အခန်း ၁၇၇၇-၁၇၇၉

အခန်း (၁၇၇၇) အောင်မြင်စွာ အဆင့်ဖြတ်ကျော်ခြင်း၊ ဒြပ်မဲ့ကျွမ်းကျင်အဆင့် နှောင်းပိုင်း

ဤခေတ်ကာလတွင် ငယ်ရွယ်သော အသက်အရွယ်ဖြင့် စကြဝဠာအဆင့်သို့ တက်လှမ်းနိုင်သူ အများအပြားရှိနေ၍ ထိုအဆင့်ကိုပင် ကျော်လွန်နိုင်သူအချို့ရှိပေသည်။ ၎င်းတို့သည် မျိုးဆက်တစ်ခု၏ စစ်မှန်သော ပါရမီရှင်များ ဖြစ်ကြသည်။ သို့သော်လည်း ထိုကဲ့သို့သော အသက်အရွယ်ဖြင့် ဧကရာဇ်အဆင့်သို့ ရောက်ရှိခြင်းသည် မလွဲဧကန် အံ့ဖွယ်ဖြစ်ရပ်တစ်ခုဖြစ်သည်။ ထိုဖြစ်စဥ်သည် ဒဏ္ဍာရီဆန်လွန်းရုံသာမကဘဲ မဖြစ်နိုင်သောအရာဟုပင် ဆိုနိုင်သည်။

သို့သော်လည်း ရှေးဟောင်းခေတ်ကာလများတွင်မူ ဧကရာဇ်တစ်ပါးဖြစ်လာခြင်းသည် အလွန်သာမန်ကျသော ကိစ္စတစ်ခုဖြစ်ခဲ့သည်။ အကြောင်းမှာ ထိုခေတ်ရှိ အထွတ်အထိပ် ပညာရှင်များသည် ပင်ကိုယ်ဗီဇအရ သဘာဝအလျောက် ဖြစ်တည်လာသော သက်ရှိများ သို့မဟုတ် ထိုသက်ရှိများ၏ တိုက်ရိုက်မျိုးဆက်များဖြစ်နေခြင်းကြောင့်ဖြစ်သည်။ ၎င်းတို့သည် ရှေးအတီတေကာလနှင့် နှိုင်းယှဉ်ပါက အားနည်းနေသော်လည်း ယခုခေတ်၏ သက်ရှိများနှင့်မူ လုံးလုံးလျားလျား နှိုင်းယှဉ်၍ မရနိုင်ပေ။

ထိုလူတို့၏ ပင်ကိုယ်ပါရမီများသည် အလွန်မြင့်မားကြသည်။ ဆေးဧကရာဇ်သည်လည်း ထိုကဲ့သို့ သဘာဝအလျောက်ဖြစ်တည်လာသည့် သက်ရှိတစ်ဦးဖြစ်ရာ သူ၏နောက်ခံသည် အလွန်အထင်ကြီးဖွယ် ကောင်းလှသည်။ ဆေးဧကရာဇ်၏ မှတ်ဉာဏ်များအရ သူသည် ထူးခြားသည့် မျိုးဆက်တစ်ခုမှ ဆင်းသက်လာခြင်းဖြစ်သည်။ ထို့ကြောင့် ၎င်းတို့သည် လုံးလုံးလျားလျား ကွဲပြားခြားနားကြသည်။ ရှေးအတီတေကာလရှိ သက်ရှိများကဲ့သို့ အင်အားမကြီးမားသော်လည်း ၎င်းတို့ဖန်တီးခဲ့သည့် ကျင့်စဉ်များမှတစ်ဆင့် ရှေးအတီတေကာလအောက် မနိမ့်ကျသည့်အပြင် ပိုမိုအစွမ်းထက်သော ယဉ်ကျေးမှုနှင့် အင်အားများကို တည်ဆောက်နိုင်ခဲ့ကြသည်။

ယဉ်ကျေးမှုပိုင်းအရ ကြည့်လျှင် နှစ်ပေါင်းကုဋေကုဋာအတွင်း အတောက်ပဆုံးသော အချိန်ကာလဖြစ်ခဲ့ရာ အပြိုင်စကြဝဠာကို သိမ်းပိုက်နိုင်ခဲ့သည့်အပြင် ရှေးဟောင်းယဉ်ကျေးမှု၏ အစွမ်းကို လောကအနှံ့ ဖြန့်ကျက်နိုင်ခဲ့သည်။ ရှေးဟောင်းမှတ်တမ်းများအရ ထိုခေတ်ကြီးသည် ကြီးမားသော စစ်ပွဲတစ်ခုကြောင့် ပြိုလဲသွားခဲ့ခြင်းဖြစ်သည်။ မည်သူမျှ မသိနိုင်သော အကြောင်းအရာတစ်ခုကြောင့် ဧကရာဇ်အများအပြား တိုက်ခိုက်ရာမှ ဧကရာဇ်ပေါင်းများစွာ သေဆုံးခဲ့ရသည်။ သွေးများ မြစ်ပမာ စီးဆင်းခဲ့ရသကဲ့သို့ လောကကြီး ပြိုပျက်ခဲ့ကာ ဝိညာဉ်စွမ်းအင်များသည်လည်း ယိုစိမ့်ပျောက်ကွယ်ခဲ့ရသည်။ ထို့အပြင် သက်ရှိပေါင်းများစွာလည်း အစုလိုက်အပြုံလိုက် သေကြေပျက်စီးခဲ့ရသည်။

ဤအကြောင်းအရာများကို ကြယ်ကြွေကောင်းကင်ဂိုဏ်း၏ မှတ်တမ်းများတွင် ဖော်ပြထားခြင်း မရှိပေ။ ၎င်းတို့ကိုယ်တိုင် မသိရှိခြင်းသော်လည်းကောင်း လူသိရှင်ကြား မထုတ်ပြန်ခြင်းကြောင့်သော်လည်းကောင်း မည်သူမျှ မသိနိုင်ပေ။ သို့သော် ချူးယွင်ဖန်း၏ ကိုယ်ပိုင်ထင်မြင်ချက်များအရ ဧကရာဇ်များ အသေအကျေ တိုက်ခိုက်ကြခြင်းသည် လောကထဲသို့ နတ်ဘုရားဝိညာဉ် ဆင်းသက်လာခြင်းနှင့် ဆက်စပ်နေနိုင်သည်။ ဆေးဧကရာဇ်သည်လည်း ထိုစစ်ပွဲအတွင်း ကွယ်လွန်ခဲ့ခြင်းဖြစ်သည်။

ထိုအချိန်မှစ၍ သမိုင်းကြောင်းသည် ခေတ်တစ်ခုသို့ ကူးပြောင်းသွားခဲ့သည်။ ခေတ်သစ်ကာလသည် အမှန်တကယ် ပရမ်းပတာဖြစ်သော ခေတ်ဆိုးကြီးတစ်ခုဖြစ်ခဲ့သည်။ ဧကရာဇ်များ၏ ဖိနှိပ်ထိန်းချုပ်မှု မရှိတော့သည့်နောက်တွင် အင်အားစုအသီးသီးသည် ထိတ်လန့်ဖွယ် စစ်ပွဲများ ဆင်နွှဲလာကြသည်။ အထူးသဖြင့် ဧကရာဇ်များကြောင့် ကမ္ဘာလောကကြီး အပိုင်းပိုင်းကွဲအက်သွားပြီးနောက် ပတ်ဝန်းကျင်အခြေအနေများ တဖြည်းဖြည်း ဆိုးရွားလာကာ ကျင့်ကြံခြင်းဆိုင်ရာ အရင်းအမြစ်များ ရှားပါးလာခဲ့သည်။ ဤအချက်ကပင် အင်အားစုများကြားရှိ ပြိုင်ဆိုင်မှုကို ပိုမိုပြင်းထန်လာစေသည်။

ထိုကာလသည် အမှောင်ခေတ်တစ်ခုဖြစ်သည်။ လူပေါင်းများစွာ ပုရွက်ဆိတ်များကဲ့သို့ သတ်ဖြတ်ခံခဲ့ရသည်။ နတ်ဆိုးလမ်းစဉ်သည် ထိုပရမ်းပတာခေတ်အတွင်း ကောင်းကင်ဘုံ၏ ချီးမြှောက်မှုကို ရရှိထားသကဲ့သို့ လျင်မြန်သော အရှိန်အဟုန်ဖြင့် ကြီးထွားလာခဲ့သည်။ ကမ္ဘာလောကကြီးတစ်ခုလုံး နတ်ဆိုးလမ်းစဉ်၏ လက်အောက်သို့ ရောက်လုနီးပါးဖြစ်ခဲ့ရာ တရားသောလမ်းစဉ် ကျင့်ကြံသူများ ကိုယ့်ကိုယ်ကို ကာကွယ်ရန်ပင် ခဲယဉ်းသောကြောင့် ဆုတ်ခွာခဲ့ရသည်။

ခေတ်သစ်ကာလ၏ အဆုံးသတ်တွင်မူ စစ်မှန်သော ဧကရာဇ်တစ်ပါး ပေါ်ထွန်းလာကာ ပြင်းထန်သော စွမ်းအင်ဖြင့် ထိုအမှောင်ခေတ်ကို ဖိနှိပ်နိုင်ခဲ့သည်။ ထိုဧကရာဇ်သည် ဒုက္ခပေးနေသည့် နတ်ဆိုးကျင့်ကြံသူများနှင့် ဘုရင်အဆင့် နတ်ဆိုးကျင့်ကြံသူများကိုပင် နှိမ်နင်းနိုင်ခဲ့သည်။ ထိုဧကရာဇ်သည် ပေါ်ထွန်းလာချိန်မှစ၍ ပြိုင်ဆန်ရှာခဲ့ရာ ရန်သူအားလုံးကို အောင်နိုင်၍ အမှောင်ခေတ်ကို အပြီးတိုင် ငြိမ်းအေးစေခဲ့သည်။ ဧကရာဇ်သည် သူနှင့်အတူ တိုက်ပွဲဝင်ခဲ့သော ဂိုဏ်းကြီးဆယ်ဂိုဏ်းနှင့် ပူးပေါင်း၍ မင်းဆက်တစ်ခုကို တည်ထောင်ခဲ့ရာ ၎င်းသည် ယခုလက်ရှိ ကြီးမြတ်သောတရှဖြစ်သည်။

ထိုအချိန်မှ ယနေ့အထိ သမိုင်းကြောင်းကို လက်ရှိခေတ်ဟု လူသိများကြသည်။ သမိုင်းကြောင်းကို ဖတ်ရှုနေချိန်၌ ချူးယွင်ဖန်းသည် ထိုခေတ်ကာလ၏ ခန့်ညားထည်ဝါမှုကို အံ့အားသင့်နေမိသည်။ ဧကရာဇ် ပေါ်ထွန်းလာချိန်မှစ၍ အမှောင်ခေတ်ကြီး ကုန်ဆုံးကာ တရှမင်းဆက်ကို တည်ထောင်ခဲ့သည်အထိ ဗဟိုလွင်ပြင်ဒေသရှိ နတ်ဆိုးများကို မောင်းထုတ်ရန် အချိန်နှစ်ဆယ်မျှသာ ကြာမြင့်ခဲ့သည်။ ပြီးနောက် ကြီးမြတ်သောတရှ၏ ဧကရာဇ်သည် ဟူမျိုးနွယ်စုများ၊ လူရိုင်းများ၊ မွန်းစတားများ၊ ပင်လယ်မျိုးနွယ်စုများ၊ နတ်ဆိုးများနှင့် ဗဟိုလွင်ပြင်ကို ဖျက်ဆီးနေသော အခြားသော တိုင်းတစ်ပါးမျိုးနွယ်စုများကို ဆက်တိုက် အောင်နိုင်ခဲ့သည်။ ထိုအချိန်မှသာ ဗဟိုလွင်ပြင်ဒေသသည် ငြိမ်းချမ်းသောခေတ်သို့ ဦးတည်နိုင်ခဲ့ခြင်းဖြစ်သည်။

အဆိုပါ ဧကရာဇ်သည် ကြီးမြတ်သောတရှ၏ ပထမဆုံးနှင့် တစ်ဦးတည်းသော ဧကရာဇ်ဖြစ်ခဲ့သည်။ ထိုအချိန်မှစ၍ တရှ၏ အုပ်ချုပ်သူများကို ဘုရင်ဟုသာ ခေါ်ဆိုနိုင်၍ ဧကရာဇ်ဟု မခေါ်ဆိုနိုင်တော့ပေ။ အားလုံး၏ စွမ်းဆောင်ရည်နှင့် ခွန်အားသည် လူအများက ဧကရာဇ်ဟု ခေါ်ဆိုထိုက်ရန် မလုံလောက်ခြင်းကြောင့်ဖြစ်သည်။ ကြီးမြတ်သောတရှ၏ ဧကရာဇ်တွင်မူ ကြီးပြင်းလာမှု သမိုင်းကြောင်းဟူ၍ လုံးလုံးလျားလျား မရှိခဲ့ရာ ကျောက်ဆောင်ကြားမှ ခုန်ထွက်လာသကဲ့သို့ပင် ထင်မှတ်ရစေသည်။ သူသည် ပေါ်ထွက်လာချိန်တွင် ပြိုင်ဘက်ကင်းသော ဧကရာဇ်အဆင့်သို့ ရောက်ရှိနေပြီဖြစ်သည်။ သူသည် မွေးဖွားလာသည်နှင့်တစ်ပြိုင်နက် မှောင်မိုက်သော ပရမ်းပတာခေတ်ကို နှိမ်နင်းရန် တိုက်ပွဲအတွင်းသို့ ချက်ချင်းဝင်ရောက်ခဲ့သည်။

သူသည် နန်းတက်ပြီး နှစ်ပေါင်းငါးဆယ်အကြာတွင် ကြီးမြတ်သောတရှအတွင်းရှိ သောင်းကျန်းမှုများကို ငြိမ်သက်စေခဲ့သည်။ ပြီးနောက် သားကြီးဖြစ်သူအား ထီးနန်းလွှဲအပ်ကာ မည်သည့်သဲလွန်စမျှ မချန်ရစ်ဘဲ ပျောက်ကွယ်သွားခဲ့သည်။ အချို့ကမူ အမှောင်ခေတ်ကို နှိမ်နင်းစဉ် ရရှိခဲ့သော ဒဏ်ရာများကြောင့် စွမ်းအင်ကုန်ခမ်းကာ ကွယ်လွန်သွားခြင်းဖြစ်သည်ဟု ဆိုကြ၍ အချို့ကမူ ဧကရာဇ်သည် ထာဝရအိပ်စက်မှု အခြေအနေသို့ ဝင်ရောက်သွားခြင်းဖြစ်သည်ဟု ဆိုကြသည်။

အချို့သော ကောလာဟလများအရ ထိုဧကရာဇ်သည် ခေတ်သစ်ကာလ၏ ပညာရှင်တစ်ဦး မဟုတ်ဘူးဟုပင် ဆိုကြသည်။ ရှေးဟောင်းခေတ် ပြီးဆုံးသွားပြီးနောက်ပိုင်း ဧကရာဇ်တစ်ပါးကို မမြင်တွေ့ရသည်မှာ ကြာမြင့်ပြီဖြစ်သောကြောင့် ကြီးမြတ်သောတရှ၏ ဧကရာဇ်သည် ရှေးဟောင်းခေတ်မှ နှစ်ရှည်လများ အိပ်စက်နေသော ဧကရာဇ်တစ်ပါး ဖြစ်နိုင်ခြေရှိသည်။ ထို့ကြောင့်သာ သူ ပေါ်ထွက်လာချိန်မှစ၍ ပြိုင်ဘက်ကင်းနေကာ ရန်သူအားလုံးကို ခြေမှုန်းနိုင်ခြင်းဖြစ်ပေလိမ့်မည်။

သို့သော်လည်း ဤအချက်ကို သဘောမတူသူများ ရှိနေသည်။ ရှေးဟောင်းခေတ်မှ ယခုအချိန်အထိ မည်မျှကြာမြင့်သွားသည်ကို မည်သူမျှ မသိနိုင်သော်လည်း ဧကရာဇ်များပင် ထိုမျှကြာရှည်စွာ မရှင်သန်နိုင်ကြပေ။ ၎င်းတို့တွင်လည်း သက်တမ်းကန့်သတ်ချက်ဟူ၍ ရှိနေသည်။ ထိုသို့မဟုတ်ပါက နတ်ဘုရားဝိညာဉ်ကို ရရှိရန် ဧကရာဇ်အများအပြား တိုက်ခိုက်နေကြမည် မဟုတ်ပေ။ အခြေခံအကြောင်းရင်းမှာ မသေမျိုးဖြစ်ရန်နှင့် ထာဝရအသက်ရှင်ရန်အတွက်သာဖြစ်၏။

ကြီးမြတ်သောတရှ၏ ဧကရာဇ်သည် အမြဲတစေ မြူခိုးများအတွင်း ဖုံးကွယ်နေသောကြောင့် မည်သူမျှ သူ့ကို အမှန်တကယ် နားမလည်ကြပေ။ ကြယ်ကြွေကောင်းကင်ဂိုဏ်း၏ မှတ်တမ်းများတွင်လည်း ဤကောလာဟလများကို စိတ်ဝင်စားဖွယ် သတင်းများအဖြစ်သာ ဖော်ပြထားသော်လည်း အရေးကြီးသည့် အချက်အလက်များကို မှတ်တမ်းတင်ထားခြင်း မရှိပေ။ ချူးယွင်ဖန်းအနေဖြင့် အမှန်တရားကို သိရှိလိုပါက ယခုလက်ရှိ တော်ဝင်မိသားစုကိုသာ မေးမြန်းရမည်ဖြစ်သည်။

ချူးယွင်ဖန်းသည် မျက်လုံးများကို မှိတ်ထားပြီးနောက် မိမိပတ်ဝန်းကျင်တွင် သာမန်မျက်စိဖြင့် မြင်တွေ့နိုင်သည့် စည်းမျဉ်းများကို စတင်ဆန်းစစ်လေသည်။ သူ၏ နယ်ပယ်အပေါ် နားလည်သဘောပေါက်မှုများ တဖြည်းဖြည်း မြင့်တက်လာ၍ ခန္ဓာကိုယ်အတွင်းရှိ နတ်စွမ်းအင်များသည်လည်း အံ့အားသင့်ဖွယ် အရှိန်အဟုန်ဖြင့် တိုးပွားလာသည်။ မူလက ခိုင်မာလှသော နယ်ပယ်ခြားနားချက်သည် ယခုအခါ အံ့ဩဖွယ် အရှိန်အဟုန်ဖြင့် ပြိုလဲပျက်စီးလာသည်။ နတ်ဘုရားဝိညာဉ်၏ အကူအညီဖြင့် ချူးယွင်ဖန်း၏ ကျင့်ကြံခြင်းအရှိန်သည် နောက်ထပ်အဆင့်တစ်ခုသို့ မြင့်တက်သွားသည်။

စက္ကန့်၊ မိနစ်များ ကုန်ဆုံးသွားသော်လည်း အချိန်မည်မျှ ကုန်လွန်သွားသည်ကို မည်သူမျှ မသိနိုင်ပေ။ ချူးယွင်ဖန်း၏ ခန္ဓာကိုယ်ပတ်လည်ရှိ အရှိန်အဝါများ တဖြည်းဖြည်း ပိုမိုအားကောင်းလာသည်။ ထိုစွမ်းအင်သည် ခဏအတွင်း လောကတစ်ခုလုံးကို လွှမ်းခြုံသွားပြီးနောက် ရုတ်တရက် ပေါက်ကွဲထွက်သွားသည်။

ဘုံး

ချူးယွင်ဖန်း၏ ခန္ဓာကိုယ်အတွင်းရှိ နတ်စွမ်းအင်များ ရုတ်တရက် ပေါက်ကွဲထွက်ကာ ပြင်းထန်သော လေပြင်းများအဖြစ် တိုက်ခတ်လာသည်။ သို့သော် နောက်တစ်ခဏတွင် ထိုစွမ်းအင်များသည် သူ၏ ခန္ဓာကိုယ်အတွင်းသို့ ပြန်လည်စုပ်ယူခံလိုက်ရသည်။ ချူးယွင်ဖန်းသည် အသက်ပြင်းပြင်း ရှူထုတ်လိုက်သောအခါ ၎င်းသည် စွမ်းအင်နဂါးတစ်ကောင်အဖြစ် ပြောင်းလဲကာ လွင့်ပျံသွားသည်။ သူသည် ခန္ဓာကိုယ်အတွင်းရှိ ပေါက်ကွဲလုနီးပါး နတ်စွမ်းအင်များကို ခံစားနေရသည်။ သူသည် နောက်ဆုံးတွင် အဆင့်ဖြတ်ကျော်နိုင်ခဲ့သည်။ ချူးယွင်ဖန်းသည် ယခင်နှင့် နှိုင်းယှဉ်ပါက နှစ်ဆထက်မက ပိုမိုသန်မာလာသည်။ ဤသည်မှာ အစပျိုးမှုသာဖြစ်သည်။ အကယ်၍ သူ၏စွမ်းအင်ကို ဆက်လက်အားကောင်းအောင် လုပ်ဆောင်နိုင်ပါက ယခုထက်မက တိုးတက်သွားမည်ဖြစ်သည်။ ထိုအခြေအနေကို ကျော်ဖြတ်ပြီးနောက် သူ၏ ကျင့်ကြံမှုအဆင့်များ တိုးတက်လာကာ အထွတ်အထိပ်သို့ ရောက်ရှိနိုင်ပေလိမ့်မည်။

အခန်း (၁၇၇၈) စကြဝဠာအဆင့်များကို မြက်ပင်များသဖွယ် သတ်ဖြတ်ခြင်း

ချူးယွင်ဖန်း၏ ယခုလက်ရှိ တိုက်ခိုက်ရေးစွမ်းရည်သည် စကြဝဠာဒုတိယအဆင့်ကို ကျော်ဖြတ်၍ တတိယအဆင့်သို့ အရှိန်အဟုန်ဖြင့် တက်လှမ်းနိုင်ပြီဖြစ်ရာ စကြဝဠာတတိယအဆင့် ကျွမ်းကျင်သူများကိုပင် အပြတ်အသတ် ချေမှုန်းနိုင်စွမ်းရှိသည်။ သာမန်လူများနှင့် နှိုင်းယှဉ်လျှင် ချူးယွင်ဖန်းသည် အဆင့်ဖြတ်ကျော်ရန် အဆပေါင်းများစွာ ပိုမိုခက်ခဲလှသော်လည်း တစ်ကြိမ် အဆင့်တက်သွားသည်နှင့် သူ၏တိုက်ခိုက်ရေးစွမ်းရည်သည် မည်သူနှင့်မျှ မနှိုင်းယှဉ်နိုင်သည်အထိ တုန်လှုပ်ဖွယ်ရာကောင်းလာသည်။

ထိုစဉ် တောင်မြစ်ပန်းချီကား၏ အပြင်ဘက်တွင် ရုတ်တရက် အပြောင်းအလဲတစ်ခု ဖြစ်ပေါ်လာသည်။ နာရီဝက်ကျော်ကြာ အရူးအမူးတိုက်ခိုက်ပြီးနောက် ဟွမ်ဖုလီ၊ မုန့်ထျန့်ရန်၊ ဟူချင်းရွှမ်၊ ကျစ်ပုယွီနှင့် အခြားကျွမ်းကျင်သူ လေးဦးတို့သည် တစ်ပြိုင်နက်တည်း တိုက်ခိုက်နေသောကြောင့် အတားအဆီးတွင် အပေါက်တစ်ခု ပွင့်ထွက်သွားခဲ့သည်။ လူတိုင်း ထိုအပေါက်ကို မြင်သောအခါ အလွန်ဝမ်းသာသွားကာ အတင်းတိုးဝှေ့၍ အတွင်းသို့ ချီတက်သွားကြသည်။ ချူးယွင်ဖန်း တောင်မြစ်ပန်းချီကားထဲမှ ထွက်လာခါစတွင် အခြားသူများသည် အတွင်းသို့ ရောက်နှင့်နေပြီဖြစ်သည်။ သူသည် အဆင့်ဖြတ်ကျော်ခါစဖြစ်သောကြောင့် ထိုအုပ်စုနှင့်အတူ အမီမလိုက်ခဲ့ပေ။

ထိုအချိန်တွင် ရုပ်သေးရုပ်များ၏ တားဆီးမှုဖြင့် ပိတ်မိနေသော စကြဝဠာအဆင့် တတိယမြောက် အုပ်စုသည် ရုပ်သေးရုပ်များကို ကျော်ဖြတ်ကာ ရောက်ရှိလာကြသည်။ ၎င်းတို့၏ အရေအတွက်သည် ရုပ်သေးရုပ်များထက် များပြားသည့်အပြင် ခွန်အားသည်လည်း မဆိုးလှပေ။ မှန်ကန်စွာပြောရလျှင် ၎င်းတို့သည် ရုပ်သေးရုပ်များထက်ပင် ပိုမိုသန်မာကြသော်လည်း ခေတ္တမျှ ပိတ်မိသွားခဲ့သဖြင့် အချိန်ကြန့်ကြာသွားခြင်းဖြစ်သည်။ ယခုမူ ၎င်းတို့အားလုံးသည် ချူးယွင်ဖန်းအနားသို့ ရောက်ရှိလာကြသည်။

"ဒီမှာတစ်ယောက်ရှိနေတာပဲ"

လူတိုင်း တောင်မြစ်ပန်းချီကားထဲမှ ထွက်လာသော ချူးယွင်ဖန်းကို မြင်သောအခါ မျက်လုံးများတွင် လောဘရိပ်များ ဖြတ်သန်းသွားကြသည်။ ၎င်းတို့ထံတွင် နေရာလွတ်ပစ္စည်းများရှိကြသော်လည်း လူကိုယ်တိုင် ဝင်ရောက်နိုင်သော ပစ္စည်းမျိုးသည် ရှားပါးပေသည်။

"အဖိုးကြီး၊ ခင်ဗျားလက်ထဲက နေရာလွတ်ရတနာကို ကောင်းကောင်းမွန်မွန် ပေးရင် ပေး၊ မဟုတ်လို့ကတော့ ကျုပ်တို့ကို ရိုင်းတယ်လို့ လာမပြောနဲ့" ခန္ဓာကိုယ် အလယ်အလတ် အရွယ်အစားရှိသော သက်လတ်ပိုင်း ကျင့်ကြံသူတစ်ဦးက အရှေ့သို့ တိုးလာကာ ယုတ်မာသော အပြုံးဖြင့် ပြောလိုက်သည်။ သူ့၏ အနောက်တွင် စကြဝဠာအဆင့် ကျွမ်းကျင်သူ ရာပေါင်းများစွာ ဝိုင်းရံလျက်ရှိသည်။

"ခင်ဗျားတို့က ကိုယ့်သေတွင်း ကိုယ်တူးနေတာပဲ" ချူးယွင်ဖန်း၏ မျက်လုံးများသည် စူးရှသော အလင်းတန်းများဖြင့် လင်းလက်သွားသည်။

ဤလူများသည် ပိုးကောင်များကဲ့သို့ဖြစ်ကြသည်။ ၎င်းတို့၏ ကြားဖြတ်သတ်ဖြတ်ရန် ဝံ့ရဲသော အပြုအမူသည် အမှန်တကယ်ပင် သေချင်ဇောတက်နေကြခြင်းနှင့် ဆင်တူပေသည်။ သက်လတ်ပိုင်းကျင့်ကြံသူသည် ချူးယွင်ဖန်း၏ တည်ငြိမ်နေသော မျက်နှာကို မြင်သောအခါ သူ ကြောက်လန့်နေသည်ဟု ထင်မှတ်သွားသဖြင့် အလွန်ဝင့်ကြွားလာသည်။

"ခင်ဗျား ဘယ်လိုလုပ်ခဲ့လဲဆိုတာ ကျုပ် မသိပေမယ့် ကျုပ်တို့ထက် အများကြီး စောရောက်နေတာဆိုတော့ ပစ္စည်းကောင်းတွေ အများကြီး ရထားမှာပဲ၊ အဲဒါတွေကို အသာတကြည်သာ ပေးလိုက်" သူ၏မျက်နှာတွင် ကျေနပ်အားရသော အပြုံးတစ်ခု ထွက်ပေါ်လာသည်။ သူ၏ ထင်မြင်ချက်အရ ချူးယွင်ဖန်းသည် ရရှိထားသမျှ ရတနာများကို အပ်နှံပေလိမ့်မည်။

ချူးယွင်ဖန်းသည် သူ့စကားများ ပြီးဆုံးသည်နှင့် စတင် တိုက်ခိုက်လိုက်သည်။ ကြောက်မက်ဖွယ်ကောင်းသော လှံအလင်းတန်းသည် နဂါးတစ်ကောင်ကဲ့သို့ သက်လတ်ပိုင်းကျင့်ကြံသူကို ထိုးဖောက်သွားသည်။ သက်လတ်ပိုင်းအရွယ် ကျင့်ကြံသူ၏ မျက်နှာသည် မယုံကြည်နိုင်ဖြစ်နေသော အမူအရာဖြင့် ပြည့်နှက်နေသည်။ ချူးယွင်ဖန်းသည် ဤကဲ့သို့ တိုက်ခိုက်လိမ့်မည်ဟု သူ လုံးလုံးလျားလျား မထင်ထားခဲ့ပေ။ သူသည် စကြဝဠာအဆင့်သို့ ရောက်ရှိနေသည့် ကျွမ်းကျင်သူတစ်ဦးဖြစ်ပါလျက် ချူးယွင်ဖန်း အရှေ့တွင် အဘယ်ကြောင့် ဤမျှ အားနည်းနေရသနည်းဟု မေးခွန်းထုတ်နေသည်။ ဤသို့ဖြင့် သူသည် ချက်ချင်းပင် အသတ်ခံလိုက်ရသည်။

"သေချင်နေကြတာပဲ။ သံမဏိလှံဂိုဏ်းက ကျုပ်ဆိုတဲ့ လော့ကျောက်ကိုများ လုယက်ဖို့ ကြံရဲတယ်ပေါ့လေ" ချူးယွင်ဖန်းက လှောင်ပြုံးပြုံးကာ ပြောလိုက်သည်။

သူသည် လော့ကျောက်၏ အမည်ကို အသုံးပြုလိုက်ခြင်းဖြစ်သည်။ လော့ကျောက်သည် သေဆုံးသွားပြီဖြစ်သောကြောင့် ဤအမည်ကြောင့် သူ့ကို ပြဿနာလာရှာလိမ့်မည် မဟုတ်ပေ။ ချူးယွင်ဖန်း၏ အပြုအမူကြောင့် ပတ်ဝန်းကျင်ရှိ စကြဝဠာအဆင့်ကျွမ်းကျင်သူများ ချက်ချင်း ဒေါသထွက်သွားကြသည်။ သူ၏ ခွန်အားသည် ၎င်းတို့ကို အနည်းငယ် တုန်လှုပ်သွားစေသော်လည်း ထိုတုန်လှုပ်မှုသည် ဒေါသဖြင့် လျင်မြန်စွာ အစားထိုးခံလိုက်ရသည်။

"သံမဏိလှံဂိုဏ်းက ဘာမို့လို့လဲ၊ ခင်ဗျား တကယ် လူသတ်ရဲတယ်ပေါ့လေ၊ ကြည့်ရတာ အသက်မရှင်ချင်တော့ဘူးပဲ"

ဤနေရာသို့ ရောက်နေသူအများစုသည် ထိပ်သီးဂိုဏ်းကြီး ဆယ်ဂိုဏ်း သို့မဟုတ် နတ်ဆိုးဂိုဏ်းများ၏ ကျင့်ကြံသူများဖြစ်ကြသည်။ အချို့သည် နတ်ဆိုးမျိုးနွယ်စုများကြားတွင်ပင် နာမည်ကျော်ကြားသူများဖြစ်ကြသည်။ ၎င်းတို့အနက် မည်သူဖြစ်ပါစေ၊ သံမဏိလှံဂိုဏ်းထက် သန်မာကြသည်။ သံမဏိလှံဂိုဏ်းသည် ကြီးမြတ်သောတရှတွင် ပထမတန်းစား အင်အားစုတစ်ခုဖြစ်သော်လည်း ဤနေရာရှိ ကျင့်ကြံသူများ၏ အင်အားစုကြီးများရှေ့တွင်မူ အသာစီးမရနိုင်ပေ။ သံမဏိလှံဂိုဏ်းမှ အဖိုးကြီးတစ်ဦး ၎င်းတို့ရှေ့တွင် သောင်းကျန်းနေခြင်းသည် ကောင်းကင်ဘုံကို အန်တုနေခြင်းနှင့် ဆင်တူသည်။

"ဒါဆိုလည်း စမ်းကြည့်ကြတာပေါ့" ချူးယွင်ဖန်းက လှောင်ရယ်ကာ ပြောလိုက်သည်။ သူ၏ မျက်လုံးများထဲတွင် စူးရှသော အလင်းတန်းများ လင်းလက်ဖြစ်သွားပြီးနောက် သက်လတ်ပိုင်းကျင့်ကြံသူ၏ အလောင်းကို သိမ်းဆည်းလိုက်သည်။

ဤလူများသည် သူ့ကို ပစ်မှတ်ထားနေကြသဖြင့် သူသည်လည်း ၎င်းတို့ကို တစ်ပြိုင်နက်တည်း အမြစ်ပြတ် ရှင်းလင်းရန် ပြင်ဆင်လိုက်သည်။ စကြဝဠာအဆင့် ကျွမ်းကျင်သူ ရာပေါင်းများစွာနှင့် ဆုံစည်းခြင်းသည် မလွယ်ကူလှပေ။ ထို့ကြောင့် ၎င်းတို့ကို ဗြဟ္မာပင်အတွက် မြေဩဇာအဖြစ် အသုံးပြုကာ သူ၏ ခွန်အားကို မြှင့်တင်ရန် ဆုံးဖြတ်လိုက်သည်။ သူသည် ဤလူများကို ကျင့်ကြံခြင်း အရင်းအမြစ်များအဖြစ် ကြည့်ရှုနေသော်လည်း ၎င်းတို့သည် ထိုအချက်ကို မသိကြပေ။

"အားလုံးပဲ အတူတိုက်ခိုက်ကြရအောင်၊ သူပိုင်တဲ့ ရတနာတွေနဲ့ ပစ္စည်းတွေကိုတော့ နောက်မှ ခွဲယူကြတာပေါ့" တစ်စုံတစ်ဦးက အော်ဟစ်လိုက်သည်။

ထိုစကားကို ကြားသောအခါ စကြဝဠာအဆင့်ကျွမ်းကျင်သူ ရာပေါင်းများစွာသည် စိတ်လှုပ်ရှားသွားကြရာ ကြောက်ရွံ့ခြင်း အနည်းမျှ မရှိတော့ပေ။ ၎င်းတို့သည် မူလကတည်းက ကြင်နာတတ်သူများ မဟုတ်ကြချေ။ ၎င်းတို့၏ အမြင်တွင် ချူးယွင်ဖန်းသည် စကြဝဠာအဆင့် ရာပေါင်းများစွာ၏ ဝိုင်းရံတိုက်ခိုက်မှုအောက်တွင် သေရမည်မှာ သေချာသည်။ မျက်စိတစ်မှိတ်အတွင်း စကြဝဠာအဆင့်ကျွမ်းကျင်သူ ရာပေါင်းများစွာ ဝိုင်းအုံလာကြသည်။

၎င်းတို့အားလုံးသည် စကြဝဠာပထမအဆင့်မှ တတိယအဆင့်အတွင်းသာရှိကြသော်လည်း ရာပေါင်းများစွာ တစ်ပြိုင်နက်တည်း တိုက်ခိုက်ခြင်းသည် မြေပြိုလုနီးပါး ကြောက်မက်ဖွယ်ကောင်းလှသည်။ ရာပေါင်းများစွာသော စွမ်းအင်စီးကြောင်းများ ကြောက်မက်ဖွယ် အလင်းတိုင်ကြီးအဖြစ် ပေါင်းစည်းသွားကာ ချူးယွင်ဖန်းထံသို့ တိုက်ရိုက် ဦးတည်သွားလေသည်။

ချူးယွင်ဖန်းသည် အနည်းငယ်မျှ စိုးရိမ်ခြင်းမရှိဘဲ လှောင်ပြုံးပြုံးကာ ပြောလိုက်သည်။

"ခင်ဗျားတို့ သေပြီး ငရဲပြည်ရောက်လို့ ငရဲမင်းက မေးရင် ခင်ဗျားတို့ကို သတ်လိုက်တာ သံမဏိလှံဂိုဏ်းက လော့ကျောက်ဆိုတာကို ပြောဖို့ မမေ့နဲ့ဦး"

ချူးယွင်ဖန်းက စတင်တိုက်ခိုက်လိုက်သည်။ ငွေနဂါးလှံကို ဝေ့ယမ်းကာ ထိုးနှက်လိုက်သည်နှင့် လှံအလင်းတန်းသည် ဧရာမ နဂါးကြီးတစ်ကောင်အဖြစ် ပြောင်းလဲသွားသည်။ နဂါးလက်သည်းများသည် စွမ်းအင်စီးကြောင်းများကို အလင်းစက်များအဖြစ် ဆွဲဖြဲပစ်လိုက်ပြီးနောက် အနီးဆုံးရှိ စကြဝဠာအဆင့်ကျွမ်းကျင်သူ ဒါဇင်ပေါင်းများစွာကို ပိုမိုမြန်ဆန်သော အရှိန်အဟုန်ဖြင့် ရိုက်ခတ်လိုက်သည်။ စကြဝဠာအဆင့်ကျွမ်းကျင်သူများသည် အော်ဟစ်ကာ သွေးများအန်ထုတ်လျက် ဧရာမ တူကြီးဖြင့် ထုရိုက်ခံလိုက်ရသကဲ့သို့ နောက်သို့ လွင့်ထွက်သွားကြသည်။ ပြီးနောက် ချက်ချင်းပင် ကောင်းကင်မှ မရေတွက်နိုင်သော လှံအလင်းတန်းများ ကျဆင်းလာကာ ၎င်းတို့အပေါ်သို့ ကျရောက်သွားသဖြင့် ထိုစကြဝဠာအဆင့် ကျွမ်းကျင်သူများ မြေပြင်ပေါ်တွင် ထိုးစိုက်ခံလိုက်ရသည်။

ခဏတာ တိုက်ခိုက်မှုအတွင်း စကြဝဠာအဆင့်ကျွမ်းကျင်သူ ဆယ်ဦးကျော်သည် ဆိုးရွားစွာ သေဆုံးသွားကြသည်။ ဤရုတ်တရက်ဖြစ်ပေါ်လာသော အခြေအနေကြောင့် လူတိုင်း တုန်လှုပ်သွားကြသည်။ ၎င်းတို့အားလုံး ကြောက်လန့်သွားကြသည်ဟုပင် ဆိုနိုင်သည်။ ချူးယွင်ဖန်းသည် မရပ်တန့်ဘဲ လက်ထဲရှိ ငွေနဂါးလှံကို ဆက်လက်ဝေ့ယမ်းနေသည်။ သံမဏိလှံဂိုဏ်း၏ အကြောက်ရွံ့ရဆုံး လှံသိုင်းပညာဖြစ်သည့် ကျားနှင့်နဂါးဟိန်းသံလှံသိုင်းကို သူ၏လက်ဖြင့် ခင်းကျင်းပြသနေခြင်းဖြစ်သည်။ စကြဝဠာအဆင့် ကျွမ်းကျင်သူတစ်ဦးသည် လှံတစ်ချက် ထိုးနှက်ရုံဖြင့် သေဆုံးသွားရသည်ဟု ဆိုနိုင်သည်။ မည်သို့သော အကာအကွယ် အတားအဆီးမျိုးရှိနေပါစေ၊ ဤနတ်ဆိုးသဖွယ် လှံချက်ရှေ့တွင် စက္ကူတစ်ခုကဲ့သို့ပင် အားနည်းလှသည်။ ထိုနေရာတွင် ခဏအတွင်း ထိခိုက်သေဆုံးမှုများစွာ ပေါ်ပေါက်လာသည်။

အခန်း (၁၇၇၉) ရှေးအတီတေ အမှောင်ဖီးနစ်ဥ

ချူးယွင်ဖန်း၏ လက်ထဲရှိ သံမဏိလှံဂိုဏ်း၏ ကျားနှင့်နဂါးဟိန်းသံလှံသိုင်းသည် တုန်လှုပ်ဖွယ် စွမ်းအင်ဖြင့် ပေါက်ကွဲထွက်ပေါ်လာသည်။ ၎င်းသည် သူ့ကို ဝိုင်းရံထားသော စကြဝဠာအဆင့် ကျင့်ကြံသူများကို ခဏတာအတွင်း သေကြေဒဏ်ရာရအောင် တိုက်ခိုက်နိုင်ခဲ့၏။ ကျန်ရှိနေသူများ တုန်လှုပ်ခြောက်ခြား၍ ဒေါသထွက်နေကြသည်။ ချူးယွင်ဖန်းသည် ၎င်းတို့ကို ယခုကဲ့သို့ အလွယ်တကူ သတ်ဖြတ်ရဲလိမ့်မည်ဟု မမျှော်လင့်ထားကြပေ။ ဤလူများသည် သာမန်လူများမဟုတ်ဘဲ တစ်ဦးတစ်ယောက်ချင်းစီသည် စကြဝဠာအဆင့် ကျင့်ကြံသူများဖြစ်သည့်အပြင် ဂိုဏ်းအသီးသီး၏ ရတနာသဖွယ် တန်ဖိုးရှိသော ကျင့်ကြံသူများဖြစ်ကြသည်။ လော့ကျောက်သည် အလွန်မာန်တက်လွန်းလှသည်။ သံမဏိလှံဂိုဏ်းသည် အင်အားစုကြီးများအားလုံးကို ရန်စရဲခြင်းဖြစ်လေသလော။

"မြန်မြန် ထွက်သွားကြစမ်း" ချူးယွင်ဖန်းသည် ၎င်းတို့ကို ဆက်လက်သတ်ဖြတ်ရန် အစီအစဉ်မရှိသကဲ့သို့ လှောင်ရယ်ကာ ပြောလိုက်သည်။

ကျန်ရှိနေသော ကျင့်ကြံသူများသည် တစ်ဦးကိုတစ်ဦး လှည့်ကြည့်ရှုပြီးနောက် တစ်ယောက်ပြီးတစ်ယောက် ထွက်ခွာသွားကြသည်။ ချူးယွင်ဖန်းသည် တစ်ချက်တည်းနှင့် လူဦးရေတစ်ဝက်ကျော်ကို သတ်ဖြတ်နိုင်ခဲ့ရာ သူ၏ ဤကြောက်မက်ဖွယ် ကျင့်ကြံမှုသည် ၎င်းတို့ကို တုန်လှုပ်ချောက်ချားစေခဲ့သည်။ ဤကဲ့သို့ သေကြေပျက်စီးနိုင်စွမ်းသည် အလွန်ထိတ်လန့်ဖွယ်ကောင်းလှသည်။ အရေးအကြီးဆုံးအချက်မှာ ချူးယွင်ဖန်းသည် ၎င်းတို့နောက်ကွယ်ရှိ အင်အားစုများကို လုံးလုံးလျားလျား ဂရုမစိုက်ဘဲ မဆင်မခြင် သတ်ဖြတ်နေခြင်းဖြစ်သည်။ မာနကြီးသူသည် တုံးအသူကို ကြောက်ရွံ့ကာ တုံးအသူသည် မဆင်မခြင် ပြုမူသူကို ကြောက်ရွံ့၍ မဆင်မခြင်ပြုမူသူသည် ရူးသွပ်သူကို ကြောက်ရွံ့ရသည်ဟူသော ဆိုရိုးစကားပင် ရှိပေသည်။

၎င်းတို့၏မျက်လုံးထဲတွင် သံမဏိလှံဂိုဏ်း၏ လော့ကျောက်သည် ရူးသွပ်နေသူတစ်ဦးဖြစ်သည်။ လူအများအပြားသည် ဤနာမည်ကို တိတ်တဆိတ် မှတ်သားထားလိုက်ကြသည်။ လက်ရှိတွင် ၎င်းတို့သည် ချူးယွင်ဖန်း၏ ပြိုင်ဘက်မဟုတ်သော်လည်း ဂိုဏ်းသို့ ပြန်ရောက်သည့်အခါ သံမဏိလှံဂိုဏ်းကို ပြဿနာရှာရပေလိမ့်မမည်။ သို့သော် ၎င်းတို့သည် ချူးယွင်ဖန်း၏ အကြံအစည်ထဲသို့ ရောက်ရှိသွားခြင်းဖြစ်ကြောင်း ၎င်းတို့မသိကြပေ။ သူသည် ပြဿနာများကို အခြားဘက်သို့ လွှဲပြောင်းပေးလိုခြင်းဖြစ်သည်။ သံမဏိလှံဂိုဏ်းသည် လီချန်းယွမ်၏ဘက်တော်သားများဖြစ်သည့်အပြင် မိမိကို သတ်ဖြတ်ရန် လူများ စေလွှတ်နေကြသဖြင့် ချူးယွင်ဖန်း၏ အကောက်ကြံမှုကို ရက်စက်သည်ဟု အပြစ်ဆို၍ မရနိုင်ပေ။

ထို့ပြင် သူသည် လော့ကျောက်အဖြစ် ရုပ်ဖျက်ထားကာ ကျားနှင့်နဂါးဟိန်းသံလှံသိုင်းသည်လည်း အလွန်နက်ရှိုင်းသောကြောင့် သံမဏိလှံဂိုဏ်းအနေဖြင့် ဖြေရှင်းရန် ခက်ခဲပေလိမ့်မည်။ လူတိုင်း ထွက်ခွာသွားပြီးနောက် ချူးယွင်ဖန်းသည် အေးစက်စွာ ပြုံးလိုက်သည်။ သူသည် စကြဝဠာအဆင့် အလောင်း ၅၀ ကျော်ကို တစ်ပြိုင်နက် သိမ်းဆည်းနိုင်ခဲ့သည်။ ၎င်းတို့သည် လော့ကျောက်၏ အလောင်းနှင့် မနှိုင်းယှဉ်နိုင်သော်လည်း ကြီးမားသော ရိတ်သိမ်းမှုဖြစ်သည်။ ဤသည်မှာ ချူးယွင်ဖန်း၏ ကျင့်ကြံမှုကို တိုးတက်စေမည့် ဗြဟ္မာသစ်သီးတစ်လုံး ထုတ်လုပ်ရန် လုံလောက်ပေသည်။

ချူးယွင်ဖန်းက ရယ်မောလိုက်မိသည်။ လူတစ်ယောက်သည် မမျှော်လင့်ထားသော ကံကောင်းမှုများမရှိဘဲ မချမ်းသာနိုင်သကဲ့သို့၊ မြင်းတစ်ကောင်သည်လည်း ညဘက်တွင် မြက်မစားဘဲ မဝဖြိုးနိုင်ပေ။ အကယ်၍ သူသာ ဖြည်းဖြည်းချင်း စုဆောင်းနေမည်ဆိုပါက မည်မျှကြာသည်အထိ စောင့်ဆိုင်းရမည်နည်း။ သူ၏ အတွေးများ နယ်ချဲ့နေစဉ် လျှပ်စီးတောင်ပံများကို ဖြန့်ကြက်၍ ကနဦး အတားအဆီးအတွင်းသို့ လိုက်ပါသွားသည်။ သူသည် စကြဝဠာအဆင့် ကျင့်ကြံသူများထဲတွင် နောက်ဆုံး၌ ကျန်ရစ်ခဲ့ခြင်းဖြစ်သည်။ ဒြပ်မဲ့ကျွမ်းကျင်အဆင့် ကျင့်ကြံသူများကမူ စကြဝဠာအဆင့်ရုပ်သေးများ၏ တိုက်ခိုက်မှုမှ လွတ်မြောက်နိုင်ခြင်း မရှိကြပေ။ ချူးယွင်ဖန်းသည် အတွင်းဘက်သို့ ပိုမိုနက်ရှိုင်းစွာ ဝင်ရောက်လာလေ ဒီရေလှိုင်းကဲ့သို့ ပြင်းထန်သော ဖိအားများကို ပိုမိုခံစားလာရသည်။

"ဒုတ်... ဒုတ်... ဒုတ်..."

ချူးယွင်ဖန်းသည် နှလုံးခုန်သံများ ကြားလိုက်ရသောကြောင့် နားကြားမှားနေသည်ဟုပင် သံသယဝင်မိသည်။ မှန်သည်၊ ၎င်းသည် အမှန်တကယ် နှလုံးခုန်သံဖြစ်သည်။ ဂူအတွင်းပိုင်း၌ ကြောက်မက်ဖွယ် သားရဲကြီးတစ်ကောင် ခိုအောင်းနေသကဲ့သို့ ထိုသားရဲ၏ နှလုံးခုန်သံကို ကြားနေရသည်။ သူသည် မကြာမီတွင် လူတိုင်းနှင့်အတူ လိုက်မှီသွားသည်။ လူတိုင်း အရူးအမူး တိုးဝင်နေကြသော်လည်း တဖြည်းဖြည်း ရပ်တန့်သွားကြောင်း သူ မြင်လိုက်ရသည်။ ၎င်းတို့သည် မမြင်နိုင်သော စွမ်းအင်တစ်ခု၏ တားဆီးမှုအောက်သို့ ရောက်ရှိနေပုံရသည်။ ကျင့်ကြံမှု အနက်ရှိုင်းဆုံးဖြစ်သော ဟွမ်ဖုလီ၊ မုန့်ထျန့်ရန်၊ ဟူချင်းရွှမ်နှင့် ကျစ်ပုယွီတို့ပင် ဤမမြင်နိုင်သော ဖိအားအောက်တွင် ရှေ့ဆက်တိုးရန် အလွန်ခက်ခဲနေကြသည်။

၎င်းသည် အလွန်ခက်ခဲလှသည်။ ၎င်းတို့၏ ခန္ဓာကိုယ်များမှ ရတနာအလင်းတန်းများ ဆက်တိုက် ထွက်ပေါ်လာကာ ဤကြောက်မက်ဖွယ် ဖိအားကို တားဆီးရန် ကာကွယ်ရေးမှော်ရတနာများကို အသုံးပြုထားကြသည်။ အခြားသော စကြဝဠာအဆင့် ကျင့်ကြံသူများသည်လည်း ထိုနည်းတူလည်းကောင်းတူဖြစ်သည်။ ချက်ချင်းဆိုသလိုပင် ဂူအလယ်၌ အရောင်အသွေးစုံလင်သော အလင်းတန်းများ လင်းလက်လာသောကြောင့် မှောင်မည်းနေသော ပတ်ဝန်းကျင်တစ်ခုလုံး လင်းထိန်သွားသည်။ သို့သော် ၎င်းတို့၏ ခွန်အားသည် အနည်းငယ် အားနည်းနေသဖြင့် အနားသို့ မချဉ်းကပ်နိုင်ဘဲ ပတ်ဝန်းကျင်တွင်သာ လှည့်ပတ်နေကြသည်။

ချူးယွင်ဖန်း လှမ်းကြည့်လိုက်သောအခါ ဂူ၏ အနက်ရှိုင်းဆုံးနေရာ၌ လူတစ်ယောက်အရွယ်ခန့်ရှိ ကြီးမားသည့် ဥကြီးတစ်ခုကို မြင်တွေ့လိုက်ရသည်။ ထိုဥကြီးသည် ကြောက်မက်ဖွယ် ဖိအားများကို ထုတ်လွှတ်ခြင်းဖြင့် လူတိုင်း၏ ရှေ့တိုးမှုကို ဟန့်တားနေသည်။ ချူးယွင်ဖန်း ကြားလိုက်ရသော နှလုံးခုန်သံသည် ဤဥကြီးအတွင်းမှ ထွက်ပေါ်လာခြင်းဖြစ်သည်။

‘ဘယ်လိုမျိုး သားရဲဥလဲ… အကောင်မပေါက်သေးတာတောင် စကြဝဠာအဆင့် ကျင့်ကြံသူတွေကို တားဆီးထားနိုင်တယ်'

ချူးယွင်ဖန်းသည် အလွန်အံ့အားသင့်သွားသည်။ ၎င်းသည် သားရဲတစ်ကောင်၏ ဥဖြစ်ကြောင်း ရှင်းလင်းလှသော်လည်း မည်သည့်သားရဲဥမျိုးဖြစ်သည်ကို မည်သူမျှ မသိရသေးပေ။ မမွေးဖွားမီ ဤမျှအစွမ်းထက်နေပါက ၎င်းသာ မွေးဖွားလာလျှင် အနည်းဆုံးလျှင် စကြဝဠာအဆင့် သို့မဟုတ် စကြဝဠာအဆင့်ထက် ကျော်လွန်သော တည်ရှိမှုမျိုးဖြစ်လာပေလိမ့်မည်။ အစွမ်းထက်သော သားရဲများစွာရှိသော်လည်း မွေးဖွားကတည်းက ဤမျှအစွမ်းထက်သည့် သားရဲမျိုး အလွန်ရှားပါးလှသည်။

ထိုဥအပေါ်တွင် အမှောင်ထု ပုံစံများဖြင့် ဖော်ပြထားသော နိယာမတရားအမှတ်အသားများ ထွင်းထုထားကြောင်း ချူးယွင်ဖန်း မြင်လိုက်ရသည်။ မည်သည့်နိယာမတရားမျိုးဖြစ်သည်ကို အတိအကျမသိသော်လည်း ထိုအရာသည် သူ့ကို အနည်းငယ် ကြောက်လန့်စေသည့် ခံစားချက်မျိုး ပေးစွမ်းနေသည်။ ဆေးဧကရာဇ်၏ မှတ်ဉာဏ်များအရ သာမန် သားရဲဥများတွင်လည်း ပုံစံအမှတ်အသားများ ပါရှိတတ်သော်လည်း ၎င်းတို့သည် အလွန်ရိုးရှင်ကြကြောင်း သူ သိထားသည်။ ထိုပုံစံများသည် မွန်းစတားများ ဆက်ခံထားသော မျိုးဆက်ကို ကိုယ်စားပြုလေ့ရှိသည်။

ယေဘုယျအားဖြင့် သားရဲတစ်ကောင်၏ မျိုးဆက်သည် ပိုမိုသန့်စင်လေ၊ ဥအပေါ်ရှိ အမှတ်အသားများ ပိုမိုရှုပ်ထွေးလေဖြစ်ကာ ဝိညာဉ်စွမ်းအင် လှုပ်ခတ်မှုသည်လည်း ပို၍ သိသာထင်ရှားကြသည်။ နိယာမတရားပေါင်းစုံဖြင့် သိပ်သည်းစွာ ထွင်းထုထားသော ဥမျိုးသည် ဖီးနစ်အမွှေးနှင် ချီးလင်၏ ဦးချိုကဲ့သို့ အလွန်တရာ ရှားပါးသည်။ ၎င်းသည် ထူးခြားဆန်းပြားသော အရာတစ်ခုကို ပျိုးထောင်နေပုံပေါ်သည်။

"မဟုတ်မှလွဲရော ရှေးအတီတေ အမှောင်ဖီးနစ်များလား" ချူးယွင်ဖန်းက အံ့အားသင့်စွာ ရေရွတ်လိုက်မိသည်။ အမှတ်အသားများကြားတွင် သေခြင်းတရား၏ အငွေ့အသက်များကို သူ မြင်တွေ့လိုက်ရသည်။ ထိုသိပ်သည်းသော သေခြင်းရနံ့သည် ကြည့်မိရုံနှင့်ပင် လူတိုင်းကို အသက်ရှူကျပ်စေသည်။

ရှေးအတီတေ အမှောင်ဖီးနစ်၏ မျိုးဆက်များ နေထိုင်ရာဂူအတွင်း၌ ဤကဲ့သို့ သိသာထင်ရှားသော သေခြင်းတရား နိယာမများရှိနေခြင်းကြောင့် ခန့်မှန်းရန် မခက်ခဲလှပေ။ ၎င်းသည် ရှေးအတီတေ အမှောင်ဖီးနစ်၏ မျိုးဆက်များ ချန်ထားရစ်ခဲ့သော ဥတစ်လုံးဖြစ်နိုင်ချေရှိသည်။

"ဒါကြောင့်ကို" လူတိုင်း၏ မျက်လုံးများထဲတွင် လောဘရိပ်များ ဖြတ်သန်းသွားကြောင်း ချူးယွင်ဖန်း မြင်တွေ့လိုက်ရသည်။ ၎င်းတို့အားလုံးသည်လည်း ဤဥ၏ ဇာစ်မြစ်ကို ခန့်မှန်းမိသွားဟန်တူသည်။

အကယ်၍ ရှေးအတီတေ အမှောင်ဖီးနစ်ဥကို ပိုင်ဆိုင်နိုင်ကာ ၎င်းကို လျှို့ဝှက်နည်းစနစ်ဖြင့် ယဉ်ပါးအောင် ပြုလုပ်နိုင်ပါက သူ၏ အနာဂတ်သည် အကန့်အသတ်မရှိ တိုးတက်လာပေလိမ့်မည်။ ရှေးအတီတေအမှောင်ဖီးနစ်သည် ရှေးခေတ်၏ အစွမ်းထက်ဆုံး သားရဲကြီး ၁၀ မျိုးအနက် တစ်မျိုးဖြစ်သည်။ ၎င်း၏ မျိုးဆက်များသည် ပထမဆုံးသော ရှေးအတီတေ အမှောင်ဖီးနစ်ကို မမှီနိုင်သော်လည်း သာမန်မွန်းစတားများသည် ၎င်းကို ယှဥ်ပြိုင်နိုင်မည် မဟုတ်ပေ။ သူသည် အနည်းဆုံးလျှင် ဘုရင်တစ်ပါးနှင့်ပင် တန်းတူ ရင်ဘောင်တန်းနိုင်ပေလိမ့်မည်။ အကယ်၍ ရှေးအတီတေ အမှောင်ဖီးနစ်၏ သစ္စာစောင့်သိမှုကိုသာ ရရှိသွားပါက ပြည်နယ်တစ်ခုကို လွှမ်းမိုးချုပ်ကိုင်နိုင်သည့် ဘုရင်တစ်ပါးပင်ဖြစ်လာနိုင်သည်။ ဤကဲ့သို့သော ဆွဲဆောင်မှုသည် လူတိုင်း အစွမ်းကုန် ကြိုးစားရန် လုံလောက်သော အကြောင်းပြချက်ဖြစ်လာသည်။