အခန်း (၄၅၉-၄၆၀)
Vol. 33 Ch. 459-460
အခန်း ( ၄၅၉ ) - အကြံကို အကြံဖြင့်တန်ပြန်ခြင်း၊ နတ်ဆိုးနှလုံးသား အစစ်နှင့် အတု၊ အစစ်အမှန် ရည်ရွယ်ချက်
နတ်ဆိုးဧကရာဇ်ကြီး၏ လေသံကြောင့် ကုချန် အနည်းငယ် အံ့အားသင့်သွားခဲ့၏။ သူသည် ထိုရှေးဟောင်းနတ်ဆိုးဧကရာဇ်ကို ကြည့်ကာ ရှင်းပြချက်ကို စောင့်ဆိုင်းနေလိုက်သည်။
သို့သော် နတ်ဆိုးဧကရာဇ်ကြီးမှာ ကုချန်ကို ချက်ချင်း မရှင်းပြခဲ့ချေ။ ထို့အစား ကောင်းကင်ပိတ်လှောင် ဧကရာဇ်အစီအရင်ထဲတွင် ပိတ်မိနေသော ရှာနာနတ်ဆိုးဧကရာဇ်ထံသို့ အကြည့်ရွှေ့လိုက်၍ သူ၏မျက်နှာအမူအရာမှာ အနည်းငယ် မှုန်ကုပ်သွားလေသည်။
" ရှာနာ... မင်းက ငါအရှင့်ကို လျှို့ဝှက်အကြံအစည်နဲ့ ပြန်လုပ်ကြံတာလား "
နတ်ဆိုးဧကရာဇ်ကြီး၏ တုံ့ပြန်မှုကို မြင်သောအခါ ရေခဲတမျှ အေးစက်နေခဲ့သော ရှာနာနတ်ဆိုးဧကရာဇ်၏ မျက်နှာပေါ်တွင် အန္တရာယ်ရှိသော အပြုံးတစ်ခု ရုတ်တရက် ထွက်ပေါ်လာခဲ့၏။
" ဟားဟားဟား... နတ်ဆိုးဧကရာဇ်ကြီး ငါအရှင်က မင်းကို ဘယ်လိုလုပ် အကြံအစည်နဲ့ လုပ်ကြံရမှာလဲ... မင်းကသာ ငါအရှင့်ကို အကွက်ဆင်ချင်နေတာ ရှင်းနေတာပဲ... ငါအရှင်က မင်းရဲ့အကြံကို မင်းဆီ ပြန်လှည့်ပေးလိုက်ရုံပါပဲ "
နတ်ဆိုးဧကရာဇ်ကြီး၏ အကြံအစည်ကြောင့် အစီအရင်ထဲတွင် ပိတ်မိနေသော မို့ကျွင်းနတ်ဆိုးအရှင်မှာလည်း ယခုအခါ စိတ်လှုပ်ရှားနေပုံရ၏။
" နတ်ဆိုးဧကရာဇ်... နတ်ဆိုးဧကရာဇ်ကြီး ငါးမျှားချိတ်ကို ဟပိမိသွားပြီလား "
" သေချာတာပေါ့ "
ရှာနာနတ်ဆိုးဧကရာဇ်သည် ကျေနပ်သော အပြုံးတစ်ခုကို ပြသလိုက်၏။ ထို့နောက် ချက်ချင်းပင် နတ်ဆိုးဧကရာဇ်ကြီးထံသို့ အကြည့်များ ပြန်လည်ရွှေ့ကာ အေးစက်စွာ ဆက်၍ ပြောဆိုလေသည်။
" နတ်ဆိုးဧကရာဇ်... ငါအရှင်က အဲဒီလောက် ရူးမယ်လို့ မင်း ထင်နေတာလား... မင်း လှည့်စားတာကို တစ်ခါ ခံခဲ့ရပြီးပြီဆိုတော့ ဒုတိယအကြိမ် မင်းရဲ့ အကြံအစည်ထဲ ထပ်ကျွံဝင်သွားမယ်လို့ ထင်နေလား.....
ဒီ မို့ကျွင်းက ငါအရှင့်ဆီ အရင်က ချဉ်းကပ်လာတုန်းက တစ်ခုခု မှားနေတယ်ဆိုတာ ငါအရှင် ခံစားမိခဲ့တယ်.....
မင်းက ကံကြမ္မာဗေဒင်တွက်ချက်ခြင်း တာအိုမှာ ကျွမ်းကျင်တယ်ဆိုတာ နတ်ဆိုးနယ်မြေက လူတိုင်းသိတယ်.... ဒါပေမဲ့ အခု မို့ကျွင်းက သစ္စာဖောက်သွားတာတောင် မင်းက ဘာတုံ့ပြန်မှုမှ မလုပ်ဘူးလား.....
ဒါကို သက်သေပြဖို့ မင်း ဘာများတုံ့ပြန်မလဲဆိုတာ ငါကိုယ်တော် တမင်သက်သက် ဆယ်နှစ်တိတိ စောင့်ကြည့်ခဲ့တယ်... ဒါပေမဲ့ မင်းက ဘာမှမသိတဲ့အတိုင်း ဟန်ဆောင်နေတော့ ငါအရှင်ရဲ့ သံသယကို ပိုပြီး သေချာသွားစေတယ်... မင်းက ငါအရှင့်ကို လျှို့ဝှက်လုပ်ကြံဖို့ ကြံစည်နေတာ အသေအချာပဲ! "
ဆိုတော့... နတ်ဆိုးဧကရာဇ်ကြီးရဲ့ အကြံအစည်ကို ရှာနာနတ်ဆိုးဧကရာဇ်က ထိုးထွင်းသိမြင်သွားခဲ့ပြီပေါ့။
ရှာနာနတ်ဆိုးဧကရာဇ်၏ စကားများကို နားထောင်ရင်းနှင့် နတ်ဆိုးဧကရာဇ်ကြီး၏ မှုန်ကုပ်နေသော မျက်နှာကို ကြည့်က ကုချန် တစ်စုံတစ်ခုကို နားလည်သွားသကဲ့သို့ ရှိလေသည်။
" မို့ကျွင်း ပြောတဲ့ တည်နေရာကိုတော့ ငါအရှင် တွေ့ပါပြီ... ဒါပေမဲ့..... "
နတ်ဆိုးဧကရာဇ်ကြီး၏ ကိုယ်ပွား၏ အသံမှာ တွေဝေနေခဲ့သော်လည်း သူ၏မျက်လုံးအနက်ရှိုင်းဆုံးနေရာမှ မြင်ကွင်းတစ်ခု ထွက်ပေါ်လာကာ ကုချန်၏ အသိစိတ်ပင်လယ်အတွင်းသို့ ရောင်ပြန်ဟပ်လာခဲ့၏။
၎င်းမှာ နတ်ဆိုးဧကရာဇ်ကြီး၏ ကိုယ်အစစ်ရှိရာ နေရာပင် ဖြစ်သည်။
နတ်ဆိုးဧကရာဇ်ကြီး၏ ကိုယ်အစစ်သည် မို့ကျွင်းနတ်ဆိုးအရှင် ခုလေးတင် ပြောပြလိုက်သည့်အတိုင်း နတ်ဆိုးဧကရာဇ်နှလုံးသားကို ဖွက်ထားသော နေရာသို့ သွားရောက်ရှာဖွေခဲ့ခြင်း ဖြစ်သည်။
သို့သော် ထိုနေရာသို့ ရောက်သွားသောအခါ ကောင်းကင်နှင့်မြေကြီးကြားတွင် မရေမတွက်နိုင်သော ရှေးဟောင်းမှန်ပြင်များ ရုတ်တရက် ထွက်ပေါ်လာလျက် သူ့ကို ဝိုင်းရံထားသည်ကို တွေ့လိုက်ရလေသည်။
၎င်းမှာ ရှာနာနတ်ဆိုးဧကရာဇ်မှ ကြိုတင်ခင်းကျင်းထားခဲ့သော အစီအရင်ဖြစ်ကြောင်း ရှင်းလင်းလှပေသည်။
မို့ကျွင်းနတ်ဆိုးအရှင် ပြောပြခဲ့သော နေရာတွင် မည်သည့် နတ်ဆိုးဧကရာဇ်နှလုံးသားမျှ ရှိမနေခဲ့ဘဲ ရှာနာနတ်ဆိုးဧကရာဇ် ကြိုတင်ခင်းကျင်းထားသော နတ်ဆိုးဧကရာဇ် မဟာအစီအရင်သာ ရှိနေခဲ့ခြင်း ဖြစ်သည်။
အစက နတ်ဆိုးဧကရာဇ်ကြီးသည် ရှာနာနတ်ဆိုးဧကရာဇ်၏ ကိုယ်အစစ်ကို အကွက်ဆင်ကာ ထောင်ချောက်ဆင်ထားလိုက်ခြင်းဖြင့် နတ်ဆိုးဧကရာဇ်နှလုံးသားကို စိတ်အေးချမ်းသာစွာ သွားရောက်လုယူနိုင်မည်ဟု ထင်မှတ်ထားခဲ့၏။
သို့သော် ရလဒ်မှာ နတ်ဆိုးဧကရာဇ်နှလုံးသား မရှိရုံသာမက သူ၏ကိုယ်အစစ်ပင်လျှင် ရှာနာနတ်ဆိုးဧကရာဇ်၏ အစီအရင်ထဲတွင် ပိတ်မိသွားခဲ့လေသည်။
" နတ်ဆိုးဧကရာဇ်ကြီး... ချန်ဝူး... မင်းက ကံကြမ္မာဗေဒင်တွက်ချက်ခြင်း တာအိုမှာ ထူးချွန်တာ မှန်ပေမယ့် ငါအရှင်ကလည်း လွယ်လွယ်နဲ့ အနိုင်ကျင့်လို့ရတဲ့သူ မဟုတ်ဘူး.....
ကံကြမ္မာရဲ့ လမ်းညွှန်မှုကို အလွန်အမင်း မှီခိုလွန်းတာက... ကိုယ်တိုင်တောင် မသိလိုက်ဘဲ အဲဒီအထဲကို နက်နက်ရှိုင်းရှိုင်း ကျွံဝင်သွားစေနိုင်တယ်.....
မင်း မထွက်သွားခင်လေးတင် ဗေဒင်တစ်ခါ တွက်ကြည့်လိုက်တော့... တည်နေရာက နတ်ဆိုးဧကရာဇ်နဲ့ သက်ဆိုင်နေတာ အမှန်ပဲဆိုတာ တွေ့ခဲ့တယ်မလား.....
ဟားဟားဟားဟား... မင်းရဲ့ ဗေဒင်တွက်ချက်မှုက မှန်ပါတယ်... ဒါက နတ်ဆိုးဧကရာဇ်နဲ့ သက်ဆိုင်နေတာ အမှန်ပဲ... ဒါပေမဲ့ အဲဒါက နတ်ဆိုးဧကရာဇ်နှလုံးသား မဟုတ်ဘဲ မင်းအတွက် ငါကိုယ်တော် ခင်းကျင်းထားတဲ့ မဟာအစီအရင် ဖြစ်နေတာပဲ! "
ရှာနာနတ်ဆိုးဧကရာဇ်သည် အောင်ပွဲခံသည့်ဟန်ဖြင့် ပြောဆိုလေ၏။
" အဲဒီနေ့က မို့ကျွင်း ငါအရှင့်ဆီက ပြန်ထွက်သွားပြီးနောက်မှာ ငါအရှင်က မို့ကျွင်းရဲ့ အသိစိတ်ပင်လယ်ထဲကို နတ်ဝိညာဉ်အာရုံတစ်မျှင် သီးသန့် လျှို့ဝှက်ထည့်ပေးလိုက်တယ်... ပြီးတော့ ကောင်းကင်ဘုံရဲ့ လျှို့ဝှက်ချက်တွေကို ဖုံးကွယ်ထားပြီး ဒီနေ့မှာ နတ်ဆိုးဧကရာဇ်နှလုံးသားရဲ့ အစစ်အမှန် တည်နေရာကို မပြောပြဘဲ... မင်းကို မြှားခေါ်ဖို့ ရည်ရွယ်ချက်နဲ့ တည်နေရာအမှားကို တမင်သက်သက် ပြောပြဖို့ သူ့ကို ခိုင်းထားခဲ့တာ.....
ပြီးတော့ မင်းက တကယ်ပဲ မခံနိုင်ဘဲ ပါလာတာပဲ... ဟားဟားဟား... တခြားသူတွေကို အမြဲတမ်း မြှားစာချပြီး အကြံအစည်လုပ်နေရတာကနေ အခု ကိုယ်တိုင် အကွက်ဆင်ခံရတော့ ဘယ်လိုခံစားရလဲ "
" ကျစ်...! "
နတ်ဆိုးဧကရာဇ်ကြီး၏မျက်နှာမှာ မှိုင်းညို့နေလေသည်။ ဤအချိန်တွင်မူ သူသည် ရှာနာနတ်ဆိုးဧကရာဇ်၏ လှည့်စားခြင်းကို ခံလိုက်ရပြီဖြစ်ကြောင်း နားလည်သွားခဲ့လေပြီ။
သူသည် ရှာနာနတ်ဆိုးဧကရာဇ်ကို လျှို့ဝှက်ကြံစည်နေသည်ဟု ထင်မှတ်ထားခဲ့ခြင်း ဖြစ်သည်။
သို့သော် တစ်ဖက်လူက အရာအားလုံးကို သိရှိထားပြီး သူ၏အကြံအစည်ကို သူ့အပေါ် ပြန်လှည့်ကာ တန်ပြန်တိုက်ခိုက်ခဲ့ကြောင်းကို သူ မသိခဲ့ချေ။
" မို့ကျွင်း... အခု ငါအရှင့်ကို နတ်ဆိုးဧကရာဇ်နှလုံးသားရဲ့ အစစ်အမှန် တည်နေရာကို ပြောပြလို့ရပြီ "
ရှာနာနတ်ဆိုးဧကရာဇ်သည် ဖြည်းညင်းစွာ ပြောဆိုလိုက်ပြီးမှသာ နတ်ဆိုးဧကရာဇ်နှလုံးသား၏ တကယ့်တည်နေရာကို မို့ကျွင်းနတ်ဆိုးအရှင်အား မေးမြန်းလိုက်လေသည်။
နတ်ဆိုးဧကရာဇ်ကြီး၏ မှုန်ကုပ်နေသော အမူအရာကို မြင်သောအခါ ရှာနာနတ်ဆိုးဧကရာဇ်၏ အကြံအစည် အောင်မြင်သွားပြီဖြစ်ကြောင်း မို့ကျွင်းနတ်ဆိုးအရှင်မှ သိလိုက်ရာ စိတ်သက်သာရာရစွာဖြင့် ပြောပြလိုက်လေသည်။
" နတ်ဆိုးဧကရာဇ်ကို ကျွန်တော် မဖုံးကွယ်ရဲပါဘူး... နတ်ဆိုးဧကရာဇ်နှလုံးသားကို ကျွန်တော့် ကိုယ်ပေါ်မှာ အမြဲတမ်း သယ်ဆောင်ထားခဲ့တာပါ... အခုက နတ်ဆိုးဧကရာဇ်ကို ဆက်သရမယ့် အချိန်ပါပဲ! "
ထိုသို့ပြောပြီးနောက် မို့ကျွင်းနတ်ဆိုးအရှင်သည် မည်သည့် တွေဝေမှုမျှမရှိဘဲ လက်လှမ်းကာ လေဟာနယ်ကို ဆွဲဖြဲလိုက်၏။ ထိုနောက် အဆုံးမရှိသော နတ်ဆိုးဧကရာဇ်၏ ခမ်းနားမှုများ ပါဝင်ကာ အဆက်မပြတ် ခုန်လှုပ်နေဆဲဖြစ်သော နတ်ဆိုးဧကရာဇ်နှလုံးသားတစ်ခုကို ရှာနာနတ်ဆိုးဧကရာဇ်ထံ နာခံစွာ ဆက်သလိုက်လေသည်။
မို့ကျွင်းနတ်ဆိုးအရှင် ဆက်သလာသော နတ်ဆိုးဧကရာဇ်နှလုံးသားကို ကြည့်ကာ ရှာနာနတ်ဆိုးဧကရာဇ်၏ မျက်နှာပေါ်တွင် ကျေနပ်သော အပြုံးတစ်ခု ပေါ်လာလေသည်။
" မင်းက ဒီနတ်ဆိုးဧကရာဇ်နှလုံးသားကို ကိုယ်ပေါ်မှာ ယူထားမယ်လို့ ငါအရှင် မထင်ထားခဲ့ဘူး... ဒါပေမဲ့ အဲဒါလည်း မှန်ပါတယ်... အန္တရာယ်အများဆုံး နေရာက အလုံခြုံဆုံး နေရာပဲလေ.....
စိတ်မပူပါနဲ့... ဒီနေ့ ငါအရှင်က ကြီးမြတ်လှပါတယ်ဆိုတဲ့ နတ်ဆိုးဧကရာဇ်ကြီးချန်ဝူးကို လှည့်စားနိုင်ခဲ့တဲ့အတွက် အရမ်း စိတ်ရွှင်လန်းနေတယ်... နောင်တစ်ချိန် သူ မင်းကို လက်စားချေချင်ရင်တောင်မှ မင်းကို ငါအရှင် ကာကွယ်ပေးမယ် "
ထိုသို့ပြောပြီးနောက် ရှာနာနတ်ဆိုးဧကရာဇ်သည် မို့ကျွင်းနတ်ဆိုးအရှင် ဆက်သလာသော နတ်ဆိုးဧကရာဇ်နှလုံးသားကို အားနာခြင်းမရှိဘဲ သူ၏လက်ထဲသို့ ယူလိုက်လေသည်။
" ဟွန့်...! ရှာနာ... ဒီတစ်ကြိမ် မင်း နိုင်သွားတယ်... ဒီနတ်ဆိုးဧကရာဇ်နှလုံးသားကို ငါအရှင် မလိုချင်တော့ဘူး "
ကိစ္စများ ဤအခြေအနေသို့ ရောက်လာခဲ့ပြီဖြစ်ရာ ယနေ့ နတ်ဆိုးဧကရာဇ်နှလုံးသားကို ရယူနိုင်တော့မည် မဟုတ်ကြောင်း နတ်ဆိုးဧကရာဇ်ကြီး သိလိုက်လေသည်။ သူသည် ကုချန်ကို တစ်ချက်ကြည့်လိုက်ကာ အတူ ထွက်ခွာရန် ပြင်ဆင်လိုက်၏။
ဤကောင်းကင်ပိတ်လှောင် ဧကရာဇ်အစီအရင်ကို ခင်းကျင်းရန် သူ၌ ဆယ်နှစ်သာ အချိန်ရခဲ့ရာ ရှာနာနတ်ဆိုးဧကရာဇ်ကို တစ်ခဏမျှသာ ထောင်ချောက်ဆင်ထားနိုင်မည် ဖြစ်သည်။
ရှာနာနတ်ဆိုးဧကရာဇ် ခင်းကျင်းထားသော မဟာအစီအရင်မှာလည်း ထိုနည်းတူပင် ဖြစ်သည်။ သူ၏ကိုယ်အစစ်ကို ယာယီသာ ထောင်ချောက်ဆင်ထားနိုင်မည်ဖြစ်၍ မည်သည့် အန္တရာယ်မျှ ပေးနိုင်မည် မဟုတ်ချေ။ အချိန်မကြာမီမှာပင် သူ၏ကိုယ်အစစ်သည် သဘာဝကျကျ လွတ်မြောက်လာမည် ဖြစ်သည်။
ထို့ကြောင့် နတ်ဆိုးဧကရာဇ်ကြီးသည် ချက်ချင်းပင် ထွက်ခွာရန် ပြင်ဆင်လိုက်ကာ အချိန်ထပ်မဖြုန်းတော့ချေ။
သို့သော် ရှာနာနတ်ဆိုးဧကရာဇ်မှာ ဤမျှနှင့် ရပ်တန့်ရန် ရည်ရွယ်ချက် မရှိကြောင်း သိသာလှပေသည်။
နတ်ဆိုးဧကရာဇ်ကြီး ဆုတ်ခွာလိုသည့် ရည်ရွယ်ချက်ကို မြင်သောအခါ ရှာနာနတ်ဆိုးဧကရာဇ်၏ မျက်နှာပေါ်တွင် အန္တရာယ်ရှိသော အပြုံးတစ်ခု ချက်ချင်း ပေါ်လာခဲ့၏။
" ချန်ဝူး... ငါအရှင်က ဒီနတ်ဆိုးဧကရာဇ်နှလုံးသားကို ရဖို့အတွက်ပဲ ဒီအရာတွေအားလုံးကို ခင်းကျင်းဖို့ ဒီလောက် အားထုတ်ခဲ့ရတယ်လို့ မင်း ထင်မနေဘူးမလား.....
ဒီနေ့ မင်း ထွက်သွားလို့ရတယ်... ဒါပေမဲ့ ဒီကောင်လေးရဲ့ အသက်ကတော့ ဒီမှာ ကျန်ရစ်ခဲ့ရမယ် "
ထိုသို့ပြောရင်း ရှာနာနတ်ဆိုးဧကရာဇ်၏ အကြည့်များမှာ ကုချန်ထံသို့ ပထမဆုံးအကြိမ် ပြောင်းရွှေ့သွားကာ တွေးတောနေသည့်ဟန်ဖြင့် ထပ်မံ ပြောဆိုလိုက်လေသည်။
" ဒီကောင်လေးရဲ့ ဘယ်အရာကို မင်းက ဒီလောက် တန်ဖိုးထားနေလဲဆိုတာ ငါအရှင် သေချာမသိပေမယ့်.....
မင်းက ဒီကောင်လေးကို ဒီလောက် တန်ဖိုးထားနေမှတော့... သူက မင်းအတွက် တစ်ခုခု အကူအညီဖြစ်စေမှာ သေချာတယ်ဆိုတာတော့ ငါအရှင် သိတယ်.....
ဒါဆိုရင် ငါအရှင်က မင်းကို ကူညီပေးမယ်လေ... ဒီနေ့ သူ့ကို ဒီမှာသတ်ပြီး မင်းရဲ့ အကြံအစည်ကို ဖျက်ဆီးပစ်မယ်! "
ရှာနာနတ်ဆိုးဧကရာဇ်၏ ပစ်မှတ်အစစ်အမှန်မှာ တကယ်တော့ ကုချန်ပင် ဖြစ်သည်။
ရှာနာနတ်ဆိုးဧကရာဇ်၏စကားကို ကြားသောအခါ နတ်ဆိုးဧကရာဇ်ကြီး၏ မျက်နှာမှာ ပို၍ပင် မှုန်ကုပ်သွားလေသည်။
အဘယ်ကြောင့်ဆိုသော် ရှာနာနတ်ဆိုးဧကရာဇ် ပြောသည်မှာ အမှန်တကယ်ပင် မှန်ကန်နေသောကြောင့်ပင်။
နတ်ဆိုးဧကရာဇ်နှလုံးသားကို ဆုံးရှုံးရခြင်းက ကိစ္စကြီးတစ်ခုဖြစ်သော်လည်း ကုချန်သည် ရှေးဟောင်း အင်မော်တယ်-နတ်ဆိုး စစ်ပွဲကတည်းက နှစ်ပေါင်းမရေမတွက်နိုင်အောင် ကြာမြင့်ခဲ့သော သူ၏ ကြီးမားလှသည့် ကံကြမ္မာဖန်တီးမှုနှင့် ဆက်စပ်နေလေရာ မည်သည့်အမှားအယွင်းမျှ ဖြစ်၍ မရနိုင်ချေ!
အခန်း ( ၄၆၀ ) - ယောင်ဧကရာဇ်အဆောင်၊ ဟွမ်သွမ့်ဗေဒင်လက္ခဏာ၊ ဗေဒင်တွက်ချက်မှု ကျရှုံးခြင်း
" ဟွန့်...! ငါကိုယ်တော်ရဲ့ ကိုယ်အစစ်ကို မင်း ထောင်ချောက်ဆင်နိုင်ခဲ့တာ မှန်ပေမယ့် မင်းရဲ့ ကိုယ်အစစ်ကလည်း ဒီနေရာမှာ ငါကိုယ်တော်ရဲ့ ပိတ်လှောင်မှုကို ခံထားရတာပဲ... ငါတို့နှစ်ယောက်စလုံး လွတ်မြောက်ဖို့ ကြာမယ့်အချိန်က အတူတူလောက်ပဲဆိုတော့ မင်းမှာ ဘယ်လိုနည်းလမ်းတွေ ရှိနေနိုင်ဦးမှာလဲ "
နတ်ဆိုးဧကရာဇ်ကြီးမှ လှောင်ပြောင်လိုက်၏။ ရှာနာနတ်ဆိုးဧကရာဇ်မှ သူ၏မျက်စိအောက်တွင် ကုချန်၏အသက်ကို ယူနိုင်မည်ဟု သူ မယုံကြည်ခဲ့ပေ။
သူ၏ကိုယ်ပွားမှ ထိန်းသိမ်းထားသော ကောင်းကင်ပိတ်လှောင် ဧကရာဇ်အစီအရင်ကြီးသည် လည်ပတ်နေဆဲဖြစ်၏။ ဤနေရာတွင် သူ၏ကိုယ်အစစ်မဟုတ်ဘဲ ကိုယ်ပွားသာရှိနေသော်လည်း အစီအရင်ကြီး၏စွမ်းအားဖြင့် ရှာနာနတ်ဆိုးဧကရာဇ်၏ ကိုယ်အစစ်ကို တစ်ခဏမျှ ပိတ်လှောင်ထားနိုင်ဆဲဖြစ်သည်။
ထိုတစ်ခဏဆိုလျှင်ပင် လုံလောက်နေပြီဖြစ်သည်။ ထိုရှာနာမှာ သူ၏မျက်စိအောက်တွင် လူတစ်ယောက်ကို သတ်မည်ဟု ကြုံးဝါးရင်း ဤမျှ မောက်မာစွာ မည်သို့ ပြောဆိုရဲသနည်း။
" ဟက်! ချန်ဝူး... ငါအရှင်က မင်းရဲ့ အစီအစဉ်တွေကို ကြိုမသိနိုင်ဘူးလို့ မင်း တကယ်ပဲ ထင်နေတာလား "
သို့သော် ရှာနာနတ်ဆိုးဧကရာဇ်မှာ အနည်းငယ်မျှ ပြာယာခတ်သွားခြင်းမရှိဘဲ အရာအားလုံးကို ထိန်းချုပ်ထားနိုင်သည့် အပြုံးတစ်ခု သူ၏မျက်နှာပေါ်တွင် ပေါ်လာခဲ့၏။
" အဲဒီ မဟာအစီအရင်ကို ခင်းကျင်းဖို့ ငါအရှင် အများကြီး အားထုတ်ခဲ့ရတာ... ကျိန်းသေပေါက် မင်းကို ထောင်ချောက်ဆင်ဖို့ သက်သက်တော့ မဟုတ်ဘူးပေါ့ "
...
အဆုံးမရှိ ဝေးကွာသော နယ်မြေတစ်ခု၌.....
နတ်ဆိုးဧကရာဇ်ကြီး၏ ကိုယ်အစစ်သည် ကောင်းကင်နှင့်မြေကြီးကြားတွင် မားမားမတ်မတ်ရပ်နေလျက် ကောင်းကင်နှင့်မြေကြီးကို ရောင်ပြန်ဟပ်ကာ နယ်မြေတစ်ခုလုံးကို ဝိုင်းရံထားသော မရေမတွက်နိုင်သည့် မှန်ပြင်များကို ကြည့်ရင်း မျက်မှောင်အနည်းငယ် ကျုံ့ထားလေ၏။
သူသည် ဤနေရာမှ လွတ်မြောက်ရန် မကြိုးစားခဲ့ချေ။ အဘယ်ကြောင့်ဆိုသော် ရှာနာ နှစ်ပေါင်းများစွာ အချိန်ယူ၍ ခင်းကျင်းထားခဲ့သော ဤမဟာအစီအရင်ထဲမှ ဖောက်ထွက်ရန် ကြိုးစားခြင်းမှာ အချည်းနှီးသာ ဖြစ်မည်ကို သူ သိထားသောကြောင့်ပင်။
အကောင်းဆုံး ရွေးချယ်မှုမှာ မဟာအစီအရင်၏ စွမ်းအားများ ကုန်ဆုံးသွားမည့်အချိန်ကို စောင့်ဆိုင်းပြီးနောက်မှ အေးအေးဆေးဆေး ထွက်ခွာသွားရန်ပင် ဖြစ်သည်။ သို့သော် ရှာနာ၏ အမူအရာကို ကြည့်ရလျှင် ဤမဟာအစီအရင်မှာ သူ့ကို ထောင်ချောက်ဆင်ရန် သက်သက်ထက် ပိုနေပုံရ၏။
" ရှာနာ... မင်းမှာ တခြား ဘယ်လို လှည့်ကွက်တွေပဲရှိရှိ ထုတ်သုံးလိုက်စမ်းပါ "
နတ်ဆိုးဧကရာဇ်ကြီးသည် မျက်ခွံကို အနည်းငယ် ပင့်ကာ တည်ငြိမ်အေးဆေးစွာ ပြောဆိုလိုက်လေသည်။
ဤနေရာတွင် ရှာနာနတ်ဆိုးဧကရာဇ် စီစဉ်ထားသည်မှာလည်း သူ၏ကိုယ်ပွားကဲ့သို့ပင် ကိုယ်ပွားတစ်ခုမျှသာ ဖြစ်ကြောင်း သူ သိလေသည်။
" ဟွန်းဟွန်း... ချန်ဝူး... ငါအရှင်ရဲ့ မဟာအစီအရင်က မင်းကို ထောင်ချောက်ဆင်ဖို့ သက်သက် မဟုတ်ဘူး "
ကောင်းကင်နှင့်မြေကြီးကြားရှိ မရေမတွက်နိုင်သော မှန်ပြင်များအားလုံးတွင် ရှာနာနတ်ဆိုးဧကရာဇ်၏ လူရိပ်များ ပေါ်လာကာ နတ်ဆိုးဧကရာဇ်ကြီးကို စိုက်ကြည့်နေကြလေသည်။
" ဒီတစ်ခေါက် မလာခင်မှာ ယောင်ဧကရာဇ်ဆီကနေ အဆောင်တစ်ခုကို ငါအရှင် သီးသန့် တောင်းလာခဲ့တယ် "
" ယောင်ဧကရာဇ်အဆောင်?! "
ရှာနာနတ်ဆိုးဧကရာဇ်၏စကားကို ကြားသောအခါ နတ်ဆိုးဧကရာဇ်ကြီး၏ မျက်နှာမှာ ချက်ချင်းပင် မှိုင်းညို့သွားလေသည်။
ယောင်ဧကရာဇ်သည်လည်း နတ်ဆိုးနယ်မြေရှိ ရှေးဟောင်းနတ်ဆိုးဧကရာဇ်များထဲမှ တစ်ပါးဖြစ်သည်။ သူ နတ်ဆိုးဧကရာဇ်တာအိုကို ရရှိခဲ့သောအချိန်မှာ နတ်ဆိုးဧကရာဇ်ကြီးထက်ပင် အလွန် စောခဲ့လေ၏။ နတ်ဆိုးဧကရာဇ်ကြီး အားနည်းနေသေးချိန်တွင် ဤယောင်ဧကရာဇ်သည် နတ်ဆိုးဧကရာဇ်ရာထူးကို ရယူထားပြီးသော အမြင့်ဆုံးတည်ရှိမှုတစ်ခု ဖြစ်နေခဲ့ပြီဖြစ်သည်။
ဤရှာနာနတ်ဆိုးဧကရာဇ်မှာ ယောင်ဧကရာဇ်နှင့် မည်သို့ ပတ်သက်သွားရသနည်း။
ထိုယောင်ဧကရာဇ်အဆောင်သည် ယောင်ဧကရာဇ် ကိုယ်တိုင် ဖန်တီးထားခြင်းဖြစ်၍ အစစ်အမှန်နှင့် ပုံရိပ်ယောင်ကို လှည့်စားဖျက်ဆီးနိုင်စွမ်း ရှိ၏။ တစ်ကြိမ် အသက်သွင်းလိုက်သည်နှင့် နတ်ဆိုးဧကရာဇ်အဆင့်ရှိ တည်ရှိမှုတစ်ခုပင်လျှင် ၎င်းအတွင်း နက်ရှိုင်းစွာ ကျွံဝင်သွားနိုင်ရာ တစ်ခဏတာမျှ ရုန်းထွက်ရန်ပင် ခက်ခဲသွားမည် ဖြစ်သည်။
နတ်ဆိုးဧကရာဇ်ကြီးအတွက် လက်ခံရန် အခက်ခဲဆုံးမှာ ဤအချက်ပင် ဖြစ်သည်။
ဤယောင်ဧကရာဇ်အဆောင်သည် အစစ်အမှန်နှင့် ပုံရိပ်ယောင်ကို လှည့်စားနိုင်ရုံသာမက ဤနယ်မြေကို ပြင်ပကမ္ဘာနှင့်ပါ ယာယီအဆက်အသွယ် ဖြတ်တောက်ထားနိုင်လေသည်။
၎င်းမှာ ၎င်း၏ကိုယ်ပိုင် ကောင်းကင်နှင့်မြေကြီးကို ဖန်တီးထားသကဲ့သို့ ဖြစ်ရာ အခြားကမ္ဘာများနှင့်ပင် လုံးဝ အဆက်အသွယ် ပြတ်တောက်သွားစေ၏။
ဤနည်းဖြင့်ဆိုလျှင် သူ၏ ကိုယ်ပွားနှင့် အဆက်အသွယ်မှာ လုံးဝ ပြတ်တောက်သွားတော့မည် ဖြစ်သည်။ ကိုယ်အစစ်နှင့် အဆက်အသွယ် မရှိပါက ကိုယ်ပွားမှာ မျက်စိတစ်မှိတ်အတွင်း ပြိုကွဲသွားမည်သာ ဖြစ်သည်။
ကိုယ်ပွားတစ်ခုမျှသာ ဖြစ်ရာ ဆုံးရှုံးသွားလျှင်ပင် နတ်ဆိုးဧကရာဇ်ကြီးအနေဖြင့် နှမြောတသ ဖြစ်နေမည် မဟုတ်ချေ။
သို့သော် အရေးကြီးဆုံးအချက်မှာ ယခုအချိန်တွင် ကောင်းကင်ပိတ်လှောင် ဧကရာဇ်အစီအရင်ကြီး လည်ပတ်နေစေရန် သူ၏ကိုယ်ပွားမှ တာဝန်ယူထားရခြင်းပင် ဖြစ်သည်။
အကယ်၍ ကိုယ်ပွားသာ ပြိုကွဲသွားပါက ကောင်းကင်ပိတ်လှောင် ဧကရာဇ်အစီအရင်ကြီးလည်း လည်ပတ်မှု ရပ်တန့်သွားမည်ဖြစ်ရာ ရှာနာနတ်ဆိုးဧကရာဇ်သည် အစီအရင်ထဲမှ လွတ်မြောက်သွားတော့မည် ဖြစ်သည်။
ထို့နောက် ဘာဆက်ဖြစ်မည်ကို နတ်ဆိုးဧကရာဇ်ကြီး ခန့်မှန်းနိုင်လေပြီ။
သူ၏ကာကွယ်မှုမရှိဘဲ ထိုအဆုံးမဲ့ထျန်းကျွင်းသည် ရှာနာနတ်ဆိုးဧကရာဇ်ကို မည်သို့ ယှဉ်နိုင်ပါမည်နည်း။
ဒါက... ဒါက တကယ်တော့ ရှာနာနတ်ဆိုးဧကရာဇ်ရဲ့ အစစ်အမှန် ရည်ရွယ်ချက်ပဲ!
" ချန်ဝူး... အဲဒီကောင်လေးရဲ့ အလောင်းကို သိမ်းဖို့သာ စောင့်နေလိုက်တော့! ဟားဟားဟား! "
ရှာနာနတ်ဆိုးဧကရာဇ်၏ အောင်ပွဲခံ ရယ်မောသံနှင့်အတူ ကောင်းကင်နှင့်မြေကြီးမှာ ရုတ်တရက် တုန်ဟည်းသွားလေသည်။
အရောင်အသွေးမျိုးစုံဖြင့် လင်းလက်နေသည့် ရှေးဟောင်းအဆောင်တစ်ခုသည် ကောင်းကင်နှင့်မြေကြီး၏ အလယ်ဗဟိုတွင် ရုတ်တရက် ထွက်ပေါ်လာခဲ့၏။
ထိုအဆောင်မှ အလင်းတန်းများ ပျံ့နှံ့ထွက်ပေါ်လာ၏။ ၎င်းတို့ ဖြတ်သန်းသွားရာ နေရာတိုင်းတွင် ကောင်းကင်နှင့်မြေကြီးပင်လျှင် မယုံနိုင်လောက်အောင် ပျက်စီးသွားကာ ကမ္ဘာကြီးမှ လုံးဝ ဖြတ်တောက် ဖယ်ရှားခံရ၍ ပျောက်ကွယ်သွားတော့မည့်ဟန်ပင် ရှိလေသည်။
ထို့အပြင် နတ်ဆိုးဧကရာဇ်ကြီးသည် ပြင်ပကမ္ဘာနှင့် သူ၏ဆက်သွယ်မှုမှာ ပို၍ပို၍ အားနည်းလာကြောင်းကိုပါ ခံစားလိုက်ရ၏။
အသက်ရှူကြိမ် အနည်းငယ်အတွင်းမှာပင် သူ၏ ကိုယ်ပွားတည်ရှိနေမှု အာရုံအားလုံးကို လုံးဝ ဆုံးရှုံးသွားတော့မည် ဖြစ်သည်။
" တကယ်ပဲ တစ်ခုခု မှားယွင်းတော့မှာတော့ မဟုတ်ပါဘူးနော် "
နတ်ဆိုးဧကရာဇ်ကြီး၏ အကြည့်များမှာ ဝေဝါးသွားသော်လည်း သူ၏လက်ဖဝါးထဲတွင် ထိုကျောက်စိမ်းဖြူလိပ်ခွံလေးမှာ တိတ်ဆိတ်စွာ ထွက်ပေါ်လာခဲ့၏။
ဤကိစ္စ၏ နောက်ဆုံးရလဒ် မည်သို့ဖြစ်လာမည်ကို သိရှိနိုင်ရန် ကျောက်စိမ်းဖြူလိပ်ခွံဖြင့် နောက်ထပ် ဗေဒင်တစ်ကြိမ် တွက်ချက်ရန် သူ ပြင်ဆင်လိုက်လေသည်။
" ဝှစ်...! "
နတ်ဆိုးဧကရာဇ်ကြီးမှ စွမ်းအားများ ထည့်သွင်းလိုက်သည်နှင့် ကျောက်စိမ်းဖြူလိပ်ခွံမှာ မှိန်ဖျော့ဖျော့ လင်းလက်သွားလေ၏။
ထို့နောက် ချက်ချင်းပင် လိပ်ခွံထဲမှ ဝေဝါးသော ပုံရိပ်တစ်ခု ထွက်ပေါ်လာခဲ့၏။
၎င်းမှာ အရိပ်ထဲတွင် ပုန်းကွယ်နေပုံရသော ထပ်တူညီသည့် ဝေဝါးသော အမျိုးသမီးပုံရိပ် နှစ်ခု ဖြစ်လေသည်။
ထိုပုံရိပ်နှစ်ခု ပေါ်လာသည်နှင့်အမျှ လိပ်ခွံပေါ်တွင် ဖျော့တော့သော ကြက်သွေးရောင်တစ်ခုလည်း စီးဆင်းသွားကာ မကောင်းသော နိမိတ်လက္ခဏာ တစ်ခုခုကို ကြိုတင်ပြသနေဟန် ရှိလေသည်။
လိပ်ခွံပေါ်တွင် ပေါ်လာသော ထပ်တူညီသည့် ပုံရိပ်နှစ်ခုမှာ ရှာနာနတ်ဆိုးဧကရာဇ်၏ ကိုယ်အစစ်နှင့် ကိုယ်ပွားကို ကိုယ်စားပြုကြောင်းနှင့် ဤမကောင်းသော နိမိတ်လက္ခဏာမှာ ရှာနာနတ်ဆိုးဧကရာဇ်ထံမှ ထွက်ပေါ်လာခြင်းဖြစ်ကြောင်း နတ်ဆိုးဧကရာဇ်ကြီး သိလေသည်။
" အဲဒီ အဆုံးမဲ့ထျန်းကျွင်း ဘာဖြစ်သွားလဲဆိုတာ ငါအရှင် ကြည့်ချင်တယ် "
နတ်ဆိုးဧကရာဇ်ကြီးသည် လက်ကိုဝှေ့ယမ်းကာ ကျောက်စိမ်းဖြူလိပ်ခွံကို နောက်တစ်ကြိမ် အသက်သွင်းလိုက်လေသည်။
သူ့ကိုယ်သူအတွက်တော့ စိုးရိမ်နေခြင်း မရှိချေ။ ယောင်ဧကရာဇ်အဆောင် ရှိနေလျှင်ပင် ရှာနာနတ်ဆိုးဧကရာဇ်မှ သူ့ကို သတ်နိုင်မည်မဟုတ်ဘဲ အလွန်ဆုံး အချိန်ခဏမျှသာ ထောင်ချောက်ဆင်ထားနိုင်မည် ဖြစ်သည်။
သူ အမှန်တကယ် စိုးရိမ်နေသည်မှာ ကုချန်၏လုံခြုံရေးပင် ဖြစ်သည်။
၎င်းမှာ နှစ်သန်းပေါင်းများစွာကြာအောင် သူ အချိန်ယူ ပျိုးထောင်ထားခဲ့သော ကံကြမ္မာဖန်တီးမှုကြီး ဖြစ်၏။
အကယ်၍ ကုချန်သာ သေဆုံးသွားပါက အရာအားလုံး ပျောက်ကွယ်သွားတော့မည် ဖြစ်သည်။
နတ်ဆိုးဧကရာဇ်ကြီး၏ စကားအတိုင်း ကုချန်၏ကံကြမ္မာကို တွက်ချက်ပြမည့်အလား ကျောက်စိမ်းဖြူလိပ်ခွံသည် တောက်ပစွာ လင်းလက်လာလေ၏။
သို့သော် နောက်တစ်ခဏတွင် ဖော်ပြ၍မရနိုင်လောက်အောင် နားမလည်နိုင်ဖြစ်နေသော အမူအရာတစ်ခု နတ်ဆိုးဧကရာဇ်ကြီး၏ မျက်နှာပေါ်တွင် ပေါ်လာခဲ့လေသည်။
အဘယ်ကြောင့်ဆိုသော် ကျောက်စိမ်းဖြူလိပ်ခွံပေါ်တွင် ပုံရိပ်အားလုံး ပျောက်ကွယ်သွားကာ ဟွမ်သွမ့်ချီများဖြင့် အစားထိုးခံလိုက်ရသည်ကို သူ မြင်လိုက်ရသောကြောင့်ပင်။
ဟွမ်သွမ့်ချီများ လည်ပတ်နေကာ ပုံရိပ်အားလုံးကို ဖုံးကွယ်ထား၍ ကံကောင်းခြင်း၊ ကံဆိုးခြင်းကို ကိုယ်စားပြုသော အလင်းတန်းများပင် ထွက်ပေါ်မလာခဲ့ချေ။
ကျောက်စိမ်းဖြူလိပ်ခွံရဲ့ ဗေဒင်တွက်ချက်မှု... ကျရှုံးသွားခဲ့တာလား?!
နတ်ဆိုးဧကရာဇ်ကြီးမှာ အလွန်အမင်း တုန်လှုပ်သွားခဲ့၏။
ဤကဲ့သို့သော အဖြစ်အပျက်မျိုးမှာ ပထမဆုံးအကြိမ် ဖြစ်ပျက်ခဲ့ခြင်း ဖြစ်သည်။
ဤရေတွက်၍မရနိုင်သော နှစ်ကာလများတစ်လျှောက် နတ်ဆိုးဧကရာဇ်ကြီးသည် ဤကျောက်စိမ်းဖြူလိပ်ခွံကို အားကိုး၍ အန္တရာယ်များမှ အကြိမ်များစွာ လွတ်မြောက်ခဲ့ဖူးသော်လည်း ယခုမူ ဗေဒင်တွက်ချက်ရာတွင် ကျရှုံးသွားခဲ့လေပြီ။
ဘာကြောင့်လဲ။
အရင်က အခြားသူတွေရဲ့ ကံကြမ္မာတွေကို တွက်ချက်ဖို့ ဒီကျောက်စိမ်းဖြူလိပ်ခွံကို အသုံးပြုခဲ့ဖူးပေမယ့် ဒီလို အခြေအနေမျိုး တစ်ခါမှ မဖြစ်ခဲ့ဖူးဘူး!
ဒါဆိုရင် အခု အဲဒီ အဆုံးမဲ့ထျန်းကျွင်းအတွက် ဗေဒင်တွက်ချက်တဲ့အခါမှာ ဘာလို့ လက္ခဏာက သန့်စင်တဲ့ ဟွမ်သွမ့်အခြေအနေမျိုး ဖြစ်နေရတာလဲ။
နတ်ဆိုးဧကရာဇ်ကြီးမှာ ဘာလုပ်ရမှန်း မသိဖြစ်နေခဲ့သည်။
ဤသည်မှာ သူ ကုချန်အတွက် ပထမဆုံးအကြိမ် ဗေဒင်တွက်ချက်ခြင်း ဖြစ်သည်။
ယခင်အကြိမ်များက ကုချန်နှင့် သက်ဆိုင်နေသော်လည်း နတ်ဆိုးဧကရာဇ်ကြီးသည် မိမိကိုယ်တိုင်အတွက်သာ ဗေဒင်တွက်ချက်ခဲ့ခြင်းဖြစ်ရာ မည်သည့်အမှားအယွင်းကိုမျှ သတိမထားမိခဲ့ချေ။
သို့သော် ယခု ကုချန်အတွက် ပထမဆုံးအကြိမ် ဗေဒင်တွက်ချက်ရာတွင် ဤရလဒ်ကို ရရှိခဲ့လေသည်။
ဗေဒင်လက္ခဏာမှာ သန့်စင်သော ဟွမ်သွမ့်အခြေအနေဖြစ်နေပြီး ဘာကိုမှ မပြသပေ!
ဒါ... ဒါက တကယ်ပဲ ဘာအကြောင်းကြောင့်များ ဖြစ်ရတာလဲ?!