အခန်း (၃၃၅-၃၃၆)

အခန်း ၃၃၅ - လျှို့ဝှက်နယ်မြေအကြောင်း ဆွေးနွေးခြင်းနှင့် ဝင်္ကပါအစီအရင် တည်ဆောက်မည့် အစီအစဉ်

"သိပ်နက်ရှိုင်းတဲ့ ရန်ငြိုးကြီးတော့ မဟုတ်ပါဘူး။ မကြာသေးခင်က ရွှမ်ခုန်းဘုရားကျောင်းနဲ့ ပြဿနာနည်းနည်းတက်ပြီး သူတို့ဆီက ခေါင်းပြောင်ဘုန်းကြီးတချို့ကို ကျွန်တော် သတ်ပစ်ခဲ့တာလောက်ပါပဲ"

လုချင်းသည် ရွှမ်ခုန်းဘုရားကျောင်းနှင့် သူ၏ကြားရှိ ရန်ငြိုးကို အကျဉ်းချုပ်ပြောပြရင်း ပေါ့ပေါ့ပါးပါးပင် ဆိုလိုက်လေသည်။

ထိုစကားကြောင့် ယန် မှာ ဆွံ့အသွားရရှာ၏။

သူတို့ရဲ့ တပည့်တစ်သိုက်ကို သတ်ပစ်ခဲ့တာတောင်မှ ပြင်းထန်တဲ့ ရန်ငြိုးလို့ မသတ်မှတ်ဘူးပေါ့လေ။

သို့သော်လည်း ဤပဋိပက္ခ၏ အစအနသည် ရွှမ်ခုန်းဘုရားကျောင်းဘက်မှ စတင်ခဲ့ခြင်းဖြစ်ကြောင်းကိုတော့ သူ ရိပ်မိလိုက်ပါ၏။

သူက သက်ပြင်းချကာ ပြောလိုက်သည်။ "ရှေးခေတ်ကာလတွေတုန်းက ရွှမ်ခုန်းဘုရားကျောင်းဆိုတာ ဩဇာတိက္ကမကြီးမားတယ် ဆိုပေမဲ့ ဖြောင့်မတ်တဲ့ ဂိုဏ်းတစ်ခုအဖြစ် သတ်မှတ်ခံခဲ့ရတာပါ။ အခုတော့ အမှားအမှန်ကိုတောင် မခွဲခြားနိုင်တော့ဘဲ အညစ်အကြေးတွေကို ဖုံးကွယ်ပေးတဲ့အထိ ပျက်စီးယိုယွင်းနေလိမ့်မယ်လို့ ဘယ်သူက ထင်ထားမှာလဲ"

လုချင်းက ရယ်မောလိုက်သော်လည်း ဘာမှမပြောတော့ပေ။

သူသည် ရှေးခေတ်ကာလက ရွှမ်ခုန်းဘုရားကျောင်းကို မကြုံတွေ့ခဲ့ဖူးသဖြင့် မဝေဖန်နိုင်ပေ။ သို့သော် ယခုလက်ရှိ ရွှမ်ခုန်းဘုရားကျောင်းနှင့် ပတ်သက်၍မူ သူတို့နှစ်ဖက်စလုံးထဲမှ တစ်ဖက်ဖက်ကသာ အသက်ရှင်ကျန်ရစ်နိုင်မည်ဆိုသည်မှာ ရှင်းလင်းလှသည်။

ရွှမ်မင်းတို့ကဲ့သို့သော ဘုန်းကြီးများ၏ အပြုအမူများကို ကြည့်ခြင်းအားဖြင့် လုချင်းသည် ရွှမ်ခုန်းဘုရားကျောင်းကို သွားမပတ်သက်လျှင်တောင်မှ သူတို့က သူ့ကို အလွယ်တကူ လွှတ်ထားပေးမည်မဟုတ်ကြောင်း သေချာနေလေသည်။

"ဒါပေမဲ့ သခင်လေး... စိုးရိမ်စရာမလိုပါဘူး။ အဲဒီ ရွှမ်ခုန်းဘုရားကျောင်း လျှို့ဝှက်နယ်မြေဆိုတာ သာမန် လျှို့ဝှက်နယ်မြေတစ်ခုပဲ ဖြစ်ဖို့များပါတယ်။ ဝိညာဉ်လက်နက်တစ်ခုကို သုံးပြီး တည်ငြိမ်အောင် ထိန်းထားတယ်ဆိုရင်တောင် အထဲမှာ ပုန်းနေတဲ့ ကျင့်ကြံသူတွေက အရမ်းကြီး အင်အားမကြီးနိုင်ပါဘူး။ အကယ်၍သာ သူတို့ အရမ်းအင်အားကြီးနေရင် လောကရဲ့ စည်းမျဉ်းတွေကို နှိုးဆွမိသလိုဖြစ်သွားပြီးတော့ ကောင်းကင်အတိဒုက္ခတွေ ကျရောက်လာရင် လျှို့ဝှက်နယ်မြေတစ်ခုလုံး ပျက်စီးသွားနိုင်တဲ့ အန္တရာယ်ရှိတယ်။ လက်ရှိမှာ လောကရဲ့ စည်းမျဉ်းတွေက အခြေတည်အဆင့် အထက်ကလူတွေ လွတ်လွတ်လပ်လပ် သွားလာလှုပ်ရှားနိုင်တဲ့အထိ ပြောင်းလဲတိုးတက်လာခြင်း မရှိသေးပါဘူး။ ဒါကြောင့် ရွှမ်ခုန်းဘုရားကျောင်းက ကလဲ့စားချေဖို့ တပည့်တွေ လွှတ်လိုက်ရင်တောင် အဲဒီတပည့်တွေက အရမ်းကြီး အင်အားကြီးနေမှာ မဟုတ်ပါဘူး" ယန် က နှစ်သိမ့်ပေးလိုက်သည်။

လုချင်းက မေးလိုက်သည်။ "အဲဒါကို ခဏထားလိုက်ပါဦး ချန်ပေ့။ စောစောက ချန်ပေ့ပြောခဲ့တာ ဒီလောကကြီးမှာ လျှို့ဝှက်နယ်မြေတွေ အများကြီးရှိခဲ့တယ်ဆို"

"ဟုတ်တယ်လေ။ လျှို့ဝှက်နယ်မြေဆိုတာ အခြေခံအားဖြင့်တော့ ဒီလောကကြီးနဲ့အတူ ပေါ်ပေါက်လာပြီး ပျက်စီးသွားတတ်တဲ့ သီးသန့် နေရာလွတ်တစ်ခုပါပဲ။ ရှေးဟောင်း မသေမျိုးကျင့်ကြံခြင်းခေတ်တုန်းက လျှို့ဝှက်နယ်မြေတွေဆိုတာ အမြဲလိုလို ပေါ်လာလိုက်၊ ပျောက်သွားလိုက် ဖြစ်နေတာ။ ဒါပေမဲ့ အများစုက အရမ်းသေးငယ်ပြီး ရှာတွေ့ဖို့ ခက်ခဲကြတယ်။ တချို့ဆိုရင် လူတစ်ယောက်၊ နှစ်ယောက်လောက်ပဲ ဝင်လို့ရလောက်အောင်အထိ သေးငယ်ပြီး အချိန်တိုလေးပဲ တည်ရှိတတ်တယ်... ဥပမာ နာရီအနည်းငယ်လောက်နေရင် ပျောက်ကွယ်သွားတာမျိုးပေါ့။ အဲဒီလို သေးငယ်ပြီး သက်တမ်းတိုတဲ့၊ အဆုံးသတ်ကို မြင်သာတဲ့ နယ်မြေတွေက များသောအားဖြင့် သိပ်တန်ဖိုးမရှိကြဘူး။ သတိမထားရင် အတွင်းက စွမ်းအားတွေကြောင့် ထိခိုက်ဒဏ်ရာရတာ ဒါမှမဟုတ် ထာဝရပိတ်မိသွားတာမျိုးတောင် ဖြစ်နိုင်တယ်လေ။ အဲ့ဒါကြောင့်မလို့ ဒီလိုအသေးစား နယ်မြေတွေထဲကို ဝင်ရောက်စွန့်စားတဲ့သူ ရှားတယ်။ အလယ်အလတ် ဒါမှမဟုတ် အကြီးစား လျှို့ဝှက်နယ်မြေတွေလောက်မှသာ စူးစမ်းဖို့ တန်ကြေးရှိတာ။ အကယ်၍ အလယ်အလတ် သို့မဟုတ် အကြီးစား နယ်မြေတစ်ခု ပေါ်လာပြီဆိုရင်တော့ အဲဒီနယ်မြေတွေထဲမှာ ရှားပါးရတနာတွေ ပါဝင်တတ်ပြီး ကျင့်ကြံခြင်းအတွက် အကောင်းဆုံး အရင်းအမြစ်တွေ ဖြစ်နေတတ်လို့ ဂိုဏ်းတွေနဲ့ အင်အားကြီး ကျင့်ကြံသူတွေကြားမှာ ပြိုင်ဆိုင်မှုတွေ ဖြစ်လာစေနိုင်တာပေါ့"

ယန် သည် လုချင်းအား ဤအရာအားလုံးကို စိတ်ရှည်လက်ရှည် ရှင်းပြလေ၏။

"ရတနာတွေ ပေါ်ထွက်လာတဲ့ လျှို့ဝှက်နယ်မြေတွေ..." လုချင်းသည် ထိုစကားများကို စဉ်းစားခန်းဝင်သွားလေသည်။

"ဟုတ်တယ်။ တကယ်တော့ ရှေးဟောင်း မသေမျိုးကျင့်ကြံခြင်းခေတ် အလယ်ပိုင်းကနေ နှောင်းပိုင်းအထိ လျှို့ဝှက်နယ်မြေတွေက ပိုပိုပြီး အရေးပါလာခဲ့ကြတယ်။ ကျင့်ကြံခြင်းလောကရဲ့ အရင်းအမြစ်တွေက အချိန်ကြာလာတာနဲ့အမျှ ကုန်ခန်းလာခဲ့ပြီး နေရာလွတ်တွေကြားထဲမှာ နက်နက်ရှိုင်းရှိုင်း ပုန်းကွယ်နေတဲ့ ဒီလျှို့ဝှက်နယ်မြေတွေကနေပဲ ရှားပါးရတနာတွေကို ဆက်လက်ထုတ်လုပ်ပေးနိုင်ခဲ့တော့တာကိုး။ ပိုင်ရှင်မရှိတဲ့ အလယ်အလတ် သို့မဟုတ် အကြီးစား လျှို့ဝှက်နယ်မြေတစ်ခု ပေါ်လာတိုင်း ကျင့်ကြံခြင်းလောကမှာ သွေးထွက်သံယို ပဋိပက္ခတွေ မလွဲမသွေ ဖြစ်ပေါ်စေခဲ့တယ်လေ"

"လီဟော်ဂိုဏ်းကရော"

"လီဟော်ဂိုဏ်းက တစ်ချိန်တုန်းက အလယ်အလတ်တန်းစား လျှို့ဝှက်နယ်မြေတစ်ခုကို ထိန်းချုပ်ခဲ့ဖူးပါတယ်။ ဒါပေမဲ့ အခုတော့ အဲဒီအကြောင်း မတွေးပါနဲ့တော့။ ရှေးခေတ်ကာလတွေကစပြီး ဝိညာဉ်စွမ်းအင်တွေ စပြီးတော့ ဆုတ်ယုတ်လာတာနဲ့အမျှ ဂိုဏ်းကြီးတွေ ထိန်းချုပ်ထားတဲ့ လျှို့ဝှက်နယ်မြေတွေ အားလုံးက ပြိုကျပျက်စီးမယ့် လက္ခဏာတွေ ပြသလာခဲ့တယ်လေ။ ဒီတော့ လျှို့ဝှက်နယ်မြေထဲကို ဝိညာဉ်လက်နက်တစ်ခု ပေါင်းစပ်ထည့်သွင်းလိုက်တာမျိုးကလွဲရင် ပျက်စီးမယ့်အရေးကို တားဆီးဖို့ တခြားနည်းလမ်း မရှိတော့ဘူးလေ။ ဒါပေမဲ့ ဝိညာဉ်လက်နက်တွေက မယုံနိုင်လောက်အောင် ရှားပါးပြီး အချမ်းသာဆုံး၊ အဆင့်အမြင့်ဆုံး ဂိုဏ်းတွေကလွဲရင် တခြားဘယ်ဂိုဏ်းမှ ဒီလောက် ဇိမ်ခံနိုင်တဲ့ အခွင့်အရေး မရှိကြဘူး။ လီဟော်ဂိုဏ်းမှာဆိုရင်လည်း ဒီလိုလက်နက်မျိုး တစ်ခုပဲရှိခဲ့ပြီး အဲဒါကို သူတို့ အသုံးပြုနိုင်ခဲ့မှာ မဟုတ်ဘူး။ အဲ့ဒါကြောင့် အဲဒီလျှို့ဝှက်နယ်မြေက လွန်ခဲ့တဲ့ နှစ်သောင်းပေါင်းများစွာကတည်းက ပျောက်ကွယ်သွားလောက်ပါပြီ"

"နှမြောစရာပဲ" လုချင်းက နောင်တရစွာဖြင့် သက်ပြင်းချလိုက်လေသည်။

အကယ်၍ ထိုလျှို့ဝှက်နယ်မြေသာ တည်ရှိနေသေးပြီး သူက ထိန်းချုပ်နိုင်မည်ဆိုပါက အနာဂတ်စိန်ခေါ်မှုများကို ရင်ဆိုင်ရာတွင် သူ့အတွက် များစွာ ပိုမိုယုံကြည်မှု ရှိလာပေမည်။

"သခင်လေး အရမ်းကြီး စိတ်မကောင်းဖြစ်နေစရာ မလိုပါဘူး" ဟု ယန် က ရယ်မောလိုက်သည်။ "ကျုပ်ပြောခဲ့သလိုပဲ၊ လျှို့ဝှက်နယ်မြေတွေက ဒီလောကကြီးရဲ့ အတက်အကျတွေနဲ့အတူ ပေါ်လာလိုက်၊ ပျောက်သွားလိုက် ဖြစ်တတ်ပါတယ်။ အခု လောကကြီးက ပြောင်းလဲနေပြီး ဝိညာဉ်စွမ်းအင်တွေ ပြန်လည်နိုးထလာနေပြီဆိုတော့ သတ်မှတ်ထားတဲ့ သိပ်သည်းဆတစ်ခုကို ရောက်လာတဲ့အခါ ကျ လျှို့ဝှက်နယ်မြေအသစ်တွေ သေချာပေါက် ထပ်ပေါ်လာပါလိမ့်မယ်။ သခင်လေးရဲ့ စွမ်းဆောင်ရည်တွေနဲ့ဆိုရင် လျှို့ဝှက်နယ်မြေ တစ်ခု၊ နှစ်ခုလောက် သိမ်းပိုက်ဖို့ဆိုတာ ပြဿနာ မဟုတ်လောက်ပါဘူး"

"အနာဂတ်ကိစ္စတွေကိုတော့ အချိန်တန်ရင် ဖြေရှင်းကြတာပေါ့" လုချင်းက ခေါင်းခါရင်း ပြန်ပြောလိုက်ပြီး ထိုသို့သော ကြီးမားသည့် ကတိစကားများကြောင့် လမ်းချော်မသွားစေရန် သတိထားလိုက်လေသည်။

လျှို့ဝှက်နယ်မြေများ ပြန်လည်ပေါ်ပေါက်လာရန် လောကကြီးက မည်သည့်အချိန်တွင် အလုံအလောက် ပြောင်းလဲတိုးတက်လာမည်ကို ဘယ်သူသိနိုင်မည်နည်း။ အကယ်၍ နှစ်ရာပေါင်း၊ ထောင်ပေါင်းများစွာ ကြာမြင့်မည်ဆိုပါက ယခုအချိန်တွင် တွေးနေခြင်းသည် အချည်းနှီးသာ ဖြစ်ပေမည်။

သို့သော်လည်း ယန် ၏ စကားများက လုချင်းအတွက် တန်ဖိုးရှိသော ဗဟုသုတများကို ချန်ထားခဲ့လေ၏။ အနည်းဆုံးတော့ ရွှမ်ခုန်းဘုရားကျောင်း၏ အခြေခံအုတ်မြစ်များသည် သူ စိုးရိမ်ခဲ့သလောက် မကြောက်မက်ဖွယ် မကောင်းကြောင်း ယခု သူ သိသွားလေပြီပင်။

အကယ်၍ လျှို့ဝှက်နယ်မြေထဲတွင် နှစ်သောင်းပေါင်းများစွာ အသက်ရှင်နေထိုင်ခဲ့သည့် ရှေးဟောင်း ဘီလူးကြီးများ တစ်အုပ်လုံး ပုန်းကွယ်နေမည်ဆိုပါက သူ ထွက်ပြေးရန် အမှန်တကယ် စဉ်းစားရပေလိမ့်မည်။

ရှေးဟောင်း မသေမျိုးကျင့်ကြံခြင်းလောကနှင့် ပတ်သက်သည့် အချက်အလက်များကို ယန် ထံမှ ထပ်မံရယူကာ သူ၏အမြင်ကို ကျယ်ပြန့်စေပြီးနောက် လုချင်းသည် လီဟော်ဒယ်အိုးကို သိမ်းဆည်းလိုက်ပြီး ရွာသို့ ပြန်ရန် ပြင်ဆင်လိုက်တော့၏။

ယခုတစ်ကြိမ်တွင် ယန် နှင့် ဆက်ဆံရေး ပိုမိုကောင်းမွန်လာသဖြင့် လုချင်းသည် ၎င်း၏အာရုံများကို မပိတ်ဆို့တော့ဘဲ ပြင်ပလောကကို လေ့လာခွင့် ပြုထားလိုက်သည်။

"ဒီလောက် ခေါင်ကျတဲ့နေရာမှာ မြင့်မြတ်သော ဂါထာမန္တန်ဂိုဏ်းရဲ့ ခြေကုပ်စခန်းတစ်ခု ရှိနေလိမ့်မယ်လို့ ကျုပ် တစ်ခါမှ မတွေးမိခဲ့ဘူး။ ကျုပ် အိပ်စက်သွားပြီးနောက်ပိုင်း မသေမျိုးကျင့်ကြံခြင်းလောကမှာ အရေးကြီးတဲ့ အဖြစ်အပျက်တွေ အများကြီး ဖြစ်ခဲ့တဲ့ပုံပဲ" ချိုင့်ဝှမ်းထဲမှ ထွက်လာစဉ် ပတ်ဝန်းကျင်ကို အာရုံခံမိသောအခါ ယန် က ဆိုလေသည်။

"မြင့်မြတ်သော ဂါထာမန္တန်ဂိုဏ်းက ရှေးခေတ်တုန်းက အရမ်းနာမည်ကြီးခဲ့တာလား" လုချင်းက မေးလိုက်သည်။

"ဒါပေါ့။ မြင့်မြတ်သော ဂါထာမန္တန်ဂိုဏ်းက လူနည်းပေမဲ့ အကြွင်းမဲ့ ပါရမီရှင်တွေနဲ့ပဲ ပြည့်နေတာလေ။ တခြား ထိပ်တန်းဂိုဏ်းတွေက အဓိကတပည့်တွေတောင်မှ သူတို့နဲ့ယှဉ်ရင် မကြာခဏဆိုသလို အဆင့်နိမ့်သွားကြတယ်။ ဒီဂိုဏ်းက အရမ်းကို လျှို့ဝှက်ဆန်းကြယ်ပြီး လောကကြီးအောက်က အရာခပ်သိမ်းဆီကနေ သင်ယူတယ်ဆိုတဲ့ ဒဿနကို ကျင့်သုံးကြတယ်။ သူတို့က ဂါထာမန္တန်တွေနဲ့ ဝင်္ကပါအစီအရင်တွေမှာ အထူးကျွမ်းကျင်ကြတယ်။ တူညီတဲ့ ဂါထာမန္တန် ဒါမှမဟုတ် ဝင်္ကပါကို သူတို့တပည့်တွေက အသုံးပြုရင် သိသိသာသာကို ပိုပြီး အားကောင်းကြတယ်လေ။ အဲဒီခေတ်တုန်းက မြင့်မြတ်သော ဂါထာမန္တန်ဂိုဏ်းက မသေမျိုးကျင့်ကြံခြင်းလောကမှာ အင်အားအကြီးဆုံး အဖွဲ့အစည်းတွေထဲက တစ်ခုမလို့ သူတို့ကို သွားရန်စရဲတဲ့သူ ရှားတယ်"

မြင့်မြတ်သော ဂါထာမန္တန်ဂိုဏ်းမှ တပည့်များသည် ဂါထာများနှင့် ဝင်္ကပါအစီအရင်များကို ပိုမိုအားကောင်းစွာ အသုံးပြုနိုင်ကြောင်း ယန် ပြောသည်ကို ကြားသောအခါ၌ လုချင်းသည် သူ၏ မျက်ခုံးအလယ်ရှိ ဝိညာဉ်ဂါထာကို ချက်ချင်း သတိရသွားလေသည်။

ဂါထာများနှင့် ဝင်္ကပါများကို မြှင့်တင်ပေးနိုင်သည့် ဝိညာဉ်ဂါထာ၏ ထူးခြားသောစွမ်းရည်ကြောင့် ပိုမိုအားကောင်းလာရခြင်းဖြစ်သည်ဟူသော အစစ်အမှန် အကြောင်းရင်းကို သူ သိထားပါ၏။

သို့သော်လည်း သူက ဤအကြောင်းကို နှုတ်မှဖွင့်မပြောဘဲ အကြောင်းအရာကို ပြောင်းလိုက်သည်။

"ယန်ချန်ပေ့... အိမ်ပြန်ရောက်ရင် ခင်ဗျားရဲ့ အကူအညီ လိုအပ်လိမ့်မယ်ထင်တယ်။ ဝင်္ကပါတစ်ခု တည်ဆောက်ဖို့အတွက် ကိရိယာတချို့ကို သန့်စင်ဖန်တီးချင်လို့ပါဗျ..."

လုချင်းသည် ကျိုးလီရွာသို့ ပြန်ရောက်ပြီး သမား‌တော်ကြီးအိမ်ဆီသို့ ချဉ်းကပ်လာသောအခါ သာယာသော အံ့သြဖွယ်ရာတစ်ခုက သူ့ကို စောင့်ကြိုနေလေသည်။

ခြံဝင်းထဲမှ အမည်းရောင်ပုံရိပ်တစ်ခု ရုတ်တရက် ခုန်ထွက်လာပြီး သူ၏ရင်ခွင်ထဲသို့ ခုန်ဝင်ကာ သူ၏ရင်ဘတ်ကို ခေါင်းဖြင့် ပွတ်သပ်နေလေ၏။

"ရှောင်လီ... နိုးပြီလား"

လုချင်းသည် ရှောင်လီကို ပွေ့ဖက်ထားရင်း ဝမ်းသာအားရ ဖြစ်သွားလေသည်။

"အင်း... ဒီမနက်မှ နိုးတာ။ ရှောင်လီက အရမ်းဇိမ်ကျကျ အိပ်လိုက်ရတယ်" လုချင်း၏ စိတ်ထဲတွင် နူးညံ့ချွဲနွဲ့သော အသံလေးတစ်ခု ထွက်ပေါ်လာသည်။

"မင်းကတော့ ကောင်းကောင်းအိပ်လိုက်ရတာပေါ့၊ ဒါပေမဲ့ ရှောင်ယန်ကတော့ မင်းအတွက် အရမ်းကို စိတ်ပူနေခဲ့ရတာလေ" လုချင်းက စနောက်လိုက်သည်။

"ဟင်... ညဝိညာဉ်ကြောင်မြီးတိုလား" ဤအချိန်တွင် ယန် ၏ အံ့သြသွားသောအသံက လုချင်း၏ စိတ်ထဲတွင် ထွက်ပေါ်လာလေသည်။

လုချင်း၏ ရင်ထဲတွင် လှုပ်ရှားသွားသော်လည်း ချက်ချင်း မမေးမြန်းသေးပေ။ ထိုအစား သူသည် ရှောင်လီကို ပွေ့ချီကာ ခြံဝင်းထဲသို့ ဝင်လာခဲ့လေသည်။

မျှော်လင့်ထားသည့်အတိုင်း ရှောင်ယန်က စာလုပ်နေသည်ကို သူတွေ့လိုက်ရပြီး သမားတော်ကြီးချန်နှင့် ဝေ့ရှန်ဟိုင်တို့ကတော့ ကျောက်စားပွဲတစ်ခုတွင် ထိုင်ကာ စစ်တုရင် ကစားနေကြလေသည်။

ရှောင်ယန် အသက်ကြီးလာသည်နှင့်အမျှ သူမ၏ စာသင်ကြားမှုများမှာ ပို၍လေးလံလာပြီး အိမ်စာတွေလည်း ပိုလုပ်လာရလေသည်။

"ကိုကို... ပြန်လာပြီလား" လုချင်းကို မြင်သောအခါ၌ ရှောင်ယန်၏ မျက်နှာလေး ဝင်းလက်သွားလေသည်။ "ရှောင်လီ ရုတ်တရက် အပြင်ပြေးထွက်သွားကတည်းက ကိုကိုပြန်လာပြီဆိုတာ ညီမလေး သိလိုက်တယ်"

"အင်း... အခုလေးတင် ပြန်ရောက်တာ" လုချင်းက ခေါင်းညိတ်ပြလိုက်ပြီးနောက် ဆရာဖြစ်သူနှင့် အခြားသူများကို ဦးညွှတ်လိုက်သည်။ "ဆရာ... ကျွန်တော် ပြန်ရောက်ပါပြီ။ ဂါရဝပြုပါတယ် ဝေ့ချန်ပေ့"

"ကဲ... တောင်ပေါ်ခရီးစဉ်က ဘယ်လိုနေလဲ။ တစ်ခုခု ထူးခြားတာ တွေ့ခဲ့ရလား"

သမားတော်ကြီးချန်သည် လုချင်းက တောင်ပေါ်ရှိ အခြေအနေများကို သွားရောက်စုံစမ်းခြင်းဖြစ်ကြောင်း သိထားသဖြင့် စစ်တုရင်ကစားနေခြင်းကို ရပ်ကာ မေးလိုက်လေသည်။

"တောင်ပေါ်မှာ သိသိသာသာ ပြောင်းလဲမှုတွေ ရှိနေပါတယ်ဗျ" လုချင်း၏ အမူအရာမှာ လေးနက်သွားလေသည်။

"ဆရာ... တောင်ပေါ်က သတ္တဝါတွေက အနည်းနဲ့အများဆိုသလို မျိုးဗီဇပြောင်းလဲနေကြတယ်။ အထူးသဖြင့် အဆိပ်ရှိတဲ့ အင်းဆက်တွေနဲ့ မြွေတွေပေါ့။ သူတို့ရဲ့ အဆိပ်တွေက အရင်ကထက် အများကြီး ပိုပြီး ပြင်းထန်လာကြတယ်ဗျ။ သာမန် သိုင်းပညာရှင်တစ်ယောက်တောင်မှ သူတို့ အကိုက်ခံရရင် အသက်ရှင်နိုင်မှာ မဟုတ်ဘူး"

"အဲဒီလောက်တောင် ဆိုးသလား" သမားတော်ကြီးချန်၏ အမူအရာသည်လည်း လေးနက်သွားလေသည်။ "ဒါဆိုရင်တော့ အနီးအနားက ရွာသားတွေအတွက် သတင်းဆိုးပဲ"

ပတ်ဝန်းကျင် ဆယ်မိုင်ခန့်အတွင်းရှိ ရွာအများစုမှာ ကျိုးလီရွာကဲ့သို့ပင် လယ်ယာလုပ်ငန်းဖြင့် အသက်မွေးဝမ်းကျောင်း ပြုကြလေသည်။ သို့သော် တချို့ရွာများမှာမူ အသက်မွေးဝမ်းကျောင်းအတွက် တောင်ပေါ်တွင် ဆေးမြစ်ရှာဖွေခြင်းနှင့် အမဲလိုက်ခြင်းတို့ကို မှီခိုကြရ၏။

အကယ်၍ တောင်ပေါ်ရှိ အခြေအနေများမှာ လုချင်းပြောသကဲ့သို့ ပြင်းထန်နေမည်ဆိုပါက အဆိုပါ ရွာသားများအတွက် အမှန်တကယ် ဘေးဒုက္ခရောက်စေမည်ဖြစ်သည်။

"လူတွေက တောင်ပေါ်ကို နက်နက်ရှိုင်းရှိုင်း ဝင်လေ့မရှိကြတော့ လောလောဆယ် တောင်ပေါ်က အခြေအနေက သိပ်မဆိုးသေးပါဘူး။ နက်နက်ရှိုင်းရှိုင်း မဝင်သရွေ့တော့ အဆင်ပြေမှာပါ။ ဒါပေမဲ့ အချိန်ကြာလာတာနဲ့အမျှ အဆိပ်ရှိတဲ့ သတ္တဝါတွေက ပိုပြီး ဉာဏ်ရည်မြင့်လာပြီး တောင်ပေါ်ကနေ အပြင်ကို ထွက်လာကြမှာကိုတော့ ကျွန်တော် စိုးရိမ်မိတယ်။ အဲဒါက တကယ်ကို အန္တရာယ်ရှိလိမ့်မယ်"

ထိုအခါ သမားတော်ကြီးချန်၏ ရင်ထဲတွင် ဒိန်းခနဲ ဖြစ်သွားလေသည်။ လုချင်း၏ စကားများမှာ အကြောင်းပြချက်မရှိဘဲ ပြောနေခြင်းမဟုတ်ကြောင်း သူ သိပါ၏။

အကယ်၍ အဆိပ်ရှိသော သတ္တဝါများသည် အဆိပ်ပိုပြင်းလာရုံသက်သက်ဆိုပါက သိပ်ပြီး စိုးရိမ်စရာ မရှိလှပေ။ သူတို့၏ သဘာဝဗီဇအရ သူတို့၏ နယ်မြေအတွင်းမှာသာ နေထိုင်ကြမည်ဖြစ်သည်။

သို့သော် အမှန်တကယ် စိုးရိမ်ရသည်မှာ ဤသတ္တဝါများသည် ပြန်လည်နိုးထလာသော ဝိညာဉ်စွမ်းအင်များမှ ဉာဏ်ရည်များ ရရှိလာမည်ဆိုပါက မည်သည့်အရာမဆို ဖြစ်လာနိုင်ပါ၏။

"မင်း ဘာလုပ်ဖို့ စီစဉ်ထားလဲ"

သမားတော်ကြီးချန်က မေးလိုက်လေသည်။

"အဆိပ်ရှိတဲ့ သတ္တဝါတွေ ကျွန်တော်တို့ မသိလိုက်ဘဲ အပြင်ကို တွားသွားထွက်လာတာမျိုး မဖြစ်အောင် ကြိုတင်သတိပေးဖို့နဲ့ ကာကွယ်ဖို့အတွက် ရွာပတ်လည်မှာ ဝင်္ကပါအစီအရင်တစ်ခု တည်ဆောက်ဖို့ ရည်ရွယ်ထားပါတယ်"

လုချင်းက သူ၏ အစီအစဉ်ကို ရှင်းပြလိုက်လေသည်။

"ဝင်္ကပါအစီအရင် တည်ဆောက်မယ်... မင်း တကယ် လုပ်နိုင်မယ်လို့ သေချာလို့လား" သမားတော်ကြီးချန်မှာ အနည်းငယ် အံ့အားသင့်သွားလေသည်။

သူသည် လုချင်း ပေးထားသော ကျောက်စိမ်းပြားများမှ အခြေခံအချက်အလက်များစွာကို သင်ယူထားပြီးဖြစ်ရာ ကျင့်ကြံခြင်းနယ်ပယ်တွင် အတွေ့အကြုံမရှိသူတစ်ယောက် မဟုတ်တော့ပေ။ ရွာတစ်ရွာလုံးကို လွှမ်းခြုံနိုင်လောက်အောင် ကြီးမားသော ဝင်္ကပါတစ်ခု တည်ဆောက်ရန်မှာ လွယ်ကူသော ကိစ္စမဟုတ်ကြောင်း သူ သိထားပါ၏။

"လုံးဝ ယုံကြည်ချက်ရှိတယ်လို့တော့ မပြောနိုင်ပါဘူး၊ ဒါပေမဲ့ ကျွန်တော် ကြိုးစားကြည့်ပါမယ်" လုချင်းက သတိထား၍ ပြန်ဖြေလိုက်လေသည်။

"ဒါပေမဲ့ ဒါကို အကောင်အထည်ဖော်ဖို့ ဝေ့ချန်ပေ့ရဲ့ အကူအညီတော့ လိုအပ်လိမ့်မယ်"

" ဟေ... သခင်လေးက ဒီအဘိုးကြီးဆီက ဘယ်လိုအကူအညီမျိုးများ လိုအပ်တာလဲ" ဝေ့ရှန်ဟိုင်သည် လုချင်းက ဝင်္ကပါတစ်ခု တည်ဆောက်မည့်အကြောင်း ပြောကတည်းက စိတ်ဝင်စားနေခဲ့ပြီးဖြစ်သည်။ ယခု သူ၏အကူအညီ လိုအပ်မည်ဟု ကြားသောအခါ အမြန်တုံ့ပြန်လိုက်လေသည်။

"သံမဏိသန့်သန့်နဲ့ ကျောက်စိမ်း အများကြီး လိုအပ်လိမ့်မယ်၊ ပြီးတော့..."

လုချင်းသည် သူလိုအပ်သော ပစ္စည်းများကို ပြောပြရင်း ရှောင်ယန်၏ အိမ်စာစာရွက်များထဲမှ စာရွက်တစ်ရွက်ကို ဆွဲယူကာ စာရင်းတစ်ခု ရေးချလိုက်လေသည်။

"ဖြစ်နိုင်ရင် ဝေ့ချန်ပေ့က ဒီပစ္စည်းတွေကို အမြန်ဆုံး စုဆောင်းပေးနိုင်မယ်လို့ မျှော်လင့်ပါတယ်"

လုချင်းသည် စာရင်းကို ဝေ့ရှန်ဟိုင်အား ကမ်းပေးလိုက်လေသည်။

"စိတ်ချပါ သခင်လေး။ သုံးရက်အတွင်း အားလုံး စုဆောင်းပေးပါ့မယ်"

ဝေ့ရှန်ဟိုင်သည် တွန့်ဆုတ်ခြင်းမရှိဘဲ ကတိပေးလိုက်၏။

လုချင်းတောင်းဆိုသော ပစ္စည်းများမှာ အထူးရှားပါးလှသည်တော့ မဟုတ်ပေ။ အရေအတွက် အများအပြား လိုအပ်ရုံသာဖြစ်ပြီး ငွေကုန်ကြေးကျတော့ အနည်းငယ် များနိုင်လေသည်။

သို့သော် ဝေ့ရှန်ဟိုင်အတွက်မူ ငွေကြေးသည် ပြဿနာမဟုတ်ပေ။

ပြောင်းလဲနေသော ဤအချိန်ကာလတွင် လောကကြီးက ပြောင်းလဲကာ ဝိညာဉ်စွမ်းအင်များ ပြန်လည်နိုးထလာနေပြီး အနာဂတ်တွင် မည်သို့ဖြစ်လာမည်ကို မည်သူမျှ မသိနိုင်ပေ။ ဝေ့မိသားစုတွင် မွေးရာပါနယ်ပယ် ကျင့်ကြံသူ နှစ်ဦးရှိသော်လည်း သူတို့၏ ရှင်သန်မှုကို သေချာစေရန် လိုအပ်နေဆဲဖြစ်သည်။

လုချင်းကဲ့သို့သော အင်အားကြီးမားသည့် နောက်ခံကို အားကိုးခြင်းသည် သူတို့၏ အနာဂတ်ကို လုံခြုံစေရန် အကောင်းဆုံးနည်းလမ်းဖြစ်ကြောင်း ဝေ့ရှန်ဟိုင် သိပါ၏။

ဝေ့ရှန်ဟိုင်သည် ပစ္စည်းများ စုဆောင်းရန် သူ၏မိသားစုအား ညွှန်ကြားရန် ထွက်သွားပြီးနောက် လုချင်းသည် သူ၏အာရုံကို ရှောင်လီထံသို့ ပြောင်းလိုက်လေသည်။

အချိန်ကြာမြင့်စွာ အိပ်စက်ပြီးနောက်တွင် ဤသတ္တဝါလေးမှာ အပြောင်းအလဲမရှိသကဲ့သို့ ထင်ရသော်လည်း ၎င်း၏ သက်စောင့်စွမ်းအင်တွင် အခြေခံကျသော အသွင်ပြောင်းလဲမှုတစ်ခုကို လုချင်း ခံစားနိုင်လေသည်။

သို့သော် ရှောင်လီ၏ လက်ရှိအခြေအနေကို စစ်ဆေးရန် သူ၏နတ်မျက်စိစွမ်းရည်ကို အသက်သွင်းလိုက်မည့်အချိန်တွင်ပင် ယန် ၏ အသံက သူ၏စိတ်ထဲတွင် ထပ်မံထွက်ပေါ်လာလေသည်။ "သခင်လေး... ညဝိညာဉ်ကြောင်မြီးတိုလို ရှားပါးတဲ့ သားရဲမျိုးကိုတောင် ယဉ်ပါးအောင် လုပ်နိုင်တာ တကယ့်ကို ကံကောင်းတာပဲ"

"ယန်ချန်ပေ့... ရှောင်လီရဲ့ ဇာစ်မြစ်ကို သိလို့လား"

လုချင်းက သူတို့၏ ဝိညာဉ်ချိတ်ဆက်မှုမှတစ်ဆင့် မေးလိုက်လေသည်။

"ရှောင်လီ ဆိုတာ သူ့နာမည်လား။ သင့်တော်တဲ့ နာမည်ပါပဲ။ ညဝိညာဉ်ကြောင်မြီးတိုဆိုတာ သဘာဝအားဖြင့် မီးဓာတ်ကို ယိမ်းယိုင်တတ်တဲ့အတွက် 'လီ' ဆိုတဲ့ စာလုံးနဲ့ အရမ်းကိုက်ညီပါတယ်"

ယန် က ချီးမွမ်းလိုက်ပြီးနောက် ဆက်ပြောလေသည်။ "သူ့ရဲ့ ဇာစ်မြစ်နဲ့ ပတ်သက်ပြီး ပြောရရင် ကျုပ် မှန်းတာ မမှားဘူးဆိုရင် သူက ရှေးဟောင်း မသေမျိုးကျင့်ကြံခြင်းခေတ်က အမြင့်မြတ်ဆုံး မိစ္ဆာဧကရာဇ်ရဲ့ လက်အောက်ခံ မိစ္ဆာဘုရင် ဆယ့်နှစ်ပါးထဲက တစ်ပါးဖြစ်တဲ့ ညဉ့်ဘုရင်ရဲ့ မျိုးဆက်ပဲ ဖြစ်ရမယ်"

"ညဉ့်ဘုရင် ဟုတ်လား" လုချင်း၏ ရင်ထဲတွင် အနည်းငယ် တုန်လှုပ်သွား၏။

....

အခန်း ၃၃၆ - တိုင်များ သန့်စင်ခြင်းနှင့် ကောင်းကင်ယံမှ အပြောင်းအလဲများ

"ယန်ချန်ပေ့... ရှောင်လီရဲ့ အဖေက ညဉ့်ဘုရင်လို့ ခေါ်တဲ့သူ ဖြစ်နိုင်တယ်လို့ ပြောလိုက်တာလား"

"ဟုတ်တယ်။ ရှေးဟောင်း မသေမျိုးကျင့်ကြံခြင်းခေတ်မှာ လူသားကျင့်ကြံသူတွေက အင်အားကြီးမားတယ်ဆိုပေမဲ့ သူတို့ကချည်း တစ်ခုတည်းသော လွှမ်းမိုးနိုင်တဲ့ အင်အားစု မဟုတ်ဘူးလေ

သူတို့နဲ့ ယှဉ်နိုင်တဲ့ တခြား အဓိက အင်အားစု အနည်းဆုံး နှစ်ခုလောက် ရှိသေးတယ်။ အဲဒါတွေကတော့ နတ်သားရဲမျိုးနွယ်နဲ့ ပင်လယ်မျိုးနွယ်ပဲ။

ပင်လယ်မျိုးနွယ်နဲ့ ပတ်သက်လို့တော့ သူတို့က ကျယ်ပြောလှတဲ့ သမုဒ္ဒရာတွေကို သိမ်းပိုက်ထားပြီး ကုန်းပေါ်ကို တက်လာခဲတယ်။ ပင်လယ်က သူတို့ရဲ့ အိမ်ပဲလေ။

သ‌န္ဓေသားဝိညာဉ်အဆင့်အထက်က အင်အားကြီးမားတဲ့ ပုဂ္ဂိုလ်တွေကလွဲရင် သူတို့ရဲ့ နယ်မြေထဲကို ခြေချရဲတဲ့ ကျင့်ကြံသူက ရှားတယ်။

နတ်သားရဲမျိုးနွယ်နဲ့ ပတ်သက်လို့တော့... ပင်လယ်မျိုးနွယ်နဲ့ နတ်သားရဲမျိုးနွယ် နှစ်ခုစလုံးက မိစ္ဆာသားရဲတွေနဲ့ ဝိညာဉ်သားရဲတွေ အမျိုးအစားထဲမှာ ပါဝင်ပြီး တစ်မျိုးက ပင်လယ်ထဲမှာ နေထိုင်တယ်၊ အခြားတစ်မျိုးကတော့ ကုန်းပေါ်မှာပဲ အဓိက နေထိုင်ကြတာပေါ့။

သူတို့နှစ်ခုကြားက ဆက်ဆံရေးက သိပ်မကြာခဏ မရှိလှသလို ပဋိပက္ခတချို့တောင် ရှိခဲ့ဖူးတဲ့အတွက် သီးခြား အင်အားစုနှစ်ခုအဖြစ် ကွဲထွက်သွားကြတာပဲ။

အဲဒီလိုမှ မဟုတ်ရင် ဒီနှစ်ခုသာ ပေါင်းစည်းသွားမယ်ဆိုရင်တော့ လူသားကျင့်ကြံသူတွေအနေနဲ့ သူတို့ရဲ့ အစောပိုင်းကာလတွေမှာ အသက်ရှင်ရပ်တည်ဖို့ အများကြီး ပိုပြီး ခက်ခဲသွားလိမ့်မယ်လေ"

ယန် သည် ခေတ္တရပ်နားလိုက်ပြီးနောက် ဆက်ပြောလေ၏။

"ကျုပ်ပြောခဲ့တဲ့ ညဉ့်ဘုရင်နဲ့ ပတ်သက်လို့တော့ သူက ကုန်းပေါ်က နတ်သားရဲဧကရာဇ်ရဲ့ လက်အောက်ခံ မိစ္ဆာဘုရင် ဆယ့်နှစ်ပါးထဲက တစ်ပါးလေ။ သူ့ရဲ့ အစစ်အမှန်ပုံစံက ညဝိညာဉ်ကြောင်မြီးတိုပါပဲ။

သူက ကြောင်မြီးတိုမျိုးနွယ်ကို အခြားသော မိစ္ဆာသားရဲအများကြီးနဲ့အတူတူ အုပ်ချုပ်တယ် ပြီးတော့ သူ့ရဲ့ ခွန်အားက လူသား သ‌န္ဓေသားဝိညာဉ်အဆင့် ကျွမ်းကျင်သူတစ်ယောက်နဲ့ အတူတူပဲ"

"ကြောင်မြီးတိုမျိုးနွယ် ရှိတယ်ဆိုရင် ရှောင်လီက ညဉ့်ဘုရင်ရဲ့ မျိုးဆက် ဖြစ်ချင်မှ ဖြစ်မှာပေါ့" လုချင်းက မေးခွန်းထုတ်လိုက်လေသည်။

"မဟုတ်ဘူး။ ညဝိညာဉ်ကြောင်မြီးတိုတွေက ကြောင်မြီးတိုမျိုးနွယ်ထဲမှာတောင် အင်မတန် ရှားပါးတယ်။ တစ်ကောင်တောင် မပေါ်လာဘဲ ခေတ်တစ်ခေတ် ကုန်ဆုံးသွားတာမျိုးတောင် ဖြစ်နိုင်တယ်။

ကျုပ်ရဲ့ခေတ်တုန်းက ကျုပ် အိပ်မပျော်သွားခင်အချိန်အထိ နတ်သားရဲမျိုးနွယ် တစ်ခုလုံးမှာ ညဝိညာဉ်ကြောင်မြီးတိုဆိုလို့ နှစ်ကောင်ပဲ ရှိခဲ့တယ်လေ။ ပြီးတော့ သူတို့က အဖိုအမ စုံတွဲ။

ဒါကြောင့် ရှောင်လီက သေချာပေါက် သူတို့ရဲ့ မျိုးဆက်ပဲ ဖြစ်ရမယ်"

ယန် သည် ယုံကြည်မှုအပြည့်ဖြင့် ပြောလိုက်လေသည်။

လုချင်းလည်း တိတ်ဆိတ်သွား၏။ အကယ်၍ အဲဒါသာ အမှန်ဆိုလျှင် အလွန်ဖြစ်နိုင်ချေ များပါသည်။

"ဒါပေမဲ့ ရှောင်လီက ဘာလို့ ဒီကိုရောက်နေတာလဲ။ ကျုပ် ကြည့်ရသလောက် သူက ငယ်ရွယ်တဲ့ပုံစံပဲ ရှိသေးတယ် မဟုတ်ဘူးလား"

ယန်ခင်မျာ တွေဝေသွားပုံရ၏။

"ရှောင်လီက တကယ်ကို ငယ်ရွယ်ပါသေးတယ်။ လွန်ခဲ့တဲ့ နှစ်နှစ်ကမှ သူ့ကို ကျွန်တော် အမှတ်မထင် တွေ့ခဲ့တာလေ"

လုချင်းသည် ရှောင်လီနှင့် မည်သို့တွေ့ဆုံခဲ့ကြောင်း အကျဉ်းချုပ် ပြောပြလိုက်ပြီး ရှောင်လီတွင် ၎င်း၏ ဇာစ်မြစ်နှင့် ပတ်သက်သည့် မှတ်ဉာဏ်များ မရှိကြောင်းကိုလည်း ထည့်ပြောလိုက်လေ၏။

"ကျုပ် အိပ်ပျော်သွားပြီးနောက်ပိုင်း မသေမျိုးကျင့်ကြံခြင်းလောကမှာ တကယ်ပဲ ကြီးမားတဲ့ အပြောင်းအလဲတွေ အများကြီး ဖြစ်ခဲ့တဲ့ပုံပဲ" ယန်က သက်ပြင်းချလိုက်လေသည်။ "ဒါမှမဟုတ်ရင် အဲဒီနှစ်ယောက်ကလည်း သူတို့ရဲ့ သမီးလေးကို တစ်ကောင်တည်း ထားရစ်ခဲ့မှာ မဟုတ်ဘူးလေ

ဝိညာဉ်စွမ်းအင်တွေ ခမ်းခြောက်သွားပြီး မဟာကပ်ဘေးကြီး ကျရောက်လာတဲ့အချိန်မှာ အဖွဲ့အစည်း အသီးသီးက ဘယ်လိုများ ခုခံခဲ့ကြလဲဆိုတာကို ဘယ်သူမှ မသိကြဘူး။

သူတို့ ဒီလောကကြီးကနေ အောင်မြင်စွာ ထွက်ခွာသွားနိုင်ခဲ့ကြသလား ဒါမှမဟုတ် ကပ်ဘေးထဲမှာပဲ ပျက်စီးသွားခဲ့ကြသလား"

လုချင်းမှာတော့ တိတ်ဆိတ်နေဆဲပင်။

နှစ်သောင်းပေါင်းများစွာ အသက်ရှင်ခဲ့သော ယန်ကဲ့သို့သော သတ္တဝါပင် ဘာတွေဖြစ်ခဲ့သည်ကို မသိပါက သူက မည်သို့သိနိုင်မည်နည်း။

"ချန်ပေ့... အကယ်၍ ရှောင်လီကသာ အဲဒီနှစ်ယောက်ရဲ့ သမီးတကယ်ဖြစ်ခဲ့ရင် သူက လွန်ခဲ့တဲ့ နှစ်သောင်းပေါင်းများစွာ ကတည်းက မွေးဖွားခဲ့တာ ဖြစ်ရမယ်။ ဒါပေမဲ့ ဘာကြောင့် သူက အခုထိ ငယ်ရွယ်တဲ့ပုံစံ ရှိနေသေးတာလဲ"

"အဲဒါ နားလည်ဖို့ သိပ်မခက်ပါဘူး။ ညဉ့်ဘုရင်က ရှောင်လီ မွေးမွေးချင်းမှာပဲ ရှားပါးရတနာတစ်ခုခုကို သုံးပြီး ချိတ်ပိတ်ထားခဲ့တာ ဖြစ်နိုင်တယ်။

ညဝိညာဉ်ကြောင်မြီးတိုတွေဟာ မီးဓာတ်ရော နေရာလွတ်ဓာတ်ရော ပိုင်ဆိုင်ထားပြီး သဘာဝအရ ထူးခြားတဲ့ ဝိညာဉ်အာရုံကို ပိုင်ဆိုင်ထားတယ်ဆိုတာ မင်း နားလည်ရမယ်။

သူတို့က သာမန်လူတွေ ရှာတွေ့ဖို့ ခက်ခဲတဲ့ ရတနာတွေကိုတောင် အလွယ်တကူ ရှာဖွေတွေ့ရှိနိုင်တယ်လေ။

ညဉ့်ဘုရင်ရဲ့ နက်နဲတဲ့ ကျင့်ကြံမှုနဲ့ဆိုရင် ရတနာရှာဖို့ဆိုတာ လွယ်ကူတဲ့ ကိစ္စတစ်ခုပဲ။

လျှို့ဝှက်နယ်မြေတွေ ပေါ်လာတဲ့အခါတိုင်း ရတနာအများဆုံး စုဆောင်းနိုင်ခဲ့တာ ညဉ့်ဘုရင်ပဲဆိုတာ ကျုပ် မှတ်မိနေသေးတယ်။

ဒါကြောင့် ရှောင်လီကို နှစ်သောင်းပေါင်းများစွာ ချိတ်ပိတ်ထားနိုင်တဲ့ ရတနာတစ်ခု ပိုင်ဆိုင်ထားတယ်ဆိုတာ လုံးဝ ဖြစ်နိုင်တယ်။

မင်းရဲ့ ညဝိညာဉ်ကြောင်မြီးတိုကို ကောင်းကောင်း ဂရုစိုက်ပါ။

သူက တကယ့် ကောင်းချီးမင်္ဂလာတစ်ခုပဲ။ ကောင်းကင်နဲ့ မြေကြီးရဲ့ စည်းမျဉ်းတွေ ပြောင်းလဲလာပြီး လျှို့ဝှက်နယ်မြေတွေ အများကြီး ပေါ်လာတဲ့အခါ ရှောင်လီက အဲဒီနယ်မြေတွေကို စူးစမ်းရှာဖွေရာမှာ မင်းအတွက် အကြီးမားဆုံး အထောက်အကူ ဖြစ်လာနိုင်တယ်"

ယန် စကားပြောနေစဉ် ၎င်း၏ လေသံတွင် စိတ်ခံစားမှု တစ်ခုခု ပါဝင်နေလေ၏။

လုချင်း၏ ကံတရားမှာ အလွန်ကောင်းမွန်လွန်းလှသည်။

ဝိညာဉ်လက်နက်များစွာကို ပိုင်ဆိုင်ထားရုံသာမက ယခုအခါ ညဝိညာဉ်ကြောင်မြီးတိုကဲ့သို့ ရှားပါးသော ဝိညာဉ်သားရဲကိုပါ ယဉ်ပါးအောင် ပြုလုပ်နိုင်ခဲ့ပြီပင်။

ကောင်းကင်နှင့် မြေကြီး၏ စည်းမျဉ်းတွေ အပြည့်အဝ ပြောင်းလဲလာပြီး လျှို့ဝှက်နယ်မြေ အများအပြား ပေါ်ထွက်လာသည့်အခါ သူ မည်မျှလောက်များသော အခွင့်အရေးများကို ရရှိလာမည်ဆိုသည်ကို စိတ်ကူးကြည့်ရန်ပင် ခက်ခဲလှသည်။

ဤအကြောင်းကို တွေးမိသောအခါ ယန်သည် ၎င်း၏ ယခင်က စိတ်ပျက်မှုများအားလုံးကို ဖယ်ရှားပစ်ကာ မျှော်လင့်ချက်များ တဖွားဖွား ပေါ်ပေါက်လာသည်ကို မအောင့်ထားနိုင်တော့ပေ။

ဤကဲ့သို့ ကံကောင်းသော သခင်နောက်သို့ လိုက်ပါခြင်းဖြင့် တစ်နေ့တွင် ၎င်းသည် လှောင်ချိုင့်ထဲမှ အမှန်တကယ် လွတ်မြောက်ကာ လွတ်လပ်ခွင့် ရရှိလာနိုင်ပေသည်။

"ကောင်းချီးမင်္ဂလာတစ်ခု ဟုတ်လား..."

လုချင်းသည် ရှောင်ယန်နှင့် ကစားနေသော ရှောင်လီကို ကြည့်ရင်း နှစ်တစ်ရာသက်တမ်းရှိ ဂျင်ဆင်းကို ငါးနှင့် လဲလှယ်ခဲ့စဉ်က အချိန်ကို ပြန်လည်အမှတ်ရသွားလေသည်။

ခေတ္တမျှ စဉ်းစားပြီးနောက် ဤအကြောင်းကို ရှောင်လီအား မပြောပြရန် သူ ဆုံးဖြတ်လိုက်၏။

ဤအဖြစ်အပျက်များသည် လွန်ခဲ့သော နှစ်သောင်းပေါင်းများစွာက ဖြစ်ပျက်ခဲ့ခြင်းဖြစ်သဖြင့် ရှောင်လီ၏ မိဘများ အသက်ရှင်လျက် ရှိချင်မှ ရှိတော့မည်သာ။

ယခုအချိန်တွင် ပြောပြခြင်းက မလိုအပ်သော စိုးရိမ်ပူပန်မှုများကိုသာ ထပ်တိုးစေလိမ့်မည်။

ညဝိညာဉ်ကြောင်မြီးတို ဇနီးမောင်နှံအနေဖြင့် ရှောင်လီကို ယခုကဲ့သို့ ပူပင်သောကကင်းစွာ နေထိုင်စေချင်မည်မှာ အသေအချာပင်။

...

ဝေ့မိသားစုသည် လျင်မြန်စွာ လှုပ်ရှားကြလေသည်။

လုချင်း လိုအပ်သော ပစ္စည်းများကို စုဆောင်းရန် သုံးရက်ကြာမည်ဟု ဝေ့ရှန်ဟိုင်က ပြောခဲ့သော်လည်း လက်တွေ့တွင်တော့ ဒုတိယနေ့မှာပင် ဝေ့မိသားစုမှ ယာဉ်တန်းတစ်ခုသည် ပစ္စည်းအချို့ကို စတင်ပို့ဆောင်ပေးနေပြီဖြစ်သည်။

"သခင်လေးလု... ဒါက ခရိုင်ထဲက ပန်းပဲဖိုအချို့ဆီကနေ ယာယီစုဆောင်းထားတဲ့ သံမဏိသန့်သန့်တွေပါ။ ဘိုးဘေးရဲ့ အမိန့်အရ သခင်လေးဆီကို အရင်ယူလာပေးတာပါဗျ"

"ကျောက်စိမ်းပစ္စည်းတွေနဲ့ ပတ်သက်လို့တော့ ပြည်နယ်ကနေ လွှဲပြောင်းပေးပို့ထားပြီး နောက်တစ်ရက်၊ နှစ်ရက်အတွင်း ရောက်လာပါလိမ့်မယ်"

သမားတော်ကြီး၏အိမ်တွင် အိမ်တော်ထိန်းကြီးဝေ့က လုချင်းအား ရိုသေစွာ ပြောလာ၏။

ဝေ့မိသားစုသည် ယခုအခါ လုချင်း၏ တောင်းဆိုမှုအားလုံးကို အထူးအလေးထားနေပြီဖြစ်ပြီး ဤသံမဏိသန့်သန့်များကို အိမ်တော်ထိန်းကြီးဝေ့ ကိုယ်တိုင် ကြီးကြပ်၍ ပို့ဆောင်ပေးခြင်းဖြစ်သည်။

"ကျေးဇူးတင်ပါတယ် အိမ်တော်ထိန်းကြီး"

လုချင်းက ယဉ်ကျေးစွာ ကျေးဇူးတင်စကား ဆိုလိုက်ပြီးနောက်၌ သံမဏိသန့်သန့်များကို စစ်ဆေးကြည့်လိုက်လေသည်။

"အားချင်း... ဒီလောက်များတဲ့ သံမဏိသန့်သန့်တွေ လိုအပ်တယ်ဆိုတော့ ဘယ်လိုဝင်္ကပါမျိုးကို မင်း တည်ဆောက်ဖို့ စီစဉ်နေတာလဲ"

အိမ်တော်ထိန်းကြီးဝေ့ ပို့ဆောင်ပေးသော များပြားလှသည့် သံမဏိသန့်သန့်များကို မြင်ပြီး နောက်ထပ် ရောက်လာဦးမည်ဟု ကြားရသောအခါ သမားတော်ကြီးချန်မှာ မအံ့သြဘဲ မနေနိုင်တော့ပေ။

"သိပ်မများပါဘူး" လုချင်းက ခေါင်းခါလိုက်လေသည်။ "ကျွန်တော် သံမဏိတွေကို ထပ်ပြီး သန့်စင်ရဦးမယ်။ နောက်ဆုံးကျရင် သိပ်ကျန်တော့မှာ မဟုတ်ဘူး"

"နှမြောစရာပဲ။ အကြိမ်တစ်ထောင် သန့်စင်ထားတဲ့ သံမဏိသန့်သန့် အစုလိုက်ကိုသာ ရနိုင်မယ်ဆိုရင် ကျွန်တော် သန့်စင်ဖို့ ဒုက္ခခံနေစရာ လိုမှာမဟုတ်ဘူး"

ဤစကားကို ကြားသောအခါ အိမ်တော်ထိန်းကြီးဝေ့က စိတ်ထဲမှ တွေးလိုက်လေသည်။

အကြိမ်တစ်ထောင် သန့်စင်ထားတဲ့ သံမဏိသန့်သန့် အစုလိုက် ဟုတ်လား။ ခရိုင်တစ်ခုလုံးမှာ အဲဒီလိုလုပ်နိုင်တဲ့ ပန်းပဲဖို တစ်ခုမှ မရှိဘူးလေ။

ဝေ့မိသားစုရဲ့ ဘဏ္ဍာတိုက်ထဲမှာတောင် နည်းနည်းလေးပဲ ရှိတာ။

လုချင်းက အစုလိုက်အပြုံလိုက် တစ်ပြိုင်နက်တည်း ရချင်နေတာဆိုတော့ မဖြစ်နိုင်သလောက်ပါပဲ။

ချန်းကျိုး ပြည်နယ်တစ်ခုလုံးကို ရှာရင်တောင် လုံလောက်ချင်မှ လုံလောက်မှာ။လေ။

ဘာပဲဖြစ်ဖြစ် အကြိမ်တစ်ထောင် သန့်စင်ထားတဲ့ သံမဏိဆိုတာ တန်ဖိုးကြီးတဲ့ လက်နက်တွေ ဖန်တီးဖို့ အသုံးပြုတဲ့ ရတနာတစ်ခုဖြစ်ပြီး အမြဲတမ်း ဝယ်လိုအား မြင့်မားနေတာကိုး။

ဒါကို ရရှိတဲ့ သိုင်းပညာရှင်တိုင်းက သူတို့နဲ့ အသင့်တော်ဆုံး လက်နက်အဖြစ် ချက်ချင်း ဖန်တီးကြမှာပဲ။

မသုံးဘဲ သိမ်းထားမယ့်သူက ရှားပါတယ်။

ဒါသည် မျှော်လင့်ချက် သက်သက်သာဖြစ်ကြောင်း လုချင်းလည်း သိလေသည်။

ထို့ကြောင့် အိမ်တော်ထိန်းကြီးဝေ့နှင့် သူ၏လူများ ထွက်သွားပြီးနောက်၌ သူသည် သံမဏိများကို သန့်စင်ရန် ဒယ်အိုးကို ချက်ချင်း ဖွင့်လိုက်လေသည်။

လက်သင်္ကေတတစ်ခုဖြင့် သူ၏ လည်ပင်းတွင် ဆွဲထားသော လက်ညှိုးအရွယ်အစားခန့်ရှိ လီဟော်ဒယ်အိုးလေးသည် တိတ်ဆိတ်စွာ ပျံထွက်လာပြီး လူတစ်ဝက်အရွယ်အစား ဒယ်အိုးအဖြစ် ပြောင်းလဲသွားကာ ခြံဝင်းအတွင်းသို့ ကျဆင်းလာလေသည်။

သမားတော်ကြီးချန်၏ အမူအရာက အနည်းငယ် ပြောင်းလဲသွား၏။

ဤအရာကို အကြိမ်ကြိမ် မြင်ဖူးသော်လည်း မသေမျိုးကျင့်ကြံခြင်း၏ အံ့သြဖွယ် နည်းစနစ်များကို သူ မချီးကျူးဘဲ မနေနိုင်သေးပေ။

"ယန်ချန်ပေ့... ခင်ဗျားကို ထပ်ပြီး ဒုက္ခပေးရဦးမယ်"

"ဘာဒုက္ခမှ မဟုတ်ပါဘူးကွာ။ ငါ့တာဝန်သာ ထားလိုက်"

လုချင်းသည် လီဟော်ဒယ်အိုးထဲသို့ သံမဏိသန့်သန့်များကို တစ်တုံးချင်း ပစ်ထည့်လိုက်လေသည်။

ယန်သည် မည်သည့်ညည်းညူမှုမျှ မရှိဘဲ အားလုံးကို လက်ခံကာ မျိုချလိုက်၏။

၎င်း၏ ကိုယ်ပိုင် နေရာလွတ် ပါရှိသော အရာတစ်ခုအတွက် တောင်တစ်လုံးလုံးကိုပင် အလွယ်တကူ မျိုချနိုင်ရာ သံမဏိသန့်သန့် အနည်းငယ်မျှမှာ ပြောပလောက်မည် မဟုတ်ပေ။

သံမဏိအားလုံးကို မျိုချပြီးနောက် ယန်သည် ဝိညာဉ်လက်နက် နေရာလွတ်အတွင်း၌ လက်သင်္ကေတတစ်ခုကို ဖော်လိုက်လေသည်။

နောက်တစ်ခဏတွင် လေထဲမှ မီးတောက်ကြီးတစ်ခု ထွက်ပေါ်လာပြီး သံမဏိတုံးများကို အရည်ပျော်စေလိုက်၏။

မကြာမီ သံမဏိများ အရည်ပျော်သွားပြီး သံရည်ပူကန်ကြီး တစ်ခုအဖြစ်သို့ ပြောင်းလဲသွားတော့၏။

ယန်သည် မီးတောက်များကို အလွယ်တကူ ထိန်းချုပ်ကာ သံရည်ပူများကို ဆက်လက် သန့်စင်နေပါသည်။

ဝိညာဉ်လက်နက်တစ်ခုဖြစ်သော လီဟော်ဒယ်အိုးအတွင်း၌ သာမန်သံများကို သန့်စင်ခြင်းမှာ ရိုးရှင်းသော အလုပ်တစ်ခုသာ ဖြစ်သည်။

ဤအလုပ်ကို အလွယ်တကူ ပြီးမြောက်စေရန်အတွက် စွမ်းအားများစွာ အသုံးပြုရန်ပင် မလိုအပ်ပေ။

ယန်၏ ထိန်းချုပ်မှုအောက်တွင် သံရည်ပူများအတွင်းရှိ အညစ်အကြေးများကို လျင်မြန်စွာ လောင်ကျွမ်းစေပြီး အရွယ်အစားမှာ ကျုံ့ဝင်လာလေ၏။

နောက်ဆုံးတွင်တော့ အမြင့်ဆုံးအဆင့်သို့ ရောက်ရှိသွားပြီး အညစ်အကြေးများကို ထပ်မံသန့်စင်၍ မရတော့သောအခါ ဝိညာဉ်လက်နက် နေရာလွတ်အတွင်းသို့ လုချင်း၏ ပုံရိပ် ပေါ်လာလေသည်။

သူသည် လီဟော်ဒယ်အိုးကို ထိန်းချုပ်လိုက်ပြီး စိတ်အာရုံဖြင့် သန့်စင်သော သံရည်ပူများကို အပိုင်းငယ်ပေါင်း ဒါဇင်များစွာအဖြစ် ခွဲထုတ်လိုက်လေ၏။

ထို့နောက် လုချင်းသည် သံရည်ပူများအတွင်းသို့ ကန့်သတ်ချက်များ စတင်ထည့်သွင်းလိုက်သည်။

သမားတော်ကြီးချန်သည် ဘေးမှရပ်ကာ လုချင်း တရားထိုင်နေစဉ် စောင့်ကြပ်ပေးနေ၏။

မကြာမီ လီဟော်ဒယ်အိုးမှ သံတိုင်များကို တစ်တိုင်ပြီးတစ်တိုင် အန်ထုတ်လာတော့သည်။

တိုင်တစ်ခုစီ၏ မျက်နှာပြင်ပေါ်တွင် လျှို့ဝှက်ဆန်းကြယ်သော ပုံစံများ ရေးရေးမျှ ပေါ်လာပြီး ဖုံးကွယ်ထားသော စွမ်းအားတစ်ခုခု ပါဝင်နေပုံရလေသည်။

သေးငယ်သော သံတိုင်ပေါင်း ဒါဇင်များစွာကို အန်ထုတ်ပြီးနောက်၌ နောက်ဆုံးတွင် လုချင်း မျက်လုံးများကို ဖွင့်လိုက်ရာ မျက်လုံးများတွင် ပင်ပန်းနွမ်းနယ်မှု အရိပ်အယောင်များ ပေါ်လွင်နေလေသည်။

"အားချင်း... အားလုံး သန့်စင်ပြီးပြီလား"

"ဟုတ်ကဲ့၊ ဒါပေမဲ့ ကံဆိုးတာက သံမဏိက မလုံလောက်ဘူးလေ။ လောလောဆယ် တိုင် ၃၆ တိုင်ပဲ သန့်စင်နိုင်သေးတယ်"

လုချင်း၏ လေသံမှာ အနည်းငယ် မကျေမနပ်ဖြစ်နေပုံရ၏။

"ဝင်္ကပါအတွက် တိုင်ဘယ်နှတိုင်တောင် လိုလို့လဲ"

"ကျွန်တော့်အစီအစဉ်အရဆိုရင် ပြည့်စုံတဲ့ ဝင်္ကပါအစီအရင်တစ်ခု တည်ဆောက်ဖို့ တိုင် ၁၀၈ တိုင် လိုအပ်ပါတယ်"

သမားတော်ကြီးချန်မှာ အံ့အားသင့်သွားလေ၏။

ဝေ့မိသားစု ပို့ဆောင်ပေးသော သံမဏိပမာဏမှာ နည်းပါးလှသည်မဟုတ်ဘဲ လုချင်း လိုအပ်သည့် ပမာဏ၏ ထက်ဝက်ပင် မရှိသေးပေ။

"ဒါပေမဲ့ တိုင် ၃၆ တိုင်ဆိုရင် လောလောဆယ် ဝင်္ကပါရဲ့ မူဘောင်ကို တည်ဆောက်ဖို့တော့ လုံလောက်ပါတယ်"

လက်တစ်ချက် ဝှေ့ယမ်းလိုက်ရာ သန့်စင်ထားပြီး သူ၏ ဝိညာဉ်စွမ်းအင်များ ထည့်သွင်းထားသော သံတိုင် ၃၆ တိုင်မှ တောက်ပသော အလင်းရောင်များ ထွက်ပေါ်လာလေသည်။ ၎င်းတို့သည် မြေကြီးပေါ်မှ ပျံတက်သွားပြီး အလင်းတန်းများအဖြစ် ပြောင်းလဲကာ တောင်အောက်သို့ ပစ်လွှတ်သွားတော့၏။

လုချင်း၏ လက်ရှိ ဝိညာဉ်စွမ်းအားမှာ အခြေတည်အဆင့် ကျင့်ကြံသူတစ်ဦးနှင့် ညီမျှပြီး သူ အပြည့်အဝ အာရုံစိုက်ထားပါက မိုင်အတော်များများ အတွင်းရှိ မည်သည့်အရာမျှ သူ၏ အာရုံမှ လွတ်ကင်းနိုင်မည် မဟုတ်ပေ။

ကျိုးလီရွာလေးကို ဖုံးလွှမ်းရန်မှာ ပြဿနာ လုံးဝ မရှိပေ။

သူ၏ ထိန်းချုပ်မှုအောက်တွင် သံတိုင် ၃၆ တိုင်သည် ၎င်းတို့ ရည်ရွယ်ထားသော နေရာများသို့ တိကျစွာ ကျရောက်သွားပြီး မြေကြီးထဲသို့ တိတ်ဆိတ်စွာ နစ်မြုပ်သွား၏။

ကျိုးလီရွာတွင် အချိန်ကြာမြင့်စွာ နေထိုင်ခဲ့သဖြင့် လုချင်းသည် မြေပြင်အနေအထားကို အလွန်ရင်းနှီးကျွမ်းဝင်နေပြီ ဖြစ်သည်။

ထို့ကြောင့် တိုင်များအတွက် သူရွေးချယ်ထားသော နေရာများသည် ဝင်္ကပါအစီအရင်အတွက် အကောင်းဆုံး အချိတ်အဆက် နေရာများပင် ဖြစ်၏။

တိုင်များ နေရာတကျ ဖြစ်သွားသည်နှင့်တစ်ပြိုင်နက် ၎င်းတို့အတွင်းရှိ စွမ်းအင်များ ချိတ်ဆက်သွားကာ ကျိုးလီရွာမှာ စတင်ပြောင်းလဲလာတော့၏။

မြေကမ္ဘာစွမ်းအင်များကို လျင်မြန်စွာ လမ်းကြောင်းပြောင်းစေပြီး ပတ်ဝန်းကျင်ရှိ ဝိညာဉ်စွမ်းအင်များသည် ရွာအနီးသို့ စတင်စုစည်းလာလေသည်။

သေချာသည်မှာ ဤပြောင်းလဲမှုများကို သာမန်ရွာသားများ သတိမပြုမိနိုင်ပေ။

သူတို့ခံစားရသည်မှာ ရွာသည် ရုတ်တရက် ပိုမိုအေးမြလာခြင်းပင် ဖြစ်သည်။

"အဘိုးကြီး... အိမ်ထဲမှာ ပိုအေးလာသလို မခံစားရဘူးလား"

အဘိုးကျန်း၏ အိမ်တွင် ယပ်ခတ်နေသော သူ၏ဇနီးဖြစ်သူက အံ့သြတကြီး ပြောလိုက်လေသည်။

"ပိုအေးလာသလိုတော့ ထင်ရတယ်။ ဘာဖြစ်တာလဲ၊ မိုးရွာတော့မလို့လား"

ပူအိုက်မှုကြောင့် ကုလားထိုင်ပေါ်တွင် လှဲလျောင်းနေသော အဘိုးကျန်းသည် အဝတ်လှန်းထားသည်များကို သိမ်းရန် အပြင်သို့ အမြန်ထွက်လာခဲ့လေသည်။

သို့သော် သူ ခြံဝင်းထဲသို့ ရောက်သောအခါ၌ တိမ်တစ်လိပ်မျှမရှိဘဲ ကောင်းကင်ကြီးမှာ ကြည်လင်တောက်ပနေသည်ကို တွေ့လိုက်ရလေသည်။ အထက်တွင် နေမင်းကြီး တောက်ပနေသော်လည်း ပြင်းထန်သော နေရောင်အောက်တွင် ရပ်နေရသော်လည်း အရင်ကကဲ့သို့ ပူအိုက်လွန်းသော အပူဒဏ်ကို သူ မခံစားရပေ။

ထိုအစား နေရောင်ခြည်မှာ ဆောင်းဦး သို့မဟုတ် ဆောင်းရာသီကဲ့သို့ နွေးထွေးနေလေ၏။

"ဒါက... ဘယ်လိုဖြစ်ရတာလဲ"

ဤကဲ့သို့ ထူးဆန်းသော အခြေအနေကြောင့် အဘိုးကျန်းမှာ ဝမ်းသာမနေနိုင်ဘဲ စိတ်မသက်မသာ ဖြစ်သွားလေသည်။

အရာရာသည် ပုံမှန်မဟုတ်သောအခါတွင် တစ်ခုခု ထူးဆန်းနေတတ်သည်။ ဤကဲ့သို့ သာမန်အသိနှင့် ဆန့်ကျင်နေသော အခြေအနေများသည် များသောအားဖြင့် ထူးခြားသည့် အရာတစ်ခုခုကို ကြိုတင်နိမိတ်ပြလေ့ရှိပါ၏။

အခြား သတိထားမိသော ရွာသားများသည်လည်း ရုတ်တရက် ပြောင်းလဲမှုကို သတိပြုမိကြပြီး စစ်ဆေးရန် အပြင်သို့ ပြေးထွက်လာကြလေသည်။

လူတိုင်း စိုးရိမ်ပူပန်နေချိန်မှာပင် တောင်ပေါ်မှ လုချင်း၏ အသံ ထွက်ပေါ်လာလေသည်။

"အားလုံးပဲ... စိုးရိမ်စရာ မလိုပါဘူး။ ရွာထဲက အပြောင်းအလဲတွေက ကျွန်တော် လုပ်လိုက်တာပါ။ ဒါက အကျိုးရှိစေမယ့် အရာတွေဖြစ်တာမလို့ အန္တရာယ်မရှိပါဘူးဗျ၊ ဘယ်သူ့ကိုမှလည်း မထိခိုက်စေပါဘူး"

အသံသည် တောင်ပေါ်မှ လာသော်လည်း ကျယ်လောင်မှုမရှိဘဲ ရွာသားများ၏ နားဘေးတွင် ပြောနေသကဲ့သို့ ဖြစ်နေလေသည်။

ဤစကားကို ကြားသောအခါ၌ ရွာသားများ နားလည်သွားပြီး နောက်ဆုံးတွင် စိတ်အေးသွားကြလေသည်။

"ဪ... အားချင်းပါလား။ အဲ့ဆို အားလုံးပဲ စိုးရိမ်စရာ မလိုပါဘူး၊ ကိုယ့်အလုပ် ကိုယ်ဆက်လုပ်ကြတာပေါ့"

"အားချင်းက တကယ်ကို အံ့သြစရာကောင်းလာတာပဲ။ ရာသီဥတုကိုတောင် လွှမ်းမိုးနိုင်လောက်အောင် သူ့ရဲ့ နောက်ဆုံးခရီးစဉ်မှာ ဘယ်လို အံ့မခန်း စွမ်းရည်တွေ သင်ယူလာခဲ့တာလဲ မသိဘူး"

"ဒါ အရမ်းကောင်းတာပဲ။ မကြာသေးခင်က ရာသီဥတုက တဖြည်းဖြည်း ပိုပူလာတယ်လေ ၊ အရင်နှစ်တွေကထက် အများကြီး ပိုဆိုးတယ်။ ငါဆို တောင့်မခံနိုင်တော့ဘူး။ အခု ပိုအေးလာပြီဆိုတော့ ညဘက် ကောင်းကောင်း အိပ်လို့ရပြီပေါ့"

"ဟုတ်တယ်၊ ဒီနှစ် ရာသီဥတုက ထူးဆန်းတယ်။ လွန်ခဲ့တဲ့ လအနည်းငယ်က ငါတို့ကို သေလုနီးပါး အေးခဲသွားစေမယ့် မိုးအေးမုန်တိုင်းကြီး တိုက်ခဲ့သေးတယ်။ ဘေးရွာက လူတွေတောင် အအေးဒဏ်ကြောင့် သေကုန်တယ်လို့ ကြားတယ်။

အခုကျတော့လည်း မခံမရပ်နိုင်အောင် ပူလာပြန်တယ်လေ။ ဒီအတိုင်းဆက်သွားရင် ငါတို့တွေ ပြင်းထန်တဲ့ မိုးခေါင်ရေရှားမှုနဲ့ ရင်ဆိုင်ရနိုင်တယ်"

"အားချင်း ရှိနေလို့ တော်သေးတာပေါ့။ သူက ပိုပိုပြီး စွမ်းအားကြီးလာပြီ။ ရွာတစ်ရွာလုံးကို ပိုအေးအောင် လုပ်ပေးနိုင်တယ်။ ဒါက မသေမျိုးတွေအကြောင်း ပုံပြင်တွေထဲကလိုပဲနော်။"

"အားချင်းနဲ့ သမားတော်ကြီးချန်တို့က မသေမျိုးတွေကို ရှာဖို့ ခရီးထွက်ခဲ့ကြတာများလား"

...

ရွာသားများသည် စကားများ ပြောဆိုနေကြပြီး မကြာသေးမီက ရာသီဥတုအကြောင်း ဆွေးနွေးရာမှ လုချင်းသည် မသေမျိုးနည်းစနစ်များ တတ်ကျွမ်းနေသလားဟု တွေးတောလာကြကာ ပုံပြင်များမှာ ပို၍ ပုံကြီးချဲ့လာလေတော့သည်။

သမားတော်ကြီး၏အိမ်တွင် လုချင်းသည် ထိုဆွေးနွေးမှုများကို ကြားရပြီး သူ၏ ဝိညာဉ်အာရုံကို ပြန်၍ရုတ်သိမ်းလိုက်စဉ် ရယ်မောလိုက်လေ၏။

သို့သော် သူ၏ အမူအရာမှာ မကြာမီ ပိုမို လေးနက်လာလေသည်။

ရွာသားများ ပြောသည်မှာ မှန်ပါသည်။ ကောင်းကင်နှင့် မြေကြီး၏ စည်းမျဉ်းများ ပြောင်းလဲလာပြီး ဝိညာဉ်စွမ်းအင်များ ပြန်လည်နိုးထလာကတည်းက ရာသီဥတုမှာ အမှန်တကယ်ပင် ပိုမို၍ ရှုပ်ထွေးလာခဲ့ပါ၏။

လွန်ခဲ့သည့် လအနည်းငယ်က အေးစက်သော မိုးအေးမုန်တိုင်းမှာ ဥပမာတစ်ခုသာ ဖြစ်သည်။

သို့သော် ပြီးခဲ့သည့်လအတွင်း ပြင်းထန်သော နေရောင်ကြောင့် ရာသီဥတုမှာ ပိုမိုပူပြင်းလာပြီး သာမန်လူများအတွက် မခံမရပ်နိုင်လုနီးပါး ဖြစ်လာခဲ့သည်။ ၎င်းမှာ ပုံမှန်အခြေအနေနှင့် အလွန်ကွာခြားနေလေ၏။

"ဆရာ... ကောင်းကင်နဲ့ မြေကြီးရဲ့ ဒီအပြောင်းအလဲတွေက သာမန်လူတွေအတွက် ကောင်းချီးမင်္ဂလာတစ်ခု ဖြစ်ချင်မှ ဖြစ်မှာနော်"

"ကောင်းချီးမင်္ဂလာထက် ကျိန်စာတစ်ခု ဖြစ်ဖို့ ပိုများတယ်"

သမားတော်ကြီးချန်၏ မျက်နှာတွင် စိုးရိမ်ပူပန်မှုများ ပြည့်နှက်နေ၏။

သူသည် ရွာသားများ၏ စကားဝိုင်းများကို ကြားခဲ့ရသည်။

ကျိုးလီရွာသည် တောင်တန်းတစ်သိန်းဘေးတွင် တည်ရှိပြီး စိမ်းလန်းစိုပြည်သော သဘာဝပတ်ဝန်းကျင်ကြောင့် ကောင်းချီးရထားလေသည်။ သို့တိုင် ဤနေရာတွင်ပင် ရာသီဥတု ပြောင်းလဲမှုများမှာ အလွန် သိသာထင်ရှားနေပါ၏။

ပတ်ဝန်းကျင် ပိုမိုကြမ်းတမ်းသော နေရာများတွင်ဆိုလျှင်ကော မည်သို့နေမည်နည်း။ ဤကဲ့သို့ မမှန်ကန်သော ရာသီဥတုပုံစံများအောက်တွင် သူတို့ မည်သို့ နေထိုင်ရမည်နည်း။

ထိုအတွေးများက သမားတော်ကြီးချန်၏ ရင်ထဲတွင် လေးလံနေလေသည်။

အတန်ကြာပြီးနောက် သူက ရုတ်တရက် ပြောလိုက်၏။ "အားချင်း... လာမယ့်ရက်တွေမှာ အနီးအနားက ရွာတချို့ကို သွားကြည့်ဖို့ ငါ စဉ်းစားနေတယ်"

....