အခန်း (၁၆၀၅-၁၆၀၆)

အခန်း (၁၆၀၅) - စစ်မှန်သောဘုရင်မျိုးနွယ်

"နေဦး စီနီယာအစ်မသုံး... စီနီယာအစ်ကိုကျိရဲ့ မိသားစုက ပြဿနာတက်နေတာ စစ်မှန်သောဘုရင်မျိုးနွယ်နဲ့တော့ မဟုတ်ဘူးမလား"

"ကျွန်တော်တို့ အခုချက်ချင်း နောက်လှည့်ပြန်ရင်ကော အချိန်မီသေးရဲ့လား"

လူတိုင်း၏ မျက်နှာအမူအရာများမှာ ချက်ချင်းပင် ပျက်ယွင်းသွားကြသည်။

ကျိရှန့်က ထိုစကားကို ကြားသောအခါ မျက်လုံးအသာလှန်ပြကာ မနေနိုင်ဘဲ ပြောလိုက်သည်။

"အားလုံးပဲ... ကျိမျိုးနွယ်စုက ဘယ်လိုလုပ်ပြီး စစ်မှန်သောဘုရင်မျိုးနွယ်ကို သွားရန်စမှာလဲ။ ကျွန်တော်တို့က အသက်မရှင်ချင်တော့လို့လား"

"အဲဒါလည်း ဟုတ်တာပဲ..."

လူတိုင်း သတိဝင်လာကြပြီး တစ်ယောက်ကိုတစ်ယောက် ကြည့်ကာ ရှက်ကိုးရှက်ကန်း ရယ်မောလိုက်ကြသည်။

ကျိမျိုးနွယ်စု၏ အင်အားနှင့်ဆိုလျှင် စစ်မှန်သောဘုရင်မျိုးနွယ်ကို သွားရောက်ပြစ်မှားမိပါက ကြားဝင်စေ့စပ်ပေးရန်ပင် မလိုအပ်တော့ချေ။ ၎င်းမှာ လူ့လောကမှ သာမန်အရပ်သားတစ်ဦးက ဧကရာဇ်မင်းမြတ်ကို သွားရောက်စော်ကားမိသကဲ့သို့ ဖြစ်ရာ၊ သေခြင်းရှင်ခြင်းမှာ တစ်ဖက်လူ၏ စိတ်အလိုအတိုင်းသာ ဖြစ်ပေလိမ့်မည်။

ချန်အင်းရွှယ်က ပြုံးလျက်

"စစ်မှန်သောဘုရင်မျိုးနွယ်ရဲ့ အောက်မှာတော့ မြေမသေမျိုး၊ ဝိညာဉ်ခွဲမသေမျိုး၊ လက်နက်ခွဲမသေမျိုးနဲ့ ကောင်းကင်မသေမျိုး ဆိုတဲ့ မသေမျိုးလမ်းစဉ်ကြီး လေးခုကို အခြေခံပြီး မသေမျိုး မျိုးနွယ်စုကြီး လေးခု အဖြစ် ထပ်မံခွဲခြားထားတယ်"

"စီနီယာအစ်မသုံး... ဒီမျိုးနွယ်စုကြီး လေးခုလုံးမှာလည်း အဆင့် ၉ ပုဂ္ဂိုလ်တွေ ရှိတာလားဟင်"

ဖန့်ချန်က သိချင်စိတ်ဖြင့် မေးလိုက်သည်။

"ရှိတာပေါ့"

ချန်အင်းရွှယ်က ခေါင်းအသာငြိမ့်ပြကာ

"ဒီအဆင့် ၉ ပုဂ္ဂိုလ်ကြီးတွေက လူမြင်ကွင်းကနေ ပျောက်ကွယ်နေတာ အတော်ကြာပြီဆိုပေမယ့်၊ သူတို့ဆီမှာ အဆင့် ၉ မသေမျိုးတွေ စောင့်ကြပ်နေဆဲဆိုတာတော့ အသေအချာပဲ"

"တကယ်လို့ ဒီမျိုးနွယ်စုကြီး လေးခုထဲက တစ်ခုခုနဲ့ ပြဿနာဖြစ်တာဆိုရင်တော့ ဖြေရှင်းရတာ လွယ်ကူနိုင်ပါတယ်။ သူတို့လည်း ကျွယ်မင်နန်းတော်ရဲ့ မျက်နှာကိုတော့ အနည်းနဲ့အများ ထောက်ထားကြမှာပါ"

အမာခံတပည့်တစ်ဦးက ရေရွတ်လိုက်သည်

"ဘယ်လိုပဲဖြစ်ဖြစ် ငါတို့လို အမာခံတပည့် အများကြီးက ကြားဝင်စေ့စပ်ပေးမှာဆိုတော့၊ ဒီလောက်မျက်နှာကိုမှ မထောက်ရင်တော့ သူတို့က လူမှုရေးနားမလည်ရာ ကျလွန်းမှာပေါ့"

"စီနီယာအစ်မသုံး... တည့်တည့်ပဲ ပြောပါတော့ဗျာ၊ လျှို့ဝှက်မနေပါနဲ့တော့။ ကျိမျိုးနွယ်စု ရန်စမိတာက ဒီမျိုးနွယ်စုကြီး လေးခုထဲက တစ်ခုလား"

တစ်စုံတစ်ဦးက ခါးသီးစွာ ပြုံးလျက် မေးလိုက်သည်။

"ဘာတွေ လောနေကြတာလဲ"

ချန်အင်းရွှယ်က မျက်စောင်းတစ်ချက်ထိုးကာ ဆက်ပြောသည်။

"ဒီမျိုးနွယ်စုကြီး လေးခုရဲ့အောက်မှာ မျိုးနွယ်စုငယ် တစ်ရာ ရှိသေးတယ်။ ကျိမျိုးနွယ်စု ပြဿနာဖြစ်တာက အဲဒီထဲက မီးတောက်ဂုဏ်အင်္ဂါမသေမျိုးမျိုးနွယ် နဲ့ပဲ။

ဒီမီးတောက်ဂုဏ်အင်္ဂါမသေမျိုး မျိုးနွယ်ရဲ့ နောက်ကွယ်မှာတော့ ကောင်းကင်မသေမျိုး မျိုးနွယ်စု ရှိတယ်"

"ဒါဆိုရင်တော့ ရိုးရှင်းသွားပါပြီ၊ မျိုးနွယ်စုငယ် တစ်ရာထဲက တစ်ခုဆိုရင်တော့ သိပ်ပြီး ကိစ္စမရှိပါဘူး"

လူတိုင်း တစ်ယောက်ကိုတစ်ယောက် ကြည့်ကာ စိတ်သက်သာရာရသွားသော အမူအရာများ ပေါ်လာကြသည်။

"ကျွန်တော် ထင်တာကတော့ ကျွန်တော်တို့တောင် သွားစရာ မလိုပါဘူး။ စီနီယာအစ်ကို တစ်ဆယ် ကိုယ်တိုင် ပြန်သွားရင်တင် ဒီကိစ္စက ပြေလည်သွားမှာပါ"

တစ်ဦးက ဆိုသည်။

"အဲဒီလောက် လွယ်နေရင် ငါကိုယ်တိုင် လာပါ့မလား"

ချန်အင်းရွှယ်က နှာခေါင်းတစ်ချက် ရှုံ့လိုက်ပြီး

"နံပါတ်တစ်ဆယ်ရဲ့ မိသားစုမှာ လူရမ်းကား တစ်ယောက်ရှိတယ်။ အဲဒီကောင်က ဒီတစ်ခါ သွားရန်စမိတာက မီးတောက်ဂုဏ်အင်္ဂါမသေမျိုး မျိုးနွယ်က အဆင့် ၈ ရှေးဟောင်းမသေမျိုး တစ်ပါးကိုပဲ။ အခုတော့ တစ်ဖက်လူက ဒေါသထွက်ပြီး ကျိမျိုးနွယ်စု တစ်စုလုံးကို မျိုးဖြုတ်သတ်ပြီး၊ ကျိမျိုးနွယ် ဘိုးဘေးရဲ့ ရှေးဟောင်းမသေမျိုး မှတ်တမ်း ကိုပါ သိမ်းယူဖို့ လုပ်နေတာ"

"အဆင့် ၈ ရှေးဟောင်းမသေမျိုးကို သွားရန်စမိတာကိုး... အဲဒါကြောင့်လည်း စီနီယာအစ်မသုံး ကိုယ်တိုင် လာရတာပေါ့"

လူတိုင်း သဘောပေါက်သွားကြသည်။

ဒီလောက်ကြီးမားတဲ့ ကိစ္စမျိုးကိုသာ ချန်အင်းရွှယ် မလာခဲ့ပါက ကျွယ်မင်နန်းတော်အနေဖြင့် အဆင့်မြင့် အကြီးအကဲ တစ်ပါးပါးကို လွှတ်ပြီး စေ့စပ်ခိုင်းရပေလိမ့်မည်။

လူ့လောကနယ်မြေ ကိုးခုအတွင်း၌ အဆင့် ၈ ရှေးဟောင်းမသေမျိုး ဆိုသည်မှာ အလွန်တရာ ရှားပါးလှပြီး လက်ချိုးရေတွက်၍ပင် ရနိုင်သည်။ နယ်မြေကိုးခုမှာပဲဖြစ်ဖြစ်၊ မသေမျိုးလောကငယ်မှာပဲဖြစ်ဖြစ် ထိုကဲ့သို့သော ပုဂ္ဂိုလ်များ၏ အဆင့်အတန်းမှာ အလွန်မြင့်မားလှရာ၊ ကျွယ်မင်နန်းတော်မှ သာမန်အမာခံတပည့် တစ်ဦးစနှစ်ဦးစကို ကြောက်ရွံ့နေမည် မဟုတ်ချေ။

"ကံကောင်းတာက တစ်ဖက်လူကလည်း ကျိရှန့်ဟာ ကျွယ်မင်နန်းတော်မှာ ကျင့်ကြံနေတယ်ဆိုတာ သိလို့ ချက်ချင်း မလှုပ်ရှားသေးတာပဲ။

အခု သူတို့က ငါတို့ သွားရောက်ညှိနှိုင်းမှာကို စောင့်နေကြတာ။ ငါ့ရဲ့ တောင်းဆိုချက်ကတော့ ရိုးရိုးလေးပဲ၊ ကျိမျိုးနွယ်စုဘက်က အထိအခိုက် နည်းနိုင်သမျှ နည်းအောင် လုပ်ဖို့ပဲ။

ဒါပေမဲ့ မီးတောက်ဂုဏ်အင်္ဂါမသေမျိုး မျိုးနွယ်က ပုဂ္ဂိုလ်ကတော့ အလွယ်တကူနဲ့ ကျေနပ်မှာ မဟုတ်ဘူး၊ ဒေါသထွက်နေဦးမှာပဲ။ အဲဒါကြောင့် မင်းတို့အားလုံး သူတစ်ပါးနဲ့ လက်ရည်ယှဉ် ပြိုင်ဆိုင်ဖို့ အတွက် ကြိုတင်ပြင်ဆင်ထားကြ"

"လက်ရည်ယှဉ်ပြိုင်ရမယ် ကျွန်တော်တို့ရဲ့ နယ်မြေချဲ့ထွင်ရေးတပ်ဖွဲ့ တွေလည်း ပါမလာဘူး၊ မသေမျိုးလောကငယ်ကလည်း မသေမျိုးလှေအစီရင် တွေကို သုံးခွင့်မပြုဘူးဆိုတော့... ဒါက..."

လူတိုင်း အံ့အားသင့်သွားကြသည်။ သူတို့ကို လက်ချည်းသက်သက်ဖြင့် သူတစ်ပါးနှင့် သွားရောက် ရင်ဆိုင်ခိုင်းနေခြင်းလား။

"အစီရင်... အစီရင်... မင်းတို့က အစီရင်တွေ မရှိရင် လက်ရည်ယှဉ်ပြိုင်ဖို့ မတတ်ကြတော့ဘူးလား။ အစီရင်ဆိုတာကို အထင်ကြီးမနေကြနဲ့။

ပြင်ပအားကိုးဆိုတာ အမြဲတမ်း ပြင်ပအားကိုးပဲ။ မင်းတို့ တစ်ယောက်ချင်းစီက ပါရမီရှင်တွေထဲက ပါရမီရှင်တွေပဲလေ၊ ဘာကို ကြောက်နေတာလဲ"

ချန်အင်းရွှယ်က အေးစက်စက် လှောင်ပြောင်လိုက်သည်။

"အဲဒါလည်း ဟုတ်တာပဲ"

"ခုနက ခဏလောက် ကြောင်သွားလို့ပါ၊ ဟားဟား"

"စီနီယာအစ်မသုံး စိတ်ချပါ။ ဒီတစ်ခါတော့ ကျွန်တော်တို့ ကျွယ်မင်နန်းတော်ရဲ့ မျက်နှာကို အပျက်မခံပါဘူး"

ထိုနေရာရှိ အမာခံတပည့် အများစုမှာ အဆင့် ၄၊ အဆင့် ၅ မသေမျိုးများ ဖြစ်ကြရာ လက်ရည်ယှဉ်ပြိုင်ခြင်းအပေါ် ယုံကြည်ချက် အပြည့်ရှိနေကြသည်။

ဖန့်ချန်သည်လည်း ပြုံးနေသော်လည်း၊ စိတ်ထဲတွင်မူ ဤခရီးစဉ်မှာ သူတို့ထင်သကဲ့သို့ မလွယ်ကူကြောင်း နားလည်ထားသည်။

ဤနေရာသို့ ရောက်လာကတည်းက သူသည် ယင်လောကသို့ သွားရန် ကြိုးစားခဲ့သော်လည်း၊ ထိုနေရာသည်လည်း ပိတ်ဆို့ခံထားရကြောင်း အတည်ပြုနိုင်ခဲ့သည်။

ယခု ကြီးမားသော ပြဿနာတစ်ခု ပေါ်လာပြီ ဖြစ်သည်။

မသေမျိုးလောကငယ်သည် ကုန်းမြေတိုက်ကြီးတစ်ခုဖြစ်ပြီး နတ်ဘုရားလောက၏ အစိတ်အပိုင်းတစ်ခု ဖြစ်သည်။

အကယ်၍ ယခင်က ထိုမိစ္ဆာမျိုးနွယ်များက ထိုနေရာကို ပိတ်ဆို့ထားခဲ့သည်ဆိုပါက၊ ထိုပိတ်ဆို့မှုသည် တခြားကြယ်တာရာများပေါ်က ပိတ်ဆို့မှုထက် အဆပေါင်းများစွာ ပိုမိုခိုင်မာနေလိမ့်မည် မဟုတ်ပါလား။

ဖြစ်နိုင်သည်မှာ... ထိုပိတ်ဆို့မှုကြီးသည် နတ်ဘုရားလောက ဘက်မှာ ရှိနေနိုင်ခြင်းပင်။

ထိုအချက်နှစ်ခု၏ နှောင့်ယှက်မှု မရှိဘဲ၊ ပိတ်ဆို့မှုသည် မသေမျိုးလောကငယ်မှာသာ ရှိနေပြီး အစီရင်ဗဟိုချက် တစ်ခုက ပိတ်ဆို့မှုကို ဖြည်ချရန် လုံလောက်သည်ဆိုလျှင်ပင်...

လက်ရှိတွင် သူ၌ ထိုပိတ်ဆို့ထားသော နေရာကို ရှာဖွေရန် လုံလောက်သော သဲလွန်စ မရှိသေးချေ။

'ကံကောင်းတာက ငါ့ရဲ့ မျက်နှာနဲ့ဆိုရင် မသေမျိုးကျောက်တုံး တွေ တော်တော်များများ ချေးလို့ရမှာပါ။ တကယ်လို့ မရရင်လည်း ငါ့ရဲ့ ဂုဏ်ထူးမှတ် တွေနဲ့ နှိမ်လိုက်ရုံပဲ'

ဖန့်ချန်သည် ထိုနေရာရှိ အမာခံတပည့်များကို တစ်ချက်ကြည့်လိုက်သည်။

သူတို့၏ ကြွယ်ဝမှုမှာ သေချာပေါက် များပြားလှမည်ဖြစ်ရာ လုံလောက်သော မသေမျိုးကျောက်တုံးများ ရှိနေပေလိမ့်မည်။

'မှန်လေး... ဒီနေရာက တံလျှပ်တောင်တန်းကြီး၊ ဒါမှမဟုတ် အဲဒီပိတ်ဆို့မှုရှိတဲ့နေရာရဲ့ တိကျတဲ့ တည်နေရာ၊ ဒါမှမဟုတ် ခန့်မှန်းခြေ တည်နေရာကို သိချင်ရင် မသေမျိုးကျောက်တုံး ဘယ်လောက် လိုမလဲ'

'တကယ်လို့ ခန့်မှန်းခြေ တည်နေရာဆိုရင်တော့ ဈေးနှုန်းက ကွဲပြားလိမ့်မယ်။ ဥပမာ - မိုင်တစ်သောင်းအတွင်းနဲ့ မိုင်တစ်သိန်းအတွင်း ဆိုရင် ဈေးက အများကြီး ကွာတယ်'

'မိုင်တစ်သိန်းအတွင်းဆိုရင် ဘယ်လောက်လဲ'

'မသေမျိုးကျောက်တုံး ခြောက်ထောင်ပဲ။ မင်းအတွက် လျှော့ပေးထားတာနော် အစ်ကို'

'မသေမျိုးကျောက် ခြောက်ထောင်လား တော်သေးတာပေါ့၊ စုရင် ရနိုင်လောက်ပါတယ်'

ဖန့်ချန်သည် လူတိုင်းကို တိတ်တဆိတ် အကဲခတ်ကြည့်ရင်း၊ နောက်ဆုံးတွင် ချန်အင်းရွှယ်ထံသို့ အကြည့်ရောက်သွားသည်။

သူမ၏ ကြွယ်ဝမှုမှာတော့ ပြောစရာပင် မလိုဘဲ အလွန်များပြားမည် ဖြစ်သည်။

"နံပါတ်ကိုး... ငါနဲ့ ခဏလိုက်ခဲ့ဦး"

ချန်အင်းရွှယ်က ရုတ်တရက် ဖန့်ချန်ကို လက်ယမ်းခေါ်လိုက်ပြီး၊ တိတ်ဆိတ်သော အခန်း ရှိရာသို့ ဦးတည်လျှောက်သွားသည်။

လူတိုင်းက သိချင်စိတ်ဖြင့် ကြည့်ကျန်ရစ်ခဲ့ကြသည်။ ချန်အင်းရွှယ်က ဖန့်ချန်ကို ဘာပြောစရာရှိလို့ အခန်းထဲအထိ ခေါ်သွားရသနည်းဟု တွေးနေကြသည်။

ကြာနီနတ်မိမယ်သည် ထိုမြင်ကွင်းကို မြင်သောအခါ ထရပ်၍ နောက်က လိုက်သွားခဲ့သည်။

"ညီမလေးဟုန်... ငါ နံပါတ်ကိုးနဲ့ တိုးတိုးတိတ်တိတ် စကားပြောစရာ ရှိလို့၊ မင်း လိုက်မလာနဲ့တော့။ စိတ်ချပါ... ငါ မင်းရဲ့ ယောကျ်ားကို လုမယူပါဘူး"

ချန်အင်းရွှယ်က ကြာနီနတ်မိမယ်ကို ပြုံးစစဖြင့် ကြည့်ကာ ပြောလိုက်သည်။

"ကျွန်မက အနားယူဖို့ ပြန်မလို့ပါ"

ကြာနီနတ်မိမယ်က အေးဆေးစွာ ပြောလိုက်ပြီး တခြားအခန်းတစ်ခုသို့ လျှောက်သွားတော့သည်။

ချန်အင်းရွှယ်က ပြုံးလိုက်ရုံသာ ပြုပြီး ဘာမှထပ်မဆိုတော့ဘဲ ဖန့်ချန်ကို အခန်းထဲသို့ ခေါ်ဆောင်သွားကာ တားမြစ်အစီရင်တစ်ခုကို ချလိုက်သည်။

"စီနီယာအစ်မသုံး... ဘာများ အမိန့်ရှိမလို့လဲခင်ဗျ"

ဖန့်ချန်က ပြုံးလျက် လက်အုပ်ချီ မေးလိုက်သည်။

ချန်အင်းရွှယ်က ဖန့်ချန်ကို ပြုံးစစဖြင့် ကြည့်နေရာ၊ ဖန့်ချန် တစ်ကိုယ်လုံး ကြက်သီးထလာသည့်အထိပင်။ ထို့နောက် သူမက အေးစက်စက် ပြောလိုက်သည်။

"ငါ မင်းကို ပြောထားတယ်လေ၊ ဒီကိစ္စကို နံပါတ်တစ် ကို သွားမပြောပါနဲ့လို့။ ဒါပေမဲ့ မင်းက ငါ့စကားကို မနားထောင်ဘူး။ နံပါတ်ကိုး... မင်း ငါ့ကို တကယ် စိတ်ပျက်အောင် လုပ်လိုက်တာပဲ"

ခဏချင်းမှာပင် မသိမသာသော သတ်ဖြတ်ခြင်း အငွေ့အသက်များ ဖန့်ချန်၏ ခန္ဓာကိုယ်ပေါ်သို့ ကျရောက်လာသည်။

ဖန့်ချန်၏ မျက်နှာပေါ်မှ အပြုံးများ တဖြည်းဖြည်း မှေးမှိန်သွားပြီး၊ ချန်အင်းရွှယ်ကို ဘာမှမဖြစ်သကဲ့သို့ ပြန်လည် စိုက်ကြည့်နေလိုက်သည်။

'မိစ္ဆာမျိုးနွယ်လား'

သတ်ဖြတ်လိုသော အငွေ့အသက်များက ပိုမိုပြင်းထန်လာပြီး ဖန့်ချန်၏ ကိုယ်ပေါ်ရှိ အမွေးအမှင်များပင် ထောင်ထလာသည်။

ဤနေရာတွင် မရဏလမ်းကို ဖွင့်၍မရသဖြင့် သူသည် ဝိညာဉ်ခေါ်ယူခြင်း နည်းလမ်းဖြင့် ဝိညာဉ်ကလေး နှင့် ရှေးဟောင်းသစ်ပင် တို့ကို ခေါ်ယူ၍ မရနိုင်ချေ။

ထိုအခြေအနေမျိုးတွင် ချန်အင်းရွှယ်နှင့် တိုက်ရိုက် ရင်ဆိုင်ရပါက သူ အနိုင်ရရန် အခွင့်အရေးမှာ သုညနှင့် နီးကပ်နေသည်။

"ကဲပါ... နံပါတ်ကိုးကို သိပ်မခြောက်ပါနဲ့တော့။ သူ့ကို တစ်ခုခုဖြစ်အောင် ခြောက်လိုက်လို့ကတော့ အကြီးအကဲများအဖွဲ့ က လူတွေက မင်းကို အရှင်လတ်လတ် ဝါးစားကြလိမ့်မယ်"

တင်းမာနေသော အခြေအနေကြားတွင် ရှဲ့အာမန် ၏ အသံက ရုတ်တရက် ထွက်ပေါ်လာသည်။

ဖန့်ချန် အံ့အားသင့်သွားကာ နောက်သို့ လှည့်ကြည့်လိုက်ရာ၊ သူ့နောက်ကွယ်တွင် ရပ်နေသည်မှာ ကျွယ်မင်နတ်နန်း၏ အကြီးဆုံးစီနီယာမကြီး ပင် ဖြစ်သည်။

"နံပါတ်သုံး... မင်း ငါ့ကို ဂုဏ်ထူးမှတ် ငါးဆယ် ကြွေးတင်နေပြီ။ အဲဒါ မင်းရှုံးထားတာနော်၊ ပြန်ရောက်ရင် ငါ့ကို ပေးလိုက်တော့။ တကယ်လို့ လိမ်ဖို့ ကြိုးစားရင်တော့ မင်းကို နာအောင် လုပ်ပစ်မယ်"

ရှဲ့အာမန်သည် ချန်အင်းရွှယ်ကို ပြုံးပြုံးလေး ကြည့်ကာ ပြောလိုက်သည်။

ဒါက ဘာတွေ ဖြစ်ကုန်တာလဲ

ဖန့်ချန်ကဲ့သို့ ထက်မြက်သူပင်လျှင် လက်ရှိ ဖြစ်ပျက်နေသော အခြေအနေကို ချက်ချင်း သဘောမပေါက်နိုင် ဖြစ်နေတော့သည်။

အခန်း (၁၆၀၆) - ကြီးမားသော အံ့အားသင့်စရာတစ်ခု

ဖန့်ချန်၏ မျက်နှာအမူအရာမှာ အနည်းငယ် ထူးဆန်းနေသည်။ သူသည် ချန်အင်းရွှယ်၏ စကားကို အမှန်တကယ်ပင် နားမထောင်ဘဲ လူတိုင်း၏ ဤခရီးစဉ်အကြောင်းကို ရှဲ့အာမန်အား လျှို့ဝှက်စွာ အသိပေးခဲ့မိသည်။

သူ့အနေဖြင့် ရှဲ့အာမန်သာ ဤကိစ္စတွင် ကြားဝင်ပတ်သက်ပေးပါက လူတိုင်းအတွက် ဘေးအန္တရာယ် လျော့နည်းသွားနိုင်လိမ့်မည်ဟု မျှော်လင့်ခဲ့ခြင်း ဖြစ်သည်။

ထို့ပြင် ချန်အင်းရွှယ်အနေဖြင့် မိစ္ဆာမျိုးနွယ်၏ ထောင်ချောက်ထဲသို့ ကျရောက်ကာ သူမ၏ အရင်ဘဝ မှတ်ဉာဏ်များ နိုးထလာမည်ကိုလည်း သူ မလိုလားပေ။

အဆင့် ၃ အမာခံတပည့်ဖြစ်သူသာ အရင်ဘဝမှတ်ဉာဏ်များ နိုးထလာပါက ရှောက်ကွမ်းယင် ကဲ့သို့ပင် လူ့လောကနယ်မြေကိုးခုအတွက် အလွန်အမင်း အန္တရာယ်ကြီးမားပေလိမ့်မည်။

သို့သော် သူသည် ထိုသတင်းကို ရှဲ့အာမန်အား ပြောပြစဉ်က သူမသည် စိတ်ဝင်စားဟန် မပြခဲ့သည့်အပြင် လိုက်လာမည့် အရိပ်အယောင်လည်း မရှိခဲ့ချေ။ သို့သော် ယခုမူ သူမသည် ချန်အင်းရွှယ်၏ နဂါးနက်လှေပေါ်တွင် အဘယ်ကြောင့် ပေါ်လာရသနည်း။

ခဏချင်းမှာပင် ဖန့်ချန် တစ်စုံတစ်ခုကို သဘောပေါက်သွားသကဲ့သို့ ဖြစ်ကာ ခါးသီးစွာ ပြုံးလျက် ဆိုလိုက်သည်။

"စီနီယာမကြီး... စီနီယာမကြီးနဲ့ စီနီယာအစ်မသုံးကြားမှာ အမြဲတမ်း ဆက်သွယ်မှု ရှိနေခဲ့တာလား"

"ဒါပေါ့... မဟုတ်လို့လဲ ဘာရှိဦးမှာလဲ။ ကျွယ်မင်နန်းတော်ရဲ့ နံပါတ်သုံးက ဒီလောက် အန္တရာယ်များတဲ့ မသေမျိုးလောကငယ်ထဲကို အလွယ်တကူ ကိုယ်တိုင်ကိုယ်ကျ လာရဲမယ်လို့ မင်း ထင်နေတာလား။

ဒီနေရာက နတ်ဘုရားလောက နဲ့ ဆက်သွယ်ထားတာလေ။ အကယ်၍ လောကနှစ်ခုကြားက တံတိုင်းသာ ကျိုးပျက်သွားရင် ဒီလောကထဲမှာ ရှိတဲ့လူတိုင်း သုံးခါလောက် သေရလိမ့်မယ်"

ရှဲ့အာမန်က မျက်စောင်းတစ်ချက် ထိုးလိုက်ပြီး

"နန်းတော်သခင်က ခေါင်းမညိတ်ရင်၊ အကြီးအကဲများအဖွဲ့က ခွင့်မပြုရင်၊ ပြီးတော့ ငါက သဘောမတူရင် သူမဟာ မသေမျိုးလောကငယ်ထဲကို တစ်လှမ်းတောင် ခြေချခွင့် ရမှာမဟုတ်ဘူး"

"စီနီယာမကြီး ပြောပုံက ကျွန်မမှာ လုံးဝ လွတ်လပ်ခွင့် မရှိသလိုပဲ။ ကျွန်မ သွားချင်တဲ့နေရာကို ဘယ်သူက တားနိုင်မှာလဲ"

ချန်အင်းရွှယ်က ပြန်လည် ချေပလိုက်သည်။

"ဒါပေမဲ့ ဒီကိစ္စက နည်းနည်း ထူးဆန်းနေတယ်လို့ ခံစားရတာနဲ့ စီနီယာမကြီးကို အရင် ပြောပြထားလိုက်တာပါ"

'သူမကိုယ်တိုင်လည်း ဒီကိစ္စ ထူးဆန်းနေတာကို သိနေတာလား'

ဖန့်ချန်သည် ချန်အင်းရွှယ်ကို ကြည့်ကာ စိတ်သက်သာရာ ရသွားသည်။

ကျွယ်မင်နန်းတော်၏ နံပါတ်သုံး ဖြစ်သည့်အတိုင်း သူမ၏ အမြင်အာရုံမှာ အမှန်တကယ်ပင် စူးရှလှပေသည်။

"ဒီကိစ္စက ငါ အရင်တုန်းက ချုံခိုတိုက်ခိုက်ခံရတဲ့ အဖြစ်အပျက်နဲ့ တစ်ပုံစံတည်းပဲ။

နေရာကို မသေမျိုးလောကငယ်ကို ပြောင်းလိုက်တာရယ်၊ ပြီးတော့ နံပါတ်တစ်ဆယ်ရဲ့ ပါးစပ်ကနေတစ်ဆင့် နံပါတ်သုံးကို ဖိတ်ခေါ်ခိုင်းတာရယ်ပဲ ကွာခြားတယ်။

သာမန်ဆိုရင်တော့ ဘာအပြစ်အနာအဆာမှ ရှာလို့မရဘူး၊ ဘာလို့လဲဆိုတော့ ကျွယ်မင်နန်းတော် နဲ့ မသေမျိုးလောကငယ်က မျိုးနွယ်စုတွေကြားမှာ ကြီးကြီးမားမား ပဋိပက္ခ မရှိလို့ပဲ"

"ဒီလောကက ကျင့်ကြံသူတွေအနေနဲ့ သူမကို ရန်ပြုဖို့ ဘာအကြောင်းပြချက်မှ မရှိဘူးလေ"

ရှဲ့အာမန်က ပြုံးလျက် ဆိုသည်။

"ဒါပေမဲ့ အခုက ပုံမှန်အခြေအနေ မဟုတ်ဘူးလေ"

ချန်အင်းရွှယ်က အေးစက်စက် လှောင်ပြောင်လိုက်ပြီး

"ရှောက်ကွမ်းယင်က စီနီယာမကြီးကို လုပ်ကြံဖို့ ဦးဆောင်ခဲ့တယ်။ နောက်ဆုံးမှာ တိုက်ခိုက်ခဲ့တဲ့ အဆင့် ၈ ရှေးဟောင်းမသေမျိုး မုန့်ထျန်းရှု ကလည်း မသေမျိုးလောကငယ်ကပဲ လာတာ။

သူက ရွှမ်ခွန်မသေမျိုး မျိုးနွယ် ရဲ့ အကြီးအကဲရဲ့ ညီအရင်းပဲ။ အဲဒီတုန်းက ကျွယ်မင်နန်းတော်က ရွှမ်ခွန်မသေမျိုး မျိုးနွယ်ဆီ သတင်းပို့တော့၊ အဲဒီအကြီးအကဲက ပြောတယ်... သူ့ညီက ရွှမ်ခွန်မသေမျိုး မျိုးနွယ်ကနေ အနှင်ခံရတာ ကြာပြီတဲ့။

သူလုပ်တဲ့ ကိစ္စတွေက ရွှမ်ခွန်မသေမျိုး မျိုးနွယ်နဲ့ ဘာမှမဆိုင်ဘူးတဲ့။ နောက်ပိုင်းမှာ ရွှမ်ခွန်မသေမျိုးမျိုးနွယ်ရဲ့ နောက်ကွယ်က ကောင်းကင်မသေမျိုးမျိုးနွယ်စု က ကြားဝင်စေ့စပ်ပေးပြီး ငါတို့ကို ဝိညာဉ်လက်နက် တစ်ခု ပေးလျော်လို့သာ ဒီကိစ္စကို လက်စသတ်လိုက်ရတာ"

"ရွှမ်ခွန်မသေမျိုး မျိုးနွယ်ရဲ့ နောက်ကွယ်မှာ ကောင်းကင်မသေမျိုးမျိုးနွယ်စု ရှိတယ်၊ အခု မီးတောက်ဂုဏ်အင်္ဂါမသေမျိုး မျိုးနွယ်ရဲ့ နောက်ကွယ်မှာလည်း ကောင်းကင်မသေမျိုး မျိုးနွယ်စု ရှိတယ်..."

ဖန့်ချန်က တိုးတိုးလေး ရေရွတ်လိုက်သည်

"စီနီယာမကြီးတို့က ဒီတစ်ခေါက် ဖြစ်ရပ်ရဲ့ နောက်ကွယ်က ကြိုးကိုင်သူဟာ ကောင်းကင်မသေမျိုးမျိုးနွယ်စုလို့ သံသယရှိနေတာလား"

"မှန်တယ်၊ သံသယတော့ ရှိတယ်၊ ဒါပေမဲ့ တကယ့်သက်သေ အထောက်အထား မရှိတော့ ကောင်းကင်မသေမျိုး မျိုးနွယ်စုကို အပြစ်တင်လို့ မရဘူး"

ရှဲ့အာမန်က ပြုံးလျက် ဆိုသည်

"ဒါပေမဲ့ သူတို့က ငါ့ကို ရန်စခဲ့ပြီးမှ ဝိညာဉ်လက်နက်တစ်ခု၊ ကုယွဲ့တစ္ဆေလှေတစ်စင်း၊ ပြီးတော့ မသေမျိုးစာရင်းဝင်ခွင့် တစ်ခုတည်းနဲ့ ဒီကိစ္စကို အဆုံးသတ်ဖို့ ကြံစည်နေတာကတော့ အိပ်မက်မက်နေတာပဲ။

အဲဒါကြောင့် ငါက ရွှမ်ခွန်မသေမျိုး မျိုးနွယ်ကို ကြီးမားတဲ့ အံ့အားသင့်စရာတစ်ခု ပေးဖို့ အမြဲတမ်း ကြံစည်နေခဲ့တာ။ မင်းတို့ကိစ္စနဲ့ကလည်း ကွက်တိ သွားတိုးနေတာပဲ"

ဖန့်ချန် သဘောပေါက်သွားသည်။

ရှဲ့အာမန်သည် ရွှမ်ခွန်မျိုးနွယ်ကို လက်စားချေရန် အခွင့်အရေးကို အမြဲတစေ စောင့်ဆိုင်းနေခဲ့ခြင်း ဖြစ်ကာ၊ ယခုဖြစ်ရပ်ကို သိရှိသွားချိန်တွင် ချန်အင်းရွှယ်နှင့်အတူ ပူးပေါင်းကာ အစီအစဉ်အချို့ကို ရေးဆွဲခဲ့ခြင်း ဖြစ်ပေသည်။

"ငါ ဒီကိစ္စကို သိလိုက်ရတုန်းက နံပါတ်သုံးနဲ့ လောင်းကြေးထပ်ခဲ့သေးတယ်။ မင်းဟာ ဒီကိစ္စကို ငါ့ကို သေချာပေါက် ပြောပြလိမ့်မယ်လို့ ငါပြောခဲ့တယ်။ တခြားကြောင့် မဟုတ်ဘူး၊ မင်းဟာ ဒီကိစ္စထဲက ထူးဆန်းတဲ့အချက်တွေကို မြင်နိုင်စွမ်းရှိတယ်လို့ ငါယုံကြည်လို့ပဲ"

ရှဲ့အာမန်က ပြုံးလိုက်ပြီး

"မင်း အဲဒီတုန်းက တည့်တည့်မပြောဘဲ အရိပ်အမြွက် စကားလုံးတွေပဲ သုံးခဲ့တာက ကျိရှန့်ဟာ မင်းရဲ့ ဂျူနီယာညီအစ်ကို ဖြစ်နေလို့၊ မင်းရဲ့စကားက သူ့အပေါ်မှာ ထိခိုက်မှု ဖြစ်မှာစိုးလို့ မဟုတ်လား"

"နံပါတ်ကိုး... မင်းကြောင့် ငါ ဂုဏ်ထူးမှတ် ငါးဆယ် ရှုံးသွားပြီ"

ချန်အင်းရွှယ်က ရယ်ရမလို ငိုရမလို မျက်နှာဖြင့် ပြောလိုက်သည်။

"စီနီယာအစ်မသုံး... အဲဒီ ဂုဏ်ထူးမှတ်တွေကို ကျွန်တော်ပဲ ပေးပါ့မယ်"

ဖန့်ချန်က ပြတ်ပြတ်သားသား ဆိုလိုက်သည်။

ချန်အင်းရွှယ် မျက်လုံးများ တောက်ပသွားကာ ဖန့်ချန် စကားပြန်လည် ရုပ်သိမ်းသွားမည်ကို စိုးရိမ်သဖြင့် ရှဲ့အာမန်အား အမြန်လှည့်ကြည့်ကာ

"စီနီယာမကြီး... ကြားတယ်မလား။ နံပါတ်ကိုးက အဲဒီဂုဏ်ထူးမှတ်တွေကို ပေးမယ်တဲ့။ လူကြီးလူကောင်းတစ်ယောက်ရဲ့ စကားဟာ အစီရင် ထက်တောင် ခိုင်မြဲရမယ်နော် "

"မင်းမှာ ဂုဏ်ထူးမှတ်တွေ ရှိနေရင်တောင် ဒီလိုမျိုး အလဟဿ မသုံးသင့်ဘူး"

ရှဲ့အာမန်က အနည်းငယ် စိတ်တိုသွားသော်လည်း သူမသည် အရေးကြီးသည့် ကိစ္စကို သတိရသွားကာ အသံကို နှိမ့်လျက် ပြောလိုက်သည်။

"နံပါတ်သုံးကို မင်းကို ခေါ်ခိုင်းလိုက်တာက မင်းကို အထူးမှာကြားစရာ တစ်ခုရှိလို့ပဲ။ မင်းက အမာခံတပည့် အသစ်တစ်ယောက် ဖြစ်သလို၊ တာ့လေယင် တိုက်ပွဲမှာ နာမည်ရခဲ့တယ် ဆိုပေမယ့်လည်း

မင်းရဲ့ ကျင့်ကြံမှုအဆင့်က မမြင့်သေးဘူး။ ပြီးတော့ ဒီနေရာမှာ မသေမျိုးလှေအစီရင် တွေကိုလည်း သုံးလို့မရဘူး ဆိုတော့၊ တစ်ဖက်လူတွေက မင်းအပေါ်မှာ သိပ်ပြီး အာရုံစိုက်နေမှာ မဟုတ်ဘူး"

"စီနီယာမကြီး မိန့်ပါ"

ဖန့်ချန်၏ မျက်လုံးများ လှုပ်ခတ်သွားသည်။

ကြည့်ရသည်မှာ ဤနှစ်ယောက်၌ အစီအစဉ်တစ်ခု ရှိနေပုံရသည်။ သို့သော်...

၎င်းတို့သည် ထိုဖြစ်ရပ်၏ နောက်ကွယ်မှ အမှန်တရားကို မသိကြချေ။ သူတို့၏ ခန့်မှန်းချက်အရ သူတို့ကို ရန်ပြုလိုသူမှာ ကောင်းကင်မသေမျိုး မျိုးနွယ်စု ဖြစ်နိုင်ပြီး၊ ရည်ရွယ်ချက်မှာ ၎င်းတို့နောက်ကွယ်မှ ကျွယ်မင်နန်းတော် ဖြစ်နိုင်သည်ဟု ယူဆထားကြပုံရသည်။

'အကယ်၍ ဒါဟာ မိစ္ဆာမျိုးနွယ်တွေရဲ့ တမင်ရန်တိုက်ပေးမှု ဖြစ်နေပြီး၊ ကျွယ်မင်နန်းတော် နဲ့ ကောင်းကင်မသေမျိုး မျိုးနွယ်စုကို စစ်ဖြစ်စေချင်တာ ဆိုရင်တော့...'

ထိုသို့တွေးမိသောအခါ ဖန့်ချန် စိတ်ထဲတွင် သက်ပြင်းချမိသည်။ အရေးကြီးသော အချိန်တွင် ဝမ်အိုကြီး ကလည်း ပျောက်နေသည်။

သူသာ ရှိနေလျှင် ရှဲ့အာမန်ကို တစ်နည်းနည်းဖြင့် သွယ်ဝိုက်ပြီး သတိပေးနိုင်မည် ဖြစ်သည်။

"မင်းတို့က ကျိမျိုးနွယ်စုကို သွားပြီး မီးတောက်ဂုဏ်အင်္ဂါနတ်မျိုးနွယ်နဲ့ သွားညှိနှိုင်းကြမှာ မဟုတ်လား။ အဲဒီအခါကျရင် မင်းရဲ့ ကျင့်ကြံမှုမှာ ပြဿနာတက်လို့ ဒီနေရာမှာပဲ တံခါးပိတ်ကျင့်ကြံ မယ်လို့ တည့်တည့်ပြောလိုက်။

ပြီးရင် မင်း တာ့လေယင် တိုက်ပွဲတုန်းက သုံးခဲ့တဲ့ ကိုယ်ယောင်ဖျောက်နည်းစနစ် ကို သုံးပြီး ရွှမ်ခွန်မျိုးနွယ်ဆီကို တစ်ခေါက် သွားလိုက်"

ရှဲ့အာမန်က ပြုံးလျက် အနက်ရောင် လုံးဝိုင်းသော အရာတစ်ခုကို ထုတ်ယူကာ ဖန့်ချန်အား ကမ်းပေးလိုက်သည်။

"ဒီပစ္စည်းက ငါကိုယ်တိုင် သန့်စင်ထားတဲ့ ဝိညာဉ်လက်နက် တစ်ခုပဲ။ ဒါက သာမန်လက်နက်တွေနဲ့ မတူဘူး၊ တစ်ကြိမ်ပဲ သုံးလို့ရတယ်၊ ဒါပေမဲ့ စွမ်းအားကတော့ အလွန်ကြီးမားတယ်။

မင်း အဲဒီကို ရောက်ရင် ဒါကို ရွှမ်ခွန်မသေမျိုး မျိုးနွယ်ရဲ့..."

သူမက တည်နေရာတစ်ခုကို ပြောပြလိုက်သည်။

"အဲဒီမှာ ချထားပြီးရင် မင်း ငါတို့ဆီကို ချက်ချင်း ပြန်လာပြီး ပူးပေါင်းလိုက်ရုံပဲ။ ငါကတော့ နံပါတ်သုံးတို့နဲ့အတူ လိုက်သွားပြီး၊ မီးတောက်ဂုဏ်အင်္ဂါနတ်မျိုးနွယ်က ဒီတစ်ခါ ဘာကို ဆိုလိုချင်တာလဲဆိုတာ သွားကြည့်လိုက်ဦးမယ်။

တကယ်လို့ သူတို့က ငါ့ရဲ့ ကျွယ်မင်နန်းတော် အမာခံတပည့်တွေကို ရန်ပြုဖို့ တကယ် ကြံစည်ထားတာဆိုရင်တော့ ငါ့ကို မျက်နှာသာမပေးဘူးလို့ မဆိုနဲ့တော့"

ရှဲ့အာမန်က အေးစက်စက် လှောင်ပြောင်လိုက်သည်။

ဖန့်ချန်သည် ထိုအနက်ရောင် ဘောလုံးလေးကို တိတ်တဆိတ် လက်ခံလိုက်သည်။ ၎င်း၏ အပြင်ပန်းမှာ ရိုးရိုးလေးဖြစ်ပြီး အငွေ့အသက်မှာလည်း သာမန်ပင်။ သူ၏ ကျင့်ကြံမှုအဆင့်ဖြင့်မူ ၎င်းအပေါ်တွင် ကျင့်ကြံခြင်းနှင့် ပတ်သက်သော မည်သည့်အငွေ့အသက်ကိုမျှ မခံစားရချေ။

၎င်းမှာ တမင်တကာ ပွတ်တိုက်ထားသော အဝိုင်းပုံ စရစ်ခဲလေးတစ်ခုနှင့်သာ တူနေသည်။

'သူတို့နဲ့ လမ်းခွဲပြီး လုပ်ဆောင်ရမယ်ပေါ့... ဒါပေမဲ့ ဒီဖြစ်ရပ်ရဲ့ အဓိက အကျဆုံးနေရာက မီးတောက်ဂုဏ်အင်္ဂါနတ်မျိုးနွယ်ဘက်မှာပဲ ရှိနေတုန်းပဲ...'

'တစ်ဖက်လူရဲ့ ရည်မှန်းချက်က ချန်အင်းရွှယ်သာ အမှန်ဆိုရင်၊ လှုပ်ရှားမယ့်သူဟာ အနည်းဆုံး အဆင့် ၇ ရှေးဟောင်းမသေမျိုး ဖြစ်လိမ့်မယ်'

"နံပါတ်ကိုး... မင်း မစိုးရိမ်ပါနဲ့။ ဒီကိစ္စမှာ မင်းအတွက် ဘာအန္တရာယ်မှ မရှိစေရဘူး။ တကယ်လို့ တစ်ယောက်ယောက်က မင်းကို တွေ့သွားရင်တောင်၊ မင်းက ဒီအတိုင်း လမ်းလျှောက်ထွက်လာတာလို့ပဲ ပြောလိုက်၊ သူတို့ မင်းကို ဘာမှ မလုပ်ရဲပါဘူး"

ရှဲ့အာမန်သည် ဖန့်ချန်က မိမိ၏ ဘေးအန္တရာယ်ကို စိုးရိမ်နေသည်ဟု ထင်မှတ်သဖြင့် နှစ်သိမ့်လိုက်သည်။

"မင်း အရင်က သုံးခဲ့တဲ့ ကိုယ်ယောင်ဖျောက်နည်းစနစ်ကို ငါနဲ့ နံပါတ်သုံးတို့တောင်မှ အကဲမဖြတ်နိုင်ခဲ့ဘူး။ အဲဒီတော့ ဒီခရီးအတွက် မင်းက အသင့်တော်ဆုံးပဲ"

"စီနီယာမကြီး... ကျွန်တော် အဲဒီကိစ္စကို စိုးရိမ်နေတာ မဟုတ်ပါဘူး။ စီနီယာမကြီးတို့ ကြားဖူးသလား... မကြာသေးမီ နှစ်တွေအတွင်းမှာ အောက်ဘက်နယ်မြေခြောက်ခု မှာ ဖြစ်ပျက်ခဲ့တဲ့ ကိစ္စတချို့ကို "

ဖန့်ချန်၏ မျက်နှာမှာ လေးနက်သွားကာ

"အဲဒီကိစ္စက အလွန် ထူးဆန်းပါတယ်။ အဲဒါက ကျွန်တော်တို့ကိုပါ အန္တရာယ်ပေးနိုင်မယ်လို့ ကျွန်တော် ခံစားရတယ်"

"ဘယ်ကိစ္စလဲ"

ချန်အင်းရွှယ်က သိချင်စိတ်ဖြင့် မေးလိုက်သည်။

ဖန့်ချန် စကားမစရသေးမီ ရှဲ့အာမန်က ဦးအောင် ရယ်မောလိုက်ပြီး

"မင်းပြောတာက အောက်ဘက်နယ်မြေခြောက်ခုက နေရာအတော်များများမှာ မိစ္ဆာကပ်ဘေး တွေ ကျရောက်နေတဲ့ ကိစ္စလား"

"စီနီယာမကြီး သိနေပြီလား"

ဖန့်ချန် အံ့အားသင့်သွားသည်။

"အင်း... ဒီကိစ္စကို ဝိညာဉ်နတ်ဘုရားဂိုဏ်း က ငါတို့ကို ဆက်သွယ်လာဖူးတယ်။ တစ်စုံတစ်ယောက်က သာမန်လူသားတွေရဲ့ အသက်ကို သုံးပြီး တားမြစ်ထားတဲ့ နည်းစနစ်တစ်ခုခုကို စမ်းသပ်နေပုံရတယ်လို့ ပြောတယ်"

ရှဲ့အာမန်က ရယ်မောလျက်

"ဝိညာဉ်နတ်ဘုရားဂိုဏ်း ကိုယ်တိုင်ကလည်း သိပ်ပြီး သန့်ရှင်းတာ မဟုတ်ပါဘူး၊ ဒါကိုမှ ငါတို့ကို လာပြောနေသေးတယ်။

ဒါပေမဲ့ နန်းတော်သခင်က သူတို့မျက်နှာကို ထောက်ပြီး၊ အဲဒီကိစ္စကို သေချာ စုံစမ်းဖို့အတွက် ရှေးဟောင်းမသေမျိုး တစ်ပါးကို လွှတ်ပြီးပါပြီ"

"အဲဒီ ရှေးဟောင်းမသေမျိုးက... ထိုက်ရွှီမသေမျိုး တော့ မဟုတ်ဘူးမလား"

ဖန့်ချန် အံ့အားသင့်စွာ မေးလိုက်တော့သည်။