အခန်း (၁၆၄၉-၁၆၅၀)

အခန်း (၁၆၄၉) - ထိပ်တိုက်ရင်ဆိုင်ခြင်း

ဖန့်ချန်၏ စကားကို နားထောင်ပြီးနောက် ရှဲ့အာမန်၏ မျက်ဝန်းများထဲတွင် စဉ်းစားဆင်ခြင်နေသော အရိပ်အယောင်များ ပေါ်လာသည်။

"အဘိုးကြီးရဲ့ ခန့်မှန်းချက်က ဖြစ်နိုင်ခြေ အရမ်းများတယ်။ ကျိရှန်းအင်ပါယာထဲက ကျဆုံးမသေမျိုးအချို့ဟာ လက်ရှိအာဏာကို ဖြုတ်ချပြီး သူတို့ကိုယ်တိုင် အထက်စီးရဖို့ ကြံစည်နေပုံရတယ်"

ရှဲ့အာမန်က ဖြည်းဖြည်းချင်း ပြောလာသည်

"ဒါပေမဲ့... သွေးတံခါးနယ်စပ်မှာ သစ္စာဖောက်တွေ ရှိနေရင်တောင် ကျဆုံးမသေမျိုးတွေကို အထဲပေးဝင်ဖို့တော့ ဘယ်သူမှ မဝံ့ရဲကြဘူး။ အမှားအယွင်း တစ်ခုခုဖြစ်တာနဲ့ မသေမျိုးလောကငယ်ဟာ အဆုံးမရှိတဲ့ စစ်မီးတောက်တွေကြားထဲ ကျရောက်သွားပြီး၊ မျိုးတုံးပျောက်ကွယ်သွားရမယ့် အခြေအနေထိ ရောက်သွားနိုင်လို့ပဲ"

"လူတစ်ယောက်ကို ထည့်ထားနိုင်တဲ့ ရတနာမျိုး ရှိနိုင်မလား။ အဲဒီထဲမှာ ထည့်ပြီး နတ်ဘုရားလောကကနေ တိတ်တဆိတ် ခိုးထုတ်သွားမယ်ဆိုရင် သွေးတံခါးနယ်စပ်က စောင့်ကြပ်နေတဲ့ ကျင့်ကြံသူတွေတောင် သတိမထားမိဘဲ နေနိုင်မလား"

ဖန့်ချန်က မေးလိုက်သည်။

"မဖြစ်နိုင်တာတော့ မဟုတ်ဘူး၊ ဒါပေမဲ့ ဖြစ်နိုင်ခြေကတော့ အရမ်းနည်းတယ်"

ရှဲ့အာမန်က ရှင်းပြသည်

"အစစ်မှန်ဘုရင်မျိုးနွယ်စု ဆီမှာ စစ်မှန်သော နတ်ဘုရားမှန် လို့ခေါ်တဲ့ ဝိညာဉ်ရတနာ တစ်ခု ရှိတယ်။ အခု အဲဒီမှန်ရဲ့ တစ်ခုတည်းသော အလုပ်က သွေးတံခါးနယ်စပ်ကို စောင့်ကြည့်ဖို့ပဲ၊ အထူးသဖြင့် ကျဆုံးမသေမျိုးတွေရဲ့ အငွေ့အသက်ကိုပေါ့။

ဘယ်လိုနည်းလမ်းနဲ့ပဲ ဖုံးကွယ်ထားပါစေ စစ်မှန်သော နတ်ဘုရားမှန်ရဲ့ မျက်လုံးကနေ လွတ်ဖို့ ခက်ခဲတယ်။ ရှောင်ကွမ်းယင်တို့ အုပ်စု ခိုးဝင်လာနိုင်တာက သူတို့ဟာ ကျဆုံးမသေမျိုးတွေ မဟုတ်လို့ပဲ၊ မှန်က သူတို့ကို သတိမပြုမိတာ။

တကယ်လို့ ကျဆုံးမသေမျိုးရဲ့ အငွေ့အသက်ကိုသာ သတိပြုမိလိုက်ရင် အဆင့် ၉ ကျဆုံးမသေမျိုးတောင် အဲဒီနေရာမှာတင် ချက်ချင်း အနှိမ်နင်းခံရလိမ့်မယ် "

စစ်မှန်သော နတ်ဘုရားမှန် အဆင့် ၉ ကျဆုံးမသေမျိုးကိုတောင် နှိမ်နင်းနိုင်တယ် ဟုတ်လား။

ဖန့်ချန် မှတ်မိသွားသည်။ စစ်မှန်သော နတ်ဘုရားမှန်သည် ဝိညာဉ်ရတနာ အဆင့်သတ်မှတ်ချက်ဇယားတွင် အဆင့် ၃ ရှိသည်။

'အဆင့်မြင့် ဝိညာဉ်ရတနာတွေက အဆင့် ၉ ကျင့်ကြံသူကိုတောင် နှိမ်နင်းနိုင်တာလား။ ဒါဆို အဆင့် ၉ ကျင့်ကြံသူတွေထက်တောင် ပိုစွမ်းတာပေါ့' ဖန့်ချန် စိတ်ထဲမှ တိတ်တဆိတ် အံ့အားသင့်နေမိသည်။

"ဒီကိစ္စကို နတ်လမ်းစဉ်ဂိုဏ်းကနေ စပြီး စုံစမ်းလို့ရတယ်။ နံပါတ် ၉... အဲဒီလူတွေက နတ်လမ်းစဉ်ဂိုဏ်းကဆိုတာ မင်းသေချာလား"

ရှဲ့အာမန်က ဖန့်ချန်ကို ကြည့်ကာ မေးသည်။

"သေချာပါတယ်" ဖန့်ချန်က ခေါင်းညိတ်ပြလိုက်၏။

"နောက်တစ်ခါ သူတို့ကို ထပ်တွေ့ရင်ကော မင်း မှတ်မိဦးမလား"

"မှတ်မိတာပေါ့"

"ကောင်းပြီ"

ရှဲ့အာမန်က စကားအပိုမပြောတော့ဘဲ သူမ၏ စိတ်အာရုံကို လှုပ်ရှားလိုက်ရာ၊ အရပ်ရပ်သို့ ပြန့်ကျဲနေသော နတ်ဘုရားရွှေ့ပြောင်းခြင်း အဆောင် များသည် တစ်ခုပြီးတစ်ခု စတင်လောင်ကျွမ်းလာတော့သည်။

သူမ၏ အနီးအနားတွင် လူရိပ်များ တစ်ဦးပြီးတစ်ဦး ပေါ်လာသော်လည်း ၇ ယောက်၊ ၈ ယောက်ခန့် လျော့နည်းနေသည်ကို တွေ့ရသည်။

နန်မင်ရုယွဲ့ ပေါ်လာသောအခါ သူကြုံတွေ့ခဲ့ရသည်များကို ရှဲ့အာမန်ထံသို့ စိတ်ချင်းဆက်သွယ်ကာ ချက်ချင်း အစီရင်ခံလိုက်သည်။

"စီနီယာအစ်မကြီး... ဘာလို့ လူတွေ ဒီလောက် အများကြီး လျော့နေတာလဲ"

လီရှမ်းဇီက အံ့အားသင့်စွာ မေးလိုက်သည်။

"သူတို့တွေက ကျွယ်မင်နန်းတော်ရဲ့ သစ္စာဖောက်တွေပဲ။ ရှောင်ကွမ်းယင်ရဲ့ သိမ်းသွင်းမှုကို ခံလိုက်ရတာ။ တချို့က နံပါတ် ၉ ကို တိုက်ခိုက်ခဲ့သလို၊ တချို့ကတော့ နံပါတ် ၅ ကို တိုက်ခိုက်ခဲ့ကြတယ်"

ရှဲ့အာမန်က ခပ်အေးအေးပင် ဆိုသည်

"ဒါကြောင့် သူတို့အားလုံး သေကုန်ကြပြီ"

အားလုံးမှာ ရုတ်ရုတ်သဲသဲ ဖြစ်သွားကြပြီး မယုံကြည်နိုင်သလို ခံစားလိုက်ရသည်။ ကျွယ်မင်နန်းတော်ရဲ့ အမာခံတပည့်တွေ ဖြစ်နေပြီကိုတောင် ဘယ်လိုလုပ် သစ္စာဖောက်နိုင်ကြတာလဲ ရှောင်ကွမ်းယင်က သူတို့ကို ဘယ်လောက်တောင် များပြားတဲ့ အကျိုးအမြတ်တွေ ပေးခဲ့လို့ ဒီလိုကိစ္စမျိုးကို လုပ်ခဲ့ကြတာလဲ။

တကယ်လို့ ဒီစကားကို တခြားသူဆီက ကြားရရင်တော့ သူတို့ လုံးဝယုံမှာ မဟုတ်ဘဲ အဲဒီလူကိုတောင် ပြန်ဆဲမိမှာ သေချာသည်။ သို့သော် အခုက ရှဲ့အာမန်ကိုယ်တိုင် ပြောနေခြင်းဖြစ်၍ မယုံ၍ မရပေ။

"ကဲ... တချို့ကိစ္စတွေကိုတော့ အခုလောလောဆယ် မင်းတို့ အသေးစိတ် သိစရာမလိုသေးဘူး။ အခု ငါနဲ့အတူ သွေးတံခါးနယ်စပ်ကို ပြန်ကြမယ်။ အချိန်မီမယ်လို့ မျှော်လင့်ရတာပဲ"

ရှဲ့အာမန်သည် နဂါးနက်လှေ ကို ထုတ်လိုက်ပြီး အားလုံး တက်ပြီးသည်နှင့် လှေသည် ဟင်းလင်းပြင်ထဲတွင် အလွန်လျှင်မြန်သော အရှိန်ဖြင့် စတင်ခရီးနှင်တော့သည်။

အရှိန်မှာ ပိုပိုမြန်လာပြီး နောက်ဆုံးတွင် တစ်စုံတစ်ခုသော အငွေ့အသက်နှင့် ဆက်သွယ်မိသွားကာ မျက်တောင်တစ်ခတ်အတွင်း ဟင်းလင်းပြင်ထဲသို့ ပျောက်ကွယ်သွားတော့သည်။

မသေမျိုးလောကငယ်၊ သွေးတံခါးနယ်စပ်။

ရှဲ့အာမန်က လူတိုင်းကို လှေပေါ်တွင် စောင့်နေရန် အမိန့်ပေးခဲ့ပြီး၊ သူမသည် ချန်အင်းရွှယ်၊ ဆဋ္ဌမမြောက် ကြယ်တာရာတို့နှင့်အတူ ထိုနေရာရှိ စောင့်ကြပ်သူအချို့ထံသို့ သွားရောက်ခဲ့သည်။

"ဖန့်အမာခံတပည့်... မိတ်ဆွေကြာနီရဲ့ ဒဏ်ရာက ပြင်းထန်လား"

လူတိုင်းက ဖန့်ချန်အနားသို့ စုရုံးလာကြပြီး စိုးရိမ်တကြီး ကြည့်နေကြသည်။ အခုနကတည်းက ကြာနီနတ်မိမယ်ရဲ့ အခြေအနေ မကောင်းတာကို သူတို့ သတိထားမိကြသော်လည်း မေးရန် အချိန်မရခဲ့ခြင်း ဖြစ်သည်။

"ကိစ္စမရှိပါဘူး၊ ထူးဆန်းတဲ့ အဆိပ်နံ့တစ်ခုကြောင့် သုံးလေးငါးနှစ်လောက် အိပ်ပျော်သွားမှာပါ။ အသက်အန္တရာယ်တော့ မရှိပါဘူး"

ဖန့်ချန်က ဖြေလိုက်သည်။

နန်မင်ရုယွဲ့က သက်ပြင်းတစ်ချက်ချကာ

"ငါတို့ ကျွယ်မင်နန်းတော်ထဲမှာ ကိုယ့်ညီအစ်ကို မောင်နှမအချင်းချင်းတောင် လုပ်ရက်တဲ့ သစ္စာဖောက်တွေ ရှိနေမယ်လို့ ထင်မထားခဲ့ဘူး"

လူတိုင်း တိတ်ဆိတ်သွားကြပြီး ဘာပြောရမှန်း မသိတော့ပေ။ ရှူခွန်းနဲ့ တခြားအမာခံတပည့်တွေ ဘာကြောင့် သစ္စာဖောက် ဖြစ်သွားရတာလဲဆိုတာကို သူတို့ ခုထိ စဉ်းစားမရသေးပေ။

သူတို့ဟာ အစကတည်းက ရှောင်ကွမ်းယင်ရဲ့ လူတွေလား ဒါဆိုရင်တော့ တကယ်ကို ရယ်စရာကောင်းလှသည်။

"တကယ်တော့လည်း ကောင်းပါတယ်၊ စီနီယာအစ်မကြီးက ဒီတစ်ခါ အကွက်ချလိုက်လို့ ငါတို့ ကျွယ်မင်နန်းတော်အတွက် အန္တရာယ်ရှိတဲ့ အညှောင့်အညှောက်တွေကို ရှင်းထုတ်နိုင်ခဲ့တာပေါ့"

လီရှမ်းဇီက ဖြည်းဖြည်းချင်း ဆိုသည်။

ကျိရှန့်သည်လည်း အရင်ကလောက် စိတ်မကောင်း မဖြစ်တော့ပေ။ ရှူခွန်းတို့လို အမာခံတပည့်တွေတောင် သစ္စာဖောက် ဖြစ်နေမှတော့ ကျိထျန်းကျွင်းလို အပြင်စည်းကျင့်ကြံသူတစ်ယောက် ပါဝင်နေတာက ဘာမှ မထူးဆန်းတော့သလို ခံစားလိုက်ရသည်။

လီရှမ်းဇီရဲ့ စကားကို ကြားသောအခါ လူတိုင်းက ခေါင်းညိတ်လိုက်ကြသည်။ ထိုခရီးစဉ်ကို ဖြတ်သန်းပြီးနောက် အားလုံးရဲ့ ဆက်ဆံရေးမှာ ပိုမိုနီးကပ်လာသလို ခံစားကြရသည်။ အနည်းဆုံးတော့ အခု ကျန်နေတဲ့သူတွေထဲမှာ ဘာပြဿနာမှ မရှိတော့ပေ။ ပြဿနာရှိသူတွေကတော့... အပြီးတိုင် ဖယ်ရှားခံလိုက်ရပြီ ဖြစ်သည်။

နာရီဝက်ခန့် ကြာသောအခါ...

မသေမျိုးလှေ အချို့သည် ထိုဘက်သို့ ဖြည်းညှင်းစွာ မောင်းနှင်လာကြသည်။ ထိုအထဲတွင် အစောပိုင်းက သူတို့ကို လမ်းပြပေးခဲ့သော အဖွားအိုလည်း ပါဝင်သည်။

သူမမှာ မြေမသေမျိုးမျိုးနွယ် မှ စောင့်ကြပ်သူ၊ အဆင့် ၈ ရှေးဟောင်းမသေမျိုး ဖြစ်ပြီး အဆင့် ၉ ကျဆုံးမသေမျိုး လက်ချက်ဖြင့် ဒဏ်ရာရဖူးသူ ဖြစ်သည်။

သူမအပြင် သက်လတ်ပိုင်းအရွယ် ကျင့်ကြံသူတစ်ဦးလည်း ပါလာပြီး သူ၏ကိုယ်မှ အဆင့် ၈ ရှေးဟောင်းမသေမျိုး အရှိန်အဝါများ ထွက်ပေါ်နေသည်။ ထိုလူကြီး၏ နောက်ကွယ်တွင်တော့ ဖန့်ချန် အလွန်ရင်းနှီးနေသော လူရိပ်လေးခု ရပ်နေသည်ကို တွေ့လိုက်ရ၏။

ထိုသူတို့မှာ ရှန်းယွမ်ဈေးတွင် ယွမ်သခင်လေးနှင့် အလောင်းအစား လုပ်ခဲ့ကြသော နတ်လမ်းစဉ်ဂိုဏ်းမှ ကျင့်ကြံသူ လေးဦးပင် ဖြစ်သည်။

"နံပါတ် ၉... လာပြီး လူခွဲခြားကြည့်စမ်း"

ရှဲ့အာမန်က လေထဲတွင် ရပ်နေရင်း ဖန့်ချန်ကို ခေါင်းညိတ်ပြလိုက်သည်။

ဖန့်ချန်က စကားအပိုမပြောဘဲ ထိုလူရိပ်လေးခုကို လက်ညှိုးထိုးပြကာ

"စီနီယာအစ်မကြီး... သူတို့တွေပါပဲ"

ထိုလေးဦးမှာ ထိတ်လန့်သွားကြပြီး တစ်ဦးကိုတစ်ဦး ကြည့်ကာ မျက်လုံးထဲတွင် ဝေခွဲမရသည့် ပဟေဠိများဖြင့် ပြည့်နှက်နေသည်။

နန်မင်ရုယွဲ့တို့ အုပ်စုကတော့ ဘာတွေဖြစ်နေလဲဆိုတာ အတိအကျ မသိသော်လည်း၊ ဒီအခြေအနေကို ကြည့်ခြင်းအားဖြင့် ဖန့်ချန်ဟာ နတ်ဘုရားလောက ထဲမှာ တစ်ခုခု ကြုံတွေ့ခဲ့ရမှန်း ခန့်မှန်းမိကြသည်။

"ညီလေး... မင်း နတ်ဘုရားလောကထဲမှာ သူတို့လေးယောက်ကို တွေ့ခဲ့တယ်လို့ ပြောတာလား"

ထိုသက်လတ်ပိုင်းအရွယ် ကျင့်ကြံသူက ဖန့်ချန်ကို ပြုံး၍ မေးလိုက်သည်။

"ဟုတ်ပါတယ်၊ ဟန်စန်းကျောင်းတော် နယ်မြေထဲက ရှန်းယွမ်ဈေးမှာပါ"

ဖန့်ချန်က ခေါင်းညိတ်လိုက်သည်။

မထင်မှတ်ထားစရာ မရှိလျှင်တော့ ထိုလူကြီးမှာ ဟိုဘက်မှာ တိတ်တဆိတ် ကမ်းလှမ်းခဲ့သည့် အဆင့် ၈ ရှေးဟောင်းမသေမျိုး ဖြစ်ပေလိမ့်မည်။

ထိုလူကြီးဆီမှာလည်း ယန်ဘူးသီး တစ်လုံး ရှိနေမလားဆိုတာ ဖန့်ချန် သိချင်နေမိသည်။

ရှဲ့အာမန်က စစ်မှန်သော နတ်ဘုရားမှန်သည် အလွန်အစွမ်းထက်ပြီး အဆင့် ၉ ကျဆုံးမသေမျိုးတောင် မလွတ်နိုင်ဘူးလို့ ပြောခဲ့ပေမဲ့၊ ယန်ဘူးသီး ကလည်း နောက်ခံမသေးသလို လူသားတွေကို ယင်လောကထဲ ခေါ်သွားနိုင်တဲ့ အစွမ်းရှိသည် မဟုတ်လား။

ရှဲ့အာမန်၏ မျက်မှောင်များ အနည်းငယ် ကြုတ်သွားပြီး ချန်အင်းရွှယ်မှာလည်း လေးနက်သော အမူအရာဖြင့် ဖန့်ချန်ကို အကြိမ်ကြိမ် ကြည့်နေမိသည်။

မြေမသေမျိုးမျိုးနွယ်မှ အဖွားအိုက နှာခေါင်းတစ်ချက် ရှုံ့ကာ ရယ်လိုက်ပြီး ရှဲ့အာမန်ကို ကြည့်လိုက်သည်။

"မိတ်ဆွေရှဲ့... ဒီကိစ္စအတွက် ကျွယ်မင်နန်းတော်က ရှင်းပြချက်တစ်ခု ပေးသင့်တယ်နော်"

ဖန့်ချန် စိတ်လှုပ်ရှားသွားသည်။ အခြေအနေက တစ်ခုခု မှားနေသလိုပဲ

မှန်ပေသည်၊ ထိုလူကြီးက ရုတ်တရက် ရယ်မောကာ ပြောလာသည်။

"ငါတို့က မသေမျိုးလောကငယ်ကို အခုမှ ရောက်တာလေ၊ နတ်ဘုရားလောကထဲကိုတောင် မဝင်ရသေးဘူး။ ညီလေးက ဘယ်လိုလုပ်ပြီး သူတို့လေးယောက်ကို အထဲမှာ တွေ့ခဲ့တာလဲ ဒါနဲ့... မင်း ငါ့ကိုရော တွေ့ခဲ့သေးလား ဟားဟား"

မသေမျိုးလောကငယ်ကို အခုမှ ရောက်တာ ဟုတ်လား။

"ကျွန်တော်... သူတို့ကို နတ်ဘုရားလောကထဲမှာ တကယ်တွေ့ခဲ့တာပါ။ ဟန်စန်းကျောင်းတော် နယ်မြေထဲက ရှန်းယွမ်ဈေးမှာ သူတို့တွေ ရှန်းယွမ်ကျောက်တုံး လောင်းကြေးထပ်နေကြတုန်း တာပေ့စစ်တပ်ရဲ့ တိုက်ခိုက်မှုကို ခံခဲ့ရတာပါ"

ဖန့်ချန်က တည်ငြိမ်ပြတ်သားသော လေသံဖြင့် ပြောလိုက်သည်။

"နံပါတ် ၉... သွေးတံခါးနယ်စပ်ရဲ့ အဝင်အထွက် မှတ်တမ်းတွေအရ သူတို့တွေဟာ မသေမျိုးလောကငယ်ကို အခုမှ ရောက်တာ သေချာတယ်။ နယ်စပ်ကိုတောင် မဖြတ်ရသေးဘူး။ ဒီမှတ်တမ်းကို စစ်မှန်သော နတ်ဘုရားမှန် က ထိန်းချုပ်ထားတာမို့ ဘယ်သူမှ ပြင်လို့မရဘူး"

ရှဲ့အာမန်က ရုတ်တရက် ပြုံးလိုက်ပြီးနောက် ထိုလူကြီးကို လက်အုပ်ချီကာ ဆိုသည်။

"မိတ်ဆွေ... ဒါက အထင်လွဲမှုတစ်ခုပါ"

"ကိစ္စမရှိပါဘူး၊ ရပါတယ်"

ထိုလူကြီးက ရယ်မောရင်း လက်ယမ်းပြလိုက်သည်။ သူက ဖန့်ချန်ကို တစ်ချက် ထပ်ကြည့်လိုက်ပြီးမှ ထိုလေးဦးကို ခေါ်ဆောင်ကာ လှည့်ထွက်သွားတော့သည်။

အဖွားအိုကလည်း ဘာမှ ထပ်မပြောတော့ဘဲ ရှဲ့အာမန်ကို ခေါင်းတစ်ချက် ညိတ်ပြကာ ထိုလူကြီးနောက်မှ လိုက်သွားခဲ့သည်။

ရှဲ့အာမန်နှင့် ချန်အင်းရွှယ်တို့ နဂါးနက်လှေ ပေါ်သို့ ပြန်လည် ပျံတက်လာကြသည်။ ဖန့်ချန် စကားမပြောရသေးမီမှာပင် ရှဲ့အာမန်က စိတ်ချင်းဆက်သွယ်ကာ လှမ်းပြောလိုက်သည်။

"ဘာမှမပြောနဲ့တော့။ မင်း အမြင်မမှားဘူးဆိုတာ ငါယုံတယ်။ နတ်လမ်းစဉ်ဂိုဏ်းမှာ တကယ်ပဲ တစ်ခုခု ထူးဆန်းနေတယ်။ ဒါပေမဲ့ ဒီကိစ္စက ပတ်သက်မှုတွေ အရမ်းကျယ်ပြန့်နိုင်လို့ ငါတို့ ကျွယ်မင်နန်းတော်ကို အရင်ဆုံး ပြန်ကြရအောင်"

အခန်း (၁၆၅၀) - ၎င်းတို့၊ နိုးထလာကြပြီ ဖြစ်နိုင်သည်

ရှဲ့အာမန်သည် စိတ်ချင်းဆက်သွယ်၍ စကားပြောပြီးနောက် မလှမ်းမကမ်းတွင်ရှိသော ဆဋ္ဌမမြောက် ကြယ်တာရာကို လှမ်းအော်ပြောလိုက်သည်။

"အဘိုးကြီး... ငါတို့ အရင်သွားတော့မယ်နော်၊ အားတဲ့အခါ ကျွယ်မင်နန်းတော်ဘက်ကို လာလည်ဦး"

"ငါ အခုပဲ အားတယ်လေ" ဆဋ္ဌမမြောက် ကြယ်တာရာက ပြန်အော်ပြောသည်။

ရှဲ့အာမန်မှာ အနည်းငယ် ကြောင်အသွားပြီးနောက် ချက်ချင်းပင် နဂါးနက်လှေကို မောင်းနှင်ကာ ဟင်းလင်းပြင်ထဲသို့ ပျောက်ကွယ်သွားတော့သည်။

ဆဋ္ဌမမြောက် ကြယ်တာရာမှာ လှေပေါ်တက်ရန် ပြင်နေဆဲဖြစ်သော်လည်း ဤမြင်ကွင်းကို မြင်လိုက်ရသောအခါ ရုတ်တရက် ဆွံ့အသွားပြီး အားတယ် ဆိုသည့် စကားလုံး၏ အဓိပ္ပာယ်ကို သူ့ဦးနှောက်ထဲတွင် အသစ်ပြန်လည် အဓိပ္ပာယ်ဖွင့်ဆိုနေရတော့သည်။

"စီနီယာအစ်မကြီး... ကျိမိသားစုက ကျိထုံ ဆိုတဲ့လူနဲ့ ကျွန်တော်နဲ့က ရေစက်အနည်းငယ် ရှိလို့၊ သူ့ကိုပါ တစ်ပါတည်း ခေါ်သွားပေးပါလား"

နဂါးနက်လှေသည် ကျိမိသားစုနယ်မြေကို ဖြတ်သန်းသွားစဉ် ဖန့်ချန်က ရုတ်တရက် စိတ်ချင်းဆက်သွယ်၍ တောင်းဆိုလိုက်သည်။ ရှဲ့အာမန်မှာ ခေတ္တမျှ မှင်တက်သွားသော်လည်း အများကြီး စဉ်းစားမနေဘဲ သဘောတူလိုက်၏။

ဖန့်ထုံ (ကျိထုံ) တစ်ယောက် မသေမျိုးလှေပေါ်သို့ ရောက်လာသောအခါ သူကိုယ်တိုင်ပင် မယုံနိုင်ဘဲ ဖြစ်နေရသည်။ သူသည် တကယ်ပဲ ကျွယ်မင်နန်းတော်သို့ လိုက်ပါသွားရတော့မည်လော။

ကျိရှန့်သည်လည်း ကျိမိသားစုဝင် တစ်ယောက်အနေဖြင့် ဖန့်ချန်နှင့် ဖန့်ထုံတို့ ရင်းနှီးသည်ကို မြင်သောအခါ ဝမ်းသာသွားပြီး သူတို့အနားသို့ လာကာ ခေတ္တမျှ စကားပြောဆိုခဲ့ကြသည်။

အပြန်ခရီးမှာ အလွန်ပင် ချောမွေ့ခဲ့ပြီး မည်သည့် မတော်တဆမှုမျှ မရှိခဲ့ပေ။ နဂါးနက်လှေသည် ကျွယ်မင်နန်းတော်သို့ ပြန်လည်ရောက်ရှိချိန်တွင် ဆယ်စုနှစ်တစ်ခုကျော်ပင် ကုန်လွန်သွားခဲ့ပြီ ဖြစ်သည်။

"ဒီတစ်ခေါက် ကြုံခဲ့ရတာတွေကို မင်းတို့ ဗိုက်ထဲမှာပဲ ပုပ်ထွက်သွားတဲ့အထိ သိမ်းထားကြ။ တကယ်လို့ အပြင်ကို ပေါက်ကြားသွားရင်တော့ အရိုက်ခံရမယ်လို့သာ မှတ်ထားကြပေတော့"

ရှဲ့အာမန်က လူတိုင်းကို ဝေ့ကြည့်ကာ အေးစက်စွာ ပြောလိုက်သည်။

လူတိုင်းက အလျင်အမြန်ပင် ခေါင်းညိတ် ကတိပေးကြ၏။

အပြန်ခရီးလမ်းတွင် သတိရလာခဲ့သော ကြာနီနတ်မိမယ်သည် သူမ အိပ်ပျော်နေစဉ်အတွင်း ဖြစ်ပျက်ခဲ့သမျှကို ဖန့်ချန်၏ ပြောပြချက်အရ သိရှိသွားခဲ့သည်။

"မိတ်ဆွေဖန့်... ကျွန်မ နည်းနည်း ပင်ပန်းနေလို့၊ ကျင့်ကြံရာနေရာကို အရင်ပြန်ပြီး အနားယူလိုက်ဦးမယ်"

ကြာနီနတ်မိမယ်က မျက်နှာပေါ်တွင် အားယူကာ ပြုံးရင်း ဖန့်ချန်ကို လက်အုပ်ချီ နှုတ်ဆက်ကာ သူမ၏ မသေမျိုးလှေကို ထုတ်၍ ပျံသန်းထွက်ခွာသွားတော့သည်။

အခြားသော အမာခံတပည့်များလည်း တစ်ဦးပြီးတစ်ဦး ထွက်ခွာသွားကြရာ နောက်ဆုံးတွင် ရှဲ့အာမန်၊ ချန်အင်းရွှယ် နှင့် ဖန့်ချန်၊ ဖန့်ထုံ ညီအစ်ကိုနှစ်ဦးသာ ကျန်ရစ်တော့သည်။

"စီနီယာအစ်မကြီး... ကျွန်တော် သူ့ကို အရင်ခေါ်သွားပြီး မှတ်ပုံတင်လိုက်ဦးမယ်"

ဖန့်ချန်က ဖန့်ထုံကို တစ်ချက်ကြည့်ကာ ရှဲ့အာမန်ကို ပြောလိုက်သည်။

"အင်း... သူ့ကို အရင်နေရာချထားပေးလိုက်ဦး၊ ပြီးရင် ငါ့ဆီ လာခဲ့ပါဦး"

ရှဲ့အာမန်က ခေါင်းညိတ်ပြကာ ဖန့်ချန်နှင့် ဖန့်ထုံတို့ ထွက်ခွာသွားသည်ကို ကြည့်နေရင်းမှ ချန်အင်းရွှယ်ကို တစ်ချက် လှည့်ကြည့်လိုက်သည်။

"ဘယ်လိုလဲ ဒီတစ်ခေါက်ကိစ္စက တကယ်ပဲ အခြေအနေ ဆိုးနေတာလား "

ချန်အင်းရွှယ်သည် ရှဲ့အာမန်၏ မူမမှန်မှုကို အစောကတည်းက ရိပ်မိထားခြင်း ဖြစ်သည်။ သူမ၏ မျက်နှာတွင် အရင်ကလို ပေါ့ပေါ့ပါးပါး အပြုံးများ မရှိတော့ဘဲ လေးနက်သော အရိပ်အယောင်များဖြင့် ဖုံးလွှမ်းနေသည်။

"သူတို့... နိုးထလာကြပြီ ဖြစ်နိုင်တယ်"

ရှဲ့အာမန်က ဆိုသည်။

"သူတို့ ဘယ်သူတွေကို ပြောတာလဲ နင် ဘယ်သူ့ကို ရည်ညွှန်းနေတာလဲ "

ချန်အင်းရွှယ်မှာ ခေတ္တမျှ နားမလည်နိုင် ဖြစ်သွားသည်။

ထိုအချိန်တွင် လူရိပ်တစ်ခု လေကိုခွဲ၍ ရောက်ရှိလာရာ၊ ၎င်းမှာ အကြီးကဲအဖွဲ့ မှ အကြီးကဲဟောက် ပင် ဖြစ်သည်။

"ဒီတစ်ခေါက်ကိစ္စကို အကြီးကဲအဖွဲ့က သိပြီးပြီ။ သစ္စာဖောက်သွားတဲ့ အမာခံတပည့်တွေရဲ့ နာမည်ကို ကျွယ်မင်နန်းတော်ရဲ့ မှတ်တမ်းကနေ ပယ်ဖျက်လိုက်ပြီ။ ဒါပေမဲ့ နင်ပြောတဲ့ နောက်ထပ် အရေးကြီးတဲ့ ကိစ္စက ဘာလဲ "

အကြီးကဲဟောက်က လေးနက်သော လေသံဖြင့် မေးလိုက်သည်။

"ကျွန်မ ထင်တာကတော့ အစည်းအဝေး တစ်ခုလောက် လုပ်သင့်တယ် ထင်တယ်။ အကြီးကဲတွေ အားလုံးကို သူတို့ရဲ့ သဘောထားတွေ၊ အမြင်တွေကို ပြောခိုင်းကြည့်ရအောင်။ ဘာပဲဖြစ်ဖြစ် ဒီကိစ္စက ခန့်မှန်းချက်သက်သက်ပဲ ရှိသေးတာ၊ ခိုင်လုံတဲ့ သက်သေအထောက်အထားတော့ မရှိသေးဘူး"

ရှဲ့အာမန်က ဆိုသည်။

အကြီးကဲဟောက် နှင့် ချန်အင်းရွှယ် တို့၏ မျက်နှာတွင် တွန့်ဆုတ်နေသော အရိပ်အယောင်များ ပေါ်လာသည်။

"ကောင်းပြီလေ... ငါ သူတို့ကို သွားအကြောင်းကြားလိုက်မယ်"

အကြီးကဲဟောက်က ခေါင်းညိတ်လိုက်သည်။

ကျွယ်မင်နန်းတော်၏ ခေါင်းဆောင်က အစည်းအဝေးလုပ်ရန် တောင်းဆိုလာသဖြင့် အကြီးကဲအဖွဲ့ဘက်ကလည်း ပူးပေါင်းဆောင်ရွက်ပေးရန် လိုအပ်ပေသည်။

"အစ်ကိုကြီး... အဖေနဲ့အမေက အခု ဘယ်မှာလဲဟင်"

ဖန့်ထုံသည် ဖန့်ချန်၏ နောက်မှ တစ်လှမ်းချင်း လိုက်ပါလာရင်း မေးလိုက်သည်။ သူသည် မှတ်ပုံတင်ခြင်း အောင်မြင်သွားခဲ့ပြီ ဖြစ်ကာ ဤနေရာ၏ အပြင်စည်းကျင့်ကြံသူ တစ်ဦး ဖြစ်လာခဲ့ပြီ ဖြစ်သည်။

ထိုနေရာရှိ ကျင့်ကြံသူများသည် ဖန့်ချန်အပေါ် အလွန်ကောင်းမွန်စွာ ဆက်ဆံကြသည်ကိုလည်း သူ ကိုယ်တိုင် မြင်တွေ့ခဲ့ရပြီး၊ လူအများအပြား၏ အပြောအဆိုများတွင် ရိုသေလေးစားမှုများ ပါဝင်နေသည်။

"အဖေနဲ့အမေရဲ့ သွားလာမှုက အတည်တကျ မရှိဘူး၊ အခု သူတို့ ဘယ်မှာလဲဆိုတာ ငါလည်း မသိဘူး။ မင်း ကျွယ်မင်နန်းတော်ကို ရောက်လာပြီဆိုတော့ တခြားဟာတွေ အများကြီး မတွေးနဲ့၊ ကျင့်ကြံခြင်းကိုပဲ အာရုံစိုက်။ တကယ်လို့ တစ်နေ့နေ့မှာ ငါ သူတို့ကို ရှာတွေ့ရင် မင်းနဲ့ တခြား မောင်နှမတွေကိုပါ ခေါ်သွားပြီး သူတို့နဲ့ တွေ့ခိုင်းမယ်"

ဖန့်ချန်က စိတ်ချင်းဆက်သွယ်၍ သတိပေးလိုက်သည်။

"ငါနဲ့ မင်းရဲ့ ပတ်သက်မှုကိုတော့ လျှို့ဝှက်ထားပါ။ တချို့လူတွေက ဒီကိစ္စကို အသုံးချပြီး ပြဿနာရှာမှာ စိုးလို့"

"တခြား မောင်နှမတွေ"

ဖန့်ထုံမှာ ခေတ္တမျှ ကြောင်အသွားပြီးနောက် သူ၏ မျက်ဝန်းထဲတွင် မျှော်လင့်ချက်နှင့်အတူ အနည်းငယ် စိုးရိမ်တုန်လှုပ်သော အရိပ်အယောင်များ ဖြတ်ပြေးသွားသည်။

ထိုအချိန်တွင် တိုက်ပွဲတစ်ရာ မသေမျိုး သည် လေထဲမှ ရုတ်တရက် ရောက်ရှိလာသည်။ သူသည် ဖန့်ထုံကို တစ်ချက် ဝေ့ကြည့်လိုက်ပြီးနောက် ဖန့်ချန်ကို ပြုံး၍ နှုတ်ဆက်လိုက်သည်။

"ဖန့်အမာခံတပည့်... စီနီယာအစ်မကြီးက ခင်ဗျားကို အကြီးကဲအဖွဲ့ဆီ ခဏလာခဲ့ဖို့ ဖိတ်ခေါ်ခိုင်းလိုက်ပါတယ်"

"ကောင်းပါပြီ"

ဖန့်ချန်က ခေါင်းညိတ်ပြကာ၊ ဖန့်ထုံကို ဤနေရာတွင် စောင့်နေရန် မှာကြားပြီးနောက် တိုက်ပွဲတစ်ရာ မသေမျိုးနှင့်အတူ အကြီးကဲအဖွဲ့ ရှိရာသို့ ပျံသန်းသွားတော့သည်။

အကြီးကဲအဖွဲ့

လူကြီးအချို့မှာ ကျင့်ကြံနေရင်းမှ ဖြစ်စေ၊ ဆေးလုံးဖော်စပ်နေရင်းမှ ဖြစ်စေ အကြီးကဲဟောက်၏ ခေါ်ယူမှုကြောင့် ဤနေရာသို့ ရောက်လာကြပြီး စိတ်ထဲတွင် သံသယများဖြင့် ပြည့်နှက်နေကြသည်။

"အကြီးကဲဟောက်... အကြီးကဲအစည်းအဝေး လုပ်ရလောက်အောင် ဘာတွေ အရေးကြီးနေလို့လဲ "

ကျားသစ်ခေါင်းနှင့် လူကိုယ်ခန္ဓာရှိသော လူကြီးတစ်ဦးက ဇဝေဇဝါဖြင့် မေးလိုက်သည်။

အကြီးကဲအဖွဲ့တွင် စုစုပေါင်း အကြီးကဲ ၃၇ ဦး ရှိသည်။ အပြင်တွင် အလုပ်ကိစ္စဖြင့် ရောက်နေသူများမှလွဲ၍ ကျွယ်မင်ဂြိုဟ်ပေါ်တွင် ရှိနေသူအားလုံးကို ခေါ်ယူထားခြင်း ဖြစ်သည်။

နှစ်ပေါင်း ထောင်ချီအောင် ကျင့်ကြံနေပြီး လူလုံးမပြခဲ့သော အကြီးကဲအချို့ပင် ယနေ့တွင် ပေါ်လာခဲ့ကြသည်။ ဤကဲ့သို့သော အနေအထားမျိုးသည် ကျွယ်မင်နန်းတော်က တခြားသော ထိပ်တန်းအင်အားစု တစ်ခုခုနှင့် စစ်ဖြစ်တော့မည်လောဟုပင် တွေးတောစရာ ဖြစ်နေသည်။

"ရှောင်ကွမ်းယင်က ခေါင်းဆောင် (ရှဲ့အာမန်) ကို ချုံခိုတိုက်ခိုက်တဲ့ ကိစ္စကြောင့်ပါ"

အကြီးကဲဟောက်က ဆိုသည်။

လူကြီးများမှာ တစ်ဦးကိုတစ်ဦး ကြည့်လိုက်ကြသည်။ အကြီးကဲဟောက်ထက် အရှိန်အဝါ မနိမ့်ဘဲ အလွန်အိုမင်းနေသော အဖိုးအိုတစ်ဦးက ဖြည်းဖြည်းချင်း ပြောလာသည်။

"ရုလိုင်ကျောင်းတော်က ဗုဒ္ဓသားတော် ရှောင်ကွမ်းယင်လား သူက ဘာလို့ ခေါင်းဆောင်ကို ချုံခိုတိုက်တာလဲ ငါတို့ကော ပြန်တိုက်ခဲ့ပြီလား "

ပြောနေရင်းဖြင့် သူက ရှဲ့အာမန်ကို စူးစမ်းသော အကြည့်ဖြင့် တစ်ချက် ကြည့်လိုက်သည်။

ဤလူကြီးမှာ နှစ်ပေါင်း ထောင်ချီအောင် ကျင့်ကြံနေခဲ့သူ ဖြစ်သည်။ အမှန်စင်စစ် သူသည် အဆင့် ၈ ထိပ်ဆုံးသို့ ရောက်ရှိနေပြီ ဖြစ်သော်လည်း ခန္ဓာကိုယ်အတွင်းရှိ မသေမျိုးစွမ်းအားများ ကုန်ဆုံးမှုကို လျှော့ချရန်အတွက် နှစ်ရှည်လများ အောင်းနေခဲ့ခြင်း ဖြစ်သည်။ ကျင့်ကြံခြင်း မြင့်မားလေလေ၊ အချိန်တိုင်း ကုန်ဆုံးသွားသော မသေမျိုးစွမ်းအားမှာ များပြားလေလေ ဖြစ်သည်။

ယခင်က ထိုကဲ့သို့သော မသေမျိုးအဆင့်များသည် နတ်ဘုရားလောက တွင် နေထိုင်ကြသည်။ သို့သော် ယခုခေတ်ကာလတွင် မသေမျိုးစွမ်းအားများ ကွယ်ပျောက်သွားသဖြင့် သက်တမ်းကုန်ခါနီး ကျင့်ကြံသူများစွာမှာ အသက်ဆက်ရန် အခြားနည်းလမ်းများကိုသာ အသုံးပြုနေကြရသည်။

"ပြန်တိုက်တာကတော့ တိုက်ခဲ့တာပေါ့၊ ဒါပေမဲ့ ဒီကိစ္စကြောင့်ပဲ ခေါင်းဆောင်က တခြား ရှာဖွေတွေ့ရှိမှုတွေ ရှိခဲ့တယ်"

အကြီးကဲဟောက်က ရှဲ့အာမန်ဘက် လှည့်ကာ

"နင်ပဲ ပြောပြလိုက်တော့"

"ဒီကိစ္စကတော့ နံပါတ် ၉ ရောက်လာတဲ့အထိ စောင့်ရလိမ့်မယ်။ နံပါတ် ၉ ကို အရင်ပြောခိုင်းလိုက်မယ်၊ ပြီးမှ ကျွန်မက လိုအပ်တာ ထပ်ဖြည့်မယ်။ အားလုံး နားထောင်ပြီးမှ ရှင်တို့ရဲ့ အမြင်တွေကို ပြောကြတာပေါ့"

ရှဲ့အာမန်က ဆိုသည်။

"နံပါတ် ၉ လား ငါ သူ့ကို မတွေ့ရတာ ကြာပြီပဲ"

နှစ်ပေါင်းထောင်ချီ ဂူအောင်းနေခဲ့သော အဖိုးအိုက ပြုံး၍ ဆိုသည်။

လူတိုင်း၏ အမူအရာမှာ ရုတ်တရက် ထူးဆန်းသွားကြသည်။

အကြီးကဲကျန်းက ချောင်းတစ်ချက်ဟန့်ကာ

"အကြီးကဲတုန်းဟွာ... ခင်ဗျား အရင်ကသိခဲ့တဲ့ နံပါတ် ၉ မဟုတ်ဘူးဗျ။ အဲဒီတစ်ယောက်က ဆုံးသွားပြီ။ အခု နံပါတ် ၉ က အမာခံတပည့် ဖြစ်လာတာ ရာစုနှစ် အနည်းငယ်ပဲ ရှိသေးတယ်"

"နံပါတ် ၉ သေသွားပြီ ဘယ်လိုသေတာလဲ"

အကြီးကဲတုန်းဟွာ မှာ ခေတ္တမျှ ကြောင်အသွားပြီးနောက် မျက်နှာမှာ ခက်ထန်သွားကာ

"ဒီလိုကိစ္စမျိုးကို ဘာလို့ ငါ့ကို တစ်ယောက်မှ အကြောင်းမကြားတာလဲ "

"ခင်ဗျား သက်တမ်းက ကုန်ခါနီးနေပြီကို အကြောင်းကြားတော့ကော ဘာထူးမှာလဲ။ လူကတော့ သေသွားပြီ၊ ကလဲ့စားချေရမှာတွေကိုလည်း ငါတို့ ချေခဲ့ပြီးပြီ။ ဒီနေ့ ကိစ္စက တကယ် အခြေအနေ ဆိုးနေလို့သာ ခင်ဗျားကို ခေါ်လိုက်တာ"

အကြီးကဲဟောက်က အေးဆေးစွာ ပြောလိုက်သည်။

"ငါ့သက်တမ်းကုန်တော့ ဘာဖြစ်လဲ လိုအပ်ရင် မသေမျိုးအဖြစ် မနေတော့ဘဲ ယင်မသေမျိုး လမ်းစဉ်ကို ပြောင်းလိုက်ရုံပေါ့"

အကြီးကဲတုန်းဟွာ၏ မျက်လုံးများ အေးစက်သွားသည်။

"ဘယ်နှစ်နှစ် ပိုနေရနေရ တန်ပါတယ်၊ ယင်မသေမျိုး လမ်းစဉ်ကလည်း... လျှောက်ရတာ လွယ်တာ မဟုတ်ဘူး"

ကျားသစ်ခေါင်းနှင့် လူကြီးက တိုးတိုးလေး ရေရွတ်လိုက်သည်။

ထိုအချိန်တွင် တိုက်ပွဲတစ်ရာ မသေမျိုးက ဖန့်ချန်ကို အကြီးကဲအဖွဲ့ထဲသို့ ခေါ်ဆောင်လာခဲ့သည်။ တိုက်ပွဲတစ်ရာ မသေမျိုးသည် ရှိနေသော အကြီးကဲများကို အရိုအသေပြုပြီးနောက် ပြန်လည်ထွက်ခွာသွားခဲ့သည်။

"ဒါက အသစ်တက်လာတဲ့ နံပါတ် ၉ လား အနားကို လာခဲ့စမ်း၊ ငါ ကြည့်ချင်လို့"

အကြီးကဲတုန်းဟွာက ရုတ်တရက် ပြောလိုက်လေသည်။