အခန်း ၁၇၇၄-၁၇၇၆

အခန်း (၁၇၇၄) အသီးအပွင့်များစွာ ရရှိခြင်း

ရှေးဟောင်း ဒဿမသားရဲကြီးများဂူ မည်သည့်သတိပေးချက်မျှမရှိဘဲ ပွင့်လာခဲ့သည်။ ဂူပွင့်မည်ကို လူတိုင်း သိထားကြသော်လည်း ယခုကဲ့သို့ လျင်မြန်စွာ ပွင့်လာလိမ့်မည်ဟု လူတိုင်း မမျှော်လင့်ထားကြပေ။ ကျယ်လောင်သော မြည်ဟည်းသံကြီးနှင့်အတူ လူသောင်းနှင့်ချီ၍ ဂူဆီသို့ တိုးဝင်သွားကြသည်။ သောင်းနှင့်ချီသော ကျွမ်းကျင်သူများသည် စီးဆင်းနေသော အလင်းတန်းများအဖြစ် ပြောင်းလဲသွားကြရာ ကောင်းကင်ယံကို ဖြတ်သန်းသွားသည့် ဥက္ကာခဲများကဲ့သို့ ထင်မှတ်ရစေသည်။

ချူးယွင်ဖန်းသည် လူအုပ်နောက်မှ ကပ်လိုက်၍ ရှေးဟောင်း ဒဿမသားရဲကြီးများဂူထဲသို့ ဝင်ရောက်သွားခဲ့သည်။ ဂူထဲသို့ ဝင်လိုက်သည်နှင့် တစ်ပြိုင်နက် ကြောက်မက်ဖွယ်ကောင်း၍ ရက်စက်ကြမ်းကြုတ်သော အရောင်အဝါတစ်ခု ပေါက်ကွဲထွက်လာကြောင်း သူ ခံစားလိုက်ရသည်။ အတွင်း၌ ကြောက်မက်ဖွယ်ကောင်းသော သားရဲတစ်ကောင် ပုန်းအောင်းနေသကဲ့သို့ ထင်မှတ်ရစေသည်။ ထိုဖိအားကြောင့် လူအုပ်ကြားရှိ ဒြပ်မဲ့ကျွမ်းကျင်အဆင့် ကျင့်ကြံသူများ၏ မျက်နှာအမူအရာများ သိသိသာသာ ပြောင်းလဲသွားသည်။ ၎င်းတို့၏ ကျင့်ကြံမှုဖြင့် ထိုဖိအားကို ခုခံရန်ပင် အလွန်ခက်ခဲနေသဖြင့် မိမိကိုယ်ကို ကာကွယ်ရန် နတ်စွမ်းအင်များကို အသုံးပြုကာ ထိုဖိအားနှင့် သီးသန့်ခွဲထုတ်လိုက်ရသည်။ စကြဝဠာအဆင့် ကျင့်ကြံသူများ၏ စိတ်ဝိညာဉ်ကျင့်ကြံမှုသည် ပိုမိုခိုင်မာသဖြင့် ထိုရက်စက်ကြမ်းကြုတ်သော အရောင်အဝါ၏ သက်ရောက်မှုကို အလွန်အမင်း မခံစားရပေ။

ချူးယွင်ဖန်း၏ ခန္ဓာကိုယ် အနည်းငယ် တုန်ခါသွားပြီးနောက် ဖိအားများ ချက်ချင်းပင် အစအနမကျန် ပျောက်ကွယ်သွားသည်။ ဂူထဲသို့ ရောက်ရှိပြီးနောက် ဂူ၏အပြင်ဘက် ဧရိယာတွင် ရက်စက်ကြမ်းကြုတ်သော သားရဲကြီးများ၏ အရိုးစုများဖြင့် ပြည့်နှက်နေကြောင်း ချူးယွင်ဖန်း တွေ့လိုက်ရသည်။ အချို့သော အရိုးစုများသည် တောင်ငယ်တစ်လုံးခန့် ကြီးမား၍ အချို့သည် သာမန်လူတစ်ယောက် အရွယ်အစားမျှသာရှိသည်။ အများစုသည် သေဆုံးပြီးနောက်တွင်ပင် ဖိအားအလွှာများ ထုတ်လွှတ်နေဆဲဖြစ်သဖြင့် လူအများကို ချမ်းစိမ့်သွားစေသည်။

၎င်းတို့သည် အနည်းဆုံး ဒြပ်မဲ့ကျွမ်းကျင်အဆင့် သားရဲများဖြစ်ကြသည်။ စကြဝဠာအဆင့်နှင့် ၎င်းထက် မြင့်မားသော သားရဲကြီးများ၏ အရိုးစုများပင် တည်ရှိနေသည်။ အရေးကြီးဆုံးအချက်မှာ ထိုသားရဲကြီးများသည် သဘာဝအတိုင်း သေဆုံးခဲ့ခြင်း မဟုတ်ပေ။ ၎င်းတို့သည် တစ်စုံတစ်ယောက် သို့မဟုတ် တစ်စုံတစ်ခု၏ စားသောက်ခြင်းကို ခံခဲ့ရခြင်းဖြစ်သည်။ အရိုးစုများမှလွဲ၍ ကျန်အရာအားလုံး စားသောက်ခံထားရသည်။ ဤအရာအားလုံးကို လုပ်ဆောင်ခဲ့သူသည် ရှေးအတီတေ အမှောင်ဖီးနစ်၏ မျိုးဆက်ဖြစ်ပေလိမ့်မည်။

ဂူအတွင်းသို့ ရောက်လာသည်နှင့် များပြားလှသော ဒြပ်မဲ့ကျွမ်းကျင်သူများသည် ထိုအရိုးစုများအတွက် စတင်တိုက်ခိုက်နေကြသည်။ ထိုအရိုးစုများသည် အစွမ်းထက်သော သားရဲကြီးများ၏ အရိုးများသာဖြစ်သော်လည်း လက်နက်များ ပြုလုပ်ရာတွင်လည်းကောင်း၊ ဆေးလုံးများ ဖော်စပ်ရာတွင်လည်းကောင်း အရေးကြီးသော အစိတ်အပိုင်းများဖြစ်ကြသည်။ အထူးသဖြင့် ရတနာကောင်းများသည် ၎င်းတို့နှင့် မဆိုင်ကြောင်း သိထားကြသဖြင့် ဤအရာများသည် လာရကျိုးနပ်သည်ဟု ခံစားရစေသည်။

ထိုအချိန်တွင် ချူးယွင်ဖန်းသည် လူအုပ်ထဲ၌ ရောနှောနေခဲ့သည်။ မိမိကဲ့သို့ပင် စကြဝဠာအဆင့် ကျင့်ကြံသူများစွာ တည်ရှိနေသဖြင့် ထူးဆန်းခြင်းမရှိပေ။ တစ်ကိုယ်တော် သိုင်းသမားများသည်လည်း ပြန့်ကျဲနေ၍ မိမိတို့အလိုရှိရာကို ရှာဖွေနေကြသည်။ လူအများအပြားရှိနေသဖြင့် ဖြည်းဖြည်းချင်း ရှာဖွေနေရန် အချိန်မရှိကြောင်း လူတိုင်း နားလည်ထားသည့်အတွက် အချိန်နှင့်အမျှ ပြိုင်ဆိုင်နေကြသည်။

ထိုစဉ် တိုက်ပွဲကြောင့် နောက်ကျကျန်နေခဲ့သော ဟွမ်ဖုလီ၊ မုန့်ထျန့်ရန်၊ ဟူချင်းရွှမ်နှင့် ကျစ်ပုယွီတို့ လေးဦး ရောက်ရှိလာကြသည်။ ၎င်းတို့လေးဦးသည် အလွန်မြန်ဆန်သော အရှိန်ဖြင့် လူတိုင်းကို ကျော်တက်သွားကြသည်။ လူအများသည်လည်း ၎င်းတို့အနောက်မှ လိုက်ပါသွားကြသည်။ ဂူအတွင်းပိုင်းသို့ ပို၍နက်ရှိုင်းစွာ ဝင်ရောက်လေ နေရာသည် ပို၍ကြီးမားကျယ်ပြန့်လာလေဖြစ်သည်။ ဂူသည် ပြင်ပမှ မြင်တွေ့ရသည့် အရွယ်အစားထက်ပင် များစွာ သာလွန်နေသည်။

'ဒါ နေရာလွတ် အကာအကွယ်ပဲ' ချူးယွင်ဖန်းသည် ချက်ချင်း ရိပ်မိသွားသည်။ ယခုကဲ့သို့ တုန်လှုပ်ဖွယ်ကောင်းသော အကျိုးသက်ရောက်မှုကို ဖန်တီးရန်အတွက် ဤနေရာတွင် နေရာလွတ် အကာအကွယ်တစ်ခု တပ်ဆင်ထားရမည်ဖြစ်သည်။ မကြာမီတွင် ပထမဆုံး အတားအဆီးဖြစ်သည့် များပြားလှသော ရုပ်သေးရုပ်များက ၎င်းတို့ကို လမ်းပိတ်ထားကြသည်။ မျက်စိတစ်မှိတ်အတွင်း ရုပ်သေးရုပ်များသည် လူအုပ်ထဲသို့ ချီတက်လာကြသည်။ ထိုထောင်ပေါင်းများစွာသော ရုပ်သေးရုပ်များသည် စကြဝဠာအဆင့် ကျင့်ကြံသူများကဲ့သို့ပင် အစွမ်းထက်ကြသည်။ ယခုအခါ ၎င်းတို့သည် စစ်တပ်တစ်ခုကဲ့သို့ တန်းစီနေကြသဖြင့် အလွန်ထိတ်လန့်ဖွယ်ကောင်းလှသည်။

ရှေးအတီတေ အမှောင်ဖီးနစ်သည် အမှန်တကယ် ကြောက်မက်ဖွယ်ကောင်းသည်ဟု ချူးယွင်ဖန်း တွေးလိုက်မိသည်။ ပထမမျိုးဆက် ရှေးအတီတေ အမှောင်ဖီးနစ်နှင့် မနှိုင်းယှဉ်နိုင်သော်လည်း ၎င်းသည် ဝေးကွာသော အတိတ်ကာလတွင် အရှင်သခင်တစ်ပါးဖြစ်ခဲ့ဖူးသည်။ စကြဝဠာအဆင့်နှင့် ညီမျှသော ဤရုပ်သေးရုပ်များကို ထုတ်လုပ်ရန်အတွက် မည်မျှသော ရတနာများ အသုံးပြုခဲ့ရမည်ကို မည်သူမျှ မသိနိုင်ပေ။ စကြဝဠာအဆင့် ကျင့်ကြံသူများပင် ထိုမျှများပြားသော စကြဝဠာအဆင့်ရုပ်သေးရုပ်များကို မြင်သောအခါ ခြေလှမ်းများ တန့်သွားကာ အရှေ့သို့ မတိုးရဲကြတော့ပေ။ ဆန့်ကျင်ဘက်အနေဖြင့် ဟွမ်ဖုလီသည် အရှေ့သို့တစ်လှမ်းတိုးကာ သူ့ထံသို့ ချီတက်လာသော စကြဝဠာအဆင့်ရုပ်သေးရုပ်တစ်ခုကို ဖျက်ဆီးလိုက်သည်။

"ရုပ်သေးရုပ်တွေကများ ကျုပ် လမ်းကို ပိတ်ရဲတယ်ပေါ့လေ"

ဟွမ်ဖုလီသည် လောကထဲသို့ ဆင်းသက်လာသော နတ်ဆိုးတစ်ပါးကဲ့သို့ပင် လမ်းတစ်လျှာက်လုံး အတားအဆီးမဲ့စွာ သောင်းကျန်းနေသည်။ ဤစကြဝဠာအဆင့်ရုပ်သေးရုပ်များသည် သာမန်စကြဝဠာအဆင့်များနှင့် ယှဉ်ပြိုင်နိုင်သော်လည်း ဟွမ်ဖုလီကဲ့သို့ ပုဂ္ဂိုလ်မျိုးကိုမူ လုံးလုံးလျားလျား ခုခံနိုင်စွမ်းမရှိသောကြောင့် ချက်ချင်းပင် ရှုံးနိမ့်သွားကြသည်။ ဟွမ်ဖုလီသည် ခဏအတွင်း လမ်းတစ်ခု ဖောက်ထုတ်ကာ အလင်းတန်းတစ်ခုကဲ့သို့ ထွက်ခွာသွားသည်။ မကြာမီတွင် ဟူချင်းရွှမ်၊ မုန့်ထျန့်ရန်နှင့် ကျစ်ပုယွီတို့သည်လည်း ဟွမ်ဖုလီနှင့်အတူ ရင်ဘောင်တန်း ချီတက်နေကြသည်။ ၎င်းတို့၏ ကျင့်ကြံမှုသည် ဟွမ်ဖုလီအောက် မနိမ့်ကျပေ။ ဤရုပ်သေးရုပ်များသည် ၎င်းတို့ကို မည်သို့ တားဆီးနိုင်မည်နည်း။ ရုပ်သေးရုပ်များ အစိတ်စိတ်အမြွှာမြွှာဖြစ်သွားပြီးနောက် ကျွမ်းကျင်သူများ ချီတက်လာကြသည်။

"သူတို့နောက်ကို မြန်မြန် လိုက်ကြ" တစ်စုံတစ်ယောက်က အော်ဟစ်လိုက်ရာ စကြဝဠာအဆင့် ကျင့်ကြံသူ၂၀၀၀ ကျော်ခန့်သည် အရှေ့သို့ တစ်ဖန် ချီတက်သွားပြန်သည်။ ၎င်းတို့ထဲမှ အချို့သည် အလွန်နက်ရှိုင်းသော ကျင့်ကြံမှုရှိသည့် စကြဝဠာအဆင့် ကျင့်ကြံသူများဖြစ်ကြသည်။ ၎င်းတို့သည် ခဏအတွင်း ဟွမ်ဖုလီနှင့် အခြားသုံးဦးတို့ ဖောက်ထုတ်ထားသော လမ်းမှတစ်ဆင့် ဖြတ်ကျော်နိုင်ခဲ့ကြသည်။

ချူးယွင်ဖန်းသည်လည်း ခြေထောက်များတွင် စူးရှသော အလင်းတန်းများ ထွက်ပေါ်လာကာ တိုးဝင်သွားသည်။ အဝေးတွင် ဟွမ်ဖုလီနှင့် အခြားလူများ၏ အသံများ တဖြည်းဖြည်း တိုးသထက် တိုးလျော့သွားသဖြင့် ၎င်းတို့သည် ဂူ၏ အနက်ရှိုင်းဆုံးနေရာသို့ ဝင်ရောက်သွားကြပုံပေါ်သည်။ ချူးယွင်ဖန်းသည်လည်း အနောက်မှ ကပ်လိုက်သွားခဲ့ရာ စကြဝဠာအဆင့် ရာပေါင်းများစွာလည်း သူနှင့်အတူ လိုက်ပါလာသည်။ ၎င်းတို့သည် ကျန်လူများအနက် အတော်ဆုံး ကျင့်ကြံသူများဖြစ်ကြသည်။ ၎င်းတို့သည် အရှုံးမပေးလိုကြဘဲ အပြေးအလွှား လိုက်ပါသွားကြသည်။ ကျန်လူများသည် ကံမကောင်းလှဘဲ ရုပ်သေးရုပ်များ၏ ပိတ်ဆို့မှုကို ခံလိုက်ရသည်။

မကြာမီ ချူးယွင်ဖန်းသည် ဟွမ်ဖုလီနှင့် အခြားလူများ ချန်ရစ်ထားခဲ့သော အမှတ်အသားများစွာကို တွေ့လိုက်ရသည်။ အဝေးမှကြည့်လျှင် ရုပ်သေးရုပ်များ အပိုင်းပိုင်းပြတ်ကာ မြေပြင်ပေါ်သို့ လဲကျနေကြောင်း မြင်တွေ့လိုက်ရသည်။ ထို့ပြင် အသက်ရှင်ကျန်ရစ်နေသော သားရဲကြီးများစွာသည်လည်း ဟွမ်ဖုလီတို့၏ သတ်ဖြတ်မှုကြောင့် သေဆုံးနေကြသည်။ ၎င်းတို့သည် အကုန်အစင် သုတ်သင်ရှင်းလင်းခဲ့ခြင်းဖြစ်သည်။ သာမန်လူတစ်ယောက်သည် ထိုကဲ့သို့သော အတားအဆီးများမှ လွတ်မြောက်ရန် မဖြစ်နိုင်ပေ။ သို့သော်လည်း ဟွမ်ဖုလီတို့ အဖွဲ့နှင့် ၎င်းတို့အနောက်မှ လိုက်ပါလာသော စကြဝဠာအဆင့်ရာပေါင်းများစွာသည် ထိုအတားအဆီးများကို ရှင်းထုတ်နိုင်ကြသည်။

ချူးယွင်ဖန်းသည်လည်း လမ်းတစ်လျှောက်တွင် ရုပ်သေးရုပ်များ၏ အကြွင်းအကျန်များနှင့် သားရဲကြီးများ၏ အလောင်းများကို သိမ်းဆည်းကာ ချက်ချင်းပင် လိုက်ပါသွားသည်။ ထိုသားရဲများအားလုံးသည် စကြဝဠာအဆင့်အထက်တွင် တည်ရှိနေသောကြောင့် သိမ်းဆည်းခဲ့ခြင်းဖြစ်သည်။ ၎င်းတို့သည် စကြဝဠာအဆင့် ကျင့်ကြံမှုမျိုးမရှိသော်လည်း ပုံမှန်မဟုတ်သော လျှို့ဝှက်နည်းလမ်းတစ်ခုခုဖြင့် ပြုလုပ်ထားသဖြင့် စကြဝဠာအဆင့် စွမ်းရည်များရှိနေကြသည်။

၎င်းတို့၏ သွေးအဆီအနှစ်များသည် အစစ်အမှန်ဖြစ်သည်။ သားရဲအလောင်းများ အလွန်ပင် များပြားလှသဖြင့် ချူးယွင်ဖန်းသည် ခဏအတွင်း အလောင်းရာပေါင်းများစွာကို သိမ်းဆည်းကာ တောင်မြစ်ပန်းချီကားအတွင်းရှိ ဗြဟ္မာသစ်ပင်ပေါ်သို့ သွန်းလောင်းလိုက်သည်။

အခန်း (၁၇၇၅) စကြဝဠာခုနစ်ဆင့်

ဗြဟ္မာသစ်ပင်ပေါ်တွင် အလောင်းများစွာ စုပုံနေကြောင်း မြင်လိုက်ရသောအခါ ချူးယွင်ဖန်းက ပြုံးလိုက်သည်။ ဤသည်မှာ ကြီးမားသော ရိတ်သိမ်းမှုကြီးတစ်ခုဖြစ်သည်။ သာမန် စကြဝဠာအဆင့် ကျင့်ကြံသူများအတွက်မူ ဤသားရဲများသည် အထူး လျှို့ဝှက်နည်းလမ်းများဖြင့် မွေးမြူထားခြင်းဖြစ်ရာ စစ်မှန်သော စကြဝဠာအဆင့် သားရဲများ၏ အနှစ်သာရမျိုး မရှိကြပေ။ သို့ရာတွင် ချူးယွင်ဖန်းအတွက်မူ ကွဲပြားခြားနားသည်။ ၎င်းတို့အားလုံးကို ဗြဟ္မာသစ်ပင်မှတစ်ဆင့် ဗြဟ္မာသီးများအဖြစ် ပြောင်းလဲနိုင်ကာ ချူးယွင်ဖန်း၏ အင်အားကို အပြည့်အဝ တိုးတက်စေနိုင်သည်။ ရင့်မှည့်နေပြီဖြစ်သော ဗြဟ္မာသီး အနည်းငယ် ပြောင်းလဲသွားကာ သစ်သီးရနံ့များ သူ့ နှာခေါင်းထဲသို့ တိုးဝင်လာသည်။

ချူးယွင်ဖန်းသည် ပျက်စီးနေသော ရုပ်သေးရုပ်များကိုလည်း သိမ်းဆည်းလိုက်သည်။ အခြားသူများအတွက်မူ ပျက်စီးသွားသော ရုပ်သေးရုပ်များသည် တန်ဖိုးမရှိသော်လည်း ချူးယွင်ဖန်းအတွက်မူ ထိုသို့ မဟုတ်ပေ။ နတ်ဘုရားကျင့်စဥ်တိုက်ပွဲစာအုပ်ထဲတွင် ရုပ်သေးရုပ် ပြုလုပ်နည်း အများအပြားကို မှတ်တမ်းတင်ထားသော်လည်း ကုန်ကြမ်းပစ္စည်းများ စုဆောင်းရန် အချိန်ကြာမြင့်မည်ဖြစ်သဖြင့် သူ တစ်ခါမျှ မစမ်းသပ်ဖူးခဲ့ပေ။ ယခုမူ အခြေအနေများ လုံးလုံးလျားလျား ပြောင်းလဲသွားသည်။ ဤအကြွင်းအကျန်များမှ လိုအပ်သော ကုန်ကြမ်းများကို ထုတ်ယူနိုင်သည့်အတွက် အချိန်တန်လျှင် ရုပ်သေးစစ်တပ်တစ်ခု တည်ဆောက်နိုင်ပေလိမ့်မည်။

ရုပ်သေးပညာရပ်သည် သေးငယ်သော လမ်းစဉ်တစ်ခု မဟုတ်ပေ။ ဆန့်ကျင်ဘက်အနေဖြင့် ၎င်းသည် ကြီးမြတ်သော လမ်းစဉ်များထဲမှ တစ်ခုဖြစ်ကာ သာမန်လူများ မမှန်းဆနိုင်သော လျှို့ဝှက်ချက်များစွာ ပါဝင်သည်။ ပြည့်စုံသော အမွေအနှစ်များ မရှိဘဲနှင့် ရုပ်သေးပညာရပ်ကို ထိတွေ့ရန် မဖြစ်နိုင်ပေ။ သားရဲအလောင်းများနှင့် ရုပ်သေးရုပ်များ လိုက်လံစုဆောင်းနေစဉ် ချူးယွင်ဖန်းသည် လူအုပ်ကြီး အနောက်တွင် တဖြည်းဖြည်း ကျန်ရစ်ခဲ့သည်။ ထိုလူတို့သည် ချူးယွင်ဖန်းကို အထင်အမြင်သေးစွာ ကြည့်နေကြသည်။ ၎င်းတို့အမြင်တွင် ချူးယွင်ဖန်းသည် စစ်မှန်သော ရတနာကို မသိနားမလည်သည့် တောသားတစ်ယောက်သာဖြစ်သည်။ ဤအရာများသည် ၎င်းတို့ကဲ့သို့ စကြဝဠာအဆင့်များအတွက် မပြောပါ့လောက်သော ပစ္စည်းများဖြစ်သည်။ ရတနာကောင်းများသည် ရှေးဟောင်း ဒဿမသားရဲကြီးများဂူ၏ အနက်ရှိုင်းဆုံးနေရာတွင် ရှိနေဆဲဖြစ်သည်။ ယခုမူ သူသည် အမှိုက်ကောက်သကဲ့သို့ စုဆောင်းနေသဖြင့် အဆုံးတွင် ရတနာကောင်းများ လုယူရန်ပင် အရည်အချင်း မရှိဘူးဟု ၎င်းတို့ ယူဆထားကြသည်။

သို့သော် ဤအချက်ကြောင့် သူ့အပေါ်ထားရှိသော ရန်လိုသည့် အကြည့်များစွာ လျော့ပါးသွားသည်။ ၎င်းတို့၏အမြင်တွင် ဤလူသည် လောကကြီးကို မမြင်တွေ့ဖူးသော တောသားတစ်ယောက်ဖြစ်သဖြင့် ဤနေရာတွင် အမှိုက်များ ကောက်ပါစေဟုသာ ၎င်းတို့ လွှတ်ထားလိုက်ကြသည်။ ချူးယွင်ဖန်းသည် ထိုအကြည့်များကို လျစ်လျူရှုထားလိုက်သည်။ လူတိုင်း သူ့ကို အထင်လွဲနေသည့်အတွက် သူ ဝမ်းသာနေမိသည်။ မိမိ၏ အင်အားကို တိုးတက်အောင် ပြုလုပ်နိုင်သရွေ့ အမှိုက်ကောက်ရခြင်းသည် ပြဿနာ မဟုတ်ပေ။

ချူးယွင်ဖန်းသည် ရှာဖွေမှုများ ဆက်လက်လုပ်ဆောင်လျက် ဂူအတွင်းပိုင်းသို့ ပျံသန်းသွားသည်။ တစ်ချိန်တည်းမှာပင် သူသည် တအံ့တဩ စုတ်သပ်လိုက်သည်။ သူ့ အရှေ့ရှိ လူအုပ်ကြီး၏ အရှိန်သည် အလွန် မြန်ဆန်လွန်းလှသည်။ သူသာဆိုလျှင် ထိုမျှ မြန်ဆန်နိုင်မည် မဟုတ်ပေ။ သူ၏ လက်ရှိ ကျင့်စဉ်သည် ထိုလူများ၏ ကျင့်စဥ်နှင့် အလွန်ကြီးမားစွာ ကွာဟနေဆဲဖြစ်သည်။ ထိုလူများသည် စကြဝဠာအဆင့်၏ စစ်မှန်သော ထိပ်တန်း ကျင့်ကြံသူများဖြစ်ကြသည်။

ဒြပ်မဲ့ကျွမ်းကျင်အဆင့်နှင့် မတူဘဲ စကြဝဠာအဆင့်ကို အဆင့်ခုနစ်ဆင့် ခွဲခြားထားသောကြောင့် စကြဝဠာခုနစ်ဆင့်ဟု လူသိများကြသည်။ ချူးယွင်ဖန်း၏ တိုက်ခိုက်ရေးစွမ်းရည်သည် စကြဝဠာဒုတိယအဆင့်နှင့် တူညီသည်။ ချူးယွင်ဖန်း၏ တိုက်ခိုက်ရေးစွမ်းရည်သည် ထိုအဆင့်ကို အလွယ်တကူ ကျော်လွှားနိုင်သော်လည်း သူသည် ဤအဆင့်၌ တစ်ဆို့နေခဲ့သည်။ မုန့်ထျန့်ရန်၊ ဟူချင်းရွှမ်း၊ ဟွမ်ဖုလီနှင့် ကျစ်ပုယွီတို့သည် ၎င်းတို့ထဲတွင် အတော်ဆုံး ကျင့်ကြံသူများဖြစ်ကြသည်။ ၎င်းတို့၏ ကျင့်စဉ်သည် စကြဝဠာအထွတ်အထိပ်အဆင့်သို့ ရောက်ရှိနေကြသည်။ ဆေးဧကရာဇ်၏ မှတ်ဉာဏ်များအရ ဤလေးဦးသည် စကြဝဠာအဆင့်ကို ကျော်လွန်သွားရန် ခြေတစ်လှမ်းသာ လိုအပ်ပေသည်။

ထိုအဆင့်သို့ ရောက်ရှိသွားလျှင် ၎င်းတို့သည် အမှန်တကယ် အင်အားကြီးပုဂ္ဂိုလ်များဖြစ်လာပေလိမ့်မည်။ မျိုးဆက်သစ်လူငယ်များ၏ ဘုရင်ဖြစ်ရုံသာမကဘဲ ယခင်မျိုးဆက်၏ ပညာရှင်များနှင့်ပင် ယှဉ်ပြိုင်နိုင်မည်ဖြစ်သည်။ ထိုအဆင့်သို့ မရောက်ရှိသေးသော်လည်း ချူးယွင်ဖန်းသည် ၎င်းတို့၏ ကြောက်မက်ဖွယ် စွမ်းအင်ကို အမီလိုက်နိုင်ရန် ဝေးကွာနေဆဲဖြစ်သည်။ ၎င်းတို့အနောက်မှ ကပ်လိုက်လာသူများသည် စကြဝဠာဆဋ္ဌမအဆင့် သို့မဟုတ် စကြဝဠာသတ္တမအဆင့် ကျင့်ကြံသူများဖြစ်နိုင်ကြရာ ၎င်းတို့အားလုံးသည်လည်း ထူးချွန်သော ကျင့်ကြံသူများဖြစ်ကြသည်။ ၎င်းတို့၏ ကျင့်စဉ်သည် ချူးယွင်ဖန်း သတ်ဖြတ်ခဲ့သော လော့ကျောက်နှင့် ဆင်တူပုံပေါ်သည်။

ပြီးနောက် ချူးယွင်ဖန်း ပါဝင်သော အုပ်စုရှိသည်။ ထိုအုပ်စုရှိ ကျင့်ကြံသူများ စကြဝဠာစတုတ္ထအဆင့် သို့မဟုတ် စကြဝဠာပဉ္စမအဆင့်များဖြစ်ကြသည်။ ပထမအုပ်စု နှစ်စုမျှ မသန်မာသော်လည်း ရုပ်သေးရုပ်များ၏ တားဆီးမှုကို ခံလိုက်ရသော တတိယအဆင့်အောက် သာမန် စကြဝဠာအဆင့်များနှင့် နှိုင်းယှဉ်လျှင် လုံးလုံးလျားလျား ကွဲပြားပေသည်။ မှန်ကန်စွာပြောရမည်ဆိုလျှင် ထိုရုပ်သေးရုပ်များသည် စကြဝဠာအဆင့်နှင့် နှိုင်းယှဉ်နိုင်သော်လည်း အများဆုံး စကြဝဠာပထမအဆင့် သို့မဟုတ် စကြဝဠာဒုတိယအဆင့်တွင်သာ ရှိကြသည်။ ထို့ကြောင့် ရုပ်သေးရုပ်များသည် ဟွမ်ဖုလီ၏ တိုက်ခိုက်မှုတစ်ခုကိုပင် မခုခံနိုင်ကြပေ။

ဤအချက်သည် ချူးယွင်ဖန်းကို စိုးရိမ်ပူပန်စေသည်။ ဟွမ်ဖုလီနှင့် အခြားလူများသည် ထိုမျှသန်မာနေပါက လီချန်းယွမ်သည် ၎င်းတို့ထက်ပင် ပို၍ သန်မာပေလိမ့်မည်။ သူသည် မျိုးဆက်သစ်လူငယ်များထဲတွင် ထိပ်တန်းအဖြစ် လူသိများသဖြင့် အနည်းဆုံးလျှင် စကြဝဠာအဆင့် အထွတ်အထိပ်တွင် ရှိနေပေလိမ့်မည်။ ထိုကဲ့သို့ သန်မာသော ရန်သူကြောင့် ချူးယွင်ဖန်းသည် မိမိ၏ ကျင့်စဉ်များ တိုးတက်အောင် အစွမ်းကုန် ကြိုးစားရန်မှတစ်ပါး အခြားရွေးချယ်စရာ မရှိပေ။ ၎င်းတို့အနောက်သို့ ဆက်လိုက်သွားလျှင် အန္တရာယ်ရှိနိုင်သော်လည်း ချူးယွင်ဖန်းသည် မကြောက်ရွံ့ပေ။

မကြာမီ ချူးယွင်ဖန်းသည် လူအုပ်ကြီးနှင့်အတူ ပြန်မီသွားသည်။ အကြောင်းမှာ ၎င်းတို့ကို ကြီးမားသော အတားအဆီးတစ်ခုက ပိတ်ဆို့ထားသောကြောင့်ဖြစ်သည်။ ထိုအတားအဆီး၏ အခြားတစ်ဖက်တွင် ရတနာကောင်းများရှိနေနိုင်ကြောင်း ချူးယွင်ဖန်း နားလည်လိုက်သည်။ လူတိုင်း အနည်းငယ် စိတ်ပျက်နေကြသည်။ ၎င်းတို့သည် ဤနေရာတွင် ရပ်တန့်သွားကြရမည်ဖြစ်သလော။ ၎င်းတို့သည် တိုက်ခိုက်ရန် ကြိုးစားခဲ့ကြသော်လည်း ဤအတားအဆီးကို မထိုးဖောက်နိုင်ကြပေ။ ၎င်းတို့၏ တိုက်ခိုက်မှုများသည် အတားအဆီးပေါ် ကျရောက်သွားသော်လည်း ရေဂယက်ကဲ့သို့ သဲလွန်စများသာ ကျန်ရစ်ခဲ့သဖြင့် အတားအဆီးကို မလှုပ်ခတ်နိုင်ခဲ့ပေ။

"သေသွားတာ နှစ်ပေါင်းမရေတွက်နိုင်တော့တဲ့ အဖိုးကြီးတစ်ယောက် ချန်ထားခဲ့တဲ့ အတားအဆီးက ကျုပ်တို့ကို တားနိုင်မယ်လို့ ကျုပ် မယုံဘူး" ဟွမ်ဖုလီက ဟိန်းဟောက်လိုက်သည်နှင့် သူ၏ ခန္ဓာကိုယ်မှ ကြောက်မက်ဖွယ်ကောင်းသော မှော်စွမ်းအင်များ ထွက်ပေါ်လာသည်။ ပြီးနောက် နတ်ဆိုးမီးတောက်များ ထွက်ပေါ်လာကာ အတားအဆီးကို ဆက်တိုက်တိုက်ခိုက်လိုက်သည်။ သူသည် နတ်ဆိုးဂိုဏ်းတွင် မွေးဖွားလာသူဖြစ်၍ အင်အားကိုသာ ယုံကြည်သဖြင့် ရှေးဟောင်းကျွမ်းကျင်သူများကို သိပ်ရိုသေလေးစားမှု မရှိပေ။

သူ့အနောက်တွင် သူနှင့် မဟာမိတ်ဖွဲ့ထားပုံရသော ဟူချင်းရွှမ်း၊ မုန့်ထျန့်ရန်နှင့် ကျစ်ပုယွီတို့သည်လည်း စတင်တိုက်ခိုက်ကြလေသည်။ ဒုတိယအုပ်စုမှ စကြဝဠာဆဋ္ဌမအဆင့်နှင့် စကြဝဠာသတ္တမအဆင့် ကျွမ်းကျင်သူများလည်း ဝင်ရောက်တိုက်ခိုက်လာကြသည်။ မည်သူမျှ ဤအတားအဆီးကြောင့် မရပ်တန့်လိုကြပေ။ မကြာမီ တတိယအုပ်စုမှ စကြဝဠာအဆင့်များပင် ဝိုင်းဝန်းတိုက်ခိုက်နေကြသည်။ သို့သော် အတားအဆီးသည် အနည်းငယ်မျှ မလှုပ်ရှားခဲ့ပေ။ ၎င်းသည် အလွန်တရာ ခိုင်မာလှသည်။ လူတိုင်း၏ တိုက်ခိုက်မှုများကြောင့် ရေဂယက်အချို့သာ ဖြစ်ပေါ်လာစေ၍ အနည်းငယ်မျှ ထိုးဖောက်နိုင်ခြင်း မရှိခဲ့ပေ။ ဤနှုန်းအတိုင်းဆိုလျှင် အတားအဆီးကို ခဏအတွင်း ဖောက်ထွင်းနိုင်မည် မဟုတ်ကြောင်း ပတ်ဝန်းကျင်ကို ကြည့်ရုံ၍ ချူးယွင်ဖန်း သိမြင်လိုက်သည်။

'ဒီအခွင့်အရေးကို သုံးပြီး ငါ့ ကျင့်စဉ်ကို မြှင့်တင်ထားတာ ပိုကောင်းမယ်၊ ဒါမှ နောက်လာမယ့် ပြိုင်ဆိုင်မှုတွေမှာ အနိုင်ရဖို့ အခွင့်အလမ်း ပိုများလာမှာ' ချူးယွင်ဖန်းက တွေးလိုက်မိသည်။

အခန်း (၁၇၇၆) ရှေးအတီတေ၊ ရှေးဟောင်း၊ ခေတ်လယ်နှင့် လက်ရှိခေတ်များ

အတွင်း၌ မည်သည့်အရာများ ပုန်းကွယ်နေပါစေ မြေကမ္ဘာတုန်ဟိန်းစေမည့် တိုက်ပွဲတစ်ခုဖြစ်လာပေလိမ့်မည်။ ချူးယွင်ဖန်းသည် အတိုင်းအတာတစ်ခုထိ မိမိကိုယ်ကို ယုံကြည်မှုရှိသော်လည်း အဆုံးသတ်တွင် ပကတိအင်အားသာလျှင် အရာရာအတွက် အာမခံချက်ဖြစ်ပေသည်။ ထို့ကြောင့် ချူးယွင်ဖန်းသည် အလျင်မလိုဘဲ မည်သူမျှ သတိမပြုမိစဉ် တောင်မြစ်ပန်းချီကားအတွင်းသို့ ဝင်ရောက်လိုက်သည်။ ပြီးနောက် သူသည် ဗြဟ္မာသီးများကို ဆွတ်ခူးလိုက်သည်။ အစောပိုင်းက သားရဲများ၏ အလောင်းများမှ ဖြစ်တည်လာသော ဗြဟ္မာသီးများ ပြွတ်သိပ်လျက်ရှိပေသည်။

ချူးယွင်ဖန်းသည် ယခင်က ဤကဲ့သို့ အဆင့်နိမ့်အလောင်းများကို စိတ်မဝင်စားခဲ့ပေ။ အကြောင်းမှာ သူကိုယ်တိုင်အတွက် အသုံးမဝင်သည့်အပြင် သိမ်းဆည်းထားလျှင်လည်း နေရာကျပ်မည်ဖြစ်သောကြောင့်ဖြစ်သည်။ သို့သော် ယခုမူ အခြေအနေများ ကွဲပြားသွားပြီဖြစ်သည်။ အဆင့်နိမ့်ဗြဟ္မာသီးများသည် သူ့အတွက် အသုံးမဝင်သော်လည်း စစ်တပ်တစ်ခုကို ဦးဆောင်နေရသောကြောင့် ထိုသစ်သီးများကို ပေါင်းထိုက်မြို့၏ စစ်သားများ အသုံးပြုရန် ချန်ထားနိုင်ပေသည်။

သူသည် ထိုစစ်သားများကို ဒြပ်မဲ့အဆင့်သို့ တစ်ဟုန်ထိုး မြှင့်တင်ပေးထားခဲ့သည်။ ၎င်းသည် ဒြပ်မဲ့အနိမ့်ဆုံးအဆင့်သာဖြစ်သော်လည်း စစ်တပ်တစ်ခုလုံးဖြစ်နေသည့်အတွက် အလွန်တရာ တုန်လှုပ်ဖွယ်ကောင်းလှပေသည်။ ပုံမှန်လေ့ကျင့်ရေးနည်းလမ်းများဖြင့်ဆိုလျှင် ဤအဆင့်ထိရောက်ရှိရန် မည်မျှများပြားသော သယံဇာတနှင့် ရတနာများ လိုအပ်မည်ကို မခန့်မှန်းနိုင်ပေ။ ကြီးမြတ်သောတရှ၏ များပြားလှသော စစ်တပ်များထဲတွင်ပင် ထိပ်တန်းစစ်သည် အနည်းငယ်သာ ဒြပ်မဲ့အဆင့်သို့ ရောက်ရှိနိုင်ကြသည်။ သို့သော် ချူးယွင်ဖန်းကမူ ထိုအဆင့်သို့ မိမိဘာသာ ပြုစုပျိုးထောင်ပေးရန် ကြံရွယ်နေခြင်းဖြစ်သဖြင့် သူ၏ ရည်မှန်းချက်များ မည်မျှကြီးမားသည်ကို ခန့်မှန်းကြည့်နိုင်သည်။

ဗြဟ္မာသီးကို ဝါးမြိုလိုက်ပြီးနောက် ချူးယွင်ဖန်းသည် ခန္ဓာကိုယ်အတွင်းရှိ နတ်စွမ်းအင်များ လှိုင်းထန်လာကြောင်း ခံစားလိုက်ရ၍ ပတ်ဝန်းကျင်၌ ကြောက်မက်ဖွယ် မြင်ကွင်းတစ်ခု ဖြစ်ပေါ်လာသည်။ အကယ်၍ ချူးယွင်ဖန်းသာ ယခုအချိန် တောင်မြစ်ပန်းချီကားအတွင်း ရှိမနေပါက ကြီးမားသော လှုပ်ခတ်မှုကြီး ဖြစ်လာပေလိမ့်မည်။ သူ၏ ခန္ဓာကိုယ်အတွင်းရှိ နတ်စွမ်းအင်များ အံ့ဩဖွယ် အရှိန်နှုန်းဖြင့် စတင်လည်ပတ်လာသည်။ နတ်စွမ်းအင်များ လည်ပတ်လာသည်နှင့်အမျှ အလိုလို ပြောင်းလဲသွားကာ မကြာမီတွင် ချူးယွင်ဖန်းသည် ဒြပ်မဲ့ကျွမ်းကျင်အဆင့်၏ အထွတ်အထိပ်သို့ တက်လှမ်းနိုင်ခဲ့သည်။

ချူးယွင်ဖန်း၏ မျက်လုံးထဲတွင် တစ်ကမ္ဘာလုံးသည် ယခင်နှင့်မတူဘဲ ထူးခြားနေဟန်ရှိသည်။ သူ၏ ခန္ဓာကိုယ်ကို သေးငယ်သော အမျှင်တန်းများက ရစ်ပတ်ထားသောကြောင့် ယခင်နှင့်မတူဘဲ ပြောင်းလဲသွားစေသည်။ ဒြပ်မဲ့အဆင့် ကျင့်ကြံသူများသည် သဘာဝတရား၏ နိယာမ ဖြစ်တည်မှုကို အနည်းငယ်မျှသာ အာရုံခံနိုင်ကြသည်။ ထိုမှတစ်ဆင့် နိယာမများကို နားလည်သဘောပေါက်ကာ၊ ၎င်းအတွင်းရှိ စည်းမျဉ်းများကို စူးစမ်းနိုင်သည့်အပြင် နိယာမများကို အသုံးပြု၍ ခန္ဓာကိုယ်ကို ခိုင်ခန့်သည့်အထိ ကျင့်ကြံခြင်းသည် ဒြပ်မဲ့ကျွမ်းကျင်အဆင့်၏ ကျင့်စဉ်ဖြစ်သည်။ သို့သော် ချူးယွင်ဖန်းသည် ကွဲပြားခြားနားသည်။ သူသည် ဤနိယာမများ၏ ဖြစ်တည်မှုသည်ကို မြင်တွေ့နေရခြင်းဖြစ်သည်။ ၎င်းတို့သည် သူ့ပတ်ဝန်းကျင်တွင် ပြွတ်သိပ်စွာ တည်ရှိနေကြရာ ဤဖြစ်တည်မှုသည် မည်မျှ တုန်လှုပ်ဖွယ်ကောင်းသနည်း။

ကျင့်စဉ်အဆင့်အရဆိုရလျှင် ချူးယွင်ဖန်းသည် တောင်ကို တောင်ဟုမြင်၍ ရေကို ရေဟုမြင်သောအဆင့်မှ တောင်သည် တောင်မဟုတ်၊ ရေသည် ရေမဟုတ်ဟူသော အဆင့်တစ်ခုသို့ တက်လှမ်းသွားခြင်းဖြစ်သည်။ နောက်ဆုံးအဆင့်သည် တောင်ကို တောင်အဖြစ်၊ ရေကို ရေအဖြစ် ကြည့်ရှု့ခြင်းဖြစ်ကြောင်း ချူးယွင်ဖန်း သိရှိထားသည်။ မည်သို့ပင်ဆိုစေကာမူ၊ ဆေးဧကရာဇ်သည် ထိုအဆင့်၏ ထိပ်တန်းပညာရှင်တစ်ဦးဖြစ်ပေသည်။ သို့သော် ၎င်းကို သိရှိခြင်းနှင့် အမှန်တကယ် နားလည်သဘောပေါက်ခြင်းဟူသည် ကွာခြားသော အကြောင်းအရာဖြစ်သည်။

ယခုမူ ချူးယွင်ဖန်းသည် နတ်ဘုရားဝိညာဥ်၏ စွမ်းအင်ကို အသုံးပြု၍ တောင်သည် တောင်မဟုတ်၊ ရေသည် ရေမဟုတ်သည့် အခြေအနေကို မြင်တွေ့လိုက်ရသည်။ ဤသည်မှာ သူ ရရှိထားသော အလယ်အလတ်အဆင့် ဝိညာဉ်ကျောက်တုံးအားလုံးကို ဝါးမြိုပြီးနောက် နတ်ဘုရားဝိညာဥ် ထုတ်လွှတ်လာသည့် စွမ်းရည်အသစ်ဖြစ်သည်။ နတ်ဘုရားဝိညာဥ်၏ မူလစွမ်းရည်ဖြစ်သော မဟာတာအိုအားလုံးကို ခွဲခြမ်းစိတ်ဖြာနိုင်စွမ်းနှင့် ပေါင်းစပ်လိုက်သည့်အခါ ချူးယွင်ဖန်း၏ ကျင့်စဉ်နှင့် နားလည်နိုင်စွမ်းများ အရှိန်အဟုန်ဖြင့် တိုးတက်လာခဲ့သည်။ ၎င်းသည် ကျားကို အတောင်ပံ တပ်ပေးလိုက်ခြင်းနှင့် ဆင်တူသည်။

ဤကဲ့သို့ အခြေအနေသို့ ရောက်ရှိသွားခြင်းသည် ကျင့်စဉ်ပိုင်းဆိုင်ရာ အခက်အခဲများစွာကို အပေါ်စီးမှ မြင်တွေ့နိုင်စေသည်။ သူသည် ဤနိယာမများကို သာမန်မျက်စိဖြင့် မြင်နေရသည်။ သာမန်လူများအတွက် ဝေဝါးနေသော နိယာမများကို ရှင်းလင်းစွာ မြင်တွေ့နေသည်ဟု ဆိုနိုင်သည်။ ဤအချက်ကြောင့်ပင် သူ၏ ကျင့်စဉ်ပါရမီများ မည်မျှသာမန်ဖြစ်နေပါေစ သူ၏ ကျင့်စဉ်တိုးတက်မှု အရှိန်အဟုန်သည် ပါရမီရှင်ဆိုသူများထက် အဆပေါင်းများစွာ ပိုမိုမြန်ဆန်နေခြင်းဖြစ်သည်။ အပေါ်ယံ ကြည့်ရုံဖြင့် အရာခပ်သိမ်း၏ အနှစ်သာရကို မြင်တွေ့နိုင်ခြင်းသည် နတ်ဘုရားဝိညာဥ်၏ အစွမ်းထက်ဆုံးသော အချက်ဖြစ်သည်။ ချူးယွင်ဖန်း၏ ရှေ့မှောက်တွင် မည်သည့်နိယာမဖြစ်ပါစေ လျှို့ဝှက်ချက်အဖြစ် တည်ရှိနိုင်မည် မဟုတ်ပေ။

ဧကရာဇ်များစွာ ယှဉ်တွဲပေါ်ထွက်ခဲ့သည့် ဝေးကွာလှသော ဘုန်းတန်ခိုးကြီးခေတ်ကာလတွင် ဧကရာဇ်များစွာသည် နတ်ဘုရားဝိညာဥ်အတွက် ခေတ်တစ်ခု အဆုံးသတ်သွားသည်အထိ တိုက်ခိုက်ခဲ့ကြခြင်းသည် အံ့ဩစရာ မဟုတ်တော့ပေ။ ဤကာလအတွင်း ချူးယွင်ဖန်းသည် အချက်အလက်များစွာကို ရှာဖွေကြည့်ရှုခဲ့သည်။ ကြယ်ကြွေကောင်းကင်ဂိုဏ်းသည် ကမ္ဘာပေါ်ရှိ ထိပ်တန်းဂိုဏ်းဆယ်ခုတွင် ပါဝင်သောကြောင့် ၎င်းတို့၌တည်ရှိသော အချက်အလက်များသည် ဖုန်မှုန့်များကဲ့သို့ များပြားလှပေသည်။

ဝေးကွာလှသော အတိတ်ရှိ ကိစ္စရပ်များနှင့် ပတ်သက်လျှင် အမှန်တကယ် လျှို့ဝှက်ချက်ဟူ၍ မရှိပေ။ ဂိုဏ်းကြီးများအားလုံးသည် ထိုအကြောင်းအရာအားလုံးကို သိရှိထားသည့်အပြင် တပည့်များ ဗဟုသုတ တိုးပွားစေရန်အတွက် ချပြထားကြသည်။ ကျင့်ကြံခြင်း၏ လမ်းစဥ်ဟူသည် တံခါးပိတ်၍ လုပ်ဆောင်ရမည့်အရာ မဟုတ်ပေ။ အောင်မြင်မှုရရှိသော ကျင့်ကြံသူတိုင်းသည် သာမန်လူတို့ စိတ်ကူးထားသည်ထက် များစွာ ဗဟုသုတ ကြွယ်ဝသူများဖြစ်ကြသည်။ ချူးယွင်ဖန်းသည် ထိုအချက်အလက်များမှတစ်ဆင့် အကြောင်းအရာများစွာကို တွေးဆနိုင်ခဲ့သည်။ သမိုင်းဝင် အထောက်အထားများ ဝေဝါးနေသော်လည်း အတိတ်ကို ရှေးအတီတေ၊ ရှေးဟောင်း၊ ခေတ်လယ်နှင့် လက်ရှိခေတ်များဟူ၍ အကြမ်းဖျင်း ပိုင်းခြားထားပေသည်။

ကမ္ဘာစဖြစ်တည်ရာ ရှေးအတီတေကာလတွင် ကြောက်မက်ဖွယ် သားရဲများစွာ သောင်းကျန်းခဲ့ကြသည်။ မွေးရာပါ စိတ်ဝိညာဉ်ပါရှိသော သက်ရှိများသည် ကမ္ဘာတစ်ခုလုံးတွင် ပျံ့နှံ့စွာ သောင်းကျန်းနေကြ၏။ သဘာဝတရား၏ ဝိညာဉ်စွမ်းအင်သည် အလွန်ကြမ်းတမ်းလှသောကြောင့် လက်ရှိကျင့်ကြံသူများ စိတ်ကူးနိုင်မည်မဟုတ်ပေ။ ကြောက်မက်ဖွယ် သားရဲကြီးဆယ်ကောင်သည် ထိုခေတ်မှ ဆင်းသက်လာကြသူများဖြစ်ကြ၍ ခေတ်ကာလ၏ အကောင်းဆုံးများဖြစ်ကြသည်။

ရှေးအတီတေကာလပြီးနောက် မိမိတို့၏ မွေးရာပါ စွမ်းအင်နှင့် ပါရမီကို အားကိုး၍ နယ်မြေများကို စိုးမိုးထားသော သားရဲများသည် ကမ္ဘာကြီး၏ ကြီးမားသော အပြောင်းအလဲနှင့် ရင်ဆိုင်ခဲ့ရသောကြောင့် သမိုင်းမှ တဖြည်းဖြည်း ဆုတ်ခွာသွားကြသည်။ ယခုအချိန်အထိ ၎င်းတို့မျိုးဆက်မှ ဆင်းသက်လာသူ အနည်းငယ်သာ ကျန်ရှိသော်လည်း ၎င်းတို့၏ အင်အားကို လျှော့တွက်၍ မရနိုင်သေးပေ။ ၎င်းသားရဲများသည် အလွန်တရာ ကြောက်မက်ဖွယ်ကောင်းသောကြောင့် ကျင်စဥ်ခြင်း ဆင်တူသည့် မည်သူမျှ ၎င်းတို့နှင့် မယှဉ်ပြိုင်နိုင်ကြပေ။

ထိုမှတစ်ဆင့် စစ်မှန်သော ကျင့်စဉ်ခေတ်ဖြစ်သည့် ရှေးဟောင်းခေတ်သို့ ရောက်ရှိလာခဲ့သည်။ ထိုအချိန်တွင် မွေးရာပါ စိတ်ဝိညာဉ်ပါရှိသော သက်ရှိများစွာ ကျန်ရှိနေသေးသော်လည်း ရှေးအတီတေကာလကဲ့သို့ မွေးရာပါ စွမ်းအင်ကိုသာ အားကိုး၍ စိုးမိုးနိုင်ခြင်း မရှိတော့ပေ။ ရှေ့ဆောင်လမ်းပြများစွာက ကျင့်စဉ်လမ်းစဉ်များစွာကို တီထွင်ဖန်တီး၍ စနစ်တကျ ပြုလုပ်ခဲ့ကြသောကြောင့် သာမန်သက်ရှိများစွာသည် ကျင့်စဉ်လမ်းကြောင်းပေါ်သို့ တက်လှမ်းနိုင်လာကြသည်။

ရှေးအတီတေကာလနှင့် မဝေးလှသေးသည့်အတွက် သက်ရှိအားလုံး၏ မျိုးဆက်များသည် ယိုယွင်းခြင်း မရှိသေးပေ။ မရေတွက်နိုင်သော ပညာရှင်များ၊ ဂိုဏ်းများနှင့် လမ်းစဉ်များစွာ ပေါ်ထွက်လာသည့်အတွက် ဧကရာဇ်များစွာ ယှဉ်တွဲရပ်တည်ခဲ့သော ခေတ်ကာလဟု ခေါ်ဆိုကြသည်။ ယနေ့ခေတ် ကျင့်စဉ်အများစုသည် ထိုခေတ်မှ ဆင်းသက်လာကြခြင်းဖြစ်သည်။ ထိုခေတ်ရှိ ပါရမီရှင်များသည် ကြောက်မက်ဖွယ်ကောင်းသည်အထိ သန်မာကြရာ ယနေ့ခေတ်လူများ စိတ်ကူးကြည့်ရန်ပင် ခက်ခဲလှပေသည်။ ဥပမာအားဖြင့် ဟွာရှန်းယွမ်သည် ထူးခြားသော ခန္ဓာကိုယ်ပိုင်ဆိုင်ထားသဖြင့် ကြယ်ကြွေကောင်းကင်ဂိုဏ်း၏ အာရုံစိုက်မှုကို ခံစားခဲ့ရသည်။

သို့သော် ထိုခေတ်တွင်မူ ထိုကဲ့သို့သော ခန္ဓာကိုယ်များသည် နွားမွေးကဲ့သို့ ပေါများလှသည်။ မရေတွက်နိုင်သည်အထိ များပြားလှသဖြင့် ထူးခြားသော ခန္ဓာကိုယ်ဟုပင် မသတ်မှတ်ကြပေ။ ဧကရာဇ်ခန္ဓာကိုယ်ကို စစ်မှန်သော ထိပ်တန်းခန္ဓာကိုယ်ဟု သတ်မှတ်နိုင်သော်လည်း ၎င်းသည်လည်း ထိုခေတ်၌ မပြောပါ့လောက်သော အရာဖြစ်သည်။ ဤသည်မှာ မွေးရာပါ စိတ်ဝိညာဉ်ပါရှိသော သက်ရှိများစွာ တည်ရှိနေသည့် ကြောက်မက်ဖွယ် ခေတ်ကာလတစ်ခုဖြစ်သည်။ ကြီးမြတ်သော ဧကရာဇ်နှင့် ဆေးဧကရာဇ်တို့ကဲ့သို့ ပညာရှင်များ ဆယ်စုနှစ်အနည်းငယ်အတွင်း ထိပ်တန်းပညာရှင်များဖြစ်လာခြင်းသည် ထိုခေတ်တွင်မူ မယုံကြည်နိုင်သော အံ့ဖွယ်ဖြစ်ရပ်တစ်ခုဖြစ်ပေသည်။