အခန်း (၄၅၃-၄၅၄)
Vol. 33 Ch. 453-454
အခန်း ( ၄၅၃ ) - အမှောင်ကိုစွန့်ခွာ၍ အလင်းသို့ကူးပြောင်းခြင်း၊ နတ်ဆိုးဧကရာဇ်၏ နှလုံးသားကို လက်နှစ်ဖက်ဖြင့် ဆက်သခြင်း
ထိုအခါ နတ်ဆိုးဧကရာဇ်၏ ရယ်မောသံတွင် လှောင်ပြောင်မှုများ ပြည့်နှက်နေ၏။
မို့ကျွင်းနတ်ဆိုးအရှင်မှာ ရူးသွပ်နေပြီဟု သူ ခံစားလိုက်ရသည်။ ရှီမိုထျန်းကျွင်းနှင့် မို့ကျွင်းတို့ နှစ်ဦးစလုံးမှာ နတ်ဆိုးဧကရာဇ်ကြီး၏ လက်အောက်ခံများ ဖြစ်ကြသည်။ ယခု ရှီမို သေဆုံးသွား၍ နတ်ဆိုးဧကရာဇ်ကြီးမှာ သူ၏ဘက်မှ မရပ်တည်ပေးသည့်တိုင် မို့ကျွင်းသည် သူထံသို့ လာရသလော။
ဤသည်မှာ လုံးဝ အဓိပ္ပာယ်မရှိလှပေ!
" မို့ကျွင်း... တကယ်လို့ မင်းက ငါအရှင့်ကို ခိုင်လုံတဲ့ ရှင်းပြချက် မပေးနိုင်ဘူးဆိုရင် မင်းက ငါအရှင့်ကို လာနောက်ပြောင်တယ်လို့ပဲ သတ်မှတ်ရလိမ့်မယ်... မင်း ငါအရှင့်ကို နောက်ပြောင်ရဲတဲ့ အကျိုးဆက်က ဘာလဲဆိုတာကို သိသင့်တယ် "
နတ်ဆိုးဧကရာဇ်သည် ရယ်မောနေဆဲဖြစ်သော်လည်း သူ၏ရယ်မောသံထဲတွင် မို့ကျွင်းနတ်ဆိုးအရှင်အား တုန်လှုပ်သွားစေသည့် အရိုးခိုက်မတတ် အေးစက်မှုတစ်ခု ပါဝင်နေပုံရ၏။
ဤနတ်ဆိုးဧကရာဇ် ဒေါသထွက်လာပါက အကျိုးဆက်များ မည်သို့ရှိမည်ကို သူ ကျိန်းသေပေါက် သိထားလေသည်။ သို့သော် ဤတစ်ကြိမ် သူ လာရောက်ဝံ့ကတည်းက လိုအပ်သည့် ပြင်ဆင်မှုများအားလုံးကို သေချာပေါက် ပြုလုပ်ထားပြီး ဖြစ်သည်။
" နတ်ဆိုးဧကရာဇ်ကြီးမှာ တရားမျှတမှု မရှိပါဘူး... မို့ကျွင်းအနေနဲ့ အမှောင်ကိုစွန့်ပြီး အလင်းကိုကူးပြောင်းချင်ပါတယ်... နတ်ဆိုးဧကရာဇ်ဆီမှာ သစ္စာခံပါ့မယ်... နတ်ဆိုးဧကရာဇ်အနေနဲ့ ရှီမိုအတွက် လက်စားချေပေးဖို့ပဲ တောင်းဆိုချင်ပါတယ်! "
မို့ကျွင်းနတ်ဆိုးအရှင်သည် သွားကြိတ်လိုက်ပြီးနောက် ဒူးတစ်ဖက်ထောက်ကာ ခေါင်းငုံ့လျက် ပြောဆိုလေသည်။
သူသည် နတ်ဆိုးဧကရာဇ်ကြီးအား သစ္စာဖောက်ရန် ကြံစည်နေခဲ့သည်မှာ ကြာပြီဖြစ်ပြီး ရှီမိုထျန်းကျွင်း သေဆုံးသွားမှုက သူ့အား ပို၍ စိတ်ပျက်သွားစေခဲ့သည်။
ထို့ကြောင့် နတ်ဆိုးဧကရာဇ်ကြီးအား စွန့်ခွာခြင်းကို စည်းကမ်းချက်တစ်ခုအနေဖြင့် အသုံးပြုကာ နတ်ဆိုးဧကရာဇ်အား ထိုအဆုံးမဲ့ထျန်းကျွင်းကို သတ်၍ ရှီမိုအတွက် လက်စားချေပေးရန် တောင်းဆိုလိုခြင်း ဖြစ်သည်။
" အမှောင်ကိုစွန့်ပြီး အလင်းကို ကူးပြောင်းမယ်? ဟားဟားဟား! "
နတ်ဆိုးဧကရာဇ်၏ ရယ်မောသံသည် လေဟာနယ် နယ်မြေတစ်ခွင် ပဲ့တင်ထပ်သွားလေသည်။
ကျောက်စိမ်းကဲ့သို့ သွယ်လျသော လက်ချောင်းတစ်ချောင်းမှာ မို့ကျွင်းနတ်ဆိုးအရှင်၏ မေးစေ့ကို ထိတွေ့လိုက်ရာ သူ၏ခေါင်းမှာ အလိုအလျောက် မော့တက်သွားရ၏။
နောက်တစ်ခဏတွင် မို့ကျွင်းနတ်ဆိုးအရှင်သည် နတ်ဆိုးဧကရာဇ်၏ ယှဉ်ပြိုင်ကင်းစွာ လှပသော်လည်း ရေခဲတမျှ အေးစက်နေသော မျက်နှာကို မြင်တွေ့လိုက်ရသည်။
" ငါအရှင်က... မင်းရဲ့ သစ္စာခံမှုကို လိုအပ်လို့လား.....
မင်းရဲ့ သစ္စာခံမှုက ငါအရှင့်အတွက် ဘာအဓိပ္ပာယ်မှ မရှိဘူး... ပြီးတော့ နတ်ဆိုးဧကရာဇ်ကြီးကိုလည်း စော်ကားရာရောက်လိမ့်မယ်... ဒီလောက် ရယ်စရာကောင်းတဲ့ စည်းကမ်းချက်တွေက ငါအရှင့်ကို လက်ပါလာအောင် လုပ်နိုင်မယ်လို့ မင်း တကယ်ထင်နေတာလား "
နတ်ဆိုးဧကရာဇ်၏ အန္တရာယ်များသော အကြည့်ကို ကြည့်ကာ မို့ကျွင်းနတ်ဆိုးအရှင်၏ မျက်နှာအမူအရာမှာ တင်းမာသွားသော်လည်း သူ၏စိတ်ထဲတွင်မူ ဝမ်းမြောက်ဝမ်းသာ ဖြစ်သွားရသည်။
နတ်ဆိုးဧကရာဇ်သည် သူ့အား ငြင်းဆန်လိုက်သော်လည်း စည်းကမ်းချက်များ မလုံလောက်သေးဟုသာ ပြောခဲ့ရာ ဤလမ်းစကို လုံးဝ ပိတ်ပင်လိုက်ခြင်း မရှိပေ။
ဆိုလိုသည်မှာ နတ်ဆိုးဧကရာဇ်အား သွေးဆောင်နိုင်မည့် စည်းကမ်းချက်များကို သူ ကမ်းလှမ်းနိုင်ပါက သူ့ကို လှုပ်ရှားလာအောင် ဆွဲဆောင်နိုင်သည်ဟူသော အဓိပ္ပာယ်ပင်တည်း။
အစောပိုင်းက သူသိထားခဲ့သော လျှို့ဝှက်သတင်းမှာ အမှန်တကယ် မှန်ကန်နေပုံရပေသည်။
မို့ကျွင်းနတ်ဆိုးအရှင်၏ မျက်လုံးများထဲတွင် သိမ်မွေ့သော ဝမ်းမြောက်မှု အရိပ်အယောင်တစ်ခု ဖြတ်ပြေးသွားခဲ့၏။
အကြမ်းဖျင်းအားဖြင့်ဆိုရလျှင် နတ်ဆိုးဧကရာဇ်ကြီးကဲ့သို့သော နတ်ဆိုးနယ်မြေမှ နတ်ဆိုးဧကရာဇ်များ အားလုံးမှာ မြင့်မြတ်၍ ဂုဏ်သိက္ခာကြီးမားကြ၏။ လက်အောက်ငယ်သားများကြားမှ ပြည်တွင်းရေးပဋိပက္ခများကြောင့် အချင်းချင်း ရန်ငြိုးရန်စမထားကြသလို တစ်ယောက်၏ 'မိသားစုရေးရာ' များတွင် အခြားတစ်ယောက်က မည်သည့်အခါမျှ ဝင်ရောက်စွက်ဖက်လေ့မရှိကြပေ။
အကယ်၍ ဤတစ်ကြိမ်သာ သူသည် အခြားနတ်ဆိုးဧကရာဇ်များကို အဆင်အခြင်မဲ့ သွားရောက်ရှာဖွေခဲ့ပါက သူတို့ကို တွေ့ခွင့်ပင်ရမည်မဟုတ်ဘဲ အရေးယူရန် နတ်ဆိုးဧကရာဇ်ကြီးထံသို့ ပြန်လည်ပေးပို့ခံရပေလိမ့်မည်။
သို့သော် ဤနတ်ဆိုးဧကရာဇ်ကမူ ချွင်းချက်ဖြစ်လေသည်။
မို့ကျွင်းနတ်ဆိုးအရှင်သည် လျှို့ဝှက်သတင်းလမ်းကြောင်းတစ်ခုမှတစ်ဆင့် လျှို့ဝှက်ချက်တစ်ခုကို သိရှိခဲ့ဖူးသည်။
လွန်ခဲ့သော အချိန်ကာလများစွာက၊ တိတိကျကျဆိုရလျှင် နတ်ဆိုးဧကရာဇ်ကြီး နတ်ဆိုးဧကရာဇ်အဆင့်သို့ မရောက်ရှိမီက ဤနတ်ဆိုးဧကရာဇ်သည် နတ်ဆိုးဧကရာဇ်ကြီးအား လုပ်ကြံရန် ကြံစည်ခဲ့ဖူးသော်လည်း နတ်ဆိုးဧကရာဇ်ကြီးသည် ပြဿနာကြီးကြီးမားမားမရှိဘဲ ဖြေရှင်းနိုင်ခဲ့၏။
ဤအကြောင်းကြောင့် နတ်ဆိုးဧကရာဇ်ကြီး နတ်ဆိုးဧကရာဇ်ရာထူးသို့ တက်လှမ်းပြီးနောက်တွင်ပင် ၎င်းတို့၏ဆက်ဆံရေးမှာ အပြင်ပန်း၌ လက်ခံနိုင်ဖွယ်ရှိသော်လည်း တိတ်တဆိတ်တွင်မူ များစွာ အဆင်မပြေလှချေ။
ဤအချက်ကို သိထားသောကြောင့်ပင် မို့ကျွင်းနတ်ဆိုးအရှင်သည် ဤနတ်ဆိုးဧကရာဇ်အား လာရောက်တွေ့ဆုံရဲခြင်း ဖြစ်သည်။
သို့မဟုတ်ပါက ဤကဲ့သို့သော အလုပ်မျိုးကို သူ လုံးဝ လုပ်ရဲမည် မဟုတ်ချေ။
ယခုမူ နတ်ဆိုးဧကရာဇ်၏တုံ့ပြန်မှုသည် သူ၏ ခန့်မှန်းချက် မှန်ကန်ကြောင်း သံသယဖြစ်ဖွယ်မရှိ ပြောပြနေလေပြီ။
နတ်ဆိုးဧကရာဇ်နှင့် နတ်ဆိုးဧကရာဇ်ကြီးတို့မှာ အမှန်တကယ်ပင် အဆင်မပြေကြချေ။ သူ့ဘက်မှ သွေးဆောင်နိုင်လောက်သော အလဲအလှယ်တစ်ခုကို ကမ်းလှမ်းနိုင်ပါက ထိုအဆုံးမဲ့ထျန်းကျွင်းကို သတ်ရာတွင် သူ့အား ကူညီပေးရန်အတွက် နတ်ဆိုးဧကရာဇ်ကြီးကို စော်ကားမိမည်ကို ထိုနတ်ဆိုးဧကရာဇ် ဂရုစိုက်မည် မဟုတ်ပေ။
" နတ်ဆိုးဧကရာဇ်ကို ကျွန်တော် ဘာမှ မဖုံးကွယ်ရဲပါဘူး... ကျွန်တော် တစ်ချိန်က အံ့မခန်း ကံကြမ္မာဖန်တီးမှုတစ်ခုကို ရရှိခဲ့ပေမယ့် ဘယ်သူ့ကိုမှ ထုတ်မပြရဲခဲ့ပါဘူး... အခု ကျွန်တော်ရရှိခဲ့တဲ့ အဲဒီအရာက အစစ်လား... အတုလားဆိုတာ နတ်ဆိုးဧကရာဇ်ကို အကဲဖြတ်ပေးဖို့ တောင်းဆိုချင်ပါတယ် "
မို့ကျွင်းနတ်ဆိုးအရှင်၏ မျက်လုံးများမှာ တလက်လက် တောက်ပသွားကာ ရုန်းကန်မှုနှင့် တွေဝေမှုများအပြီးတွင် နောက်ဆုံး၌ ဆုံးဖြတ်ချက်တစ်ခု ချလိုက်သည့်အလား ရှိလေသည်။
နောက်တစ်ခဏတွင် သူသည် လက်ဝါးကို ဖွဖွလေး ဝှေ့ယမ်းလိုက်ရာ လေဟာနယ်နယ်မြေအတွင်း အက်ကွဲကြောင်းတစ်ခု ပေါ်လာခဲ့၏။
ထို့နောက် ချက်ချင်းပင် ထိုအက်ကွဲကြောင်းထဲမှ တိုးညင်းသော်ငြား ကျယ်ပြောလှသော ချီအငွေ့အသက်များ ထွက်ပေါ်လာလေသည်။
ထိုအက်ကွဲကြောင်း၏ အနက်ရှိုင်းဆုံးနေရာတွင် ဝေဝါးနေသော အနက်ရောင် နတ်ဆိုးဧကရာဇ်နှလုံးသားတစ်ခု အားကောင်းစွာ ခုန်လှုပ်နေသည်ကို ခပ်ရေးရေး မြင်တွေ့ရပေသည်။
ထိုနတ်ဆိုးဧကရာဇ်နှလုံးသား၏ ခုန်ပေါက်မှုတိုင်းမှ ခမ်းနားကြီးကျယ်၍ အမြင့်ဆုံးသော ချီအငွေ့အသက်များ ထွက်ပေါ်နေကာ လူကို အလိုအလျောက် ပျပ်ဝပ်ကိုးကွယ်ချင်စိတ် ပေါက်သွားစေ၏။
" ဟင်?! "
အနက်ရောင် နတ်ဆိုးဧကရာဇ်နှလုံးသားမှ ထွက်ပေါ်လာသော အမြင့်ဆုံး ချီအငွေ့အသက်များကို ခံစားလိုက်ရသောအခါ အစပိုင်းတွင် ဂရုမစိုက်သည့်ဟန် ရှိနေသော နတ်ဆိုးဧကရာဇ်၏ လှပသော မျက်လုံးများကို ချက်ချင်း ကျဉ်းမြောင်းသွားစေကာ အနက်ရောင် နတ်ဆိုးဧကရာဇ်နှလုံးသားကို စူးစိုက်ကြည့်လျက် သူ၏လက်ဝါစထဲသို့ ဆုပ်ကိုင်ရန် အလိုအလျောက် လက်လှမ်းလိုက်လေ၏။
သို့သော် နောက်တစ်ခဏတွင် နတ်ဆိုးဧကရာဇ်မှ ဆုပ်ကိုင်ရန် လက်လှမ်းလိုက်သည်နှင့် လေဟာနယ်အက်ကွဲကြောင်း၏ အနက်ရှိုင်းဆုံးတွင် ပုန်းကွယ်နေသော အနက်ရောင် နတ်ဆိုးဧကရာဇ်နှလုံးသားမှာ အိပ်မက်ပူဖောင်းတစ်ခုကဲ့သို့ ချက်ချင်း ပျောက်ကွယ်သွားလေသည်။
ဤသည်ကို မြင်သောအခါ နတ်ဆိုးဧကရာဇ်၏ အကြည့်များမှာ ချက်ချင်းပင် မှိုင်းညို့ စူးရှသွားတော့သည်။
" မို့ကျွင်း... မင်းက ငါအရှင့်ကို ကစားနေတာလား "
" မဝံ့ရဲပါဘူး... ကျွန်တော် မဝံ့ရဲပါဘူး.....
ဒီပစ္စည်းက တန်ဖိုးကြီးလွန်းလို့ ကျွန်တော့်ကိုယ်ပေါ်မှာ ယူမထားရဲလို့ပါ... သူ့ရဲ့ ချီအငွေ့အသက် နည်းနည်းကိုပဲ ကျွန်တော် မှတ်တမ်းတင် ယူဆောင်လာခဲ့တာပါ "
မို့ကျွင်းနတ်ဆိုးအရှင်သည် အနည်းငယ် တင်းမာနေသော အပြုံးတစ်ခုကို ပြသလိုက်လေ၏။
သူသည် ဤပစ္စည်းကို သူနှင့်အတူ သယ်ဆောင်လာရဲမည် မဟုတ်သည်မှာ သဘာဝပင်။ အကယ်၍ နတ်ဆိုးဧကရာဇ်မှ လောဘတက်ကာ သူ့အတွက် ယူထား၍ သူတို့၏အပေးအယူကို မဖြည့်ဆည်းပေးခဲ့လျှင် မည်သို့ လုပ်မည်နည်း။
" ဟွန်း... မင်းက ငါအရှင့်ကို မယုံကြည်သေးဘူး ထင်တယ် "
မို့ကျွင်းနတ်ဆိုးအရှင်၏ ရှင်းပြချက်ကို ကြားသောအခါ နတ်ဆိုးဧကရာဇ်သည် ဟုတ်သည် မဟုတ်သည် တိတိကျကျ မပြောသော်လည်း သူ၏မျက်နှာအမူအရာမှာ နွေဦးလေပြေနှင့် မိုးရေပေါက်များကဲ့သို့ တစ်ဖန် ပြန်လည် နူးညံ့သွားလေသည်။
" ဒါပေမဲ့... မင်းဆီမှာ ဒီလောက် အမြင့်ဆုံးရတနာမျိုး ရှိနေမယ်လို့ ငါအရှင် မထင်ထားခဲ့ဘူး.....
ဒီနတ်ဆိုးဧကရာဇ်နှလုံးသားက... နတ်ဆိုးဧကရာဇ်အဆင့်ရှိတဲ့ တည်ရှိမှုတစ်ခု သေဆုံးသွားချိန်မှာ အခွင့်အရေးတစ်ခုအနေနဲ့ပဲ ကျန်ရစ်နိုင်တာ... မင်း ဒီပစ္စည်းကို ဘယ်တုန်းက ရခဲ့တာလဲ "
နတ်ဆိုးဧကရာဇ်မှာ မအံ့ဩဘဲ မနေနိုင်ခဲ့ချေ။
မို့ကျွင်းနတ်ဆိုးအရှင်မှ သူ့အား ပြသခဲ့သော ပစ္စည်းမှာ နတ်ဆိုးဧကရာဇ်နှလုံးသား ဟု ခေါ်လေသည်။
၎င်းသည် နတ်ဆိုးဧကရာဇ်အဆင့်ရှိသော တည်ရှိမှုတစ်ခု သေဆုံးသွားပြီးနောက်မှသာ ချန်ရစ်ခံရနိုင်ခြေရှိသည့် အမြင့်ဆုံးရတနာတစ်ခု ဖြစ်၏။
၎င်းတွင် နတ်ဆိုးဧကရာဇ် သက်ရှိထင်ရှားရှိစဉ်က သူ၏တာအိုတစ်စိတ်တစ်ပိုင်း ပါဝင်နေ၍ နတ်ဆိုးဧကရာဇ်အဆင့်တူ တည်ရှိမှုတစ်ခုမှ ၎င်းကို ရရှိလျှင်ပင် ၎င်းထံမှ နက်ရှိုင်းသော အမှန်တရားများစွာကို နားလည်သဘောပေါက်နိုင်ပေသည်။
ထို့ကြောင့် နတ်ဆိုးဧကရာဇ်၏ အမြင်တွင်ပင် ဤနတ်ဆိုးဧကရာဇ်နှလုံးသားသည် သူ တစ်ကြိမ် လှုပ်ရှားပေးရန် တန်ဖိုးရှိသည့် အဖိုးတန်ရတနာတစ်ခုအဖြစ် အမှန်တကယ် သတ်မှတ်နိုင်ပေသည်။
" ဟားဟား... ဒါက တိုက်ဆိုင်မှုတစ်ခုနဲ့ အခွင့်အရေးရလို့ ရလာတာပါ "
မို့ကျွင်းနတ်ဆိုးအရှင်သည် ရယ်မောလိုက်ကာ ပစ္စည်း၏ အစစ်အမှန် ဇာစ်မြစ်ကို နတ်ဆိုးဧကရာဇ်အား ထုတ်မပြောခဲ့ချေ။
နတ်ဆိုးဧကရာဇ် သွေးဆောင်ခံလိုက်ရသည်ကို မြင်သောအခါ သူသည် တုံ့ဆိုင်းမနေတော့ဘဲ သူ၏စည်းကမ်းချက်များကို ချက်ချင်း ပြောဆိုလိုက်လေသည်။
" အရှင်နတ်ဆိုးဧကရာဇ်အနေနဲ့ အဲ့ဒီအဆုံးမဲ့ထျန်းကျွင်းကို သတ်ဖို့ ကျွန်တော့်ကို ကူညီပေးနိုင်မယ်ဆိုရင် ဒီနတ်ဆိုးဧကရာဇ်နှလုံးသားကို လက်နှစ်ဖက်နဲ့ သေချာပေါက် ဆက်သပါ့မယ်!
ဒါပေမဲ့ ကျွန်တော့်မှာ သေးငယ်တဲ့ တောင်းဆိုမှုတစ်ခု ရှိပါတယ်... အဲဒါကတော့ ဒီနတ်ဆိုးဧကရာဇ်နှလုံးသားထဲက ကံကြမ္မာဖန်တီးမှု ဆယ်ပုံနှစ်ပုံကို ကျွန်တော် ယူချင်ပါတယ် "
ဤစကားများကို ပြောနေစဉ် မို့ကျွင်းနတ်ဆိုးအရှင်၏ နှလုံးသားမှာ သွေးထွက်နေလေပြီ။
ဤနတ်ဆိုးဧကရာဇ်နှလုံးသားသည် မူလက သူကိုယ်တိုင်အတွက် ပြင်ဆင်ထားသော သူ၏ အကြီးမားဆုံးသော ကံကြမ္မာဖန်တီးမှုနှင့် ဝှက်ဖဲကတ်တစ်ခု ဖြစ်သော်လည်း ယခုအခါတွင်မူ ၎င်းကို နတ်ဆိုးဧကရာဇ်အား ဆက်သလိုက်ရလေပြီ။
ဤသည်က သူ့ကို မည်သို့ ရင်နာမသွားစေဘဲ နေမည်နည်း။
အခန်း ( ၄၅၄ ) - အစစ်အမှန် ရည်ရွယ်ချက်၊ ဆယ်ပုံ နှစ်ပုံ ခွဲဝေခြင်း၊ သဘောတူညီမှု ရရှိသွားခြင်း
နတ်ဆိုးဧကရာဇ်၏ နှလုံးသားထဲတွင် နတ်ဆိုးဧကရာဇ်တစ်ပါး သက်ရှိထင်ရှားရှိစဉ်က တာအိုနှင့်ပတ်သက်၍ နားလည်သဘောပေါက်မှု တစ်စိတ်တစ်ပိုင်း ပါဝင်နေသည်မှာ အမှန်ပင်ဖြစ်သည်။
သို့သော် အင်မော်တယ်ဘုရင်တစ်ပါးအတွက် ဤနားလည်သဘောပေါက်မှုကို စုပ်ယူကာ နတ်ဆိုးဧကရာဇ်နှလုံးသားကို အပြည့်အဝ နားလည်နိုင်ရန်မှာ အလွန်အမင်း ခက်ခဲလှပေသည်။
မို့ကျွင်းနတ်ဆိုးအရှင်သည် နတ်ဆိုးဧကရာဇ်နှလုံးသားကို ရရှိခဲ့ချိန်မှစ၍ ၎င်းအတွင်းရှိ နက်ရှိုင်းလှသော တာအိုကို နားလည်သဘောပေါက်ရန် အချိန်တိုင်းနီးပါး ကြိုးစားနေခဲ့၏။ သို့သော် ဤမျှ နှစ်ကာလများစွာ ကြာမြင့်ခဲ့သည့်တိုင် အပေါ်ယံမျှသာ နားလည်နိုင်ခဲ့ကာ နတ်ဆိုးဧကရာဇ်နှလုံးသား၏ အစစ်အမှန် အနှစ်သာရကိုမူ အကူအညီမဲ့စွာဖြင့် လက်လျှော့ထားခဲ့ရလေသည်။
သို့သော် မို့ကျွင်းနတ်ဆိုးအရှင်မှာ ဤအတိုင်း အလွယ်တကူ လက်မလျှော့လိုခဲ့ချေ။
အဘယ်ကြောင့်ဆိုသော် နတ်ဆိုးဧကရာဇ်နှလုံးသားအတွင်းရှိ နတ်ဆိုးဧကရာဇ်၏ တာအိုကို သူသာ နားလည်သဘောပေါက်နိုင်ပါက နတ်ဆိုးဧကရာဇ်အဆင့်သို့ တက်လှမ်းမည့်လမ်းစကို သေချာပေါက် မြင်တွေ့ရမည်ဖြစ်သောကြောင့်ပင်။
သူ့အား နတ်ဆိုးဧကရာဇ် မဖြစ်စေနိုင်လျှင်တောင်မှ အင်မော်တယ်ဘုရင်များကြားတွင် ထိပ်သီးတစ်ဦး ဖြစ်လာစေရန် သေချာပေါက် ကူညီပေးနိုင်လိမ့်မည်။
စိတ်ကူးများက ကြီးကျယ်ခမ်းနားလှသော်လည်း လက်တွေ့ဘဝမှာမူ ကြမ်းတမ်းလွန်းလှ၏။
မို့ကျွင်းနတ်ဆိုးအရှင်သည် မည်သည့်နည်းလမ်းများကို အသုံးပြုစေကာမူ ဤနတ်ဆိုးဧကရာဇ်နှလုံးသားထံမှ အသိအမြင်များကို ရယူနိုင်စွမ်း မရှိခဲ့ချေ။
ရတနာသိုက်ကြီးကို စောင့်ကြပ်နေရသော်လည်း အတွင်းရှိ ရတနာများကို ထုတ်ယူသုံးစွဲခွင့်မရသော ခံစားချက်မျိုးက မို့ကျွင်းနတ်ဆိုးအရှင်အား စိတ်မသက်မသာ ဖြစ်စေခဲ့သည်မှာ အသေအချာပင်။
နောက်ဆုံးတွင် အခြားရွေးချယ်စရာ မရှိတော့သည့်အဆုံး နတ်ဆိုးဧကရာဇ်နှလုံးသားကို ဆက်သရန် သူ ဆုံးဖြတ်လိုက်တော့သည်။
ဤသည်မှာ ရှီမိုထျန်းကျွင်းအတွက် လက်စားချေပေးရန် သက်သက်သာ မဟုတ်ချေ။
သူနှင့် ရှီမိုထျန်းကျွင်းကြားတွင် နက်ရှိုင်းသော ခင်မင်ရင်းနှီးမှု ရှိခဲ့သည်မှာ မှန်သော်လည်း လက်စားချေပေးရန်အတွက် ဤမျှ အဖိုးတန်သော ရတနာကို ပေးဆပ်ရလောက်သည့်အထိတော့ မဟုတ်ပေ။
ကုချန်ကိုသတ်ကာ ရှီမိုထျန်းကျွင်းအတွက် လက်စားချေပေးရန် နတ်ဆိုးဧကရာဇ်နှလုံးသားကို စည်းကမ်းချက်တစ်ခုအနေဖြင့် အသုံးပြု၍ ရှာနာနတ်ဆိုးဧကရာဇ်အား တောင်းဆိုနေခြင်းထက် မို့ကျွင်းနတ်ဆိုးအရှင်ကိုယ်တိုင်က နတ်ဆိုးဧကရာဇ်နှလုံးသားအတွင်းရှိ အသိအမြင်များကို လိုလားတောင့်တနေသောကြောင့် ရှာနာနတ်ဆိုးဧကရာဇ်၏ အကူအညီကို မဖြစ်မနေ လာရောက်ရှာဖွေရခြင်းဟု ဆိုလျှင် ပို၍ မှန်ကန်ပေလိမ့်မည်။
မို့ကျွင်းနတ်ဆိုးအရှင်၏ ဤအကြံအစည်သေးသေးလေးသည် ရှာနာနတ်ဆိုးဧကရာဇ်၏ အမြင်မှ မလွတ်ကင်းနိုင်ခဲ့ချေ။
လေဟာနယ်နယ်မြေအတွင်း၌ ဆွဲဆောင်မှုရှိသော ရယ်မောသံတစ်ခု ပဲ့တင်ထပ်သွားလေသည်။
" ဟွန်းဟွန်း... မင်းနဲ့ ရှီမိုတို့က ခင်မင်ရင်းနှီးမှု အရမ်းနက်ရှိုင်းတယ်လို့ ထင်နေခဲ့တာ တကယ်တော့ ဒီနတ်ဆိုးဧကရာဇ်နှလုံးသားကြောင့်ကိုး... စိတ်မပူပါနဲ့ မင်းကို ရှင်းရှင်းလင်းလင်း ပြောပြမယ်... ငါကိုယ်တော့် အကူအညီမပါရင် နောက်ထပ် နှစ်ရာချီ၊ သန်းဆယ်ချီ ကြာသွားရင်တောင် ဒီနတ်ဆိုးဧကရာဇ်နှလုံးသားထဲက အသိအမြင် တစ်စွန်းတစ်စကိုတောင် မင်း နားလည်နိုင်မှာ မဟုတ်ဘူး "
နတ်ဆိုးဧကရာဇ်နှလုံးသားအတွင်း၌ နတ်ဆိုးဧကရာဇ်တစ်ပါး သက်ရှိထင်ရှားရှိစဉ်က တာအိုကို နားလည်သဘောပေါက်မှု၏ အဓိကအကျဆုံး အနှစ်သာရများ ပါဝင်နေရာ သာမန် အင်မော်တယ်ဘုရင်တစ်ပါးအနေဖြင့် မည်သို့ နားလည်နိုင်ပါမည်နည်း။
အင်မော်တယ်ဘုရင်များကြားမှ ထိပ်သီးတစ်ဦးဆိုလျှင်တောင် အပေါ်ယံမျှကိုသာ နားလည်နိုင်ပေမည်။ ၎င်းကို အပြည့်အဝ ခွဲခြမ်းစိတ်ဖြာ၍ နားလည်သဘောပေါက်နိုင်ရန်အတွက် နတ်ဆိုးဧကရာဇ်အဆင့်တူ တည်ရှိမှုတစ်ခု ဖြစ်မှသာ ရနိုင်ပေသည်။
" ဟားဟား... ဒါကို ကျွန်တော် သိထားလို့ပဲ ရှာနာနတ်ဆိုးဧကရာဇ်ရဲ့ အကူအညီကို လာတောင်းခံရတာပါ "
သူ၏အတွေးများကို ရှာနာနတ်ဆိုးဧကရာဇ်မှ ထိုးထွင်းသိမြင်သွားသောကြောင့် မို့ကျွင်းနတ်ဆိုးအရှင်မှာ အနေရခက်စွာ ပြုံးလိုက်လေသည်။
နတ်ဆိုးဧကရာဇ်နှလုံးသား၏ အသိအမြင်များထဲမှ ဆယ်ပုံနှစ်ပုံကိုသာ ယူရန်မှာ သူ ကြိုတင်စဉ်းစားထားပြီးဖြစ်သော စည်းကမ်းချက်တစ်ခု ဖြစ်၏။ သူသည် နတ်ဆိုးဧကရာဇ်တစ်ပါးအား နတ်ဆိုးဧကရာဇ်နှလုံးသားအတွင်းရှိ အရာများကို ခွဲခြမ်းစိတ်ဖြာ နားလည်စေ၍ သူ့အား ပြန်လည်သင်ကြားပေးရန် တောင်းဆိုရခြင်းအတွက် ပေးဆပ်ရမည့် တန်ဖိုးတစ်ခု ရှိမည်ကို သိထားလေသည်။
နတ်ဆိုးဧကရာဇ်နှလုံးသား အသိအမြင်များ၏ ဆယ်ပုံရှစ်ပုံမှာ သူ ပေးကမ်းမည့် အကျိုးအမြတ်ဖြစ်သည်။ ရှီမိုထျန်းကျွင်းအတွက် လက်စားချေပေးရန် ဆိုသည်မှာ ဤအပေးအယူအတွက် ကြိုတင်သတ်မှတ်ချက်တစ်ခုမျှသာ ဖြစ်၏။
ရှာနာနတ်ဆိုးဧကရာဇ်အနေဖြင့် ဤအတွက် လှုပ်ရှားပေးကာ အဆုံးမဲ့ထျန်းကျွင်းကို သတ်ပစ်ရန် ဆန္ဒရှိမှသာ ဤအပေးအယူကို ပြီးမြောက်စေလိုသည့် သူ၏ရိုးသားမှုကို သက်သေပြနိုင်မည် ဖြစ်သည်။
ထိုအခါမှသာ မို့ကျွင်းနတ်ဆိုးအရှင်အနေဖြင့် ဤအပေးအယူကို ဆက်လုပ်ရန် စိတ်ချနိုင်ပေမည်။
" သာမန် အင်မော်တယ်ဘုရင်တစ်ပါးကများ ငါကိုယ်တော့်အပေါ် အကြံအစည်လုပ်ရဲတယ်ပေါ့... မင်းရဲ့ သတ္တိကတော့ မသေးဘူးပဲ "
ရှာနာနတ်ဆိုးဧကရာဇ်သည် မို့ကျွင်းနတ်ဆိုးအရှင်ကို ကြည့်လိုက်ရာ သူ၏မျက်လုံးများထဲတွင် အန္တရာယ်ရှိသော အလင်းတန်းများ တလက်လက် တောက်ပနေ၏။
အကယ်၍ သူသာ စောစောက နတ်ဆိုးဧကရာဇ်နှလုံးသားကို သူ၏လက်ထဲတွင် ရရှိထားပြီးဖြစ်ပါက ယခုအချိန်၌ မည်သည့်အပေးအယူကိုမျှ ဂရုစိုက်နေမည်မဟုတ်ဘဲ နတ်ဆိုးဧကရာဇ်နှလုံးသားကို တိုက်ရိုက် လုယူလိုက်မည်မှာ အသေအချာပင်။
မို့ကျွင်းနတ်ဆိုးအရှင်ကသာ အခြေအနေကို နားလည်ပါက နာခံစွာ ထွက်သွားမည်သာ ဖြစ်၏။ အကယ်၍ နားမလည်ခဲ့ပါကလည်း ရှာနာနတ်ဆိုးဧကရာဇ်အနေဖြင့် သူ့ကို အလွယ်တကူ သတ်ပစ်လိုက်ရန် ဝန်လေးနေမည် မဟုတ်ချေ။
အပေးအယူ ဟုတ်လား။
နောက်ပြောင်နေခြင်းကို ဘေးဖယ်ထားလိုက်လျှင် နတ်ဆိုးနယ်မြေဆိုသည်မှာ အားကြီးသူမှ အားနည်းသူကို ဝါးမျိုသည့် နေရာတစ်ခုသာ ဖြစ်၏။ သာမန် အင်မော်တယ်ဘုရင်တစ်ပါး၌ သူနှင့် အပေးအယူလုပ်ရန် မည်သည့် အခွင့်အရေးများ ရှိနေသနည်း။
သို့သော် သိသာထင်ရှားစွာပင် မို့ကျွင်းနတ်ဆိုးအရှင်သည် ဤအခြေအနေကို ကြိုတင်ကာကွယ်ထားခဲ့ရာ နတ်ဆိုးဧကရာဇ်နှလုံးသားကို သူနှင့်အတူ သယ်ဆောင်မလာခဲ့ဘဲ သီးခြားနေရာတစ်ခုတွင် ဖွက်ထားခဲ့လေသည်။ ထို့ကြောင့် ရှာနာနတ်ဆိုးဧကရာဇ်၌လည်း နတ်ဆိုးဧကရာဇ်နှလုံးသားကို ရယူရန် မည်သည့်နည်းလမ်းမှ ရှိမနေခဲ့ချေ။
မို့ကျွင်းနတ်ဆိုးအရှင်ကို ဖမ်းဆီးကာ စစ်ဆေးမေးမြန်းရန် ဆိုသည်မှာ ပို၍ပင် အသုံးမဝင်သေးသည်။ နတ်ဆိုးဧကရာဇ်အဆင့်နှင့် အင်မော်တယ်ဘုရင်အဆင့်ကြားတွင် ခွန်အားကွာဟချက် အလွန်ကြီးမားလှပြီး ရှာနာနတ်ဆိုးဧကရာဇ်အနေဖြင့် မို့ကျွင်းနတ်ဆိုးအရှင်ကို အလွယ်တကူ ချေမှုန်းနိုင်သည်မှာ မှန်သော်လည်း အင်မော်တယ်ဘုရင်အဆင့်သို့ ရောက်ရှိသွားသည်နှင့် တစ်ပြိုင်နက် နတ်ဝိညာဉ်ကို ထိုးထွင်းဖတ်ရှုရန် ဆိုသည်မှာ လုံးဝ မဖြစ်နိုင်တော့ချေ။ ရှာနာနတ်ဆိုးဧကရာဇ် ကိုယ်တိုင်ပင်လျှင် မို့ကျွင်းနတ်ဆိုးအရှင်ထံမှ နတ်ဆိုးဧကရာဇ်နှလုံးသားကို အောင်မြင်စွာ ရယူနိုင်ရန် မသေချာလှပေ။
ထို့ကြောင့် အလုံခြုံဆုံးသော နည်းလမ်းမှာ မို့ကျွင်းနတ်ဆိုးအရှင်နှင့် အပေးအယူလုပ်ကာ သူ၏ကိုယ်စား ထိုအဆုံးမဲ့ထျန်းကျွင်း ဆိုသူကို သတ်ပေးပြီးနောက် နတ်ဆိုးဧကရာဇ်နှလုံးသားကို ရယူရန်သာ ဖြစ်ပေသည်။
သို့သော်.....
" မင်းက ငါကိုယ်တော့်ကို လှည့်စားနေတာ မဟုတ်ဘူးဆိုတာ ငါကိုယ်တော် ဘယ်လိုသိရမလဲ... တကယ်လို့ မင်းဆီမှာ နတ်ဆိုးဧကရာဇ်နှလုံးသား လုံးဝမရှိဘဲ ဒီအတုအယောင် ပုံရိပ်ယောင်နဲ့ ငါကိုယ်တော် လှုပ်ရှားလာအောင် လှည့်စားနေတာဆိုရင်ရော "
ရှာနာနတ်ဆိုးဧကရာဇ်မှ ညင်သာစွာ ရယ်မောလိုက်လေ၏။
" နတ်ဆိုးဧကရာဇ်ကို ကျွန်တော် ဘယ်တော့မှ မလှည့်စားရဲပါဘူး "
မို့ကျွင်းနတ်ဆိုးအရှင်သည် ခြောက်ကပ်ကပ် အသံဖြင့် ရယ်မောလိုက်၏။ ရှာနာနတ်ဆိုးဧကရာဇ်၏ အဓိပ္ပာယ်မှာ ရှင်းလင်းလှသည်။ 'ပစ္စည်းစစ်ဆေးရန်' အတွက် နတ်ဆိုးဧကရာဇ်နှလုံးသားကို ကြိုတင် ထုတ်ပြခိုင်းနေခြင်း ဖြစ်သည်။ သို့သော် မို့ကျွင်းနတ်ဆိုးအရှင်မှာ မည်သို့ စိတ်ချနိုင်ပါမည်နည်း။
အကယ်၍ သူသာ ရှာနာနတ်ဆိုးဧကရာဇ်ကို အမှန်တကယ် ယုံကြည်ခဲ့ပါက နတ်ဆိုးဧကရာဇ်နှလုံးသားကို ယူဆောင်လာ၍ သစ္စာခံခဲ့သည်မှာ ကြာလှပြီ ဖြစ်ပေလိမ့်မည်။ ထို့ကြောင့် ယခုအခိုက်အတန့်တွင် ရှာနာနတ်ဆိုးဧကရာဇ်မှ မည်သို့ပင် ပြောဆိုစေကာမူ သူသည် နတ်ဆိုးဧကရာဇ်နှလုံးသားကို လုံးဝ ထုတ်မပြရဲချေ။
မို့ကျွင်းနတ်ဆိုးအရှင်မှာ စိုးရိမ်နေသော်လည်း နောက်ဆုတ်မည့် အရိပ်အယောင်မရှိသည်ကို မြင်သောအခါ ရှာနာနတ်ဆိုးဧကရာဇ်မှ ထပ်မံ ရယ်မောလိုက်၏။
" ပျင်းစရာကောင်းလိုက်တာ...ကောင်းပြီလေ... ငါကိုယ်တော် နောက်ထပ် ခြေတစ်လှမ်း ဆုတ်ပေးမယ်...ငါကိုယ်တော် ဆင်းသက်လာတဲ့အခါ အဲဒီ အဆုံးမဲ့ထျန်းကျွင်းကို မသတ်ခင်မှာ နတ်ဆိုးဧကရာဇ်နှလုံးသားကို ဖွက်ထားတဲ့နေရာ မင်း ငါကိုယ်တော့်ကို ပြောပြရမယ်...အဲဒါက အစစ်အမှန် ဟုတ်မဟုတ် သက်သေပြဖို့ နည်းလမ်းတွေ ငါကိုယ်တော့်ဆီမှာ ရှိပြီးသားပဲ.....
တကယ်လို့ အစစ်သာဖြစ်ရင် ငါကိုယ်တော်က မင်းအတွက် လှုပ်ရှားပေးပြီး အဲဒီ အဆုံးမဲ့ထျန်းကျွင်းဆိုတဲ့ကောင်ကို သတ်ပေးမယ်... တကယ်လို့ အတုသာဖြစ်နေခဲ့ရင်တော့... ဟင်းဟင်း... ငါကိုယ်တော့်ကို လှည့်စားရဲတဲ့ အကျိုးဆက်က ဘာလဲဆိုတာ မင်းသိရမယ် "
ရှာနာနတ်ဆိုးဧကရာဇ်သည် မို့ကျွင်းနတ်ဆိုးအရှင်၌ နတ်ဆိုးဧကရာဇ်နှလုံးသား ရှိနေနိုင်ခြေ များလွန်းကြောင်း ခံစားမိသော်လည်း သူ့အနေဖြင့် အလောတကြီး မလုပ်ဆောင်လိုသေးချေ။
ထို အဆုံးမဲ့ထျန်းကျွင်းဆိုသူကို သတ်ဖြတ်ရန်မှာ ဘာမှမဟုတ်ပေ။ သူ့အတွက် ၎င်းမှာ အသေးအဖွဲ ကိစ္စရပ်တစ်ခုမျှသာ ဖြစ်သည်။ သို့သော် ဤလူကို သတ်ဖြတ်လိုက်ခြင်းက သူ့ကို နတ်ဆိုးဧကရာဇ်ကြီးနှင့် မလွဲမသွေ ရန်သူဖြစ်သွားစေမည် ဖြစ်သည်။
၎င်းတို့နှစ်ဦးမှာ သဘောထားကွဲလွဲနေခဲ့သည်မှာ ကြာလှပြီဖြစ်သော်လည်း အနည်းဆုံးတော့ ယခုအခါ အပြင်ပန်းတွင် ကြည့်ကောင်းနေသေးသည်။ အကယ်၍ သူကသာ နတ်ဆိုးဧကရာဇ်ကြီးကို အဆင်အခြင်မဲ့ စော်ကားမိပါက အနာဂတ်တွင် ပြဿနာများနှင့် မလွဲမသွေ ရင်ဆိုင်ရပေလိမ့်မည်။ လက်ချည်းသက်သက် အဆုံးမသတ်ရစေရန် နတ်ဆိုးဧကရာဇ်နှလုံးသားမှာ အစစ်အမှန်ဖြစ်ကြောင်း သေချာမှသာ ရှာနာနတ်ဆိုးဧကရာဇ် လှုပ်ရှားမည် ဖြစ်သည်။
" ကောင်းပါပြီ "
မို့ကျွင်းနတ်ဆိုးအရှင်သည် သေချာစွာ တွေးတောလိုက်ပြီးနောက် နောက်ဆုံးတွင် သဘောတူလိုက်လေသည်။ သူအနေဖြင့် ဤထက်ပို၍ လွန်ကဲသော တောင်းဆိုမှုများကို မလုပ်နိုင်တော့ကြောင်း သူ သိထားလေသည်။
ရှာနာနတ်ဆိုးဧကရာဇ် ဤတစ်လှမ်း ဆုတ်ပေးလိုက်ခြင်းကပင် အကန့်အသတ်တစ်ခု ဖြစ်နေပြီ။ အကယ်၍ သူကသာ ယခု နောက်မဆုတ်ပေးပါက စိတ်အပြောင်းအလဲ မြန်လွန်းလှသော ရှာနာနတ်ဆိုးဧကရာဇ်က မည်သို့ လုပ်လာမည်ကို ပြောရန် ခက်ခဲပေသည်။
ထို့ကြောင့် မို့ကျွင်းနတ်ဆိုးအရှင်သည် အချိန်သိပ်မဆွဲတော့ဘဲ သဘောတူလိုက်တော့သည်။
" အရမ်းကောင်းတယ် "
မို့ကျွင်းနတ်ဆိုးအရှင်က အခြေအနေကို နားလည်စွာ သဘောတူလိုက်သည်ကို မြင်သောအခါ ရှာနာနတ်ဆိုးဧကရာဇ်၏ လှပသော မျက်လုံးများထဲတွင် ကျေနပ်သွားသည့် အရိပ်အယောင်တစ်ခု နောက်ဆုံး၌ ပေါ်ထွက်လာခဲ့လေသည်။