အခန်း (၁၆၁၅-၁၆၁၆)

အခန်း (၁၆၁၅) - ဆိတ်ကွယ်ရာမှ ဓားစာခံ

​နန်မင်ရုယွဲ့နှင့် လီရှမ်းဇီတို့ နှစ်ဦးမှာ ရှေးဟောင်းတားမြစ်နယ်မြေ သို့ သွားရောက်ခဲ့ပြီဖြစ်ကြောင်း ဖန့်ချန် အစောပိုင်းက မေးမြန်းစဉ် သိရှိခဲ့ရသည်။

ယခုအခါ ၎င်းတို့ကို ထိုနေရာ၌ မြင်တွေ့ရသည်မှာ ရှဲ့အာမန်နှင့် ချန်အင်းရွှယ်တို့က လျှို့ဝှက်လှုပ်ရှားမှု နည်းဗျူဟာကို အသုံးပြုခဲ့ကြခြင်းပင် ဖြစ်ပေလိမ့်မည်။

​ဖန့်ချန်သည် သူ၏ဝိညာဉ်ကို ခန္ဓာကိုယ်မှ ခွဲထုတ်လိုက်ပြီး ခန်းမထဲရှိ လူအများအား မသိမသာ အကဲခတ်လိုက်၏။ နန်မင်ရုယွဲ့တို့ သုံးဦးကို မြင်လိုက်ရသောအခါ ကျိရှန့်၏ မျက်နှာတွင် အံ့အားသင့်မှုများ သိသိသာသာ ပေါ်လွင်နေသလို ကျိထျန်းကျွင်းမှာလည်း ထိုနည်းတူပင် ဖြစ်သည်။

​အစမှအဆုံးအထိ ထိုကိစ္စကို ချန်အင်းရွှယ်နှင့် ရှဲ့အာမန်တို့ နှစ်ဦးသာ သိရှိပုံရပြီး ပြင်ပလူကို လုံးဝ အသိပေးခဲ့ခြင်း မရှိပေ။

​"စီနီယာကြီး ယန်... မိတ်ဆွေ ကျိ... ကျွန်မ မိတ်ဆက်ပေးပါရစေ။ ဒီနှစ်ယောက်ကတော့ ကျွန်မတို့ ကျွယ်မင်နန်းတော်ရဲ့ နံပါတ်ငါးနဲ့ နံပါတ်ရှစ်တို့ပါ၊ ဒီဘက်ကတော့ ထိုက်ယီမသေမျိုးဂိုဏ်းရဲ့ အမာခံတပည့် ရှန့်ယွဲ့ကွမ်း ပါ၊ သူကတော့ နံပါတ်သုံးပေါ့"

ချန်အင်းရွှယ်က ပြုံးလျက် မိတ်ဆက်ပေးလိုက်သည်။

​ထိုသုံးဦးစလုံးကလည်း လူအများကို ဂါရဝပြု နှုတ်ဆက်လိုက်ကြ၏။

​'ရှန့်ယွဲ့ကွမ်းက ထိုက်ယီမသေမျိုးဂိုဏ်းရဲ့ နံပါတ်သုံးလား'

ဖန့်ချန်က စိတ်ထဲမှ ခေါင်းငြိမ့်မိသည်။

ဤသူမှာ အဆင့် ၆ မသေမျိုးဖြစ်ပြီး ကျင့်ကြံမှုမှာ ချန်အင်းရွှယ်ထက် မနိမ့်ကျချေ၊ ကျွယ်မင်နန်းတော်၏ မဟာမိတ်ဂိုဏ်းတွင် နံပါတ်သုံးနေရာ ရထားခြင်းမှာ အမည်နှင့်လိုက်အောင် အရည်အချင်းရှိသူ ဖြစ်ပေမည်။

​ယန်ချန်းကျွင်းနှင့် မီးနတ်ဘုရား ကျင့်ကြံသူများ၊ ကျိမျိုးနွယ်စုဝင်များ၏ အကြည့်မှာ နန်မင်ရုယွဲ့နှင့် ရှန့်ယွဲ့ကွမ်းတို့ နှစ်ဦးထံသို့ ရောက်ရှိနေသည်။ နန်မင်ရုယွဲ့၏ ဦးခေါင်းတွင် နဂါးချိုများ ရှိနေသဖြင့် လူသားမျိုးနွယ် မဟုတ်ကြောင်း ထင်ရှားနေသည်။

ရှန့်ယွဲ့ကွမ်းမှာမူ ဆံပင်များမှာ အပြာရောင်တောက်နေပြီး နားရွက်အောက်ရှိ ငါးပါးဟက်များမှာ အသက်ရှူလိုက်တိုင်း ပွင့်လိုက်ပိတ်လိုက် ဖြစ်နေသဖြင့် သူသည်လည်း လူသားမျိုးနွယ် မဟုတ်ပေ။

​"မင်းက ရှန့်လန့်ကျင်ထောင်းပင်လယ် ကလား"

ယန်ချန်းကျွင်းက ရှန့်ယွဲ့ကွမ်းအား တစ်ချက်ကြည့်လိုက်ရာ သူ၏မျက်ဝန်းထဲတွင် စိုးရိမ်ထိတ်လန့်မှု အရိပ်အယောင်မျှ ပေါ်သွားသည်။

​"ကျွန်တော်မျိုးက ရှန့်လန့်ကျင်ထောင်းပင်လယ်က လာတာ မှန်ပါတယ်၊ ဒါပေမဲ့ ဒီနေ့တော့ လာပြီး အပျော်ကြည့်တာပါ စီနီယာကြီး... ဘာမှ အထင်မလွဲပါနဲ့"

ရှန့်ယွဲ့ကွမ်းက ပြုံးပြုံးရွှင်ရွှင် ခေါင်းငြိမ့်ပြကာ နေရာတစ်ခုတွင် ဝင်ထိုင်လိုက်၏။ သူ၏ပုံစံမှာ ဘေးမှကြည့်နေမည်ဖြစ်ပြီး ပါဝင်ပတ်သက်မည်မဟုတ်ကြောင်း ပြသနေခြင်းပင်။

​"ချန်လေး... ကြည့်ရတာ မင်းတို့ ကျွယ်မင်နန်းတော်က ပြင်ဆင်မှုတွေ တော်တော်လုပ်လာပုံရတယ်။ မင်းတို့ ဘာလုပ်ချင်တာလဲ ပြောစမ်းပါ"

ယန်ချန်းကျွင်းက လူအများထံမှ အကြည့်ကို ရုပ်သိမ်းလိုက်ပြီး ချန်အင်းရွှယ်အား ပြန်ကြည့်လိုက်သည်။

​"နံပါတ်ငါး... ဒီတစ်ခေါက် စုံစမ်းလို့ရတဲ့ အသုံးဝင်တဲ့ သတင်းတွေကို ပြောပြလိုက်ဦး"

ချန်အင်းရွှယ်က ပြုံးလျက် ဆိုသည်

"စီနီယာကြီး ယန်က ကျိုးကြောင်းဆင်ခြင်တတ်တဲ့သူပါ။ မင်းတို့ စုံစမ်းရရှိထားတာတွေက မှန်ကန်နေသရွေ့ ဒီနေ့ အားလုံးကို အလင်းပွင့်အောင် ပြောကြတာပေါ့"

​ကျိရှန့်မှာ ရင်ထဲတွင် တိတ်တဆိတ် ထိတ်လန့်သွား၏။ ကျွယ်မင်နန်းတော်က ဤမျှအထိ အလေးထားလိမ့်မည်ဟု သူ မထင်ထားခဲ့ပေ။

နန်မင်ရုယွဲ့ကဲ့သို့ အမာခံတပည့်ကိုပင် မသေမျိုးလောကငယ်သို့ ကြိုတင်လွှတ်ကာ စုံစမ်းခိုင်းထားသည် မဟုတ်ပါလား။ ဤသို့ အကာအကွယ်ပေးမှုကြောင့် သူ၏ရင်ထဲတွင် နွေးထွေးမှုကို ခံစားလိုက်ရသည်။ ကျိချွမ်းမေနှင့် အခြားသူများမှာလည်း ကျိရှန့်အား ကျွယ်မင်နန်းတော်သို့ လွှတ်လိုက်ခြင်းမှာ အကောင်းဆုံး ဆုံးဖြတ်ချက်ဖြစ်ကြောင်း တမ်းတမ်းတတ တွေးမိနေကြသည်။

​ဖန့်ချန် သတိပြုမိသည်မှာ ကျိထျန်းကျွင်းသည် ခုနက တစ်ခဏအတွင်း သိသိသာသာ အခြေအနေ ပျက်ယွင်းသွားခြင်းပင်။ သူက ချက်ချင်းပြန်လည် ဖုံးကွယ်လိုက်သော်လည်း နန်မင်ရုယွဲ့တို့ ပေါ်လာခြင်းမှာ သူတို့၏ အစီအစဉ်ထဲတွင် မရှိကြောင်း သက်သေပြနေသည်။

​"ကောင်းပြီလေ၊ မင်းတို့ ကျွယ်မင်နန်းတော်က ဘာတွေစုံစမ်းထားလဲ ပြောကြည့်ပါဦး။ ငါလည်း သိချင်နေတာ၊ ဒီကိစ္စက တကယ်ပဲ တခြား လျှို့ဝှက်ချက်တွေ ရှိနေလို့လား"

ယန်ချန်းကျွင်းက ခေါင်းငြိမ့်ပြကာ နန်မင်ရုယွဲ့ကို ကြည့်လိုက်သည်။

​"အဟမ်း..."

နန်မင်ရုယွဲ့က ချောင်းတစ်ချက်ဟန့်လိုက်ပြီးနောက် အေးအေးဆေးဆေးပင် စတင်ပြောဆိုသည်။

"လွန်ခဲ့တဲ့ နှစ်ပေါင်းငါးဆယ်ကျော်တုန်းက ကျွန်တော်နဲ့ နံပါတ်ရှစ်တို့ဟာ စီနီယာအစ်မသုံးရဲ့ တာဝန်ပေးချက်အရ ထိုက်ယီမသေမျိုးဂိုဏ်းက မိတ်ဆွေရှန့်ရဲ့ အကူအညီနဲ့ မသေမျိုးလောကငယ်ထဲကို ဝင်လာခဲ့ပါတယ်"

​"ကျွန်တော်ကတော့ ဘေးကနေ ကူညီပေးရုံပါ၊ ကျွန်တော့်ကိစ္စ မဟုတ်ပါဘူး"

ရှန့်ယွဲ့ကွမ်းက ပြုံးပြုံးလေး ဝင်ရှင်းပြသည်။

​"မသေမျိုးလောကငယ်ကို ရောက်တဲ့အခါ ကျွန်တော်တို့အရင်က ရထားတဲ့ သတင်းတွေအရ အဓိကပြဿနာဖြစ်တဲ့ နှစ်ဖက်စလုံးရဲ့ အထင်လွဲမှုအပေါ် စုံစမ်းစစ်ဆေးခဲ့ပါတယ်။ စုံစမ်းမှု ရလဒ်တွေကတော့ အခုလိုပါပဲ ကျိမျိုးနွယ်စုက ကျိထုံ နဲ့ မီးနတ်ဘုရားမသေမျိုးမျိုးနွယ်က ကျူးလင် တို့ဟာ ဒီကိစ္စရဲ့ တိုက်ရိုက်ပတ်သက်သူတွေ ဖြစ်ပါတယ်"

​"ဒါတွေက အပိုတွေ မဟုတ်ဘူးလား "

မီးနတ်ဘုရား ကျင့်ကြံသူများ၏ မျက်နှာတွင် လှောင်ပြောင်သည့် အရိပ်အယောင်များ ပေါ်လာကာ တစ်ဦးက မကျေမနပ် ဝင်ပြောလိုက်သည်။

"မင်းတို့ ကျွယ်မင်နန်းတော်က ဒါလောက်ပဲ စုံစမ်းနိုင်တာလား တကယ်တော့ ငါတို့ကို လာမေးရင်တောင် သိရမယ့်ဟာကို ဘာလို့ အပင်ပန်းခံ စုံစမ်းနေသေးတာလဲ"

​"ယဉ်ကျေးမှု မရှိလိုက်တာ၊ သူပြောတာကို ဆုံးအောင် နားထောင်ဦး"

ယန်ချန်းကျွင်းက မျက်မှောင်ကြုတ်ကာ ဆိုလိုက်သဖြင့် အနောက်မှလူများ ငြိမ်ကျသွားကြသည်။ သူက နန်မင်ရုယွဲ့အား ဆက်ပြောရန် ခေါင်းငြိမ့်ပြလိုက်၏။

​နန်မင်ရုယွဲ့က ဒေါသမထွက်ဘဲ အေးအေးဆေးဆေးပင် ဆက်ပြောသည်။

"ကျွန်တော်တို့ စုံစမ်းရရှိချက်အရ ဒီကိစ္စမှာ နောက်ထပ် ပတ်သက်သူ နှစ်ယောက် ရှိပါသေးတယ်။ တစ်ယောက်က ရေနတ်ဘုရားမသေမျိုးမျိုးနွယ် က ချူဖုန်း ဖြစ်ပြီး၊ နောက်တစ်ယောက်ကတော့ ကျူးလင်ရဲ့ အနီးကပ်အထိန်းတော်ကြီး ကျန်းလော့လင် ပါ"

​ကျိချွမ်းမေမှာ အံ့အားသင့်သွားပြီး

"ရေနတ်ဘုရားမျိုးနွယ်နဲ့ မီးနတ်ဘုရားမျိုးနွယ်က အစကတည်းက ရေနဲ့မီးလို မတည့်ကြတာပဲ၊ ဒီကိစ္စနဲ့ ဘယ်လို ပတ်သက်နေတာလဲ "

​ယန်ချန်းကျွင်း၏ မျက်နှာမှာ မည်းမှောင်သွားကာ

"ရေနတ်ဘုရားမျိုးနွယ်လား သူတို့က ဒီကိစ္စနဲ့ ဘာဆိုင်လို့လဲ "

​"အမှန်တရားကတော့... ကျူးလင်နဲ့ ချူဖုန်းတို့ဟာ အစကတည်းက ချစ်သူတွေ ဖြစ်နေကြတာပါ။ ကောင်းကင်မသေမျိုး မျိုးနွယ်ဆီကို အိမ်ထောင်မပြုချင်တဲ့အတွက် အထိန်းတော်ကြီးနဲ့ ချူဖုန်းတို့ တိုင်ပင်ပြီး... ကံဆိုးမယ့် ဓားစာခံတစ်ယောက်ကို ရွေးချယ်ဖို့ ဆုံးဖြတ်ခဲ့ကြတာပါ။ အဲဒီ ဓားစာခံကနေတစ်ဆင့် မီးနတ်ဘုရားမျိုးနွယ်အပေါ် ကျရောက်လာမယ့် ကောင်းကင်မသေမျိုး မျိုးနွယ်ရဲ့ ဒေါသကို လွှဲပြောင်းပေးဖို့ ကြံစည်ခဲ့ကြတာပါ"

နန်မင်ရုယွဲ့က ပြုံးလျက် ပြောလိုက်သည်။

​ဝုန်း

ယန်ချန်းကျွင်းသည် ဘေးရှိ လက်ဖက်ရည်ခုံကို လက်ဝါးဖြင့် ရိုက်ခွဲလိုက်၏။ မီးနတ်ဘုရား ကျင့်ကြံသူများ အားလုံးမှာလည်း ရှေ့သို့ တစ်လှမ်းတိုးလာကြပြီး ကိုယ်တွင်းမှ မသေမျိုးစွမ်းအင်များ ဆူပွက်လာကာ တိုက်ခိုက်တော့မည့် အသွင် ဆောင်လာကြသည်။

​ချန်အင်းရွှယ်ကမူ ထိုင်ခုံကြီးပေါ်တွင် ပျင်းရိပျင်းတွဲ ထိုင်နေရင်း ယန်ချန်းကျွင်းအား တစ်ချက်ကြည့်ကာ

"စီနီယာကြီး ယန်... မလောပါနဲ့ဦး၊ နံပါတ်ငါးကို စကားဆုံးအောင် ပြောခွင့်ပေးပါဦး"

​ယန်ချန်းကျွင်းသည် ရင်ထဲမှ ဒေါသကို အတင်းဖိသိပ်လိုက်ကာ အေးစက်စွာ ဆိုသည်။

"မင်းပြောတဲ့ စကားတိုင်းဟာ ကျွယ်မင်နန်းတော်ရဲ့ သဘောထားပဲ။ အကယ်၍ သက်သေမရှိဘဲ လျှောက်ပြောပြီး ငါတို့ မီးနတ်ဘုရားမျိုးနွယ်ကို အပုပ်ချတာဆိုရင်တော့... တကယ်ပဲ စစ်ပွဲတစ်ခု ဆင်နွှဲရလိမ့်မယ်"

​ဧည့်ခန်းထဲရှိ လေထုမှာ ထူးဆန်းသွား၏။ ကျိမျိုးနွယ်စု ကျင့်ကြံသူများမှာ တစ်ဦးကိုတစ်ဦး ကြည့်လိုက်ကြသည်။ နန်မင်ရုယွဲ့ ပြောသည့်အတိုင်းသာဆိုလျှင် ဖြစ်နိုင်ခြေ အလွန်ရှိလှပေသည်။

ကျွယ်မင်နန်းတော်က အကြောင်းမဲ့ ပြောမည်မဟုတ်ပေ၊ သို့ဆိုလျှင်... ကျိမျိုးနွယ်စုက တကယ်ပဲ "ဆိတ်ကွယ်ရာမှ ဓားစာခံ" ဖြစ်သွားခဲ့တာလား

​ကျိထုံမှာ သိသိသာသာ စိတ်လှုပ်ရှားလာပြီး နန်မင်ရုယွဲ့အား မျှော်လင့်ချက်အပြည့်ဖြင့် ကြည့်နေသည်။

​"ဒါတွေအားလုံးဟာ အထောက်အထား ခိုင်ခိုင်လုံလုံ ရှိပါတယ်၊ အလကား လျှောက်ပြောနေတာ မဟုတ်ပါဘူး"

နန်မင်ရုယွဲ့က လက်အုပ်ချီကာ ခပ်ပြုံးပြုံးပင် ဆိုသည်။

​ယန်ချန်းကျွင်းက အေးစက်စွာ ဆိုသည်

"သူမက အိမ်ထောင်မပြုချင်ဘူး ဆိုရင်တောင် ဘာလို့ ဒီလောက်အထိ လှည့်ကွက်တွေ သုံးနေရမှာလဲတစ်ခွန်းပြောလိုက်ရင် ပြီးတာပဲလေ။ ဒီကိစ္စသာ တကယ်ကြီးကျယ်သွားရင် ဘယ်လိုရလဒ်မျိုး ကြုံရမလဲဆိုတာ ကျူးလင် မသိဘူးလား "

​"ဘာဖြစ်လို့လဲဆိုတော့ ကျူးလင်လေးမှာ အချိန်သိပ်မရှိတော့လို့ပါ။ သူမက တစ်ပါးသူနဲ့ ခန္ဓာကိုယ်ချင်း အပ်နှင်းပြီးသား ဖြစ်နေပြီ။ ကောင်းကင်မသေမျိုးမျိုးနွယ်ကို အိမ်ထောင်မပြုချင်ဘူးလို့ ပြောရင်တောင် မီးနတ်ဘုရားမျိုးနွယ်ဘက်က သဘောတူမှာ မဟုတ်တာ သိလို့ပါ"

နန်မင်ရုယွဲ့က ပြုံး၍ ဆိုလိုက်သည်။

​ယန်ချန်းကျွင်းတို့အဖွဲ့မှာ ရင်လေးသွားကြသည်။ မီးနတ်ဘုရားမျိုးနွယ်က အလွယ်တကူ သဘောတူမည် မဟုတ်သည်မှာ အမှန်ပင်။

သို့သော်...

​အကယ်၍ သူမက ရေနတ်ဘုရားမျိုးနွယ် ကျင့်ကြံသူနှင့် ဖောက်ပြန်နေကြောင်း သိသွားပါက ကျူးလင်သည် ပြင်းထန်သော အပြစ်ပေးမှုကို ခံရမည်မှာ သေချာသည်။ ထို့အပြင် မျိုးနွယ်စုကြီး နှစ်ခုကြား စစ်ပွဲပင် ဖြစ်သွားနိုင်ပေသည်။

​"သူမက အပျိုစင် မဟုတ်တော့တဲ့ ခန္ဓာကိုယ်နဲ့ ကောင်းကင်မသေမျိုး မျိုးနွယ်ဆီကို ရောက်သွားခဲ့ရင် အဲဒီဒေါသကို မီးနတ်ဘုရားမျိုးနွယ် တစ်ခုတည်းကပဲ ခံရမှာပါ။ ဒါကြောင့်မို့လို့ သူမက ဓားစာခံတစ်ယောက်ကို ရှာဖို့ သဘောတူခဲ့တာပေါ့။ အဲဒီ ဓားစာခံရဲ့ အဆင့်အတန်းကလည်း သိပ်မနိမ့်မှ သူတစ်ပါး ယုံကြည်မှာလေ"

​ချန်အင်းရွှယ်က သက်ပြင်းသဲ့သဲ့ ချကာ

"ဒီလို ကိစ္စလေးတစ်ခုကြောင့်နဲ့ ကျွန်မတို့ကိုယ်တိုင် ဒီကို လာခဲ့ရတယ်၊ ဒီကောင်မလေးက တကယ်ပဲ တစ်ကိုယ်ကောင်းဆန်လွန်းပါတယ်"

​"သက်သေရော"

ယန်ချန်းကျွင်းက အေးဆေးစွာ ဆိုသည်

"သက်သေမရှိရင်တော့ မင်းတို့ရဲ့ စကားတွေကို မီးနတ်ဘုရားမျိုးနွယ်အပေါ် မကောင်းတဲ့ စိတ်နဲ့ အပုပ်ချတာလို့ပဲ သတ်မှတ်မယ်။ ဒီနေ့ ငါလာတာက ဒီကိစ္စကို အဆုံးသတ်ဖို့ပဲ၊ မင်းတို့က ကျိမျိုးနွယ်စုဘက်က ပါချင်ရုံနဲ့ ငါတို့ခေါင်းပေါ် အညစ်အကြေးတွေ လာပုံမချဖို့ မျှော်လင့်တယ်"

​"ရေနတ်ဘုရားမျိုးနွယ်က ချူဖုန်းနဲ့ ကျူးလင်ရဲ့ အထိန်းတော်ကြီး ကျန်းလော့လင် တို့က ဝန်ခံပြီးသားပါ"

နန်မင်ရုယွဲ့က ပြုံးလျက် ဆိုသည်

"သူတို့နှစ်ယောက်ရဲ့ ဝန်ခံချက်ကပဲ သက်သေပါပဲ"

​"ဝန်ခံတယ် မင်းတို့ သူတို့ကို ဖမ်းထားတာလား "

ယန်ချန်းကျွင်းက မျက်လုံးကို မှေးလိုက်ပြီး

"မင်းတို့ မေးမြန်းလို့ ထွက်လာတဲ့ စကားတွေကို ငါတို့ဘက်က အတည်ယူလို့ မရနိုင်ဘူးနော်"

​"စီနီယာကြီး အထင်လွဲနေပါပြီ။ ဒီကိစ္စကို စီနီယာအစ်မကြီး ကိုယ်တိုင် ကောင်းကင်မသေမျိုးမျိုးနွယ်ဆီ သွားခဲ့တာပါ။ အဲဒီက စီနီယာကြီးတွေကိုယ်တိုင် ဖြေရှင်းပေးခဲ့တာဖြစ်ပြီး ကျွန်တော်တို့ကတော့ ဘေးကနေ ကူညီပေးရုံ သက်သက်ပါပဲ"

နန်မင်ရုယွဲ့က ပြုံး၍ ဆိုလိုက်သည်။

​ထိုစကားအဆုံးတွင် ဧည့်ခန်းမကြီးတစ်ခုလုံး တိတ်ဆိတ်ငြိမ်သက်သွားတော့သည်။

အခန်း (၁၆၁၆) - ဆဌမမြောက် ကြယ်တာရာမသေမျိုး

​ကျွယ်မင်နန်းတော်၏ လုပ်ဆောင်ချက်မှာ ဤမျှအထိ ပြတ်သားပြီး ရက်စက်ကြမ်းကြုတ်လိမ့်မည်ဟု လူတိုင်း လုံးဝ မထင်မှတ်ထားခဲ့ကြပေ။

​သူတို့သည် ဤကိစ္စကို ကောင်းကင်မသေမျိုး မျိုးနွယ်စုထံ တိုက်ရိုက် တိုင်တန်း ပစ်လိုက်သည်လား။

​ကျိချွမ်းမေသည် ယန်ချန်းကျွင်းအား တစ်ချက်ကြည့်ကာ အတွေးနက်သွားပြီးနောက် သူမ၏ နှုတ်ခမ်းထောင့်တွင် ပေါ့ပါးသော အပြုံးတစ်ခု ပေါ်လာသည်။

အခြေအနေမှာ အလွန်ပင် ရှင်းလင်းသွားပြီ ဖြစ်ရာ သူမအနေဖြင့် ကျွယ်မင်နန်းတော်၏ စကားကို ခြွင်းချက်မရှိ ယုံကြည်လိုက်ပြီ ဖြစ်သည်။ တစ်ဖက်လူက စုံစမ်းစစ်ဆေးမှုမှာ အတည်ဖြစ်သည်ဟု ဆိုလျှင် ဧကန်အမှန်ပင် အတည်ဖြစ်ရမည်။

အကြောင်းမှာ ကျိမျိုးနွယ်စုသည် ကျွယ်မင်နန်းတော်အနေဖြင့် အကျိုးဆက်ကို ဂရုမစိုက်ဘဲ ဘက်လိုက်ကာကွယ်ပေးရလောက်အောင် အင်အားကြီးမားသည့် အနေအထားတွင် မရှိသောကြောင့်ပင်။

​မီးနတ်ဘုရားမသေမျိုးမျိုးနွယ်မှ ကျင့်ကြံသူများမှာမူ တစ်ဦးကိုတစ်ဦး ကြည့်ကာ မျက်လုံးများထဲတွင် ထိတ်လန့်မှု၊ ဒေါသထွက်မှုနှင့် စိုးရိမ်ပူပန်မှုများ ရောပြွမ်းနေကြသည်။

​ယန်ချန်းကျွင်းသည် အတော်ကြာအောင် တိတ်ဆိတ်သွားပြီးနောက် သက်ပြင်းရှည်ကြီး တစ်ချက်ချလိုက်ကာ

"ချန်လေး... သူပြောတာ တကယ်ပဲလား ကောင်းကင်မသေမျိုးမျိုးနွယ်က တကယ်ပဲ ဒီကိစ္စထဲမှာ ဝင်ပါနေပြီလား "

​ချန်အင်းရွှယ်က ခေါင်းငြိမ့်ပြရင်း

"စီနီယာကြီး ယန်... ကျွန်မတို့ ဒီကိစ္စကို သိလိုက်ရတဲ့အချိန်မှာ အခြေအနေက အလွန်ကို ပြင်းထန်တယ်လို့ ခံစားခဲ့ရတယ်။ ဒါကြောင့် ကောင်းကင်မသေမျိုးမျိုးနွယ်ကိုပဲ ဦးဆောင်ဖြေရှင်းခိုင်းတာက အသင့်တော်ဆုံးပဲလေ။ ဒါမှ ကျွန်မတို့ ကျွယ်မင်နန်းတော်ရော၊ ကျိမျိုးနွယ်စုရော၊ ရှင်တို့ မီးနတ်ဘုရားမျိုးနွယ်ရော ဘက်လိုက်တယ်ဆိုတဲ့ စွပ်စွဲချက်ကနေ ကင်းလွတ်နိုင်မှာပါ"

​"ဒါဆိုရင်... ဘယ်သူက ဒီစုံစမ်းစစ်ဆေးမှုကို ဦးဆောင်တာလဲ "

ယန်ချန်းကျွင်းက စဉ်းစားဆင်ခြင်စွာ မေးလိုက်သည်။

​"ကောင်းကင်မသေမျိုးမျိုးနွယ်ရဲ့ ဆဌမမြောက် ကြယ်တာရာမသေမျိုး ပါ"

ဟု ချန်အင်းရွှယ်က ဆိုလိုက်သည်။

​ဖန့်ချန်သည် မသေမျိုးလောကငယ်နှင့် ပတ်သက်၍ စုံစမ်းထားဖူးရာ ကောင်းကင်မသေမျိုးမျိုးနွယ်တွင် စုစုပေါင်း ကြယ်တာရာမသေမျိုး ၃၆ ပါး ရှိကြောင်း သိထားသည်။ ထိုမသေမျိုး များသည် ကျွယ်မင်နန်းတော်၏ သာမန်အမာခံတပည့်များထက် သာလွန်သော်လည်း ရှဲ့အာမန်နှင့် ယှဉ်လျှင်မူ အလွန်ပင် အားနည်းကြသေးသည်။

သူတို့အားလုံးမှာ မျိုးဆက်သစ်လူငယ်များထဲမှ အတော်ဆုံးသူများသာ ရရှိနိုင်သည့် ရာထူးဖြစ်ပြီး အဆင့်အနိမ့်ဆုံး (၃၆ ပါးမြောက်) မသေမျိုးပင်လျှင် နန်မင်ရုယွဲ့နှင့် တူညီသော အဆင့် ၅ မသေမျိုး အဆင့် ရှိသည်။

ထိုဆဌမမြောက် မသေမျိုးမှာမူ အဆင့် ၇ သို့ မရောက်သေးဘဲ အဆင့် ၆ မသေမျိုး ဖြစ်နိုင်ခြေ အလွန်များပေသည်။

​"ကျူးလင်က မူလက ဆဌမမြောက် ကြယ်တာရာမသေမျိုး နဲ့ လက်ထပ်ရမှာလေ... အခုတော့ သူ့ကိုပဲ ဒီကိစ္စကို ဖြေရှင်းခိုင်းတယ်ပေါ့..."

ယန်ချန်းကျွင်းက သက်ပြင်းချလိုက်ပြန်သည်။

"စုံစမ်းစစ်ဆေးမှု ရလဒ်က တကယ်ပဲ မင်းတို့ပြောသလို ကျူးလင်က ချူဖုန်းနဲ့ လျှို့ဝှက်ချစ်ကြိုက်နေတာလား "

​"ဒီကိစ္စကို ဆဌမမြောက် ကြယ်တာရာမသေမျိုး ကိုယ်တိုင် ပြောပြတာက ပိုကောင်းပါလိမ့်မယ်"

ဟု ချန်အင်းရွှယ်က ပြောလိုက်သည်။

​လူတိုင်းမှာ ထပ်မံ၍ အံ့အားသင့်သွားကြရပြန်သည်။ သူမ၏ စကားအဆုံးတွင် ခန်းမအတွင်း၌ မှိန်ပျပျ အဖြူရောင်အလင်းတန်းများ ပေါ်ထွက်လာပြီး ထူထဲသိပ်သည်းလှသော မသေမျိုးစွမ်းအင်များကြောင့် အဆင့် ၆ အောက်ရှိ ကျင့်ကြံသူများအားလုံး ရင်တထိတ်ထိတ် ဖြစ်သွားကြရသည်။

​"ဒါက ကောင်းကင်မသေမျိုး သက်ဆင်းခြင်း ပဲ... လာတဲ့သူက တကယ်ပဲ ကောင်းကင်မသေမျိုးမျိုးနွယ်ရဲ့ ကြယ်တာရာမသေမျိုး ပဲ"

ယန်ချန်းကျွင်းက တိုးတိုးလေး ရေရွတ်လိုက်၏။

​ထိုအခြေအနေသို့ ရောက်ရှိလာမှတော့ သူသည်လည်း ချန်အင်းရွှယ်တို့၏ စုံစမ်းချက်ကို ယုံကြည်သွားပြီ ဖြစ်သည်။ သို့သော် မိမိကဲ့သို့ အဆင့် ၇ ရှေးဟောင်းမသေမျိုး တစ်ဦးက ကောင်မလေးတစ်ယောက်၏ လှည့်ကွက်ထဲတွင် အရူးလုပ်ခြင်း ခံလိုက်ရသည်ကို တွေးမိပြီး စိတ်မကောင်း ဖြစ်နေမိသည်။

ဒီတစ်ကြိမ်တွင် မီးနတ်ဘုရားမျိုးနွယ်၏ သိက္ခာမှာ မျိုးနွယ်စုပေါင်း တစ်ရာလုံးကြားတွင် ကျဆင်းရတော့မည် မဟုတ်ပါလား။

​"ကောင်းကင်မသေမျိုးမျိုးနွယ်က တကယ်ပဲ ဒီမသေမျိုးလမ်းစဉ်ကို အကောင်းဆုံး ထိန်းသိမ်းထားနိုင်တာပဲ"

တစ်ချိန်လုံး နှုတ်ဆိတ်နေသည့် ရှန့်ယွဲ့ကွမ်းက မှတ်ချက်ပေးလိုက်သည်။

"လောကမှာရှိတဲ့ အဆင့် ၆ ကောင်းကင်မသေမျိုးတွေထဲမှာ ကောင်းကင်မသေမျိုးမျိုးနွယ် တစ်ခုတည်းကပဲ ဒီ ကောင်းကင်မသေမျိုး သက်ဆင်းခြင်း ဆိုတဲ့ တန်ခိုးစွမ်းအားကို ပိုင်ဆိုင်တာ။ မိုင်ပေါင်း ကုဋေကုဋာ ဝေးကွာနေရင်တောင် မျက်စိတစ်မှိတ်အတွင်း ရောက်လာနိုင်တာလေ"

​'မိုင်ပေါင်း ကုဋေကုဋာ ဝေးတာတောင်လား ကြည့်ရတာ မသေမျိုးလမ်းစဉ်တိုင်းမှာ သူ့ထူးခြားချက်နဲ့သူ ရှိပုံရတယ်၊ ဒီသက်ဆင်းခြင်းက ကောင်းကင်မသေမျိုးလမ်းစဉ်ရဲ့ ထူးခြားချက် ဖြစ်မှာပေါ့'

ဖန့်ချန်သည် ထိုမြင်ကွင်းကို စိုက်ကြည့်ရင်း သူ၏ ဓားမသေမျိုး လမ်းစဉ်ကို တွေးတောမိသည်။

သူ၏လမ်းစဉ်မှာ တိုက်ခိုက်မှုစွမ်းအား ကြောက်မက်ဖွယ်ကောင်းသည့်အပြင် အဓိကထူးခြားချက်မှာ ဓား သည် ပိုင်ရှင်နှင့်အတူ အဆင့်တက်နိုင်ခြင်းပင် ဖြစ်သည်။

သူက အဆင့် ၃ မသေမျိုး ဖြစ်လာသောအခါ ဓားငယ်လေး၏ စွမ်းအားမှာလည်း တိုးတက်လာခဲ့သည်။

အကယ်၍ တစ်နေ့တွင် သူက အဆင့် ၉ ဓားမသေမျိုး ဖြစ်လာခဲ့လျှင် ထိုဓားငယ်လေးသည် ရတနာစာရင်း တွင် ထိပ်သီး (၁၀) ခု၌ ပါဝင်နိုင်မည်လား။

​အတွေးများ ဝေ့ဝဲနေစဉ်မှာပင် အဖြူရောင်အလင်းတန်းများ တဖြည်းဖြည်း လျော့ပါးသွားသည်။

အရပ် ၁.၅ မီတာခန့်သာရှိပြီး ယန်ချန်းကျွင်းထက် တစ်ခေါင်းစာခန့်သာ ပိုမြင့်ကာ ကလေးမျက်နှာရှိသော အမျိုးသားကျင့်ကြံသူတစ်ဦး လူတိုင်းရှေ့တွင် ပေါ်လာသည်။

သူ၏ အသားအရေမှာ ဆီးနှင်းကဲ့သို့ ဖြူဖွေးနေပြီး နတ်ဘုရားဆန်သော အရှိန်အဝါ ရှိသည်။ ရုပ်ရည်မှာလည်း ကြည့်ရသည်မှာ အလွန်ပင် ခန့်ညားပြီး ထက်ရှလွန်းသော အရှိန်အဝါမျိုးလည်း မရှိ၊ သာမန်ကာလျှံကာလည်း မဟုတ်ပေ။

သူ၏ မျက်ဝန်းများထဲတွင် နတ်ဘုရားအလင်းတန်းများ လှည့်ပတ်နေပြီးနောက် ပျောက်ကွယ်သွားသည်။

​"ဘာလို့ လူတွေ ဒီလောက်တောင် များနေတာလဲ"

သူက ပတ်ဝန်းကျင်ကို မြင်လိုက်ရသောအခါ အနည်းငယ် အမူအရာ ပြောင်းသွားသည်။

​"ကျုပ်က မီးနတ်ဘုရားမျိုးနွယ်က ယန်ချန်းကျွင်းပါ။ ဆဌမမြောက် ကြယ်တာရာမသေမျိုး ကို ဂါရဝပြုပါတယ်"

ယန်ချန်းကျွင်းသည် ထိုင်ခုံပေါ်မှ ဆင်းကာ လက်အုပ်ချီ ဂါရဝပြုလိုက်ရာ သူ၏မျက်နှာမှာ အနည်းငယ် ရှက်ရွံ့နေဟန်ရှိသည်။ ကျိချွမ်းမေသည်လည်း ရှေ့သို့တက်ကာ ဂါရဝပြုပြီးနောက် ဘေးသို့ တိတ်တဆိတ် ဆုတ်ခွာသွားသည်။

​ဆဌမမြောက် ကြယ်တာရာမသေမျိုး သည်လည်း ဂါရဝပြန်ပြုလိုက်ရာ ချန်အင်းရွှယ်ကို မြင်လိုက်ရသောအခါ သိသိသာသာ မှင်တက်သွားသည်။

သူ စကားမပြောမီမှာပင် ချန်အင်းရွှယ်က ပြုံးလျက် ထရပ်လိုက်ကာ

"နံပါတ်ခြောက်... မင်းရဲ့ စုံစမ်းချက် ရလဒ်ကို ပြောပြလိုက်ဦး။ စီနီယာကြီး ယန်က ငါတို့ပြောတာကို မယုံဘူးတဲ့၊ မင်းပါးစပ်က ထွက်လာမှပဲ ထူးခြားမှာ"

​လူတိုင်း၏ အကြည့်မှာ သူ့ထံသို့ ကျရောက်သွားသည်။

မျှော်လင့်ချက်များ၊ စိုးရိမ်မှုများ၊ တုန်လှုပ်မှုများဖြင့် ပြည့်နှက်နေ၏။ ကျိထုံမှာလည်း အလွန်ရင်ခုန်နေသော်လည်း ဖန့်ချန်က အေးအေးဆေးဆေး ရှိနေသည်ကို မြင်လိုက်ရသည့်အပြင် မီးနတ်ဘုရား ကျင့်ကြံသူများက သူထက်ပင် ပို၍ စိုးရိမ်နေကြသည်ကို တွေ့လိုက်ရသဖြင့် စိတ်အနည်းငယ် ပြန်လည် တည်ငြိမ်လာသည်။

​"အဲ..."

ဆဌမမြောက် ကြယ်တာရာမသေမျိုးမှာ အကြောင်းရင်းမသိဘဲ အနေရခက်နေဟန်ရှိသည်။ သူက လူအများကို ဝေ့ဝဲကြည့်လိုက်ပြီးနောက် အေးဆေးစွာ စတင်ပြောဆိုသည်။

"ဒီကိစ္စကို ဆယ်စုနှစ်ပေါင်းများစွာ စုံစမ်းစစ်ဆေးပြီး သက်သေအထောက်အထားတွေအရ ရရှိလာတဲ့ ရလဒ်ကတော့ - မီးနတ်ဘုရားမျိုးနွယ်က ကျူးလင်ဟာ ရေနတ်ဘုရားမျိုးနွယ်က ချူဖုန်းနဲ့ တိတ်တဆိတ် ချစ်ကြိုက်နေတာပါ။ ကျွန်တော့်နဲ့ စေ့စပ်ထားတဲ့ ကတိကို ဖျက်သိမ်းချင်တဲ့အပြင် မီးနတ်ဘုရားမျိုးနွယ်ကိုလည်း အထိခိုက်မခံချင်တာကြောင့် ကျိမျိုးနွယ်စုက ကျိထုံကို ဓားစာခံအဖြစ် ရှာဖွေခဲ့တာပဲ ဖြစ်ပါတယ်"

​ဤသို့ ပြောပြီးနောက် ဆဌမမြောက် ကြယ်တာရာမသေမျိုးက စပ်စုလိုသော မျက်ဝန်းများဖြင့် ပတ်ဝန်းကျင်ကို ကြည့်ကာ

"အဲဒီ ဓားစာခံက ဘယ်သူလဲ"

​ခန်းမအလယ်တွင် တစ်ကိုယ်တည်း ရပ်နေပြီး နှစ်ပေါင်းများစွာ အရှက်တကွဲ ဖြစ်ခဲ့ရသော ကျိထုံသည် ချက်ချင်းပင် လက်ညှိုးထောင်လိုက်ကာ

"ဆဌမမြောက် ကြယ်တာရာမသေမျိုး... ကျွန်တော် ဒီမှာပါ"

​"မင်းလား..."

ဆဌမမြောက် ကြယ်တာရာနတ်မင်းက ခေါင်းငြိမ့်ပြကာ

"ဒီနှစ်တွေအတွင်း မင်း တကယ်ပဲ မတရား အနိုင်ကျင့်ခံခဲ့ရတာပဲ။ တော်သေးတာပေါ့၊ ကျွယ်မင်နန်းတော်က ဒီကိစ္စမှာ တစ်ခုခု ထူးဆန်းနေမှန်း သိပြီး ကျွန်တော့်ကို အချိန်မီ ဝင်ပါခိုင်းခဲ့လို့။ အကယ်၍သာ တခြား ကြယ်တာရာမသေမျိုးတွေ သိသွားမယ်ဆိုရင် သူတို့ စိတ်ဓာတ်နဲ့ဆိုရင် မင်းနဲ့ မင်းရဲ့ ကျိမျိုးနွယ်စုကတော့..."

သူက အားနာစရာကောင်းသော အပြုံးတစ်ခု ပြုံးလိုက်ပြီး ဆက်မပြောတော့ပေ။

​သို့သော် ကျိချွမ်းမေနှင့် အခြားသူများမှာမူ ထိုစကား၏ အဓိပ္ပာယ်ကို သဘောပေါက်လိုက်ကြသဖြင့် ရင်ထဲတွင် ထိတ်လန့်သွားကြသည်။

မီးနတ်ဘုရားမျိုးနွယ်ဘက်ကို ကြည့်သည့် အကြည့်များမှာ ဒေါသနှင့် မကျေနပ်မှုများ ပါဝင်လာ၏။ ထိုကျူးလင်၏ ရမ်းကားမှုကြောင့် သူတို့ ကျိမျိုးနွယ်စုတစ်ခုလုံး မျိုးဖြုတ်သုတ်သင် ခံရမည့် ဘေးနှင့် ကြုံတွေ့ခဲ့ရသည် မဟုတ်ပါလား။ တကယ်ကို ယုတ်မာလွန်းလှပေသည်။

​ယန်ချန်းကျွင်း၏ မျက်နှာမှာ ဖြူလျော်သွားပြီးနောက် ခါးသက်သက် ပြုံးလိုက်ကာ

"ဒါကြောင့်ကိုး... အခုတော့ ကျုပ် အားလုံးကို နားလည်ပါပြီ။ ဆဌမမြောက် ကြယ်တာရာမသေမျိုးအနေနဲ့ ဒီကိစ္စကို ဘယ်လို စီရင်ဖို့ အစီအစဉ် ရှိပါသလဲ ဘယ်လိုပဲဖြစ်ဖြစ် ကျုပ်တို့ မီးနတ်ဘုရားမျိုးနွယ်ဘက်က အမှားစခဲ့တာပဲလေ"

​ဆဌမမြောက် ကြယ်တာရာမသေမျိုးက အံ့အားသင့်စွာဖြင့်

"ဘာကို စီရင်ရမှာလဲ"

​ယန်ချန်းကျွင်းမှာ မှင်တက်သွားပြီး

"ကျူးလင်ရဲ့ လုပ်ရပ်က ကောင်းကင်မသေမျိုးမျိုးနွယ်ရဲ့ သိက္ခာကို ညှိုးနွမ်းစေခဲ့တာ မဟုတ်ဘူးလား ဒါကို..."

​"ကျူးလင်က သူမရဲ့ ခန္ဓာကိုယ်ဟာ အပျိုစင် မဟုတ်တော့မှန်း သိလို့ ဒီလိုနည်းလမ်းနဲ့ လက်ထပ်ပွဲကို ငြင်းဆိုခဲ့တာပဲ၊ ကျွန်တော့်အမြင်မှာတော့ ဒါက မမှားပါဘူး။ ကျွန်တော်နဲ့ လက်ထပ်တဲ့နေ့မှ သိရတာထက်စာရင် အများကြီး ပိုကောင်းတာပေါ့ မဟုတ်ဘူးလား"

ဆဌမမြောက် ကြယ်တာရာမသေမျိုး က ထူးဆန်းသော အမူအရာဖြင့် ဆိုလိုက်သည်။

​"သူမက နည်းလမ်း မှားသွားခဲ့တာပဲ ရှိတာပါ။ ပတ်သက်မှုမရှိတဲ့သူကို ဆွဲသွင်းခဲ့မိတာပေါ့။ ဒီကိစ္စက အဆုံးစွန်ထိ ပြောရရင် ခင်ဗျားတို့ မီးနတ်ဘုရားမျိုးနွယ်နဲ့ ကျိမျိုးနွယ်စုရဲ့ ကိစ္စပဲလေ။ ရေနတ်ဘုရားမျိုးနွယ်နဲ့လည်း နည်းနည်းတော့ ပတ်သက်မှာပေါ့၊ အဲဒါကို ခင်ဗျားတို့ ဘာသာပဲ ရှင်းလိုက်ကြပါ။ ကျွန်တော်ကတော့ ကျွယ်မင်နန်းတော်က ကျိမျိုးနွယ်စုဘက်ကနေ ဘက်လိုက်နေတယ်လို့ လူတွေ အထင်မလွဲအောင် မျက်နှာလာပြရုံ သက်သက်ပါပဲ"

​ယန်ချန်းကျွင်း၏ ရင်ထဲတွင် ဝမ်းသာသွားမိသည်။

တစ်ဖက်လူက ဤကိစ္စကို အပြစ်ယူရန် အစီအစဉ်မရှိကြောင်း သိလိုက်ရသဖြင့် ကြီးမားသော ဘေးဒုက္ခတစ်ခု မဟုတ်တော့ဘဲ အလွယ်တကူ ဖြေရှင်းနိုင်တော့မည် မဟုတ်ပါလား။

​"မိတ်ဆွေ ရှန့်... ခုနက ခင်ဗျားပြောတဲ့ 'ကောင်းကင်မသေမျိုး သက်ဆင်းခြင်း' က မိုင်ပေါင်း ကုဋေကုဋာ ဝေးတာတောင် ရောက်လာနိုင်တယ်ဆိုတာက အလွန်အကျွံ ပြောတာပါ။ တကယ်လို့ အဲဒီလို စွမ်းအားမျိုး ရှိခဲ့ရင်တောင် ကျွန်တော့်လို ကျင့်ကြံမှုမျိုးနဲ့ မလုပ်နိုင်ပါဘူး။ ကျွန်တော်တို့ မျိုးနွယ်စုခေါင်းဆောင်ကြီးသာ အဲဒီလို လုပ်နိုင်မှာပါ"

ဆဌမမြောက် ကြယ်တာရာမသေမျိုးသည် ရှန့်ယွဲ့ကွမ်းအား ကြည့်ကာ အလေးအနက် ရှင်းပြလိုက်သေးသည်။

​"မင်းကလည်း အရင်အတိုင်းပဲ... ငါက ဥပမာပေးပြီး တင်စားပြောလိုက်တာပါ။ ငါကမှ ကောင်းကင်မသေမျိုး မဟုတ်တာ၊ မင်းတို့ သက်ဆင်းခြင်းရဲ့ တကယ့်စွမ်းအားကို ဘယ်လို သိမှာလဲ"

ရှန့်ယွဲ့ကွမ်းမှာ စိတ်ပျက်လက်ပျက် ဖြစ်သွားရသည်။

​"ဩော်..."

ဆဌမမြောက် ကြယ်တာရာမသေမျိုးက သဘောပေါက်သွားဟန်ဖြင့် ခေါင်းငြိမ့်ပြပြီးနောက် ချန်အင်းရွှယ်ကို ခိုးကြည့်လိုက်ကာ စကားတစ်ခွန်း ပြောချင်နေသော်လည်း တွေဝေနေပုံရသည်။

​"နံပါတ်ခြောက်... မင်းအတွက် ကိစ္စမရှိတော့ရင် ပြန်သက်ဆင်းသွားတော့လေ "

ချန်အင်းရွှယ်က လက်ခါပြလိုက်သည်။

​"ဒါဆိုရင် ကျွန်တော် သွားတော့မယ်"

ဆဌမမြောက် ကြယ်တာရာမသေမျိုးသည် ဖြည်းညင်းစွာ မျက်လုံးမှိတ်လိုက်ရာ သူ၏ ကိုယ်ပေါ်တွင် မသေမျိုးစွမ်းအင်များ ဆူပွက်လာပြီး အဖြူရောင်အလင်းတန်းများ ထွက်ပေါ်လာကာ သူ၏ ပုံရိပ်မှာ တဖြည်းဖြည်း ပျောက်ကွယ်သွားတော့သည်။