အခန်း (၃၃၈)

အခန်း။ ၃၃၈

ရွှီရန်သည် အလွန်အမင်း အံ့အားသင့်သွားရသည်။

ကျူးယွီဟန်အနေဖြင့် ယခင်က ထိုသို့သော အရိပ်အယောင်မျိုး ခံစားခဲ့ရဖူးသည်ဟု ဆိုသော်လည်း တကယ့်လက်တွေ့ ဖြစ်လာသည့်အခါတွင်မူ ရွှီရန်အတွက် မျှော်လင့်မထားသော အခြေအနေမျိုး ဖြစ်နေသည်။

အချိန်ကျောက်မျက်အတွင်းရှိ နက်နဲသော စွမ်းအင်များကို စုပ်ယူရုံဖြင့် အရိုးတည်ဆောက်ပုံနှင့် မသက်ဆိုင်သည့် အစွမ်းသစ်တစ်ခုကို ရရှိနိုင်သည်ဆိုပါက ၎င်းမှာ ကောင်းကင်ဘုံက ချီးမြှင့်သည့် နတ်ဘုရားသတ် နည်းစနစ်တစ်ခုကို အပိုဆောင်း၍ ရရှိလိုက်သကဲ့သို့ပင်။

ရွှီရန်သည် ပြီးခဲ့သော ငါးနှစ်၊ ခြောက်နှစ်ခန့်က တစ်နေ့လျှင် ငါးနာရီ၊ ခြောက်နာရီခန့် စာကြည့်တိုက်အတွင်း၌ အချိန်ကုန်ဆုံးခဲ့ပြီး စာအုပ်စာပေများ၏ အသိပညာဗဟုသုတများကို စုပ်ယူခဲ့သူဖြစ်သည်။ သူသည် စာအုပ်ပေါင်းစုံကို ဖတ်ရှုခဲ့ပြီး သူ၏ မြင့်မားသော ထိုးထွင်းသိမြင်မှုနှင့်အတူ အသိပညာ ဗဟုသုတ နက်နဲမှုမှာ ကြောက်မက်ဖွယ်ကောင်းလှသည်။

သို့သော်လည်း ကျူးယွီဟန် ကြုံတွေ့ရသည့် အခြေအနေမျိုးကို သူ တစ်ခါမျှ မတွေ့ကြုံဖူးချေ။ လူသားတို့၏ သမိုင်းမှတ်တမ်းများတွင်လည်း ထိုသို့သော မှတ်တမ်းမျိုး မရှိခဲ့ပေ။ စာအုပ်များကြားတွင် အချိန်ကုန်ဆုံးခဲ့သော ရွှီရန်ပင်လျှင် ဤကဲ့သို့ ထူးဆန်းသော အခြေအနေမျိုးကို မတွေ့ဖူးခဲ့ပေ။

ဒါက ဘာသဘောတရားဖြစ်မလဲ။

အချိန်ကျောက်မျက်၏ နက်နဲသော စွမ်းအားကို စုပ်ယူခြင်းဖြင့် စွမ်းရည်အသစ်ကို ရရှိခြင်းလား။

ဒါက စွမ်းရည်ကျောက်တုံးမျိုးလား။

ထိုစဉ်မှာပင် ရွှီရန် စဉ်းစားခန်း ဝင်နေစဉ်အတွင်း ရွှီရန်၏ ဘေးနားရှိ ကျားမလေးမှာ ရွှေရောင်မျက်ဝန်းများ ဝင်းလက်လျက် ယခင်က ပင်ပန်းနွမ်းနယ်မှုများကို မေ့ပျောက်ကာ ရွှီရန်၏ လက်မောင်းကို စိတ်လှုပ်ရှားစွာ ဆွဲကိုင်လိုက်ပြီး "မမယွီဟန်... ဘာစွမ်းရည် ရတာလဲဆိုတာ မပြောရသေးဘူးလေ အစ်ကိုရန်... ဒါက အချိန်အရိုးတည်ဆောက်ပုံရဲ့ နောက်ထပ် ကောင်းကင်ဘုံ ပြစ်ဒဏ်ခတ်ခြင်းပုံစံမျိုးလား" ဟု မေးလိုက်သည်။

ကျားမလေးသည် လိုရင်းကိုသာ တိုက်ရိုက်ပြောလိုသူ ဖြစ်သည်။

သူမ နားမလည်သောအရာရှိလျှင် တိုက်ရိုက်ပင် မေးမြန်းတတ်သည်။

စဉ်းစားဆင်ခြင်ခြင်း၏ အရသာကို ခံစားတတ်သော ရွှီရန်နှင့် မတူညီချေ။

ကျန်ရှိသော အဖွဲ့သားများမှာလည်း ကျားမလေးကဲ့သို့ပင် တိုက်ရိုက် မေးမြန်းကြတော့သည်။

ထန်ချီချီကလည်း အနားသို့ တိုးကပ်လာပြီး "ဟုတ်တယ်... အချိန်ကျောက်မျက်ကနေ ဘယ်လိုစွမ်းရည်မျိုး ရခဲ့တာလဲ" ဟု ပြောလိုက်သည်။

နင်ရွှမ်ကလည်း အသာအယာ ခေါင်းညိတ်လျက် "ဟုတ်တယ်... ဘယ်လိုစွမ်းရည်မျိုးလဲ အသင်းခေါင်းဆောင် တီထွင်ထားတဲ့ နတ်ဘုရားအဆင့်စွမ်းရည်ကို ယှဉ်နိုင်မှာလား" ဟု မေးမြန်းသည်။

အားလုံးမှာ သိချင်စိတ်များ ပြင်းပြနေကြပြီး အံ့အားသင့်နေသော ကျူးယွီဟန်ကို ကြည့်ကာ ရှင်းလင်းချက်ကို စောင့်ဆိုင်းနေကြသည်။

လူတိုင်း၏ သိချင်စိတ် ပြင်းပြနေသော အကြည့်များအောက်တွင် ကျူးယွီဟန်က အားနည်းသောအသံဖြင့် "ငါ အချိန်ကျောက်မျက်က စွမ်းင်အားလုံးကို စုပ်ယူပြီးတဲ့နောက် လုံးဝခြားနားတဲ့ စွမ်းရည်တစ်ခု ရခဲ့တယ်။ အဲဒါကတော့ အရာဝတ္တုတစ်ခု ဒါမှမဟုတ် သက်ရှိတစ်ခုရဲ့ အချိန်ကို ခေတ္တခဏ အရှိန်မြှင့်လိုက်တာ ဒါမှမဟုတ် နောက်ပြန်ဆုတ်လိုက်တာပဲ" ဟု ရှင်းပြလိုက်သည်။

ကျူးယွီဟန်၏ အပြာရောင်မျက်ဝန်းများတွင် ဝမ်းသာရိပ်များ ယှက်သန်းနေသည်။ သုံးတန်ခန့် အလေးချိန်ရှိသော အချိန်ကျောက်မျက်မှာ သူမအား အိပ်မပျော်သော ညပေါင်းများစွာကို ပေးခဲ့ဖူးသည်။

အဘယ်ကြောင့်ဆိုသော် သူမ ရရှိလိုက်သော စွမ်းရည်မှာ အလွန်ပင် ရင်ခုန်စိတ်လှုပ်ရှားဖွယ် ကောင်းသောကြောင့်ပင်။

ကျားမလေးမှာ စဉ်းစားခန်း ဝင်သွားသည်။

"..."

အခြားသူများမှာလည်း တစ်ယောက်ကိုတစ်ယောက် ကြည့်လိုက်ကြပြီး အပြည့်အဝ နားမလည်နိုင်သေးပုံပင်။

အရာဝတ္တုတွေ ဒါမှမဟုတ် သက်ရှိတွေရဲ့ အချိန်ကို ခဏလေး အရှိန်မြှင့်လိုက်တာနဲ့ နောက်ပြန်ဆုတ်လိုက်တာက... တကယ်တော့ ဘာကို ဆိုလိုချင်တာလဲ။

ကျားမလေးက သူမ၏ ဦးခေါင်းလေးကို အလေးအနက် ခါယမ်းလိုက်ပြီး "ကျွန်မ သိပ်နားမလည်ဘူး။ အဲဒါကို လက်တွေ့မှာ ဘယ်လိုသုံးလို့ရလဲဆိုတာ ရှင်းပြပေးလို့ ရမလား" ဟု မေးလိုက်သည်။

ထိုသို့ပြောရင်း သူမသည် သူမ၏ နွေဦးဝိညာဉ်နို့ဗူးကို မော့လိုက်ပြီး ကျေနပ်အားရသော မျက်နှာလေးဖြင့် နို့တစ်ငုံ သောက်လိုက်သည်။

အခြားသူများက ကျူးယွီဟန်ကို ကြည့်လိုက်ကြသည်။

“...”

ကျူးယွီဟန်က ခပ်ဖွဖွလေး ချောင်းဟန့်လိုက်ရင်း “ငါ ရှင်းပြတာ မရှင်းလင်းလို့လား။ ကောင်းပြီလေ... နင်တို့ ပိုနားလည်သွားအောင် ငါ့စကားလုံးတွေကို ပြန်စီစဉ်ကြည့်မယ်”

သူမ ဆယ်စက္ကန့်ခန့် ငြိမ်သက်သွားပြီးနောက် စတင်ရှင်းပြတော့သည်။

“ဥပမာပြောရရင်... ရှောင်ရန်က ငါ့ကို အချိန်ကျောက်မျက် ပြတုန်းက ငါတို့ ရွှီရန်ရဲ့အိမ် အပေါ်ထပ်မှာ သလင်းကျောက်သားရဲဥကို ကြည့်နေကြတာလေ။ အဲဒီအချိန်တုန်းက ငါ့မှာ ခံစားချက်တစ်ခု ရှိခဲ့တယ်။ အကယ်၍ ငါသာ အချိန်ကျောက်မျက်ရဲ့ စွမ်းအင်ကို စုပ်ယူနိုင်ရင် ဒီသားရဲဥ ပေါက်ဖွားမှုကို အရှိန်မြှင့်ပေးနိုင်မယ်ဆိုတာပဲ”

“အခုတော့ တကယ်ဖြစ်လာပြီ။ ငါ့ရဲ့ အချိန်ကိုင်တွယ်ခြင်းစွမ်းရည်နဲ့ အဲဒီသားရဲဥအပေါ် အချိန်အရှိန်မြှင့်ခြင်းအကျိုးသက်ရောက်မှုကို သုံးပြီး မြန်မြန်ပေါက်လာအောင် လုပ်လို့ရသလို အချိန်နောက်ပြန်ဆုတ်ခြင်းကို သုံးပြီး လွန်ခဲ့တဲ့ နှစ်နှစ်က အခြေအနေကိုလည်း ပြန်ရောက်သွားအောင် လုပ်လို့ရတယ်”

အားလုံးက အနည်းငယ် အံ့အားသင့်သွားကြသည်။ ကျူးယွီဟန်က သူမ၏ ရှင်းပြချက်ကို နောက်တစ်ဆင့် ထပ်တိုးလိုက်သေးသည်။

“ဒါက သားရဲဥတွေတင်မကဘူး။ အရာဝတ္တုတွေ၊ ဓားတွေနဲ့ လက်နက်တွေမှာလည်း သုံးလို့ရတယ်။ ငါက အဲဒီအရာတွေရဲ့ အချိန်ကို ရှေ့တိုးတာ ဒါမှမဟုတ် နောက်ဆုတ်တာမျိုး လုပ်နိုင်တယ်။ ဒါ့အပြင် လူသားတွေမှာတောင် သုံးလို့ရသေးတယ်။ ဒါပေမဲ့ လူတစ်ယောက်က ပိုသန်မာလေလေ အချိန်ကို ရွှေ့ပြောင်းဖို့ ပိုခက်ခဲလေလေပဲ။ ပြီးတော့ အဲဒီလူရဲ့ သက်တမ်းရော၊ ငါ့ရဲ့ သက်တမ်းကိုပါ ပေးဆပ်ရလိမ့်မယ်။ သားရဲဥကို ဥပမာပေးရရင်... ငါက သူ့ရဲ့ပေါက်ဖွားမှုကို အရှိန်မြှင့်ချင်တယ်ဆိုရင် သူ့ရဲ့သက်တမ်းရော၊ ငါ့ရဲ့သက်တမ်းပါ ကုန်ဆုံးသွားမှာမျိုးပေါ့”

ဒီရှင်းပြချက်ကို ကြားလိုက်ရသည့်အခါတွင်မူ ကျားမလေး၊ ထန်ချီချီ၊ နင်ရွှမ်နှင့် ကွမ်းရှင်းတို့သည် အလိုလိုနေရင်း လေးစားမိသည့် စိတ်များ ဖြစ်ပေါ်လာပြီး အလေးအနက် အနေအထားဖြင့် နောက်သို့ မှီလိုက်ကြသည်။

အချိန်ကို ကိုင်တွယ်နိုင်တာလား။

ကျားမလေး၏ ရွှေရောင်မျက်ဝန်းများ တောက်ပလာသည်။

“နားလည်ပြီ အချိန်အရှိန်မြှင့်တာနဲ့ အချိန်နောက်ပြန်ဆုတ်တာပေါ့။ ဒါပေမဲ့ ဒါက တိုက်ပွဲတွေမှာ သုံးလို့မရဘူး ထင်တယ်နော်”

ဘာပဲဖြစ်ဖြစ် သူမ၏ ပထမဆုံးအတွေးမှာ တိုက်ခိုက်ရေးသာ ဖြစ်သည်။ ထန်ချီချီက နှုတ်ခမ်းလေး ဆူလိုက်ရင်း “တိုက်ပွဲအတွက်ပဲ ဖြစ်စရာမလိုပါဘူး။ တခြားနည်းလမ်းတွေနဲ့ သုံးလို့ရတာပဲ။ ငါ့အထင်တော့ ဒါကို သေချာဖော်ထုတ်မယ်ဆိုရင် တကယ့်ကို နတ်ဘုရားအဆင့်စွမ်းရည်ပဲ” ဟု ပြောလိုက်သည်။

နင်ရွှမ်နှင့် ကွမ်းရှင်းကလည်း လက်မြှောက်၍ “ငါတို့လည်း ထောက်ခံတယ်” ဟု ပြောကြသည်။

ကျူးယွီဟန်က အားနည်းစွာ ခေါင်းညိတ်ပြသည်။

“လောလောဆယ်တော့ သားရဲဥ ပေါက်ဖွားမှုကို ကူညီပေးဖို့လောက်ပဲ ငါစဉ်းစားမိသေးတယ်။ ဒါ့အပြင် တခြားအသုံးဝင်ပုံတစ်ခု ရှိသေးတယ်။ အဲဒါကတော့ ကျင့်ကြံမှုကို အထောက်အကူပြုဖို့ပဲ”

“ဥပမာ... ရွှီရန်က သူ့ရဲ့ကျင့်ကြံမှုကို အရှိန်မြှင့်ချင်တယ်ဆိုရင် ငါက အချိန်ကို ထိန်းချုပ်နိုင်တဲ့ မှော်အင်းကွက်တစ်ခု ဖန်တီးပေးလို့ရတယ်။ ငါတို့နှစ်ယောက်လုံးရဲ့ သက်တမ်းကို အသုံးပြုပြီး အချိန်စီးဆင်းမှုကို မြန်အောင်လုပ်ပေးမှာပေါ့။ အချိန်တစ်လလောက် အရှိန်မြှင့်လိုက်ရင် သူက တစ်လစာ ကျင့်ကြံမှုအဆင့်ကို ရမှာဖြစ်သလို။ တစ်နှစ်လောက် အရှိန်မြှင့်လိုက်ရင် တစ်နှစ်စာ ကျင့်ကြံမှုအဆင့်ကို ရရှိမှာပါ”

အချိန်စွမ်းရည်ကို အသုံးပြု၍ အချိန်ကို မြန်ဆန်စေခြင်းအားဖြင့် ထိုကာလအတွင်း ကျင့်ကြံမှုကို မြှင့်တင်ပေးနိုင်ခြင်းပင်။ တစ်နှစ်ခန့် မြန်လိုက်ရုံဖြင့် သူ၏စွမ်းအားမှာ တစ်နှစ်စာ အရှိန်အဟုန်ဖြင့် တိုးတက်လာမည်ပင်။

ကျူးယွီဟန်၏ စကားများကြောင့် လူတိုင်းသည် နေရာ၌ပင် အေးခဲသွားကြသည်။ ရွှီရန်တောင်မှ သူ၏ မျက်တောင်များ လှုပ်ခတ်သွားရသည်။

ဘာလဲဟ…

တစ်နှစ် အရှိန်မြှင့်လိုက်တာနဲ့ တစ်နှစ်စာ ကျင့်ကြံမှု အောင်မြင်မှုကို ရမယ်ဆိုရင် ဒါက ထူးဆန်းသစ်သားနှလုံးသားအခု ၁၀၀ ရှိတာနဲ့ မတူဘူးလား။

တစ်နှစ် အရှိန်မြှင့်ရင် သွေးစွမ်းအင်တန်ဖိုး ၁ သန်း…

ဆယ်နှစ် အရှိန်မြှင့်ရင် သွေးစွမ်းအင်တန်ဖိုး ၁၀ သန်း….

ချက်ချင်းကို အနှိုင်းမဲ့ အစွမ်းထက်သူ ဖြစ်သွားမှာပဲ။

အကယ်၍ ဆယ်နှစ်စာလောက် အချိန်အရှိန်မြှင့်တာကို ခံယူလိုက်ရမယ်ဆိုရင် ငါ့ကို ဘယ်သူကများ ယှဉ်နိုင်တော့မှာလဲ။

ဒါက တကယ့်ကို ကြောက်စရာကောင်းလောက်အောင် အစွမ်းထက်တာပဲ မဟုတ်ဘူးလား။

အရင်တုန်းက မတော်တဆလိုလိုနဲ့ ယူလာခဲ့တဲ့ အချိန်ကျောက်မျက်မှာ ဒီလောက်အထိ ထူးကဲတဲ့ အာနိသင် ရှိလိမ့်မယ်လို့ ဘယ်သူက ထင်ထားမိမှာလဲ။