အခန်း (၃၄၉-၃၅၀)

အခန်း (၃၄၉) - ခြိမ်းခြောက်ငွေညှစ်ခြင်း(၁)

“ဒီကနေ့ ကူမိသားစုက အနိုင်ရသွားပါတယ်၊ မနက်ဖြန် သူတို့အနေနဲ့ ရှန်ထူကျွယ်ကို စိန်ခေါ်နိုင်ပါပြီ၊ အဲဒီပွဲကိုပါ နိုင်မယ်ဆိုရင် ဒီနှစ်အတွက် ရှေးဟောင်းကမ္ဘာဦးစေတီ ဝင်ခွင့်နေရာကို ကူမိသားစုက ရရှိမှာပါ”

ဝူယွမ် စင်မြင့်ပေါ်မှ ဆင်းလာချိန်တွင် ရှန်ထူမိသားစု အကြီးအကဲက နောက်ဆုံး ကြေညာချက်ကို ပြုလုပ်လိုက်သည်။

“မနက်ဖြန် မျှော်စင်ကာကွယ်ရေး တိုက်ပွဲမှာ ကြီးကြီးမားမား ကန့်သတ်ချက်တွေ မရှိဘူး၊ မျှော်စင်ကို ကာကွယ်မယ့် ရှန်ထူကျွယ်ကို အနိုင်ယူနိုင်ရင် ရပြီ၊ စိန်ခေါ်သူတွေအနေနဲ့ ငါတို့က လူသုံးယောက်လွှတ်လို့ရတယ်” ကူရွှေ့က ဝူယွမ်ကို ရှင်းပြလိုက်သည်။

“သုံးယောက်တောင်လား၊ မလိုပါဘူး၊ ကျွန်တော် တစ်ယောက်တည်း သွားမယ်” ဝူယွမ်က ခေါင်းယမ်းလိုက်ပြီး သူတစ်ယောက်တည်း ဖြေရှင်းနိုင်ကြောင်း ပြောလိုက်သည်။

ကူယန်နှင့် ကူမုန်ချီတို့၏ စွမ်းအားက ကွာဟချက် အရမ်းကြီးမားလွန်းသဖြင့် သူတို့နှစ်ဦးစလုံး ချက်ချင်း အသတ်ခံရနိုင်ခြေရှိရာ သူတို့ ပါဝင်ခြင်းက အဓိပ္ပာယ်ရှိမည် မဟုတ်ချေ။

“ပြဿနာတော့ မရှိပါဘူး၊ ဒါပေမဲ့ မပေါ့ဆနဲ့၊ ရှန်ထူကျွယ်ကလည်း သာမန် မဟုတ်ဘူး” ကူရွှေက ခေတ္တမျှ စဉ်းစားလိုက်ပြီး ဝူယွမ်ကို မငြင်းဆန်ခဲ့သော်လည်း ညင်သာစွာ သတိပေးလိုက်သည်။

ယခုအခါ သူ့အနေဖြင့် ဝူယွမ်အပေါ် ကြီးမားသော ယုံကြည်မှုများ ရှိနေပြီဖြစ်သည်။ ယခုလေးတင် ဝူယွမ်၏ မဟာရှေးဟောင်းဓားကို တားဆီးခဲ့စဉ်က အသက်စွမ်းအင်များကို တိုက်စားနိုင်သော ထိုလေပြင်းစွမ်းအား များကို ဆန်းကြယ်ရှင်ခြင်း၏ အထွတ်အထိပ်ရှိ ထိပ်သီးပုဂ္ဂိုလ်ဖြစ်သော သူကိုယ်တိုင်ပင် အလွန်အမင်း ဒုက္ခပေးနိုင်စွမ်း ရှိသည်ဟု ခံစားခဲ့ရသည် မဟုတ်ပါလား။

“ဝူယွမ်၊ ရပ်လိုက်စမ်း”

ဝေမိသားစု အကြီးအကဲက ရုတ်တရက် အသံကျယ်ကြီးဖြင့် အော်ဟစ်လိုက်သည်။

သူသည် ယခုအခါ ဝေကျန်း နှင့် အခြားနှစ်ဦး၏ ဘေးတွင် ရှိနေပြီး သူတို့၏ ခန္ဓာကိုယ်များအတွင်းမှ လေပြင်းစွမ်းအား များကို ဖယ်ရှားပေးရန် ကြိုးစားနေသည်။ သို့သော် သူ မည်သို့ပင် လုပ်ဆောင်စေကာမူ လေပြင်းစွမ်းအားများက သူတို့သုံးဦး၏ ခန္ဓာကိုယ်အတွင်း အမြစ်တွယ်နေပုံရသည်။

တစ်လှိုင်းကို ရှင်းလင်းလိုက်လျှင် နောက်တစ်လှိုင်းက ထွက်ပေါ်လာပြီး သူတို့၏ အသက်စွမ်းအင်များကို အဆက်မပြတ် တိုက်စားနေတော့သည်။ ထို့အပြင် ဤလုပ်ငန်းစဉ်အတွင်း သူကိုယ်တိုင်လည်း အလွန် နေရခက်လာသည်ကို ခံစားရပြီး ထိုလေပြင်းစွမ်းအား များကို သူပင်လျှင် သန့်စင်၍ မရနိုင်ကြောင်း သိလိုက်ရသည်။

‘ဒီအတိုင်း ဆက်သွားနေမယ်ဆိုရင် မကြာခင်မှာပဲ သူတို့ သုံးယောက်လုံး အသက်ဆုံးရှုံးရတော့မယ်...’

“တစ်ခုခု မှားလို့လား” ဝူယွမ်က လှည့်ကြည့်လိုက်ပြီး သူ့ကိစ္စ မဟုတ်သလို နေနေသည်။

သို့သော် ကူရွှေ က သူ့ရှေ့တွင် ဝင်ရပ်လိုက်ပြီး ဝေမိသားစု အကြီးအကဲက ဝူယွမ်ကို အန္တရာယ်ပြုလာမည်ကို စိုးရိမ်နေပုံရသည်။

“သိုင်းပြိုင်ပွဲက ပြီးသွားပြီ၊ သူတို့ ခန္ဓာကိုယ်ထဲက အဲဒီစွမ်းအားတွေကို ပြန်နှုတ်ပေးလိုက်စမ်း” ဝေမိသားစု အကြီးအကဲက အမိန့်ပေးသည့် လေသံဖြင့် ပြောလိုက်သည်။

“ကျွန်တော် မနှုတ်ပေးနိုင်ဘူး” ဝူယွမ်က ခပ်ပေါ့ပေါ့ပင် ပြန်ပြောလိုက်သည်။

“မင်း မနှုတ်ပေးရင် သူတို့ သေသွားလိမ့်မယ်” ဝေမိသားစု အကြီးအကဲမှာ စိတ်ပူလာပြီး အသံကျယ်ကြီးဖြင့် အော်ဟစ်လိုက်သည်။

ဝူယွမ် - “ဒါဆို အဲဒါက ကျွန်တော်နဲ့ ဘာဆိုင်လို့လဲ”

“မင်း...”

ဝေမိသားစု အကြီးအကဲက ဝူယွမ်ကို လက်ညှိုးထိုးကာ မေးလိုက်သည်။“မင်းက နိုင်သွားပြီပဲ၊ ဘာတွေများ ထပ်လိုချင်နေသေးလို့လဲ”

“ဒါက အကူအညီတောင်းတဲ့ ပုံစံလား” ဝူယွမ်က ပြုံးလိုက်ပြီး လက်ပိုက်ကာ သူတို့ကို ကြည့်နေလိုက်သည်။

ဝေကျန်းနှင့် အခြား နှစ်ဦးမှာ ဆေးလုံးများနှင့် အားဆေးများကို အမြောက်အမြား ရူးသွပ်စွာ စားသုံးနေကြပြီး လေပြင်းစွမ်းအားများ ပျံ့နှံ့မှုကို နှေးကွေးစေရန် မျှော်လင့်နေကြသည်။

“သိုင်းပြိုင်ပွဲမှာ စည်းမျဉ်းတွေ ရှိတယ်၊ တမင်သက်သက် လူသတ်တာကို တားမြစ်ထားတယ်၊ မင်းက စည်းမျဉ်းတွေကို ဖောက်ဖျက်လိုက်တာပဲ” ဝေမိသားစု အကြီးအကဲက မှိုင်းညို့နေသော အကြည့်များဖြင့် ပြောလိုက်သည်။

“သိုင်းပြိုင်ပွဲက အခု ပြီးသွားပြီလေ၊ ပြီးတော့ သူတို့လည်း မသေသေးဘူး မဟုတ်လား” ဝူယွမ်က ပြန်လည် ချေပလိုက်သည်။

“မိတ်ဆွေလေး ဝူယွမ်၊ ဒီအတိုင်း ဆက်သွားရင် အဘိုးကြီး ဝေလင်တစ်ယောက် သေချာပေါက် စိတ်ပူလာလိမ့်မယ်၊ ဖြစ်နိုင်ရင် သူတို့ကို တန်ဖိုးတစ်ခု ပေးဆပ်ခိုင်းပြီး အဲဒီသုံးယောက်ကို ချမ်းသာပေးလိုက်ပါလား” ကူရွှေက ဝူယွမ်၏ နားနားကပ်ကာ တိတ်တဆိတ် အကြံပေးလိုက်သည်။

ဝူယွမ်သည် လက်ရှိတွင် ကူမိသားစု၏ အပြင်ဘက် အကူအညီဖြစ်ပြီး ကူမိသားစုကို ကိုယ်စားပြုနေသူ ဖြစ်သည်။ ကူမိသားစုသည် ဝေမိသားစုနှင့် ရန်ငြိုးအချို့ ရှိသော်လည်း လုံးလုံးလျားလျား အဆက်အသွယ် မဖြတ်ချင်ကြသေးချေ။

အကယ်၍ ဝေကျန်းနှင့် အခြား နှစ်ဦးသာ သေဆုံးသွားပါက ဝေမိသားစုက သေချာပေါက် ဒီအတိုင်း နေမည်မဟုတ်ဘဲ ကူမိသားစုအပေါ် ရန်ငြိုးဖွဲ့လာမည်မှာ သေချာပေသည်။

“အကြီးအကဲကူ၊ ခင်ဗျားတို့ ကူမိသားစုရဲ့ သခင်လေးက ချန်လော့ရဲ့ ပြင်းပြင်းထန်ထန် တိုက်ခိုက်တာကို ခံလိုက်ရတယ်လေ” ဝူယွမ်က ဖြူရော်သော မျက်နှာဖြင့် ဘီးတပ်ကုလားထိုင်ပေါ်တွင် ထိုင်နေဆဲဖြစ်သော ကူယွမ်ထျန်းကို ကြည့်ကာ ကူရွှေအား ပြောလိုက်သည်။

ဆိုလိုရင်းမှာ ရှင်းလင်းလှပေသည်။ ‘အခြားသူများက ခင်ဗျားတို့ မိသားစု၏ ပါရမီရှင်ကို ဒဏ်ရာရအောင် လုပ်ခဲ့တာတောင် ခင်ဗျားတို့က ဒေါသကို မျိုသိပ်ထားခဲ့တယ်၊ အခု အခြားသူတွေရဲ့ ပါရမီရှင်တွေ သေတော့မယ့် အချိန်ကျမှ ဆက်ဆံရေး ပျက်ပြားသွားမှာကို ခင်ဗျားက စိုးရိမ်နေတယ်ပေါ့လေ'

အထွတ်အထိပ်သို့ ရောက်ရှိရန် ပြင်းပြသော သူ၏ရည်မှန်းချက်များက ခြေလှမ်းတိုင်းတွင် အထင်းသား ပေါ်လွင်နေပေသည်။

ဝူယွမ်၏ စကားများကို ကြားသောအခါ ကူယွမ်ထျန်း၏ မျက်နှာအမူအရာက ပြောင်းလဲသွားပြီး ဝူယွမ်ကို လေးနက်သော ကျေးဇူးတင်မှုများဖြင့် ကြည့်လိုက်သည်... ‘ဒါဆို အစ်ကိုဝူယွမ်က ကျွန်တော့်အတွက် ဒေါသထွက်လို့ ဒါကို လုပ်နေတာပေါ့'

ကူရွှေမှာ အနည်းငယ် ရှက်ရွံ့သွားပြီး ခေါင်းငုံ့သွားတော့သည်။

“အစ်ကိုဝူယွမ်၊ ကျေးဇူးပြုပြီး သဘောထားကြီးကြီးထားပေးပါ၊ ဒါပေမဲ့ ဝေမိသားစုနဲ့ ဆက်ဆံရေး ပျက်ပြားသွားတာက အစ်ကို့အတွက် အကျိုးမရှိနိုင်ဘူး” ကူယွမ်ထျန်းက ဝူယွမ်ကို ရိုးသားစွာ ကြည့်ကာ သူ့အတွက် စိုးရိမ်ပူပန်မှု အချို့ကို ဖော်ပြလိုက်သည်။

မည်သို့ပင်ဆိုစေကာမူ သူတို့၏ အမြင်တွင် ဝူယွမ်သည် လက်ရှိတွင် တစ်ကောင်တည်းသော ဝံပုလွေတစ်ကောင်ဖြစ်ပြီး ဝေမိသားစုကဲ့သို့သော ကြီးမားလှသည့် အင်အားစုကြီးကို ရန်စရန်မတတ်နိုင်ချေ။

ဝူယွမ်က ခေါင်းညိတ်လိုက်ပြီးနောက် ပြောလိုက်သည်။ “အကြီးအကဲဝေလင်၊ ကျွန်တော်က သူတို့ကို မကယ်ချင်တာ မဟုတ်ပါဘူး၊ ဒါပေမဲ့ အဲဒီ စွမ်းအားတွေကို သူတို့ဆီကနေ ဖယ်ရှားဖို့က ကျွန်တော့်ရဲ့ စွမ်းအင်တွေကိုလည်း အများကြီး ကုန်ဆုံးစေတယ်လေ၊ မနက်ဖြန် ကျွန်တော်က ရှန်ထူကျွယ်ကို ရင်ဆိုင်ရဦးမှာ”

သူက ဝေမိသားစုကို ခြိမ်းခြောက်ငွေညှစ်ရန် ပြင်ဆင်နေခြင်း ဖြစ်သည်။ မည်သို့ပင်ဆိုစေ ဝေကျန်းနှင့် အခြားနှစ်ဦး၏ အသက်များက သူ့အတွက် အသုံးမဝင်ချေ။

ဝေလင် - “မင်း ဘာလိုချင်လို့လဲ၊ နောက်ထပ် တစ်ရက်သာ ထပ်ကြာသွားရင် သူတို့ သုံးယောက်လုံး သေသွားလိမ့်မယ်”

“အကြီးအကဲဝေလင်၊ အရမ်း ဒေါသထွက်မနေပါနဲ့၊ သဟဇာတဖြစ်ခြင်းက ချမ်းသာကြွယ်ဝမှုကို ဆောင်ကြဉ်းလာတယ် မဟုတ်လား၊ တစ်ယောက်ကို ဆန်းကြယ်ယွမ်ဆေးလုံး ငါးသိန်း၊ ဘယ်လိုလဲ” ဝူယွမ်က လက်ညှိုးကို ဆန့်ထုတ်ကာ အမူအရာပြသရင်း ပြောလိုက်သည်။

“တစ်ယောက်ကို ငါးသိန်း၊ သုံးယောက်အတွက် တစ်သန်းခွဲလား၊ မင်းက ငါတို့ကို တိုက်ရိုက် ဓားမြတိုက်လိုက်ပါလား” ဝေလင်၏ မျက်နှာမှာ ချက်ချင်းပင် အလွန် အရုပ်ဆိုးသွားတော့သည်။

“တစ်သန်းခွဲလား”

ဤဂဏန်းကို ကြားလိုက်ရချိန်တွင် ပတ်ဝန်းကျင်ရှိလူတိုင်း အံ့အားသင့်သွားကြသည်။

ယခင်က ကူမိသားစုသည် မိုထောင်းကို အပြင်ဘက် အကူအညီအဖြစ် ဖိတ်ခေါ်ရန် ဆန်းကြယ်ယွမ်ဆေးလုံး တစ်သိန်းသာ အသုံးပြုခဲ့ရကြောင်း သတိပြုရန် လိုအပ်ပေသည်။

ဤပမာဏသည် ဝေမိသားစုကဲ့သို့သော မိသားစုကြီးတစ်ခုအတွက်ပင် ကြီးမားသော ထိုးနှက်ချက်တစ်ခု ဖြစ်နေပြီဖြစ်သည်။

ဝူယွမ် - “ဒီသုံးယောက်ကို ကူညီဖို့က ကျွန်တော့်ရဲ့စွမ်းအင်တွေကို အများကြီး ကုန်ဆုံးစေတယ်၊ ဒါက တိကျတဲ့ဈေးနှုန်းပဲ၊ အလျော့အတင်း မရှိဘူး၊ အကယ်၍ ခင်ဗျားတို့ မတတ်နိုင်ဘူးဆိုရင် ခင်ဗျားတို့ဘာသာ ခင်ဗျားတို့ ကြည့်ရှင်းကြတော့”

သူ၏ လေသံက အလွန်ပြတ်သားနေပြီး ဝေမိသားစုကို ဈေးဆစ်ခွင့် လုံးဝမပေးခဲ့ချေ။

ဝေလင် ၏ မျက်နှာမှာ အလွန် မှိုင်းညို့နေသည်။ ဤကြွယ်ဝချမ်းသာမှု ပမာဏသည် သူတို့ ဝေမိသားစု၏ တစ်နှစ်ကျော်စာ အမြတ်ငွေနှင့် ညီမျှပေသည်။ ၎င်းကို ထုတ်ပေးရခြင်းက သူ့ကို နာကျင်စေမည်ဖြစ်သည်။

“ဝူယွမ်၊ ငါ့ဆရာက မိစ္ဆာလေ လျှို့ဝှက်ဂူ ရဲ့ ဂုဏ်ထူးဆောင် ဧည့်သည်တော် အရိုးအဘိုးအိုပဲ၊ အကယ်၍ ငါသေသွားရင် သူက မင်းကို သေချာပေါက်လက်စားချေလိမ့်မယ်” ဝေမိသားစု၏ မျက်နှာအမူအရာများ ပြောင်းလဲသွားသည်ကို မြင်သောအခါ ချန်လော့က ခြိမ်းခြောက်လိုက်သည်။

ဝူယွမ် - “ငါ့ကို ခြိမ်းခြောက်နေတာလား၊ ဟဲဟဲ၊ အခု မင်းကိုကယ်ဖို့ တစ်သန်းပေးရမယ်”

ချန်လော့၏ မျက်နှာမှာ ချက်ချင်း တောင့်တင်းသွားပြီး သူ ထပ်မပြောရဲတော့ချေ။

“သူတို့ကို အရင် ကယ်ပေးလို့ ရမလား၊ ငါတို့ဆီမှာ အဲဒီလောက် ဆေးလုံးတွေ အများကြီး မပါလာဘူး၊ အခု မင်းအတွက် သွားစုပေးမယ်လေ” ဝေလင် က သူ၏မျက်လုံးများထဲတွင် ကောက်ကျစ်သော အရိပ်အယောင်တစ်ခု လက်ခနဲဖြစ်သွားရင်း ပြောလိုက်သည်။

ဝူယွမ် - “ငါ မင်းတို့ကို အများဆုံး သုံးမိနစ်ပဲစောင့်မယ်၊ ဆန်းကြယ်ယွမ်ဆေးလုံးတွေ မရဘူးဆိုရင် ငါ ထွက်သွားမယ်၊ ပြီးရင် မင်းတို့ကို ဆက်ပြီး ဂရုစိုက်နေမှာ မဟုတ်ဘူး၊ အကယ်၍ ဆန်းကြယ်ယွမ်ဆေးလုံးတွေ မလုံလောက်ဘူးဆိုရင် တခြား တန်ဖိုးတူတဲ့ ပစ္စည်းတွေနဲ့ အစားထိုးလို့ ရတယ်”

ထိုသို့ပြောပြီးနောက် ဝူယွမ်က ထိုလူများကို ဆက်လက်အာရုံမစိုက်တော့ချေ။

ဆန်းကြယ်ယွမ်ဆေးလုံးများသည် ဆန်းကြယ်ရှင်ခြင်းအဆင့် ကျင့်ကြံသူများအတွက် အသုံးဝင်ပြီး အလွန်ကောင်းမွန်သော အရင်းအမြစ်များ ဖြစ်သည်။ ဝူယွမ်ကလည်း အချို့ကို စုဆောင်းရန် ပြင်ဆင်နေခြင်း ဖြစ်သည်။

သူကိုယ်တိုင်လည်း ၎င်းတို့ကို လိုအပ်နေသည် မဟုတ်လော။

ဝူယွမ်က အလျှော့မပေးသည်ကို မြင်သောအခါ ဝေလင်မှာ ရွေးချယ်စရာ မရှိတော့ဘဲ ဆေးလုံးများကို သွားရောက် စုဆောင်းရတော့သည်။

မူလက ဝေလင်သည် သူ၏လွှမ်းမိုးမှုကို အသုံးပြု၍ ဝူယွမ်ကို အနိုင်ကျင့် ဗိုလ်ကျရန် ရည်ရွယ်ထားသော်လည်း အစောပိုင်းက သူ လှုပ်ရှားခဲ့စဉ်က ဝူယွမ်၏ စွမ်းအားကို သူခံစားခဲ့ရပြီးဖြစ်သည်။ ထိုလေပြင်းစွမ်းအား က သူ့ကိုပင် တုန်လှုပ်သွားစေခဲ့ပြီး သူ အနိုင်ယူနိုင်စွမ်း မရှိလောက်ချေ။

ဝေလင်က ဝေမိသားစုဝင်အားလုံးကို စုစည်းလိုက်ပြီး သူတို့၏ သိုလှောင်အိတ်များကို တစ်လုံးချင်းစီ စုဆောင်းလိုက်သည်။ အရေအတွက်ကို စစ်ဆေးပြီးနောက် သူက မှိုင်းညို့နေသော မျက်နှာဖြင့် ချန်လော့ထံသို့ ရောက်လာပြီး ဘာမှမတတ်နိုင်သလို ပြောလိုက်သည်။

“ချန်လော့၊ ငါတို့ ဝေမိသားစုက မင်းကို ပေးရမယ့် ဆုလာဘ်က ဆန်းကြယ်ယွမ်ဆေးလုံး သုံးသိန်းပဲ၊ ကျန်တဲ့ ခုနစ်သိန်းကို မင်းဘာသာမင်း ပေးရလိမ့်မယ်”

“ဘာ၊ အကြီးအကဲဝေ၊ ကျွန်တော်က ဒါကို ခင်ဗျားတို့ ဝေမိသားစုအတွက် လုပ်ပေးခဲ့တာလေ”

ချန်လော့က ဝေလင် ကို မကျေမနပ်ဖြင့် ကြည့်လိုက်သည်။

အခန်း (၃၅၀) - ခြိမ်းခြောက်ငွေညှစ်ခြင်း(၂)

“ငါတို့ လုပ်နိုင်တာ ဘာမှမရှိဘူး၊ အခု ငါတို့ စုဆောင်းနိုင်တာက တစ်သန်းသုံးသိန်းပဲ ရှိတယ်၊ ပြီးတော့ မင်းက ငါတို့ဝေမိသားစုကို သိုင်းပြိုင်ပွဲမှာ နိုင်အောင်တောင် မကူညီပေးခဲ့ဘူးလေ” ဝေလင် က အေးစက်စက် ပြောလိုက်သည်။

ချန်လော့ကိုယ်တိုင် ဝူယွမ်ကို ရန်စခဲ့ခြင်းကြောင့် ဈေးနှုန်းက တစ်သန်းအထိ တက်သွားရခြင်း ဖြစ်သည်။ သူတို့၏အကူအညီ သုံးသိန်းကပင် ကူညီထားခြင်း ဖြစ်လေသည်။

“ခင်ဗျား...” ချန်လော့မှာ လတ်ဆတ်သော သွေးတစ်ပွက်ကို တိုက်ရိုက် အန်ထုတ်လိုက်ရတော့သည်။

သူ၏ ကိုယ်ပိုင် သိုလှောင်အိတ်ကို ထုတ်ယူလိုက်ရာ ၎င်းအတွင်း၌ ဆန်းကြယ်ယွမ်ဆေးလုံး နှစ်သိန်းကျော်နှင့် ပစ္စည်းအမြောက်အမြား ပါဝင်နေသည်။ သူက ၎င်းတို့သည် တစ်သိန်းခန့် တန်ကြေးရှိမည်ဟု အကြမ်းဖျင်း တွက်ချက်လိုက်၏။

နှစ်သိန်း လိုနေသေးသည်။

“တစ်သန်း၊ ဝေကျန်းနဲ့ ဝေလီကို အရင် ကယ်ပေးပါ”

ဝေလင်က သိုလှောင်အိတ်နှစ်လုံးကို ဝူယွမ်ဆီသို့ ပစ်ပေးလိုက်သည်။

ဝူယွမ်က သူ၏ ဝိညာဉ်စွမ်းအင်ဖြင့် အကြမ်းဖျင်း စစ်ဆေးကြည့်လိုက်ရာ ဆန်းကြယ်ယွမ်ဆေးလုံး ရှစ်သိန်းနှင့် ပစ္စည်းအမြောက်အမြားကို တွေ့လိုက်ရသည်။

“ဒီပစ္စည်းတွေက ဆန်းကြယ်ယွမ်ဆေးလုံး နှစ်သိန်း တန်မတန် ကျွန်တော့်ကို ကူတွက်ပေးကြပါဦး” ဝူယွမ်က ပစ္စည်းများပါဝင်သော သိုလှောင်အိတ်ကို ကူယန်ဆီသို့ ပစ်ပေးလိုက်ရင်း ပြောလိုက်သည်။

ကူယန်နှင့် ကူမုန်ချီတို့က သူတို့၏ တံတွေးများကို ခက်ခဲစွာ မျိုချလိုက်ကြပြီး ဝူယွမ်၏လွှမ်းမိုးနိုင်စွမ်းရှိပြီး အစွမ်းထက်လှသော အမူအရာကို လေးစားအားကျစွာဖြင့် ကြည့်နေကြသည်။

“ငါ့ရဲ့ ဒီတစ္ဆေတစ်သောင်း ဝိညာဉ်မျိုလှံက ကောင်းကင်အဆင့် ဝိညာဉ်ရတနာ အမြင့်ဆုံးအဆင့်ပဲ၊ အဲဒါကို သွန်းလုပ်တုန်းက ပစ္စည်းတွေချည်းပဲ ဆန်းကြယ်ယွမ်ဆေးလုံး ခုနစ်သိန်း ကုန်ကျခဲ့တယ်၊ လေလံတင်ရောင်းမယ်ဆိုရင် သေချာပေါက် တစ်သန်းကျော် တန်လိမ့်မယ်” ချန်လော့က သူ၏ လက်ထဲရှိ အနက်ရောင် လှံရှည်ကို ပစ်ချလိုက်ပြီး နာကျင်နေသည့်အလား ပြောလိုက်သည်။

ဝူယွမ်က လက်ဝှေ့ယမ်းလိုက်ကာ လှံကိုယူပြီး စစ်ဆေးကြည့်လိုက်သည်။ ထို့နောက် ခေါင်းယမ်းလိုက်ပြီး ပြောလိုက်သည်။

“ခုနစ်သိန်းက ခုနစ်သိန်းပဲ၊ ဘာ ‘တစ်သန်းကျော်’ လဲ၊ မင်းက ပွဲစားလုပ်ပြီး ဈေးကွာဟချက်ကို အမြတ်ထုတ်ချင်နေသေးတာလား၊ ပြီးတော့ ဒီလှံက ငါ့ရဲ့ စွမ်းရည်တွေနဲ့လည်း မကိုက်ညီဘူး၊ အလွန်ဆုံး ငါးသိန်းပဲ တန်တယ်၊ မင်း ငါ့ကို နောက်ထပ် ငါးသိန်းပေးဖို့ လိုသေးတယ်”

“မင်း...” ချန်လော့မှာ လတ်ဆတ်သော သွေးတစ်ပွက်ကို တိုက်ရိုက် အန်ထုတ်လိုက်ရပြန်သည်။

“ယူလိုက်၊ ယူလိုက်၊ အကုန်ယူလိုက်”

သူက သူ၏ကိုယ်ပိုင် သိုလှောင်အိတ်ကို ပစ်ချလိုက်ပြီး ပြောလိုက်သည်။ “ဝေမိသားစုရဲ့ သုံးသိန်းအပါအဝင်ဆိုရင် လုံလောက်သွားပြီ”

ဝေလင်ကလည်း အချိန်ကိုက်ပင် ဝူယွမ်ကို နောက်ထပ် ဆန်းကြယ်ယွမ်ဆေးလုံး သုံးသိန်း ပေးလိုက်သည်။

ဝူယွမ်က သိုလှောင်အိတ်ကို ယူလိုက်ပြီး ချန်လော့သည်လည်း အရာအားလုံးကို ပေးလိုက်ကြောင်း တွေ့လိုက်ရသည်။ ဆန်းကြယ်ယွမ်ဆေးလုံး နှစ်သိန်းကျော်နှင့် ပစ္စည်းအမြောက်အမြား ပါဝင်နေပေသည်။

ဝူယွမ်က ကျေနပ်စွာဖြင့် ခေါင်းညိတ်လိုက်ပြီး သူတို့ သုံးဦးဆီသို့ လျှောက်သွားကာ ဝိညာဉ်စွမ်းအင်များ ပျံ့နှံ့ထွက်ပေါ်လာပြီး သူတို့၏ ခန္ဓာကိုယ်များအတွင်းသို့ ဝင်ရောက်ကာ လေပြင်းစွမ်းအားများအားလုံးကို စုပ်ယူလိုက်သည်။

ထိုသုံးဦး၏ အရှိန်အဝါများ အလျင်အမြန် တည်ငြိမ်သွားပြီး သူတို့၏ ခန္ဓာကိုယ်မှ အသက်စွမ်းအင်များလည်း အလျင်အမြန် ပြန်လည် ကောင်းမွန်လာတော့သည်။

ဟူး...

ထိုသုံးဦးမှာ အသက်ကို လုရှူလိုက်ရသည်။ ချန်လော့ သည် စွမ်းအားအနည်းငယ် ပြန်လည်ရရှိလာပြီးနောက် တိုက်ရိုက်ပင် ထွက်ခွာသွားတော့သည်။

သူက ဝေမိသားစုကို ဆက်ပြီး အားကိုးလို့ မရတော့ချေ။ သူ၏ဆရာဖြစ်သော အရိုးအဘိုးအိုကို သွားရှာပြီး တရားမျှတမှု ရရှိအောင် ကူညီပေးရန် တောင်းဆိုရမည်ဖြစ်သည်။

ဝူယွမ်က သူ့ကို လုပ်ခဲ့သမျှအရာအားလုံး ဝူယွမ်ကို အရင်းရော အတိုးပါ နှစ်ဆ ပြန်အန်ထုတ်ခိုင်းရမည်ဖြစ်သည်။

ဝေလင်လည်း ဝေကျန်း၊ ဝေလီတို့နှင့်အတူ စိတ်ပျက်လက်ပျက်ဖြင့် ထွက်ခွာသွားတော့သည်။

သူက ဤကိစ္စကို သူ၏မိသားစုမှ သီးသန့်တံခါးပိတ်ကျင့်ကြံနေသော ဘိုးဘေးထံ သတင်းပို့ရမည်ဖြစ်သည်။ ဤကိစ္စကို ဒီအတိုင်း လျစ်လျူရှုထား၍ မရနိုင်ချေ။

သူတို့ ဝေမိသားစုသည် ဤမျှ ကြီးမားသော ဆုံးရှုံးမှုမျိုးကို တစ်ကြိမ်တစ်ခါမျှ မခံစားခဲ့ရဖူးချေ။

“မိုက်တယ်ဟေ့၊ အမြဲတမ်း မောက်မာနေတတ်တဲ့ ဝေမိသားစုကို ဒီလောက်တောင် ကျိုးနွံသွားအောင် လုပ်နိုင်တဲ့ ဒီဝူယွမ်ဆိုတဲ့ မသေမျိုးပုဂ္ဂိုလ်ကြီးက ဘယ်သူများလဲ”

“ပြီးတော့ အဲဒီ ချန်လော့က မိစ္ဆာလေ လျှို့ဝှက်ဂူက ဖြစ်တာကို အားကိုးပြီး သာမန်ရက်တွေမှာ မကောင်းတာတွေ နည်းနည်းပါးပါး လုပ်ခဲ့တာမဟုတ်ဘူး၊ ဒီနေ့တော့ ပြိုင်ဘက်ကောင်းနဲ့ တွေ့သွားပြီ၊ ကျေနပ်စရာပဲ၊ ကျေနပ်စရာပဲ”

“မနက်ဖြန် မျှော်စင်ကာကွယ်ရေး တိုက်ပွဲကို ဝူယွမ် နိုင်မယ်လို့ ငါ ခံစားနေရတယ်”

“အခု ငါ ဒီဝူယွမ်ကို ပိုပိုပြီးလေးစားလာပြီ”

...ဤမျှ ဗြောင်ကျကျ ခြိမ်းခြောက်ငွေညှစ်ခြင်းကြောင့် ဝေမိသားစုနှင့် ချန်လော့ တို့မှာ အလွန် ကြီးမားသော ဆုံးရှုံးမှုကြီးကို ခံစားလိုက်ရသည်။ ဝူယွမ်၏ လွှမ်းမိုးနိုင်စွမ်းရှိပြီး အစွမ်းထက်လှသော လုပ်ရပ်များက စောင့်ကြည့်နေသူများကို စကားပင် မပြောနိုင်လောက်အောင် အံ့အားသင့်သွားစေခဲ့သည်။

ယနေ့ သိုင်းပြိုင်ပွဲကျွန်းတွင် လူများ ပြည့်နှက်နေပေသည်။ ဝူယွမ်၏ လုပ်ရပ်များက ထျန်းဖုန်း ပင်လယ်နယ်မြေ တစ်ခုလုံးတွင် သူ့ကို နာမည်ကျော်ကြားသွားစေရန် အလားအလာ ရှိပေသည်။

“အစ်ကိုကြီးဝူယွမ်၊ သတိထားရမယ်နော်၊ ဝေမိသားစုနဲ့ ချန်လော့က ဒါကို သေချာပေါက် ဒီအတိုင်း လွှတ်ထားမှာ မဟုတ်ဘူး” ကူယန်က သတိပေးလိုက်သည်။

“ဝေမိသားစုက ကိစ္စမရှိပါဘူး၊ ငါတို့ ကူမိသားစုက သူတို့ကို ထိန်းထားနိုင်သေးတယ်၊ ဒါပေမဲ့ ချန်လော့ထွက်သွားတာကတော့ သေချာပေါက် အရိုးအဘိုးအိုကို သွားရှာဖို့ပဲ ဖြစ်ရမယ်” ကူယွမ်ထျန်းက ပြောလိုက်သည်။

သူတို့အားလုံး ဝူယွမ်အတွက် စိုးရိမ်နေကြသည်။

“မိတ်ဆွေလေး ဝူယွမ်၊ ငါတို့ ကူမိသားစုထဲကို ဝင်ပြီး ကူမိသားစုရဲ့ ဂုဏ်ထူးဆောင် ဧည့်သည်တော် ဖြစ်လာရင် မကောင်းဘူးလား၊ ဒါဆိုရင် ဝေမိသားစုနဲ့ အရိုးအဘိုးအိုက မင်းကို ပြဿနာလာရှာရင် ငါတို့ ကူမိသားစုက မင်းကို ကူညီဖို့ ခိုင်လုံတဲ့ အကြောင်းပြချက် ရှိသွားတာပေါ့”

ကူရွှေ့က ဤအခွင့်အရေးကို အသုံးချ၍ သူ့ကို စည်းရုံးရန် ကြိုးစားလိုက်သည်။

သူက ဝူယွမ်ကို ဆွဲဆောင်ရန် အချိန်ကြာမြင့်စွာကတည်းက လိုလားနေခဲ့ပြီး ဤသည်မှာ အကောင်းဆုံးသော အခွင့်အရေးပင် ဖြစ်သည်။

“အကြီးအကဲကူရွှေ့ ရဲ့ စေတနာကို ကျေးဇူးတင်ပါတယ်၊ ဒါပေမဲ့ စိုးရိမ်စရာမလိုပါဘူး၊ အကယ်၍ ကျွန်တော်က သူတို့ကို ရန်စရဲတယ်ဆိုမှတော့ သူတို့ရဲ့ လက်စားချေမှုကို ကြောက်နေမှာ မဟုတ်ပါဘူး” ဝူယွမ်က အပြုံးဖျော့ဖျော့လေးဖြင့် ပြောလိုက်သည်။

သူက ငါးမျှားနေခြင်းပင်။ ငါးကြီးကြီးကိုပေါ့။

“ပြန်ကြစို့” ဝူယွမ်က ထွက်ခွာရန် လှည့်လိုက်သည်။

ဤအချိန်တွင် စွမ်းအားတစ်ခုက သူ့ကို လွှမ်းခြုံလာတော့သည်။ သူ၏ မျက်နှာအမူအရာ တောင့်တင်းသွားပြီး ခေါင်းကို ရုတ်တရက်လှည့်ကာ တောင်ထိပ်ဆီသို့ သူ၏အကြည့်များ ဝေ့ဝဲသွားတော့သည်။

ကောင်းကင်ယံအထက် လေထဲ၌ မတ်တတ်ရပ်နေသော ပုံရိပ်တစ်ခု ရှိနေလေသည်။ လေးလံသော အရှိန်အဝါတစ်ခုက အသက်ရှူရခက်ခဲစေပြီး မှေးမှိန်စွာဖြင့် ဖြည်းညင်းစွာ ပျံ့နှံ့လာနေသည်။

တောင်ပေါ်ရှိ လူတိုင်းက ၎င်းကို ခံစားလိုက်ရပြီး တောင်ထိပ်ရှိ ပုံရိပ်ကို အံ့အားသင့်စွာဖြင့် ကြည့်လိုက်ကြသည်။ ထို့နောက် သူတို့၏ မျက်လုံးများမှာ အနည်းငယ် လေးနက်သွားကြပြီး အစွမ်းထက်လှသော အရှိန်အဝါနှင့် ဖိအားများကို သတိပြုမိသွားကြသည်။

“သံမဏိအသူရာ ရှန်ထူကျွယ်”

လူတစ်ဦးက အံ့သြတကြီး အော်ဟစ်လိုက်ပြီး ထိုပုံရိပ်ကို မှတ်မိသွားသည်။

ရှန်ထူကျွယ်က လေထဲတွင် မတ်တတ်ရပ်နေပြီး သူ၏ မျက်လုံးများက ကြိတ်ကြိတ်တိုး စည်ကားနေသော လူအုပ်ကြီးကို ဝေ့ကြည့်လိုက်ကာ နောက်ဆုံးတွင် ဝူယွမ်အပေါ်၌ ရပ်တန့်သွားတော့သည်။

ထိုအကြည့်များ ရောက်ရှိလာသည်နှင့် တစ်ပြိုင်နက် ဝူယွမ်၏မျက်လုံးများထဲတွင် ထက်ရှသော အရောင်တစ်ခု လက်ခနဲဖြစ်သွားသည်။

ထို့နောက် သူ၏ရှေ့ရှိ ကောင်းကင်ယံမှ ယွမ်စွမ်းအင်များ ရူးသွပ်စွာ စုစည်းလာပြီး နောက်ဆုံးတွင် ယွမ်စွမ်းအင် တောင်ကြီးတစ်လုံးအဖြစ် ပြောင်းလဲသွားကာ အလွန်အမင်း လေးလံစွာ ဖိဆင်းလာသည်ကို သူ ခံစားလိုက်ရသည်။

“ဘာလို့ သူတို့က ဖိအားပေးရတာကို အမြဲတမ်း သဘောကျနေကြတာလဲ” ဝူယွမ်က စိတ်ထဲမှ တီးတိုးရေရွတ်လိုက်သည်။

ဤလူများက သူတို့၏အရှိန်အဝါကို ထုတ်လွှတ်ပြီး အခြားသူများကို ဖိနှိပ်ရသည်ကို အမြဲတမ်း နှစ်သက်ကြသည်။ ၎င်းက သူတို့ကို အထင်ကြီးစရာ ကောင်းပုံပေါ်စေသည်ဟု ထင်နေကြသည်။

“မင်းက တော်တော်လေးဆိုးတာပဲ၊ ငါ အရမ်း သဘောကျတယ်” ရှန်ထူကျွယ်က နှုတ်ခမ်းတွန့်ကာ ဝူယွမ်ကို ပြောလိုက်သည်။

သူက ဝူယွမ် ခြိမ်းခြောက်ငွေညှစ်သည့် လုပ်ရပ်များ ဆက်တိုက် ပြုလုပ်နေသည်ကို မျက်မြင်ကိုယ်တွေ့ မြင်တွေ့ခဲ့ရပြီး ၎င်းတို့က သူ၏အကြိုက်နှင့် အလွန် ကိက်ညီပေသည်။

“အို ဒါဆိုရင် မင်းရဲ့ အကြိုက်က တကယ်ကို ကောင်းတာပဲ” ဝူယွမ်က သူ့ကို လက်မထောင်ပြလိုက်သည်။

ထို့နောက် စိတ်ဝင်တစားဖြင့် ပြောလိုက်သည်။ “မင်းလည်း ပေါ်လာပြီဆိုတော့ မျှော်စင်ကာကွယ်ရေး တိုက်ပွဲကို တိုက်ရိုက် စလိုက်ရင် မကောင်းဘူးလား၊ စောင့်နေစရာ မလိုတော့ဘူးလေ”

ရှန်ထူကျွယ် - “ခုနကပဲ အဲဒီသုံးယောက်ကို ကယ်တာ မင်းရဲ့ စွမ်းအင်တွေကို အများကြီး ကုန်ဆုံးသွားစေတယ်လို့ မင်း ပြောခဲ့တယ် မဟုတ်ဘူးလား၊ သူတစ်ပါး အားနည်းနေတဲ့ အချိန်ကို အခွင့်ကောင်း မယူချင်ဘူး”

“မင်း ပြန်လည် ကောင်းမွန်လာတဲ့အထိ စောင့်ကြတာပေါ့၊ မင်းနဲ့ အထွတ်အထိပ် တိုက်ပွဲတစ်ခု တိုက်ရဖို့ ငါ တကယ်ကို စောင့်မျှော်နေတယ်”

“အာ ဟုတ်သားပဲ၊ ငါ မေ့တောင်မေ့သွားတယ်” ဝူယွမ်က ခေါင်းကို ပုတ်ကာ ပြောလိုက်သည်။

လူတိုင်းမှာ စကားပင် မပြောနိုင်အောင် ဖြစ်သွားကြသည်။ ‘မင်းက အားနည်းနေတာလား၊ ဒါမှမဟုတ် အားမနည်းဘူးလား'

သို့သော် ဝူယွမ်၏လေသံက ပြောင်းလဲသွားပြီး ပြောလိုက်သည်။ “ဒါပေမဲ့ အများကြီးတော့ မထိခိုက်သွားပါဘူး၊ မင်းကို တိုက်ဖို့ဆိုရင် လုံလောက်တယ်”

“မင်း အခု တကယ် ငါနဲ့ တိုက်ချင်နေတာ သေချာလား” ဤသည်မှာ ရှန်ထူကျွယ်အနေဖြင့် သူ့ကို ဤမျှလောက် အထင်သေးသော ရွယ်တူတစ်ဦးကို ပထမဆုံးအကြိမ် ကြုံတွေ့ဖူးခြင်းပင်ဖြစ်သည်။

လျှို့ဝှက်ဂူ နှစ်ခုရှိ ထိပ်တန်း ပါရမီရှင် နှစ်ဦးပင်လျှင် သူ့ကို ဤမျှလောက်အထင်သေးရန် မဝံ့ရဲကြချေ။

ထို့ကြောင့် ဝူယွမ်၏စကားများကို ကြားလိုက်ရသောအခါ သူလည်း အနည်းငယ် ဒေါသထွက်သွားခဲ့သည်။

“မဖြစ်နိုင်တာ၊ သူတို့ အခု တိုက်ကြတော့မလို့လား”

“ဒီဝူယွမ်က အရမ်းအံ့သြစရာကောင်းလွန်းတယ်၊ သူက ရှန်ထူကျွယ်ကို သူ့မျက်လုံးထဲမှာတောင် မထည့်ထားဘူး”

“သူက လေတစ်လုံးမိုးတစ်လုံးတွေ ပြောနေတာ မဟုတ်ဖို့ မျှော်လင့်ပါတယ်”

“မြန်မြန် တိုက်ကြစမ်းပါ၊ ဒီနှစ်ယောက် ယှဉ်ပြိုင်တာကို ကြည့်ဖို့ ငါ စိတ်မရှည်တော့ဘူး”

“အကယ်၍ သူက ရှန်ထူကျွယ်ကို မနိုင်ဘူးဆိုရင် ဒီဝူယွမ်က အကြီးအကျယ် အရှက်ကွဲရတော့မှာပဲ၊ စက္ကူကျားတစ်ကောင်ကတော့ ဝေမိသားစုရဲ့ လက်စားချေတာကို သေချာပေါက်ခံရမှာပဲ”

“သူ တကယ် မောက်မာတာလား၊ ဒါမှမဟုတ် ဟန်ဆောင်နေတာလား ဆိုတာက သူ့မှာ တကယ့်စွမ်းရည် ရှိမရှိဆိုတာကိုပဲ ကြည့်ပြီးဆုံးဖြတ်ကြတာပေါ့”

ဝူယွမ်၏ စိန်ခေါ်မှုကြောင့် ကွင်းပြင်ကြီးမှာ ချက်ချင်းပင် ဆူညံပွက်လောရိုက်သွားတော့သည်။ ထွက်ခွာရန် ပြင်ဆင်နေသူများပင်လျှင် နောက်ပြန်လှည့်လာကြပြီး ထိုနှစ်ဦးကို မျှော်လင့်တကြီးဖြင့် ကြည့်နေကြသည်။

အခြေအနေအရ ကြည့်လျှင် သိုင်းပြိုင်ပွဲ၏ အန္တိမတိုက်ပွဲကြီးသည် စောစီးစွာ ရောက်ရှိလာတော့မည့် ပုံရပေသည်။

“အပိုစကားတွေ ပြောမနေနဲ့တော့၊ တိုက်ရိုက်ပဲ တိုက်ကြတာပေါ့၊ စောစောပြီးရင် စောစောအနားယူလို့ရတယ်”

ဝူယွမ်၏ ပုံရိပ်က လက်ခနဲဖြစ်သွားပြီး လေထဲတွင် ပေါ်လာကာ ရှန်ထူကျွယ်၏ မျက်နှာချင်းဆိုင်တွင် ရပ်လိုက်သည်။

သူ့အတွက်မူ သိုင်းပြိုင်ပွဲဆိုသည်မှာ ကလေးကစားစရာ တစ်ခုမျှသာဖြစ်ရာ အချိန်ကုန်သက်သာနိုင်သမျှ သက်သာအောင် လုပ်ဆောင်မည်ဖြစ်သည်။

“ကောင်းပြီ၊ ဒါဆိုလည်းတိုက်ကြတာပေါ့” ရှန်ထူကျွယ်ကလည်း လိုလိုလားလားပင် သဘောတူလိုက်သည်။