အခန်း (၂၂၅-၂၂၆)

အခန်း (၂၂၅) - စစ်မှန်အင်မော်တယ် အထွတ်အထိပ်အဆင့် နှစ်ယောက်ကို ဓားတစ်ချက်တည်းဖြင့် သတ်ဖြတ်ခြင်း

"သောက်ကျိုးနည်း... ငါသာ အထွတ်အထိပ်အဆင့် မှာ ရှိနေသေးရင် သူတို့ရဲ့ စော်ကားမှုကို ဘယ်လိုလုပ် သည်းခံနေမှာလဲ..."

အနောက်မှ လိုက်လာသော စစ်မှန်အင်မော်တယ် အထွတ်အထိပ်အဆင့် နှစ်ဦးကို ခံစားလိုက်ရချိန်တွင် ဝူမိုဝူ၏ အမူအရာမှာ အလွန် ကြည့်ရဆိုးနေပြီး သူမကိုယ်သူမ ဒေါသတကြီး တွေးတောလိုက်၏။

အစောပိုင်းက စီနီယာအစ်ကိုချန် ကို သတ်ဖြတ်ရန်အတွက် သူမ၏ ခန္ဓာကိုယ်အတွင်းရှိ စွမ်းအားများ လုံးလုံးလျားလျား ကုန်ဆုံးလုနီးပါး ဖြစ်သွားခဲ့ပြီး ထွက်ပြေးရန် အသုံးပြုနေသော အင်မော်တယ် စွမ်းအားမှာလည်း အလွန်အမင်း အားနည်းနေပေသည်။

ထွင်းမော်ဂိုဏ်း ၏ အကြီးအကဲများနှင့် ပတ်သက်၍ ၊ သူတို့သည် ဝူမိုဝူ၏ အမိန့်အရ ထွင်းမော်ဂိုဏ်း ၏ ဌာနချုပ်သို့ ပြန်သွားကြပြီဖြစ်သည်။ မှန်၏။ ထွင်းမော်ဂိုဏ်း တွင် ဌာနချုပ် တစ်ခု ရှိသော်လည်း ၎င်းသည် အလွန် လျှို့ဝှက်စွာ တည်ရှိပေသည်။

"တစ်ဖက်လူက စီနီယာအစ်ကိုချန် ကို သတ်နိုင်တယ်ဆိုရင် သူ့ဆီမှာ လျှို့ဝှက်ချက် တစ်ခုခု ရှိရမယ်... တကယ်လို့ သူ့ကို ရွှယ်ယင်ဂိုဏ်း ဆီ ခေါ်သွားနိုင်ရင် စီနီယာအစ်ကိုချန် ရဲ့ သေဆုံးမှုနဲ့ ပတ်သက်ပြီး ရှင်းပြလို့ ရနိုင်မယ်..."

ရွှယ်ယင်ဂိုဏ်း မှ တပည့် နှစ်ဦးက ထိုသို့ တွေးတောလိုက်ကြသည်။ မည်သို့ပင်ဆိုစေကာမူ စီနီယာအစ်ကိုချန် သည် သူတို့နှင့်အတူ ထွက်လာခဲ့ခြင်းဖြစ်သည်။ အကယ်၍ စီနီယာအစ်ကိုချန် သေဆုံးသွားပြီး သူတို့သာလျှင် အသက်ရှင်လျက် ပြန်သွားပါက သေချာပေါက် အပြစ်တင်ခံရပေလိမ့်မည်။

တစ်ချိန်တည်းမှာပင် အခင်းဖြစ်ပွားရာသို့ အမြန်ဆုံး ရောက်ရှိနိုင်ရန်အတွက် ဝူရှန်းနီသည် သူ၏ သက်စောင့် ချီ ကိုပင် လောင်ကျွမ်းစေခဲ့သည်။ ကျင့်ကြံသူ တစ်ဦးအတွက် သက်စောင့် ချီ သည် အရေးအကြီးဆုံး အရာဖြစ်သည်။ အကယ်၍ သက်စောင့် ချီ ကုန်ဆုံးသွားပါက ထိုလူသည် သေဆုံးသွားပေလိမ့်မည်။

သို့သော် ယခု ညီမဖြစ်သူအတွက် ထိုအရာအားလုံးကို သူ ဂရုမစိုက်နိုင်တော့ချေ။

နောက်ဆုံးတွင် ဝူရှန်းနီသည် ဝူမိုဝူ၏ အငွေ့အသက်ကို ခံစားမိခဲ့သည်။

"အဲဒါ... ငါ့ညီမရဲ့ အငွေ့အသက်ပဲ... ပြီးတော့ စစ်မှန်အင်မော်တယ် အထွတ်အထိပ်အဆင့် နှစ်ယောက်က သူမကို လိုက်ဖမ်းနေတာလား... နေပါဦး... အဲဒါက ရွှယ်ယင်ဂိုဏ်း ရဲ့ သင်္ကေတ ပဲ... ရွှယ်ယင်ဂိုဏ်း က ငါ့ညီမကို တိုက်ခိုက်ရဲလိမ့်မယ်လို့ ငါ မထင်ထားခဲ့ဘူး... ရွှယ်ယင်ဂိုဏ်း သေဖို့ ပြင်ထားတော့..."

ဝူရှန်းနီ၏ အမူအရာသည် တည်ကြည်လေးနက်နေပြီး သူ၏ လေသံထဲတွင် သတ်ဖြတ်လိုခြင်း အငွေ့အသက်များ ရောယှက်နေ၏။ တစ်စုံတစ်ယောက်က ညီမဖြစ်သူကို လိုက်လံသတ်ဖြတ်ရဲလောက်အောင် ရဲတင်းလိမ့်မည်ဟု သူ မထင်မှတ်ထားခဲ့ချေ။ ရွှယ်ယင်ဂိုဏ်း နှင့် ပတ်သက်၍မူ ယခင်ဘဝက အင်မော်တယ် ဧကရာဇ် ဖြစ်ခဲ့သော ဝူရှန်းနီသည် ဤကဲ့သို့ နာမည်ဆိုးဖြင့် ကျော်ကြားသော ထို မိစ္ဆာလမ်းစဉ် အဖွဲ့အစည်းနှင့် သဘာဝကျကျပင် ရင်းနှီးကျွမ်းဝင်ပေသည်။

ဤဘဝတွင် ရွှယ်ယင်ဂိုဏ်း ကို ဖျက်ဆီးပစ်နိုင်မည့် အခွင့်အရေးကို သူ ဘယ်တော့မှ လက်လွတ်ခံမည် မဟုတ်ပေ။ ယခု ရွှယ်ယင်ဂိုဏ်း သည် သူ့ကို ရန်စလာပြီဖြစ်၍ ရွှယ်ယင်ဂိုဏ်း ကို သူ ပို၍ပင် ဖျက်ဆီးပစ်သင့်ပေသည်။

ထိုအတွေးဖြင့် ဝူရှန်းနီသည် ဆက်လက် တွေဝေမနေတော့ဘဲ နောက်တစ်စက္ကန့်တွင် ရွှယ်ယင်ဂိုဏ်း မှ တပည့် နှစ်ဦးထံသို့ ဦးတည်သွားလေ၏။ အကယ်၍ ဝူမိုဝူသည် စစ်မှန်အင်မော်တယ် ကနဦးအဆင့် ကျင့်ကြံခြင်းဖြင့် ရွှေအင်မော်တယ် ကနဦးအဆင့် တစ်ဦးကို သတ်ဖြတ်နိုင်ပါက အစ်ကိုဖြစ်သူ သူသည် ညီမဖြစ်သူထက် သဘာဝကျကျပင် ပိုမိုသန်မာရမည် ဖြစ်ပေသည်။

ဝူရှန်းနီသည် သူ၏ အင်အားအပြည့်ကို အသုံးပြုကာ ဓားဖြင့် ခုတ်ချလိုက်ပြီး ရွှယ်ယင်ဂိုဏ်း မှ တပည့် နှစ်ဦးကို တိုက်ခိုက်လိုက်၏။ ၎င်းတို့ နှစ်ဦး မတုံ့ပြန်နိုင်မီမှာပင် ဝူရှန်းနီ၏ ဓားဖြင့် အသတ်ခံလိုက်ရပြီး သူတို့၏ သိုလှောင်လက်စွပ် များသည် ဝူရှန်းနီ၏ လက်ထဲသို့ ကျရောက်သွားလေသည်။

ဝူရှန်းနီသည် ညီမဖြစ်သူကို အလွန်တွေ့ချင်နေသော်လည်း အမြင့်ဆုံးနေရာ ရောက်မှသာ ပြန်တွေ့မည်ဟု ပြောခဲ့သဖြင့် ယခုအချိန်သည် တွေ့ရန် မသင့်တော်သေးချေ။

ဤသည်ကို တွေးမိရင်း ဝူရှန်းနီသည် သိုလှောင်လက်စွပ် များကို ယူကာ ဝူမိုဝူကို နောက်တစ်ကြိမ် စစ်ဆေးကြည့်လိုက်သည်။ ဝူမိုဝူ အဆင်ပြေကြောင်း အတည်ပြုပြီးနောက်မှသာ လှည့်ထွက်သွားခဲ့သည်။

ရွှယ်ယင်ဂိုဏ်း မှ တပည့် နှစ်ဦးသည် မျက်တောင်တစ်ခတ်အတွင်း ခြေရာလက်ရာမကျန် ပျောက်ကွယ်သွားကြောင်း သိလိုက်ရချိန်တွင် ဝူမိုဝူ၏ အမူအရာ သည် အနည်းငယ် တည်ကြည်လေးနက်သွားခဲ့သည်။

"စွမ်းအားကြီးမားတဲ့ လူတစ်ယောက်ကများ လက်ပါလိုက်တာလား... တစ်ဖက်လူက ဘယ်သူလဲဆိုတာ ငါ မသိပေမယ့် သူက ငါ့အတွက် လာတာ မဟုတ်လောက်ဘူး... လမ်းကြုံလို့ ဝင်လုပ်သွားတာ ဖြစ်မယ်..."

ဝူမိုဝူ သည် နောက်ဆုံးတွင် ဤသို့ကောက်ချက်ချလိုက်၏။ သို့မဟုတ်ပါက အခြား ရှင်းပြစရာ အကြောင်းမရှိပေ။ မည်သို့ပင်ဆိုစေ တစ်စုံတစ်ယောက်ကသာ သူမကို ကယ်တင်ခဲ့ပါက ထိုသူသည် သူမနှင့် လာတွေ့သင့်သည် မဟုတ်လော။ ယခုအခါ တစ်ဖက်လူ၏ သရုပ်မှန်ကို သူမ မသိရသဖြင့် လမ်းကြုံလာသော ကျင့်ကြံသူ တစ်ဦးအဖြစ်သာ သူမ သတ်မှတ်နိုင်တော့သည်။

တစ်ချိန်တည်းမှာပင် အထက်ကမ္ဘာ ၏ မြောက်ပိုင်းဒေသရှိ နေဝင်ချိန်တောင်ကြားသည် သွေးမြူများဖြင့် အမြဲတမ်း ဖုံးလွှမ်းနေပြီး အင်မော်တယ်ဘုရင် အဆင့် စွမ်းအားကြီးမားသူများပင်လျှင် ထိုနေရာသို့ ဝင်ရောက်ပါက လမ်းပျောက်သွားနိုင်ပေသည်။

ရွှယ်ယင်ဂိုဏ်း ၏ အခြေစိုက်စခန်းသည် နေဝင်ချိန်တောင်ကြားတွင် တည်ရှိသည်၊ သို့မဟုတ် နေဝင်ချိန်တောင်ကြားသည် ရွှယ်ယင်ဂိုဏ်း သို့ ဦးတည်သော ကမ္ဘာ့ဝင်ပေါက်နှင့် ချိတ်ဆက်ထားသည်ဟု ဆိုရမည်။

ရွှယ်ယင်ဂိုဏ်း အတွင်းရှိ ဝိညာဉ်မီးအိမ် ခန်းမ ၌ ကျယ်လောင်သော အသံတစ်သံ ထွက်ပေါ်လာပြီး နောက်ထပ် အသံနှစ်သံ ဆက်တိုက် ထွက်ပေါ်လာခဲ့သည်။ ဤဆူညံသံသည် ရွှယ်ယင်ဂိုဏ်း ၏ ဝိညာဉ်မီးအိမ် ခန်းမ အကြီးအကဲ ၏ အာရုံကို ဖမ်းစားသွားခဲ့သည်။

"ဒါက... အလယ်ပိုင်းဒေသ က တပည့် တွေရဲ့ ဝိညာဉ် မီးအိမ် လား... ရွှေအင်မော်တယ် တစ်ယောက်နဲ့ စစ်မှန်အင်မော်တယ် အထွတ်အထိပ်အဆင့် နှစ်ယောက်လား... ငါ့ရဲ့ ရွှယ်ယင်ဂိုဏ်း အတွက်တော့ ဘာမှမဟုတ်ပေမယ့် ဘယ်လိုပဲဖြစ်ဖြစ် ငါ့ရဲ့ ရွှယ်ယင်ဂိုဏ်း က တပည့် တွေပဲလေ... ဒီကိစ္စကို ဒီအတိုင်း လွှတ်ထားလို့ မရဘူး..."

"ဂိုဏ်း အတွင်းမှာ ဆုကြေးထုတ်လိုက်... ငါ့ရဲ့ ရွှယ်ယင်ဂိုဏ်း က တပည့် တွေကို လိုက်လံသတ်ဖြတ်သွားတဲ့ ကျင့်ကြံသူ ကို သွားသတ်တဲ့သူကို အဆင့် ၄ သွေးစွမ်းအင်ဆေးလုံး သုံးလုံး ပေးမယ်..."

ရွှယ်ယင်ဂိုဏ်း ၏ အကြီးအကဲ တစ်ဦးသည် သူ၏မျက်လုံးများကို ဖြည်းညင်းစွာ ဖွင့်လိုက်ပြီးနောက် ကြေညာလိုက်သည်။

ထိုသတင်း ပျံ့နှံ့သွားသည်နှင့် အမျှ၊ လျိုထျန်းရွှေအင်မော်တယ် အထွတ်အထိပ်အဆင့် မှ တပည့် တစ်ဦး ဝင်ရောက်လာခဲ့သည်။

"အကြီးအကဲလီ..."

အကြီးအကဲလီ သည် မျက်လုံးကို အနည်းငယ် ပင့်ကြည့်လိုက်ရာ ၊ ထိုတပည့် ကို မှတ်မိသွားသည်။ သူ၏အမည်မှာ ချန်ဟန့်ရှန်း ဖြစ်ပေသည်။

"ကောင်းပြီ... သွားတော့... ဒီ အင်မော်တယ် မှော်လက်နက် က သူတို့သုံးယောက် နောက်ဆုံးပေါ်လာခဲ့တဲ့ နေရာကို ရှာဖွေဖို့နဲ့ အဲဒီနေရာမှာ ဘာတွေဖြစ်ခဲ့လဲ ဆိုတာကို ပြန်လည်ပုံဖော်ဖို့ ကူညီပေးလိမ့်မယ်... ဒါပေမဲ့ သူက တစ်နှစ်အတွင်း ဖြစ်ခဲ့တဲ့ မြင်ကွင်းတွေကိုပဲ ပြန်လည်ပုံဖော်ပေးနိုင်တာမို့လို့ မင်း အဲဒီနေရာကို တစ်နှစ်အတွင်း ရှာတွေ့ဖို့ လိုတယ်..."

အကြီးအကဲလီသည် ထိုသို့ပြောပြီးနောက် ၊ မီးအိမ်ပုံစံ အင်မော်တယ် မှော်လက်နက် တစ်ခုကို ထုတ်ပေးလိုက်သည်။ ၎င်းမှာ ရွှယ်ယင်ဂိုဏ်း၏ အထူး အင်မော်တယ် မှော်လက်နက် တစ်ခုဖြစ်ပြီး ဝိညာဉ် မီးအိမ် အတွင်းရှိ အချက်အလက်များအပေါ် အခြေခံ၍ ဝိညာဉ် မီးအိမ် ပိုင်ရှင်ရှိရာ နေရာကို ရှာဖွေနိုင်သည်။

"ကျွန်တော် နားလည်ပါပြီ အကြီးအကဲလီ..."

အင်မော်တယ် မှော်လက်နက် ကို လက်ခံရယူပြီးနောက် ချန်ဟန့်ရှန်းသည် ရွှယ်ယင်ဂိုဏ်း မှ ထွက်ခွာသွားခဲ့ပြီး အကြီးအကဲလီ သည် မျက်လုံးများကို မှိတ်ကာ ဆက်လက် ကျင့်ကြံလိုက်သည်။

ချန်ဟန့်ရှန်းသည် ခွန်အားအရာတွင် အင်မော်တယ်ဘုရင် ကနဦးအဆင့် တစ်ဦးနှင့်ပင် ယှဉ်ပြိုင်နိုင်စွမ်းရှိပြီး နောက်ထပ် သူတော်စင်အဆင့် ဖြစ်လာနိုင်ခြေ အများဆုံးလူအဖြစ် သတ်မှတ်ခံထားရသူ ဖြစ်ပေသည်။

ချန်ဟန့်ရှန်း ပါဝင်လာပြီဖြစ်၍ ဤကိစ္စသည် ဖြေရှင်းပြီးသွားပြီဟု ဆိုနိုင်သည်။

အခြားတစ်ဖက်တွင် ထွင်းမော်ဂိုဏ်း သို့ ပြန်လည်ရောက်ရှိပြီးနောက် ဝူမိုဝူသည် ထွင်းမော်ဂိုဏ်း ၏ အကြီးအကဲများအားလုံးကို စုဝေးခိုင်းလိုက်သည်။

ထွင်းမော်ဂိုဏ်း ၏ အကြီးအကဲများသည် ဝူမိုဝူ အဆင်ပြေကြောင်း မြင်တွေ့လိုက်ရချိန်တွင် သက်ပြင်းချနိုင်ခဲ့ကြသော်လည်း သို့သော် သူတို့ ဘာမှမမေးလိုက်ရသေးမီ ဝူမိုဝူက စကားစပြောလိုက်၏။

"ဒီနေ့ကစပြီး ငါတို့ ထွင်းမော်ဂိုဏ်း က သိုသိုသိပ်သိပ် နေမယ်... လူသိရှင်ကြား ထွက်ပေါ်လာမှာ မဟုတ်တော့ဘူး..."

"ဂိုဏ်းချုပ်... ဘာကြောင့်များလဲ..."

မဟာအကြီးအကဲ က စပ်စုလိုစိတ်ဖြင့် မေးမြန်းလိုက်၏။

ဤသည်ကို ကြားလိုက်ရချိန်တွင် ဝူမိုဝူက ခေါင်းယမ်းလိုက်သည်။ ရွှယ်ယင်ဂိုဏ်း ၏ တည်ရှိမှုအကြောင်း သူတို့ကို ပြောပြရန် သူမ စိတ်ကူးမရှိ‌ချေ။ မည်သို့ပင်ဆိုစေကာမူ ၊ ရွှယ်ယင်ဂိုဏ်း သည် သူတို့အားလုံး အနိုင်မယူနိုင်သော တည်ရှိမှုဖြစ်ကာ ၊ အကယ်၍ သူတို့သာ ထိုအကြောင်းကို သိရှိသွားပါက သူတို့၏ ကျင့်ကြံခြင်း ကိုသာ ထိခိုက်စေမည်ဖြစ်သည်။

မဟာအကြီးအကဲ နှင့် အခြားသူများသည် ဝူမိုဝူ အဘယ်ကြောင့် ထိုသို့လုပ်ဆောင်ခဲ့ကြောင်းကို အလွန်သိချင်နေကြသော်လည်း သူတို့သည် ပညာရှိစွာပင် အဖြေများကို ဆက်လက်တောင်းဆိုခြင်း မပြုခဲ့ကြချေ။ ဝူမိုဝူက သူတို့ကို အန္တရာယ်ပြုမည်မဟုတ်ကြောင်းကိုသာ သူတို့ သိရန် လိုအပ်ပေသည်။

စစ်မှန်အင်မော်တယ်အဖွဲ့ တွင်လည်း အလားတူ ဖြစ်ရပ်မျိုး ဖြစ်ပွားခဲ့သော်လည်း ဝူရှန်းနီကမူ မည်သည့်အရာကိုမျှ ဖုံးကွယ်မထားဘဲ ရွှယ်ယင်ဂိုဏ်း အကြောင်းကို သူတို့အား ပြောပြခဲ့သည်။

စစ်မှန်အင်မော်တယ်အဖွဲ့ သည် ဤမျှ စွမ်းအားကြီးမားသော ရန်သူကို အမှန်တကယ် ရန်စမိကြောင်း သိလိုက်ရပြီးနောက် အကြီးအကဲ အများအပြားသည် နောက်ဆုတ်လိုသော ဆန္ဒများ ဖြစ်ပေါ်လာခဲ့သည်။ တစ်ဖက်အဖွဲ့သည် အင်မော်တယ် မဟာဧကရာဇ် အဆင့်ရှိ အင်အားစုတစ်ခု ဖြစ်ပေသည်။

ထိုအချိန်တွင် ဝူရှန်းနီက လက်ကိုဝှေ့ယမ်းကာ ပြောဆိုလိုက်၏။

"ရွှယ်ယင်ဂိုဏ်း ကိစ္စကြောင့် လူတိုင်း အရမ်းကြောက်နေကြပြီး စစ်မှန်အင်မော်တယ်အဖွဲ့ ကနေ ထွက်သွားဖို့ တွေးနေကြလောက်ပြီဆိုတာကို ငါ သိပါတယ်... အဲဒီအပေါ် ငါ ကန့်ကွက်မှာ မဟုတ်ပါဘူး... မင်းတို့ ထွက်သွားရင်လည်း ငါ အပြစ်တင်မှာ မဟုတ်ပါဘူး..."

“ ဒီနေ့ကစပြီး ငါတို့ လမ်းခွဲကြမယ်... ပြီးတော့ စစ်မှန်အင်မော်တယ်အဖွဲ့ ကို ဝင်ဖို့ မင်းတို့မှာ အခွင့်အရေး ရှိတော့မှာ မဟုတ်ဘူး...

ဝူရှန်းနီ၏ စကားကိုကြားလိုက်ရချိန်တွင် ထိုနေရာရှိ အကြီးအကဲများမှာ တုန်လှုပ်သွားကြသည်။ ဝူရှန်းနီ၏ ယုံကြည်မှုရှိသော အမူအရာကို မြင်တွေ့လိုက်ရချိန်တွင် ရွှယ်ယင်ဂိုဏ်း ကို ရင်ဆိုင်ရန် သူ့တွင် နည်းလမ်းများ ရှိနေလိမ့်မည်ဟု သံသယများ ဖြစ်လာကြသည်။

အခန်း (၂၂၆) - ဝူလီ၏ အခြေအနေ

"ဂိုဏ်းချုပ်... ရွှယ်ယင်ဂိုဏ်း က ငါတို့ကို ပစ်မှတ်ထားနေမှတော့ မြင့်မြတ်နယ်မြေ ကို အကူအညီ မတောင်းဘူးလား..."

အကြီးအကဲ တစ်ဦးက စပ်စုချင်စိတ်ဖြင့် မေးမြန်းလိုက်၏။ သူ၏ နားလည်မှုအရ အကောင်းနှင့် အဆိုးသည် အမြဲတမ်း ပြန်လည်သင့်မြတ်၍ မရနိုင်သောအရာများ ဖြစ်သည်။ အကယ်၍ မြင့်မြတ်နယ်မြေ ကသာ ရွှယ်ယင်ဂိုဏ်း၏ တည်ရှိမှုကို သိခဲ့မည်ဆိုပါက ၊ သူတို့သည် ၎င်းကို ဖျက်ဆီးရန် သေချာပေါက် လုပ်ဆောင်ကြပေလိမ့်မည်။

ဤသည်ကိုကြားလိုက်ရချိန်တွင် ဝူရှန်းနီသည် ခေါင်းယမ်းလိုက်ပြီး ရှုပ်ထွေးသွားသော အမူအရာဖြင့် ပြန်ပြောလိုက်သည်။

"မဟုတ်ဘူး... ဒီကိစ္စက အရမ်းကို နက်နဲတယ်... ဘာတွေဖြစ်နေလဲဆိုတာကို မင်းတို့ မသိဘူး..."

အတိတ်ဘဝတုန်းက ဝူရှန်းနီသည်လည်း အကောင်းနှင့်အဆိုး ဆိုသည်မှာ ယခင်ကတည်းကပင် တစ်ဖက်နှင့်တစ်ဖက် မည်သို့မျှ ပြန်လည်သင့်မြတ်၍ မရနိုင်သော ဆန့်ကျင်ဘက်အရာများဟု ယုံကြည်ခဲ့ဖူးသည်။ သို့သော် သူသည် စွမ်းအားကြီးမားသော ပုဂ္ဂိုလ်တစ်ဦးဖြစ်လာပြီး ထိုအဆင့်အတန်းသို့ ရောက်ရှိသွားချိန်တွင်မူ အကောင်းနှင့်အဆိုး ပြန်လည်သင့်မြတ်၍ မရခြင်းဟူသည်မှာ မရှိကြောင်းနှင့် လောကတွင် ခွန်အားအကြီးဆုံးသူကသာ စည်းမျဉ်းကို သတ်မှတ်ခြင်းဖြစ်ကြောင်း သူ နားလည်သဘောပေါက်သွားခဲ့သည်။

ခွန်အား အလုံအလောက် ရှိနေသရွေ့ မိစ္ဆာ ဖြစ်စေ၊ အင်မော်တယ် ဖြစ်စေ ကျင့်ကြံသူ ၏ ဆုံးဖြတ်ချက်အပေါ်တွင်သာ လုံးလုံးလျားလျား မူတည်ပေသည်။

အချို့သော ဖြောင့်မတ်ခြင်းလမ်းစဉ် ကျင့်ကြံသူ များသည် မိစ္ဆာလမ်းစဉ် ကျင့်ကြံသူ များထက် များစွာ ပိုမို ရက်စက်ကြပြီး မိစ္ဆာလမ်းစဉ် ကျင့်ကြံသူ များသည်လည်း သူတို့ ဖြတ်သန်းသွားသော နေရာတိုင်းတွင် ပျက်စီးခြင်း တစ်ခုတည်းသာ ဖန်တီးတတ်ခြင်း မဟုတ်ပေ။

"ကောင်းပြီ... အတိုချုပ်ပြောရရင် ငါတို့ စစ်မှန်အင်မော်တယ်အဖွဲ့ က လောလောဆယ် သိုသိုသိပ်သိပ် နေမယ်... ငါ့ကို အနှစ်တစ်ထောင် အချိန်ပေးပါ... ငါ လျိုထျန်းရွှေအင်မော်တယ် အဆင့်ကို ချိုးဖောက်ဝင်ရောက်ပြီးတဲ့ အချိန်ကျမှ သီးသန့်လေ့ကျင့်မှုကနေ ထွက်လာရင်လည်း သိပ်မနောက်ကျသေးပါဘူး..."

ဝူရှန်းနီက လက်ကိုဝှေ့ယမ်းကာ ပြန်ပြောလိုက်သည်။ ရွှယ်ယင်ဂိုဏ်း သည် အထက်ကမ္ဘာ တွင် လူသိရှင်ကြား ထွက်ပေါ်လာမည် မဟုတ်ဘဲ အခြေခံအားဖြင့် သူတို့သည် အင်မော်တယ်ဘုရင် အဆင့်ရှိ တည်ရှိမှုများကို စေလွှတ်မည် မဟုတ်ချေ။ ထို့ကြောင့် သူသည် လျိုထျန်းရွှေအင်မော်တယ် အဆင့်သို့ ချိုးဖောက်ဝင်ရောက်နိုင်သရွေ့ ရွှယ်ယင်ဂိုဏ်းက လက်စားချေရန် လာလျှင်ပင် သူ ကြောက်နေမည် မဟုတ်ပေ။

ဤသည်ကို ကြားလိုက်ရချိန်တွင် ထိုနေရာရှိ အကြီးအကဲများ၏ မျက်လုံးများမှာ အရောင်လက်သွားကြသည်။ သူတို့သည် ဝူရှန်းနီ၏ စကားကို သံသယကင်းစွာ ယုံကြည်ကြပေသည်။ မည်သို့ပင်ဆိုစေကာမူ ၊ အသက်တစ်ရာကျော်သာ ရှိသေးသည့် စစ်မှန်အင်မော်တယ် ကနဦးအဆင့် တစ်ဦးအနေဖြင့် ဝူရှန်းနီ၏ ပါရမီသည် လျိုထျန်းရွှေအင်မော်တယ် အဆင့်သို့ ချိုးဖောက်ဝင်ရောက်ရန်မှာ ပြသနာမရှိပေ။

"ဟုတ်ကဲ့ပါ ဂိုဏ်းချုပ်..."

ရွှယ်ယင်ဂိုဏ်းကြောင့် မူလက တိုက်ပွဲနွှဲရန် ဟန်ပြင်နေသော ဂိုဏ်းအဖွဲ့အစည်း နှစ်ခုမှာ ကျင့်ကြံခြင်း ပြိုင်ပွဲအဖြစ်သို့ ပြောင်းလဲသွားခဲ့သည်။

တစ်ချိန်တည်းမှာပင် လျှို့ဝှက်ချက်ခုနစ်ပါးဂိုဏ်း အတွင်း၌ ဝူလီသည် ကျင့်ကြံခြင်း ကို တရားဝင် စတင်လေတော့သည်။

အချိန်နှင့်ဟင်းလင်းပြင် နတ်ဘုရားခန္ဓာကိုယ် နှင့် သူတော်စင်ပုလင်း ၏ အကူအညီဖြင့် ဝူလီ၏ ကျင့်ကြံခြင်း သည် အံ့မခန်း တိုးတက်လာခဲ့သည်။ လျှို့ဝှက်ချက်ခုနစ်ပါးဂိုဏ်း သို့ ဝင်ရောက်ပြီး ဆယ်နှစ်မပြည့်မီ အချိန်အတွင်း သူသည် စစ်မှန်အင်မော်တယ် ကနဦးအဆင့် မှ စစ်မှန်အင်မော်တယ် အထွတ်အထိပ်အဆင့် သို့ တက်လှမ်းနိုင်ခဲ့သည်။

ထို့အပြင် သူ၏ အချိန်နှင့်ဟင်းလင်းပြင် နတ်ဘုရားခန္ဓာကိုယ် ကြောင့် သူသည် စစ်မှန်အင်မော်တယ် အထွတ်အထိပ်အဆင့် တွင်သာ ရှိနေသေးသော်လည်း ၊ ဝူလီသည် သူ့ပတ်ဝန်းကျင်ရှိ အချိန်နှင့် ဟင်းလင်းပြင်ကို လွှမ်းမိုးနိုင်နေပြီဖြစ်ရာ ယင်းက သူ၏ တိုက်ခိုက်ရေးစွမ်းအားကို များစွာ အထောက်အကူ ပြုခဲ့သည်။

"တကယ်ကို ငါက အေးအေးဆေးဆေးပဲ နေပြီး ကျင့်ကြံတာကမှ ပိုပြီး သင့်တော်တယ်... လက်ရှိအခြေအနေအရ ကြည့်ရင် ငါ အနှစ်တစ်သောင်း မပြည့်ခင် အင်မော်တယ် ဧကရာဇ် အဆင့်အထိ ကျင့်ကြံ နိုင်လိမ့်မယ်..."

ဝူလီ သည် စိတ်လှုပ်ရှားစွာဖြင့် သူ့ကိုယ်သူ တွေးတောလိုက်၏။

သူတော်စင်ပုလင်း ၏ စွမ်းရည်ကို ပိုမိုကျွမ်းကျင်လာသည်နှင့်အမျှ ဝူလီသည် သူတော်စင်ပုလင်း အတွင်း၌ လေဟာနယ် တစ်ခု ရှိကြောင်းကိုလည်း ရှာဖွေတွေ့ရှိခဲ့ပြီး ထိုနေရာရှိ ဝိညာဉ် ချီ နှင့် အင်မော်တယ် ချီ တို့သည် ပတ်ဝန်းကျင် အခြေအနေအပေါ် မူတည်၍ ပြောင်းလဲကြောင်း သိရှိလာခဲ့သည်။

ဤဟင်းလင်းပြင်အတွင်း၌ ဝူလီသည် သူတော်စင်ပုလင်း၏ သခင်ဖြစ်သည်နှင့်အညီ အချိန်စီးဆင်းမှုကို စိတ်ကြိုက်ထိန်းချုပ်နိုင်သည်။ အချိန်နှင့်ဟင်းလင်းပြင် နတ်ဘုရားခန္ဓာကိုယ်နှင့်သာ ပေါင်းစပ်လိုက်ပါက၊ ပြင်ပလောကတွင် တစ်ရက်ကုန်ဆုံးချိန်၌ ပုလင်းအတွင်းတွင် တစ်နှစ်စာနှင့်ညီသော ကျင့်ကြံခြင်းကို ပြုလုပ်နိုင်မည်ဖြစ်သည်။ ဤသည်မှာ အတော်လေး ကြောက်မက်ဖွယ်ကောင်းသော အချိန်ဆိုင်ရာ အားသာချက်တစ်ခုပင် ဖြစ်ပေသည်။

ထို့အပြင် ဝူလီ၏ ကျင့်ကြံခြင်းအဆင့် မြင့်မားလေ၊ ပိုမိုသန်မာလေဖြစ်ကာ ၊ အချိန်နှင့်ဟင်းလင်းပြင် နတ်ဘုရားခန္ဓာကိုယ် နှင့် သူတော်စင်ပုလင်း တို့၏ ဖွံ့ဖြိုးတိုးတက်မှုသည်လည်း ပို၍ မြင့်မားလာပေလိမ့်မည်။

သို့သော် သူတော်စင်ပုလင်း တွင် အားနည်းချက်တစ်ခု ရှိသည်။ ၎င်းမှာ ဝိညာဉ်များသာ အထဲသို့ ဝင်ရောက်နိုင်ပြီး ရုပ်ပိုင်းဆိုင်ရာ ခန္ဓာကိုယ်များမှာ ဝင်ရောက်၍ မရနိုင်ချေ။

ထိုအချိန်တွင် ကျန်းထျဲက တံခါးကိုခေါက်ကာ ဆိုလေသည်။

"အစ်ကိုကြီး... ဂိုဏ်းချုပ် ဝမ် က အစ်ကိုကြီးနဲ့ စကားပြောချင်လို့တဲ့..."

"ဆရာ က ငါ့ကို ရှာနေတာလား..."

ဤသည်ကို ကြားလိုက်ရချိန်တွင် ဝူလီသည် အနည်းငယ် မျက်မှောင်ကြုတ်သွားသည်။ အမှန်အားဖြင့် သူ တပည့်အဖြစ်သို့ ဝင်ရောက်စဉ်က သူသည် ကျင့်ကြံခြင်း ကိုသာ အာရုံစိုက်လိုကြောင်းနှင့် အရေးကြီးသော ကိစ္စရပ်များ မရှိပါက သူ့ကို မဆက်သွယ်ရန် ဂိုဏ်းချုပ် ဝမ် အား ပြောထားခဲ့သည်။

သူ၏ သူတော်စင်အဆင့် အဆင့်အတန်းကြောင့် ဂိုဏ်းချုပ် ဝမ် သည် အကြောင်းပြချက်မရှိဘဲ သူ့ကို ဆက်သွယ်မည် မဟုတ်ချေ။

ထိုအတွေးဖြင့် ဝူလီသည် အရေးကြီးကိစ္စ ရှိမရှိ သွားရောက်ကြည့်ရှုရန် ဆုံးဖြတ်လိုက်သည်။

ဝူလီ တံခါးကို ဖွင့်လိုက်ချိန်တွင် သူ့ရှေ့တွင် ရပ်နေသော ကျန်းထျဲကို မြင်တွေ့လိုက်ရသည်။

"အစ်ကိုကြီး... ဂိုဏ်းချုပ် ဝမ် က အစ်ကိုကြီးကို ရှာနေတယ်..."

ကျန်းထျဲက တည်ကြည်လေးနက်သော အမူအရာဖြင့် ပြောဆိုလိုက်၏။ ထိုစကားကို ကြားပြီး ဝူလီသည် ခေါင်းညိတ်လိုက်ကာ ဂိုဏ်းချုပ် ဝမ် ၏ ကျင့်ကြံခြင်း နေရာသို့ အလျင်အမြန် သွားရောက်ခဲ့သည်။

မကြာမီ ဝူလီသည် ဂိုဏ်းချုပ် ဝမ် ၏ ကျင့်ကြံခြင်း နေရာသို့ ရောက်ရှိလာသော်လည်း တိုက်ရိုက် မဝင်သွားဘဲ အပြင်ဘက်တွင် ရပ်ကာ အရိုအသေပေးလိုက်၏။

"ဆရာ... တပည့် ဝူလီ တွေ့ခွင့်တောင်းပါတယ်..."

"ဝူလီ... ဝင်လာခဲ့..."

ဂိုဏ်းချုပ်ဝမ်၏ မောက်မာလှသော အသံသည် ကျင့်ကြံခြင်း နေရာတစ်ခုလုံးတွင် ပဲ့တင်ထပ်သွားပြီးနောက်၊ တစ်ခဏအတွင်းမှာပင် ထိုနေရာရှိ တားမြစ်ချက်မန္တန်မှာ ပွင့်ထွက်သွားလေသည်။

ဝူလီသည် ဤအခြေအနေကို သံသယမဝင်ဘဲ အတွင်းသို့ ဝင်ရောက်သွားခဲ့သည်။

အတွင်းသို့ ဝင်ရောက်သွားချိန်တွင် ဝူလီသည် သူ၏ရှေ့၌ တင်ပျဉ်ခွေထိုင်နေသော ဂိုဏ်းချုပ် ဝမ် ကို မြင်တွေ့လိုက်ရသည်။

ဂိုဏ်းချုပ် ဝမ် ၏ ပုံစံသည် မီးခိုးရောင် ဆံပင်ရှည်များနှင့် အိုမင်းရင့်ရော်နေကာ သေတော့မည့်ပုံစံ ပေါက်နေသည်။

သို့သော် ဝူလီသည် သံသယမဝင်ခဲ့ချေ။ မည်သို့ပင်ဖြစ်စေ၊ သူ တပည့်အဖြစ် စတင်ဝင်ရောက်စဉ်က ဂိုဏ်းချုပ်ဝမ်အား ထိုအကြောင်းကို မေးမြန်းခဲ့ဖူးသည်။ ထိုစဉ်က ဂိုဏ်းချုပ်သည် သူ၏ သက်တမ်းကုန်ဆုံးခါနီး အချိန်ကျမှသာ အခြေခံတည်ဆောက်ခြင်းအဆင့် သို့ အောင်မြင်စွာ တက်လှမ်းနိုင်ခဲ့ခြင်းဖြစ်ကြောင်းနှင့် အဆင့်တက်ပြီးနောက်တွင်လည်း နုပျိုသောရုပ်သွင်ကို ပြန်လည်မယူလိုတော့ဘဲ လက်ရှိအသွင်အပြင်ကိုသာ ဆက်လက်ထိန်းသိမ်းထားခဲ့ခြင်းဖြစ်ကြောင်း သိခဲ့ရသည်။

"ဆရာ... ကျွန်တော့်ဆီက ဘာများ လိုအပ်လို့လဲ”

ဝူလီက အသံတိုးတိုးဖြင့် ရိုသေစွာ မေးမြန်းလိုက်၏။

ဤသည်ကို ကြားလိုက်ရချိန်တွင် ဂိုဏ်းချုပ် ဝမ်သည် ဖြည်းညင်းစွာ ထရပ်လိုက်ပြီး ဝူလီကို ကြည့်ကာ ဖြည်းညင်းစွာ ပြောဆိုလိုက်သည်။

"ဝူလီ... မင်း ငါ့ရဲ့ လျှို့ဝှက်ချက်ခုနစ်ပါးဂိုဏ်း ကို ဝင်လာတာ အချိန်အတော်ကြာပြီ မဟုတ်လား..."

"ဟုတ်ပါတယ် ဆရာ... ကျွန်တော် လျှို့ဝှက်ချက်ခုနစ်ပါးဂိုဏ်း ကို ဝင်လာတာ ငါးနှစ်ရှိပါပြီ..."

ဝူလီ အကြာကြီး စဉ်းစားမနေဘဲ မဆိုင်းမတွ ပြန်ဖြေလိုက်၏။

ထို့နောက် ဂိုဏ်းချုပ် ဝမ် က ဝူလီဘက်သို့ လှည့်ကာ ပြောဆိုလိုက်သည်။

"ဆရာ့ မှာ မင်းကို ပေးစရာ အခွင့်အရေး တစ်ခု ရှိတယ်... မင်း လက်ခံချင်မလား မသိဘူး..."

ဂိုဏ်းချုပ် ဝမ် က အခွင့်အရေး အကြောင်း ပြောဆိုချိန်တွင် သူ၏ လေသံထဲတွင် လျှို့ဝှက်ဆန်းကြယ်မှု အရိပ်အယောင်များ ရှိနေခဲ့ရာ ၊ ဝူလီ၏ စိတ်ဝင်စားမှုကို ဆွဲဆောင်နိုင်ခဲ့သည်။

"အခွင့်အရေး..."

"အင်း... ငါ ရှေးဟောင်း လျှို့ဝှက်နယ်မြေ တစ်ခုကို ရှာတွေ့ထားတယ်... ဒါပေမဲ့ ငါ့ရဲ့ ကျင့်ကြံခြင်းအဆင့်နဲ့ အဲဒီထဲကို ဝင်လို့ မလုံလောက်ဘူး... ဒါကြောင့် မင်းကို အဲဒီထဲ ဝင်ခိုင်းဖို့ ရည်ရွယ်ထားတယ်..."

ဂိုဏ်းချုပ် ဝမ် က ခေါင်းညိတ်ကာ တည်ငြိမ်စွာ ပြောဆိုလိုက်၏။

"ဆရာက ဝင်လို့ မရဘူး ဟုတ်လား..."

ယခု အံ့အားသင့်ရမည့် အလှည့်မှာ ဝူလီ ဖြစ်ပေသည်။ မည်သို့ပင်ဖြစ်စေ ဂိုဏ်းချုပ် ဝမ် သည် အင်မော်တယ် အရှင်မြတ် အထွတ်အထိပ်အဆင့် ဖြစ်ရာ သူ့ကို ဝင်ခွင့်မပြုသော လျှို့ဝှက်နယ်မြေ ဆိုသည်မှာ မည်သို့ ရှိနိုင်မည်နည်း။

သို့သော် ဂိုဏ်းချုပ် ဝမ် က ခေါင်းယမ်းကာ ခါးသက်သက် ပြုံးလိုက်ပြီး ပြောဆိုလိုက်၏။

"မင်းလည်း အံ့သြနေတယ်မလား... ဒါပေမဲ့ ဒါက အမှန်တရားပဲ..... အဲဒီ ရှေးဟောင်း လျှို့ဝှက်နယ်မြေ ကို အင်မော်တယ် မဟာဧကရာဇ် အဆင့် စွမ်းအားနဲ့ ကာကွယ်ထားပြီး စစ်မှန်အင်မော်တယ် အဆင့် ကျင့်ကြံသူ တွေကိုပဲ ဝင်ခွင့်ပြုတယ်... မင်းက အဲဒီသတ်မှတ်ချက်နဲ့ ကိုက်ညီနေတာ သိသာတယ်လေ..."

ရှေးဟောင်း လျှို့ဝှက်နယ်မြေ ကို အင်မော်တယ် မဟာဧကရာဇ် အဆင့် စွမ်းအားဖြင့် ကာကွယ်ထားကြောင်း ကြားလိုက်ရချိန်တွင် ဝူလီ၏ အမူအရာမှာ အနည်းငယ် တုံ့ဆိုင်းသွားခဲ့သည်။ အတွင်း၌ သူ မကိုင်တွယ်နိုင်သော အရာများ ရှိမရှိကို သူ မသိပေ။

သူသည် အလွန်အမင်း သတိထားတတ်သူ တစ်ဦးဖြစ်သည်။ လျှို့ဝှက်နယ်မြေ အတွင်းရှိ အခြေအနေကို သူ မသိရှိပါက လုံးလုံးလျားလျား မလိုအပ်ဘဲနှင့် ဝင်ရောက်မည် မဟုတ်ချေ။

"ဒီကိစ္စက မင်းအတွက် ခက်ခဲမယ်ဆိုတာ ဆရာ သိပါတယ်... ဒါပေမဲ့ အခု တခြားနည်းလမ်း မရှိတော့ဘူး... အဲဒီအထဲမှာ ငါ့အတွက် အင်မော်တယ် မဟာဧကရာဇ် အဆင့်ကို ချိုးဖောက်ဝင်ရောက်နိုင်မယ့် အခွင့်အရေး တစ်ခု ရှိတယ်... ဒါ့အပြင် ငါ စမ်းသပ်ကြည့်ပြီးပြီ... အဲဒီအထဲက အစွမ်းအထက်ဆုံး သက်ရှိက ရွှေအင်မော်တယ် အဆင့်မှာပဲ ရှိတယ်... မင်း သတိထားသရွေ့တော့ မင်းကို အန္တရာယ်ပြုနိုင်မှာ မဟုတ်ဘူး..."

"ပြီးတော့ ငါ အင်မော်တယ် မဟာဧကရာဇ် နယ်ပယ်ကို ချိုးဖောက်ဝင်ရောက်သွားပြီဆိုရင် မင်းလည်း ပိုကောင်းတဲ့ ကျင့်ကြံခြင်း ပတ်ဝန်းကျင်ကို ရလိမ့်မယ်... ဝူလီ... ဆရာ အင်မော်တယ် မဟာဧကရာဇ် နယ်ပယ်ကို မချိုးဖောက်နိုင်ဘဲ ကျရှုံးသွားတာကို မင်း မမြင်ချင်ဘူး မဟုတ်လား..."