အခန်း (၁၅၈၇-၁၅၈၈)

အခန်း (၁၅၈၇) - ယဲ့ဧကရာဇ်မင်းကြီး

"မသေဘူးလား..."

နတ်ဆိုးရွာလူကြီးမှာ ဖန့်ချန်၏ စကားကို သိပ်မယုံကြည်နိုင်ဖြစ်နေသည်။ အလွန်တရာ ကွဲပြားထင်ရှားလှသော အရောင်နှစ်မျိုးမှာ ဤနေရာကို လုံးဝ တစ်သားတည်း ဖြစ်သွားအောင် ဝါးမြိုလိုက်သောအခါ သူသည် အလိုအလျောက် မျက်လုံးများကို ပိတ်လိုက်ပြီး သေနေ့ကို ငြိမ်သက်စွာ စောင့်ဆိုင်းနေမိတော့သည်။

ခဏအကြာတွင်...

"ရွာလူကြီး... ကျွန်တော်တို့ တကယ်ပဲ ဘာမှမဖြစ်ဘူးဗျ"

နတ်ဆိုးမျိုးနွယ်စုဝင် တစ်ဦးက လှမ်းအော်လိုက်သည်။

ထိုနုနယ်သော အသံလေးကြောင့် နတ်ဆိုးရွာလူကြီး၏ ရင်ထဲတွင် နာကျင်သွားရသည်။ သူသည် ထိုအသံနေအသံထားကို မှတ်မိနေသည်။ တစ်ချိန်က ရဲရင့်ပြောင်မြောက်လှသော ကျားနတ်ဆိုးကြီးပင်လျှင် ထိုကဲ့သို့သော ပုံစံမျိုး ဖြစ်သွားခဲ့ရပြီ မဟုတ်ပါလား။

"စီနီယာကြီးက တကယ်ပဲ ကတိတည်တဲ့သူပဲ၊ နောက်ဆိုရင် ကျွန်တော်တို့က စီနီယာကြီးရဲ့ ဓားနယ်မြေထဲမှာပဲ နေထိုင်သွားပါ့မယ်၊ စီနီယာကြီးအနေနဲ့ သည်းခံပေးဖို့ မျှော်လင့်ပါတယ်"

နတ်ဆိုးရွာလူကြီးက ကျေးဇူးတင်ရှိသော အမူအရာဖြင့် ဖန့်ချန်ကို ကြည့်ကာ လက်အုပ်ချီ၍ ပြောလိုက်သည်။

"စီနီယာကြီး အသုံးပြုလိုတဲ့အခါမျိုးမှာ ကျွန်တော်တို့ကို စိတ်ကြိုက် အမိန့်ပေးနိုင်ပါတယ်၊ ကျွန်တော်တို့ အသက်ကို ပဓာနမထားဘဲ အစွမ်းကုန် ဆောင်ရွက်ပေးပါ့မယ်"

"အင်း..."

ဖန့်ချန်က ခေါင်းကို အသာအယာ ငြိမ့်ပြလိုက်ပြီး

"နယ်မြေကိုးခု မသေမျိုးမဟာမိတ်ရဲ့ နတ်ဆိုးမသေမျိုးတပ်ဖွဲ့ အကြောင်းကို ထပ်ပြောပြဦး၊ ငါ နားထောင်ချင်တယ်၊ အသေးစိတ်ကအစ ခင်ဗျားသိသမျှ အကုန်ပြောပြပါ"

နတ်ဆိုးရွာလူကြီး၏ မျက်နှာတွင် အတွေးတစ်ခု ပေါ်လာပြီး စမ်းသပ်သည့်အနေဖြင့် မေးလိုက်သည်။

"အခုဆိုရင်... နယ်မြေကိုးခု မသေမျိုးမဟာမိတ်က အနိုင်ရသွားပြီလား"

"ခင်ဗျားတို့ ရှုံးသွားပြီ၊ အလွန်တရာ ဆိုးဆိုးဝါးဝါးကို ရှုံးနိမ့်သွားတာ"

ဖန့်ချန်က တည်ငြိမ်စွာ ပြောလိုက်သည်။

အကယ်၍ တစ်ဖက်လူက ဟန်ဆောင်နေခြင်း မဟုတ်ပါက၊ ထိုစဉ်က အဆင့် ၃ ဓားမသေမျိုး စီနီယာကြီးသည် နယ်မြေကိုးခု မဟာမိတ်နှင့် စစ်ခင်းခဲ့သောကြောင့်သာ ဒဏ်ရာအပြင်းအထန်ရပြီး သေလုမျောပါးဖြစ်ကာ မိမိကိုယ်ကိုယ် မြှုပ်နှံရန် မသေမျိုးဂူသင်္ချိုင်းကို တူးခဲ့ခြင်း ဖြစ်ရပေမည်။

အမှန်စင်စစ် ယခုရှိနေသော အဆင့် ၃ နတ်ဆိုးမသေမျိုးများမှာ သာမန် တည်ရှိမှုမျိုး မဟုတ်တော့ပေ။ သူတို့၏ တည်ရှိပုံမှာ လူ့လောက၏ ဝိညာဉ်များနှင့် ဆင်တူသော်လည်း စိတ်ဝိညာဉ်နယ်မြေ တွင် နေထိုင်ခြင်း မဟုတ်ဘဲ ထိုစီနီယာကြီး၏ ဓားနယ်မြေအတွင်း နေထိုင်ရင်း ဓားရိုးနှင့်အတူ ယနေ့အထိ ပါလာခဲ့ကြခြင်း ဖြစ်သည်။

သူတို့အတွက် ယင်သက်တမ်း မလိုအပ်သော်လည်း... သူတို့သည် ထိုဓားနယ်မြေအတွင်းမှ ဘယ်သောအခါမှ ထွက်ခွာနိုင်မည် မဟုတ်သလို၊ ဘွဲ့ထူးအာဏာ အပ်နှင်းခြင်း ကိုလည်း ခံယူနိုင်မည် မဟုတ်ချေ။

တစ်ခုတည်းသော နည်းလမ်းမှာ နတ်ဆိုးရွာလူကြီး အစောပိုင်းက ပြောခဲ့သည့်အတိုင်း... ဖန့်ချန်ကို စားပွဲတင်ကာ သူ၏ ခန္ဓာကိုယ်ကို လုယူပြီး ပြန်လည်မွေးဖွားရန်သာ ရှိတော့သည်။

နယ်မြေကိုးခု မသေမျိုးမဟာမိတ် ရှုံးနိမ့်သွားပြီဟု ကြားလိုက်ရသောအခါ အနားရှိ အဆင့် ၃ နတ်ဆိုးမသေမျိုးများမှာ တစ်ယောက်တစ်ပေါက် ရေရွတ်ရင်း သက်ပြင်းချနေကြတော့သည်။

နတ်ဆိုးရွာလူကြီးက သက်ပြင်းတစ်ချက်ချကာ ပြောလိုက်သည်။

"စီနီယာကြီးက နတ်ဆိုးမသေမျိုးတပ်ဖွဲ့အကြောင်း သိချင်တယ်ဆိုရင်တော့ ကျွန်တော် သိသမျှ အကုန်ပြောပြရမှာပေါ့၊ ဒါက အဲဒီတုန်းက ယဲ့ဧကရာဇ်မင်းကြီး အကြောင်းကနေ စပြောရလိမ့်မယ်"

"ယဲ့ဧကရာဇ်မင်းကြီး လား"

ဖန့်ချန်သည် 'ယဲ့ ' ဟူသော စကားလုံးအပေါ် အလွန် အာရုံခံစားလွယ်လှသည်။ သူ၏ စိတ်ထဲတွင် ပထမဆုံး ပေါ်လာသည်မှာ စိတ်ဝိညာဉ်နယ်မြေ၏ နတ်သားရဲ 'ယဲ့' ပင် ဖြစ်သည်။

"ဟုတ်ပါတယ်၊ ယဲ့ဧကရာဇ်မင်းကြီးက ကျွန်တော်တို့ နတ်ဆိုးမျိုးနွယ်ရဲ့ တစ်ဦးတည်းသော အဆင့် ၉ နတ်ဆိုးမသေမျိုးဖြစ်ပြီး နယ်မြေကိုးခုလုံးမှာ အင်အားအကြီးဆုံး တည်ရှိမှုလည်း ဖြစ်ပါတယ်"

နတ်ဆိုးရွာလူကြီး၏ မျက်လုံးများတွင် ကိုးကွယ်အားကျမှုများ ပေါ်လွင်နေသည်။

"ယဲ့ဧကရာဇ်မင်းကြီးရဲ့ မူလကိုယ်ထည်က ဘာလဲဆိုတာ ဘယ်သူမှ မသိကြပါဘူး၊ သိရသလောက်ကတော့ နတ်ဆိုးမျိုးနွယ်ရဲ့ သမိုင်းမှာ ယဲ့ဧကရာဇ်မင်းကြီးရဲ့ အစွမ်းက နတ်ဆိုးမျိုးနွယ်စုရဲ့ ကနဦးဘိုးဘေးတွေနဲ့တောင် ယှဉ်နိုင်တယ်လို့ ဆိုကြတယ်"

"အဲဒီတုန်းက နယ်မြေကိုးခု မသေမျိုးမဟာမိတ်ကို တည်ထောင်ခဲ့တာကလည်း ယဲ့ဧကရာဇ်မင်းကြီးနဲ့ လူသားမျိုးနွယ်က အဆင့် ၉ မသေမျိုးအချို့ ပူးပေါင်းပြီး တွန်းအားပေးခဲ့တာပါ။ အဲဒီတုန်းက နယ်မြေကိုးခုဟာ အကြီးအကျယ် ရှုပ်ထွေးပွေလီနေခဲ့တာ၊ မဟာမိတ်ကို တည်ထောင်ရတာက အဲဒီရှုပ်ထွေးမှုတွေကို အဆုံးသတ်ဖို့နဲ့ နယ်မြေကိုးခုမှာ ရှိသင့်ရှိထိုက်တဲ့ စနစ်တကျ အစီအစဉ်တွေကို ပြန်လည် တည်ဆောက်ဖို့ပါပဲ"

"ဦးနှောက်ဆေးခံထားရတဲ့ နောက်ထပ်တစ်ယောက်ပဲ"

ဖန့်ချန်က စိတ်ထဲတွင် သက်ပြင်းချလိုက်မိသည်။

ယခုအခါ တစ်ဖက်လူမှာ သူ၏ ဓားနယ်မြေအတွင်းတွင် ရှိနေသဖြင့် လိမ်ညာရန် လုံးဝ မစွမ်းသာချေ။ စကားလုံး တစ်ဝက်လောက် လိမ်လိုက်သည်နှင့် ဖန့်ချန်က ချက်ချင်း သိရှိနိုင်သည်။

ထိုအချက်က နတ်ဆိုးမျိုးနွယ်များမှာ ဤကိစ္စကို အဓိက ကြိုးကိုင်ခဲ့သော်လည်း အမှန်တရားကို အထက်တန်းလွှာ အနည်းငယ်သာ သိရှိကြောင်း သက်သေပြနေသည်။

အောက်ခြေက နတ်ဆိုးများမှာမူ အထက်ကလူတွေက မိစ္ဆာမျိုးနွယ် ကို အသုံးချပြီး နယ်မြေကိုးခုကို ပြန်လည်သိမ်းပိုက်ဖို့ ကြံစည်နေကြသည်ကို လုံးဝ မသိကြချေ။ သူတို့ သိထားသည်မှာ မဟာမိတ်သည် နယ်မြေကိုးခု၏ ပုံစံခွက်ဟောင်းကို ရိုက်ချိုးပြီး စနစ်သစ် တည်ဆောက်ရန်နှင့် ထိုမှတစ်ဆင့် အကျိုးအမြတ်အချို့ ရယူရန်ဟုသာ မှတ်ယူထားကြသည်။

"နတ်ဆိုးမသေမျိုးတပ်ဖွဲ့ကို ယဲ့ဧကရာဇ်မင်းကြီး ကိုယ်တိုင် တည်ထောင်ခဲ့တာပါ။ သူမက နယ်မြေကိုးခုလုံးကို လှည့်လည်ပြီး အနယ်နယ်အရပ်ရပ်က နတ်ဆိုးမျိုးနွယ် ကျင့်ကြံသူတွေကို စုစည်းပြီး ဒီတပ်ဖွဲ့ကို ဖွဲ့စည်းခဲ့တာ။ မဟာမိတ်ထဲမှာ တပ်ပေါင်းစုတွေ အများကြီး ရှိပေမဲ့ ကျွန်တော်တို့ နတ်ဆိုးမသေမျိုးတပ်ဖွဲ့ကသာ အဆင့် ၁ ဖြစ်ဖို့ ထိုက်တန်တာပါ ယဲ့ဧကရာဇ်မင်းကြီး ညွှန်ပြတဲ့နေရာက စစ်တလင်းဖြစ်ပြီး၊ ကျွန်တော်တို့ တပ်ဖွဲ့ရောက်တဲ့နေရာတိုင်းမှာ အရာရာကို အနိုင်ယူနိုင်ခဲ့တယ် "

"ဒါပေမဲ့ ကံမကောင်းတာက..."

နတ်ဆိုးရွာလူကြီးက သက်ပြင်းချလိုက်သည်

"နယ်မြေကိုးခုထဲကနေ ဘယ်ကမှန်းမသိတဲ့ အဆင့် ၉ ဓားမသေမျိုး တစ်ယောက် ပေါ်လာခဲ့တယ်။ သူရဲ့ အစွမ်းက ယဲ့ဧကရာဇ်မင်းကြီးထက် မနိမ့်ရုံတင်မကဘဲ သူရဲ့ နောက်လိုက်နောက်ပါတွေကလည်း အများကြီးပဲ။ ဓားမသေမျိုး တစ်ပါးပြီးတစ်ပါးက ကျွန်တော်တို့ နတ်ဆိုးမျိုးနွယ်တွေကို သတ်ဖြတ်တဲ့နေရာမှာ လုံးဝ လက်မနှေးကြဘူး၊ တကယ့်ကို ရက်စက်ကြမ်းကြုတ်လွန်းလှပါတယ် "

"ရက်စက်တယ် ဟုတ်လား"

"ဟုတ်တယ်"

နတ်ဆိုးရွာလူကြီးက ခေါင်းကို ဖြည်းဖြည်းချင်း ညိတ်လိုက်သည်။

"သိပ်ရက်စက်တာပဲ၊ အဲဒီတုန်းက နတ်ဆိုးမသေမျိုးတပ်ဖွဲ့ဝင် အတော်များများဟာ အသတ်ခံရမှာကို ကြောက်လန့်ပြီး တပ်ပျက်သွားခဲ့ကြတယ်။ တစ်ဖွဲ့ပျက်တော့ နောက်တစ်ဖွဲ့လိုက်ပျက်နဲ့၊ နတ်ဆိုးမသေမျိုးတပ်ဖွဲ့ ကျဆုံးသွားတာဟာ အဲဒီအဆင့် ၉ ဓားမသေမျိုးကြောင့်လို့ ပြောလို့ရတယ်၊ ကျွန်တော် တကယ် နာကျည်းမိတယ်ဗျာ "

"နာကျည်းတယ်"

နတ်ဆိုးထောင်ပေါင်းများစွာမှာလည်း နိမ့်ရှိုင်းသော အသံများဖြင့် ဟိန်းဟောက်လိုက်ကြသည်။

"ဟင်း ဟင်း..."

ဓားငယ်လေးက ခပ်ဟဟ ရယ်လိုက်ပြီး ထိုနတ်ဆိုးအုပ်စုကို ဂုဏ်ယူဝင့်ကြွားစွာ ကြည့်နေသည်။

သူမ၏ စိတ်ထဲတွင်မူ ဓားမသေမျိုးဆိုသည်မှာ လောကတွင် အဆင့်အတန်း အမြင့်မားဆုံး တည်ရှိမှုပင် ဖြစ်သည်။

"နောက်တော့ ဘာဖြစ်လဲ"

ဖန့်ချန်က မေးလိုက်သည်။

"နောက်တော့လား"

နတ်ဆိုးရွာလူကြီးက ဖြည်းဖြည်းချင်း ပြန်လည် စဉ်းစားနေသည်။

"နောက်ပိုင်းကတော့ ပြန်မတွေးချင်စရာတွေပါပဲ၊ ကျွန်တော် ဦးဆောင်တဲ့ အဖွဲ့လည်း တပ်ပျက်သွားပြီး နောက်ဆုံးမှာ နှိမ်နင်းခံလိုက်ရတယ်။ အခု ဒီမှာရှိနေတဲ့ မျိုးနွယ်စုဝင်တွေ အားလုံးကလည်း အဲဒီတုန်းက နတ်ဆိုးမသေမျိုးတပ်ဖွဲ့ရဲ့ တပ်ပျက်တွေပါပဲ"

"အဲဒီ ယဲ့ဧကရာဇ်မင်းကြီးက ယောက်ျားလား၊ မိန်းမလား"

ဖန့်ချန်က ထပ်မံ မေးမြန်းလိုက်သည်။

"ကျွန်တော် ယဲ့ဧကရာဇ်မင်းကြီး စစ်ဆေးရေးထွက်လာတုန်းက အဝေးကနေ တစ်ချက်ပဲ မြင်ဖူးခဲ့တာပါ၊ သူမရဲ့ အရှိန်အဝါက တကယ့်ကို ခန့်ညားထည်ဝါပြီး လောကမှာ အနှိုင်းမဲ့ပါပဲ "

နတ်ဆိုးရွာလူကြီး၏ မျက်လုံးများတွင် မျှော်လင့်တောင့်တမှုများနှင့်အတူ ကြောက်ရွံ့ရိုသေမှု၊ ထိုမှတစ်ဆင့် အထင်ကြီးအားကျမှုများ ရောယှက်နေသည်။

"နတ်သားရဲ ယဲ့ ကလည်း အမျိုးသမီးပုံစံ၊ ယဲ့ဧကရာဇ်မင်းကြီးကလည်း အမျိုးသမီးကျင့်ကြံသူ... ကြည့်ရတာ ဒီကိစ္စကို ယွမ်ဟယ် ဆရာသခင် ဒါမှမဟုတ် အဖိုးကြီးနဲ့ တွေ့မှပဲ အသေအချာ မေးလို့ရတော့မယ်။ ကံကောင်းတာက ဒီသတင်းတွေကို သူတို့ ရံဖန်ရံခါ မှတ်မိနေဦးမှာပဲ။ ဝမ်အိုကြီး ဘက်ကလည်း... နတ်ဆိုးမျိုးနွယ်နဲ့ ပတ်သက်တာ တစ်ခုခု သိနိုင်ခြေရှိတယ်။

အခု မိစ္ဆာဘေးဒုက္ခ ကျရောက်နေတာမှာ နတ်ဆိုးမျိုးနွယ်တွေ ဘယ်လောက်အထိ ပါဝင်ပတ်သက်နေလဲဆိုတာ မသိရသေးဘူး။ အကယ်၍ နတ်ဆိုးမျိုးနွယ်က အဆင့် ၉ မသေမျိုးတွေက မိစ္ဆာမျိုးနွယ်ဘက်ကနေ နောက်ထပ် စစ်ကူတွေ လာမှာမဟုတ်တော့ဘူးလို့ အတည်ပြုနိုင်ပြီဆိုရင်၊ သူတို့က လူ့လောက နယ်မြေကိုးခုကို လုယူဖို့အတွက် မိစ္ဆာတွေနဲ့ ပြန်ပေါင်းကောင်း ပေါင်းကြလိမ့်မယ်"

ဤသို့ တွေးမိသောအခါ ဖန့်ချန်သည် လူသားမျိုးနွယ် ရင်ဆိုင်နေရသော အခက်အခဲမှာ မိစ္ဆာမျိုးနွယ် တစ်ဖက်တည်း မဟုတ်ဘဲ နတ်ဆိုးမျိုးနွယ်ပါ ပါဝင်နေကြောင်း နားလည်လိုက်သည်။ ထိုနှစ်ဖက်လုံးမှာ အမှောင်ထဲတွင် ပုန်းကွယ်နေကြပြီး၊ အပေါ်ယံ အင်အားမှာပင် လူသားမျိုးနွယ်ထက် သိပ်မလျော့လှချေ။

မိစ္ဆာမျိုးနွယ်ဘက်တွင် အဆင့် ၉ ကျန်းမို မည်မျှရှိသည်ကို စောင့်ကြည့်ရပေမည်။

"နတ်ဆိုးမသေမျိုးတပ်ဖွဲ့ အကြောင်းကို ထပ်ပြောပါဦး၊ အဲဒီတုန်းက ဘယ်လို အင်အားစုတွေ ပါဝင်ခဲ့လဲ၊ ဥပမာ ဓာတ်ကြီးငါးပါးဂိုဏ်း တို့၊ ရုလိုင်ကျောင်းတော် တို့လိုမျိုးပေါ့"

ဖန့်ချန်က တည်ငြိမ်စွာ မေးလိုက်သည်။

နတ်ဆိုးရွာလူကြီးက ရိုးရိုးသားသားပင် ဖြေကြားရှာသည်။

မကြာမီတွင် ဖန့်ချန်၏ လက်ထဲ၌ ထိုစဉ်က မဟာမိတ်တွင် ပါဝင်ခဲ့သော အင်အားစု စာရင်းတစ်ခု ရရှိလာတော့သည်။ သို့သော် သူ ကြားဖူးသည့် အဖွဲ့အစည်းတစ်ခုမျှ မပါဝင်ချေ၊ အချိန်ကာလ ရှည်လျားလှသဖြင့် လုံးဝ ဆုတ်ယုတ် ပျောက်ကွယ်သွားခဲ့ကြပြီ ဖြစ်နိုင်၏။

"ခင်ဗျားတို့လည်း သိတာရှိရင် ပြောကြဦး၊ ဘာမှ ဖုံးကွယ်မထားနဲ့"

ဖန့်ချန်က ကျန်ရှိသော နတ်ဆိုးများကို ကြည့်ကာ ပြောလိုက်သည်။

မည်မျှကြာသွားသည် မသိရသော်လည်း၊ ထိုနတ်ဆိုးများမှာ သူတို့ သိသမျှ အချက်အလက်အားလုံးကို အကုန်အစင် ထုတ်ဖော်ပြောပြပြီးသွားပြီဟု အတည်ပြုနိုင်သောအခါ ဖန့်ချန်သည် ဓားငယ်လေးကို ခေါ်ဆောင်ကာ ထိုနေရာမှ ထွက်ခွာခဲ့သည်။

သူသည် မျက်လုံးများကို ဖွင့်လိုက်ရာ၊ သူ၏ ခန္ဓာကိုယ်အတွင်းရှိ မသေမျိုးစွမ်းအင် များမှာ အရှိန်အဟုန်ဖြင့် လှုပ်ရှားနေပြီး အဆင့် ၂ ထက် အဆပေါင်းများစွာ သာလွန်နေပြီ ဖြစ်သည်။

"ဒီတစ်ခေါက်တော့ အချိန်အတော်ယူရမယ်လို့ ထင်ထားတာ၊ လူ့လောက ဓားနယ်မြေက ဒီစီနီယာကြီး ချန်ထားခဲ့တဲ့ နတ်ဆိုးနှိမ်နင်းခြင်း ဓားနယ်မြေကို လုံးဝ လွှမ်းမိုးသွားလိမ့်မယ်လို့ မထင်ထားဘူး"

ဖန့်ချန်၏ ခန့်မှန်းချက်အရ အပြင်လောကတွင် အချိန် တစ်နှစ်ခွဲခန့်သာ ကုန်လွန်သွားခဲ့ပုံရသည်။

ဓားငယ်လေးကို ကြည့်လိုက်ရာ သူမ၏ အရှိန်အဝါမှာလည်း ယခင်ကထက် များစွာ ပိုမို အားကောင်းလာခဲ့ပြီ ဖြစ်သည်။ ဖန့်ချန် အဆင့် ၃ ဓားမသေမျိုးသို့ တက်လှမ်းသွားပြီးနောက် သူမသည်လည်း အဆင့်တက်သွားခဲ့ခြင်း ဖြစ်သည်။

အကယ်၍ အမှားအယွင်း မရှိပါက၊ ဝိညာဉ်ရတနာ စာရင်း တွင် ဓားငယ်လေး၏ အဆင့်မှာ ပိုမို မြင့်တက်သွားပေလိမ့်မည်။

ဖန့်ချန်က စိတ်လှုပ်ရှားစွာဖြင့် လူ့လောက ဓားနယ်မြေကို ဖြန့်ကျက်လိုက်ရာ ၎င်းမှာ ရေစီးကဲ့သို့ ပျံ့နှံ့သွားတော့သည်။

ခဏချင်းမှာပင် အဝေးတွင် ရွာလေးတစ်ရွာ ပေါ်လာခဲ့သည်။ ၎င်းမှာ ယခင်က နတ်ဆိုးနှိမ်နင်းခြင်း ဓားနယ်မြေထဲတွင် ရှိခဲ့သော နတ်ဆိုးရွာလေးပင် ဖြစ်သည်။

ယခုအခါတွင်မူ ထိုရွာလေးသည် လူ့လောက ဓားနယ်မြေအတွင်းသို့ ပြောင်းရွှေ့ အခြေချသွားပြီ ဖြစ်သည်။

အခန်း (၁၅၈၈) - မသေမျိုးလောကငယ် သို့ ထွက်ခွာကြမည်လော

"ဖန့်ချန် ဓားနယ်မြေ က အရင်အတိုင်းပဲ ဘာမှမပြောင်းလဲသလိုပဲနော်"

ဓားငယ်လေးသည် ခဏမျှ အကဲခတ်ကြည့်ပြီးနောက် ပြောလိုက်သည်။

ဖန့်ချန်က အသာအယာ ခေါင်းညိတ်ကာ ပြုံးလျက် ဆိုသည်။

"လူ့လောက ရဲ့ ဓားနယ်မြေက အချို့သော ကဏ္ဍတွေမှာ နတ်ဆိုးနှိမ်နင်းခြင်း ဓားနယ်မြေထဲ့ အများကြီး ပိုအားကောင်းတယ်။ ဒါကြောင့် ဒီတစ်ခါက ပေါင်းစပ်တာမျိုး မဟုတ်ဘဲ တိုက်ရိုက် လွှမ်းမိုးပစ်လိုက်တာပဲ။ ငါ့ရဲ့ ဓားနယ်မြေထဲမှာ ဒီနတ်ဆိုးမသေမျိုး အုပ်စုတစ်စု ပိုတိုးလာသလိုမျိုးပေါ့"

"နောက်ဆို တိုက်ပွဲဖြစ်ရင် သူတို့ကိုပဲ တိုက်ရိုက် လွှတ်လိုက်လို့ ရတာပေါ့"

ဓားငယ်လေးက ရယ်မောရင်း ပြောသည်။

ဖန့်ချန်၏ စိတ်ထဲတွင် အတွေးတစ်ခု ပေါ်လာသည်။ အကယ်၍ ဓားနယ်မြေကို ထုတ်သုံးမှသာ အနိုင်ရမည့် ပြိုင်ဘက်မျိုးနှင့် တွေ့ပါက ထိုပြိုင်ဘက်၏ အစွမ်းမှာ အလွန်တရာ အားကောင်းနေပေလိမ့်မည်။ ထိုအခါတွင် ထိုနတ်ဆိုးမသေမျိုး အုပ်စုမှာလည်း ထိရောက်သည့် အကူအညီ ပေးနိုင်မည် မဟုတ်ချေ။

၎င်းတို့သည် စစ်မှန်သော အဆင့် ၃ နတ်ဆိုးမသေမျိုးများ မဟုတ်တော့ဘဲ အသက်မဲ့နေသော တည်ရှိမှုများ ဖြစ်နေသောကြောင့် သက်ရှိ အဆင့် ၃ ကျင့်ကြံသူများနှင့်မူ ကွာခြားချက် အနည်းငယ် ရှိပေလိမ့်မည်။

"ဒီကိစ္စတွေ ပြီးသွားပြီဆိုတော့ ငါတို့ ပြန်ကြစို့"

ကျွဲမင်နန်းတော်ယင်လောက၊ သံသရာဌာန

"ဝမ်အိုကြီး ဘယ်များ သွားနေတာလဲ မသိဘူး"

ဖန့်ချန်သည် စိတ်ထဲမှ တိုးတိုးလေး ရေရွတ်မိသည်။

မူလက ထိုဝတ်ရုံခရမ်းရောင်နှင့် ဖက်တီးအကြောင်းကို မေးမြန်းရန် ရှာဖွေခြင်းဖြစ်သော်လည်း ဝမ်အိုကြီးမှာ သံသရာဌာနတွင် ရှိမနေပေ။ ထို့ကြောင့် ထိုဖက်တီးအကြောင်းကို ယာယီအားဖြင့် မေးမြန်း၍ မရနိုင်တော့ချေ။ ဟွမ်ချင်းကျွဲ မှာကြားထားသည့် စကားကိုလည်း ပါးပေး၍ မရသေးပေ။

"ဝမ်အိုကြီးက အဆင့် ၈ ကို တက်လှမ်းဖို့အတွက် အခြေခံ အုတ်မြစ် မခိုင်မာသေးဘူး။ ပြီးတော့ အဆင့် ၈ မသေမျိုးဆေးပင်ဖြစ်တဲ့ ထိုက်ယီကြာစွယ် ကလည်း ရှေးဟောင်း နဂါးနတ်ဘုရား နန်းတော်မှာ ရှိနေတာ"

"ကျွဲမင်နန်းတော် ဘက်ကို သွားကြည့်လိုက်ဦးမယ်။ တကယ်လို့ အဲဒီမှာလည်း မရှိဘူးဆိုရင်တော့ တစ်ခုခု မှားနေပြီပဲ"

ဖန့်ချန်သည် စိတ်လှုပ်ရှားစွာဖြင့် လူ့လောကသို့ ပြန်လည်ဝင်ရောက်ကာ ကျွဲမင်နန်းတော်သို့ သွားရောက်၍ ဝမ်အိုကြီးကို ရှာဖွေတော့သည်။ တစ်ပတ်ပတ်ကြည့်သော်လည်း ဝမ်အိုကြီး၏ အရိပ်အယောင်ကို မတွေ့ရပေ။ နောက်ဆုံးတွင် ကျိကန်းကို သွားရောက် မေးမြန်းရာ ကျိကန်းပင်လျှင် ဝမ်အိုကြီး ဘယ်သွားသည်ကို မသိရှိချေ။

"ဖန့် အမာခံတပည့်... ဆရာသခင်က ကိစ္စရှိလို့ အပြင်သွားတာ ဖြစ်မှာပါ။ သူ့အလုပ်တွေ ပြီးရင်တော့ ပြန်လာမှာပါ"

ကျိကန်းက ပြောသည်။

"ကောင်းပြီ... သူပြန်လာရင် ထိုက်ရွှီစီနီယာကို အသိပေးလိုက်ပါ။ ဒါမှမဟုတ် တုန်းရှန်းနိုင်ငံ ရဲ့ လူသားဘိုးဘေးတောင် မှာ လာခေါ်ခိုင်းလိုက်ပါ"

ဖန့်ချန်က ခေါင်းညိတ်လိုက်သည်။

ဖန့်ချန် ထွက်ခွာတော့မည်ကို မြင်သောအခါ ကျိကန်းက စပ်စုသည့် အမူအရာဖြင့် မေးလိုက်သည်။

"ဖန့် အမာခံတပည့်... ကျိ အမာခံတပည့် က အခု အစီရင်မသေမျိုးအတတ် ကို နားလည်သွားပြီဆိုတော့ စီနီယာ သွားပြီး ဂုဏ်မပြုဘူးလား အခုပဲ အမာခံတပည့် ချန် က သူ့အတွက် ဂုဏ်ပြုစားပွဲ ကျင်းပပေးနေတာလေ။ သူ ကျွဲမင်နန်းတော်ရဲ့ နံပါတ် ၁၀ အမာခံတပည့် ဖြစ်လာတာကို ဂုဏ်ပြုတာပေါ့"

"ကျိရှန့်က အစီရင်မသေမျိုးအတတ်ကို နားလည်သွားပြီ ဟုတ်လား အခုလေးတင် အမာခံတပည့် အတော်များများ စုပြီး သွားနေကြတာကို ငါ မြင်လိုက်သလိုပဲ"

ဖန့်ချန် အနည်းငယ် အံ့သြသွားသည်

"ဒါပေမဲ့ သူက တာ့လေယင် မှာ စောင့်ကြပ်နေရတာ မဟုတ်လား ကျွဲမင်နန်းတော်ကို ပြန်လာချင်ရင်တောင် အဲဒီလောက် မမြန်နိုင်ပါဘူး။ ကြားထဲက ခရီးကတင် နှစ်ပေါင်းများစွာ ကြာမှာလေ"

"ကျိ အမာခံတပည့် နားလည်သွားတဲ့ အစီရင်မသေမျိုးအတတ်က လျှို့ဝှက်ရွေ့လျားခြင်း နဲ့ ပတ်သက်နေပုံရတယ်။ ဒါကြောင့် သူ ဒီတစ်ခါမှာ တာ့လေယင်ကနေ ဆယ်နှစ်ကျော်အတွင်းမှာပဲ ပြန်ရောက်လာနိုင်တာ"

ကျိကန်း၏ မျက်နှာတွင် အားကျသည့် အမူအရာ ပေါ်လွင်နေသည်။

သူသည် တာ့လေယင်သို့ ရောက်ဖူးသဖြင့် ဤအချက်သည် မည်မျှ ထူးခြားကြောင်း ကောင်းကောင်း သိရှိသည်။ မူလက လူအများ အသွားအပြန် ခရီးစဉ်အတွက်ပင် နှစ်ပေါင်း နှစ်ရာ၊ သုံးရာ ကုန်ဆုံးခဲ့ရသည်။

ဤသည်မှာ ကျိရှန့်၏ မသေမျိုးလှေ ခရီးနှင်သည့် အမြန်နှုန်းမှာ အခြား အမာခံတပည့်များထက် အဆပေါင်းများစွာ သာလွန်သွားပြီဟု ဆိုလိုခြင်းပင် ဖြစ်သည်။

"ဒါကြောင့်ကိုး... အဲဒါဆိုလည်း အတူတူ သွားပြီး ဂုဏ်ပြုပေးကြတာပေါ့"

ဖန့်ချန်သည် ကျိကန်းကို ခေါ်ဆောင်ကာ စားပွဲကျင်းပရာသို့ ပျံသန်းသွားတော့သည်။

သူကိုယ်တိုင်လည်း စပ်စုချင်နေမိသည်။ ထိုစဉ်က ကျိထျန်းကျွင်း သည် ကျိရှန့်ကို မည်သည့် နည်းစနစ်များ သင်ကြားပေးလိုက်သဖြင့် ကျိရှန့်က ဤမျှ အလျင်အမြန်ပင် အစီရင်အတတ်ကို နားလည်သွားရသနည်း။

လမ်းခရီးတွင် ဖန့်ချန်နှင့် ကျိကန်းတို့သည် နန်မင်ရုယွဲ့ နှင့် လီရှမ်းဇီ တို့ကို တွေ့ဆုံခဲ့သည်။

"ကိုးယောက်မြောက်... မင်းလည်း ကျိရှန့်ကို ဂုဏ်ပြုဖို့ သွားနေတာလား"

လီရှမ်းဇီ က ပြုံးလျက် မေးသည်။

"ဟုတ်ကဲ့... စီနီယာအစ်ကိုတို့ရောပဲလား"

ဖန့်ချန်က မေးသည်။

"နံပါတ် ၁၀ က ဒီတစ်ခါ အစီရင်မသေမျိုးအတတ်ကို နားလည်သွားတော့ နန်းတော်ရဲ့ အခြေခံ အုတ်မြစ်ကလည်း ပိုခိုင်မာသွားတာပေါ့။ ဒါက ဝမ်းသာစရာ ကိစ္စပဲ"

နန်မင်ရုယွဲ့က ဝမ်းမြောက်စွာ ဆိုသည်

"ငါတို့ အတူတူ သွားကြတာပေါ့"

လေးဦးသား အတူတူ သွားကြရာ မကြာမီပင် စားပွဲကျင်းပရာသို့ ရောက်ရှိသွားသည်။ ချန်အင်ရွှယ် သည် သူတို့ကို မြင်သောအခါ ချက်ချင်းပင် လက်လှမ်းပြ၍ ပြုံးကာ ခေါ်လိုက်သည်။

"ငါးယောက်မြောက်၊ ရှစ်ယောက်မြောက်၊ ကိုးယောက်မြောက်... လာကြ၊ လာကြ၊ နံပါတ် ၁၀ နဲ့ အသစ်တစ်ဖန် ပြန်ပြီး မိတ်ဆက်ထားကြဦး"

ချန်အင်ရွှယ်၏ အနီးတွင် အမာခံတပည့် အုပ်စုကြီး ထိုင်နေကြသည်။ ကျိရှန့်သည် ယခုအခါ လူအများ၏ အာရုံစိုက်ခြင်းကို ခံနေရသည့် အဓိက ဇာတ်ဆောင်ဖြစ်နေပြီး လူအများ၏ ဂုဏ်ပြုခြင်းနှင့် ချီးကျူးခြင်းများကို ရရှိနေသည်။ ဖန့်ချန်တို့ သုံးဦး ရောက်ရှိလာသည်ကို မြင်သောအခါ ကျိရှန့်၏ မျက်ဝန်းတွင် ပြုံးရိပ်တစ်ခု ချက်ချင်း ပေါ်လာသည်။

ကျိရှန့်၏ နောက်ကွယ်ရှိ ကျိထျန်းကျွင်းသည် ဖန့်ချန်ကို ရှုပ်ထွေးသော အကြည့်တစ်ချက်ဖြင့် ဝေ့ကြည့်လိုက်သည်။ ဖန့်ချန်သည်လည်း ၎င်းကို သတိထားမိလိုက်သည်။

"ဟင် အဆင့် ၄ မသေမျိုး ဖြစ်သွားပြီလားဘယ်လို လမ်းစဉ်ကို သုံးလိုက်တာလဲ"

ဖန့်ချန် စိတ်ထဲမှ အံ့သြသွားသည်။

ကျိထျန်းကျွင်း၏ အရှိန်အဝါမှာ အဆင့် ၄ မသေမျိုး အရှင်သခင် အဆင့်သို့ ရောက်ရှိနေပြီ ဖြစ်သည်။ သူသည် ယခင်က အညစ်ကြေးကင်းစင်သော လမ်းစဉ် ကို လျှောက်လှမ်းရန် ကြိုးစားသော်လည်း ကျရှုံးခဲ့သည်။ တောက်ပလောကမသေမျိုး လမ်းစဉ် မှာလည်း ကျရှုံးခဲ့ပုံရသည်။

"နံပါတ် ၁၀... ဒီတစ်ခါ မင်းကို ဂုဏ်ပြုပါတယ်၊ အားလုံးကို ဝေမျှပေးဖို့ အတွေ့အကြုံလေးတွေ ရှိရင် ပြောပြပါဦး"

နန်မင်ရုယွဲ့သည် နေရာတွင် ထိုင်လိုက်ပြီးနောက် ကျိရှန့်ကို ကြည့်ကာ ပြုံးလျက် မေးလိုက်သည်။

"ကျွန်တော့်မှာ ဘာအတွေ့အကြုံ ထူးထူးခြားခြား ရှိမှာလဲ၊ နှစ်ပေါင်းများစွာ ကြိုးစားကျင့်ကြံခဲ့တာတွေ စုမိလာပြီး တစ်နေ့မှာ ရုတ်တရက် နားလည်သွားတာပါပဲ"

ကျိထျန်းကျွင်းက အနည်းငယ် နှိမ့်ချစွာ ပြုံးပြီးနောက် ဖန့်ချန်ကို လှမ်းကြည့်လိုက်သည်။

"အတွေ့အကြုံအကြောင်း ပြောမယ်ဆိုရင်တော့ အမာခံတပည့် ဖန့် ကိုပဲ မေးရမှာပါ။ အဲဒီတုန်းက တာ့လေယင် တိုက်ပွဲမှာ ဖန့် အမာခံတပည့်က အစီရင် မသေမျိုးအတတ် နှစ်မျိုးကို တစ်ပြိုင်နက်တည်း နားလည်သွားတာက ကျွန်တော့်အတွက်လည်း တကယ့်ကို တွန်းအားတစ်ခု ဖြစ်ခဲ့ရတာပါ"

လူအများမှာ သူ၏ စကားကို ထောက်ခံပြီး ဖန့်ချန်အကြောင်းကို ဝိုင်းမေးကြရာ စကားဝိုင်းမှာ မပြီးနိုင် မစီးနိုင် ဖြစ်သွားတော့သည်။ ကျိရှန့်သည် ထိုမြင်ကွင်းကို မြင်သောအခါ မျက်နှာပျက်သွားသော်လည်း ဘာမှ ဝင်မပြောနိုင်ဘဲ တိတ်ဆိတ်စွာသာ နေလိုက်ရသည်။

"ဒါနဲ့ ကိုးယောက်မြောက်... ငါတို့ ခုနက မသေမျိုးလောငယ် အကြောင်း ပြောနေကြတာ။ မင်း အဲဒီကို ရောက်ဖူးလား"

ချန်အင်ရွှယ်က ရုတ်တရက် မေးလိုက်သည်။

မသေမျိုးလောကငယ်...

ဖန့်ချန်သည် စိတ်လှုပ်ရှားသွားပြီး အသာအယာ ခေါင်းခါလိုက်သည်။

"ကြားပဲ ကြားဖူးတာပါ၊ ရောက်တော့ မရောက်ဖူးဘူး။ အဲဒီနယ်မြေရဲ့ အဝင်အထွက်တွေကို အထူးစောင့်ကြပ်ထားပြီး သာမန် ကျင့်ကြံသူတွေ ဝင်ခွင့်မရှိဘူးလို့ ကြားဖူးတယ်"

နန်မင်ရုယွဲ့နှင့် လီရှမ်းဇီ တို့လည်း အံ့သြသွားကြသည်။ ချန်အင်ရွှယ်သည် အကြောင်းမရှိဘဲ ဤနယ်မြေအကြောင်းကို ပြောမည် မဟုတ်ပေ။ သူတို့ နှစ်ဦးစလုံး ကျိရှန့်ကို တစ်ချက် လှမ်းကြည့်လိုက်ကြသည်။ ထိုနေရာတွင် ကျိရှန့်နှင့် သူ၏ ညီအစ်ကိုဝမ်းကွဲ ကျိထျန်းကျွင်းတို့ နှစ်ဦးသာ မသေမျိုးလောကငယ် ဇာတိ ဖြစ်ကြသည်။

"အဲဒါဆိုရင် ကွက်တိပဲ၊ မင်း ပြန်သွားပြီး ပြင်ဆင်စရာရှိတာတွေ ပြင်ထားလိုက်ဦး။ ငါတို့ နောက်နှစ်ပေါင်း ငါးဆယ်လောက်နေရင် မသေမျိုးလောကငယ် ကို သွားကြမယ်၊ မင်းလည်း အတူတူ လိုက်ခဲ့ရမယ်"

ချန်အင်ရွှယ်က ပြုံးလျက် ဆိုသည်။

"မသေမျိုးလောငယ် ကို သွားမယ် ဟုတ်လား"

ဖန့်ချန် အနည်းငယ် ကြောင်သွားသည်။

နန်မင်ရုယွဲ့က စပ်စုကာ မေးသည်

"စီနီယာအစ်မ... ဒီတစ်ခါ အဲဒီကို ဘာသွားလုပ်မှာလဲ"

"နံပါတ် ၁၀ က အဲဒီနယ်မြေ ဇာတိ မဟုတ်လား သူ ဒီတစ်ခါ အစီရင် မသေမျိုးအတတ်ကို နားလည်သွားတာဆိုတော့ ဂုဏ်ရှိရှိနဲ့ အိမ်ပြန်ရမှာပေါ့"

ချန်အင်ရွှယ်က ဆိုသည်။

လီရှမ်းဇီက ခါးသီးစွာ ပြုံးလိုက်သည်

"စီနီယာအစ်မ... တခြား အကြောင်းရင်းတွေလည်း ရှိနေဦးမယ် မဟုတ်လား"

ချန်အင်ရွှယ်က ကျိရှန့်ကို တစ်ချက်ကြည့်လိုက်ကာ

"မင်းကိုယ်တိုင်ပဲ ပြောလိုက်တော့"

"စီနီယာအစ်ကို ၅ နဲ့ စီနီယာအစ်ကို လီ... အမှန်က ကျွန်တော်တို့ ကျိမျိုးနွယ်စုက မသေမျိုးလောကငယ် မှာ အခက်အခဲအချို့နဲ့ တွေ့နေလို့ပါ။ ဒါကြောင့် ကျွန်တော်က စီနီယာအစ်မကို အကူအညီတောင်းပြီး လိုက်လံ ညှိနှိုင်းပေးဖို့ တောင်းဆိုထားတာပါ"

ကျိရှန့်က ခါးသီးစွာ ပြုံးလျက် ဝန်ခံသည်။

လူအများမှာ အံ့အားသင့်သွားကြသည်။

"ကျိ အမာခံတပည့်... မင်းရဲ့ မိသားစုကို ဒုက္ခပေးနေတဲ့သူတွေက မင်း ကျွဲမင်နန်းတော်ရဲ့ အမာခံတပည့် ဖြစ်နေတာကို မသိကြဘူးလား "

"ဒါက ငါတို့ကို လုံးဝ အထင်မသေးရာ မရောက်ဘူးလား "

"ဘာတွေ အော်နေကြတာလဲ ကျွဲမင်နန်းတော်ရဲ့ အမာခံတပည့် ဖြစ်နေရင်ရော ဘာဖြစ်လဲ မသေမျိုးလောကငယ်က နယ်မြေပဲ၊ နယ်မြေကိုးခုက နယ်မြေကိုးခုပဲ။ ပုံမှန်ဆိုရင် တစ်ခုနဲ့တစ်ခု ဘာမှ မသက်ဆိုင်ကြဘူး။ သူတို့က ဘာဖြစ်လို့ ကျွဲမင်နန်းတော်ရဲ့ မျက်နှာကို ကြည့်နေရမှာလဲ"

ချန်အင်ရွှယ်က မျက်စောင်းထိုးကာ ပြောလိုက်သဖြင့် လူအများမှာ တိတ်ဆိတ်သွားပြီး ဘာမှ မပြောရဲတော့ချေ။

"ဒါပေမဲ့... တိုက်တိုက်ဆိုင်ဆိုင် ငါလည်း မသေမျိုးလောကငယ် ကို မရောက်တာ နှစ်အတော်ကြာပြီ။ အခု နံပါတ် ၁၀ ရဲ့ မိသားစုက အခက်အခဲ တွေ့နေတယ်ဆိုတော့ ငါ လိုက်သွားပြီး သူတို့အတွက် အားကိုးရာ ဖြစ်ပေးရမှာပေါ့"

ချန်အင်ရွှယ်က ပြုံးလျက် ဆိုသည်။

"စီနီယာအစ်မကို ကျေးဇူးအများကြီး တင်ပါတယ်... ဒါပေမဲ့ စီနီယာအစ်မ တစ်ယောက်တည်း သွားရင်ပဲ လုံလောက်နေပါပြီ။ ဖန့် အမာခံတပည့်ကိုပါ ထပ်ခေါ်နေရင် သူ့ရဲ့ ကျင့်ကြံမှုကို နှောင့်နှေးသွားစေမလားလို့..."

ကျိရှန့်က ပြောရင်း ဖန့်ချန်ကို တစ်ချက် လှမ်းကြည့်လိုက်သည်။

"ဘာကို နှောင့်နှေးမှာလဲ သူ အခု အဆင့် ၃ မသေမျိုး ဖြစ်သွားပြီဆိုတာ မမြင်ဘူးလား"

ချန်အင်ရွှယ်က လှောင်ပြုံးဖြင့် ဆိုလိုက်သည်။

အဆင့် ၃ မသေမျိုး ဖြစ်သွားပြီ ဟုတ်လား

လူတိုင်းမှာ အံ့အားသင့်သွားကြပြီး သူတို့၏ မျက်ဝန်းများတွင် ထိတ်လန့်ရိပ်များ ပေါ်လွင်လာသည်။ ကျိကန်း၊ နန်မင်ရုယွဲ့ တို့ပင်လျှင် ဖန့်ချန်ကို မယုံကြည်နိုင်သလို အကြိမ်ကြိမ် လှမ်းကြည့်နေကြတော့သည်။