အခန်း (၄၅၁-၄၅၂)
Vol. 33 Ch. 451-452
အခန်း ( ၄၅၁ ) - နတ်ဆိုးဧကရာဇ်ကြီး၏ လမ်းညွှန်မှု၊ လမ်းစဉ်၏ ကျောက်ချရာမှတ်တိုင်၊ အတွေးများကို ချန်ထားရစ်ခြင်း
ဤနတ်ဆိုးဧကရာဇ်ကြီးသည် အမှန်တကယ်ပင် ထူးဆန်းလှပေသည်။
ဟာလာဟင်းလင်းဖြစ်ကာ ဗလာကျင်းနေသော ခန်းမဆောင်ကြီးကို ကြည့်လျက် ကုချန်မှာ စိတ်ထဲ၌ သက်ပြင်းမချဘဲ မနေနိုင်အောင် ဖြစ်သွားရ၏။
သာမန် လောကီအင်ပါယာမင်းဆက်များမှ အရှင်သခင်များပင်လျှင် ၎င်းတို့၏ အိပ်ဆောင်များနှင့် နေထိုင်ရာများကို ခမ်းနားထည်ဝါ၍ ဇိမ်ကျလွန်းစွာ တည်ဆောက်ထားတတ်ကြ၏။
အောက်ကမ္ဘာ၌ သူမြင်တွေ့ခဲ့ဖူးသော ရှင်သန်ခြင်းတားမြစ်နယ်မြေများသည် ထိုကဲ့သို့ အပြင်ပန်း ခမ်းနားမှုမျိုး မရှိသော်လည်း နက်ရှိုင်းလှသော တာအိုအငွေ့အသက်များနှင့် များစွာသော အင်မော်တယ်နန်းဆောင်များကို အတွင်း၌ ဖုံးကွယ်ထားကြသည်။
ဤကောင်းကင်ဘုံများ၏ အထွတ်အထိပ်သို့ ရောက်လုနီးပါးဖြစ်နေသော ဤနတ်ဆိုးဧကရာဇ်ကြီး၌သာ ဤမျှရိုးရှင်းသော နေထိုင်မှုအခြေအနေမျိုး ရှိနေခဲ့သည်။
" ငါကိုယ်တော် နေထိုင်တဲ့နေရာက အရမ်းကို ရိုးရှင်းလွန်းနေတယ်လို့ မင်း ထင်နေတာလား "
ကုချန် ဤသို့ တွေးတောနေစဉ်မှာပင် နတ်ဆိုးဧကရာဇ်ကြီးက လှည့်လာကာ ကုချန်အား ပြုံး၍ ကြည့်လိုက်လေသည်။ သူ၏ ဉာဏ်ပညာကြီးမားသော မျက်လုံးများက ကုချန်၏ အတွေးများကို ထိုးထွင်းသိမြင်နိုင်စွမ်း ရှိနေပုံရသည်။
" နည်းနည်းတော့ ဟုတ်ပါတယ် "
ကုချန်မှ ငြင်းဆန်ခြင်းမရှိဘဲ တိုက်ရိုက်ပင် ခေါင်းညိတ် သဘောတူလိုက်လေသည်။
" ဟက်... ငါကိုယ်တော်တို့ အဆင့်ရောက်လာရင် ထာဝရတာအိုတစ်ခုတည်းကသာလျှင် တစ်ခုတည်းသော ကျောက်ချရာမှတ်တိုင်ဖြစ်ပြီး ငါတို့ လိုက်စားသင့်တဲ့အရာ ဖြစ်လာတယ်... တခြားအရာတွေက ငါကိုယ်တော့်ကို နည်းနည်းလေးတောင် စိတ်ဝင်စားမှုမပေးနိုင်တော့တာ ကြာပါပြီ "
နတ်ဆိုးဧကရာဇ်ကြီးသည် ကုချန်၏မေးခွန်းကို ဖြေကြားနေပုံရသကဲ့သို့ သူ့ကိုယ်သူလည်း သက်ပြင်းချနေဟန်ရှိသည်။
ဤသည်မှာ ၎င်းတို့ကဲ့သို့သော ရှေးဟောင်းနတ်ဆိုးဧကရာဇ်များသာ နားလည်နိုင်သည့် ခံစားချက်မျိုး ဖြစ်သည်။ အင်မော်တယ်ဘုရင်အဆင့်သို့ မကြာသေးမီကမှ ရောက်ရှိခဲ့သော ဤအဆုံးမဲ့ကောင်းကင်ဘုံအရှင်အနေဖြင့် ၎င်းကို နားလည်နိုင်မည် မဟုတ်ချေ။
၎င်းတို့ကဲ့သို့သော ရှေးဟောင်းနတ်ဆိုးဧကရာဇ်များ အားလုံးနီးပါးမှာ အံ့မခန်း ရှည်လျားသော သက်တမ်းများကို ပိုင်ဆိုင်ထားကြသည်။
သူ၏ကြီးပြင်းလာမှု ခရီးလမ်းတစ်လျှောက်တွင် နတ်ဆိုးဧကရာဇ်ကြီးသည် အာဏာ၊ အလှအပ၊ မိသားစုဝင်များ၊ သွေးဆက်များ စသည့် အခြားအရာများကို မလိုက်စားဘဲ၊ ဂရုမစိုက်ဘဲ နေခဲ့သည်တော့ မဟုတ်ပေ။
သို့သော် နောက်ဆုံးတွင် အရာအားလုံးက လွင့်ပြယ်သွားသော မီးခိုးငွေ့များအဖြစ်သာ ပြောင်းလဲသွားခဲ့သည်။
သူ၏ ရှည်လျားသော ဘဝသက်တမ်းတွင် ထာဝရတာအိုကို လိုက်စားခြင်းသာ ကျန်ရစ်ခဲ့တော့သည်။
" တစ်ခုတည်းသော ကျောက်ချရာမှတ်တိုင် "
ကုချန်မှာ မျက်ခုံးပင့်လိုက်၏။ ဤကဲ့သို့သော စကားမျိုးကို သူ ပထမဆုံးအကြိမ် ကြားဖူးခြင်း ဖြစ်သည်။
" မှန်တယ်... တစ်ခုတည်းသော ကျောက်ချရာမှတ်တိုင်ပဲ "
နတ်ဆိုးဧကရာဇ်ကြီးမှာ ပြုံး၍ ခေါင်းညိတ်ကာ ပြောဆိုလေသည်။
" နောင်တစ်ချိန်ကျရင် မင်းလည်း ဒီခံစားချက်ကို ကြုံတွေ့ရလိမ့်မယ်... အခု မင်းမြတ်နိုးပြီး ဂရုစိုက်နေတဲ့ အရာအားလုံးက ရှည်လျားတဲ့ အချိန်ကာလတစ်ခုမှာ ကြည့်လိုက်ရင် အဓိပ္ပာယ်မရှိတော့ဘူး... အားလုံးက မျက်စိတစ်မှိတ်အတွင်းမှာ ပျောက်ကွယ်သွားမယ့် မီးခိုးငွေ့တွေချည်းပဲ.....
ဒီရှည်လျားတဲ့ အချိန်ကာလကို ဖြတ်သန်းသွားမယ့် တစ်ခုတည်းသော ကျောက်ချရာမှတ်တိုင်ကတော့ မမောမပန်းနိုင် တာအိုကို လိုက်စားခြင်းပဲ!
ငါတို့အဆင့်မှာဆိုရင် လောကကြီးက အရာအားလုံးအပေါ် စိတ်ဝင်စားမှု ပျောက်ဆုံးနေတာ ကြာပြီ... ဒီအဆုံးမရှိတဲ့ တာအိုကိုပဲ စူးစမ်းချင်တော့တယ်... ဒါက ငါတို့ အသက်ရှင်နေရတဲ့ တစ်ခုတည်းသော အဓိပ္ပာယ်ပဲ.....
အမြင့်ဆုံးသော မေ့လျော့ခြင်း... ဒါက တကယ့်အစစ်အမှန် အခြေအနေပဲ.....
သက်တမ်း ရှည်လျားလေလေ၊ အဆင့် မြင့်မားလေလေ... စိတ်ခံစားမှုခုနစ်ပါးနဲ့ ရမ္မက်ခြောက်ပါးကို ဆုံးရှုံးရလွယ်ကူလေလေဖြစ်ပြီး တာအိုနဲ့ တစ်ထပ်တည်းနီးပါး ဖြစ်သွားတတ်တယ်.....
တာအိုကို ရှာဖွေခြင်းကို တည်ငြိမ်တဲ့ ကျောက်ချရာမှတ်တိုင်အဖြစ် သတ်မှတ်ထားရင်တောင်မှ... ထိန်းချုပ်မှု ကင်းမဲ့သွားနိုင်တဲ့ အန္တရာယ် ရှိနေသေးတယ်.....
နတ်ဆိုးနယ်မြေမှာ ငါကိုယ်တော်မတိုင်ခင်က... ထာဝရနတ်ဆိုးဧကရာဇ်လို့ခေါ်တဲ့ ရှေးဟောင်းနတ်ဆိုးဧကရာဇ်တစ်ပါး ရှိခဲ့ဖူးတယ်.....
နတ်ဆိုးနယ်မြေရဲ့ ဧကရာဇ်တွေထဲမှာ သူ့ကို အရှေးအကျဆုံးလို့ သတ်မှတ်ထားကြတယ်... သူ့ရဲ့ ရှည်လျားတဲ့ ဘဝသက်တမ်းမှာ အရာအားလုံးအပေါ် စိတ်ဝင်စားမှု ပျောက်ဆုံးခဲ့တာ ကြာပြီဖြစ်ပြီး... သူ့နှလုံးသားထဲမှာ တာအိုကို ရှာဖွေဖို့ဆိုတဲ့ အတွေးတစ်ခုတည်းသာ ရှိတော့တယ်.....
ဒါပေမဲ့ နောက်ပိုင်းကျတော့ ဒီတာအိုကို ရှာဖွေတယ်ဆိုတဲ့... တစ်ခုတည်းသော ကျောက်ချရာမှတ်တိုင်ကတောင် သူ့ကို တည်ငြိမ်အောင် မလုပ်ပေးနိုင်တော့ဘူး.....
နောက်ဆုံးမှာတော့... ဒီထာဝရနတ်ဆိုးဧကရာဇ်ဟာ တာအိုထဲကို တိတ်တဆိတ် ပေါင်းစည်းသွားခဲ့ပြီး... သက်ရှိအငွေ့အသက် နည်းနည်းလေးမှ မကျန်တော့ဘဲ ကောင်းကင်နဲ့မြေကြီးထဲကို ပေါင်းစပ်သွားတဲ့... ကျောက်တုံးတစ်တုံး ဖြစ်သွားခဲ့တယ် "
ဤသို့ပြောပြီးနောက် နတ်ဆိုးဧကရာဇ်ကြီးသည် အနည်းငယ် ရပ်တန့်သွားကာ ကုချန်ထံသို့ အဓိပ္ပာယ်ပါပါ ကြည့်လိုက်ကာ
" ထာဝရနတ်ဆိုးဧကရာဇ်ရဲ့ ဥပမာက နောင်လာနောက်သားတွေ အားလုံးကို သတိပေးခဲ့တယ်...
ဒါကြောင့်... ငါတို့လို နတ်ဆိုးဧကရာဇ်တွေက တာအိုကို ရှာဖွေခြင်းကို တစ်ခုတည်းသော ပင်မကျောက်ချရာမှတ်တိုင်အဖြစ် သတ်မှတ်တဲ့အပြင်... ကိုယ့်အတွက် ဒုတိယ ကျောက်ချရာမှတ်တိုင်တချို့ကိုလည်း ရည်ရွယ်ချက်ရှိရှိ ဖန်တီးထားကြတယ်.....
ဒီဒုတိယ ကျောက်ချရာမှတ်တိုင်တွေက... ဝါသနာတစ်ခု ဒါမှမဟုတ် လိုက်စားမှုတစ်ခုခု ဖြစ်နိုင်တယ်.....
အတိုချုပ်ပြောရရင်... နတ်ဆိုးဧကရာဇ်တစ်ပါးကို အသက်ရှင်ဖို့ စိတ်ဝင်စားမှု ဆက်ရှိနေစေတဲ့ 'အတွေး' တွေလို့ မင်း နားလည်ထားလို့ ရတယ်.....
'အတွေး' တွေ များများရှိလေ၊ တစ်ယောက်ရဲ့ တာအိုက ပိုတည်ငြိမ်လေဖြစ်ပြီး ကိုယ့်အပေါ် ကျောက်ချနိုင်တဲ့ အာနိသင်က ပိုကောင်းလေပဲ "
ပင်မ ကျောက်ချရာမှတ်တိုင်၊ ဒုတိယ ကျောက်ချရာမှတ်တိုင်များ.....
နတ်ဆိုးဧကရာဇ်ကြီး၏ ရှင်းပြချက်ကို နားထောင်လျက် ကုချန်သည် အလင်းပြခံလိုက်ရသကဲ့သို့ ခံစားလိုက်ရကာ သူ၏စိတ်များပင် ရုတ်တရက် ကြည်လင်သွားခဲ့၏။
သူ့အတွက် ဤသည်မှာ ယခင်က တစ်ခါမျှ နားမလည်ခဲ့ဖူးသော အချက်အလက်များ ဖြစ်ပေသည်။
နတ်ဆိုးဧကရာဇ်အဆင့်ကို ရောက်ရှိသွားတဲ့အခါ အချိန်မရွေး တာအိုထဲကို ပေါင်းစည်းသွားနိုင်တဲ့ အန္တရာယ်နဲ့ အမှန်တကယ်ပဲ ရင်ဆိုင်ရတယ်ပေါ့။
ဟုတ်ပေသည်။ နတ်ဆိုးဧကရာဇ်အဆင့်သို့ ရောက်ရှိကာ အဆုံးမရှိသော ရှေးဟောင်းနှစ်ပရိစ္ဆေဒများကို ဖြတ်သန်းပြီးနောက် လောကကြီးရှိ အရာအားလုံးအပေါ် စိတ်ဝင်စားမှုများ ပျောက်ဆုံးသွားခဲ့သည်မှာ ကြာလှပြီ ဖြစ်ပေလိမ့်မည်။
အကယ်၍ တာအိုကို ရှာဖွေမည်ဟူသော အတွေးကသာ သူတို့ကို မထောက်ပံ့ထားဘူးဆိုလျှင် မည်သည့် စိတ်ခံစားမှုလှိုင်းဂယက်မှ မရှိသော နတ်ဆိုးဧကရာဇ်တစ်ပါးသည် မာကျောသော ကျောက်တုံးတစ်တုံးနှင့် ဘာများ ကွာခြားတော့မည်နည်း။
၎င်းမှာ ရှင်သန်ခြင်းတားမြစ်နယ်မြေ အသီးသီးတွင် နှစ်သိန်းပေါင်း၊ သန်းပေါင်းများစွာကြာအောင် အင်မော်တယ်တက်လှမ်းခြင်းကို စောင့်ဆိုင်းနေခဲ့ကြသော အဆုံးမဲ့ကမ္ဘာရှိ ရှေးဟောင်းအရှင်များကဲ့သို့ပင် ဖြစ်သည်။
တားမြစ်နယ်မြေများအတွင်း ခက်ခဲကြမ်းတမ်းသော နှစ်ကာလများတစ်လျှောက် ၎င်းတို့ကို ထောက်ပံ့ပေးထားသည့် တစ်ခုတည်းသော အတွေးမှာ အင်မော်တယ်တက်လှမ်းခြင်းပင် ဖြစ်သည်။
သို့သော်လည်း ကောင်းကင်ချောက်နက်ကြီး နောက်ဆုံးတွင် ပွင့်လာပြီး တားမြစ်နယ်မြေအသီးသီးမှ အရှင်များက ကောင်းကင်ချောက်နက်ထဲသို့ ပြေးဝင်သွားကြချိန်တွင် ထိုအင်မော်တယ်တက်လှမ်းခြင်း ဆိုသည်မှာ လှည့်စားမှုတစ်ခုသာ ဖြစ်ကြောင်းကို တွေ့ရှိလိုက်ရသောအခါ အရှင်အတော်များများမှာ သည်းမခံနိုင်တော့ဘဲ နေရာမှာတင် တာအိုထဲသို့ ချက်ချင်း ပေါင်းစည်းသွားခဲ့ကြသည်။
နှစ်သိန်းပေါင်းများစွာ အသက်ရှင်ခဲ့ကြသော အရှင်များပင်လျှင် ဤသို့ဖြစ်ခဲ့သည်ဆိုပါက နှစ်သန်းပေါင်းဆယ်ချီ သို့မဟုတ် ထို့ထက်မက အသက်ရှင်ခဲ့ကြသော နတ်ဆိုးဧကရာဇ်များဆိုလျှင် မည်သို့ ရှိမည်နည်း။
တာအိုကို ရှာဖွေခြင်းဟူသော ပင်မ ကျောက်ချရာမှတ်တိုင် ရှိနေလျှင်ပင် မလုံလောက်သေးချေ။ ၎င်းတို့တွင် 'လူသားဆန်မှု' အနည်းငယ် ကျန်ရစ်နေစေရန်နှင့် စိတ်ခံစားမှုခုနစ်ပါးနှင့် ရမ္မက်ခြောက်ပါး ကင်းမဲ့နေသော ကျောက်တုံးများ မဖြစ်သွားစေရန် သေချာစေဖို့ မိမိတို့အတွက် ဒုတိယ ကျောက်ချရာမှတ်တိုင်များစွာကို ရှာဖွေထားရန် လိုအပ်ပေသည်!
အဘယ်ကြောင့်ဆိုသော် အမြင့်ဆုံးသော မေ့လျော့ခြင်းနေ့ရက် အမှန်တကယ် ရောက်ရှိလာသည်နှင့် တစ်ပြိုင်နက် တာအိုထဲသို့ ပေါင်းစည်းရမည့်နေ့မှာလည်း မဝေးတော့သောကြောင့်ပင် ဖြစ်သည်။
ထို ထာဝရနတ်ဆိုးဧကရာဇ်ကဲ့သို့ပင် ဖြစ်၏။
ဤအခိုက်အတန့်တွင် ကုချန်၏စိတ်ထဲ၌ ဟွမ်သွမ့်ကောင်းကင်ကျောက်တိုင်တွင် သူမြင်တွေ့ခဲ့ရသော တောက်ပသည့် ကျောက်စိမ်းဖြူလက်ဝါးကြီးမှာ ပြန်လည် ပေါ်လာခဲ့သည်။
သံသယဖြစ်ဖွယ်မရှိ၊ ထိုတောက်ပသော ကျောက်စိမ်းဖြူလက်ဝါးကြီး၏ ပိုင်ရှင်သည် နတ်ဆိုးဧကရာဇ်အဆင့်ထက် များစွာ၊ များစွာ ပိုမိုအားကောင်းသော တည်ရှိမှုတစ်ခုပင် ဖြစ်သည်။
လက်ဝါးတစ်ချက်ရိုက်လိုက်ရုံဖြင့် ဤကောင်းကင်ဘုံများ၏ တာအိုကို လွှမ်းခြုံသွားနိုင်ခဲ့သည်။
ထိုသို့သော တည်ရှိမှုမျိုးတွင် ၎င်း၏ ကိုယ်ပိုင် စိတ်ခံစားမှုများ ရှိနေသေးပါမည်လော။
သို့မဟုတ် ဤကျယ်ပြောလှသော တာအို၏ ပေါင်းစည်းမှုကို ခံလိုက်ရပြီး အစစ်အမှန် သက်ရှိတစ်ခု မဟုတ်တော့သည်မှာ ကြာလှပြီလော။
ထို့အပြင် လက်ရှိ သူ၏အခြေအနေတွင်လည်း တံခါးပိတ်ကျင့်ကြံခြင်း တစ်ကြိမ်လျှင် နှစ်ရာချီ၊ ထောင်ချီ ကြာမြင့်နေပြီဖြစ်ရာ တစ်ချိန်က သူပိုင်ဆိုင်ခဲ့သော စူးရှသည့် အချိန်ကာလအာရုံမှာ ပျောက်ဆုံးနေခဲ့သည်မှာ ကြာလှပြီ ဖြစ်သည်။
အနာဂတ်တွင် တစ်ကြိမ် တံခါးပိတ်ကျင့်ကြံမှုမှာပင် နှစ်သောင်းချီ သို့မဟုတ် နှစ်သိန်းချီ ကြာမြင့်မည့် အချိန်များလည်း ရှိလာနိုင်ပေသည်။
ထိုအချိန်ရောက်လျှင် တံခါးပိတ်ကျင့်ကြံခြင်း တစ်ကြိမ်၏ အချိန်ကာလမျှသာ ဖြစ်နေဦးမည်ဆိုစေကာမူ သူ ထွက်ပေါ်လာပြီးနောက် တစ်ချိန်က သူ မြတ်နိုးခဲ့သမျှ အရာအားလုံး ရှိနေပါဦးမည်လော။
ကုချန်၏အတွေးများမှာ လျင်မြန်စွာ ပြေးလွှားသွား၍ အရာများစွာကို ချက်ချင်း တွေးမိသွားခဲ့သည်။
သို့သော် မကြာမီတွင် သူ၏အတွေးများကို စုစည်းလိုက်ပြီး နတ်ဆိုးဧကရာဇ်ကြီးအား လေးနက်စွာ လက်အုပ်ချီလျက် ပြောဆိုလိုက်လေသည်။
" လူငယ်လေး ကျွန်တော် ဧကရာဇ်ကြီးရဲ့ သွန်သင်ချက်တွေကို နှလုံးသွင်းထားပါ့မယ် "
နတ်ဆိုးဧကရာဇ်ကြီးသည် သူ့အား စကားတစ်ခွန်းမျှသာ ပြောခဲ့သော်လည်း ထိုစကားတစ်ခွန်း၏ တန်ဖိုးမှာပင် မခန့်မှန်းနိုင်လောက်အောင် ကြီးမားကြောင်း ကုချန် သိထားလေသည်။
အချို့သောအရာများသည် ထိုအဆင့်ရှိ တည်ရှိမှုများ၏ အမြင်တွင် သာမန်နှင့် အများသိသော ကိစ္စရပ်များမျှသာ ဖြစ်ကောင်းဖြစ်နိုင်ပေသည်။
သို့သော် ထိုအဆင့်သို့ မရောက်ရှိပါက ထိုအချက်ကို မိမိဘာသာ မည်သည့်အခါမျှ နားလည်သဘောပေါက်နိုင်မည် မဟုတ်ချေ။
ယခုမူ နတ်ဆိုးဧကရာဇ်ကြီးက အနာဂတ်တွင် ကုချန် နတ်ဆိုးဧကရာဇ်အဆင့်သို့ တက်လှမ်းသည့်အခါ ကြုံတွေ့ရနိုင်သည့် ပြဿနာများကို ကြိုတင် ထောက်ပြကာ ရည်ရွယ်ချက်ရှိရှိ လမ်းညွှန်ပေးခဲ့ခြင်း ဖြစ်သည်။ ဤသည်မှာ ကုချန်အနေဖြင့် ကြိုတင် ကာကွယ်မှုများ ပြုလုပ်နိုင်ပြီး သူ၏ ကိုယ်ပိုင် 'ဒုတိယ ကျောက်ချရာမှတ်တိုင်များ' ကို ယခုကတည်းက စတင်ဖန်တီးနိုင်မည်ဟု ဆိုလိုခြင်းဖြစ်သည်။
ဤနည်းဖြင့် အနာဂတ်တွင် သူ နတ်ဆိုးဧကရာဇ်အဆင့်သို့ တက်လှမ်းလာသောအခါ လွယ်ကူစွာ ကိုင်တွယ်ဖြေရှင်းနိုင်မည်ဖြစ်ရာ သူ့အတွက် အလွန်တရာ ကြီးမားသော အကျိုးကျေးဇူး ဖြစ်လာပေမည်။
ထို့ကြောင့် တစ်နည်းအားဖြင့် နတ်ဆိုးဧကရာဇ်ကြီး၏ စကားများမှ ကုချန် ရရှိခဲ့သော အကျိုးကျေးဇူးများမှာတင် အတိုင်းအဆမရှိ ကြီးမားလှပေသည်။
အခန်း ( ၄၅၂ ) - မို့ကျွင်း၏ အကြံအစည်၊ နတ်ဆိုးဧကရာဇ်ကြီး၏ ရည်ရွယ်ချက်၊ တစ်ခဏတာ နတ်ဆိုးဧကရာဇ်
နတ်ဆိုးဧကရာဇ်ကြီး၏ စကားများက ကုချန်အား အတော်လေး စိတ်သက်သာရာရသွားစေခဲ့သည်။
ယခင်က ထုံးထျန်းနတ်ဆိုးတောင်သို့ မလာရောက်မီ သူ၏စိတ်ထဲတွင် သံသယအနည်းငယ် ရှိနေခဲ့သည်။ နတ်ဆိုးဧကရာဇ်ကြီးမှ သူ့အား ထုံးထျန်းနတ်ဆိုးတောင်သို့ ဖိတ်ခေါ်ခြင်းမှာ သူ့အတွက် ထောင်ချောက်ဆင်ထားသော 'ဟုန်မင်ပွဲ' တစ်ခုများ ဖြစ်နေမလားဟု တွေးတောနေခဲ့ခြင်း ဖြစ်သည်။
သို့သော် နတ်ဆိုးဧကရာဇ်ကြီးမှ ကုချန်အား ယခုလေးတင် ပြောပြခဲ့သော စကားများသည် ကျယ်ပြောလှသော ကောင်းကင်ဘုံများအတွင်းမှ အကြီးမားဆုံးသော လျှို့ဝှက်ချက်များထဲမှ တစ်ခုဖြစ်သည်မှာ ရှင်းလင်းလှပေသည်။ ဤသည်မှာ စေတနာကောင်းကို တစ်နည်းတစ်ဖုံ သွယ်ဝိုက်ပြသလိုက်ခြင်းဟု သတ်မှတ်နိုင်ပြီး သဘာဝကျကျပင် အတိုင်းအတာတစ်ခုအထိ ကုချန်အပေါ်ထားရှိသော နတ်ဆိုးဧကရာဇ်ကြီး၏ စေတနာကောင်းကို ကိုယ်စားပြုနေပေသည်။
ထိုသို့ဖြစ်ရာ ဤဖိတ်ကြားချက်မှာ 'ဟုန်မင်ပွဲ' ဖြစ်နိုင်ခြေ အလွန်နည်းပါးသွားပြီ ဖြစ်လေသည်။
သို့သော် နတ်ဆိုးဧကရာဇ်ကြီးသည် ဤတစ်ကြိမ် သူ့အား ဤနေရာသို့ ဖိတ်ခေါ်ရန် အလွန်အမင်း အားထုတ်ခဲ့ရာ တာအိုကျောက်ချရာမှတ်တိုင် အကြောင်းကို ပြောပြရုံသက်သက်တော့ သေချာပေါက် မဟုတ်နိုင်ချေ။
ဤသည်ကို တွေးမိသောအခါ ကုချန်သည် နတ်ဆိုးဧကရာဇ်ကြီးအား မေးခွန်းထုတ်လိုသည့် အကြည့်ဖြင့် ကြည့်လိုက်မိ၍ သူ စကားပြောလာမည့်အချိန်ကို စောင့်ဆိုင်းနေလိုက်လေသည်။
" ဒီတစ်ကြိမ် ငါအရှင် မင်းကို ဒီကို ဖိတ်ခေါ်လိုက်တာက ဒီကျောက်ချရာမှတ်တိုင်အကြောင်း ပြောပြဖို့ သက်သက်မဟုတ်တာ သေချာပါတယ် "
နတ်ဆိုးဧကရာဇ်ကြီးသည် ကုချန်၏စိတ်ထဲမှ သံသယကို ထိုးထွင်းသိမြင်သွားသည့်အလား ရယ်မောလိုက်လေသည်။ သူသည် လက်ဝါးကို ဝှေ့ယမ်းလိုက်ရာ ကုချန်၏မျက်စိရှေ့တွင် ပုံရိပ်ယောင်တစ်ခု ဖြည်းညင်းစွာ ပေါ်ထွက်လာတော့၏။
ထိုပုံရိပ်ထဲတွင် ခမ်းနားကြီးကျယ်သော ရှေးဟောင်းနတ်ဆိုးနန်းတော်ကြီးတစ်ခု ရှိနေပုံရကာ ထိုနတ်ဆိုးနန်းတော်အတွင်း၌ ကြီးမားလှသော နတ်ဆိုးမီးတောက်များနှင့်အတူ မားမားမတ်မတ် ရပ်နေသော လူရိပ်တစ်ခုမှာ တိတ်ဆိတ်စွာ ရှိနေလျက် သူ၏မျက်လုံးများထဲတွင် အမုန်းတရားများ ပြည့်နှက်နေ၏။
" ဒီလူကို မင်း သိလား "
နတ်ဆိုးဧကရာဇ်ကြီးသည် ပုံရိပ်ထဲမှ မားမားမတ်မတ်ရပ်နေသော လူရိပ်အား လက်ညှိုးထိုးပြကာ ပြုံး၍ မေးမြန်းလိုက်သည်။
" ကျွန်တော် မသိပါဘူး "
ကုချန်သည် မျက်မှောင်အနည်းငယ် ကျုံ့လိုက်၏။ ပုံရိပ်ထဲမှ လူကို သူ အမှန်တကယ် မသိသော်လည်း ထိုသူမှာ အင်မော်တယ်ဘုရင်တစ်ပါးနှင့် တူနေလေသည်။
သို့သော် အခြား အင်မော်တယ်ဘုရင်တစ်ပါးကို သူ သိ၊ မသိ နတ်ဆိုးဧကရာဇ်ကြီးမှ ရုတ်တရက် မေးလာခြင်းမှာ မည်သည့် သဘောနည်း။
" ဒီလူက မို့ကျွင်းနတ်ဆိုးအရှင်ပဲ... အရင် ရှီမိုထျန်းကျွင်းလိုပဲ သူက ငါအရှင့် လက်အောက်ခံ အင်မော်တယ်ဘုရင်တွေထဲက တစ်ပါးပေါ့ "
နတ်ဆိုးဧကရာဇ်ကြီးသည် ဖြည်းညင်းစွာ ဆက်၍ပြောဆိုလေသည်။
" သူနဲ့ ရှီမိုထျန်းကျွင်းက အားနည်းခဲ့တဲ့ အချိန်တွေတုန်းက အတူတူ စွန့်စားခဲ့ကြပြီး နက်ရှိုင်းတဲ့ ခင်မင်ရင်းနှီးမှု ရှိကြတယ်... ရှီမို သေဆုံးသွားတဲ့ ကိစ္စမှာ မင်းကို ငါအရှင်က အပြစ်မပေးတဲ့အပြင် အဆုံးမဲ့ထျန်းကျွင်းသစ်အဖြစ် ခန့်အပ်လိုက်တဲ့အတွက် ဒီမို့ကျွင်းနတ်ဆိုးအရှင်က ရန်ငြိုးဖွဲ့နေခဲ့တာပဲ..... "
နတ်ဆိုးဧကရာဇ်ကြီး ဤနေရာအထိ ပြောလာသောအခါ ကုချန် နားလည်သွားလေပြီ။ မို့ကျွင်းနတ်ဆိုးအရှင်၏ ရန်ငြိုးဖွဲ့ရာ ပစ်မှတ်မှာ ကျိန်းသေပေါက် သူသာ ဖြစ်ပေမည်။ နတ်ဆိုးဧကရာဇ်ကြီးကိုမူ သူ မကျေနပ်လျှင်ပင် အပြင်သို့ ထုတ်ပြရဲမည် မဟုတ်ချေ။
ထို့ကြောင့် နတ်ဆိုးဧကရာဇ်ကြီး၏ အဓိပ္ပာယ်မှာ မို့ကျွင်းနတ်ဆိုးအရှင်ဆိုသော ကောင်သည် သူ့အား လက်စားချေရန် ကြိုးစားမည် ဟူသောသဘောလော။ ကုချန် မျက်မှောင်အနည်းငယ် ကျုံ့လိုက်၏။
မို့ကျွင်းနတ်ဆိုးအရှင်မှ သူ့အား လက်စားချေမည်ဆိုသည်ကို သူ မအံ့ဩမိချေ။ သူ့အား အမှန်တကယ် အံ့ဩသွားစေသည်မှာ နတ်ဆိုးဧကရာဇ်ကြီး၏ သဘောထားပင် ဖြစ်သည်။ ဤကိစ္စကို သူ့အား ပြောပြရခြင်းမှာ မည်သည့်အဓိပ္ပာယ်နည်း။
သူ့ကို မျက်နှာသာပေးလို၍လား၊ သို့မဟုတ် သူတို့နှစ်ဦး ပြေလည်သွားစေရန်နှင့် မတိုက်ခိုက်ကြရန် မျှော်လင့်၍ မို့ကျွင်းနတ်ဆိုးအရှင်အတွက် 'တောင်းပန်' ပေးလို၍လော။
" မင်းနဲ့ ဒီမို့ကျွင်းနတ်ဆိုးအရှင်ကြားက ပြဿနာတွေမှာ ဝင်စွက်ဖက်ဖို့ ငါအရှင် အစက ရည်ရွယ်ချက် မရှိပါဘူး "
နတ်ဆိုးဧကရာဇ်ကြီးသည် ကုချန်အား တစ်ချက်ကြည့်ကာ ပေါ့ပေါ့ပါးပါး ရှင်းပြလေသည်။
" ငါအရှင်တို့ အဆင့်မှာဆိုရင် အင်အားစုတွေ၊ လက်အောက်ခံတွေဆိုတာ လွင့်ပြယ်သွားမယ့် တိမ်တိုက်တွေလို မဟုတ်ရင်တောင် အတူတူလောက်ပါပဲ... အဲဒီတစ်ယောက်ရဲ့ အမိန့်သာ မဟုတ်ရင် ဒီလောက်ကျယ်ပြောလှတဲ့ နတ်ဆိုးနယ်မြေကြီးကို အုပ်ချုပ်ဖို့ ငါအရှင် ပျင်းလွန်းနေမှာ "
" ဒါကြောင့် ငါအရှင့် လက်အောက်ခံ အင်မော်တယ်ဘုရင်တွေ ဘာပဲဖြစ်ဖြစ်၊ သေတောင်မှ ငါအရှင် ဝင်စွက်ဖက်ဖို့ အစီအစဉ် မရှိဘူး... တကယ်လို့ မို့ကျွင်းနတ်ဆိုးအရှင်နဲ့ မင်းကြားက ပြည်တွင်းရေးပဋိပက္ခသက်သက်ဆိုရင် သေချာပေါက် ငါအရှင် ဝင်ပါဖို့ ပျင်းနေမှာပဲ.....
ဒါပေမဲ့ ဒီမို့ကျွင်းနတ်ဆိုးအရှင်က အခု မင်းကိုရင်ဆိုင်ဖို့နဲ့ ငါအရှင့်ကို ပြဿနာပေးဖို့ တခြားနတ်ဆိုးဧကရာဇ်တွေနဲ့ ပူးပေါင်းချင်နေတယ်... ဒါကတော့ ငါအရှင် ခွင့်ပြုလို့မရတဲ့ ကိစ္စပဲ "
အခြား နတ်ဆိုးဧကရာဇ်များလော။ မူလက နတ်ဆိုးဧကရာဇ်ကြီး ပြောသော 'ထိုတစ်ယောက်' မှာ မည်သူနည်းဟု တွေးတောနေခဲ့သော ကုချန်သည် နောက်ဆက်တွဲ စကားများကြောင့် ချက်ချင်း စိတ်ဝင်စားသွားခဲ့၏။ ဤမို့ကျွင်းနတ်ဆိုးအရှင်သည် သူ့အား ရင်ဆိုင်ရန် အခြား နတ်ဆိုးဧကရာဇ်များကိုပါ ဖိတ်ခေါ်နိုင်ခဲ့သည်ပေါ့။
ကြီးမားလွန်းသော အကြံအစည်ပင်တည်း။
သို့သော် ကုချန်၏မျက်လုံးများမှာ တလက်လက် တောက်ပသွားကာ ပြောဆိုလိုက်၏။
" ဒီမို့ကျွင်းနတ်ဆိုးအရှင်မှာ နတ်ဆိုးဧကရာဇ်တစ်ပါးကို ကျွန်တော့်ဆီ ပစ်မှတ်ထားလာအောင် ဖိတ်ခေါ်နိုင်တဲ့ ဘယ်လိုစွမ်းရည်မျိုး ရှိနေလဲဆိုတာ သေချာနားမလည်ဘူး ဖြစ်နေတယ် "
" ငါကိုယ်တော်လည်း အရမ်းသိချင်တာနဲ့ ဒီမို့ကျွင်းနတ်ဆိုးအရှင်နောက်ကို လိုက်ကြည့်ခဲ့တာ "
နတ်ဆိုးဧကရာဇ်ကြီးသည် အနည်းငယ် ပြုံးလိုက်၍ လက်ဝါးကို နောက်တစ်ကြိမ် ဝှေ့ယမ်းလိုက်ရာ ပုံရိပ်ယောင်မြင်ကွင်းမှာ ချက်ချင်း ပြောင်းလဲသွားကာ နက်ရှိုင်းတိတ်ဆိတ်သော လေဟာနယ် နယ်မြေတစ်ခုသို့ ရောက်ရှိသွားသကဲ့သို့ ဖြစ်သွားလေသည်။
အဆုံးမဲ့လေဟာနယ် နယ်မြေတွင် မရေမတွက်နိုင်သော မှန်ပြင်များ တိတ်ဆိတ်စွာ တည်ရှိနေကာ ပုံပျက်နေသော အလင်းတန်းများမှာ ဤကမ္ဘာကြီးကို ရေတွက်မရနိုင်သော အပိုင်းအစများအဖြစ် ခွဲခြားထားသကဲ့သို့ ရှိနေလေသည်။ ကုချန်သည် ကြည့်ရုံမျှဖြင့်ပင် သူ၏စိတ်ထဲ၌ မသက်မသာ ခံစားမှုတစ်ခုကို ခံစားလိုက်ရသည်။
အကယ်၍ အင်မော်တယ်ဘုရင်အဆင့်အောက်ရှိ သက်ရှိတစ်ခုသာ ဤနေရာ၌ ရှိနေပါက ဤမြင်ကွင်းကို မြင်လိုက်ရုံဖြင့်ပင် ရူးသွပ်သွားနိုင်ပေသည်။
ဤအချိန်တွင် မို့ကျွင်းနတ်ဆိုးအရှင်သည် ဤအဆုံးမရှိသော လေဟာနယ် နယ်မြေ၌ ရိုသေလေးစားစွာ ရပ်နေလျက် ခေါင်းငုံ့ထားကာ တစ်စုံတစ်ခုကို တိတ်ဆိတ်စွာ စောင့်ဆိုင်းနေပုံရ၏။
" ဒီနေရာက မို့ကျွင်းနတ်ဆိုးအရှင် ရှာဖွေနေတဲ့ အခြားနတ်ဆိုးဧကရာဇ်တစ်ပါး နေထိုင်တဲ့နေရာပဲ "
နတ်ဆိုးဧကရာဇ်ကြီးသည် ပေါ့ပေါ့ပါးပါး ရှင်းပြလေ၏။ သို့သော် သူ၏ တိုးညင်းသော အသံမှာ ကုချန်၏ နားထဲသို့ ရောက်လာသောအခါ အနည်းငယ် အံ့ဩသွားစေသည်။ နတ်ဆိုးဧကရာဇ်ကြီးတွင် မည်မျှ ကျွမ်းကျင်သော နည်းလမ်းများ ရှိနေသနည်း။ အခြား နတ်ဆိုးဧကရာဇ်တစ်ပါးအကြောင်းကိုပင် လျှို့ဝှက်စွာ စုံစမ်းထောက်လှမ်းနိုင်သည်ပေါ့။
" ဟက်...! ဒါက လှည့်ကွက်အသေးစားလေး တစ်ခုပါ "
နတ်ဆိုးဧကရာဇ်ကြီးမှ ပေါ့ပေါ့ပါးပါး ပြောဆိုလေသည်။
သေချာပေါက်ပင် မကြာမီက သူ စိတ်ကူးပေါက်ကာ ကျောက်စိမ်းဖြူလိပ်ခွံဖြင့် နောက်ထပ် ဗေဒင်တွက်ချက်မှုတစ်ခု ပြုလုပ်ခဲ့ခြင်းကြောင့် ဖြစ်သည်ကိုမူ ကုချန်အား သူ ပြောပြမည် မဟုတ်ချေ။ ဗေဒင်တွက်ချက်မှု၏ ရလဒ်တွင် မို့ကျွင်းနတ်ဆိုးအရှင်မှ ကုချန်အား အန္တရာယ်ပြုမည့် ပုံရိပ်ပေါ်လာခဲ့ခြင်း ဖြစ်သည်။
မို့ကျွင်းနတ်ဆိုးအရှင်၌ ကုချန်အား ပစ်မှတ်ထားနိုင်သည့် စွမ်းရည် မည်သို့ရှိနေသည်ကို နတ်ဆိုးဧကရာဇ်ကြီး မသိသော်လည်း ကုချန်သည် သူ၏အနာဂတ်ကံကြမ္မာ အသွယ်သွယ်နှင့် ဆက်စပ်နေလေသည်။ နတ်ဆိုးဧကရာဇ်ကြီးသည် အခြားသူများမှ ကုချန်အား အန္တရာယ်ပြု အောင်မြင်သွားမည်ကို ကျိန်းသေပေါက် ခွင့်ပြုမည်မဟုတ်ရာ မို့ကျွင်းနတ်ဆိုးအရှင်ထံသို့ နတ်ဝိညာဉ်အာရုံတစ်မျှင်ကို လျှို့ဝှက်စွာ ကပ်ထားရန် သူ၏နည်းလမ်းများကို အသုံးပြုခဲ့ခြင်း ဖြစ်သည်။ ထိုအခါမှသာ ဤမြင်ကွင်းများ ပေါ်ထွက်လာခဲ့ခြင်း ဖြစ်၏။
အစမှအဆုံးတိုင် မို့ကျွင်းနတ်ဆိုးအရှင်သည် သူ နတ်ဆိုးဧကရာဇ်ကြီး၏ ပစ်မှတ်ထားခံခဲ့ရသည်မှာ ကြာပြီဖြစ်ကြောင်း လုံးဝ သိမနေခဲ့ချေ။
" မို့ကျွင်းနတ်ဆိုးအရှင်... မင်းက နတ်ဆိုးဧကရာဇ်ကြီးရဲ့ လက်အောက်ခံ အင်မော်တယ်ဘုရင် မဟုတ်ဘူးလား... ဘာလို့ ငါအရှင့်ဆီ လာတွေ့ရတာလဲ "
မှန်ပြင်နေရာလွတ်အတွင်းမှ ဆွဲဆောင်မှုရှိပြီး ညှို့ဓာတ်ပြင်းသော အသံတစ်သံ ထွက်ပေါ်လာကာ ထိုမှန်ပြင်နေရာလွတ်၏ အနက်ရှိုင်းဆုံးနေရာ၌ လောက၏ အလှတရားအားလုံး ပြည့်နှက်နေသော လူရိပ်တစ်ခု ထင်ဟပ်လာသည်ကို ခပ်ရေးရေး မြင်တွေ့ရပေသည်။
ထိုလူရိပ်ကို မြင်သောအခါ မို့ကျွင်းနတ်ဆိုးအရှင်၏ စိတ်ထဲတွင် ရမ္မက်ဆန္ဒ အရိပ်အယောင်တစ်ခု အလိုအလျောက် ပေါ်ထွက်လာခဲ့၏။ သို့သော် အလွန်လျင်မြန်စွာပင် ထိုပူလောင်သော ခံစားချက်ကို သူ အတင်းအဓမ္မ ဖိနှိပ်ထားလိုက်လေသည်။
" ရှာနာနတ်ဆိုးဧကရာဇ်ကို ဂါရဝပြုပါတယ် "
မို့ကျွင်းနတ်ဆိုးအရှင်သည် ခေါင်းကို အနည်းငယ် ငုံ့ကာ အသံနက်ကြီးဖြင့် ပြောဆိုလိုက်၏။
" ငါအရှင်က မင်းကို မေးနေတာလေ... နတ်ဆိုးဧကရာဇ်ကြီး ကွယ်ရာမှာ ငါအရှင့်ဆီ လာတွေ့တာ... သူ သိသွားမှာကို မင်း မကြောက်ဘူးလား "
ရှာနာနတ်ဆိုးဧကရာဇ်သည် ဆွဲဆောင်မှုရှိစွာ ရယ်မောလိုက်၏။ သူ ရယ်မောလိုက်သည်နှင့်အမျှ ဤကမ္ဘာကြီးမှာလည်း လိုက်ပါ တောက်ပသွားသကဲ့သို့ ရှိလေသည်။
" နတ်ဆိုးဧကရာဇ်ကြီးက ကိစ္စတွေကို မျှတမှုမရှိဘဲ ကိုင်တွယ်တယ်... ရှီမိုထျန်းကျွင်း သေဆုံးသွားတာတောင် နတ်ဆိုးဧကရာဇ်ကြီးက တရားခံကို အပြစ်ပေးဖို့ ရည်ရွယ်ချက် မရှိတဲ့အပြင် တစ်ဖက်လူကို ရှီမိုထျန်းကျွင်းသစ်အဖြစ်တောင် ခန့်အပ်လိုက်သေးတယ်.....
ဒီလုပ်ရပ်တွေက ကျွန်တော့်ကို စိတ်ပျက်စေပါတယ်... ဒါကြောင့် ရှာနာနတ်ဆိုးဧကရာဇ်ဆီ လာတွေ့ပြီး ရှာနာနတ်ဆိုးဧကရာဇ်အနေနဲ့ ရှီမိုထျန်းကျွင်းအတွက် တရားမျှတမှုကို ဖော်ဆောင်ပေးဖို့... တရားခံကို ပြင်းပြင်းထန်ထန် အပြစ်ပေးပြီး သူ့ကို တရားမျှတမှု ရစေဖို့ မျှော်လင့်ပါတယ် "
မို့ကျွင်းနတ်ဆိုးအရှင်သည် မည်သည့်အရာကိုမျှ မဖုံးကွယ်ရဲဘဲ သွားကြိတ်ကာ ပြောဆိုလေသည်။ သို့သော် သူ၏ရှင်းပြချက်က ရှာနာနတ်ဆိုးဧကရာဇ်အား ကျေနပ်မှု မပေးနိုင်သည်မှာ သိသာလှကာ ကမ္ဘာကြီးတစ်ခွင်လုံး လှောင်ပြောင်ရယ်မောသံ ပဲ့တင်ထပ်သွားခဲ့၏။
" ဟားဟား... ငါအရှင် အကြားအာရုံများ မှားနေသလား... ရှီမို သေတာ ငါအရှင်နဲ့ ဘာဆိုင်လို့လဲ... နတ်ဆိုးဧကရာဇ်ကြီးတောင် ဒီကိစ္စကို ဂရုမစိုက်တာ... မင်းက ငါအရှင့်ဆီ လာရသလား... မင်း ရူးနေပြီလား "