များပင်လျှင် သူတို့ကို ကိုင်တွယ်ရန် ခက်ခဲနိုင်သည်။

ရွှေကျီးကန်းနတ်ဘုရားတောင်၏ တာအိုအစောင့်အရှောက် ခုနစ်ဦးသည် နတ်ဘုရားသားတော်ယန်ရန်နှင့် တခြားသူများ၏ အထက်သို့ ဆင်းသက်လာကြသည်။

ခုံးဝူတောက်အပေါ် သူတို့၏ အကြည့်များသည် အနည်းငယ် စိုးရိမ်ပူပန်နေကြ၏။

အကြောင်းပြချက် တစ်ခုခုကြောင့် ခုံးဝူတောက်ကို သူတို့ မြင်လိုက်ရသည့် အခိုက်အတန့်တွင် သူတို့၏ မသိစိတ်များသည် အချက်ပေး ခေါင်းလောင်းသံများ ရူးသွပ်စွာ မြည်ဟီးလာခဲ့သည်။

ဤသည်မှာ ခုံးဝူတောက်သည် အလွန် အန္တရာယ်များကြောင်း သူတို့ကို သတိပေးနေခြင်းပင်။

ဤအရာသည် သူတို့ကို ကြောက်ရွံ့သွားစေပြီး တစ်ချိန်တည်းမှာပင် အနည်းငယ် စိတ်ရှုပ်ထွေးသွားစေခဲ့သည်။

သူတို့အနက် အဆင့်နိမ့်ဆုံးကျင့်ကြံသူသည် နတ်ဘုရားဘုရင်နယ်ပယ် အဆင့်ကိုး ဖြစ်ပေ၏။

ခုံးဝူတောက်၏ကျင့်ကြံခြင်းကို သူတို့ အာရုံမခံနိုင်ကြသော်လည်း....

သူတို့၏အမြင်အရ ခုံးဝူတောက်သည် အလွန် ငယ်ရွယ်ပြီး အများဆုံးအနေဖြင့် ဟင်းလင်းပြင်နတ်ဘုရားနယ်ပယ် အဆင့်ငါး ဝန်းကျင်တွင်သာ ရှိနေနိုင်သည်။

ထိုသို့ဆိုလျှင် မည်သည်ကြောင့် သူသည် သူတို့ကို အန္တရာယ်ရှိသည့် ခံစားချက်မျိုး ပေးနိုင်ရသနည်း။

"ဘာလဲ..."

"ဒီငှက်ကတုံးကောင်ကို လွှတ်ပေးဖို့ ဒီနတ်ဘုရားသားတော် ကို မင်းတို့က အသနားခံချင်တာလား..."

ခုံးဝူတောက်သည် မျက်ခုံးတစ်ဖက်ကို အနည်းငယ်ပင့်ကာ ခပ်ဖျော့ဖျော့အပြုံးဖြင့် မေးမြန်းလိုက်၏။

သူတို့ ခုနစ်ယောက်၏ ရှေ့တွင် နတ်ဘုရားသားတော်ယန်ရန်အား ငှက်ကတုံးကောင်ဟု ခုံးဝူတောက်သည် ခေါ်နေဆဲဖြစ်သည်ကို မြင်လိုက်ရသောအခါ သူတို့အားလုံး၏ မျက်နှာအမူအရာများ အနည်းငယ် ပျက်ယွင်းသွားကြသည်။

ဦးဆောင်လာသော တာအိုအစောင့်အရှောက်က ရှေ့သို့ထွက်လာခဲ့သည်။

သူသည် ခုံးဝူတောက်ကို လေးစားမှုပြသသည့်အနေဖြင့် လက်ပူးဆုပ်ကာ အရိုအသေပေးလိုက်ပြီးနောက် ပြောဆိုလိုက်သည်။

"နတ်ဘုရားသားတော် ခုံးဝူတောက်ရဲ့ နာမည်ဂုဏ်သတင်းကို ငါ ကြားနေရတာ ကြာပြီ... ဒီနေ့အရှင်ကို မြင်လိုက်ရတော့ အရှင်က တကယ်ကို ထူးကဲတာပဲ..."

"အရင်က ကိစ္စက ငါတို့ ရွှေကျီးကန်းနတ်ဘုရားတောင်ရဲ့ နတ်ဘုရားသားတော်က အဆင်အခြင်မဲ့ပြီးတော့ နတ်ဘုရားသားတော် ခုံးဝူတောက်ကို စော်ကားမိလို့ပါ... ကျေးဇူးပြုပြီး နတ်ဘုရားသားတော် ခုံးဝူတောက်က ခွင့်လွှတ်ပေးပါ..."

"နတ်ဘုရားသားတော် ခုံးဝူတောက်က သဘောထားကြီးပြီး ဒီကိစ္စကို ခွင့်လွှတ်ပေးဖို့ ဆန္ဒရှိသရွေ့ ငါတို့ ရွှေကျီးကန်းနတ်ဘုရားတောင်က ရွှေကျီးကန်း သွေးအဆီအနှစ် တစ်စက်နဲ့ တောင်းပန်စကားတွေကို ပေးအပ်ဖို့ ဆန္ဒရှိပါတယ်..."

"နတ်ဘုရားသားတော် ဘယ်လိုသဘောရလဲ..."

သူတို့၏နောက်တွင် ကာကွယ်ပေးခြင်းခံထားရသော နတ်ဘုရားသားတော် ယန်ရန်သည် သုန်မှုန်နေသော မျက်နှာအမူအရာ ရှိနေပြီး နာကြည်းမှုဖြင့် အံ့တင်းတင်းကြိတ်လိုက်သည်။

အစောပိုင်းက ခုံးဝူတောက် သူ့အပေါ် ယူဆောင်လာခဲ့သော အရှက်ခွဲခံရမှုကို သူ ဆေးကြောပစ်ရန် ပျက်ကွက်ခဲ့သည်။ ထိုမျှသာမက နောက်ဆုံးတွင် သူ၏တာအိုအစောင့်အရှောက်များကို ရှေ့သို့ထွက်လာစေပြီး ခုံးဝူတောက်ကို တောင်းပန်ခိုင်းရသည်အထိပင် ဖြစ်သွားခဲ့သည် မဟုတ်လော။

ဤသည်က သူ့အတွက် အရှက်ရဖွယ်ကိစ္စပင်။

သူ့အတွက် ကြီးမားသော အရှက်ရမှုကြီးတစ်ခု ဖြစ်ပေ၏။

တခြားတစ်ဖက်တွင်....

ခုံးဝူတောက် စကားမပြောရသေးမီမှာပင်....

အချိန်လေဟာနယ် တားမြစ်နယ်မြေမှ ဧကရာဇ်သားတော်များနှင့်သမီးတော်များတချို့သည် လုံးလုံးလျားလျား ဒေါသထွက်သွားကြလေပြီ။

"မင်းတို့ ရွှေကျီးကန်းနတ်ဘုရားတောင် က တကယ်ကို မျက်နှာပြောင်တိုက်ရဲတာပဲ..."

"မင်းတို့က ငါတို့ရဲ့ နတ်ဘုရားသားတော် ကို စော်ကားထားပြီးတော့ ရွှေကျီးကန်း သွေးအဆီအနှစ်တစ်စက်တည်းနဲ့ ဒီကိစ္စကို ခွင့်လွှတ်ပေးဖို့ တကယ်ကြီး စီစဉ်နေတာလား..."

"မင်းတို့က စိတ်ကူးယဉ်နေတယ်ဆိုတာ ထည့်မပြောနဲ့အုံး .. မင်းတို့ရဲ့ အောက်တန်းကျတဲ့ ရွှေကျီးကန်း သွေးအဆီအနှစ်က နတ်ဘုရားသားတော် ခုံးဝူတောက်ရဲ့ အဆင့်အတန်းနဲ့ ဘယ်လိုလုပ်ပြီး ထိုက်တန်မှာလဲ..."

ခုံးကျန်ယွဲ့နှင့် တခြားသူများ၏ ချုပ်တည်းမှုမရှိသော ဒေါသတကြီး ကျိန်ဆဲသံများကို ကြားလိုက်ရသောအခါ...

ရွှေကျီးကန်းနတ်ဘုရားတောင်မှ တာအိုအစောင့်အရှောက်ခုနစ်ဦး၏ မျက်နှာအမူအရာများ ပို၍ပင် ဖြူရော်သွားကြသည်။

သူတို့သည် အချိန်လေဟာနယ် တားမြစ်နယ်မြေ ကို မျက်နှာသာ အများကြီး ပေးခဲ့ရုံသာမက သူတို့၏ အဆင့်အတန်းကိုပင် လျှော့ချကာ ကြီးမားသော လိုက်လျောမှုတစ်ခုကို ပြုလုပ်ခဲ့သည် မဟုတ်လော....

သို့သော် တစ်ဖက်လူသည် ဤမျှထိ အလွန်အမင်း မောက်မာနေဆဲပင်။

သူတို့ကို မျက်နှာသာမပေးရုံသာမက သူတို့၏ ရွှေကျီးကန်းနတ်ဘုရားတောင် ကို လုံးလုံးလျားလျား အသုံးမကျသကဲ့သို့ နှိမ့်ချပြောဆိုခဲ့သည် မဟုတ်လော....

"နတ်ဘုရားသားတော် ခုံးဝူတောက်...အရှင် သေချာစဉ်းစားရမယ်.. တကယ်လို့ ငါတို့ခုနစ်ယောက်က ငါတို့ရဲ့ စွမ်းအားအပြည့်အဝကို ထုတ်သုံးလိုက်မယ်ဆိုရင် ငါတို့ရဲ့ ရွှေကျီးကန်းနတ်ဘုရားတောင်က လူတိုင်းကို ခေါ်သွားနိုင်ဖို့ ငါတို့ကို ယုံကြည်မှု ရှိတယ်..."

ရွှေကျီးကန်းနတ်ဘုရားတောင်မှ ဦးဆောင်လာသော တာအိုအစောင့်အရှောက်သည် သူ၏ ဒေါသကို ဖိနှိပ်လိုက်ပြီး သူ၏လက်များကို နောက်တစ်ကြိမ် ပူးဆုပ်လိုက်၏။

"ကျေးဇူးပြုပြီး နတ်ဘုရားသားတော် ခုံးဝူတောက်... ငါတို့ကို မျက်နှာသာ နည်းနည်းလောက် ပေးပါ... ဒါမှသာ ငါတို့က အခြေအနေတွေကို သိပ်ပြီးခက်ခဲအောင် မလုပ်ရမှာ..."

"ဟဲ ဟဲ... ခက်ခဲအောင်လား..."

ဤစကားကို ကြားသောအခါ ခုံးဝူတောက်၏ နှုတ်ခမ်းထောင့်ရှိ လှောင်ပြောင်လိုသော မျက်နှာအမူအယာသည် ပို၍ပီပြင်ထင်ရှားလာသည်။

သူ၏အပြုံး လုံးလုံးလျားလျား ပျောက်ကွယ်သွားချိန်၌....

သူ၏ အရှိန်အဝါတစ်ခုလုံး ရုတ်တရက် ပြောင်းလဲသွားပြီး အရိုးခိုက်မတတ် သတ်ဖြတ်လိုခြင်း စိတ်ဆန္ဒတစ်ရပ် ထွက်ပေါ်လာခဲ့သည်။

"ဒါဆိုရင်လည်း မနှောင့်ယှက်နဲ့တော့..."

"မင်းတို့ အားလုံး ဒီမှာပဲ သေလိုက်ကြတော့..."

ဝုန်း...

နောက်ထပ်အချိန်တခဏတွင်...

မိုးကောင်းကင်ယံသည် တုန်ခါသွားပြီး ဟင်းလင်းပြင်၏ ကျယ်ပြန့်သော ဧရိယာများ ရုတ်တရက် ပြိုလဲပျက်စီးသွားပေ၏။

ကြောက်မက်ဖွယ်ကောင်းသော ဥပဒေသ မုန်တိုင်းကြီးတစ်ခုသည် ကောင်းကင်နှင့်မြေကြီးကို ချက်ချင်းလွှမ်းခြုံသွားသည်။

ထို့နောက် ခမ်းနားကြီးကျယ်သော ပုံရိပ်ဆယ့်ရှစ်ခုသည် ထိုအရာအတွင်းမှ ချက်ချင်းထွက်ပေါ်လာခဲ့သည်။

ဤခမ်းနားကြီးကျယ်သော ပုံရိပ်ဆယ့်ရှစ်ခုသည် ယခုခရီးစဉ်တွင် ခုံးဝူတောက်၏ လုံခြုံရေးကို ကာကွယ်ရန် တာဝန်ယူထားသော တာအိုအစောင့်အရှောက်များမှလွဲ၍ တခြားသူများ မဟုတ်ကြချေ။

ဤမြင်ကွင်းကို မြင်လိုက်ရသောအခါ မရေမတွက်နိုင်သော ကျင့်ကြံသူများ၏ မျက်နှာများ ချက်ချင်းပင် စက္ကူကဲ့သို့ ဖြူရော်သွားကြသည်။

"အဲ့ဒါ... အဲ့ဒါက... ခြေလှမ်းတစ်ဝက် သူတော်စင်နယ်ပယ် ကျွမ်းကျင်သူ ဆယ့်ရှစ်ယောက်တောင် လား..."