အခန်း (၈၂၀-၈၂၂)

အခန်း (၈၂၀) - တောင်နှင့် ပင်လယ် ကမ္ဘာ မှ ရန်သူများ

~ဤ ပုလဲ များမှာ ကျယ်ပြန့်သော ကမ္ဘာ ၏ စစ်တပ်ကြီး သုံးခု ရှိနေသော နေရာနှင့် အနီးဆုံးရှိ ဆုံမှတ် များ၏ အဓိက အသက်သွေးကြောများ ပင် ဖြစ်သည်။

သာမန် တိုက်ပွဲကြီး တစ်ခုတွင်... ဆုံမှတ်ပုလဲ ကို ခိုးယူနိုင်လိမ့်မည်ဟု မည်သူကမျှ တွေးထင်ထားမည် မဟုတ်ချေ။

အကယ်၍ တစ်စုံတစ်ယောက်က ထိုသို့ တွေးတောရဲလျှင်တောင်မှ... လက်တွေ့တွင်မူ လုံးဝ လုပ်ဆောင်နိုင်စွမ်း ရှိမည် မဟုတ်ပေ။

ပုံမှန်အားဖြင့် ဝိညာဉ်ကမ္ဘာ နှစ်ခုလုံး မှ ကျင့်ကြံသူ များသည် ဆုံမှတ် တစ်ခုကို သိမ်းပိုက်ပြီးသည်နှင့် တစ်ပြိုင်နက်... ဝိညာဉ်ကမ္ဘာ ၏ ဆန္ဒတော် ကို ဆင့်ခေါ်ရန်အတွက် ယဇ်ပလ္လင် တစ်ခုကို ချက်ချင်း တည်ဆောက်ကြလေ့ ရှိသည်။

သို့သော်၊ နင်ချီ သည် မူလ ကမ္ဘာ့အရှင်သခင် ၏ စွမ်းရည် အချို့ကို ပိုင်ဆိုင်ထားသဖြင့်... နယ်မြေ ၏ အဓိက အသက်သွေးကြော များကို အရင်ဆုံး လုယူနိုင်ခဲ့ခြင်း ဖြစ်၏။

ဤသည်က ကျယ်ပြန့်သော ကမ္ဘာ ၏ စစ်တပ်ကြီးကို ကျယ်ပြန့်သော ကမ္ဘာ့ဆန္ဒတော် အား ခေါ်ဆောင်လာခြင်းမှ တားဆီးနိုင်ခဲ့ပြီး... နင်ချီ အတွက် ကစားရန် ဖဲချပ်များ ပိုမို ရရှိသွားစေခဲ့တော့၏။

သူ တစ်ယောက်တည်းက ဤစစ်ပွဲ အတွက် တိုက်ခိုက်ရေး ပုံစံသစ် တစ်ခုကို စတင် ဖန်တီးလိုက်ခြင်းပင် ဖြစ်ပြီး၊ နှစ်ဖက်စလုံးက မသိမ်းပိုက်ရသေးသော ဆုံမှတ်ပုလဲ များကို ရယူရန် ဤနည်းလမ်းကို အသုံးပြုနိုင်စွမ်း ရှိသည်။

ထို့နောက် တောင်နှင့် ပင်လယ် ကမ္ဘာ့ဆန္ဒတော် ကို ဆင့်ခေါ်မည် မခေါ်မည် ဆိုတာကတော့ သူ၏ ကိုယ်ပိုင် ဆုံးဖြတ်ချက်သာ ဖြစ်ပေတော့သည်။

ထို့နောက် နင်ချီ က ဝိညာဉ်ပျံသန်း ရှာဖွေရေး သံလိုက်အိမ်မြှောင် ကို ထုတ်ယူကာ ထိုအပေါ်တွင် ပြသနေသော မြေပုံ ကို ငုံ့ကြည့်လိုက်၏။

မြေပုံ ပေါ်တွင် ကျယ်ပြန့်သော ကမ္ဘာ ၏ စစ်တပ်ကြီးမှာ မူလ နေရာတွင်သာ ရှိနေဆဲ ဖြစ်သော်လည်း၊ သူတို့၏ တန်းစီ ဖွဲ့စည်းပုံ များ အတွင်း၌ အလွန်တရာ အစွမ်းထက်လှသော ချီ စွမ်းအင် သတင်းအချက်အလက် အခု (၂၀) ရုတ်တရက် ပေါ်ထွက်လာသည်။

မြေပုံ ပေါ်တွင်မူ ၎င်းကို ကျယ်ပြန့်သော ကမ္ဘာ ၏ စစ်တပ်ကြီးကို ကိုယ်စားပြုနေသော မြူခိုး အစက်လေး (၂၀) က ရှင်းလင်းစွာ တောက်ပနေခြင်း ဖြင့် ပြသနေ၏။

သူတို့မှ လွဲ၍ အလယ် နယ်မြေ မြေပုံ တစ်ခုလုံးတွင် ကျန်ရှိနေသည်မှာ သူ၏ ကွပ်ကဲမှုအောက်ရှိ စစ်တပ်ကြီး သုံးခု ဖြစ်သော နက်ရှိုင်းသော သစ္စာတရား နယ်မြေ၊ ဖူယောင် နယ်မြေ နှင့် လန်ယာ နယ်မြေ တို့သာ ဖြစ်သည်။

ထင်ရှားသည်မှာ မူလက အလယ် နယ်မြေ အတွင်း၌ ရှိနေခဲ့သော တောင်နှင့် ပင်လယ် ကမ္ဘာ မှ စစ်တပ်ကြီး သုံးခုလုံး လုံးလုံးလျားလျား မျိုးတုံး ပျက်စီးသွားခဲ့ပြီ ဆိုသည့် အဓိပ္ပာယ်ပင်။

ဤမြင်ကွင်းအား မြင်လိုက်ရသောအခါ နင်ချီ က သူ၏ လက်ထဲရှိ ဆုံမှတ်ပုလဲ ကို အထက်သို့ မြှောက်ကာ ကစားလိုက်ပြီး၊ သူ၏ ခေါင်းထဲတွင် အတွေး အချို့ လျှပ်တစ်ပြက် ဖြတ်ပြေးသွားတော့၏။

ယခုအခါ တစ်ဖက်ရန်သူများက ကိုယ့်ကိုယ်ကိုယ် အဆုံးစီရင်သွားခဲ့ကြပြီ ဖြစ်ရာ... သူတို့တွင် ဖြစ်နိုင်ခြေ ရှိသော နည်းလမ်း နှစ်ခုသာ ရှိတော့သည်။

တစ်ခုက သူ့ဆီကို တိုက်ရိုက် လာဖို့ ဖြစ်ပြီး၊ နောက်တစ်ခုကတော့ သူ၏ စစ်တပ်ကြီးကို ဓားစာခံ အဖြစ် ဖမ်းဆီးကာ သူ့ကို အပြင်ထွက်လာအောင် အတင်းအကျပ် ဖိအားပေးဖို့သာ ဖြစ်၏။

နင်ချီ ၏ နားလည် သဘောပေါက်နိုင်စွမ်း ဖြင့်၊ တစ်ဖက်လူ အသုံးပြုလာနိုင်သည့် နည်းလမ်း အမျိုးမျိုးကိုပင် သူ ကြိုတင် ခန့်မှန်း တွက်ချက်ထားပြီး ဖြစ်သည်။

ဤသို့ ကြိုတင် ခန့်မှန်းထားနိုင်သည် ဆိုမှတော့... တစ်ဖက်လူကို သူတို့ အလိုရှိသည့်အတိုင်း ဖြစ်ခွင့် ပေးဖို့ ဆိုတာ ဘယ်လိုလုပ် ဖြစ်နိုင်ပါ့မလဲ။

နင်ချီ ပြုံးလိုက်ပြီး၊ သူ့ရှေ့ရှိ ဟင်းလင်းပြင် ကို အလွယ်တကူ ဆွဲဖြဲလိုက်ကာ ထိုနေရာမှ ပျောက်ကွယ်သွားတော့၏။

...

သွေးစွန်း သတ်ဖြတ်သူ နှင့် အခြား ပေါင်းစည်းခြင်း နယ်ပယ် ကျင့်ကြံသူ (၂၀) မှာ နင်ချီ ကို မည်သို့ ရှာဖွေရမည်နည်း ဆိုသည်ကို တိုင်ပင် ဆွေးနွေးနေကြဆဲ ဖြစ်သည်။

ဝူရွှီ နှင့် စွန်းလွီ တို့ သူတို့၏ အမြင်များကို ဖလှယ်ပြီးနောက်... နောက်ဆုံးတွင် သွေးစွန်း သတ်ဖြတ်သူ က ဝူရွှီ ၏ အကြံအစည် ကို လက်ခံလိုက်၏။

သူတို့က ဖမ်းဆီးခံထားရသော ဖန်ထျန်း နှင့် မုကျူးထျန်း ကို အကြည့်ပို့လွှတ်လိုက်ကြသည်။

“မင်းတို့ အသက်ရှင်ချင်တယ် ဆိုရင် ရှေ့ကနေ လမ်းပြစမ်း”

ဖန်ထျန်း နှင့် သူ၏ အဖော်မှာ သက်ပြင်းချကာ စိတ်အေးသွားကြတော့သည်။

တစ်ဖက်လူက မိမိတို့၏ အကြံပေးချက် ကို လက်ခံလိုက်၍ ကံကောင်းသေး၏။

“ကျေးဇူးပြုပြီး ကျွန်တော်တို့ ခန္ဓာကိုယ် ပေါ်က တံဆိပ်ခတ် ထားတာတွေကို ဖယ်ရှားပေးပါ ..စီနီယာ”

ထိုအခါ၊ သွေးစွန်း သတ်ဖြတ်သူ က သူ၏ လက်ညှိုးကို တစ်ချက် ခတ်လိုက်ရာ၊ သွေးရဲရဲ နီနေသော အလင်းစက် နှစ်ခုက ထိုနှစ်ဦး ရှိရာဆီသို့ ချက်ချင်း ပျံသန်းသွားတော့၏။

အလင်းတန်းများ သူတို့အပေါ် ကျရောက်သွားသည်နှင့် တစ်ပြိုင်နက်၊ ဖေးပင်း နှင့် အခြား နှစ်ဦးက အလွန်တရာ အားစိုက်ထုတ်ကာ တပ်ဆင်ထားခဲ့သော တံဆိပ်ခတ် မှုများမှာ မျက်စိတစ်မှိတ် အတွင်း လွင့်စင် ပျောက်ကွယ်သွားတော့သည်။

ဖန်ထျန်း နှင့် သူ၏ အဖော်မှာ ဖရိုဖရဲ ဖြစ်နေသော အသွင်အပြင်ဖြင့် မတ်တတ်ရပ်လိုက်ကြ၏။

အစွမ်းထက် ပုဂ္ဂိုလ် (၂၀) နှင့် ကျယ်ပြန့်သော ကမ္ဘာ ၏ ကျန်ရှိနေသေးသော နယ်မြေ နှစ်ခု မှ ကျင့်ကြံသူ စစ်တပ်ကြီးကို ကြည့်ရင်း... ထိုနှစ်ဦးမှာ လူသား စစ်တပ်ကြီး တစ်ခုလုံးကို ရင်ဆိုင်နေရသော ပုရွက်ဆိတ် လေးများအလား ခံစားလိုက်ကြရသည်။

အကယ်၍ သူတို့တွင် သူတို့၏ ဖခင်များ ပေးအပ်ထားသော နည်းလမ်းများ ရှိနေသေးလျှင်တောင်မှ... ဤမျှ စွမ်းအားကြီး ရှေ့တွင် လုံးဝ အသုံးပြုရဲချေ။

သူတို့၏ စွမ်းရည်များကို အသုံးမပြုနိုင်ခင်မှာပင်၊ တစ်ဖက်လူ၏ လွယ်လွယ်ကူကူ ညှစ်ချေ ဖျက်ဆီးပစ်ခံလိုက်ရမည်သာ ဖြစ်သည်။

ထိုနှစ်ဦးမှာ အလွန်တရာ မလုံခြုံမှုများကို ခံစားနေကြရသော်ငြားလည်း... သူတို့ လက်ရှိ ရင်ဆိုင်နေရသော အကြပ်အတည်းမှာ နင်ချီ ကြောင့်သာ ဖြစ်ကြောင်း သဘောပေါက်သွားသောအခါ၊ နင်ချီ အပေါ်တွင် အလွန်တရာ ကြီးမားလှသော မုန်းတီးမှုများ ပေါက်ဖွားလာကြတော့၏။

‘ခွေးကောင်... မင်း စောင့်ကြည့်နေလိုက်စမ်း’

“သေတဲ့သူက ရဲဘော်ရဲဘက်တွေ ဖြစ်ချင် ဖြစ်မယ်... ဒါပေမဲ့ ငါတို့တော့ မဟုတ်ဘူး” ဆိုတာက သူတို့၏ အမြဲတမ်း ကိုင်စွဲထားသော မူဝါဒပင်။

တောင်နှင့် ပင်လယ် ကမ္ဘာ မှ သာမန် ကျင့်ကြံသူ များကို သစ္စာဖောက်လျှင်တောင်မှ... တောင်ဘိုးဘေးကြီး ကို သစ္စာမဖောက်သရွေ့ ပြဿနာ မရှိဘူးဟု သူတို့ ခံယူထားကြသည်။

သူတို့၏ စိတ်ထဲတွင် တောင်ဘိုးဘေးကြီး ၏ အသိအမှတ်ပြုခြင်းကို ခံရသူများသာလျှင် သူတို့၏ ကိုယ်ပိုင် လူများ ဖြစ်ကြ၏။

သူတို့၏ အောက်ခြေရှိ မရေမတွက်နိုင်သော ကျင့်ကြံသူ များမှာမူ သူတို့၏ အကျိုးစီးပွားများ အတွက် တိုက်ပွဲဝင်ပေးရမည့် ကျွန်များသာ ဖြစ်ပြီး... သူတို့ကို စည်းစိမ်ချမ်းသာ များနှင့် ဇိမ်ကျကျ နေနိုင်ရန်အတွက် အလွယ်တကူ စတေးခံနိုင်သော အရင်းအမြစ်များမျှသာ ဖြစ်သည်။

စတေးခံရမည့် ပစ္စည်းတွေကို ရောင်းစားတာက ဘယ်လိုလုပ် သစ္စာဖောက်တာ ဖြစ်နိုင်မည်လဲ။

ထို စတေးခံ ပစ္စည်းတွေရဲ့ အသက်တွေက သူတို့၏ အသက်တွေလောက် ဘယ်တော့မှ တန်ဖိုး မကြီးပေ။

ထိုနှစ်ဦးက ကျယ်ပြန့်သော ကမ္ဘာ ၏ စစ်တပ်ကြီးကို ဦးဆောင်ကာ နင်ချီ ၏ နယ်မြေ သုံးခု စစ်တပ်ကြီးကို ရှာဖွေရန် ပြင်ဆင်နေကြစဉ်မှာပင်...

ရုတ်တရက် သူတို့၏ နယ်မြေ အတွင်း၌ ကြောက်မက်ဖွယ် ကောင်းသော အပြောင်းအလဲ တစ်ခု ဖြစ်ပေါ်လာတော့သည်။

မြောက်ဘက် မိုင်တစ်ထောင်ခန့် အကွာအဝေးတွင် ခရမ်းရောင် ကောင်းကင်ကြယ် တစ်လုံးက ၎င်း၏ အလင်းတန်းများကို ဖြာကျနေသည်ကို မြင်တွေ့လိုက်ကြရ၏။

ချက်ချင်းပင် လူတိုင်းက သူတို့၏ ခန္ဓာကိုယ်များ လေးလံသွားသည်ကို ခံစားလိုက်ရပြီး၊ သူတို့၏ ခွန်အားများမှာ မျက်စိတစ်မှိတ် အတွင်း (၃၀) ရာခိုင်နှုန်း ဖိနှိပ်ခံလိုက်ရတော့သည်။

“ဒုက္ခပဲ... ဒီ ဆုံမှတ် ကို တောင်နဲ့ ပင်လယ် ကမ္ဘာ က သိမ်းပိုက်သွားပြီ”

သူတို့သည် ဤဒေသ၏ အစွန်အဖျားတွင် ရှိနေကြပြီး ကြယ်အလင်းတန်းများ၏ လွှမ်းမိုးမှု အောက်သို့ အတိအကျ ရောက်ရှိနေကြသဖြင့်၊ ဖြစ်ပေါ်နေသော အပြောင်းအလဲ များကို ချက်ချင်း သတိပြုမိသွားကြခြင်း ဖြစ်သည်။

ထိုစကားကို ကြားလိုက်ရသောအခါ နယ်မြေ သုံးခု စစ်တပ်ကြီး၏ စစ်သူကြီးများ ဖြစ်ကြသော ဖေးပင်း နှင့် အခြား နှစ်ဦးမှာ အလွန်တရာ အံ့အားသင့်သွားကြတော့၏။

ထိုအခါ၊ ဖေးပင်း က ဆိုလိုက်၏။

“အရှင်သခင် သွေး... ကျွန်တော်တို့ အဲဒီနေရာကို အရင်က သွားပြီး စုံစမ်းကြည့်ပြီးပါပြီ။ ဆုံမှတ်ပုလဲ က ပျောက်နေခဲ့တာပါ။ ဒါပေမဲ့ အခုတော့ ရုတ်တရက် ပြန်ပေါ်လာပြီး အသက်ဝင်လာတယ် ဆိုတော့... နင်ချီ ရောက်လာပြီ ဆိုတာ သေချာတယ်ဗျ”

“နင်ချီ...”

သွေးစွန်း သတ်ဖြတ်သူ က လူအုပ်ကြီးကို တစ်ချက် ဝေ့ကြည့်လိုက်ပြီးနောက်၊ သူ၏ အကြည့်များက ဖန်ထျန်း နှင့် အခြား တစ်ယောက်ဆီသို့ နောက်ဆုံးတွင် ကျရောက်သွားတော့သည်။

ထို့နောက်၊ သူက ဖေးပင်း နှင့် အခြား နှစ်ဦးကို အမိန့်ပေးလိုက်၏။

“သူတို့ကို သေချာ စောင့်ကြည့်ထား။ တစ်ခုခု ထူးခြားတာနဲ့ လုံးဝ လက်မတွန့်နဲ့”

ဖေးပင်း နှင့် အခြား နှစ်ဦးက ချက်ချင်း ခေါင်းညိတ်ပြလိုက်ကြသည်။

ထိုအခါ၊ ဖန်ထျန်း နှင့် အခြား တစ်ယောက်၏ မျက်နှာများမှာ ယခုလေးတင်မှ သွေးရောင် အနည်းငယ် ပြန်လည် လွှမ်းမိုးလာခဲ့သော်လည်း၊ ယခုအခါ နောက်တစ်ကြိမ် ချက်ချင်း သွေးဆုတ်သွားကြပြန်၏။

သူတို့သည် အသက်ရှင် လွတ်မြောက်နိုင်မည့် အခွင့်အရေး တစ်ခုကို နောက်ဆုံးတွင် ရရှိသွားခဲ့ပြီဟု ထင်မှတ်ထားခဲ့သော်ငြားလည်း... ရုတ်တရက်ကြီး အခြေအနေတွေက နောက်တစ်ခါ ထပ်ပြောင်းသွားပြန်ပြီ‌လော။

သွေးစွန်း သတ်ဖြတ်သူ က ရှေ့ဆုံးမှ ဦးဆောင်ကာ ခရမ်းရောင် ကောင်းကင်ကြယ် ဖြာကျနေသော အရပ်ဆီသို့ တဟုန်ထိုး ပျံသန်းသွားတော့သည်။

“ငါ့နောက်က လိုက်ခဲ့ကြ”

သူ၏ နောက်ကွယ်ရှိ လူ (၁၉) ဦးကလည်း လျင်မြန်စွာ လိုက်ပါသွားကြသည်။

လူ (၂၀) စလုံးက ဂျက်လေယာဉ် များအလား ကောင်းကင်ယံကို ဖြတ်သန်း ပျံသန်းသွားကြရာ၊ ကောင်းကင်ယံတွင် မျဉ်းကြောင်း (၂၀) ခု ထင်ကျန်ရစ်ခဲ့တော့သည်။

လူတိုင်းအတွက် တစ်ခုတည်းသော သက်သာရာ ရစေမည့် အချက်မှာ... ဆုံမှတ် မှာ ယခုလေးတင် အသက်ဝင်လာခဲ့ခြင်း ဖြစ်ပြီး၊ တောင်နှင့် ပင်လယ် ကမ္ဘာ့ဆန္ဒတော် မှာ အပြည့်အဝ ဆင်းသက်မလာသေးသည့် အချက်ပင် ဖြစ်၏။

သို့မဟုတ်ပါက သူတို့ ရင်ဆိုင်ရမည့် ဖိနှိပ် ချုပ်ချယ်မှု များမှာ ယခုထက် များစွာ ပိုမို ကြောက်မက်ဖွယ် ကောင်းနေမည်သာ။

ကိုယ့်ကိုယ်ကိုယ် ဒဏ်ရာရအောင် လုပ်ပြီး ဝင်လာကြသော ဤ ပေါင်းစည်းခြင်း နယ်ပယ် ကျင့်ကြံသူ များပင်လျှင်... တောင်နှင့် ပင်လယ် ကမ္ဘာ့ဆန္ဒတော် အပြည့်အဝ ဆင်းသက်လာချိန်တွင် သက်သာမည် မဟုတ်ချေ။

၎င်းမှာ သူတို့ ကျယ်ပြန့်သော ကမ္ဘာ ၏ တစ်စိတ်တစ်ပိုင်း ဖြစ်နေသကဲ့သို့ပင်။ အကယ်၍ ကျင့်ကြံသူ တစ်ယောက်က တောင်နှင့် ပင်လယ် ကမ္ဘာ အတွင်း၌ ရုတ်တရက် ပေါ်လာမည် ဆိုပါက၊ အလွယ်တကူ ခြယ်လှယ် ထိန်းချုပ်ခံရမည်ပင်။

ဝိညာဉ်နယ်မြေ ၏ ဆန္ဒတော်သည် ပြိုင်ဘက်ကင်းသည် မဟုတ်ပါလော။

သွေးစွန်း သတ်ဖြတ်သူ နှင့် သူ၏ အဖွဲ့သည် အချိန်တိုလေး အတွင်းမှာပင် မိုင်ငါးရာ ခန့် အကွာအဝေးသို့ ရောက်ရှိသွားကြ၏။

သူတို့က ပတ်ဝန်းကျင်ကို အကြည့်ပို့လွှတ်လိုက်ရာ၊ သူတို့၏ ခွန်အားများဖြင့် မိုင် ( ၅၀၀ )

အကွာအဝေးတွင် ဘာတွေ ဖြစ်ပျက်နေသနည်း ဆိုတာကို ရှင်းလင်းစွာ မြင်တွေ့နိုင်စွမ်း ရှိကြသည်။

အခန်း (၈၂၁) - တောင်နှင့် ပင်လယ် ကမ္ဘာ မှ ရန်သူများ

~အဖြူရောင် ဝတ်ရုံနှင့် ပုံရိပ် တစ်ခုက မြေကြီးပေါ်တွင် မတ်မတ် ရပ်နေ၏။

သူ၏ ရှေ့တွင် ယဇ်ပလ္လင် တစ်ခု ရှိနေပြီး၊ အဖြူရောင် ဝတ်ရုံနှင့် ပုံရိပ်က ၎င်း၏ ထောင့်တစ်နေရာတွင် ရပ်ကာ... တောင်နှင့် ပင်လယ် ကမ္ဘာ့ဆန္ဒတော် ကို အပြည့်အဝ ဆင်းသက်လာစေရန် မန္တန် များကို ရွတ်ဆိုနေပုံ ရသည်။

“အရှိန်တင်ကြ... နင်ချီ တောင်နဲ့ ပင်လယ် ကမ္ဘာ့ဆန္ဒတော် ကို မဆင့်ခေါ်နိုင်ခင် ယဇ်ပလ္လင် ကို ငါတို့ ဖျက်ဆီးပစ်ရမယ်”

လူတိုင်းက ပြိုင်တူ ပြန်လည် ဖြေကြားလိုက်ကြသည်။

သို့သော် လူ (၂၀) အနက်မှ... စာပေသမား ဝတ်ရုံကို ဆင်မြန်းထားသော ဝူရွှီ ၏ မျက်မှောင်များ အနည်းငယ် တွန့်ချိုးသွားပြီး၊ တစ်ခုခု မှားယွင်းနေကြောင်း ခံစားလိုက်ရ၏။

‘နင်ချီ က အရမ်းကြီး မာနထောင်လွှားလွန်းနေတာ မဟုတ်ဘူးလား။ တခြားသူတွေ အနီးအနားမှာ ရှိနေတယ် ဆိုတာကို သိသိကြီးနဲ့... ဆုံမှတ် ကို သိမ်းပိုက်ဖို့နဲ့ တောင်နဲ့ ပင်လယ် ကမ္ဘာ့ဆန္ဒတော် ကို ဆင့်ခေါ်ဖို့ ဒီကို တစ်ယောက်တည်း လာရဲတယ်ပေါ့လေ။

သူက သူ့ကိုယ်သူ ကာကွယ်ဖို့နဲ့ ငါတို့ကို တောင်နဲ့ ပင်လယ် ကမ္ဘာ့ဆန္ဒတော် ရဲ့ အကူအညီနဲ့ သတ်ဖို့ ကြိုးစားနေတာများလား’

ခဏအကြာတွင် သူတို့သည် မိုင် ၂၅၀ ခန့် အကွာအဝေးသို့ ရောက်ရှိလာကြပြီ ဖြစ်ရာ... ၎င်းမှာ သူတို့ အနေဖြင့် အတော်လေး အစွမ်းထက်သော တိုက်ခိုက်မှု များကို ထုတ်လွှတ်နိုင်စွမ်း ရှိသည့် အကွာအဝေး တစ်ခု ဖြစ်၏။

“အားလုံးပဲ... လှုပ်ရှားကြ”

သွေးစွန်း သတ်ဖြတ်သူ၏ အမိန့်ပေးလိုက်သံကိုသာ ကြားလိုက်ရသည်။

သူက ရှေ့သို့ ဆက်လက် ပျံသန်းနေရင်း ညာလက်ကို မြှောက်လိုက်၏။

သူ၏ ညာလက်ဝါး အတွင်း၌ အဆုံးအစမဲ့သော ကြက်သွေးရောင် အလင်းတန်းများ ပေါက်ကွဲ ထွက်လာပြီး၊ မျက်စိတစ်မှိတ် အတွင်း ကြက်သွေးရောင် ဖန်သား တစ်ခုနှင့် တူသော သွေးလှံအဖြစ် ဖွဲ့တည်သွားတော့သည်။

“သွားစမ်း”

သွေးစွန်း သတ်ဖြတ်သူ က အော်ဟစ်လိုက်ပြီး သူ၏ သွေးလှံ ကို ပစ်လွှတ်လိုက်၏။

“ဂျိန်း...”

မိုးခြိမ်းသံကြီး တစ်ခုနှင့်အတူ... လျှပ်စီးအလား မြန်ဆန်လှသော အမြန်နှုန်းဖြင့် ရွေ့လျားသွားသော သွေးလှံ မှာ ယဇ်ပလ္လင် ရှေ့ရှိ အဖြူရောင် ဝတ်ရုံနှင့် ပုံရိပ် ကို တိုက်ရိုက် ဝင်ရောက် ရိုက်ခတ်သွားတော့သည်။

ထို့နောက်တွင် အခြားသူများ၏ စည်းမျဉ်း တိုက်ခိုက်မှုများကလည်း ထပ်ကြပ်မကွာ လိုက်ပါလာကြသည်။

ဒါက အပြာရောင် လျှပ်စီးတန်း တစ်ခု ဖြစ်နိုင်သလို၊ ရွှေရောင် နတ်ဘုရား မြှား တစ်စင်း၊ ထက်မြက်လှသော ဓားချက် တစ်ချက်လိုပင်။

အတိုချုပ် ပြောရမည် ဆိုလျှင်... မည်သည့် အစီအစဉ်ဖြင့် ဖြစ်ပေါ်လာသည် ဖြစ်စေ တာအို များ၏ တိုက်ခိုက်မှု အားလုံးမှာ မိုင် နှစ်ရာ အကွာအဝေးရှိ ယဇ်ပလ္လင် ပေါ်သို့ အတိအကျ ကျရောက်သွားကြတော့၏။

တိုက်ခိုက်မှုများက အတိအကျ ထိမှန်သွားပြီး၊ ယဇ်ပလ္လင် မှာ အလွယ်တကူပင် ကြေမွ ပျက်စီးသွားပုံပေါ်၏။... ကောင်းကင်ယံမှ တန်းတန်းမတ်မတ် ဖြာကျနေသော ခရမ်းရောင် ကောင်းကင်ကြယ် ၏ အလင်းတန်းများမှာလည်း ပြတ်တောက်သွားသည့်အလား ဖြစ်သွားတော့သည်။

သို့သော် နောက်တစ်စက္ကန့်တွင် လူတိုင်း၏ မျက်နှာထားများ အုံ့မှိုင်းသွားကြတော့သည်။

ဝူရွှီ က ဒေါသတကြီး အော်ဟစ်လိုက်၏။

“ငါတို့ ထောင်ချောက်ထဲ ကျသွားပြီ။ အခုချက်ချင်း ဆုတ်ကြ”

သူက ပထမဆုံး စတင် လှုပ်ရှားလိုက်ပြီး လေထဲတွင် ရုတ်တရက် ရပ်တန့်ကာ နောက်သို့ လျင်မြန်စွာ ပျံသန်း ထွက်ပြေးသွားတော့သည်။

သွေးစွန်း သတ်ဖြတ်သူ နှင့် အခြားသူများမှာလည်း မယုံကြည်နိုင်သော အကြည့်များဖြင့် ချက်ချင်း နောက်ဆုတ် ထွက်ပြေးသွားကြ၏။

အကြောင်းမူကား သူတို့ ဖျက်ဆီးပစ်လိုက်သော ယဇ်ပလ္လင် မှာ ပုံရိပ်ယောင် တစ်ခုမျှသာ ဖြစ်ပြီး၊ ၎င်း၏ ဘေးရှိ အဖြူရောင် ဝတ်ရုံနှင့် ပုံရိပ် မှာလည်း ပုံရိပ်ယောင် တစ်ခုမျှသာ ဖြစ်နေသောကြောင့်ပင် ဖြစ်သည်။

ထို ပုံရိပ်ယောင် မှာ အစကတည်းက သူတို့၏ အာရုံစိုက်မှုကို ဆွဲဆောင်ရန်နှင့် သူတို့ကို ပိုမို နီးကပ်လာစေရန် ရည်ရွယ်ထားပုံ ရ၏။

အကယ်၍ သူတို့သာ ခပ်လှမ်းလှမ်းမှ တိုက်ခိုက်ပြီး ၎င်းကို မဖျက်ဆီးပစ်ခဲ့လျှင်... ၎င်းမှာ ပုံရိပ်ယောင် တစ်ခုမျှသာ ဖြစ်ကြောင်း သိရှိနိုင်မည် မဟုတ်သလို၊ အကယ်၍ ပိုမို နီးကပ်စွာ သွားရောက်ခဲ့မည် ဆိုပါက အလွန်တရာ အန္တရာယ် များသွားပေလိမ့်မည်။

မိမိတို့၏ တိုက်ခိုက်မှုများ လွဲချော်သွားသည်ကို မြင်လိုက်ရသောအခါ... ပုံရိပ်ယောင် ကို ဖန်တီးခဲ့သူသည် အစစ်အမှန် နှင့် ပုံရိပ်ယောင် တို့၏ အပြန်အလှန် အလုပ်လုပ်ပုံကို အလွန်တရာ ကျွမ်းကျင် ပိုင်နိုင်ရုံသာမက၊ အခင်းအကျင်း ပညာရပ်များ တွင်လည်း အထူး ကျွမ်းကျင်သူ တစ်ဦး ဖြစ်ကြောင်း သူတို့ ချက်ချင်း သဘောပေါက်သွားကြတော့သည်။

အရာအားလုံးကို တစ်ဖက်လူက ကြိုတင် စီစဉ်ထားခဲ့သည်ပဲ။

ကောင်းကင်ယံမှ ဖြာကျနေသော ခရမ်းရောင် ကောင်းကင်ကြယ် ၏ အလင်းတန်းများမှာ ၎င်း၏ ဒီဇိုင်း အစိတ်အပိုင်း တစ်ခုမျှသာ ဖြစ်သည်။

ရည်ရွယ်ချက်မှာ တောင်နှင့် ပင်လယ် ကမ္ဘာ့ဆန္ဒတော် အပြည့်အဝ ဆင်းသက်လာခြင်း မရှိသေးဟု သူတို့ကို ယုံကြည်သွားစေရန်ပင်။

... ထို့ကြောင့်သာ တောင်နှင့် ပင်လယ် ကမ္ဘာ့ဆန္ဒတော် ဆင်းသက်လာခြင်းကို တားဆီးရန်အတွက် သူတို့က သည်နေရာကို အသည်းအသန် သွားချင်နေခဲ့ကြသည်ကိုး။

သို့ရာတွင်၊ ထိုပုံရိပ်ယောင် ကို တိုက်ခိုက်လိုက်သော အခိုက်အတန့်မှာပင်... ကြိုတင် ရေးဆွဲထားသည့် ပရိုဂရမ် တစ်ခုကို အပြည့်အဝ အသက်သွင်းလိုက်သလို ဖြစ်သွားတော့၏။

ခရမ်းရောင် ကောင်းကင်ကြယ် ၏ အလင်းတန်းများ ပြတ်တောက်သွားခြင်းမှာ သူတို့က တစ်ဖက်လူ၏ ရိုးရာ ဓလေ့ကို နှောင့်ယှက်လိုက်သောကြောင့် မဟုတ်ဘဲ... တောင်နှင့် ပင်လယ် ကမ္ဘာ့ဆန္ဒတော် က အမှန်တကယ်ပင် ဆင်းသက်လာခဲ့သောကြောင့် ဖြစ်သည်။

သွေးစွန်း သတ်ဖြတ်သူ နှင့် အခြားသူများမှာ အလွန်တရာ မချင့်မရဲ ဖြစ်သွားကြရ၏။

သူတို့ကို အနည်းငယ် သက်သာရာ ရသွားစေသည့် တစ်ခုတည်းသော အရာမှာ... တောင်နှင့် ပင်လယ် ကမ္ဘာ့ဆန္ဒတော် သည် ယခုလေးတင်မှ ဆင်းသက်လာခြင်း ဖြစ်ပြီး အစစ်အမှန် စွမ်းအားများကို မပိုင်ဆိုင်သေးသည့် အချက်ပင် ဖြစ်သည်။

အကယ်၍ သူတို့ ဤနယ်မြေ အတွင်း၌ ဆက်လက် ရှိနေမည် ဆိုလျှင်တောင်မှ သူတို့ အနေဖြင့် ထွက်ပြေးရန် အချိန် ရနိုင်သေးသည်။

အချိန်တိုလေး အတွင်းမှာပင် ထိုအဖွဲ့သည် မိုင် ရာပေါင်းများစွာ အထိ နောက်ဆုတ်သွားခဲ့ကြတော့၏။

ဝူရွှီ မှာ အလွန်တရာ စိုးရိမ် ထိတ်လန့်လာပြီး ရုတ်တရက် အော်ဟစ်လိုက်တော့သည်။

“မင်းတို့ အနောက်ကို ကြည့်လိုက်ကြဦး”

ထိုစကားကို ကြားလိုက်ရသောအခါ ရှေ့ဘက်ရှိ အရာများကိုသာ အာရုံစိုက်နေခဲ့ကြသော လူတိုင်း၏ အာရုံစိုက်မှုများမှာ နောက်ဘက်သို့ ချက်ချင်း ပြောင်းလဲသွားတော့၏။

ကိုယ်တိုင် မမြင်ရသရွေ့တော့ ယုံမှာ မဟုတ်။

ယခုလို မြင်လိုက်ရသော အခါ၊... လူတိုင်း၏ နှလုံးသားတွေက ဆောင်းရာသီက အေးခဲနေဟော မြစ်ရေတွေလို အေးစက်သွားတော့သည်။

သူတို့ အားလုံး အလွန်တရာ အံ့အားသင့် မှင်သက်သွားကြသည်။... သူတို့၏ နောက်ဆုတ်နေသော ပုံရိပ်များမှာ ရုတ်တရက် ရပ်တန့်သွားကြကာ ဇဝေဇဝါ ဖြစ်နေကြသည်။ နောက်ထပ် ဘယ်ကို ဆက်သွားရမှန်း မသိတော့သည့်အလား ဖြစ်နေကြတော့၏။

အုပ်စု၏ အနောက်ဘက်၊ ဘယ်ဘက် နှင့် ညာဘက် မိုင်တစ်ထောင်ခန့် အကွာအဝေးတွင်... ခရမ်းရောင် ကောင်းကင်ကြယ် ၏ အလင်းတန်း နှစ်ခုက ကောင်းကင်ယံမှ ဆင်းသက်လာနေသည်။ မျက်စိတစ်မှိတ် အတွင်း မြေကြီးပေါ်သို့ ကျရောက်လာတော့သည်။

သူတို့ ယခင်က မြင်တွေ့ခဲ့ရသည်များနှင့် မတူဘဲ... ထို ခရမ်းရောင် ကောင်းကင်ကြယ် ၏ အလင်းတန်း နှစ်ခုမှာ ချက်ချင်းပင် ပြီးပြည့်စုံစွာ ဖွဲ့စည်းသွားကြသည်။

မျက်စိတစ်မှိတ် အတွင်းမှာပင်... စွမ်းအင်လှိုင်းကြီး တစ်ခုက သူတို့၏ နောက်ကွယ်ရှိ အရပ်မျက်နှာ နှစ်ခုစလုံးမှ တဟုန်ထိုး ထွက်ပေါ်လာပြီး၊ ၎င်းမှာ တောင်နှင့် ပင်လယ် ကမ္ဘာ ၏ ဆန္ဒတော် ကိုယ်ထင်ပြလာခြင်းပင် ဖြစ်သည်။

“ဘုရားရေ... ဘယ်လိုလုပ်ပြီး ဒီလို ဖြစ်သွားရတာလဲ”

လူတိုင်းက သဘောတူညီနေကြသော်ငြားလည်း သူတို့၏ ရင်တွင်း၌ စိုးရိမ် ထိတ်လန့်မှုများဖြင့် ပြည့်နှက်နေကြသည်။

ဤမျှ ကြီးမားသော ဆူပူအုံကြွမှု များကို ဖြစ်ပေါ်စေနိုင်သူမှာ... သူတို့ ရှင်းလင်းရန် ပစ်မှတ်ထားနေသော နင်ချီ မှလွဲ၍ အခြား မည်သူမျှ မဖြစ်နိုင်ကြောင်းကို သူတို့ အပြည့်အဝ ယုံကြည် သေချာနေကြ၏။

သို့သော် နင်ချီ ၏ စွမ်းဆောင်ရည်များမှာ သူတို့ စိတ်ကူးယဉ် ထားခဲ့သည်ထက် များစွာ ပိုမို အစွမ်းထက်နေပုံ ရပြီး၊ နင်ချီ သည် သူတို့၏ အစီအစဉ်များကို လုံးလုံးလျားလျား ဖျက်ဆီးပစ်လိုက်တော့၏။

သူတို့၏ မူလ အစီအစဉ်မှာ ပေါင်းစည်းခြင်း နယ်ပယ် ကျင့်ကြံသူ အယောက် (၂၀) စလုံးက နင်ချီ ဆီသို့ တိုက်ရိုက် ချဉ်းကပ်ရန် သို့မဟုတ် နင်ချီ ကို အပြင်ထွက်လာအောင် အတင်းအကျပ် ဖိအားပေးရန် ဖြစ်သည်။

အတိုချုပ် ပြောရမည် ဆိုလျှင်... လူ (၂၀) ပေါင်းပြီး နင်ချီ ကို ဝိုင်းရိုက်ဖို့ စီစဉ်ထားခဲ့သည်လေ။

သို့ရာတွင်၊ နင်ချီ က သူတို့ကို ဘာအခွင့်အရေးမှ လုံးဝ မပေးခဲ့။ သူတို့ မျက်နှာချင်းဆိုင်တောင် မတွေ့ရသေးခင်မှာပင်... တစ်ဖက်လူက စားပွဲကို မှောက်လှန်ပစ်ပြီး အခြေအနေတွေကို အခွင့်ကောင်း ယူသွားခဲ့ပြီပင်။

နင်ချီ သည် သူတို့နှင့် တိုက်ခိုက်ရန် ရည်ရွယ်ချက် လုံးဝ မရှိခဲ့ချေ။ ထိုအစား သူသည် တောင်နှင့် ပင်လယ် ကမ္ဘာ့ဆန္ဒတော် ကို ဆင့်ခေါ်ခြင်းဖြင့် သူတို့၏ ပတ်ဝန်းကျင် အခြေအနေများကို ပြောင်းလဲပစ်လိုက်၏။

သွေးစွန်း သတ်ဖြတ်သူ နှင့် အခြားသူများမှာ ရူးသွပ်သွားလုမတတ် ဖြစ်နေကြတော့သည်။

ဘာလို့ ဒီလို အခြေအနေမျိုး ဖြစ်သွားရတာလဲ။

ယခုအခါ နင်ချီ ၏ အစီအစဉ်များ အောင်မြင်သွားခဲ့ပြီ ဖြစ်ရာ... သူသည် သူတို့၏ ပတ်လည်ရှိ ဆုံမှတ် သုံးခုကို အပြည့်အဝ သိမ်းပိုက်နိုင်ခဲ့ပြီး၊ တောင်နှင့် ပင်လယ် ကမ္ဘာ့ဆန္ဒတော် ကို တစ်ပြိုင်နက်တည်းနီးပါး ဆင့်ခေါ်နိုင်ခဲ့တော့၏။

ဒါက ကိုယ့်ကိုယ်ကိုယ် စက်ဝိုင်း တစ်ခုထဲမှာ လှောင်ပိတ်ထားတာနဲ့ ဘာကွာတော့မှာလဲ။

ထို့အပြင် နင်ချီ သည် အလွန်တရာ ကောက်ကျစ် စဉ်းလဲပြီး အကြံပိုင်သူ ဖြစ်ရာ... သူတို့ကို အလယ်ဗဟို အနီးရှိ နေရာ သုံးခုတွင် ပိတ်လှောင်ထားနိုင်ခဲ့သည်။

ယခုအခါ သူတို့၏ အဓိက စိုးရိမ် ပူပန်ရမည့် ကိစ္စမှာ နင်ချီ ကို မည်သို့ ဖြေရှင်းရမည်နည်း ဆိုသည် မဟုတ်တော့ဘဲ၊ တောင်နှင့် ပင်လယ် ကမ္ဘာ့ဆန္ဒတော် ၏ ဝိုင်းရံ ပိတ်ဆို့မှုများမှ မည်သို့ လွတ်မြောက်အောင် ထွက်ပြေးရမည်နည်း ဆိုသည်သာ ဖြစ်ပေတော့၏။

အခန်း (၈၂၂) - ဖန်ထျန်း ကို အပြတ်ရှင်းခြင်း

~ဤအခိုက်အတန့်တွင် သွေးစွန်း သတ်ဖြတ်သူ နှင့် အခြားသူများ၏ စိတ်အခြေအနေမှာ... ရှန်ဖန် တောင်ကြား ထဲတွင် ပိတ်လှောင်ခံလိုက်ရသော စီမာယီ ၏ အခြေအနေနှင့် ဆင်တူနေပေလိမ့်မည်။

သူတို့သည် ရောက်ရှိလာသည်နှင့် တစ်ပြိုင်နက် ရန်သူကို ချက်ချင်း မျိုးတုံး သတ်ဖြတ်နိုင်လိမ့်မည်ဟု မျှော်လင့်ထားခဲ့ကြသော်ငြားလည်း၊ လက်တွေ့တွင်တော့ လုံးဝ ထိုသို့ မဖြစ်လာခဲ့ချေ။ ရန်သူကို မသတ်နိုင်ခဲ့သည့်အပြင်... သူတို့ ကိုယ်တိုင်ပင် ပိတ်လှောင်ခံလိုက်ရပြီး မီးတင်ရှို့ ခံရမည့် အခြေအနေသို့ ရောက်ရှိသွားခဲ့တော့၏။

သို့သော် သွေးစွန်း သတ်ဖြတ်သူ နှင့် သူ၏ အဖွဲ့မှာ စီမာယီ လောက်တော့ ကံမကောင်းခဲ့ကြချေ။

မီးတောက်များကို ငြိမ်းသတ်ပေးမည့် သည်းထန်သော မိုးဒဏ် ကို ဖန်တီးပေးနိုင်သော နတ်ဘုရား ၏ အကူအညီမျိုး သူတို့ ရရှိမည် မဟုတ်ပေ။ အကြောင်းမူကား စစ်မြေပြင်နယ်မြေ အတွင်းရှိ နတ်ဘုရား အာဏာပိုင်များမှာ ဝိညာဉ်ကမ္ဘာ နှစ်ခုလုံး၏ ဆန္ဒတော်တွေ ပင် ဖြစ်နေသောကြောင့်တည်း။

ယခုအခါ သူတို့၏ အနီးအနားရှိ ဆုံမှတ် သုံးခုမှာ နင်ချီ ၏ တစ်ပြိုင်နက်တည်းနီးပါး အသက်သွင်းခြင်းကို ခံလိုက်ရပြီ ဖြစ်ရာ၊ တောင်နှင့် ပင်လယ် ကမ္ဘာ့ဆန္ဒတော် မှာ အပြည့်အဝ ဆင်းသက်လာခဲ့တော့၏။

မျက်စိတစ်မှိတ် အတွင်းမှာပင် တောင်နှင့် ပင်လယ် ကမ္ဘာ ၏ ကြောက်မက်ဖွယ်ကောင်းသော စွမ်းအားကြီးမှာ ဆုံမှတ် ၏ အလယ်ဗဟိုမှနေ၍ အပြင်ဘက်သို့ လျင်မြန်စွာ ရိုက်ခတ်သွားတော့သည်။

ထို ဆုံမှတ် သုံးခု၏ အလယ်ဗဟို တည့်တည့်တွင် ရပ်နေကြသူများမှာ ကျယ်ပြန့်သော ကမ္ဘာ ၏ စစ်တပ်ကြီးပင် ဖြစ်သည်။

စစ်သူကြီးများ ဖြစ်ကြသော ဖေးပင်း နှင့် သူ၏ သူငယ်ချင်း နှစ်ဦးမှာ... သူတို့ မျက်စိရှေ့တွင် ဖြစ်ပေါ်နေသော ကြောက်မက်ဖွယ် ပြောင်းလဲမှုများကို မြင်တွေ့လိုက်ရသောအခါ သူငယ်အိမ်များ ကျုံ့ဝင်သွားကြတော့သည်။

ကိုယ့်ကိုယ်ကိုယ် ဒဏ်ရာရအောင် လုပ်ပြီး ဝင်လာကြသော သွေးစွန်း သတ်ဖြတ်သူ ကဲ့သို့သော ပေါင်းစည်းခြင်း နယ်ပယ် အယောက် (၂၀) နှင့် နှိုင်းယှဉ်ကြည့်မည် ဆိုပါက... သူတို့၏ ခွန်အားများမှာ သဘာဝကျကျပင် များစွာ ပိုမို အားနည်းလှသည်။

ထို့ကြောင့် မျက်စိတစ်မှိတ် အတွင်းမှာပင်... သူတို့ ထွက်မပြေးနိုင်ခင်မှာ... ကျန်ရှိနေသော နယ်မြေ နှစ်ခု ၏ စစ်တပ်ကြီးများ အားလုံးမှာ အိုးထဲသို့ ပစ်ချခံလိုက်ရသော ဖက်ထုပ်များအလား မြေကြီးပေါ်သို့ ပြုတ်ကျသွားကြတော့သည်။

ဆန့်ကျင်ဘက် အနေဖြင့် သူတို့ ဖမ်းဆီးထားသော ဖန်ထျန်း နှင့် မုကျူးထျန်း တို့ နှစ်ဦးမှာမူ ကောင်းကင်ယံတွင် လွင့်မျောနေဆဲ ဖြစ်ပြီး၊ သူတို့၏ အရှိန်အဝါ များမှာလည်း ချက်ချင်းပင် နဂါး တစ်ကောင်အလား သက်ဝင် လှုပ်ရှားလာကြတော့၏။

တောင်နှင့် ပင်လယ် ကမ္ဘာ့ဆန္ဒတော် ဆင်းသက်လာမှုကြောင့် ထိုနှစ်ဦး၏ ဖိနှိပ်ခံထားရသော စွမ်းအားများမှာ အပြည့်အဝ ပြန်လည် ကောင်းမွန်လာခဲ့တော့၏။

ဤမြင်ကွင်းကို မြင်တွေ့လိုက်ရသောအခါ... သူတို့၏ ခွန်အားများ ပြန်လည် ကောင်းမွန်လာခဲ့သော်ငြားလည်း၊ သူတို့၏ နှလုံးသားများမှာမူ ထိန်းမရအောင် တဒိတ်ဒိတ် ခုန်နေဆဲပင် ဖြစ်၏။

မည်သို့ပင်ဆိုစေ သူတို့ထဲမှ အတုံးအအ ဆုံးသူပင်လျှင်... လက်ရှိ စစ်မြေပြင်နယ်မြေ အတွင်း၌ နင်ချီ တစ်ယောက်တည်းသာ ဤကဲ့သို့ စွမ်းဆောင်နိုင်စွမ်း ရှိကြောင်းကို ကောင်းကောင်း နားလည် သဘောပေါက်ထားကြသည်။

သို့သော် သူတို့၏ ကိုယ်ပိုင် အသက်ရှင် ရှင်သန်ရေး အတွက်၊ ထိုနှစ်ဦးသည် နင်ချီ နှင့် တောင်နှင့် ပင်လယ် ကမ္ဘာ မှ ကျင့်ကြံသူ များကို သစ္စာဖောက်ရန် ရွေးချယ်ခဲ့ကြတော့၏။

“သူတို့ကို သတ်”

ထိုသူတို့ ဆက်လက် မတွေးတောနိုင်ခင်မှာပင်၊ အေးစက်ပြီး ထက်မြက်လှသော အော်ဟစ်သံ တစ်ခု သူတို့၏ နားထဲတွင် ပဲ့တင်ထပ်သွားပြီး... သူတို့သည် အန္တရာယ် ရှိသော အခြေအနေတွင် ရှိနေဆဲ ဖြစ်ကြောင်း ချက်ချင်း သတိပေးလိုက်သည်။

ထိုနှစ်ဦး၏ ခွန်အားများ ပြန်လည် ကောင်းမွန်လာခဲ့ပြီ ဖြစ်သော်ငြားလည်း၊ ကျယ်ပြန့်သော ကမ္ဘာ ၏ စစ်တပ်ကြီးမှာ သူတို့၏ ပတ်လည်တွင် ရှိနေဆဲပင်။

တောင်နှင့် ပင်လယ် ကမ္ဘာ့ဆန္ဒတော် ၏ ဖိနှိပ်မှုကြောင့် မြေကြီးပေါ်သို့ ပြုတ်ကျသွားခဲ့ရသော်ငြားလည်း... ဖေးပင်း နှင့် သူ၏ အဖော်များမှာ သွေးစွန်း သတ်ဖြတ်သူ ပေးထားခဲ့သော ညွှန်ကြားချက်များကို လုံးဝ မမေ့လျော့ခဲ့ကြချေ။

အကယ်၍ ထူးခြားသည့် အခြေအနေ တစ်ခုခု ဖြစ်လာလျှင်...ထိုနှစ်ယောက်ကို အရင်ဆုံး ရှင်းပစ်ရမည်။

ဖိနှိပ်ခံထားရသော ကျယ်ပြန့်သော ကမ္ဘာ ၏ စစ်တပ်ကြီးမှာ အမိန့်ကို ချက်ချင်း နာခံလိုက်ကြပြီး၊ သူတို့၏ မျက်လုံးများက ဖန်ထျန်း နှင့် သူ၏ အဖော်ဆီသို့ စူးစိုက် ကြည့်နေကြသည်။ သူတို့၏ မျက်နှာများပေါ်တွင် အံကြိတ်ထားသော အမူအရာများ ပေါ်လွင်နေသည်။

ယခု တောင်နှင့် ပင်လယ် ကမ္ဘာ့ဆန္ဒတော် ဆင်းသက်လာပြီ ဖြစ်ရာ... သူတို့သည် ကြီးမားသော အန္တရာယ်နှင့် ကြုံတွေ့ရဖွယ် ရှိသော်ငြားလည်း၊ အနည်းဆုံးတော့ သူတို့မှာ ခွန်အား ရှိနေသေးချိန်တွင် သူတို့ ရှေ့ရှိ ထိုနှစ်ဦးကို သေချာပေါက် သတ်ပစ်ရမည်သာ ဖြစ်၏။

သေရမည် ဆိုလျှင်တောင်မှ အဖော် တစ်ယောက်လောက်တော့ သေချာပေါက် ခေါ်သွားရမည်။

ထို့ကြောင့် လူတိုင်းက သူတို့၏ ဝိညာဉ် လက်နက်များကို ဖန်ထျန်း နှင့် အခြား နှစ်ဦးဆီသို့ ပစ်လွှတ်လိုက်ကြပြီး... တိုက်ခိုက်မှု များကိုပါ ထုတ်လွှတ်လိုက်ကြရာ၊ ထိုနေရာ တစ်ဝိုက်တွင် စွမ်းအင် ပေါက်ကွဲမှုကြီး တစ်ခု ဖြစ်ပေါ်သွားတော့သည်။

မီးရှူးမီးပန်းများ အလား အရောင်အသွေး စုံလင်လှသော တိုက်ခိုက်မှုများ ကောင်းကင် တစ်ခွင်လုံး ပြည့်နှက်သွားပြီး လေထဲရှိ လူနှစ်ယောက်ဆီသို့ တဟုန်ထိုး ပြေးဝင်သွားကြတော့၏။

ဖန်ထျန်း နှင့် သူ၏ အဖော်မှာ မျက်စိတစ်မှိတ် အတွင်း တည်နေရာ ရွှေ့ပြောင်းသွားကြသော်ငြားလည်း... သူတို့ မည်မျှပင် မြန်ဆန်စွာ တည်နေရာ ရွှေ့ပြောင်းနိုင်ပါစေ၊ ဤမျှ များပြားလှသော ကျင့်ကြံသူ များ၏ တိုက်ခိုက်မှုများကို မည်သို့.. ရှောင်တိမ်းနိုင်ပါမည်နည်း။

မျက်တောင်တစ်ခတ် အတွင်းမှာပင် သူတို့သည် အရောင်အသွေး စုံလင်လှသော အလင်းတန်းများ၏ ဝါးမြိုခြင်းကို ခံလိုက်ရတော့သည်။