အခန်း (၄၆၇-၄၆၈)
Vol. 34 Ch. 467-468
အခန်း ( ၄၆၇ ) - ကြီးမားသော အမှား၊ အခြားကမ္ဘာတွင် သတ်ဖြတ်ခြင်း၊ အရာအားလုံးကို မေ့ပျောက်သွားခြင်း
ယခုအခါ ကုချန်သည် ရှာနာနတ်ဆိုးဧကရာဇ်နှင့် အနည်းငယ် ယှဉ်ပြိုင်နိုင်စွမ်းရှိနေပြီဖြစ်ကြောင်း သိလိုက်ရသောအခါ နတ်ဆိုးဧကရာဇ်ကြီးသည် ကုချန်၏ နောက်ဆုံးနည်းလမ်းများကို သူ နားလည်သွားပြီဟု မထင်မှတ်ခဲ့သည့်အပြင် ကုချန်မှာ ပို၍ပင် လျှို့ဝှက်ဆန်းကြယ်လာသည်ဟု ခံစားလိုက်ရသည်။
သူ၏ဖုံးကွယ်ထားသော တိုက်ခိုက်ရေးစွမ်းအားကပင် နတ်ဆိုးဧကရာဇ်တစ်ပါးနှင့် ယှဉ်ပြိုင်နိုင်ရန် လုံလောက်နေပြီ ဖြစ်သည်။
အကယ်၍ ဤသည်မှာ သူ၏အစစ်အမှန် ဝှက်ဖဲကတ် မဟုတ်သေးဘူးဆိုလျှင် သူ၏ အစစ်အမှန် ဝှက်ဖဲကတ်က မည်မျှအထိ အစွမ်းထက်နေမည်နည်း။
" သူ အဲဒီတုန်းက သာမန် အင်မော်တယ်ဘုရင်တစ်ပါးရဲ့ ကျင့်ကြံမှုပဲ ရှိသေးတာတောင် ငါအရှင့်ကို ဖမ်းမယ့်ငါးလို့ သတ်မှတ်ရဲခဲ့တာ မဆန်းတော့ပါဘူး... သူက တကယ့်ကို ဝှက်ဖဲကတ်တွေနဲ့ နည်းလမ်းတွေ ရှိနေခဲ့တာပဲ "
နတ်ဆိုးဧကရာဇ်ကြီးသည် စိတ်ထဲမှ တိတ်တဆိတ် သက်ပြင်းချလိုက်လေသည်။
အင်မော်တယ်ဘုရင်တစ်ပါးက နတ်ဆိုးဧကရာဇ်တစ်ပါးကို မျှားဖို့ ရဲဝံ့တယ်ပေါ့?
တစ်နတ်ဆိုးနယ်မြေလုံးကို ကြည့်လိုက်လျှင် ဤသို့သော ပုန်ကန်လိုသည့် အတွေးမျိုးကို မည်သည့် အင်မော်တယ်ဘုရင်ကမျှ တွေးဝံ့မည် မဟုတ်ချေ။ အမှန်တကယ်တွင် နတ်ဆိုးဧကရာဇ်တစ်ပါး၏ ရှေ့မှောက်၌ အဆင့်အတန်း ဖိနှိပ်မှုကြောင့် ထိုသို့သော အတွေးမျိုး သူတို့၏ နှလုံးသားထဲတွင် ပေါ်လာမည်ပင် မဟုတ်ချေ။
သို့သော် ကုချန်မှ တွေးရဲရုံသာမက လက်တွေ့လုပ်ဆောင်ရန်လည်း ဝံ့ရဲခဲ့သည်။ သမိုင်းတစ်လျှောက် မည်သည့် အင်မော်တယ်ဘုရင်က ဤသို့ လုပ်နိုင်ခဲ့သနည်း။
အတိတ်နှင့် အနာဂတ် ကာလများကို ရှာဖွေကြည့်လျှင်ပင် တစ်ယောက်ကိုပင် ရှာတွေ့ရန် ခက်ခဲလိမ့်မည်။
ကုချန်ကို နတ်ဆိုးနယ်မြေ ဖန်ဆင်းကတည်းက ပထမဆုံး အင်မော်တယ်ဘုရင်ဟု ခေါ်ဆိုလျှင်ပင် ပုံကြီးချဲ့ရာ မရောက်နိုင်ပေ။
သို့သော် ရှာနာနတ်ဆိုးဧကရာဇ်ကို ယှဉ်ပြိုင်ရန် သူ့၌ မည်သို့သော နောက်ကွယ်က အစီအစဉ်များ ရှိနေသဖြင့် ဤမျှ ယုံကြည်မှု ရှိနေရသနည်း။
ကုချန်သည် သူ ညွှန်ကြားခဲ့သည့်အတိုင်း ထုံးထျန်းနတ်ဆိုးတောင်ဆီသို့ ချက်ချင်း မထွက်ပြေးခဲ့ကြောင်း သိလိုက်ရကတည်းက ကုချန်တွင် ရှာနာနတ်ဆိုးဧကရာဇ်ကို ယှဉ်ပြိုင်ရန် အပြည့်အဝ သေချာမှုနှင့် ယုံကြည်မှုများ ရှိနေရမည်ကို နတ်ဆိုးဧကရာဇ်ကြီး သိထားခဲ့ပြီး ဖြစ်၏။
သို့သော် နတ်ဆိုးဧကရာဇ်ကြီး မည်မျှပင် ခေါင်းစားအောင် တွေးတောစေကာမူ အင်မော်တယ်ဘုရင်အဆင့်ရှိ တည်ရှိမှုတစ်ခုကို နတ်ဆိုးဧကရာဇ်တစ်ပါးအား ယှဉ်ပြိုင်နိုင်ရန် ကူညီပေးမည့် နည်းလမ်းမျိုး ဤလောကတွင် ရှိနေမည်ကို သူ လုံးဝ စိတ်ကူးမယဉ်နိုင်ခဲ့ချေ။
ဒါပေမဲ့ ဘာပဲဖြစ်ဖြစ် ရှာနာကတော့ တကယ်ပဲ စောစော အောင်ပွဲခံနေတာပဲ။
ကောင်းကင်နှင့်မြေကြီးကြားတွင် ရှာနာနတ်ဆိုးဧကရာဇ်၏ ရယ်မောသံများ ပဲ့တင်ထပ်နေဆဲကို ကြားရသော်လည်း နတ်ဆိုးဧကရာဇ်ကြီးသည် မျက်လုံးများကို အနည်းငယ် မှိတ်ထားကာ မည်သည့်စကားမျှ မပြောဘဲ နေလိုက်လေသည်။
တကယ်လို့ ရှာနာက အောင်ပွဲကို သူ့ရဲ့လက်ထဲမှာ ရထားရပြီး အရာအားလုံးကို ထိန်းချုပ်ထားနိုင်နေပြီလို့ ထင်နေခဲ့ရင်တော့ သူ တကယ်ကို မှားယွင်းနေပြီ!
... ... ... ...
အဆုံးမဲ့ကောင်းကင်ဘုံအတွင်း၌.....
နတ်ဆိုးနယ်မြေ အများအပြားမှာ ပျက်စီးခြင်း နယ်မြေတစ်ခုအဖြစ် ပြောင်းလဲသွားခဲ့လေပြီ။
မရေမတွက်နိုင်သော နတ်ဆိုးအလင်းတန်းများနှင့် ဟွမ်သွမ့်ချီများ ဤနေရာတွင် ပေါက်ကွဲထွက်ပေါ်လာရာ ဤနတ်ဆိုးနယ်မြေများတွင် မည်သည့် သက်ရှိမျှ မကျန်ရစ်တော့ဘဲ အဆုံးမဲ့တာအိုများကို ကိုယ်စားပြုသော စနစ်ကျသည့် မြင့်မြတ်ကြိုးကွင်းများက နေရာအနှံ့ ထူထပ်စွာ ယှက်နွယ်နေကြလေသည်။
ဤမရေမတွက်နိုင်သော စနစ်ကျသည့် မြင့်မြတ်ကြိုးကွင်းများသည် ကောင်းကင်နှင့်မြေကြီး၏ စည်းမျဉ်းများအဖြစ် ဆောင်ရွက်ကာ ကောင်းကင်နှင့်မြေကြီး၏ တည်ငြိမ်မှုနှင့် အဆုံးမဲ့တာအိုများ၏ စည်းမျဉ်းများကို ထိန်းသိမ်းထားသင့်ပေ၏။
သို့သော် ထိုအခိုက်အတန့်တွင် ကုချန်နှင့် ရှာနာနတ်ဆိုးဧကရာဇ်တို့၏ ပြင်းထန်သော တိုက်ခိုက်မှုအောက်တွင် တိုက်ပွဲ၏ ဂယက်ရိုက်ခတ်မှုများကပင် စည်းမျဉ်းအားလုံးကို ဖျက်ဆီးပစ်လိုက်ရာ ထိုအဆုံးမရှိ စနစ်ကျသည့် မြင့်မြတ်ကြိုးကွင်းများကို ထွက်ပေါ်လာစေခဲ့ခြင်း ဖြစ်သည်။
ဟွမ်သွမ့်ချီများ အရှိန်အဟုန်ဖြင့် ထွက်ပေါ်လာ၍ အရာအားလုံးကို ဝါးမျိုပစ်နိုင်သော တွင်းနက်ကြီးတစ်ခုကဲ့သို့ အရာအားလုံးကို လွှမ်းမိုးသွားကာ ကောင်းကင်နှင့်မြေကြီး တစ်ခုလုံးကို နစ်မြုပ်သွားစေလုနီးပါး ဖြစ်သွားခဲ့၏။
ထိုအချိန်တွင် မို့ကျွင်းနတ်ဆိုးအရှင်သည် တိုက်ပွဲမြေပြင်မှ အဆုံးမရှိ ဝေးကွာသော နေရာတစ်ခုသို့ ထွက်ပြေးရောက်ရှိနေပြီဖြစ်သလို သူ၏ မျက်နှာပေါ်တွင် နက်ရှိုင်းသော ထိတ်လန့်တုန်လှုပ်မှု အမူအရာတစ်ခု ပေါ်လွင်နေလေသည်။
ကုချန်၏ တိုက်ခိုက်ရေးစွမ်းအားက ဤမျှ ကြောက်မက်ဖွယ်ကောင်းလိမ့်မည်ဟု သူ တကယ် မမျှော်လင့်ထားခဲ့ချေ။
သူသည် ရှာနာနတ်ဆိုးဧကရာဇ်နှင့် နာရီဝက်တိတိ တိုက်ခိုက်ခဲ့သော်လည်း မသေသေးသည့်အပြင် ဒဏ်ရာများစွာပင် မရရှိခဲ့ချေ!
ဒီကောင်က အင်မော်တယ်ဘုရင် ဟုတ်သေးရဲ့လား။
နတ်ဆိုးနယ်မြေမှာရော ဒီလိုလုပ်နိုင်တဲ့ အင်မော်တယ်ဘုရင် ရှိလို့လား?!
မို့ကျွင်းနတ်ဆိုးအရှင်၏ စိတ်ထဲတွင် ရူးသွပ်စွာ အော်ဟစ်နေလေသည်။ ရှာနာနတ်ဆိုးဧကရာဇ်ပင်လျှင် ဤလူကို မသိခဲ့ပါက တစ်ဖက်လူသည် ရုပ်ဖျက်ထားသော ရှေးဟောင်း နတ်ဆိုးနယ်မြေ တည်ရှိမှုတစ်ခုခုများ ဖြစ်နေမလားဟုပင် မို့ကျွင်းနတ်ဆိုးအရှင် ထင်မှတ်သွားမိပေလိမ့်မည်။
" ဒီဟာသဇာတ်လမ်းက ပြီးဆုံးသင့်ပြီ... တန်ဖိုးအချို့ ပေးဆပ်ရမယ်ဆိုရင်တောင် ငါအရှင် မင်းကို သတ်ကိုသတ်ရမယ်! "
အချိန်ကြာမြင့်စွာ တိုက်ခိုက်ပြီးနောက်တွင်ပင် ကုချန်ကို အနိုင်မယူနိုင်သေးသဖြင့် ရှာနာနတ်ဆိုးဧကရာဇ်မှာ သိသိသာသာ စိတ်တိုလာ၍ နောက်ဆုံးတွင် ဆုံးဖြတ်ချက်တစ်ခုခု ချလိုက်သည့်အလား သူ၏မျက်လုံးများထဲတွင် စူးရှသော အလင်းတန်းတစ်ခု ပေါ်လာခဲ့၏။
" နှစ်ကာလတွေက တိုက်စားဖို့ ခက်ခဲတယ်... ရှေးကနေ အခုအချိန်အထိ ထာဝရ ရှုံးနိမ့်နိုင်စွမ်း မရှိဘူး! "
ရှာနာနတ်ဆိုးဧကရာဇ်မှ ကျယ်လောင်စွာ အော်ဟစ်လိုက်ရာ သူ၏စွမ်းအားများမှာ ကောင်းကင်ဘုံများအားလုံးကို ဖုံးလွှမ်းသွားသော ဧကရီတစ်ပါး ဒေါသထွက်နေသည့်အလား ရှိလေသည်။
မျက်စိတစ်မှိတ်အတွင်းမှာပင် အဆက်မပြတ် စီးဆင်းနေသော အချိန်မြစ်ကြီးပင် ချက်ချင်း ထွက်ပေါ်လာခဲ့၍ ရှာနာနတ်ဆိုးဧကရာဇ်၏ နင်းခြေခြင်းကို ခံလိုက်ရလေသည်။
သူ ကြမ်းတမ်းစွာ အော်ဟစ်လိုက်ရာ ကောင်းကင်ကြီး မှောင်မိုက်သွား၍ မရေမတွက်နိုင်သော ကြယ်များ ပေါက်ကွဲသွားကာ ကျယ်ပြောလှသော အဆုံးမရှိ အချိန်မြစ်ကြီးပင်လျှင် သူ၏အော်ဟစ်သံကြောင့် နှစ်ပိုင်းပြတ်သွားတော့မည့်အလား ရှိလေသည်။
အဆုံးမရှိသော မြစ်ရေများ မြင့်တက်လာသော်လည်း ရှာနာနတ်ဆိုးဧကရာဇ်၏ ခိုင်မာစွာ နင်းခြေမှုကြောင့် မျက်စိတစ်မှိတ်အတွင်းမှာပင် မရေမတွက်နိုင်သော အဖြူရောင် မြူခိုးများအဖြစ် ပြိုကွဲသွားခဲ့သည်။
" အချိန်မြစ်ဆိုတာ ဘုရင်တစ်ပါးအတွက် ထိတွေ့လို့မရနိုင်တဲ့ အရာဖြစ်ပေမယ့် ငါအရှင့်အတွက်တော့ မဟုတ်ဘူး! "
ရှာနာနတ်ဆိုးဧကရာဇ်မှ လှောင်ပြုံး ပြုံးလိုက်၍ လက်ကို ညင်သာစွာ မြှောက်ကာ အချိန်မြစ်၏ အထက်ပိုင်းဆီသို့ လှမ်းသွားလိုက်လေသည်။ သူသည် အချိန်မြစ်အတွင်းမှ ကုချန်၏အတိတ်ကို ရှာဖွေ၍ ရိုက်သတ်ချင်နေသည့်အလားပင်။
ရှာနာနတ်ဆိုးဧကရာဇ်မှ ထိုသို့ လုပ်ဆောင်လိုက်သောအခါ မည်သည့်အကြောင်းကြောင့်မှန်းမသိ ကုချန်၏နှလုံးသားထဲတွင် ဖော်ပြ၍မရနိုင်လောက်အောင် ထိတ်လန့်မှုနှင့် လစ်ဟာသွားသော ခံစားချက်တစ်ခု ရုတ်တရက် ပေါ်ထွက်လာခဲ့၏။
ထိုခံစားချက်မှာ လက်ရှိကမ္ဘာကြီးရှိ သူ၏တည်ရှိမှု အဓိပ္ပာယ်အားလုံး ငြင်းပယ်ခံလိုက်ရ၍ သူ လုံးဝ ပျောက်ကွယ်သွားတော့မည့်အလား ရှိလေသည်။
တစ်ချိန်တည်းမှာပင် နတ်ဆိုးနယ်မြေ၏ ကြက်သွေးရောင်ငရဲနတ်ဆိုးနယ်မြေ၌.....
ချီလျန်မျိုးနွယ်ဝင်များသည် တိုက်ပွဲဖြစ်ပွားနေသော နေရာဆီသို့ စိုးရိမ်တကြီးဖြင့် ကြည့်နေကြလေသည်။
ချီလျိုနှင့် အခြားသူများ၏ ကျင့်ကြံမှုအရ သူတို့သည် တိုက်ပွဲမြေပြင်အနီးသို့ တစ်လက်မမျှပင် ချဉ်းကပ်ရန် အခွင့်အရေး မရှိသည်မှာ သဘာဝပင်။ သို့သော် တိုက်ပွဲမှာ အဆုံးမဲ့ကောင်းကင်ဘုံတွင် ဖြစ်ပွားနေခြင်းဖြစ်၍ သူတို့၏သခင်မှာ မကြာမီကမှ ထွက်ခွာသွားခြင်းဖြစ်ရာ ချီလျိုနှင့် ချီမုန်တို့အားလုံးမှာ ကုချန်၏ လုံခြုံရေးအတွက် စိုးရိမ်နေကြလေသည်။
အဲ့ဒီကြောက်မက်ဖွယ်ကောင်းတဲ့ တိုက်ပွဲကြီးက သူတို့ရဲ့သခင်နှင့်များ သက်ဆိုင်နေမလား။
သူတို့ရဲ့သခင် ဘေးကင်းမှာပါ!
" အမေ... သခင်က အဆင်ပြေပါ့မလား "
ချီမုန်သည် ဤမေးခွန်းကို အကြိမ်မရေမတွက်နိုင်အောင် စိုးရိမ်တကြီး မေးမြန်းနေခဲ့သည်။
သူ၏မိခင်က တိကျသော အဖြေမပေးနိုင်မှန်း သူ သိသော်လည်း မေးချင်စိတ်ကို မထိန်းနိုင်ခဲ့ချေ။
" သခင်က အရမ်း အစွမ်းထက်တာပဲ... သူ သေချာပေါက်..... "
ချီလျိုသည် ယခင်ကကဲ့သို့ပင် ချီမုန်အား နှစ်သိမ့်ပေးရန် ပြင်လိုက်သော်လည်း စကားတစ်ဝက်ခန့်တွင် သူ၏ လှပသော မျက်နှာပေါ်၌ ဖော်ပြ၍မရနိုင်လောက်အောင် နားမလည်နိုင်မှု အမူအရာတစ်ခု ပေါ်လာခဲ့ကာ သူ၏စကားများပင် ရုတ်တရက် ရပ်တန့်သွားခဲ့သည်။
" ထူးဆန်းလိုက်တာ... ချီမုန်... ခုနက သမီး ဘာပြောနေတာလဲ... ဘာသခင်လဲ..... "
ချီလျိုမှ နားမလည်နိုင်စွာဖြင့် မေးမြန်းလိုက်လေသည်။
" ဘာသခင်လဲ ဟုတ်လား... အမေ ဘာတွေပြောနေတာလဲ "
ချီမုန်ဟာလည်း နားမလည်နိုင်စွာဖြင့် ပြန်ဖြေလေ၏။
" ထူးဆန်းလိုက်တာ... ငါ တစ်ခုခုကို မေ့သွားသလို ဘာလို့ ခံစားနေရတာလဲ... အမေ... သမီး ဘာလို့ ဒီကို ရောက်နေတာလဲ..... "
အင်မော်တယ်နယ်မြေရှိ လဝိညာဉ်ကောင်းကင်ဘုံအတွင်း၌.....
ယွဲ့လင်အင်မော်တယ်ဘုရင်သည် ကုချန်နှင့် ပတ်သက်သည့် သတင်းအချက်အလက်များကို ထပ်မံမေးမြန်းရန်အတွက် ချီလျို၏ ကိုယ်ပွားထံသို့ ထပ်မံသွားရောက်ရန် ပြင်ဆင်နေခဲ့၏။
သို့သော် လမ်းတစ်ဝက်တွင် သူ၏ အသိစိတ်ပင်လယ်အတွင်းရှိ ကုချန်နှင့် သက်ဆိုင်သော မှတ်ဉာဏ်များမှာ အလိုအလျောက် ပျောက်ကွယ်မှေးမှိန်လာခဲ့သည်။ ထိုခံစားချက်မှာ သူ၏ ထိန်းချုပ်မှုမှ လုံးဝ ကင်းလွတ်နေ၍ အမြင့်ဆုံး မှော်စွမ်းအင်ရှိသူ တစ်ဦးဦးက သူ၏စိတ်ထဲမှ အတင်းအဓမ္မ ဖျက်ပစ်နေသကဲ့သို့ ရှိလေသည်။
" မှတ်ဉာဏ်တွေ ပျောက်ကုန်ပြီ! မှတ်ဉာဏ်တွေ... မှတ်ဉာဏ်တွေ... ဘာမှတ်ဉာဏ်တွေလဲ..... "
ယွဲ့လင်အင်မော်တယ်ဘုရင်မှ တစ်ခုခု မှားယွင်းနေကြောင်း သတိထားမိလိုက်သောအခါ အစတွင် လန့်ဖျပ်သွား၍ ဘာတွေဖြစ်ပျက်ခဲ့သလဲဆိုတာကို ပြန်လည်မှတ်မိရန် ကြိုးစားလိုက်သော်လည်း နောက်တစ်ခဏတွင် ပြန်လည်မှတ်မိရန်ကိုပင် သူ မေ့လျော့သွားခဲ့သည်။
သူ တစ်ခုခုကို ဆုံးရှုံးလိုက်ရသကဲ့သို့ နှလုံးသားထဲတွင် လစ်ဟာနေသော ခံစားချက်တစ်ခုကိုသာ ခံစားလိုက်ရ၏။
" ထူးဆန်းလိုက်တာ... ငါအရှင်က ဘာလို့ ဒီကို ရောက်နေတာလဲ "
ယွဲ့လင်အင်မော်တယ်ဘုရင်သည် နားမလည်နိုင်စွာဖြင့် ခေါင်းရမ်းလိုက်လေသည်။ သူ ဤနေရာသို့ ဘာကြောင့် ရောက်နေသနည်းဆိုသည်ကိုပင် မေ့လျော့သွားပုံပင်။
အခန်း ( ၄၆၈ ) - ကောင်းကင်ကို လက်တစ်ဖက်တည်းဖြင့် ဖုံးအုပ်ခြင်း၊ ရှေးဟောင်းအမွှေးတိုင်ကို ထွန်းညှိခြင်း၊ လက်ညှိုးတစ်ချောင်း၏ စွမ်းအား
ယွဲ့လင်အင်မော်တယ်ဘုရင်၏ ခွန်အားနှင့် နည်းလမ်းများဖြင့်ပင် သူ၏မှတ်ဉာဏ်များကို ဖျက်ပစ်နေသော စွမ်းအားကို မယှဉ်ပြိုင်နိုင်ခဲ့ချေ။
အဘယ်ကြောင့်ဆိုသော် ၎င်းမှာ တစ်ဦးတစ်ယောက်တည်း၏ စွမ်းအားမဟုတ်ဘဲ သူ လုံးဝ မတားဆီးနိုင်၊ မခုခံနိုင်သော ကျယ်ပြောလှသည့် တာအို၏ စွမ်းအားဖြစ်နေသောကြောင့်ပင်။
ဤအပြောင်းအလဲ၏ အကြောင်းရင်းမှာ သေချာပေါက် နတ်ဆိုးနယ်မြေ တိုက်ပွဲမြေပြင်နှင့် ဆက်စပ်နေလေသည်။ ရှာနာနတ်ဆိုးဧကရာဇ်သည် ကုချန်၏ အတိတ်က ကိုယ်ကို တိုက်ခိုက်သတ်ဖြတ်ချင်နေခြင်း ဖြစ်သည်။
အကယ်၍ အတိတ်က ကိုယ်သာ သေဆုံးသွားပါက လက်ရှိကိုယ်သည် မည်သို့ ဆက်လက်တည်ရှိနိုင်တော့မည်နည်း။ ဤသည်မှာ ကုချန် တည်ရှိနေခြင်း၏ အဓိပ္ပာယ်ကို လုံးဝ ငြင်းပယ်လိုက်ခြင်းနှင့် အတူတူပင် ဖြစ်သည်။
အတိတ်ကာလက ရှီမိုထျန်းကျွင်းနှင့် တိုက်ခိုက်ခဲ့စဉ်ကလည်း ရှီမိုထျန်းကျွင်းသည် ဤနည်းလမ်းကိုပင် အသုံးပြုကာ ကုချန်၏ အားနည်းသော အတိတ်က ကိုယ်ကို ဖျက်ပစ်ရန် ကြိုးစားခဲ့၍ သူ၏လက်ရှိတည်ရှိမှုကို ငြင်းပယ်ရန် ကြံစည်ခဲ့ဖူးသည်။
သို့သော် ရှီမိုထျန်းကျွင်းမှာ နောက်ဆုံးတွင် အောင်မြင်မှု မရရှိခဲ့ချေ။ ကုချန် လှုပ်ရှားစရာပင် မလိုဘဲ ရှီမိုထျန်းကျွင်းမှာ ကျရှုံးသွားခဲ့ရ၏။
အဘယ်ကြောင့်ဆိုသော် ကျယ်ပြောလှသော အချိန်မြစ်ကြီးကို ခြယ်လှယ်နိုင်သည့် ကြီးမားသော စွမ်းအားမျိုးမှာ ရှီမိုထျန်းကျွင်း ပိုင်ဆိုင်နိုင်သည့် အရာမျိုး လုံးဝ မဟုတ်သောကြောင့်ပင်။ သူ အချိန်၏ တားမြစ်ချက်ကို အဆင်အခြင်မဲ့ သွားရောက်ထိတွေ့မိခြင်းက အချိန်၏ စွမ်းအားထံမှ တန်ပြန်သက်ရောက်မှုကို ဖြစ်ပေါ်စေခဲ့သည်။
ယခု ရှာနာနတ်ဆိုးဧကရာဇ် လှုပ်ရှားလာသောအခါတွင်လည်း ရှီမိုထျန်းကျွင်းနှင့် ထပ်တူကျသော နည်းလမ်းကို အသုံးပြုလာခဲ့၏။
တစ်ခုတည်းသော ကွာခြားချက်မှာ ဤတစ်ကြိမ် ရှာနာနတ်ဆိုးဧကရာဇ် လှုပ်ရှားလိုက်ချိန်တွင် ကျော်လွှား၍မရနိုင်သော လစ်ဟာမှုတစ်ခုနှင့် ကံကြမ္မာ၏ ခံစားချက်ကို သူ အမှန်တကယ် ခံစားလိုက်ရခြင်းပင်။
လွန်ခဲ့သော နှစ်တစ်သိန်းနီးပါးခန့်က သူ တစ်ယောက်တည်း ဧကရာဇ်ဂိတ်ကို စောင့်ကြပ်နေစဉ်.....
တောက်ပသော လက်ဝါးဖြူဖြူကြီးတစ်ခု ကောင်းကင်ယံမှ ကျဆင်းလာ၍ သူ့ကိုသာမက သူ၏အောက်ရှိ ဧကရာဇ်ဂိတ်ကိုပါ ပြာအဖြစ် ချေမှုန်းပစ်လိုက်ကာ သူ၏ တည်ရှိမှု အရိပ်အယောင် တစ်ခုမျှပင် မကျန်ရစ်စေခဲ့သည်ကို သူ မြင်တွေ့လိုက်ရသကဲ့သို့ ရှိလေသည်။
ဤမြင်ကွင်းသည် မှတ်ဉာဏ်တစ်ခုကဲ့သို့ ကုချန်၏ စိတ်အနက်ရှိုင်းဆုံးတွင် ခိုင်မာစွာ အမြစ်တွယ်သွားခဲ့၏။ သို့သော် သူ၏ နောက်ဆက်တွဲ မှတ်ဉာဏ်များမှာမူ လုံးဝ ပျောက်ကွယ်သွားတော့မည့်အလား တဖြည်းဖြည်း ဝေဝါးလာခဲ့လေသည်။
ဤအခိုက်အတန့်ရောက်မှသာ ကုချန် နားလည်သွားခဲ့၏။ ရှာနာနတ်ဆိုးဧကရာဇ်၏ လှုပ်ရှားမှုသည် အချိန်မြစ်ကို အနည်းငယ်မျှသာ လှုပ်ခါစေနိုင်ကာ အချိန်၏စွမ်းအားထံမှ အဆုံးမဲ့ တန်ပြန်သက်ရောက်မှုကို ခံစားခဲ့ရသော ရှီမိုထျန်းကျွင်းနှင့် မတူဘဲ အချိန်မြစ်ကို အမှန်တကယ် ခြယ်လှယ်နိုင်စွမ်း ရှိပုံရပေသည်။
ဒီအတိုင်း ဆက်ဖြစ်ခွင့်ပေးလို့ မဖြစ်ဘူး!
ကုချန်၏ နှလုံးသားထဲတွင် သတိပေးချက်တစ်ခု ချက်ချင်း ထွက်ပေါ်လာခဲ့၏။ ရှာနာနတ်ဆိုးဧကရာဇ်သည် ရှီမိုထျန်းကျွင်းနှင့် မတူကြောင်း သူ သိလေပြီ။ အကယ်၍ ရှာနာနတ်ဆိုးဧကရာဇ်ကိုသာ ဆက်လက် လှုပ်ရှားခွင့် ပေးထားမည်ဆိုပါက မကြာမီတွင် သူ ပြန်လည်တိုက်ခိုက်ရန် အခွင့်အရေးပင် မရတော့မည်ကို သူ စိုးရိမ်မိသည်။
" မင်းပြောတာ အမှန်ပဲ... ဒီဟာသဇာတ်လမ်းက ပြီးဆုံးသင့်ပြီ "
ကုချန်သည် ခပ်တိုးတိုး ရေရွတ်လိုက်ပြီးနောက် နောက်ဆုံးတွင် ကံကြမ္မာပြောင်းပြန်လှန်အမွှေးတိုင်ကို ထုတ်ယူကာ လက်ဖဝါးပေါ်တွင် တင်၍ တိတ်တဆိတ် ထွန်းညှိလိုက်လေသည်။
ပုလဲ၏ မှိန်ဖျော့ဖျော့ အလင်းရောင်သည် အစိမ်းရောင် မီးခိုးငွေ့တစ်မျှင်အဖြစ် လျင်မြန်စွာ ပြောင်းလဲသွား၍ ဝေးကွာသော ကောင်းကင်ဘုံကိုးခုအတွင်းသို့ ပေါင်းစပ်သွားသည့်အလား ရှိလေသည်။ သို့သော် မကြာမီမှာပင် ထိုအစိမ်းရောင် မီးခိုးငွေ့များသည် တစ်စုံတစ်ခုကို အာရုံခံမိသွားသည့်အလား ကောင်းကင်ယံမှ ကျဆင်းလာကာ ကုချန်၏ခန္ဓာကိုယ်ထဲသို့ အလုံးစုံ ပေါင်းစည်းဝင်ရောက်သွားတော့သည်။
ကံကြမ္မာပြောင်းပြန်လှန်အမွှေးတိုင်၏ အာနိသင်မှာ အသုံးပြုသူ၏ လက်ရှိ ခွန်အားအဆင့်ကို လျစ်လျူရှုကာ ၎င်းတို့၏ တိုက်ခိုက်ရေးစွမ်းအားကို အဆင့်တစ်ဆင့် မြှင့်တင်ပေးခြင်းပင် ဖြစ်သည်။
ကျင့်ကြံသူ၏ အဆင့် မည်မျှပင်ရှိစေကာမူ အာနိသင်မှာ အတိအကျ အတူတူပင် ဖြစ်၏။ နတ်ဆိုးဧကရာဇ်အဆင့်တွင် အသုံးပြုလျှင်ပင် မပြောင်းလဲချေ။ ဤအမွှေးတိုင် ကုန်ဆုံးသွားသည်အထိ အာနိသင်မှာ တည်ရှိနေမည် ဖြစ်သည်။
" ဥုံ မဏိ ပဒ္မေ ဟုံ..... "
ကံကြမ္မာပြောင်းပြန်လှန်အမွှေးတိုင် စတင်လောင်ကျွမ်းလာသည်နှင့်အမျှ လျှို့ဝှက်ဆန်းကြယ်၍ ခမ်းနားကြီးကျယ်သော ရွတ်ဆိုသံများသည်လည်း ကုချန်၏နားထဲတွင် ထွက်ပေါ်လာခဲ့ရာ အချိန်ကာလကို ကျော်လွန်၍ လက်ရှိကမ္ဘာတွင် ပဲ့တင်ထပ်လာသော ရှေးဟောင်းဘိုးဘေးများ၏ အော်ဟစ်သံများနှင့် တူလေသည်။
နတ်ဆိုးဧကရာဇ်အဆင့်ကို မဆိုစလောက်လေး ယှဉ်ပြိုင်နိုင်သော ကုချန်၏ လက်ရှိ တိုက်ခိုက်ရေးစွမ်းအားဖြင့် ဤကံကြမ္မာပြောင်းပြန်လှန်အမွှေးတိုင်ကို ထွန်းညှိပြီးနောက် သူ၏
တိုက်ခိုက်ရေးစွမ်းအားမှာ မည်သည့်အဆင့်အထိ မြင့်တက်သွားမည်နည်း။ သူ၏ခန္ဓာကိုယ်အတွင်းမှ လှိုင်းထန်ဆူပွက်နေသော စွမ်းအားများကို ခံစားလျက် ကုချန်၏နှလုံးသားထဲတွင် မျှော်လင့်ချက် အရိပ်အယောင်တစ်ခု ဝေဝါးဝါး ပေါ်ထွက်လာခဲ့၏။
သူ၏တိုက်ခိုက်ရေးစွမ်းအားသည် နတ်ဆိုးဧကရာဇ်အဆင့်၏ ယှဉ်ပြိုင်ကင်းသော အဆင့်အထိ မဟုတ်လျှင် နတ်ဆိုးဧကရာဇ်အဆင့်ထက်ပင် ပိုမိုအားကောင်းသော အဆင့်တစ်ခုအထိ မြင့်တက်သွားနိုင်မည်လော။
ကုချန်၏ တိုက်ခိုက်ရေးစွမ်းအားမှာ လျင်မြန်စွာ မြင့်တက်လာနေသော်လည်း ရှာနာနတ်ဆိုးဧကရာဇ်မှာ ဤသည်ကို လုံးဝ သတိမထားမိခဲ့ဘဲ လွန်ခဲ့သော နှစ်ကိုးသောင်းကျော်က ဧကရာဇ်ဂိတ်ကို စောင့်ကြပ်နေခဲ့သော ကုချန်ထံသို့ သူ၏လက်ဝါးဖြင့် ဖိချနေဆဲ ဖြစ်သည်။
" ပါရမီရှင်တစ်ယောက်ကို လည်ပင်းညှစ်သတ်ပြီး လက်တစ်ဖက်တည်းနဲ့ ကောင်းကင်ကို ဖုံးအုပ်မယ်... ငါက နတ်ဆိုးဧကရာဇ်ပဲ...ဘယ်သူက ငါအရှင့်ကို ယှဉ်နိုင်မှာလဲ! "
ရှာနာနတ်ဆိုးဧကရာဇ်၏ မျက်နှာတွင် အေးစက်မှုများ ပေါ်လွင်နေ၏။
သူသည် အင်မော်တယ်ဘုရင်တစ်ပါး မဟုတ်ချေ။ ရန်သူကို သတ်ရန် အချိန်မြစ်ကို ခြယ်လှယ်ခြင်းက သူ့အတွက် အတိုင်းအတာတစ်ခုအထိ တန်ပြန်သက်ရောက်မှုကို သေချာပေါက် ဖြစ်ပေါ်စေမည်ဖြစ်သော်လည်း လုံးဝ ခံနိုင်ရည်မရှိနိုင်သည်အထိတော့ မဟုတ်ပေ။
ယခုအခါ အဝေးရှိ မဟာအစီအရင်မှာ နတ်ဆိုးဧကရာဇ်ကြီးကို အချိန်ကြာမြင့်စွာ ထောင်ချောက်ဆင်ထားနိုင်မည် မဟုတ်တော့ရာ ရှာနာနတ်ဆိုးဧကရာဇ်အနေဖြင့် စက္ကန့်တိုင်းကို အမိအရဖမ်းဆွဲကာ ထိုမတိုင်မီ ကုချန်ကို သတ်ပစ်ရမည် ဖြစ်သည်။ သို့မဟုတ်လျှင် နတ်ဆိုးဧကရာဇ်ကြီး လွတ်မြောက်လာမည့်အချိန်အထိ အချိန်ဆွဲနေမည်ဆိုပါက အရာအားလုံး အချည်းနှီး ဖြစ်သွားပေလိမ့်မည်။
ဤအတွက်ကြောင့် တန်ဖိုးအချို့ ပေးဆပ်ရမည်ဆိုလျှင်ပင် ရှာနာနတ်ဆိုးဧကရာဇ်၏ အမြင်တွင် တန်သည်ဟု ထင်မှတ်နေလေသည်။
" သေစမ်း! "
ရှာနာနတ်ဆိုးဧကရာဇ်၏ မျက်လုံးများထဲတွင် ရက်စက်သော အလင်းတန်းတစ်ခု လက်ဖြာသွား၍ မည်သည့် ညှာတာမှုမျှမရှိဘဲ ကုချန်နှင့် သူ၏အောက်ရှိ ဧကရာဇ်ဂိတ်ကိုပါ ပြာအဖြစ် ချေမှုန်းကာ လုံးဝ ပျောက်ကွယ်သွားစေရန် ရည်ရွယ်၍ တိုက်ခိုက်လိုက်လေသည်။
သို့သော် ဤအရေးကြီးသော အခိုက်အတန့်တွင်.....
ရှာနာနတ်ဆိုးဧကရာဇ်၏ ချီအငွေ့အသက်များမှာ ရုတ်တရက် အေးခဲသွားခဲ့၏။
အဘယ်ကြောင့်ဆိုသော် ဧကရာဇ်ဂိတ်ပေါ်တွင် မတ်တပ်ရပ်နေသော ကုချန်၏လူရိပ်မှာ တစ်စုံတစ်ခုကို သတိပြုမိသွားသည့်အလား ရုတ်တရက် မော့ကြည့်လာကာ အရာအားလုံးကို ထိုးဖောက်မြင်နိုင်စွမ်းရှိပုံရသော စူးရှသည့် မျက်လုံးတစ်စုံမှ သူ့ကို ပိတ်ဆို့လိုက်သည်ကို သတိထားမိလိုက်သောကြောင့်ပင်!
ဘာလဲ?!
ထိုအကြည့်ကြောင့် မှင်တက်သွားကာ ရှာနာနတ်ဆိုးဧကရာဇ်၏ နှလုံးသားမှာ အလိုအလျောက် ခဏတာမျှ ထိတ်လန့်သွားခဲ့၏။
သူ နားမလည်နိုင်ခဲ့ချေ။ ဤအချိန်ကာလအတွင်းတွင် ဤလူ ကြီးပြင်းလာခြင်း မရှိသေးသည်မှာ ရှင်းလင်းနေ၍ သူ၏ ကျင့်ကြံမှုမှာလည်း သနားစရာကောင်းသော အရှင်အဆင့်မျှသာ ရှိသေး၏။ သို့ဆိုလျှင် သူ ထုတ်လွှတ်ထားသော ဖိအားအောက်တွင် ထိုသူသည် မည်သို့ လွတ်လပ်စွာ လှုပ်ရှားနိုင်၍ သူ့ကိုပင် မော့ကြည့်ကာ အကြည့်ချင်း ဆုံနိုင်ခဲ့သနည်း။ ရှာနာနတ်ဆိုးဧကရာဇ်မှာ လုံးဝကို စိတ်ရှုပ်ထွေးသွားခဲ့၏။
ထို့နောက် ပေါ်ထွက်လာသော မြင်ကွင်းက သူ၏မျက်လုံးများကို ဒေါသတကြီးဖြင့် ပို၍ ပြူးကျယ်သွားစေခဲ့သည်။
ဧကရာဇ်ဂိတ်ပေါ်တွင် မတ်တပ်ရပ်နေသော လူရိပ်သည် မော့ကြည့်ပြီးနောက် လက်ညှိုးတစ်ချောင်းကို ပေါ့ပေါ့ပါးပါး မြှောက်ကာ ရှာနာနတ်ဆိုးဧကရာဇ် ရှိရာဘက်သို့ အဝေးမှ လှမ်း၍ ထိုးပြလိုက်လေသည်။
သူ၏ ဟန်ပန်မှာ အေးဆေးပေါ့ပါးလွန်းလှကာ သူ၏ ပြိုင်ဘက်မှာ ကောင်းကင်ဘုံများအားလုံးကို အထက်စီးမှ ကြည့်နိုင်သည့် ပြိုင်ဘက်ကင်း နတ်ဆိုးဧကရာဇ်တစ်ပါး ဖြစ်နေသည်ကို လုံးဝ မသိရှိသည့်အလား၊ ပုရွက်ဆိတ်တစ်ကောင်ကို ပေါ့ပေါ့ပါးပါး ချေမွတော့မည့်အလား ရှိလေသည်။
သို့သော် ထိုလက်ညှိုး ထိုးပြလိုက်သောအခါ အရာအားလုံး ပြောင်းလဲသွားခဲ့၏။
လက်ချောင်းထိပ်မှနေ၍ တောက်ပလင်းလက်သော ဓားအလင်းတန်းတစ်မျှင် ပျံ့နှံ့ထွက်ပေါ်လာကာ ယှဉ်ပြိုင်ကင်းသော အင်မော်တယ်ဓားတစ်လက်အဖြစ် ပြောင်းလဲသွား၍ ကောင်းကင်ယံဆီသို့ ခုတ်ပိုင်းသွားသည့်အလား ရှိလေသည်။
ထိုအင်မော်တယ်ဓားပေါ်တွင် အေးစက်သော အလင်းတန်းများ ထွက်ပေါ်နေပြီး အလင်းတန်း တစ်မျှင်စီတိုင်းမှာ ဟွမ်သွမ့်များကို ခုတ်ပိုင်းရန်နှင့် အရာအားလုံးကို ဖျက်ဆီးပစ်ရန် လုံလောက်နေကာ ဤရှေးဟောင်း သမိုင်းကြောင်းကိုပင် နှစ်ပိုင်းပြတ်အောင် ခုတ်ပိုင်းပစ်တော့မည့်အလား ရှိလေသည်။
"ရွှမ်း...! "
ဓားအလင်းတန်းမှာ ကောင်းကင်ယံသို့ ပျံတက်သွား၍ ယှဉ်ပြိုင်ကင်းသော နတ်ဆိုးစွမ်းအားများ ပါဝင်သည့် ရှာနာနတ်ဆိုးဧကရာဇ်၏ လက်ဝါးမှာ ထိုဓားရှေ့တွင် ထက်မြက်သော ဓားတစ်လက်ဖြင့် ခုတ်ပိုင်းခံရသည့် ဆီပူများကဲ့သို့ သွေးတစ်စက်မျှပင် မကျန်ရစ်စေဘဲ တိတ်တဆိတ် ပျောက်ကွယ်သွားခဲ့လေသည်။
ရှာနာနတ်ဆိုးဧကရာဇ်၏ နှလုံးသားမှာ လန့်ဖျပ်သွား၍ သူ၏ကိုယ်အစစ်မှာလည်း ပေါက်ကွဲထွက်သွားကာ ကမ္ဘာကြီး၏ အရပ်လေးမျက်နှာကို ဖုံးလွှမ်းသွားသော မရေမတွက်နိုင်သည့် မှော်မှန်ပြင်များအဖြစ် ပြောင်းလဲသွားလေသည်။
ထိုမရေမတွက်နိုင်သော မှော်မှန်ပြင်များအတွင်း၌ မှန်ပြင်တစ်ခုစီတိုင်းတွင် ရှာနာနတ်ဆိုးဧကရာဇ်၏ လူရိပ်တစ်ခုစီ မတ်တပ်ရပ်နေလေ၏။ မှော်မှန်ပြင် တစ်ခု ကျန်ရှိနေသရွေ့ ရှာနာနတ်ဆိုးဧကရာဇ်သည် အနည်းငယ်မျှပင် ဒဏ်ရာရရှိမည် မဟုတ်ချေ!
သို့သော် ရှာနာနတ်ဆိုးဧကရာဇ်၏ နည်းလမ်းများကို ရင်ဆိုင်ရာတွင် ထိုယှဉ်ပြိုင်ကင်းသော ဓားအလင်းတန်းတစ်မျှင်သည် ဉာဏ်ရည်ရှိနေသည့်အလား လွှမ်းမိုးနိုင်သော အင်မော်တယ်ဓားမိုးရေများအဖြစ် ချက်ချင်း ပြောင်းလဲသွားကာ အဆုံးမရှိသော ထက်မြက်မှုများဖြင့် မရေမတွက်နိုင်သည့် မှော်မှန်ပြင်များဆီသို့ ခုတ်ပိုင်းသွားလေတော့သည်။
" ခွမ်း...! ခွမ်း...! ခွမ်း...! "
သတ္တုများ ထိခိုက်သံနှင့် ကွဲအက်သံများမှာ တစ်ပြိုင်နက်တည်းနီးပါး ထွက်ပေါ်လာခဲ့၏။
ထိုမရေမတွက်နိုင်သော မှော်မှန်ပြင်များ အားလုံးမှာ မျက်စိတစ်မှိတ်အတွင်း ကွဲအက်သွားကာ တစ်ခုမျှပင် မကျန်ရစ်တော့ချေ!
ရှာနာနတ်ဆိုးဧကရာဇ်၏ ကိုယ်အစစ်မှာလည်း သမိုင်းတစ်လျှောက် ပထမဆုံးအကြိမ်အဖြစ် နောက်သို့ လွင့်စင်သွားခဲ့၍ သူ၏ကိုယ်ပေါ်တွင် ထက်မြသော ဓားရာများစွာ ဖုံးလွှမ်းနေကာ ပြင်းထန်သော ဒဏ်ရာများကို ရရှိသွားခဲ့သည်မှာ ရှင်းလင်းလှပေသည်။
လက်ညှိုးတစ်ချောင်းတည်းဖြင့်ပင် ရှာနာနတ်ဆိုးဧကရာဇ်အား ဤမျှ အကျပ်ရိုက်သွားစေခဲ့လေသည်။