အခန်း (၃၃၉)

အခန်း။ ၃၃၉

နောင်ကျရင် ကပ်ဘေးအဆင့် ညစ်ညမ်းနယ်မြေတွေမှာ လေ့ကျင့်တဲ့အခါ လက်လှမ်းမီသမျှ အရာအားလုံးကို သိမ်းကျုံးယူရမယ်ဆိုတာ သေချာသွားပြီ။

ရွှီရန်၏ နှုတ်ခမ်းအစုံမှာ အသာအယာ ကွေးညွတ်သွားပြီး ပြုံးလိုက်မိသည်။ သို့သော် ကျူးယွီဟန်၏ လေသံမှာ ရုတ်တရက် ပြောင်းလဲသွား၏။

"ဒါပေမဲ့ ရှောင်ရန်နဲ့ ငါ့ကြားက ခွန်အားကွာဟချက်က အရမ်းကြီးမားလွန်းတယ်။ ရှောင်ရန်ရဲ့ ကျင့်ကြံမှုကို တစ်နှစ်စာ အရှိန်မြှင့်ပေးဖို့ဆိုရင် သူက အနည်းဆုံး သက်တမ်း အနှစ် ၁၀၀ ပေးဆပ်ရမှာဖြစ်သလို ငါ့ဘက်ကလည်း သက်တမ်း အနှစ် ၂၀၀ လောက် ကုန်ဆုံးသွားလိမ့်မယ်။ ဒီလောက်ထိ ပေးဆပ်ရတာမျိုးက လုံးဝကို အဓိပ္ပာယ်မရှိသလို လက်ခံနိုင်စရာလည်း မရှိဘူး"

ကျူးယွီဟန်က ခေါင်းယမ်းလိုက်သည်။ အားလုံး ငြိမ်သက်သွားကြ၏။

ပေးဆပ်ရတဲ့ တန်ဖိုးက ဒီလောက်တောင် ကြီးမားတာလား။

ဒါဆိုရင် ဒီစွမ်းရည်က အသုံးမဝင်သလို ဖြစ်မနေဘူးလား။

ကျူးယွီဟန်ကို စိတ်မပျက်အောင် ဝိုင်းပြီး နှစ်သိမ့်ပေးသင့်သလားဟု မိန်းကလေးများက စဉ်းစားနေကြသည်။

သို့သော် ကျူးယွီဟန်က စိတ်ဓာတ်ကျမနေဘဲ "ဒါက အချိန်ကိုင်တွယ်တဲ့ စွမ်းရည်ရဲ့ အစောပိုင်းအဆင့်မို့လို့ပါ။ ငါသာ နောက်ထပ် အချိန်ကျောက်မျက်တွေ ထပ်ပြီး စုပ်ယူနိုင်မယ် ဒါမှမဟုတ် ငါ့ရဲ့ ကျင့်ကြံမှုက အဆတစ်ဆယ်လောက် မြင့်တက်လာမယ်ဆိုရင်တော့ ပေးဆပ်ရတဲ့ သက်တမ်းက ဒီထက်အများကြီး လျော့နည်းသွားလိမ့်မယ်" ဟု ပြုံးလျက် ခိုင်မာစွာ ပြောလိုက်သည်။

ရွှီရန်က "ဒါဆို အခုလက်ရှိ အခြေအနေမှာ သလင်းကျောက်သားရဲဥကို အကောင်ပေါက်အောင် လုပ်ဖို့ဆိုရင်ကော ဘယ်လောက် ပေးဆပ်ရမလဲ" ဟု မေးမြန်းလိုက်သည်။

ကျူးယွီဟန်က သူမ ကြိုတင်တွက်ချက်ထားသည့်အတိုင်း မဆိုင်းမတွပင် ပြန်ဖြေသည်။

"အခုလောလောဆယ် သားရဲဥကို ပေါက်စေဖို့ဆိုရင် သားရဲရဲ့ သက်တမ်း ၂၀ နှစ်နဲ့ ငါ့ရဲ့ သက်တမ်း ၁၀ နှစ်လောက် ပေးဆပ်ရပါလိမ့်မယ်"

ရွှီရန်က ချက်ချင်းပင် လက်ခါယမ်းလိုက်ပြီး "တန်ဖိုးက အရမ်းကြီးလွန်းတယ်။ အဲဒီသားရဲဥအတွက်နဲ့ မင်းရဲ့ သက်တမ်းကို အကုန်မခံပါနဲ့ဦး လုံးဝ မထိုက်တန်ဘူး"

မထိုက်တန်ရုံတင်မကဘဲ အကြီးအကျယ် ရှုံးနိမ့်ခြင်းပင်။

"အင်း... သက်တမ်းကို ပေးဆပ်ရတာက တကယ့်ကို ပြင်းထန်လွန်းတယ်..."

တစ်ဖက်လူရော သူမကိုယ်တိုင်ရော မခံနိုင်သည့် ပမာဏဖြစ်နေသည်။

တစ်နှစ်စာအတွက် အနှစ် ၂၀၀ ကျော်လောက် ပေးဆပ်ရမယ်ဆိုရင် ဘယ်သူက သုံးရဲမှာလဲ။

ကျူးယွီဟန်၏ မျက်နှာတွင် ဝမ်းနည်းရိပ်များ ယှက်သန်းသွားသည်။

၎င်းကို မြင်သောအခါ ရွှီရန်က သူမ၏ ပခုံးကို အသာအယာ ပုတ်လိုက်ပြီး "ရပါတယ်။ ငါ အချိန်ကျောက်မျက်တွေ ထပ်ရှာပေးမယ်။ ပေးဆပ်ရတဲ့ တန်ဖိုးကို အနည်းဆုံးဖြစ်အောင် ငါတို့ သေချာပေါက် လုပ်နိုင်မှာပါ။ တန်ဖိုးနည်းသွားပြီဆိုတာနဲ့ ဒါက တကယ့်ကို နတ်ဘုရားအဆင့် စွမ်းရည်ကြီး ဖြစ်လာမှာပါ" ဟု နှစ်သိမ့်လိုက်သည်။

ကျူးယွီဟန်က အလေးအနက် ခေါင်းညိတ်ပြီး "ငါလည်း တခြား အသုံးဝင်မယ့် နည်းလမ်းတွေကို ထပ်ပြီး စဉ်းစားကြည့်ပါဦးမယ်။ သားရဲဥ ပေါက်ဖို့နဲ့ အချိန်အရှိန်မြှင့်ဖို့တင် မဟုတ်ဘဲ တခြား ဘာတွေ လုပ်လို့ရဦးမလဲဆိုတာပေါ့" ဟု ပြောလိုက်သည်။

ထိုစကားကို ကြားသောအခါ ကျားမလေးက စိတ်အားထက်သန်စွာဖြင့် "ကျွန်မလည်း ဝိုင်းစဉ်းစားပေးမယ် လူညံ့သုံးယောက်ပေါင်းရင် ကျူးကော့လျန်ထက် တော်တယ်ဆိုတာမျိုးပေါ့" ဟု ပြောကာ သူမ၏ နွေဦးဝိညာဉ်နို့ကိုပင် မသောက်နိုင်တော့ဘဲ မျက်မှောင်ကြုတ်လျက် အလေးအနက် စဉ်းစားဟန် ပြုနေတော့သည်။

"ငါတို့လည်း ဝိုင်းစဉ်းစားပေးမယ်"

ကွမ်းရှင်း၊ ထန်ချီချီနှင့် နင်ရွှမ်တို့လည်း ပူးပေါင်းလိုက်ကြသည်။ တစ်ဖွဲ့လုံးမှာ ကမ္ဘာကျော် ပြဿနာကြီးတစ်ခုကို ဖြေရှင်းနေရသည့်အလား အလေးအနက် ဖြစ်နေကြ၏။

ရွှီရန်က တစ်ချက်ရယ်မောလိုက်ပြီး "ငါ့မှာ မေးစရာတစ်ခုရှိတယ်။ အကယ်၍ လူတစ်ယောက် သေသွားခဲ့ရင် အချိန်ကို နောက်ပြန်ဆုတ်ပြီး ပြန်ရှင်အောင် လုပ်လို့ရမလား"

ကျူးယွီဟန်က ခေတ္တစဉ်းစားပြီး "သီအိုရီအရတော့ ဖြစ်နိုင်ပါတယ်။ ဒါပေမဲ့ ငါ့ရဲ့ ခွန်အားနဲ့ သက်တမ်းက အဲဒါကို လုပ်ဖို့ ခွင့်မပြုဘူး" ဟု ဖြေသည်။

၎င်းမှာ ကောင်းကင်ဘုံကို ဆန့်ကျင်ပြီး ကံကြမ္မာကို ပြောင်းလဲခြင်း ဖြစ်ရာ အလွယ်တကူ လုပ်နိုင်မည့်အရာ မဟုတ်သည်မှာ သေချာသည်။ ရွှီရန်က ပြုံးလျက် ခေါင်းခါပြကာ "ငါက သဘောပြောတာပါ။ တကယ်သာ ပြန်ရှင်အောင် လုပ်လို့ရရင် အဲဒါက ကောင်းကင်ဘုံကို စိန်ခေါ်လွန်းရာ ရောက်မှာပေါ့"

"ဒါပေမဲ့... အသင်းသားတစ်ယောက် ပြင်းပြင်းထန်ထန် ဒဏ်ရာရတဲ့အခါ အချိန်နောက်ပြန်ဆုတ်ဖို့ဆိုရင် ပေးဆပ်ရတာ အများကြီး နည်းသွားမှာ မဟုတ်လား"

ကျူးယွီဟန်က ခေါင်းညိတ်လျက် "အများကြီး နည်းသွားမှာပါ။ သေသွားတဲ့သူကို ပြန်ရှင်အောင် လုပ်ဖို့ကတော့ ငါ့သက်တမ်းတစ်ခုလုံး ပေးဆပ်ရင်တောင် ငှက်ကလေးတစ်ကောင်ကိုပဲ ပြန်ရှင်စေနိုင်မှာပါ။ ဒါပေမဲ့ တစ်ဖက်လူက မသေသေးဘူးဆိုရင်တော့ တန်ဖိုးက အများကြီး သက်သာသွားလိမ့်မယ်" ဟု ရှင်းပြသည်။

အားလုံး စဉ်းစားခန်း ဝင်သွားကြသည်။ သေသောသူကို ပြန်ရှင်စေခြင်းမှာ ကောင်းကင်ဘုံကို ဆန့်ကျင်ရာ ရောက်သည်။

ကွမ်းရှင်းက "ဒဏ်ရာတွေကို ကုသနိုင်တာတင်ပဲ တကယ့်ကို အဆုံးအဖြတ်ပေးနိုင်တဲ့ စွမ်းရည်ပဲ ငါမကုနိုင်တဲ့ ဒဏ်ရာတွေကို မမကျူးက ကူညီပေးလို့ ရတာပေါ့" ဟု ပြောလိုက်သည်။

ရွှီရန်က ခေါင်းခါယမ်းလိုက်ပြီး "မင်းတွေးတာက နည်းနည်းလေး ကျဉ်းမြောင်းနေသေးတယ်။ ဒဏ်ရာကုသဖို့တင် မဟုတ်ဘူး... အရေးကြီးဆုံးက အချိန်နောက်ပြန်ဆုတ်ခြင်းက အသင်းသားတွေကို သူတို့ရဲ့ အကောင်းဆုံး အခြေအနေဆီကို ပြန်ပို့ပေးနိုင်တာပဲ"

"ဥပမာပြောရရင်... ငါက အားကောင်းတဲ့ ပြိုင်ဘက်တစ်ယောက်နဲ့ တိုက်နေတယ်ဆိုပါစို့။ ငါတို့နှစ်ယောက်လုံးက အသာမရဘဲ အားအင်တွေ ကုန်ခမ်းပြီး သွေးစွမ်းအင်တွေလည်း နည်းသွားပြီဆိုရင်"

"အဲဒီအချိန်မှာ ရှောင်ယွီဟန်က အချိန်နောက်ပြန်ဆုတ်ခြင်းကို အသုံးပြုပြီး နာရီလက်တံကို တစ်နာရီလောက် နောက်ပြန်လှည့်ပေးလိုက်မယ်ဆိုရင် ငါက အားအင်အပြည့်နဲ့ ပြန်ဖြစ်သွားပြီး အားနည်းနေတဲ့ ရန်သူကို တစ်ကျော့ပြန် တိုက်ခိုက်လို့ ရပြီပေါ့"

"အင်အားအပြည့်နဲ့ အားနည်းနေသူကို ယှဉ်တာဆိုတော့ ရလဒ်ကတော့ အထူးပြောနေစရာ မလိုတော့ဘူးပေါ့"

ရွှီရန်၏ ခွဲခြမ်းစိတ်ဖြာမှုကို ကြားပြီးနောက်တွင် အားလုံးမှာ လေးစားကာ အားကျစိတ်များဖြင့် ပြည့်နှက်သွားကြသည်။

"ဟုတ်သားပဲ အကောင်းဆုံးအခြေအနေဆီ ပြန်ရောက်သွားစေတဲ့ ဒီစွမ်းရည်က တကယ့်ကို အံ့ဩစရာပဲ ပြီးတော့ တစ်နာရီ၊ နှစ်နာရီလောက်ပဲ နောက်ပြန်ဆုတ်ဖို့ လိုတာဆိုတော့ ပေးဆပ်ရတာကိုလည်း အနည်းဆုံးဖြစ်အောင် လျှော့ချနိုင်တာပေါ့"

ထန်ချီချီက လက်ခုပ်တီး၍ ချီးကျူးလိုက်သည်။

"တကယ့်ကို ယုတ္တိရှိတဲ့ ခွဲခြမ်းစိတ်ဖြာမှုပဲ ဒီနည်းအတိုင်းသာ သုံးမယ်ဆိုရင် ယွီဟန်ရဲ့ စွမ်းရည်က အသင်းသားတစ်ယောက်ကို ချက်ချင်း အကောင်းဆုံးအခြေအနေ ပြန်ရောက်သွားစေနိုင်တယ်။ ဒါက တကယ့်ကို ကြောက်စရာကောင်းတဲ့ စွမ်းအားပဲ စစ်မြေပြင်ရဲ့ အလှည့်အပြောင်းကို ချက်ချင်း ပြောင်းလဲပစ်နိုင်တယ်"

"ဒါဆို ပြီးပြည့်စုံတဲ့ အားပြန်ဖြည့် စွမ်းရည်တစ်ခုပေါ့ ဟုတ်လား"

"ဟုတ်တာပေါ့"

ရွှီရန်၏ စကားများကို ကြားပြီးနောက် ကျားမလေး၏ ရွှေရောင်မျက်ဝန်းများတွင် ကြည်ညိုလေးစားမှုများ တောက်ပလာသည်။

"အစ်ကို ဗျူဟာခင်းတဲ့နေရာမှာတော့ အစ်ကိုကို အတော်ဆုံးအဖြစ် ကျွန်မ တကယ် အလေးပြုပါတယ်"

ထန်ချီချီက နားလည်မှုရှိရှိ ပြုံးလိုက်ရင်း "ဒါကြောင့်လည်း နင်က ငါတို့အဖွဲ့ရဲ့ ဦးနှောက်၊ အသင်းခေါင်းဆောင် ဖြစ်နေတာပေါ့" ဟု ပြောလိုက်သည်။

နင်ရွှမ်ကလည်း ထပ်ဆင့်ပြောကြားသည် "ဒါက ထိုးထွင်းသိမြင်မှု အရိုးတည်ဆောက်ပုံရဲ့ စွမ်းရည်လား။ စွမ်းရည်အသစ်တွေကို ဖော်ထုတ်တဲ့နေရာမှာ အနှိုင်းမဲ့နေတာပဲ။ အစတုန်းကတော့ တန်ဖိုးကြီးပြီး သာမန်စွမ်းရည်တစ်ခုလို ထင်ရပေမဲ့ အခုတော့ တစ်ဆင့်ချင်းစီ နတ်ဘုရားအဆင့်စွမ်းရည်ဖြစ်လာနေပြီ"

မိန်းကလေးများ၏ ချီးကျူးစကားများကြားတွင် ရွှီရန်မှာ စိတ်မလေဘဲ တည်ငြိမ်စွာပင် "ထပ်ပြီး စဉ်းစားကြည့်ရအောင်... နောက်ထပ် ဖော်ထုတ်စရာတွေ ကျန်သေးတယ်လို့ ငါ ခံစားနေရတယ်..."

အားလုံးက လေးစားစွာဖြင့် ငေးကြည့်နေမိကြသည်။

တကယ်ပဲ နောက်ထပ် ရှိဦးမှာလား။

လူတွေရဲ့ တွေးခေါ်ပုံချင်းက ဒီလောက်တောင် ကွာခြားတာလား။

သူတို့အားလုံး ရွှီရန်ကို အာရုံစိုက်ကြည့်နေကြသည်။

ရွှီရန်က ခေတ္တမျှ စဉ်းစားပြီးနောက် "ငါ့အထင်တော့ မင်းအနေနဲ့ ဒီစွမ်းရည်ကို ပိုပြီး သိမ်မွေ့နက်နဲစွာ ထိန်းချုပ်နိုင်ဖို့ ကြိုးစားသင့်တယ်" ဟု ပြောလိုက်သည်။

ကျားမလေးက ဇဝေဇဝါဖြင့် "ဘာကို ဆိုလိုတာလဲဟင်"

ကျူးယွီဟန်၊ ထန်ချီချီ၊ နင်ရွှမ်နှင့် ကွမ်းရှင်းတို့လည်း နားမလည်နိုင် ဖြစ်နေကြသည်။

ဒီလောက်အထိ သိမ်မွေ့နက်နဲနေတာကို... ဘယ်လိုနည်းနဲ့ ထိန်းချုပ်ရမလဲ။

ရွှီရန်က စိတ်ရှည်လက်ရှည် ရှင်းပြသည်။

"ငါ ဥပမာတစ်ခု ပေးမယ်။ ရှောင်ယွီဟန်ရဲ့ စွမ်းရည်က အရာဝတ္တုတစ်ခုလုံးကို သက်ရောက်ဖို့ မလိုပါဘူး။ အဲဒီစွမ်းရည်ကို သိမ်မွေ့စွာ ထိန်းချုပ်ပြီး အချိန်အပ်တစ်ခုအဖြစ် ပုံဖော်လို့ ရနိုင်မလား"

"ဒီအပ်က ရန်သူ့ရဲ့ ကိုယ်တွင်းအင်္ဂါတွေထဲကို ထိုးဖောက်ဝင်ရောက်သွားမယ်။ ပြီးရင် အဲဒီအင်္ဂါတွေရဲ့ အချိန်ကိုပဲ အရှိန်မြှင့်ပစ်လိုက်မယ်။ ဒါဆိုရင် ရန်သူ့ရဲ့ အင်္ဂါတွေက ရုတ်တရက် အိုမင်းပျက်စီးသွားပြီး အလုပ်မလုပ်နိုင်တော့ဘူး။ ဒါက ရန်သူ့ကို ပစ်မှတ်ထားပြီး အတွင်းပိုင်းကနေ ဖောက်ခွဲဖျက်ဆီးလိုက်တဲ့ အကျိုးသက်ရောက်မှုမျိုး ရစေလိမ့်မယ်"

ရွှီရန်က သပ်ရပ်စွာပင် ရှင်းပြလိုက်သည်။

ကျားမလေးမှာ ပါးစပ်အဟောင်းသားဖြင့် မျက်လုံးပြူးသွားသည်။

"အစ်ကို... တကယ်ပဲ ထိုးထွင်းသိမြင်မှု ပါရမီရှင်ဆိုတာ အမှန်ပဲ တကယ့်ကို ထူးခြားတဲ့ အတွေးအခေါ်ပဲ အကယ်၍ စွမ်းရည်အသစ်ကို ဒီလိုသာ သုံးနိုင်မယ်ဆိုရင်တော့ တကယ့်ကို အနှိုင်းမဲ့သွားမှာပဲ"

ထန်ချီချီက အသက်ကို ပြင်းပြင်းရှူလိုက်ရင်း "အသင်းခေါင်းဆောင်... နင်က နတ်ဘုရားလား"

ကွမ်းရှင်းနှင့် နင်ရွှမ် "ကျွန်မတို့လည်း အသင်းခေါင်းဆောင်ကို နတ်ဘုရားလို့ ထင်မိတယ်"

ကျူးယွီဟန်၏ အပြာရောင်မျက်ဝန်းများမှာ ရုတ်တရက် ဝင်းလက်သွားပြီး စဉ်းစားဆင်ခြင်မှု အလင်းတန်းများ ပေါ်ထွက်လာသည်။

သူမသည် မနေနိုင်ဘဲ ထိုစွမ်းအားကို အသက်သွင်းကာ အချိန်အပ်တစ်ခုအဖြစ် စုစည်းကြည့်ရန် ကြိုးစားလိုက်သည်။

၎င်းမှာ အလွန်ပင် ခက်ခဲလှသော်လည်း သီအိုရီအရတော့ လုံးဝ ဖြစ်နိုင်ခြေရှိသည်။

ကျူးယွီဟန်၏ နုနယ်သော မျက်နှာတွင် စိတ်လှုပ်ရှားဝမ်းသာရိပ်များကို ဖုံးကွယ်မထားနိုင်တော့ဘဲ "လုပ်လို့ရတယ် တကယ် လုပ်လို့ရတယ် လောလောဆယ် ပေးဆပ်ရတဲ့ တန်ဖိုးက အလွန်ကြီးမားပြီး အချိန်အပ်ကလည်း မသိမသာဖြစ်အောင် မချွန်ထက်သေးပေမဲ့ ဖြစ်နိုင်ခြေရှိတယ် သီအိုရီအရဆိုရင် ရှောင်ရန်ပြောတဲ့ အဆင့်ကို ရောက်နိုင်ပါတယ်"

ကျူးယွီဟန်မှာ အတိုင်းထက်အလွန် ဝမ်းသာသွားသည်။

နောက်ဆုံးတွင် သူမအနေဖြင့် အဆုံးအဖြတ်ပေးနိုင်သော လက်နက်တစ်ခုရရှိသွားခြင်းပင်။

ကျူးယွီဟန်၏ ဝမ်းသာအားရ ဖြစ်နေမှုကို မြင်သောအခါ ကျားမလေးက ဂုဏ်ယူစွာဖြင့် ရယ်မောလိုက်သည်။

"အံ့ဩစရာပဲ ရန်သူ့အင်္ဂါတွေကို အိုမင်းပျက်စီးစေတဲ့ အချိန်အပ်ဆိုတာက တိုက်ခိုက်ရေးစွမ်းရည်တင် မဟုတ်ဘဲ ပံ့ပိုးရေးစွမ်းရည်လည်း ဖြစ်နေတာပဲ။ အရာခပ်သိမ်းကို ရပ်တန့်စေတဲ့စွမ်းရည်နဲ့သာ ပေါင်းစပ်လိုက်ရင် အချိန်အပ်ရဲ့ ထိုးဖောက်အားက ကြောက်စရာကောင်းလောက်အောင် ဖြစ်သွားမှာ။ ရန်သူတွေ အများကြီး ဒူးထောက်သွားမှာ သေချာတယ်"

"အဆင့်ချင်း ကွာခြားနေတဲ့ တိုက်ပွဲတွေကိုတောင် အနိုင်တိုက်နိုင်ဦးမယ်"

တိုက်ပွဲများအကြောင်း စဉ်းစားလိုက်သည့်အခါ ကျားမလေး၏ အတွေးများမှာ ပိုမိုချောမွေ့လာသည်။

ကျူးယွီဟန်၏ မျက်ဝန်းများမှာ ပို၍ပင် တောက်ပလာသည်။

"ရှောင်လျူလီ ပြောတာ မှန်တယ်။ အရာခပ်သိမ်း ရပ်တန့်ခြင်းနဲ့ အချိန်အပ်... ဒါတွေက တကယ့်ကို ပြီးပြည့်စုံတဲ့ အတွဲအစပ်ပဲ"

နင်ရွှမ်က အလေးအနက် ပြင်ပေးလိုက်သည်။

"ပြီးပြည့်စုံတဲ့ အတွဲအစပ်ရုံတင် ဘယ်ကမလဲ ဒါက ပြီးပြည့်စုံတဲ့ နတ်ဘုရားအဆင့်စွမ်းရည်ပဲ တကယ် မနာလိုလိုက်တာ။ ယွီဟန်... နင်က အခုကစပြီး ထိန်းချုပ်ရော တိုက်ခိုက်မှုပါ လုပ်နိုင်တဲ့သူ ဖြစ်သွားပြီ။ ကျားမလေးလည်း ထိုနည်းတူပဲ။ ငါတို့အဖွဲ့လေးက တကယ့်ကို သန်မာလွန်းနေပြီ"

နင်ရွှမ်မှာ မသိမသာ ကျေနပ်နေမိသည်။ အသင်းသားတွေ ပိုသန်မာလေလေ အင်အားမြှင့်ပေးရသူဖြစ်သည့် သူမအတွက် ပိုကောင်းလေလေ ဖြစ်သည်။

အသင်းခေါင်းဆောင်မှာ အနှိုင်းမဲ့နေသည်မှာ အထူးပြောရန် မလိုပေ။ အရန်တိုက်စစ်မှူးများမှာလည်း ထိန်းချုပ်မှုရော တိုက်ခိုက်မှုပါ လုပ်နိုင်သည့် အမျိုးအစားများ ဖြစ်နေသဖြင့် ပံ့ပိုးသူတစ်ဦးအနေဖြင့် အလွန်ပင် စိတ်ချအားရစရာ ကောင်းလှသည်။

အားလုံးက စိတ်လှုပ်ရှားစွာဖြင့် ကျူးယွီဟန်ကို ကြည့်နေကြသည်။

ကျူးယွီဟန် အနည်းငယ် ရှက်ကိုးရှက်ကန်း ဖြစ်သွားပြီး "ရှောင်ရန်ရဲ့ ထိုးထွင်းသိမြင်မှုကြောင့်ပါ။ ငါ့ရဲ့ အတွေးတွေကို မြန်မြန်ဆန်ဆန် ပွင့်လင်းသွားအောင် လုပ်ပေးခဲ့တာလေ။ အခုတော့ ငါ ဘာကို ကြိုးစားရမလဲဆိုတဲ့ ဦးတည်ချက်က ရှင်းလင်းသွားပြီ" ဟု ပြောလိုက်သည်။

ရွှီရန်က နွေးထွေးစွာ ပြုံးလိုက်ရင်း "တကယ်တော့... ငါ့အထင်တော့ အံ့ဩစရာအကောင်းဆုံးက မင်းရဲ့ အချိန်အရှိန်မြှင့်ခြင်းပဲ ရှိသေးတယ်..."

ကျူးယွီဟန် အနည်းငယ် အံ့အားသင့်သွားသည်။

ကျားမလေး၊ ထန်ချီချီ၊ ကွမ်းရှင်းနှင့် နင်ရွှမ်တို့လည်း ထပ်တူပင် ထိတ်လန့်သွားကြသည်။

သူတို့အားလုံး ရွှီရန်ထံသို့ အကြည့်များ ပို့လိုက်ကြပြီး ဘာလို့ အခုလိုပြောရတာလဲဆိုသည်ကို သိချင်နေကြတော့သည်။