အခန်း (၂၅၁-၂၅၂)

အခန်း ၂၅၁

- အပိုင်း ၄၇ - မိစ္ဆာဘုရင်ရွေးချယ်ပွဲ (၅)

ကျနော်တို့တွေ မကြာမီမှာပင် ယူဂျွန်ဟော့ စက်မှုဇုန် (ယခင် စစ်ဝစ်ဇ်သို့ ရောက်ရှိသွားခဲ့သည်။

လမ်းခရီးတစ်လျှောက်တွင် ယူဂျွန်ဟော့ က မည်သည့်စကားမျှ မပြောခဲ့သကဲ့သို့ စက်မှုဇုန်သို့ ရောက်ရှိလာပြီးနောက်တွင်လည်း ထိုနည်းတူပင် ပြုမူခဲ့သည်။ အဆင့်-X ဖာရာရီဂီနီ ကားစက်သတ်လိုက်သည့်ခဏတွင်တော့ ယူဂျွန်ဟော့ က ကားပေါ်မှ ဆင်းလိုက်ပြီး ကျနော့်ကို ပြောခဲ့သည်။

"အခုကစပြီး ငါက သီးခြားစီ လှုပ်ရှားမယ်"

" ရွေးချယ်ပွဲအတွက်တော့ မင်းဟာ ရောက်လာမှာ မလား"

ယူဂျွန်ဟော့က ခေါင်းညိတ်ပြခဲ့ပြီးနောက်တွင်တော့ ခြေလှမ်းများကို လှမ်းကာ မြင်ကွင်းထဲမှ ပျောက်ကွယ်သွားခဲ့၏။ သူသည် မည်သည့်နေရာသို့ သွားရမည်၊ မည်သည့်အရာကို လုပ်ဆောင်ရမည်ကို သိရှိနေပုံရသည်။ ကျနော် သေချာပေါက် သိရှိနေမိသည့် အရာတစ်ခုကတော့ သူ၏ မြင်ကွင်းထဲတွင် ရှိနေသမျှ အရာအားလုံးကို သူက ချေမှုန်းပစ်ပေလိမ့်မည်။

"သူ့ကို မတားတော့ဘူးလား"

ဂျန်ဟာယောင်း ၏ မေးခွန်းကို ကျနော် ခေါင်းညိတ်ပြလိုက်သည်။ မည်သို့ပင်ဖြစ်စေ ယူဂျွန်ဟော့ က ကျနော့်စကားကို နားမထောင်ဘူးဆိုသည့် အချက်အပေါ်တွင် အခြေခံ၍ အစီအစဉ်တစ်ခုကို ကျနော် ဆွဲထားခဲ့ခြင်း ဖြစ်သည်။ ယူဂျွန်ဟော့ အနေဖြင့် မိစ္ဆာဘုရင် ရွေးချယ်ပွဲအထိ ဘေးကင်းလုံခြုံစွာ အသက်ရှင်နေရန်သာ လိုအပ်၏။

အရေးကြီးဆုံး အရာမှာ ယခု ကျနော် ဘာလုပ်ရမလဲဆိုသည့် အချက်ပင် ဖြစ်သည်။ အသေးအဖွဲ လုပ်ငန်းစဉ်များကို ကျနော် လျစ်လျူရှုလိုက်ပြီး အိုင်လင်း ၏ ကောင်စီခန်းမဆီသို့ တိုက်ရိုက် ဦးတည်ခဲ့သည်။

"မတွေ့ရတာ ကြာပြီနော်"

အိုင်လင်း နှင့်ကျနော် မတွေ့ဖြစ်ခဲ့သည်မှာ အချိန်အတော်ကြာခဲ့ပြီ ဖြစ်ပြီး အိုင်လင်းသည် အလုပ်များလှသော စက်မှုဇုန်ကြောင့် လူပင် ပိန်ကျသွားခဲ့၏။

အိုင်လင်းက သူ၏ မျက်မှန်ကို ပင့်တင်လိုက်ပြီး အစီရင်ခံစာတစ်ခုကို တင်ပြခဲ့သည်။

"စော်ဘွားကြီး ထွက်သွားကတည်းက တခြားစက်မှုဇုန်တွေနဲ့ ရုန်းကန်နေခဲ့ရတာ။ အဖွဲ့သားတွေကတော့ အခြေအနေကို ကောင်းကောင်း ကိုင်တွယ်နိုင်ကြပါတယ်"

"အဖွဲ့သားတွေ ဟုတ်လား"

"ယူဂျွန်ဟော့ ရဲ့ အဖွဲ့သားတွေလေ။ ရှင် မသိဘူးလား။ မနက်တိုင်း 'ငါက ယူဂျွန်ဟော့' လို့ အော်ဟစ်ပြီး လမ်းလျှောက်နေတဲ့ လူတွေ ရှိတယ်။ အဲဒီအဖွဲ့က ရှင်မထွက်သွားခင်လေးမှာတင် တည်ထောင်ခဲ့တာ။ ရှင် မြင်ဖူးမှာ မဟုတ်ဘူး"

သူတို့တွေလား။ လဖွတ်ပဲ။

ထိုနေ့က အော်ဟစ်သံများကို ယခုအထိ ကြားနေရဆဲဟု တစ်ခါတစ်ရံတွင် ကျနော် တွေးထင်မိသည်။

အိုင်လင်းက ခေါင်းကို ခါယမ်းလိုက်ပြီး ဆက်ပြောသည်။

"အခုလတ်တလောတော့ 'ပြစ်ဒဏ်ပေးသူ' ရဲ့ နောက်လိုက်အုပ်စုတစ်ခု ပေါ်ပေါက်လာတယ်"

"ပြစ်ဒဏ်ပေးသူက မည်သူမည်ဝါဖြစ်ကြောင်း ပေါ်ပေါက်သွားပြီလား"

"မပေါ်သေးဘူး။ စော်ဘွားကြီး ထွက်သွားပြီး သိပ်မကြာခင်မှာတင် ပြစ်ဒဏ်ပေးသူက ရုတ်တရက် ပျောက်ကွယ်သွားခဲ့တာ"

"ပျောက်ကွယ်သွားတယ် ဟုတ်လား"

ကျနော့် နှလုံးသားထဲတွင် ထူးဆန်းသော ခံစားချက်တစ်ခု ဝင်ရောက်လာခဲ့သည်။ ကျနော့်တွင် အတွေးတစ်ခု ရှိနေခဲ့သော်လည်း ထိုအတွေးမှာ မဖြစ်နိုင်သောအရာပင် ဖြစ်၏။ ကျနော် မည်သို့ပင် တွေးတောနေပါစေ ထိုကဲ့သို့သော အရာမျိုး အမှန်တကယ် ဖြစ်လာရန်မှာ မဖြစ်နိုင်သောအရာပင် ဖြစ်၏။

အိုင်လင်းက သက်ပြင်းကိုအသာအယာချလိုက်သည်။

"ကျမ ဘာလို့ ရှင့်ဆီကို ဆက်ပြီး အစီရင်ခံနေရလဲဆိုတာ မသိတော့ဘူး။ ဒီစက်မှုဇုန်ရဲ့ ပိုင်ရှင်က ယူဂျွန်ဟော့လေ"

" ဘာပဲဖြစ်ဖြစ်...အဲဒါက အရေးမကြီးပါဘူး"

"စော်ဘွားကြီး အနေနဲ့ အခု ကိုယ်ပိုင်တဲ့ စက်မှုဇုန်ဆီကို သွားသင့်ပြီ"

ဤစက်မှုဇုန်မှာ ကျနော့်၏ စက်မှုဇုန် မဟုတ်ပေ။ ကျနော်သည် မိစ္ဆာနယ်မြေ သို့ ပြန်လည် ရောက်ရှိလာခဲ့ပြီ ဖြစ်သောကြောင့် ကင်ဒေါ့ဂျာ စက်မှုဇုန် (ယခင် ဂီလိုဘတ်) ၏ လက်ရှိ အခြေအနေကို သွားရောက် စစ်ဆေးရမည် ဖြစ်သည်။ ကင်ဒေါ့ဂျာ စက်မှုဇုန်ကို မာ့ခ် ဆီတွင် ကျနော်အပ်နှံထားခဲ့သော်လည်း မည်သည့်အရာများ ဖြစ်ပျက်နေမည်ကို ကျနော် မသိရှိပေ။

ပြတင်းပေါက်မှတစ်ဆင့် စက်မှုဇုန်၏ ရှုခင်းကို ကျနော် စိုက်ကြည့်လိုက်မိသည်။ ဤနေရာသို့ ရောက်ရှိလာခဲ့ပြီးနောက်တွင် အဖြစ်အပျက်များစွာ ဖြစ်ပျက်ခဲ့၏။ ကျနော် နေရာမှ ထလိုက်ရာ အိုင်လင်း ကလည်း ကျနော်နှင့်အတူ ထလာခဲ့သည်။

"စော်... စော်ဘွားကြီး"

ကျနော် နောက်လှည့်ကြည့်လိုက်ရာ အိုင်လင်း ၏ မျက်နှာအမူအရာမှာ ထူးဆန်းနေခဲ့သည်။ သူ၏အမူအရာမှာ အေးစက်နေသလိုလို၊ ဝမ်းနည်းနေသလိုလို၊ စိတ်ပျက်နေသလိုလို ဖြစ်နေခဲ့သည်။ သို့သော်လည်း အိုင်ဟင်း စကားပြောလိုက်သည့် အချိန်တွင်တော့ အသံမှာ တည်ငြိမ်နေခဲ့သည်။ ကျနော်သည် Ways of Survival ထဲတွင် အိုင်လင်း အကြောင်းကို လေ့လာခဲ့ဖူးသဖြင့် အိုင်လင်းတစ်ယောက် ဤကဲ့သို့သော အသံမျိုး ပြုလုပ်သည့် အခါတိုင်းကို သိရှိနေခဲ့သည်။

အိုင်လင်းက ခဏတာမျှ မွှေနှောက်ရှာဖွေလိုက်ပြီးနောက်တွင်တော့ သေတ္တာငယ်လေးတစ်ခုကို ထုတ်ပေးခဲ့သည်။

"ဒါက ဟိုအရင်တုန်းက ရှင်တောင်းဆိုထားခဲ့တဲ့ အရာပါ"

ထိုသေတ္တာထဲတွင်တော့ နာရီငယ်လေးတစ်လုံး ပါဝင်နေခဲ့သည်။ ထိုနာရီလေးမှာ အလွန် သေးငယ်လှသော ပတ်လမ်းများဖြင့် ဒီဇိုင်းဖော်ထားသည့် အိတ်ဆောင်နာရီငယ်လေး တစ်လုံး ဖြစ်၏။ ထိုနာရီကို ကျနော်ကိုင်လိုက်သည့်အခါတွင်တော့ နာရီထံမှနေ၍ မသိသာသော တုန်ခါမှုတစ်ခုကို ခံစားလိုက်ရသည်။ နှေးကွေးသော်လည်း သေချာပေါက် ရွေ့လျားနေသော အချိန်ကို ကျနော် ခံစားလိုက်ရစဉ်မှာပင် အရာများစွာက ကျနော့်၏ စိတ်ထဲတွင် ဖြတ်သန်းသွားခဲ့သည်။

ဇာတ်လမ်း မိုးကုတ်စက်ဝိုင်း၊ တော်လှန်ရေးကစားပွဲ...

လက်လှမ်းမမီနိုင်သော နေရာတစ်ခုဆီသို့ ဆုတ်ခွာသွားခဲ့ကြသည့် အမှတ်တရများ အားလုံးမှာ တဂျောက်ဂျောက် မြည်ဟည်းနေခဲ့ကြသည်။

ထိုနာရီကို ကျနော်ခဏတာမျှ စိုက်ကြည့်နေမိသည်။ အိုင်လင်းကို နောက်တစ်ကြိမ် ကျနော် လှမ်းကြည့်လိုက်ရာ အိုင်လင်းက လက်ကောက်ဝတ် နှစ်ဖက်ကို ထပ်လျက် ကျနော့်ကို စိုက်ကြည့်နေခဲ့လေသည်။

"စော်ဘွား ယူဂျွန်ဟော့"

လက်ကောက်ဝတ် နှစ်ဖက်ကို ကြက်ခြေခတ်ပုံစံတင်ထားသော အမူအရာမျိုးကို အိုင်လင်းက ပြုလုပ်နေခြင်းဖြစ်သည်။ ဤသည်မှာ အိုင်လင်း နေထိုင်ခဲ့သည့် မွေးရပ်မြေဂြိုဟ် ဖြစ်သော လင်းဘာ့ဂ် မှ နှုတ်ဆက်ခြင်း အမူအရာ ဖြစ်လေသည်။ သွေးကြောနှစ်ခုကို ဖြတ်ကျော်လိုက်ပြီး တုန်ခါမှုများကို တစ်ဖက်လူဆီသို့ ပေးပို့ခြင်း ဖြစ်၏။ နာရီ၏ စက္ကန့်တံကလေး ရွေ့လျားနေသကဲ့သို့ပင် အိုင်လင်း၏ သွေးခုန်နှုန်းမှာ ကျနော့်ထံသို့ ကူးစက်လာခဲ့သည်။

"ဒီစက်မှုဇုန်က ရှင့်ကို မေ့လျော့သွားမှာ မဟုတ်ပါဘူး"

ကျနော်တို့သည် ယူဂျွန်ဟော့ စက်မှုဇုန်မှ ထွက်ခွာလာပြီးနောက်တွင်တော့ ကင်ဒေါ့ဂျာ စက်မှုဇုန်ဆီသို့ တိုက်ရိုက် ဦးတည်ခဲ့ကြသည်။ ပုံမှန်အတိုင်းခရီးသွားလျှင် တစ်ပတ်ခန့် ကြာမြင့်နိုင်သော်လည်း အဆင့်-X ဖာရာရီဂီနီ ၏ အင်ဂျင်စွမ်းအားကြောင့် နှစ်နာရီသာ ကြာမြင့်ခဲ့သည်။

ဘေးတွဲထိုင်ခုံတွင် ကျနော်ထိုင်ရင်း ဘေးဘီမှ ဖြတ်သန်းသွားသော ရှုခင်းများကို ကြည့်ကာ အိုင်လင်း ၏ စကားများကို တွေးတောနေမိသည်။ သူပြောပြခဲ့သည်မှာ ကျနော် မရှိခိုက်တွင် လာရောက်လည်ပတ်ခဲ့ကြသော ဧည့်သည်များအကြောင်း ဖြစ်ပြီး ၎င်းတို့ထဲတွင် ဒိုကဲဘီ တစ်ကောင်၊ အကျိတ်နှင့်လူ တစ်ယောက်နှင့် နက္ခတ်အချို့ ပါဝင်နေခဲ့သည်။ နက္ခတ်များမှာ သူတို့၏ ဘွဲ့အမည်များကို ချန်ထားခဲ့ခြင်း မရှိသဖြင့် ကျနော် ခန့်မှန်း၍ မရနိုင်ခဲ့ချေ။ အိုင်လင်း က မိစ္ဆာနယ်မြေ ထဲတွင် ကျနော့်ကို စောင့်ကြည့်နေကြသည့် အင်အားကြီးသူများ များပြားလှသဖြင့် သတိထားရန်လည်း မှာခဲ့သည်။

ထိုအချက်ကို အိုင်လင်း ပြောပြရန်ပင် မလိုဘဲ စနစ်၏ ချန်နယ်ကို ကြည့်လိုက်ရုံနှင့်ပင် သိရှိနိုင်ပေသည်။

[နက္ခတ်များစွာက သင်၏ လုပ်ဆောင်ချက်များကို အာရုံစိုက်နေကြပါသည်။]

[သင်၏ ဘွဲ့အမည်မှာ အကြွင်းမဲ့ မကောင်းဆိုးဝါး စနစ်၏ နက္ခတ်များအကြားတွင် ပျံ့နှံ့နေပါသည်။]

['မိစ္ဆာကဲ့သို့ မီးလျှံတရားစီရင်သူ' နက္ခတ်က သင့်အား စိုးရိမ်ပူပန်သော မျက်လုံးများဖြင့် စောင့်ကြည့်နေပါသည်။]

မိစ္ဆာဘုရင် ရွေးချယ်ပွဲရောက်ရန် သုံးရက်ပင် မလိုတော့ပေ။ ကားနောက်ခန်းတွင် ဖက်လျက် အိပ်ပျော်နေကြသော ဂျန်ဟာယောင်း နှင့် ကောင်းကင်ဖြိုခွင်းဓါးသခင် တို့ကို ကျနော်လှမ်းကြည့်လိုက်မိသည်။ ကောင်းကင်ဖြိုခွင်းဓါးသိုသခင် နှင့် ဂျန်ဟာယောင်း တို့သည် ပင်ပန်းနေကြပုံရ၏။

အထူးသဖြင့် ဂျန်ဟာယောင်း သည် ကျနော့်ကြောင့် အမည်မသိတံတိုင်းကို အတင်းအဓမ္မ အသုံးပြုခဲ့ရလေသည်။ သို့သော်လည်း သူတို့ ရှိနေခြင်းကြောင့်သာ ကျနော် တစ်ခုခုကို ကြိုးစားကြည့်ရန် တွေးတောနိုင်ခဲ့ခြင်း ဖြစ်၏။

ကျနော် ကားမောင်းသူနေရာကို လှမ်းကြည့်လိုက်ပြီး လှမ်းခေါ်လိုက်မိသည်။

"ဌာနမှူး ဟန်မြုံအို"

"ဟမ်"

ဟန်မြုံအို က အဆင့်-X ဖာရာရီဂီနီ ၏ စွမ်းဆောင်ရည်များကို စမ်းသပ်နေရင်းမှ ဇဝေဇဝါ ဖြစ်နေသော မျက်နှာအမူအရာဖြင့် လှမ်းကြည့်လာခဲ့သည်။ ကျနော့်၏ အကြည့်ကို သူ သတိထားမိသွား၍လားတော့ မသိသော်လည်း ဟန်မြုံအို က ချောင်းတစ်ချက် ဟန့်လိုက်သည်။

"အဟမ်း။ အဟမ်း…. ဘဝဆိုတာ မလွယ်ကူဘူးနော်"

ဟန်မြုံအို က ကျနော့်၏ ဇဝေဇဝါ ဖြစ်နေမှုကို မြင်သွားပြီး အလျင်အမြန်ပင် ဆက်ပြောလာခဲ့သည်။

"ငါ ဖြတ်သန်းလာတဲ့ ဘဝတစ်လျှောက်မှာ ခံစားခဲ့ရတာကတော့ ဘဝဆိုတာ ဒီလိုပဲ ဖြစ်သင့်တာလို့ပဲ ယူဆတယ်။ ဘာမှ မတတ်နိုင်တဲ့ အချိန်တွေ ရှိသလို အဆင်မပြေဖြစ်တတ်တဲ့ အချိန်တွေလည်း ရှိတာပဲလေ"

ဟန်မြုံအို ၏ မျက်နှာအမူအရာတွင် နွေးထွေးမှုအချို့ ပါဝင်နေခဲ့သည်။ စဉ်းစားကြည့်မှပဲ ဟန်မြုံအိုသည် ကိစ္စများစွာကို အမှန်တကယ် ကြုံတွေ့ခဲ့ရသည်။ တစ်နည်းအားဖြင့် သူသည် ကျနော့်ထက်ပင် ပို၍ ခက်ခဲသော အချိန်များကို ဖြတ်သန်းခဲ့ရပုံပင်။

ကျနော် ထိုအကြောင်းကို တွေးတောနေရင်းမှ ဟန်မြုံအို ကို တစ်ခုခု မေးမြန်းချင်စိတ် ပေါက်လာခဲ့သည်။

"ကျနော် ခင်ဗျားကို တစ်ခုလောက် မေးလို့ ရမလား"

"မေးချင်တာ မေးပါ"

ဤကမ္ဘာကြီးထဲတွင် ကလေးတစ်ယောက် မွေးဖွားပေးခဲ့သည့် ထိုလူသည် ယုံကြည်စိတ်ချရသော မျက်နှာအမူအရာမျိုးကို ပြုလုပ်နိုင်ခဲ့သည်။ ကျနော် ဘာပြောရမလဲဟု တွေးတောရင်း စမတ်ဖုန်းကို ထပ်ခါတလဲလဲ ဖွင့်လိုက် ပိတ်လိုက် လုပ်နေမိသည်။

ဟန်မြုံအို က ကျနော့်၏ လုပ်ရပ်များကို လက်ခံသည့်အလား ပြောလာခဲ့သည်။

"အင်း... အဲဒါက တကယ် နာကျင်ခဲ့ရတယ်"

"ဘာကို ပြောတာလဲ"

"အဲဒါက မင်း မေးချင်တဲ့ အရာလို့ ငါ ထင်မှတ်နေခဲ့တာ။ အဲဒါက ဘယ်ယောက်ျား ဒါမှမဟုတ် ဘယ်မိန်းမမဆို ခံနိုင်ရည်ရှိဖို့ ခဲယဉ်းတဲ့ နာကျင်မှုမျိုးပဲ"

ဟန်မြုံအို ဘာပြောလိုသည်ကို နားလည်သွားသည့် ခဏတွင်တော့ ကျနော် အံ့အားသင့်သွားခဲ့ရသည်။

မဟုတ်သေးပါဘူး၊ ငါက သူ့ကို အဲဒီအကြောင်း မေးမလို့ မဟုတ်ဘူးလေ...

သို့သော်လည်း ကျနော် စိတ်ဝင်စားမိသွားခဲ့သည်။

"ထွက်လာတော့ရော ဘယ်ကနေ ထွက်လာတာလဲ"

"ငါ့ရဲ့ နှလုံးသားထဲကနေ မွေးဖွားလာခဲ့တာပါ"

"နာကျင်ခဲ့ရလား"

ဟန်မြုံအို က ဆေးလိပ်တစ်လိပ်ကို ထုတ်ယူလိုက်ပြီး ရုတ်တရက်ဆိုသလို တည်ကြည်သော မျက်နှာအမူအရာမျိုး ပြုလုပ်လိုက်သည်။

"ပထမတော့ ငါ မင်းကို သတ်ပစ်မလို့ပဲ"

ခါးသီးလှသော ဆေးလိပ်ငွေ့များက ပြတင်းပေါက်မှတစ်ဆင့် အပြင်သို့ လွင့်ပျံသွားခဲ့သည်။

"အဲဒါက ရှက်ရွံ့စရာနဲ့ အရှက်ရစရာ ကောင်းခဲ့တာ။ ငါ အခြေအနေက ဘာလို့ ဒီလို ဖြစ်နေရတာလဲဆိုပြီး ဆွံ့အခဲ့ရတယ်"

"..."

"ဒရာမာရုပ်ရှင်တွေထဲမှာ ပါတဲ့ နည်းလမ်းတွေကို ငါ စမ်းသပ်ကြည့်ခဲ့သေးတယ်။ ဥပမာ ပဲငံပြာရည်တွေ အများကြီး သောက်တာမျိုးပေါ့။ ကြုံတွေ့နေရတဲ့အခြေအနေတွေကြောင့် ပဲငံပြာရည်တွေကို ရှာဖို့က မလွယ်ကူခဲ့ဘူး"

ဟန်မြုံအို ဆီမှ ဤဇာတ်ကြောင်းကို ကြားနေရသည်မှာ လက်တွေ့မဆန်သကဲ့သို့ ခံစားနေရသည်။ ကျနော့်အတွက်တော့ စိတ်ကူးကြည့်၍ပင် မရနိုင်လောက်သည့် အခက်အခဲမျိုး ဖြစ်၏။

"ငါ ကြောက်ခဲ့ရတယ်။ တကယ်လို့ ငါက မကောင်းဆိုးဝါးတစ်ကောင် မွေးဖွားပေးလိုက်ရင် ဘယ်လိုလုပ်မလဲ။ ကလေးက ငါ့ကို ပြန်စားပစ်ရင် ဘယ်လိုလုပ်မလဲ။ တစ်နေ့မှာ ရုတ်တရက်ဆိုသလို ငါ့ဗိုက်ကို ဖောက်ထွက်ပြီး ငါ့ကို သတ်ပစ်မလားဆိုပြီးတော့ပေါ့လေ..."

"..."

"ငါ တစ်ယောက်ထဲ ဖြတ်သန်းခဲ့ရတဲ့ ညပေါင်းများစွာမှာ စိုးရိမ်ပူပန်မှုတွေနဲ့အတူ ထွက်ပြေးခဲ့ရသလို သားရဲတွေကိုလည်း ရှောင်တိမ်းခဲ့ရတယ်။ ဒီကလေးကို ငါ ဘာလုပ်ရမလဲ။ သတ်ပစ်ရမလား၊ အသက်ရှင်ခွင့် ပေးရမလား၊ မွေးဖွားပေးရမလား ဒါမှမဟုတ်..."

ကျနော်သည် အနှိုင်းမဲ့စာဖတ်သူ၏ရှုထောင့် ကို အသုံးမပြုခဲ့သော်လည်း ဟန်မြုံအို ထွက်ပြေးတိမ်းရှောင်ခဲ့ရသည့် မြောက်မြားလှစွာသော ဇာတ်ဝင်ခန်းများမှာ ကျနော့်၏ ခေါင်းထဲတွင် ဖြတ်သန်းသွားခဲ့သည်။

ဟန်မြုံအို သည် ကျနော် တစ်ခါမျှ မမြင်ဖူးသော မျက်နှာအမူအရာမျိုးဖြင့် စကားပြောခဲ့သည်။

"ဒါတောင်မှ မင်း သိလား။ ရယ်စရာကောင်းတာက အဲဒီအကြောင်းကို တွေးနေရင်းနဲ့တင် လပေါင်းများစွာ ကုန်ဆုံးသွားခဲ့တယ်။ အဲဒီလို ရုန်းကန်နေရင်းနဲ့ပဲ ငါ အသက်ရှင်ကျန်ရစ်ခဲ့တယ်"

ဟန်မြုံအိုသည် အကြီးကျယ်ဆုံးသော ဇာတ်ဝင်ခန်းများမှ ရှင်သန်နိုင်ခဲ့ခြင်းမှာ အကြောင်းရင်း တစ်ခုတည်းကြောင့် ဖြစ်သည်။

"အဲဒီအချိန်မှာပဲ ငါ သဘောပေါက်လိုက်တယ်။ မဟုတ်မှလွဲရော ဒီကလေးက ငါ့ကို ကယ်တင်ခဲ့တာပဲ ဖြစ်မယ်။ ဒါကြောင့် ငါ ဆုံးဖြတ်လိုက်တယ်။ ငါ သေသည်ဖြစ်စေ ရှင်သည်ဖြစ်စေ ဒီကလေးကို မွေးဖွားပေးမယ်လို့ပေါ့"

သူက ဆေးလိပ်ကို ပြတင်းပေါက်မှတစ်ဆင့် ရုတ်တရက် လွှင့်ပစ်လိုက်သည်။ ဟန်မြုံအို သည် ဆေးလိပ်အသစ်တစ်လိပ်ကို ထပ်မံ ထုတ်ယူလိုက်ပြန်သည်။ ထိုခဏတာအတွင်းတွင် ဟန်မြုံအိုသည် အတိတ်သို့ ပြန်လည် ရောက်ရှိသွားပုံရပြီးမှ ပြန်လည် သတိဝင်လာခဲ့သည်။

ဟန်မြုံအို အကြောင်းကို ကျနော်ကောင်းကောင်း သိသည်။ သူသည် ကျနော် သိရှိထားသမျှသော လူဆိုးများစာရင်းတွင် သေချာပေါက် ပါဝင်နေသူတစ်ဦး ဖြစ်၏။ သို့သော်လည်း ဤခဏတွင်တော့ ဟန်မြုံအိုသည် လူကောင်းတစ်ယောက်ကဲ့သို့ ခံစားလိုက်ရသည်။

"ငါ့သမီးက အတိုင်းအဆမရှိ လှပတဲ့ ကလေးလေးတစ်ယောက်ပါ။ သူက လူသား မဟုတ်ပေမဲ့ မယုံနိုင်လောက်အောင် ချောမောလှပခဲ့တယ်"

"…ကျနော် ခင်ဗျားသမီးကို မြင်ဖူးပါတယ်"

ဟန်မြုံအို၏ကလေးမှာ အလွန် ချောမောလှပခဲ့သဖြင့် အက်စ်မိုးဒီအက်စ် က ထိုကလေးမကို သူ၏ ကိုယ်စားလှယ် ခန္ဓာကိုယ်အဖြစ် အသုံးပြုခဲ့ခြင်း ဖြစ်သည်။ ကျနော် ထိုသို့ တွေးတောနေစဉ်မှာပင် ဟန်မြုံအို ၏ မျက်နှာပေါ်မှ အပြုံးများ ပျောက်ကွယ်သွားခဲ့သည်။ ဇာတ်လမ်းက ကောင်းမွန်စွာ အဆုံးသတ်မသွားခဲ့သော်လည်း ဟန်မြုံအို ဘာပြောချင်လဲဆိုသည်ကို ကျနော် မြင်တွေ့နိုင်ခဲ့သည်။

ခဏအကြာတွင်တော့ ဟန်မြုံအိုက စကားကို ဆက်ပြောလေသည်။

"ဒါကြောင့် ဒေါ့ဂျာလည်း အဲဒါကို ကြိုးစားကြည့်သင့်တယ်"

"…ကျနော်က ကလေးမွေးဖို့ ကြိုးစားရမယ် ဟုတ်လား"

"မဟုတ်ပါဘူး။ ငါက ဒေါ့ဂျာအတွက် စိုးရိမ်လို့ပါ"

ကျနော့်ထံတွင် ခဏတာမျှ စူးရှသော ခံစားချက်တစ်ခု ဖြစ်ပေါ်သွားခဲ့သည်။ စမတ်ဖုန်း မျက်နှာပြင်ပေါ်တွင် ကျနော့်၏ ဇဝေဇဝါ ဖြစ်နေသော မျက်နှာက ပေါ်လာခဲ့သည်။

"ဒေါ့ဂျာ ဘာတွေ တွေးနေလဲဆိုတာ ငါ မသိဘူး။ အမှန်အတိုင်း ပြောရရင် အရင်တုန်းက ဒေါ့ဂျာကို ငါ သဘောမကျခဲ့ဘူး"

"အဲဒါကို သိရတာ ဝမ်းသာပါတယ်"

"ဒါပေမဲ့ မကြာသေးခင်ကစပြီး ဒေါ့ဂျာက တစ်မျိုး ဖြစ်နေတယ်လို့ ငါ ခံစားနေရတယ်"

ကျနော် နှုတ်ဆိတ်နေလိုက်မိသည်။

"အရာရာတိုင်းက အဆင်မပြေဖြစ်တတ်မှန်း ငါ သိပါတယ်။ အားလုံးက ကိုယ်ဖြစ်ချင်သလို ဖြစ်မလာနိုင်ဘူးလေ။ ဒါပေမဲ့ အဲဒါကို အရမ်း အာရုံမစိုက်ပါနဲ့။ မင်းရဲ့ နှလုံးသား ဦးဆောင်ရာနောက်ကိုပဲ လိုက်ပါ"

"…"

"ဘာတွေပဲ ဖြစ်ပျက်ခဲ့ပါစေ ရှင်သန်ခဲ့တာက ဒေါ့ဂျာပဲလေ။ တကယ်လို့ မင်းသာ လုပ်ဆောင်သင့်တာကို မှန်ကန်အောင် မလုပ်ဆောင်နိုင်ခဲ့ရင် နောက်ပိုင်းမှာ နောင်တရလိမ့်မယ်"

အမှန်တကယ်ပင် ကျနော်သည် အချိန်အတော်ကြာ အသက်ရှင်ခဲ့ပြီး ကမ္ဘာကြီးကို မြင်တွေ့ခဲ့ဖူးသော်လည်း ဤလူနှင့် ထပ်တူထပ်မျှ ခံစားရမည့် နေ့တစ်နေ့ ရောက်လာလိမ့်မည်ဟု မည်သည့်အခါမှ မမျှော်လင့်ထားခဲ့ချေ။

စမတ်ဖုန်း၏ LCD မျက်နှာပြင် ပွင့်လာခဲ့ပြီး Ways of Survival ၏ ဖိုင်က ပေါ်လာခဲ့သည်။

「 ပျက်စီးသွားသော ကမ္ဘာကြီးတွင် ရှင်သန်နိုင်မည့် နည်းလမ်း သုံးသွယ် (ဒုတိယအကြိမ် ပြင်ဆင်ချက်).txt 」

ကျနော့်ထံတွင် ဟန်မြုံအို ကဲ့သို့သော အတွေ့အကြုံများ မရှိခဲ့ချေ။ ကျနော့်ထံတွင် ကလေးတစ်ယောက် မရှိခဲ့ဖူးသကဲ့သို့ ကလေးယူရန်လည်း အစီအစဉ် မရှိ။ သို့သော်လည်း ဟန်မြုံအို ၏ ခံစားချက်များကို ကျနော် အနည်းငယ်တော့ နားလည်သကဲ့သို့ ဖြစ်နေခဲ့သည်။

ဒုတိယအကြိမ် ပြင်ဆင်ချက်ကို ဖတ်ရမလား၊ မဖတ်ရဘူးလား။

လွန်ခဲ့သော နာရီအနည်းငယ်အတွင်းတွင် ဤအရာကသာ ကျနော့်၏ အတွေးများကို ကြီးစိုးနေခဲ့သည်။

ထိုဝတ္ထုဗားရှင်းအသစ်ကို ကျနော်ဖတ်လိုက်ရခြင်းကြောင့် ထိခိုက်မှုများ ရှိလာမည်ကို ကြောက်ရွံ့နေခဲ့သည်။ ကျနော့်၏ အလုပ်ရလဒ်များကို အတည်ပြုရခြင်းမှာလည်း နာကျင်စရာ ကောင်းလှသည်။ ကျနော့်၏ 'အနာဂတ်' က တည်မြဲသွားမည်ကိုလည်း ကျနော် ကြောက်ရွံ့နေခဲ့သည်။

သို့သော်လည်း အခြေအနေက အစကတည်းက ရယ်စရာ ကောင်းနေခဲ့ပြီးဖြစ်၏။

ဟုတ်ပေသည်။ ဤဇာတ်လမ်းမှာ ကောင်းမွန်စွာ မွေးဖွားမလာသေးချေ။ ကျနော်သည် တွန့်ဆုတ်နေခြင်း မရှိဘဲ Ways of Survival ၏ ဖိုင်ကို ဖွင့်လိုက်သည်။ ထို့နောက်တွင်တော့ ကျနော် အမြဲတမ်း လုပ်ဆောင်နေကျအတိုင်း စတင်၍ ဖတ်ရှုလိုက်တော့သည်။

Ways of Survival ၏ ဒုတိယအကြိမ် ပြင်ဆင်ချက်မှာ စတုတ္ထအကြိမ်မြောက်မှ စတင်ခဲ့သည်။

「 အဲဒီအချိန်မှာ ဖြစ်ပျက်ခဲ့သလိုမျိုးပါပဲ။ တတိယအကြိမ်မှာတုန်းက သူသာ မရှိခဲ့ရင် အဲဒီမှာတင် ဆရာဟာ သေဆုံးသွားခဲ့ရမှာ 」

အချို့သော ဖော်ပြချက်များက ကျနော့်ကို စိတ်သက်သာရာ ရစေခဲ့သည်။

「 ဒါတောင်မှ ငါဟာ အဲဒါကို မပြောင်းလဲနိုင်ခဲ့ဘူး။ 」

အချို့သော ဖော်ပြချက်များမှာတော့ ယခုအထိ မပြောင်းလဲသေးချေ။

「 အဲဒီကောင်ဟာ ဒီအကြိမ်မှာ မရှိဘူး」

ကျနော်သည် ယူဂျွန်ဟော့ ၏ စတုတ္ထအကြိမ်မြောက် နောက်ပြန်ဆုတ်ခြင်း တွင် ရှိမနေခဲ့ချေ။

「 ငါဟာ တတိယအကြိမ်မှာ ကျရှုံးခဲ့တယ်။ ]

ကျနော်သည် ကြိုတင်၍ မျှော်လင့်ထားခဲ့ပြီး ဖြစ်သောကြောင့် ထိတ်လန့်သွားခြင်း မရှိခဲ့ချေ။ စာရေးသူက ကျနော့်ဆီကို ဘာလို့ ဒီလိုမျိုး ပေးပို့ခဲ့သလဲဆိုတာ ကျနော် မသိပေ။ေကျနော့်ကို ခြိမ်းခြောက်ရန် သို့မဟုတ် သူအလိုရှိသော ဇာတ်သိမ်းအတွက် ကျနော့်ကို အသုံးချရန် ဖြစ်ကောင်းဖြစ်နိုင်၏။ မူလကတည်းက ဤtxtကို ပေးပို့ခဲ့သူမှာ စာရေးသူ ဟုတ်မဟုတ်ကိုပင် ကျနော် မသိရှိခဲ့ချေ။

ကျနော် မျက်လုံးများကို ဖြည်းညှင်းစွာ မှိတ်လိုက်ပြီး အသက်ပြင်းပြင်း ရှူသွင်းလိုက်ကာ ပြန်လည် ဖွင့်ကြည့်လိုက်သည်။ ထို့နောက်တွင်တော့ Fourth Wall ကို တွေးတောလိုက်မိသည်။

[ ကင်ဒေါ့ဂျာ က တွေးလိုက်တယ်။ ]

ကျနော်သည် ဝတ္ထုတစ်ပုဒ်ထဲတွင် ဝါကျတစ်ခုကို ရေးသားနေသကဲ့သို့ပင် ဖြစ်နေခဲ့သည်။

[ သူဟာ နောက်ဆုံးမှာ ဘာကို အလိုရှိနေလဲဆိုတာ ငါ မသိဘူး။ ဒါပေမဲ့ ရလဒ်က ဘယ်လိုပဲ ဖြစ်နေပါစေ ငါကတော့ ငါ အလိုရှိတဲ့ ဇာတ်သိမ်းကိုပဲ ဖန်တီးသွားမှာပါ။ ]

ကျနော်သည် ထိုဝါကျကို ရေးသားလိုက်ပြီး လေထုထဲသို့ ခဏတာမျှ စိုက်ကြည့်နေမိသည်။

ထင်ထားသည့်အတိုင်းပင် မည်သည့် ပြန်လည် ဖြေကြားချက်မျှ ရှိမနေခဲ့ပါ။ ထိုအစား Fourth Wall ကသာ တုံ့ပြန်ခဲ့သည်။

[ Fourth Wall က ပျော်ရွှင်စွာဖြင့် လှုပ်ရှားပါနေသည်။ ]

ကျနော် အပြင်သို့ ရုတ်တရက် လှမ်းကြည့်လိုက်ရာ အဝေးတွင် စက်မှုဇုန်ကို မြင်တွေ့လိုက်ရသည်။ ကျနော်သည် ကင်ဒေါ့ဂျာ စက်မှုဇုန် သို့ ပထမဆုံးအကြိမ်အဖြစ် လာရောက်လည်ပတ်ခြင်း ဖြစ်သည်။ ထိုစဉ် ဟန်မြုံအို က ကား၏ အရှိန်ကို ရုတ်တရက် လျှော့ချလိုက်လေသည်။

"ဘာဖြစ်လို့လဲ"

"…ဇာတ်ဝင်ခန်းက တိုးတက်နေတယ်"

ဇာတ်ဝင်ခန်း ဟုတ်လား။ မဖြစ်နိုင်တာ... မိစ္ဆာဘုရင် ရွေးချယ်ပွဲက မစတင်ရသေးဘူး မဟုတ်လား။

[ သင်သည် ဝှက်ထားသော ဇာတ်ဝင်ခန်း နယ်မြေထဲသို့ ဝင်ရောက်လိုပါသလား။ ]

ဟန်မြုံအို သည် စက်မှုဇုန်ဆီသို့ သတိရှိရှိဖြင့် ချဉ်းကပ်သွားခဲ့သည်။ စက်မှုဇုန်၏ ဝင်ပေါက်တွင်တော့ အစောင့်တစ်ယောက်မျှ မရှိဘဲ ဗလာကျင်းနေခဲ့သည်။

ကျနော် ပြတင်းပေါက်ကို ဖွင့်လိုက်ရာ စက်မှုဇုန်ထဲမှနေ၍ အော်ဟစ်သံများကို ကြားလိုက်ရသည်။

"ငါက ကင်ဒေါ့ဂျာ ကွ"

"မဟုတ်ဘူး၊ ငါက ကင်ဒေါ့ဂျာ"

"ငါက ကင်ဒေါ့ဂျာ၊ ငါကမှ အစစ်"

ဟန်မြုံအို နှင့် ကျနော်သည် တစ်ပြိုင်နက်တည်း အချင်းချင်း လှမ်းကြည့်လိုက်ကြသည်။

"ဘာတွေလဲ..."

စနစ်၏ မက်ဆေ့ချ် တစ်ခုက ထပ်မံ ထွက်ပေါ်လာခဲ့လေသည်။

[ ဝှက်ထားသော ဇာတ်ဝင်ခန်း ― ကင်ဒေါ့ဂျာ ကစားပွဲက လုပ်ဆောင်နေဆဲ ဖြစ်သည်။ ]

ကျနော် မရှိခိုက်တွင် ကျနော့်၏ စက်မှုဇုန်ထဲ၌ ထူးဆန်းသော အရာတစ်ခု ဖြစ်ပျက်နေခဲ့ပြီ ဖြစ်သည်။

အခန်း ၂၅၂

- အပိုင်း ၄၇ - မိစ္ဆာဘုရင်ရွေးချယ်ပွဲ (၆)

[သင်သည် ဝှက်ထားသော ဇာတ်ဝင်ခန်း နယ်မြေထဲသို့ ဝင်ရောက်ခဲ့ပါသည်။]

[ဝှက်ထားသော ဇာတ်ဝင်ခန်း ဖြစ်သည့် ‘ကင်ဒေါ့ဂျာ ကစားပွဲ’ တွင် ပါဝင်လိုပါသလား]

ဟန်မြုံအိုက ကျနော့်ကို စိုက်ကြည့်ပြီး ဆွံ့အမှင်သက်စွာဖြင့် ရေရွတ်လိုက်သည်။

"ဘာတွေ ဖြစ်ကုန်တာလဲ"

ဘီယူ ကို ကျနော်လှမ်းကြည့်လိုက်သည်။

[ဘတ်၊ ဘတ်...]

ဘီယူ က ခေါင်းကို အခါခါ ခါယမ်းပြခဲ့သည်။ ဤအရာကို ပြုလုပ်ခဲ့သည်မှာ ဘီယူ မဟုတ်ပေ။ ဝှက်ထားသော ဇာတ်ဝင်ခန်း အများစုမှာ အဓိကဇာတ်ဝင်ခန်းများကဲ့သို့ပင် ကြယ်တာရာ ရုပ်သံထုတ်လွှင့်မှု ၏ အလိုဆန္ဒနှင့်အညီ အသက်ဝင်လာလေ့ ရှိကြသည်။ သို့ဆိုလျှင် အဘယ်ကြောင့် ဤအချိန်မှ ဖြစ်ရသနည်း။ နောက်ဆက်တွဲ စနစ်မက်ဆေ့ချ်က အရိပ်အမြွက် ပေးလာခဲ့၏။

[စက်မှုဇုန်၏ ပိုင်ရှင်မှာ လက်ရှိအချိန်တွင် ကင်းကွာနေပါသည်။]

[အရေးပေါ် ရာထူးတိုးမြှင့်ခြင်း ဇာတ်ဝင်ခန်း အသက်ဝင်လာပါပြီ။]

ကျနော် ပျောက်ကွယ်နေသည်မှာ အလွန် ကြာမြင့်သွားခဲ့ပုံရသည်။

"ကျနော်က စော်ဘွား ရာထူးကို ဆက်ခံဖို့ ဆန္ဒမရှိဘူးလို့ ကြယ်တာရာ ရုပ်သံထုတ်လွှင့်မှု က ဆုံးဖြတ်လိုက်ပုံရတယ်"

"အခု မင်း ဒီကို ရောက်နေပြီဆိုတော့ အဆင်ပြေသွားပြီ မဟုတ်ဘူးလား"

"အဲဒါဆိုရင်တော့ ကောင်းတာပေါ့"

ကျနော်သည် စက်မှုဇုန်ထဲသို့ ဝင်ရောက်ခဲ့ပြီးနောက်တွင်ပင် ဇာတ်ဝင်ခန်းမှာ အပြောင်းအလဲ မရှိဘဲ ကျန်ရှိနေခဲ့သည်။ ကျနော်နှင့် ယူဂျွန်ဟော့ တို့ ပြုလုပ်ခဲ့သော အယောင်ဆောင်မှု လုပ်ရပ်ကြောင့် ကြယ်တာရာ ရုပ်သံထုတ်လွှင့်မှု ဇာတ်ဝင်ခန်းမှာ လွဲချော်သွားခဲ့ပုံရသည်။ ထိုအချိန်တုန်းက အမှားအယွင်းတစ်ခု ဖြစ်ပွားခဲ့သည်ဟူသော မက်ဆေ့ချ်တစ်ခု တက်လာခဲ့ဖူးသည်။

"ကင်ဒေါ့ဂျာ ကစားပွဲ ဆိုတာ ဘာလဲ။ အဲဒါက လွတ်လပ်စွာ ပါဝင်နိုင်တဲ့ ဇာတ်ဝင်ခန်းလား"

ဂျန်ဟာယောင်း သည် နောက်ခန်းတွင် မျက်လုံးများကို ဖွင့်လိုက်ပြီး အကြောဆန့်လိုက်သည်။

[ငါတို့က လက်ရှိမှာ စက်မှုဇုန်ရဲ့ 'ကင်ဒေါ့ဂျာအစစ်' ကို ရွေးချယ်နေကြတာလေ]

ဤအတိုင်းဆိုလျှင် ကျနော့်၏ နာမည်မှာ အခိုးခံရတော့မည် ဖြစ်သည်။ ကျနော်သည် ဟန်မြုံအို ဘက်သို့ လှည့်ကြည့်ပြီး မေးမြန်းလိုက်သည်။

"ခင်ဗျားကော ပါမလား"

"ငါက ဘာလို့ အဲဒီလို လုပ်ရမှာလဲ"

"နင်ကော ဘယ်လိုလဲ၊ ဂျန်ဟာယောင်း"

"ကျုပ်ကတော့ ကင်ဒေါ့ဂျာ မဖြစ်ချင်ပါဘူး"

သူ၏ မျက်နှာအမူအရာက အလျင်အမြန်ပင် ပြောင်းလဲသွားပြီး စိတ်ကောက်နေပုံရသည်။

"ကျုပ်က ကယ်တင်ခြင်း၏ မိစ္ဆာဘုရင်ကိုလည်း မသိဘူး"

လက်တွေ့ဘဝကို ရှောင်တိမ်းရန်အတွက် သူသည် ကျနော်နှင့် ကယ်တင်ခြင်း၏ မိစ္ဆာဘုရင် ကို သီးခြားစီ ခွဲခြားထားရန် ဆုံးဖြတ်လိုက်ခြင်း ဖြစ်သည်။ ကျနော် နောက်ဆုံး လှမ်းကြည့်လိုက်သည့်သူမှာ ကောင်းကင်ဖြိုခွင်းဓါးသခင် ဖြစ်သည်။

ဝုတ်၊ ဝုတ်

ကျနော် ခေါင်းညိတ်လိုက်သည်။

"ဒါဆိုရင်တော့ ငါ တစ်ယောက်ထဲပဲ ပါလိုက်တော့မယ်"

"အဆင်ပြေပါ့မလား။ ဘာတွေ ဖြစ်နေလဲဆိုတာကိုလည်း မင်းလည်း မသိသေးဘူးလေ..."

"ဘာပဲဖြစ်ဖြစ် ကျနော် သွားမှ ဖြစ်မယ်။ ဒါက ကျနော့်ရဲ့ စက်မှုဇုန်ပဲလေ"

ဇာတ်ဝင်ခန်းတွင် ပါဝင်ပြီးသည်နှင့် ချက်ချင်းပင် မက်ဆေ့ချ်ဇယားတစ်ခု ထွက်ပေါ်လာခဲ့သည်။

[ဝှက်ထားသော ဇာတ်ဝင်ခန်း - ကင်ဒေါ့ဂျာ၏ ဖြစ်တည်မှု သက်သေ]

အမျိုးအစား

အဓိက

ခက်ခဲမှု

???

အောင်မြင်ရန် လိုအပ်ချက်

‘ကင်ဒေါ့ဂျာ စက်မှုဇုန်’ ချန်နယ်၏ နက္ခတ်များအား သင်သည် ကင်ဒေါ့ဂျာ ဖြစ်ကြောင်း သက်သေပြပါ။

အချိန်ကန့်သတ်ချက်

၃ နာရီ

ဆုလာဘ်

ကင်ဒေါ့ဂျာ စက်မှုဇုန်၏ စော်ဘွား ဖြစ်လာခြင်း နှင့် ဒင်္ဂါး ၂၀၀,၀၀၀

ကျရှုံးမှု

???

ဇာတ်ဝင်ခန်းအတွင်းရှိ ‘ကင်ဒေါ့ဂျာ’ ဖြစ်ရန် ရည်မှန်းထားသူအားလုံးသည် ဇာတ်ဝင်ခန်း မပြီးဆုံးမချင်း တူညီသော ရုပ်သွင်ပြင်ကို ရရှိနေမည် ဖြစ်သည်။

အချိန်ကန့်သတ်ချက်အတွင်း နက္ခတ်များထံမှ ရမှတ်အများဆုံး ရရှိသော ‘ကင်ဒေါ့ဂျာ’ ဖြစ်ရန် ရည်မှန်းထားသူသည် ကင်ဒေါ့ဂျာ စက်မှုဇုန်ကို ဆက်ခံရရှိမည် ဖြစ်၏။

...ဤကဲ့သို့သော ဇာတ်ဝင်ခန်းမျိုးကို ကျနော် ပထမဆုံးအကြိမ် မြင်တွေ့ဖူးခြင်း ဖြစ်သည်။ ဤဇာတ်ဝင်ခန်းမှာ မူရင်းစာအုပ်ထဲတွင် မပါဝင်ခဲ့ပေ။

[‘ကင်ဒေါ့ဂျာ’ ဖြစ်ရန် ရည်မှန်းထားသူ အသစ်တစ်ဦး ဝင်ရောက်လာခဲ့ပါသည်။]

[ဇာတ်ဝင်ခန်း ပြီးဆုံးရန် သုံးနာရီ ကျန်ရှိပါတော့သည်။]

[သင်သည် နက္ခတ်အများစု၏ အသိအမှတ်ပြုခြင်းကို ‘ကင်ဒေါ့ဂျာ’ အဖြစ် ခံယူရပါမည်။]

[သင်သည် ၁၁၃၁ ယောက်မြောက် ‘ကင်ဒေါ့ဂျာ’ ဖြစ်ရန် ရည်မှန်းထားသူ ဖြစ်ပါသည်။]

ဇာတ်ဝင်ခန်း စတင်ခဲ့ပြီး ကျနော်သည် ကင်ဒေါ့ဂျာ စက်မှုဇုန်ရှိ ရင်ပြင်၏ အစွန်အဖျားသို့ ဆင့်ခေါ်ခြင်း ခံခဲ့ရသည်။ ထိုနေရာတွင် သူတို့ကိုယ်သူတို့ ကင်ဒေါ့ဂျာ ဖြစ်ကြောင်း သက်သေပြရန်အတွက် ရုန်းကန်နေမှုများ ရှိနေနှင့်ပြီးသား ဖြစ်သည်။

[ဟားဟား၊ အားလုံးပဲ။ နက္ခတ်တွေရဲ့ အသိအမှတ်ပြုမှုကို ခံယူချင်ကြတာလား။ မင်းတို့က ကင်ဒေါ့ဂျာအစစ် ဖြစ်ကြောင်း ငါတို့ကို ပြသစမ်းပါ]

ဒိုကဲဘီ တစ်ကောင်၏ အသံကို ကျနော်ကြားလိုက်ရသည်။ ကျနော် မရှိသည့် အတောအတွင်း စီမံခန့်ခွဲရေးဌာနသည် မိစ္ဆာနယ်မြေထဲသို့ အောင်မြင်စွာ တိုးချဲ့ဝင်ရောက်လာနိုင်ခဲ့ပုံရသည်။ ဤသို့တိုးချဲ့ဝင်ရောက်ခြင်းက အကျိတ်နှင့်လူ များအတွက် အနှောင့်အယှက်တစ်ခု ဖြစ်လာလောက်သည်။ မည်သို့ပင်ဆိုစေကာမူ သူတို့သည် ဇာတ်လမ်းတစ်ခု ရှိလာတိုင်း သရဲတစ္ဆေများကဲ့သို့ စုပြုံရောက်ရှိလာကြစမြဲ ဖြစ်၏။

[ဘတ်]

ဘီယူ က စိတ်ပိုင်းဖြတ်လိုက်ပြီး ချန်နယ်ကို စတင်ချဲ့ထွင်လိုက်သည်။

[နက္ခတ်များစွာသည် ချန်နယ်ထဲသို့ ဝင်ရောက်လာခဲ့ကြပါသည်။]

ကျနော်သည် ‘ကင်ဒေါ့ဂျာ’ ဖြစ်ရန် ရည်မှန်းထားကြသော အခြားသူများကို ဖြည်းညှင်းစွာ လှည့်ပတ်ကြည့်ရှုလိုက်မိသည်။

"ငါက ကင်ဒေါ့ဂျာပဲ။ ကြည့်လိုက်စမ်း"

"ငါက ကင်ဒေါ့ဂျာကွ"

ကင်ဒေါ့ဂျာ ဖြစ်ရန် ရည်မှန်းထားကြသူများအော်ဟစ်နေချိန်တွင် သူတို့၏ မျက်နှာများမှာ ဝေဝါးနေ၏။

အတိအကျပြောရမည်ဆိုလျှင် အခြားသော နက္ခတ်များ၏ အမြင်တွင်လည်း ကျနော်သည် ဤကဲ့သို့ပင် ဖြစ်နေလောက်ပေမည်။

...ချီး

တစ်ခုခုတော့ ထူးဆန်းနေသလို ခံစားလိုက်ရသည်။ ကင်ဒေါ့ဂျာ ဖြစ်ရန် ရည်မှန်းထားကြသူ အများစုမှာ ကျနော့် နာမည်ကိုသာ ထပ်ခါတလဲလဲ အော်ဟစ်နေကြပြီး ထူးခြားသည့် အမူအရာမျိုးကို ပြသနိုင်ခြင်း မရှိကြပေ။ သူတို့မှာ စော်ဘွား ရာထူးကို မက်မောပြီး ပါဝင်လာကြသူများသာ ဖြစ်ကြ၏။

သို့သော်လည်း သူတို့အားလုံးကတော့ တူညီမနေခဲ့ကြပေ။

"ငါက ပရောဟိတ် ကင်ဒေါ့ဂျာ"

"ငါက ကယ်တင်ခြင်း၏ မိစ္ဆာဘုရင်"

[နက္ခတ်အချို့က စိတ်ဝင်စားနေကြပါသည်။]

[ကိုယ်စားလှယ် ၉၈၆ က ၁၀ မှတ် ရရှိသွားပါသည်။]

ဆီလျော်လှသော ဝတ်စုံများကို ဝတ်ဆင်ထားပြီး ‘ကင်ဒေါ့ဂျာ’ ဟု အော်ဟစ်နေကြသော ကိုယ်စားလှယ် အချို့ကို မြင်လိုက်ရသဖြင့် ကျနော် ခဏမျှ ရပ်တန့်သွားခဲ့ရသည်။

"ငါက ဘုရင်မဲ့ကမ္ဘာ၏ ဘုရင်ပဲ"

[နက္ခတ်အနည်းငယ်က ဤကိုယ်စားလှယ်ကို စိတ်ဝင်စားနေကြ ပါသည်။]

[ကိုယ်စားလှယ် ၉၈၆ က ၂၀ မှတ် ရရှိသွားပါသည်။]

...သူက တော်တော်လေး တော်သားပဲ။

စက်မှုဇုန်၏ ဗဟိုချက်ဆီသို့ ကျနော်ဝင်ရောက်ခဲ့ရာ ပို၍ ဆီလျော်သော စကားများကို ပြောဆိုနေကြသူများမှာ တဖြည်းဖြည်း ပိုမိုများပြားလာခဲ့သည်။

ကင်ဒေါ့ဂျာ အချို့မှာ အချင်းချင်း စိန်ခေါ်တိုက်ခိုက်နေကြသည်ကိုလည်း မြင်တွေ့ရသည်။ ရင်းနှီးနေသော နက္ခတ်တစ်ပါးထံမှ မက်ဆေ့ချ်တစ်ခုကို ကြားလိုက်ရချိန်တွင်တော့ ဤနယ်မြေက ဘာကြောင့် ဤမျှအထိ သွေးချောင်းစီးနေရသည်ကို ကျနော် နားလည်ချင်စိတ် ပေါက်သွားခဲ့သည်။

[‘ရွှေခေါင်းကွင်း၏အကျဉ်သား’ နက္ခတ်က ကင်ဒေါ့ဂျာမှာ သတ္တိရှိသူတစ်ဦး ဖြစ်သည်ဟု အငြင်းပွားနေပါသည်။]

...ကောင်းကင်တစ်မျှ မဟာပညာရှိ က ဘာကြောင့် ဤမျှအထိ တိတ်ဆိတ်နေရသနည်းဟု ကျနော် တွေးတောမိခဲ့ဖူးသည်။ သူသည် ဤအခြေအနေ၏ အလယ်ဗဟိုသို့ ရောက်ရှိနေနှင့်ပြီးသား ဖြစ်နေခဲ့၏။ ထိုစဉ် လေထုကို ဖြတ်သန်းသွားသော ဓါးသံတစ်ခု ထွက်ပေါ်လာခဲ့ပြီး ကင်ဒေါ့ဂျာ ဖြစ်ရန် ရည်မှန်းထားသူတစ်ဦးမှာ လဲပြိုသွားခဲ့ရသည်။

"အား"

ပြင်းထန်သော မှော်စွမ်းအင်တစ်ခုက ကင်ဒေါ့ဂျာ ဖြစ်ရန် ရည်မှန်းထားသည့် အခြားတစ်ဦး၏ ခါးကို ဖြတ်တောက်သွားခဲ့သည်။ ကိုယ်စားလှယ်အချို့မှာ ထွက်ပြေးသွားကြပြီး အနိုင်ရရှိသွားသော ကင်ဒေါ့ဂျာ က အော်ဟစ်လိုက်သည်။

"ဒါက ငါဟာ ကင်ဒေါ့ဂျာ ဖြစ်တယ်ဆိုတဲ့ သက်သေပဲ"

ပြာလဲ့သော မှော်စွမ်းအင်များဖြင့် ပြုလုပ်ထားသည့် ဓါးသွားတစ်ခုက သူ၏ လက်ထဲတွင် ရှိနေခဲ့သည်။ ကျနော် အနည်းငယ် အံ့အားသင့်သွားခဲ့ရသည်။

[နက္ခတ်အမြောက်အမြားက ဤကိုယ်စားလှယ်ကို စိတ်ဝင်စားနေကြ ပါသည်။]

[ကိုယ်စားလှယ် ၃၁၂ က ၁၀၀ မှတ် ရရှိသွားပါသည်။]

ကိုယ်စားလှယ် ၃၁၂ သည် အသန့်စင်ဆုံးဓါးစွမ်းအင် ကို အသုံးမပြုခဲ့သော်လည်း ပုံပန်းသဏ္ဍာန်အားဖြင့်တော့ ဆင်တူနေခဲ့သည်။ ကိုယ်စားလှယ် ၃၁၂ သည် အခြားသော ကိုယ်စားလှယ်များကို ပြန်လည်သုတ်သင်ခြင်း မပြုမီ ကျနော့်ဘက်သို့ လှမ်းကြည့်လာခဲ့သည်။ လှမ်းကြည့်မှုမှာ ခဏတာမျှသာ ဖြစ်သော်လည်း သူနှင့် မျက်လုံးချင်း ဆုံလိုက်ရသည့် ခဏတွင်တော့ အိုင်လင်း ၏ စကားများမှာ ကျနော့်၏ ခေါင်းထဲသို့ ဖြတ်သန်းသွားခဲ့သည်။

--စော်ဘွား ထွက်ခွာသွားကတည်းက တခြား စက်မှုဇုန်တွေနဲ့ ရုန်းကန်နေခဲ့ရတယ်... အဖွဲ့သားတွေကတော့ ကောင်းကောင်း ကိုင်တွယ်နိုင်ကြပါတယ်

အခြေအနေများက မည်ကဲ့သို့ ဖြစ်ပျက်နေသည်ကို ကျနော် အကြမ်းဖျင်း သဘောပေါက်လိုက်မိသည်။ ဤနေရာရှိ ကင်ဒေါ့ဂျာ ဖြစ်ရန် ရည်မှန်းထားသူအချို့မှာ အခြားသော စက်မှုဇုန်များမှ ရောက်ရှိလာကြသူများ ဖြစ်ကြ၏။ တစ်နည်းအားဖြင့်ဆိုရသော် ကျနော့်နှင့် ပတ်သက်သည့် အချက်အလက်များကို ထောက်ပံ့မှု ရရှိထားကြပြီး ကင်ဒေါ့ဂျာ အဖြစ် ဟန်ဆောင်နေကြသူများလည်း ရှိနေကြခြင်း ဖြစ်၏။

ကျနော့်၏ စိတ်ထဲတွင်တော့ အနည်းငယ် ရှုပ်ထွေးသွားခဲ့ရသည်။ အကယ်၍ ကျနော်သည် ဤကစားပွဲတွင် ရှုံးနိမ့်သွားခဲ့လျှင် မှားယွင်းသော ကင်ဒေါ့ဂျာ ကသာ မိစ္ဆာဘုရင် ရွေးချယ်ပွဲသို့ တက်ရောက်သွားရပေလိမ့်မည်။

[နက္ခတ်အနည်းငယ်က သင့်ကို စိတ်ဝင်စားနေကြပါသည်။]

[နက္ခတ်အနည်းငယ်က သင်သည် ကင်ဒေါ့ဂျာ ဖြစ်ကြောင်း သက်သေပြရန် တောင်းဆိုနေကြပါသည်။]

ကျနော့်၏ ဖြစ်တည်မှုကို ကျနော် မည်သို့ သက်သေပြရမည်နည်း။ ကျနော့်တွင် ကိုယ့်ကိုယ်ကိုယ် သက်သေပြရန်အတွက် မှတ်ပုံတင် သို့မဟုတ် သက်သေခံကတ်ပြားဟူ၍ ဘာမှမရှိချေ။

[‘မိစ္ဆာကဲ့သို့ မီးလျှံတရားစီရင်သူ’ နက္ခတ်က ကင်ဒေါ့ဂျာအစစ်မှာ အပေါင်းအဖော်ကို ချစ်မြတ်နိုးသူ ဖြစ်သည်ဟု ဆိုပါသည်။]

...ယူရီအယ်

ကျနော်သည် ယူရီအယ်ကို လှမ်းအော်တော့မည့် ဆဲဆဲတွင် ရင်ပြင်၏ အလယ်ဗဟိုရှိ ကိုယ်စားလှယ်တစ်ဦးမှာ ဒူးထောက်လိုက်ပြီး ငိုကြွေးလာခဲ့သည်။

"ယူဂျွန်ဟော့။ ယူဂျွန်ဟော့။ ထစမ်းပါ။ ကျေးဇူးပြုပြီး ထစမ်းပါဦးကွာ"

ကင်ဒေါ့ဂျာ အယောင်ဆောင်မှာ သူ၏ ရင်ခွင်ထဲတွင် စိတ်ကူးယဉ် ယူဂျွန်ဟော့ ကို ပိုက်ထွေးထားရင်းမှ အော်ဟစ်နေခဲ့သည်။ ကျနော်သည် မရယ်ဘဲ မနေနိုင်တော့ပေ။ ကျနော်က ထိုကဲ့သို့ အပြုအမူမူး မလုပ်ခဲ့ဘူးချေ။ ယူရီအယ်သည်လည်း ဤကဲ့သို့သော သရုပ်ဆောင်မှုမျိုးဖြင့် လှည့်စားခြင်းကို ခံရမည် မဟုတ်သည်မှာ သေချာ…

[‘မိစ္ဆာကဲ့သို့ မီးလျှံတရားစီရင်သူ’ နက္ခတ်က မျက်ရည်များ ဝဲနေပါသည်။]

[‘မိစ္ဆာကဲ့သို့ မီးလျှံတရားစီရင်သူ’ နက္ခတ်က ထပ်မံပြသပေးရန် တောင်းဆိုနေပါသည်။]

[ကိုယ်စားလှယ် ၃၂ က ၃၀၀ မှတ် ရရှိသွားပါသည်။]

...ကျနော် မယုံနိုင်အောင် ဖြစ်သွားခဲ့ရသည်။ ကျနော် ခေါင်းကို ခါယမ်းလိုက်ပြီး ကိုယ်စားလှယ် ၃၂ ကို ကျော်ဖြတ်သွားခဲ့ရာတွင်တော့ မမျှော်လင့်ထားသော စကားတစ်ခွန်းကို ကြားလိုက်ရပြန်သည်။

[‘မဟူရာမီးလျှံ အသူတစ်ရာနဂါး’ နက္ခတ်က ကင်ဒေါ့ဂျာအစစ်မှာ အုံ့ပုန်းတစ်ယောက်ဖြစ်ကြောင်း အခိုင်အမာ ဆိုပါသည်။]

မဟူရာမီးလျှံ အသူတစ်ရာနဂါး လား။ သူက ဘယ်အချိန်က ရောက်လာတာလဲ...

[‘မဟူရာမီးလျှံ အသူတစ်ရာနဂါး’ နက္ခတ်က ကင်ဒေါ့ဂျာအစစ်မှာ လျှို့ဝှက်ချက်တွေရှိသူဖြစ်ကြောင်း အခိုင်အမာ ဆိုပါသည်။]

ဘာတွေ ဖြစ်ပျက်နေသည်ကို ကျနော် သိရှိလိုက်ပြီ ထင်သည်။ အံ့အားသင့်စရာ ကောင်းလှသည်မှာ တစ်ချိန်တည်းမှာပင် အော်ဟစ်လာခဲ့သည့် ကိုယ်စားလှယ်တစ်ဦး ရှိနေခဲ့ခြင်း ဖြစ်သည်။

"အာ... ယူဆန်းအာ။ ခင်ဗျား သိလား။ ဟက်ဟက်။ ကျနော်က စာဖတ်သူ တစ်ယောက်ပဲ။ ကျနော့်မှာ စာဖတ်သူ တစ်ယောက်ရဲ့ ဘဝ ရှိတယ်"

ကျနော့်၏ စိတ်ကူးများမှာ မယုံနိုင်လောက်အောင်ပင် ရှုပ်ထွေးသွားခဲ့ရသည်။ ထိုကိစ္စက ဇာတ်ဝင်ခန်း မပေါ်ပေါက်မီက ဇာတ်ကြောင်းတစ်ခု ဖြစ်သည်။

သူက ဘယ်လိုလုပ်ပြီး သိနေရတာလဲ... မဟုတ်သေးဘူး၊ နေပါဦး၊ ငါက ဘယ်တုန်းကမှ အဲဒီလိုမျိုး မပြောခဲ့ပါဘူး။

[‘မဟူရာမီးလျှံ အသူတစ်ရာနဂါး’ နက္ခတ်က ကျေနပ်နေပါသည်။]

[ ‘မဟူရာမီးလျှံ အသူတစ်ရာနဂါး’ နက္ခတ်က ကိုယ်စားလှယ် ၉၇ ကို ၃၀၀ မှတ် ပေးလိုက်ပါသည်။]

စိတ်ပျက်အားငယ်မှုကို ကျနော်ခံစားလိုက်ရပြီး နှုတ်ခမ်းများမှာလည်း တုန်ရီနေခဲ့သည်။ ဤအတိုင်းသာဆိုလျှင် ကျနော့်၏ နာမည်မှာ ထိုကဲ့သို့သော ရယ်စရာကောင်းသည့် လူများဆီသို့ ဆုံးရှုံးသွားပေတော့မည်။

ကျနော် တည်ငြိမ်စွာ စဉ်းစားရမည်။ ကျနော်သည် ကင်ဒေါ့ဂျာ ဖြစ်ကြောင်း သက်သေပြနိုင်ရန်အတွက် ကျနော်နှင့် နက္ခတ်များသာ မျှဝေခံစားခဲ့ဖူးသည့် ဖြစ်ရပ်များကို သူတို့အား ပြန်လည်အမှတ်ရစေရန် လိုအပ်သည်။

"ငါ့ကိုယ်ပေါ်က မင်းလက်ကို ဖယ်ပြီး ဝေးဝေးသွားစမ်း။ မအေဘေး"

[ကိုယ်စားလှယ် ၃၂ က ၂၀၀ မှတ် ရရှိသွားပါသည်။]

နက္ခတ်များနှင့် ကျနော်သာ သိရှိထားသည့် အရာတစ်ခု...

"ငါက ဒီလိုမျိုး ပြုံးရတာကို သဘောကျတယ်"

[ကိုယ်စားလှယ် ၉၇ က ၂၅၀ မှတ် ရရှိသွားပါသည်။]

နက္ခတ်များနှင့် ကျနော်...

"ငါ အကြိုက်ဆုံးက တရုတ်ဝတ်စုံနဲ့ ခြေအိတ်ရှည်ပါတဲ့ အတွင်းခံမျိုးပဲ"

[ကိုယ်စားလှယ် ၃၁၂ က ၄၀၀ မှတ် ရရှိသွားပါသည်။]

ချီး။ ဘာတွေလဲကွာ။

ကျနော်သည် ရှုပ်ထွေးနေသော စိတ်ကူးများကို စုစည်းလိုက်ပြီး ပိုမိုလွယ်ကူသော နည်းလမ်းတစ်ခုကို အသုံးပြုရန် ဆုံးဖြတ်လိုက်သည်။ ကျနော်သည် ကယ်တင်ခြင်း၏ မိစ္ဆာဘုရင် ၏ သွယ်ဝိုက်သော မက်ဆေ့ချ်မှတစ်ဆင့် ကျနော်သည် ကင်ဒေါ့ဂျာ ဖြစ်ကြောင်း သူတို့ကို တိုက်ရိုက် အသိပေးလိုက်မည် ဖြစ်သည်။

[ဇာတ်ဝင်ခန်းတစ်လျှောက်တွင် ‘ကယ်တင်ခြင်း၏ မိစ္ဆာဘုရင်’ နက္ခတ်သည် စကားမပြောနိုင်ပါ။]

...ခွေးမသား။

[ဇာတ်ဝင်ခန်း ပြီးဆုံးရန် တစ်နာရီသာ ကျန်ရှိပါတော့သည်။]

ယခုဆိုလျှင် အချိန် သိပ်မကျန်တော့ပေ။ မကျိုးပဲ့နိုင်သောယုံကြည်မှုဓါးကို လက်ထဲတွင် တိတ်တဆိတ် ကျနော် ဆုပ်ကိုင်ထားလိုက်မိသည်။ ကင်ဒေါ့ဂျာ ဖြစ်ရန် ရည်မှန်းထားကြသူများ၏ အရေအတွက်တွင် ကန့်သတ်ချက်တစ်ခု ရှိနေ၏။ အကယ်၍ ကျနော်သည် ကင်ဒေါ့ဂျာ ဖြစ်ရန် ရည်မှန်းထားကြသူ အားလုံးကို သတ်ပစ်လိုက်လျှင် နောက်ဆုံး ကျန်ရှိမည့် ကိုယ်စားလှယ်မှာ ကင်ဒေါ့ဂျာအစစ် ဖြစ်လာပေလိမ့်မည်။

သို့သော်လည်း ဤနည်းလမ်းကို ကျနော်အသုံးမပြုချင်ပေ။ သူတို့သည် လက်ရှိတွင် အာဏာမက်ပြီး လောဘအမှောင်ဖုံးနေကြသော်လည်း သူတို့အနက်မှ အများစုမှာ ကျနော့်၏ စက်မှုဇုန်မှ နိုင်ငံသားများသာ ဖြစ်ကြသည်...

ကျနော် သက်ပြင်းတစ်ချက် ချလိုက်ပြီး ခေါင်းကို ခါယမ်းလိုက်ကာ ကျနော့် ဓါးလက်ကိုင်ကို ထပ်ခါတလဲလဲ ဆုပ်ကိုင်လိုက် လွှတ်လိုက် ပြုလုပ်နေမိသည်။

「 ဒီလို လုပ်ရပ်တွေက မင်းနဲ့ မတူဘူး 」

ကျနော် စိတ်ပျက်လက်ပျက် ဖြစ်ရသည်မှာ ယူဂျွန်ဟော့ ပြောသည်မှာ မှန်ကန်နေခြင်းပင် ဖြစ်သည်။ ကင်ဒေါ့ဂျာ သည် ဤကဲ့သို့သော နည်းလမ်းမျိုးဖြင့် အရာရာကို ဘယ်တော့မှ ဖြေရှင်းမည် မဟုတ်ပေ။ ကျနော် ထိုအကြောင်းကို တွေးတောနေမိသည်။ ကျနော့်၏ ဖြစ်တည်မှုကို ကျနော် မည်သို့ သက်သေပြရမည်နည်း။ မဟုတ်သေးပေ။ ကျနော်သည် ‘ကျနော်’ ဖြစ်ကြောင်း သက်သေပြရန်မှာ ဘာကို ဆိုလိုခြင်း ဖြစ်သနည်း။

ထိုအချိန်တွင် ရုတ်တရက် အပြောင်းအလဲတစ်ခု ဖြစ်ပေါ်လာခဲ့သည်။

"ဒါက လျှပ်စစ်ဓာတ် အားဖြည့်ခြင်းပါ။ ဝိရောဓိ ဘတ်ချုံး ဆီကနေ သင်ယူခဲ့တဲ့ အဆင့်မြင့်ဆုံး နည်းစနစ်ပါ... "

ကိုယ်စားလှယ် ၃၁၂ သည် လျှပ်စီးဓါးကို ကိုင်ဆောင်ထားရင်းမှ အော်ဟစ်လိုက်သည်။ ဘတ်ချုံး မဟုတ်ဘဲ ဘတ်ချွန်း ဖြစ်သည်ဟု ကျနော် ထောက်ပြတော့မည့် ဆဲဆဲတွင် မိုးကောင်းကင်မှ လျှပ်စီးများ လက်ခနဲ ဖြစ်သွားခဲ့သည်။

"အား"

ဖြူပြာရောင် လျှပ်စီးများက ထိုကိုယ်စားလှယ်၏ ဓါးသွားကို ထိမှန်သွားခဲ့ပြီး သူ၏ ခန္ဓာကိုယ်ကို ဆုတ်ဖြဲပစ်လိုက်သည်။ ကိုယ်စားလှယ် အချို့မှာ အော်ဟစ်ပြီး နောက်ဆုတ်သွားကြသလို နက္ခတ်အချို့ကတော့ သဘောကျပြီး ရမှတ်များကို ကျပန်း ပေးနေကြလေသည်။ ရှုပ်ထွေးမှုများ၏ ကြားတွင် ကျနော်သည် မိုးကောင်းကင်ကို မော့ကြည့်လိုက်မိသည်။ သေးငယ်သော အရာတစ်ခုမှာ မိုးကောင်းကင်မှ ပြုတ်ကျလာခဲ့သည်။

...သူ ရောက်ရှိလာမည့် အချိန်ရောက်တော့မည်ဟု ကျနော် တွေးထားခဲ့သော်လည်း ဤမျှအထိ မြန်ဆန်လိမ့်မည်ဟုတော့ မမျှော်လင့်ထားခဲ့ပေ။ ကြီးမားသော ဖိအားများကို ထုတ်လွှတ်နေသည့် သေးငယ်သော အစက်အပြောက်မှာ နားကွဲလုမတတ် ဟိန်းဟောက်သံကြီးနှင့်အတူ စက်မှုဇုန်၏ ရင်ပြင်ဆီသို့ ဆင်းသက်လာခဲ့သည်။

ဖြူပြာရောင် အလင်းတန်းများက ရင်ပြင်တစ်ခုလုံးကို လွှမ်းခြုံသွားခဲ့သည်။ သေးငယ်သော လူသားတစ်ဦးမှာ လျှပ်စီးများ၏ အလယ်ဗဟိုတွင် ရပ်နေခဲ့ပြီး ကြီးမားသော တည်ရှိမှုတစ်ခုကို ထုတ်လွှတ်နေခဲ့သည်။ ဖုန်မှုန့်များကြားမှ အသံတစ်သံကို ကြားလိုက်ရချိန်တွင် လျှပ်စစ်မီးပွားများမှာ စင်ထွက်သွား၏။

[ငါ့ရဲ့ တပည့် ဘယ်မှာလဲ]

ခဏအကြာတွင် ထိုအသံရှင်၏ ပုံပန်းသဏ္ဍာန်မှာ ပေါ်ပေါက်လာခဲ့သည်။

[နက္ခတ်များစွာက အံ့အားသင့်နေကြပါသည်။]

ထိုသေးငယ်သော လူသားမှာ နက္ခတ်များ အံ့အားသင့်သည်ဖြစ်စေ မအံ့အားသင့်သည်ဖြစ်စေ ဂရုမစိုက်ခဲ့ပေ။ ထိုလူ၏ ဖြစ်တည်မှုကို သဘောပေါက်လိုက်ကြသော နက္ခတ်အချို့လည်း ရှိနေခဲ့ကြသည်။

"ဒီသေးငယ်တဲ့ ခန္ဓာကိုယ်က..."

"နေပါဦး၊ မဟုတ်မှလွဲရော"

သူတို့သည် အချင်းချင်း လှမ်းကြည့်လိုက်ကြပြီး ထိုလူ၏ ရှေ့တွင် လဲပြိုကျသွားခဲ့ကြသည်။

"ကျ... ကျနော်ပါ"

"ကျနော်က ကင်ဒေါ့ဂျာပါ။ ဆရာ..."

မြောက်မြားလှစွာသော ကင်ဒေါ့ဂျာ များမှာ ထိုသေးငယ်သော လူသား၏ ရှေ့တွင် လဲပြိုကျသွားခဲ့၏။ ကျနော်သည် သူတို့ကို ကြည့်ပြီး နှုတ်ခမ်းတစ်ချက် သပ်လိုက်မိသည်။ သူတို့၏ ပါးနပ်မှုကိုတော့ သဘောကျမိသည်။ သို့သော်လည်း သူတို့၏ ခန္ဓာကိုယ်များက ပို၍ မြန်မြန်ဆန်ဆန် လှုပ်ရှားနိုင်ခဲ့လျှင် ပို၍ ကောင်းပေလိမ့်မည်။

"အ"

"အား"

ကင်ဒေါ့ဂျာ များမှာ ဖြူပြာရောင် လျှပ်စီးများ၏ တိုက်ခိုက်ခြင်းကို ခံလိုက်ရပြီး ပြာအဖြစ်သို့ ပြောင်းလဲသွားခဲ့ရသည်။ ကျနော်သည် သူ၏ တပည့်ကို ကိုယ်တိုင်ကိုယ်ကျ လာရောက်ခေါ်ယူရန် စိတ်ကောင်းရှိလှသော ဆရာကို ကြည့်ပြီး တစ်ခုခုကို သဘောပေါက်လိုက်မိသည်။

...ကျနော် နားလည်သွားပေပြီ။ ပထမဆုံးအနေဖြင့် ‘ကျနော်’ ဆိုသည်မှာ သက်သေပြ၍ ရနိုင်သောအရာ မဟုတ်ပေ။

[သင်၏ သီးသန့် ဇာတ်လမ်းကို ဖွင့်လှစ်ပါတော့မည်။]

[ဇာတ်လမ်း ‘ပြန်လာသူ၏ တပည့်’ စတင်ပါပြီ။]

‘ကျနော်’ ဆိုသည်မှာ ကျနော့်တစ်ဦးတည်း ပိုင်ဆိုင်သည့် အရာများဖြင့်သာ ဖွဲ့စည်းထားခြင်း မဟုတ်သောကြောင့် ဖြစ်သည်။ ထွက်ပြေးနေကြသော ကင်ဒေါ့ဂျာ များ၏ အလယ်တွင် ကင်ဒေါ့ဂျာအစစ် ကို သိရှိထားသည့် လူတစ်ဦး ရှိနေခဲ့သည်။

[ငါ့ရဲ့ တပည့်အစစ်က ဘယ်မှာလဲ]

အကယ်၍ ကျနော် ရှေ့သို့ ထွက်သွားခဲ့လျှင် အခြားသော အတုအယောင်များကဲ့သို့ပင် ဆုတ်ဖြဲခြင်း ခံရပေလိမ့်မည်။ ထိုစဉ် ရင်းနှီးနေသော အသံတစ်ခုကို ကျနော် ကြားလိုက်ရသည်။

"ချီး။ ဒါက ဘာကြီးလဲ။ သူတို့အားလုံးက ကင်ဒေါ့ဂျာ တွေချည်းပဲလား"

ကျနော် နောက်သို့ လှည့်ကြည့်လိုက်ရာ ဂျန်ဟာယောင်း က မြည်တွန်တောက်တီးနေသည်ကို မြင်လိုက်ရသည်။

ကျနော်သည် ဂျန်ဟာယောင်း ကို လှမ်းပြောလိုက်၏။

"ဂျန်ဟာယောင်း"

သူက သူ၏ နာမည်ကို ကြားလိုက်ရသဖြင့် အံ့အားသင့်စွာဖြင့် လှမ်းကြည့်လာခဲ့ပြီးနောက် ထိတ်လန့်သွားကာ နောက်သို့ တွန့်ဆုတ်သွားခဲ့သည်။

"...ကင်ဒေါ့ဂျာ လား"

ကျနော် ခေါင်းညိတ်ပြလိုက်ပြီး မေးလိုက်သည်။

"မင်းက ကောင်းကင်ဖြိုခွင်းဓါးသိုင်း ကို သင်ယူခဲ့တယ်မလား"

"...သေချာပေါက် သင်ယူခဲ့တာပေါ့။ ဘာဖြစ်လို့လဲ"

ကျနော် ပြုံးလိုက်ပြီး ကျနော့်၏ လက်နှစ်ဖက်ကို ဖြန့်ကားလိုက်သည်။

"အခု ငါ့အပေါ်မှာ အဲ့ဒီဓါးသိုင်းကို သုံးလိုက်စမ်းပါ"