ယန်မိသားစု (၂)

ဦးတည်ချက်နှင့် ပန်းတိုင်ကို စိတ်ထဲ၌ စွဲမြဲစွာ မှတ်ကျောက်တင်ပြီးနောက် ယန်မိသားစု၏ တည်ထောင်သူသည် ခန္ဓာကိုယ်သန့်စင်ခြင်း လုပ်ငန်းစဉ်၌ စိတ်ရောကိုယ်ပါ နှစ်မြှုပ်ခဲ့လေသည်။

သူပိုင်ဆိုင်သမျှသော အရင်းအမြစ်အားလုံးကိုလည်း ထိုကိစ္စရပ်အတွက်သာ အသုံးချခဲ့၏။

ယန်ချင်းသည် ငယ်စဉ်က မိဘများပြောပြသော တည်ထောင်သူ၏ ပုံပြင်များကို နားထောင်စဉ်က ထိုသို့မတွေးမိခဲ့သော်လည်း နောင်တွင် သူ၏ဆင်းရဲဒုက္ခများအတွက် အပြစ်တင်ခဲ့ရသော ထိုပုဂ္ဂိုလ်၏အကြောင်းကို ပြန်လည်စဉ်းစားမိသည့်အခါ သူတို့၏ တည်ထောင်သူသည် ကြီးမားသော မိသားစု သို့မဟုတ် အဖွဲ့အစည်းတစ်ခုခုနှင့် ဆက်နွှယ်မှု ရှိနိုင်သည်ဟု သင်္ကာမကင်းဖြစ်မိသည်။

ခန္ဓာကိုယ်သန့်စင်ခြင်း အဆင့်ကို ကျင့်ကြံခြင်း၏ အနိမ့်ဆုံးအဆင့်ဟု ယူဆနိုင်သော်လည်း အဆင့်တစ်ခုပြီးတစ်ခု ကျော်ဖြတ်နိုင်ရန် ကြိုးပမ်းခြင်းမှာ အလွန်ပင် ကုန်ကျစရိတ်များလှပေသည်။

ခန္ဓာကိုယ်ကို သန့်စင်ရန်အတွက် များပြားလှသော ဆေးဖက်ဝင်အပင်များနှင့် ထူးခြားသည့် သဘာဝရတနာများကို ပေါင်းစပ်အသုံးပြုရန် လိုအပ်သကဲ့သို့ ဆေးဖော်စပ်ခြင်းနှင့် ဆေးဖက်ဝင်အပင်ပညာရပ်၌ ကျွမ်းကျင်ရန်နှင့် ကျွမ်းကျင်သော ဆေးဆရာတစ်ဦး၏ အကူအညီကို ရယူရန်လည်း လိုအပ်သည်။

ထို့အပြင် ခန္ဓာကိုယ်ကြီးထွားမှုကို ထောက်ပံ့ပေးရန်အတွက် အာဟာရပြည့်ဝသော အစားအစာများကိုလည်း လောင်စာအဖြစ် လိုအပ်သေးသည်။

အကယ်၍ တွက်ချက်ကြည့်မည်ဆိုပါက ခန္ဓာကိုယ်သန့်စင်ခြင်းအဆင့်၌ ကုန်ကျသောစရိတ်သည် အခြေခံတည်ဆောက်ခြင်းအဆင့်ထက်ပင် ပိုမိုများပြားနေသည်ကို တွေ့ရှိရပေလိမ့်မည်။

ကျောထောက်နောက်ခံနှင့် ကျင့်ကြံခြင်းအခြေခံ မရှိသောသူတစ်ဦးသည် သူတို့၏ တည်ထောင်သူကဲ့သို့ ခန္ဓာကိုယ်သန့်စင်ခြင်းအဆင့်ကို မည်သို့စမ်းသပ်နိုင်ခဲ့သည်ဆိုသည်မှာ ယန်ချင်းအတွက် ပဟေဠိဖြစ်နေဆဲပင်။

သူသည် ခန္ဓာကိုယ်တိုးတက်စေရန်အတွက် အချိန်နှင့် အရင်းအမြစ်များကို နှစ်ပေါင်းများစွာ ရင်းနှီးမြှုပ်နှံခဲ့ရသည်။

ချီဓာတ်ကို အာရုံခံစားရာတွင် ပါရမီမပါသော်လည်း မိမိကိုယ်ကိုယ်အပေါ် ရက်စက်ကာ ပြတ်သားသည့်နေရာတွင်မူ သူသည် အနှိုင်းမဲ့ပေသည်။

ဆေးဖော်စပ်ခြင်းပညာ၌ အသင့်အတင့် တတ်မြောက်ထားပြီး မည်သည့်အရာကိုမဆို စမ်းသပ်လိုစိတ်ရှိခြင်းကလည်း သူ၏ထူးခြားချက်ပင် ဖြစ်သည်။

အထူးသဖြင့် နောက်ပိုင်းဖြစ်ပျက်ခဲ့သည့် အခြေအနေများကို ကြည့်လျှင် သူသည် အဘယ်ကြောင့် ဤမျှအထိ ဇွဲနပဲကြီးနေခဲ့သည်ကို ယန်ချင်း နားမလည်နိုင်ခဲ့ပေ။

တည်ထောင်သူသည် နှစ်ပေါင်းများစွာအတွင်း သူ၏ခန္ဓာကိုယ်ကို အကြိမ်ကြိမ်အခါခါဖျက်စီး၍ ပြန်လည်ကုသခြင်းဖြင့် ခန္ဓာကိုယ်သန့်စင်ခြင်း အစောပိုင်းအဆင့်များတွင် တိုးတက်မှုအချို့ ရရှိခဲ့သည်။

သူသည် ဗဟုသုတနည်းပါးသောသူတစ်ဦးအဖြစ်မှ သံမဏိခန္ဓာ၊ ကြေးခန္ဓာနှင့် ငွေခန္ဓာများ ရရှိစေရန် မရေမတွက်နိုင်သော နည်းလမ်းများကို တီထွင်သူတစ်ဦး ဖြစ်လာခဲ့သည်။

သို့သော် တိုးတက်မှုများ ရှိခဲ့သော်လည်း ခန္ဓာကိုယ်သန့်စင်ခြင်း အဆင့်များသည် စိန်ခန္ဓာနှင့် ပြိုင်ဘက်ကင်းကျောက်စိမ်းခန္ဓာမှလွဲ၍ လူ၏သက်တမ်းကို မတိုးမြှင့်ပေးနိုင်သဖြင့် သူ၏သက်တမ်းမှာ တဖြည်းဖြည်းကုန်ဆုံးလာခဲ့သည်။

အချိန်သိပ်မကျန်တော့သည့်အခါ သူသည် မိသားစုတစ်ခုကို တည်ထောင်ခဲ့ပြီး ခန္ဓာကိုယ်သန့်စင်ခြင်းအပေါ် ထားရှိသည့် သူ၏စွဲလမ်းမှုကို သားသမီးများထံ လက်ဆင့်ကမ်းခဲ့သည်။

သေအံ့ဆဲဆဲအချိန်အထိပင် သူ၏သားသမီးများကို သူကဲ့သို့ပင် ထိုအဆင့်အပေါ် ရူးသွပ်လာအောင် ပြုလုပ်ခဲ့ပြီး နောက်ပိုင်းတွင် ၎င်းမှာ မိသားစုဓလေ့တစ်ခု ဖြစ်လာခဲ့တော့သည်။

ယန်မိသားစု၏ မျိုးဆက်တိုင်းသည် ခန္ဓာကိုယ်သန့်စင်ခြင်းအဆင့်၏ လျှို့ဝှက်ချက်များကို ဖော်ထုတ်ရန်အတွက် သူတို့၌ရှိသမျှကို ပုံအောခဲ့ကြသည်။

အချို့မှာ ကျင့်ကြံခြင်းပါရမီ ရှိသော်လည်း ချီသန့်စင်ခြင်းအဆင့်သို့ပင် မတက်လှမ်းတော့ဘဲ ခန္ဓာကိုယ်သန့်စင်ခြင်း နယ်ပယ်၌သာ အချိန်နှင့် အရင်းအမြစ်အားလုံးကို မြှုပ်နှံထားကြတော့သည်။

ထို့နောက် ထိုအတွေးအခေါ်များကို နောက်မျိုးဆက်များထံ လက်ဆင့်ကမ်းခဲ့ကြပြီး အသေးစိတ်အချက်အလက်များကိုလည်း ပိုမိုချဲ့ထွင် ပြောကြားခဲ့ကြသည်။

နောက်ဆုံးတွင် ယန်မိသားစုသည် ကိုယ်ပိုင်အယူဝါဒတစ်ခုကို ဖန်တီးခဲ့ကြသည်။

ခန္ဓာကိုယ်သန့်စင်ခြင်းတွင် မရေမတွက်နိုင်သော လျှို့ဝှက်ချက်များ ရှိနေပြီး ယင်းတို့ကိုသာ ဆက်တိုက်ဖော်ထုတ်နိုင်ပါက ကျင့်ကြံသူတစ်ဦးအနေဖြင့် အဆင့်များကို တိုက်ရိုက်ကျော်ဖြတ်နိုင်သည်ဟု ယုံကြည်ကြသည်။

ကျော်ဖြတ်နိုင်သည့် အဆင့်အရေအတွက်မှာလည်း ကန့်သတ်ချက်မရှိဘဲ လူတစ်ဦး၏ မိမိကိုယ်ပိုင်ခန္ဓာကိုယ်အပေါ် နားလည်မှုအပေါ်၌သာ မူတည်သည်ဟု ဆိုကြသည်။

လက်ရှိကျင့်ကြံခြင်း အလားအလာများသည် ခန္ဓာကိုယ်က တံခါးဖြစ်ပြီး ချီဓာတ်မှာ ထိုတံခါးကိုဖွင့်ရန် ကမ္ဘာပေါ်ရှိ သော့များစွာထဲမှ တစ်ခုသာဖြစ်ကြောင်း သက်သေပြနေသည်ဟုပင် သူတို့က ဆိုခဲ့ကြသေးသည်။

ဒန်တျန်သည် မည်သည့်နေရာမှ ထွက်ပေါ်လာသနည်း။ ခန္ဓာကိုယ်မှပင် ဖြစ်သည်။

ချီဓာတ်ကို မည်သည့်အရာက အာရုံခံပြီး စုပ်ယူသနည်း။ ခန္ဓာကိုယ်ပင် ဖြစ်သည်။

မဏ္ဍိုင်များနှင့် အမြုတေများသည် မည်သည့်နေရာမှ လာသနည်း။ ခန္ဓာကိုယ်မှပင် ဖြစ်သည်။

အကယ်၍ ကျင့်ကြံသူတစ်ဦး၌ ခန္ဓာကိုယ်မရှိလျှင် ဤအရာများကို ဖန်တီးနိုင်မည်လော။

သူတို့အယူအဆအရ ခန္ဓာကိုယ်အကြောင်းကို လုံလောက်အောင် စူးစမ်းနိုင်လျှင် အခိုင်မာဆုံးသော အခြေခံအုတ်မြစ်ဖြင့် နန်းတော်အဆင့်သို့ တစ်ဟုန်ထိုး ခုန်တက်နိုင်ရုံသာမက သာမန်နန်းတော်အဆင့် ကျင့်ကြံသူများထက်ပင် သက်တမ်း ပိုရှည်နိုင်သည်ဟု တွေးဆခဲ့ကြသည်။

ဤသို့သော အတွေးများဖြင့် ယန်မိသားစုဝင်များသည် ခန္ဓာကိုယ်သန့်စင်ခြင်းအဆင့်ကို ကျော်လွန်ရန် ခဲယဉ်းလှပေသည်။

မြင့်မားသော ကျင့်ကြံခြင်းအဆင့်များသို့ တက်လှမ်းသည့် တစ်ခုတည်းသော အကြောင်းပြချက်မှာ ချီသန့်စင်ခြင်းနှင့် အခြေတည်အဆင့်များသို့ ရောက်ရှိပါက ခန္ဓာကိုယ်သန့်စင်ခြင်းအဆင့်တွင် ပိုမိုတိုးတက်မှုများ ရှိနိုင်မရှိနိုင်ကို သုတေသနပြုရန်အတွက်သာ ဖြစ်သည်။

ခန္ဓာကိုယ်သန့်စင်ခြင်း၏ နောက်ထပ်အဆင့်များကို ဖွင့်လှစ်ရန်အတွက် လိုအပ်သော အထူးအခြေအနေများ ရှိနိုင်သည်ဟုလည်း သူတို့က ယူဆချက်ထုတ်ခဲ့ကြသည်။

သူတို့၏ စိတ်အားထက်သန်မှုမှာ အချည်းနှီးမဖြစ်ခဲ့ပေ။

လူသားခန္ဓာကိုယ်နှင့် ပတ်သက်သော ဆေးဖော်စပ်ခြင်းပညာရပ်တွင် သူတို့သည် အလွန်နှံ့စပ်ကျွမ်းကျင်ကြသဖြင့် ယန်ချင်းသည် အဖွဲ့အစည်း၏ စာမေးပွဲများကို အောင်မြင်ပြီးနောက် သူတို့ပါ လိုက်ပါလာရန် ဆုံးဖြတ်သည့်အခါ ဆေးတောင်ကြား၊ ဆေးဖော်စပ်ခြင်းဌာနနှင့် သုတေသနဌာနတို့က သူတို့ကို ဝမ်းမြောက်ဝမ်းသာ လက်ခံခဲ့ကြသည်။

မိသားစု စတင်တည်ထောင်ချိန်မှစ၍ နှစ်ပေါင်း ၁,၀၀၀ အတွင်း ယန်ချင်းမှလွဲ၍ ပြိုင်ဘက်ကင်းကျောက်စိမ်းခန္ဓာ ပိုင်ဆိုင်သူ မရှိခဲ့သော်လည်း စိန်ခန္ဓာပိုင်ဆိုင်သူ နှစ်ဦး သုံးဦးခန့်၊ ရွှေခန္ဓာပိုင်ဆိုင်သူ တစ်ဒါဇင်ကျော်နှင့် ငွေခန္ဓာ ပိုင်ဆိုင်သူများမှာ မရေမတွက်နိုင်အောင် ပေါ်ထွက်ခဲ့သည်။

သူတို့၏ အတွေးအမြင်များ၊ အထူးသဖြင့် ပထမဆုံးအဆင့် သုံးဆင့်ဖြစ်သည့် သံမဏိခန္ဓာ၊ ကြေးခန္ဓာနှင့် ငွေခန္ဓာတို့အပေါ် သိမြင်မှုများသည် အလွန်ပင် ကျယ်ပြန့်လှသဖြင့် အဖွဲ့အစည်းကပင် သူတို့၏ အယူအဆများကို သင်ရိုးညွှန်းတမ်း၏ အစိတ်အပိုင်းတစ်ခုအဖြစ် ထည့်သွင်းခဲ့သည်။

ယန်ချင်းကမူ သူတို့၏ ခန္ဓာကိုယ်သန့်စင်ခြင်း စမ်းသပ်မှုများအတွက် အမှတ်မထင် ပါဝင်ပေးရသည့် စမ်းသပ်ခံ ကျောင်းသားများစွာကို ရရှိသည့်အတွက် ယန်မိသားစုသည် သူတို့၏ တွေ့ရှိချက်များကို အခမဲ့နီးပါး မျှဝေပေးခဲ့ခြင်းဖြစ်သည်ဟု ဆိုလေသည်။

အဖွဲ့အစည်းသည် သူတို့အတွက် အကောင်းဆုံး ခိုလှုံရာဖြစ်ခဲ့သည်။ အကန့်အသတ်မရှိသော အရင်းအမြစ်များနှင့် သူတို့၏ တွေ့ရှိချက်များကို စမ်းသပ်ရန် ပါရမီထူးချွန်သော သူများစွာ ရှိနေသောကြောင့်ပင်။

ယန်ချင်း၏ အဘိုးနှင့် အပေါင်းအဖော်များသည် သူတို့၏ သုတေသနလုပ်ငန်းများ အဖွဲ့အစည်းအတွင်း မည်မျှအထိ တိုးတက်လာတော့မည်ကို တွေးတောရင်း မျက်လုံးများ နီမြန်းလာသည်အထိ စိတ်လှုပ်ရှားခဲ့ကြသည်ကို ယန်ချင်း မှတ်မိနေသေးသည်။

သူ၏ ဘဝတစ်လျှောက်လုံးတွင် သူ၏အဘိုးနှင့် အခြားသော အကြီးအကဲများ ငိုကြွေးသည်ကို မမြင်ဖူးခဲ့သော်လည်း ထိုနေ့တွင်မူ ထူးဆန်းသော အဖိုးကြီးတစ်စုမှာ အဖွဲ့အစည်း၏ ဂိတ်တံခါးဝတွင် တစ်ဦးကိုတစ်ဦးဖက်၍ ငိုကြွေးနေခဲ့ကြသည်။

ထို့နောက် သူတို့ကို ဖြတ်ကျော်သွားသည့် ကျင့်ကြံခြင်းမရှိသေးသော ကလေးငယ်များကိုလည်း တက်ကြွစွာ နှုတ်ဆက်နေကြတော့သည်။

…

“တရားသူကြီး ယန်ချင်း... တရားသူကြီး ယန်ချင်း... ကျွန်တော်တို့ ကြယ်နှင်းမြူတောင်ကြားကို ရောက်နေပြီဗျ။”

တွေးတောငေးမောနေသော ယန်ချင်းသည် စုန့်ကောကျိ၏ ခေါ်သံကြောင့် သတိပြန်ဝင်လာခဲ့သည်။

သူတို့သည် မနက်ဖြန်ကျင်းပမည့် အခမ်းအနားနေရာဖြစ်သော ကြယ်နှင်းမြူတောင်ကြားသို့ ရောက်ရှိနေပြီ ဖြစ်သည်။

ဤနေရာမှာ အဖွဲ့အစည်း၏ ခမ်းနားထည်ဝါမှုကို အစစ်အမှန် ပြသနေပြီး အိပ်မက်ဆန်လှသော ရှုခင်းတစ်ခုပင် ဖြစ်ပေသည်။