အခန်း (၁၁၇-၁၁၈)

အခန်း (၁၁၇) ကောင်းကင်မိုးကြိုးကို မျိုချခြင်း၊ နတ်ဘုရားကလီစာကို သွန်းလုပ်ခြင်း

ဤပါရမီက တစ်စုံတစ်ယောက်၏ မိုးကြိုးဒဏ်ခံနိုင်ရည်ကို အဆတစ်သောင်း မြှင့်တင်ပေးနိုင်ပြီး၊ ခန္ဓာကိုယ်အတွင်း၌ မိုးကြိုးကပ်ဘေးဒုက္ခ စက်ဝန်းတစ်ခုကို ဖန်တီးပေးလေသည်။

ရွှမ်ထင်ထီးနှင့် ဆေးလုံး သုံးလုံးတို့၏ ပေါင်းစပ်မှုဖြင့် နင်းဖန်မှာ ကောင်းကင်အဆင့် မိုးကြိုးရေကန် အတွင်း၌ မြေပြန့်တွင် လမ်းလျှောက်နေရသကဲ့သို့ လျှောက်လှမ်းနိုင်ခဲ့၏။ သူက ခေါင်းမော့ကာ ကြီးမားသော ခြေလှမ်းများဖြင့် ရှေ့သို့ လျှောက်သွားပြီး မျက်တောင်တစ်ခတ်အတွင်း ခြေလှမ်းဆယ် လှမ်းကို ဖြတ်ကျော်သွားလေသည်။

ရေစည်ပိုင်းမျှ တုတ်ခိုင်သော မိုးကြိုးများက သူ၏ ရုပ်ခန္ဓာကိုယ်ကို သိပ်သည်းစွာ ပစ်ခတ်နေသော်ငြား၊ ၎င်းတို့က အနည်းငယ်မျှပင် ထိခိုက်မှု မဖြစ်စေခဲ့ချေ။

ကောင်းကင်မိုးကြိုးများ အားလုံးက သူ၏ ဝိညာဉ်ကြောများတစ်လျှောက် စီးဆင်းသွားပြီး သူ၏ ခန္ဓာကိုယ်တစ်ခုလုံးကို ဖြတ်သန်းသွားလေသည်။ နောက်ဆုံးတွင် ၎င်းတို့က သူ၏ ကလီစာငါးခုအတွင်း စုစည်းသွားပြီး၊ ရေလွှမ်းမိုးမှုတစ်ခုကဲ့သို့ သူ၏ အင်္ဂါများကို ပွတ်တိုက်ကာ နှစ်ခြင်းပေးလိုက်၏။

ကောင်းကင်တာအို၏ ဤစွမ်းအားအောက်တွင်၊ နင်းဖန်မှာ စက္ကန့်တိုင်းတွင် အံ့မခန်း အသွင်ပြောင်းလဲမှု တစ်ခုကို ဖြတ်သန်းနေရလေသည်။

“ဝုန်း... “

မိုးကြိုးသံများနှင့်အတူ နင်းဖန်ကို လျှပ်စစ်အလင်းရောင်များက ဝန်းရံထားပြီး၊ သူ့ကို ကြမ်းတမ်းပြီး အထင်ကြီးလောက်စရာ အရှိန်အဝါရှိသော မိုးကြိုးနတ်ဘုရားတစ်ပါးကဲ့သို့ ဖြစ်နေစေ၏။

သူက ဆယ့်တစ်လှမ်းမြောက် ခြေလှမ်းကိုပင် လှမ်းလိုက်ပြီ ဖြစ်လေသည်။ ဤအချိန်တွင် ကောင်းကင် ကိုးထပ် မိုးကြိုးဂိုဏ်းမှ အကြီးအကဲများ အားလုံးမှာ တစ်ပြိုင်နက်တည်း အံ့အားသင့်သွားကြတော့၏။ အကြီးအကဲများက အချင်းချင်း ဆွေးနွေးလိုက်ကြလေသည်။

“သူက တကယ်ပဲ ဆက်တောင့်ခံနိုင်သေးတာလား…။”

“ဒီလို မဖြစ်သင့်ဘူးလေ၊ သေမျိုးခန္ဓာကိုယ်တစ်ခုက ဘယ်လိုလုပ် ဒီအထိ ရောက်နိုင်မှာလဲ…။”

“ကောင်းကင်အဆင့် မိုးကြိုးရေကန်ထဲမှာ တတိယစက်ဝန်းကနေ ဗဟိုချက်အထိ အကွာအဝေးမှာ မိုးကြိုးအားလုံးရဲ့ စွမ်းအားက တဖြည်းဖြည်း နှစ်ဆတိုးလာတာ။ ထျန်းကွမ်လို ကောင်းကင်ကိုးထပ် မိုးကြိုးအာဏာရှင် ခန္ဓာကိုယ်အတွက်တောင် အောင်မြင်ဖို့ အခွင့်အရေး နည်းနည်းလေးရဖို့ ကြီးမားတဲ့ ကံကြမ္မာအထောက်အပံ့နဲ့ အကူအညီ လိုအပ်တာကို။ ဒါပေမယ့် ဒီကလေးက မြေပြန့်မှာ လမ်းလျှောက် နေသလို လျှောက်နေတယ်...။ သူက မိုးကြိုးဘိုးဘေးကြီး ဝင်စားတာများလား…။”

“ယုံနိုင်စရာမရှိလွန်းဘူး၊ ထိုက်ရီအစစ်အမှန်ဂိုဏ်းက တကယ်ပဲ ဘယ်လို မိစ္ဆာမျိုးကို ပျိုးထောင်ထား တာလဲ…။”

“ဒီအနေအထားကို ကြည့်ရတာ ဒီလူက မိုးကြိုးရေကန်ရဲ့ ဗဟိုချက်ဆီကို သွားဖို့ စိတ်ပိုင်းဖြတ်ထား တာပဲ…။”

“သူ တကယ်ပဲ အဲဒီလို လုပ်နိုင်မှာလား…။”

မိုးကြိုးနည်းစနစ်များကို အထူးပြုသော အကြီးအကဲများအဖွဲ့မှာ ဤအချိန်တွင် သူတို့၏ တည်ငြိမ်မှု များကို လုံးဝ ဆုံးရှုံးသွားကြလေပြီ။ နင်းဖန်က ခြေလှမ်းဆယ်လှမ်းအတွင်း သေဆုံးမည်ဟူသော ဖန်ကျွင်း ၏ ယခင် ပြောဆိုချက်မှာ ပြောင်းပြန်လှန်ခံလိုက်ရ၏။ သူ၏ မျက်နှာထားမှာ ခဏတာ ထိန်းချုပ်မရဖြစ်သွားပြီး သူ၏ မျက်နှာပေါ်တွင် ပူလောင်သော ခံစားချက်တစ်ခုကို ခံစားလိုက်ရ လေသည်။

ဤအထိ ရောက်နိုင်သော သေမျိုးခန္ဓာကိုယ်တစ်ခု မည်သို့များ ရှိနိုင်မည်နည်း တွေးတောစရာပင်။ နင်းဖန်ဟု အမည်ရသော ဤတပည့်မှာ သာမန်အသိဉာဏ်ကို လုံးဝ အာခံနေလေသည်။ ၎င်းက သူ မီးကိုးမျိုး သွေးသစ္စာနည်းစနစ်နှင့် ရေဆယ့်နှစ်မျိုး ရုပ်ခန္ဓာကိုယ်သန့်စင်ခြင်းတို့ကို အသုံးပြုခဲ့ပုံနှင့် အတူတူပင် ဖြစ်၏။

“အရင်က ဒသမအဆင့် နတ်ဆေးလုံးကိုလည်း ဒီလူ စားသုံးခဲ့တာများလား….။”

နင်းဖန်၏ ကြောက်မက်ဖွယ်ကောင်းသော ပါရမီကို တွေးမိသောအခါ ဖန်ကျွင်း၏ နှလုံးသားက လှုပ်ရှားသွားပြီး ရုတ်တရက် အခြား ခန့်မှန်းချက်တစ်ခု ပေါ်လာလေသည်။ သို့ရာတွင် ဤအတွေး ပေါ်လာသည်နှင့် တစ်ပြိုင်နက် ယင်းက သူ၏ လက်ဖျားခြေဖျားများကို ချက်ချင်း အေးစက်သွားစေ၏။

မည်သို့ပင်ဆိုစေ သူ မျက်မြင်ကိုယ်တွေ့ မြင်တွေ့ခဲ့ရသည့် အရာများမှနေ၍၊ ကျိုးကြောင်းဆီလျော်မှု မရှိသော အရာသုံးခု ရှိနေပြီ ဖြစ်လေသည်။ မီးကိုးမျိုး သွေးသစ္စာနည်းစနစ်၊ ရေဆယ့်နှစ်မျိုး ရုပ်ခန္ဓာ ကိုယ်သန့်စင်ခြင်းနှင့် လက်ရှိ ကောင်းကင်အဆင့် မိုးကြိုးရေကန်ထဲရှိ ခန္ဓာကိုယ် သွန်းလုပ်ခြင်း တို့ပင် တည်း။

အကယ်၍ ဒသမအဆင့် နတ်ဆေးလုံးကိုပါ ပေါင်းထည့်လိုက်မည်ဆိုပါက၊ တစ်ဖက်လူ၏ အခြေခံ အုတ်မြစ်မှာ စိတ်ကူးကြည့်ရန်ပင် မဖြစ်နိုင်တော့ချေ။ ထိုကဲ့သို့ ပြိုင်ဘက်ကင်းသော ပါရမီရှင်တစ်ဦး သာ ကြီးပြင်းလာပါက ခေတ်တစ်ခေတ်လုံးကို တံမြက်လှည်းရန် လုံလောက်နေပြီ ဖြစ်ပေသည်။

ဤသည်က အလွန် ကြောက်မက်ဖွယ်ကောင်းပြီး ကျောချမ်းစရာပင် ကောင်းလှ၏။ မည်သည့်ဂိုဏ်းမှ မည်သည့်တပည့်က သူ့ကို ခုခံနိုင်မည်နည်းဟု မေးစရာဖြစ်လာလေသည်။

ဖန်ကျွင်းက သက်ပြင်းရှည်ကြီး တစ်ချက်ချကာ ပြောလိုက်လေသည်။

“ထိုက်ရီအစစ်အမှန်ဂိုဏ်းက တုန်လှုပ်စရာကောင်းတဲ့ အပြောင်းအလဲတစ်ခုကို ဖြတ်သန်းခဲ့ရပေမယ့်၊ ဂိုဏ်းကာကွယ်ရေး ဝင်္ကပါက အမြဲတမ်း ဖွင့်ထားတော့ ငါတို့ ဝင်စွက်ဖက်လို့ မရတာ နှမြောစရာပဲ။ ဒီကလေးက မိုးကြိုးရေကန်ရဲ့ ဗဟိုချက်ဆီ တကယ် မရောက်နိုင်ပါစေနဲ့လို့ပဲ ငါတို့ ဆုတောင်းလို့ရတော့ တယ်…။”

ပြိုင်ဘက်ကင်း ပါရမီရှင်တစ်ဦးက သူတို့၏ မျက်စိအောက်တွင် ကောင်းကင်ကို အာခံနိုင်သော အခြေခံ အုတ်မြစ်တစ်ခုကို တည်ဆောက်နေသော်ငြား၊ သူတို့က မည်သို့မျှ ဝင်ရောက်စွက်ဖက်နိုင်ခြင်း မရှိဘဲ ကူကယ်ရာမဲ့စွာ ကြည့်နေရုံသာ တတ်နိုင်လေသည်။ ဤသည်ကား သည်းခံရန် အလွန် ခက်ခဲလှပေ သည်။

ထို့ကြောင့် ကောင်းကင်အဆင့် မိုးကြိုးရေကန်၏ ဗဟိုအမှတ်က သူ့ကို သေအောင် ပစ်ခတ်နိုင်လောက် အောင် အားကောင်းပါစေဟုသာ သူတို့ မျှော်လင့်နိုင်တော့၏။

…

ကောင်းကင်ကိုးထပ် မိုးကြိုးဂိုဏ်းမှ လူတိုင်း အံ့အားသင့်နေကြချိန်တွင်။

ထိုက်ရီ အကြွင်းအကျန်နယ်မြေ အတွင်း၌လည်း အထူးပင် စည်ကားနေလေသည်။ ဂိုဏ်းတစ်ခုလုံးမှ တပည့်များက မိုးကြိုးရေကန်၏ ဗဟိုချက်သို့ ရောက်လုနီးပါး ကြီးမားသော ခြေလှမ်းများဖြင့် လျှောက် လှမ်းနေသည့် နင်းဖန်ကို ကြည့်နေကြပြီး၊ လူတိုင်းက အသက်အောင့်ထားကာ စိတ်လှုပ်ရှားမှုကြောင့် မျက်နှာများ နီမြန်းနေကြ၏။ တပည့်များက ဆက်တိုက် ရေရွတ်လိုက်ကြလေသည်။

“အမွေဆက်ခံသူနင်းက အောင်မြင်တော့မယ်…။”

“ခြေလှမ်းအနည်းငယ်ပဲ လိုတော့တယ်၊ သေချာပေါက် တည်ငြိမ်နေမှာပါ…။”

“နင်းဖန်က ဒီလောက်တောင် ကောင်းကင်ကို အာခံနိုင်လိမ့်မယ်လို့ ငါ တကယ် မထင်ထားခဲ့ဘူး….။ ကောင်းကင်မိုးကြိုးနဲ့ ကလီစာငါးခု သွန်းလုပ်ခြင်းလို အန္တရာယ်များတဲ့ နည်းစနစ်နဲ့တောင် သူက အဆုံး စွန်ထိ ရောက်အောင် လုပ်ချင်နေသေးတာ….။”

“ဒီစမ်းသပ်မှုအပြီးမှာ စစ်မှန်တဲ့ ပြိုင်ဘက်ကင်း အခြေခံအုတ်မြစ်ကို လုံးဝ တည်ဆောက်ပြီးသွားမှာ ဖြစ်ပြီး၊ ရှေ့ဆက်မယ့် ကျင့်ကြံခြင်းလမ်းစဉ်က ချောမွေ့သွားတော့မှာပဲ…။”

“ငါ့ရဲ့ ထိုက်ရီအစစ်အမှန်ဂိုဏ်းက ဒီမျိုးဆက်မှာ အလွန်တရာ ဘုန်းကျက်သရေရှိဖို့ ဖန်တီးခံထားရပြီး စကြဝဠာကို တစ်ဖန် ပြန်လည် ထိန်းချုပ်နိုင်တော့မယ်ပုံပဲ….။”

“မှန်တယ်၊ နင်းဖန်ရဲ့ တက်လမ်းနဲ့အတူ၊ ငါတို့ အပြင်စည်းတပည့်တွေလည်း ဂုဏ်ယူဝင့်ကြွားခွင့် ရပြီ။”

“နင်းဖန်...၊ ရှေ့ကိုသာ ချီတက်ပါတော့…။”

တပည့် တစ်သိန်းကျော်၏ အတွေးများက ဤအချိန်တွင် ယခင်ကထက် ပို၍ ညီညွတ်နေကြလေသည်။ လူတိုင်းက နင်းဖန်အတွက် အားပေးနေကြ၏။

သူတို့၏ မျက်နှာများပေါ်ရှိ တင်းမာမှုများမှာ အခြေအနေကို မသိသူများက သူတို့ကိုယ်တိုင် မိုးကြိုး ရေကန်ထဲတွင် ရုပ်ခန္ဓာကိုယ်သန့်စင်ခြင်းကို ဖြတ်သန်းနေရသည်ဟု ထင်မှတ်သွားလောက်ပေသည်။ ဗဟိုစက်ဝန်းအတွင်းမှ အကြီးအကဲများစွာကလည်း ဤခံစားချက်ကို ခံစားနေရလေသည်။

သူတို့က အချင်းချင်း ကြည့်လိုက်ကြပြီးနောက် အားလုံးက ကျေနပ်အားရစွာ ခေါင်းညိတ်လိုက်ကြ၏။ ကျမ်းစာဆောင်သို့ ခြေချပြီး ကျင့်ကြံခြင်းလမ်းစဉ်သို့ ဝင်ရောက်လာချိန်မှစ၍ ယနေ့တိုင်အောင်။

လမ်းတစ်လျှောက်တွင် နင်းဖန်က အချိုးအကွေ့များစွာကို ဖြုံတွေ့ခဲ့ရပြီး၊ မျှော်လင့်ချက်မဲ့သော အခြေ အနေတစ်ခုထဲသို့ ကျရောက်သွားပြီဟု အကြိမ်ကြိမ် ယူဆခံခဲ့ရသော်ငြား၊ နောက်ဆုံးတွင် သူက သာမန် အသိဉာဏ်ကို ချိုးဖျက်ကာ ဤနေရာအထိ လျှောက်လှမ်းလာနိုင်ခဲ့လေသည်။

ယခုအခါ ဂိုဏ်းအတွင်း သူ၏ ဂုဏ်သတင်းမှာ ပြိုင်ဘက်ကင်းနေပြီ ဖြစ်၏။ တပည့်များအားလုံးက သူ့ကို ရိုးသားစွာ အညံ့ခံ ယုံကြည်နေကြပေသည်။

အကြီးအကဲများက သဘာဝကျစွာပင် ကျေနပ်အားရနေကြပြီး၊ တစ်ချိန်တည်းမှာပင် ကြာမြင့်စွာ ပျောက်ဆုံးနေခဲ့သော စိတ်အားထက်သန်မှုတစ်ခုက သူတို့၏ အတွင်း၌ လောင်ကျွမ်းလာလေသည်။ အကြီးအကဲများက အချင်းချင်း ဆွေးနွေးလိုက်ကြ၏။

“နင်းဖန်က လူတွေကြားထဲက ပူပြင်းတဲ့ နေမင်းတစ်စင်းပဲ၊ သူ့ကို သာမန်အသိဉာဏ်နဲ့ ဆုံးဖြတ်လို့ မရဘူး…။”

“တကယ်ပါပဲ၊ အပြင်စည်းတပည့်တွေတောင် သူ့အပေါ် ဒီလောက် ယုံကြည်မှုရှိနေကြတာ၊ ငါတို့က သူ့ရဲ့ အကြီးအကဲတွေအနေနဲ့ ဘယ်လိုလုပ် ငိုချင်းချနေလို့ရမှာလဲ…။”

“အားလုံးပဲ၊ ကောင်းကင်အဆင့် မိုးကြိုးရေကန်ရဲ့ ဗဟိုချက်မှာ ရုပ်ခန္ဓာကိုယ်သန့်စင်ခြင်းကို ဖြတ်သန်း နိုင်တဲ့ ငါတို့ဂိုဏ်းရဲ့ ပထမဆုံး တပည့် ထွက်ပေါ်လာမယ့်အချိန်ကို တိတ်တဆိတ် စောင့်ဆိုင်းကြ ရအောင်…။”

ဤအချိန်တွင် မည်သူမျှ သဘောထားကွဲလွဲသော စကားများ မပြောကြတော့ချေ။

အကြီးအကဲတိုင်းက ကျင့်ကြံခြင်းလမ်းစဉ်အပေါ် သူတို့၏ ကိုယ်ပိုင် သာမန်အသိဉာဏ် နားလည်မှုများ ကို စွန့်ပစ်လိုက်ကြလေသည်။ သာမန် သေမျိုးခန္ဓာကိုယ်လေးတစ်ခုက မိုးကြိုးရေကန်ထဲတွင် ဤနေရာ အထိ မည်သို့ လျှောက်လှမ်းလာနိုင်သနည်း ဆိုသည်ကို သူတို့ စဉ်းစား၍မရနိုင်ကြချေ။ သို့ရာတွင် ယင်း က အရေးမကြီးတော့ပေ။

မည်သို့ပင်ဆိုစေ နင်းဖန်ထံတွင် ဖြစ်ပျက်ခဲ့သော အံ့မခန်း အရာများက ဤတစ်ခုတည်းထက် အများ ကြီး ပိုများနေခဲ့ပြီ ဖြစ်၏။ ယခုအခါ လူတိုင်းက သူတို့၏ ဦးနှောက်များကို ဘေးဖယ်ထားကာ စဉ်းစား ခြင်းကို ရပ်တန့်လိုက်ကြပြီး၊ အားလုံးက နင်းဖန်ကိုသာ စိုးရိမ်တကြီး အာရုံစိုက်နေကြလေသည်။

အောင်မြင်မှု ရောက်ရှိလာမည့် အချိန်ကို စောင့်ဆိုင်းနေကြခြင်း ဖြစ်ပေသည်။

…

မိုးကြိုးရေကန်၏ ဗဟိုဧရိယာ။

မုန်တိုင်း ထောင်ပေါင်းများစွာ စုရုံးနေပြီး မရေမတွက်နိုင်သော မိုးကြိုးရေစီးကြောင်းများက အောက်သို့ စီးဆင်းနေလေသည်။ လျှပ်စီးတန်း တစ်ခုစီတိုင်းက ခရမ်းရင့်ရောင် ဖြစ်နေပြီး၊ ၎င်းတို့အတွင်း ဖုံးကွယ် နေသော ကောင်းကင်တာအို၏ နတ်ဘုရားစွမ်းအားနှင့် ပတ်သက်၍ မည်သည့် သံသယမျှ မကျန်ရှိစေ ချေ။

ဤအချိန်တွင် နင်းဖန် ရှေ့သို့လှမ်းလိုက်သော ခြေလှမ်းတိုင်းလိုလိုတွင် သူ ကြုံတွေ့ရသော မိုးကြိုး၏ စွမ်းအားက နှစ်ဆတိုးလာလေသည်။ သူ၏ ဦးခေါင်းထက်တွင် လည်ပတ်နေသော ရွှမ်ထင်ထီးမှာ ၎င်း ၏ ခံနိုင်ရည် ကန့်သတ်ချက်သို့ ရောက်ရှိသွားခဲ့ပြီ ဖြစ်၏။

မရေမတွက်နိုင်သော ကောင်းကင်မိုးကြိုးများ၏ ရိုက်ခတ်မှုကို ခုခံပြီးနောက်၊ နောက်ဆုံးတွင် ဗဟိုအ မှတ်သို့ မရောက်မီလေးတွင်ပင် ၎င်းက ကျယ်လောင်သော အသံကြီးနှင့်အတူ ပေါက်ကွဲ ကွဲကြေသွား လေတော့သည်။

ကောင်းကင်အဆင့်မြင့် မှော်လက်နက်တစ်ခုပင် ပြိုကျကွဲကြေသွားခဲ့ရပြီ ဖြစ်လေသည်။ ဤသည်က ကောင်းကင်တာအို နတ်ဘုရားမိုးကြိုး၏ စွမ်းအားက မည်မျှ ကြောက်မက်ဖွယ်ကောင်းကြောင်း သက်သေပြရန် လုံလောက်နေပေသည်။

သူ၏ ဦးခေါင်းထက်ရှိ ရွှမ်ထင်ထီး၏ အကာအကွယ်ကို ဆုံးရှုံးလိုက်ရသဖြင့်၊ နင်းဖန်၏ ရုပ်ခန္ဓာကိုယ် က နတ်ဘုရားမိုးကြိုး၏ ရိုက်ခတ်မှုကို တိုက်ရိုက် ရင်ဆိုင်ရတော့မည် ဖြစ်၏။

“ဝုန်း... “

တစ်ခဏချင်းမှာပင် တုတ်ခိုင်သော လျှပ်စီးတန်းများက မည်သည့် လမ်းညွှန်မှု သို့မဟုတ် အားပျော့သွား ခြင်းမျှ မရှိဘဲ သူ၏ ဦးခေါင်းပေါ်သို့ ကျဆင်းလာလေသည်။ ထုံကျင်သော ခံစားချက်တစ်ခုက သူ၏ ခန္ဓာကိုယ်တစ်ခုလုံးသို့ စီးဆင်းသွားခဲ့လေ ၏။

သူ၏ ခန္ဓာကိုယ်နှင့် သူ၏ အသားများမှာ ကောင်းကင်မိုးကြိုးအောက်တွင် ပျက်စီးသွားပြီး ပြန်လည် တည်ဆောက်ခံရလေသည်။ သူ၏ ကလီစာငါးခုမှာ လုံးဝ ကျွမ်းလောင်သွားသော်ငြား၊ သူ၏ နှလုံး၏ အားကောင်းသော ခုန်ပေါက်မှုနှင့်အတူ သွေးများဖြင့် တစ်ဖန် ပြန်လည် ဆေးကြောခံရပြီး ချက်ချင်းပင် အသစ်စက်စက် ပြန်ဖြစ်သွား၏။

ဤလုပ်ငန်းစဉ်က စက်ဝန်းတစ်ခုကဲ့သို့ သူ၏ ခန္ဓာကိုယ်အတွင်း၌ မရပ်မနား ဆက်လက် ဖြစ်ပေါ်နေ လေသည်။ ၎င်း၏ အကြောင်းရင်းမှာ ကမ္ဘာဦး မိုးကြိုးအမြုတေ ပါရမီက အာနိသင်ပြနေပြီး သူ၏ ခန္ဓာကိုယ်အတွင်း၌ မိုးကြိုးကပ်ဘေးဒုက္ခ စက်ဝန်းတစ်ခုကို ဖန်တီးပေးနေသောကြောင့်ပင် ဖြစ်ပေ သည်။

နင်းဖန်က အော်ဟစ်လိုက်လေသည်။

“ကောင်းကင်မိုးကြိုး၊ မင်း ငါ့ကို ဘာမှလုပ်လို့မရပါဘူးကွ….။”

နင်းဖန်၏ ဆံပင်များနှင့် မုတ်ဆိတ်များက ထောင်မတ်နေပြီး၊ ဆံပင်မွေးညင်းတိုင်းတွင် လျှပ်စီးများ ရစ်ပတ်နေကာ၊ သူ၏ သွေးစွမ်းအင်များက ရူးသွပ်စွာ ပေါက်ကွဲထွက်နေလေသည်။ သူက ကျယ် လောင်စွာ ဟိန်းဟောက်လိုက်ပြီး နောက်ဆုံးတွင် နောက်ဆုံး ခြေလှမ်းကို လှမ်းလိုက်ကာ၊ မိုးကြိုး ရေကန်၏ ဗဟိုအမှတ်ပေါ်သို့ တိုက်ရိုက် ဆင်းသက်လိုက်လေတော့၏။

“ဝုန်း...”

ကြမ်းတမ်းသော မိုးကြိုးသံများ ဟိန်းထွက်လာပြီး၊ အလယ်ဗဟိုချက်ရှိ ကောင်းကင်မိုးကြိုး၏ စွမ်းအား က တစ်ဖန် နှစ်ဆ ထပ်တိုးလာပြန်လေသည်။ လျှပ်စီးတန်းများက ငွေရောင်မြွေများကဲ့သို့ ကခုန်နေကြ ပြီး၊ ကောင်းကင်နှင့် မြေကြီး၏ ကြီးမားကျယ်ပြန့်မှုကို မသိဘဲ သူ့ကို အာခံရဲသော အောက်ဘက်ရှိ လူသားကို ရက်စက်ကြမ်းကြုတ်စွာ ပစ်ခတ်လိုက်ကြလေ၏။

သို့ရာတွင် နင်းဖန်က တည်ငြိမ်နေပြီး ကြောက်ရွံ့ခြင်း မရှိချေ။ သူ၏ မျက်လုံးများက တောက်ပစွာ အရောင်လင်းလာပြီး၊ သူက မော့ကြည့်ကာ ပါးစပ်ကို ဟလိုက်ပြီး၊ အောက်သို့ ပစ်ချလာသော ကောင်းကင်မိုးကြိုးကို တစ်ကြိုက်တည်း မျိုချလိုက်တော့သည်။

ကောင်းကင်မိုးကြိုးကို မျိုချခြင်းပင်။

ဤအချိန်တွင် အထက်ရှိ လျှို့ဝှက်နယ်မြေဖြစ်စေ၊ အပြင်ဘက်ရှိ တောင်ထိပ်သစ်တောများဖြစ်စေ။ လူမည်မျှလောက် ဆွံ့အသွားသည်ကို မသိနိုင်တော့ချေ။

ကြောက်မက်ဖွယ်ကောင်းလွန်းလှပေသည်။

အဆုံးအစမဲ့ မာနထောင်လွှားသော ကိုယ်ဟန်အမူအရာဖြင့်၊ နင်းဖန်က မိုးကြိုးရေကန်၏ ဗဟိုချက်ရှိ ကောင်းကင်မိုးကြိုးကို လက်ခံရယူရန် သူ၏ ပါးစပ်ကို အသုံးပြုခဲ့ပြီး၊ သူက အန္တရာယ်ကင်းစွာ ရှိနေဆဲ ဖြစ်လေသည်။ ယခုအချိန်၌ လျှပ်စီးများကို ထိန်းချုပ်သော ဒဏ္ဍာရီလာ ကောင်းကင်ကိုးထပ် မိုးကြိုး နတ်ဘုရားဟု သူ့ကို ပြောမည်ဆိုလျှင်ပင် ချဲ့ကားပြောဆိုရာ ရောက်မည် မဟုတ်ချေ။

ဖန်ကျွင်းက သူ၏ရှေ့မှ မြင်ကွင်းကို နားမလည်နိုင်ဖြစ်ကာ ပြောလိုက်လေသည်။

“ရုပ်ခန္ဓာကိုယ်သန့်စင်နေတုန်း ကောင်းကင်မိုးကြိုးကို စားနိုင်တဲ့ ဘယ်လို လူမျိုးများ ရှိနိုင်လို့လဲ…။”

ဖန်ကျွင်းမှာ မူးဝေမှုလှိုင်းများကို ခံစားနေရ၏။ မိုးကြိုးဂိုဏ်းချုပ်မှာ ပို၍ပင် ဆွံ့အသွားပြီး၊ သူ တစ်သက်လုံး လေ့ကျင့်လာခဲ့သော မိုးကြိုးနည်းစနစ်များမှာ ဤအချိန်တွင် ဟာသတစ်ခု ဖြစ်သွားပြီဟု ခံစားလိုက်ရလေသည်။

ရုတ်တရက် အကြီးအကဲတစ်ဦးက တုန်ယင်နေသော အသံဖြင့် အော်ဟစ်လိုက်လေသည်။

“လျှပ်စစ်အလင်းရောင်က သရဖူကို ဖောက်ထွင်းသွားတယ်၊ ဆံပင်တွေက လျှပ်စစ်အဖြစ် ပြောင်းလဲ သွားတယ်...။ ဒါက အမြင့်ဆုံး ကောင်းကင်မိုးကြိုး ရုပ်ခန္ဓာကိုယ်သန့်စင်ခြင်းရဲ့ ပြသမှုပဲ။ သူ အောင်မြင် သွားပြီ…။”

ပုံရိပ်ယောင်ထဲတွင် နင်းဖန်က လုံးဝ ကွဲပြားသွားပြီဖြစ်ကြောင်း လူတစ်ဦး မြင်တွေ့နိုင်လေသည်။ သူက မိုးကြိုးရေကန်၏ ဗဟိုချက်တွင် ရပ်နေပြီး ထောင်ပေါင်းများစွာသော လျှပ်စီးတန်းများက သူ့ကို ဝန်းရံ ထားလေ၏။ ခရမ်းရင့်ရောင် လျှပ်စီးကြောင်းများက သူ၏ ခန္ဓာကိုယ်မှ ထွက်ပေါ်နေပြီး၊ သူ၏ ပုံစံ တစ်ခုလုံးကို အလွန် ထူးဆန်းနေပုံရစေကာ၊ သူက လျှပ်စီးခန္ဓာကိုယ်တစ်ခုအဖြစ် အသွင်ပြောင်းသွား သည့်အလား ဖြစ်နေခဲ့လေသည်။

ထို့အပြင် သူ၏ ခန္ဓာကိုယ်ပေါ်တွင် သူ၏ ကလီစာငါးခုက ကောင်းကင်တာအို နတ်ဘုရားမိုးကြိုးနှင့် မူလဇာစ်မြစ်တူညီသော တောက်ပမှုတစ်ခုဖြင့် လင်းလက်နေကြ၏။

ဤသည်ကား ကောလာဟလများတွင်သာ ရှိနေခဲ့သော ကောင်းကင်မိုးကြိုးဖြင့် ကလီစာငါးခု သန့်စင် ခြင်း နည်းစနစ်၏ အမြင့်ဆုံး ပြသမှုဖြစ်သည့်...၊ ကောင်းကင်သွန်းလုပ် နတ်ဘုရားကလီစာ ဖြစ်ကြောင်း ထင်ရှားလှပေသည်။

အခန်း (၁၁၈) ကောင်းကင်ဘုံ၏ ဆုလာဘ် ပြန်လည်ရရှိခြင်း၊ ကမ္ဘာကြီးကို တစ်ဖန် တုန်လှုပ်စေခြင်း

ကလီစာငါးခုမှာ လူ့ခန္ဓာကိုယ်၏ အတွင်းအင်္ဂါများ၏ အဓိက အမြုတေ ဖြစ်လေသည်။ တစ်ခုစီတိုင်းက မတူညီသော လုပ်ဆောင်ချက်များကို ထိန်းချုပ်ထားပြီး နက်ရှိုင်းသော အဓိပ္ပါယ်များကို သယ်ဆောင် ထား၏။ ၎င်းတို့သည် ကျင့်ကြံသူတစ်ဦးအတွက် အရေးကြီးဆုံးအရာများ ဖြစ်သည်ဟု ဆိုနိုင်ပေသည်။

ထို့ကြောင့် လူသားမျိုးနွယ်၏ ပညာရှိများက ၎င်းတို့ကို သန့်စင်ရန်အတွက် ကောင်းကင်မိုးကြိုးဖြင့် ကလီစာငါးခု သွန်းလုပ်ခြင်း နည်းလမ်းကို ရှာဖွေခဲ့ကြလေသည်။ ယင်းက ကလီစာငါးခုကို အရည် အသွေးပိုင်းဆိုင်ရာ အပြောင်းအလဲတစ်ခုနှင့်တူသော အမြင့်မြတ်ဆုံး အဆင့်တစ်ခုသို့ ရောက်ရှိစေနိုင် ၏။

ယင်း၏ အမြင့်ဆုံး ပြသမှုမှာ ကောင်းကင်အဆင့် မိုးကြိုးရေကန်၏ ဗဟိုချက်တွင် ခန္ဓာကိုယ်ကို သန့်စင် ခြင်း ဖြစ်ပေသည်။ ဤသည်ကား မယုံနိုင်လောက်အောင် အန္တရာယ်များသော ခြေလှမ်းတစ်ခု ဖြစ်၏။ ကျရှုံးမှု ဖြစ်ပေါ်သွားသည်နှင့် တစ်ပြိုင်နက် မည်သည့် ကယ်တင်မှုမျှ မရှိနိုင်တော့ဘဲ ပြာအဖြစ်သို့ လျော့ကျသွားမည် ဖြစ်လေသည်။

သေချာသည်မှာ အန္တရာယ်များခြင်းက ကြီးမားသော ဆုလာဘ်ကိုလည်း ယူဆောင်လာပေးပေသည်။ အောင်မြင်သွားသည်နှင့် တစ်ပြိုင်နက် ကလီစာငါးခုမှာ ကောင်းကင်တာအို၏ စွမ်းအားများဖြင့် ပြည့်နှက် သွားမည်ဖြစ်ပြီး၊ ထိုအချိန်မှစ၍ အခြားသူများနှင့် လုံးဝ ကွာဟသွားမည် ဖြစ်လေသည်။

နှလုံးက ပိုမို အားကောင်းလာမည်ဖြစ်ပြီး၊ နှလုံးခန်းများက မိုးကြိုးလေဝဲတစ်ခုအဖြစ် အသွင်ပြောင်း သွားကာ သွေးများကို ပြဒါးကဲ့သို့ စီးဆင်းစေပြီး၊ ဤအထွတ်အထိပ်အခြေခံအုတ်မြစ်ဆီသို့ အဆုံးအစမဲ့ သော စွမ်းအင်နှင့် တက်ကြွမှုတို့ကို ယူဆောင်လာပေးမည် ဖြစ်၏။

နှလုံးခုန်နှုန်း မြန်လာသောအခါ၊ အသံက ဧကရာဇ်တစ်ပါး၏ စက်အင်ဂျင်ကဲ့သို့ မိုးကြိုးသံအလား ဟိန်းဟောက်မည်ဖြစ်ပြီး ပတ်ဝန်းကျင်ရှိ သေးငယ်သူများကို တုန်လှုပ်စေမည် ဖြစ်လေသည်။

အသည်းနှင့် နှလုံးတို့ကလည်း အပြောင်းအလဲများကို ဖြတ်သန်းရ၏။ အသည်းက သွေးကို သိုလှောင် ထားပြီး ဖန်တီးခြင်းကို ကျင့်ကြံရန် ကောင်းကင်မိုးကြိုးကို သယ်ဆောင်ထားလေသည်။ ထိုအချိန်မှစ၍ သွေးစွမ်းအင်က နဂါးတစ်ကောင်ကဲ့သို့ ဖြစ်လာပြီး တက်ကြွမှုမှာ ကုန်ဆုံးနိုင်ခြင်း မရှိ တော့ချေ။

နှလုံးက သွေးကို ထိန်းချုပ်ထားပြီး မြေကြီး၏ အဆီအနှစ်ကို စုပ်ယူရန် နတ်ဘုရားလျှပ်စစ်ထဲတွင် ရေချိုးနေလေသည်။ ထို့နောက်တွင် ရည်ရွယ်ချက်က တောင်တစ်လုံးကဲ့သို့ ရွေ့လျားသွားမည်ဖြစ်ပြီး မကောင်းဆိုးဝါး တစ်သောင်းက ဝင်ရောက်ကျူးကျော်နိုင်မည် မဟုတ်ချေ။

အဆုတ်နှင့် ကျောက်ကပ်တို့က အပြန်အလှန် ထင်ဟပ်နေကြပြီး ယင်နှင့် ယန်၏ လည်ပတ်မှုကို ပုံဖော်ပေးလေသည်။ အဆုတ်က ချီကို ထိန်းချုပ်ထားပြီး အသက်ရှူလိုက်တိုင်း လေနှင့် တိမ်တိုက်များ က လှုပ်ရှားလာ၏။ ကျောက်ကပ်က အဆီအနှစ်ကို သိုလှောင်ထားပြီး ခွန်အားနှင့် ရဲစွမ်းသတ္တိတို့ဖြင့် ညတစ်ညလုံး မမောမပန်းဘဲ နေနိုင်ပေသည်။

ခန္ဓာကိုယ်အတွင်းရှိ အပူထုတ်လွှတ်ပေးသော အင်္ဂါသုံးခုကလည်း ၎င်းနှင့်အညီ ပဲ့တင်ထပ်နေ၏။ သည်းခြေအိတ်နှင့် အစာအိမ်က တာအိုနှင့် ပေါင်းစပ်သွားပြီး မာကျောမှုနှင့် နူးညံ့မှုကြား ဟန်ချက်ညီ မှုကို ရရှိလေသည်။

အူသိမ်က ဝိညာဉ်အဆီအနှစ်ကို သန့်စင်ပေးသော လျှပ်စစ်လေဝဲတစ်ခုကဲ့သို့ ဖြစ်လာပြီး၊ အူမကြီးက အခြေခံအုတ်မြစ်ကို ခိုင်မာစေသော နဂါး၏ ကျောရိုးတစ်ခုကဲ့သို့ ဖြစ်လာ၏။ ခန္ဓာကိုယ်အတွင်းရှိ အပူထုတ်လွှတ်ပေးသော အင်္ဂါသုံးခုမှာ ကောင်းကင်နှင့် မြေကြီးကို ဆက်သွယ်ပေးသော မိုးကြိုးကွန် ရက်တစ်ခုနှင့် တူပေသည်။

ဤအပြောင်းအလဲ အမျိုးမျိုးက သူ့ကို သာမန် ကျင့်ကြံသူများနှင့် လုံးဝ ကွာဟသွားစေခဲ့လေပြီ။ ခန္ဓာကိုယ်အတွင်း၌ စကြဝဠာငယ်တစ်ခုကို ဖွင့်လှစ်လိုက်သကဲ့သို့ ဖြစ်နေ၏။ အတွင်းအင်္ဂါငါးခုက သတ္တဒြပ်စင်ငါးပါး၏ ဂြိုဟ်ငါးလုံးဖြစ်ပြီး၊ ကျန်အင်္ဂါများက ကောင်းကင်ယံ လည်ပတ်မှုကို လုပ်ဆောင် ပေးလေသည်။

ထို့ကြောင့် ၎င်းကို နတ်ဘုရားကလီစာဟု ခေါ်ဆိုနိုင်ပေသည်။ ဤသည်ကား သမိုင်းတစ်လျှောက်လုံး တွင် မြင်တွေ့ရခဲသော အမြင့်မြတ်ဆုံး ဖန်တီးမှုပင် ဖြစ်၏။

နင်းဖန်တွင် နတ်ဘုရားကလီစာ ရှိရုံသာမက နတ်ဘုရားအရိုးကိုပါ သွန်းလုပ်ထားကြောင်းတော့ ပြောနေစရာပင် မလိုတော့ချေ။ အပြင်ဘက်တွင် နတ်ဘုရားအရိုး၊ အတွင်းဘက်တွင် နတ်ဘုရား ကလီစာ၊ ဒသမအဆင့် နတ်ဆေးလုံးဖြင့် အရည်ကျိုထားသော အသားနှင့် သွေး၊ ထိပ်တန်းအဆင့် ဆေးစိမ်ရေချိုးခြင်းများဖြင့် အာဟာရဖြည့်ထားသော ဝိညာဉ်ကြောများ။

ဤအချိန်တွင် နင်းဖန် ယခင်က ဖြတ်သန်းခဲ့သော ရုပ်ခန္ဓာကိုယ်သန့်စင်ခြင်း နည်းစနစ်များ အားလုံးက ရောယှက်ပေါင်းစပ်သွားပြီး သူ၏ ခန္ဓာကိုယ်ကို လုံးဝ ထူးကဲသွားစေလေသည်။ ကောင်းကင်မိုးကြိုးဖြင့် ကလီစာငါးခု သွန်းလုပ်ခြင်း ပြီးစီးသွားပြီးနောက် အဆုံးအစမဲ့သော ဝိညာဉ်စွမ်းအင်များ စုဝေးလာ၏။ မျက်တောင်တစ်ခတ်အတွင်း သူ၏ ဝိညာဉ်စွမ်းအင်က ပဲ့တင်ထပ်ခြင်း အမှတ်တစ်ခုသို့ ရောက်ရှိသွား လေသည်။

“ဝုန်း... “

မည်သည့် အတားအဆီးမျှမရှိဘဲ၊ သူ၏ သွေးနှင့် ချီများ ပေါက်ကွဲထွက်လာချိန်တွင်၊ လျှပ်စီးတန်း တစ်သောင်းအောက်ရှိ မိုးကြိုးရေကန်၏ ဗဟိုချက်တွင် နင်းဖန်က ရုပ်ခန္ဓာကိုယ်သန့်စင်ခြင်း နဝမ အဆင့်သို့ ထိုးဖောက်ဝင်ရောက်သွားခဲ့လေတော့သည်။

မြှင့်တင်ပေးသည့် ကြီးမားသော စွမ်းအားက ဆင်းသက်လာပြီး သူ၏ ခန္ဓာကိုယ်တစ်ခုလုံး၏ ခွန်အားကို နှစ်ဆ တိုးသွားစေ၏။ သို့ရာတွင် ဤသည်က အဆုံးသတ် မဟုတ်သေးချေ။

ရုပ်ခန္ဓာကိုယ်သန့်စင်ခြင်း နဝမအဆင့်မှာ နောက်ဆုံးနယ်ပယ် ဖြစ်လေသည်။ ထိုးဖောက်ဝင်ရောက်ပြီး နောက် မိမိ၏ အခြေခံအုတ်မြစ်အပေါ် မူတည်၍ ကောင်းကင်တာအိုထံမှ ဆုလာဘ် ပြန်လည်ရရှိမည် ဖြစ်ပြီး၊ ရုပ်ပိုင်းဆိုင်ရာ ခွန်အားကို ပိုမို မြှင့်တင်ပေးမည် ဖြစ်၏။

နင်းဖန်က သူ၏ ခန္ဓာကိုယ်အတွင်းရှိ အပြောင်းအလဲများကို သေချာစွာ မခံစားနိုင်မီမှာပင်၊ ကောင်းကင် ယံတွင် အက်ကွဲကြောင်းတစ်ခု ပေါ်လာလေသည်။ နတ်ဘုရားအလင်းတန်းတစ်ခုက တန်းတန်းမတ် မတ် ကျဆင်းလာပြီး မိုးကြိုးရေကန်၏ ဝင်္ကပါကို ထိုးဖောက်ကာ သူ၏အပေါ်သို့ တိကျစွာ ကျရောက် လာ၏။ တစ်ချိန်တည်းမှာပင်၊ ဝင်္ကပါအတွင်းရှိ မရပ်မနား ပစ်ခတ်နေသော မိုးကြိုးနှင့် လျှပ်စီးများက ဤအချိန်တွင် ပျောက်ကွယ်သွားလေသည်။

ချက်ချင်းပင် နင်းဖန်၏ ခန္ဓာကိုယ်ပတ်လည်တွင် မင်္ဂလာရှိသော အလင်းရောင်နှင့် ရောင်စုံမြူခိုးများ ပေါ်လာကာ လှည့်ပတ်နေကြ၏။ နင်းဖန်က သူ၏ ခန္ဓာကိုယ်အတွင်းရှိ စွမ်းအားများ ကြီးထွားလာ နေသည်ကို ရှင်းလင်းစွာ ခံစားနိုင်လေသည်။

သူ၏ သွေးစွမ်းအင်များက အရှိန်မြန်လာပြီး၊ သူ၏ ကြွက်သားများနှင့် အရိုးများက တစ်ပြိုင်နက်တည်း ဟိန်းဟောက်လာကာ၊ သူ၏ ခြေလက်များတစ်လျှောက် အဆုံးမဲ့ စွမ်းအားများ လှိုင်းခတ်သွားသဖြင့် သူက လန်းဆန်းသော အော်ဟစ်သံရှည်ကြီးကို မထုတ်ဘဲ မနေနိုင်တော့ချေ။

ထိုကြည်လင်သော အသံက မိုင်တစ်သောင်းအထိ မြည်ဟည်းသွားပြီး ဂိုဏ်းတစ်ခုလုံးကို လွှမ်းခြုံသွား လေသည်။ ဂိုဏ်းအပြင်ဘက်ရှိ ကျယ်ပြန့်သော သစ်တောပင်လယ်ကြီးပင်လျှင် ဤအသံလှိုင်း၏ ရိုက်ခတ်မှုကို ခံရပြီး၊ ဧရာမသစ်ပင်ကြီးများမှာ လေပြင်းတိုက်ခံရသည့်အလား သူတို့၏ သစ်ကိုင်းများ နှင့် အရွက်များက ရူးသွပ်စွာ ကခုန်နေကြ၏။

ဤသည်ကား ကောင်းကင်တာအိုထံမှ ဆုလာဘ် ပြန်လည်ရရှိခြင်းပင် ဖြစ်ပေသည်။

…

ကောင်းကင်ကိုးထပ် မိုးကြိုးဂိုဏ်းမှ လူတိုင်းက အံ့အားသင့်စွာ ရေရွတ်လိုက်ကြလေသည်။

“ကောင်းကင်ဘုံ၊ ငါ ဘာကို မြင်နေရတာလဲ….။”

“ကောင်းကင်က သွန်းလုပ်ထားတဲ့ နတ်ဘုရားကလီစာပဲ။ ကောင်းကင်တာအိုရဲ့ ဆုလာဘ်က ထိတွေ့ ကိုင်တွယ်လို့ရတဲ့ အလင်းတန်းတစ်ခုအဖြစ် ပြောင်းလဲသွားတယ်၊ ဒါက ရှေးဟောင်းစာအုပ်တွေထဲမှာ တစ်ခါမှ မှတ်တမ်းမတင်ဖူးတဲ့ အရာပဲ….။”

“ဒီကလေးက တကယ်ကို ကောင်းကင်ကို အာခံနိုင်လွန်းတယ်…။”

ကျယ်ပြန့်သော သစ်တောပင်လယ်ကြီး အထက်တွင်၊ ကောင်းကင်ကိုးထပ် မိုးကြိုးဂိုဏ်းမှ လူတိုင်းမှာ ဤကြည်လင်သော အော်ဟစ်သံကြောင့် သူတို့၏ အဝတ်အစားများ လွင့်ပျံသွားကြလေသည်။

သို့ရာတွင် မည်သူကမျှ ၎င်းကို အာရုံမစိုက်နိုင်ကြချေ။ အဘယ်ကြောင့်ဆိုသော် သူတို့၏ မျက်နှာ များတွင် အံ့အားသင့်မှုများ ပြည့်နှက်နေသောကြောင့်ပင်တည်း။

ဟွာထျန်းကွမ်မှာ အသက်ရှူကြပ်နေပြီး၊ ကောင်းကင်နှင့် မြေကြီးကို ထိုးဖောက်လာသည့် ဆုလာဘ် နတ်ဘုရားအလင်းတန်းကို စိုက်ကြည့်ရင်း ဤမြင်ကွင်းကို မယုံကြည်ချင်သကဲ့သို့ ဖြစ်နေလေသည်။

ဘယ်လိုလုပ် ဒီလို ဖြစ်နိုင်မှာလဲဟု သူ တွေးတောမိ၏။ ဤလက်ရှိခေတ်တွင် နတ်ဘုရားကလီစာကို သွန်းလုပ်နိုင်ပြီး ထိတွေ့ကိုင်တွယ်၍ရသော ကောင်းကင်တာအို နတ်ဘုရားအလင်းတန်းကိုပင် အစပျိုး နိုင်သူ အမှန်တကယ် ရှိနေပါသလား။ ဤကဲ့သို့သော ထူးဆန်းသည့် ဖြစ်စဉ်မျိုးက မူလဘူတခေတ်တွင် ပင် ရှားပါးလှပေသည်။

တစ်ခဏချင်းမှာပင် ဟွာထျန်းကွမ်က သူ၏ လက်ဖျားခြေဖျားများ အေးစက်သွားသည်ကို ခံစားလိုက် ရပြီး၊ သူ၏ အထွတ်အထိပ်အခြေခံအုတ်မြစ်က တစ်ဖက်လူ၏ အထွတ်အထိပ်အခြေခံအုတ်မြစ်နှင့် ထိပ်တိုက်တွေ့ပါက မည်သည့် အောင်မြင်မှု အခွင့်အရေးမျိုး ရှိနိုင်မည်နည်းဟု တွေးတောမိတော့၏။

ဤဘဝတွင် တာအိုအတွက် ရုန်းကန်မှုက ခက်ခဲတော့မည် ဖြစ်လေသည်။

…

ထိတွေ့ကိုင်တွယ်၍ရသော ဤကောင်းကင်တာအို ဆုလာဘ် အလင်းတန်းက ကောင်းကင်နှင့် မြေကြီးကို ထိုးဖောက်သွားစဉ်။

ကမ္ဘာကြီးတစ်ခုလုံး တုန်လှုပ်သွားလေသည်။ ဤအချိန်တွင် တောင်ပိုင်းအထွတ်အထိပ် အသင်္ချေ နယ်မြေများ၌။ တောင်တန်းပေါင်း သန်းထောင်ချီ၏ နက်ရှိုင်းသောနေရာတွင်။

သူ၏ အသားအရေပေါ်တွင် ထူးဆန်းသော စာလုံးများ ရေးဆွဲထားသည့် ထူးဆန်းသော တာအိုဝတ်စုံကို ဝတ်ဆင်ထားသော အဘိုးအိုတစ်ဦးက ကလေးငယ်တစ်ဦး၏ လက်ကိုကိုင်ကာ ဤဘက်သို့ အံ့အား သင့်စွာ ကြည့်နေလေသည်။ အဘိုးအိုက ပြောလိုက်၏။

“ကောင်းကင်တာအို ဆုလာဘ်ရဲ့ အလင်းတန်းက ထိတွေ့ကိုင်တွယ်လို့ရတဲ့ အရာတစ်ခုအဖြစ် ပြောင်းလဲသွားပြီ။ ဒါက အသားကို အာဟာရဖြည့်ဖို့ နတ်ဆေးလုံးတွေကို အသုံးပြုပြီး နတ်ဘုရားအရိုး နဲ့ နတ်ဘုရားကလီစာကို သွန်းလုပ်ထားတဲ့ ရုပ်ခန္ဓာကိုယ်သန့်စင်ခြင်း အဆင့်က ကျင့်ကြံသူတစ်ယောက် ကပဲ အစပျိုးနိုင်တဲ့ ဖြစ်စဉ်တစ်ခုပဲ…။”

“ဒီခေတ်မှာ ဒီလို ပါရမီမျိုးကို ပိုင်ဆိုင်ထားတဲ့လူ တကယ်ရှိနေလိမ့်မယ်လို့ ငါ တစ်ခါမှ မတွေးဖူးခဲ့ ဘူး…။”

အဘိုးအို၏ မျက်လုံးများက ထူးဆန်းသော ရွှေရောင်အလင်းတန်းများဖြင့် တောက်ပနေပြီး၊ ၎င်းတို့က အရာအားလုံးကို ထိုးဖောက်မြင်နိုင်သော အရောင်မတူသည့် သူငယ်အိမ် အမျိုးအစားတစ်ခုနှင့် တူလေ သည်။ ထိုက်ရီအစစ်အမှန်ဂိုဏ်းတွင် ဖြစ်ပျက်နေသည်များကို သူ ရှင်းလင်းစွာ မြင်တွေ့နေရ၏။

သူ၏ဘေးရှိ ကလေးငယ်က ဤကိုယ်တိုင်ပြောစကားများကို ကြားသောအခါ၊ အသိပညာကို ဆာလောင်မွတ်သိပ်မှုဖြင့် ချက်ချင်း ခေါင်းမော့ကာ မေးလိုက်လေသည်။

“ဘိုးဘိုးမဟာနတ်ဆရာ၊ ဘာဖြစ်လို့ ရုပ်ခန္ဓာကိုယ်သန့်စင်ခြင်း အဆင့်ကို မဟာနယ်ပယ်တစ်ခုလို့ ခေါ်တာလဲ….။”

သူတို့ မြေးအဘိုးနှစ်ဦးမှာ တောင်ပိုင်းအထွတ်အထိပ် အသင်္ချေနယ်မြေများ၏ ထိပ်တန်းအင်အားစု ဖြစ်သော ဘိုးဘေးဝိညာဉ် မြင့်မြတ်သောဂိုဏ်းမှ လာကြခြင်း ဖြစ်လေသည်။ တောင်ပိုင်းနယ်မြေက အခြားဒေသများနှင့် ကွဲပြား၏။ ဤနေရာရှိ တောင်တန်းများနှင့် တောင်ကြားများက လူသားမျိုးနွယ်ကို မတူညီသော ယဉ်ကျေးမှုများ မွေးဖွားလာစေရန် ခွင့်ပြုပေးခဲ့လေသည်။

ထို့အပြင် အင်အားစုများမှာ အများအားဖြင့် မြင့်မြတ်သော ဂိုဏ်းများအဖြစ် ဖွဲ့စည်းတည်ဆောက်ထား ကြ၏။ ၎င်းတို့အနက် ဤဘိုးဘေးဝိညာဉ် မြင့်မြတ်သောဂိုဏ်းမှာ ဤဒေသရှိ ထိပ်တန်းအင်အားစု ဖြစ်လေသည်။ မဟာနတ်ဆရာမှာ ဂိုဏ်းတစ်ခုရှိ မဟာအကြီးအကဲနှင့် တူညီသော ဂိုဏ်း၏ မဏ္ဍိုင် ဖြစ်ပေသည်။

မဟာနတ်ဆရာက ကလေး၏ မေးခွန်းကို ကြားသောအခါ၊ သူ၏ မုတ်ဆိတ်ကို သပ်ကာ စိတ်ရှည် လက်ရှည် ရှင်းပြလိုက်လေသည်။

“ရုပ်ခန္ဓာကိုယ်သန့်စင်ခြင်း မဟာနယ်ပယ်ဆိုတာ မူလဘူတခေတ်က နာမည်တစ်ခုပဲ…။”

“ဘာလို့လဲဆိုတော့ အဲဒီခေတ်မတိုင်ခင်က ရုပ်ခန္ဓာကိုယ်သန့်စင်ခြင်း အဆင့်ဆိုတာ တကယ်တော့ မရှိခဲ့ဘူးလေ….။”

“အဲဒီအချိန်တုန်းက လူသားမျိုးနွယ်က ရုပ်ခန္ဓာကိုယ် ကျင့်ကြံခြင်းကို အရေပြားသန့်စင်ခြင်း၊ အရွတ် သန့်စင်ခြင်း၊ အသားသန့်စင်ခြင်း၊ သွေးသန့်စင်ခြင်း၊ အရိုးသန့်စင်ခြင်းနဲ့ ကလီစာသန့်စင်ခြင်း စတဲ့ နယ်ပယ်များစွာအဖြစ် ခွဲခြားထားခဲ့တယ်….။”

“နယ်ပယ်တစ်ခုစီက ခန္ဓာကိုယ်ရဲ့ အစိတ်အပိုင်းတစ်ခုစီနဲ့ ကိုက်ညီပြီး၊ အားလုံးကို ကျင့်ကြံပြီးမှသာ အရည်အချင်းပြည့်မီတဲ့ ရုပ်ခန္ဓာကိုယ်တစ်ခုကို တကယ်ပဲ တည်ဆောက်ပြီးပြီလို့ ယူဆလို့ရတာ…။”

“အဲဒီအချိန်တုန်းက လူသားမျိုးနွယ်ရဲ့ ရုပ်ခန္ဓာကိုယ်သန့်စင်ခြင်း နည်းစနစ်တွေက ကောင်းကင်ယံက ကြယ်တွေလိုပဲ မရေမတွက်နိုင်အောင် များပြားပြီး နှိုင်းယှဉ်လို့မရအောင် ထူးချွန်ကြတယ်။ နတ်ဆေး လုံး အမျိုးမျိုးနဲ့ အံ့ဩစရာကောင်းတဲ့ နည်းလမ်းတွေက တစ်ခုပြီးတစ်ခု ပေါ်ထွက်လာပြီး၊ အထွတ်အ ထိပ်အခြေခံအုတ်မြစ်တွေက မကြာခဏ ပေါ်လာခဲ့ကြတယ်…။”

“ကံမကောင်းစွာနဲ့ပဲ မူလဘူတခေတ်ကို ရောက်တဲ့အချိန်မှာ၊ ကောင်းကင်နဲ့ မြေကြီးရဲ့ ဥပဒေသတွေက ပြောင်းလဲသွားပြီး၊ ဒီကျင့်ကြံခြင်း နည်းစနစ်အစုအဝေးက လူတိုင်းအတွက် မသင့်လျော်တော့ဘူး…။”

“ဒါကြောင့် လိုက်လျောညီထွေဖြစ်အောင် နေထိုင်ရတဲ့ ကာလတစ်ခုအပြီးမှာ၊ အရေပြားသန့်စင်ခြင်းနဲ့ အရွတ်သန့်စင်ခြင်းလို နယ်ပယ်တွေက ပျောက်ကွယ်သွားပြီး ရုပ်ခန္ဓာကိုယ်သန့်စင်ခြင်း မဟာနယ် ပယ်လို့ စုပေါင်းခေါ်ဝေါ်ခဲ့ကြတယ်….။”

“ရုပ်ခန္ဓာကိုယ်သန့်စင်ခြင်း မဟာနယ်ပယ်မှာ သာမန်လူတွေက ပုံမှန်အတိုင်းပဲ ကျင့်ကြံကြပြီး၊ သူတို့ရဲ့ အထွေထွေ ရုပ်ပိုင်းဆိုင်ရာ ခွန်အားကိုပဲ တိုးမြှင့်နိုင်ကြကာ အလားအလာ သိပ်မရှိကြဘူး…။”

“ဒါပေမယ့် ပါရမီရှင် အနည်းငယ်က ရုပ်ခန္ဓာကိုယ်သန့်စင်ခြင်း နည်းစနစ်တွေကို အသုံးပြုပြီး အလွှာ တစ်ခုစီရဲ့ကြားမှာ အရေပြား၊ အရွတ်၊ အသားနဲ့ သွေး စတဲ့ အရင်အစိတ်အပိုင်းတွေရဲ့ ကျင့်ကြံမှုကို ကြားညှပ်ထည့်ကြတယ်…။”

“ဒီအစဉ်အလာက ယနေ့ခေတ်အထိ လက်ဆင့်ကမ်းလာခဲ့တာပဲ…။”

“အဓိက အင်အားစုတွေရဲ့ တိုက်ရိုက်တပည့်တွေက အမည်ခံအားဖြင့်တော့ ရုပ်ခန္ဓာကိုယ်သန့်စင်ခြင်း အဆင့်က ကျင့်ကြံသူတွေ ဖြစ်ကြပေမယ့်၊ တကယ်တမ်းမှာတော့ သမားရိုးကျ ရုပ်ခန္ဓာကိုယ်သန့်စင် ခြင်း အဆင့်က ကျင့်ကြံသူတွေနဲ့ လုံးဝ ကွဲပြားတယ်…။”

“ဘာလို့လဲဆိုတော့ သူတို့ အသုံးပြုတာက ရှေးဟောင်း ကျင့်ကြံခြင်း နည်းစနစ်တွေ ဖြစ်နေလို့ပဲ….။ “

“ဒါပေမယ့် သူတို့က အဲဒါတွေကို အသုံးပြုတယ်ဆိုပေမယ့်လည်း၊ မူလဘူတခေတ်မတိုင်ခင်က အဲဒီ ပါရမီရှင်တွေရဲ့ အမူအရာကို တကယ်ပဲ ပြန်လည် ဖန်တီးနိုင်သူ အလွန်နည်းပါးတယ်…။”

“ဒီနေ့မှာတော့ နောက်ဆုံးမှာ တစ်ယောက် ပေါ်လာခဲ့ပြီ….။”

အဘိုးအို၏ ရှင်းပြချက်ကို နားထောင်ရင်း ကလေးက ရုတ်တရက် သဘောပေါက်သွားသကဲ့သို့ ခေါင်းညိတ်လိုက်လေသည်။ ရှေးဟောင်းခေတ်က ဤမျှလောက်အထိ ဘုန်းကျက်သရေရှိလိမ့်မည်ဟု သူ မမျှော်လင့်ထားခဲ့ချေ။

ယခု ရုပ်ခန္ဓာကိုယ်သန့်စင်ခြင်း အဆင့်မှာ ရိုးရှင်းသော ဗားရှင်းတစ်ခုမျှသာ ဖြစ်လေသည်။ အတိတ်က မူ ဤနယ်ပယ်တွင် အဓိက နယ်ပယ်များစွာ၏ ကျင့်ကြံခြင်းများ ပါဝင်နေခဲ့၏။

မဟာနတ်ဆရာက စကားပြောပြီးနောက် လေးနက်စွာ တိုက်တွန်းလိုက်လေသည်။

“အာမန်လေး၊ မင်းက တောင်တန်းပေါင်း အသင်္ချေရဲ့ ဘိုးဘေးသွေး ရုပ်ခန္ဓာကိုယ်ဖြစ်ပြီး ဒီကမ္ဘာကြီးရဲ့ ဇာတ်လိုက်ဖြစ်လာသင့်ပေမယ့်၊ အလယ်ပိုင်းပြည်နယ်မှာ ပါရမီရှင်တစ်ယောက် ပေါ်လာလိမ့်မယ်လို့ ငါ မမျှော်လင့်ထားခဲ့ဘူး…။”

“ဒါက တကယ်ကို အချိန်နဲ့ ကံကြမ္မာရဲ့ ကိစ္စတစ်ခုပါပဲ၊ သူ ရှိနေရင် တာအိုကို သက်သေပြဖို့ဆိုတာ မဖြစ်နိုင်သလောက်ပဲ…။”

“ဒါကြောင့် အနာဂတ်မှာ မင်း ဒီလူနဲ့ ဆုံခဲ့ရင်၊ သူ့ကို ဘယ်တော့မှ ထိပ်တိုက်မရင်ဆိုင်ရဘူး။ မင်း သတိ ထားပြီး ဆင်ခြင်ရမယ်၊ ဒါမှမဟုတ် ရိုးရိုးရှင်းရှင်းပဲ သူ့ကို မင်းရဲ့ အစ်ကိုကြီးအဖြစ် အသိအမှတ် ပြုလိုက်ပါ…။”

“သူ လက်မခံရင်တောင် မင်း အတင်းပြောရမယ်။ မင်း ဒူးထောက်ပြီး အရိုအသေပေးရရင်တောင်မှ ပဲ…။”

“ဒီလို ပါရမီရှင်မျိုးနဲ့ ပေါင်းသင်းခြင်းအားဖြင့် မင်းလည်း အောင်မြင်မှု ရနိုင်သလို၊ သူ့ပတ်ဝန်းကျင်က လူတွေတောင် ကောင်းကင်ဘုံကို တက်လှမ်းနိုင်တယ်ဆိုတာ မင်း သိထားရမယ်…။”

၎င်းကိုကြားသောအခါ ကလေး၏ ရိုးသားသော မျက်နှာပေါ်တွင် နာခံမှု အရိပ်အယောင်တစ်ခု ပေါ်လာ ပြီး သူက ဆက်တိုက် ခေါင်းညိတ်ပြလိုက်လေသည်။

“ဘိုးဘိုးမဟာနတ်ဆရာ ပြောတာ အကုန်လုံးကို ကျွန်တော် နားထောင်ပါ့မယ်….။”