အခန်း (၃၅၉-၃၆၀)

အခန်း (၃၅၉) - ဝူယွမ် - ငါ့တစ်သက် ဒီလိုတောင်းဆိုမှုမျိုး ပထမဆုံးအကြိမ် ကြားဖူးတာပဲ(၁)

ကောင်းကင်ပြာနဂါးပြောင်းလဲခြင်း ကျင့်စဉ်သည် မဟာရှေးဟောင်းကျမ်း သို့မဟုတ် သိုင်းဧကရာဇ်ကျမ်းတို့ထက် အားနည်းခြင်းမရှိသော ထိပ်တန်း ကောင်းကင်အဆင့် သိုင်းပညာတစ်ခု ဖြစ်သည်။

စနစ်တွင် ဆိုင်းအင်လုပ်ခြင်းမှတစ်ဆင့် ရရှိခဲ့သော ကျင့်စဉ်များမှလွဲ၍ ဤလောကတွင် ဝူယွမ် ရရှိဖူးသမျှထဲ၌ အစွမ်းအထက်ဆုံး သိုင်းပညာဟု ဆိုနိုင်ပေသည်။

ထို့အပြင် ဤသိုင်းပညာသည် ဝူယွမ်၏ အုပ်စိုးသူခန္ဓာကိုယ်နှင့် အလွန်တရာ လိုက်ဖက်ညီလှသည်။

၎င်းသည် အုပ်စိုးသူခန္ဓာကိုယ်၏ ကောင်းကင်ပြာနဂါးပုံစံအတွက် မွေးဖွားလာသော သိုင်းပညာတစ်ခုပမာ ဖြစ်နေသည်။

ကောင်းကင်ပြာနဂါးပြောင်းလဲခြင်း ကျင့်စဉ်ကို ကျင့်ကြံခြင်းက ဝူယွမ်၏ ရုပ်ပိုင်းဆိုင်ရာကို စစ်မှန်သော ကောင်းကင်ပြာနဂါးတစ်ကောင်နှင့် ယှဉ်ပြိုင်နိုင်စွမ်းရှိစေသည်။

ဤအခြေအနေတွင် အုပ်စိုးသူခန္ဓာကိုယ်နှင့် ပေါင်းစပ်လိုက်သောအခါ ဝူယွမ်၏ တိုက်ခိုက်ရေးစွမ်းအားမှာ နှစ်ဆတိုးပွားသွားလေသည်။

ခရမ်းရွှေရောင် မဟာရှေးဟောင်းစွမ်းအင်များ ဝူယွမ်၏ ခန္ဓာကိုယ်အတွင်းသို့ စီးဝင်လာသည်နှင့်အမျှ သူ၏ ခန္ဓာကိုယ်တစ်ခုလုံးမှာ ရွှေရောင်အလင်းလွှာတစ်ခုဖြင့် လွှမ်းခြုံခံလိုက်ရပြီဖြစ်သည်။

ထိုရွှေရောင်အလင်းတန်းအောက်မှ ခပ်သဲ့သဲ့ နဂါးဟိန်းသံတစ်ခုကို ကြားလိုက်ရသည်။ သူ၏ ရွှေရောင်အရေပြားမှာ လှိုင်းထသွားပြီး ၎င်းအောက်တွင် အစိမ်းရောင် နဂါးအလင်းပုံစံများကို ဝေဝါးဝါး မြင်တွေ့နိုင်သည်။

နဂါးအလင်းပုံစံများ လှိုင်းထသွားတိုင်း အစွမ်းထက်သော စွမ်းအားတစ်ခု ပေါက်ကွဲထွက်ပေါ်လာပြီး ထိုစွမ်းအားအောက်တွင် လေထုကြီးပင် တုန်လှုပ်သွားကာ ပေါက်ကွဲသံတိုးတိုးများ ထွက်ပေါ်လာလေသည်။

ဝူယွမ်၏ ခန္ဓာကိုယ်ပေါ်တွင် ကောင်းကင်ပြာနဂါး အလင်းပုံစံ ဆယ်ခုခန့် ထွက်ပေါ်နေပြီဖြစ်ပြီး ဤအလင်းပုံစံဆယ်ခုတည်းကပင် ရှန်ထူကျွယ်၏ အသူရာခန္ဓာကိုယ်ထက် ပိုမိုအစွမ်းထက်နေလေပြီ။

မဟာရှေးဟောင်းစွမ်းအင်များကို ဝူယွမ်က သန့်စင်လိုက်သည်နှင့်အမျှ သူ၏ခန္ဓာကိုယ်ပေါ်ရှိ ကောင်းကင်ပြာနဂါး အလင်းပုံစံများမှာ ပိုမိုများပြားလာသည်။

ဆယ့်တစ်၊ ဆယ့်နှစ်... အချိန်များ တစ်မိနစ်ပြီးတစ်မိနစ် ကုန်ဆုံးသွားပြီး ဝူယွမ်၏ ခန္ဓာကိုယ်ပေါ်ရှိ ကောင်းကင်ပြာနဂါးပုံစံများမှာ ပို၍ ထူထပ်များပြားလာသည်။

တစ်ဖက်တွင် လင်းတုန်သည်လည်း ရွှေရောင်အလင်းတန်းများကို ဖြာထွက်နေသည်။

ဝီ….။

သတ္တုချင်း ရိုက်ခတ်သံတစ်ခုနှင့်အတူ ရွှေခေါင်းလောင်း ခန္ဓာကိုယ်ကို နောက်ဆုံးတွင် ချိုးဖောက်ဝင်ရောက်သွားလေပြီ။

လင်းတုန် အဆင့်ချိုးဖောက်ဝင်ရောက်သွားချိန်တွင် အပြင်ဘက်ရှိ ရှေးဟောင်းကမ္ဘာဦးစေတီကြီး တစ်ခုလုံးသည်လည်း ရွှေရောင်အလင်းလွှာတစ်ခုဖြင့် ဖုံးလွှမ်းသွားသကဲ့သို့ တောက်ပစွာ လင်းလက်သွားလေသည်။

ဤရုတ်တရက် ပြောင်းလဲမှုက မျိုးနွယ်စုကြီးငါးခုမှ အကြီးအကဲများကို ထပ်မံ၍ တုန်လှုပ်သွားစေသည်။ ရွှေရောင်ဆိုးထားသကဲ့သို့ဖြစ်နေသော ဧရာမစေတီကြီးကို သူတို့ တွေဝေစွာ ကြည့်လိုက်ကြသည်။

အထူးသဖြင့် ရှေးဟောင်းကမ္ဘာဦးစေတီမှ ထုတ်လွှင့်နေသော ရွှေရောင်အလင်းတန်းက သူတို့ကို အလွန်ပြင်းထန်သော ထက်ရှသည့် ခံစားချက်တစ်ခုကို ပေးစွမ်းနေသည်။ ဤရွှေရောင်အလင်းတန်းကို ရင်ဆိုင်ရချိန်တွင် ၎င်းကို တည့်တည့်စိုက်ကြည့်ရန် သို့မဟုတ် ခုခံရန် မဖြစ်နိုင်လောက်အောင် အကူအညီမဲ့နေသည့် ခံစားချက်ကို သူတို့ ရရှိလိုက်ကြသည်။

ပထမတော့ ငလျင်လှုပ်ခြင်း၊ ထို့နောက် မြေဆွဲအား ဖိနှိပ်ခြင်းနှင့် ယခု ထက်ရှသော ရွှေရောင်အလင်းတန်းများ ဖြာထွက်လာခြင်းပင် ဖြစ်သည်။

“အတွင်းထဲမှာ ဝူယွမ် ဘာတွေများလုပ်နေတာလဲ” ကူရွှေ့က နက်နက်နဲနဲ တွေးတောလိုက်ပြီး ဝူယွမ်ကို ဝင်ခွင့်ပြုလိုက်ခြင်းမှာ မှားယွင်းသော ဆုံးဖြတ်ချက်တစ်ခုများ ဖြစ်သွားပြီလားဟု သံသယဝင်လာသည်။

“မဖြစ်ဘူး၊ ငါ ဆက်ပြီး သည်းမခံနိုင်တော့ဘူး၊ အထဲဝင်ပြီး စစ်ဆေးကြည့်ရမယ်၊” ဝေမိသားစု အကြီးအကဲက အသံနိမ့်နိမ့်ဖြင့် ပြောလိုက်သည်။

အခြားသူများ တုံ့ပြန်ရန် အချိန်မရလိုက်မီမှာပင် သူသည် ရှေးဟောင်းကမ္ဘာဦးစေတီဆီသို့ ပြေးဝင်သွားခဲ့ပြီဖြစ်သည်။

ရှေးဟောင်းကမ္ဘာဦးစေတီ၏ အဝင်ဝသို့ ရောက်ရှိသွားသောအခါ စေတီကိုယ်ထည်မှာ လက်ရှိတွင် လင်းတုန်၏ စွမ်းအားများဖြင့် လွှမ်းခြုံခံထားရလေသည်။

ဝေမိသားစု အကြီးအကဲသည် တံခါးကြီးကို ဖွင့်ရန် ရည်ရွယ်ချက်ဖြင့် သူ၏ လက်ဖဝါးဖြင့် ရိုက်ချလိုက်သည်။

ဝုန်းးး။

ပြတ်သားသော အသံတစ်ခု ထွက်ပေါ်လာသည်။ သို့သော်လည်း ရှေးဟောင်းကမ္ဘာဦးစေတီ၏ တံခါးကြီးမှာ လှုပ်ပင်မလှုပ်ချေ။

“ဘယ်လိုလုပ် ဖြစ်နိုင်မှာလဲ” ဝေမိသားစု အကြီးအကဲ၏ မျက်နှာတွင် သံသယများ ပြည့်နှက်သွားသည်။ ချက်ချင်းပင် သူ၏ ယွမ်စွမ်းအင်များ ဆူပွက်လာပြီး ဤတစ်ကြိမ်တွင် ပို၍အစွမ်းထက်သော ခွန်အားကို အသုံးပြုလိုက်သည်။

ဝုန်းးး။

တုံးတိတိအသံတစ်ခု တံခါးဆီမှ ထပ်မံထွက်ပေါ်လာသည်။

သို့သော်၊ ၎င်းမှာ လှုပ်ပင်မလှုပ်သေးပေ။ ကြီးမားလှသော စွမ်းအားကြီးတစ်ခုက သူ့ကို ပိတ်ဆို့တားဆီးထားသည်။ ထိုရွှေရောင်အလင်းတန်းသည် အလွန်အစွမ်းထက်သော ကာကွယ်မှုစွမ်းရည်ကို ပိုင်ဆိုင်ထားပြီး သူ ထိုးဖောက်၍မရနိုင်ခဲ့ပေ။

“ဝိညာဉ်အိုကြီးဝေ၊ ဝူယွမ် ကျင့်ကြံနေတာကို နှောင့်ယှက်ဖို့ မတွေးနဲ့” ကူရွှေ့သည် တံခါးရှေ့သို့ ပျံသန်းသွားကာ ဝေမိသားစု အကြီးအကဲကို ပိတ်ဆို့လိုက်သည်။

“အကြီးအကဲ ဝေ၊ မင်း စည်းမျဉ်းတွေကို မချိုးဖောက်သင့်ဘူး၊” ရှန်ထူမိသားစု အကြီးအကဲကလည်း ကူရွှေ့၏ ဘေးတွင်ရပ်ကာ အကြီးအကဲဝေအား အတူတကွ ပိတ်ဆို့လိုက်သည်။

ဆက်တိုက်ဖြစ်ပေါ်လာသော ထူးခြားဖြစ်စဉ်နှစ်ခုစလုံးမှာ အလွန်ပြင်းထန်သော ဖိနှိပ်မှုခံစားချက်များကို သယ်ဆောင်ထားသဖြင့် ဤဆန်းကြယ်ရှင်ခြင်းအဆင့် အထွတ်အထိပ် အကြီးအကဲများပင်လျှင် သူတို့၏ စိတ်နှလုံးထဲတွင် တုန်ခါသွားစေသည်။

ဤထူးခြားဖြစ်စဉ်များကို ဖန်တီးခဲ့သူသည် မည်မျှ အစွမ်းထက်ကြောင်း သက်သေပြရန် လုံလောက်ပေသည်။

အကြီးအကဲ ရှန်ထူ၏ အမြင်တွင် ၎င်းသည် ရှန်ထူကျွယ်၏ စကားများကို ယုံမှားသံသယဖြစ်ဖွယ်မရှိ အတည်ပြုပေးနေသည်။ ဝူယွမ်သည် တကယ့်ကို ဝင်စားခြင်းအဆင့် စွမ်းအားကို ပိုင်ဆိုင်ထားသည်။

ဤအဆင့်အတန်းရှိသော ပုဂ္ဂိုလ်တစ်ဦးကို ရှန်ထူကျွယ်အား ထောက်ပံ့ပေးရန် ပြင်ဆင်နေသည်ကို မဆိုထားနှင့် ရှန်ထူကျွယ် ကြားခံမရှိလျှင်ပင် အကြီးအကဲရှန်ထူအနေဖြင့် အသက်တစ်ရာ ရှိလျှင်တောင် သွားရောက်ရန်စဝံ့မည် မဟုတ်ပေ။

သူတို့ ရှန်ထူမိသားစု၏ ဘိုးဘေးအိုကြီးမှာ ဆန်းကြယ်သေခြင်းအဆင့် အထွတ်အထိပ်တွင်သာ ရှိသေးသည်။ ဝင်စားခြင်းအဆင့် အစွမ်းထက်သူတစ်ဦးကို ရန်စမိပါက သူတို့ မိသားစုတစ်ခုလုံး ပျက်စီးသွားရန် သေချာလှသည်။

အကြီးအကဲဝေနှင့်ပတ်သက်၍မူ သူတို့ ဝေမိသားစုသည် ယခင်က ဝူယွမ်ထံတွင် ဆန်းကြယ်ယွမ်ဆေးလုံး အမြောက်အမြား အညှစ်ခံခဲ့ရဖူးသည်။ အခွင့်အရေးရသရွေ့ ဝူယွမ်ကို လွယ်လွယ်နှင့် လွှတ်ပေးမည်မဟုတ်သည်မှာ သေချာသည်။

ထို့အပြင် အတွင်းမှ ဖြစ်ပေါ်နေသော ရုတ်ရုတ်သဲသဲအခြေအနေကို ကြည့်ရသည်မှာ အတော်လေး ကြောက်မက်ဖွယ်ကောင်းနေသည်။ အကြီးအကဲဝေသည် ဝူယွမ် ကျင့်ကြံရာတွင် အရေးပါသော အချိုးအကွေ့တစ်ခုသို့ ရောက်နေနိုင်ကြောင်း ခံစားမိသည်။

ထိုသို့သော အချိန်တွင် သူ ဝင်ရောက်နှောင့်ယှက်လိုက်ပါက ဝူယွမ်ကို တိုက်ရိုက် သိုင်းပျက်သွားစေနိုင်သည်အထိ ပြုလုပ်နိုင်ပေမည်။

“ဝူယွမ် ရှေးဟောင်းကမ္ဘာဦးစေတီကို ဖျက်ဆီးတာကို ငါတို့ အဖြစ်ခံလို့ မရဘူး” အကြီးအကဲ ဝေက စူးရှသောအသံဖြင့် ပြောလိုက်သည်။

“ရှေးဟောင်းကမ္ဘာဦးစေတီက အကောင်းအတိုင်းကြီး ရှိနေတာ မဟုတ်ဘူးလား၊ ရှန်ထူကျွယ် အသူရာခန္ဓာကိုယ်ကို ကျင့်ကြံအောင်မြင်တုန်းကလည်း စေတီကိုယ်ထည်က သိပ်သည်းတဲ့ အမည်းရောင်အလင်းတွေ ထွက်ပေါ်ခဲ့တာပဲ”

“ဒီထူးခြားဖြစ်စဉ်တွေ အားလုံးက အတွင်းထဲမှာ ကျင့်ကြံနေတဲ့သူတွေကြောင့် ဖြစ်ပေါ်လာတာ သက်သက်ပါ၊ ရှေးဟောင်းကမ္ဘာဦးစေတီ အကောင်းတိုင်း ရှိမရှိဆိုတာနဲ့ ဘာမှမဆိုင်ဘူး၊ မင်းက ဝူယွမ် ကျင့်ကြံနေတာကို နှောင့်ယှက်ချင်ရုံ သက်သက်ပဲလို့ ငါထင်တယ်” ကူရွှေ့က ယုတ္တိတန်တန် ပြန်လည်ချေပလိုက်သည်။

ယခု ဝူယွမ်က သူတို့ ကူမိသားစုနှင့် ဆက်ဆံရေးကောင်းမွန်နေပြီဖြစ်ရာ ဝူယွမ်၏ ကြီးမားသော စွမ်းအားများကြောင့် သူတို့ ကူမိသားစုသည် သူ့အား အစွမ်းကုန်ကာကွယ်ပေးမည်မှာ သေချာသည်။

ယခုအခါ ရှန်ထူမိသားစုနှင့် ကူမိသားစုတို့က ဝေမိသားစုကို ပိတ်ဆို့တားဆီးထားသည်။ နှစ်ဖက်လုံး အခြေအနေ တင်းမာနေကြ၏။

စုန်မိသားစုနှင့် စုမိသားစုမှ အကြီးအကဲများကမူ မည်သည့်ဘက်မှ မပါဝင်ဘဲ ဘေးမှသာ စောင့်ကြည့်နေကြသည်။

“ဝေမိသားစုက ကောင်းကောင်း သင်ခန်းစာပေးဖို့လိုနေပုံရတယ်”

ရှေးဟောင်းကမ္ဘာဦးစေတီအတွင်း ကျင့်ကြံမှုအခြေအနေတွင် ရှိနေသော ဝူယွမ်သည်လည်း အပြင်ဘက်ရှိ အခြေအနေကို အာရုံခံသိရှိနေသည်။

ဝေမိသားစုက သူ့အပေါ် ဤမျှကြီးမားသော ရန်လိုမှုများ ရှိနေပြီး သူ့အား ပစ်မှတ်ထားရန် စေတီအတွင်းသို့ အတင်းအဓမ္မ ဝင်ရောက်ရန်ပင် ကြိုးပမ်းနေသည်ကို မြင်သောအခါ ဝူယွမ်၏စိတ်ထဲတွင် သတ်ဖြတ်လိုစိတ်များ ပေါ်ပေါက်လာခဲ့ပြီဖြစ်သည်။

သို့သော်လည်း ကူမိသားစုနှင့် ရှန်ထူမိသားစုတို့၏ တုံ့ပြန်မှုများက ဝူယွမ်ကို အလွန်ကျေနပ်အားရစေသည်။

ထိုမိသားစုနှစ်ခုသည် လမ်းမှန်ကို ရွေးချယ်ခဲ့သည်ဟုသာ ဆိုရပေမည်။

“ငါ ကျင့်ကြံပြီးရင် မင်းကိုရှင်းမယ်” ဝူယွမ်သည် သူ၏ကျင့်ကြံမှုကို ဆက်လက်ပြုလုပ်နိုင်လေသည်။

ဤအချိန်တွင် စေတီကိုယ်ထည်မှ ရွှေရောင်အလင်းတန်းများ မှေးမှိန်သွားသည်။ လင်းတုန်သည် အဆင့်ချိုးဖောက်ဝင်ရောက်မှု အောင်မြင်သွားပြီး ဘုရင်ခန္ဓာကိုယ်သို့ တက်လှမ်းသွားလေပြီ။

ရွှေခေါင်းလောင်း ခန္ဓာကိုယ်မှ ဝရဇိန်ဘုရင်ခန္ဓာကိုယ်သို့ပင်။

“ငါ့ရဲ့ လက်ရှိရုပ်ပိုင်းဆိုင်ရာ ခန္ဓာကိုယ်က ဝင်စားခြင်းအဆင့် အစွမ်းထက်ကျင့်ကြံသူ တစ်ယောက်ရဲ့တိုက်ကွက်ကို ပြဿနာမရှိဘဲ တောင့်ခံနိုင်လောက်တယ်” လင်းတုန်သည် လက်သီးများကို ဆုပ်လိုက်ကာ သူ၏တစ်ကိုယ်လုံးမှ ပေါက်ကွဲထွက်လာသည့် စွမ်းအားများကို ခံစားလိုက်သည်။

သူ၏ ခန္ဓာကိုယ်မှာ ရွှေဖြင့်သွန်းလုပ်ထားသကဲ့သို့ ရွှေရောင်အလင်းများဖြင့် လင်းလက်နေပြီး ထက်ရှသော အသွင်အပြင်ကို ပိုင်ဆိုင်ထားသည်။

ဝရဇိန်ဘုရင်ခန္ဓာကိုယ်၏ အကူအညီဖြင့် သူ၏ ရုပ်ပိုင်းဆိုင်ရာ ကာကွယ်မှုအစွမ်းမှာ များစွာ တိုးတက်လာရုံသာမက တိုက်ခိုက်ရေးစွမ်းအားကလည်း နှစ်ဆ မြင့်တက်လာခဲ့သည်။

ခန္ဓာကိုယ်အဆင့် ချိုးဖောက်ဝင်ရောက်မှုက ဘက်စုံစွမ်းရည်တိုးတက်မှုကို ယူဆောင်လာပေးသည်။

ယခုအခါ အဋ္ဌမထပ်ရှိ အရည်ပမာဖြစ်နေသော မဟာရှေးဟောင်းစွမ်းအင် ရွှေရောင်သမုဒ္ဒရာကို ရင်ဆိုင်ရချိန်တွင် လင်းတုန်သည် မည်သည့်ဖိအားကိုမျှ မခံစားရတော့ပေ။ သူသည် မူလကျောက်လက်ဖွဲ့၏ အလင်းရောင်ကို အားကိုးစရာမလိုဘဲ အတွင်း၌ လွတ်လပ်စွာ လှုပ်ရှားသွားလာနိုင်သည်။

“ဝါး၊ အစ်ကိုကြီးရဲ့ လက်မောင်းက အစိမ်းရောင်တွေချည်းပဲ” လင်းတုန်သည်ဘေးတွင် ကျင့်ကြံနေသော ဝူယွမ်ကို ကြည့်ကာ အံ့အားသင့်စွာ ရေရွတ်လိုက်သည်။

ဝူယွမ်၏ ခန္ဓာကိုယ်ပေါ်တွင် ကောင်းကင်ပြာနဂါးအလင်းပုံစံ ရာပေါင်းများစွာ ရှိနေပြီဖြစ်ပြီး သူ၏ ညာဘက်လက်မောင်းတစ်ခုလုံးကို ဖုံးလွှမ်းထားသည်။

တကယ့်ကို... ကောင်းကင်ပြာနဂါး လက်မောင်းပင်။

“ငါလည်း ကောင်းကင်ပြာနဂါးပြောင်းလဲခြင်း ကျင့်စဉ်ကို ကျင့်ကြံရမယ်” လင်းတုန်၏ စိတ်နှလုံးသည် စိတ်အားထက်သန်မှုများဖြင့် တောက်လောင်လာပြီး ကျင့်ကြံခြင်းကို စတင်လေတော့သည်။

လက်ရှိတွင် သူ ကျင့်ကြံနေသော အဓိက ခန္ဓာကိုယ်သန့်စင်ခြင်း သိုင်းပညာများမှာ ခန္ဓာကိုယ်သန့်စင်ခြင်းကျမ်း၊ လိပ်နက်ခန္ဓာကိုယ်နှင့် ကောင်းကင်ပြာနဂါးပြောင်းလဲခြင်း ကျင့်စဉ်တို့ ဖြစ်သည်။

ခန္ဓာကိုယ်သန့်စင်ခြင်းကျမ်း၏ ‘ကြံ့ခိုင်ခြင်း’ အခန်းသည် အကာအကွယ်အပေါ် အဓိက အာရုံစိုက်ပြီး လိပ်နက်ခန္ဓာကိုယ်မှာ ကာကွယ်မှုဖြစ်သော်လည်း ပျော့ပျောင်းသော ကာကွယ်မှုဖြစ်ကာ တိုက်ခိုက်မှုများကို လမ်းကြောင်းလွှဲခြင်းနှင့် လွှဲပြောင်းခြင်းအပေါ် အဓိကထားသည်။

ကောင်းကင်ပြာနဂါးပြောင်းလဲခြင်း ကျင့်စဉ်ကမူ တိုက်ခိုက်ခြင်းကို အာရုံစိုက်ပြီး ရုပ်ပိုင်းဆိုင်ရာ ခန္ဓာကိုယ်၏ စွမ်းအားကို အစွမ်းထက်သော တိုက်ခိုက်ရေးနည်းလမ်းများအဖြစ် ပြောင်းလဲပေးနိုင်သည့် ရှားပါးသော သိုင်းပညာတစ်ခု ဖြစ်သည်။

ဝါးမျိုခြင်းဘိုးဘေးအဆောင်ကို ပိုင်ဆိုင်ထားသဖြင့် လင်းတုန်၏ ကျင့်ကြံမှုအရှိန်မှာ သူ့အစ်ကိုကြီးဝူယွမ်ထက် လုံးဝ နှေးကွေးနေခြင်း မရှိပေ။ ဧရာမ လေဝဲကတော့ကြီးတစ်ခု သူ၏ရှေ့တွင် ဖြစ်ပေါ်လာပြီး မဟာရှေးဟောင်းစွမ်းအင်များ သူ၏ ခန္ဓာကိုယ်အတွင်းသို့ ရူးသွပ်စွာ စီးဝင်လာသည်။

ရွှေရောင်အလင်းတန်းများ ဆုတ်ခွာသွားပြီး သူ၏ ခန္ဓာကိုယ်ပေါ်တွင် ကောင်းကင်ပြာနဂါး အလင်းပုံစံများက အစားထိုး စုစည်းလာကြသည်။

“ဒီကောင်လေးနှစ်ယောက် တော်တော်လေးကို မျိုဆို့နေကြပါလား” ဘိုးဘေးကျောက်လက်ဖွဲ့ ဝိညာဉ်သည် မဟာရှေးဟောင်းစွမ်းအင်များကို ရူးသွပ်စွာ ဝါးမျိုနေသော ဝူယွမ်နှင့် လင်းတုန်တို့ကို ကြည့်ကာ စိတ်ထဲမှ ရေရွတ်လိုက်သည်။

အခန်း (၃၆၀) - ဝူယွမ် - ငါ့တစ်သက် ဒီလိုတောင်းဆိုမှုမျိုး ပထမဆုံးအကြိမ် ကြားဖူးတာပဲ(၂)

သူသည် အဆင့်နှစ် နတ်ဘုရားရတနာ၊ သို့မဟုတ် ဤလောကတွင် ဒုတိယအစွမ်းအထက်ဆုံး နတ်ဘုရားရတနာ ဖြစ်သည်။ စွမ်းအင်လိုအပ်ချက်မှာ သဘာဝကျစွာပင် တိုင်းတာ၍မရနိုင်လောက်အောင် ကြီးမားလှသည်။

သို့သော်လည်း ဆန်းကြယ်ရှင်ခြင်းအဆင့်မျှသာရှိသေးသော လူငယ်လေးများဖြစ်သည့် ဝူယွမ်နှင့် လင်းတုန်တို့သည် ဤမျှများပြားသော မဟာရှေးဟောင်းစွမ်းအင်များကို စုပ်ယူနိုင်စွမ်း ရှိနေကြသည်။

သူတို့၏ ရုပ်ပိုင်းဆိုင်ရာ ခန္ဓာကိုယ်များက မည်မျှ အစွမ်းထက်နေသနည်း။

ကောင်းကင်အဆင့် ဝိညာဉ်ရတနာလား။ မဟုတ်ပေ၊ သန့်စင်ယွမ်ရတနာတစ်ခုထက်ပင် ပိုမိုအစွမ်းထက်နေလောက်သည်။

ဘိုးဘေးကျောက်လက်ဖွဲ့ ဝိညာဉ်သည်လည်း သူ၏စုပ်ယူမှုအရှိန်ကို မြှင့်တင်လိုက်ရာ သူ၏ ဝိညာဉ်ခန္ဓာကိုယ်မှာ ပို၍ပို၍ ခိုင်မာလာလေသည်။

အချိန်များ လျင်မြန်စွာ ကုန်ဆုံးသွားသည်။

ဆယ်ရက်တာကာလမှာ မျက်စိတစ်မှိတ်အတွင်း ကုန်လွန်သွားခဲ့သည်။

အဋ္ဌမထပ်ရှိ မဟာရှေးဟောင်းစွမ်းအင်များမှာ တကယ်ကို များပြားလှသည်။ မည်သို့ပင်ဆိုစေ မဟာရှေးဟောင်းနယ်မြေသခင်ကြီးသည် သံသရာအဆင့် အစွမ်းထက်ပုဂ္ဂိုလ်တစ်ဦးဖြစ်ပြီး သူ၏ ရုပ်ပိုင်းဆိုင်ရာ ခန္ဓာကိုယ်ကို ပြန်လည်ကုစားနိုင်သည့် နေရာဖြစ်ရာ အလွန်တရာ ကျယ်ပြောလှသော စွမ်းအင်များ ပါဝင်နေမည်မှာ သေချာသည်။ အနည်းဆုံး လူတစ်ယောက် ဝင်စားခြင်းအဆင့်သို့ ပြဿနာမရှိဘဲ ချိုးဖောက်ဝင်ရောက်နိုင်ရန် လုံလောက်ပေသည်။

သေချာပေါက် ဝင်စားခြင်းအဆင့်သို့ ချိုးဖောက်ဝင်ရောက်ရန်မှာ စွမ်းအင်သာမက နားလည်သဘောပေါက်မှုလည်း လိုအပ်ပေသည်။

ဆယ်ရက်ကျော် ကြာပြီးနောက်း ဝူယွမ်၊ ဘိုးဘေးကျောက်လက်ဖွဲ့ ဝိညာဉ်နှင့် လင်းတုန်တို့သည် နောက်ဆုံးတွင် ဤနေရာရှိ စွမ်းအင်များအားလုံးကို စုပ်ယူပြီးစီးသွားလေပြီ။

“ကောင်းကင်ပြာနဂါး အလင်းပုံစံ ရှစ်ရာ၊ အရမ်းကောင်းတယ်” ဝူယွမ်၏ လက်မောင်းနှစ်ဖက်စလုံးတွင် ကောင်းကင်ပြာနဂါး တက်တူးများ ထွင်းထုထားသကဲ့သို့ ဖြစ်နေပြီး သူက အားရပါးရ ပြုံးလိုက်သည်။

“မဟာရှေးဟောင်းရူန်းကလည်း ဆယ်ပုံတစ်ပုံ ပြည့်စုံသွားပြီ၊ တကယ့်ကို ကောင်းတာပဲ”

နီဝမ်နယ်ပယ်အတွင်းရှိ ကစဉ်ကလျားသန္ဓေသားအထက်တွင် ထပ်ဆောင်း ရူန်းသင်္ကေတတစ်ခု ပေါ်ထွက်လာပြီး ၎င်းမှာ တခြားမဟုတ်၊ မဟာရှေးဟောင်းရူန်းပင် ဖြစ်သည်။

ဤနေရာတွင် ကျင့်ကြံနေစဉ်အတွင်း ကစဉ်ကလျားသန္ဓေသားသည် ရူန်းသင်္ကေတများကို စုစည်းရန်အတွက် ပတ်ဝန်းကျင်ရှိ စွမ်းအင်များကို အလိုအလျောက် စုပ်ယူခဲ့ခြင်းဖြစ်သည်။

မဟာရှေးဟောင်းရူန်း၏ ရည်ရွယ်ချက်မှာ ရုပ်ပိုင်းဆိုင်ရာခန္ဓာကိုယ်ကို ခိုင်ခံ့စေရန် ဖြစ်သည်။

ဝူယွမ်က ခဏတာ အာရုံခံကြည့်လိုက်ရာ ဤဆယ်ပုံတစ်ပုံသော မဟာရှေးဟောင်းရူန်းကပင် သူ၏ ရုပ်ပိုင်းဆိုင်ရာခန္ဓာကိုယ်ကို အလွန်အစွမ်းထက်သော အဆင့်တစ်ခုသို့ မြှင့်တင်ပေးလိုက်ပြီဖြစ်သည်။

ရုပ်ပိုင်းဆိုင်ရာ ခန္ဓာကိုယ်ဖြင့် တိုက်ခိုက်သောအခါ ၎င်းသည် သူ၏ ရုပ်ပိုင်းဆိုင်ရာ ခွန်အားကို နှစ်ဆကျော်အထိ တိုးမြှင့်ပေးနိုင်သည်။

သိထားရမည်မှာ သူ၏ လက်ရှိ ရုပ်ပိုင်းဆိုင်ရာ ခန္ဓာကိုယ်မှာ အုပ်စိုးသူခန္ဓာကိုယ်၊ နတ်ဘုရားတောင်တန်း ခန္ဓာကိုယ်၊ ကောင်းကင်ပြာနဂါးပြောင်းလဲခြင်း ကျင့်စဉ်နှင့် နတ်ဆင်ဖိနှိပ်ခြင်း အကျဉ်းထောင် စွမ်းအားတို့ကို စုစည်းထားခြင်းဖြစ်သည်။

အဆင့်မြင့်သိုင်းပညာရပ်များ အသုံးမပြုဘဲနှင့်ပင် ဝင်စားခြင်းအဆင့် အစွမ်းထက်သူတစ်ဦးကို သူ ရင်ဆိုင်နိုင်စွမ်း ရှိနေပြီဖြစ်သည်။

အကယ်၍ သူသည် မဟာရှေးဟောင်းရူန်း၏ တစ်ဆတိုး မြှင့်တင်မှုကို အသုံးပြုပြီး ချယ်အက္ခရာလျှို့ဝှက်ချက်၏ ဆယ်ဆပြင်းထန်သော တိုက်ခိုက်မှုကိုပါ အသက်သွင်းလိုက်ပါက ဝင်စားခြင်းအဆင့် အစွမ်းထက်သူတစ်ဦးသည် တကယ့်ကို သူ၏လက်ခုပ်ထဲမှရေပမာ ဖြစ်သွားပေလိမ့်မည်။

လင်းတုန်၏ ကောင်းကင်ပြာနဂါး အသွင်အပြင်များကလည်း သူ၏ လက်မောင်းနှစ်ဖက်စလုံးကို ဖုံးလွှမ်းထားသည်။ ဝရဇိန်ဘုရင်ခန္ဓာကိုယ်နှင့် လိပ်နက်ခန္ဓာကိုယ်တို့ ပေါင်းစပ်လိုက်သောအခါ ဝင်စားခြင်းအဆင့် အစွမ်းထက်သူတစ်ဦးက သူ့ကို လာရောက်တိုက်ခိုက်စေရန် ငြိမ်သက်စွာ ရပ်နေလျှင်ပင် သူ၏ အကာအကွယ်ကို ချိုးဖျက်ရန် အချိန်အတော်ကြာ ယူရပေလိမ့်မည်။

လက်ရှိ လင်းတုန်မှာ ယုံကြည်နိုင်စရာမရှိလောက်အောင် ကြံ့ခိုင်မာကျောနေပြီဟု ဆိုနိုင်ပေသည်။

ဘိုးဘေးကျောက်လက်ဖွဲ့ဝိညာဉ်မှာ နောက်ဆုံးတွင် အပြည့်အဝပုံပေါ်လာချေပြီ။ သူသည် မျက်ခုံးနှစ်ခုကြားတွင် နေမင်းရူန်းသင်္ကေတ ပါရှိပြီး အဖြူရောင်ဝတ်စုံကို ဝတ်ဆင်ထားသော ချောမောခံ့ညားသည့် သက်လတ်ပိုင်းအရွယ် အမျိုးသားတစ်ဦး ဖြစ်သည်။

“အဆောင်ဘိုးဘေး၊ ဆရာ” ဘိုးဘေးကျောက်လက်ဖွဲ့ဝိညာဉ်၏ အသွင်အပြင်ကို မြင်သောအခါ ဟွမ်သည် အတိတ်သို့ ပြန်လည်ရောက်ရှိသွားသကဲ့သို့ ခဏတာ တွေဝေငေးမောသွားလေသည်။

ဘိုးဘေးကျောက်လက်ဖွဲ့ဝိညာဉ်သည် အဆောင်ဘိုးဘေး၏ နတ်ဘုရားရတနာဖြစ်ပြီး ၎င်း၏ အသွင်အပြင်မှာ မူလပိုင်ရှင်နှင့် အနည်းငယ် ဆင်တူလေသည်။

“အဆောင်ဘိုးဘေးရဲ့ရုပ်ရည်က ဒီလိုမျိုးကိုး၊ အတော်လေးချောတာပဲ၊ ငါ့ထက် နည်းနည်းလေးပဲ လျော့တယ်” ဝူယွမ်က စိတ်ထဲမှ တိတ်တဆိတ် တွေးလိုက်မိသည်။

“ဒါက ရှေးဟောင်းခေတ်က အဲဒီပုဂ္ဂိုလ်ကြီးပေါ့” လင်းတုန်ကလည်း နှုတ်ခမ်းကို သပ်လိုက်သည်။ သူတို့သည် အဆောင်ဘိုးဘေး၏ ဇာတ်လမ်းကို ဟွမ်ထံမှ ကြားဖူးထားပြီး ကမ္ဘာခြားနတ်ဆိုး ဧကရာဇ်ကို ခုခံတိုက်ခိုက်ကာ ထျန်းရွှမ်တိုက်ကြီးကို ကယ်တင်ခဲ့ကြောင်း သိရှိထားကြသည်။

“နောက်ဆုံးတော့ စွမ်းအားတချို့ ပြန်ရလာပြီ၊ အဘိုးကြီး၊ အခု ငါ မင်းနဲ့အတူ လက်ဖက်ရည် သောက်လို့ရပြီ” ယန်က အဘိုးအိုဟွမ်ကို ကြည့်ကာ ရယ်မောလိုက်သည်။

ကမ္ဘာသစ်ပင်အတွင်း၌ ရှေးဟောင်းခေတ်က အဘိုကြီးအချို့ အတူတကွ ထိုင်ကာ စကားစမြည်ပြောဆိုရင်း လက်ဖက်ရည်သောက်ရသည်မှာ အလွန် ကြည်နူးဖွယ်ကောင်းပေသည်။

ယခုအခါ ကမ္ဘာသစ်ပင်ရှိနေပြီဖြစ်၍ သူတို့သည် ကမ္ဘာခြားနတ်ဆိုးများကို သန့်စင်ပစ်နိုင်ပြီဖြစ်ရာ ကမ္ဘာခြားနတ်ဆိုးများ၏ နောက်ဆုံးတန်ပြန်တိုက်ခိုက်မှုကို သိပ်ပြီး စိုးရိမ်မနေကြတော့ပေ။

“ဟုတ်ပါရဲ့၊ ငါတို့ ပြန်ဆုံရလိမ့်မယ်လို့ မထင်ထားခဲ့ဘူး” အဘိုးအိုဟွမ်ကလည်း ခံစားချက်အပြည့်ဖြင့် ပြောလိုက်သည်။

သူတို့၏ဆရာ သေဆုံးသွားခဲ့ပြီး သူတို့၏ ယခင် ရဲဘော်ရဲဘက်များအားလုံး ပျောက်ကွယ်သွားခဲ့ကြပြီဖြစ်သည်။ သူတို့သာ ကျန်ရစ်တော့သည်။

“မင်းတို့နှစ်ယောက် ရှေးဟောင်းကျောက်တိုင် ကမ္ဘာထဲကို အရင်ပြန်ဝင်သွားကြ၊”

“မဟာရှေးဟောင်းစွမ်းအင် မရှိတော့ရင် ရှေးဟောင်းကမ္ဘာဦးစေတီက ဒီမှာ သိပ်အသုံးမဝင်တော့ဘူး လောလောဆယ် အဲဒါကို ရှေးဟောင်းကျောက်တိုင်ထဲပဲ သိမ်းလိုက်မယ်” ဝူယွမ်က သူတို့ကို ညွှန်ကြားလိုက်သည်။

“အင်း” ဟွမ်က ခေါင်းညိတ်ပြလိုက်သည်။ ချက်ချင်းပင် မဟာရှေးဟောင်းကျောက်တိုင်က လေဟာနယ်တံခါးတစ်ခုကို ဖွင့်လှစ်လိုက်ပြီး ဧရာမ ရှေးဟောင်းကမ္ဘာဦးစေတီကြီးမှာ ၎င်း၏ မူလနေရာမှ ပျောက်ကွယ်သွားလေသည်။

ဝူယွမ် တစ်ယောက်တည်းသာ ထိုနေရာတွင် ကျန်ရစ်တော့သည်။

“ရှေးဟောင်းကမ္ဘာဦးစေတီက ဘယ်မှာလဲ”

“ရှေးဟောင်းကမ္ဘာဦးစေတီ ဘယ်ရောက်သွားတာလဲ”

“ဘာတွေဖြစ်နေတာလဲ၊ လေထဲမှာတင် ပျောက်သွားတာလား”

ရှေးဟောင်းကမ္ဘာဦးစေတီ ပျောက်ကွယ်သွားသည်ကို မျက်မြင်ကိုယ်တွေ့ ကြုံလိုက်ရသော မျိုးနွယ်စုကြီးငါးခုမှ အဖွဲ့ဝင်များမှာ ယခုအခါ မေးခွန်းများဖြင့် ပြည့်နှက်နေကြသည်။

မီတာတစ်ထောင်ခန့် မြင့်မားသော ဤမျှကြီးမားသည့် စေတီကြီးတစ်ခုက ဘယ်လိုလုပ်ပြီး လေထဲကို ပျောက်ကွယ်သွားနိုင်ရသနည်း။

လူတိုင်း၏ အကြည့်များက ဝူယွမ်အပေါ်သို့ စုပြုံကျရောက်သွားသည်။

ဤမေးခွန်းကို ဝူယွမ်ကသာ ဖြေဆိုနိုင်မည်မှာ ထင်ရှားသည်။

“ဝူယွမ်၊ ရှေးဟောင်းကမ္ဘာဦးစေတီက ဘယ်မှာလဲ” ကူရွှေ့က ပထမဆုံး မေးလိုက်ပြီး သူ၏ တွေဝေနေသော မျက်နှာပေါ်တွင် စိုးရိမ်မှုအချို့လည်း ထွက်ပေါ်နေသည်။

ရှေးဟောင်းကမ္ဘာဦးစေတီမှာ ပျက်စီးသွားခြင်းမဟုတ်ဘဲ လုံးဝ ပျောက်ကွယ်သွားလိမ့်မည်ဟု သူ မထင်မှတ်ထားခဲ့ပေ။

အခြားသော မျိုးနွယ်စုကြီးလေးခုမှ အကြီးအကဲများ၏ မျက်နှာများမှာလည်း မနှစ်မြို့ဖွယ်ဖြစ်နေကြသည်။

ဝေမိသားစု အကြီးအကဲက ပထမဆုံး ဒေါသတကြီး အော်ဟစ်လိုက်ပြီး စွပ်စွဲလိုက်သည်။

“သူ ရှေးဟောင်းကမ္ဘာဦးစေတီကို ယူသွားတာ ဖြစ်ရမယ်၊ သူ့ကို မောင်းထုတ်ပစ်ရမယ်လို့ ငါ အစောကြီးကတည်းက ပြောသားပဲ၊ အခုကြည့်စမ်း၊ ရှေးဟောင်းကမ္ဘာဦးစေတီ ပျောက်သွားပြီ၊ ဒီလူက သိုးရေခြုံထားတဲ့ ဝံပုလွေပဲ၊ ရှေးဟောင်းကမ္ဘာဦးစေတီအတွက် သူ ဒီကို လာခဲ့တာ”

ဤလူက ဤမျှလောက် အကဲခတ်ကောင်းလိမ့်မည်ဟု မထင်မှတ်ထားသဖြင့် ဝူယွမ်က ဝေမိသားစု အကြီးအကဲကို အံ့အားသင့်စွာ ကြည့်လိုက်သည်။

သူ၏ အဆိပ်ပြင်းသော အကြည့်များက ဝူယွမ်အပေါ် စူးစိုက်သွားပြီး အော်ဟစ်လိုက်သည်။ “ဝူယွမ်ကို သတ်ကြ၊ သူ့ဆီမှာ အဆင့်မြင့် လေဟာနယ်ရတနာ တစ်ခုခု ရှိနေရမယ်၊ အဲဒီလိုမှမဟုတ်ရင် သူ ရှေးဟောင်းကမ္ဘာဦးစေတီကို ယူသွားနိုင်မှာ မဟုတ်ဘူး၊”

ဝေမိသားစု အကြီးအကဲသည် ဝူယွမ်အား ဝိုင်းဝန်းတိုက်ခိုက်ရန်အတွက် မျိုးနွယ်စုကြီးငါးခု၏ အင်အားကို စည်းရုံးလိုနေသည်။

အခြားသူများက တစ်ယောက်ကိုတစ်ယောက် ကြည့်လိုက်ကြပြီးနောက် ရှန်ထူမိသားစု အကြီးအကဲကို လှမ်းကြည့်လိုက်ကြသည်။

အတိုင်းအတာတစ်ခုအထိ မျိုးနွယ်စုကြီးငါးခုကို ရှန်ထူမိသားစုက ဦးဆောင်နေဆဲပင် ဖြစ်သည်။

“မိတ်ဆွေလေး ဝူယွမ်၊ မင်း ပြောစရာ တစ်ခုခု ရှိသေးလား” ရှန်ထူမိသားစု အကြီးအကဲက အသံနိမ့်နိမ့်ဖြင့် မေးလိုက်သည်။

“အင်း၊ ရှေးဟောင်းကမ္ဘာဦးစေတီကို ငါ ယူလိုက်တာ၊ ငါ့ဆီမှာ ရှိတယ်” ဝူယွမ်က သူတို့ကို တည်ငြိမ်စွာကြည့်ရင်း ဝန်ခံသည့်အနေဖြင့် ခေါင်းညိတ်လိုက်သည်။

ဤကိစ္စကို ကိုင်တွယ်ဖြေရှင်းရန် သူ့တွင် အစီအစဉ်ရှိပြီးသားဖြစ်ပြီး မျိုးနွယ်စုကြီးငါးခုက အစွမ်းကုန် တိုက်ခိုက်လာမည်ကို သူ စိုးရိမ်မနေပေ။

သေချာပေါက် ဤယုံကြည်မှုက သူ၏စွမ်းအားမှလည်း မြစ်ဖျားခံနေသည်။ မျိုးနွယ်စုကြီးငါးခုက အညံ့မခံလျှင်ပင် သူတို့ကို အညံ့ခံလာသည်အထိ ရိုက်နှက်ပစ်လိုက်ရုံသာ ဖြစ်သည်။

မည်သို့ပင်ဆိုစေ သူ ဝူယွမ်သည် ရှေးဟောင်းကမ္ဘာဦးစေတီကို ရယူရန် သန္နိဋ္ဌာန်ချထားပြီးဖြစ်သည်။

“သူ ဝန်ခံပြီ၊ မြင်လား၊ သူ ဝန်ခံပြီ၊ သူ့ကိုသတ်ပြီး ရှေးဟောင်းကမ္ဘာဦးစေတီကို ပြန်လုကြ” ဝေမိသားစု အကြီးအကဲက မစောင့်ဆိုင်းနိုင်တော့ဘဲ ချက်ချင်း အော်ဟစ်လိုက်သည်။

အခြားသူများအားလုံးက ဝူယွမ်၏ရှင်းပြချက်ကို စောင့်ဆိုင်းနေဆဲပင် ဖြစ်သည်။

“မင်းက တော်တော် စိတ်အနှောင့်အယှက်ပေးတာပဲ၊ ဆက်ပြီး ဆူညံနေမယ်ဆိုရင် မင်းကို ပါးချည်းရိုက်သတ်ပစ်မယ်ဆိုတာ ယုံလား” ဝူယွမ်က ဝေမိသားစု အကြီးအကဲကို စိတ်မရှည်စွာ ကြည့်ကာ ပြောလိုက်သည်။

“ဝူယွမ်၊ မင်း သတ္တိတော်တော်ကောင်းပါလား၊ ရှေးဟောင်းကမ္ဘာဦးစေတီကို ခိုးသွားပြီးတော့တောင် ငါတို့ မျိုးနွယ်စုကြီးငါးခုကို ရန်စဝံ့သေးတယ်ပေါ့”

“ဟမ့်၊ ငါ ဒီနေရာမှာပဲ ရပ်နေမယ်၊ မင်း ငါ့ကို ဘယ်လို ပါးရိုက်သတ်မလဲဆိုတာ ကြည့်ကြသေးတာပေါ့” အကြီးအကဲ ဝေက မာနထောင်လွှားစွာ ပြောလိုက်သည်။

ဝူယွမ် တိုက်ခိုက်ရဲမည် မဟုတ်ဟု သူ လောင်းကြေးထပ်ထားခြင်းဖြစ်သည်။

ထို့အပြင် သူ့ကို ပါးချည်းရိုက်သတ်မည်ဟုလည်း ကျိမ်းဝါးသေးသည်လော။ မည်မျှ ရယ်စရာကောင်းလိုက်သည့်စကားနည်ူ သူ ဝေလင်သည် ဆန်းကြယ်ရှင်ခြင်းအဆင့် အထွတ်အထိပ်မှ အစွမ်းထက်ပုဂ္ဂိုလ်တစ်ဦးဖြစ်ရာ ပါးချည်းရိုက်သတ်၍ သေမည့်သူမျိုးမဟုတ်ချေ။

“သတ္တိရှိရင် လာခဲ့လေ” ဝေလင်က ထပ်မံရန်စလိုက်သည်။

“ငါ့တစ်သက်တာမှာ ဒီလိုတောင်းဆိုမှုမျိုးကို ပထမဆုံးအကြိမ် ကြားဖူးခြင်းပဲ” ဝူယွမ်က အေးတိအေးစက်ဖြင့် ဆက်လက်၍ ပြောလိုက်သည်။

“မင်းက ဒီလောက်တောင် လောနေမှတော့ မင်းရဲ့ ဆန္ဒကို ငါ ဖြည့်ဆည်းပေးရမှာပေါ့”

သူ၏ လတ်တလော ကျင့်ကြံခြင်းရလဒ်များကို စမ်းသပ်ရန် အချိန်ကိုက်ပင်ဖြစ်သဖြင့် လက်ဖဝါးများကို ပွတ်သပ်လိုက်မိသည်။

သူ၏ ညာဘက်လက်ပေါ်တွင် ကောင်းကင်ပြာနဂါး အလင်းပုံစံများ ပေါ်ထွက်လာပြီး အပြာရောင်အလင်းတန်းများ ဖြာထွက်လာသည်။ ဝူယွမ်၏ ခန္ဓာကိုယ်မှာ အရိပ်တစ်ခုအဖြစ် ပြောင်းလဲသွားပြီး မျက်စိတစ်မှိတ်အတွင်း ဝေလင်၏ ရှေ့သို့ ရောက်ရှိသွားလေသည်။

ဝေလင်၏ မျက်လုံးများ ပြူးကျယ်သွားသော်လည်း သူ တုံ့ပြန်ရန် အချိန်နှောင်းသွားခဲ့ပြီဖြစ်သည်။

“ဖြန်း” ဝူယွမ်၏ ကောင်းကင်ပြာနဂါး လက်ဝါးကြီးက သူ၏ မျက်နှာကို ရိုက်ချလိုက်ပြီဖြစ်သည်။

လူတိုင်း၏ မျက်မှောက်၌ပင် ဝေလင်သည် မြေပြင်မှ တိုက်ရိုက်မြောက်တက်သွားကာ ကောင်းကင်ယံသို့ လွင့်စင်သွားပြီးနောက် လည်ထွက်ကာ မြေကြီးပေါ်သို့ ကျဆင်းသွားလေသည်။

“ဝူယွမ်၊ မင်း... “ အခြားသော ဝေမိသားစုဝင်များမှာ အလွန်အမင်း ထိတ်လန့်ကြောက်ရွံ့သွားကြသည်။

အခြား မျိုးနွယ်စုကြီးလေးခုမှ လူများကလည်း ဝူယွမ်ကို အံ့ဩတကြီး ကြည့်လိုက်ကြသည်။ ဝူယွမ်က နေရာတွင်ပင် အမှန်တကယ် တိုက်ခိုက်ဝံ့လိမ့်မည်ဟု သူတို့ လုံးဝ ကြိုတင်မပြင်ဆင်ထားခဲ့ပေ။

သူက ဝေမိသားစုကို မကြောက်ခြင်းလော။ မျိုးနွယ်စုကြီးငါးခုကို မကြောက်ခြင်းလော။

“အကြီးအကဲ ဝေလင်ကို မြန်မြန်သွားကြည့်ကြ” အခြား ဝေမိသားစုမှ အကြီးအကဲတစ်ဦးက ညွှန်ကြားလိုက်သည်။

ခဏအကြာတွင် ဝေမိသားစု တပည့်တစ်ဦးက ဝေလင်၏ရုပ်အလောင်းကို သယ်ဆောင်လာခဲ့သည်။

ဝေလင်၏ ဦးခေါင်းမှာ ချိုင့်ဝင်နေပြီး လုံးဝ သေဆုံးသွားကာ သူ၏ မူလစိတ်ဝိညာဉ်ပင်လျှင် လွင့်စင်ပျောက်ကွယ်သွားခဲ့ပြီဖြစ်သည်။

လူတိုင်း ထိတ်လန့်တုန်လှုပ်သွားကြသည်။

“တစ်ချက်တည်းနဲ့ ခန္ဓာရော ဝိညာဉ်ပါ ချေမှုန်းခံလိုက်ရတာပဲ”