အခန်း (၃၁၄)

ရွှီရန်က အချိန်ကျောက်မျက်ကို အသာအယာ ပုတ်လိုက်ရင်း "ဒီကျောက်မျက်ကို ဘေးအန္တရာယ်ဇုန်ထဲက မှိုမြို့တော်ရဲ့ အမြင့်ဆုံး ခုနစ်ထပ်မှိုမျှော်စင်ထိပ်မှာ ငါတွေ့ခဲ့တာ။ သူ့ထဲမှာ အချိန်ရဲ့စွမ်းအားတွေ ကိန်းအောင်းနေတာကို မြင်လိုက်ရလို့ ငါယူလာခဲ့တာပဲ။ အလေးချိန်ကတော့ သုံးတန်တိတိ ရှိတယ်"

လူတိုင်းမှာ နောက်တစ်ကြိမ် ထပ်မံ မှင်သက်သွားကြရပြန်သည်။

"ဒီလောက်ကြီးတဲ့ ကျောက်တုံးကြီးကို ဘေးအန္တရာယ်ဇုန်ထဲကနေ ဘေးကင်းဇုန်အထိ သယ်လာခဲ့တာလား အဲဒါက အရမ်း အန္တရာယ်မများလွန်းဘူးလား"

ရွှီရန်က ခေါင်းခါပြလျက် "အန္တရာယ်မရှိပါဘူး လမ်းမှာ နတ်ဘုရားအဆင့် သတ္တဝါတွေနဲ့လည်း မတိုးခဲ့ပါဘူး။ ယွီဟန်လေး... မင်း လာကြည့်ဦး ဒီထဲကနေ စွမ်းအားတစ်မျိုးမျိုး ဒါမှမဟုတ် အကျိုးကျေးဇူးတစ်ခုခုကို ထုတ်ယူလို့ရမလားဆိုတာ စမ်းကြည့်ရအောင်"

ကျူးယွီဟန်၏ ပြာလဲ့လဲ့မျက်ဝန်းလေးများက ရွှီရန်ကို အားနည်းစွာ ကြည့်လိုက်ပြီး "အခု... အခုချက်ချင်းကြီးလား"

"အခုပဲ စမ်းကြည့်လိုက်ရအောင်လေ ကြည့်ဦး... ကျားမလေးတောင် စမ်းကြည့်ပြီးသွားပြီ..."

လူမိသွားသဖြင့် ကျားမလေးက အနေခက်စွာ ရယ်မောလိုက်ရင်း "ဒါက ငါနဲ့တော့ မကိုက်ပါဘူး... ဘာမှလည်း ထူးမခြားနားဘူး ယွီဟန်... မင်းပဲ စမ်းကြည့်လိုက်တော့ ဒီထဲမှာ အချိန်ရဲ့ အမှတ်အသားတစ်ခုခု ပါနေသလိုပဲ"

ကျူးယွီဟန်က ခေါင်းလေးကို အသာအယာ ငြိမ့်လိုက်သည်။ သူမ၏ ပြာလဲ့သော မျက်ဝန်းအစုံမှာ ထူးဆန်းသော အလင်းတန်းများဖြင့် ဝေ့သီသွားပြီး လက်ကလေးကို ဆန့်ကာ အချိန်ကျောက်မျက်ပေါ်သို့ ဖိတင်လိုက်သည်။ သူမ၏ စိတ်အာရုံမှာ လက်ဖဝါးမှတစ်ဆင့် ကျောက်မျက်အတွင်းသို့ စတင်ဆက်သွယ်လိုက်လေသည်။

ရှပ်…

မျက်စိတစ်မှိတ်အတွင်းမှာပင် သူမ၏ စိတ်အာရုံမှာ ကြီးကျယ်ခမ်းနားပြီး ခန့်ညားထည်ဝါလှသော မြင်ကွင်းတစ်ခုအတွင်းသို့ ဆွဲခေါ်ခြင်း ခံလိုက်ရလေတော့သည်။

၎င်းသည် အဆုံးအစမရှိ ရှည်လျားလှသော သမိုင်းဝင် ပုရပိုက်စကြီးတစ်ခုပမာပင်။

အစဦး၌ မြင့်မြတ်သော နတ်ဘုရားနယ်မြေ၏ ကောင်းကင်ယံထက်တွင် ဖော်ပြ၍မရနိုင်သော အမည်းရောင် ညစ်ညမ်းမှုများမှာ ဦးထုပ်များအလား ကျဆင်းလာခဲ့သည်။ ထိုအရာများသည် မြေကမ္ဘာကို တိုက်စားပြီး မြက်ပင်သစ်ပင်များကို ညှိုးနွမ်းစေကာ လယ်ယာမြေများကို ပျက်စီးစေခဲ့သည်။ ပြည်သူတို့၏ သီးနှံများမှာလည်း ရှင်သန်နိုင်ရန် အသည်းအသန် ရုန်းကန်နေရတော့သည်။

ညစ်ညမ်းမှုများသည် ဟင်းလင်းပြင်ကိုပါ တိုက်စားဖျက်ဆီးခဲ့ရာ ရှန်ကျိုးတိုက်ကြီးပေါ်တွင် အုတ်ဂူမှတ်တိုင်များအလား အက်ကြောင်းများမှာ ထောင်မတ်စွာ ပေါ်ထွက်လာခဲ့သည်။ ထိုအက်ကြောင်းများအတွင်းမှ မိစ္ဆာသတ္တဝါများသည် အဆက်မပြတ် တိုးထွက်လာကြပြီး မြင်မြင်သမျှ သက်ရှိအပေါင်းကို ရန်မူတိုက်ခိုက်ကြတော့သည်။

တရုတ်အက္ခရာများ ရေးထိုးထားသော စစ်အလံများသည် လေထဲတွင် တဖျတ်ဖျတ် လွင့်ပျံနေပြီး မီးလျှံရောင် ချပ်ဝတ်တန်ဆာများကို ဆင်မြန်းထားသော မရေမတွက်နိုင်သည့် စစ်သည်တော်များမှာ မိစ္ဆာများနှင့် အပြင်းအထန် တိုက်ပွဲဝင်နေကြသည်။

ရှန်ကျိုးတိုက်ကြီး၏ အရပ်ရပ်တိုင်းမှာ စစ်မီးများ တောက်လောင်ခဲ့ရသည်။ စစ်သူကြီးများ ကျဆုံးကာ တပ်ရင်းတပ်ဖွဲ့များမှာ အမြစ်ပြတ် ချေမှုန်းခြင်း ခံခဲ့ရသည်။ မိစ္ဆာအရေအတွက်မှာလည်း အဆမတန် များပြားလှပြီး ရှန်ကျိုးတိုက်ကြီးပေါ်ရှိ ညစ်ညမ်းမှုများမှာ တဖြည်းဖြည်း ပိုမိုပြင်းထန်လာခဲ့၏။

ထိုကဲ့သို့သော အသက်လုရသည့် အရေးကြုံနေချိန်တွင် ဒီဇိုင်းရှစ်ကွက်ပါရှိသော မသေမျိုးဝတ်ရုံကို ဆင်မြန်းထားသည့် လူငယ်တစ်ဦးသည် ဘေးဒုက္ခများကြားမှ ပေါ်ထွက်လာခဲ့သည်။

သူ၏ ခါးတွင်မူ တောက်ပနေသော လိပ်ခွံတစ်ခုကို ချိတ်ဆွဲထားသည်။

ငတ်မွတ်ဘေးနှင့် သေဆုံးသူများဖြင့် ပြည့်နှက်နေသော ထိုဘေးဒုက္ခနယ်မြေအတွင်း၌ သူသည် အဆောင်တံဆိပ်များကို ရေးထိုးပြီး အလောင်းများကို သန့်စင်ပေးခဲ့သည်။ ပြည်သူလူထုကို ကူညီကယ်တင်ကာ လောကကြီး၏ ညစ်ညမ်းမှုများကို ရှင်းလင်းပေးခဲ့သည်။ သူ၏ ကြိုးပမ်းအားထုတ်မှုကြောင့် ရှန်ကျိုးတိုက်ကြီးမှာ တဖြည်းဖြည်း ပြန်လည်ကြည်လင်လာခဲ့ပြီး တရုတ်အက္ခရာအလံများအောက်ရှိ စစ်တပ်များမှာလည်း ပြန်လည် အင်အားတောင့်တင်းလာခဲ့လေတော့သည်။

ထိုလူငယ်၏ ဂုဏ်သတင်းကျော်စောမှုမှာလည်း တစ်ဟုန်ထိုး မြင့်တက်လာခဲ့သည်။

ဧကရာဇ်မင်းမြတ်သည် သူ့အား မရေမတွက်နိုင်သော ရတနာများနှင့်အတူ စစ်သည်တော် တစ်သန်းကိုပါ အပ်နှင်းခဲ့သည်။ ထိုစစ်သည်တော်များသည် လူငယ်၏ နောက်ကွယ်မှနေ၍ စစ်အလံများကို ဝှေ့ယမ်းကာ တောင်ပိုင်းနှင့် မြောက်ပိုင်း ဒေသအရပ်ရပ်သို့ စစ်ချီရာတွင် လိုက်ပါခဲ့ကြသည်။

ထိုလူငယ်၏ ဦးဆောင်မှုအောက်တွင် စစ်သည်တော် တစ်သန်းမှာ ရှန်ကျိုးတိုက်ကြီး တစ်ခုလုံးကို သိမ်းကျုံးအောင်ပွဲဆင်ခဲ့ရာ စကြဝဠာကြီးမှာ ပြန်လည်ကြည်လင်လာပြီး အုတ်ဂူမှတ်တိုင်အလား အက်ကြောင်းများမှာလည်း နည်းပါးသွားခဲ့သည်။ တစ်ချိန်က သောင်းကျန်းခဲ့သော မိစ္ဆာများမှာလည်း ဆယ်ပုံတစ်ပုံအောက်သို့ လျော့နည်းသွားခဲ့လေသည်။

သို့သော်လည်း အလယ်ပိုင်းလွင်ပြင်၏ ဗဟိုချက်မတွင်မူ ပိုမိုကြောက်မက်ဖွယ်ကောင်းသော အက်ကြောင်းကြီးတစ်ခု ပေါ်ထွက်လာခဲ့သည်။

နတ်ဘုရားအဆင့်ရှိသော မိစ္ဆာအချို့၏ ပုံရိပ်ယောင်များမှာ တဖြည်းဖြည်းနှင့် ရုပ်လုံးပေါ်လာခဲ့သည်။ ဧရာမ အသားနံရံကြီးတစ်ခုမှာ တောက်ပသော နဂါးငွေ့တန်းဂလက်ဆီနေရာတွင် အစားထိုးဝင်ရောက်ကာ ကောင်းကင်ယံကို ပိတ်ဆို့ထားသည်။ ထိုအသားနံရံကြီးအတွင်း၌ ပျက်စီးနေသော အလောင်းကောင်ပေါင်း သန်းနှင့်ချီ၍ လှုပ်ရှားကာ ငိုကြွေးနေကြပြီး ကြောက်ရွံ့မှုနှင့် ညည်းတွားသံများမှာလည်း ဖုံးလွှမ်းနေတော့သည်။

ယုတ်မာလှသော နတ်ဘုရားရုပ်ထုကြီးများမှာလည်း ကောင်းကင်ယံ ဖြစ်စဉ်များကို ပြသကာ ထူးဆန်းပြီး ကြောက်မက်ဖွယ်ကောင်းသော ရွှေရောင်အလင်းတန်းများ ဖြာထွက်နေသည်။ ၎င်းတို့သည် တောင်တန်းကြီးများအလား မြင့်မားလှပြီး ဝေးကွာသော အရပ်မှ နဂါးနန်းဆောင်ကို ထူးထူးခြားခြား စိုက်ကြည့်နေကြသည်။

အခြားတစ်ဖက်တွင်မူ ဦးခေါင်းခွံမရှိသော ဦးနှောက်များ သန်းနှင့်ချီ၍ သစ်သီးများအလား ဖြာထွက်နေသည့် ဧရာမ သရဲသစ်ပင်ကြီးတစ်ပင်မှာလည်း လျှို့ဝှက်ဆန်းပြားပြီး ရူးသွပ်ဖွယ်ရာကောင်းသော ဝိညာဉ်စွမ်းအားများကို အရှိန်အဟုန်ဖြင့် ထုတ်လွှတ်နေသည်။

၎င်းတို့သည် ဤကမ္ဘာလောကအတွင်းသို့ ညစ်ညမ်းမှုနှင့် ဘေးဒုက္ခများကို ထုတ်လွှတ်နေသော အမြင့်မြတ်ဆုံးသော နတ်ဘုရားများ၏ ပုံသဏ္ဌာန်များပင်။

ကျူးယွီဟန်မှာမူ ချွေးစေးများ ပြန်လာခဲ့ရသည်။

လောကကြီး ပျက်စီးတော့မည့် အန္တရာယ်ဆိုးကြီး၏ နိမိတ်မှာ သူမ၏ ရင်ထဲတွင် စွဲထင်နေတော့သည်။

“ဒါက ဘယ်ခေတ်လဲ တရုတ်အက္ခရာပါတဲ့ စစ်အလံတွေဆိုတော့ ရှေးဟောင်းခေတ်များလား”

ကျူးယွီဟန်မှာ မည်သည့်အသံကိုမျှ မကြားရဘဲ မြင်ကွင်းများကိုသာ မြင်တွေ့နေရခြင်းပင်။

သူမ ဇဝေဇဝါ ဖြစ်နေစဉ်မှာပင် ကမ္ဘာပျက်ကိန်း မြင်ကွင်းကြီးမှာ အထွတ်အထိပ်သို့ ရောက်ရှိလာခဲ့သည်။